| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. பச்சயஸுத்தவண்ணனா
10. Paccayasuttavaṇṇanā
20. த³ஸமே படிச்சஸமுப்பாத³ஞ்ச வோ பி⁴க்க²வே, தே³ஸெஸ்ஸாமி படிச்சஸமுப்பன்னே ச த⁴ம்மேதி ஸத்தா² இமஸ்மிங் ஸுத்தே பச்சயே ச பச்சயனிப்³ப³த்தே ச ஸபா⁴வத⁴ம்மே தே³ஸெஸ்ஸாமீதி உப⁴யங் ஆரபி⁴. உப்பாதா³ வா ததா²க³தானந்தி ததா²க³தானங் உப்பாதே³பி, பு³த்³தே⁴ஸு உப்பன்னேஸு அனுப்பன்னேஸுபி ஜாதிபச்சயா ஜராமரணங், ஜாதியேவ ஜராமரணஸ்ஸ பச்சயோ. டி²தாவ ஸா தா⁴தூதி டி²தோவ ஸோ பச்சயஸபா⁴வோ, ந கதா³சி ஜாதி ஜராமரணஸ்ஸ பச்சயோ ந ஹோதி. த⁴ம்மட்டி²ததா த⁴ம்மனியாமதாதி இமேஹிபி த்³வீஹி பச்சயமேவ கதே²தி. பச்சயேன ஹி பச்சயுப்பன்னா த⁴ம்மா திட்ட²ந்தி, தஸ்மா பச்சயோவ ‘‘த⁴ம்மட்டி²ததா’’தி வுச்சதி. பச்சயோ த⁴ம்மே நியமேதி, தஸ்மா ‘‘த⁴ம்மனியாமதா’’தி வுச்சதி. இத³ப்பச்சயதாதி இமேஸங் ஜராமரணாதீ³னங் பச்சயா இத³ப்பச்சயா, இத³ப்பச்சயாவ இத³ப்பச்சயதா. தந்தி தங் பச்சயங். அபி⁴ஸம்பு³ஜ்ஜ²தீதி ஞாணேன அபி⁴ஸம்பு³ஜ்ஜ²தி. அபி⁴ஸமேதீதி ஞாணேன அபி⁴ஸமாக³ச்ச²தி. ஆசிக்க²தீதி கதே²தி. தே³ஸேதீதி த³ஸ்ஸேதி. பஞ்ஞாபேதீதி ஜானாபேதி. பட்ட²பேதீதி ஞாணமுகே² ட²பேதி. விவரதீதி விவரித்வா த³ஸ்ஸேதி. விப⁴ஜதீதி விபா⁴க³தோ த³ஸ்ஸேதி. உத்தானீகரோதீதி பாகடங் கரோதி. பஸ்ஸதா²தி சாஹாதி பஸ்ஸத² இதி ச வத³தி. கிந்தி? ஜாதிபச்சயா, பி⁴க்க²வே, ஜராமரணந்திஆதி³.
20. Dasame paṭiccasamuppādañca vo bhikkhave, desessāmi paṭiccasamuppanne ca dhammeti satthā imasmiṃ sutte paccaye ca paccayanibbatte ca sabhāvadhamme desessāmīti ubhayaṃ ārabhi. Uppādā vā tathāgatānanti tathāgatānaṃ uppādepi, buddhesu uppannesu anuppannesupi jātipaccayā jarāmaraṇaṃ, jātiyeva jarāmaraṇassa paccayo. Ṭhitāva sā dhātūti ṭhitova so paccayasabhāvo, na kadāci jāti jarāmaraṇassa paccayo na hoti. Dhammaṭṭhitatā dhammaniyāmatāti imehipi dvīhi paccayameva katheti. Paccayena hi paccayuppannā dhammā tiṭṭhanti, tasmā paccayova ‘‘dhammaṭṭhitatā’’ti vuccati. Paccayo dhamme niyameti, tasmā ‘‘dhammaniyāmatā’’ti vuccati. Idappaccayatāti imesaṃ jarāmaraṇādīnaṃ paccayā idappaccayā, idappaccayāva idappaccayatā. Tanti taṃ paccayaṃ. Abhisambujjhatīti ñāṇena abhisambujjhati. Abhisametīti ñāṇena abhisamāgacchati. Ācikkhatīti katheti. Desetīti dasseti. Paññāpetīti jānāpeti. Paṭṭhapetīti ñāṇamukhe ṭhapeti. Vivaratīti vivaritvā dasseti. Vibhajatīti vibhāgato dasseti. Uttānīkarotīti pākaṭaṃ karoti. Passathāti cāhāti passatha iti ca vadati. Kinti? Jātipaccayā, bhikkhave, jarāmaraṇantiādi.
