| Library / Tipiṭaka / திபிடக • Tipiṭaka / பட்டா²னபாளி • Paṭṭhānapāḷi |
(2) பச்சயனித்³தே³ஸோ
(2) Paccayaniddeso
1. ஹேதுபச்சயோதி – ஹேதூ ஹேதுஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் ஹேதுபச்சயேன பச்சயோ 1.
1. Hetupaccayoti – hetū hetusampayuttakānaṃ dhammānaṃ taṃsamuṭṭhānānañca rūpānaṃ hetupaccayena paccayo 2.
2. ஆரம்மணபச்சயோதி – ரூபாயதனங் சக்கு²விஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஆரம்மணபச்சயேன பச்சயோ. ஸத்³தா³யதனங் ஸோதவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஆரம்மணபச்சயேன பச்சயோ. க³ந்தா⁴யதனங் கா⁴னவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஆரம்மணபச்சயேன பச்சயோ. ரஸாயதனங் ஜிவ்ஹாவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஆரம்மணபச்சயேன பச்சயோ. பொ²ட்ட²ப்³பா³யதனங் காயவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஆரம்மணபச்சயேன பச்சயோ. ரூபாயதனங் ஸத்³தா³யதனங் க³ந்தா⁴யதனங் ரஸாயதனங் பொ²ட்ட²ப்³பா³யதனங் மனோதா⁴துயா தங்ஸம்பயுத்தகானஞ்ச த⁴ம்மானங் ஆரம்மணபச்சயேன பச்சயோ. ஸப்³பே³ த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஆரம்மணபச்சயேன பச்சயோ.
2. Ārammaṇapaccayoti – rūpāyatanaṃ cakkhuviññāṇadhātuyā taṃsampayuttakānañca dhammānaṃ ārammaṇapaccayena paccayo. Saddāyatanaṃ sotaviññāṇadhātuyā taṃsampayuttakānañca dhammānaṃ ārammaṇapaccayena paccayo. Gandhāyatanaṃ ghānaviññāṇadhātuyā taṃsampayuttakānañca dhammānaṃ ārammaṇapaccayena paccayo. Rasāyatanaṃ jivhāviññāṇadhātuyā taṃsampayuttakānañca dhammānaṃ ārammaṇapaccayena paccayo. Phoṭṭhabbāyatanaṃ kāyaviññāṇadhātuyā taṃsampayuttakānañca dhammānaṃ ārammaṇapaccayena paccayo. Rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ manodhātuyā taṃsampayuttakānañca dhammānaṃ ārammaṇapaccayena paccayo. Sabbe dhammā manoviññāṇadhātuyā taṃsampayuttakānañca dhammānaṃ ārammaṇapaccayena paccayo.
யங் யங் த⁴ம்மங் ஆரப்³ப⁴ யே யே த⁴ம்மா உப்பஜ்ஜந்தி சித்தசேதஸிகா த⁴ம்மா, தே தே த⁴ம்மா தேஸங் தேஸங் த⁴ம்மானங் ஆரம்மணபச்சயேன பச்சயோ.
Yaṃ yaṃ dhammaṃ ārabbha ye ye dhammā uppajjanti cittacetasikā dhammā, te te dhammā tesaṃ tesaṃ dhammānaṃ ārammaṇapaccayena paccayo.
3. அதி⁴பதிபச்சயோதி – ச²ந்தா³தி⁴பதி ச²ந்த³ஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் அதி⁴பதிபச்சயேன பச்சயோ. வீரியாதி⁴பதி வீரியஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் அதி⁴பதிபச்சயேன பச்சயோ. சித்தாதி⁴பதி சித்தஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் அதி⁴பதிபச்சயேன பச்சயோ. வீமங்ஸாதி⁴பதி வீமங்ஸஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் அதி⁴பதிபச்சயேன பச்சயோ.
3. Adhipatipaccayoti – chandādhipati chandasampayuttakānaṃ dhammānaṃ taṃsamuṭṭhānānañca rūpānaṃ adhipatipaccayena paccayo. Vīriyādhipati vīriyasampayuttakānaṃ dhammānaṃ taṃsamuṭṭhānānañca rūpānaṃ adhipatipaccayena paccayo. Cittādhipati cittasampayuttakānaṃ dhammānaṃ taṃsamuṭṭhānānañca rūpānaṃ adhipatipaccayena paccayo. Vīmaṃsādhipati vīmaṃsasampayuttakānaṃ dhammānaṃ taṃsamuṭṭhānānañca rūpānaṃ adhipatipaccayena paccayo.
யங் யங் த⁴ம்மங் க³ருங் கத்வா யே யே த⁴ம்மா உப்பஜ்ஜந்தி சித்தசேதஸிகா த⁴ம்மா, தே தே த⁴ம்மா தேஸங் தேஸங் த⁴ம்மானங் அதி⁴பதிபச்சயேன பச்சயோ.
Yaṃ yaṃ dhammaṃ garuṃ katvā ye ye dhammā uppajjanti cittacetasikā dhammā, te te dhammā tesaṃ tesaṃ dhammānaṃ adhipatipaccayena paccayo.
4. அனந்தரபச்சயோதி – சக்கு²விஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ. மனோதா⁴து தங்ஸம்பயுத்தகா ச த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ.
4. Anantarapaccayoti – cakkhuviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ anantarapaccayena paccayo. Manodhātu taṃsampayuttakā ca dhammā manoviññāṇadhātuyā taṃsampayuttakānañca dhammānaṃ anantarapaccayena paccayo.
ஸோதவிஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ. மனோதா⁴து தங்ஸம்பயுத்தகா ச த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ.
Sotaviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ anantarapaccayena paccayo. Manodhātu taṃsampayuttakā ca dhammā manoviññāṇadhātuyā taṃsampayuttakānañca dhammānaṃ anantarapaccayena paccayo.
கா⁴னவிஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ. மனோதா⁴து தங்ஸம்பயுத்தகா ச த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ.
Ghānaviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ anantarapaccayena paccayo. Manodhātu taṃsampayuttakā ca dhammā manoviññāṇadhātuyā taṃsampayuttakānañca dhammānaṃ anantarapaccayena paccayo.
ஜிவ்ஹாவிஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ. மனோதா⁴து தங்ஸம்பயுத்தகா ச த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ.
Jivhāviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ anantarapaccayena paccayo. Manodhātu taṃsampayuttakā ca dhammā manoviññāṇadhātuyā taṃsampayuttakānañca dhammānaṃ anantarapaccayena paccayo.
காயவிஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ. மனோதா⁴து தங்ஸம்பயுத்தகா ச த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அனந்தரபச்சயேன பச்சயோ.
Kāyaviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ anantarapaccayena paccayo. Manodhātu taṃsampayuttakā ca dhammā manoviññāṇadhātuyā taṃsampayuttakānañca dhammānaṃ anantarapaccayena paccayo.
