| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁၄. ပစ္စဝေက္ခဏဉာဏနိဒ္ဒေသော
14. Paccavekkhaṇañāṇaniddeso
၆၅. ကထံ တဒာ သမုဒာဂတေ ဓမ္မေ ပသ္သနေ ပညာ ပစ္စဝေက္ခဏေ ဉာဏံ? သောတာပတ္တိမဂ္ဂက္ခဏေ ဒသ္သနဋ္ဌေန သမ္မာဒိဋ္ဌိ တဒာ သမုဒာဂတာ။ အဘိနိရောပနဋ္ဌေန သမ္မာသင္ကပ္ပော တဒာ သမုဒာဂတော။ ပရိဂ္ဂဟဋ္ဌေန သမ္မာဝာစာ တဒာ သမုဒာဂတာ။ သမုဋ္ဌာနဋ္ဌေန သမ္မာကမ္မန္တော တဒာ သမုဒာဂတော။ ဝောဒာနဋ္ဌေန သမ္မာအာဇီဝော တဒာ သမုဒာဂတော။ ပဂ္ဂဟဋ္ဌေန သမ္မာဝာယာမော တဒာ သမုဒာဂတော။ ဥပဋ္ဌာနဋ္ဌေန သမ္မာသတိ တဒာ သမုဒာဂတာ။ အဝိက္ခေပဋ္ဌေန သမ္မာသမာဓိ တဒာ သမုဒာဂတော။
65. Kathaṃ tadā samudāgate dhamme passane paññā paccavekkhaṇe ñāṇaṃ? Sotāpattimaggakkhaṇe dassanaṭṭhena sammādiṭṭhi tadā samudāgatā. Abhiniropanaṭṭhena sammāsaṅkappo tadā samudāgato. Pariggahaṭṭhena sammāvācā tadā samudāgatā. Samuṭṭhānaṭṭhena sammākammanto tadā samudāgato. Vodānaṭṭhena sammāājīvo tadā samudāgato. Paggahaṭṭhena sammāvāyāmo tadā samudāgato. Upaṭṭhānaṭṭhena sammāsati tadā samudāgatā. Avikkhepaṭṭhena sammāsamādhi tadā samudāgato.
ဥပဋ္ဌာနဋ္ဌေန သတိသမ္ဗောဇ္ဈင္ဂော တဒာ သမုဒာဂတော။ ပဝိစယဋ္ဌေန ဓမ္မဝိစယသမ္ဗောဇ္ဈင္ဂော တဒာ သမုဒာဂတော။ ပဂ္ဂဟဋ္ဌေန ဝီရိယသမ္ဗောဇ္ဈင္ဂော တဒာ သမုဒာဂတော။ ဖရဏဋ္ဌေန ပီတိသမ္ဗောဇ္ဈင္ဂော တဒာ သမုဒာဂတော။ ဥပသမဋ္ဌေန ပသ္သဒ္ဓိသမ္ဗောဇ္ဈင္ဂော တဒာ သမုဒာဂတော။ အဝိက္ခေပဋ္ဌေန သမာဓိသမ္ဗောဇ္ဈင္ဂော တဒာ သမုဒာဂတော။ ပဋိသင္ခာနဋ္ဌေန ဥပေက္ခာသမ္ဗောဇ္ဈင္ဂော တဒာ သမုဒာဂတော။
Upaṭṭhānaṭṭhena satisambojjhaṅgo tadā samudāgato. Pavicayaṭṭhena dhammavicayasambojjhaṅgo tadā samudāgato. Paggahaṭṭhena vīriyasambojjhaṅgo tadā samudāgato. Pharaṇaṭṭhena pītisambojjhaṅgo tadā samudāgato. Upasamaṭṭhena passaddhisambojjhaṅgo tadā samudāgato. Avikkhepaṭṭhena samādhisambojjhaṅgo tadā samudāgato. Paṭisaṅkhānaṭṭhena upekkhāsambojjhaṅgo tadā samudāgato.
