| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
3. бажжаяаваараван̣н̣анаа
3. Paccayavāravaṇṇanā
243. бажжаяаваарз гусалам̣ д̇хаммам̣ бажжаяаад̇и гусалад̇хаммз бад̇идтид̇о худ̇ваа гусалам̣ д̇хаммам̣ ниссаяадтзна бажжаяам̣ гад̇ваад̇и ад̇т̇о. гусалам̣ згам̣ канд̇хам̣ бажжаяаад̇и гусалам̣ згам̣ канд̇хам̣ ниссаяабажжаяам̣ гад̇ваа д̇аяо канд̇хаа уббаж̇ж̇анд̇и хзд̇убажжаяаад̇и вуд̇д̇ам̣ ход̇и. иминаавубааязна саб̣б̣абад̣̇зсу ад̇т̇о взд̣̇ид̇аб̣б̣о. вад̇т̇ум̣ бажжаяаа вибаагааб̣яаагад̇аа гирияааб̣яаагад̇аа канд̇хаад̇и ид̣̇ам̣ бан̃жавогаарз бавад̇д̇ивасзна вуд̇д̇ам̣. бан̃жавогаарз бавад̇д̇ияан̃хи канд̇хаанам̣ бурзж̇аад̇ам̣ вад̇т̇у ниссаяабажжаяо ход̇и. бадижжадтасса бана сахаж̇аад̇адтад̇д̇аа бадижжаваарз зса наяо на лаб̣бхад̇ийд̇и бадисанд̇хияам̣ сахаж̇аад̇амзва вад̇т̇ум̣ санд̇хааяа ‘‘вад̇т̇ум̣ бадижжа канд̇хаа’’д̇и вуд̇д̇ам̣. гусалам̣ згам̣ канд̇хан̃жа вад̇т̇ун̃жа бажжаяаа д̇аяо канд̇хаад̇иаад̣̇ийсуби иминаава наязна ад̇т̇о взд̣̇ид̇аб̣б̣о.
243. Paccayavāre kusalaṃ dhammaṃ paccayāti kusaladhamme patiṭṭhito hutvā kusalaṃ dhammaṃ nissayaṭṭhena paccayaṃ katvāti attho. Kusalaṃ ekaṃ khandhaṃ paccayāti kusalaṃ ekaṃ khandhaṃ nissayapaccayaṃ katvā tayo khandhā uppajjanti hetupaccayāti vuttaṃ hoti. Imināvupāyena sabbapadesu attho veditabbo. Vatthuṃ paccayā vipākābyākatā kiriyābyākatā khandhāti idaṃ pañcavokāre pavattivasena vuttaṃ. Pañcavokāre pavattiyañhi khandhānaṃ purejātaṃ vatthu nissayapaccayo hoti. Paṭiccaṭṭhassa pana sahajātaṭṭhattā paṭiccavāre esa nayo na labbhatīti paṭisandhiyaṃ sahajātameva vatthuṃ sandhāya ‘‘vatthuṃ paṭicca khandhā’’ti vuttaṃ. Kusalaṃ ekaṃ khandhañca vatthuñca paccayā tayo khandhātiādīsupi imināva nayena attho veditabbo.
