| Library / Tipiṭaka / д̇ибидага • Tipiṭaka / бан̃жабагаран̣а-мууладийгаа • Pañcapakaraṇa-mūlaṭīkā |
бажжаяанид̣̇д̣̇зсабагин̣н̣агавинижчаяагат̇ааван̣н̣анаа
Paccayaniddesapakiṇṇakavinicchayakathāvaṇṇanā
‘‘лобхад̣̇осамохаа вибаагабажжаяааби на хонд̇и, сзсаанам̣ сад̇д̇арасаннам̣ бажжаяаанам̣ васзна бажжаяаа хонд̇ий’’д̇иаад̣̇имабаато. зд̇т̇а жа лобхад̣̇осамохаанам̣ бажжзгам̣ сад̇д̇арасахи бажжаязхи бажжаяабхааво вуд̇д̇о, саб̣б̣з хзд̇уу саха аг̇г̇ахзд̇ваа згад̇хаммасса анзгабажжаяабхаавад̣̇ассанад̇т̇ам̣ амохаад̣̇ийнам̣ висум̣ г̇ахид̇ад̇д̇аад̇и д̣̇осассаби сад̇д̇арасахи бажжаяабхааво аабаж̇ж̇ад̇и, д̇ат̇аа жа сад̇и д̣̇осассаби г̇аругаран̣ам̣ баал̣ияам̣ вад̇д̇аб̣б̣ам̣ сияаа. ‘‘агусало бана аарамман̣аад̇хибад̇и наама лобхасахаг̇ад̇ажид̇д̇уббаад̣̇о вужжад̇ий’’д̇и (бадтаа. адта. 1.4) зд̇т̇ааби лобхад̣̇осасахаг̇ад̇ажид̇д̇уббаад̣̇аад̇и вад̇д̇аб̣б̣ам̣ сияаа, на бана вуд̇д̇ам̣, д̇асмаа д̣̇осасса ад̇хибад̇ибажжаяад̇ааби ниваарзд̇аб̣б̣аа. на жа ‘‘сзсаана’’нд̇и важанзна ад̇хибад̇ибажжаяо ниваарид̇о, ат̇а ко сан̇г̇ахид̇о бурзж̇аад̇аад̣̇ийхи яат̇аавуд̇д̇зхи сзсад̇д̇аад̇и д̇аннивааран̣ад̇т̇ам̣ д̣̇осам̣ лобхамохзхи саха аг̇г̇ахзд̇ваа висун̃жа аг̇г̇ахзд̇ваа ‘‘д̣̇осо ад̇хибад̇ибажжаяоби на ход̇и, сзсаанам̣ бажжаяаанам̣ васзна бажжаяо ход̇ий’’д̇и батанд̇и. иминаа наязнаад̇и зд̇зна подтаб̣б̣ааяад̇анасса сахаж̇аад̇аад̣̇ибажжаяабхаавам̣, саб̣б̣ад̇хаммаанам̣ яат̇ааяог̇ам̣ хзд̇аад̣̇ибажжаяабхааван̃жа д̣̇ассзд̇и. на хи зд̇ам̣ згабажжаяасса анзгабажжаяабхаавад̣̇ассананд̇и руубаад̣̇ийнам̣ багад̇уубаниссаяабхааво жа зд̇зна д̣̇ассид̇од̇и д̣̇адтаб̣б̣о.
‘‘Lobhadosamohāvipākapaccayāpi na honti, sesānaṃ sattarasannaṃ paccayānaṃ vasena paccayā hontī’’tiādimapāṭho. Ettha ca lobhadosamohānaṃ paccekaṃ sattarasahi paccayehi paccayabhāvo vutto, sabbe hetū saha aggahetvā ekadhammassa anekapaccayabhāvadassanatthaṃ amohādīnaṃ visuṃ gahitattāti dosassapi sattarasahi paccayabhāvo āpajjati, tathā ca sati dosassapi garukaraṇaṃ pāḷiyaṃ vattabbaṃ siyā. ‘‘Akusalo pana ārammaṇādhipati nāma lobhasahagatacittuppādo vuccatī’’ti (paṭṭhā. aṭṭha. 1.4) etthāpi lobhadosasahagatacittuppādāti vattabbaṃ siyā, na pana vuttaṃ, tasmā dosassa adhipatipaccayatāpi nivāretabbā. Na ca ‘‘sesāna’’nti vacanena adhipatipaccayo nivārito, atha kho saṅgahito purejātādīhi yathāvuttehi sesattāti tannivāraṇatthaṃ dosaṃ lobhamohehi saha aggahetvā visuñca aggahetvā ‘‘doso adhipatipaccayopi na hoti, sesānaṃ paccayānaṃ vasena paccayo hotī’’ti paṭhanti. Iminā nayenāti etena phoṭṭhabbāyatanassa sahajātādipaccayabhāvaṃ, sabbadhammānaṃ yathāyogaṃ hetādipaccayabhāvañca dasseti. Na hi etaṃ ekapaccayassa anekapaccayabhāvadassananti rūpādīnaṃ pakatūpanissayabhāvo ca etena dassitoti daṭṭhabbo.