இதி கோ², பி⁴க்க²வேதி ஏவங் கோ², பி⁴க்க²வே. யா தத்ராதி யா தேஸு ‘‘ஜாதிபச்சயா ஜராமரண’’ந்திஆதீ³ஸு. தத²தாதிஆதீ³னி பச்சயாகாரஸ்ஸேவ வேவசனானி. ஸோ தேஹி தேஹி பச்சயேஹி அனூனாதி⁴கேஹேவ தஸ்ஸ தஸ்ஸ த⁴ம்மஸ்ஸ ஸம்ப⁴வதோ தத²தாதி, ஸாமக்³கி³ங் உபக³தேஸு பச்சயேஸு முஹுத்தம்பி ததோ நிப்³ப³த்தானங் த⁴ம்மானங் அஸம்ப⁴வாபா⁴வதோ அவிதத²தாதி, அஞ்ஞத⁴ம்மபச்சயேஹி அஞ்ஞத⁴ம்மானுப்பத்திதோ அனஞ்ஞத²தாதி, ஜராமரணாதீ³னங் பச்சயதோ வா பச்சயஸமூஹதோ வா இத³ப்பச்சயதாதி வுத்தோ. தத்ராயங் வசனத்தோ² – இமேஸங் பச்சயா இத³ப்பச்சயா, இத³ப்பச்சயா ஏவ இத³ப்பச்சயதா, இத³ப்பச்சயானங் வா ஸமூஹோ இத³ப்பச்சயதா. லக்க²ணங் பனெத்த² ஸத்³த³ஸத்த²தோ வேதி³தப்³ப³ங்.
Itikho, bhikkhaveti evaṃ kho, bhikkhave. Yā tatrāti yā tesu ‘‘jātipaccayā jarāmaraṇa’’ntiādīsu. Tathatātiādīni paccayākārasseva vevacanāni. So tehi tehi paccayehi anūnādhikeheva tassa tassa dhammassa sambhavato tathatāti, sāmaggiṃ upagatesu paccayesu muhuttampi tato nibbattānaṃ dhammānaṃ asambhavābhāvato avitathatāti, aññadhammapaccayehi aññadhammānuppattito anaññathatāti, jarāmaraṇādīnaṃ paccayato vā paccayasamūhato vā idappaccayatāti vutto. Tatrāyaṃ vacanattho – imesaṃ paccayā idappaccayā, idappaccayā eva idappaccayatā, idappaccayānaṃ vā samūho idappaccayatā. Lakkhaṇaṃ panettha saddasatthato veditabbaṃ.
அனிச்சந்தி ஹுத்வா அபா⁴வட்டே²ன அனிச்சங். எத்த² ச அனிச்சந்தி ந ஜராமரணங் அனிச்சங், அனிச்சஸபா⁴வானங் பன க²ந்தா⁴னங் ஜராமரணத்தா அனிச்சங் நாம ஜாதங். ஸங்க²தாதீ³ஸுபி ஏஸேவ நயோ. எத்த² ச ஸங்க²தந்தி பச்சயேஹி ஸமாக³ந்த்வா கதங். படிச்சஸமுப்பன்னந்தி பச்சயே நிஸ்ஸாய உப்பன்னங். க²யத⁴ம்மந்தி க²யஸபா⁴வங். வயத⁴ம்மந்தி விக³ச்ச²னகஸபா⁴வங். விராக³த⁴ம்மந்தி விரஜ்ஜனகஸபா⁴வங். நிரோத⁴த⁴ம்மந்தி நிருஜ்ஜ²னகஸபா⁴வங். ஜாதியாபி வுத்தனயேனேவ அனிச்சதா வேதி³தப்³பா³. ஜனகபச்சயானங் வா கிச்சானுபா⁴வக்க²ணே தி³ட்ட²த்தா ஏகேன பரியாயேனெத்த² அனிச்சாதிஆதீ³னி யுஜ்ஜந்தியேவ. ப⁴வாத³யோ அனிச்சாதி³ஸபா⁴வாயேவ.