အသ္သဒ္ဓိယေ အကမ္ပိယဋ္ဌေန သဒ္ဓာဗလံ တဒာ သမုဒာဂတံ။ ကောသဇ္ဇေ အကမ္ပိယဋ္ဌေန ဝီရိယဗလံ တဒာ သမုဒာဂတံ။ ပမာဒေ အကမ္ပိယဋ္ဌေန သတိဗလံ တဒာ သမုဒာဂတံ။ ဥဒ္ဓစ္စေ အကမ္ပိယဋ္ဌေန သမာဓိဗလံ တဒာ သမုဒာဂတံ။ အဝိဇ္ဇာယ အကမ္ပိယဋ္ဌေန ပညာဗလံ တဒာ သမုဒာဂတံ။
Assaddhiye akampiyaṭṭhena saddhābalaṃ tadā samudāgataṃ. Kosajje akampiyaṭṭhena vīriyabalaṃ tadā samudāgataṃ. Pamāde akampiyaṭṭhena satibalaṃ tadā samudāgataṃ. Uddhacce akampiyaṭṭhena samādhibalaṃ tadā samudāgataṃ. Avijjāya akampiyaṭṭhena paññābalaṃ tadā samudāgataṃ.
အဓိမောက္ခဋ္ဌေန သဒ္ဓိန္ဒ္ရိယံ တဒာ သမုဒာဂတံ။ ပဂ္ဂဟဋ္ဌေန ဝီရိယိန္ဒ္ရိယံ တဒာ သမုဒာဂတံ။ ဥပဋ္ဌာနဋ္ဌေန သတိန္ဒ္ရိယံ တဒာ သမုဒာဂတံ။ အဝိက္ခေပဋ္ဌေန သမာဓိန္ဒ္ရိယံ တဒာ သမုဒာဂတံ။ ဒသ္သနဋ္ဌေန ပညိန္ဒ္ရိယံ တဒာ သမုဒာဂတံ။
Adhimokkhaṭṭhena saddhindriyaṃ tadā samudāgataṃ. Paggahaṭṭhena vīriyindriyaṃ tadā samudāgataṃ. Upaṭṭhānaṭṭhena satindriyaṃ tadā samudāgataṃ. Avikkhepaṭṭhena samādhindriyaṃ tadā samudāgataṃ. Dassanaṭṭhena paññindriyaṃ tadā samudāgataṃ.
အာဓိပတေယ္ယဋ္ဌေန ဣန္ဒ္ရိယာ တဒာ သမုဒာဂတာ။ အကမ္ပိယဋ္ဌေန ဗလာ တဒာ သမုဒာဂတာ။ နိယ္ယာနဋ္ဌေန သမ္ဗောဇ္ဈင္ဂာ တဒာ သမုဒာဂတာ။ ဟေတုဋ္ဌေန မဂ္ဂော တဒာ သမုဒာဂတော။ ဥပဋ္ဌာနဋ္ဌေန သတိပဋ္ဌာနာ တဒာ သမုဒာဂတာ။ ပဒဟနဋ္ဌေန သမ္မပ္ပဓာနာ တဒာ သမုဒာဂတာ။ ဣဇ္ဈနဋ္ဌေန ဣဒ္ဓိပာဒာ တဒာ သမုဒာဂတာ။ တထဋ္ဌေန သစ္စာ တဒာ သမုဒာဂတာ။ အဝိက္ခေပဋ္ဌေန သမထော တဒာ သမုဒာဂတော။ အနုပသ္သနဋ္ဌေန ဝိပသ္သနာ တဒာ သမုဒာဂတာ။ ဧကရသဋ္ဌေန သမထဝိပသ္သနာ တဒာ သမုဒာဂတာ။ အနတိဝတ္တနဋ္ဌေန ယုဂနဒ္ဓံ တဒာ သမုဒာဂတံ။ သံဝရဋ္ဌေန သီလဝိသုဒ္ဓိ တဒာ သမုဒာဂတာ။ အဝိက္ခေပဋ္ဌေန စိတ္တဝိသုဒ္ဓိ တဒာ သမုဒာဂတာ။ ဒသ္သနဋ္ဌေန ဒိဋ္ဌိဝိသုဒ္ဓိ တဒာ သမုဒာဂတာ။ ဝိမုတ္တဋ္ဌေန ဝိမောက္ခော တဒာ သမုဒာဂတော။ ပဋိဝေဓဋ္ဌေန ဝိဇ္ဇာ တဒာ သမုဒာဂတာ။ ပရိစ္စာဂဋ္ဌေန ဝိမုတ္တိ တဒာ သမုဒာဂတာ။ သမုစ္ဆေဒဋ္ဌေန ခယေ ဉာဏံ တဒာ သမုဒာဂတံ။
Ādhipateyyaṭṭhena indriyā tadā samudāgatā. Akampiyaṭṭhena balā tadā samudāgatā. Niyyānaṭṭhena sambojjhaṅgā tadā samudāgatā. Hetuṭṭhena maggo tadā samudāgato. Upaṭṭhānaṭṭhena satipaṭṭhānā tadā samudāgatā. Padahanaṭṭhena sammappadhānā tadā samudāgatā. Ijjhanaṭṭhena iddhipādā tadā samudāgatā. Tathaṭṭhena saccā tadā samudāgatā. Avikkhepaṭṭhena samatho tadā samudāgato. Anupassanaṭṭhena vipassanā tadā samudāgatā. Ekarasaṭṭhena samathavipassanā tadā samudāgatā. Anativattanaṭṭhena yuganaddhaṃ tadā samudāgataṃ. Saṃvaraṭṭhena sīlavisuddhi tadā samudāgatā. Avikkhepaṭṭhena cittavisuddhi tadā samudāgatā. Dassanaṭṭhena diṭṭhivisuddhi tadā samudāgatā. Vimuttaṭṭhena vimokkho tadā samudāgato. Paṭivedhaṭṭhena vijjā tadā samudāgatā. Pariccāgaṭṭhena vimutti tadā samudāgatā. Samucchedaṭṭhena khaye ñāṇaṃ tadā samudāgataṃ.
