| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
৩. পচ্চযৰারৰণ্ণনা
3. Paccayavāravaṇṇanā
২৪৩. পচ্চযাতি এত্থ পতি অযো পচ্চযো। পতি-সদ্দো পতিট্ঠত্থং দীপেতি, অয-সদ্দো গতিং, পতিট্ঠাভূতা গতি নিস্সযো পচ্চযোতি ৰুত্তং হোতি, ততো পচ্চযা, পচ্চযকরণতো তদাযত্তভাৰগমনতো ৰাতি অত্থো।
243. Paccayāti ettha pati ayo paccayo. Pati-saddo patiṭṭhatthaṃ dīpeti, aya-saddo gatiṃ, patiṭṭhābhūtā gati nissayo paccayoti vuttaṃ hoti, tato paccayā, paccayakaraṇato tadāyattabhāvagamanato vāti attho.
‘‘মহাভূতে পচ্চযা চিত্তসমুট্ঠানং রূপ’’ন্তি (পট্ঠা॰ ১.১.২৪৫) ভূতুপাদারূপানি সহ সঙ্গণ্হিত্ৰা ৰুত্তং। অট্ঠকথাযং পন চিত্তসমুট্ঠানে চ মহাভূতে নিস্সায চিত্তসমুট্ঠানং উপাদারূপন্তি সযং নিস্সযো অহুত্ৰা নিস্সযে উপ্পজ্জমানেন উপাদারূপেন নিদস্সনং কতন্তি দট্ঠব্বং।
‘‘Mahābhūte paccayā cittasamuṭṭhānaṃ rūpa’’nti (paṭṭhā. 1.1.245) bhūtupādārūpāni saha saṅgaṇhitvā vuttaṃ. Aṭṭhakathāyaṃ pana cittasamuṭṭhāne ca mahābhūte nissāya cittasamuṭṭhānaṃ upādārūpanti sayaṃ nissayo ahutvā nissaye uppajjamānena upādārūpena nidassanaṃ katanti daṭṭhabbaṃ.
২৫৫. অসঞ্ঞ…পে॰… কটত্তারূপং উপাদারূপন্তি এত্থ যো পটিচ্চৰারে সহজাতে কম্মউতুজানং, কম্মে চ একন্তানেকন্তকম্মজানং ৰসেন অত্থো ৰুত্তো, সো নাধিপ্পেতো এৰ ‘‘কটত্তারূপ’’ন্তি কম্মসমুট্ঠানরূপস্সেৰ সব্বস্স চ গহিতত্তাতি তং পহায যথাগহিতস্স কটত্তারূপস্স ৰিসেসনৰসেন ‘‘উপাদারূপসঙ্খাতং কটত্তারূপ’’ন্তি অত্থমাহ। মহাভূতে পন পটিচ্চ পচ্চযা চ মহাভূতানং উপ্পত্তি ন নিৰারেতব্বাতি উপাদারূপগ্গহণেন কটত্তারূপগ্গহণং অৰিসেসেত্ৰা উপাদারূপানং নিৰত্তেতব্বানং অত্থিতায কটত্তারূপগ্গহণেনেৰ উপাদারূপগ্গহণস্স ৰিসেসনং দট্ঠব্বং।
255. Asañña…pe… kaṭattārūpaṃ upādārūpanti ettha yo paṭiccavāre sahajāte kammautujānaṃ, kamme ca ekantānekantakammajānaṃ vasena attho vutto, so nādhippeto eva ‘‘kaṭattārūpa’’nti kammasamuṭṭhānarūpasseva sabbassa ca gahitattāti taṃ pahāya yathāgahitassa kaṭattārūpassa visesanavasena ‘‘upādārūpasaṅkhātaṃ kaṭattārūpa’’nti atthamāha. Mahābhūte pana paṭicca paccayā ca mahābhūtānaṃ uppatti na nivāretabbāti upādārūpaggahaṇena kaṭattārūpaggahaṇaṃ avisesetvā upādārūpānaṃ nivattetabbānaṃ atthitāya kaṭattārūpaggahaṇeneva upādārūpaggahaṇassa visesanaṃ daṭṭhabbaṃ.
