| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৭-১২. পচ্চনীযপট্ঠানৰণ্ণনা
7-12. Paccanīyapaṭṭhānavaṇṇanā
১. ইদানি কুসলাদীনং পদানং পটিক্খেপৰসেন ধম্মানং পচ্চনীযতায লদ্ধনামং পচ্চনীযপট্ঠানং দস্সেতুং নকুসলং ধম্মং পটিচ্চ নকুসলো ধম্মো উপ্পজ্জতি হেতুপচ্চযাতিআদি আরদ্ধং। তত্থ নকুসলং ধম্মং পটিচ্চাতি কুসলস্স পচ্চযভাৰং ৰারেতি। নকুসলো ধম্মো উপ্পজ্জতীতি কুসলস্স উপ্পত্তিং ৰারেতি, তস্মা ‘‘অকুসলাব্যাকতং একং খন্ধং পটিচ্চ অকুসলাব্যাকতা তযো খন্ধা চিত্তসমুট্ঠানঞ্চ রূপ’’ন্তি এৰমাদিনা নযেনেত্থ পঞ্হং ৰিস্সজ্জিতব্বং। তস্মিং তস্মিং পচ্চযে লদ্ধগণনা পন পাল়িযং ৰুত্তাযেৰ। যেপি ৰারা সদিসৰিস্সজ্জনা, তেপি তত্থেৰ দস্সিতা। তস্মা সব্বমেত্থ হেট্ঠা ৰুত্তনযানুসারেন পাল়িং উপপরিক্খিত্ৰা ৰেদিতব্বং। যথা চেত্থ, এৰং দুকপট্ঠানে, দুকতিকপট্ঠানে, তিকদুকপট্ঠানে তিকতিকপট্ঠানে, দুকদুকপট্ঠানে চ।
1. Idāni kusalādīnaṃ padānaṃ paṭikkhepavasena dhammānaṃ paccanīyatāya laddhanāmaṃ paccanīyapaṭṭhānaṃ dassetuṃ nakusalaṃ dhammaṃ paṭicca nakusalo dhammo uppajjati hetupaccayātiādi āraddhaṃ. Tattha nakusalaṃ dhammaṃ paṭiccāti kusalassa paccayabhāvaṃ vāreti. Nakusalo dhammo uppajjatīti kusalassa uppattiṃ vāreti, tasmā ‘‘akusalābyākataṃ ekaṃ khandhaṃ paṭicca akusalābyākatā tayo khandhā cittasamuṭṭhānañca rūpa’’nti evamādinā nayenettha pañhaṃ vissajjitabbaṃ. Tasmiṃ tasmiṃ paccaye laddhagaṇanā pana pāḷiyaṃ vuttāyeva. Yepi vārā sadisavissajjanā, tepi tattheva dassitā. Tasmā sabbamettha heṭṭhā vuttanayānusārena pāḷiṃ upaparikkhitvā veditabbaṃ. Yathā cettha, evaṃ dukapaṭṭhāne, dukatikapaṭṭhāne, tikadukapaṭṭhāne tikatikapaṭṭhāne, dukadukapaṭṭhāne ca.
এত্তাৰতা –
Ettāvatā –
তিকঞ্চ পট্ঠানৰরং দুকুত্তমং,
Tikañca paṭṭhānavaraṃ dukuttamaṃ,
দুকং তিকঞ্চেৰ তিকং দুকঞ্চ।
Dukaṃ tikañceva tikaṃ dukañca;
তিকং তিকঞ্চেৰ, দুকং দুকঞ্চ,
Tikaṃ tikañceva, dukaṃ dukañca,
ছ পচ্চনীযম্হি নযা সুগম্ভীরাতি॥ –
Cha paccanīyamhi nayā sugambhīrāti. –
অট্ঠকথাযং ৰুত্তগাথায দীপিতা। ধম্মপচ্চনীযপট্ঠানে ছ নযা নিদ্দিট্ঠা হোন্তি। পচ্চযৰসেন পনেত্থ একেকস্মিং পট্ঠানে অনুলোমাদযো চত্তারো চত্তারো নযাতি একেন পরিযাযেন চতুৰীসতিনযপটিমণ্ডিতং পচ্চনীযপট্ঠানঞ্ঞেৰ ৰেদিতব্বং।
Aṭṭhakathāyaṃ vuttagāthāya dīpitā. Dhammapaccanīyapaṭṭhāne cha nayā niddiṭṭhā honti. Paccayavasena panettha ekekasmiṃ paṭṭhāne anulomādayo cattāro cattāro nayāti ekena pariyāyena catuvīsatinayapaṭimaṇḍitaṃ paccanīyapaṭṭhānaññeva veditabbaṃ.
পচ্চনীযপট্ঠানৰণ্ণনা।
Paccanīyapaṭṭhānavaṇṇanā.