புரிமா புரிமா குஸலா த⁴ம்மா பச்சி²மானங் பச்சி²மானங் குஸலானங் த⁴ம்மானங் அனந்தரபச்சயேன பச்சயோ. புரிமா புரிமா குஸலா த⁴ம்மா பச்சி²மானங் பச்சி²மானங் அப்³யாகதானங் த⁴ம்மானங் அனந்தரபச்சயேன பச்சயோ.
Purimā purimā kusalā dhammā pacchimānaṃ pacchimānaṃ kusalānaṃ dhammānaṃ anantarapaccayena paccayo. Purimā purimā kusalā dhammā pacchimānaṃ pacchimānaṃ abyākatānaṃ dhammānaṃ anantarapaccayena paccayo.
புரிமா புரிமா அகுஸலா த⁴ம்மா பச்சி²மானங் பச்சி²மானங் அகுஸலானங் த⁴ம்மானங் அனந்தரபச்சயேன பச்சயோ. புரிமா புரிமா அகுஸலா த⁴ம்மா பச்சி²மானங் பச்சி²மானங் அப்³யாகதானங் த⁴ம்மானங் அனந்தரபச்சயேன பச்சயோ.
Purimā purimā akusalā dhammā pacchimānaṃ pacchimānaṃ akusalānaṃ dhammānaṃ anantarapaccayena paccayo. Purimā purimā akusalā dhammā pacchimānaṃ pacchimānaṃ abyākatānaṃ dhammānaṃ anantarapaccayena paccayo.
புரிமா புரிமா அப்³யாகதா த⁴ம்மா பச்சி²மானங் பச்சி²மானங் அப்³யாகதானங் த⁴ம்மானங் அனந்தரபச்சயேன பச்சயோ. புரிமா புரிமா அப்³யாகதா த⁴ம்மா பச்சி²மானங் பச்சி²மானங் குஸலானங் த⁴ம்மானங் அனந்தரபச்சயேன பச்சயோ. புரிமா புரிமா அப்³யாகதா த⁴ம்மா பச்சி²மானங் பச்சி²மானங் அகுஸலானங் த⁴ம்மானங் அனந்தரபச்சயேன பச்சயோ.
Purimā purimā abyākatā dhammā pacchimānaṃ pacchimānaṃ abyākatānaṃ dhammānaṃ anantarapaccayena paccayo. Purimā purimā abyākatā dhammā pacchimānaṃ pacchimānaṃ kusalānaṃ dhammānaṃ anantarapaccayena paccayo. Purimā purimā abyākatā dhammā pacchimānaṃ pacchimānaṃ akusalānaṃ dhammānaṃ anantarapaccayena paccayo.
யேஸங் யேஸங் த⁴ம்மானங் அனந்தரா யே யே த⁴ம்மா உப்பஜ்ஜந்தி சித்தசேதஸிகா த⁴ம்மா, தே தே த⁴ம்மா தேஸங் தேஸங் த⁴ம்மானங் அனந்தரபச்சயேன பச்சயோ.
Yesaṃ yesaṃ dhammānaṃ anantarā ye ye dhammā uppajjanti cittacetasikā dhammā, te te dhammā tesaṃ tesaṃ dhammānaṃ anantarapaccayena paccayo.
5. ஸமனந்தரபச்சயோதி – சக்கு²விஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் ஸமனந்தரபச்சயேன பச்சயோ. மனோதா⁴து தங்ஸம்பயுத்தகா ச த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஸமனந்தரபச்சயேன பச்சயோ.
5. Samanantarapaccayoti – cakkhuviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ samanantarapaccayena paccayo. Manodhātu taṃsampayuttakā ca dhammā manoviññāṇadhātuyā taṃsampayuttakānañca dhammānaṃ samanantarapaccayena paccayo.
ஸோதவிஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் ஸமனந்தரபச்சயேன பச்சயோ. மனோதா⁴து தங்ஸம்பயுத்தகா ச த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஸமனந்தரபச்சயேன பச்சயோ.
Sotaviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ samanantarapaccayena paccayo. Manodhātu taṃsampayuttakā ca dhammā manoviññāṇadhātuyā taṃsampayuttakānañca dhammānaṃ samanantarapaccayena paccayo.
கா⁴ணவிஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் ஸமனந்தரபச்சயேன பச்சயோ . மனோதா⁴து தங்ஸம்பயுத்தகா ச த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஸமனந்தரபச்சயேன பச்சயோ.
Ghāṇaviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ samanantarapaccayena paccayo . Manodhātu taṃsampayuttakā ca dhammā manoviññāṇadhātuyā taṃsampayuttakānañca dhammānaṃ samanantarapaccayena paccayo.
ஜிவ்ஹாவிஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் ஸமனந்தரபச்சயேன பச்சயோ. மனோதா⁴து தங்ஸம்பயுத்தகா ச த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஸமனந்தரபச்சயேன பச்சயோ.
Jivhāviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ samanantarapaccayena paccayo. Manodhātu taṃsampayuttakā ca dhammā manoviññāṇadhātuyā taṃsampayuttakānañca dhammānaṃ samanantarapaccayena paccayo.
காயவிஞ்ஞாணதா⁴து தங்ஸம்பயுத்தகா ச த⁴ம்மா மனோதா⁴துயா தங்ஸம்பயுத்தகானஞ்ச த⁴ம்மானங் ஸமனந்தரபச்சயேன பச்சயோ. மனோதா⁴து தங்ஸம்பயுத்தகா ச த⁴ம்மா மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் ஸமனந்தரபச்சயேன பச்சயோ.
Kāyaviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ samanantarapaccayena paccayo. Manodhātu taṃsampayuttakā ca dhammā manoviññāṇadhātuyā taṃsampayuttakānañca dhammānaṃ samanantarapaccayena paccayo.
புரிமா புரிமா குஸலா த⁴ம்மா பச்சி²மானங் பச்சி²மானங் குஸலானங் த⁴ம்மானங் ஸமனந்தரபச்சயேன பச்சயோ. புரிமா புரிமா குஸலா த⁴ம்மா பச்சி²மானங் பச்சி²மானங் அப்³யாகதானங் த⁴ம்மானங் ஸமனந்தரபச்சயேன பச்சயோ.
Purimā purimā kusalā dhammā pacchimānaṃ pacchimānaṃ kusalānaṃ dhammānaṃ samanantarapaccayena paccayo. Purimā purimā kusalā dhammā pacchimānaṃ pacchimānaṃ abyākatānaṃ dhammānaṃ samanantarapaccayena paccayo.
புரிமா புரிமா அகுஸலா த⁴ம்மா பச்சி²மானங் பச்சி²மானங் அகுஸலானங் த⁴ம்மானங் ஸமனந்தரபச்சயேன பச்சயோ. புரிமா புரிமா அகுஸலா த⁴ம்மா பச்சி²மானங் பச்சி²மானங் அப்³யாகதானங் த⁴ம்மானங் ஸமனந்தரபச்சயேன பச்சயோ.