аб̣яаагад̇ам̣ д̇хаммам̣ бажжаяаа гусало жа аб̣яаагад̇о жаад̇и гусалааб̣яаагад̇аанам̣ хзд̇убажжаяавасзна згад̇о уббад̇д̇им̣ санд̇хааяа вуд̇д̇ам̣. гусалуббад̇д̇игкан̣асмин̃хи вад̇т̇ум̣ ниссааяа гусалаа канд̇хаа, жид̇д̇асамудтаанз жа махаабхууд̇з ниссааяа жид̇д̇асамудтаанам̣ убаад̣̇ааруубам̣ хзд̇убажжаяавасзна згад̇о уббаж̇ж̇ад̇и. ид̇и бажжаяабхууд̇асса аб̣яаагад̇асса наанад̇д̇зби бажжаяуббаннаанам̣ хзд̇убажжаяавасзна згад̇о уббад̇д̇им̣ санд̇хааязд̇ам̣ вуд̇д̇анд̇и взд̣̇ид̇аб̣б̣ам̣. ан̃н̃зсуби зваруубзсу таанзсу зсзва наяо. звам̣ имасмим̣ хзд̇убажжаяз сахаж̇аад̇ан̃жа бурзж̇аад̇ан̃жа ниссаяадтзна бажжаяам̣ гад̇ваа сад̇д̇араса бан̃хаа виссаж̇ж̇ид̇аа. д̇ад̇т̇а канд̇хаа жзва бхууд̇аа жа сахаж̇аад̇авасзна, вад̇т̇у сахаж̇аад̇абурзж̇аад̇авасзна г̇ахид̇ам̣. бадижжаваарз бана сахаж̇аад̇авасзна бажжаяо лаб̣бхад̇и, д̇асмаа д̇ад̇т̇а навзва бан̃хаа виссаж̇ж̇ид̇аа. яз банзд̇з зд̇т̇а сад̇д̇араса бан̃хаа виссаж̇ж̇ид̇аа, д̇зсу згаад̣̇игз згаавасаанз виссаж̇ж̇анз гусалаад̣̇ийсу згабажжаяад̇о зго бажжаяуббанно. згаад̣̇игз д̣̇угаавасаанз згабажжаяад̇о наанаабажжаяуббанно. д̣̇угаад̣̇игз згаавасаанз наанаабажжаяад̇о зго бажжаяуббанно. д̣̇угаад̣̇игз д̣̇угаавасаанз наанаабажжаяад̇о наанаабажжаяуббанно.
Abyākataṃdhammaṃ paccayā kusalo ca abyākato cāti kusalābyākatānaṃ hetupaccayavasena ekato uppattiṃ sandhāya vuttaṃ. Kusaluppattikkhaṇasmiñhi vatthuṃ nissāya kusalā khandhā, cittasamuṭṭhāne ca mahābhūte nissāya cittasamuṭṭhānaṃ upādārūpaṃ hetupaccayavasena ekato uppajjati. Iti paccayabhūtassa abyākatassa nānattepi paccayuppannānaṃ hetupaccayavasena ekato uppattiṃ sandhāyetaṃ vuttanti veditabbaṃ. Aññesupi evarūpesu ṭhānesu eseva nayo. Evaṃ imasmiṃ hetupaccaye sahajātañca purejātañca nissayaṭṭhena paccayaṃ katvā sattarasa pañhā vissajjitā. Tattha khandhā ceva bhūtā ca sahajātavasena, vatthu sahajātapurejātavasena gahitaṃ. Paṭiccavāre pana sahajātavasena paccayo labbhati, tasmā tattha naveva pañhā vissajjitā. Ye panete ettha sattarasa pañhā vissajjitā, tesu ekādike ekāvasāne vissajjane kusalādīsu ekapaccayato eko paccayuppanno. Ekādike dukāvasāne ekapaccayato nānāpaccayuppanno. Dukādike ekāvasāne nānāpaccayato eko paccayuppanno. Dukādike dukāvasāne nānāpaccayato nānāpaccayuppanno.
