| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৩. পচ্চযৰারৰণ্ণনা
3. Paccayavāravaṇṇanā
২৪৩. পচ্চযৰারে কুসলং ধম্মং পচ্চযাতি কুসলধম্মে পতিট্ঠিতো হুত্ৰা কুসলং ধম্মং নিস্সযট্ঠেন পচ্চযং কত্ৰাতি অত্থো। কুসলং একং খন্ধং পচ্চযাতি কুসলং একং খন্ধং নিস্সযপচ্চযং কত্ৰা তযো খন্ধা উপ্পজ্জন্তি হেতুপচ্চযাতি ৰুত্তং হোতি। ইমিনাৰুপাযেন সব্বপদেসু অত্থো ৰেদিতব্বো। ৰত্থুং পচ্চযা ৰিপাকাব্যাকতা কিরিযাব্যাকতা খন্ধাতি ইদং পঞ্চৰোকারে পৰত্তিৰসেন ৰুত্তং। পঞ্চৰোকারে পৰত্তিযঞ্হি খন্ধানং পুরেজাতং ৰত্থু নিস্সযপচ্চযো হোতি। পটিচ্চট্ঠস্স পন সহজাতট্ঠত্তা পটিচ্চৰারে এস নযো ন লব্ভতীতি পটিসন্ধিযং সহজাতমেৰ ৰত্থুং সন্ধায ‘‘ৰত্থুং পটিচ্চ খন্ধা’’তি ৰুত্তং। কুসলং একং খন্ধঞ্চ ৰত্থুঞ্চ পচ্চযা তযো খন্ধাতিআদীসুপি ইমিনাৰ নযেন অত্থো ৰেদিতব্বো।
243. Paccayavāre kusalaṃ dhammaṃ paccayāti kusaladhamme patiṭṭhito hutvā kusalaṃ dhammaṃ nissayaṭṭhena paccayaṃ katvāti attho. Kusalaṃ ekaṃ khandhaṃ paccayāti kusalaṃ ekaṃ khandhaṃ nissayapaccayaṃ katvā tayo khandhā uppajjanti hetupaccayāti vuttaṃ hoti. Imināvupāyena sabbapadesu attho veditabbo. Vatthuṃ paccayā vipākābyākatā kiriyābyākatā khandhāti idaṃ pañcavokāre pavattivasena vuttaṃ. Pañcavokāre pavattiyañhi khandhānaṃ purejātaṃ vatthu nissayapaccayo hoti. Paṭiccaṭṭhassa pana sahajātaṭṭhattā paṭiccavāre esa nayo na labbhatīti paṭisandhiyaṃ sahajātameva vatthuṃ sandhāya ‘‘vatthuṃ paṭicca khandhā’’ti vuttaṃ. Kusalaṃ ekaṃ khandhañca vatthuñca paccayā tayo khandhātiādīsupi imināva nayena attho veditabbo.