Purimā purimā akusalā dhammā pacchimānaṃ pacchimānaṃ akusalānaṃ dhammānaṃ samanantarapaccayena paccayo. Purimā purimā akusalā dhammā pacchimānaṃ pacchimānaṃ abyākatānaṃ dhammānaṃ samanantarapaccayena paccayo.
புரிமா புரிமா அப்³யாகதா த⁴ம்மா பச்சி²மானங் பச்சி²மானங் அப்³யாகதானங் த⁴ம்மானங் ஸமனந்தரபச்சயேன பச்சயோ. புரிமா புரிமா அப்³யாகதா த⁴ம்மா பச்சி²மானங் பச்சி²மானங் குஸலானங் த⁴ம்மானங் ஸமனந்தரபச்சயேன பச்சயோ. புரிமா புரிமா அப்³யாகதா த⁴ம்மா பச்சி²மானங் பச்சி²மானங் அகுஸலானங் த⁴ம்மானங் ஸமனந்தரபச்சயேன பச்சயோ.
Purimā purimā abyākatā dhammā pacchimānaṃ pacchimānaṃ abyākatānaṃ dhammānaṃ samanantarapaccayena paccayo. Purimā purimā abyākatā dhammā pacchimānaṃ pacchimānaṃ kusalānaṃ dhammānaṃ samanantarapaccayena paccayo. Purimā purimā abyākatā dhammā pacchimānaṃ pacchimānaṃ akusalānaṃ dhammānaṃ samanantarapaccayena paccayo.
யேஸங் யேஸங் த⁴ம்மானங் ஸமனந்தரா யே யே த⁴ம்மா உப்பஜ்ஜந்தி சித்தசேதஸிகா த⁴ம்மா, தே தே த⁴ம்மா தேஸங் தேஸங் த⁴ம்மானங் ஸமனந்தரபச்சயேன பச்சயோ.
Yesaṃ yesaṃ dhammānaṃ samanantarā ye ye dhammā uppajjanti cittacetasikā dhammā, te te dhammā tesaṃ tesaṃ dhammānaṃ samanantarapaccayena paccayo.
6. ஸஹஜாதபச்சயோதி – சத்தாரோ க²ந்தா⁴ அரூபினோ அஞ்ஞமஞ்ஞங் ஸஹஜாதபச்சயேன பச்சயோ. சத்தாரோ மஹாபூ⁴தா அஞ்ஞமஞ்ஞங் ஸஹஜாதபச்சயேன பச்சயோ. ஓக்கந்திக்க²ணே நாமரூபங் அஞ்ஞமஞ்ஞங் ஸஹஜாதபச்சயேன பச்சயோ. சித்தசேதஸிகா த⁴ம்மா சித்தஸமுட்டா²னானங் ரூபானங் ஸஹஜாதபச்சயேன பச்சயோ. மஹாபூ⁴தா உபாதா³ரூபானங் ஸஹஜாதபச்சயேன பச்சயோ. ரூபினோ த⁴ம்மா அரூபீனங் த⁴ம்மானங் கிஞ்சி காலே 3 ஸஹஜாதபச்சயேன பச்சயோ, கிஞ்சி காலே ந ஸஹஜாதபச்சயேன பச்சயோ.
6. Sahajātapaccayoti – cattāro khandhā arūpino aññamaññaṃ sahajātapaccayena paccayo. Cattāro mahābhūtā aññamaññaṃ sahajātapaccayena paccayo. Okkantikkhaṇe nāmarūpaṃ aññamaññaṃ sahajātapaccayena paccayo. Cittacetasikā dhammā cittasamuṭṭhānānaṃ rūpānaṃ sahajātapaccayena paccayo. Mahābhūtā upādārūpānaṃ sahajātapaccayena paccayo. Rūpino dhammā arūpīnaṃ dhammānaṃ kiñci kāle 4 sahajātapaccayena paccayo, kiñci kāle na sahajātapaccayena paccayo.
7. அஞ்ஞமஞ்ஞபச்சயோதி – சத்தாரோ க²ந்தா⁴ அரூபினோ அஞ்ஞமஞ்ஞபச்சயேன பச்சயோ. சத்தாரோ மஹாபூ⁴தா அஞ்ஞமஞ்ஞபச்சயேன பச்சயோ. ஓக்கந்திக்க²ணே நாமரூபங் அஞ்ஞமஞ்ஞபச்சயேன பச்சயோ.
7. Aññamaññapaccayoti – cattāro khandhā arūpino aññamaññapaccayena paccayo. Cattāro mahābhūtā aññamaññapaccayena paccayo. Okkantikkhaṇe nāmarūpaṃ aññamaññapaccayena paccayo.
8. நிஸ்ஸயபச்சயோதி – சத்தாரோ க²ந்தா⁴ அரூபினோ அஞ்ஞமஞ்ஞங் நிஸ்ஸயபச்சயேன பச்சயோ. சத்தாரோ மஹாபூ⁴தா அஞ்ஞமஞ்ஞங் நிஸ்ஸயபச்சயேன பச்சயோ. ஓக்கந்திக்க²ணே நாமரூபங் அஞ்ஞமஞ்ஞங் நிஸ்ஸயபச்சயேன பச்சயோ. சித்தசேதஸிகா த⁴ம்மா சித்தஸமுட்டா²னானங் ரூபானங் நிஸ்ஸயபச்சயேன பச்சயோ. மஹாபூ⁴தா உபாதா³ரூபானங் நிஸ்ஸயபச்சயேன பச்சயோ.
8. Nissayapaccayoti – cattāro khandhā arūpino aññamaññaṃ nissayapaccayena paccayo. Cattāro mahābhūtā aññamaññaṃ nissayapaccayena paccayo. Okkantikkhaṇe nāmarūpaṃ aññamaññaṃ nissayapaccayena paccayo. Cittacetasikā dhammā cittasamuṭṭhānānaṃ rūpānaṃ nissayapaccayena paccayo. Mahābhūtā upādārūpānaṃ nissayapaccayena paccayo.
சக்கா²யதனங் சக்கு²விஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் நிஸ்ஸயபச்சயேன பச்சயோ. ஸோதாயதனங் ஸோதவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் நிஸ்ஸயபச்சயேன பச்சயோ. கா⁴னாயதனங் கா⁴னவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் நிஸ்ஸயபச்சயேன பச்சயோ. ஜிவ்ஹாயதனங் ஜிவ்ஹாவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் நிஸ்ஸயபச்சயேன பச்சயோ. காயாயதனங் காயவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் நிஸ்ஸயபச்சயேன பச்சயோ. யங் ரூபங் நிஸ்ஸாய மனோதா⁴து ச மனோவிஞ்ஞாணதா⁴து ச வத்தந்தி, தங் ரூபங் மனோதா⁴துயா ச மனோவிஞ்ஞாணதா⁴துயா ச தங்ஸம்பயுத்தகானஞ்ச த⁴ம்மானங் நிஸ்ஸயபச்சயேன பச்சயோ.
