| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
ਪਚ੍ਚਯਨਿਦ੍ਦੇਸਪਕਿਣ੍ਣਕવਿਨਿਚ੍ਛਯਕਥਾ
Paccayaniddesapakiṇṇakavinicchayakathā
ਇਦਾਨਿ ਏવਂ ਉਦ੍ਦੇਸਨਿਦ੍ਦੇਸਤੋ ਦਸ੍ਸਿਤੇਸੁ ਇਮੇਸੁ ਚਤੁવੀਸਤਿਯਾ ਪਚ੍ਚਯੇਸੁ ਞਾਣਚਾਰਸ੍ਸ વਿਸਦਭਾવਤ੍ਥਂ ਅਨੇਕਧਮ੍ਮਾਨਂ ਏਕਪਚ੍ਚਯਭਾવਤੋ, ਏਕਧਮ੍ਮਸ੍ਸ ਅਨੇਕਪਚ੍ਚਯਭਾવਤੋ, ਏਕਪਚ੍ਚਯਸ੍ਸ ਅਨੇਕਪਚ੍ਚਯਭਾવਤੋ, ਪਚ੍ਚਯਸਭਾਗਤੋ, ਪਚ੍ਚਯવਿਸਭਾਗਤੋ, ਯੁਗਲ਼ਕਤੋ, ਜਨਕਾਜਨਕਤੋ, ਸਬ੍ਬਟ੍ਠਾਨਿਕਾਸਬ੍ਬਟ੍ਠਾਨਿਕਤੋ, ਰੂਪਂ ਰੂਪਸ੍ਸਾਤਿਆਦਿવਿਕਪ੍ਪਤੋ, ਭવਭੇਦਤੋਤਿ ਇਮੇਸਂ ਦਸਨ੍ਨਂ ਪਦਾਨਂ વਸੇਨ ਪਕਿਣ੍ਣਕવਿਨਿਚ੍ਛਯੋ વੇਦਿਤਬ੍ਬੋ। ਤਤ੍ਥ ਅਨੇਕਧਮ੍ਮਾਨਂ ਏਕਪਚ੍ਚਯਭਾવਤੋਤਿ ਏਤੇਸੁ ਹਿ ਠਪੇਤ੍વਾ ਕਮ੍ਮਪਚ੍ਚਯਂ ਅવਸੇਸੇਸੁ ਤੇવੀਸਤਿਯਾ ਪਚ੍ਚਯੇਸੁ ਅਨੇਕਧਮ੍ਮਾ ਏਕਤੋ ਪਚ੍ਚਯਾ ਹੋਨ੍ਤਿ। ਕਮ੍ਮਪਚ੍ਚਯੋ ਪਨ ਏਕੋ ਚੇਤਨਾਧਮ੍ਮੋਯੇવਾਤਿ ਏવਂ ਤਾવੇਤ੍ਥ ਅਨੇਕਧਮ੍ਮਾਨਂ ਏਕਪਚ੍ਚਯਭਾવਤੋ વਿਨਿਚ੍ਛਯੋ વੇਦਿਤਬ੍ਬੋ।
Idāni evaṃ uddesaniddesato dassitesu imesu catuvīsatiyā paccayesu ñāṇacārassa visadabhāvatthaṃ anekadhammānaṃ ekapaccayabhāvato, ekadhammassa anekapaccayabhāvato, ekapaccayassa anekapaccayabhāvato, paccayasabhāgato, paccayavisabhāgato, yugaḷakato, janakājanakato, sabbaṭṭhānikāsabbaṭṭhānikato, rūpaṃ rūpassātiādivikappato, bhavabhedatoti imesaṃ dasannaṃ padānaṃ vasena pakiṇṇakavinicchayo veditabbo. Tattha anekadhammānaṃ ekapaccayabhāvatoti etesu hi ṭhapetvā kammapaccayaṃ avasesesu tevīsatiyā paccayesu anekadhammā ekato paccayā honti. Kammapaccayo pana eko cetanādhammoyevāti evaṃ tāvettha anekadhammānaṃ ekapaccayabhāvato vinicchayo veditabbo.
ਏਕਧਮ੍ਮਸ੍ਸ ਅਨੇਕਪਚ੍ਚਯਭਾવਤੋਤਿ ਹੇਤੁਪਚ੍ਚਯੇ ਤਾવ ਅਮੋਹੋ ਏਕੋ ਧਮ੍ਮੋ। ਸੋ ਪੁਰੇਜਾਤਕਮ੍ਮਾਹਾਰਝਾਨਪਚ੍ਚਯੋવ ਨ ਹੋਤਿ, ਸੇਸਾਨਂ વੀਸਤਿਯਾ ਪਚ੍ਚਯਾਨਂ વਸੇਨ ਪਚ੍ਚਯੋ ਹੋਤਿ। ਅਲੋਭਾਦੋਸਾ ਇਨ੍ਦ੍ਰਿਯਮਗ੍ਗਪਚ੍ਚਯਾਪਿ ਨ ਹੋਨ੍ਤਿ, ਸੇਸਾਨਂ ਅਟ੍ਠਾਰਸਨ੍ਨਂ ਪਚ੍ਚਯਾਨਂ વਸੇਨ ਪਚ੍ਚਯਾ ਹੋਨ੍ਤਿ। ਲੋਭਮੋਹਾ વਿਪਾਕਪਚ੍ਚਯਾਪਿ ਨ ਹੋਨ੍ਤਿ, ਸੇਸਾਨਂ ਸਤ੍ਤਰਸਨ੍ਨਂ ਪਚ੍ਚਯਾਨਂ વਸੇਨ ਪਚ੍ਚਯਾ ਹੋਨ੍ਤਿ। ਦੋਸੋ ਅਧਿਪਤਿਪਚ੍ਚਯੋਪਿ ਨ ਹੋਤਿ, ਸੇਸਾਨਂ ਸੋਲ਼ਸਨ੍ਨਂ ਪਚ੍ਚਯਾਨਂ વਸੇਨ ਪਚ੍ਚਯੋ ਹੋਤਿ। ਆਰਮ੍ਮਣਪਚ੍ਚਯੇ ਰੂਪਾਯਤਨਂ ਚਕ੍ਖੁવਿਞ੍ਞਾਣਧਾਤੁਯਾ ਆਰਮ੍ਮਣਪੁਰੇਜਾਤਅਤ੍ਥਿਅવਿਗਤવਸੇਨ ਚਤੁਧਾ ਪਚ੍ਚਯੋ; ਤਥਾ ਮਨੋਧਾਤੁਯਾ ਅਹੇਤੁਕਮਨੋવਿਞ੍ਞਾਣਧਾਤੁਯਾ ਚ। ਸਹੇਤੁਕਾਯ ਪਨ ਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯવਸੇਨਾਪਿ ਪਚ੍ਚਯੋ ਹੋਤਿ। ਇਮਿਨਾ ਨਯੇਨ ਸਬ੍ਬੇਸਂ ਆਰਮ੍ਮਣਪਚ੍ਚਯਧਮ੍ਮਾਨਂ ਅਨੇਕਪਚ੍ਚਯਭਾવੋ વੇਦਿਤਬ੍ਬੋ।
Ekadhammassa anekapaccayabhāvatoti hetupaccaye tāva amoho eko dhammo. So purejātakammāhārajhānapaccayova na hoti, sesānaṃ vīsatiyā paccayānaṃ vasena paccayo hoti. Alobhādosā indriyamaggapaccayāpi na honti, sesānaṃ aṭṭhārasannaṃ paccayānaṃ vasena paccayā honti. Lobhamohā vipākapaccayāpi na honti, sesānaṃ sattarasannaṃ paccayānaṃ vasena paccayā honti. Doso adhipatipaccayopi na hoti, sesānaṃ soḷasannaṃ paccayānaṃ vasena paccayo hoti. Ārammaṇapaccaye rūpāyatanaṃ cakkhuviññāṇadhātuyā ārammaṇapurejātaatthiavigatavasena catudhā paccayo; tathā manodhātuyā ahetukamanoviññāṇadhātuyā ca. Sahetukāya pana ārammaṇādhipatiārammaṇūpanissayavasenāpi paccayo hoti. Iminā nayena sabbesaṃ ārammaṇapaccayadhammānaṃ anekapaccayabhāvo veditabbo.
ਅਧਿਪਤਿਪਚ੍ਚਯੇ ਆਰਮ੍ਮਣਾਧਿਪਤਿਨੋ ਆਰਮ੍ਮਣਪਚ੍ਚਯੇ વੁਤ੍ਤਨਯੇਨੇવ ਅਨੇਕਪਚ੍ਚਯਭਾવੋ વੇਦਿਤਬ੍ਬੋ। ਸਹਜਾਤਾਧਿਪਤੀਸੁ વੀਮਂਸਾ ਅਮੋਹਹੇਤੁ વਿਯ વੀਸਤਿਧਾ ਪਚ੍ਚਯੋ ਹੋਤਿ। ਛਨ੍ਦੋ ਹੇਤੁਪੁਰੇਜਾਤਕਮ੍ਮਆਹਾਰਇਨ੍ਦ੍ਰਿਯਝਾਨਮਗ੍ਗਪਚ੍ਚਯੋ ਨ ਹੋਤਿ, ਸੇਸਾਨਂ ਸਤ੍ਤਰਸਨ੍ਨਂ ਪਚ੍ਚਯਾਨਂ વਸੇਨ ਪਚ੍ਚਯੋ ਹੋਤਿ। ਚਿਤ੍ਤਂ ਹੇਤੁਪੁਰੇਜਾਤਕਮ੍ਮਝਾਨਮਗ੍ਗਪਚ੍ਚਯੋ ਨ ਹੋਤਿ, ਸੇਸਾਨਂ ਏਕੂਨવੀਸਤਿਯਾ ਪਚ੍ਚਯਾਨਂ વਸੇਨ ਪਚ੍ਚਯੋ ਹੋਤਿ। વੀਰਿਯਂ ਹੇਤੁਪੁਰੇਜਾਤਕਮ੍ਮਾਹਾਰਝਾਨਪਚ੍ਚਯੋ ਨ ਹੋਤਿ, ਸੇਸਾਨਂ ਏਕੂਨવੀਸਤਿਯਾ વਸੇਨ ਪਚ੍ਚਯੋ ਹੋਤਿ।
Adhipatipaccaye ārammaṇādhipatino ārammaṇapaccaye vuttanayeneva anekapaccayabhāvo veditabbo. Sahajātādhipatīsu vīmaṃsā amohahetu viya vīsatidhā paccayo hoti. Chando hetupurejātakammaāhāraindriyajhānamaggapaccayo na hoti, sesānaṃ sattarasannaṃ paccayānaṃ vasena paccayo hoti. Cittaṃ hetupurejātakammajhānamaggapaccayo na hoti, sesānaṃ ekūnavīsatiyā paccayānaṃ vasena paccayo hoti. Vīriyaṃ hetupurejātakammāhārajhānapaccayo na hoti, sesānaṃ ekūnavīsatiyā vasena paccayo hoti.