Aniccanti hutvā abhāvaṭṭhena aniccaṃ. Ettha ca aniccanti na jarāmaraṇaṃ aniccaṃ, aniccasabhāvānaṃ pana khandhānaṃ jarāmaraṇattā aniccaṃ nāma jātaṃ. Saṅkhatādīsupi eseva nayo. Ettha ca saṅkhatanti paccayehi samāgantvā kataṃ. Paṭiccasamuppannanti paccaye nissāya uppannaṃ. Khayadhammanti khayasabhāvaṃ. Vayadhammanti vigacchanakasabhāvaṃ. Virāgadhammanti virajjanakasabhāvaṃ. Nirodhadhammanti nirujjhanakasabhāvaṃ. Jātiyāpi vuttanayeneva aniccatā veditabbā. Janakapaccayānaṃ vā kiccānubhāvakkhaṇe diṭṭhattā ekena pariyāyenettha aniccātiādīni yujjantiyeva. Bhavādayo aniccādisabhāvāyeva.
ஸம்மப்பஞ்ஞாயாதி ஸவிபஸ்ஸனாய மக்³க³பஞ்ஞாய. புப்³ப³ந்தந்தி புரிமங் அதீதந்தி அத்தோ². அஹோஸிங் நு கோ²திஆதீ³ஸு ‘‘அஹோஸிங் நு கோ² நனு கோ²’’தி ஸஸ்ஸதாகாரஞ்ச அதி⁴ச்சஸமுப்பத்திஆகாரஞ்ச நிஸ்ஸாய அதீதே அத்தனோ விஜ்ஜமானதஞ்ச அவிஜ்ஜமானதஞ்ச கங்க²தி. கிங் காரணந்தி ந வத்தப்³ப³ங், உம்மத்தகோ விய பா³லபுது²ஜ்ஜனோ யதா² வா ததா² வா பவத்ததி. கிங் நு கோ² அஹோஸிந்தி ஜாதிலிங்கு³பபத்தியோ நிஸ்ஸாய ‘‘க²த்தியோ நு கோ² அஹோஸிங், ப்³ராஹ்மணவெஸ்ஸஸுத்³த³க³ஹட்ட²பப்³ப³ஜிததே³வமனுஸ்ஸானங் அஞ்ஞதரோ’’தி கங்க²தி. கத²ங் நு கோ²தி ஸண்டா²னாகாரங் நிஸ்ஸாய ‘‘தீ³கோ⁴ நு கோ² அஹோஸிங் ரஸ்ஸஓதா³தகண்ஹபமாணிகஅப்பமாணிகாதீ³னங் அஞ்ஞதரோ’’தி கங்க²தி. கேசி பன ‘‘இஸ்ஸரனிம்மானாதீ³னி நிஸ்ஸாய ‘கேன நு கோ² காரணேன அஹோஸி’ந்தி ஹேதுதோ கங்க²தீ’’தி வத³ந்தி. கிங் ஹுத்வா கிங் அஹோஸிந்தி ஜாதிஆதீ³னி நிஸ்ஸாய ‘‘க²த்தியோ ஹுத்வா நு கோ² ப்³ராஹ்மணோ அஹோஸிங்…பே॰… தே³வோ ஹுத்வா மனுஸ்ஸோ’’தி அத்தனோ பரம்பரங் கங்க²தி. ஸப்³ப³த்தே²வ பன அத்³தா⁴னந்தி காலாதி⁴வசனமேதங். அபரந்தந்தி அனாக³தங் அந்தங். ப⁴விஸ்ஸாமி நு கோ² நனு கோ²தி ஸஸ்ஸதாகாரஞ்ச உச்சே²தா³காரஞ்ச நிஸ்ஸாய அனாக³தே அத்தனோ விஜ்ஜமானதஞ்ச அவிஜ்ஜமானதஞ்ச கங்க²தி. ஸேஸமெத்த² வுத்தனயமேவ.
