| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
ಪಚ್ಚಯನಿದ್ದೇಸಪಕಿಣ್ಣಕವಿನಿಚ್ಛಯಕಥಾ
Paccayaniddesapakiṇṇakavinicchayakathā
ಇದಾನಿ ಏವಂ ಉದ್ದೇಸನಿದ್ದೇಸತೋ ದಸ್ಸಿತೇಸು ಇಮೇಸು ಚತುವೀಸತಿಯಾ ಪಚ್ಚಯೇಸು ಞಾಣಚಾರಸ್ಸ ವಿಸದಭಾವತ್ಥಂ ಅನೇಕಧಮ್ಮಾನಂ ಏಕಪಚ್ಚಯಭಾವತೋ, ಏಕಧಮ್ಮಸ್ಸ ಅನೇಕಪಚ್ಚಯಭಾವತೋ, ಏಕಪಚ್ಚಯಸ್ಸ ಅನೇಕಪಚ್ಚಯಭಾವತೋ, ಪಚ್ಚಯಸಭಾಗತೋ, ಪಚ್ಚಯವಿಸಭಾಗತೋ, ಯುಗಳಕತೋ, ಜನಕಾಜನಕತೋ, ಸಬ್ಬಟ್ಠಾನಿಕಾಸಬ್ಬಟ್ಠಾನಿಕತೋ, ರೂಪಂ ರೂಪಸ್ಸಾತಿಆದಿವಿಕಪ್ಪತೋ, ಭವಭೇದತೋತಿ ಇಮೇಸಂ ದಸನ್ನಂ ಪದಾನಂ ವಸೇನ ಪಕಿಣ್ಣಕವಿನಿಚ್ಛಯೋ ವೇದಿತಬ್ಬೋ। ತತ್ಥ ಅನೇಕಧಮ್ಮಾನಂ ಏಕಪಚ್ಚಯಭಾವತೋತಿ ಏತೇಸು ಹಿ ಠಪೇತ್ವಾ ಕಮ್ಮಪಚ್ಚಯಂ ಅವಸೇಸೇಸು ತೇವೀಸತಿಯಾ ಪಚ್ಚಯೇಸು ಅನೇಕಧಮ್ಮಾ ಏಕತೋ ಪಚ್ಚಯಾ ಹೋನ್ತಿ। ಕಮ್ಮಪಚ್ಚಯೋ ಪನ ಏಕೋ ಚೇತನಾಧಮ್ಮೋಯೇವಾತಿ ಏವಂ ತಾವೇತ್ಥ ಅನೇಕಧಮ್ಮಾನಂ ಏಕಪಚ್ಚಯಭಾವತೋ ವಿನಿಚ್ಛಯೋ ವೇದಿತಬ್ಬೋ।
Idāni evaṃ uddesaniddesato dassitesu imesu catuvīsatiyā paccayesu ñāṇacārassa visadabhāvatthaṃ anekadhammānaṃ ekapaccayabhāvato, ekadhammassa anekapaccayabhāvato, ekapaccayassa anekapaccayabhāvato, paccayasabhāgato, paccayavisabhāgato, yugaḷakato, janakājanakato, sabbaṭṭhānikāsabbaṭṭhānikato, rūpaṃ rūpassātiādivikappato, bhavabhedatoti imesaṃ dasannaṃ padānaṃ vasena pakiṇṇakavinicchayo veditabbo. Tattha anekadhammānaṃ ekapaccayabhāvatoti etesu hi ṭhapetvā kammapaccayaṃ avasesesu tevīsatiyā paccayesu anekadhammā ekato paccayā honti. Kammapaccayo pana eko cetanādhammoyevāti evaṃ tāvettha anekadhammānaṃ ekapaccayabhāvato vinicchayo veditabbo.
ಏಕಧಮ್ಮಸ್ಸ ಅನೇಕಪಚ್ಚಯಭಾವತೋತಿ ಹೇತುಪಚ್ಚಯೇ ತಾವ ಅಮೋಹೋ ಏಕೋ ಧಮ್ಮೋ। ಸೋ ಪುರೇಜಾತಕಮ್ಮಾಹಾರಝಾನಪಚ್ಚಯೋವ ನ ಹೋತಿ, ಸೇಸಾನಂ ವೀಸತಿಯಾ ಪಚ್ಚಯಾನಂ ವಸೇನ ಪಚ್ಚಯೋ ಹೋತಿ। ಅಲೋಭಾದೋಸಾ ಇನ್ದ್ರಿಯಮಗ್ಗಪಚ್ಚಯಾಪಿ ನ ಹೋನ್ತಿ, ಸೇಸಾನಂ ಅಟ್ಠಾರಸನ್ನಂ ಪಚ್ಚಯಾನಂ ವಸೇನ ಪಚ್ಚಯಾ ಹೋನ್ತಿ। ಲೋಭಮೋಹಾ ವಿಪಾಕಪಚ್ಚಯಾಪಿ ನ ಹೋನ್ತಿ, ಸೇಸಾನಂ ಸತ್ತರಸನ್ನಂ ಪಚ್ಚಯಾನಂ ವಸೇನ ಪಚ್ಚಯಾ ಹೋನ್ತಿ। ದೋಸೋ ಅಧಿಪತಿಪಚ್ಚಯೋಪಿ ನ ಹೋತಿ, ಸೇಸಾನಂ ಸೋಳಸನ್ನಂ ಪಚ್ಚಯಾನಂ ವಸೇನ ಪಚ್ಚಯೋ ಹೋತಿ। ಆರಮ್ಮಣಪಚ್ಚಯೇ ರೂಪಾಯತನಂ ಚಕ್ಖುವಿಞ್ಞಾಣಧಾತುಯಾ ಆರಮ್ಮಣಪುರೇಜಾತಅತ್ಥಿಅವಿಗತವಸೇನ ಚತುಧಾ ಪಚ್ಚಯೋ; ತಥಾ ಮನೋಧಾತುಯಾ ಅಹೇತುಕಮನೋವಿಞ್ಞಾಣಧಾತುಯಾ ಚ। ಸಹೇತುಕಾಯ ಪನ ಆರಮ್ಮಣಾಧಿಪತಿಆರಮ್ಮಣೂಪನಿಸ್ಸಯವಸೇನಾಪಿ ಪಚ್ಚಯೋ ಹೋತಿ। ಇಮಿನಾ ನಯೇನ ಸಬ್ಬೇಸಂ ಆರಮ್ಮಣಪಚ್ಚಯಧಮ್ಮಾನಂ ಅನೇಕಪಚ್ಚಯಭಾವೋ ವೇದಿತಬ್ಬೋ।
Ekadhammassa anekapaccayabhāvatoti hetupaccaye tāva amoho eko dhammo. So purejātakammāhārajhānapaccayova na hoti, sesānaṃ vīsatiyā paccayānaṃ vasena paccayo hoti. Alobhādosā indriyamaggapaccayāpi na honti, sesānaṃ aṭṭhārasannaṃ paccayānaṃ vasena paccayā honti. Lobhamohā vipākapaccayāpi na honti, sesānaṃ sattarasannaṃ paccayānaṃ vasena paccayā honti. Doso adhipatipaccayopi na hoti, sesānaṃ soḷasannaṃ paccayānaṃ vasena paccayo hoti. Ārammaṇapaccaye rūpāyatanaṃ cakkhuviññāṇadhātuyā ārammaṇapurejātaatthiavigatavasena catudhā paccayo; tathā manodhātuyā ahetukamanoviññāṇadhātuyā ca. Sahetukāya pana ārammaṇādhipatiārammaṇūpanissayavasenāpi paccayo hoti. Iminā nayena sabbesaṃ ārammaṇapaccayadhammānaṃ anekapaccayabhāvo veditabbo.
ಅಧಿಪತಿಪಚ್ಚಯೇ ಆರಮ್ಮಣಾಧಿಪತಿನೋ ಆರಮ್ಮಣಪಚ್ಚಯೇ ವುತ್ತನಯೇನೇವ ಅನೇಕಪಚ್ಚಯಭಾವೋ ವೇದಿತಬ್ಬೋ। ಸಹಜಾತಾಧಿಪತೀಸು ವೀಮಂಸಾ ಅಮೋಹಹೇತು ವಿಯ ವೀಸತಿಧಾ ಪಚ್ಚಯೋ ಹೋತಿ। ಛನ್ದೋ ಹೇತುಪುರೇಜಾತಕಮ್ಮಆಹಾರಇನ್ದ್ರಿಯಝಾನಮಗ್ಗಪಚ್ಚಯೋ ನ ಹೋತಿ, ಸೇಸಾನಂ ಸತ್ತರಸನ್ನಂ ಪಚ್ಚಯಾನಂ ವಸೇನ ಪಚ್ಚಯೋ ಹೋತಿ। ಚಿತ್ತಂ ಹೇತುಪುರೇಜಾತಕಮ್ಮಝಾನಮಗ್ಗಪಚ್ಚಯೋ ನ ಹೋತಿ, ಸೇಸಾನಂ ಏಕೂನವೀಸತಿಯಾ ಪಚ್ಚಯಾನಂ ವಸೇನ ಪಚ್ಚಯೋ ಹೋತಿ। ವೀರಿಯಂ ಹೇತುಪುರೇಜಾತಕಮ್ಮಾಹಾರಝಾನಪಚ್ಚಯೋ ನ ಹೋತಿ, ಸೇಸಾನಂ ಏಕೂನವೀಸತಿಯಾ ವಸೇನ ಪಚ್ಚಯೋ ಹೋತಿ।
Adhipatipaccaye ārammaṇādhipatino ārammaṇapaccaye vuttanayeneva anekapaccayabhāvo veditabbo. Sahajātādhipatīsu vīmaṃsā amohahetu viya vīsatidhā paccayo hoti. Chando hetupurejātakammaāhāraindriyajhānamaggapaccayo na hoti, sesānaṃ sattarasannaṃ paccayānaṃ vasena paccayo hoti. Cittaṃ hetupurejātakammajhānamaggapaccayo na hoti, sesānaṃ ekūnavīsatiyā paccayānaṃ vasena paccayo hoti. Vīriyaṃ hetupurejātakammāhārajhānapaccayo na hoti, sesānaṃ ekūnavīsatiyā vasena paccayo hoti.