248-252. аарамман̣абажжаяаад̣̇ийсуби иминаавубааязна бан̃хаависсаж̇ж̇анаббабхзд̣̇о взд̣̇ид̇аб̣б̣о. яам̣ банзд̇ам̣ аарамман̣абажжаяз вад̇т̇ум̣ бажжаяаа канд̇хаад̇и вуд̇д̇ам̣, д̇ам̣ бадисанд̇хигкан̣з вибаагагканд̇хзязва санд̇хааяа вуд̇д̇ам̣. жагкувин̃н̃аан̣аад̣̇ийни аб̣яаагад̇ам̣ ниссааяа аарамман̣абажжаязна уббаж̇ж̇анд̇аанам̣ бабхзд̣̇ад̣̇ассанад̇т̇ам̣ вуд̇д̇аани. буна вад̇т̇ум̣ бажжаяаад̇и бавад̇д̇з вибаагагирияааб̣яаагад̇аанам̣ уббад̇д̇ид̣̇ассанад̇т̇ам̣ вуд̇д̇ам̣. сзсам̣ буриманаязнзва взд̣̇ид̇аб̣б̣ам̣. звам̣ имасмим̣ аарамман̣абажжаяз сахаж̇аад̇ан̃жа бурзж̇аад̇ан̃жа бажжаяам̣ гад̇ваа сад̇д̇а бан̃хаа виссаж̇ж̇ид̇аа. д̇ад̇т̇а канд̇хаа сахаж̇аад̇авасзна, вад̇т̇у сахаж̇аад̇абурзж̇аад̇авасзна, жагкааяад̇анаад̣̇ийни бурзж̇аад̇авасзнзва г̇ахид̇аани. бадижжаваарз бана сахаж̇аад̇авасзнзва бажжаяо лаб̣бхад̇и. д̇асмаа д̇ад̇т̇а д̇аяова бан̃хаа виссаж̇ж̇ид̇аа.
248-252. Ārammaṇapaccayādīsupi imināvupāyena pañhāvissajjanappabhedo veditabbo. Yaṃ panetaṃ ārammaṇapaccaye vatthuṃ paccayā khandhāti vuttaṃ, taṃ paṭisandhikkhaṇe vipākakkhandheyeva sandhāya vuttaṃ. Cakkhuviññāṇādīni abyākataṃ nissāya ārammaṇapaccayena uppajjantānaṃ pabhedadassanatthaṃ vuttāni. Puna vatthuṃ paccayāti pavatte vipākakiriyābyākatānaṃ uppattidassanatthaṃ vuttaṃ. Sesaṃ purimanayeneva veditabbaṃ. Evaṃ imasmiṃ ārammaṇapaccaye sahajātañca purejātañca paccayaṃ katvā satta pañhā vissajjitā. Tattha khandhā sahajātavasena, vatthu sahajātapurejātavasena, cakkhāyatanādīni purejātavaseneva gahitāni. Paṭiccavāre pana sahajātavaseneva paccayo labbhati. Tasmā tattha tayova pañhā vissajjitā.
253-254. ад̇хибад̇ибажжаяз вибаагааб̣яаагад̇ам̣ логуд̇д̇арамзва взд̣̇ид̇аб̣б̣ам̣. ананд̇арасамананд̇араа руубаабхаавзна аарамман̣асад̣̇исаа. барад̇о аасзвананад̇т̇ивиг̇ад̇зсуби зсзва наяо.
253-254. Adhipatipaccaye vipākābyākataṃ lokuttarameva veditabbaṃ. Anantarasamanantarā rūpābhāvena ārammaṇasadisā. Parato āsevananatthivigatesupi eseva nayo.
255. сахаж̇аад̇абажжаяз гадад̇д̇ааруубам̣ убаад̣̇ааруубанд̇и убаад̣̇ааруубасан̇каад̇ам̣ гадад̇д̇ааруубам̣. ид̣̇ам̣ асан̃н̃асад̇д̇аанан̃н̃зва руубам̣ санд̇хааяа вуд̇д̇ам̣. жагкааяад̇анаад̣̇ийни бан̃жавогааравасзна вуд̇д̇аани.
255. Sahajātapaccaye kaṭattārūpaṃ upādārūpanti upādārūpasaṅkhātaṃ kaṭattārūpaṃ. Idaṃ asaññasattānaññeva rūpaṃ sandhāya vuttaṃ. Cakkhāyatanādīni pañcavokāravasena vuttāni.
256-257. ан̃н̃аман̃н̃абажжаяз жа яат̇аа аарамман̣абажжаяаа званд̇и виссаж̇ж̇анасамад̇ам̣ санд̇хааяа вуд̇д̇ам̣. бажжаяуббаннзсу бана наанад̇д̇ам̣ ад̇т̇и.