ဆန္ဒော မူလဋ္ဌေန တဒာ သမုဒာဂတော။ မနသိကာရော သမုဋ္ဌာနဋ္ဌေန တဒာ သမုဒာဂတော။ ဖသ္သော သမောဓာနဋ္ဌေန တဒာ သမုဒာဂတော။ ဝေဒနာ သမောသရဏဋ္ဌေန တဒာ သမုဒာဂတာ။ သမာဓိ ပမုခဋ္ဌေန တဒာ သမုဒာဂတော။ သတိ အာဓိပတေယ္ယဋ္ဌေန တဒာ သမုဒာဂတာ။ ပညာ တဒုတ္တရဋ္ဌေန တဒာ သမုဒာဂတာ ။ ဝိမုတ္တိ သာရဋ္ဌေန တဒာ သမုဒာဂတာ။ အမတောဂဓံ နိဗ္ဗာနံ ပရိယောသာနဋ္ဌေန တဒာ သမုဒာဂတံ။ ဝုဋ္ဌဟိတ္ဝာ ပစ္စဝေက္ခတိ, ဣမေ ဓမ္မာ တဒာ သမုဒာဂတာ။
Chando mūlaṭṭhena tadā samudāgato. Manasikāro samuṭṭhānaṭṭhena tadā samudāgato. Phasso samodhānaṭṭhena tadā samudāgato. Vedanā samosaraṇaṭṭhena tadā samudāgatā. Samādhi pamukhaṭṭhena tadā samudāgato. Sati ādhipateyyaṭṭhena tadā samudāgatā. Paññā taduttaraṭṭhena tadā samudāgatā . Vimutti sāraṭṭhena tadā samudāgatā. Amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā.
သောတာပတ္တိဖလက္ခဏေ ဒသ္သနဋ္ဌေန သမ္မာဒိဋ္ဌိ တဒာ သမုဒာဂတာ။ အဘိနိရောပနဋ္ဌေန သမ္မာသင္ကပ္ပော တဒာ သမုဒာဂတော။ပေ.။ ပဋိပ္ပသ္သဒ္ဓဋ္ဌေန အနုပ္ပာဒေ ဉာဏံ တဒာ သမုဒာဂတံ။ ဆန္ဒော မူလဋ္ဌေန တဒာ သမုဒာဂတော။ မနသိကာရော သမုဋ္ဌာနဋ္ဌေန တဒာ သမုဒာဂတော။ ဖသ္သော သမောဓာနဋ္ဌေန တဒာ သမုဒာဂတော။ ဝေဒနာ သမောသရဏဋ္ဌေန တဒာ သမုဒာဂတာ။ သမာဓိ ပမုခဋ္ဌေန တဒာ သမုဒာဂတော။ သတိ အာဓိပတေယ္ယဋ္ဌေန တဒာ သမုဒာဂတာ။ ပညာ တဒုတ္တရဋ္ဌေန တဒာ သမုဒာဂတာ။ ဝိမုတ္တိ သာရဋ္ဌေန တဒာ သမုဒာဂတာ။ အမတောဂဓံ နိဗ္ဗာနံ ပရိယောသာနဋ္ဌေန တဒာ သမုဒာဂတံ။ ဝုဋ္ဌဟိတ္ဝာ ပစ္စဝေက္ခတိ, ဣမေ ဓမ္မာ တဒာ သမုဒာဂတာ။
Sotāpattiphalakkhaṇe dassanaṭṭhena sammādiṭṭhi tadā samudāgatā. Abhiniropanaṭṭhena sammāsaṅkappo tadā samudāgato…pe… paṭippassaddhaṭṭhena anuppāde ñāṇaṃ tadā samudāgataṃ. Chando mūlaṭṭhena tadā samudāgato. Manasikāro samuṭṭhānaṭṭhena tadā samudāgato. Phasso samodhānaṭṭhena tadā samudāgato. Vedanā samosaraṇaṭṭhena tadā samudāgatā. Samādhi pamukhaṭṭhena tadā samudāgato. Sati ādhipateyyaṭṭhena tadā samudāgatā. Paññā taduttaraṭṭhena tadā samudāgatā. Vimutti sāraṭṭhena tadā samudāgatā. Amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā.