Cakkhāyatanaṃ cakkhuviññāṇadhātuyā taṃsampayuttakānañca dhammānaṃ nissayapaccayena paccayo. Sotāyatanaṃ sotaviññāṇadhātuyā taṃsampayuttakānañca dhammānaṃ nissayapaccayena paccayo. Ghānāyatanaṃ ghānaviññāṇadhātuyā taṃsampayuttakānañca dhammānaṃ nissayapaccayena paccayo. Jivhāyatanaṃ jivhāviññāṇadhātuyā taṃsampayuttakānañca dhammānaṃ nissayapaccayena paccayo. Kāyāyatanaṃ kāyaviññāṇadhātuyā taṃsampayuttakānañca dhammānaṃ nissayapaccayena paccayo. Yaṃ rūpaṃ nissāya manodhātu ca manoviññāṇadhātu ca vattanti, taṃ rūpaṃ manodhātuyā ca manoviññāṇadhātuyā ca taṃsampayuttakānañca dhammānaṃ nissayapaccayena paccayo.
9. உபனிஸ்ஸயபச்சயோதி – புரிமா புரிமா குஸலா த⁴ம்மா பச்சி²மானங் பச்சி²மானங் குஸலானங் த⁴ம்மானங் உபனிஸ்ஸயபச்சயேன பச்சயோ. புரிமா புரிமா குஸலா த⁴ம்மா பச்சி²மானங் பச்சி²மானங் அகுஸலானங் த⁴ம்மானங் கேஸஞ்சி உபனிஸ்ஸயபச்சயேன பச்சயோ. புரிமா புரிமா குஸலா த⁴ம்மா பச்சி²மானங் பச்சி²மானங் அப்³யாகதானங் த⁴ம்மானங் உபனிஸ்ஸயபச்சயேன பச்சயோ.
9. Upanissayapaccayoti – purimā purimā kusalā dhammā pacchimānaṃ pacchimānaṃ kusalānaṃ dhammānaṃ upanissayapaccayena paccayo. Purimā purimā kusalā dhammā pacchimānaṃ pacchimānaṃ akusalānaṃ dhammānaṃ kesañci upanissayapaccayena paccayo. Purimā purimā kusalā dhammā pacchimānaṃ pacchimānaṃ abyākatānaṃ dhammānaṃ upanissayapaccayena paccayo.
புரிமா புரிமா அகுஸலா த⁴ம்மா பச்சி²மானங் பச்சி²மானங் அகுஸலானங் த⁴ம்மானங் உபனிஸ்ஸயபச்சயேன பச்சயோ. புரிமா புரிமா அகுஸலா த⁴ம்மா பச்சி²மானங் பச்சி²மானங் குஸலானங் த⁴ம்மானங் கேஸஞ்சி உபனிஸ்ஸயபச்சயேன பச்சயோ. புரிமா புரிமா அகுஸலா த⁴ம்மா பச்சி²மானங் பச்சி²மானங் அப்³யாகதானங் த⁴ம்மானங் உபனிஸ்ஸயபச்சயேன பச்சயோ.
Purimā purimā akusalā dhammā pacchimānaṃ pacchimānaṃ akusalānaṃ dhammānaṃ upanissayapaccayena paccayo. Purimā purimā akusalā dhammā pacchimānaṃ pacchimānaṃ kusalānaṃ dhammānaṃ kesañci upanissayapaccayena paccayo. Purimā purimā akusalā dhammā pacchimānaṃ pacchimānaṃ abyākatānaṃ dhammānaṃ upanissayapaccayena paccayo.
புரிமா புரிமா அப்³யாகதா த⁴ம்மா பச்சி²மானங் பச்சி²மானங் அப்³யாகதானங் த⁴ம்மானங் உபனிஸ்ஸயபச்சயேன பச்சயோ . புரிமா புரிமா அப்³யாகதா த⁴ம்மா பச்சி²மானங் பச்சி²மானங் குஸலானங் த⁴ம்மானங் உபனிஸ்ஸயபச்சயேன பச்சயோ. புரிமா புரிமா அப்³யாகதா த⁴ம்மா பச்சி²மானங் பச்சி²மானங் அகுஸலானங் த⁴ம்மானங் உபனிஸ்ஸயபச்சயேன பச்சயோ.
Purimā purimā abyākatā dhammā pacchimānaṃ pacchimānaṃ abyākatānaṃ dhammānaṃ upanissayapaccayena paccayo . Purimā purimā abyākatā dhammā pacchimānaṃ pacchimānaṃ kusalānaṃ dhammānaṃ upanissayapaccayena paccayo. Purimā purimā abyākatā dhammā pacchimānaṃ pacchimānaṃ akusalānaṃ dhammānaṃ upanissayapaccayena paccayo.
உதுபோ⁴ஜனம்பி உபனிஸ்ஸயபச்சயேன பச்சயோ. புக்³க³லோபி உபனிஸ்ஸயபச்சயேன பச்சயோ. ஸேனாஸனம்பி உபனிஸ்ஸயபச்சயேன பச்சயோ.
Utubhojanampi upanissayapaccayena paccayo. Puggalopi upanissayapaccayena paccayo. Senāsanampi upanissayapaccayena paccayo.
10. புரேஜாதபச்சயோதி – சக்கா²யதனங் சக்கு²விஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ. ஸோதாயதனங் ஸோதவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ. கா⁴னாயதனங் கா⁴னவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ. ஜிவ்ஹாயதனங் ஜிவ்ஹாவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ. காயாயதனங் காயவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ.
10. Purejātapaccayoti – cakkhāyatanaṃ cakkhuviññāṇadhātuyā taṃsampayuttakānañca dhammānaṃ purejātapaccayena paccayo. Sotāyatanaṃ sotaviññāṇadhātuyā taṃsampayuttakānañca dhammānaṃ purejātapaccayena paccayo. Ghānāyatanaṃ ghānaviññāṇadhātuyā taṃsampayuttakānañca dhammānaṃ purejātapaccayena paccayo. Jivhāyatanaṃ jivhāviññāṇadhātuyā taṃsampayuttakānañca dhammānaṃ purejātapaccayena paccayo. Kāyāyatanaṃ kāyaviññāṇadhātuyā taṃsampayuttakānañca dhammānaṃ purejātapaccayena paccayo.
ரூபாயதனங் சக்கு²விஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ. ஸத்³தா³யதனங் ஸோதவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ. க³ந்தா⁴யதனங் கா⁴னவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ. ரஸாயதனங் ஜிவ்ஹாவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ. பொ²ட்ட²ப்³பா³யதனங் காயவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ. ரூபாயதனங் ஸத்³தா³யதனங் க³ந்தா⁴யதனங் ரஸாயதனங் பொ²ட்ட²ப்³பா³யதனங் மனோதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ.