Sammappaññāyāti savipassanāya maggapaññāya. Pubbantanti purimaṃ atītanti attho. Ahosiṃ nu khotiādīsu ‘‘ahosiṃ nu kho nanu kho’’ti sassatākārañca adhiccasamuppattiākārañca nissāya atīte attano vijjamānatañca avijjamānatañca kaṅkhati. Kiṃ kāraṇanti na vattabbaṃ, ummattako viya bālaputhujjano yathā vā tathā vā pavattati. Kiṃ nu kho ahosinti jātiliṅgupapattiyo nissāya ‘‘khattiyo nu kho ahosiṃ, brāhmaṇavessasuddagahaṭṭhapabbajitadevamanussānaṃ aññataro’’ti kaṅkhati. Kathaṃ nu khoti saṇṭhānākāraṃ nissāya ‘‘dīgho nu kho ahosiṃ rassaodātakaṇhapamāṇikaappamāṇikādīnaṃ aññataro’’ti kaṅkhati. Keci pana ‘‘issaranimmānādīni nissāya ‘kena nu kho kāraṇena ahosi’nti hetuto kaṅkhatī’’ti vadanti. Kiṃ hutvā kiṃ ahosinti jātiādīni nissāya ‘‘khattiyo hutvā nu kho brāhmaṇo ahosiṃ…pe… devo hutvā manusso’’ti attano paramparaṃ kaṅkhati. Sabbattheva pana addhānanti kālādhivacanametaṃ. Aparantanti anāgataṃ antaṃ. Bhavissāmi nu kho nanu khoti sassatākārañca ucchedākārañca nissāya anāgate attano vijjamānatañca avijjamānatañca kaṅkhati. Sesamettha vuttanayameva.
ஏதரஹி வா பச்சுப்பன்னங் அத்³தா⁴னந்தி இதா³னி வா படிஸந்தி⁴மாதி³ங் கத்வா சுதிபரியந்தங் ஸப்³ப³ம்பி வத்தமானகாலங் க³ஹெத்வா. அஜ்ஜ²த்தங் கத²ங்கதீ² ப⁴விஸ்ஸதீதி அத்தனோ க²ந்தே⁴ஸு விசிகிச்சீ² ப⁴விஸ்ஸதி. அஹங் நு கொ²ஸ்மீதி அத்தனோ அத்தி²பா⁴வங் கங்க²தி. யுத்தங் பனேதந்தி? யுத்தங் அயுத்தந்தி கா எத்த² சிந்தா. அபிசெத்த² இத³ங் வத்து²ம்பி உதா³ஹரந்தி – சூளமாதாய கிர புத்தோ முண்டோ³, மஹாமாதாய புத்தோ அமுண்டோ³, தங் புத்தங் முண்டே³ஸுங், ஸோ உட்டா²ய ‘‘அஹங் நு கோ² சூளமாதாய புத்தோ’’தி சிந்தேஸி. ஏவங் அஹங் நு கொ²ஸ்மீதி கங்கா² ஹோதி. நோ நு கொ²ஸ்மீதி அத்தனோ நத்தி²பா⁴வங் கங்க²தி. தத்ராபி இத³ங் வத்து² – ஏகோ கிர மச்சே² க³ண்ஹந்தோ உத³கே சிரட்டா²னேன ஸீதிபூ⁴தங் அத்தனோ ஊருங் மச்சோ²தி சிந்தெத்வா பஹரி. அபரோ ஸுஸானபஸ்ஸே கெ²த்தங் ரக்க²ந்தோ பீ⁴தோ ஸங்குடிதோ ஸயி, ஸோ படிபு³ஜ்ஜி²த்வா அத்தனோ ஜண்ணுகானி த்³வே யக்கா²தி சிந்தெத்வா பஹரி. ஏவங் நோ நு கொ²ஸ்மீதி கங்க²தி.
Etarahivā paccuppannaṃ addhānanti idāni vā paṭisandhimādiṃ katvā cutipariyantaṃ sabbampi vattamānakālaṃ gahetvā. Ajjhattaṃ kathaṃkathī bhavissatīti attano khandhesu vicikicchī bhavissati. Ahaṃ nu khosmīti attano atthibhāvaṃ kaṅkhati. Yuttaṃ panetanti? Yuttaṃ ayuttanti kā ettha cintā. Apicettha idaṃ vatthumpi udāharanti – cūḷamātāya kira putto muṇḍo, mahāmātāya putto amuṇḍo, taṃ puttaṃ muṇḍesuṃ, so uṭṭhāya ‘‘ahaṃ nu kho cūḷamātāya putto’’ti cintesi. Evaṃ ahaṃ nu khosmīti kaṅkhā hoti. No nu khosmīti attano natthibhāvaṃ kaṅkhati. Tatrāpi idaṃ vatthu – eko kira macche gaṇhanto udake ciraṭṭhānena sītibhūtaṃ attano ūruṃ macchoti cintetvā pahari. Aparo susānapasse khettaṃ rakkhanto bhīto saṅkuṭito sayi, so paṭibujjhitvā attano jaṇṇukāni dve yakkhāti cintetvā pahari. Evaṃ no nu khosmīti kaṅkhati.