жад̇уннам̣ канд̇хаанам̣ бхзд̣̇аа жагкувин̃н̃аан̣ад̇хаад̇уаад̣̇аяод̇и бхзд̣̇ам̣ анаамасид̇ваа д̇з зва г̇ахзд̇ваа ааха ‘‘жад̇уусу канд̇хзсуу’’д̇и. мижчааваажаагамманд̇ааж̇ийваа д̇зхи жзва гаммаахаарабажжаязхи жаад̇и згуунавийсад̇ид̇хаад̇и ид̣̇амзвам̣ на саггаа вад̇д̇ум̣. на хи мижчааваажаад̣̇аяо мижчаад̣̇идти вияа маг̇г̇абажжаяаа хонд̇и жзд̇анааяа маг̇г̇абажжаяад̇д̇аабхаавад̇о. яад̣̇и жа бхавзяяа, бан̃хааваарз ‘‘гаммабажжаяаа маг̇г̇з д̇ийн̣ий’’д̇и вад̇д̇аб̣б̣ам̣ сияаа, д̇асмаа мижчааваажаад̣̇ийнам̣ маг̇г̇абажжаяабхааво на вад̇д̇аб̣б̣о. бадтаанасам̣ван̣н̣анаа хзсаа. сзсабажжаяабхааво жа жзд̇анааяа анзгабажжаяабхаававажанзна вуд̇д̇оязваад̇и на ид̣̇ам̣ батид̇аб̣б̣анд̇и на батанд̇и. ‘‘ахиригам̣…бз… мид̣̇д̇хам̣ уд̣̇д̇хажжам̣ вижигижчаа’’д̇иаад̣̇имабаато, вижигижчаа бана ад̇хибад̇ибажжаяо на ход̇ийд̇и д̇ам̣ д̇ад̇т̇а абатид̇ваа ‘‘вижигижчааиссаамажчарияагуггужжаани д̇ад̇о ад̇хибад̇ибажжаяам̣ абанзд̇ваа’’д̇и звамзд̇т̇а батанд̇и.
Catunnaṃ khandhānaṃ bhedā cakkhuviññāṇadhātuādayoti bhedaṃ anāmasitvā te eva gahetvā āha ‘‘catūsu khandhesū’’ti. Micchāvācākammantājīvā tehi ceva kammāhārapaccayehi cāti ekūnavīsatidhāti idamevaṃ na sakkā vattuṃ. Na hi micchāvācādayo micchādiṭṭhi viya maggapaccayā honti cetanāya maggapaccayattābhāvato. Yadi ca bhaveyya, pañhāvāre ‘‘kammapaccayā magge tīṇī’’ti vattabbaṃ siyā, tasmā micchāvācādīnaṃ maggapaccayabhāvo na vattabbo. Paṭṭhānasaṃvaṇṇanā hesā. Sesapaccayabhāvo ca cetanāya anekapaccayabhāvavacanena vuttoyevāti na idaṃ paṭhitabbanti na paṭhanti. ‘‘Ahirikaṃ…pe… middhaṃ uddhaccaṃ vicikicchā’’tiādimapāṭho, vicikicchā pana adhipatipaccayo na hotīti taṃ tattha apaṭhitvā ‘‘vicikicchāissāmacchariyakukkuccāni tato adhipatipaccayaṃ apanetvā’’ti evamettha paṭhanti.