অব্যাকতং ধম্মং পচ্চযা কুসলো চ অব্যাকতো চাতি কুসলাব্যাকতানং হেতুপচ্চযৰসেন একতো উপ্পত্তিং সন্ধায ৰুত্তং। কুসলুপ্পত্তিক্খণস্মিঞ্হি ৰত্থুং নিস্সায কুসলা খন্ধা, চিত্তসমুট্ঠানে চ মহাভূতে নিস্সায চিত্তসমুট্ঠানং উপাদারূপং হেতুপচ্চযৰসেন একতো উপ্পজ্জতি। ইতি পচ্চযভূতস্স অব্যাকতস্স নানত্তেপি পচ্চযুপ্পন্নানং হেতুপচ্চযৰসেন একতো উপ্পত্তিং সন্ধাযেতং ৰুত্তন্তি ৰেদিতব্বং। অঞ্ঞেসুপি এৰরূপেসু ঠানেসু এসেৰ নযো। এৰং ইমস্মিং হেতুপচ্চযে সহজাতঞ্চ পুরেজাতঞ্চ নিস্সযট্ঠেন পচ্চযং কত্ৰা সত্তরস পঞ্হা ৰিস্সজ্জিতা। তত্থ খন্ধা চেৰ ভূতা চ সহজাতৰসেন, ৰত্থু সহজাতপুরেজাতৰসেন গহিতং। পটিচ্চৰারে পন সহজাতৰসেন পচ্চযো লব্ভতি, তস্মা তত্থ নৰেৰ পঞ্হা ৰিস্সজ্জিতা। যে পনেতে এত্থ সত্তরস পঞ্হা ৰিস্সজ্জিতা, তেসু একাদিকে একাৰসানে ৰিস্সজ্জনে কুসলাদীসু একপচ্চযতো একো পচ্চযুপ্পন্নো। একাদিকে দুকাৰসানে একপচ্চযতো নানাপচ্চযুপ্পন্নো। দুকাদিকে একাৰসানে নানাপচ্চযতো একো পচ্চযুপ্পন্নো। দুকাদিকে দুকাৰসানে নানাপচ্চযতো নানাপচ্চযুপ্পন্নো।
Abyākataṃdhammaṃ paccayā kusalo ca abyākato cāti kusalābyākatānaṃ hetupaccayavasena ekato uppattiṃ sandhāya vuttaṃ. Kusaluppattikkhaṇasmiñhi vatthuṃ nissāya kusalā khandhā, cittasamuṭṭhāne ca mahābhūte nissāya cittasamuṭṭhānaṃ upādārūpaṃ hetupaccayavasena ekato uppajjati. Iti paccayabhūtassa abyākatassa nānattepi paccayuppannānaṃ hetupaccayavasena ekato uppattiṃ sandhāyetaṃ vuttanti veditabbaṃ. Aññesupi evarūpesu ṭhānesu eseva nayo. Evaṃ imasmiṃ hetupaccaye sahajātañca purejātañca nissayaṭṭhena paccayaṃ katvā sattarasa pañhā vissajjitā. Tattha khandhā ceva bhūtā ca sahajātavasena, vatthu sahajātapurejātavasena gahitaṃ. Paṭiccavāre pana sahajātavasena paccayo labbhati, tasmā tattha naveva pañhā vissajjitā. Ye panete ettha sattarasa pañhā vissajjitā, tesu ekādike ekāvasāne vissajjane kusalādīsu ekapaccayato eko paccayuppanno. Ekādike dukāvasāne ekapaccayato nānāpaccayuppanno. Dukādike ekāvasāne nānāpaccayato eko paccayuppanno. Dukādike dukāvasāne nānāpaccayato nānāpaccayuppanno.
২৪৮-২৫২. আরম্মণপচ্চযাদীসুপি ইমিনাৰুপাযেন পঞ্হাৰিস্সজ্জনপ্পভেদো ৰেদিতব্বো। যং পনেতং আরম্মণপচ্চযে ৰত্থুং পচ্চযা খন্ধাতি ৰুত্তং, তং পটিসন্ধিক্খণে ৰিপাকক্খন্ধেযেৰ সন্ধায ৰুত্তং। চক্খুৰিঞ্ঞাণাদীনি অব্যাকতং নিস্সায আরম্মণপচ্চযেন উপ্পজ্জন্তানং পভেদদস্সনত্থং ৰুত্তানি। পুন ৰত্থুং পচ্চযাতি পৰত্তে ৰিপাককিরিযাব্যাকতানং উপ্পত্তিদস্সনত্থং ৰুত্তং। সেসং পুরিমনযেনেৰ ৰেদিতব্বং। এৰং ইমস্মিং আরম্মণপচ্চযে সহজাতঞ্চ পুরেজাতঞ্চ পচ্চযং কত্ৰা সত্ত পঞ্হা ৰিস্সজ্জিতা। তত্থ খন্ধা সহজাতৰসেন, ৰত্থু সহজাতপুরেজাতৰসেন, চক্খাযতনাদীনি পুরেজাতৰসেনেৰ গহিতানি। পটিচ্চৰারে পন সহজাতৰসেনেৰ পচ্চযো লব্ভতি। তস্মা তত্থ তযোৰ পঞ্হা ৰিস্সজ্জিতা।
248-252. Ārammaṇapaccayādīsupi imināvupāyena pañhāvissajjanappabhedo veditabbo. Yaṃ panetaṃ ārammaṇapaccaye vatthuṃ paccayā khandhāti vuttaṃ, taṃ paṭisandhikkhaṇe vipākakkhandheyeva sandhāya vuttaṃ. Cakkhuviññāṇādīni abyākataṃ nissāya ārammaṇapaccayena uppajjantānaṃ pabhedadassanatthaṃ vuttāni. Puna vatthuṃ paccayāti pavatte vipākakiriyābyākatānaṃ uppattidassanatthaṃ vuttaṃ. Sesaṃ purimanayeneva veditabbaṃ. Evaṃ imasmiṃ ārammaṇapaccaye sahajātañca purejātañca paccayaṃ katvā satta pañhā vissajjitā. Tattha khandhā sahajātavasena, vatthu sahajātapurejātavasena, cakkhāyatanādīni purejātavaseneva gahitāni. Paṭiccavāre pana sahajātavaseneva paccayo labbhati. Tasmā tattha tayova pañhā vissajjitā.