Rūpāyatanaṃ cakkhuviññāṇadhātuyā taṃsampayuttakānañca dhammānaṃ purejātapaccayena paccayo. Saddāyatanaṃ sotaviññāṇadhātuyā taṃsampayuttakānañca dhammānaṃ purejātapaccayena paccayo. Gandhāyatanaṃ ghānaviññāṇadhātuyā taṃsampayuttakānañca dhammānaṃ purejātapaccayena paccayo. Rasāyatanaṃ jivhāviññāṇadhātuyā taṃsampayuttakānañca dhammānaṃ purejātapaccayena paccayo. Phoṭṭhabbāyatanaṃ kāyaviññāṇadhātuyā taṃsampayuttakānañca dhammānaṃ purejātapaccayena paccayo. Rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ manodhātuyā taṃsampayuttakānañca dhammānaṃ purejātapaccayena paccayo.
யங் ரூபங் நிஸ்ஸாய மனோதா⁴து ச மனோவிஞ்ஞாணதா⁴து ச வத்தந்தி, தங் ரூபங் மனோதா⁴துயா தங்ஸம்பயுத்தகானஞ்ச த⁴ம்மானங் புரேஜாதபச்சயேன பச்சயோ. மனோவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் கிஞ்சி காலே புரேஜாதபச்சயேன பச்சயோ, கிஞ்சி காலே ந புரேஜாதபச்சயேன பச்சயோ.
Yaṃ rūpaṃ nissāya manodhātu ca manoviññāṇadhātu ca vattanti, taṃ rūpaṃ manodhātuyā taṃsampayuttakānañca dhammānaṃ purejātapaccayena paccayo. Manoviññāṇadhātuyā taṃsampayuttakānañca dhammānaṃ kiñci kāle purejātapaccayena paccayo, kiñci kāle na purejātapaccayena paccayo.
11. பச்சா²ஜாதபச்சயோதி – பச்சா²ஜாதா சித்தசேதஸிகா த⁴ம்மா புரேஜாதஸ்ஸ இமஸ்ஸ காயஸ்ஸ பச்சா²ஜாதபச்சயேன பச்சயோ.
11. Pacchājātapaccayoti – pacchājātā cittacetasikā dhammā purejātassa imassa kāyassa pacchājātapaccayena paccayo.
12. ஆஸேவனபச்சயோதி – புரிமா புரிமா குஸலா த⁴ம்மா பச்சி²மானங் பச்சி²மானங் குஸலானங் த⁴ம்மானங் ஆஸேவனபச்சயேன பச்சயோ. புரிமா புரிமா அகுஸலா த⁴ம்மா பச்சி²மானங் பச்சி²மானங் அகுஸலானங் த⁴ம்மானங் ஆஸேவனபச்சயேன பச்சயோ. புரிமா புரிமா கிரியாப்³யாகதா த⁴ம்மா பச்சி²மானங் பச்சி²மானங் கிரியாப்³யாகதானங் த⁴ம்மானங் ஆஸேவனபச்சயேன பச்சயோ.
12. Āsevanapaccayoti – purimā purimā kusalā dhammā pacchimānaṃ pacchimānaṃ kusalānaṃ dhammānaṃ āsevanapaccayena paccayo. Purimā purimā akusalā dhammā pacchimānaṃ pacchimānaṃ akusalānaṃ dhammānaṃ āsevanapaccayena paccayo. Purimā purimā kiriyābyākatā dhammā pacchimānaṃ pacchimānaṃ kiriyābyākatānaṃ dhammānaṃ āsevanapaccayena paccayo.
13. கம்மபச்சயோதி – குஸலாகுஸலங் கம்மங் விபாகானங் க²ந்தா⁴னங் கடத்தா ச ரூபானங் கம்மபச்சயேன பச்சயோ. சேதனா ஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் கம்மபச்சயேன பச்சயோ.
13. Kammapaccayoti – kusalākusalaṃ kammaṃ vipākānaṃ khandhānaṃ kaṭattā ca rūpānaṃ kammapaccayena paccayo. Cetanā sampayuttakānaṃ dhammānaṃ taṃsamuṭṭhānānañca rūpānaṃ kammapaccayena paccayo.
14. விபாகபச்சயோதி – விபாகா சத்தாரோ க²ந்தா⁴ அரூபினோ அஞ்ஞமஞ்ஞங் விபாகபச்சயேன பச்சயோ.
14. Vipākapaccayoti – vipākā cattāro khandhā arūpino aññamaññaṃ vipākapaccayena paccayo.
15. ஆஹாரபச்சயோதி – கப³ளீகாரோ 5 ஆஹாரோ இமஸ்ஸ காயஸ்ஸ ஆஹாரபச்சயேன பச்சயோ. அரூபினோ ஆஹாரா ஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் ஆஹாரபச்சயேன பச்சயோ.
15. Āhārapaccayoti – kabaḷīkāro 6 āhāro imassa kāyassa āhārapaccayena paccayo. Arūpino āhārā sampayuttakānaṃ dhammānaṃ taṃsamuṭṭhānānañca rūpānaṃ āhārapaccayena paccayo.
16. இந்த்³ரியபச்சயோதி – சக்கு²ந்த்³ரியங் சக்கு²விஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் இந்த்³ரியபச்சயேன பச்சயோ. ஸோதிந்த்³ரியங் ஸோதவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் இந்த்³ரியபச்சயேன பச்சயோ. கா⁴னிந்த்³ரியங் கா⁴னவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் இந்த்³ரியபச்சயேன பச்சயோ. ஜிவ்ஹிந்த்³ரியங் ஜிவ்ஹாவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் இந்த்³ரியபச்சயேன பச்சயோ. காயிந்த்³ரியங் காயவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் இந்த்³ரியபச்சயேன பச்சயோ. ரூபஜீவிதிந்த்³ரியங் கடத்தாரூபானங் இந்த்³ரியபச்சயேன பச்சயோ.
16. Indriyapaccayoti – cakkhundriyaṃ cakkhuviññāṇadhātuyā taṃsampayuttakānañca dhammānaṃ indriyapaccayena paccayo. Sotindriyaṃ sotaviññāṇadhātuyā taṃsampayuttakānañca dhammānaṃ indriyapaccayena paccayo. Ghānindriyaṃ ghānaviññāṇadhātuyā taṃsampayuttakānañca dhammānaṃ indriyapaccayena paccayo. Jivhindriyaṃ jivhāviññāṇadhātuyā taṃsampayuttakānañca dhammānaṃ indriyapaccayena paccayo. Kāyindriyaṃ kāyaviññāṇadhātuyā taṃsampayuttakānañca dhammānaṃ indriyapaccayena paccayo. Rūpajīvitindriyaṃ kaṭattārūpānaṃ indriyapaccayena paccayo.
அரூபினோ இந்த்³ரியா ஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் இந்த்³ரியபச்சயேன பச்சயோ.