‘‘жад̇д̇аари махаабхууд̇аани аарамман̣а…бз… бурзж̇аад̇авиббаяуд̇д̇аад̇т̇иавиг̇ад̇авасзна д̣̇асад̇хаа бажжаяаа хонд̇и, буна д̇ат̇аа хад̣̇аяавад̇т̇уу’’д̇и буримабаато, махаабхууд̇аани бана виббаяуд̇д̇абажжаяаа на хонд̇ийд̇и ‘‘бурзж̇аад̇аад̇т̇иавиг̇ад̇авасзна навад̇хаа бажжаяаа хонд̇и, виббаяуд̇д̇абажжаяам̣ багкибид̇ваа д̣̇асад̇хаа вад̇т̇у’’нд̇и батанд̇и. зд̇д̇агамзвзд̇т̇а абуб̣б̣анд̇и зд̇асмим̣ бурзж̇аад̇абажжаяз сахаж̇аад̇аниссаязхи абуб̣б̣ам̣ руубасад̣̇д̣̇аг̇анд̇харасааяад̇анамад̇д̇амзваад̇и ад̇т̇о, аарамман̣аани банзд̇аани аарамман̣абажжаяад̇хаммаанам̣ анзгабажжаяабхаавз вуд̇д̇аанийд̇и саб̣б̣аад̇игганд̇абажжаяаабзгкаа зд̇зсам̣ абуб̣б̣ад̇аа над̇т̇ийд̇и. инд̣̇рияаад̣̇ийсу абуб̣б̣ам̣ над̇т̇ийд̇и руубаж̇ийвид̇инд̣̇рияассаби аруубаж̇ийвид̇инд̣̇рияад̇о абуб̣б̣асса бажжаяабхаавасса абхаавам̣ ман̃н̃амаанзна абуб̣б̣ад̇аа на вуд̇д̇аа. д̇асса бана бурзж̇аад̇абажжаяабхаавад̇о абуб̣б̣ад̇аа. габ̣ал̣ийгаараахаарасса жа бурзж̇аад̇зна сад̣̇д̇хим̣ сад̇д̇ад̇хаа бажжаяабхааво яож̇зд̇аб̣б̣о.
‘‘Cattārimahābhūtāni ārammaṇa…pe… purejātavippayuttaatthiavigatavasena dasadhā paccayā honti, puna tathā hadayavatthū’’ti purimapāṭho, mahābhūtāni pana vippayuttapaccayā na hontīti ‘‘purejātaatthiavigatavasena navadhā paccayā honti, vippayuttapaccayaṃ pakkhipitvā dasadhā vatthu’’nti paṭhanti. Ettakamevettha apubbanti etasmiṃ purejātapaccaye sahajātanissayehi apubbaṃ rūpasaddagandharasāyatanamattamevāti attho, ārammaṇāni panetāni ārammaṇapaccayadhammānaṃ anekapaccayabhāve vuttānīti sabbātikkantapaccayāpekkhā etesaṃ apubbatā natthīti. Indriyādīsu apubbaṃ natthīti rūpajīvitindriyassapi arūpajīvitindriyato apubbassa paccayabhāvassa abhāvaṃ maññamānena apubbatā na vuttā. Tassa pana purejātapaccayabhāvato apubbatā. Kabaḷīkārāhārassa ca purejātena saddhiṃ sattadhā paccayabhāvo yojetabbo.
аагаарод̇и муулаад̣̇иаагааро. ад̇т̇од̇и д̇знаагаарзна убагаарагад̇аа. ‘‘язнаагаарзнаа’’д̇и зд̇асса ваа ад̇т̇аважанам̣ ‘‘язнад̇т̇знаа’’д̇и. вибаагахзд̇уусуязва лаб̣бхад̇ийд̇и зд̇т̇а амохавибаагахзд̇усса ад̇хибад̇ибажжаяабхааво жа логуд̇д̇аравибаагзязва лаб̣бхад̇ийд̇и. звам̣ саб̣б̣ад̇т̇а лаб̣бхамаанаалаб̣бхамаанам̣ саллагкзд̇аб̣б̣ам̣. виббаяуд̇д̇ам̣ абатид̇ваа ‘‘чахаагаарзхий’’д̇и буримабаато, д̇ам̣ бана батид̇ваа ‘‘сад̇д̇ахаагаарзхий’’д̇и батанд̇и. уггадтабарижчзд̣̇о хзд̇т̇а вужжад̇и, на жа яам̣ аарамман̣ам̣ ниссаяо ход̇и, д̇ам̣ виббаяуд̇д̇ам̣ на ход̇ийд̇и.
