| Library / Tipiṭaka / তিপিটক • Tipiṭaka / অপদানপাল়ি • Apadānapāḷi |
২. পচ্চেকবুদ্ধঅপদানং
2. Paccekabuddhaapadānaṃ
অথ পচ্চেকবুদ্ধাপদানং সুণাথ –
Atha paccekabuddhāpadānaṃ suṇātha –
৮৩.
83.
‘‘তথাগতং জেতৰনে ৰসন্তং, অপুচ্ছি ৰেদেহমুনী নতঙ্গো।
‘‘Tathāgataṃ jetavane vasantaṃ, apucchi vedehamunī nataṅgo;
‘পচ্চেকবুদ্ধা কির নাম হোন্তি, ভৰন্তি তে হেতুভি কেহি ৰীর’ 1॥
‘Paccekabuddhā kira nāma honti, bhavanti te hetubhi kehi vīra’ 2.
৮৪.
84.
‘‘তদাহ সব্বঞ্ঞুৰরো মহেসী, আনন্দভদ্দং মধুরস্সরেন।
‘‘Tadāha sabbaññuvaro mahesī, ānandabhaddaṃ madhurassarena;
‘যে পুব্ববুদ্ধেসু 3 কতাধিকারা, অলদ্ধমোক্খা জিনসাসনেসু॥
‘Ye pubbabuddhesu 4 katādhikārā, aladdhamokkhā jinasāsanesu.
৮৫.
85.
‘‘‘তেনেৰ সংৰেগমুখেন ধীরা, ৰিনাপি বুদ্ধেহি সুতিক্খপঞ্ঞা।
‘‘‘Teneva saṃvegamukhena dhīrā, vināpi buddhehi sutikkhapaññā;
আরম্মণেনাপি পরিত্তকেন, পচ্চেকবোধিং অনুপাপুণন্তি॥
Ārammaṇenāpi parittakena, paccekabodhiṃ anupāpuṇanti.
৮৬.
86.
‘‘‘সব্বম্হি লোকম্হি মমং ঠপেত্ৰা, পচ্চেকবুদ্ধেহি সমোৰ নত্থি।
‘‘‘Sabbamhi lokamhi mamaṃ ṭhapetvā, paccekabuddhehi samova natthi;
তেসং ইমং ৰণ্ণপদেসমত্তং, ৰক্খামহং সাধু মহামুনীনং॥
Tesaṃ imaṃ vaṇṇapadesamattaṃ, vakkhāmahaṃ sādhu mahāmunīnaṃ.
৮৭.
87.
‘‘‘সযমেৰ বুদ্ধানং মহাইসীনং, সাধূনি ৰাক্যানি মধূৰ 5 খুদ্দং।
‘‘‘Sayameva buddhānaṃ mahāisīnaṃ, sādhūni vākyāni madhūva 6 khuddaṃ;
অনুত্তরং ভেসজং পত্থযন্তা, সুণাথ সব্বেসু পসন্নচিত্তা॥
Anuttaraṃ bhesajaṃ patthayantā, suṇātha sabbesu pasannacittā.
৮৮.
88.
‘‘‘পচ্চেকবুদ্ধানং সমাগতানং, পরম্পরং ব্যাকরণানি যানি।
‘‘‘Paccekabuddhānaṃ samāgatānaṃ, paramparaṃ byākaraṇāni yāni;
আদীনৰো যঞ্চ ৰিরাগৰত্থুং, যথা চ বোধিং অনুপাপুণিংসু॥
Ādīnavo yañca virāgavatthuṃ, yathā ca bodhiṃ anupāpuṇiṃsu.
৮৯.
89.
‘‘‘সরাগৰত্থূসু ৰিরাগসঞ্ঞী, রত্তম্হি লোকম্হি ৰিরত্তচিত্তা।
‘‘‘Sarāgavatthūsu virāgasaññī, rattamhi lokamhi virattacittā;
হিত্ৰা পপঞ্চে জিতফন্দিতানি 7, তথেৰ বোধিং অনুপাপুণিংসু॥
Hitvā papañce jitaphanditāni 8, tatheva bodhiṃ anupāpuṇiṃsu.
