| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
பச்சயனித்³தே³ஸபகிண்ணகவினிச்ச²யகதா²வண்ணனா
Paccayaniddesapakiṇṇakavinicchayakathāvaṇṇanā
‘‘லோப⁴தோ³ஸமோஹா விபாகபச்சயாபி ந ஹொந்தி, ஸேஸானங் ஸத்தரஸன்னங் பச்சயானங் வஸேன பச்சயா ஹொந்தீ’’திஆதி³மபாடோ². எத்த² ச லோப⁴தோ³ஸமோஹானங் பச்சேகங் ஸத்தரஸஹி பச்சயேஹி பச்சயபா⁴வோ வுத்தோ, ஸப்³பே³ ஹேதூ ஸஹ அக்³க³ஹெத்வா ஏகத⁴ம்மஸ்ஸ அனேகபச்சயபா⁴வத³ஸ்ஸனத்த²ங் அமோஹாதீ³னங் விஸுங் க³ஹிதத்தாதி தோ³ஸஸ்ஸபி ஸத்தரஸஹி பச்சயபா⁴வோ ஆபஜ்ஜதி, ததா² ச ஸதி தோ³ஸஸ்ஸபி க³ருகரணங் பாளியங் வத்தப்³ப³ங் ஸியா. ‘‘அகுஸலோ பன ஆரம்மணாதி⁴பதி நாம லோப⁴ஸஹக³தசித்துப்பாதோ³ வுச்சதீ’’தி (பட்டா²॰ அட்ட²॰ 1.4) எத்தா²பி லோப⁴தோ³ஸஸஹக³தசித்துப்பாதா³தி வத்தப்³ப³ங் ஸியா, ந பன வுத்தங், தஸ்மா தோ³ஸஸ்ஸ அதி⁴பதிபச்சயதாபி நிவாரேதப்³பா³. ந ச ‘‘ஸேஸான’’ந்தி வசனேன அதி⁴பதிபச்சயோ நிவாரிதோ, அத² கோ² ஸங்க³ஹிதோ புரேஜாதாதீ³ஹி யதா²வுத்தேஹி ஸேஸத்தாதி தன்னிவாரணத்த²ங் தோ³ஸங் லோப⁴மோஹேஹி ஸஹ அக்³க³ஹெத்வா விஸுஞ்ச அக்³க³ஹெத்வா ‘‘தோ³ஸோ அதி⁴பதிபச்சயோபி ந ஹோதி, ஸேஸானங் பச்சயானங் வஸேன பச்சயோ ஹோதீ’’தி பட²ந்தி. இமினா நயேனாதி ஏதேன பொ²ட்ட²ப்³பா³யதனஸ்ஸ ஸஹஜாதாதி³பச்சயபா⁴வங், ஸப்³ப³த⁴ம்மானங் யதா²யோக³ங் ஹேதாதி³பச்சயபா⁴வஞ்ச த³ஸ்ஸேதி. ந ஹி ஏதங் ஏகபச்சயஸ்ஸ அனேகபச்சயபா⁴வத³ஸ்ஸனந்தி ரூபாதீ³னங் பகதூபனிஸ்ஸயபா⁴வோ ச ஏதேன த³ஸ்ஸிதோதி த³ட்ட²ப்³போ³.
‘‘Lobhadosamohāvipākapaccayāpi na honti, sesānaṃ sattarasannaṃ paccayānaṃ vasena paccayā hontī’’tiādimapāṭho. Ettha ca lobhadosamohānaṃ paccekaṃ sattarasahi paccayehi paccayabhāvo vutto, sabbe hetū saha aggahetvā ekadhammassa anekapaccayabhāvadassanatthaṃ amohādīnaṃ visuṃ gahitattāti dosassapi sattarasahi paccayabhāvo āpajjati, tathā ca sati dosassapi garukaraṇaṃ pāḷiyaṃ vattabbaṃ siyā. ‘‘Akusalo pana ārammaṇādhipati nāma lobhasahagatacittuppādo vuccatī’’ti (paṭṭhā. aṭṭha. 1.4) etthāpi lobhadosasahagatacittuppādāti vattabbaṃ siyā, na pana vuttaṃ, tasmā dosassa adhipatipaccayatāpi nivāretabbā. Na ca ‘‘sesāna’’nti vacanena adhipatipaccayo nivārito, atha kho saṅgahito purejātādīhi yathāvuttehi sesattāti tannivāraṇatthaṃ dosaṃ lobhamohehi saha aggahetvā visuñca aggahetvā ‘‘doso adhipatipaccayopi na hoti, sesānaṃ paccayānaṃ vasena paccayo hotī’’ti paṭhanti. Iminā nayenāti etena phoṭṭhabbāyatanassa sahajātādipaccayabhāvaṃ, sabbadhammānaṃ yathāyogaṃ hetādipaccayabhāvañca dasseti. Na hi etaṃ ekapaccayassa anekapaccayabhāvadassananti rūpādīnaṃ pakatūpanissayabhāvo ca etena dassitoti daṭṭhabbo.