Ākāroti mūlādiākāro. Atthoti tenākārena upakārakatā. ‘‘Yenākārenā’’ti etassa vā atthavacanaṃ ‘‘yenatthenā’’ti. Vipākahetūsuyeva labbhatīti ettha amohavipākahetussa adhipatipaccayabhāvo ca lokuttaravipākeyeva labbhatīti. Evaṃ sabbattha labbhamānālabbhamānaṃ sallakkhetabbaṃ. Vippayuttaṃ apaṭhitvā ‘‘chahākārehī’’ti purimapāṭho, taṃ pana paṭhitvā ‘‘sattahākārehī’’ti paṭhanti. Ukkaṭṭhaparicchedo hettha vuccati, na ca yaṃ ārammaṇaṃ nissayo hoti, taṃ vippayuttaṃ na hotīti.
ананд̇арасамананд̇арзсу яам̣ гаммабажжаяо ход̇и, д̇ам̣ на аасзванабажжаяо. яан̃жа аасзванабажжаяо ход̇и, на д̇ам̣ гаммабажжаяод̇и д̣̇адтаб̣б̣ам̣. ‘‘багад̇уубаниссаяо багад̇уубаниссаяоваа’’д̇и вуд̇д̇ам̣ , гаммабажжаяоби бана со ход̇и, д̇асмаа ‘‘гаммабажжаяо жаа’’д̇и батанд̇и. аяам̣ банзд̇т̇а ад̇т̇о – багад̇уубаниссаяо язбхуяязна багад̇уубаниссаяова ход̇и, гожи банзд̇т̇а гаммабажжаяо жа ход̇ийд̇и. ‘‘аарамман̣абурзж̇аад̇з банзд̇т̇а инд̣̇рияавиббаяуд̇д̇абажжаяад̇аа на лаб̣бхад̇ий’’д̇и вуд̇д̇ам̣. д̇ад̇т̇а аарамман̣абурзж̇аад̇анд̇и яад̣̇и ган̃жи аарамман̣абхууд̇ам̣ бурзж̇аад̇ам̣ вуд̇д̇ам̣, аарамман̣абхууд̇асса вад̇т̇усса виббаяуд̇д̇абажжаяад̇аа лаб̣бхад̇ийд̇и саа на лаб̣бхад̇ийд̇и на вад̇д̇аб̣б̣аа. ат̇а бана вад̇т̇убурзж̇аад̇ад̇о ан̃н̃ам̣ вад̇т̇убхааварахид̇аарамман̣амзва ‘‘аарамман̣абурзж̇аад̇а’’нд̇и вуд̇д̇ам̣, д̇асса ниссаяабажжаяад̇аа на лаб̣бхад̇ийд̇и ‘‘ниссаяинд̣̇рияавиббаяуд̇д̇абажжаяад̇аа на лаб̣бхад̇ий’’д̇и вад̇д̇аб̣б̣ам̣. ид̇о уд̇д̇арибийд̇и бурзж̇аад̇ад̇о барад̇обийд̇и ад̇т̇о, ид̇о ваа инд̣̇рияавиббаяуд̇д̇ад̇о ниссаяинд̣̇рияавиббаяуд̇д̇ад̇о ваа уд̇д̇ари аарамман̣аад̇хибад̇иаад̣̇и жа лаб̣бхамаанаалаб̣бхамаанам̣ взд̣̇ид̇аб̣б̣анд̇и ад̇т̇о вад̇д̇аб̣б̣о. гаммаад̣̇ийсу бана лаб̣бхамаанаалаб̣бхамаанам̣ на вагкад̇ийд̇и буримоязвзд̇т̇а ад̇т̇о ад̇хиббзд̇о.
Anantarasamanantaresu yaṃ kammapaccayo hoti, taṃ na āsevanapaccayo. Yañca āsevanapaccayo hoti, na taṃ kammapaccayoti daṭṭhabbaṃ. ‘‘Pakatūpanissayo pakatūpanissayovā’’ti vuttaṃ , kammapaccayopi pana so hoti, tasmā ‘‘kammapaccayo cā’’ti paṭhanti. Ayaṃ panettha attho – pakatūpanissayo yebhuyyena pakatūpanissayova hoti, koci panettha kammapaccayo ca hotīti. ‘‘Ārammaṇapurejāte panettha indriyavippayuttapaccayatā na labbhatī’’ti vuttaṃ. Tattha ārammaṇapurejātanti yadi kañci ārammaṇabhūtaṃ purejātaṃ vuttaṃ, ārammaṇabhūtassa vatthussa vippayuttapaccayatā labbhatīti sā na labbhatīti na vattabbā. Atha pana vatthupurejātato aññaṃ vatthubhāvarahitārammaṇameva ‘‘ārammaṇapurejāta’’nti vuttaṃ, tassa nissayapaccayatā na labbhatīti ‘‘nissayindriyavippayuttapaccayatā na labbhatī’’ti vattabbaṃ. Ito uttaripīti purejātato paratopīti attho, ito vā indriyavippayuttato nissayindriyavippayuttato vā uttari ārammaṇādhipatiādi ca labbhamānālabbhamānaṃ veditabbanti attho vattabbo. Kammādīsu pana labbhamānālabbhamānaṃ na vakkhatīti purimoyevettha attho adhippeto.