ಅನನ್ತರಪಚ್ಚಯೇ ‘‘ಚಕ್ಖುವಿಞ್ಞಾಣಧಾತೂ’’ತಿಆದಿನಾ ನಯೇನ ವುತ್ತೇಸು ಚತೂಸು ಖನ್ಧೇಸು ವೇದನಾಕ್ಖನ್ಧೋ ಹೇತುಪುರೇಜಾತಕಮ್ಮಾಹಾರಮಗ್ಗಪಚ್ಚಯೋ ನ ಹೋತಿ, ಸೇಸಾನಂ ಏಕೂನವೀಸತಿಯಾ ವಸೇನ ಪಚ್ಚಯೋ ಹೋತಿ। ಸಞ್ಞಾಕ್ಖನ್ಧೋ ಇನ್ದ್ರಿಯಝಾನಪಚ್ಚಯೋಪಿ ನ ಹೋತಿ, ಸೇಸಾನಂ ಸತ್ತರಸನ್ನಂ ವಸೇನ ಪಚ್ಚಯೋ ಹೋತಿ। ಸಙ್ಖಾರಕ್ಖನ್ಧೇ ಹೇತೂ ಹೇತುಪಚ್ಚಯೇ ವುತ್ತನಯೇನ, ಛನ್ದವೀರಿಯಾನಿ ಅಧಿಪತಿಪಚ್ಚಯೇ ವುತ್ತನಯೇನೇವ ಪಚ್ಚಯಾ ಹೋನ್ತಿ। ಫಸ್ಸೋ ಹೇತುಪುರೇಜಾತಕಮ್ಮಇನ್ದ್ರಿಯಝಾನಮಗ್ಗಪಚ್ಚಯೋ ನ ಹೋತಿ, ಸೇಸಾನಂ ಅಟ್ಠಾರಸನ್ನಂ ವಸೇನ ಪಚ್ಚಯೋ ಹೋತಿ। ಚೇತನಾ ಹೇತುಪುರೇಜಾತಇನ್ದ್ರಿಯಝಾನಮಗ್ಗಪಚ್ಚಯೋ ನ ಹೋತಿ। ಸೇಸಾನಂ ಏಕೂನವೀಸತಿಯಾ ವಸೇನ ಪಚ್ಚಯೋ ಹೋತಿ। ವಿತಕ್ಕೋ ಹೇತುಪುರೇಜಾತಕಮ್ಮಾಹಾರಿನ್ದ್ರಿಯಪಚ್ಚಯೋ ನ ಹೋತಿ, ಸೇಸಾನಂ ಏಕೂನವೀಸತಿಯಾ ವಸೇನ ಪಚ್ಚಯೋ ಹೋತಿ। ವಿಚಾರೋ ಮಗ್ಗಪಚ್ಚಯೋಪಿ ನ ಹೋತಿ, ಸೇಸಾನಂ ಅಟ್ಠಾರಸನ್ನಂ ವಸೇನ ಪಚ್ಚಯೋ ಹೋತಿ। ಪೀತಿ ತೇಸಞ್ಞೇವ ವಸೇನ ಪಚ್ಚಯೋ ಹೋತಿ। ಚಿತ್ತೇಕಗ್ಗತಾ ಹೇತುಪುರೇಜಾತಕಮ್ಮಾಹಾರಪಚ್ಚಯೋ ನ ಹೋತಿ, ಸೇಸಾನಂ ವೀಸತಿಯಾ ವಸೇನ ಪಚ್ಚಯೋ ಹೋತಿ। ಸದ್ಧಾ ಹೇತುಪುರೇಜಾತಕಮ್ಮಾಹಾರಝಾನಮಗ್ಗಪಚ್ಚಯೋ ನ ಹೋತಿ, ಸೇಸಾನಂ ಅಟ್ಠಾರಸನ್ನಂ ವಸೇನ ಪಚ್ಚಯೋ ಹೋತಿ। ಸತಿ ತೇಹಿ ಚೇವ ಮಗ್ಗಪಚ್ಚಯೇನ ಚಾತಿ ಏಕೂನವೀಸತಿಯಾ ವಸೇನ ಪಚ್ಚಯೋ ಹೋತಿ। ಜೀವಿತಿನ್ದ್ರಿಯಂ ಸದ್ಧಾಯ ವುತ್ತಾನಂ ಅಟ್ಠಾರಸನ್ನಂ ವಸೇನ ಪಚ್ಚಯೋ ಹೋತಿ। ಹಿರೋತ್ತಪ್ಪಂ ತತೋ ಇನ್ದ್ರಿಯಪಚ್ಚಯಂ ಅಪನೇತ್ವಾ ಸೇಸಾನಂ ಸತ್ತರಸನ್ನಂ ವಸೇನ ಪಚ್ಚಯೋ ಹೋತಿ। ತಥಾ ಕಾಯಪಸ್ಸದ್ಧಾದೀನಿ ಯುಗಳಕಾನಿ, ಯೇವಾಪನಕೇಸು ಅಧಿಮೋಕ್ಖಮನಸಿಕಾರತತ್ರಮಜ್ಝತ್ತತಾ ಕರುಣಾಮುದಿತಾ ಚ। ವಿರತಿಯೋ ಪನ ತೇಹಿ ಚೇವ ಮಗ್ಗಪಚ್ಚಯೇನ ಚಾತಿ ಅಟ್ಠಾರಸಧಾ ಪಚ್ಚಯಾ ಹೋನ್ತಿ। ಮಿಚ್ಛಾದಿಟ್ಠಿ ತತೋ ವಿಪಾಕಪಚ್ಚಯಂ ಅಪನೇತ್ವಾ ಸತ್ತರಸಧಾ, ಮಿಚ್ಛಾವಾಚಾಕಮ್ಮನ್ತಾಜೀವಾ ತೇಹಿ ಚೇವ ಕಮ್ಮಾಹಾರಪಚ್ಚಯೇಹಿ ಚಾತಿ ಏಕೂನವೀಸತಿಧಾ। ಅಹಿರಿಕಂ ಅನೋತ್ತಪ್ಪಂ ಮಾನೋ ಥಿನಂ ಮಿದ್ಧಂ ಉದ್ಧಚ್ಚನ್ತಿ ಇಮೇ ಹೇತುಪುರೇಜಾತಕಮ್ಮವಿಪಾಕಾಹಾರಿನ್ದ್ರಿಯಝಾನಮಗ್ಗಪಚ್ಚಯಾ ನ ಹೋನ್ತಿ, ಸೇಸಾನಂ ಪನ ಸೋಳಸನ್ನಂ ಪಚ್ಚಯಾನಂ ವಸೇನ ಪಚ್ಚಯಾ ಹೋನ್ತಿ। ವಿಚಿಕಿಚ್ಛಾಇಸ್ಸಾಮಚ್ಛರಿಯಕುಕ್ಕುಚ್ಚಾನಿ ತತೋ ಅಧಿಪತಿಪಚ್ಚಯಂ ಅಪನೇತ್ವಾ ಪನ್ನರಸಧಾ ವಿಞ್ಞಾಣಕ್ಖನ್ಧಸ್ಸ। ಅಧಿಪತಿಪಚ್ಚಯೇ ವುತ್ತನಯೇನೇವ ಅನೇಕಪಚ್ಚಯಭಾವೋ ವೇದಿತಬ್ಬೋ। ಸಮನನ್ತರಪಚ್ಚಯೇಪಿ ಏಸೇವ ನಯೋ।
Anantarapaccaye ‘‘cakkhuviññāṇadhātū’’tiādinā nayena vuttesu catūsu khandhesu vedanākkhandho hetupurejātakammāhāramaggapaccayo na hoti, sesānaṃ ekūnavīsatiyā vasena paccayo hoti. Saññākkhandho indriyajhānapaccayopi na hoti, sesānaṃ sattarasannaṃ vasena paccayo hoti. Saṅkhārakkhandhe hetū hetupaccaye vuttanayena, chandavīriyāni adhipatipaccaye vuttanayeneva paccayā honti. Phasso hetupurejātakammaindriyajhānamaggapaccayo na hoti, sesānaṃ aṭṭhārasannaṃ vasena paccayo hoti. Cetanā hetupurejātaindriyajhānamaggapaccayo na hoti. Sesānaṃ ekūnavīsatiyā vasena paccayo hoti. Vitakko hetupurejātakammāhārindriyapaccayo na hoti, sesānaṃ ekūnavīsatiyā vasena paccayo hoti. Vicāro maggapaccayopi na hoti, sesānaṃ aṭṭhārasannaṃ vasena paccayo hoti. Pīti tesaññeva vasena paccayo hoti. Cittekaggatā hetupurejātakammāhārapaccayo na hoti, sesānaṃ vīsatiyā vasena paccayo hoti. Saddhā hetupurejātakammāhārajhānamaggapaccayo na hoti, sesānaṃ aṭṭhārasannaṃ vasena paccayo hoti. Sati tehi ceva maggapaccayena cāti ekūnavīsatiyā vasena paccayo hoti. Jīvitindriyaṃ saddhāya vuttānaṃ aṭṭhārasannaṃ vasena paccayo hoti. Hirottappaṃ tato indriyapaccayaṃ apanetvā sesānaṃ sattarasannaṃ vasena paccayo hoti. Tathā kāyapassaddhādīni yugaḷakāni, yevāpanakesu adhimokkhamanasikāratatramajjhattatā karuṇāmuditā ca. Viratiyo pana tehi ceva maggapaccayena cāti aṭṭhārasadhā paccayā honti. Micchādiṭṭhi tato vipākapaccayaṃ apanetvā sattarasadhā, micchāvācākammantājīvā tehi ceva kammāhārapaccayehi cāti ekūnavīsatidhā. Ahirikaṃ anottappaṃ māno thinaṃ middhaṃ uddhaccanti ime hetupurejātakammavipākāhārindriyajhānamaggapaccayā na honti, sesānaṃ pana soḷasannaṃ paccayānaṃ vasena paccayā honti. Vicikicchāissāmacchariyakukkuccāni tato adhipatipaccayaṃ apanetvā pannarasadhā viññāṇakkhandhassa. Adhipatipaccaye vuttanayeneva anekapaccayabhāvo veditabbo. Samanantarapaccayepi eseva nayo.
