| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
абхид̇хаммабидагз
Abhidhammapiṭake
бадтаанаббагаран̣а-адтагат̇аа
Paṭṭhānappakaraṇa-aṭṭhakathā
д̣̇зваад̇ид̣̇зво д̣̇зваанам̣, д̣̇звад̣̇аанавабууж̇ид̇о,
Devātidevo devānaṃ, devadānavapūjito,
д̣̇зсаяид̇ваа багаран̣ам̣, яамагам̣ суд̣̇д̇хасам̣яамо.
Desayitvā pakaraṇaṃ, yamakaṃ suddhasaṃyamo.
ад̇т̇ад̇о д̇хаммад̇о жзва, г̇амбхийрассаат̇а д̇асса яам̣,
Atthato dhammato ceva, gambhīrassātha tassa yaṃ,
ананд̇арам̣ махаавийро, сад̇д̇амам̣ исисад̇д̇амо.
Anantaraṃ mahāvīro, sattamaṃ isisattamo.
бадтаанам̣ наама наамзна, наамаруубанирод̇хано,
Paṭṭhānaṃ nāma nāmena, nāmarūpanirodhano,
д̣̇зсзси ад̇иг̇амбхийра-наяаман̣д̣ид̇ад̣̇зсанам̣.
Desesi atigambhīra-nayamaṇḍitadesanaṃ.
ид̣̇аани д̇асса самбад̇д̇о, яасмаа сам̣ван̣н̣анааггамо,
Idāni tassa sampatto, yasmā saṃvaṇṇanākkamo,
д̇асмаа нам̣ ван̣н̣аяиссаами, д̇ам̣ сун̣аат̇а самаахид̇аад̇и.
Tasmā naṃ vaṇṇayissāmi, taṃ suṇātha samāhitāti.
бажжаяуд̣̇д̣̇зсаван̣н̣анаа
Paccayuddesavaṇṇanā
саммаасамб̣уд̣̇д̇хзна хи ануломабадтаанз д̣̇ваавийсад̇и д̇игз ниссааяа д̇игабадтаанам̣ наама нид̣̇д̣̇идтам̣, сад̇ам̣ д̣̇угз ниссааяа д̣̇угабадтаанам̣ наама нид̣̇д̣̇идтам̣. д̇ад̇о барам̣ д̣̇ваавийсад̇и д̇игз г̇ахзд̇ваа д̣̇угасад̇з багкибид̇ваа д̣̇угад̇игабадтаанам̣ наама д̣̇ассид̇ам̣. д̇ад̇о барам̣ д̣̇угасад̇ам̣ г̇ахзд̇ваа д̣̇ваавийсад̇ияаа д̇игзсу багкибид̇ваа д̇игад̣̇угабадтаанам̣ наама д̣̇ассид̇ам̣. д̇игз бана д̇игзсуязва багкибид̇ваа д̇игад̇игабадтаанам̣ наама д̣̇ассид̇ам̣. д̣̇угз жа д̣̇угзсуязва багкибид̇ваа д̣̇угад̣̇угабадтаанам̣ наама д̣̇ассид̇ам̣. звам̣ –
Sammāsambuddhena hi anulomapaṭṭhāne dvāvīsati tike nissāya tikapaṭṭhānaṃ nāma niddiṭṭhaṃ, sataṃ duke nissāya dukapaṭṭhānaṃ nāma niddiṭṭhaṃ. Tato paraṃ dvāvīsati tike gahetvā dukasate pakkhipitvā dukatikapaṭṭhānaṃ nāma dassitaṃ. Tato paraṃ dukasataṃ gahetvā dvāvīsatiyā tikesu pakkhipitvā tikadukapaṭṭhānaṃ nāma dassitaṃ. Tike pana tikesuyeva pakkhipitvā tikatikapaṭṭhānaṃ nāma dassitaṃ. Duke ca dukesuyeva pakkhipitvā dukadukapaṭṭhānaṃ nāma dassitaṃ. Evaṃ –
д̇иган̃жа бадтаанаварам̣ д̣̇угуд̇д̇амам̣,
Tikañca paṭṭhānavaraṃ dukuttamaṃ,
д̣̇угам̣ д̇иган̃жзва д̇игам̣ д̣̇уган̃жа;
Dukaṃ tikañceva tikaṃ dukañca;
д̇игам̣ д̇иган̃жзва д̣̇угам̣ д̣̇уган̃жа,
Tikaṃ tikañceva dukaṃ dukañca,
ча ануломамхи наяаа суг̇амбхийраад̇и.
Cha anulomamhi nayā sugambhīrāti.
бажжанийяабадтаанзби д̣̇ваавийсад̇и д̇игз ниссааяа д̇игабадтаанам̣ наама. д̣̇угасад̇ам̣ ниссааяа д̣̇угабадтаанам̣ наама. д̣̇ваавийсад̇и д̇игз д̣̇угасад̇з багкибид̇ваа д̣̇угад̇игабадтаанам̣ наама. д̣̇угасад̇ам̣ д̣̇ваавийсад̇ияаа д̇игзсу багкибид̇ваа д̇игад̣̇угабадтаанам̣ наама. д̇игз д̇игзсуязва багкибид̇ваа д̇игад̇игабадтаанам̣ наама. д̣̇угз д̣̇угзсуязва багкибид̇ваа д̣̇угад̣̇угабадтаанам̣ наамаад̇и звам̣ бажжанийязби чахи наязхи бадтаанам̣ нид̣̇д̣̇идтам̣. д̇зна вуд̇д̇ам̣ –
Paccanīyapaṭṭhānepi dvāvīsati tike nissāya tikapaṭṭhānaṃ nāma. Dukasataṃ nissāya dukapaṭṭhānaṃ nāma. Dvāvīsati tike dukasate pakkhipitvā dukatikapaṭṭhānaṃ nāma. Dukasataṃ dvāvīsatiyā tikesu pakkhipitvā tikadukapaṭṭhānaṃ nāma. Tike tikesuyeva pakkhipitvā tikatikapaṭṭhānaṃ nāma. Duke dukesuyeva pakkhipitvā dukadukapaṭṭhānaṃ nāmāti evaṃ paccanīyepi chahi nayehi paṭṭhānaṃ niddiṭṭhaṃ. Tena vuttaṃ –
‘‘д̇иган̃жа бадтаанаварам̣ д̣̇угуд̇д̇амам̣,
‘‘Tikañca paṭṭhānavaraṃ dukuttamaṃ,
д̣̇угам̣ д̇иган̃жзва д̇игам̣ д̣̇уган̃жа;
Dukaṃ tikañceva tikaṃ dukañca;
д̇игам̣ д̇иган̃жзва д̣̇угам̣ д̣̇уган̃жа,
Tikaṃ tikañceva dukaṃ dukañca,
ча бажжанийяамхи наяаа суг̇амбхийраа’’д̇и.
Cha paccanīyamhi nayā sugambhīrā’’ti.
д̇ад̇о барам̣ ануломабажжанийязби зд̇знзвубааязна ча наяаа д̣̇ассид̇аа. д̇знааха –
Tato paraṃ anulomapaccanīyepi etenevupāyena cha nayā dassitā. Tenāha –
‘‘д̇иган̃жа бадтаанаварам̣ д̣̇угуд̇д̇амам̣,
‘‘Tikañca paṭṭhānavaraṃ dukuttamaṃ,
д̣̇угам̣ д̇иган̃жзва д̇игам̣ д̣̇уган̃жа;
Dukaṃ tikañceva tikaṃ dukañca;
д̇игам̣ д̇иган̃жзва д̣̇угам̣ д̣̇уган̃жа,
Tikaṃ tikañceva dukaṃ dukañca,
ча ануломабажжанийяамхи наяаа суг̇амбхийраа’’д̇и.
Cha anulomapaccanīyamhi nayā sugambhīrā’’ti.
д̇ад̣̇ананд̇арам̣ бажжанийяаануломамхи зд̇зхзва чахи наязхи нид̣̇д̣̇идтам̣. д̇знааха –
Tadanantaraṃ paccanīyānulomamhi eteheva chahi nayehi niddiṭṭhaṃ. Tenāha –
‘‘д̇иган̃жа бадтаанаварам̣ д̣̇угуд̇д̇амам̣,
‘‘Tikañca paṭṭhānavaraṃ dukuttamaṃ,
д̣̇угам̣ д̇иган̃жзва д̇игам̣ д̣̇уган̃жа;
Dukaṃ tikañceva tikaṃ dukañca;
д̇игам̣ д̇иган̃жзва д̣̇угам̣ д̣̇уган̃жа,
Tikaṃ tikañceva dukaṃ dukañca,
ча бажжанийяаануломамхи наяаа суг̇амбхийраа’’д̇и.
Cha paccanīyānulomamhi nayā sugambhīrā’’ti.
звам̣ ануломз ча бадтаанаани, бажжанийяз ча, ануломабажжанийяз ча, бажжанийяаануломз ча бадтаанаанийд̇и ид̣̇ам̣ ‘‘жад̇увийсад̇исаманд̇абадтаанасамод̇хаанабадтаанамахаабагаран̣ам̣ наамаа’’д̇и хи вуд̇д̇ам̣.
Evaṃ anulome cha paṭṭhānāni, paccanīye cha, anulomapaccanīye cha, paccanīyānulome cha paṭṭhānānīti idaṃ ‘‘catuvīsatisamantapaṭṭhānasamodhānapaṭṭhānamahāpakaraṇaṃ nāmā’’ti hi vuttaṃ.
д̇ад̇т̇а язсам̣ жад̇увийсад̇ияаа саманд̇абадтаанаанам̣ самод̇хаанавасзнзд̇ам̣ жад̇увийсад̇исаманд̇абадтаанасамод̇хаанам̣ бадтаанамахаабагаран̣ам̣ наамаад̇и вуд̇д̇ам̣, д̇зсан̃жзва имасса жа багаран̣асса наамад̇т̇о д̇аава звам̣ взд̣̇ид̇аб̣б̣о. гзнадтзна бадтаананд̇и? наанаббагаарабажжаяадтзна. ‘ба-гааро’ хи наанаббагаарад̇т̇ам̣ д̣̇ийбзд̇и, таанасад̣̇д̣̇о бажжаяад̇т̇ам̣. таанаадтаанагусалад̇аад̇иаад̣̇ийсу хи бажжаяо таананд̇и вуд̇д̇о. ид̇и наанаббагаараанам̣ бажжаяаанам̣ васзна д̣̇зсид̇ад̇д̇аа имзсу жад̇увийсад̇ияаа бадтаанзсу згзгам̣ бадтаанам̣ наама. имзсам̣ бана бадтаанаанам̣ самуухад̇о саб̣б̣амбзд̇ам̣ багаран̣ам̣ бадтаананд̇и взд̣̇ид̇аб̣б̣ам̣.
Tattha yesaṃ catuvīsatiyā samantapaṭṭhānānaṃ samodhānavasenetaṃ catuvīsatisamantapaṭṭhānasamodhānaṃ paṭṭhānamahāpakaraṇaṃ nāmāti vuttaṃ, tesañceva imassa ca pakaraṇassa nāmattho tāva evaṃ veditabbo. Kenaṭṭhena paṭṭhānanti? Nānappakārapaccayaṭṭhena. ‘Pa-kāro’ hi nānappakāratthaṃ dīpeti, ṭhānasaddo paccayatthaṃ. Ṭhānāṭṭhānakusalatātiādīsu hi paccayo ṭhānanti vutto. Iti nānappakārānaṃ paccayānaṃ vasena desitattā imesu catuvīsatiyā paṭṭhānesu ekekaṃ paṭṭhānaṃ nāma. Imesaṃ pana paṭṭhānānaṃ samūhato sabbampetaṃ pakaraṇaṃ paṭṭhānanti veditabbaṃ.