ਅਨਨ੍ਤਰਪਚ੍ਚਯੇ ‘‘ਚਕ੍ਖੁવਿਞ੍ਞਾਣਧਾਤੂ’’ਤਿਆਦਿਨਾ ਨਯੇਨ વੁਤ੍ਤੇਸੁ ਚਤੂਸੁ ਖਨ੍ਧੇਸੁ વੇਦਨਾਕ੍ਖਨ੍ਧੋ ਹੇਤੁਪੁਰੇਜਾਤਕਮ੍ਮਾਹਾਰਮਗ੍ਗਪਚ੍ਚਯੋ ਨ ਹੋਤਿ, ਸੇਸਾਨਂ ਏਕੂਨવੀਸਤਿਯਾ વਸੇਨ ਪਚ੍ਚਯੋ ਹੋਤਿ। ਸਞ੍ਞਾਕ੍ਖਨ੍ਧੋ ਇਨ੍ਦ੍ਰਿਯਝਾਨਪਚ੍ਚਯੋਪਿ ਨ ਹੋਤਿ, ਸੇਸਾਨਂ ਸਤ੍ਤਰਸਨ੍ਨਂ વਸੇਨ ਪਚ੍ਚਯੋ ਹੋਤਿ। ਸਙ੍ਖਾਰਕ੍ਖਨ੍ਧੇ ਹੇਤੂ ਹੇਤੁਪਚ੍ਚਯੇ વੁਤ੍ਤਨਯੇਨ, ਛਨ੍ਦવੀਰਿਯਾਨਿ ਅਧਿਪਤਿਪਚ੍ਚਯੇ વੁਤ੍ਤਨਯੇਨੇવ ਪਚ੍ਚਯਾ ਹੋਨ੍ਤਿ। ਫਸ੍ਸੋ ਹੇਤੁਪੁਰੇਜਾਤਕਮ੍ਮਇਨ੍ਦ੍ਰਿਯਝਾਨਮਗ੍ਗਪਚ੍ਚਯੋ ਨ ਹੋਤਿ, ਸੇਸਾਨਂ ਅਟ੍ਠਾਰਸਨ੍ਨਂ વਸੇਨ ਪਚ੍ਚਯੋ ਹੋਤਿ। ਚੇਤਨਾ ਹੇਤੁਪੁਰੇਜਾਤਇਨ੍ਦ੍ਰਿਯਝਾਨਮਗ੍ਗਪਚ੍ਚਯੋ ਨ ਹੋਤਿ। ਸੇਸਾਨਂ ਏਕੂਨવੀਸਤਿਯਾ વਸੇਨ ਪਚ੍ਚਯੋ ਹੋਤਿ। વਿਤਕ੍ਕੋ ਹੇਤੁਪੁਰੇਜਾਤਕਮ੍ਮਾਹਾਰਿਨ੍ਦ੍ਰਿਯਪਚ੍ਚਯੋ ਨ ਹੋਤਿ, ਸੇਸਾਨਂ ਏਕੂਨવੀਸਤਿਯਾ વਸੇਨ ਪਚ੍ਚਯੋ ਹੋਤਿ। વਿਚਾਰੋ ਮਗ੍ਗਪਚ੍ਚਯੋਪਿ ਨ ਹੋਤਿ, ਸੇਸਾਨਂ ਅਟ੍ਠਾਰਸਨ੍ਨਂ વਸੇਨ ਪਚ੍ਚਯੋ ਹੋਤਿ। ਪੀਤਿ ਤੇਸਞ੍ਞੇવ વਸੇਨ ਪਚ੍ਚਯੋ ਹੋਤਿ। ਚਿਤ੍ਤੇਕਗ੍ਗਤਾ ਹੇਤੁਪੁਰੇਜਾਤਕਮ੍ਮਾਹਾਰਪਚ੍ਚਯੋ ਨ ਹੋਤਿ, ਸੇਸਾਨਂ વੀਸਤਿਯਾ વਸੇਨ ਪਚ੍ਚਯੋ ਹੋਤਿ। ਸਦ੍ਧਾ ਹੇਤੁਪੁਰੇਜਾਤਕਮ੍ਮਾਹਾਰਝਾਨਮਗ੍ਗਪਚ੍ਚਯੋ ਨ ਹੋਤਿ, ਸੇਸਾਨਂ ਅਟ੍ਠਾਰਸਨ੍ਨਂ વਸੇਨ ਪਚ੍ਚਯੋ ਹੋਤਿ। ਸਤਿ ਤੇਹਿ ਚੇવ ਮਗ੍ਗਪਚ੍ਚਯੇਨ ਚਾਤਿ ਏਕੂਨવੀਸਤਿਯਾ વਸੇਨ ਪਚ੍ਚਯੋ ਹੋਤਿ। ਜੀવਿਤਿਨ੍ਦ੍ਰਿਯਂ ਸਦ੍ਧਾਯ વੁਤ੍ਤਾਨਂ ਅਟ੍ਠਾਰਸਨ੍ਨਂ વਸੇਨ ਪਚ੍ਚਯੋ ਹੋਤਿ। ਹਿਰੋਤ੍ਤਪ੍ਪਂ ਤਤੋ ਇਨ੍ਦ੍ਰਿਯਪਚ੍ਚਯਂ ਅਪਨੇਤ੍વਾ ਸੇਸਾਨਂ ਸਤ੍ਤਰਸਨ੍ਨਂ વਸੇਨ ਪਚ੍ਚਯੋ ਹੋਤਿ। ਤਥਾ ਕਾਯਪਸ੍ਸਦ੍ਧਾਦੀਨਿ ਯੁਗਲ਼ਕਾਨਿ, ਯੇવਾਪਨਕੇਸੁ ਅਧਿਮੋਕ੍ਖਮਨਸਿਕਾਰਤਤ੍ਰਮਜ੍ਝਤ੍ਤਤਾ ਕਰੁਣਾਮੁਦਿਤਾ ਚ। વਿਰਤਿਯੋ ਪਨ ਤੇਹਿ ਚੇવ ਮਗ੍ਗਪਚ੍ਚਯੇਨ ਚਾਤਿ ਅਟ੍ਠਾਰਸਧਾ ਪਚ੍ਚਯਾ ਹੋਨ੍ਤਿ। ਮਿਚ੍ਛਾਦਿਟ੍ਠਿ ਤਤੋ વਿਪਾਕਪਚ੍ਚਯਂ ਅਪਨੇਤ੍વਾ ਸਤ੍ਤਰਸਧਾ, ਮਿਚ੍ਛਾવਾਚਾਕਮ੍ਮਨ੍ਤਾਜੀવਾ ਤੇਹਿ ਚੇવ ਕਮ੍ਮਾਹਾਰਪਚ੍ਚਯੇਹਿ ਚਾਤਿ ਏਕੂਨવੀਸਤਿਧਾ। ਅਹਿਰਿਕਂ ਅਨੋਤ੍ਤਪ੍ਪਂ ਮਾਨੋ ਥਿਨਂ ਮਿਦ੍ਧਂ ਉਦ੍ਧਚ੍ਚਨ੍ਤਿ ਇਮੇ ਹੇਤੁਪੁਰੇਜਾਤਕਮ੍ਮવਿਪਾਕਾਹਾਰਿਨ੍ਦ੍ਰਿਯਝਾਨਮਗ੍ਗਪਚ੍ਚਯਾ ਨ ਹੋਨ੍ਤਿ, ਸੇਸਾਨਂ ਪਨ ਸੋਲ਼ਸਨ੍ਨਂ ਪਚ੍ਚਯਾਨਂ વਸੇਨ ਪਚ੍ਚਯਾ ਹੋਨ੍ਤਿ। વਿਚਿਕਿਚ੍ਛਾਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਾਨਿ ਤਤੋ ਅਧਿਪਤਿਪਚ੍ਚਯਂ ਅਪਨੇਤ੍વਾ ਪਨ੍ਨਰਸਧਾ વਿਞ੍ਞਾਣਕ੍ਖਨ੍ਧਸ੍ਸ। ਅਧਿਪਤਿਪਚ੍ਚਯੇ વੁਤ੍ਤਨਯੇਨੇવ ਅਨੇਕਪਚ੍ਚਯਭਾવੋ વੇਦਿਤਬ੍ਬੋ। ਸਮਨਨ੍ਤਰਪਚ੍ਚਯੇਪਿ ਏਸੇવ ਨਯੋ।
Anantarapaccaye ‘‘cakkhuviññāṇadhātū’’tiādinā nayena vuttesu catūsu khandhesu vedanākkhandho hetupurejātakammāhāramaggapaccayo na hoti, sesānaṃ ekūnavīsatiyā vasena paccayo hoti. Saññākkhandho indriyajhānapaccayopi na hoti, sesānaṃ sattarasannaṃ vasena paccayo hoti. Saṅkhārakkhandhe hetū hetupaccaye vuttanayena, chandavīriyāni adhipatipaccaye vuttanayeneva paccayā honti. Phasso hetupurejātakammaindriyajhānamaggapaccayo na hoti, sesānaṃ aṭṭhārasannaṃ vasena paccayo hoti. Cetanā hetupurejātaindriyajhānamaggapaccayo na hoti. Sesānaṃ ekūnavīsatiyā vasena paccayo hoti. Vitakko hetupurejātakammāhārindriyapaccayo na hoti, sesānaṃ ekūnavīsatiyā vasena paccayo hoti. Vicāro maggapaccayopi na hoti, sesānaṃ aṭṭhārasannaṃ vasena paccayo hoti. Pīti tesaññeva vasena paccayo hoti. Cittekaggatā hetupurejātakammāhārapaccayo na hoti, sesānaṃ vīsatiyā vasena paccayo hoti. Saddhā hetupurejātakammāhārajhānamaggapaccayo na hoti, sesānaṃ aṭṭhārasannaṃ vasena paccayo hoti. Sati tehi ceva maggapaccayena cāti ekūnavīsatiyā vasena paccayo hoti. Jīvitindriyaṃ saddhāya vuttānaṃ aṭṭhārasannaṃ vasena paccayo hoti. Hirottappaṃ tato indriyapaccayaṃ apanetvā sesānaṃ sattarasannaṃ vasena paccayo hoti. Tathā kāyapassaddhādīni yugaḷakāni, yevāpanakesu adhimokkhamanasikāratatramajjhattatā karuṇāmuditā ca. Viratiyo pana tehi ceva maggapaccayena cāti aṭṭhārasadhā paccayā honti. Micchādiṭṭhi tato vipākapaccayaṃ apanetvā sattarasadhā, micchāvācākammantājīvā tehi ceva kammāhārapaccayehi cāti ekūnavīsatidhā. Ahirikaṃ anottappaṃ māno thinaṃ middhaṃ uddhaccanti ime hetupurejātakammavipākāhārindriyajhānamaggapaccayā na honti, sesānaṃ pana soḷasannaṃ paccayānaṃ vasena paccayā honti. Vicikicchāissāmacchariyakukkuccāni tato adhipatipaccayaṃ apanetvā pannarasadhā viññāṇakkhandhassa. Adhipatipaccaye vuttanayeneva anekapaccayabhāvo veditabbo. Samanantarapaccayepi eseva nayo.