ಸಹಜಾತಪಚ್ಚಯೇ ಚತೂಸು ತಾವ ಖನ್ಧೇಸು ಏಕೇಕಸ್ಸ ಧಮ್ಮಸ್ಸ ಅನೇಕಪಚ್ಚಯಭಾವೋ ವುತ್ತನಯೇನೇವ ವೇದಿತಬ್ಬೋ। ಚತ್ತಾರಿ ಮಹಾಭೂತಾನಿ ಆರಮ್ಮಣಆರಮ್ಮಣಾಧಿಪತಿಸಹಜಾತಅಞ್ಞಮಞ್ಞನಿಸ್ಸಯಉಪನಿಸ್ಸಯಪುರೇಜಾತಅತ್ಥಿಅವಿಗತವಸೇನ ನವಧಾ ಪಚ್ಚಯಾ ಹೋನ್ತಿ। ಹದಯವತ್ಥು ತೇಸಞ್ಚೇವ ವಿಪ್ಪಯುತ್ತಸ್ಸ ಚ ವಸೇನ ದಸಧಾ ಪಚ್ಚಯೋ ಹೋತಿ। ಅಞ್ಞಮಞ್ಞಪಚ್ಚಯೇ ಅಪುಬ್ಬಂ ನತ್ಥಿ। ನಿಸ್ಸಯಪಚ್ಚಯೇ ಚಕ್ಖಾಯತನಾದೀನಿ ಆರಮ್ಮಣಆರಮ್ಮಣಾಧಿಪತಿನಿಸ್ಸಯಉಪನಿಸ್ಸಯಪುರೇಜಾತಇನ್ದ್ರಿಯವಿಪ್ಪಯುತ್ತಅತ್ಥಿಅವಿಗತವಸೇನ ನವಧಾ ಪಚ್ಚಯಾ ಹೋನ್ತಿ। ಉಪನಿಸ್ಸಯೇ ಅಪುಬ್ಬಂ ನತ್ಥಿ। ಪುರೇಜಾತಪಚ್ಚಯೇ ರೂಪಸದ್ದಗನ್ಧರಸಾಯತನಾನಿ ಆರಮ್ಮಣಆರಮ್ಮಣಾಧಿಪತಿಉಪನಿಸ್ಸಯಪುರೇಜಾತಅತ್ಥಿಅವಿಗತವಸೇನ ಛಧಾ ಪಚ್ಚಯಾ ಹೋನ್ತಿ। ಏತ್ತಕಮೇವೇತ್ಥ ಅಪುಬ್ಬಂ। ಪಚ್ಛಾಜಾತಾದೀಸು ಅಪುಬ್ಬಂ ನತ್ಥಿ। ಆಹಾರಪಚ್ಚಯೇ ಕಬಳೀಕಾರಾಹಾರೋ ಆರಮ್ಮಣಆರಮ್ಮಣಾಧಿಪತಿಉಪನಿಸ್ಸಯಆಹಾರಅತ್ಥಿಅವಿಗತವಸೇನ ಛಧಾ ಪಚ್ಚಯೋ ಹೋತಿ। ಇನ್ದ್ರಿಯಾದೀಸು ಅಪುಬ್ಬಂ ನತ್ಥಿ। ಏವಮೇತ್ಥ ಏಕಧಮ್ಮಸ್ಸ ಅನೇಕಪಚ್ಚಯಭಾವತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋ।
Sahajātapaccaye catūsu tāva khandhesu ekekassa dhammassa anekapaccayabhāvo vuttanayeneva veditabbo. Cattāri mahābhūtāni ārammaṇaārammaṇādhipatisahajātaaññamaññanissayaupanissayapurejātaatthiavigatavasena navadhā paccayā honti. Hadayavatthu tesañceva vippayuttassa ca vasena dasadhā paccayo hoti. Aññamaññapaccaye apubbaṃ natthi. Nissayapaccaye cakkhāyatanādīni ārammaṇaārammaṇādhipatinissayaupanissayapurejātaindriyavippayuttaatthiavigatavasena navadhā paccayā honti. Upanissaye apubbaṃ natthi. Purejātapaccaye rūpasaddagandharasāyatanāni ārammaṇaārammaṇādhipatiupanissayapurejātaatthiavigatavasena chadhā paccayā honti. Ettakamevettha apubbaṃ. Pacchājātādīsu apubbaṃ natthi. Āhārapaccaye kabaḷīkārāhāro ārammaṇaārammaṇādhipatiupanissayaāhāraatthiavigatavasena chadhā paccayo hoti. Indriyādīsu apubbaṃ natthi. Evamettha ekadhammassa anekapaccayabhāvatopi viññātabbo vinicchayo.
ಏಕಪಚ್ಚಯಸ್ಸ ಅನೇಕಪಚ್ಚಯಭಾವತೋತಿ ಹೇತುಪಚ್ಚಯಾದೀಸು ಯಸ್ಸ ಕಸ್ಸಚಿ ಏಕಸ್ಸ ಪಚ್ಚಯಸ್ಸ ಯೇನಾಕಾರೇನ ಯೇನತ್ಥೇನ ಯೋ ಪಚ್ಚಯುಪ್ಪನ್ನಾನಂ ಪಚ್ಚಯೋ ಹೋತಿ, ತಂ ಆಕಾರಂ ತಂ ಅತ್ಥಂ ಅವಿಜಹಿತ್ವಾವ ಅಞ್ಞೇಹಿಪಿ ಯೇಹಾಕಾರೇಹಿ ಯೇಹಿ ಅತ್ಥೇಹಿ ಸೋ ತಸ್ಮಿಞ್ಞೇವ ಖಣೇ ತೇಸಂ ಧಮ್ಮಾನಂ ಅನೇಕಪಚ್ಚಯಭಾವಂ ಗಚ್ಛತಿ, ತತೋ ಅನೇಕಪಚ್ಚಯಭಾವತೋ ತಸ್ಸ ವಿನಿಚ್ಛಯೋ ವೇದಿತಬ್ಬೋತಿ ಅತ್ಥೋ। ಸೇಯ್ಯಥಿದಂ – ಅಮೋಹೋ ಹೇತುಪಚ್ಚಯೋ, ಸೋ ಹೇತುಪಚ್ಚಯತ್ತಂ ಅವಿಜಹನ್ತೋವ ಅಧಿಪತಿಸಹಜಾತಅಞ್ಞಮಞ್ಞನಿಸ್ಸಯವಿಪಾಕಇನ್ದ್ರಿಯಮಗ್ಗಸಮ್ಪಯುತ್ತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ಏಕಾದಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಅಲೋಭಾದೋಸಾ ತತೋ ಅಧಿಪತಿಇನ್ದ್ರಿಯಮಗ್ಗಪಚ್ಚಯೇ ತಯೋ ಅಪನೇತ್ವಾ ಸೇಸಾನಂ ವಸೇನ ಅನೇಕಪಚ್ಚಯಭಾವಂ ಗಚ್ಛನ್ತಿ। ಇದಂ ವಿಪಾಕಹೇತೂಸುಯೇವ ಲಬ್ಭತಿ, ಕುಸಲಕಿರಿಯೇಸು ಪನ ವಿಪಾಕಪಚ್ಚಯತಾ ಪರಿಹಾಯತಿ। ಲೋಭದೋಸಮೋಹಾ ತೇ ತಯೋ ವಿಪಾಕಞ್ಚಾತಿ ಚತ್ತಾರೋ ಅಪನೇತ್ವಾ ಸೇಸಾನಂ ವಸೇನ ಅನೇಕಪಚ್ಚಯಭಾವಂ ಗಚ್ಛನ್ತಿ।
Ekapaccayassa anekapaccayabhāvatoti hetupaccayādīsu yassa kassaci ekassa paccayassa yenākārena yenatthena yo paccayuppannānaṃ paccayo hoti, taṃ ākāraṃ taṃ atthaṃ avijahitvāva aññehipi yehākārehi yehi atthehi so tasmiññeva khaṇe tesaṃ dhammānaṃ anekapaccayabhāvaṃ gacchati, tato anekapaccayabhāvato tassa vinicchayo veditabboti attho. Seyyathidaṃ – amoho hetupaccayo, so hetupaccayattaṃ avijahantova adhipatisahajātaaññamaññanissayavipākaindriyamaggasampayuttavippayuttaatthiavigatānaṃ vasena aparehipi ekādasahākārehi anekapaccayabhāvaṃ gacchati. Alobhādosā tato adhipatiindriyamaggapaccaye tayo apanetvā sesānaṃ vasena anekapaccayabhāvaṃ gacchanti. Idaṃ vipākahetūsuyeva labbhati, kusalakiriyesu pana vipākapaccayatā parihāyati. Lobhadosamohā te tayo vipākañcāti cattāro apanetvā sesānaṃ vasena anekapaccayabhāvaṃ gacchanti.