২৫৩-২৫৪. অধিপতিপচ্চযে ৰিপাকাব্যাকতং লোকুত্তরমেৰ ৰেদিতব্বং। অনন্তরসমনন্তরা রূপাভাৰেন আরম্মণসদিসা। পরতো আসেৰননত্থিৰিগতেসুপি এসেৰ নযো।
253-254. Adhipatipaccaye vipākābyākataṃ lokuttarameva veditabbaṃ. Anantarasamanantarā rūpābhāvena ārammaṇasadisā. Parato āsevananatthivigatesupi eseva nayo.
২৫৫. সহজাতপচ্চযে কটত্তারূপং উপাদারূপন্তি উপাদারূপসঙ্খাতং কটত্তারূপং। ইদং অসঞ্ঞসত্তানঞ্ঞেৰ রূপং সন্ধায ৰুত্তং। চক্খাযতনাদীনি পঞ্চৰোকারৰসেন ৰুত্তানি।
255. Sahajātapaccaye kaṭattārūpaṃ upādārūpanti upādārūpasaṅkhātaṃ kaṭattārūpaṃ. Idaṃ asaññasattānaññeva rūpaṃ sandhāya vuttaṃ. Cakkhāyatanādīni pañcavokāravasena vuttāni.
২৫৬-২৫৭. অঞ্ঞমঞ্ঞপচ্চযে চ যথা আরম্মণপচ্চযা এৰন্তি ৰিস্সজ্জনসমতং সন্ধায ৰুত্তং। পচ্চযুপ্পন্নেসু পন নানত্তং অত্থি।
256-257. Aññamaññapaccaye ca yathā ārammaṇapaccayā evanti vissajjanasamataṃ sandhāya vuttaṃ. Paccayuppannesu pana nānattaṃ atthi.
২৫৮. উপনিস্সযপচ্চযে আরম্মণপচ্চযসদিসন্তি রূপাভাৰতোপি ৰিস্সজ্জনসমতাযপি ৰুত্তং।
258. Upanissayapaccaye ārammaṇapaccayasadisanti rūpābhāvatopi vissajjanasamatāyapi vuttaṃ.
২৫৯-২৬০. ৰত্থুং পুরেজাতপচ্চযাতিআদীনং পটিচ্চৰারে ৰুত্তনযেনেৰত্থো গহেতব্বো।
259-260. Vatthuṃ purejātapaccayātiādīnaṃ paṭiccavāre vuttanayenevattho gahetabbo.
২৬১-২৬৬. কম্মপচ্চযে তীণীতি কুসলং পচ্চযা কুসলো অব্যাকতো কুসলাব্যাকতো চাতি এৰং তীণি ৰেদিতব্বানি। অকুসলেপি এসেৰ নযো।
261-266. Kammapaccaye tīṇīti kusalaṃ paccayā kusalo abyākato kusalābyākato cāti evaṃ tīṇi veditabbāni. Akusalepi eseva nayo.
