| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༢. པཙྩཡཔཙྩནཱིཡཝཎྞནཱ
2. Paccayapaccanīyavaṇṇanā
༤༢-༤༤. ཨིདཱནི པཙྩནཱིཡཾ ཧོཏི། ཏཾ དསྶེཏུཾ སིཡཱ ཀུསལཾ དྷམྨཾ པཊིཙྩ ཀུསལོ དྷམྨོ ཨུཔྤཛྫེཡྻ ན ཧེཏུཔཙྩཡཱཏིཨཱདི ཨཱརདྡྷཾ། ཏཏྠ ཨནུལོམཔུཙྪཱཧི སམཔྤམཱཎོཝ པུཙྪཱཔརིཙྪེདོ། ཏེནེཝེཏྠ ‘‘ཡཐཱ ཨནུལོམེ ཧེཏུཔཙྩཡོ ཝིཏྠཱརིཏོ, ཨེཝཾ པཙྩནཱིཡེཔི ནཧེཏུཔཙྩཡོ ཝིཏྠཱརེཏབྦོ’’ཏི ཝཏྭཱ པུན པརིཡོསཱནེ ‘‘ཡཐཱ ཨནུལོམེ ཨེཀེཀསྶ པདསྶ ཨེཀམཱུལཀཾ, དུམཱུལཀཾ, ཏིམཱུལཀཾ, ཙཏུམཱུལཀཾ ཡཱཝ ཏེཝཱིསཏིམཱུལཀཾ, ཨེཝཾ པཙྩནཱིཡེཔི ཝིཏྠཱརེཏབྦ’’ནྟི ཝུཏྟཾ། ཏེཝཱིསཏིམཱུལཀནྟི ཨིདཉྩེཏྠ དུམཱུལཀཾཡེཝ སནྡྷཱཡ ཝུཏྟཾ། པརིཡོསཱནེ པན སབྦམཱུལཀཾ ཙཏུཝཱིསཏིམཱུལཀམྤི ཧོཏིཡེཝ། ཏཾ སབྦཾ སངྑིཏྟམེཝཱཏི།
42-44. Idāni paccanīyaṃ hoti. Taṃ dassetuṃ siyā kusalaṃ dhammaṃ paṭicca kusalo dhammo uppajjeyya na hetupaccayātiādi āraddhaṃ. Tattha anulomapucchāhi samappamāṇova pucchāparicchedo. Tenevettha ‘‘yathā anulome hetupaccayo vitthārito, evaṃ paccanīyepi nahetupaccayo vitthāretabbo’’ti vatvā puna pariyosāne ‘‘yathā anulome ekekassa padassa ekamūlakaṃ, dumūlakaṃ, timūlakaṃ, catumūlakaṃ yāva tevīsatimūlakaṃ, evaṃ paccanīyepi vitthāretabba’’nti vuttaṃ. Tevīsatimūlakanti idañcettha dumūlakaṃyeva sandhāya vuttaṃ. Pariyosāne pana sabbamūlakaṃ catuvīsatimūlakampi hotiyeva. Taṃ sabbaṃ saṅkhittamevāti.
ཏིཀཉྩ པཊྛཱནཝརཾ…པེ॰… ཚ པཙྩནཱིཡམྷི ནཡཱ སུགམྦྷཱིརཱཏི ཨེཏྠཱཔི དྭེ པཙྩནཱིཡཱནི – དྷམྨཔཙྩནཱིཡཉྩ པཙྩཡཔཙྩནཱིཡཉྩ། ཏཏྠ ‘‘ཀུསལཱ དྷམྨཱ’’ཏི ཨེཝཾ ཨབྷིདྷམྨམཱཏིཀཱཔདེཧི སངྒཧིཏཱནཾ དྷམྨཱནཾ ‘‘ན ཀུསལཾ དྷམྨཾ པཊིཙྩ ན ཀུསལོ དྷམྨོ’’ཏི པཙྩནཱིཡདེསནཱཝསེན པཝཏྟཾ དྷམྨཔཙྩནཱིཡཾ ནཱམ། ‘‘ནཧེཏུཔཙྩཡཱ ནཱརམྨཎཔཙྩཡཱ’’ཏི ཨེཝཾ ཙཏུཝཱིསཏིཡཱ པཙྩཡཱནཾ པཙྩནཱིཡདེསནཱཝསེན པཝཏྟཾ པཙྩཡཔཙྩནཱིཡཾ ནཱམ། ཏཏྠ ཧེཊྛཱ ཨཊྛཀཐཱཡཾ ‘‘ཏིཀཉྩ པཊྛཱནཝརཾ…པེ॰… ཚ པཙྩནཱིཡམྷི ནཡཱ སུགམྦྷཱིརཱ’’ཏི ཨཡཾ གཱཐཱ དྷམྨཔཙྩནཱིཡཾ སནྡྷཱཡ ཝུཏྟཱ། ཨིདྷ པན ཨཡཾ གཱཐཱ དྷམྨཱནུལོམེཡེཝ པཙྩཡཔཙྩནཱིཡཾ སནྡྷཱཡ ཝུཏྟཱ། ཏསྨཱ ‘‘ཚ པཙྩནཱིཡམྷི ནཡཱ སུགམྦྷཱིརཱ’’ཏི ཨཊྛཀཐཱགཱཐཱཡ དྷམྨཔཙྩནཱིཡེ ཏིཀཔཊྛཱནཱདཡོ ཚ ནཡཱ སུགམྦྷཱིརཱཏི ཨེཝམཏྠོ ཝེདིཏབྦོ། ཨིམསྨིཾ པནོཀཱསེ ན ཧེཏུཔཙྩཡཱ ནཱརམྨཎཔཙྩཡཱཏི ཨེཝཾ པཝཏྟེ པཙྩཡཔཙྩནཱིཡེ ཨེཏེ དྷམྨཱནུལོམེཡེཝ ཏིཀཔཊྛཱནཱདཡོ ཚ ནཡཱ སུགམྦྷཱིརཱཏི ཨེཝམཏྠོ ཝེདིཏབྦོ།