ಆರಮ್ಮಣಪಚ್ಚಯೋ ತಂ ಆರಮ್ಮಣಪಚ್ಚಯತ್ತಂ ಅವಿಜಹನ್ತಂಯೇವ ಆರಮ್ಮಣಾಧಿಪತಿನಿಸ್ಸಯಉಪನಿಸ್ಸಯಪುರೇಜಾತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ಸತ್ತಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಅಯಮೇತ್ಥ ಉಕ್ಕಟ್ಠಪರಿಚ್ಛೇದೋ, ಅರೂಪಧಮ್ಮಾನಂ ಪನ ಅತೀತಾನಾಗತಾನಂ ವಾ ರೂಪಧಮ್ಮಾನಂ ಆರಮ್ಮಣಪಚ್ಚಯಭಾವೇ ಸತಿ ಆರಮ್ಮಣಾಧಿಪತಿಆರಮ್ಮಣೂಪನಿಸ್ಸಯಮತ್ತಞ್ಞೇವ ಉತ್ತರಿ ಲಬ್ಭತಿ। ಅಧಿಪತಿಪಚ್ಚಯೇ ವೀಮಂಸಾ ಅಮೋಹಸದಿಸಾ। ಛನ್ದೋ ಅಧಿಪತಿಪಚ್ಚಯೋ ಅಧಿಪತಿಪಚ್ಚಯತ್ತಂ ಅವಿಜಹನ್ತೋವ ಸಹಜಾತಅಞ್ಞಮಞ್ಞನಿಸ್ಸಯವಿಪಾಕಸಮ್ಪಯುತ್ತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ಅಟ್ಠಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ವೀರಿಯಂ ತೇಸಞ್ಚೇವ ಇನ್ದ್ರಿಯಮಗ್ಗಪಚ್ಚಯಾನಞ್ಚಾತಿ ಇಮೇಸಂ ವಸೇನ ಅಪರೇಹಿಪಿ ದಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಚಿತ್ತಂ ತತೋ ಮಗ್ಗಪಚ್ಚಯಂ ಅಪನೇತ್ವಾ ಆಹಾರಪಚ್ಚಯಂ ಪಕ್ಖಿಪಿತ್ವಾ ಇಮೇಸಂ ವಸೇನ ಅಧಿಪತಿಪಚ್ಚಯತೋ ಉತ್ತರಿ ದಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಆರಮ್ಮಣಾಧಿಪತಿನೋ ಪನ ಹೇಟ್ಠಾ ಆರಮ್ಮಣಪಚ್ಚಯೇ ವುತ್ತನಯೇನೇವ ಅನೇಕಪಚ್ಚಯಭಾವೋ ವೇದಿತಬ್ಬೋ।
Ārammaṇapaccayo taṃ ārammaṇapaccayattaṃ avijahantaṃyeva ārammaṇādhipatinissayaupanissayapurejātavippayuttaatthiavigatānaṃ vasena aparehipi sattahākārehi anekapaccayabhāvaṃ gacchati. Ayamettha ukkaṭṭhaparicchedo, arūpadhammānaṃ pana atītānāgatānaṃ vā rūpadhammānaṃ ārammaṇapaccayabhāve sati ārammaṇādhipatiārammaṇūpanissayamattaññeva uttari labbhati. Adhipatipaccaye vīmaṃsā amohasadisā. Chando adhipatipaccayo adhipatipaccayattaṃ avijahantova sahajātaaññamaññanissayavipākasampayuttavippayuttaatthiavigatānaṃ vasena aparehipi aṭṭhahākārehi anekapaccayabhāvaṃ gacchati. Vīriyaṃ tesañceva indriyamaggapaccayānañcāti imesaṃ vasena aparehipi dasahākārehi anekapaccayabhāvaṃ gacchati. Cittaṃ tato maggapaccayaṃ apanetvā āhārapaccayaṃ pakkhipitvā imesaṃ vasena adhipatipaccayato uttari dasahākārehi anekapaccayabhāvaṃ gacchati. Ārammaṇādhipatino pana heṭṭhā ārammaṇapaccaye vuttanayeneva anekapaccayabhāvo veditabbo.
ಅನನ್ತರಸಮನನ್ತರಪಚ್ಚಯಾ ಅನನ್ತರಸಮನನ್ತರಪಚ್ಚಯತ್ತಂ ಅವಿಜಹನ್ತಾವ ಉಪನಿಸ್ಸಯಕಮ್ಮಆಸೇವನನತ್ಥಿವಿಗತಾನಂ ವಸೇನ ಅಪರೇಹಿಪಿ ಪಞ್ಚಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛನ್ತಿ। ಅರಿಯಮಗ್ಗಚೇತನಾಯೇವ ಚೇತ್ಥ ಕಮ್ಮಪಚ್ಚಯತಂ ಲಭತಿ, ನ ಸೇಸಧಮ್ಮಾ। ಸಹಜಾತಪಚ್ಚಯೋ ಸಹಜಾತಪಚ್ಚಯತ್ತಂ ಅವಿಜಹನ್ತೋವ ಹೇತುಅಧಿಪತಿಅಞ್ಞಮಞ್ಞನಿಸ್ಸಯಕಮ್ಮವಿಪಾಕಆಹಾರಇನ್ದ್ರಿಯಝಾನಮಗ್ಗಸಮ್ಪಯುತ್ತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿ ಚುದ್ದಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಅಯಮ್ಪಿ ಉಕ್ಕಟ್ಠಪರಿಚ್ಛೇದೋ ವತ್ಥುಸಹಜಾತಾದೀನಂ ಪನ ವಸೇನೇತ್ಥ ಹೇತುಪಚ್ಚಯಾದೀನಂ ಅಭಾವೋಪಿ ವೇದಿತಬ್ಬೋ। ಅಞ್ಞಮಞ್ಞಪಚ್ಚಯೇಪಿ ಏಸೇವ ನಯೋ।
Anantarasamanantarapaccayā anantarasamanantarapaccayattaṃ avijahantāva upanissayakammaāsevananatthivigatānaṃ vasena aparehipi pañcahākārehi anekapaccayabhāvaṃ gacchanti. Ariyamaggacetanāyeva cettha kammapaccayataṃ labhati, na sesadhammā. Sahajātapaccayo sahajātapaccayattaṃ avijahantova hetuadhipatiaññamaññanissayakammavipākaāhāraindriyajhānamaggasampayuttavippayuttaatthiavigatānaṃ vasena aparehi cuddasahākārehi anekapaccayabhāvaṃ gacchati. Ayampi ukkaṭṭhaparicchedo vatthusahajātādīnaṃ pana vasenettha hetupaccayādīnaṃ abhāvopi veditabbo. Aññamaññapaccayepi eseva nayo.