абаро наяо – гзнадтзна бадтаананд̇и? вибхаж̇анадтзна. ‘‘бан̃н̃аабанаа бадтабанаа виваран̣аа вибхаж̇анаа уд̇д̇аанийгамма’’нд̇и (ма. ни. 1.371) ааг̇ад̇адтаанасмин̃хи вибхаж̇анадтзна бадтаанам̣ бан̃н̃ааяад̇и. ид̇и гусалаад̣̇ийнам̣ д̇хаммаанам̣ хзд̇убажжаяаад̣̇ивасзна вибхад̇д̇ад̇д̇аа имзсу жад̇увийсад̇ияаа бадтаанзсу згзгам̣ бадтаанам̣ наама. имзсам̣ бана бадтаанаанам̣ самуухад̇о саб̣б̣амбзд̇ам̣ багаран̣ам̣ бадтаанам̣ наамаад̇и взд̣̇ид̇аб̣б̣ам̣.
Aparo nayo – kenaṭṭhena paṭṭhānanti? Vibhajanaṭṭhena. ‘‘Paññāpanā paṭṭhapanā vivaraṇā vibhajanā uttānīkamma’’nti (ma. ni. 1.371) āgataṭṭhānasmiñhi vibhajanaṭṭhena paṭṭhānaṃ paññāyati. Iti kusalādīnaṃ dhammānaṃ hetupaccayādivasena vibhattattā imesu catuvīsatiyā paṭṭhānesu ekekaṃ paṭṭhānaṃ nāma. Imesaṃ pana paṭṭhānānaṃ samūhato sabbampetaṃ pakaraṇaṃ paṭṭhānaṃ nāmāti veditabbaṃ.
абаро наяо – гзнадтзна бадтаананд̇и? бадтид̇ад̇т̇зна. г̇аманадтзнаад̇и ад̇т̇о. ‘‘г̇одтаа бадтид̇аг̇ааво’’д̇и (ма. ни. 1.156) ааг̇ад̇адтаанасмин̃хи язна бадтаанзна бадтид̇аг̇аавод̇и вуд̇д̇о, д̇ам̣ ад̇т̇ад̇о г̇аманам̣ ход̇и. ид̇и наад̇ивид̇т̇аарид̇анаязсу д̇хаммасан̇г̇ан̣ийаад̣̇ийсу аниссан̇г̇аг̇аманасса саб̣б̣ан̃н̃уд̇ан̃н̃аан̣асса хзд̇убажжаяаад̣̇ибхзд̣̇абхиннзсу гусалаад̣̇ийсу вид̇т̇аарид̇анаяалаабхад̇о ниссан̇г̇авасзна бавад̇д̇аг̇аманад̇д̇аа имзсу жад̇увийсад̇ияаа бадтаанзсу згзгам̣ бадтаанам̣ наама. имзсам̣ бана бадтаанаанам̣ самуухад̇о саб̣б̣амбзд̇ам̣ багаран̣ам̣ бадтаанам̣ наамаад̇и взд̣̇ид̇аб̣б̣ам̣.
Aparo nayo – kenaṭṭhena paṭṭhānanti? Paṭṭhitatthena. Gamanaṭṭhenāti attho. ‘‘Goṭṭhā paṭṭhitagāvo’’ti (ma. ni. 1.156) āgataṭṭhānasmiñhi yena paṭṭhānena paṭṭhitagāvoti vutto, taṃ atthato gamanaṃ hoti. Iti nātivitthāritanayesu dhammasaṅgaṇīādīsu anissaṅgagamanassa sabbaññutaññāṇassa hetupaccayādibhedabhinnesu kusalādīsu vitthāritanayalābhato nissaṅgavasena pavattagamanattā imesu catuvīsatiyā paṭṭhānesu ekekaṃ paṭṭhānaṃ nāma. Imesaṃ pana paṭṭhānānaṃ samūhato sabbampetaṃ pakaraṇaṃ paṭṭhānaṃ nāmāti veditabbaṃ.
д̇ад̇т̇а ануломамхи д̇аава батамам̣ д̇игавасзна д̣̇зсид̇ад̇д̇аа д̇игабадтаанам̣ наама. д̇асса бад̣̇ажчзд̣̇о – д̇игаанам̣ бадтаанам̣ зд̇т̇а ад̇т̇ийд̇и д̇игабадтаанам̣. д̇игаанам̣ наанаббагаарагаа бажжаяаа зд̇иссаа д̣̇зсанааяа ад̇т̇ийд̇и ад̇т̇о. д̣̇уд̇ияавигаббзби д̇игаанам̣ бадтаананд̇взва д̇игабадтаанам̣. хзд̇убажжаяаад̣̇ивасзна д̇игаанам̣ вибхаж̇анаад̇и ад̇т̇о. д̇ад̇ияавигаббз хзд̇убажжаяаад̣̇ибхзд̣̇абхиннад̇ааяа лад̣̇д̇хавид̇т̇аараа д̇игаа зва бадтаанам̣ д̇игабадтаанам̣. саб̣б̣ан̃н̃уд̇ан̃н̃аан̣асса ниссан̇г̇аг̇аманабхуумийд̇и ад̇т̇о. д̣̇угабадтаанаад̣̇ийсуби зсзва наяо. звам̣ ануломз чабадтаанаани вид̣̇ид̇ваа бажжанийяаад̣̇ийсуби иминаавубааязна взд̣̇ид̇аб̣б̣аани.
Tattha anulomamhi tāva paṭhamaṃ tikavasena desitattā tikapaṭṭhānaṃ nāma. Tassa padacchedo – tikānaṃ paṭṭhānaṃ ettha atthīti tikapaṭṭhānaṃ. Tikānaṃ nānappakārakā paccayā etissā desanāya atthīti attho. Dutiyavikappepi tikānaṃ paṭṭhānantveva tikapaṭṭhānaṃ. Hetupaccayādivasena tikānaṃ vibhajanāti attho. Tatiyavikappe hetupaccayādibhedabhinnatāya laddhavitthārā tikā eva paṭṭhānaṃ tikapaṭṭhānaṃ. Sabbaññutaññāṇassa nissaṅgagamanabhūmīti attho. Dukapaṭṭhānādīsupi eseva nayo. Evaṃ anulome chapaṭṭhānāni viditvā paccanīyādīsupi imināvupāyena veditabbāni.
яасмаа банзд̇аани ануломз, бажжанийяз, ануломабажжанийяз, бажжанийяаануломзд̇и саманд̇аа ча ча худ̇ваа жад̇увийсад̇и хонд̇и; д̇асмаа ‘‘жад̇увийсад̇и саманд̇абадтаанааний’’д̇и вужжанд̇и. ид̇и имзсам̣ жад̇увийсад̇ияаа куд̣̇д̣̇агабадтаанасан̇каад̇аанам̣ саманд̇абадтаанаанам̣ самод̇хаанавасзнзд̇ам̣ жад̇увийсад̇исаманд̇абадтаанасамод̇хаанам̣ бадтаанамахаабагаран̣ам̣ наама.
Yasmā panetāni anulome, paccanīye, anulomapaccanīye, paccanīyānulometi samantā cha cha hutvā catuvīsati honti; tasmā ‘‘catuvīsati samantapaṭṭhānānī’’ti vuccanti. Iti imesaṃ catuvīsatiyā khuddakapaṭṭhānasaṅkhātānaṃ samantapaṭṭhānānaṃ samodhānavasenetaṃ catuvīsatisamantapaṭṭhānasamodhānaṃ paṭṭhānamahāpakaraṇaṃ nāma.
д̇ам̣ банзд̇ам̣ яз д̇игаад̣̇аяо ниссааяа нид̣̇д̣̇идтад̇д̇аа ‘‘д̇игабадтаанам̣ д̣̇угабадтаанам̣…бз… д̣̇угад̣̇угабадтаана’’нд̇и вуд̇д̇ам̣, д̇з анаамасид̇ваа язсам̣ бажжаяаанам̣ васзна д̇з д̇игаад̣̇аяо вибхад̇д̇аа д̇з бажжаяз д̣̇ассзд̇ум̣ аад̣̇ид̇о д̇аавасса маад̇игаанигкзбавааро наама вуд̇д̇о; бажжаяавибхан̇г̇аваарод̇иби д̇ассзва наамам̣. со уд̣̇д̣̇зсанид̣̇д̣̇зсад̇о д̣̇увид̇хо. д̇асса хзд̇убажжаяо…бз… авиг̇ад̇абажжаяод̇и аяам̣ уд̣̇д̣̇зсо.
Taṃ panetaṃ ye tikādayo nissāya niddiṭṭhattā ‘‘tikapaṭṭhānaṃ dukapaṭṭhānaṃ…pe… dukadukapaṭṭhāna’’nti vuttaṃ, te anāmasitvā yesaṃ paccayānaṃ vasena te tikādayo vibhattā te paccaye dassetuṃ ādito tāvassa mātikānikkhepavāro nāma vutto; paccayavibhaṅgavārotipi tasseva nāmaṃ. So uddesaniddesato duvidho. Tassa hetupaccayo…pe… avigatapaccayoti ayaṃ uddeso.
д̇ад̇т̇а хзд̇у жа со бажжаяо жаад̇и хзд̇убажжаяо. хзд̇у худ̇ваа бажжаяо, хзд̇убхаавзна бажжаяод̇и вуд̇д̇ам̣ ход̇и. аарамман̣абажжаяаад̣̇ийсуби зсзва наяо. д̇ад̇т̇а хзд̇ууд̇и важанааваяавагааран̣амуулаанамзд̇ам̣ ад̇хиважанам̣. ‘‘бадин̃н̃аа хзд̇уу’’д̇иаад̣̇ийсу хи логз важанааваяаво хзд̇ууд̇и, вужжад̇и. саасанз бана ‘‘яз д̇хаммаа хзд̇уббабхаваа’’д̇иаад̣̇ийсу (махаава. 60) гааран̣ам̣. ‘‘д̇аяо гусалаа хзд̇уу, д̇аяо агусалаа хзд̇уу’’д̇иаад̣̇ийсу (д̇ха. са. 1059) муулам̣ хзд̇ууд̇и вужжад̇и. д̇ам̣ ид̇ха ад̇хиббзд̇ам̣. бажжаяод̇и зд̇т̇а бана аяам̣ важанад̇т̇о – бадижжа зд̇асмаа зд̇ийд̇и бажжаяо, аббажжагкааяа нам̣ вад̇д̇ад̇ийд̇и ад̇т̇о. яо хи д̇хаммо яам̣ д̇хаммам̣ аббажжагкааяа д̇идтад̇и ваа уббаж̇ж̇ад̇и ваа, со д̇асса бажжаяод̇и вуд̇д̇ам̣ ход̇и.