கிங் நு கொ²ஸ்மீதி க²த்தியோவ ஸமானோ அத்தனோ க²த்தியபா⁴வங் கங்க²தி. ஏஸேவ நயோ ஸேஸேஸுபி. தே³வோ பன ஸமானோ தே³வபா⁴வங் அஜானந்தோ நாம நத்தி², ஸோபி பன ‘‘அஹங் ரூபீ நு கோ² அரூபீ நு கோ²’’திஆதி³னா நயேன கங்க²தி. க²த்தியாத³யோ கஸ்மா ந ஜானந்தீதி சே? அபச்சக்கா² தேஸங் தத்த² தத்த² குலே உப்பத்தி. க³ஹட்டா²பி ச பொத்த²லிகாத³யோ பப்³ப³ஜிதஸஞ்ஞினோ, பப்³ப³ஜிதாபி ‘‘குப்பங் நு கோ² மே கம்ம’’ந்திஆதி³னா நயேன க³ஹட்ட²ஸஞ்ஞினோ. மனுஸ்ஸாபி ச ராஜானோ விய அத்தனி தே³வஸஞ்ஞினோ ஹொந்தி. கத²ங் நு கொ²ஸ்மீதி வுத்தனயமேவ. கேவலஞ்ஹெத்த² அப்³ப⁴ந்தரே ஜீவோ நாம அத்தீ²தி க³ஹெத்வா தஸ்ஸ ஸண்டா²னாகாரங் நிஸ்ஸாய ‘‘தீ³கோ⁴ நு கொ²ஸ்மி ரஸ்ஸசதுரஸ்ஸச²ளங்ஸஅட்ட²ங்ஸஸோளஸங்ஸாதீ³னங் அஞ்ஞதரப்பகாரோ’’தி கங்க²ந்தோ கத²ங் நு கொ²ஸ்மீதி? கங்க²தீதி வேதி³தப்³போ³. ஸரீரஸண்டா²னங் பன பச்சுப்பன்னங் அஜானந்தோ நாம நத்தி². குதோ ஆக³தோ ஸோ குஹிங் கா³மீ ப⁴விஸ்ஸதீதி அத்தபா⁴வஸ்ஸ ஆக³திக³திட்டா²னங் கங்க²ந்தோ ஏவங் கங்க²தி. அரியஸாவகஸ்ஸாதி இத⁴ ஸோதாபன்னோ அதி⁴ப்பேதோ, இதரேபி பன தயோ அவாரிதாயேவாதி. த³ஸமங்.
Kiṃ nu khosmīti khattiyova samāno attano khattiyabhāvaṃ kaṅkhati. Eseva nayo sesesupi. Devo pana samāno devabhāvaṃ ajānanto nāma natthi, sopi pana ‘‘ahaṃ rūpī nu kho arūpī nu kho’’tiādinā nayena kaṅkhati. Khattiyādayo kasmā na jānantīti ce? Apaccakkhā tesaṃ tattha tattha kule uppatti. Gahaṭṭhāpi ca potthalikādayo pabbajitasaññino, pabbajitāpi ‘‘kuppaṃ nu kho me kamma’’ntiādinā nayena gahaṭṭhasaññino. Manussāpi ca rājāno viya attani devasaññino honti. Kathaṃ nu khosmīti vuttanayameva. Kevalañhettha abbhantare jīvo nāma atthīti gahetvā tassa saṇṭhānākāraṃ nissāya ‘‘dīgho nu khosmi rassacaturassachaḷaṃsaaṭṭhaṃsasoḷasaṃsādīnaṃ aññatarappakāro’’ti kaṅkhanto kathaṃ nu khosmīti? Kaṅkhatīti veditabbo. Sarīrasaṇṭhānaṃ pana paccuppannaṃ ajānanto nāma natthi. Kuto āgato so kuhiṃ gāmī bhavissatīti attabhāvassa āgatigatiṭṭhānaṃ kaṅkhanto evaṃ kaṅkhati. Ariyasāvakassāti idha sotāpanno adhippeto, itarepi pana tayo avāritāyevāti. Dasamaṃ.
ஆஹாரவக்³கோ³ து³தியோ.
Āhāravaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. பச்சயஸுத்தங் • 10. Paccayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. பச்சயஸுத்தவண்ணனா • 10. Paccayasuttavaṇṇanā