ನಿಸ್ಸಯಪಚ್ಚಯೋ ನಿಸ್ಸಯಪಚ್ಚಯತ್ತಂ ಅವಿಜಹನ್ತೋವ ಚತುವೀಸತಿಯಾ ಪಚ್ಚಯೇಸು ಅತ್ತನೋ ನಿಸ್ಸಯಪಚ್ಚಯತ್ತಞ್ಚೇವ ಅನನ್ತರಸಮನನ್ತರಪಚ್ಛಾಜಾತಆಸೇವನನತ್ಥಿವಿಗತಪಚ್ಚಯೇ ಚ ಛ ಅಪನೇತ್ವಾ ಸೇಸಾನಂ ವಸೇನ ಅಪರೇಹಿಪಿ ಸತ್ತರಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಅಯಮ್ಪಿ ಉಕ್ಕಟ್ಠಪರಿಚ್ಛೇದೋವ ವತ್ಥುನಿಸ್ಸಯಾದೀನಂ ಪನ ವಸೇನೇತ್ಥ ಹೇತುಪಚ್ಚಯಾದೀನಂ ಆಭಾವೋಪಿ ವೇದಿತಬ್ಬೋ।
Nissayapaccayo nissayapaccayattaṃ avijahantova catuvīsatiyā paccayesu attano nissayapaccayattañceva anantarasamanantarapacchājātaāsevananatthivigatapaccaye ca cha apanetvā sesānaṃ vasena aparehipi sattarasahākārehi anekapaccayabhāvaṃ gacchati. Ayampi ukkaṭṭhaparicchedova vatthunissayādīnaṃ pana vasenettha hetupaccayādīnaṃ ābhāvopi veditabbo.
ಉಪನಿಸ್ಸಯಪಚ್ಚಯೇ ಆರಮ್ಮಣೂಪನಿಸ್ಸಯೋ ಆರಮ್ಮಣಾಧಿಪತಿಸದಿಸೋ। ಅನನ್ತರೂಪನಿಸ್ಸಯೋ ಅನನ್ತರೂಪನಿಸ್ಸಯಪಚ್ಚಯತ್ತಂ ಅವಿಜಹನ್ತೋವ ಅನನ್ತರಸಮನನ್ತರಕಮ್ಮಆಸೇವನನತ್ಥಿವಿಗತಾನಂ ವಸೇನ ಅಪರೇಹಿಪಿ ಛಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಅರಿಯಮಗ್ಗಚೇತನಾಯೇವ ಚೇತ್ಥ ಕಮ್ಮಪಚ್ಚಯತಂ ಲಭತಿ, ನ ಸೇಸಧಮ್ಮಾ। ಪಕತೂಪನಿಸ್ಸಯೋ ಪಕತೂಪನಿಸ್ಸಯೋವ। ಪುರೇಜಾತಪಚ್ಚಯೋ ಅತ್ತನೋ ಪುರೇಜಾತಪಚ್ಚಯತ್ತಂ ಅವಿಜಹನ್ತೋವ ಆರಮ್ಮಣಆರಮ್ಮಣಾಧಿಪತಿನಿಸ್ಸಯಉಪನಿಸ್ಸಯಇನ್ದ್ರಿಯವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ಅಟ್ಠಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಅಯಮ್ಪಿ ಉಕ್ಕಟ್ಠನಿದ್ದೇಸೋವ ಆರಮ್ಮಣಪುರೇಜಾತೇ ಪನೇತ್ಥ ನಿಸ್ಸಯಇನ್ದ್ರಿಯವಿಪ್ಪಯುತ್ತಪಚ್ಚಯತಾ ನ ಲಬ್ಭತಿ। ಇತೋ ಉತ್ತರಿಪಿ ಲಬ್ಭಮಾನಾಲಬ್ಭಮಾನಂ ವೇದಿತಬ್ಬಂ। ಪಚ್ಛಾಜಾತಪಚ್ಚಯೋ ಅತ್ತನೋ ಪಚ್ಛಾಜಾತಪಚ್ಚಯಭಾವಂ ಅವಿಜಹನ್ತೋವ ವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ತೀಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಆಸೇವನಪಚ್ಚಯೋ ಆಸೇವನಪಚ್ಚಯತ್ತಂ ಅವಿಜಹನ್ತೋವ ಅನನ್ತರಸಮನನ್ತರಉಪನಿಸ್ಸಯನತ್ಥಿವಿಗತಾನಂ ವಸೇನ ಅಪರೇಹಿಪಿ ಪಞ್ಚಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ।
Upanissayapaccaye ārammaṇūpanissayo ārammaṇādhipatisadiso. Anantarūpanissayo anantarūpanissayapaccayattaṃ avijahantova anantarasamanantarakammaāsevananatthivigatānaṃ vasena aparehipi chahākārehi anekapaccayabhāvaṃ gacchati. Ariyamaggacetanāyeva cettha kammapaccayataṃ labhati, na sesadhammā. Pakatūpanissayo pakatūpanissayova. Purejātapaccayo attano purejātapaccayattaṃ avijahantova ārammaṇaārammaṇādhipatinissayaupanissayaindriyavippayuttaatthiavigatānaṃ vasena aparehipi aṭṭhahākārehi anekapaccayabhāvaṃ gacchati. Ayampi ukkaṭṭhaniddesova ārammaṇapurejāte panettha nissayaindriyavippayuttapaccayatā na labbhati. Ito uttaripi labbhamānālabbhamānaṃ veditabbaṃ. Pacchājātapaccayo attano pacchājātapaccayabhāvaṃ avijahantova vippayuttaatthiavigatānaṃ vasena aparehipi tīhākārehi anekapaccayabhāvaṃ gacchati. Āsevanapaccayo āsevanapaccayattaṃ avijahantova anantarasamanantaraupanissayanatthivigatānaṃ vasena aparehipi pañcahākārehi anekapaccayabhāvaṃ gacchati.
ಕಮ್ಮಪಚ್ಚಯೋ ಕಮ್ಮಪಚ್ಚಯತ್ತಂ ಅವಿಜಹನ್ತೋವ ಏಕಕ್ಖಣಿಕೋ ತಾವ ಸಹಜಾತಅಞ್ಞಮಞ್ಞನಿಸ್ಸಯವಿಪಾಕಆಹಾರಸಮ್ಪಯುತ್ತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ನವಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ನಾನಾಕ್ಖಣಿಕೋ ಉಪನಿಸ್ಸಯಅನನ್ತರಸಮನನ್ತರನತ್ಥಿವಿಗತಾನಂ ವಸೇನ ಅಪರೇಹಿಪಿ ಪಞ್ಚಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ವಿಪಾಕಪಚ್ಚಯೋ ವಿಪಾಕಪಚ್ಚಯತ್ತಂ ಅವಿಜಹನ್ತೋವ ಹೇತುಅಧಿಪತಿಸಹಜಾತಅಞ್ಞಮಞ್ಞನಿಸ್ಸಯಕಮ್ಮಆಹಾರಇನ್ದ್ರಿಯಝಾನಮಗ್ಗಸಮ್ಪಯುತ್ತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ಚುದ್ದಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಆಹಾರಪಚ್ಚಯೇ ಕಬಳೀಕಾರೋ ಆಹಾರೋ ಆಹಾರಪಚ್ಚಯತ್ತಂ ಅವಿಜಹನ್ತೋವ ಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ದ್ವೀಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಸೇಸಾ ತಯೋ ಆಹಾರಪಚ್ಚಯತ್ತಂ ಅವಿಜಹನ್ತಾವ ಯಥಾನುರೂಪಂ ಅಧಿಪತಿಸಹಜಾತಅಞ್ಞಮಞ್ಞನಿಸ್ಸಯಕಮ್ಮವಿಪಾಕಇನ್ದ್ರಿಯಸಮ್ಪಯುತ್ತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ಏಕಾದಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛನ್ತಿ।
Kammapaccayo kammapaccayattaṃ avijahantova ekakkhaṇiko tāva sahajātaaññamaññanissayavipākaāhārasampayuttavippayuttaatthiavigatānaṃ vasena aparehipi navahākārehi anekapaccayabhāvaṃ gacchati. Nānākkhaṇiko upanissayaanantarasamanantaranatthivigatānaṃ vasena aparehipi pañcahākārehi anekapaccayabhāvaṃ gacchati. Vipākapaccayo vipākapaccayattaṃ avijahantova hetuadhipatisahajātaaññamaññanissayakammaāhāraindriyajhānamaggasampayuttavippayuttaatthiavigatānaṃ vasena aparehipi cuddasahākārehi anekapaccayabhāvaṃ gacchati. Āhārapaccaye kabaḷīkāro āhāro āhārapaccayattaṃ avijahantova atthiavigatānaṃ vasena aparehipi dvīhākārehi anekapaccayabhāvaṃ gacchati. Sesā tayo āhārapaccayattaṃ avijahantāva yathānurūpaṃ adhipatisahajātaaññamaññanissayakammavipākaindriyasampayuttavippayuttaatthiavigatānaṃ vasena aparehipi ekādasahākārehi anekapaccayabhāvaṃ gacchanti.