Tattha hetu ca so paccayo cāti hetupaccayo. Hetu hutvā paccayo, hetubhāvena paccayoti vuttaṃ hoti. Ārammaṇapaccayādīsupi eseva nayo. Tattha hetūti vacanāvayavakāraṇamūlānametaṃ adhivacanaṃ. ‘‘Paṭiññā hetū’’tiādīsu hi loke vacanāvayavo hetūti, vuccati. Sāsane pana ‘‘ye dhammā hetuppabhavā’’tiādīsu (mahāva. 60) kāraṇaṃ. ‘‘Tayo kusalā hetū, tayo akusalā hetū’’tiādīsu (dha. sa. 1059) mūlaṃ hetūti vuccati. Taṃ idha adhippetaṃ. Paccayoti ettha pana ayaṃ vacanattho – paṭicca etasmā etīti paccayo, appaccakkhāya naṃ vattatīti attho. Yo hi dhammo yaṃ dhammaṃ appaccakkhāya tiṭṭhati vā uppajjati vā, so tassa paccayoti vuttaṃ hoti.
лагкан̣ад̇о бана убагаарагалагкан̣о бажжаяо, яо хи д̇хаммо яасса д̇хаммасса тид̇ияаа ваа уббад̇д̇ияаа ваа убагаараго ход̇и, со д̇асса бажжаяод̇и вужжад̇и. бажжаяо, хзд̇у; гааран̣ам̣ нид̣̇аанам̣ самбхаво, бабхавод̇и ад̇т̇ад̇о згам̣, б̣яан̃ж̇анад̇о наанам̣. ид̇и мууладтзна хзд̇у, убагаарагадтзна бажжаяод̇и сан̇кзбад̇о мууладтзна убагаараго д̇хаммо хзд̇убажжаяо. со хи саалиаад̣̇ийнам̣ саалиб̣ийж̇аад̣̇ийни вияа, ман̣иббабхаад̣̇ийнам̣ вияа жа ман̣иван̣н̣аад̣̇аяо гусалаад̣̇ийнам̣ гусалаад̣̇ибхаавасаад̇хагод̇и аажарияаанам̣ ад̇хиббааяо. звам̣ санд̇з бана д̇ам̣самудтаанаруубзсу хзд̇убажжаяад̇аа на самбаж̇ж̇ад̇и. на хи со д̇зсам̣ гусалаад̣̇ибхаавам̣ саад̇хзд̇и, на жа бажжаяо на ход̇ийд̇и. вуд̇д̇ан̃хзд̇ам̣ ‘‘хзд̇уу хзд̇усамбаяуд̇д̇агаанам̣ д̇хаммаанам̣ д̇ам̣самудтаанаанан̃жа руубаанам̣ хзд̇убажжаязна бажжаяо’’д̇и. ахзд̇угажид̇д̇аанан̃жа винаа зд̇зна аб̣яаагад̇абхааво сид̣̇д̇хо.
Lakkhaṇato pana upakārakalakkhaṇo paccayo, yo hi dhammo yassa dhammassa ṭhitiyā vā uppattiyā vā upakārako hoti, so tassa paccayoti vuccati. Paccayo, hetu; kāraṇaṃ nidānaṃ sambhavo, pabhavoti atthato ekaṃ, byañjanato nānaṃ. Iti mūlaṭṭhena hetu, upakārakaṭṭhena paccayoti saṅkhepato mūlaṭṭhena upakārako dhammo hetupaccayo. So hi sāliādīnaṃ sālibījādīni viya, maṇippabhādīnaṃ viya ca maṇivaṇṇādayo kusalādīnaṃ kusalādibhāvasādhakoti ācariyānaṃ adhippāyo. Evaṃ sante pana taṃsamuṭṭhānarūpesu hetupaccayatā na sampajjati. Na hi so tesaṃ kusalādibhāvaṃ sādheti, na ca paccayo na hotīti. Vuttañhetaṃ ‘‘hetū hetusampayuttakānaṃ dhammānaṃ taṃsamuṭṭhānānañca rūpānaṃ hetupaccayena paccayo’’ti. Ahetukacittānañca vinā etena abyākatabhāvo siddho.
сахзд̇угаанамби жа яонисоманасигаараад̣̇ибадиб̣ад̣̇д̇хо гусалаад̣̇ибхааво на самбаяуд̇д̇ахзд̇убадиб̣ад̣̇д̇хо. яад̣̇и жа самбаяуд̇д̇ахзд̇уусу сабхаавад̇ова гусалаад̣̇ибхааво сияаа, д̇ам̣самбаяуд̇д̇зсу хзд̇убадиб̣ад̣̇д̇хо алобхо гусало ваа сияаа аб̣яаагад̇о ваа. яасмаа бана убхаяат̇ааби ход̇и, д̇асмаа яат̇аа самбаяуд̇д̇зсу, звам̣ хзд̇уусуби гусалаад̣̇ид̇аа бариязсид̇аб̣б̣аа. гусалаад̣̇ибхаавасаад̇ханавасзна бана хзд̇уунам̣ мууладтам̣ аг̇г̇ахзд̇ваа суббад̇идтид̇абхаавасаад̇ханавасзна г̇аяхамаанз на гин̃жи вируж̇жхад̇и. лад̣̇д̇хахзд̇убажжаяаа хи д̇хаммаа вирул̣хамуулаа вияа баад̣̇абаа т̇ираа хонд̇и суббад̇идтид̇аа, ахзд̇угаа бана д̇илаб̣ийж̇агаад̣̇исзваалаа вияа на суббад̇идтид̇аа. ид̇и мууладтзна убагаарагод̇и суббад̇идтид̇абхаавасаад̇ханзна убагаараго д̇хаммо хзд̇убажжаяод̇и взд̣̇ид̇аб̣б̣о.
Sahetukānampi ca yonisomanasikārādipaṭibaddho kusalādibhāvo na sampayuttahetupaṭibaddho. Yadi ca sampayuttahetūsu sabhāvatova kusalādibhāvo siyā, taṃsampayuttesu hetupaṭibaddho alobho kusalo vā siyā abyākato vā. Yasmā pana ubhayathāpi hoti, tasmā yathā sampayuttesu, evaṃ hetūsupi kusalāditā pariyesitabbā. Kusalādibhāvasādhanavasena pana hetūnaṃ mūlaṭṭhaṃ aggahetvā suppatiṭṭhitabhāvasādhanavasena gayhamāne na kiñci virujjhati. Laddhahetupaccayā hi dhammā viruḷhamūlā viya pādapā thirā honti suppatiṭṭhitā, ahetukā pana tilabījakādisevālā viya na suppatiṭṭhitā. Iti mūlaṭṭhena upakārakoti suppatiṭṭhitabhāvasādhanena upakārako dhammo hetupaccayoti veditabbo.
д̇ад̇о барзсу аарамман̣авасзна убагаараго д̇хаммо аарамман̣абажжаяо. со ‘‘руубааяад̇анам̣ жагкувин̃н̃аан̣ад̇хаад̇уяаа’’д̇и аарабхид̇вааби ‘‘яам̣ яам̣ д̇хаммам̣ аараб̣бха яз яз д̇хаммаа уббаж̇ж̇анд̇и жид̇д̇ажзд̇асигаа д̇хаммаа, д̇з д̇з д̇хаммаа д̇зсам̣ д̇зсам̣ д̇хаммаанам̣ аарамман̣абажжаязна бажжаяо’’д̇и осаабид̇ад̇д̇аа на гожи д̇хаммо на ход̇и. яат̇аа хи д̣̇уб̣б̣ало бурисо д̣̇ан̣д̣ам̣ ваа раж̇ж̇ум̣ ваа ааламб̣ид̇ваава удтахад̇и жзва д̇идтад̇и жа, звам̣ жид̇д̇ажзд̇асигаа д̇хаммаа руубаад̣̇иаарамман̣ам̣ аараб̣бхзва уббаж̇ж̇анд̇и жзва д̇идтанд̇и жа. д̇асмаа саб̣б̣зби жид̇д̇ажзд̇асигаанам̣ д̇хаммаанам̣ аарамман̣абхууд̇аа д̇хаммаа аарамман̣абажжаяод̇и взд̣̇ид̇аб̣б̣аа.
Tato paresu ārammaṇavasena upakārako dhammo ārammaṇapaccayo. So ‘‘rūpāyatanaṃ cakkhuviññāṇadhātuyā’’ti ārabhitvāpi ‘‘yaṃ yaṃ dhammaṃ ārabbha ye ye dhammā uppajjanti cittacetasikā dhammā, te te dhammā tesaṃ tesaṃ dhammānaṃ ārammaṇapaccayena paccayo’’ti osāpitattā na koci dhammo na hoti. Yathā hi dubbalo puriso daṇḍaṃ vā rajjuṃ vā ālambitvāva uṭṭhahati ceva tiṭṭhati ca, evaṃ cittacetasikā dhammā rūpādiārammaṇaṃ ārabbheva uppajjanti ceva tiṭṭhanti ca. Tasmā sabbepi cittacetasikānaṃ dhammānaṃ ārammaṇabhūtā dhammā ārammaṇapaccayoti veditabbā.
ж̇здтагадтзна убагаараго д̇хаммо ад̇хибад̇ибажжаяо. со сахаж̇аад̇аарамман̣авасзна д̣̇увид̇хо. д̇ад̇т̇а ‘‘чанд̣̇аад̇хибад̇и чанд̣̇асамбаяуд̇д̇агаанам̣ д̇хаммаанам̣ д̇ам̣самудтаанаанан̃жа руубаанам̣ ад̇хибад̇ибажжаязна бажжаяо’’д̇иаад̣̇иважанад̇о чанд̣̇авийрияажид̇д̇авиймам̣сасан̇каад̇аа жад̇д̇ааро д̇хаммаа сахаж̇аад̇аад̇хибад̇ибажжаяод̇и взд̣̇ид̇аб̣б̣аа, но жа ко згад̇о. яад̣̇аа хи чанд̣̇ам̣ д̇хурам̣ ж̇здтагам̣ гад̇ваа жид̇д̇ам̣ бавад̇д̇ад̇и, д̇ад̣̇аа чанд̣̇ова ад̇хибад̇и, на ид̇арз. зса наяо сзсзсуби. яам̣ бана д̇хаммам̣ г̇арум̣ гад̇ваа аруубад̇хаммаа бавад̇д̇анд̇и, со нзсам̣ аарамман̣аад̇хибад̇и. д̇зна вуд̇д̇ам̣ – ‘‘яам̣ яам̣ д̇хаммам̣ г̇арум̣ гад̇ваа яз яз д̇хаммаа уббаж̇ж̇анд̇и жид̇д̇ажзд̇асигаа д̇хаммаа, д̇з д̇з д̇хаммаа д̇зсам̣ д̇зсам̣ д̇хаммаанам̣ ад̇хибад̇ибажжаязна бажжаяо’’д̇и.
Jeṭṭhakaṭṭhena upakārako dhammo adhipatipaccayo. So sahajātārammaṇavasena duvidho. Tattha ‘‘chandādhipati chandasampayuttakānaṃ dhammānaṃ taṃsamuṭṭhānānañca rūpānaṃ adhipatipaccayena paccayo’’tiādivacanato chandavīriyacittavīmaṃsasaṅkhātā cattāro dhammā sahajātādhipatipaccayoti veditabbā, no ca kho ekato. Yadā hi chandaṃ dhuraṃ jeṭṭhakaṃ katvā cittaṃ pavattati, tadā chandova adhipati, na itare. Esa nayo sesesupi. Yaṃ pana dhammaṃ garuṃ katvā arūpadhammā pavattanti, so nesaṃ ārammaṇādhipati. Tena vuttaṃ – ‘‘yaṃ yaṃ dhammaṃ garuṃ katvā ye ye dhammā uppajjanti cittacetasikā dhammā, te te dhammā tesaṃ tesaṃ dhammānaṃ adhipatipaccayena paccayo’’ti.