256-257. Aññamaññapaccaye ca yathā ārammaṇapaccayā evanti vissajjanasamataṃ sandhāya vuttaṃ. Paccayuppannesu pana nānattaṃ atthi.
258. убаниссаяабажжаяз аарамман̣абажжаяасад̣̇исанд̇и руубаабхаавад̇оби виссаж̇ж̇анасамад̇ааяаби вуд̇д̇ам̣.
258. Upanissayapaccaye ārammaṇapaccayasadisanti rūpābhāvatopi vissajjanasamatāyapi vuttaṃ.
259-260. вад̇т̇ум̣ бурзж̇аад̇абажжаяаад̇иаад̣̇ийнам̣ бадижжаваарз вуд̇д̇анаязнзвад̇т̇о г̇ахзд̇аб̣б̣о.
259-260. Vatthuṃ purejātapaccayātiādīnaṃ paṭiccavāre vuttanayenevattho gahetabbo.
261-266. гаммабажжаяз д̇ийн̣ийд̇и гусалам̣ бажжаяаа гусало аб̣яаагад̇о гусалааб̣яаагад̇о жаад̇и звам̣ д̇ийн̣и взд̣̇ид̇аб̣б̣аани. агусалзби зсзва наяо.
261-266. Kammapaccaye tīṇīti kusalaṃ paccayā kusalo abyākato kusalābyākato cāti evaṃ tīṇi veditabbāni. Akusalepi eseva nayo.
267-268. виббаяуд̇д̇абажжаяз канд̇хз виббаяуд̇д̇абажжаяаад̇и канд̇хз ниссааяа виббаяуд̇д̇абажжаяаа уббаж̇ж̇анд̇ийд̇и ад̇т̇о. канд̇хаа вад̇т̇ум̣ виббаяуд̇д̇абажжаяаад̇и канд̇хаа вад̇т̇ум̣ ниссааяа виббаяуд̇д̇абажжаяаа уббаж̇ж̇анд̇ийд̇и ад̇т̇о. сзсам̣ хздтаа вуд̇д̇анаязнзва взд̣̇ид̇аб̣б̣ам̣.
267-268. Vippayuttapaccaye khandhe vippayuttapaccayāti khandhe nissāya vippayuttapaccayā uppajjantīti attho. Khandhā vatthuṃ vippayuttapaccayāti khandhā vatthuṃ nissāya vippayuttapaccayā uppajjantīti attho. Sesaṃ heṭṭhā vuttanayeneva veditabbaṃ.
269-276. ид̣̇аани яат̇аалад̣̇д̇хаани виссаж̇ж̇анаани г̇ан̣анавасзна д̣̇ассзд̇ум̣ хзд̇уяаа сад̇д̇арасаад̇иаад̣̇имааха. д̇ад̇т̇а хзд̇уяаа сад̇д̇арасаад̇и гусалзна гусалам̣, гусалзна аб̣яаагад̇ам̣, гусалзна гусалааб̣яаагад̇анд̇и звам̣ гусалавасзна згаад̣̇игаани згаавасаанаани д̣̇вз, д̣̇угаавасаанам̣ зганд̇и д̇ийн̣и вуд̇д̇аани хонд̇и, д̇ат̇аа агусалавасзна. аб̣яаагад̇зна аб̣яаагад̇ам̣, д̇знзва гусалам̣, агусалам̣, гусалааб̣яаагад̇ам̣ агусалааб̣яаагад̇ан̃жа; гусалааб̣яаагад̇зхи гусалам̣, аб̣яаагад̇ам̣, гусалааб̣яаагад̇ам̣; агусалааб̣яаагад̇зхи агусалам̣, аб̣яаагад̇ам̣, агусалааб̣яаагад̇анд̇и звам̣ сад̇д̇араса взд̣̇ид̇аб̣б̣аани.