২৬৭-২৬৮. ৰিপ্পযুত্তপচ্চযে খন্ধে ৰিপ্পযুত্তপচ্চযাতি খন্ধে নিস্সায ৰিপ্পযুত্তপচ্চযা উপ্পজ্জন্তীতি অত্থো। খন্ধা ৰত্থুং ৰিপ্পযুত্তপচ্চযাতি খন্ধা ৰত্থুং নিস্সায ৰিপ্পযুত্তপচ্চযা উপ্পজ্জন্তীতি অত্থো। সেসং হেট্ঠা ৰুত্তনযেনেৰ ৰেদিতব্বং।
267-268. Vippayuttapaccaye khandhe vippayuttapaccayāti khandhe nissāya vippayuttapaccayā uppajjantīti attho. Khandhā vatthuṃ vippayuttapaccayāti khandhā vatthuṃ nissāya vippayuttapaccayā uppajjantīti attho. Sesaṃ heṭṭhā vuttanayeneva veditabbaṃ.
২৬৯-২৭৬. ইদানি যথালদ্ধানি ৰিস্সজ্জনানি গণনৰসেন দস্সেতুং হেতুযা সত্তরসাতিআদিমাহ। তত্থ হেতুযা সত্তরসাতি কুসলেন কুসলং, কুসলেন অব্যাকতং, কুসলেন কুসলাব্যাকতন্তি এৰং কুসলৰসেন একাদিকানি একাৰসানানি দ্ৰে, দুকাৰসানং একন্তি তীণি ৰুত্তানি হোন্তি, তথা অকুসলৰসেন। অব্যাকতেন অব্যাকতং, তেনেৰ কুসলং, অকুসলং, কুসলাব্যাকতং অকুসলাব্যাকতঞ্চ; কুসলাব্যাকতেহি কুসলং, অব্যাকতং, কুসলাব্যাকতং; অকুসলাব্যাকতেহি অকুসলং, অব্যাকতং, অকুসলাব্যাকতন্তি এৰং সত্তরস ৰেদিতব্বানি।
269-276. Idāni yathāladdhāni vissajjanāni gaṇanavasena dassetuṃ hetuyā sattarasātiādimāha. Tattha hetuyā sattarasāti kusalena kusalaṃ, kusalena abyākataṃ, kusalena kusalābyākatanti evaṃ kusalavasena ekādikāni ekāvasānāni dve, dukāvasānaṃ ekanti tīṇi vuttāni honti, tathā akusalavasena. Abyākatena abyākataṃ, teneva kusalaṃ, akusalaṃ, kusalābyākataṃ akusalābyākatañca; kusalābyākatehi kusalaṃ, abyākataṃ, kusalābyākataṃ; akusalābyākatehi akusalaṃ, abyākataṃ, akusalābyākatanti evaṃ sattarasa veditabbāni.
আরম্মণে সত্তাতি কুসলেন কুসলং; অকুসলেন অকুসলং, অব্যাকতেন অব্যাকতং, কুসলং, অকুসলং; কুসলাব্যাকতেন কুসলং; অকুসলাব্যাকতেন অকুসলন্তি এৰং সত্ত।
Ārammaṇesattāti kusalena kusalaṃ; akusalena akusalaṃ, abyākatena abyākataṃ, kusalaṃ, akusalaṃ; kusalābyākatena kusalaṃ; akusalābyākatena akusalanti evaṃ satta.