ананд̇арабхаавзна убагаараго д̇хаммо ананд̇арабажжаяо. самананд̇арабхаавзна убагаараго д̇хаммо самананд̇арабажжаяо. ид̣̇ан̃жа бажжаяад̣̇ваяам̣ б̣ахуд̇хаа бабан̃жаяанд̇и. аяам̣ банзд̇т̇а сааро – яо хи зса жагкувин̃н̃аан̣аананд̇араа манод̇хаад̇у, манод̇хаад̇уананд̇араа мановин̃н̃аан̣ад̇хаад̇ууд̇иаад̣̇и жид̇д̇анияамо, со яасмаа буримажид̇д̇авасзнзва иж̇жхад̇и, на ан̃н̃ат̇аа. д̇асмаа ад̇д̇ано ад̇д̇ано ананд̇арам̣ ануруубасса жид̇д̇уббаад̣̇асса уббаад̣̇анасамад̇т̇ова д̇хаммо ананд̇арабажжаяо. д̇знзвааха – ‘‘ананд̇арабажжаяод̇и жагкувин̃н̃аан̣ад̇хаад̇у д̇ам̣самбаяуд̇д̇агаа жа д̇хаммаа манод̇хаад̇уяаа д̇ам̣самбаяуд̇д̇агаанан̃жа д̇хаммаанам̣ ананд̇арабажжаязна бажжаяо’’д̇иаад̣̇и.
Anantarabhāvena upakārako dhammo anantarapaccayo. Samanantarabhāvena upakārako dhammo samanantarapaccayo. Idañca paccayadvayaṃ bahudhā papañcayanti. Ayaṃ panettha sāro – yo hi esa cakkhuviññāṇānantarā manodhātu, manodhātuanantarā manoviññāṇadhātūtiādi cittaniyamo, so yasmā purimacittavaseneva ijjhati, na aññathā. Tasmā attano attano anantaraṃ anurūpassa cittuppādassa uppādanasamatthova dhammo anantarapaccayo. Tenevāha – ‘‘anantarapaccayoti cakkhuviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ anantarapaccayena paccayo’’tiādi.
яо ананд̇арабажжаяо, свзва самананд̇арабажжаяо. б̣яан̃ж̇анамад̇д̇амзва хзд̇т̇а наанам̣, убажаяасанд̇ад̇иаад̣̇ийсу вияа, ад̇хиважананируд̇д̇ид̣̇угаад̣̇ийсу вияа жа, ад̇т̇ад̇о бана наанам̣ над̇т̇и. яамби ‘‘ад̣̇д̇хаананд̇арад̇ааяа ананд̇арабажжаяо, гаалаананд̇арад̇ааяа самананд̇арабажжаяо’’д̇и аажарияаанам̣ мад̇ам̣ , д̇ам̣ ‘‘нирод̇хаа вудтаханд̇асса нзвасан̃н̃аанаасан̃н̃ааяад̇анагусалам̣ паласамаабад̇д̇ияаа самананд̇арабажжаязна бажжаяо’’д̇иаад̣̇ийхи вируж̇жхад̇и. яамби д̇ад̇т̇а вад̣̇анд̇и – ‘‘д̇хаммаанам̣ самудтаабанасамад̇т̇ад̇аа на барихааяад̇и, бхааванааб̣алзна бана ваарид̇ад̇д̇аа д̇хаммаа самананд̇арам̣ нуббаж̇ж̇анд̇ий’’д̇и, д̇амби гаалаананд̇арад̇ааяа абхаавамзва саад̇хзд̇и. бхааванааб̣алзна хи д̇ад̇т̇а гаалаананд̇арад̇аа над̇т̇ийд̇и, маяамби зд̇ад̣̇зва вад̣̇аама. яасмаа жа гаалаананд̇арад̇аа над̇т̇и, д̇асмаа самананд̇арабажжаяад̇аа на яуж̇ж̇ад̇и. гаалаананд̇арад̇ааяа хи д̇зсам̣ самананд̇арабажжаяо ход̇ийд̇и лад̣̇д̇хи. д̇асмаа абхинивзсам̣ агад̇ваа б̣яан̃ж̇анамад̇д̇ад̇овзд̇т̇а наанаагаран̣ам̣ бажжзд̇аб̣б̣ам̣, на ад̇т̇ад̇о. гат̇ам̣? над̇т̇и зд̇зсам̣ анд̇аранд̇и хи ананд̇араа. сан̣таанаабхаавад̇о судту ананд̇араад̇и самананд̇араа.
Yo anantarapaccayo, sveva samanantarapaccayo. Byañjanamattameva hettha nānaṃ, upacayasantatiādīsu viya, adhivacananiruttidukādīsu viya ca, atthato pana nānaṃ natthi. Yampi ‘‘addhānantaratāya anantarapaccayo, kālānantaratāya samanantarapaccayo’’ti ācariyānaṃ mataṃ , taṃ ‘‘nirodhā vuṭṭhahantassa nevasaññānāsaññāyatanakusalaṃ phalasamāpattiyā samanantarapaccayena paccayo’’tiādīhi virujjhati. Yampi tattha vadanti – ‘‘dhammānaṃ samuṭṭhāpanasamatthatā na parihāyati, bhāvanābalena pana vāritattā dhammā samanantaraṃ nuppajjantī’’ti, tampi kālānantaratāya abhāvameva sādheti. Bhāvanābalena hi tattha kālānantaratā natthīti, mayampi etadeva vadāma. Yasmā ca kālānantaratā natthi, tasmā samanantarapaccayatā na yujjati. Kālānantaratāya hi tesaṃ samanantarapaccayo hotīti laddhi. Tasmā abhinivesaṃ akatvā byañjanamattatovettha nānākaraṇaṃ paccetabbaṃ, na atthato. Kathaṃ? Natthi etesaṃ antaranti hi anantarā. Saṇṭhānābhāvato suṭṭhu anantarāti samanantarā.
уббаж̇ж̇амаано саха уббаж̇ж̇амаанабхаавзна убагаараго д̇хаммо сахаж̇аад̇абажжаяо, багаасасса бад̣̇ийбо вияа. со аруубагканд̇хаад̣̇ивасзна чаб̣б̣ид̇хо ход̇и. яат̇ааха – жад̇д̇ааро канд̇хаа аруубино ан̃н̃аман̃н̃ам̣ сахаж̇аад̇абажжаязна бажжаяо. жад̇д̇ааро махаабхууд̇аа ан̃н̃аман̃н̃ам̣…бз… огганд̇игкан̣з наамаруубам̣ ан̃н̃аман̃н̃ам̣…бз… жид̇д̇ажзд̇асигаа д̇хаммаа жид̇д̇асамудтаанаанам̣ руубаанам̣…бз… махаабхууд̇аа убаад̣̇ааруубаанам̣…бз… руубино д̇хаммаа аруубийнам̣ д̇хаммаанам̣ гин̃жигаалз сахаж̇аад̇абажжаязна бажжаяо; гин̃жи гаалз на сахаж̇аад̇абажжаязна бажжаяод̇и. ид̣̇ам̣ хад̣̇аяавад̇т̇умзва санд̇хааяа вуд̇д̇ам̣.
Uppajjamāno saha uppajjamānabhāvena upakārako dhammo sahajātapaccayo, pakāsassa padīpo viya. So arūpakkhandhādivasena chabbidho hoti. Yathāha – cattāro khandhā arūpino aññamaññaṃ sahajātapaccayena paccayo. Cattāro mahābhūtā aññamaññaṃ…pe… okkantikkhaṇe nāmarūpaṃ aññamaññaṃ…pe… cittacetasikā dhammā cittasamuṭṭhānānaṃ rūpānaṃ…pe… mahābhūtā upādārūpānaṃ…pe… rūpino dhammā arūpīnaṃ dhammānaṃ kiñcikāle sahajātapaccayena paccayo; kiñci kāle na sahajātapaccayena paccayoti. Idaṃ hadayavatthumeva sandhāya vuttaṃ.
ан̃н̃аман̃н̃ам̣ уббаад̣̇анубад̇т̇амбханабхаавзна убагаараго д̇хаммо ан̃н̃аман̃н̃абажжаяо. ан̃н̃аман̃н̃убад̇т̇амбхагам̣ д̇ид̣̇ан̣д̣ам̣ вияа. со аруубагканд̇хаад̣̇ивасзна д̇ивид̇хо ход̇и. яат̇ааха – жад̇д̇ааро канд̇хаа аруубино ан̃н̃аман̃н̃абажжаязна бажжаяо. жад̇д̇ааро махаабхууд̇аа…бз… огганд̇игкан̣з наамаруубам̣ ан̃н̃аман̃н̃абажжаязна бажжаяод̇и.
Aññamaññaṃ uppādanupatthambhanabhāvena upakārako dhammo aññamaññapaccayo. Aññamaññupatthambhakaṃ tidaṇḍaṃ viya. So arūpakkhandhādivasena tividho hoti. Yathāha – cattāro khandhā arūpino aññamaññapaccayena paccayo. Cattāro mahābhūtā…pe… okkantikkhaṇe nāmarūpaṃ aññamaññapaccayena paccayoti.
ад̇хидтаанаагаарзна ниссаяаагаарзна жа убагаараго д̇хаммо ниссаяабажжаяо, д̇аружид̇д̇агаммаад̣̇ийнам̣ бат̇авийбадаад̣̇аяо вияа. со ‘‘жад̇д̇ааро канд̇хаа аруубино ан̃н̃аман̃н̃ам̣ ниссаяабажжаязна бажжаяо’’д̇и звам̣ сахаж̇аад̇з вуд̇д̇анаязнзва взд̣̇ид̇аб̣б̣о. чадто банзд̇т̇а годтаасо ‘‘жагкааяад̇анам̣ жагкувин̃н̃аан̣ад̇хаад̇уяаа, сод̇агхаанаж̇ивхаагааяааяад̇анам̣ гааяавин̃н̃аан̣ад̇хаад̇уяаа д̇ам̣самбаяуд̇д̇агаанан̃жа д̇хаммаанам̣ ниссаяабажжаязна бажжаяо. яам̣ руубам̣ ниссааяа манод̇хаад̇у жа мановин̃н̃аан̣ад̇хаад̇у жа вад̇д̇анд̇и , д̇ам̣ руубам̣ манод̇хаад̇уяаа жа мановин̃н̃аан̣ад̇хаад̇уяаа жа д̇ам̣самбаяуд̇д̇агаанан̃жа д̇хаммаанам̣ ниссаяабажжаязна бажжаяо’’д̇и звам̣ вибхад̇д̇о.
Adhiṭṭhānākārena nissayākārena ca upakārako dhammo nissayapaccayo, tarucittakammādīnaṃ pathavīpaṭādayo viya. So ‘‘cattāro khandhā arūpino aññamaññaṃ nissayapaccayena paccayo’’ti evaṃ sahajāte vuttanayeneva veditabbo. Chaṭṭho panettha koṭṭhāso ‘‘cakkhāyatanaṃ cakkhuviññāṇadhātuyā, sotaghānajivhākāyāyatanaṃ kāyaviññāṇadhātuyā taṃsampayuttakānañca dhammānaṃ nissayapaccayena paccayo. Yaṃ rūpaṃ nissāya manodhātu ca manoviññāṇadhātu ca vattanti , taṃ rūpaṃ manodhātuyā ca manoviññāṇadhātuyā ca taṃsampayuttakānañca dhammānaṃ nissayapaccayena paccayo’’ti evaṃ vibhatto.