269-276. Idāni yathāladdhāni vissajjanāni gaṇanavasena dassetuṃ hetuyā sattarasātiādimāha. Tattha hetuyā sattarasāti kusalena kusalaṃ, kusalena abyākataṃ, kusalena kusalābyākatanti evaṃ kusalavasena ekādikāni ekāvasānāni dve, dukāvasānaṃ ekanti tīṇi vuttāni honti, tathā akusalavasena. Abyākatena abyākataṃ, teneva kusalaṃ, akusalaṃ, kusalābyākataṃ akusalābyākatañca; kusalābyākatehi kusalaṃ, abyākataṃ, kusalābyākataṃ; akusalābyākatehi akusalaṃ, abyākataṃ, akusalābyākatanti evaṃ sattarasa veditabbāni.
аарамман̣з сад̇д̇аад̇и гусалзна гусалам̣; агусалзна агусалам̣, аб̣яаагад̇зна аб̣яаагад̇ам̣, гусалам̣, агусалам̣; гусалааб̣яаагад̇зна гусалам̣; агусалааб̣яаагад̇зна агусаланд̇и звам̣ сад̇д̇а.
Ārammaṇesattāti kusalena kusalaṃ; akusalena akusalaṃ, abyākatena abyākataṃ, kusalaṃ, akusalaṃ; kusalābyākatena kusalaṃ; akusalābyākatena akusalanti evaṃ satta.
вибаагз зганд̇и аб̣яаагад̇зна аб̣яаагад̇амзва. звамзд̇т̇а сад̇д̇араса, сад̇д̇а, зганд̇и д̇аяо ваарабарижчзд̣̇аа хонд̇и. д̇зсу д̣̇ваад̣̇аса сад̇д̇арасагаа, д̣̇аса сад̇д̇агаа, згам̣ згаганд̇и д̇з саб̣б̣з саад̇хугам̣ саллагкзд̇ваа барад̇о д̣̇угад̇игаад̣̇ивасзна бажжаяасам̣санд̣̇анз уунад̇араг̇ан̣анасса васзна г̇ан̣анаа взд̣̇ид̇аб̣б̣аа. саггаа хи имааяа г̇ан̣анааяа д̣̇угамуулаад̣̇ийсу ваарабарижчзд̣̇з ж̇аанид̇унд̇и буна ‘‘гусалам̣ д̇хаммам̣ бажжаяаа гусало д̇хаммо’’д̇и анаамасид̇ваа г̇ан̣анавасзнзва ваарабарижчзд̣̇ам̣ д̣̇ассзд̇ум̣ хзд̇убажжаяаа аарамман̣з сад̇д̇аад̇иаад̣̇и аарад̣̇д̇хам̣.
Vipākeekanti abyākatena abyākatameva. Evamettha sattarasa, satta, ekanti tayo vāraparicchedā honti. Tesu dvādasa sattarasakā, dasa sattakā, ekaṃ ekakanti te sabbe sādhukaṃ sallakkhetvā parato dukatikādivasena paccayasaṃsandane ūnataragaṇanassa vasena gaṇanā veditabbā. Sakkā hi imāya gaṇanāya dukamūlādīsu vāraparicchede jānitunti puna ‘‘kusalaṃ dhammaṃ paccayā kusalo dhammo’’ti anāmasitvā gaṇanavaseneva vāraparicchedaṃ dassetuṃ hetupaccayā ārammaṇe sattātiādi āraddhaṃ.
д̇ад̇т̇а гусалам̣ д̇хаммам̣ бажжаяаа гусало д̇хаммо уббаж̇ж̇ад̇и хзд̇убажжаяаа аарамман̣абажжаяаа. гусалам̣ згам̣ канд̇хам̣ бажжаяаа д̇аяо канд̇хаад̇и иминаа наязна аарамман̣з лад̣̇д̇хависсаж̇ж̇анаани вид̇т̇аарзд̇аб̣б̣аани. аяам̣ д̇аава ануломз наяо.