৯০.
90.
‘‘‘সব্বেসু ভূতেসু নিধায দণ্ডং, অৰিহেঠযং অঞ্ঞতরম্পি তেসং।
‘‘‘Sabbesu bhūtesu nidhāya daṇḍaṃ, aviheṭhayaṃ aññatarampi tesaṃ;
মেত্তেন চিত্তেন হিতানুকম্পী, একো চরে খগ্গৰিসাণকপ্পো॥
Mettena cittena hitānukampī, eko care khaggavisāṇakappo.
৯১.
91.
‘‘‘সব্বেসু ভূতেসু নিধায দণ্ডং, অৰিহেঠযং অঞ্ঞতরম্পি তেসং।
‘‘‘Sabbesu bhūtesu nidhāya daṇḍaṃ, aviheṭhayaṃ aññatarampi tesaṃ;
ন পুত্তমিচ্ছেয্য কুতো সহাযং, একো চরে খগ্গৰিসাণকপ্পো॥
Na puttamiccheyya kuto sahāyaṃ, eko care khaggavisāṇakappo.
৯২.
92.
‘‘‘সংসগ্গজাতস্স ভৰন্তি স্নেহা, স্নেহন্ৰযং দুক্খমিদং পহোতি।
‘‘‘Saṃsaggajātassa bhavanti snehā, snehanvayaṃ dukkhamidaṃ pahoti;
আদীনৰং স্নেহজং পেক্খমানো, একো চরে খগ্গৰিসাণকপ্পো॥
Ādīnavaṃ snehajaṃ pekkhamāno, eko care khaggavisāṇakappo.
৯৩.
93.
‘‘‘মিত্তে সুহজ্জে অনুকম্পমানো, হাপেতি অত্থং পটিবদ্ধচিত্তো।
‘‘‘Mitte suhajje anukampamāno, hāpeti atthaṃ paṭibaddhacitto;
এতং ভযং সন্থৰে পেক্খমানো, একো চরে খগ্গৰিসাণকপ্পো॥
Etaṃ bhayaṃ santhave pekkhamāno, eko care khaggavisāṇakappo.
৯৪.
94.
‘‘‘ৰংসো ৰিসালোৰ যথা ৰিসত্তো, পুত্তেসু দারেসু চ যা অপেক্খা।
‘‘‘Vaṃso visālova yathā visatto, puttesu dāresu ca yā apekkhā;
ৰংসে কল়ীরোৰ অসজ্জমানো, একো চরে খগ্গৰিসাণকপ্পো॥
Vaṃse kaḷīrova asajjamāno, eko care khaggavisāṇakappo.
৯৫.
95.
‘‘‘মিগো অরঞ্ঞম্হি যথা অবদ্ধো, যেনিচ্ছকং গচ্ছতি গোচরায।
‘‘‘Migo araññamhi yathā abaddho, yenicchakaṃ gacchati gocarāya;
ৰিঞ্ঞূ নরো সেরিতং পেক্খমানো, একো চরে খগ্গৰিসাণকপ্পো॥
Viññū naro seritaṃ pekkhamāno, eko care khaggavisāṇakappo.
৯৬.
96.
‘‘‘আমন্তনা হোতি সহাযমজ্ঝে, ৰাসে চ 9 ঠানে গমনে চারিকায।
‘‘‘Āmantanā hoti sahāyamajjhe, vāse ca 10 ṭhāne gamane cārikāya;
অনভিজ্ঝিতং সেরিতং পেক্খমানো, একো চরে খগ্গৰিসাণকপ্পো॥
Anabhijjhitaṃ seritaṃ pekkhamāno, eko care khaggavisāṇakappo.
৯৭.
97.
