| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
১৪. পচ্চৰেক্খণঞাণনিদ্দেসৰণ্ণনা
14. Paccavekkhaṇañāṇaniddesavaṇṇanā
৬৫. পচ্চৰেক্খণঞাণনিদ্দেসে মগ্গক্খণেযেৰ হেতুট্ঠেন পঠমং মগ্গঙ্গানি ৰিসুং ৰিসুং ৰত্ৰা পুন মগ্গঙ্গভূতে চ অমগ্গঙ্গভূতে চ ধম্মে ‘‘বুজ্ঝনট্ঠেন বোধী’’তি লদ্ধনামস্স অরিযস্স অঙ্গভাৰেন বোজ্ঝঙ্গে ৰিসুং দস্সেসি। সতিধম্মৰিচযৰীরিযসমাধিসম্বোজ্ঝঙ্গা হি মগ্গঙ্গানেৰ, পীতিপস্সদ্ধিউপেক্খাসম্বোজ্ঝঙ্গা অমগ্গঙ্গানি। পুন বলৰসেন ইন্দ্রিযৰসেন চ ৰিসুং নিদ্দিট্ঠেসু সদ্ধা এৰ অমগ্গঙ্গভূতা। পুন মগ্গক্খণে জাতেযেৰ ধম্মে রাসিৰসেন দস্সেন্তো আধিপতেয্যট্ঠেনাতিআদিমাহ। তত্থ উপট্ঠানট্ঠেন সতিপট্ঠানাতি একাৰ নিব্বানারম্মণা সতি কাযৰেদনাচিত্তধম্মেসু সুভসুখনিচ্চঅত্তসঞ্ঞাপহানকিচ্চসাধনৰসেন চত্তারো সতিপট্ঠানা নাম। নিব্বানারম্মণং একমেৰ ৰীরিযং উপ্পন্নানুপ্পন্নানং অকুসলানং পহানানুপ্পত্তিকিচ্চস্স, অনুপ্পন্নুপ্পন্নানং কুসলানং উপ্পাদট্ঠিতিকিচ্চস্স সাধনৰসেন চত্তারো সম্মপ্পধানা নাম।
65. Paccavekkhaṇañāṇaniddese maggakkhaṇeyeva hetuṭṭhena paṭhamaṃ maggaṅgāni visuṃ visuṃ vatvā puna maggaṅgabhūte ca amaggaṅgabhūte ca dhamme ‘‘bujjhanaṭṭhena bodhī’’ti laddhanāmassa ariyassa aṅgabhāvena bojjhaṅge visuṃ dassesi. Satidhammavicayavīriyasamādhisambojjhaṅgā hi maggaṅgāneva, pītipassaddhiupekkhāsambojjhaṅgā amaggaṅgāni. Puna balavasena indriyavasena ca visuṃ niddiṭṭhesu saddhā eva amaggaṅgabhūtā. Puna maggakkhaṇe jāteyeva dhamme rāsivasena dassento ādhipateyyaṭṭhenātiādimāha. Tattha upaṭṭhānaṭṭhena satipaṭṭhānāti ekāva nibbānārammaṇā sati kāyavedanācittadhammesu subhasukhaniccaattasaññāpahānakiccasādhanavasena cattāro satipaṭṭhānā nāma. Nibbānārammaṇaṃ ekameva vīriyaṃ uppannānuppannānaṃ akusalānaṃ pahānānuppattikiccassa, anuppannuppannānaṃ kusalānaṃ uppādaṭṭhitikiccassa sādhanavasena cattāro sammappadhānā nāma.