২৬৯-২৭৬. ‘‘অব্যাকতেন অব্যাকতং, কুসলং, অকুসল’’ন্তি ৰত্তব্বে ‘‘অব্যাকতেন কুসলং, অকুসলং, অব্যাকত’’ন্তি, ‘‘কুসলং ধম্মং পটিচ্চ কুসলো চ অকুসলো চ ধম্মা কুসলস্সাতি অনামসিত্ৰা’’তি চ পুরিমপাঠে পমাদলেখা দট্ঠব্বা।
269-276. ‘‘Abyākatena abyākataṃ, kusalaṃ, akusala’’nti vattabbe ‘‘abyākatena kusalaṃ, akusalaṃ, abyākata’’nti, ‘‘kusalaṃ dhammaṃ paṭicca kusalo ca akusalo ca dhammā kusalassāti anāmasitvā’’ti ca purimapāṭhe pamādalekhā daṭṭhabbā.
২৮৬-২৮৭. নহেতুপচ্চযা নপুরেজাতে দ্ৰেতি এত্থ অট্ঠকথাযং ‘‘আরুপ্পে পন অহেতুকমোহস্স অহেতুককিরিযস্স চ ৰসেন দ্ৰেতি ৰুত্তা, নৰিপ্পযুত্তে দ্ৰেতি আরুপ্পে অহেতুকাকুসলকিরিযৰসেনা’’তি ৰুত্তং, তং লব্ভমানেসু একদেসেন নিদস্সনৰসেন ৰুত্তন্তি দট্ঠব্বং। আরুপ্পে পন অহেতুকমোহস্স অহেতুককিরিযায অহেতুকপটিসন্ধিযা একচ্চস্স চ রূপস্স ৰসেন দ্ৰে ৰুত্তাতি, নৰিপ্পযুত্তে দ্ৰেতি আরুপ্পে অহেতুকাকুসলকিরিযাএকচ্চরূপানং ৰসেনাতি ৰুত্তন্তি। ‘‘নোনত্থিনোৰিগতেসু একন্তি সব্বরূপস্স ৰসেনা’’তি ৰুত্তং, নহেতুমূলকত্তা ইমস্স নযস্স হেতুপচ্চযং লভন্তং ন লব্ভতীতি ‘‘একচ্চস্স রূপস্স ৰসেনা’’তি ভৰিতব্বং। চক্খাদিধম্মৰসেন পন চিত্তসমুট্ঠানাদিকোট্ঠাসৰসেন ৰা সব্বং লব্ভতীতি ‘‘সব্বরূপস্সা’’তি ৰুত্তং সিযা।
286-287. Nahetupaccayā napurejāte dveti ettha aṭṭhakathāyaṃ ‘‘āruppe pana ahetukamohassa ahetukakiriyassa ca vasena dveti vuttā, navippayutte dveti āruppe ahetukākusalakiriyavasenā’’ti vuttaṃ, taṃ labbhamānesu ekadesena nidassanavasena vuttanti daṭṭhabbaṃ. Āruppe pana ahetukamohassa ahetukakiriyāya ahetukapaṭisandhiyā ekaccassa ca rūpassa vasena dve vuttāti, navippayutte dveti āruppe ahetukākusalakiriyāekaccarūpānaṃ vasenāti vuttanti. ‘‘Nonatthinovigatesu ekanti sabbarūpassa vasenā’’ti vuttaṃ, nahetumūlakattā imassa nayassa hetupaccayaṃ labhantaṃ na labbhatīti ‘‘ekaccassa rūpassa vasenā’’ti bhavitabbaṃ. Cakkhādidhammavasena pana cittasamuṭṭhānādikoṭṭhāsavasena vā sabbaṃ labbhatīti ‘‘sabbarūpassā’’ti vuttaṃ siyā.
২৮৯-২৯৬. আগতানাগতন্তি পঞ্হৰসেন ৰুত্তং, লব্ভমানালব্ভমানন্তি আগতে চ পঞ্হে লব্ভমানালব্ভমানধম্মৰসেন।
289-296. Āgatānāgatanti pañhavasena vuttaṃ, labbhamānālabbhamānanti āgate ca pañhe labbhamānālabbhamānadhammavasena.
পচ্চযৰারৰণ্ণনা নিট্ঠিতা।
Paccayavāravaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / ১. কুসলত্তিকং • 1. Kusalattikaṃ
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৩. পচ্চযৰারৰণ্ণনা • 3. Paccayavāravaṇṇanā