ಇನ್ದ್ರಿಯಪಚ್ಚಯೇ ರೂಪಿನೋ ಪಞ್ಚಿನ್ದ್ರಿಯಾ ಇನ್ದ್ರಿಯಪಚ್ಚಯತ್ತಂ ಅವಿಜಹನ್ತಾವ ನಿಸ್ಸಯಪುರೇಜಾತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ಪಞ್ಚಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛನ್ತಿ। ರೂಪಜೀವಿತಿನ್ದ್ರಿಯಮ್ಪಿ ಇನ್ದ್ರಿಯಪಚ್ಚಯತ್ತಂ ಅವಿಜಹನ್ತಞ್ಞೇವ ಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ದ್ವೀಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಅರೂಪಿನೋ ಇನ್ದ್ರಿಯಾನಿಪಿ ಯಥಾನುರೂಪಂ ಇನ್ದ್ರಿಯಪಚ್ಚಯತ್ತಂ ಅವಿಜಹನ್ತಾನೇವ ಹೇತುಅಧಿಪತಿಸಹಜಾತಅಞ್ಞಮಞ್ಞನಿಸ್ಸಯವಿಪಾಕಆಹಾರಝಾನಮಗ್ಗಸಮ್ಪಯುತ್ತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ತೇರಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛನ್ತಿ। ಝಾನಪಚ್ಚಯೋ ಝಾನಪಚ್ಚಯತ್ತಂ ಅವಿಜಹನ್ತೋವ ಯಥಾನುರೂಪಂ ಸಹಜಾತಅಞ್ಞಮಞ್ಞನಿಸ್ಸಯವಿಪಾಕಇನ್ದ್ರಿಯಮಗ್ಗಸಮ್ಪಯುತ್ತವಿಪ್ಪಯುತ್ತಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ದಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ಮಗ್ಗಪಚ್ಚಯೋ ಮಗ್ಗಪಚ್ಚಯತ್ತಂ ಅವಿಜಹನ್ತೋವ ಯಥಾನುರೂಪಂ ಝಾನಪಚ್ಚಯೇ ವುತ್ತಾನಂ ದಸನ್ನಂ ಹೇತುಅಧಿಪತೀನಞ್ಚಾತಿ ಇಮೇಸಂ ವಸೇನ ಅಪರೇಹಿಪಿ ದ್ವಾದಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ।
Indriyapaccaye rūpino pañcindriyā indriyapaccayattaṃ avijahantāva nissayapurejātavippayuttaatthiavigatānaṃ vasena aparehipi pañcahākārehi anekapaccayabhāvaṃ gacchanti. Rūpajīvitindriyampi indriyapaccayattaṃ avijahantaññeva atthiavigatānaṃ vasena aparehipi dvīhākārehi anekapaccayabhāvaṃ gacchati. Arūpino indriyānipi yathānurūpaṃ indriyapaccayattaṃ avijahantāneva hetuadhipatisahajātaaññamaññanissayavipākaāhārajhānamaggasampayuttavippayuttaatthiavigatānaṃ vasena aparehipi terasahākārehi anekapaccayabhāvaṃ gacchanti. Jhānapaccayo jhānapaccayattaṃ avijahantova yathānurūpaṃ sahajātaaññamaññanissayavipākaindriyamaggasampayuttavippayuttaatthiavigatānaṃ vasena aparehipi dasahākārehi anekapaccayabhāvaṃ gacchati. Maggapaccayo maggapaccayattaṃ avijahantova yathānurūpaṃ jhānapaccaye vuttānaṃ dasannaṃ hetuadhipatīnañcāti imesaṃ vasena aparehipi dvādasahākārehi anekapaccayabhāvaṃ gacchati.
ಸಮ್ಪಯುತ್ತಪಚ್ಚಯೋ ಸಮ್ಪಯುತ್ತಪಚ್ಚಯತ್ತಂ ಅವಿಜಹನ್ತೋವ ಯಥಾನುರೂಪಂ ಹೇತುಅಧಿಪತಿಸಹಜಾತಅಞ್ಞಮಞ್ಞನಿಸ್ಸಯಕಮ್ಮವಿಪಾಕಆಹಾರಇನ್ದ್ರಿಯಝಾನಮಗ್ಗಅತ್ಥಿಅವಿಗತಾನಂ ವಸೇನ ಅಪರೇಹಿಪಿ ತೇರಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ವಿಪ್ಪಯುತ್ತಪಚ್ಚಯೋ ವಿಪ್ಪಯುತ್ತಪಚ್ಚಯತ್ತಂ ಅವಿಜಹನ್ತೋವ ಅನನ್ತರಸಮನನ್ತರಆಸೇವನಸಮ್ಪಯುತ್ತನತ್ಥಿವಿಗತಸಙ್ಖಾತೇ ಛ ಪಚ್ಚಯೇ ಅಪನೇತ್ವಾ ಸೇಸಾನಂ ವಸೇನ ಯಥಾನುರೂಪಂ ಅಪರೇಹಿಪಿ ಸತ್ತರಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ತತ್ಥ ರೂಪಸ್ಸ ಚ ಅರೂಪಸ್ಸ ಚ ಪಚ್ಚಯವಿಭಾಗೋ ವೇದಿತಬ್ಬೋ। ಅತ್ಥಿಪಚ್ಚಯೋ ಅತ್ಥಿಪಚ್ಚಯತ್ತಂ ಅವಿಜಹನ್ತೋವ ಅನನ್ತರಸಮನನ್ತರಆಸೇವನನತ್ಥಿವಿಗತಸಙ್ಖಾತೇ ಪಞ್ಚ ಪಚ್ಚಯೇ ಅಪನೇತ್ವಾ ಸೇಸಾನಂ ವಸೇನ ಯಥಾನುರೂಪಂ ಅಪರೇಹಿ ಅಟ್ಠಾರಸಹಾಕಾರೇಹಿ ಅನೇಕಪಚ್ಚಯಭಾವಂ ಗಚ್ಛತಿ। ನತ್ಥಿಪಚ್ಚಯವಿಗತಪಚ್ಚಯಾ ಅನನ್ತರಪಚ್ಚಯಸದಿಸಾ । ಅವಿಗತಪಚ್ಚಯೋ ಅತ್ಥಿಪಚ್ಚಯಸದಿಸೋಯೇವಾತಿ ಏವಮೇತ್ಥ ಏಕಪಚ್ಚಯಸ್ಸ ಅನೇಕಪಚ್ಚಯಭಾವತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋ।
Sampayuttapaccayo sampayuttapaccayattaṃ avijahantova yathānurūpaṃ hetuadhipatisahajātaaññamaññanissayakammavipākaāhāraindriyajhānamaggaatthiavigatānaṃ vasena aparehipi terasahākārehi anekapaccayabhāvaṃ gacchati. Vippayuttapaccayo vippayuttapaccayattaṃ avijahantova anantarasamanantaraāsevanasampayuttanatthivigatasaṅkhāte cha paccaye apanetvā sesānaṃ vasena yathānurūpaṃ aparehipi sattarasahākārehi anekapaccayabhāvaṃ gacchati. Tattha rūpassa ca arūpassa ca paccayavibhāgo veditabbo. Atthipaccayo atthipaccayattaṃ avijahantova anantarasamanantaraāsevananatthivigatasaṅkhāte pañca paccaye apanetvā sesānaṃ vasena yathānurūpaṃ aparehi aṭṭhārasahākārehi anekapaccayabhāvaṃ gacchati. Natthipaccayavigatapaccayā anantarapaccayasadisā . Avigatapaccayo atthipaccayasadisoyevāti evamettha ekapaccayassa anekapaccayabhāvatopi viññātabbo vinicchayo.
ಪಚ್ಚಯಸಭಾಗತೋತಿ ಏತೇಸು ಹಿ ಚತುವೀಸತಿಯಾ ಪಚ್ಚಯೇಸು ಅನನ್ತರಸಮನನ್ತರಅನನ್ತರೂಪನಿಸ್ಸಯಆಸೇವನನತ್ಥಿವಿಗತಾ ಸಭಾಗಾ, ತಥಾ ಆರಮ್ಮಣಆರಮ್ಮಣಾಧಿಪತಿಆರಮ್ಮಣೂಪನಿಸ್ಸಯಾತಿ ಇಮಿನಾ ಉಪಾಯೇನೇತ್ಥ ಪಚ್ಚಯಸಭಾಗತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋ।
Paccayasabhāgatoti etesu hi catuvīsatiyā paccayesu anantarasamanantaraanantarūpanissayaāsevananatthivigatā sabhāgā, tathā ārammaṇaārammaṇādhipatiārammaṇūpanissayāti iminā upāyenettha paccayasabhāgatopi viññātabbo vinicchayo.
ಪಚ್ಚಯವಿಸಭಾಗತೋತಿ ಪುರೇಜಾತಪಚ್ಚಯೋ ಪನೇತ್ಥ ಪಚ್ಛಾಜಾತಪಚ್ಚಯೇನ ವಿಸಭಾಗೋ, ತಥಾ ಸಮ್ಪಯುತ್ತಪಚ್ಚಯೋ ವಿಪ್ಪಯುತ್ತಪಚ್ಚಯೇನ, ಅತ್ಥಿಪಚ್ಚಯೋ ನತ್ಥಿಪಚ್ಚಯೇನ, ವಿಗತಪಚ್ಚಯೋ ಅವಿಗತಪಚ್ಚಯೇನಾತಿ ಇಮಿನಾ ಉಪಾಯೇನೇತ್ಥ ಪಚ್ಚಯವಿಸಭಾಗತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋ।
Paccayavisabhāgatoti purejātapaccayo panettha pacchājātapaccayena visabhāgo, tathā sampayuttapaccayo vippayuttapaccayena, atthipaccayo natthipaccayena, vigatapaccayo avigatapaccayenāti iminā upāyenettha paccayavisabhāgatopi viññātabbo vinicchayo.