சதுன்னங் க²ந்தா⁴னங் பே⁴தா³ சக்கு²விஞ்ஞாணதா⁴துஆத³யோதி பே⁴த³ங் அனாமஸித்வா தே ஏவ க³ஹெத்வா ஆஹ ‘‘சதூஸு க²ந்தே⁴ஸூ’’தி. மிச்சா²வாசாகம்மந்தாஜீவா தேஹி சேவ கம்மாஹாரபச்சயேஹி சாதி ஏகூனவீஸதிதா⁴தி இத³மேவங் ந ஸக்கா வத்துங். ந ஹி மிச்சா²வாசாத³யோ மிச்சா²தி³ட்டி² விய மக்³க³பச்சயா ஹொந்தி சேதனாய மக்³க³பச்சயத்தாபா⁴வதோ. யதி³ ச ப⁴வெய்ய, பஞ்ஹாவாரே ‘‘கம்மபச்சயா மக்³கே³ தீணீ’’தி வத்தப்³ப³ங் ஸியா, தஸ்மா மிச்சா²வாசாதீ³னங் மக்³க³பச்சயபா⁴வோ ந வத்தப்³போ³. பட்டா²னஸங்வண்ணனா ஹேஸா. ஸேஸபச்சயபா⁴வோ ச சேதனாய அனேகபச்சயபா⁴வவசனேன வுத்தோயேவாதி ந இத³ங் படி²தப்³ப³ந்தி ந பட²ந்தி. ‘‘அஹிரிகங்…பே॰… மித்³த⁴ங் உத்³த⁴ச்சங் விசிகிச்சா²’’திஆதி³மபாடோ², விசிகிச்சா² பன அதி⁴பதிபச்சயோ ந ஹோதீதி தங் தத்த² அபடி²த்வா ‘‘விசிகிச்சா²இஸ்ஸாமச்ச²ரியகுக்குச்சானி ததோ அதி⁴பதிபச்சயங் அபனெத்வா’’தி ஏவமெத்த² பட²ந்தி.
Catunnaṃ khandhānaṃ bhedā cakkhuviññāṇadhātuādayoti bhedaṃ anāmasitvā te eva gahetvā āha ‘‘catūsu khandhesū’’ti. Micchāvācākammantājīvā tehi ceva kammāhārapaccayehi cāti ekūnavīsatidhāti idamevaṃ na sakkā vattuṃ. Na hi micchāvācādayo micchādiṭṭhi viya maggapaccayā honti cetanāya maggapaccayattābhāvato. Yadi ca bhaveyya, pañhāvāre ‘‘kammapaccayā magge tīṇī’’ti vattabbaṃ siyā, tasmā micchāvācādīnaṃ maggapaccayabhāvo na vattabbo. Paṭṭhānasaṃvaṇṇanā hesā. Sesapaccayabhāvo ca cetanāya anekapaccayabhāvavacanena vuttoyevāti na idaṃ paṭhitabbanti na paṭhanti. ‘‘Ahirikaṃ…pe… middhaṃ uddhaccaṃ vicikicchā’’tiādimapāṭho, vicikicchā pana adhipatipaccayo na hotīti taṃ tattha apaṭhitvā ‘‘vicikicchāissāmacchariyakukkuccāni tato adhipatipaccayaṃ apanetvā’’ti evamettha paṭhanti.