Arūpino indriyā sampayuttakānaṃ dhammānaṃ taṃsamuṭṭhānānañca rūpānaṃ indriyapaccayena paccayo.
17. ஜா²னபச்சயோதி – ஜா²னங்கா³னி ஜா²னஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் ஜா²னபச்சயேன பச்சயோ.
17. Jhānapaccayoti – jhānaṅgāni jhānasampayuttakānaṃ dhammānaṃ taṃsamuṭṭhānānañca rūpānaṃ jhānapaccayena paccayo.
18. மக்³க³பச்சயோதி – மக்³க³ங்கா³னி மக்³க³ஸம்பயுத்தகானங் த⁴ம்மானங் தங்ஸமுட்டா²னானஞ்ச ரூபானங் மக்³க³பச்சயேன பச்சயோ.
18. Maggapaccayoti – maggaṅgāni maggasampayuttakānaṃ dhammānaṃ taṃsamuṭṭhānānañca rūpānaṃ maggapaccayena paccayo.
19. ஸம்பயுத்தபச்சயோதி – சத்தாரோ க²ந்தா⁴ அரூபினோ அஞ்ஞமஞ்ஞங் ஸம்பயுத்தபச்சயேன பச்சயோ.
19. Sampayuttapaccayoti – cattāro khandhā arūpino aññamaññaṃ sampayuttapaccayena paccayo.
20. விப்பயுத்தபச்சயோதி – ரூபினோ த⁴ம்மா அரூபீனங் த⁴ம்மானங் விப்பயுத்தபச்சயேன பச்சயோ. அரூபினோ த⁴ம்மா ரூபீனங் த⁴ம்மானங் விப்பயுத்தபச்சயேன பச்சயோ.
20. Vippayuttapaccayoti – rūpino dhammā arūpīnaṃ dhammānaṃ vippayuttapaccayena paccayo. Arūpino dhammā rūpīnaṃ dhammānaṃ vippayuttapaccayena paccayo.
21. அத்தி²பச்சயோதி – சத்தாரோ க²ந்தா⁴ அரூபினோ அஞ்ஞமஞ்ஞங் அத்தி²பச்சயேன பச்சயோ. சத்தாரோ மஹாபூ⁴தா அஞ்ஞமஞ்ஞங் அத்தி²பச்சயேன பச்சயோ. ஓக்கந்திக்க²ணே நாமரூபங் அஞ்ஞமஞ்ஞங் அத்தி²பச்சயேன பச்சயோ. சித்தசேதஸிகா த⁴ம்மா சித்தஸமுட்டா²னானங் ரூபானங் அத்தி²பச்சயேன பச்சயோ. மஹாபூ⁴தா உபாதா³ரூபானங் அத்தி²பச்சயேன பச்சயோ.
21. Atthipaccayoti – cattāro khandhā arūpino aññamaññaṃ atthipaccayena paccayo. Cattāro mahābhūtā aññamaññaṃ atthipaccayena paccayo. Okkantikkhaṇe nāmarūpaṃ aññamaññaṃ atthipaccayena paccayo. Cittacetasikā dhammā cittasamuṭṭhānānaṃ rūpānaṃ atthipaccayena paccayo. Mahābhūtā upādārūpānaṃ atthipaccayena paccayo.
சக்கா²யதனங் சக்கு²விஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ. ஸோதாயதனங் ஸோதவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ. கா⁴னாயதனங் கா⁴னவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ. ஜிவ்ஹாயதனங் ஜிவ்ஹாவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ. காயாயதனங் காயவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ.
Cakkhāyatanaṃ cakkhuviññāṇadhātuyā taṃsampayuttakānañca dhammānaṃ atthipaccayena paccayo. Sotāyatanaṃ sotaviññāṇadhātuyā taṃsampayuttakānañca dhammānaṃ atthipaccayena paccayo. Ghānāyatanaṃ ghānaviññāṇadhātuyā taṃsampayuttakānañca dhammānaṃ atthipaccayena paccayo. Jivhāyatanaṃ jivhāviññāṇadhātuyā taṃsampayuttakānañca dhammānaṃ atthipaccayena paccayo. Kāyāyatanaṃ kāyaviññāṇadhātuyā taṃsampayuttakānañca dhammānaṃ atthipaccayena paccayo.
ரூபாயதனங் சக்கு²விஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ. ஸத்³தா³யதனங் ஸோதவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ. க³ந்தா⁴யதனங் கா⁴னவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ. ரஸாயதனங் ஜிவ்ஹாவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ. பொ²ட்ட²ப்³பா³யதனங் காயவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ. ரூபாயதனங் ஸத்³தா³யதனங் க³ந்தா⁴யதனங் ரஸாயதனங் பொ²ட்ட²ப்³பா³யதனங் மனோதா⁴துயா தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ.
Rūpāyatanaṃ cakkhuviññāṇadhātuyā taṃsampayuttakānañca dhammānaṃ atthipaccayena paccayo. Saddāyatanaṃ sotaviññāṇadhātuyā taṃsampayuttakānañca dhammānaṃ atthipaccayena paccayo. Gandhāyatanaṃ ghānaviññāṇadhātuyā taṃsampayuttakānañca dhammānaṃ atthipaccayena paccayo. Rasāyatanaṃ jivhāviññāṇadhātuyā taṃsampayuttakānañca dhammānaṃ atthipaccayena paccayo. Phoṭṭhabbāyatanaṃ kāyaviññāṇadhātuyā taṃsampayuttakānañca dhammānaṃ atthipaccayena paccayo. Rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ manodhātuyā taṃsampayuttakānañca dhammānaṃ atthipaccayena paccayo.
யங் ரூபங் நிஸ்ஸாய மனோதா⁴து ச மனோவிஞ்ஞாணதா⁴து ச வத்தந்தி, தங் ரூபங் மனோதா⁴துயா ச மனோவிஞ்ஞாணதா⁴துயா ச தங்ஸம்பயுத்தகானஞ்ச த⁴ம்மானங் அத்தி²பச்சயேன பச்சயோ.
Yaṃ rūpaṃ nissāya manodhātu ca manoviññāṇadhātu ca vattanti, taṃ rūpaṃ manodhātuyā ca manoviññāṇadhātuyā ca taṃsampayuttakānañca dhammānaṃ atthipaccayena paccayo.
22. நத்தி²பச்சயோதி – ஸமனந்தரனிருத்³தா⁴ சித்தசேதஸிகா த⁴ம்மா படுப்பன்னானங் சித்தசேதஸிகானங் த⁴ம்மானங் நத்தி²பச்சயேன பச்சயோ.
22. Natthipaccayoti – samanantaraniruddhā cittacetasikā dhammā paṭuppannānaṃ cittacetasikānaṃ dhammānaṃ natthipaccayena paccayo.
23. விக³தபச்சயோதி – ஸமனந்தரவிக³தா சித்தசேதஸிகா த⁴ம்மா படுப்பன்னானங் சித்தசேதஸிகானங் த⁴ம்மானங் விக³தபச்சயேன பச்சயோ.