তথট্ঠেন সচ্চাতি দুক্খভাৰাদীসু অৰিসংৰাদকট্ঠেন চত্তারি অরিযসচ্চানি। এতানেৰ চেত্থ পটিৰেধট্ঠেন তদা সমুদাগতানি, ‘‘অমতোগধং নিব্বান’’ন্তি ৰিসুং ৰুত্তং নিব্বানঞ্চ, সেসা পন ধম্মা পটিলাভট্ঠেন তদা সমুদাগতা। ‘‘তথট্ঠেন সচ্চা তদা সমুদাগতা’’তি ৰচনতো মগ্গফলপরিযোসানে অৰস্সং চত্তারি সচ্চানি পচ্চৰেক্খতীতি নিট্ঠমেত্থ গন্তব্বং। ‘‘কতং করণীযং নাপরং ইত্থত্তাযাতি পজানাতী’’তি (দী॰ নি॰ ১.২৪৮) ৰচনতো চ ‘‘দুক্খং মে পরিঞ্ঞাতং, সমুদযো মে পহীনো, নিরোধো মে সচ্ছিকতো, মগ্গো চ মে ভাৰিতো’’তি পচ্চৰেক্খণং ৰুত্তমেৰ হোতি। তথা পচ্চৰেক্খণং যুজ্জতি চ। সমুদযোতি চেত্থ তংতংমগ্গৰজ্ঝোযেৰ ৰেদিতব্বো। এত্থ ৰুত্তসমুদযপচ্চৰেক্খণৰসেনেৰ অট্ঠকথাযং দুৰিধং কিলেসপচ্চৰেক্খণং মগ্গফলনিব্বানপচ্চৰেক্খণানি ইধ সরূপেনেৰ আগতানীতি ৰুত্তানি। কেৰলং দুক্খপচ্চৰেক্খণমেৰ ন ৰুত্তং। কিঞ্চাপি ন ৰুত্তং, অথ খো পাঠসব্ভাৰতো যুত্তিসব্ভাৰতো চ গহেতব্বমেৰ। সচ্চপটিৰেধত্থঞ্হি পটিপন্নস্স নিট্ঠিতে সচ্চপটিৰেধে সযং কতকিচ্চপচ্চৰেক্খণং যুত্তমেৰাতি। অৰিক্খেপট্ঠেন সমথোতিআদি মগ্গসম্পযুত্তে এৰ সমথৰিপস্সনাধম্মে একরসট্ঠেন অনতিৰত্তনট্ঠেন চ দস্সেতুং ৰুত্তং। সংৰরট্ঠেন সীলৰিসুদ্ধীতি সম্মাৰাচাকম্মন্তাজীৰা এৰ। অৰিক্খেপট্ঠেন চিত্তৰিসুদ্ধীতি সম্মাসমাধি এৰ। দস্সনট্ঠেন দিট্ঠিৰিসুদ্ধীতি সম্মাদিট্ঠিযেৰ। ৰিমুত্তট্ঠেনাতি সমুচ্ছেদৰসেন মগ্গৰজ্ঝকিলেসেহি মুচ্চনট্ঠেন, নিব্বানারম্মণে ৰা অধিমুচ্চনট্ঠেন। ৰিমোক্খোতি সমুচ্ছেদৰিমোক্খো, অরিযমগ্গোযেৰ। পটিৰেধট্ঠেন ৰিজ্জাতি সচ্চপটিৰেধট্ঠেন ৰিজ্জা, সম্মাদিট্ঠিযেৰ। পরিচ্চাগট্ঠেন ৰিমুত্তীতি মগ্গৰজ্ঝকিলেসানং পজহনট্ঠেন ততো মুচ্চনতো ৰিমুত্তি, অরিযমগ্গোযেৰ। সমুচ্ছেদট্ঠেন খযে ঞাণন্তি কিলেসসমুচ্ছিন্দনট্ঠেন কিলেসক্খযকরে অরিযমগ্গে ঞাণং, সম্মাদিট্ঠিযেৰ।
Tathaṭṭhena saccāti dukkhabhāvādīsu avisaṃvādakaṭṭhena cattāri ariyasaccāni. Etāneva cettha paṭivedhaṭṭhena tadā samudāgatāni, ‘‘amatogadhaṃ nibbāna’’nti visuṃ vuttaṃ nibbānañca, sesā pana dhammā paṭilābhaṭṭhena tadā samudāgatā. ‘‘Tathaṭṭhena saccā tadā samudāgatā’’ti vacanato maggaphalapariyosāne avassaṃ cattāri saccāni paccavekkhatīti niṭṭhamettha gantabbaṃ. ‘‘Kataṃ karaṇīyaṃ nāparaṃ itthattāyāti pajānātī’’ti (dī. ni. 1.248) vacanato ca ‘‘dukkhaṃ me pariññātaṃ, samudayo me pahīno, nirodho me sacchikato, maggo ca me bhāvito’’ti paccavekkhaṇaṃ vuttameva hoti. Tathā paccavekkhaṇaṃ yujjati ca. Samudayoti cettha taṃtaṃmaggavajjhoyeva veditabbo. Ettha vuttasamudayapaccavekkhaṇavaseneva aṭṭhakathāyaṃ duvidhaṃ kilesapaccavekkhaṇaṃ maggaphalanibbānapaccavekkhaṇāni idha sarūpeneva āgatānīti vuttāni. Kevalaṃ dukkhapaccavekkhaṇameva na vuttaṃ. Kiñcāpi na vuttaṃ, atha kho pāṭhasabbhāvato yuttisabbhāvato ca gahetabbameva. Saccapaṭivedhatthañhi paṭipannassa niṭṭhite saccapaṭivedhe sayaṃ katakiccapaccavekkhaṇaṃ yuttamevāti. Avikkhepaṭṭhena samathotiādi maggasampayutte eva samathavipassanādhamme ekarasaṭṭhena anativattanaṭṭhena ca dassetuṃ vuttaṃ. Saṃvaraṭṭhena sīlavisuddhīti sammāvācākammantājīvā eva. Avikkhepaṭṭhena cittavisuddhīti sammāsamādhi eva. Dassanaṭṭhena diṭṭhivisuddhīti sammādiṭṭhiyeva. Vimuttaṭṭhenāti samucchedavasena maggavajjhakilesehi muccanaṭṭhena, nibbānārammaṇe vā adhimuccanaṭṭhena. Vimokkhoti samucchedavimokkho, ariyamaggoyeva. Paṭivedhaṭṭhena vijjāti saccapaṭivedhaṭṭhena vijjā, sammādiṭṭhiyeva. Pariccāgaṭṭhena vimuttīti maggavajjhakilesānaṃ pajahanaṭṭhena tato muccanato vimutti, ariyamaggoyeva. Samucchedaṭṭhena khaye ñāṇanti kilesasamucchindanaṭṭhena kilesakkhayakare ariyamagge ñāṇaṃ, sammādiṭṭhiyeva.