သကဒာဂာမိမဂ္ဂက္ခဏေ။ပေ.။ သကဒာဂာမိဖလက္ခဏေ။ပေ.။ အနာဂာမိမဂ္ဂက္ခဏေ။ပေ.။ အနာဂာမိဖလက္ခဏေ။ပေ.။ အရဟတ္တမဂ္ဂက္ခဏေ ဒသ္သနဋ္ဌေန သမ္မာဒိဋ္ဌိ တဒာ သမုဒာဂတာ။ပေ.။ သမုစ္ဆေဒဋ္ဌေန ခယေ ဉာဏံ တဒာ သမုဒာဂတံ။ ဆန္ဒော မူလဋ္ဌေန တဒာ သမုဒာဂတော။ပေ.။ အမတောဂဓံ နိဗ္ဗာနံ ပရိယောသာနဋ္ဌေန တဒာ သမုဒာဂတံ။ ဝုဋ္ဌဟိတ္ဝာ ပစ္စဝေက္ခတိ, ဣမေ ဓမ္မာ တဒာ သမုဒာဂတာ။
Sakadāgāmimaggakkhaṇe…pe… sakadāgāmiphalakkhaṇe…pe… anāgāmimaggakkhaṇe…pe… anāgāmiphalakkhaṇe…pe… arahattamaggakkhaṇe dassanaṭṭhena sammādiṭṭhi tadā samudāgatā…pe… samucchedaṭṭhena khaye ñāṇaṃ tadā samudāgataṃ. Chando mūlaṭṭhena tadā samudāgato…pe… amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā.
အရဟတ္တဖလက္ခဏေ ဒသ္သနဋ္ဌေန သမ္မာဒိဋ္ဌိ တဒာ သမုဒာဂတာ ။ပေ.။ ပဋိပ္ပသ္သဒ္ဓဋ္ဌေန အနုပ္ပာဒေ ဉာဏံ တဒာ သမုဒာဂတံ။ ဆန္ဒော မူလဋ္ဌေန တဒာ သမုဒာဂတော ။ပေ.။ အမတောဂဓံ နိဗ္ဗာနံ ပရိယောသာနဋ္ဌေန တဒာ သမုဒာဂတံ။ ဝုဋ္ဌဟိတ္ဝာ ပစ္စဝေက္ခတိ, ဣမေ ဓမ္မာ တဒာ သမုဒာဂတာ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘တဒာ သမုဒာဂတေ ဓမ္မေ ပသ္သနေ ပညာ ပစ္စဝေက္ခဏေ ဉာဏံ’’။
Arahattaphalakkhaṇe dassanaṭṭhena sammādiṭṭhi tadā samudāgatā …pe… paṭippassaddhaṭṭhena anuppāde ñāṇaṃ tadā samudāgataṃ. Chando mūlaṭṭhena tadā samudāgato …pe… amatogadhaṃ nibbānaṃ pariyosānaṭṭhena tadā samudāgataṃ. Vuṭṭhahitvā paccavekkhati, ime dhammā tadā samudāgatā. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘tadā samudāgate dhamme passane paññā paccavekkhaṇe ñāṇaṃ’’.
ပစ္စဝေက္ခဏဉာဏနိဒ္ဒေသော စုဒ္ဒသမော။
Paccavekkhaṇañāṇaniddeso cuddasamo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁၄. ပစ္စဝေက္ခဏဉာဏနိဒ္ဒေသဝဏ္ဏနာ • 14. Paccavekkhaṇañāṇaniddesavaṇṇanā