ਸਹਜਾਤਪਚ੍ਚਯੇ ਚਤੂਸੁ ਤਾવ ਖਨ੍ਧੇਸੁ ਏਕੇਕਸ੍ਸ ਧਮ੍ਮਸ੍ਸ ਅਨੇਕਪਚ੍ਚਯਭਾવੋ વੁਤ੍ਤਨਯੇਨੇવ વੇਦਿਤਬ੍ਬੋ। ਚਤ੍ਤਾਰਿ ਮਹਾਭੂਤਾਨਿ ਆਰਮ੍ਮਣਆਰਮ੍ਮਣਾਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਉਪਨਿਸ੍ਸਯਪੁਰੇਜਾਤਅਤ੍ਥਿਅવਿਗਤવਸੇਨ ਨવਧਾ ਪਚ੍ਚਯਾ ਹੋਨ੍ਤਿ। ਹਦਯવਤ੍ਥੁ ਤੇਸਞ੍ਚੇવ વਿਪ੍ਪਯੁਤ੍ਤਸ੍ਸ ਚ વਸੇਨ ਦਸਧਾ ਪਚ੍ਚਯੋ ਹੋਤਿ। ਅਞ੍ਞਮਞ੍ਞਪਚ੍ਚਯੇ ਅਪੁਬ੍ਬਂ ਨਤ੍ਥਿ। ਨਿਸ੍ਸਯਪਚ੍ਚਯੇ ਚਕ੍ਖਾਯਤਨਾਦੀਨਿ ਆਰਮ੍ਮਣਆਰਮ੍ਮਣਾਧਿਪਤਿਨਿਸ੍ਸਯਉਪਨਿਸ੍ਸਯਪੁਰੇਜਾਤਇਨ੍ਦ੍ਰਿਯવਿਪ੍ਪਯੁਤ੍ਤਅਤ੍ਥਿਅવਿਗਤવਸੇਨ ਨવਧਾ ਪਚ੍ਚਯਾ ਹੋਨ੍ਤਿ। ਉਪਨਿਸ੍ਸਯੇ ਅਪੁਬ੍ਬਂ ਨਤ੍ਥਿ। ਪੁਰੇਜਾਤਪਚ੍ਚਯੇ ਰੂਪਸਦ੍ਦਗਨ੍ਧਰਸਾਯਤਨਾਨਿ ਆਰਮ੍ਮਣਆਰਮ੍ਮਣਾਧਿਪਤਿਉਪਨਿਸ੍ਸਯਪੁਰੇਜਾਤਅਤ੍ਥਿਅવਿਗਤવਸੇਨ ਛਧਾ ਪਚ੍ਚਯਾ ਹੋਨ੍ਤਿ। ਏਤ੍ਤਕਮੇવੇਤ੍ਥ ਅਪੁਬ੍ਬਂ। ਪਚ੍ਛਾਜਾਤਾਦੀਸੁ ਅਪੁਬ੍ਬਂ ਨਤ੍ਥਿ। ਆਹਾਰਪਚ੍ਚਯੇ ਕਬਲ਼ੀਕਾਰਾਹਾਰੋ ਆਰਮ੍ਮਣਆਰਮ੍ਮਣਾਧਿਪਤਿਉਪਨਿਸ੍ਸਯਆਹਾਰਅਤ੍ਥਿਅવਿਗਤવਸੇਨ ਛਧਾ ਪਚ੍ਚਯੋ ਹੋਤਿ। ਇਨ੍ਦ੍ਰਿਯਾਦੀਸੁ ਅਪੁਬ੍ਬਂ ਨਤ੍ਥਿ। ਏવਮੇਤ੍ਥ ਏਕਧਮ੍ਮਸ੍ਸ ਅਨੇਕਪਚ੍ਚਯਭਾવਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋ।
Sahajātapaccaye catūsu tāva khandhesu ekekassa dhammassa anekapaccayabhāvo vuttanayeneva veditabbo. Cattāri mahābhūtāni ārammaṇaārammaṇādhipatisahajātaaññamaññanissayaupanissayapurejātaatthiavigatavasena navadhā paccayā honti. Hadayavatthu tesañceva vippayuttassa ca vasena dasadhā paccayo hoti. Aññamaññapaccaye apubbaṃ natthi. Nissayapaccaye cakkhāyatanādīni ārammaṇaārammaṇādhipatinissayaupanissayapurejātaindriyavippayuttaatthiavigatavasena navadhā paccayā honti. Upanissaye apubbaṃ natthi. Purejātapaccaye rūpasaddagandharasāyatanāni ārammaṇaārammaṇādhipatiupanissayapurejātaatthiavigatavasena chadhā paccayā honti. Ettakamevettha apubbaṃ. Pacchājātādīsu apubbaṃ natthi. Āhārapaccaye kabaḷīkārāhāro ārammaṇaārammaṇādhipatiupanissayaāhāraatthiavigatavasena chadhā paccayo hoti. Indriyādīsu apubbaṃ natthi. Evamettha ekadhammassa anekapaccayabhāvatopi viññātabbo vinicchayo.
ਏਕਪਚ੍ਚਯਸ੍ਸ ਅਨੇਕਪਚ੍ਚਯਭਾવਤੋਤਿ ਹੇਤੁਪਚ੍ਚਯਾਦੀਸੁ ਯਸ੍ਸ ਕਸ੍ਸਚਿ ਏਕਸ੍ਸ ਪਚ੍ਚਯਸ੍ਸ ਯੇਨਾਕਾਰੇਨ ਯੇਨਤ੍ਥੇਨ ਯੋ ਪਚ੍ਚਯੁਪ੍ਪਨ੍ਨਾਨਂ ਪਚ੍ਚਯੋ ਹੋਤਿ, ਤਂ ਆਕਾਰਂ ਤਂ ਅਤ੍ਥਂ ਅવਿਜਹਿਤ੍વਾવ ਅਞ੍ਞੇਹਿਪਿ ਯੇਹਾਕਾਰੇਹਿ ਯੇਹਿ ਅਤ੍ਥੇਹਿ ਸੋ ਤਸ੍ਮਿਞ੍ਞੇવ ਖਣੇ ਤੇਸਂ ਧਮ੍ਮਾਨਂ ਅਨੇਕਪਚ੍ਚਯਭਾવਂ ਗਚ੍ਛਤਿ, ਤਤੋ ਅਨੇਕਪਚ੍ਚਯਭਾવਤੋ ਤਸ੍ਸ વਿਨਿਚ੍ਛਯੋ વੇਦਿਤਬ੍ਬੋਤਿ ਅਤ੍ਥੋ। ਸੇਯ੍ਯਥਿਦਂ – ਅਮੋਹੋ ਹੇਤੁਪਚ੍ਚਯੋ, ਸੋ ਹੇਤੁਪਚ੍ਚਯਤ੍ਤਂ ਅવਿਜਹਨ੍ਤੋવ ਅਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯવਿਪਾਕਇਨ੍ਦ੍ਰਿਯਮਗ੍ਗਸਮ੍ਪਯੁਤ੍ਤવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਏਕਾਦਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਅਲੋਭਾਦੋਸਾ ਤਤੋ ਅਧਿਪਤਿਇਨ੍ਦ੍ਰਿਯਮਗ੍ਗਪਚ੍ਚਯੇ ਤਯੋ ਅਪਨੇਤ੍વਾ ਸੇਸਾਨਂ વਸੇਨ ਅਨੇਕਪਚ੍ਚਯਭਾવਂ ਗਚ੍ਛਨ੍ਤਿ। ਇਦਂ વਿਪਾਕਹੇਤੂਸੁਯੇવ ਲਬ੍ਭਤਿ, ਕੁਸਲਕਿਰਿਯੇਸੁ ਪਨ વਿਪਾਕਪਚ੍ਚਯਤਾ ਪਰਿਹਾਯਤਿ। ਲੋਭਦੋਸਮੋਹਾ ਤੇ ਤਯੋ વਿਪਾਕਞ੍ਚਾਤਿ ਚਤ੍ਤਾਰੋ ਅਪਨੇਤ੍વਾ ਸੇਸਾਨਂ વਸੇਨ ਅਨੇਕਪਚ੍ਚਯਭਾવਂ ਗਚ੍ਛਨ੍ਤਿ।
Ekapaccayassa anekapaccayabhāvatoti hetupaccayādīsu yassa kassaci ekassa paccayassa yenākārena yenatthena yo paccayuppannānaṃ paccayo hoti, taṃ ākāraṃ taṃ atthaṃ avijahitvāva aññehipi yehākārehi yehi atthehi so tasmiññeva khaṇe tesaṃ dhammānaṃ anekapaccayabhāvaṃ gacchati, tato anekapaccayabhāvato tassa vinicchayo veditabboti attho. Seyyathidaṃ – amoho hetupaccayo, so hetupaccayattaṃ avijahantova adhipatisahajātaaññamaññanissayavipākaindriyamaggasampayuttavippayuttaatthiavigatānaṃ vasena aparehipi ekādasahākārehi anekapaccayabhāvaṃ gacchati. Alobhādosā tato adhipatiindriyamaggapaccaye tayo apanetvā sesānaṃ vasena anekapaccayabhāvaṃ gacchanti. Idaṃ vipākahetūsuyeva labbhati, kusalakiriyesu pana vipākapaccayatā parihāyati. Lobhadosamohā te tayo vipākañcāti cattāro apanetvā sesānaṃ vasena anekapaccayabhāvaṃ gacchanti.