убаниссаяабажжаяод̇и ид̇ха бана аяам̣ д̇аава важанад̇т̇о – д̇ад̣̇ад̇хийнавуд̇д̇ид̇ааяа ад̇д̇ано палзна ниссид̇о, на бадигкид̇д̇од̇и ниссаяо. яат̇аа бана бхусо ааяаасо убааяаасо, звам̣ бхусо ниссаяо убаниссаяо. б̣алавагааран̣ассзд̇ам̣ ад̇хиважанам̣. д̇асмаа б̣алавагааран̣абхаавзна убагаараго д̇хаммо убаниссаяабажжаяод̇и взд̣̇ид̇аб̣б̣о. со аарамман̣уубаниссаяо, ананд̇аруубаниссаяо багад̇уубаниссаяод̇и д̇ивид̇хо ход̇и. д̇ад̇т̇а ‘‘д̣̇аанам̣ д̣̇ад̇ваа сийлам̣ самаад̣̇ияид̇ваа убосат̇агаммам̣ гад̇ваа д̇ам̣ г̇арум̣ гад̇ваа бажжавзгкад̇и, буб̣б̣з сужин̣н̣аани г̇арум̣ гад̇ваа бажжавзгкад̇и, жхаанаа вудтахид̇ваа жхаанам̣ г̇арум̣ гад̇ваа бажжавзгкад̇и, сзгкаа г̇од̇рабхум̣ г̇арум̣ гад̇ваа бажжавзгканд̇и, вод̣̇аанам̣ г̇арум̣ гад̇ваа бажжавзгканд̇и, сзгкаа маг̇г̇аа вудтахид̇ваа маг̇г̇ам̣ г̇арум̣ гад̇ваа бажжавзгканд̇ий’’д̇и звамаад̣̇инаа наязна аарамман̣уубаниссаяо д̇аава аарамман̣аад̇хибад̇инаа сад̣̇д̇хим̣ наанад̇д̇ам̣ агад̇ваа вибхад̇д̇о. д̇ад̇т̇а яам̣ аарамман̣ам̣ г̇арум̣ гад̇ваа жид̇д̇ажзд̇асигаа уббаж̇ж̇анд̇и, д̇ам̣ нияамад̇о д̇зсам̣ аарамман̣зсу б̣алаваарамман̣ам̣ ход̇и . ид̇и г̇аругаад̇аб̣б̣амад̇д̇адтзна аарамман̣аад̇хибад̇и, б̣алавагааран̣адтзна аарамман̣уубаниссаяод̇и звамзд̇зсам̣ наанад̇д̇ам̣ взд̣̇ид̇аб̣б̣ам̣.
Upanissayapaccayoti idha pana ayaṃ tāva vacanattho – tadadhīnavuttitāya attano phalena nissito, na paṭikkhittoti nissayo. Yathā pana bhuso āyāso upāyāso, evaṃ bhuso nissayo upanissayo. Balavakāraṇassetaṃ adhivacanaṃ. Tasmā balavakāraṇabhāvena upakārako dhammo upanissayapaccayoti veditabbo. So ārammaṇūpanissayo, anantarūpanissayo pakatūpanissayoti tividho hoti. Tattha ‘‘dānaṃ datvā sīlaṃ samādiyitvā uposathakammaṃ katvā taṃ garuṃ katvā paccavekkhati, pubbe suciṇṇāni garuṃ katvā paccavekkhati, jhānā vuṭṭhahitvā jhānaṃ garuṃ katvā paccavekkhati, sekkhā gotrabhuṃ garuṃ katvā paccavekkhanti, vodānaṃ garuṃ katvā paccavekkhanti, sekkhā maggā vuṭṭhahitvā maggaṃ garuṃ katvā paccavekkhantī’’ti evamādinā nayena ārammaṇūpanissayo tāva ārammaṇādhipatinā saddhiṃ nānattaṃ akatvā vibhatto. Tattha yaṃ ārammaṇaṃ garuṃ katvā cittacetasikā uppajjanti, taṃ niyamato tesaṃ ārammaṇesu balavārammaṇaṃ hoti . Iti garukātabbamattaṭṭhena ārammaṇādhipati, balavakāraṇaṭṭhena ārammaṇūpanissayoti evametesaṃ nānattaṃ veditabbaṃ.
ананд̇аруубаниссаяоби ‘‘буримаа буримаа гусалаа канд̇хаа бажчимаанам̣ бажчимаанам̣ гусалаанам̣ канд̇хаанам̣ убаниссаяабажжаязна бажжаяо’’д̇иаад̣̇инаа наязна ананд̇арабажжаязна сад̣̇д̇хим̣ наанад̇д̇ам̣ агад̇ваава вибхад̇д̇о. маад̇игаанигкзбз бана нзсам̣ ‘‘жагкувин̃н̃аан̣ад̇хаад̇у д̇ам̣самбаяуд̇д̇агаа жа д̇хаммаа манод̇хаад̇уяаа д̇ам̣самбаяуд̇д̇агаанан̃жа д̇хаммаанам̣ ананд̇арабажжаязна бажжаяо’’д̇иаад̣̇инаа наязна ананд̇арасса жа ‘‘буримаа буримаа гусалаа д̇хаммаа бажчимаанам̣ бажчимаанам̣ гусалаанам̣ д̇хаммаанам̣ убаниссаяабажжаязна бажжаяо’’д̇иаад̣̇инаа наязна убаниссаяасса жа ааг̇ад̇ад̇д̇аа нигкзбависзсо ад̇т̇и, соби ад̇т̇ад̇о згийбхаавамзва г̇ажчад̇и. звам̣ санд̇зби ад̇д̇ано ад̇д̇ано ананд̇арам̣ ануруубасса жид̇д̇уббаад̣̇асса бавад̇д̇анасамад̇т̇ад̇ааяа ананд̇арад̇аа буримажид̇д̇асса жа бажчимажид̇д̇уббаад̣̇анз б̣алавад̇ааяа ананд̇аруубаниссаяад̇аа взд̣̇ид̇аб̣б̣аа. яат̇аа хи хзд̇убажжаяаад̣̇ийсу ган̃жи д̇хаммам̣ винааби жид̇д̇ам̣ уббаж̇ж̇ад̇и, на звам̣ ананд̇аражид̇д̇ам̣, винаа жид̇д̇асса уббад̇д̇и наама ад̇т̇и, д̇асмаа б̣алавабажжаяо ход̇и. ид̇и ад̇д̇ано ад̇д̇ано ананд̇арам̣ ануруубажид̇д̇уббаад̣̇авасзна ананд̇арабажжаяо, б̣алавагааран̣авасзна ананд̇аруубаниссаяод̇и звамзд̇зсам̣ наанад̇д̇ам̣ взд̣̇ид̇аб̣б̣ам̣.
Anantarūpanissayopi ‘‘purimā purimā kusalā khandhā pacchimānaṃ pacchimānaṃ kusalānaṃ khandhānaṃ upanissayapaccayena paccayo’’tiādinā nayena anantarapaccayena saddhiṃ nānattaṃ akatvāva vibhatto. Mātikānikkhepe pana nesaṃ ‘‘cakkhuviññāṇadhātu taṃsampayuttakā ca dhammā manodhātuyā taṃsampayuttakānañca dhammānaṃ anantarapaccayena paccayo’’tiādinā nayena anantarassa ca ‘‘purimā purimā kusalā dhammā pacchimānaṃ pacchimānaṃ kusalānaṃ dhammānaṃ upanissayapaccayena paccayo’’tiādinā nayena upanissayassa ca āgatattā nikkhepaviseso atthi, sopi atthato ekībhāvameva gacchati. Evaṃ santepi attano attano anantaraṃ anurūpassa cittuppādassa pavattanasamatthatāya anantaratā purimacittassa ca pacchimacittuppādane balavatāya anantarūpanissayatā veditabbā. Yathā hi hetupaccayādīsu kañci dhammaṃ vināpi cittaṃ uppajjati, na evaṃ anantaracittaṃ, vinā cittassa uppatti nāma atthi, tasmā balavapaccayo hoti. Iti attano attano anantaraṃ anurūpacittuppādavasena anantarapaccayo, balavakāraṇavasena anantarūpanissayoti evametesaṃ nānattaṃ veditabbaṃ.
багад̇уубаниссаяо бана багад̇о убаниссаяо багад̇уубаниссаяо. багад̇о наама ад̇д̇ано санд̇аанз нибпаад̣̇ид̇о ваа сад̣̇д̇хаасийлаад̣̇и; убасзвид̇о ваа уд̇убхож̇анаад̣̇и. багад̇ияааязва ваа убаниссаяо багад̇уубаниссаяо, аарамман̣аананд̇арзхи асаммиссод̇и ад̇т̇о. д̇асса ‘‘багад̇уубаниссаяо – сад̣̇д̇хам̣ убаниссааяа д̣̇аанам̣ д̣̇зд̇и, сийлам̣ самаад̣̇ияад̇и, убосат̇агаммам̣ гарод̇и, жхаанам̣ уббаад̣̇зд̇и, вибассанам̣ уббаад̣̇зд̇и, маг̇г̇ам̣ уббаад̣̇зд̇и, абхин̃н̃ам̣ уббаад̣̇зд̇и, самаабад̇д̇им̣ уббаад̣̇зд̇и, сийлам̣… суд̇ам̣… жааг̇ам̣… бан̃н̃ам̣ убаниссааяа д̣̇аанам̣ д̣̇зд̇и…бз… самаабад̇д̇им̣ уббаад̣̇зд̇и. сад̣̇д̇хаа… сийлам̣… суд̇ам̣… жааг̇о… бан̃н̃аа сад̣̇д̇хааяа… сийласса… суд̇асса… жааг̇асса… бан̃н̃ааяа убаниссаяабажжаязна бажжаяо’’д̇иаад̣̇инаа наязна анзгаббагаараго бабхзд̣̇о взд̣̇ид̇аб̣б̣о. ид̇и имз сад̣̇д̇хаад̣̇аяо багад̇аа жзва б̣алавагааран̣адтзна убаниссаяаа жаад̇и багад̇уубаниссаяод̇и.
Pakatūpanissayo pana pakato upanissayo pakatūpanissayo. Pakato nāma attano santāne nipphādito vā saddhāsīlādi; upasevito vā utubhojanādi. Pakatiyāyeva vā upanissayo pakatūpanissayo, ārammaṇānantarehi asammissoti attho. Tassa ‘‘pakatūpanissayo – saddhaṃ upanissāya dānaṃ deti, sīlaṃ samādiyati, uposathakammaṃ karoti, jhānaṃ uppādeti, vipassanaṃ uppādeti, maggaṃ uppādeti, abhiññaṃ uppādeti, samāpattiṃ uppādeti, sīlaṃ… sutaṃ… cāgaṃ… paññaṃ upanissāya dānaṃ deti…pe… samāpattiṃ uppādeti. Saddhā… sīlaṃ… sutaṃ… cāgo… paññā saddhāya… sīlassa… sutassa… cāgassa… paññāya upanissayapaccayena paccayo’’tiādinā nayena anekappakārako pabhedo veditabbo. Iti ime saddhādayo pakatā ceva balavakāraṇaṭṭhena upanissayā cāti pakatūpanissayoti.