Tikañcapaṭṭhānavaraṃ…pe… cha paccanīyamhi nayā sugambhīrāti etthāpi dve paccanīyāni – dhammapaccanīyañca paccayapaccanīyañca. Tattha ‘‘kusalā dhammā’’ti evaṃ abhidhammamātikāpadehi saṅgahitānaṃ dhammānaṃ ‘‘na kusalaṃ dhammaṃ paṭicca na kusalo dhammo’’ti paccanīyadesanāvasena pavattaṃ dhammapaccanīyaṃ nāma. ‘‘Nahetupaccayā nārammaṇapaccayā’’ti evaṃ catuvīsatiyā paccayānaṃ paccanīyadesanāvasena pavattaṃ paccayapaccanīyaṃ nāma. Tattha heṭṭhā aṭṭhakathāyaṃ ‘‘tikañca paṭṭhānavaraṃ…pe… cha paccanīyamhi nayā sugambhīrā’’ti ayaṃ gāthā dhammapaccanīyaṃ sandhāya vuttā. Idha pana ayaṃ gāthā dhammānulomeyeva paccayapaccanīyaṃ sandhāya vuttā. Tasmā ‘‘cha paccanīyamhi nayā sugambhīrā’’ti aṭṭhakathāgāthāya dhammapaccanīye tikapaṭṭhānādayo cha nayā sugambhīrāti evamattho veditabbo. Imasmiṃ panokāse na hetupaccayā nārammaṇapaccayāti evaṃ pavatte paccayapaccanīye ete dhammānulomeyeva tikapaṭṭhānādayo cha nayā sugambhīrāti evamattho veditabbo.
ཏེསུ ཨནུལོམཏིཀཔཊྛཱནེཡེཝ ཀུསལཏྟིཀམཏྟསྶ ཝསེན ཨཡཾ ཨིམསྨིཾ པཊིཙྩཝཱརསྶ པཎྞཏྟིཝཱརེ སངྑིཔིཏྭཱ པུཙྪཱཔབྷེདོ དསྶིཏོ། སེསེསུ པན ཏིཀེསུ སེསཔཊྛཱནེསུ ཙ ཨེཀཱཔི པུཙྪཱ ན དསྶིཏཱ། ཏཏོ པརེསུ པན སཧཛཱཏཝཱརཱདཱིསུ ཀུསལཏྟིཀསྶཱཔི ཝསེན པུཙྪཾ ཨནུདྡྷརིཏྭཱ ལབྦྷམཱནཀཝསེན ཝིསྶཛྫནམེཝ དསྶིཏཾ། ‘‘ཚ པཙྩནཱིཡམྷི ནཡཱ སུགམྦྷཱིརཱ’’ཏི ཝཙནཏོ པན ཨིམསྨིཾ པཙྩཡཔཙྩནཱིཡེ ཚཔི ཨེཏེ པཊྛཱནནཡཱ པུཙྪཱཝསེན ཨུདྡྷརིཏྭཱ དསྶེཏབྦཱ། པཊྛཱནཾ ཝཎྞཡནྟཱནཉྷི ཨཱཙརིཡཱནཾ བྷཱརོ ཨེསོཏི།
Tesu anulomatikapaṭṭhāneyeva kusalattikamattassa vasena ayaṃ imasmiṃ paṭiccavārassa paṇṇattivāre saṅkhipitvā pucchāpabhedo dassito. Sesesu pana tikesu sesapaṭṭhānesu ca ekāpi pucchā na dassitā. Tato paresu pana sahajātavārādīsu kusalattikassāpi vasena pucchaṃ anuddharitvā labbhamānakavasena vissajjanameva dassitaṃ. ‘‘Cha paccanīyamhi nayā sugambhīrā’’ti vacanato pana imasmiṃ paccayapaccanīye chapi ete paṭṭhānanayā pucchāvasena uddharitvā dassetabbā. Paṭṭhānaṃ vaṇṇayantānañhi ācariyānaṃ bhāro esoti.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / པཊྛཱནཔཱལི༹ • Paṭṭhānapāḷi / ༣. པུཙྪཱཝཱརོ • 3. Pucchāvāro