23. Vigatapaccayoti – samanantaravigatā cittacetasikā dhammā paṭuppannānaṃ cittacetasikānaṃ dhammānaṃ vigatapaccayena paccayo.
24. அவிக³தபச்சயோதி – சத்தாரோ க²ந்தா⁴ அரூபினோ அஞ்ஞமஞ்ஞங் அவிக³தபச்சயேன பச்சயோ. சத்தாரோ மஹாபூ⁴தா அஞ்ஞமஞ்ஞங் அவிக³தபச்சயேன பச்சயோ . ஓக்கந்திக்க²ணே நாமரூபங் அஞ்ஞமஞ்ஞங் அவிக³தபச்சயேன பச்சயோ. சித்தசேதஸிகா த⁴ம்மா சித்தஸமுட்டா²னானங் ரூபானங் அவிக³தபச்சயேன பச்சயோ. மஹாபூ⁴தா உபாதா³ரூபானங் அவிக³தபச்சயேன பச்சயோ.
24. Avigatapaccayoti – cattāro khandhā arūpino aññamaññaṃ avigatapaccayena paccayo. Cattāro mahābhūtā aññamaññaṃ avigatapaccayena paccayo . Okkantikkhaṇe nāmarūpaṃ aññamaññaṃ avigatapaccayena paccayo. Cittacetasikā dhammā cittasamuṭṭhānānaṃ rūpānaṃ avigatapaccayena paccayo. Mahābhūtā upādārūpānaṃ avigatapaccayena paccayo.
சக்கா²யதனங் சக்கு²விஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ. ஸோதாயதனங் ஸோதவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ. கா⁴னாயதனங் கா⁴னவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ. ஜிவ்ஹாயதனங் ஜிவ்ஹாவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ. காயாயதனங் காயவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ.
Cakkhāyatanaṃ cakkhuviññāṇadhātuyā taṃsampayuttakānañca dhammānaṃ avigatapaccayena paccayo. Sotāyatanaṃ sotaviññāṇadhātuyā taṃsampayuttakānañca dhammānaṃ avigatapaccayena paccayo. Ghānāyatanaṃ ghānaviññāṇadhātuyā taṃsampayuttakānañca dhammānaṃ avigatapaccayena paccayo. Jivhāyatanaṃ jivhāviññāṇadhātuyā taṃsampayuttakānañca dhammānaṃ avigatapaccayena paccayo. Kāyāyatanaṃ kāyaviññāṇadhātuyā taṃsampayuttakānañca dhammānaṃ avigatapaccayena paccayo.
ரூபாயதனங் சக்கு²விஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ. ஸத்³தா³யதனங் ஸோதவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ. க³ந்தா⁴யதனங் கா⁴னவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ. ரஸாயதனங் ஜிவ்ஹாவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ. பொ²ட்ட²ப்³பா³யதனங் காயவிஞ்ஞாணதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ. ரூபாயதனங் ஸத்³தா³யதனங் க³ந்தா⁴யதனங் ரஸாயதனங் பொ²ட்ட²ப்³பா³யதனங் மனோதா⁴துயா தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ.
Rūpāyatanaṃ cakkhuviññāṇadhātuyā taṃsampayuttakānañca dhammānaṃ avigatapaccayena paccayo. Saddāyatanaṃ sotaviññāṇadhātuyā taṃsampayuttakānañca dhammānaṃ avigatapaccayena paccayo. Gandhāyatanaṃ ghānaviññāṇadhātuyā taṃsampayuttakānañca dhammānaṃ avigatapaccayena paccayo. Rasāyatanaṃ jivhāviññāṇadhātuyā taṃsampayuttakānañca dhammānaṃ avigatapaccayena paccayo. Phoṭṭhabbāyatanaṃ kāyaviññāṇadhātuyā taṃsampayuttakānañca dhammānaṃ avigatapaccayena paccayo. Rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ manodhātuyā taṃsampayuttakānañca dhammānaṃ avigatapaccayena paccayo.
யங் ரூபங் நிஸ்ஸாய மனோதா⁴து ச மனோவிஞ்ஞாணதா⁴து ச வத்தந்தி, தங் ரூபங் மனோதா⁴துயா ச மனோவிஞ்ஞாணதா⁴துயா ச தங்ஸம்பயுத்தகானஞ்ச த⁴ம்மானங் அவிக³தபச்சயேன பச்சயோ.
Yaṃ rūpaṃ nissāya manodhātu ca manoviññāṇadhātu ca vattanti, taṃ rūpaṃ manodhātuyā ca manoviññāṇadhātuyā ca taṃsampayuttakānañca dhammānaṃ avigatapaccayena paccayo.
பச்சயனித்³தே³ஸோ.
Paccayaniddeso.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā
1. ஹேதுபச்சயனித்³தே³ஸவண்ணனா • 1. Hetupaccayaniddesavaṇṇanā
2. ஆரம்மணபச்சயனித்³தே³ஸவண்ணனா • 2. Ārammaṇapaccayaniddesavaṇṇanā
3. அதி⁴பதிபச்சயனித்³தே³ஸவண்ணனா • 3. Adhipatipaccayaniddesavaṇṇanā
4. அனந்தரபச்சயனித்³தே³ஸவண்ணனா • 4. Anantarapaccayaniddesavaṇṇanā
5. ஸமனந்தரபச்சயனித்³தே³ஸவண்ணனா • 5. Samanantarapaccayaniddesavaṇṇanā
6. ஸஹஜாதபச்சயனித்³தே³ஸவண்ணனா • 6. Sahajātapaccayaniddesavaṇṇanā
7. அஞ்ஞமஞ்ஞபச்சயனித்³தே³ஸவண்ணனா • 7. Aññamaññapaccayaniddesavaṇṇanā
8. நிஸ்ஸயபச்சயனித்³தே³ஸவண்ணனா • 8. Nissayapaccayaniddesavaṇṇanā
9. உபனிஸ்ஸயபச்சயனித்³தே³ஸவண்ணனா • 9. Upanissayapaccayaniddesavaṇṇanā
10. புரேஜாதபச்சயனித்³தே³ஸவண்ணனா • 10. Purejātapaccayaniddesavaṇṇanā