ਆਰਮ੍ਮਣਪਚ੍ਚਯੋ ਤਂ ਆਰਮ੍ਮਣਪਚ੍ਚਯਤ੍ਤਂ ਅવਿਜਹਨ੍ਤਂਯੇવ ਆਰਮ੍ਮਣਾਧਿਪਤਿਨਿਸ੍ਸਯਉਪਨਿਸ੍ਸਯਪੁਰੇਜਾਤવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਸਤ੍ਤਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਅਯਮੇਤ੍ਥ ਉਕ੍ਕਟ੍ਠਪਰਿਚ੍ਛੇਦੋ, ਅਰੂਪਧਮ੍ਮਾਨਂ ਪਨ ਅਤੀਤਾਨਾਗਤਾਨਂ વਾ ਰੂਪਧਮ੍ਮਾਨਂ ਆਰਮ੍ਮਣਪਚ੍ਚਯਭਾવੇ ਸਤਿ ਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯਮਤ੍ਤਞ੍ਞੇવ ਉਤ੍ਤਰਿ ਲਬ੍ਭਤਿ। ਅਧਿਪਤਿਪਚ੍ਚਯੇ વੀਮਂਸਾ ਅਮੋਹਸਦਿਸਾ। ਛਨ੍ਦੋ ਅਧਿਪਤਿਪਚ੍ਚਯੋ ਅਧਿਪਤਿਪਚ੍ਚਯਤ੍ਤਂ ਅવਿਜਹਨ੍ਤੋવ ਸਹਜਾਤਅਞ੍ਞਮਞ੍ਞਨਿਸ੍ਸਯવਿਪਾਕਸਮ੍ਪਯੁਤ੍ਤવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਅਟ੍ਠਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। વੀਰਿਯਂ ਤੇਸਞ੍ਚੇવ ਇਨ੍ਦ੍ਰਿਯਮਗ੍ਗਪਚ੍ਚਯਾਨਞ੍ਚਾਤਿ ਇਮੇਸਂ વਸੇਨ ਅਪਰੇਹਿਪਿ ਦਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਚਿਤ੍ਤਂ ਤਤੋ ਮਗ੍ਗਪਚ੍ਚਯਂ ਅਪਨੇਤ੍વਾ ਆਹਾਰਪਚ੍ਚਯਂ ਪਕ੍ਖਿਪਿਤ੍વਾ ਇਮੇਸਂ વਸੇਨ ਅਧਿਪਤਿਪਚ੍ਚਯਤੋ ਉਤ੍ਤਰਿ ਦਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਆਰਮ੍ਮਣਾਧਿਪਤਿਨੋ ਪਨ ਹੇਟ੍ਠਾ ਆਰਮ੍ਮਣਪਚ੍ਚਯੇ વੁਤ੍ਤਨਯੇਨੇવ ਅਨੇਕਪਚ੍ਚਯਭਾવੋ વੇਦਿਤਬ੍ਬੋ।
Ārammaṇapaccayo taṃ ārammaṇapaccayattaṃ avijahantaṃyeva ārammaṇādhipatinissayaupanissayapurejātavippayuttaatthiavigatānaṃ vasena aparehipi sattahākārehi anekapaccayabhāvaṃ gacchati. Ayamettha ukkaṭṭhaparicchedo, arūpadhammānaṃ pana atītānāgatānaṃ vā rūpadhammānaṃ ārammaṇapaccayabhāve sati ārammaṇādhipatiārammaṇūpanissayamattaññeva uttari labbhati. Adhipatipaccaye vīmaṃsā amohasadisā. Chando adhipatipaccayo adhipatipaccayattaṃ avijahantova sahajātaaññamaññanissayavipākasampayuttavippayuttaatthiavigatānaṃ vasena aparehipi aṭṭhahākārehi anekapaccayabhāvaṃ gacchati. Vīriyaṃ tesañceva indriyamaggapaccayānañcāti imesaṃ vasena aparehipi dasahākārehi anekapaccayabhāvaṃ gacchati. Cittaṃ tato maggapaccayaṃ apanetvā āhārapaccayaṃ pakkhipitvā imesaṃ vasena adhipatipaccayato uttari dasahākārehi anekapaccayabhāvaṃ gacchati. Ārammaṇādhipatino pana heṭṭhā ārammaṇapaccaye vuttanayeneva anekapaccayabhāvo veditabbo.
ਅਨਨ੍ਤਰਸਮਨਨ੍ਤਰਪਚ੍ਚਯਾ ਅਨਨ੍ਤਰਸਮਨਨ੍ਤਰਪਚ੍ਚਯਤ੍ਤਂ ਅવਿਜਹਨ੍ਤਾવ ਉਪਨਿਸ੍ਸਯਕਮ੍ਮਆਸੇવਨਨਤ੍ਥਿવਿਗਤਾਨਂ વਸੇਨ ਅਪਰੇਹਿਪਿ ਪਞ੍ਚਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਨ੍ਤਿ। ਅਰਿਯਮਗ੍ਗਚੇਤਨਾਯੇવ ਚੇਤ੍ਥ ਕਮ੍ਮਪਚ੍ਚਯਤਂ ਲਭਤਿ, ਨ ਸੇਸਧਮ੍ਮਾ। ਸਹਜਾਤਪਚ੍ਚਯੋ ਸਹਜਾਤਪਚ੍ਚਯਤ੍ਤਂ ਅવਿਜਹਨ੍ਤੋવ ਹੇਤੁਅਧਿਪਤਿਅਞ੍ਞਮਞ੍ਞਨਿਸ੍ਸਯਕਮ੍ਮવਿਪਾਕਆਹਾਰਇਨ੍ਦ੍ਰਿਯਝਾਨਮਗ੍ਗਸਮ੍ਪਯੁਤ੍ਤવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿ ਚੁਦ੍ਦਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਅਯਮ੍ਪਿ ਉਕ੍ਕਟ੍ਠਪਰਿਚ੍ਛੇਦੋ વਤ੍ਥੁਸਹਜਾਤਾਦੀਨਂ ਪਨ વਸੇਨੇਤ੍ਥ ਹੇਤੁਪਚ੍ਚਯਾਦੀਨਂ ਅਭਾવੋਪਿ વੇਦਿਤਬ੍ਬੋ। ਅਞ੍ਞਮਞ੍ਞਪਚ੍ਚਯੇਪਿ ਏਸੇવ ਨਯੋ।
Anantarasamanantarapaccayā anantarasamanantarapaccayattaṃ avijahantāva upanissayakammaāsevananatthivigatānaṃ vasena aparehipi pañcahākārehi anekapaccayabhāvaṃ gacchanti. Ariyamaggacetanāyeva cettha kammapaccayataṃ labhati, na sesadhammā. Sahajātapaccayo sahajātapaccayattaṃ avijahantova hetuadhipatiaññamaññanissayakammavipākaāhāraindriyajhānamaggasampayuttavippayuttaatthiavigatānaṃ vasena aparehi cuddasahākārehi anekapaccayabhāvaṃ gacchati. Ayampi ukkaṭṭhaparicchedo vatthusahajātādīnaṃ pana vasenettha hetupaccayādīnaṃ abhāvopi veditabbo. Aññamaññapaccayepi eseva nayo.
ਨਿਸ੍ਸਯਪਚ੍ਚਯੋ ਨਿਸ੍ਸਯਪਚ੍ਚਯਤ੍ਤਂ ਅવਿਜਹਨ੍ਤੋવ ਚਤੁવੀਸਤਿਯਾ ਪਚ੍ਚਯੇਸੁ ਅਤ੍ਤਨੋ ਨਿਸ੍ਸਯਪਚ੍ਚਯਤ੍ਤਞ੍ਚੇવ ਅਨਨ੍ਤਰਸਮਨਨ੍ਤਰਪਚ੍ਛਾਜਾਤਆਸੇવਨਨਤ੍ਥਿવਿਗਤਪਚ੍ਚਯੇ ਚ ਛ ਅਪਨੇਤ੍વਾ ਸੇਸਾਨਂ વਸੇਨ ਅਪਰੇਹਿਪਿ ਸਤ੍ਤਰਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਅਯਮ੍ਪਿ ਉਕ੍ਕਟ੍ਠਪਰਿਚ੍ਛੇਦੋવ વਤ੍ਥੁਨਿਸ੍ਸਯਾਦੀਨਂ ਪਨ વਸੇਨੇਤ੍ਥ ਹੇਤੁਪਚ੍ਚਯਾਦੀਨਂ ਆਭਾવੋਪਿ વੇਦਿਤਬ੍ਬੋ।
Nissayapaccayo nissayapaccayattaṃ avijahantova catuvīsatiyā paccayesu attano nissayapaccayattañceva anantarasamanantarapacchājātaāsevananatthivigatapaccaye ca cha apanetvā sesānaṃ vasena aparehipi sattarasahākārehi anekapaccayabhāvaṃ gacchati. Ayampi ukkaṭṭhaparicchedova vatthunissayādīnaṃ pana vasenettha hetupaccayādīnaṃ ābhāvopi veditabbo.