‘‘சத்தாரி மஹாபூ⁴தானி ஆரம்மண…பே॰… புரேஜாதவிப்பயுத்தஅத்தி²அவிக³தவஸேன த³ஸதா⁴ பச்சயா ஹொந்தி, புன ததா² ஹத³யவத்தூ²’’தி புரிமபாடோ², மஹாபூ⁴தானி பன விப்பயுத்தபச்சயா ந ஹொந்தீதி ‘‘புரேஜாதஅத்தி²அவிக³தவஸேன நவதா⁴ பச்சயா ஹொந்தி, விப்பயுத்தபச்சயங் பக்கி²பித்வா த³ஸதா⁴ வத்து²’’ந்தி பட²ந்தி. எத்தகமேவெத்த² அபுப்³ப³ந்தி ஏதஸ்மிங் புரேஜாதபச்சயே ஸஹஜாதனிஸ்ஸயேஹி அபுப்³ப³ங் ரூபஸத்³த³க³ந்த⁴ரஸாயதனமத்தமேவாதி அத்தோ², ஆரம்மணானி பனேதானி ஆரம்மணபச்சயத⁴ம்மானங் அனேகபச்சயபா⁴வே வுத்தானீதி ஸப்³பா³திக்கந்தபச்சயாபெக்கா² ஏதேஸங் அபுப்³ப³தா நத்தீ²தி. இந்த்³ரியாதீ³ஸு அபுப்³ப³ங் நத்தீ²தி ரூபஜீவிதிந்த்³ரியஸ்ஸபி அரூபஜீவிதிந்த்³ரியதோ அபுப்³ப³ஸ்ஸ பச்சயபா⁴வஸ்ஸ அபா⁴வங் மஞ்ஞமானேன அபுப்³ப³தா ந வுத்தா. தஸ்ஸ பன புரேஜாதபச்சயபா⁴வதோ அபுப்³ப³தா. கப³ளீகாராஹாரஸ்ஸ ச புரேஜாதேன ஸத்³தி⁴ங் ஸத்ததா⁴ பச்சயபா⁴வோ யோஜேதப்³போ³.
‘‘Cattārimahābhūtāni ārammaṇa…pe… purejātavippayuttaatthiavigatavasena dasadhā paccayā honti, puna tathā hadayavatthū’’ti purimapāṭho, mahābhūtāni pana vippayuttapaccayā na hontīti ‘‘purejātaatthiavigatavasena navadhā paccayā honti, vippayuttapaccayaṃ pakkhipitvā dasadhā vatthu’’nti paṭhanti. Ettakamevettha apubbanti etasmiṃ purejātapaccaye sahajātanissayehi apubbaṃ rūpasaddagandharasāyatanamattamevāti attho, ārammaṇāni panetāni ārammaṇapaccayadhammānaṃ anekapaccayabhāve vuttānīti sabbātikkantapaccayāpekkhā etesaṃ apubbatā natthīti. Indriyādīsu apubbaṃ natthīti rūpajīvitindriyassapi arūpajīvitindriyato apubbassa paccayabhāvassa abhāvaṃ maññamānena apubbatā na vuttā. Tassa pana purejātapaccayabhāvato apubbatā. Kabaḷīkārāhārassa ca purejātena saddhiṃ sattadhā paccayabhāvo yojetabbo.
ஆகாரோதி மூலாதி³ஆகாரோ. அத்தோ²தி தேனாகாரேன உபகாரகதா. ‘‘யேனாகாரேனா’’தி ஏதஸ்ஸ வா அத்த²வசனங் ‘‘யேனத்தே²னா’’தி. விபாகஹேதூஸுயேவ லப்³ப⁴தீதி எத்த² அமோஹவிபாகஹேதுஸ்ஸ அதி⁴பதிபச்சயபா⁴வோ ச லோகுத்தரவிபாகேயேவ லப்³ப⁴தீதி. ஏவங் ஸப்³ப³த்த² லப்³ப⁴மானாலப்³ப⁴மானங் ஸல்லக்கே²தப்³ப³ங். விப்பயுத்தங் அபடி²த்வா ‘‘ச²ஹாகாரேஹீ’’தி புரிமபாடோ², தங் பன படி²த்வா ‘‘ஸத்தஹாகாரேஹீ’’தி பட²ந்தி. உக்கட்ட²பரிச்சே²தோ³ ஹெத்த² வுச்சதி, ந ச யங் ஆரம்மணங் நிஸ்ஸயோ ஹோதி, தங் விப்பயுத்தங் ந ஹோதீதி.
