| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
২. পচ্চযপচ্চনীযৰণ্ণনা
2. Paccayapaccanīyavaṇṇanā
৪২-৪৪. তেৰীসতিমূলকন্তি ইদঞ্চেত্থ দুমূলকংযেৰ সন্ধায ৰুত্তন্তি ইদং দুকমূলকে পুচ্ছানং মূলভূতা তেৰীসতি দুকা সম্ভৰন্তীতি তস্স ‘‘তেৰীসতিমূলক’’ন্তি নামং কত্ৰা যাৰ যত্তকো পভেদো অত্থি, তাৰ তত্তকং তেৰীসতিমূলকং যথানুলোমে ৰিত্থারিতং। এৰং পচ্চনীযেপি ৰিত্থারেতব্বন্তি দুকমূলকেন তিকমূলকাদীসু নযং দস্সেতীতি ইমিনা অধিপ্পাযেন ৰুত্তং সিযা। যদি পন যাৰ তেৰীসতিমং মূলং যথা ৰিত্থারিতন্তি অযমত্থো অধিপ্পেতো, ‘‘যাৰ তেৰীসতিমং মূল’’ন্ত্ৰেৰ পাঠেন ভৰিতব্বং সিযা। ন হি ‘‘তেৰীসতিমূলক’’ন্তি এতস্স ব্যঞ্জনস্স তেৰীসতিমং মূলকন্তি অযমত্থো সম্ভৰতি। যথা অনুলোমে ‘‘একেকপদস্সা’’তিআদিনা পন একমূলাদিসব্বমূলকপরিযোসানং তত্থ নযদস্সনৰসেন দস্সিতং একেকস্স পদস্স ৰিত্থারং দস্সেতীতি সব্বমূলকমেৰ চেত্থ ‘‘তেৰীসতিমূলক’’ন্তি ৰুত্তন্তি ৰেদিতব্বং। তঞ্হি তেৰীসতিযা পচ্চযানং অৰসেসস্স পচ্চযস্স মূলভাৰতো ‘‘তেৰীসতিমূলক’’ন্তি চ ততো পরং মূলস্স অঞ্ঞস্স অভাৰতো ‘‘সব্বমূলক’’ন্তি চ ৰুচ্চতি।
42-44. Tevīsatimūlakanti idañcettha dumūlakaṃyeva sandhāya vuttanti idaṃ dukamūlake pucchānaṃ mūlabhūtā tevīsati dukā sambhavantīti tassa ‘‘tevīsatimūlaka’’nti nāmaṃ katvā yāva yattako pabhedo atthi, tāva tattakaṃ tevīsatimūlakaṃ yathānulome vitthāritaṃ. Evaṃ paccanīyepi vitthāretabbanti dukamūlakena tikamūlakādīsu nayaṃ dassetīti iminā adhippāyena vuttaṃ siyā. Yadi pana yāva tevīsatimaṃ mūlaṃ yathā vitthāritanti ayamattho adhippeto, ‘‘yāva tevīsatimaṃ mūla’’ntveva pāṭhena bhavitabbaṃ siyā. Na hi ‘‘tevīsatimūlaka’’nti etassa byañjanassa tevīsatimaṃ mūlakanti ayamattho sambhavati. Yathā anulome ‘‘ekekapadassā’’tiādinā pana ekamūlādisabbamūlakapariyosānaṃ tattha nayadassanavasena dassitaṃ ekekassa padassa vitthāraṃ dassetīti sabbamūlakameva cettha ‘‘tevīsatimūlaka’’nti vuttanti veditabbaṃ. Tañhi tevīsatiyā paccayānaṃ avasesassa paccayassa mūlabhāvato ‘‘tevīsatimūlaka’’nti ca tato paraṃ mūlassa aññassa abhāvato ‘‘sabbamūlaka’’nti ca vuccati.
পচ্চযপচ্চনীযৰণ্ণনা নিট্ঠিতা।
Paccayapaccanīyavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / ৩. পুচ্ছাৰারো • 3. Pucchāvāro
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ২. পচ্চযপচ্চনীযৰণ্ণনা • 2. Paccayapaccanīyavaṇṇanā