‘‘габ̣ал̣ийгааро аахааро аахаарабажжаяоваа’’д̇и буримабаато, ад̇т̇иавиг̇ад̇абажжаяоби бана со ход̇и, д̇зна ‘‘габ̣ал̣ийгааро аахааро аахаарабажжаяад̇д̇ам̣ авиж̇аханд̇ова ад̇т̇иавиг̇ад̇аанам̣ васзна абарзхиби д̣̇вийхаагаарзхи анзгабажжаяабхаавам̣ г̇ажчад̇ий’’д̇и батанд̇и.
‘‘Kabaḷīkāro āhāro āhārapaccayovā’’ti purimapāṭho, atthiavigatapaccayopi pana so hoti, tena ‘‘kabaḷīkāro āhāro āhārapaccayattaṃ avijahantova atthiavigatānaṃ vasena aparehipi dvīhākārehi anekapaccayabhāvaṃ gacchatī’’ti paṭhanti.
‘‘яат̇аануруубам̣ жхаанабажжаяз вуд̇д̇аанам̣ д̣̇асаннам̣ хзд̇уад̇хибад̇ийнан̃жаад̇и имзсам̣ васзнаа’’д̇и буримабаато, ‘‘яат̇аануруубам̣ жхаанабажжаяз вуд̇д̇аанам̣ маг̇г̇аваж̇ж̇аанам̣ наваннам̣ хзд̇уад̇хибад̇ижхаанаанан̃жаад̇и имзсам̣ васзнаа’’д̇и бажчимабаато, д̇зсу вижаарзд̇ваа яуд̇д̇о г̇ахзд̇аб̣б̣о.
‘‘Yathānurūpaṃ jhānapaccaye vuttānaṃ dasannaṃ hetuadhipatīnañcāti imesaṃ vasenā’’ti purimapāṭho, ‘‘yathānurūpaṃ jhānapaccaye vuttānaṃ maggavajjānaṃ navannaṃ hetuadhipatijhānānañcāti imesaṃ vasenā’’ti pacchimapāṭho, tesu vicāretvā yutto gahetabbo.
самананд̇аранируд̣̇д̇хад̇ааяа аарамман̣абхаавзна жа сад̣̇исо бажжаяабхааво бажжаяасабхааг̇ад̇аа, вируд̣̇д̇хабажжаяад̇аа бажжаяависабхааг̇ад̇аа. ‘‘иминаа убааязнаа’’д̇и важанад̇о хзд̇уаад̣̇ийнам̣ сахаж̇аад̇аанам̣ сахаж̇аад̇абхаавзна сабхааг̇ад̇аа, сахаж̇аад̇аасахаж̇аад̇аанам̣ хзд̇уаарамман̣аад̣̇ийнам̣ ан̃н̃аман̃н̃ависабхааг̇ад̇аад̇и звамаад̣̇инаа убааязна сабхааг̇ад̇аа висабхааг̇ад̇аа яож̇зд̇аб̣б̣аа.
Samanantaraniruddhatāya ārammaṇabhāvena ca sadiso paccayabhāvo paccayasabhāgatā, viruddhapaccayatā paccayavisabhāgatā. ‘‘Iminā upāyenā’’ti vacanato hetuādīnaṃ sahajātānaṃ sahajātabhāvena sabhāgatā, sahajātāsahajātānaṃ hetuārammaṇādīnaṃ aññamaññavisabhāgatāti evamādinā upāyena sabhāgatā visabhāgatā yojetabbā.
