| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৩. পচ্চাগমনিযত্থেরঅপদানৰণ্ণনা
3. Paccāgamaniyattheraapadānavaṇṇanā
সিন্ধুযা নদিযা তীরেতিআদিকং আযস্মতো পচ্চাগমনিযত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে সিন্ধুযা গঙ্গায সমীপে চক্কৰাকযোনিযং নিব্বত্তো পুব্বসম্ভারযুত্তত্তা পাণিনো অখাদন্তো সেৰালমেৰ ভক্খযন্তো চরতি। তস্মিং সমযে ৰিপস্সিভগৰা সত্তানুগ্গহং করোন্তো তত্থ অগমাসি। তস্মিং খণে সো চক্কৰাকো ৰিজ্জোতমানং ভগৰন্তং দিস্ৰা পসন্নমানসো তুণ্ডেন সালরুক্খতো সালপুপ্ফং ছিন্দিত্ৰা আগম্ম পূজেসি। সো তেনেৰ চিত্তপ্পসাদেন ততো চুতো দেৰলোকে উপ্পন্নো অপরাপরং ছকামাৰচরসম্পত্তিং অনুভৰিত্ৰা ততো চুতো মনুস্সলোকে উপ্পজ্জিত্ৰা চক্কৰত্তিসম্পত্তিআদযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্তো পুব্বচরিতৰসেন সত্থরি পসন্নো পব্বজিত্ৰা নচিরস্সেৰ অরহা অহোসি, চক্কৰাকো হুত্ৰা ভগৰন্তং দিস্ৰা কত্থচি গন্ত্ৰা পুপ্ফমাহরিত্ৰা পূজিতত্তা পুব্বপুঞ্ঞনামেন পচ্চাগমনিযত্থেরোতি পাকটো।
Sindhuyā nadiyā tīretiādikaṃ āyasmato paccāgamaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle sindhuyā gaṅgāya samīpe cakkavākayoniyaṃ nibbatto pubbasambhārayuttattā pāṇino akhādanto sevālameva bhakkhayanto carati. Tasmiṃ samaye vipassibhagavā sattānuggahaṃ karonto tattha agamāsi. Tasmiṃ khaṇe so cakkavāko vijjotamānaṃ bhagavantaṃ disvā pasannamānaso tuṇḍena sālarukkhato sālapupphaṃ chinditvā āgamma pūjesi. So teneva cittappasādena tato cuto devaloke uppanno aparāparaṃ chakāmāvacarasampattiṃ anubhavitvā tato cuto manussaloke uppajjitvā cakkavattisampattiādayo anubhavitvā imasmiṃ buddhuppāde ekasmiṃ kulagehe nibbatto viññutaṃ patto pubbacaritavasena satthari pasanno pabbajitvā nacirasseva arahā ahosi, cakkavāko hutvā bhagavantaṃ disvā katthaci gantvā pupphamāharitvā pūjitattā pubbapuññanāmena paccāgamaniyattheroti pākaṭo.
১৩. অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সিন্ধুযা নদিযা তীরেতিআদিমাহ। সীতি সদ্দং কুরুমানা ধুনাতি কম্পতীতি সিন্ধু, নদতি সদ্দং করোন্তো গচ্ছতীতি নদি। চক্কৰাকো অহং তদাতি চক্কং সীঘং গচ্ছন্তং ইৰ উদকে ৰা থলে ৰা আকাসে ৰা সীঘং ৰাতি গচ্ছতীতি চক্কৰাকো। তদা ৰিপস্সিং ভগৰন্তং দস্সনকালে অহং চক্কৰাকো অহোসিন্তি অত্থো। সুদ্ধসেৰালভক্খোহন্তি অঞ্ঞগোচরঅমিস্সত্তা সুদ্ধসেৰালমেৰ খাদন্তো অহং ৰসামি। পাপেসু চ সুসঞ্ঞতোতি পুব্বৰাসনাৰসেন পাপকরণে সুট্ঠু সঞ্ঞতো তীহি দ্ৰারেহি সঞ্ঞতো সুসিক্খিতো।
13. Attano pubbakammaṃ saritvā somanassajāto pubbacaritāpadānaṃ pakāsento sindhuyā nadiyā tīretiādimāha. Sīti saddaṃ kurumānā dhunāti kampatīti sindhu, nadati saddaṃ karonto gacchatīti nadi. Cakkavāko ahaṃ tadāti cakkaṃ sīghaṃ gacchantaṃ iva udake vā thale vā ākāse vā sīghaṃ vāti gacchatīti cakkavāko. Tadā vipassiṃ bhagavantaṃ dassanakāle ahaṃ cakkavāko ahosinti attho. Suddhasevālabhakkhohanti aññagocaraamissattā suddhasevālameva khādanto ahaṃ vasāmi. Pāpesu ca susaññatoti pubbavāsanāvasena pāpakaraṇe suṭṭhu saññato tīhi dvārehi saññato susikkhito.
১৪. অদ্দসং ৰিরজং বুদ্ধন্তি রাগদোসমোহৰিরহিতত্তা ৰিরজং নিক্কিলেসং বুদ্ধং অদ্দসং অদ্দক্খিং। গচ্ছন্তং অনিলঞ্জসেতি অনিলঞ্জসে আকাসপথে গচ্ছন্তং বুদ্ধং। তুণ্ডেন ময্হং মুখতুণ্ডেন তালং সালপুপ্ফং পগ্গয্হ পগ্গহেত্ৰা ৰিপস্সিস্সাভিরোপযিং ৰিপস্সিস্স ভগৰতো পূজেসিন্তি অত্থো। সেসং সুৰিঞ্ঞেয্যমেৰাতি।
14.Addasaṃvirajaṃ buddhanti rāgadosamohavirahitattā virajaṃ nikkilesaṃ buddhaṃ addasaṃ addakkhiṃ. Gacchantaṃ anilañjaseti anilañjase ākāsapathe gacchantaṃ buddhaṃ. Tuṇḍena mayhaṃ mukhatuṇḍena tālaṃ sālapupphaṃ paggayha paggahetvā vipassissābhiropayiṃ vipassissa bhagavato pūjesinti attho. Sesaṃ suviññeyyamevāti.
পচ্চাগমনিযত্থেরঅপদানৰণ্ণনা সমত্তা।
Paccāgamaniyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৩. পচ্চাগমনিযত্থেরঅপদানং • 3. Paccāgamaniyattheraapadānaṃ