ৰিপাকে একন্তি অব্যাকতেন অব্যাকতমেৰ। এৰমেত্থ সত্তরস, সত্ত, একন্তি তযো ৰারপরিচ্ছেদা হোন্তি। তেসু দ্ৰাদস সত্তরসকা, দস সত্তকা, একং এককন্তি তে সব্বে সাধুকং সল্লক্খেত্ৰা পরতো দুকতিকাদিৰসেন পচ্চযসংসন্দনে ঊনতরগণনস্স ৰসেন গণনা ৰেদিতব্বা। সক্কা হি ইমায গণনায দুকমূলাদীসু ৰারপরিচ্ছেদে জানিতুন্তি পুন ‘‘কুসলং ধম্মং পচ্চযা কুসলো ধম্মো’’তি অনামসিত্ৰা গণনৰসেনেৰ ৰারপরিচ্ছেদং দস্সেতুং হেতুপচ্চযা আরম্মণে সত্তাতিআদি আরদ্ধং।
Vipākeekanti abyākatena abyākatameva. Evamettha sattarasa, satta, ekanti tayo vāraparicchedā honti. Tesu dvādasa sattarasakā, dasa sattakā, ekaṃ ekakanti te sabbe sādhukaṃ sallakkhetvā parato dukatikādivasena paccayasaṃsandane ūnataragaṇanassa vasena gaṇanā veditabbā. Sakkā hi imāya gaṇanāya dukamūlādīsu vāraparicchede jānitunti puna ‘‘kusalaṃ dhammaṃ paccayā kusalo dhammo’’ti anāmasitvā gaṇanavaseneva vāraparicchedaṃ dassetuṃ hetupaccayā ārammaṇe sattātiādi āraddhaṃ.
তত্থ কুসলং ধম্মং পচ্চযা কুসলো ধম্মো উপ্পজ্জতি হেতুপচ্চযা আরম্মণপচ্চযা। কুসলং একং খন্ধং পচ্চযা তযো খন্ধাতি ইমিনা নযেন আরম্মণে লদ্ধৰিস্সজ্জনানি ৰিত্থারেতব্বানি। অযং তাৰ অনুলোমে নযো।
Tattha kusalaṃ dhammaṃ paccayā kusalo dhammo uppajjati hetupaccayā ārammaṇapaccayā. Kusalaṃ ekaṃ khandhaṃ paccayā tayo khandhāti iminā nayena ārammaṇe laddhavissajjanāni vitthāretabbāni. Ayaṃ tāva anulome nayo.
২৭৭-২৮৫. পচ্চনীযে পন কুসলং ন লব্ভতীতি অকুসলং ধম্মং পচ্চযাতি অকুসলমেৰ আদিং কত্ৰা ৰিস্সজ্জনং আরদ্ধং। তং যথাপাল়িমেৰ নিয্যাতি। যঞ্হেত্থ ৰত্তব্বং সিযা, তং পটিচ্চৰারস্স পচ্চনীযে ৰুত্তমেৰ।
277-285. Paccanīye pana kusalaṃ na labbhatīti akusalaṃ dhammaṃ paccayāti akusalameva ādiṃ katvā vissajjanaṃ āraddhaṃ. Taṃ yathāpāḷimeva niyyāti. Yañhettha vattabbaṃ siyā, taṃ paṭiccavārassa paccanīye vuttameva.
২৮৬-২৮৭. যং পনেতং পচ্চনীযে লদ্ধৰিস্সজ্জনপরিচ্ছেদং গণনতো দস্সেতুং নহেতুযা চত্তারীতিআদি ৰুত্তং, তত্থ চত্তারি, সত্তরস, সত্ত, পঞ্চ, তীণি, একন্তি ছ পরিচ্ছেদা। তেসং ৰসেন দুকতিকাদীসু পচ্চযসংসন্দনে গণনা ৰেদিতব্বা। যো হি পচ্চযো সত্তরস ৰিস্সজ্জনানি লভতি, তেন সদ্ধিং সদিসসংসন্দনে সত্তরস, ঊনতরসংসন্দনে সেসা ছপি পরিচ্ছেদা লব্ভন্তি। এৰং সেসেসুপি অধিকপরিচ্ছেদং ঠপেত্ৰা সমসমা ঊনতরা চ লব্ভন্তীতি।
286-287. Yaṃ panetaṃ paccanīye laddhavissajjanaparicchedaṃ gaṇanato dassetuṃ nahetuyā cattārītiādi vuttaṃ, tattha cattāri, sattarasa, satta, pañca, tīṇi, ekanti cha paricchedā. Tesaṃ vasena dukatikādīsu paccayasaṃsandane gaṇanā veditabbā. Yo hi paccayo sattarasa vissajjanāni labhati, tena saddhiṃ sadisasaṃsandane sattarasa, ūnatarasaṃsandane sesā chapi paricchedā labbhanti. Evaṃ sesesupi adhikaparicchedaṃ ṭhapetvā samasamā ūnatarā ca labbhantīti.