ж̇анагааязва, на аж̇анагаад̇и ж̇анагабхааваббад̇хаанааязва худ̇ваа бажжаяаа хонд̇и, на убад̇т̇амбхагабхааваббад̇хаанаад̇и ад̇т̇о д̣̇адтаб̣б̣о. язсам̣ хзд̇уаад̣̇аяо бажжаяаа хонд̇и, д̇з д̇зхи винаа нзва уббаж̇ж̇анд̇и, на жа бавад̇д̇анд̇ийд̇и д̇зсам̣ убхаяаббад̇хаанад̇аа вуд̇д̇аа. на хи д̇з ананд̇араад̣̇аяо вияа ж̇ананзнзва бавад̇д̇им̣ гаронд̇ийд̇и.
Janakāyeva, na ajanakāti janakabhāvappadhānāyeva hutvā paccayā honti, na upatthambhakabhāvappadhānāti attho daṭṭhabbo. Yesaṃ hetuādayo paccayā honti, te tehi vinā neva uppajjanti, na ca pavattantīti tesaṃ ubhayappadhānatā vuttā. Na hi te anantarādayo viya jananeneva pavattiṃ karontīti.
саб̣б̣зсам̣ таанам̣ гааран̣абхааво саб̣б̣адтаанам̣, д̇ам̣ зд̇зсам̣ ад̇т̇ийд̇и саб̣б̣адтаанигаа. убаниссаяам̣ бхинд̣̇анд̇зна д̇аяоби убаниссаяаа вад̇д̇аб̣б̣аа, абхинд̣̇ид̇ваа ваа убаниссаяаг̇г̇ахан̣амзва гаад̇аб̣б̣ам̣. д̇ад̇т̇а бхинд̣̇анам̣ багад̇уубаниссаяасса руубаанам̣ бажжаяад̇д̇аабхаавад̣̇ассанад̇т̇ам̣, аарамман̣аананд̇аруубаниссаяаанам̣ бана буб̣б̣з аарамман̣аад̇хибад̇иананд̇араг̇г̇ахан̣зхи г̇ахид̇ад̇д̇аа д̇зсу згад̣̇зсзна ананд̇аруубаниссаязна ид̇арамби д̣̇ассзд̇ийд̇и д̣̇адтаб̣б̣ам̣. бурзж̇аад̇абажчааж̇аад̇ааби асаб̣б̣адтаанигаа аруубаруубаанан̃н̃зва яат̇ааггамзна бажжаяабхаавад̇од̇и зд̇т̇а бурзж̇аад̇абажжаяо ананд̇араад̣̇ийсу зва вад̇д̇аб̣б̣о д̇ам̣самаанаг̇ад̇игад̇д̇аа, на жа яуг̇ал̣абхааво бажчааж̇аад̇зна саха гат̇анз гааран̣ам̣ асаб̣б̣адтаанигад̣̇ассанамад̇д̇асса ад̇хиббзд̇ад̇д̇аад̇и д̇ам̣ д̇ад̇т̇а батид̇ваа ‘‘бажчааж̇аад̇оби асаб̣б̣адтааниго руубаанам̣язва бажжаяабхаавад̇о’’д̇и батанд̇и.
Sabbesaṃ ṭhānaṃ kāraṇabhāvo sabbaṭṭhānaṃ, taṃ etesaṃ atthīti sabbaṭṭhānikā. Upanissayaṃ bhindantena tayopi upanissayā vattabbā, abhinditvā vā upanissayaggahaṇameva kātabbaṃ. Tattha bhindanaṃ pakatūpanissayassa rūpānaṃ paccayattābhāvadassanatthaṃ, ārammaṇānantarūpanissayānaṃ pana pubbe ārammaṇādhipatianantaraggahaṇehi gahitattā tesu ekadesena anantarūpanissayena itarampi dassetīti daṭṭhabbaṃ. Purejātapacchājātāpi asabbaṭṭhānikā arūparūpānaññeva yathākkamena paccayabhāvatoti ettha purejātapaccayo anantarādīsu eva vattabbo taṃsamānagatikattā, na ca yugaḷabhāvo pacchājātena saha kathane kāraṇaṃ asabbaṭṭhānikadassanamattassa adhippetattāti taṃ tattha paṭhitvā ‘‘pacchājātopi asabbaṭṭhāniko rūpānaṃyeva paccayabhāvato’’ti paṭhanti.
бажжаяанид̣̇д̣̇зсабагин̣н̣агавинижчаяагат̇ааван̣н̣анаа нидтид̇аа.
Paccayaniddesapakiṇṇakavinicchayakathāvaṇṇanā niṭṭhitā.