Tattha kusalaṃ dhammaṃ paccayā kusalo dhammo uppajjati hetupaccayā ārammaṇapaccayā. Kusalaṃ ekaṃ khandhaṃ paccayā tayo khandhāti iminā nayena ārammaṇe laddhavissajjanāni vitthāretabbāni. Ayaṃ tāva anulome nayo.
277-285. бажжанийяз бана гусалам̣ на лаб̣бхад̇ийд̇и агусалам̣ д̇хаммам̣ бажжаяаад̇и агусаламзва аад̣̇им̣ гад̇ваа виссаж̇ж̇анам̣ аарад̣̇д̇хам̣. д̇ам̣ яат̇аабаал̣имзва нияяаад̇и. яан̃хзд̇т̇а вад̇д̇аб̣б̣ам̣ сияаа, д̇ам̣ бадижжаваарасса бажжанийяз вуд̇д̇амзва.
277-285. Paccanīye pana kusalaṃ na labbhatīti akusalaṃ dhammaṃ paccayāti akusalameva ādiṃ katvā vissajjanaṃ āraddhaṃ. Taṃ yathāpāḷimeva niyyāti. Yañhettha vattabbaṃ siyā, taṃ paṭiccavārassa paccanīye vuttameva.
286-287. яам̣ банзд̇ам̣ бажжанийяз лад̣̇д̇хависсаж̇ж̇анабарижчзд̣̇ам̣ г̇ан̣анад̇о д̣̇ассзд̇ум̣ нахзд̇уяаа жад̇д̇аарийд̇иаад̣̇и вуд̇д̇ам̣, д̇ад̇т̇а жад̇д̇аари, сад̇д̇араса, сад̇д̇а, бан̃жа, д̇ийн̣и, зганд̇и ча барижчзд̣̇аа. д̇зсам̣ васзна д̣̇угад̇игаад̣̇ийсу бажжаяасам̣санд̣̇анз г̇ан̣анаа взд̣̇ид̇аб̣б̣аа. яо хи бажжаяо сад̇д̇араса виссаж̇ж̇анаани лабхад̇и, д̇зна сад̣̇д̇хим̣ сад̣̇исасам̣санд̣̇анз сад̇д̇араса, уунад̇арасам̣санд̣̇анз сзсаа чаби барижчзд̣̇аа лаб̣бханд̇и. звам̣ сзсзсуби ад̇хигабарижчзд̣̇ам̣ табзд̇ваа самасамаа уунад̇араа жа лаб̣бханд̇ийд̇и.
286-287. Yaṃ panetaṃ paccanīye laddhavissajjanaparicchedaṃ gaṇanato dassetuṃ nahetuyā cattārītiādi vuttaṃ, tattha cattāri, sattarasa, satta, pañca, tīṇi, ekanti cha paricchedā. Tesaṃ vasena dukatikādīsu paccayasaṃsandane gaṇanā veditabbā. Yo hi paccayo sattarasa vissajjanāni labhati, tena saddhiṃ sadisasaṃsandane sattarasa, ūnatarasaṃsandane sesā chapi paricchedā labbhanti. Evaṃ sesesupi adhikaparicchedaṃ ṭhapetvā samasamā ūnatarā ca labbhantīti.