ਉਪਨਿਸ੍ਸਯਪਚ੍ਚਯੇ ਆਰਮ੍ਮਣੂਪਨਿਸ੍ਸਯੋ ਆਰਮ੍ਮਣਾਧਿਪਤਿਸਦਿਸੋ। ਅਨਨ੍ਤਰੂਪਨਿਸ੍ਸਯੋ ਅਨਨ੍ਤਰੂਪਨਿਸ੍ਸਯਪਚ੍ਚਯਤ੍ਤਂ ਅવਿਜਹਨ੍ਤੋવ ਅਨਨ੍ਤਰਸਮਨਨ੍ਤਰਕਮ੍ਮਆਸੇવਨਨਤ੍ਥਿવਿਗਤਾਨਂ વਸੇਨ ਅਪਰੇਹਿਪਿ ਛਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਅਰਿਯਮਗ੍ਗਚੇਤਨਾਯੇવ ਚੇਤ੍ਥ ਕਮ੍ਮਪਚ੍ਚਯਤਂ ਲਭਤਿ, ਨ ਸੇਸਧਮ੍ਮਾ। ਪਕਤੂਪਨਿਸ੍ਸਯੋ ਪਕਤੂਪਨਿਸ੍ਸਯੋવ। ਪੁਰੇਜਾਤਪਚ੍ਚਯੋ ਅਤ੍ਤਨੋ ਪੁਰੇਜਾਤਪਚ੍ਚਯਤ੍ਤਂ ਅવਿਜਹਨ੍ਤੋવ ਆਰਮ੍ਮਣਆਰਮ੍ਮਣਾਧਿਪਤਿਨਿਸ੍ਸਯਉਪਨਿਸ੍ਸਯਇਨ੍ਦ੍ਰਿਯવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਅਟ੍ਠਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਅਯਮ੍ਪਿ ਉਕ੍ਕਟ੍ਠਨਿਦ੍ਦੇਸੋવ ਆਰਮ੍ਮਣਪੁਰੇਜਾਤੇ ਪਨੇਤ੍ਥ ਨਿਸ੍ਸਯਇਨ੍ਦ੍ਰਿਯવਿਪ੍ਪਯੁਤ੍ਤਪਚ੍ਚਯਤਾ ਨ ਲਬ੍ਭਤਿ। ਇਤੋ ਉਤ੍ਤਰਿਪਿ ਲਬ੍ਭਮਾਨਾਲਬ੍ਭਮਾਨਂ વੇਦਿਤਬ੍ਬਂ। ਪਚ੍ਛਾਜਾਤਪਚ੍ਚਯੋ ਅਤ੍ਤਨੋ ਪਚ੍ਛਾਜਾਤਪਚ੍ਚਯਭਾવਂ ਅવਿਜਹਨ੍ਤੋવ વਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਤੀਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਆਸੇવਨਪਚ੍ਚਯੋ ਆਸੇવਨਪਚ੍ਚਯਤ੍ਤਂ ਅવਿਜਹਨ੍ਤੋવ ਅਨਨ੍ਤਰਸਮਨਨ੍ਤਰਉਪਨਿਸ੍ਸਯਨਤ੍ਥਿવਿਗਤਾਨਂ વਸੇਨ ਅਪਰੇਹਿਪਿ ਪਞ੍ਚਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ।
Upanissayapaccaye ārammaṇūpanissayo ārammaṇādhipatisadiso. Anantarūpanissayo anantarūpanissayapaccayattaṃ avijahantova anantarasamanantarakammaāsevananatthivigatānaṃ vasena aparehipi chahākārehi anekapaccayabhāvaṃ gacchati. Ariyamaggacetanāyeva cettha kammapaccayataṃ labhati, na sesadhammā. Pakatūpanissayo pakatūpanissayova. Purejātapaccayo attano purejātapaccayattaṃ avijahantova ārammaṇaārammaṇādhipatinissayaupanissayaindriyavippayuttaatthiavigatānaṃ vasena aparehipi aṭṭhahākārehi anekapaccayabhāvaṃ gacchati. Ayampi ukkaṭṭhaniddesova ārammaṇapurejāte panettha nissayaindriyavippayuttapaccayatā na labbhati. Ito uttaripi labbhamānālabbhamānaṃ veditabbaṃ. Pacchājātapaccayo attano pacchājātapaccayabhāvaṃ avijahantova vippayuttaatthiavigatānaṃ vasena aparehipi tīhākārehi anekapaccayabhāvaṃ gacchati. Āsevanapaccayo āsevanapaccayattaṃ avijahantova anantarasamanantaraupanissayanatthivigatānaṃ vasena aparehipi pañcahākārehi anekapaccayabhāvaṃ gacchati.
ਕਮ੍ਮਪਚ੍ਚਯੋ ਕਮ੍ਮਪਚ੍ਚਯਤ੍ਤਂ ਅવਿਜਹਨ੍ਤੋવ ਏਕਕ੍ਖਣਿਕੋ ਤਾવ ਸਹਜਾਤਅਞ੍ਞਮਞ੍ਞਨਿਸ੍ਸਯવਿਪਾਕਆਹਾਰਸਮ੍ਪਯੁਤ੍ਤવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਨવਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਨਾਨਾਕ੍ਖਣਿਕੋ ਉਪਨਿਸ੍ਸਯਅਨਨ੍ਤਰਸਮਨਨ੍ਤਰਨਤ੍ਥਿવਿਗਤਾਨਂ વਸੇਨ ਅਪਰੇਹਿਪਿ ਪਞ੍ਚਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। વਿਪਾਕਪਚ੍ਚਯੋ વਿਪਾਕਪਚ੍ਚਯਤ੍ਤਂ ਅવਿਜਹਨ੍ਤੋવ ਹੇਤੁਅਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਕਮ੍ਮਆਹਾਰਇਨ੍ਦ੍ਰਿਯਝਾਨਮਗ੍ਗਸਮ੍ਪਯੁਤ੍ਤવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਚੁਦ੍ਦਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਆਹਾਰਪਚ੍ਚਯੇ ਕਬਲ਼ੀਕਾਰੋ ਆਹਾਰੋ ਆਹਾਰਪਚ੍ਚਯਤ੍ਤਂ ਅવਿਜਹਨ੍ਤੋવ ਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਦ੍વੀਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਸੇਸਾ ਤਯੋ ਆਹਾਰਪਚ੍ਚਯਤ੍ਤਂ ਅવਿਜਹਨ੍ਤਾવ ਯਥਾਨੁਰੂਪਂ ਅਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਕਮ੍ਮવਿਪਾਕਇਨ੍ਦ੍ਰਿਯਸਮ੍ਪਯੁਤ੍ਤવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਏਕਾਦਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਨ੍ਤਿ।
Kammapaccayo kammapaccayattaṃ avijahantova ekakkhaṇiko tāva sahajātaaññamaññanissayavipākaāhārasampayuttavippayuttaatthiavigatānaṃ vasena aparehipi navahākārehi anekapaccayabhāvaṃ gacchati. Nānākkhaṇiko upanissayaanantarasamanantaranatthivigatānaṃ vasena aparehipi pañcahākārehi anekapaccayabhāvaṃ gacchati. Vipākapaccayo vipākapaccayattaṃ avijahantova hetuadhipatisahajātaaññamaññanissayakammaāhāraindriyajhānamaggasampayuttavippayuttaatthiavigatānaṃ vasena aparehipi cuddasahākārehi anekapaccayabhāvaṃ gacchati. Āhārapaccaye kabaḷīkāro āhāro āhārapaccayattaṃ avijahantova atthiavigatānaṃ vasena aparehipi dvīhākārehi anekapaccayabhāvaṃ gacchati. Sesā tayo āhārapaccayattaṃ avijahantāva yathānurūpaṃ adhipatisahajātaaññamaññanissayakammavipākaindriyasampayuttavippayuttaatthiavigatānaṃ vasena aparehipi ekādasahākārehi anekapaccayabhāvaṃ gacchanti.