батамад̇арам̣ уббаж̇ж̇ид̇ваа вад̇д̇амаанабхаавзна убагаараго д̇хаммо бурзж̇аад̇абажжаяо. со бан̃жад̣̇ваарз вад̇т̇аарамман̣ахад̣̇аяавад̇т̇увасзна згаад̣̇асавид̇хо ход̇и . яат̇ааха – жагкааяад̇анам̣ жагкувин̃н̃аан̣ад̇хаад̇уяаа д̇ам̣самбаяуд̇д̇агаанан̃жа д̇хаммаанам̣ бурзж̇аад̇абажжаязна бажжаяо. сод̇а… гхаана… ж̇ивхаа… гааяааяад̇анам̣, руубааяад̇анам̣, сад̣̇д̣̇а… г̇анд̇ха… раса… подтаб̣б̣ааяад̇анам̣, гааяавин̃н̃аан̣ад̇хаад̇уяаа д̇ам̣самбаяуд̇д̇агаанан̃жа д̇хаммаанам̣ бурзж̇аад̇абажжаязна бажжаяо. руубасад̣̇д̣̇аг̇анд̇харасаподтаб̣б̣ааяад̇анам̣ манод̇хаад̇уяаа д̇ам̣самбаяуд̇д̇агаанан̃жа д̇хаммаанам̣ бурзж̇аад̇абажжаязна бажжаяо. яам̣ руубам̣ ниссааяа манод̇хаад̇у жа мановин̃н̃аан̣ад̇хаад̇у жа вад̇д̇анд̇и, д̇ам̣ руубам̣ манод̇хаад̇уяаа д̇ам̣самбаяуд̇д̇агаанан̃жа д̇хаммаанам̣ бурзж̇аад̇абажжаязна бажжаяо, мановин̃н̃аан̣ад̇хаад̇уяаа д̇ам̣самбаяуд̇д̇агаанан̃жа д̇хаммаанам̣ гин̃жи гаалз бурзж̇аад̇абажжаязна бажжаяо, гин̃жи гаалз на бурзж̇аад̇абажжаязна бажжаяод̇и.
Paṭhamataraṃ uppajjitvā vattamānabhāvena upakārako dhammo purejātapaccayo. So pañcadvāre vatthārammaṇahadayavatthuvasena ekādasavidho hoti . Yathāha – cakkhāyatanaṃ cakkhuviññāṇadhātuyā taṃsampayuttakānañca dhammānaṃ purejātapaccayena paccayo. Sota… ghāna… jivhā… kāyāyatanaṃ, rūpāyatanaṃ, sadda… gandha… rasa… phoṭṭhabbāyatanaṃ, kāyaviññāṇadhātuyā taṃsampayuttakānañca dhammānaṃ purejātapaccayena paccayo. Rūpasaddagandharasaphoṭṭhabbāyatanaṃ manodhātuyā taṃsampayuttakānañca dhammānaṃ purejātapaccayena paccayo. Yaṃ rūpaṃ nissāya manodhātu ca manoviññāṇadhātu ca vattanti, taṃ rūpaṃ manodhātuyā taṃsampayuttakānañca dhammānaṃ purejātapaccayena paccayo, manoviññāṇadhātuyā taṃsampayuttakānañca dhammānaṃ kiñci kāle purejātapaccayena paccayo, kiñci kāle na purejātapaccayena paccayoti.
бурзж̇аад̇аанам̣ руубад̇хаммаанам̣ убад̇т̇амбхагадтзна убагаараго аруубад̇хаммо бажчааж̇аад̇абажжаяо, г̇иж̇жхабод̇агасарийраанам̣ аахаараасаажзд̇анаа вияа. д̇зна вуд̇д̇ам̣ – ‘‘бажчааж̇аад̇аа жид̇д̇ажзд̇асигаа д̇хаммаа бурзж̇аад̇асса имасса гааяасса бажчааж̇аад̇абажжаязна бажжаяо’’д̇и.
Purejātānaṃ rūpadhammānaṃ upatthambhakaṭṭhena upakārako arūpadhammo pacchājātapaccayo, gijjhapotakasarīrānaṃ āhārāsācetanā viya. Tena vuttaṃ – ‘‘pacchājātā cittacetasikā dhammā purejātassa imassa kāyassa pacchājātapaccayena paccayo’’ti.
аасзванадтзна ананд̇араанам̣ баг̇ун̣аб̣алавабхаавааяа убагаараго д̇хаммо аасзванабажжаяо, г̇ант̇аад̣̇ийсу буримаабуримаабхияог̇о вияа. со гусалаагусалагирияаж̇аванавасзна д̇ивид̇хо ход̇и. яат̇ааха – буримаа буримаа гусалаа д̇хаммаа бажчимаанам̣ бажчимаанам̣ гусалаанам̣ д̇хаммаанам̣ аасзванабажжаязна бажжаяо . буримаа буримаа агусалаа…бз… гирияааб̣яаагад̇аа д̇хаммаа бажчимаанам̣ бажчимаанам̣ гирияааб̣яаагад̇аанам̣ д̇хаммаанам̣ аасзванабажжаязна бажжаяод̇и.
Āsevanaṭṭhena anantarānaṃ paguṇabalavabhāvāya upakārako dhammo āsevanapaccayo, ganthādīsu purimāpurimābhiyogo viya. So kusalākusalakiriyajavanavasena tividho hoti. Yathāha – purimā purimā kusalā dhammā pacchimānaṃ pacchimānaṃ kusalānaṃ dhammānaṃ āsevanapaccayena paccayo . Purimā purimā akusalā…pe… kiriyābyākatā dhammā pacchimānaṃ pacchimānaṃ kiriyābyākatānaṃ dhammānaṃ āsevanapaccayena paccayoti.
жид̇д̇абаяог̇асан̇каад̇зна гирияаабхаавзна убагаараго д̇хаммо гаммабажжаяо. со наанаагкан̣игааяа жзва гусалаагусалажзд̇анааяа сахаж̇аад̇ааяа жа саб̣б̣ааяаби жзд̇анааяа васзна д̣̇увид̇хо ход̇и. яат̇ааха – гусалаагусалам̣ гаммам̣ вибаагаанам̣ канд̇хаанам̣ гадад̇д̇аа жа руубаанам̣ гаммабажжаязна бажжаяо. жзд̇анаа самбаяуд̇д̇агаанам̣ д̇хаммаанам̣ д̇ам̣ самудтаанаанан̃жа руубаанам̣ гаммабажжаязна бажжаяод̇и.
Cittapayogasaṅkhātena kiriyābhāvena upakārako dhammo kammapaccayo. So nānākkhaṇikāya ceva kusalākusalacetanāya sahajātāya ca sabbāyapi cetanāya vasena duvidho hoti. Yathāha – kusalākusalaṃ kammaṃ vipākānaṃ khandhānaṃ kaṭattā ca rūpānaṃ kammapaccayena paccayo. Cetanā sampayuttakānaṃ dhammānaṃ taṃ samuṭṭhānānañca rūpānaṃ kammapaccayena paccayoti.
нируссаахасанд̇абхаавзна нируссаахасанд̇абхаавааяа убагаараго вибаагад̇хаммо вибаагабажжаяо. со бавад̇д̇з жид̇д̇асамудтаанаанам̣, бадисанд̇хияам̣ гадад̇д̇аа жа руубаанам̣, саб̣б̣ад̇т̇а жа самбаяуд̇д̇ад̇хаммаанам̣ вибаагабажжаяо ход̇и. яат̇ааха – вибаагааб̣яаагад̇о зго канд̇хо д̇ин̣н̣ам̣ канд̇хаанам̣, жид̇д̇асамудтаанаанан̃жа руубаанам̣, вибаагабажжаязна бажжаяо…бз… бадисанд̇хигкан̣з вибаагааб̣яаагад̇о зго канд̇хо…бз… д̣̇вз канд̇хаа д̣̇виннам̣ канд̇хаанам̣ гадад̇д̇аа жа руубаанам̣ вибаагабажжаязна бажжаяо. канд̇хаа вад̇т̇усса вибаагабажжаязна бажжаяод̇и.
Nirussāhasantabhāvena nirussāhasantabhāvāya upakārako vipākadhammo vipākapaccayo. So pavatte cittasamuṭṭhānānaṃ, paṭisandhiyaṃ kaṭattā ca rūpānaṃ, sabbattha ca sampayuttadhammānaṃ vipākapaccayo hoti. Yathāha – vipākābyākato eko khandho tiṇṇaṃ khandhānaṃ, cittasamuṭṭhānānañca rūpānaṃ, vipākapaccayena paccayo…pe… paṭisandhikkhaṇe vipākābyākato eko khandho…pe… dve khandhā dvinnaṃ khandhānaṃ kaṭattā ca rūpānaṃ vipākapaccayena paccayo. Khandhā vatthussa vipākapaccayena paccayoti.
руубааруубаанам̣ убад̇т̇амбхагадтзна убагаарагаа жад̇д̇ааро аахаараа аахаарабажжаяо. яат̇ааха – габ̣ал̣ийгааро аахааро имасса гааяасса аахаарабажжаязна бажжаяо. аруубино аахаараа самбаяуд̇д̇агаанам̣ д̇хаммаанам̣ д̇ам̣самудтаанаанан̃жа руубаанам̣ аахаарабажжаязна бажжаяод̇и. бан̃хааваарз бана ‘‘бадисанд̇хигкан̣з вибаагааб̣яаагад̇аа аахаараа самбаяуд̇д̇агаанам̣ канд̇хаанам̣ гадад̇д̇аа жа руубаанам̣ аахаарабажжаязна бажжаяо’’д̇иби вуд̇д̇ам̣.
Rūpārūpānaṃ upatthambhakaṭṭhena upakārakā cattāro āhārā āhārapaccayo. Yathāha – kabaḷīkāro āhāro imassa kāyassa āhārapaccayena paccayo. Arūpino āhārā sampayuttakānaṃ dhammānaṃ taṃsamuṭṭhānānañca rūpānaṃ āhārapaccayena paccayoti. Pañhāvāre pana ‘‘paṭisandhikkhaṇe vipākābyākatā āhārā sampayuttakānaṃ khandhānaṃ kaṭattā ca rūpānaṃ āhārapaccayena paccayo’’tipi vuttaṃ.
ад̇хибад̇ияадтзна убагаарагаа ид̇т̇инд̣̇рияабурисинд̣̇рияаваж̇ж̇аа вийсад̇инд̣̇рияаа инд̣̇рияабажжаяо. д̇ад̇т̇а жагкунд̣̇рияаад̣̇аяо бан̃жа аруубад̇хаммаанам̣язва, сзсаа руубааруубаанам̣ бажжаяаа хонд̇и. яат̇ааха – жагкунд̣̇рияам̣ жагкувин̃н̃аан̣ад̇хаад̇уяаа, сод̇а… гхаана… ж̇ивхаа… гааяинд̣̇рияам̣ гааяавин̃н̃аан̣ад̇хаад̇уяаа д̇ам̣самбаяуд̇д̇агаанан̃жа д̇хаммаанам̣ инд̣̇рияабажжаязна бажжаяо. руубаж̇ийвид̇инд̣̇рияам̣ гадад̇д̇ааруубаанам̣ инд̣̇рияабажжаязна бажжаяо. аруубино инд̣̇рияаа самбаяуд̇д̇агаанам̣ д̇хаммаанам̣ д̇ам̣самудтаанаанан̃жа руубаанам̣ инд̣̇рияабажжаязна бажжаяод̇и. бан̃хааваарз бана ‘‘бадисанд̇хигкан̣з вибаагааб̣яаагад̇аа инд̣̇рияаа самбаяуд̇д̇агаанам̣ канд̇хаанам̣ гадад̇д̇аа жа руубаанам̣ инд̣̇рияабажжаязна бажжаяо’’д̇иби вуд̇д̇ам̣.