‘‘‘খিড্ডা রতী হোতি সহাযমজ্ঝে, পুত্তেসু পেমং ৰিপুলঞ্চ হোতি।
‘‘‘Khiḍḍā ratī hoti sahāyamajjhe, puttesu pemaṃ vipulañca hoti;
পিযৰিপ্পযোগং ৰিজিগুচ্ছমানো, একো চরে খগ্গৰিসাণকপ্পো॥
Piyavippayogaṃ vijigucchamāno, eko care khaggavisāṇakappo.
৯৮.
98.
‘‘‘চাতুদ্দিসো অপ্পটিঘো চ হোতি, সন্তুস্সমানো ইতরীতরেন।
‘‘‘Cātuddiso appaṭigho ca hoti, santussamāno itarītarena;
পরিস্সযানং সহিতা অছম্ভী, একো চরে খগ্গৰিসাণকপ্পো॥
Parissayānaṃ sahitā achambhī, eko care khaggavisāṇakappo.
৯৯.
99.
‘‘‘দুস্সঙ্গহা পব্বজিতাপি একে, অথো গহট্ঠা ঘরমাৰসন্তা।
‘‘‘Dussaṅgahā pabbajitāpi eke, atho gahaṭṭhā gharamāvasantā;
অপ্পোস্সুক্কো পরপুত্তেসু হুত্ৰা, একো চরে খগ্গৰিসাণকপ্পো॥
Appossukko paraputtesu hutvā, eko care khaggavisāṇakappo.
১০০.
100.
‘‘‘ওরোপযিত্ৰা গিহিব্যঞ্জনানি, সঞ্ছিন্নপত্তো যথা কোৰিল়ারো।
‘‘‘Oropayitvā gihibyañjanāni, sañchinnapatto yathā koviḷāro;
ছেত্ৰান ৰীরো গিহিবন্ধনানি, একো চরে খগ্গৰিসাণকপ্পো॥
Chetvāna vīro gihibandhanāni, eko care khaggavisāṇakappo.
১০১.
101.
‘‘‘সচে লভেথ নিপকং সহাযং, সদ্ধিং চরং সাধুৰিহারিধীরং।
‘‘‘Sace labhetha nipakaṃ sahāyaṃ, saddhiṃ caraṃ sādhuvihāridhīraṃ;
অভিভুয্য সব্বানি পরিস্সযানি, চরেয্য তেনত্তমনো সতীমা॥
Abhibhuyya sabbāni parissayāni, careyya tenattamano satīmā.
১০২.
102.
‘‘‘নো চে লভেথ নিপকং সহাযং, সদ্ধিং চরং সাধুৰিহারিধীরং।
‘‘‘No ce labhetha nipakaṃ sahāyaṃ, saddhiṃ caraṃ sādhuvihāridhīraṃ;
রাজাৰ রট্ঠং ৰিজিতং পহায, একো চরে মাতঙ্গরঞ্ঞেৰ নাগো॥
Rājāva raṭṭhaṃ vijitaṃ pahāya, eko care mātaṅgaraññeva nāgo.
১০৩.
103.
‘‘‘অদ্ধা পসংসাম সহাযসম্পদং, সেট্ঠা সমা সেৰিতব্বা সহাযা।
‘‘‘Addhā pasaṃsāma sahāyasampadaṃ, seṭṭhā samā sevitabbā sahāyā;
এতে অলদ্ধা অনৰজ্জভোজী, একো চরে খগ্গৰিসাণকপ্পো॥
Ete aladdhā anavajjabhojī, eko care khaggavisāṇakappo.
১০৪.
104.
‘‘‘দিস্ৰা সুৰণ্ণস্স পভস্সরানি, কম্মারপুত্তেন সুনিট্ঠিতানি।
‘‘‘Disvā suvaṇṇassa pabhassarāni, kammāraputtena suniṭṭhitāni;
সঙ্ঘট্টমানানি দুৰে ভুজস্মিং, একো চরে খগ্গৰিসাণকপ্পো॥
Saṅghaṭṭamānāni duve bhujasmiṃ, eko care khaggavisāṇakappo.
১০৫.
105.