ಯುಗಳಕತೋತಿ ಏತೇಸು ಚ ಅತ್ಥಸರಿಕ್ಖತಾಯ, ಸದ್ದಸರಿಕ್ಖತಾಯ, ಕಾಲಪಟಿಪಕ್ಖತಾಯ, ಹೇತುಫಲತಾಯ, ಅಞ್ಞಮಞ್ಞಪಟಿಪಕ್ಖತಾಯಾತಿ ಇಮೇಹಿ ಕಾರಣೇಹಿ ಯುಗಳಕತೋ ವಿಞ್ಞಾತಬ್ಬೋ ವಿನಿಚ್ಛಯೋ। ಅನನ್ತರಸಮನನ್ತರಾ ಹಿ ಅತ್ಥಸರಿಕ್ಖತಾಯ ಏಕಂ ಯುಗಳಕಂ ನಾಮ; ನಿಸ್ಸಯೂಪನಿಸ್ಸಯಾ ಸದ್ದಸರಿಕ್ಖತಾಯ, ಪುರೇಜಾತಪಚ್ಛಾಜಾತಾ ಕಾಲಪಟಿಪಕ್ಖತಾಯ, ಕಮ್ಮಪಚ್ಚಯವಿಪಾಕಪಚ್ಚಯಾ ಹೇತುಫಲತಾಯ, ಸಮ್ಪಯುತ್ತವಿಪ್ಪಯುತ್ತಪಚ್ಚಯಾ ಅಞ್ಞಮಞ್ಞಪಟಿಪಕ್ಖತಾಯ ಏಕಂ ಯುಗಳಕಂ ನಾಮ, ತಥಾ ಅತ್ಥಿನತ್ಥಿಪಚ್ಚಯಾ, ವಿಗತಾವಿಗತಪಚ್ಚಯಾ ಚಾತಿ ಏವಮೇತ್ಥ ಯುಗಳಕತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋ। ಜನಕಾಜನಕತೋತಿ ಏತೇಸು ಚ ಅನನ್ತರಸಮನನ್ತರಾನನ್ತರೂಪನಿಸ್ಸಯಪಕತೂಪನಿಸ್ಸಯಾಸೇವನಪಚ್ಚಯಾ ನಾನಾಕ್ಖಣಿಕೋ, ಕಮ್ಮಪಚ್ಚಯೋ, ನತ್ಥಿವಿಗತಪಚ್ಚಯಾತಿ ಇಮೇ ಪಚ್ಚಯಾ ಜನಕಾಯೇವ, ನ ಅಜನಕಾ। ಪಚ್ಛಾಜಾತಪಚ್ಚಯೋ ಕೇವಲಂ ಉಪತ್ಥಮ್ಭಕೋಯೇವ, ನ ಜನಕೋ। ಸೇಸಾ ಜನಕಾ ಚ ಅಜನಕಾ ಚ ಉಪತ್ಥಮ್ಭಕಾ ಚಾತಿ ಅತ್ಥೋ। ಏವಮೇತ್ಥ ಜನಕಾಜನಕತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋ।
Yugaḷakatoti etesu ca atthasarikkhatāya, saddasarikkhatāya, kālapaṭipakkhatāya, hetuphalatāya, aññamaññapaṭipakkhatāyāti imehi kāraṇehi yugaḷakato viññātabbo vinicchayo. Anantarasamanantarā hi atthasarikkhatāya ekaṃ yugaḷakaṃ nāma; nissayūpanissayā saddasarikkhatāya, purejātapacchājātā kālapaṭipakkhatāya, kammapaccayavipākapaccayā hetuphalatāya, sampayuttavippayuttapaccayā aññamaññapaṭipakkhatāya ekaṃ yugaḷakaṃ nāma, tathā atthinatthipaccayā, vigatāvigatapaccayā cāti evamettha yugaḷakatopi viññātabbo vinicchayo. Janakājanakatoti etesu ca anantarasamanantarānantarūpanissayapakatūpanissayāsevanapaccayā nānākkhaṇiko, kammapaccayo, natthivigatapaccayāti ime paccayā janakāyeva, na ajanakā. Pacchājātapaccayo kevalaṃ upatthambhakoyeva, na janako. Sesā janakā ca ajanakā ca upatthambhakā cāti attho. Evamettha janakājanakatopi viññātabbo vinicchayo.
ಸಬ್ಬಟ್ಠಾನಿಕಾಸಬ್ಬಟ್ಠಾನಿಕತೋತಿ ಏತೇಸು ಚ ಸಹಜಾತನಿಸ್ಸಯಅತ್ಥಿಅವಿಗತಪಚ್ಚಯಾ ಸಬ್ಬಟ್ಠಾನಿಕಾ ನಾಮ, ಸಬ್ಬೇಸಂ ಸಙ್ಖತಾನಂ ರೂಪಾರೂಪಧಮ್ಮಾನಂ ಠಾನಭೂತಾ ಕಾರಣಭೂತಾತಿ ಅತ್ಥೋ। ಏತೇಹಿ ವಿನಾ ಉಪ್ಪಜ್ಜಮಾನೋ ಏಕಧಮ್ಮೋಪಿ ನತ್ಥೀತಿ। ಆರಮ್ಮಣಆರಮ್ಮಣಾಧಿಪತಿಅನನ್ತರಸಮನನ್ತರಾನನ್ತರೂಪನಿಸ್ಸಯಪಕತೂಪನಿಸ್ಸಯಾಸೇವನಸಮ್ಪಯುತ್ತನತ್ಥಿವಿಗತಪಚ್ಚಯಾ ಅಸಬ್ಬಟ್ಠಾನಿಕಾ ನಾಮ। ನ ಸಬ್ಬೇಸಂ ರೂಪಾರೂಪಧಮ್ಮಾನಂ ಠಾನಭೂತಾ, ಅರೂಪಕ್ಖನ್ಧಾನಞ್ಞೇವ ಪನ ಠಾನಭೂತಾ ಕಾರಣಭೂತಾತಿ ಅತ್ಥೋ। ಅರೂಪಧಮ್ಮಾಯೇವ ಹಿ ಏತೇಹಿ ಉಪ್ಪಜ್ಜನ್ತಿ, ನ ರೂಪಧಮ್ಮಾ। ಪುರೇಜಾತಪಚ್ಛಾಜಾತಾಪಿ ಅಸಬ್ಬಟ್ಠಾನಿಕಾ ಅರೂಪರೂಪಾನಞ್ಞೇವ ಯಥಾಕ್ಕಮೇನ ಪಚ್ಚಯಭಾವತೋ। ವುತ್ತಾವಸೇಸಾಪಿ ಏಕಚ್ಚಾನಂ ರೂಪಾರೂಪಧಮ್ಮಾನಂ ಉಪ್ಪತ್ತಿಹೇತುತೋ ನ ಸಬ್ಬಟ್ಠಾನಿಕಾತಿ ಏವಮೇತ್ಥ ಸಬ್ಬಟ್ಠಾನಿಕಾ ಸಬ್ಬಟ್ಠಾನಿಕತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋ।
Sabbaṭṭhānikāsabbaṭṭhānikatoti etesu ca sahajātanissayaatthiavigatapaccayā sabbaṭṭhānikā nāma, sabbesaṃ saṅkhatānaṃ rūpārūpadhammānaṃ ṭhānabhūtā kāraṇabhūtāti attho. Etehi vinā uppajjamāno ekadhammopi natthīti. Ārammaṇaārammaṇādhipatianantarasamanantarānantarūpanissayapakatūpanissayāsevanasampayuttanatthivigatapaccayā asabbaṭṭhānikā nāma. Na sabbesaṃ rūpārūpadhammānaṃ ṭhānabhūtā, arūpakkhandhānaññeva pana ṭhānabhūtā kāraṇabhūtāti attho. Arūpadhammāyeva hi etehi uppajjanti, na rūpadhammā. Purejātapacchājātāpi asabbaṭṭhānikā arūparūpānaññeva yathākkamena paccayabhāvato. Vuttāvasesāpi ekaccānaṃ rūpārūpadhammānaṃ uppattihetuto na sabbaṭṭhānikāti evamettha sabbaṭṭhānikā sabbaṭṭhānikatopi viññātabbo vinicchayo.