ਇਨ੍ਦ੍ਰਿਯਪਚ੍ਚਯੇ ਰੂਪਿਨੋ ਪਞ੍ਚਿਨ੍ਦ੍ਰਿਯਾ ਇਨ੍ਦ੍ਰਿਯਪਚ੍ਚਯਤ੍ਤਂ ਅવਿਜਹਨ੍ਤਾવ ਨਿਸ੍ਸਯਪੁਰੇਜਾਤવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਪਞ੍ਚਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਨ੍ਤਿ। ਰੂਪਜੀવਿਤਿਨ੍ਦ੍ਰਿਯਮ੍ਪਿ ਇਨ੍ਦ੍ਰਿਯਪਚ੍ਚਯਤ੍ਤਂ ਅવਿਜਹਨ੍ਤਞ੍ਞੇવ ਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਦ੍વੀਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਅਰੂਪਿਨੋ ਇਨ੍ਦ੍ਰਿਯਾਨਿਪਿ ਯਥਾਨੁਰੂਪਂ ਇਨ੍ਦ੍ਰਿਯਪਚ੍ਚਯਤ੍ਤਂ ਅવਿਜਹਨ੍ਤਾਨੇવ ਹੇਤੁਅਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯવਿਪਾਕਆਹਾਰਝਾਨਮਗ੍ਗਸਮ੍ਪਯੁਤ੍ਤવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਤੇਰਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਨ੍ਤਿ। ਝਾਨਪਚ੍ਚਯੋ ਝਾਨਪਚ੍ਚਯਤ੍ਤਂ ਅવਿਜਹਨ੍ਤੋવ ਯਥਾਨੁਰੂਪਂ ਸਹਜਾਤਅਞ੍ਞਮਞ੍ਞਨਿਸ੍ਸਯવਿਪਾਕਇਨ੍ਦ੍ਰਿਯਮਗ੍ਗਸਮ੍ਪਯੁਤ੍ਤવਿਪ੍ਪਯੁਤ੍ਤਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਦਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਮਗ੍ਗਪਚ੍ਚਯੋ ਮਗ੍ਗਪਚ੍ਚਯਤ੍ਤਂ ਅવਿਜਹਨ੍ਤੋવ ਯਥਾਨੁਰੂਪਂ ਝਾਨਪਚ੍ਚਯੇ વੁਤ੍ਤਾਨਂ ਦਸਨ੍ਨਂ ਹੇਤੁਅਧਿਪਤੀਨਞ੍ਚਾਤਿ ਇਮੇਸਂ વਸੇਨ ਅਪਰੇਹਿਪਿ ਦ੍વਾਦਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ।
Indriyapaccaye rūpino pañcindriyā indriyapaccayattaṃ avijahantāva nissayapurejātavippayuttaatthiavigatānaṃ vasena aparehipi pañcahākārehi anekapaccayabhāvaṃ gacchanti. Rūpajīvitindriyampi indriyapaccayattaṃ avijahantaññeva atthiavigatānaṃ vasena aparehipi dvīhākārehi anekapaccayabhāvaṃ gacchati. Arūpino indriyānipi yathānurūpaṃ indriyapaccayattaṃ avijahantāneva hetuadhipatisahajātaaññamaññanissayavipākaāhārajhānamaggasampayuttavippayuttaatthiavigatānaṃ vasena aparehipi terasahākārehi anekapaccayabhāvaṃ gacchanti. Jhānapaccayo jhānapaccayattaṃ avijahantova yathānurūpaṃ sahajātaaññamaññanissayavipākaindriyamaggasampayuttavippayuttaatthiavigatānaṃ vasena aparehipi dasahākārehi anekapaccayabhāvaṃ gacchati. Maggapaccayo maggapaccayattaṃ avijahantova yathānurūpaṃ jhānapaccaye vuttānaṃ dasannaṃ hetuadhipatīnañcāti imesaṃ vasena aparehipi dvādasahākārehi anekapaccayabhāvaṃ gacchati.
ਸਮ੍ਪਯੁਤ੍ਤਪਚ੍ਚਯੋ ਸਮ੍ਪਯੁਤ੍ਤਪਚ੍ਚਯਤ੍ਤਂ ਅવਿਜਹਨ੍ਤੋવ ਯਥਾਨੁਰੂਪਂ ਹੇਤੁਅਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਕਮ੍ਮવਿਪਾਕਆਹਾਰਇਨ੍ਦ੍ਰਿਯਝਾਨਮਗ੍ਗਅਤ੍ਥਿਅવਿਗਤਾਨਂ વਸੇਨ ਅਪਰੇਹਿਪਿ ਤੇਰਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। વਿਪ੍ਪਯੁਤ੍ਤਪਚ੍ਚਯੋ વਿਪ੍ਪਯੁਤ੍ਤਪਚ੍ਚਯਤ੍ਤਂ ਅવਿਜਹਨ੍ਤੋવ ਅਨਨ੍ਤਰਸਮਨਨ੍ਤਰਆਸੇવਨਸਮ੍ਪਯੁਤ੍ਤਨਤ੍ਥਿવਿਗਤਸਙ੍ਖਾਤੇ ਛ ਪਚ੍ਚਯੇ ਅਪਨੇਤ੍વਾ ਸੇਸਾਨਂ વਸੇਨ ਯਥਾਨੁਰੂਪਂ ਅਪਰੇਹਿਪਿ ਸਤ੍ਤਰਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਤਤ੍ਥ ਰੂਪਸ੍ਸ ਚ ਅਰੂਪਸ੍ਸ ਚ ਪਚ੍ਚਯવਿਭਾਗੋ વੇਦਿਤਬ੍ਬੋ। ਅਤ੍ਥਿਪਚ੍ਚਯੋ ਅਤ੍ਥਿਪਚ੍ਚਯਤ੍ਤਂ ਅવਿਜਹਨ੍ਤੋવ ਅਨਨ੍ਤਰਸਮਨਨ੍ਤਰਆਸੇવਨਨਤ੍ਥਿવਿਗਤਸਙ੍ਖਾਤੇ ਪਞ੍ਚ ਪਚ੍ਚਯੇ ਅਪਨੇਤ੍વਾ ਸੇਸਾਨਂ વਸੇਨ ਯਥਾਨੁਰੂਪਂ ਅਪਰੇਹਿ ਅਟ੍ਠਾਰਸਹਾਕਾਰੇਹਿ ਅਨੇਕਪਚ੍ਚਯਭਾવਂ ਗਚ੍ਛਤਿ। ਨਤ੍ਥਿਪਚ੍ਚਯવਿਗਤਪਚ੍ਚਯਾ ਅਨਨ੍ਤਰਪਚ੍ਚਯਸਦਿਸਾ । ਅવਿਗਤਪਚ੍ਚਯੋ ਅਤ੍ਥਿਪਚ੍ਚਯਸਦਿਸੋਯੇવਾਤਿ ਏવਮੇਤ੍ਥ ਏਕਪਚ੍ਚਯਸ੍ਸ ਅਨੇਕਪਚ੍ਚਯਭਾવਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋ।
Sampayuttapaccayo sampayuttapaccayattaṃ avijahantova yathānurūpaṃ hetuadhipatisahajātaaññamaññanissayakammavipākaāhāraindriyajhānamaggaatthiavigatānaṃ vasena aparehipi terasahākārehi anekapaccayabhāvaṃ gacchati. Vippayuttapaccayo vippayuttapaccayattaṃ avijahantova anantarasamanantaraāsevanasampayuttanatthivigatasaṅkhāte cha paccaye apanetvā sesānaṃ vasena yathānurūpaṃ aparehipi sattarasahākārehi anekapaccayabhāvaṃ gacchati. Tattha rūpassa ca arūpassa ca paccayavibhāgo veditabbo. Atthipaccayo atthipaccayattaṃ avijahantova anantarasamanantaraāsevananatthivigatasaṅkhāte pañca paccaye apanetvā sesānaṃ vasena yathānurūpaṃ aparehi aṭṭhārasahākārehi anekapaccayabhāvaṃ gacchati. Natthipaccayavigatapaccayā anantarapaccayasadisā . Avigatapaccayo atthipaccayasadisoyevāti evamettha ekapaccayassa anekapaccayabhāvatopi viññātabbo vinicchayo.
ਪਚ੍ਚਯਸਭਾਗਤੋਤਿ ਏਤੇਸੁ ਹਿ ਚਤੁવੀਸਤਿਯਾ ਪਚ੍ਚਯੇਸੁ ਅਨਨ੍ਤਰਸਮਨਨ੍ਤਰਅਨਨ੍ਤਰੂਪਨਿਸ੍ਸਯਆਸੇવਨਨਤ੍ਥਿવਿਗਤਾ ਸਭਾਗਾ, ਤਥਾ ਆਰਮ੍ਮਣਆਰਮ੍ਮਣਾਧਿਪਤਿਆਰਮ੍ਮਣੂਪਨਿਸ੍ਸਯਾਤਿ ਇਮਿਨਾ ਉਪਾਯੇਨੇਤ੍ਥ ਪਚ੍ਚਯਸਭਾਗਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋ।
Paccayasabhāgatoti etesu hi catuvīsatiyā paccayesu anantarasamanantaraanantarūpanissayaāsevananatthivigatā sabhāgā, tathā ārammaṇaārammaṇādhipatiārammaṇūpanissayāti iminā upāyenettha paccayasabhāgatopi viññātabbo vinicchayo.
ਪਚ੍ਚਯવਿਸਭਾਗਤੋਤਿ ਪੁਰੇਜਾਤਪਚ੍ਚਯੋ ਪਨੇਤ੍ਥ ਪਚ੍ਛਾਜਾਤਪਚ੍ਚਯੇਨ વਿਸਭਾਗੋ, ਤਥਾ ਸਮ੍ਪਯੁਤ੍ਤਪਚ੍ਚਯੋ વਿਪ੍ਪਯੁਤ੍ਤਪਚ੍ਚਯੇਨ, ਅਤ੍ਥਿਪਚ੍ਚਯੋ ਨਤ੍ਥਿਪਚ੍ਚਯੇਨ, વਿਗਤਪਚ੍ਚਯੋ ਅવਿਗਤਪਚ੍ਚਯੇਨਾਤਿ ਇਮਿਨਾ ਉਪਾਯੇਨੇਤ੍ਥ ਪਚ੍ਚਯવਿਸਭਾਗਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋ।
Paccayavisabhāgatoti purejātapaccayo panettha pacchājātapaccayena visabhāgo, tathā sampayuttapaccayo vippayuttapaccayena, atthipaccayo natthipaccayena, vigatapaccayo avigatapaccayenāti iminā upāyenettha paccayavisabhāgatopi viññātabbo vinicchayo.