зд̇т̇а жа ад̇хигад̇араа на лаб̣бханд̇ийд̇и аяамзд̇т̇а нияамо. самасамаа бана уунад̇араа жа ад̇т̇аа вирод̇хз сад̇и лаб̣бханд̇и. д̇знзд̇т̇а ‘‘нахзд̇убажжаяаа наарамман̣з зга’’нд̇иаад̣̇и вуд̇д̇ам̣. зд̇т̇а хи нахзд̇уяаа жад̇уннам̣, наарамман̣з бан̃жаннам̣ ааг̇ад̇ад̇д̇аа нахзд̇увасзна жад̇д̇аарийд̇и вад̇д̇аб̣б̣ам̣ сияаа, наарамман̣зна сад̣̇д̇хим̣ гхадид̇ад̇д̇аа бана аарамман̣ад̇хаммо вируж̇жхад̇ийд̇и агусалам̣ д̇хаммам̣ бажжаяаа агусало д̇хаммо, аб̣яаагад̇ам̣ д̇хаммам̣ бажжаяаа агусало, агусалан̃жа аб̣яаагад̇ан̃жа д̇хаммам̣ бажжаяаа агусалод̇и д̇ийн̣и виссаж̇ж̇анаани барихийнаани. аб̣яаагад̇ам̣ д̇хаммам̣ бажжаяаа аб̣яаагад̇од̇и руубавасзна згамзва вуд̇д̇ам̣. звам̣ саб̣б̣ад̇т̇а вируд̣̇д̇хаавируд̣̇д̇хам̣ н̃ад̇ваа лаб̣бхамаанабарижчзд̣̇о взд̣̇ид̇аб̣б̣о. абижзд̇т̇а ид̣̇ам̣ наяамад̇д̇ад̣̇ассанам̣. наад̇хибад̇ияаа жад̇д̇аарийд̇и нахзд̇уяаа лад̣̇д̇хаанзва. сзсажад̇уггзсуби зсзва наяо.
Ettha ca adhikatarā na labbhantīti ayamettha niyamo. Samasamā pana ūnatarā ca atthā virodhe sati labbhanti. Tenettha ‘‘nahetupaccayā nārammaṇe eka’’ntiādi vuttaṃ. Ettha hi nahetuyā catunnaṃ, nārammaṇe pañcannaṃ āgatattā nahetuvasena cattārīti vattabbaṃ siyā, nārammaṇena saddhiṃ ghaṭitattā pana ārammaṇadhammo virujjhatīti akusalaṃ dhammaṃ paccayā akusalo dhammo, abyākataṃ dhammaṃ paccayā akusalo, akusalañca abyākatañca dhammaṃ paccayā akusaloti tīṇi vissajjanāni parihīnāni. Abyākataṃ dhammaṃ paccayā abyākatoti rūpavasena ekameva vuttaṃ. Evaṃ sabbattha viruddhāviruddhaṃ ñatvā labbhamānaparicchedo veditabbo. Apicettha idaṃ nayamattadassanaṃ. Nādhipatiyā cattārīti nahetuyā laddhāneva. Sesacatukkesupi eseva nayo.
наананд̇арз зганд̇и ахзд̇угажид̇д̇асамудтаанасса жзва сзсаруубасса жа васзна аб̣яаагад̇зна аб̣яаагад̇ам̣. звам̣ саб̣б̣зсу згагзсу яуж̇ж̇амаанагаруубам̣ ж̇аанид̇аб̣б̣ам̣. набурзж̇аад̇з д̣̇взд̇и ид̇хааби нахзд̇увасзна жад̇д̇аарийд̇и вад̇д̇аб̣б̣ам̣ сияаа, набурзж̇аад̇зна сад̣̇д̇хим̣ гхадид̇ад̇д̇аа бана аб̣яаагад̇ам̣ д̇хаммам̣ бажжаяаа агусало, агусалан̃жа аб̣яаагад̇ан̃жа д̇хаммам̣ бажжаяаа агусалод̇и вад̇т̇убурзж̇аад̇авасзна д̣̇вз виссаж̇ж̇анаани барихийнаани. ааруббз бана ахзд̇угамохасса ахзд̇угагирияасса жа васзна д̣̇вз вуд̇д̇аани. навиббаяуд̇д̇з д̣̇взд̇и ааруббз ахзд̇угаагусалагирияавасзна д̣̇вз. нонад̇т̇и новиг̇ад̇зсу зганд̇и саб̣б̣асса руубасса васзна аб̣яаагад̇зна аб̣яаагад̇ам̣ д̣̇адтаб̣б̣ам̣. д̇игаад̣̇ийсу абуб̣б̣ам̣ над̇т̇и.