এত্থ চ অধিকতরা ন লব্ভন্তীতি অযমেত্থ নিযমো। সমসমা পন ঊনতরা চ অত্থা ৰিরোধে সতি লব্ভন্তি। তেনেত্থ ‘‘নহেতুপচ্চযা নারম্মণে এক’’ন্তিআদি ৰুত্তং। এত্থ হি নহেতুযা চতুন্নং, নারম্মণে পঞ্চন্নং আগতত্তা নহেতুৰসেন চত্তারীতি ৰত্তব্বং সিযা, নারম্মণেন সদ্ধিং ঘটিতত্তা পন আরম্মণধম্মো ৰিরুজ্ঝতীতি অকুসলং ধম্মং পচ্চযা অকুসলো ধম্মো, অব্যাকতং ধম্মং পচ্চযা অকুসলো, অকুসলঞ্চ অব্যাকতঞ্চ ধম্মং পচ্চযা অকুসলোতি তীণি ৰিস্সজ্জনানি পরিহীনানি। অব্যাকতং ধম্মং পচ্চযা অব্যাকতোতি রূপৰসেন একমেৰ ৰুত্তং। এৰং সব্বত্থ ৰিরুদ্ধাৰিরুদ্ধং ঞত্ৰা লব্ভমানপরিচ্ছেদো ৰেদিতব্বো। অপিচেত্থ ইদং নযমত্তদস্সনং। নাধিপতিযা চত্তারীতি নহেতুযা লদ্ধানেৰ। সেসচতুক্কেসুপি এসেৰ নযো।
Ettha ca adhikatarā na labbhantīti ayamettha niyamo. Samasamā pana ūnatarā ca atthā virodhe sati labbhanti. Tenettha ‘‘nahetupaccayā nārammaṇe eka’’ntiādi vuttaṃ. Ettha hi nahetuyā catunnaṃ, nārammaṇe pañcannaṃ āgatattā nahetuvasena cattārīti vattabbaṃ siyā, nārammaṇena saddhiṃ ghaṭitattā pana ārammaṇadhammo virujjhatīti akusalaṃ dhammaṃ paccayā akusalo dhammo, abyākataṃ dhammaṃ paccayā akusalo, akusalañca abyākatañca dhammaṃ paccayā akusaloti tīṇi vissajjanāni parihīnāni. Abyākataṃ dhammaṃ paccayā abyākatoti rūpavasena ekameva vuttaṃ. Evaṃ sabbattha viruddhāviruddhaṃ ñatvā labbhamānaparicchedo veditabbo. Apicettha idaṃ nayamattadassanaṃ. Nādhipatiyā cattārīti nahetuyā laddhāneva. Sesacatukkesupi eseva nayo.