ਯੁਗਲ਼ਕਤੋਤਿ ਏਤੇਸੁ ਚ ਅਤ੍ਥਸਰਿਕ੍ਖਤਾਯ, ਸਦ੍ਦਸਰਿਕ੍ਖਤਾਯ, ਕਾਲਪਟਿਪਕ੍ਖਤਾਯ, ਹੇਤੁਫਲਤਾਯ, ਅਞ੍ਞਮਞ੍ਞਪਟਿਪਕ੍ਖਤਾਯਾਤਿ ਇਮੇਹਿ ਕਾਰਣੇਹਿ ਯੁਗਲ਼ਕਤੋ વਿਞ੍ਞਾਤਬ੍ਬੋ વਿਨਿਚ੍ਛਯੋ। ਅਨਨ੍ਤਰਸਮਨਨ੍ਤਰਾ ਹਿ ਅਤ੍ਥਸਰਿਕ੍ਖਤਾਯ ਏਕਂ ਯੁਗਲ਼ਕਂ ਨਾਮ; ਨਿਸ੍ਸਯੂਪਨਿਸ੍ਸਯਾ ਸਦ੍ਦਸਰਿਕ੍ਖਤਾਯ, ਪੁਰੇਜਾਤਪਚ੍ਛਾਜਾਤਾ ਕਾਲਪਟਿਪਕ੍ਖਤਾਯ, ਕਮ੍ਮਪਚ੍ਚਯવਿਪਾਕਪਚ੍ਚਯਾ ਹੇਤੁਫਲਤਾਯ, ਸਮ੍ਪਯੁਤ੍ਤવਿਪ੍ਪਯੁਤ੍ਤਪਚ੍ਚਯਾ ਅਞ੍ਞਮਞ੍ਞਪਟਿਪਕ੍ਖਤਾਯ ਏਕਂ ਯੁਗਲ਼ਕਂ ਨਾਮ, ਤਥਾ ਅਤ੍ਥਿਨਤ੍ਥਿਪਚ੍ਚਯਾ, વਿਗਤਾવਿਗਤਪਚ੍ਚਯਾ ਚਾਤਿ ਏવਮੇਤ੍ਥ ਯੁਗਲ਼ਕਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋ। ਜਨਕਾਜਨਕਤੋਤਿ ਏਤੇਸੁ ਚ ਅਨਨ੍ਤਰਸਮਨਨ੍ਤਰਾਨਨ੍ਤਰੂਪਨਿਸ੍ਸਯਪਕਤੂਪਨਿਸ੍ਸਯਾਸੇવਨਪਚ੍ਚਯਾ ਨਾਨਾਕ੍ਖਣਿਕੋ, ਕਮ੍ਮਪਚ੍ਚਯੋ, ਨਤ੍ਥਿવਿਗਤਪਚ੍ਚਯਾਤਿ ਇਮੇ ਪਚ੍ਚਯਾ ਜਨਕਾਯੇવ, ਨ ਅਜਨਕਾ। ਪਚ੍ਛਾਜਾਤਪਚ੍ਚਯੋ ਕੇવਲਂ ਉਪਤ੍ਥਮ੍ਭਕੋਯੇવ, ਨ ਜਨਕੋ। ਸੇਸਾ ਜਨਕਾ ਚ ਅਜਨਕਾ ਚ ਉਪਤ੍ਥਮ੍ਭਕਾ ਚਾਤਿ ਅਤ੍ਥੋ। ਏવਮੇਤ੍ਥ ਜਨਕਾਜਨਕਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋ।
Yugaḷakatoti etesu ca atthasarikkhatāya, saddasarikkhatāya, kālapaṭipakkhatāya, hetuphalatāya, aññamaññapaṭipakkhatāyāti imehi kāraṇehi yugaḷakato viññātabbo vinicchayo. Anantarasamanantarā hi atthasarikkhatāya ekaṃ yugaḷakaṃ nāma; nissayūpanissayā saddasarikkhatāya, purejātapacchājātā kālapaṭipakkhatāya, kammapaccayavipākapaccayā hetuphalatāya, sampayuttavippayuttapaccayā aññamaññapaṭipakkhatāya ekaṃ yugaḷakaṃ nāma, tathā atthinatthipaccayā, vigatāvigatapaccayā cāti evamettha yugaḷakatopi viññātabbo vinicchayo. Janakājanakatoti etesu ca anantarasamanantarānantarūpanissayapakatūpanissayāsevanapaccayā nānākkhaṇiko, kammapaccayo, natthivigatapaccayāti ime paccayā janakāyeva, na ajanakā. Pacchājātapaccayo kevalaṃ upatthambhakoyeva, na janako. Sesā janakā ca ajanakā ca upatthambhakā cāti attho. Evamettha janakājanakatopi viññātabbo vinicchayo.
ਸਬ੍ਬਟ੍ਠਾਨਿਕਾਸਬ੍ਬਟ੍ਠਾਨਿਕਤੋਤਿ ਏਤੇਸੁ ਚ ਸਹਜਾਤਨਿਸ੍ਸਯਅਤ੍ਥਿਅવਿਗਤਪਚ੍ਚਯਾ ਸਬ੍ਬਟ੍ਠਾਨਿਕਾ ਨਾਮ, ਸਬ੍ਬੇਸਂ ਸਙ੍ਖਤਾਨਂ ਰੂਪਾਰੂਪਧਮ੍ਮਾਨਂ ਠਾਨਭੂਤਾ ਕਾਰਣਭੂਤਾਤਿ ਅਤ੍ਥੋ। ਏਤੇਹਿ વਿਨਾ ਉਪ੍ਪਜ੍ਜਮਾਨੋ ਏਕਧਮ੍ਮੋਪਿ ਨਤ੍ਥੀਤਿ। ਆਰਮ੍ਮਣਆਰਮ੍ਮਣਾਧਿਪਤਿਅਨਨ੍ਤਰਸਮਨਨ੍ਤਰਾਨਨ੍ਤਰੂਪਨਿਸ੍ਸਯਪਕਤੂਪਨਿਸ੍ਸਯਾਸੇવਨਸਮ੍ਪਯੁਤ੍ਤਨਤ੍ਥਿવਿਗਤਪਚ੍ਚਯਾ ਅਸਬ੍ਬਟ੍ਠਾਨਿਕਾ ਨਾਮ। ਨ ਸਬ੍ਬੇਸਂ ਰੂਪਾਰੂਪਧਮ੍ਮਾਨਂ ਠਾਨਭੂਤਾ, ਅਰੂਪਕ੍ਖਨ੍ਧਾਨਞ੍ਞੇવ ਪਨ ਠਾਨਭੂਤਾ ਕਾਰਣਭੂਤਾਤਿ ਅਤ੍ਥੋ। ਅਰੂਪਧਮ੍ਮਾਯੇવ ਹਿ ਏਤੇਹਿ ਉਪ੍ਪਜ੍ਜਨ੍ਤਿ, ਨ ਰੂਪਧਮ੍ਮਾ। ਪੁਰੇਜਾਤਪਚ੍ਛਾਜਾਤਾਪਿ ਅਸਬ੍ਬਟ੍ਠਾਨਿਕਾ ਅਰੂਪਰੂਪਾਨਞ੍ਞੇવ ਯਥਾਕ੍ਕਮੇਨ ਪਚ੍ਚਯਭਾવਤੋ। વੁਤ੍ਤਾવਸੇਸਾਪਿ ਏਕਚ੍ਚਾਨਂ ਰੂਪਾਰੂਪਧਮ੍ਮਾਨਂ ਉਪ੍ਪਤ੍ਤਿਹੇਤੁਤੋ ਨ ਸਬ੍ਬਟ੍ਠਾਨਿਕਾਤਿ ਏવਮੇਤ੍ਥ ਸਬ੍ਬਟ੍ਠਾਨਿਕਾ ਸਬ੍ਬਟ੍ਠਾਨਿਕਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋ।
Sabbaṭṭhānikāsabbaṭṭhānikatoti etesu ca sahajātanissayaatthiavigatapaccayā sabbaṭṭhānikā nāma, sabbesaṃ saṅkhatānaṃ rūpārūpadhammānaṃ ṭhānabhūtā kāraṇabhūtāti attho. Etehi vinā uppajjamāno ekadhammopi natthīti. Ārammaṇaārammaṇādhipatianantarasamanantarānantarūpanissayapakatūpanissayāsevanasampayuttanatthivigatapaccayā asabbaṭṭhānikā nāma. Na sabbesaṃ rūpārūpadhammānaṃ ṭhānabhūtā, arūpakkhandhānaññeva pana ṭhānabhūtā kāraṇabhūtāti attho. Arūpadhammāyeva hi etehi uppajjanti, na rūpadhammā. Purejātapacchājātāpi asabbaṭṭhānikā arūparūpānaññeva yathākkamena paccayabhāvato. Vuttāvasesāpi ekaccānaṃ rūpārūpadhammānaṃ uppattihetuto na sabbaṭṭhānikāti evamettha sabbaṭṭhānikā sabbaṭṭhānikatopi viññātabbo vinicchayo.