Ākāroti mūlādiākāro. Atthoti tenākārena upakārakatā. ‘‘Yenākārenā’’ti etassa vā atthavacanaṃ ‘‘yenatthenā’’ti. Vipākahetūsuyeva labbhatīti ettha amohavipākahetussa adhipatipaccayabhāvo ca lokuttaravipākeyeva labbhatīti. Evaṃ sabbattha labbhamānālabbhamānaṃ sallakkhetabbaṃ. Vippayuttaṃ apaṭhitvā ‘‘chahākārehī’’ti purimapāṭho, taṃ pana paṭhitvā ‘‘sattahākārehī’’ti paṭhanti. Ukkaṭṭhaparicchedo hettha vuccati, na ca yaṃ ārammaṇaṃ nissayo hoti, taṃ vippayuttaṃ na hotīti.
அனந்தரஸமனந்தரேஸு யங் கம்மபச்சயோ ஹோதி, தங் ந ஆஸேவனபச்சயோ. யஞ்ச ஆஸேவனபச்சயோ ஹோதி, ந தங் கம்மபச்சயோதி த³ட்ட²ப்³ப³ங். ‘‘பகதூபனிஸ்ஸயோ பகதூபனிஸ்ஸயோவா’’தி வுத்தங் , கம்மபச்சயோபி பன ஸோ ஹோதி, தஸ்மா ‘‘கம்மபச்சயோ சா’’தி பட²ந்தி. அயங் பனெத்த² அத்தோ² – பகதூபனிஸ்ஸயோ யேபு⁴ய்யேன பகதூபனிஸ்ஸயோவ ஹோதி, கோசி பனெத்த² கம்மபச்சயோ ச ஹோதீதி. ‘‘ஆரம்மணபுரேஜாதே பனெத்த² இந்த்³ரியவிப்பயுத்தபச்சயதா ந லப்³ப⁴தீ’’தி வுத்தங். தத்த² ஆரம்மணபுரேஜாதந்தி யதி³ கஞ்சி ஆரம்மணபூ⁴தங் புரேஜாதங் வுத்தங், ஆரம்மணபூ⁴தஸ்ஸ வத்து²ஸ்ஸ விப்பயுத்தபச்சயதா லப்³ப⁴தீதி ஸா ந லப்³ப⁴தீதி ந வத்தப்³பா³. அத² பன வத்து²புரேஜாததோ அஞ்ஞங் வத்து²பா⁴வரஹிதாரம்மணமேவ ‘‘ஆரம்மணபுரேஜாத’’ந்தி வுத்தங், தஸ்ஸ நிஸ்ஸயபச்சயதா ந லப்³ப⁴தீதி ‘‘நிஸ்ஸயிந்த்³ரியவிப்பயுத்தபச்சயதா ந லப்³ப⁴தீ’’தி வத்தப்³ப³ங். இதோ உத்தரிபீதி புரேஜாததோ பரதோபீதி அத்தோ², இதோ வா இந்த்³ரியவிப்பயுத்ததோ நிஸ்ஸயிந்த்³ரியவிப்பயுத்ததோ வா உத்தரி ஆரம்மணாதி⁴பதிஆதி³ ச லப்³ப⁴மானாலப்³ப⁴மானங் வேதி³தப்³ப³ந்தி அத்தோ² வத்தப்³போ³. கம்மாதீ³ஸு பன லப்³ப⁴மானாலப்³ப⁴மானங் ந வக்க²தீதி புரிமோயேவெத்த² அத்தோ² அதி⁴ப்பேதோ.
Anantarasamanantaresu yaṃ kammapaccayo hoti, taṃ na āsevanapaccayo. Yañca āsevanapaccayo hoti, na taṃ kammapaccayoti daṭṭhabbaṃ. ‘‘Pakatūpanissayo pakatūpanissayovā’’ti vuttaṃ , kammapaccayopi pana so hoti, tasmā ‘‘kammapaccayo cā’’ti paṭhanti. Ayaṃ panettha attho – pakatūpanissayo yebhuyyena pakatūpanissayova hoti, koci panettha kammapaccayo ca hotīti. ‘‘Ārammaṇapurejāte panettha indriyavippayuttapaccayatā na labbhatī’’ti vuttaṃ. Tattha ārammaṇapurejātanti yadi kañci ārammaṇabhūtaṃ purejātaṃ vuttaṃ, ārammaṇabhūtassa vatthussa vippayuttapaccayatā labbhatīti sā na labbhatīti na vattabbā. Atha pana vatthupurejātato aññaṃ vatthubhāvarahitārammaṇameva ‘‘ārammaṇapurejāta’’nti vuttaṃ, tassa nissayapaccayatā na labbhatīti ‘‘nissayindriyavippayuttapaccayatā na labbhatī’’ti vattabbaṃ. Ito uttaripīti purejātato paratopīti attho, ito vā indriyavippayuttato nissayindriyavippayuttato vā uttari ārammaṇādhipatiādi ca labbhamānālabbhamānaṃ veditabbanti attho vattabbo. Kammādīsu pana labbhamānālabbhamānaṃ na vakkhatīti purimoyevettha attho adhippeto.