11. பச்சா²ஜாதபச்சயனித்³தே³ஸவண்ணனா • 11. Pacchājātapaccayaniddesavaṇṇanā
12. ஆஸேவனபச்சயனித்³தே³ஸவண்ணனா • 12. Āsevanapaccayaniddesavaṇṇanā
13. கம்மபச்சயனித்³தே³ஸவண்ணனா • 13. Kammapaccayaniddesavaṇṇanā
14. விபாகபச்சயனித்³தே³ஸவண்ணனா • 14. Vipākapaccayaniddesavaṇṇanā
15. ஆஹாரபச்சயனித்³தே³ஸவண்ணனா • 15. Āhārapaccayaniddesavaṇṇanā
16. இந்த்³ரியபச்சயனித்³தே³ஸவண்ணனா • 16. Indriyapaccayaniddesavaṇṇanā
17. ஜா²னபச்சயனித்³தே³ஸவண்ணனா • 17. Jhānapaccayaniddesavaṇṇanā
18. மக்³க³பச்சயனித்³தே³ஸவண்ணனா • 18. Maggapaccayaniddesavaṇṇanā
19. ஸம்பயுத்தபச்சயனித்³தே³ஸவண்ணனா • 19. Sampayuttapaccayaniddesavaṇṇanā
20. விப்பயுத்தபச்சயனித்³தே³ஸவண்ணனா • 20. Vippayuttapaccayaniddesavaṇṇanā
21. அத்தி²பச்சயனித்³தே³ஸவண்ணனா • 21. Atthipaccayaniddesavaṇṇanā
22. நத்தி²பச்சயனித்³தே³ஸவண்ணனா • 22. Natthipaccayaniddesavaṇṇanā
23. விக³தபச்சயனித்³தே³ஸவண்ணனா • 23. Vigatapaccayaniddesavaṇṇanā
24. அவிக³தபச்சயனித்³தே³ஸவண்ணனா • 24. Avigatapaccayaniddesavaṇṇanā
பச்சயனித்³தே³ஸபகிண்ணகவினிச்ச²யகதா² • Paccayaniddesapakiṇṇakavinicchayakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā
1. ஹேதுபச்சயனித்³தே³ஸவண்ணனா • 1. Hetupaccayaniddesavaṇṇanā
2. ஆரம்மணபச்சயனித்³தே³ஸவண்ணனா • 2. Ārammaṇapaccayaniddesavaṇṇanā
3. அதி⁴பதிபச்சயனித்³தே³ஸவண்ணனா • 3. Adhipatipaccayaniddesavaṇṇanā
4. அனந்தரபச்சயனித்³தே³ஸவண்ணனா • 4. Anantarapaccayaniddesavaṇṇanā
6. ஸஹஜாதபச்சயனித்³தே³ஸவண்ணனா • 6. Sahajātapaccayaniddesavaṇṇanā
8. நிஸ்ஸயபச்சயனித்³தே³ஸவண்ணனா • 8. Nissayapaccayaniddesavaṇṇanā
9. உபனிஸ்ஸயபச்சயனித்³தே³ஸவண்ணனா • 9. Upanissayapaccayaniddesavaṇṇanā
10. புரேஜாதபச்சயனித்³தே³ஸவண்ணனா • 10. Purejātapaccayaniddesavaṇṇanā
11. பச்சா²ஜாதபச்சயனித்³தே³ஸவண்ணனா • 11. Pacchājātapaccayaniddesavaṇṇanā
12. ஆஸேவனபச்சயனித்³தே³ஸவண்ணனா • 12. Āsevanapaccayaniddesavaṇṇanā
13. கம்மபச்சயனித்³தே³ஸவண்ணனா • 13. Kammapaccayaniddesavaṇṇanā
14. விபாகபச்சயனித்³தே³ஸவண்ணனா • 14. Vipākapaccayaniddesavaṇṇanā
15. ஆஹாரபச்சயனித்³தே³ஸவண்ணனா • 15. Āhārapaccayaniddesavaṇṇanā
16. இந்த்³ரியபச்சயனித்³தே³ஸவண்ணனா • 16. Indriyapaccayaniddesavaṇṇanā
17. ஜா²னபச்சயனித்³தே³ஸவண்ணனா • 17. Jhānapaccayaniddesavaṇṇanā
18. மக்³க³பச்சயனித்³தே³ஸவண்ணனா • 18. Maggapaccayaniddesavaṇṇanā
20. விப்பயுத்தபச்சயனித்³தே³ஸவண்ணனா • 20. Vippayuttapaccayaniddesavaṇṇanā
21. அத்தி²பச்சயனித்³தே³ஸவண்ணனா • 21. Atthipaccayaniddesavaṇṇanā
22-23-24. நத்தி²விக³தஅவிக³தபச்சயனித்³தே³ஸவண்ணனா • 22-23-24. Natthivigataavigatapaccayaniddesavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā
1. ஹேதுபச்சயனித்³தே³ஸவண்ணனா • 1. Hetupaccayaniddesavaṇṇanā
2. ஆரம்மணபச்சயனித்³தே³ஸவண்ணனா • 2. Ārammaṇapaccayaniddesavaṇṇanā
3. அதி⁴பதிபச்சயனித்³தே³ஸவண்ணனா • 3. Adhipatipaccayaniddesavaṇṇanā
4. அனந்தரபச்சயனித்³தே³ஸவண்ணனா • 4. Anantarapaccayaniddesavaṇṇanā
6. ஸஹஜாதபச்சயனித்³தே³ஸவண்ணனா • 6. Sahajātapaccayaniddesavaṇṇanā
8. நிஸ்ஸயபச்சயனித்³தே³ஸவண்ணனா • 8. Nissayapaccayaniddesavaṇṇanā
9. உபனிஸ்ஸயபச்சயனித்³தே³ஸவண்ணனா • 9. Upanissayapaccayaniddesavaṇṇanā
10. புரேஜாதபச்சயனித்³தே³ஸவண்ணனா • 10. Purejātapaccayaniddesavaṇṇanā
11. பச்சா²ஜாதபச்சயனித்³தே³ஸவண்ணனா • 11. Pacchājātapaccayaniddesavaṇṇanā
12. ஆஸேவனபச்சயனித்³தே³ஸவண்ணனா • 12. Āsevanapaccayaniddesavaṇṇanā
13. கம்மபச்சயனித்³தே³ஸவண்ணனா • 13. Kammapaccayaniddesavaṇṇanā
14. விபாகபச்சயனித்³தே³ஸவண்ணனா • 14. Vipākapaccayaniddesavaṇṇanā
15. ஆஹாரபச்சயனித்³தே³ஸவண்ணனா • 15. Āhārapaccayaniddesavaṇṇanā
16. இந்த்³ரியபச்சயனித்³தே³ஸவண்ணனா • 16. Indriyapaccayaniddesavaṇṇanā
17. ஜா²னபச்சயனித்³தே³ஸவண்ணனா • 17. Jhānapaccayaniddesavaṇṇanā
18. மக்³க³பச்சயனித்³தே³ஸவண்ணனா • 18. Maggapaccayaniddesavaṇṇanā
20. விப்பயுத்தபச்சயனித்³தே³ஸவண்ணனா • 20. Vippayuttapaccayaniddesavaṇṇanā
21. அத்தி²பச்சயனித்³தே³ஸவண்ணனா • 21. Atthipaccayaniddesavaṇṇanā
22-23-24. நத்தி²விக³தஅவிக³தபச்சயனித்³தே³ஸவண்ணனா • 22-23-24. Natthivigataavigatapaccayaniddesavaṇṇanā