ਰੂਪਂ ਰੂਪਸ੍ਸਾਤਿਆਦਿવਿਕਪ੍ਪਤੋਤਿ ਏਤੇਸੁ ਚ ਚਤੁવੀਸਤਿਯਾ ਪਚ੍ਚਯੇਸੁ ਏਕਪਚ੍ਚਯੋਪਿ ਏਕਨ੍ਤੇਨ ਰੂਪਮੇવ ਹੁਤ੍વਾ ਰੂਪਸ੍ਸੇવ ਪਚ੍ਚਯੋ ਨਾਮ ਨਤ੍ਥਿ, ਏਕਨ੍ਤੇਨ ਪਨ ਰੂਪਂ ਹੁਤ੍વਾ ਅਰੂਪਸ੍ਸੇવ ਪਚ੍ਚਯੋ ਨਾਮ ਅਤ੍ਥਿ। ਕਤਰੋ ਪਨੇਸੋਤਿ? ਪੁਰੇਜਾਤਪਚ੍ਚਯੋ। ਪੁਰੇਜਾਤਪਚ੍ਚਯੋ ਹਿ ਏਕਨ੍ਤੇਨ ਰੂਪਮੇવ ਹੁਤ੍વਾ ਅਰੂਪਸ੍ਸੇવ ਪਚ੍ਚਯੋ ਹੋਤਿ। ਏਕਨ੍ਤੇਨ ਰੂਪਮੇવ ਹੁਤ੍વਾ ਰੂਪਾਰੂਪਸ੍ਸੇવ ਪਚ੍ਚਯੋ ਨਾਮਾਤਿਪਿ ਨਤ੍ਥਿ, ਏਕਨ੍ਤੇਨ ਪਨ ਅਰੂਪਂ ਹੁਤ੍વਾ ਅਰੂਪਸ੍ਸੇવ ਪਚ੍ਚਯੋ ਨਾਮ ਅਤ੍ਥਿ। ਕਤਰੋ ਪਨੇਸੋਤਿ? ਅਨਨ੍ਤਰਸਮਨਨ੍ਤਰਆਸੇવਨਸਮ੍ਪਯੁਤ੍ਤਨਤ੍ਥਿવਿਗਤવਸੇਨ ਛਬ੍ਬਿਧੋ। ਸੋ ਹਿ ਸਬ੍ਬੋਪਿ ਏਕਨ੍ਤੇਨ ਅਰੂਪਮੇવ ਹੁਤ੍વਾ ਅਰੂਪਸ੍ਸੇવ ਪਚ੍ਚਯੋ ਹੋਤਿ। ਏਕਨ੍ਤੇਨ ਅਰੂਪਮੇવ ਹੁਤ੍વਾਪਿ ਏਕਨ੍ਤੇਨ ਰੂਪਸ੍ਸੇવ ਪਚ੍ਚਯੋ ਨਾਮਾਤਿਪਿ ਅਤ੍ਥਿ। ਕਤਰੋ ਪਨੇਸੋਤਿ? ਪਚ੍ਛਾਜਾਤਪਚ੍ਚਯੋ। ਸੋ ਹਿ ਏਕਨ੍ਤੇਨ ਅਰੂਪਂ ਹੁਤ੍વਾ ਰੂਪਸ੍ਸੇવ ਪਚ੍ਚਯੋ ਹੋਤਿ; ਏਕਨ੍ਤੇਨ ਪਨ ਅਰੂਪਧਮ੍ਮੋવ ਹੁਤ੍વਾ ਰੂਪਾਰੂਪਾਨਂ ਪਚ੍ਚਯੋਪਿ ਅਤ੍ਥਿ। ਕਤਰੋ ਪਨੇਸੋਤਿ? ਹੇਤੁਕਮ੍ਮવਿਪਾਕਝਾਨਮਗ੍ਗવਸੇਨ ਪਞ੍ਚવਿਧੋ। ਸੋ ਹਿ ਸਬ੍ਬੋਪਿ ਏਕਨ੍ਤੇਨ ਅਰੂਪਮੇવ ਹੁਤ੍વਾ ਰੂਪਧਮ੍ਮਾਨਂ ਅਰੂਪਧਮ੍ਮਾਨਮ੍ਪਿ ਪਚ੍ਚਯੋ ਹੋਤਿ। ਏਕਨ੍ਤੇਨ ਪਨ ਰੂਪਾਰੂਪਮੇવ ਹੁਤ੍વਾ ਰੂਪਸ੍ਸੇવ ਪਚ੍ਚਯੋ ਨਾਮਾਤਿਪਿ ਨਤ੍ਥਿ, ਅਰੂਪਸ੍ਸੇવ ਪਨ ਹੋਤਿ। ਕਤਰੋ ਪਨੇਸੋਤਿ? ਆਰਮ੍ਮਣਪਚ੍ਚਯੋ ਚੇવ ਉਪਨਿਸ੍ਸਯਪਚ੍ਚਯੋ ਚ। ਇਦਞ੍ਹਿ ਦ੍વਯਂ ਏਕਨ੍ਤੇਨ ਰੂਪਾਰੂਪਮੇવ ਹੁਤ੍વਾ ਅਰੂਪਸ੍ਸੇવ ਪਚ੍ਚਯੋ ਹੋਤਿ। ਏਕਨ੍ਤੇਨ ਰੂਪਾਰੂਪਮੇવ ਹੁਤ੍વਾ ਪਨ ਰੂਪਾਰੂਪਸ੍ਸੇવ ਪਚ੍ਚਯੋ ਨਾਮਾਤਿਪਿ ਅਤ੍ਥਿ। ਕਤਰੋ ਪਨੇਸੋਤਿ? ਅਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਆਹਾਰਇਨ੍ਦ੍ਰਿਯવਿਪ੍ਪਯੁਤ੍ਤਅਤ੍ਥਿਅવਿਗਤવਸੇਨ ਨવવਿਧੋ। ਸੋ ਹਿ ਸਬ੍ਬੋਪਿ ਏਕਨ੍ਤੇਨ ਰੂਪਾਰੂਪਮੇવ ਹੁਤ੍વਾ ਰੂਪਾਰੂਪਸ੍ਸੇવ ਪਚ੍ਚਯੋ ਹੋਤੀਤਿ ਏવਮੇਤ੍ਥ ਰੂਪਂ ਰੂਪਸ੍ਸਾਤਿਆਦਿવਿਕਪ੍ਪਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋ।
Rūpaṃ rūpassātiādivikappatoti etesu ca catuvīsatiyā paccayesu ekapaccayopi ekantena rūpameva hutvā rūpasseva paccayo nāma natthi, ekantena pana rūpaṃ hutvā arūpasseva paccayo nāma atthi. Kataro panesoti? Purejātapaccayo. Purejātapaccayo hi ekantena rūpameva hutvā arūpasseva paccayo hoti. Ekantena rūpameva hutvā rūpārūpasseva paccayo nāmātipi natthi, ekantena pana arūpaṃ hutvā arūpasseva paccayo nāma atthi. Kataro panesoti? Anantarasamanantaraāsevanasampayuttanatthivigatavasena chabbidho. So hi sabbopi ekantena arūpameva hutvā arūpasseva paccayo hoti. Ekantena arūpameva hutvāpi ekantena rūpasseva paccayo nāmātipi atthi. Kataro panesoti? Pacchājātapaccayo. So hi ekantena arūpaṃ hutvā rūpasseva paccayo hoti; ekantena pana arūpadhammova hutvā rūpārūpānaṃ paccayopi atthi. Kataro panesoti? Hetukammavipākajhānamaggavasena pañcavidho. So hi sabbopi ekantena arūpameva hutvā rūpadhammānaṃ arūpadhammānampi paccayo hoti. Ekantena pana rūpārūpameva hutvā rūpasseva paccayo nāmātipi natthi, arūpasseva pana hoti. Kataro panesoti? Ārammaṇapaccayo ceva upanissayapaccayo ca. Idañhi dvayaṃ ekantena rūpārūpameva hutvā arūpasseva paccayo hoti. Ekantena rūpārūpameva hutvā pana rūpārūpasseva paccayo nāmātipi atthi. Kataro panesoti? Adhipatisahajātaaññamaññanissayaāhāraindriyavippayuttaatthiavigatavasena navavidho. So hi sabbopi ekantena rūpārūpameva hutvā rūpārūpasseva paccayo hotīti evamettha rūpaṃ rūpassātiādivikappatopi viññātabbo vinicchayo.
ਭવਭੇਦਤੋਤਿ ਇਮੇਸੁ ਪਨ ਚਤੁવੀਸਤਿਯਾ ਪਚ੍ਚਯੇਸੁ ਪਞ੍ਚવੋਕਾਰਭવੇ ਤਾવ ਨ ਕੋਚਿ ਪਚ੍ਚਯੋ ਨ ਲਬ੍ਭਤਿ ਨਾਮ। ਚਤੁવੋਕਾਰਭવੇ ਪਨ ਤਯੋ ਪੁਰੇਜਾਤਪਚ੍ਛਾਜਾਤવਿਪ੍ਪਯੁਤ੍ਤਪਚ੍ਚਯੇ ਅਪਨੇਤ੍વਾ ਸੇਸਾ ਏਕવੀਸਤਿਮੇવ ਲਬ੍ਭਨ੍ਤਿ। ਏਕવੋਕਾਰਭવੇ ਸਹਜਾਤਅਞ੍ਞਮਞ੍ਞਨਿਸ੍ਸਯਕਮ੍ਮਇਨ੍ਦ੍ਰਿਯਅਤ੍ਥਿਅવਿਗਤવਸੇਨ ਸਤ੍ਤੇવ ਲਬ੍ਭਨ੍ਤਿ। ਬਾਹਿਰੇ ਪਨ ਅਨਿਨ੍ਦ੍ਰਿਯਬਦ੍ਧਰੂਪੇ ਸਹਜਾਤਅਞ੍ਞਮਞ੍ਞਨਿਸ੍ਸਯਅਤ੍ਥਿਅવਿਗਤવਸੇਨ ਪਞ੍ਚੇવ ਲਬ੍ਭਨ੍ਤੀਤਿ ਏવਮੇਤ੍ਥ ਭવਭੇਦਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋਤਿ।
Bhavabhedatoti imesu pana catuvīsatiyā paccayesu pañcavokārabhave tāva na koci paccayo na labbhati nāma. Catuvokārabhave pana tayo purejātapacchājātavippayuttapaccaye apanetvā sesā ekavīsatimeva labbhanti. Ekavokārabhave sahajātaaññamaññanissayakammaindriyaatthiavigatavasena satteva labbhanti. Bāhire pana anindriyabaddharūpe sahajātaaññamaññanissayaatthiavigatavasena pañceva labbhantīti evamettha bhavabhedatopi viññātabbo vinicchayoti.
ਪਚ੍ਚਯਨਿਦ੍ਦੇਸવਾਰવਣ੍ਣਨਾ ਨਿਟ੍ਠਿਤਾ।
Paccayaniddesavāravaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਪਟ੍ਠਾਨਪਾਲ਼ਿ • Paṭṭhānapāḷi / (੨) ਪਚ੍ਚਯਨਿਦ੍ਦੇਸੋ • (2) Paccayaniddeso