ছন্দাদযো হেট্ঠা ৰুত্তনযেনেৰ ৰেদিতব্বা। কেৰলঞ্হেত্থ মগ্গক্খণেযেৰ মগ্গস্স আদিমজ্ঝপরিযোসানাকারেন দস্সিতা। ৰিমুত্তীতি চেত্থ মগ্গৰিমুত্তিযেৰ। ‘‘তথট্ঠেন সচ্চা’’তি এত্থ গহিতম্পি চ নিব্বানং ইধ পরিযোসানভাৰদস্সনত্থং পুন ৰুত্তন্তি ৰেদিতব্বং। ফলক্খণেপি এসেৰ নযো। এত্থ পন হেতুট্ঠেন মগ্গোতি ফলমগ্গভাৰেনেৰ। সম্মপ্পধানাতি মগ্গক্খণে চতুকিচ্চসাধকস্স ৰীরিযকিচ্চস্স ফলস্স উপ্পাদক্খণে সিদ্ধত্তা ৰুত্তন্তি ৰেদিতব্বং। অঞ্ঞথা হি ফলক্খণে সম্মপ্পধানা এৰ ন লব্ভন্তি। ৰুত্তঞ্হি মগ্গক্খণে সত্ততিংস বোধিপক্খিযধম্মে উদ্ধরন্তেন থেরেন ‘‘ফলক্খণে ঠপেত্ৰা চত্তারো সম্মপ্পধানে অৰসেসা তেত্তিংস ধম্মা লব্ভন্তী’’তি। এৰমেৰ পটিৰেধকিচ্চাদিসিদ্ধিৰসেন সচ্চাদীনিপি যথাযোগং ৰেদিতব্বানি। ৰিমোক্খোতি চ ফলৰিমোক্খো। ৰিমুত্তীতি ফলৰিমুত্তি। পটিপ্পস্সদ্ধট্ঠেন অনুপ্পাদে ঞাণং ৰুত্তত্থমেৰ। ৰুট্ঠহিত্ৰাতি অন্তরা ৰুট্ঠানাভাৰা ফলাৰসানেন এৰং ৰুত্তং। ইমে ধম্মা তদা সমুদাগতাতি ইমে ৰুত্তপ্পকারা ধম্মা মগ্গক্খণে ফলক্খণে চ সমুদাগতাতি পচ্চৰেক্খতীতি ইতি-সদ্দং পাঠসেসং কত্ৰা সম্বন্ধো ৰেদিতব্বো।
Chandādayo heṭṭhā vuttanayeneva veditabbā. Kevalañhettha maggakkhaṇeyeva maggassa ādimajjhapariyosānākārena dassitā. Vimuttīti cettha maggavimuttiyeva. ‘‘Tathaṭṭhena saccā’’ti ettha gahitampi ca nibbānaṃ idha pariyosānabhāvadassanatthaṃ puna vuttanti veditabbaṃ. Phalakkhaṇepi eseva nayo. Ettha pana hetuṭṭhena maggoti phalamaggabhāveneva. Sammappadhānāti maggakkhaṇe catukiccasādhakassa vīriyakiccassa phalassa uppādakkhaṇe siddhattā vuttanti veditabbaṃ. Aññathā hi phalakkhaṇe sammappadhānā eva na labbhanti. Vuttañhi maggakkhaṇe sattatiṃsa bodhipakkhiyadhamme uddharantena therena ‘‘phalakkhaṇe ṭhapetvā cattāro sammappadhāne avasesā tettiṃsa dhammā labbhantī’’ti. Evameva paṭivedhakiccādisiddhivasena saccādīnipi yathāyogaṃ veditabbāni. Vimokkhoti ca phalavimokkho. Vimuttīti phalavimutti. Paṭippassaddhaṭṭhena anuppāde ñāṇaṃ vuttatthameva. Vuṭṭhahitvāti antarā vuṭṭhānābhāvā phalāvasānena evaṃ vuttaṃ. Ime dhammā tadā samudāgatāti ime vuttappakārā dhammā maggakkhaṇe phalakkhaṇe ca samudāgatāti paccavekkhatīti iti-saddaṃ pāṭhasesaṃ katvā sambandho veditabbo.
পচ্চৰেক্খণঞাণনিদ্দেসৰণ্ণনা নিট্ঠিতা।
Paccavekkhaṇañāṇaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ১৪. পচ্চৰেক্খণঞাণনিদ্দেসো • 14. Paccavekkhaṇañāṇaniddeso