‘‘‘এৰং দুতীযেন সহা মমস্স, ৰাচাভিলাপো অভিসজ্জনা ৰা।
‘‘‘Evaṃ dutīyena sahā mamassa, vācābhilāpo abhisajjanā vā;
এতং ভযং আযতিং পেক্খমানো, একো চরে খগ্গৰিসাণকপ্পো॥
Etaṃ bhayaṃ āyatiṃ pekkhamāno, eko care khaggavisāṇakappo.
১০৬.
106.
‘‘‘কামা হি চিত্রা মধুরা মনোরমা, ৰিরূপরূপেন মথেন্তি চিত্তং।
‘‘‘Kāmā hi citrā madhurā manoramā, virūparūpena mathenti cittaṃ;
আদীনৰং কামগুণেসু দিস্ৰা, একো চরে খগ্গৰিসাণকপ্পো॥
Ādīnavaṃ kāmaguṇesu disvā, eko care khaggavisāṇakappo.
১০৭.
107.
‘‘‘ঈতী চ গণ্ডো চ উপদ্দৰো চ, রোগো চ সল্লঞ্চ ভযঞ্চ মেতং।
‘‘‘Ītī ca gaṇḍo ca upaddavo ca, rogo ca sallañca bhayañca metaṃ;
এতং ভযং কামগুণেসু দিস্ৰা, একো চরে খগ্গৰিসাণকপ্পো॥
Etaṃ bhayaṃ kāmaguṇesu disvā, eko care khaggavisāṇakappo.
১০৮.
108.
‘‘‘সীতঞ্চ উণ্হঞ্চ খুদং পিপাসং, ৰাতাতপে ডংসসরীসপে 11 চ।
‘‘‘Sītañca uṇhañca khudaṃ pipāsaṃ, vātātape ḍaṃsasarīsape 12 ca;
সব্বানিপেতানি অভিব্ভৰিত্ৰা 13, একো চরে খগ্গৰিসাণকপ্পো॥
Sabbānipetāni abhibbhavitvā 14, eko care khaggavisāṇakappo.
১০৯.
109.
‘‘‘নাগোৰ যূথানি ৰিৰজ্জযিত্ৰা, সঞ্জাতখন্ধো পদুমী উল়ারো।
‘‘‘Nāgova yūthāni vivajjayitvā, sañjātakhandho padumī uḷāro;
যথাভিরন্তং ৰিহরং অরঞ্ঞে, একো চরে খগ্গৰিসাণকপ্পো॥
Yathābhirantaṃ viharaṃ araññe, eko care khaggavisāṇakappo.
১১০.
110.
‘‘‘অট্ঠানতং সঙ্গণিকারতস্স, যং ফস্সযে 15 সামযিকং ৰিমুত্তিং।
‘‘‘Aṭṭhānataṃ saṅgaṇikāratassa, yaṃ phassaye 16 sāmayikaṃ vimuttiṃ;
আদিচ্চবন্ধুস্স ৰচো নিসম্ম, একো চরে খগ্গৰিসাণকপ্পো॥
Ādiccabandhussa vaco nisamma, eko care khaggavisāṇakappo.
১১১.
111.
‘‘‘দিট্ঠীৰিসূকানি উপাতিৰত্তো, পত্তো নিযামং পটিলদ্ধমগ্গো।
‘‘‘Diṭṭhīvisūkāni upātivatto, patto niyāmaṃ paṭiladdhamaggo;
উপ্পন্নঞাণোম্হি অনঞ্ঞনেয্যো, একো চরে খগ্গৰিসাণকপ্পো॥
Uppannañāṇomhi anaññaneyyo, eko care khaggavisāṇakappo.
১১২.
112.
‘‘‘নিল্লোলুপো নিক্কুহো নিপ্পিপাসো, নিম্মক্খ 17 নিদ্ধন্তকসাৰমোহো।
‘‘‘Nillolupo nikkuho nippipāso, nimmakkha 18 niddhantakasāvamoho;
নিরাসযো 19 সব্বলোকে ভৰিত্ৰা, একো চরে খগ্গৰিসাণকপ্পো॥
Nirāsayo 20 sabbaloke bhavitvā, eko care khaggavisāṇakappo.