‘‘கப³ளீகாரோ ஆஹாரோ ஆஹாரபச்சயோவா’’தி புரிமபாடோ², அத்தி²அவிக³தபச்சயோபி பன ஸோ ஹோதி, தேன ‘‘கப³ளீகாரோ ஆஹாரோ ஆஹாரபச்சயத்தங் அவிஜஹந்தோவ அத்தி²அவிக³தானங் வஸேன அபரேஹிபி த்³வீஹாகாரேஹி அனேகபச்சயபா⁴வங் க³ச்ச²தீ’’தி பட²ந்தி.
‘‘Kabaḷīkāro āhāro āhārapaccayovā’’ti purimapāṭho, atthiavigatapaccayopi pana so hoti, tena ‘‘kabaḷīkāro āhāro āhārapaccayattaṃ avijahantova atthiavigatānaṃ vasena aparehipi dvīhākārehi anekapaccayabhāvaṃ gacchatī’’ti paṭhanti.
‘‘யதா²னுரூபங் ஜா²னபச்சயே வுத்தானங் த³ஸன்னங் ஹேதுஅதி⁴பதீனஞ்சாதி இமேஸங் வஸேனா’’தி புரிமபாடோ², ‘‘யதா²னுரூபங் ஜா²னபச்சயே வுத்தானங் மக்³க³வஜ்ஜானங் நவன்னங் ஹேதுஅதி⁴பதிஜா²னானஞ்சாதி இமேஸங் வஸேனா’’தி பச்சி²மபாடோ², தேஸு விசாரெத்வா யுத்தோ க³ஹேதப்³போ³.
‘‘Yathānurūpaṃ jhānapaccaye vuttānaṃ dasannaṃ hetuadhipatīnañcāti imesaṃ vasenā’’ti purimapāṭho, ‘‘yathānurūpaṃ jhānapaccaye vuttānaṃ maggavajjānaṃ navannaṃ hetuadhipatijhānānañcāti imesaṃ vasenā’’ti pacchimapāṭho, tesu vicāretvā yutto gahetabbo.
ஸமனந்தரனிருத்³த⁴தாய ஆரம்மணபா⁴வேன ச ஸதி³ஸோ பச்சயபா⁴வோ பச்சயஸபா⁴க³தா, விருத்³த⁴பச்சயதா பச்சயவிஸபா⁴க³தா. ‘‘இமினா உபாயேனா’’தி வசனதோ ஹேதுஆதீ³னங் ஸஹஜாதானங் ஸஹஜாதபா⁴வேன ஸபா⁴க³தா, ஸஹஜாதாஸஹஜாதானங் ஹேதுஆரம்மணாதீ³னங் அஞ்ஞமஞ்ஞவிஸபா⁴க³தாதி ஏவமாதி³னா உபாயேன ஸபா⁴க³தா விஸபா⁴க³தா யோஜேதப்³பா³.
Samanantaraniruddhatāya ārammaṇabhāvena ca sadiso paccayabhāvo paccayasabhāgatā, viruddhapaccayatā paccayavisabhāgatā. ‘‘Iminā upāyenā’’ti vacanato hetuādīnaṃ sahajātānaṃ sahajātabhāvena sabhāgatā, sahajātāsahajātānaṃ hetuārammaṇādīnaṃ aññamaññavisabhāgatāti evamādinā upāyena sabhāgatā visabhāgatā yojetabbā.