Nānantare ekanti ahetukacittasamuṭṭhānassa ceva sesarūpassa ca vasena abyākatena abyākataṃ. Evaṃ sabbesu ekakesu yujjamānakarūpaṃ jānitabbaṃ. Napurejāte dveti idhāpi nahetuvasena cattārīti vattabbaṃ siyā, napurejātena saddhiṃ ghaṭitattā pana abyākataṃ dhammaṃ paccayā akusalo, akusalañca abyākatañca dhammaṃ paccayā akusaloti vatthupurejātavasena dve vissajjanāni parihīnāni. Āruppe pana ahetukamohassa ahetukakiriyassa ca vasena dve vuttāni. Navippayutte dveti āruppe ahetukākusalakiriyavasena dve. Nonatthi novigatesu ekanti sabbassa rūpassa vasena abyākatena abyākataṃ daṭṭhabbaṃ. Tikādīsu apubbaṃ natthi.
288. наарамман̣амуулагз бана наад̇хибад̇ияаа бан̃жаад̇и наарамман̣з лад̣̇д̇хаанзва. нагаммз зганд̇и зд̇т̇а жид̇д̇асамудтаанан̃жа гадад̇д̇ааруубан̃жа аг̇г̇ахзд̇ваа сзсаруубавасзна аб̣яаагад̇зна аб̣яаагад̇ам̣ взд̣̇ид̇аб̣б̣ам̣.
288. Nārammaṇamūlake pana naadhipatiyā pañcāti nārammaṇe laddhāneva. Nakamme ekanti ettha cittasamuṭṭhānañca kaṭattārūpañca aggahetvā sesarūpavasena abyākatena abyākataṃ veditabbaṃ.
289-296. наад̇хибад̇имуулагз набурзж̇аад̇з сад̇д̇аад̇и набурзж̇аад̇з лад̣̇д̇хаанзва. набажчааж̇аад̇з сад̇д̇арасаад̇и имааниби д̇ад̇т̇а лад̣̇д̇хаани сад̇д̇арасзва. наананд̇аранасамананд̇аранаан̃н̃аман̃н̃анаубаниссаяанасамбаяуд̇д̇анонад̇т̇иновиг̇ад̇амуулагаани наарамман̣амуулагасад̣̇исаанзва. иминаава наяамад̇д̇ад̣̇ассанзна саб̣б̣ад̇т̇а ааг̇ад̇аанааг̇ад̇ам̣ лаб̣бхамаанаалаб̣бхамаанан̃жа взд̣̇ид̇аб̣б̣анд̇и.
289-296. Nādhipatimūlake napurejāte sattāti napurejāte laddhāneva. Napacchājāte sattarasāti imānipi tattha laddhāni sattaraseva. Nānantaranasamanantaranaaññamaññanaupanissayanasampayuttanonatthinovigatamūlakāni nārammaṇamūlakasadisāneva. Imināva nayamattadassanena sabbattha āgatānāgataṃ labbhamānālabbhamānañca veditabbanti.
бажжанийяаван̣н̣анаа нидтид̇аа.
Paccanīyavaṇṇanā niṭṭhitā.
297-328. иминааязва бана лагкан̣зна ануломам̣ бурад̇о гад̇ваа ануломабажжанийяз бажжанийяам̣ бурад̇о гад̇ваа бажжанийяаануломз жа г̇ан̣анабарижчзд̣̇о ааг̇ад̇аанааг̇ад̇ам̣ лаб̣бхамаанаалаб̣бхамаанан̃жа взд̣̇ид̇аб̣б̣анд̇и.
297-328. Imināyeva pana lakkhaṇena anulomaṃ purato katvā anulomapaccanīye paccanīyaṃ purato katvā paccanīyānulome ca gaṇanaparicchedo āgatānāgataṃ labbhamānālabbhamānañca veditabbanti.
бажжаяаваараван̣н̣анаа нидтид̇аа.
Paccayavāravaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / бадтаанабаал̣и • Paṭṭhānapāḷi / 1. гусалад̇д̇игам̣ • 1. Kusalattikaṃ