ರೂಪಂ ರೂಪಸ್ಸಾತಿಆದಿವಿಕಪ್ಪತೋತಿ ಏತೇಸು ಚ ಚತುವೀಸತಿಯಾ ಪಚ್ಚಯೇಸು ಏಕಪಚ್ಚಯೋಪಿ ಏಕನ್ತೇನ ರೂಪಮೇವ ಹುತ್ವಾ ರೂಪಸ್ಸೇವ ಪಚ್ಚಯೋ ನಾಮ ನತ್ಥಿ, ಏಕನ್ತೇನ ಪನ ರೂಪಂ ಹುತ್ವಾ ಅರೂಪಸ್ಸೇವ ಪಚ್ಚಯೋ ನಾಮ ಅತ್ಥಿ। ಕತರೋ ಪನೇಸೋತಿ? ಪುರೇಜಾತಪಚ್ಚಯೋ। ಪುರೇಜಾತಪಚ್ಚಯೋ ಹಿ ಏಕನ್ತೇನ ರೂಪಮೇವ ಹುತ್ವಾ ಅರೂಪಸ್ಸೇವ ಪಚ್ಚಯೋ ಹೋತಿ। ಏಕನ್ತೇನ ರೂಪಮೇವ ಹುತ್ವಾ ರೂಪಾರೂಪಸ್ಸೇವ ಪಚ್ಚಯೋ ನಾಮಾತಿಪಿ ನತ್ಥಿ, ಏಕನ್ತೇನ ಪನ ಅರೂಪಂ ಹುತ್ವಾ ಅರೂಪಸ್ಸೇವ ಪಚ್ಚಯೋ ನಾಮ ಅತ್ಥಿ। ಕತರೋ ಪನೇಸೋತಿ? ಅನನ್ತರಸಮನನ್ತರಆಸೇವನಸಮ್ಪಯುತ್ತನತ್ಥಿವಿಗತವಸೇನ ಛಬ್ಬಿಧೋ। ಸೋ ಹಿ ಸಬ್ಬೋಪಿ ಏಕನ್ತೇನ ಅರೂಪಮೇವ ಹುತ್ವಾ ಅರೂಪಸ್ಸೇವ ಪಚ್ಚಯೋ ಹೋತಿ। ಏಕನ್ತೇನ ಅರೂಪಮೇವ ಹುತ್ವಾಪಿ ಏಕನ್ತೇನ ರೂಪಸ್ಸೇವ ಪಚ್ಚಯೋ ನಾಮಾತಿಪಿ ಅತ್ಥಿ। ಕತರೋ ಪನೇಸೋತಿ? ಪಚ್ಛಾಜಾತಪಚ್ಚಯೋ। ಸೋ ಹಿ ಏಕನ್ತೇನ ಅರೂಪಂ ಹುತ್ವಾ ರೂಪಸ್ಸೇವ ಪಚ್ಚಯೋ ಹೋತಿ; ಏಕನ್ತೇನ ಪನ ಅರೂಪಧಮ್ಮೋವ ಹುತ್ವಾ ರೂಪಾರೂಪಾನಂ ಪಚ್ಚಯೋಪಿ ಅತ್ಥಿ। ಕತರೋ ಪನೇಸೋತಿ? ಹೇತುಕಮ್ಮವಿಪಾಕಝಾನಮಗ್ಗವಸೇನ ಪಞ್ಚವಿಧೋ। ಸೋ ಹಿ ಸಬ್ಬೋಪಿ ಏಕನ್ತೇನ ಅರೂಪಮೇವ ಹುತ್ವಾ ರೂಪಧಮ್ಮಾನಂ ಅರೂಪಧಮ್ಮಾನಮ್ಪಿ ಪಚ್ಚಯೋ ಹೋತಿ। ಏಕನ್ತೇನ ಪನ ರೂಪಾರೂಪಮೇವ ಹುತ್ವಾ ರೂಪಸ್ಸೇವ ಪಚ್ಚಯೋ ನಾಮಾತಿಪಿ ನತ್ಥಿ, ಅರೂಪಸ್ಸೇವ ಪನ ಹೋತಿ। ಕತರೋ ಪನೇಸೋತಿ? ಆರಮ್ಮಣಪಚ್ಚಯೋ ಚೇವ ಉಪನಿಸ್ಸಯಪಚ್ಚಯೋ ಚ। ಇದಞ್ಹಿ ದ್ವಯಂ ಏಕನ್ತೇನ ರೂಪಾರೂಪಮೇವ ಹುತ್ವಾ ಅರೂಪಸ್ಸೇವ ಪಚ್ಚಯೋ ಹೋತಿ। ಏಕನ್ತೇನ ರೂಪಾರೂಪಮೇವ ಹುತ್ವಾ ಪನ ರೂಪಾರೂಪಸ್ಸೇವ ಪಚ್ಚಯೋ ನಾಮಾತಿಪಿ ಅತ್ಥಿ। ಕತರೋ ಪನೇಸೋತಿ? ಅಧಿಪತಿಸಹಜಾತಅಞ್ಞಮಞ್ಞನಿಸ್ಸಯಆಹಾರಇನ್ದ್ರಿಯವಿಪ್ಪಯುತ್ತಅತ್ಥಿಅವಿಗತವಸೇನ ನವವಿಧೋ। ಸೋ ಹಿ ಸಬ್ಬೋಪಿ ಏಕನ್ತೇನ ರೂಪಾರೂಪಮೇವ ಹುತ್ವಾ ರೂಪಾರೂಪಸ್ಸೇವ ಪಚ್ಚಯೋ ಹೋತೀತಿ ಏವಮೇತ್ಥ ರೂಪಂ ರೂಪಸ್ಸಾತಿಆದಿವಿಕಪ್ಪತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋ।
Rūpaṃ rūpassātiādivikappatoti etesu ca catuvīsatiyā paccayesu ekapaccayopi ekantena rūpameva hutvā rūpasseva paccayo nāma natthi, ekantena pana rūpaṃ hutvā arūpasseva paccayo nāma atthi. Kataro panesoti? Purejātapaccayo. Purejātapaccayo hi ekantena rūpameva hutvā arūpasseva paccayo hoti. Ekantena rūpameva hutvā rūpārūpasseva paccayo nāmātipi natthi, ekantena pana arūpaṃ hutvā arūpasseva paccayo nāma atthi. Kataro panesoti? Anantarasamanantaraāsevanasampayuttanatthivigatavasena chabbidho. So hi sabbopi ekantena arūpameva hutvā arūpasseva paccayo hoti. Ekantena arūpameva hutvāpi ekantena rūpasseva paccayo nāmātipi atthi. Kataro panesoti? Pacchājātapaccayo. So hi ekantena arūpaṃ hutvā rūpasseva paccayo hoti; ekantena pana arūpadhammova hutvā rūpārūpānaṃ paccayopi atthi. Kataro panesoti? Hetukammavipākajhānamaggavasena pañcavidho. So hi sabbopi ekantena arūpameva hutvā rūpadhammānaṃ arūpadhammānampi paccayo hoti. Ekantena pana rūpārūpameva hutvā rūpasseva paccayo nāmātipi natthi, arūpasseva pana hoti. Kataro panesoti? Ārammaṇapaccayo ceva upanissayapaccayo ca. Idañhi dvayaṃ ekantena rūpārūpameva hutvā arūpasseva paccayo hoti. Ekantena rūpārūpameva hutvā pana rūpārūpasseva paccayo nāmātipi atthi. Kataro panesoti? Adhipatisahajātaaññamaññanissayaāhāraindriyavippayuttaatthiavigatavasena navavidho. So hi sabbopi ekantena rūpārūpameva hutvā rūpārūpasseva paccayo hotīti evamettha rūpaṃ rūpassātiādivikappatopi viññātabbo vinicchayo.
ಭವಭೇದತೋತಿ ಇಮೇಸು ಪನ ಚತುವೀಸತಿಯಾ ಪಚ್ಚಯೇಸು ಪಞ್ಚವೋಕಾರಭವೇ ತಾವ ನ ಕೋಚಿ ಪಚ್ಚಯೋ ನ ಲಬ್ಭತಿ ನಾಮ। ಚತುವೋಕಾರಭವೇ ಪನ ತಯೋ ಪುರೇಜಾತಪಚ್ಛಾಜಾತವಿಪ್ಪಯುತ್ತಪಚ್ಚಯೇ ಅಪನೇತ್ವಾ ಸೇಸಾ ಏಕವೀಸತಿಮೇವ ಲಬ್ಭನ್ತಿ। ಏಕವೋಕಾರಭವೇ ಸಹಜಾತಅಞ್ಞಮಞ್ಞನಿಸ್ಸಯಕಮ್ಮಇನ್ದ್ರಿಯಅತ್ಥಿಅವಿಗತವಸೇನ ಸತ್ತೇವ ಲಬ್ಭನ್ತಿ। ಬಾಹಿರೇ ಪನ ಅನಿನ್ದ್ರಿಯಬದ್ಧರೂಪೇ ಸಹಜಾತಅಞ್ಞಮಞ್ಞನಿಸ್ಸಯಅತ್ಥಿಅವಿಗತವಸೇನ ಪಞ್ಚೇವ ಲಬ್ಭನ್ತೀತಿ ಏವಮೇತ್ಥ ಭವಭೇದತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋತಿ।
Bhavabhedatoti imesu pana catuvīsatiyā paccayesu pañcavokārabhave tāva na koci paccayo na labbhati nāma. Catuvokārabhave pana tayo purejātapacchājātavippayuttapaccaye apanetvā sesā ekavīsatimeva labbhanti. Ekavokārabhave sahajātaaññamaññanissayakammaindriyaatthiavigatavasena satteva labbhanti. Bāhire pana anindriyabaddharūpe sahajātaaññamaññanissayaatthiavigatavasena pañceva labbhantīti evamettha bhavabhedatopi viññātabbo vinicchayoti.
ಪಚ್ಚಯನಿದ್ದೇಸವಾರವಣ್ಣನಾ ನಿಟ್ಠಿತಾ।
Paccayaniddesavāravaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಪಟ್ಠಾನಪಾಳಿ • Paṭṭhānapāḷi / (೨) ಪಚ್ಚಯನಿದ್ದೇಸೋ • (2) Paccayaniddeso