ஜனகாயேவ, ந அஜனகாதி ஜனகபா⁴வப்பதா⁴னாயேவ ஹுத்வா பச்சயா ஹொந்தி, ந உபத்த²ம்ப⁴கபா⁴வப்பதா⁴னாதி அத்தோ² த³ட்ட²ப்³போ³. யேஸங் ஹேதுஆத³யோ பச்சயா ஹொந்தி, தே தேஹி வினா நேவ உப்பஜ்ஜந்தி, ந ச பவத்தந்தீதி தேஸங் உப⁴யப்பதா⁴னதா வுத்தா. ந ஹி தே அனந்தராத³யோ விய ஜனநேனேவ பவத்திங் கரொந்தீதி.
Janakāyeva, na ajanakāti janakabhāvappadhānāyeva hutvā paccayā honti, na upatthambhakabhāvappadhānāti attho daṭṭhabbo. Yesaṃ hetuādayo paccayā honti, te tehi vinā neva uppajjanti, na ca pavattantīti tesaṃ ubhayappadhānatā vuttā. Na hi te anantarādayo viya jananeneva pavattiṃ karontīti.
ஸப்³பே³ஸங் டா²னங் காரணபா⁴வோ ஸப்³ப³ட்டா²னங், தங் ஏதேஸங் அத்தீ²தி ஸப்³ப³ட்டா²னிகா. உபனிஸ்ஸயங் பி⁴ந்த³ந்தேன தயோபி உபனிஸ்ஸயா வத்தப்³பா³, அபி⁴ந்தி³த்வா வா உபனிஸ்ஸயக்³க³ஹணமேவ காதப்³ப³ங். தத்த² பி⁴ந்த³னங் பகதூபனிஸ்ஸயஸ்ஸ ரூபானங் பச்சயத்தாபா⁴வத³ஸ்ஸனத்த²ங், ஆரம்மணானந்தரூபனிஸ்ஸயானங் பன புப்³பே³ ஆரம்மணாதி⁴பதிஅனந்தரக்³க³ஹணேஹி க³ஹிதத்தா தேஸு ஏகதே³ஸேன அனந்தரூபனிஸ்ஸயேன இதரம்பி த³ஸ்ஸேதீதி த³ட்ட²ப்³ப³ங். புரேஜாதபச்சா²ஜாதாபி அஸப்³ப³ட்டா²னிகா அரூபரூபானஞ்ஞேவ யதா²க்கமேன பச்சயபா⁴வதோதி எத்த² புரேஜாதபச்சயோ அனந்தராதீ³ஸு ஏவ வத்தப்³போ³ தங்ஸமானக³திகத்தா, ந ச யுக³ளபா⁴வோ பச்சா²ஜாதேன ஸஹ கத²னே காரணங் அஸப்³ப³ட்டா²னிகத³ஸ்ஸனமத்தஸ்ஸ அதி⁴ப்பேதத்தாதி தங் தத்த² படி²த்வா ‘‘பச்சா²ஜாதோபி அஸப்³ப³ட்டா²னிகோ ரூபானங்யேவ பச்சயபா⁴வதோ’’தி பட²ந்தி.
Sabbesaṃ ṭhānaṃ kāraṇabhāvo sabbaṭṭhānaṃ, taṃ etesaṃ atthīti sabbaṭṭhānikā. Upanissayaṃ bhindantena tayopi upanissayā vattabbā, abhinditvā vā upanissayaggahaṇameva kātabbaṃ. Tattha bhindanaṃ pakatūpanissayassa rūpānaṃ paccayattābhāvadassanatthaṃ, ārammaṇānantarūpanissayānaṃ pana pubbe ārammaṇādhipatianantaraggahaṇehi gahitattā tesu ekadesena anantarūpanissayena itarampi dassetīti daṭṭhabbaṃ. Purejātapacchājātāpi asabbaṭṭhānikā arūparūpānaññeva yathākkamena paccayabhāvatoti ettha purejātapaccayo anantarādīsu eva vattabbo taṃsamānagatikattā, na ca yugaḷabhāvo pacchājātena saha kathane kāraṇaṃ asabbaṭṭhānikadassanamattassa adhippetattāti taṃ tattha paṭhitvā ‘‘pacchājātopi asabbaṭṭhāniko rūpānaṃyeva paccayabhāvato’’ti paṭhanti.
பச்சயனித்³தே³ஸபகிண்ணகவினிச்ச²யகதா²வண்ணனா நிட்டி²தா.
Paccayaniddesapakiṇṇakavinicchayakathāvaṇṇanā niṭṭhitā.