Adhipatiyaṭṭhena upakārakā itthindriyapurisindriyavajjā vīsatindriyā indriyapaccayo. Tattha cakkhundriyādayo pañca arūpadhammānaṃyeva, sesā rūpārūpānaṃ paccayā honti. Yathāha – cakkhundriyaṃ cakkhuviññāṇadhātuyā, sota… ghāna… jivhā… kāyindriyaṃ kāyaviññāṇadhātuyā taṃsampayuttakānañca dhammānaṃ indriyapaccayena paccayo. Rūpajīvitindriyaṃ kaṭattārūpānaṃ indriyapaccayena paccayo. Arūpino indriyā sampayuttakānaṃ dhammānaṃ taṃsamuṭṭhānānañca rūpānaṃ indriyapaccayena paccayoti. Pañhāvāre pana ‘‘paṭisandhikkhaṇe vipākābyākatā indriyā sampayuttakānaṃ khandhānaṃ kaṭattā ca rūpānaṃ indriyapaccayena paccayo’’tipi vuttaṃ.
убаниж̇жхааяанадтзна убагаарагаани табзд̇ваа д̣̇вибан̃жавин̃н̃аан̣зсу гааяигасукад̣̇угкавзд̣̇анаад̣̇ваяам̣ саб̣б̣ааниби гусалаад̣̇ибхзд̣̇аани сад̇д̇а жхаанан̇г̇аани жхаанабажжаяо. яат̇ааха – жхаанан̇г̇аани жхаанасамбаяуд̇д̇агаанам̣ д̇хаммаанам̣ д̇ам̣самудтаанаанан̃жа руубаанам̣ жхаанабажжаязна бажжаяод̇и. бан̃хааваарз бана бадисанд̇хигкан̣з вибаагааб̣яаагад̇аани жхаанан̇г̇аани самбаяуд̇д̇агаанам̣ канд̇хаанам̣ гадад̇д̇аа жа руубаанам̣ жхаанабажжаязна бажжаяо’’д̇иби вуд̇д̇ам̣.
Upanijjhāyanaṭṭhena upakārakāni ṭhapetvā dvipañcaviññāṇesu kāyikasukhadukkhavedanādvayaṃ sabbānipi kusalādibhedāni satta jhānaṅgāni jhānapaccayo. Yathāha – jhānaṅgāni jhānasampayuttakānaṃ dhammānaṃ taṃsamuṭṭhānānañca rūpānaṃ jhānapaccayena paccayoti. Pañhāvāre pana paṭisandhikkhaṇe vipākābyākatāni jhānaṅgāni sampayuttakānaṃ khandhānaṃ kaṭattā ca rūpānaṃ jhānapaccayena paccayo’’tipi vuttaṃ.
яад̇о д̇ад̇о ваа нияяаанадтзна убагаарагаани гусалаад̣̇ибхзд̣̇аани д̣̇ваад̣̇аса маг̇г̇ан̇г̇аани маг̇г̇абажжаяо. яат̇ааха – ‘‘маг̇г̇ан̇г̇аани маг̇г̇асамбаяуд̇д̇агаанам̣ д̇хаммаанам̣ д̇ам̣самудтаанаанан̃жа руубаанам̣ маг̇г̇абажжаязна бажжаяо’’д̇и. бан̃хааваарз бана ‘‘бадисанд̇хигкан̣з вибаагааб̣яаагад̇аани маг̇г̇ан̇г̇аани самбаяуд̇д̇агаанам̣ канд̇хаанам̣ гадад̇д̇аа жа руубаанам̣ маг̇г̇абажжаязна бажжаяо’’д̇и вуд̇д̇ам̣. на зд̇з бана д̣̇взби жхаанамаг̇г̇абажжаяаа яат̇аасан̇кяам̣ д̣̇вибан̃жавин̃н̃аан̣аахзд̇угажид̇д̇зсу лаб̣бханд̇ийд̇и взд̣̇ид̇аб̣б̣аа.
Yato tato vā niyyānaṭṭhena upakārakāni kusalādibhedāni dvādasa maggaṅgāni maggapaccayo. Yathāha – ‘‘maggaṅgāni maggasampayuttakānaṃ dhammānaṃ taṃsamuṭṭhānānañca rūpānaṃ maggapaccayena paccayo’’ti. Pañhāvāre pana ‘‘paṭisandhikkhaṇe vipākābyākatāni maggaṅgāni sampayuttakānaṃ khandhānaṃ kaṭattā ca rūpānaṃ maggapaccayena paccayo’’ti vuttaṃ. Na ete pana dvepi jhānamaggapaccayā yathāsaṅkhyaṃ dvipañcaviññāṇāhetukacittesu labbhantīti veditabbā.
згавад̇т̇угазгаарамман̣азгуббаад̣̇зганирод̇хасан̇каад̇зна самбаяуд̇д̇абхаавзна убагаарагаа аруубад̇хаммаа самбаяуд̇д̇абажжаяо. яат̇ааха – ‘‘жад̇д̇ааро канд̇хаа аруубино ан̃н̃аман̃н̃ам̣ самбаяуд̇д̇абажжаязна бажжаяо’’д̇и.
Ekavatthukaekārammaṇaekuppādekanirodhasaṅkhātena sampayuttabhāvena upakārakā arūpadhammā sampayuttapaccayo. Yathāha – ‘‘cattāro khandhā arūpino aññamaññaṃ sampayuttapaccayena paccayo’’ti.
згавад̇т̇угаад̣̇ибхааваанубаг̇амзна убагаарагаа руубино д̇хаммаа аруубийнам̣, аруубино д̇хаммаа руубийнам̣ виббаяуд̇д̇абажжаязна бажжаяо. со сахаж̇аад̇абажчааж̇аад̇абурзж̇аад̇авасзна д̇ивид̇хо ход̇и. вуд̇д̇ан̃хзд̇ам̣ – сахаж̇аад̇аа гусалаа канд̇хаа жид̇д̇асамудтаанаанам̣ руубаанам̣ виббаяуд̇д̇абажжаязна бажжаяо. бажчааж̇аад̇аа гусалаа канд̇хаа бурзж̇аад̇асса имасса гааяасса виббаяуд̇д̇абажжаязна бажжаяод̇и. аб̣яаагад̇абад̣̇асса бана сахаж̇аад̇авибхан̇г̇з ‘‘бадисанд̇хигкан̣з вибаагааб̣яаагад̇аа канд̇хаа гадад̇д̇ааруубаанам̣ виббаяуд̇д̇абажжаязна бажжаяо. канд̇хаа вад̇т̇усса, вад̇т̇у канд̇хаанам̣ виббаяуд̇д̇абажжаязна бажжаяо’’д̇и вуд̇д̇ам̣. бурзж̇аад̇ам̣ бана жагкунд̣̇рияаад̣̇ивад̇т̇увасзнзва взд̣̇ид̇аб̣б̣ам̣. яат̇ааха – бурзж̇аад̇ам̣ жагкааяад̇анам̣ жагкувин̃н̃аан̣асса…бз… гааяааяад̇анам̣ гааяавин̃н̃аан̣асса виббаяуд̇д̇абажжаязна бажжаяо. вад̇т̇у вибаагааб̣яаагад̇аанам̣ гирияааб̣яаагад̇аанам̣ канд̇хаанам̣ вад̇т̇у гусалаанам̣ канд̇хаанам̣, вад̇т̇у агусалаанам̣ канд̇хаанам̣ виббаяуд̇д̇абажжаязна бажжаяод̇и.
Ekavatthukādibhāvānupagamena upakārakā rūpino dhammā arūpīnaṃ, arūpino dhammā rūpīnaṃ vippayuttapaccayena paccayo. So sahajātapacchājātapurejātavasena tividho hoti. Vuttañhetaṃ – sahajātā kusalā khandhā cittasamuṭṭhānānaṃ rūpānaṃ vippayuttapaccayena paccayo. Pacchājātā kusalā khandhā purejātassa imassa kāyassa vippayuttapaccayena paccayoti. Abyākatapadassa pana sahajātavibhaṅge ‘‘paṭisandhikkhaṇe vipākābyākatā khandhā kaṭattārūpānaṃ vippayuttapaccayena paccayo. Khandhā vatthussa, vatthu khandhānaṃ vippayuttapaccayena paccayo’’ti vuttaṃ. Purejātaṃ pana cakkhundriyādivatthuvaseneva veditabbaṃ. Yathāha – purejātaṃ cakkhāyatanaṃ cakkhuviññāṇassa…pe… kāyāyatanaṃ kāyaviññāṇassa vippayuttapaccayena paccayo. Vatthu vipākābyākatānaṃ kiriyābyākatānaṃ khandhānaṃ vatthu kusalānaṃ khandhānaṃ, vatthu akusalānaṃ khandhānaṃ vippayuttapaccayena paccayoti.
бажжуббанналагкан̣зна ад̇т̇ибхаавзна д̇аад̣̇исассзва д̇хаммасса убад̇т̇амбхагадтзна убагаараго д̇хаммо ад̇т̇ибажжаяо . д̇асса аруубагканд̇хамахаабхууд̇анаамаруубажид̇д̇ажзд̇асигамахаабхууд̇ааяад̇анавад̇т̇увасзна сад̇д̇ад̇хаа маад̇игаа нигкид̇д̇аа. яат̇ааха – жад̇д̇ааро канд̇хаа аруубино ан̃н̃аман̃н̃ам̣ ад̇т̇ибажжаязна бажжаяо; жад̇д̇ааро махаабхууд̇аа ан̃н̃аман̃н̃ам̣, огганд̇игкан̣з наамаруубам̣ ан̃н̃аман̃н̃ам̣, жид̇д̇ажзд̇асигаа д̇хаммаа жид̇д̇асамудтаанаанам̣ руубаанам̣ махаабхууд̇аа убаад̣̇ааруубаанам̣, жагкааяад̇анам̣ жагкувин̃н̃аан̣ад̇хаад̇уяаа…бз… гааяааяад̇анам̣…бз… руубааяад̇анам̣…бз… подтаб̣б̣ааяад̇анам̣ гааяавин̃н̃аан̣ад̇хаад̇уяаа д̇ам̣самбаяуд̇д̇агаанан̃жа д̇хаммаанам̣ ад̇т̇ибажжаязна бажжаяо. руубааяад̇анам̣…бз… подтаб̣б̣ааяад̇анам̣ манод̇хаад̇уяаа д̇ам̣самбаяуд̇д̇агаанан̃жа д̇хаммаанам̣ ад̇т̇ибажжаязна бажжаяо. яам̣ руубам̣ ниссааяа манод̇хаад̇у жа мановин̃н̃аан̣ад̇хаад̇у жа вад̇д̇анд̇и, д̇ам̣ руубам̣ манод̇хаад̇уяаа жа мановин̃н̃аан̣ад̇хаад̇уяаа жа д̇ам̣самбаяуд̇д̇агаанан̃жа д̇хаммаанам̣ ад̇т̇ибажжаязна бажжаяод̇и. бан̃хааваарз бана сахаж̇аад̇ам̣, бурзж̇аад̇ам̣, бажчааж̇аад̇ам̣, аахаарам̣, инд̣̇рияанд̇иби нигкибид̇ваа сахаж̇аад̇з д̇аава ‘‘зго канд̇хо д̇ин̣н̣ам̣ канд̇хаанам̣ жид̇д̇асамудтаанаанан̃жа руубаанам̣ ад̇т̇ибажжаязна бажжаяо’’д̇иаад̣̇инаа наязна нид̣̇д̣̇зсо гад̇о. бурзж̇аад̇з бурзж̇аад̇аанам̣ жагкаад̣̇ийнам̣ васзна нид̣̇д̣̇зсо гад̇о. бажчааж̇аад̇з бурзж̇аад̇асса имасса гааяасса бажчааж̇аад̇аанам̣ жид̇д̇ажзд̇асигаанам̣ бажжаяавасзна нид̣̇д̣̇зсо гад̇о. аахааринд̣̇риязсу бана ‘‘габ̣ал̣ийгааро аахааро имасса гааяасса ад̇т̇ибажжаязна бажжаяо. руубаж̇ийвид̇инд̣̇рияам̣ гадад̇д̇ааруубаанам̣ ад̇т̇ибажжаязна бажжаяо’’д̇и звам̣ нид̣̇д̣̇зсо гад̇од̇и.
