| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
3. පච්‌චාගමනියත්‌ථෙරඅපදානවණ්‌ණනා
3. Paccāgamaniyattheraapadānavaṇṇanā
සින්‌ධුයා නදියා තීරෙතිආදිකං ආයස්‌මතො පච්‌චාගමනියත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ සින්‌ධුයා ගඞ්‌ගාය සමීපෙ චක්‌කවාකයොනියං නිබ්‌බත්‌තො පුබ්‌බසම්‌භාරයුත්‌තත්‌තා පාණිනො අඛාදන්‌තො සෙවාලමෙව භක්‌ඛයන්‌තො චරති. තස්‌මිං සමයෙ විපස්‌සිභගවා සත්‌තානුග්‌ගහං කරොන්‌තො තත්‌ථ අගමාසි. තස්‌මිං ඛණෙ සො චක්‌කවාකො විජ්‌ජොතමානං භගවන්‌තං දිස්‌වා පසන්‌නමානසො තුණ්‌ඩෙන සාලරුක්‌ඛතො සාලපුප්‌ඵං ඡින්‌දිත්‌වා ආගම්‌ම පූජෙසි. සො තෙනෙව චිත්‌තප්‌පසාදෙන තතො චුතො දෙවලොකෙ උප්‌පන්‌නො අපරාපරං ඡකාමාවචරසම්‌පත්‌තිං අනුභවිත්‌වා තතො චුතො මනුස්‌සලොකෙ උප්‌පජ්‌ජිත්‌වා චක්‌කවත්‌තිසම්‌පත්‌තිආදයො අනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌තො පුබ්‌බචරිතවසෙන සත්‌ථරි පසන්‌නො පබ්‌බජිත්‌වා නචිරස්‌සෙව අරහා අහොසි, චක්‌කවාකො හුත්‌වා භගවන්‌තං දිස්‌වා කත්‌ථචි ගන්‌ත්‌වා පුප්‌ඵමාහරිත්‌වා පූජිතත්‌තා පුබ්‌බපුඤ්‌ඤනාමෙන පච්‌චාගමනියත්‌ථෙරොති පාකටො.
Sindhuyā nadiyā tīretiādikaṃ āyasmato paccāgamaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle sindhuyā gaṅgāya samīpe cakkavākayoniyaṃ nibbatto pubbasambhārayuttattā pāṇino akhādanto sevālameva bhakkhayanto carati. Tasmiṃ samaye vipassibhagavā sattānuggahaṃ karonto tattha agamāsi. Tasmiṃ khaṇe so cakkavāko vijjotamānaṃ bhagavantaṃ disvā pasannamānaso tuṇḍena sālarukkhato sālapupphaṃ chinditvā āgamma pūjesi. So teneva cittappasādena tato cuto devaloke uppanno aparāparaṃ chakāmāvacarasampattiṃ anubhavitvā tato cuto manussaloke uppajjitvā cakkavattisampattiādayo anubhavitvā imasmiṃ buddhuppāde ekasmiṃ kulagehe nibbatto viññutaṃ patto pubbacaritavasena satthari pasanno pabbajitvā nacirasseva arahā ahosi, cakkavāko hutvā bhagavantaṃ disvā katthaci gantvā pupphamāharitvā pūjitattā pubbapuññanāmena paccāgamaniyattheroti pākaṭo.
13. අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො සින්‌ධුයා නදියා තීරෙතිආදිමාහ. සීති සද්‌දං කුරුමානා ධුනාති කම්‌පතීති සින්‌ධු, නදති සද්‌දං කරොන්‌තො ගච්‌ඡතීති නදි. චක්‌කවාකො අහං තදාති චක්‌කං සීඝං ගච්‌ඡන්‌තං ඉව උදකෙ වා ථලෙ වා ආකාසෙ වා සීඝං වාති ගච්‌ඡතීති චක්‌කවාකො. තදා විපස්‌සිං භගවන්‌තං දස්‌සනකාලෙ අහං චක්‌කවාකො අහොසින්‌ති අත්‌ථො. සුද්‌ධසෙවාලභක්‌ඛොහන්‌ති අඤ්‌ඤගොචරඅමිස්‌සත්‌තා සුද්‌ධසෙවාලමෙව ඛාදන්‌තො අහං වසාමි. පාපෙසු ච සුසඤ්‌ඤතොති පුබ්‌බවාසනාවසෙන පාපකරණෙ සුට්‌ඨු සඤ්‌ඤතො තීහි ද්‌වාරෙහි සඤ්‌ඤතො සුසික්‌ඛිතො.
13. Attano pubbakammaṃ saritvā somanassajāto pubbacaritāpadānaṃ pakāsento sindhuyā nadiyā tīretiādimāha. Sīti saddaṃ kurumānā dhunāti kampatīti sindhu, nadati saddaṃ karonto gacchatīti nadi. Cakkavāko ahaṃ tadāti cakkaṃ sīghaṃ gacchantaṃ iva udake vā thale vā ākāse vā sīghaṃ vāti gacchatīti cakkavāko. Tadā vipassiṃ bhagavantaṃ dassanakāle ahaṃ cakkavāko ahosinti attho. Suddhasevālabhakkhohanti aññagocaraamissattā suddhasevālameva khādanto ahaṃ vasāmi. Pāpesu ca susaññatoti pubbavāsanāvasena pāpakaraṇe suṭṭhu saññato tīhi dvārehi saññato susikkhito.
14. අද්‌දසං විරජං බුද්‌ධන්‌ති රාගදොසමොහවිරහිතත්‌තා විරජං නික්‌කිලෙසං බුද්‌ධං අද්‌දසං අද්‌දක්‌ඛිං. ගච්‌ඡන්‌තං අනිලඤ්‌ජසෙති අනිලඤ්‌ජසෙ ආකාසපථෙ ගච්‌ඡන්‌තං බුද්‌ධං. තුණ්‌ඩෙන මය්‌හං මුඛතුණ්‌ඩෙන තාලං සාලපුප්‌ඵං පග්‌ගය්‌හ පග්‌ගහෙත්‌වා විපස්‌සිස්‌සාභිරොපයිං විපස්‌සිස්‌ස භගවතො පූජෙසින්‌ති අත්‌ථො. සෙසං සුවිඤ්‌ඤෙය්‍යමෙවාති.
14.Addasaṃvirajaṃ buddhanti rāgadosamohavirahitattā virajaṃ nikkilesaṃ buddhaṃ addasaṃ addakkhiṃ. Gacchantaṃ anilañjaseti anilañjase ākāsapathe gacchantaṃ buddhaṃ. Tuṇḍena mayhaṃ mukhatuṇḍena tālaṃ sālapupphaṃ paggayha paggahetvā vipassissābhiropayiṃ vipassissa bhagavato pūjesinti attho. Sesaṃ suviññeyyamevāti.
පච්‌චාගමනියත්‌ථෙරඅපදානවණ්‌ණනා සමත්‌තා.
Paccāgamaniyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 3. පච්‌චාගමනියත්‌ථෙරඅපදානං • 3. Paccāgamaniyattheraapadānaṃ