নানন্তরে একন্তি অহেতুকচিত্তসমুট্ঠানস্স চেৰ সেসরূপস্স চ ৰসেন অব্যাকতেন অব্যাকতং। এৰং সব্বেসু এককেসু যুজ্জমানকরূপং জানিতব্বং। নপুরেজাতে দ্ৰেতি ইধাপি নহেতুৰসেন চত্তারীতি ৰত্তব্বং সিযা, নপুরেজাতেন সদ্ধিং ঘটিতত্তা পন অব্যাকতং ধম্মং পচ্চযা অকুসলো, অকুসলঞ্চ অব্যাকতঞ্চ ধম্মং পচ্চযা অকুসলোতি ৰত্থুপুরেজাতৰসেন দ্ৰে ৰিস্সজ্জনানি পরিহীনানি। আরুপ্পে পন অহেতুকমোহস্স অহেতুককিরিযস্স চ ৰসেন দ্ৰে ৰুত্তানি। নৰিপ্পযুত্তে দ্ৰেতি আরুপ্পে অহেতুকাকুসলকিরিযৰসেন দ্ৰে। নোনত্থি নোৰিগতেসু একন্তি সব্বস্স রূপস্স ৰসেন অব্যাকতেন অব্যাকতং দট্ঠব্বং। তিকাদীসু অপুব্বং নত্থি।
Nānantare ekanti ahetukacittasamuṭṭhānassa ceva sesarūpassa ca vasena abyākatena abyākataṃ. Evaṃ sabbesu ekakesu yujjamānakarūpaṃ jānitabbaṃ. Napurejāte dveti idhāpi nahetuvasena cattārīti vattabbaṃ siyā, napurejātena saddhiṃ ghaṭitattā pana abyākataṃ dhammaṃ paccayā akusalo, akusalañca abyākatañca dhammaṃ paccayā akusaloti vatthupurejātavasena dve vissajjanāni parihīnāni. Āruppe pana ahetukamohassa ahetukakiriyassa ca vasena dve vuttāni. Navippayutte dveti āruppe ahetukākusalakiriyavasena dve. Nonatthi novigatesu ekanti sabbassa rūpassa vasena abyākatena abyākataṃ daṭṭhabbaṃ. Tikādīsu apubbaṃ natthi.
২৮৮. নারম্মণমূলকে পন নঅধিপতিযা পঞ্চাতি নারম্মণে লদ্ধানেৰ। নকম্মে একন্তি এত্থ চিত্তসমুট্ঠানঞ্চ কটত্তারূপঞ্চ অগ্গহেত্ৰা সেসরূপৰসেন অব্যাকতেন অব্যাকতং ৰেদিতব্বং।
288. Nārammaṇamūlake pana naadhipatiyā pañcāti nārammaṇe laddhāneva. Nakamme ekanti ettha cittasamuṭṭhānañca kaṭattārūpañca aggahetvā sesarūpavasena abyākatena abyākataṃ veditabbaṃ.
২৮৯-২৯৬. নাধিপতিমূলকে নপুরেজাতে সত্তাতি নপুরেজাতে লদ্ধানেৰ। নপচ্ছাজাতে সত্তরসাতি ইমানিপি তত্থ লদ্ধানি সত্তরসেৰ। নানন্তরনসমনন্তরনঅঞ্ঞমঞ্ঞনউপনিস্সযনসম্পযুত্তনোনত্থিনোৰিগতমূলকানি নারম্মণমূলকসদিসানেৰ। ইমিনাৰ নযমত্তদস্সনেন সব্বত্থ আগতানাগতং লব্ভমানালব্ভমানঞ্চ ৰেদিতব্বন্তি।
289-296. Nādhipatimūlake napurejāte sattāti napurejāte laddhāneva. Napacchājāte sattarasāti imānipi tattha laddhāni sattaraseva. Nānantaranasamanantaranaaññamaññanaupanissayanasampayuttanonatthinovigatamūlakāni nārammaṇamūlakasadisāneva. Imināva nayamattadassanena sabbattha āgatānāgataṃ labbhamānālabbhamānañca veditabbanti.
পচ্চনীযৰণ্ণনা নিট্ঠিতা।
Paccanīyavaṇṇanā niṭṭhitā.
২৯৭-৩২৮. ইমিনাযেৰ পন লক্খণেন অনুলোমং পুরতো কত্ৰা অনুলোমপচ্চনীযে পচ্চনীযং পুরতো কত্ৰা পচ্চনীযানুলোমে চ গণনপরিচ্ছেদো আগতানাগতং লব্ভমানালব্ভমানঞ্চ ৰেদিতব্বন্তি।
297-328. Imināyeva pana lakkhaṇena anulomaṃ purato katvā anulomapaccanīye paccanīyaṃ purato katvā paccanīyānulome ca gaṇanaparicchedo āgatānāgataṃ labbhamānālabbhamānañca veditabbanti.
পচ্চযৰারৰণ্ণনা নিট্ঠিতা।
Paccayavāravaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / ১. কুসলত্তিকং • 1. Kusalattikaṃ