Paccuppannalakkhaṇena atthibhāvena tādisasseva dhammassa upatthambhakaṭṭhena upakārako dhammo atthipaccayo. Tassa arūpakkhandhamahābhūtanāmarūpacittacetasikamahābhūtāyatanavatthuvasena sattadhā mātikā nikkhittā. Yathāha – cattāro khandhā arūpino aññamaññaṃ atthipaccayena paccayo; cattāro mahābhūtā aññamaññaṃ, okkantikkhaṇe nāmarūpaṃ aññamaññaṃ, cittacetasikā dhammā cittasamuṭṭhānānaṃ rūpānaṃ mahābhūtā upādārūpānaṃ, cakkhāyatanaṃ cakkhuviññāṇadhātuyā…pe… kāyāyatanaṃ…pe… rūpāyatanaṃ…pe… phoṭṭhabbāyatanaṃ kāyaviññāṇadhātuyā taṃsampayuttakānañca dhammānaṃ atthipaccayena paccayo. Rūpāyatanaṃ…pe… phoṭṭhabbāyatanaṃ manodhātuyā taṃsampayuttakānañca dhammānaṃ atthipaccayena paccayo. Yaṃ rūpaṃ nissāya manodhātu ca manoviññāṇadhātu ca vattanti, taṃ rūpaṃ manodhātuyā ca manoviññāṇadhātuyā ca taṃsampayuttakānañca dhammānaṃ atthipaccayena paccayoti. Pañhāvāre pana sahajātaṃ, purejātaṃ, pacchājātaṃ, āhāraṃ, indriyantipi nikkhipitvā sahajāte tāva ‘‘eko khandho tiṇṇaṃ khandhānaṃ cittasamuṭṭhānānañca rūpānaṃ atthipaccayena paccayo’’tiādinā nayena niddeso kato. Purejāte purejātānaṃ cakkhādīnaṃ vasena niddeso kato. Pacchājāte purejātassa imassa kāyassa pacchājātānaṃ cittacetasikānaṃ paccayavasena niddeso kato. Āhārindriyesu pana ‘‘kabaḷīkāro āhāro imassa kāyassa atthipaccayena paccayo. Rūpajīvitindriyaṃ kaṭattārūpānaṃ atthipaccayena paccayo’’ti evaṃ niddeso katoti.
ад̇д̇ано ананд̇арам̣ уббаж̇ж̇амаанаанам̣ аруубад̇хаммаанам̣ бавад̇д̇иогаасасса д̣̇аанзна убагаарагаа самананд̇аранируд̣̇д̇хаа аруубад̇хаммаа над̇т̇ибажжаяо. яат̇ааха – самананд̇аранируд̣̇д̇хаа жид̇д̇ажзд̇асигаа д̇хаммаа бадуббаннаанам̣ жид̇д̇ажзд̇асигаанам̣ д̇хаммаанам̣ над̇т̇ибажжаязна бажжаяод̇и.
Attano anantaraṃ uppajjamānānaṃ arūpadhammānaṃ pavattiokāsassa dānena upakārakā samanantaraniruddhā arūpadhammā natthipaccayo. Yathāha – samanantaraniruddhā cittacetasikā dhammā paṭuppannānaṃ cittacetasikānaṃ dhammānaṃ natthipaccayena paccayoti.
д̇з зва виг̇ад̇абхаавзна убагаарагад̇д̇аа виг̇ад̇абажжаяо. яат̇ааха – самананд̇аравиг̇ад̇аа жид̇д̇ажзд̇асигаа д̇хаммаа бадуббаннаанам̣ жид̇д̇ажзд̇асигаанам̣ д̇хаммаанам̣ виг̇ад̇абажжаязна бажжаяод̇и.
Te eva vigatabhāvena upakārakattā vigatapaccayo. Yathāha – samanantaravigatā cittacetasikā dhammā paṭuppannānaṃ cittacetasikānaṃ dhammānaṃ vigatapaccayena paccayoti.
ад̇т̇ибажжаяад̇хаммаа зва авиг̇ад̇абхаавзна убагаарагад̇д̇аа авиг̇ад̇абажжаяод̇и взд̣̇ид̇аб̣б̣аа. д̣̇зсанаавилаасзна бана д̇ат̇аа винзд̇аб̣б̣авзнзяяавасзна ваа аяам̣ д̣̇уго вуд̇д̇о; сахзд̇угад̣̇угам̣ вад̇вааби хзд̇усамбаяуд̇д̇ад̣̇уго вияаад̇и.
Atthipaccayadhammā eva avigatabhāvena upakārakattā avigatapaccayoti veditabbā. Desanāvilāsena pana tathā vinetabbaveneyyavasena vā ayaṃ duko vutto; sahetukadukaṃ vatvāpi hetusampayuttaduko viyāti.
имзсу бана жад̇увийсад̇ияаа бажжаязсу асаммохад̇т̇ам̣ –
Imesu pana catuvīsatiyā paccayesu asammohatthaṃ –
д̇хаммад̇о гаалад̇о жзва, наанаббагаарабхзд̣̇ад̇о;
Dhammato kālato ceva, nānappakārabhedato;
бажжаяуббаннад̇о жзва, вин̃н̃аад̇аб̣б̣о винижчаяо.
Paccayuppannato ceva, viññātabbo vinicchayo.
д̇ад̇т̇а д̇хаммад̇од̇и – имзсу хи бажжаязсу хзд̇убажжаяо д̇аава наамаруубад̇хаммзсу наамад̇хаммзгад̣̇зсо. аарамман̣абажжаяо сад̣̇д̇хим̣ бан̃н̃ад̇д̇ияаа жа абхаавзна саб̣б̣зби наамаруубад̇хаммаа. ад̇хибад̇ибажжаяз сахаж̇аад̇аад̇хибад̇и наамад̇хаммзгад̣̇зсо, д̇ат̇аа гаммажхаанамаг̇г̇абажжаяаа. аарамман̣аад̇хибад̇и саб̣б̣зби г̇аругаад̇аб̣б̣аа аарамман̣ад̇хаммаа. ананд̇арасамананд̇арабажчааж̇аад̇ааасзванавибаагасамбаяуд̇д̇анад̇т̇ивиг̇ад̇абажжаяаа наамад̇хаммаава. ниб̣б̣аанасса асан̇г̇ахид̇ад̇д̇аа наамад̇хаммзгад̣̇зсод̇иби вад̇д̇ум̣ ваддад̇и. бурзж̇аад̇абажжаяо руубзгад̣̇зсо. сзсаа яат̇аалаабхавасзна наамаруубад̇хаммаад̇и звам̣ д̇аавзд̇т̇а д̇хаммад̇о вин̃н̃аад̇аб̣б̣о винижчаяо.
Tattha dhammatoti – imesu hi paccayesu hetupaccayo tāva nāmarūpadhammesu nāmadhammekadeso. Ārammaṇapaccayo saddhiṃ paññattiyā ca abhāvena sabbepi nāmarūpadhammā. Adhipatipaccaye sahajātādhipati nāmadhammekadeso, tathā kammajhānamaggapaccayā. Ārammaṇādhipati sabbepi garukātabbā ārammaṇadhammā. Anantarasamanantarapacchājātaāsevanavipākasampayuttanatthivigatapaccayā nāmadhammāva. Nibbānassa asaṅgahitattā nāmadhammekadesotipi vattuṃ vaṭṭati. Purejātapaccayo rūpekadeso. Sesā yathālābhavasena nāmarūpadhammāti evaṃ tāvettha dhammato viññātabbo vinicchayo.
гаалад̇од̇и –
Kālatoti –
бажжуббаннаава хонд̇зд̇т̇а, бажжаяаа д̣̇аса бан̃жа жа;
Paccuppannāva hontettha, paccayā dasa pañca ca;
ад̇ийд̇аа зва бан̃жзго, д̇з гаалз д̣̇взби ниссид̇о;
Atītā eva pañceko, te kāle dvepi nissito;
д̇аяо д̇игаалигаа жзва, вимуд̇д̇аа жааби гаалад̇од̇и.
Tayo tikālikā ceva, vimuttā cāpi kālatoti.
зд̇зсу хи хзд̇убажжаяо сахаж̇аад̇аан̃н̃аман̃н̃аниссаяабурзж̇аад̇абажчааж̇аад̇авибаагааахаараинд̣̇рияажхаанамаг̇г̇асамбаяуд̇д̇авиббаяуд̇д̇аад̇т̇иавиг̇ад̇абажжаяод̇и имз баннараса бажжаяаа бажжуббаннад̇хаммаава хонд̇и. ананд̇арабажжаяо самананд̇арааасзвананад̇т̇ивиг̇ад̇абажжаяод̇и имз бан̃жа ад̇ийд̇ааязва хонд̇и. зго бана гаммабажжаяо, со бажжуббаннаад̇ийд̇з д̣̇взби гаалз ниссид̇о ход̇и. сзсаа аарамман̣абажжаяо ад̇хибад̇ибажжаяо убаниссаяабажжаяод̇и имз д̇аяо бажжаяаа д̇згаалигааби хонд̇и, бан̃н̃ад̇д̇ияаа сад̣̇д̇хим̣ ниб̣б̣аанасса сан̇г̇ахид̇ад̇д̇аа гаалавимуд̇д̇аабийд̇и. звамзд̇т̇а гаалад̇оби вин̃н̃аад̇аб̣б̣о винижчаяо.
Etesu hi hetupaccayo sahajātaaññamaññanissayapurejātapacchājātavipākaāhāraindriyajhānamaggasampayuttavippayuttaatthiavigatapaccayoti ime pannarasa paccayā paccuppannadhammāva honti. Anantarapaccayo samanantaraāsevananatthivigatapaccayoti ime pañca atītāyeva honti. Eko pana kammapaccayo, so paccuppannātīte dvepi kāle nissito hoti. Sesā ārammaṇapaccayo adhipatipaccayo upanissayapaccayoti ime tayo paccayā tekālikāpi honti, paññattiyā saddhiṃ nibbānassa saṅgahitattā kālavimuttāpīti. Evamettha kālatopi viññātabbo vinicchayo.
наанаббагаарабхзд̣̇ад̇о бажжаяуббаннад̇од̇и имзсам̣ бана д̣̇виннам̣ бад̣̇аанам̣ ад̇т̇о нид̣̇д̣̇зсаваарз аавибхависсад̇ийд̇и.
Nānappakārabhedato paccayuppannatoti imesaṃ pana dvinnaṃ padānaṃ attho niddesavāre āvibhavissatīti.
бажжаяуд̣̇д̣̇зсаван̣н̣анаа.
Paccayuddesavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / бадтаанабаал̣и • Paṭṭhānapāḷi / (1) бажжаяуд̣̇д̣̇зсо • (1) Paccayuddeso