১১৩.
113.
‘‘‘পাপং সহাযং পরিৰজ্জযেথ, অনত্থদস্সিং ৰিসমে নিৰিট্ঠং।
‘‘‘Pāpaṃ sahāyaṃ parivajjayetha, anatthadassiṃ visame niviṭṭhaṃ;
সযং ন সেৰে পসুতং পমত্তং, একো চরে খগ্গৰিসাণকপ্পো॥
Sayaṃ na seve pasutaṃ pamattaṃ, eko care khaggavisāṇakappo.
১১৪.
114.
‘‘‘বহুস্সুতং ধম্মধরং ভজেথ, মিত্তং উল়ারং পটিভানৰন্তং।
‘‘‘Bahussutaṃ dhammadharaṃ bhajetha, mittaṃ uḷāraṃ paṭibhānavantaṃ;
অঞ্ঞায অত্থানি ৰিনেয্য কঙ্খং, একো চরে খগ্গৰিসাণকপ্পো॥
Aññāya atthāni vineyya kaṅkhaṃ, eko care khaggavisāṇakappo.
১১৫.
115.
‘‘‘খিড্ডং রতিং কামসুখঞ্চ লোকে, অনলঙ্করিত্ৰা অনপেক্খমানো।
‘‘‘Khiḍḍaṃ ratiṃ kāmasukhañca loke, analaṅkaritvā anapekkhamāno;
ৰিভূসট্ঠানা ৰিরতো সচ্চৰাদী, একো চরে খগ্গৰিসাণকপ্পো॥
Vibhūsaṭṭhānā virato saccavādī, eko care khaggavisāṇakappo.
১১৬.
116.
‘‘‘পুত্তঞ্চ দারং পিতরঞ্চ মাতরং, ধনানি ধঞ্ঞানি চ বন্ধৰানি।
‘‘‘Puttañca dāraṃ pitarañca mātaraṃ, dhanāni dhaññāni ca bandhavāni;
হিত্ৰান কামানি যথোধিকানি, একো চরে খগ্গৰিসাণকপ্পো॥
Hitvāna kāmāni yathodhikāni, eko care khaggavisāṇakappo.
১১৭.
117.
‘‘‘সঙ্গো এসো পরিত্তমেত্থ সোখ্যং, অপ্পস্সাদো দুক্খমেৰেত্থ ভিয্যো।
‘‘‘Saṅgo eso parittamettha sokhyaṃ, appassādo dukkhamevettha bhiyyo;
গল়ো 21 এসো ইতি ঞত্ৰা মতিমা, একো চরে খগ্গৰিসাণকপ্পো॥
Gaḷo 22 eso iti ñatvā matimā, eko care khaggavisāṇakappo.
১১৮.
118.
‘‘‘সন্দালযিত্ৰান সংযোজনানি, জালংৰ ভেত্ৰা সলিলম্বুচারী।
‘‘‘Sandālayitvāna saṃyojanāni, jālaṃva bhetvā salilambucārī;
অগ্গীৰ দড্ঢং অনিৰত্তমানো, একো চরে খগ্গৰিসাণকপ্পো॥
Aggīva daḍḍhaṃ anivattamāno, eko care khaggavisāṇakappo.
১১৯.
119.
‘‘‘ওক্খিত্তচক্খূ ন চ পাদলোলো, গুত্তিন্দ্রিযো রক্খিতমানসানো।
‘‘‘Okkhittacakkhū na ca pādalolo, guttindriyo rakkhitamānasāno;
অনৰস্সুতো অপরিডয্হমানো, একো চরে খগ্গৰিসাণকপ্পো॥
Anavassuto apariḍayhamāno, eko care khaggavisāṇakappo.
১২০.
120.
‘‘‘ওহারযিত্ৰা গিহিব্যঞ্জনানি, সঞ্ছন্নপত্তো যথা পারিছত্তো।
‘‘‘Ohārayitvā gihibyañjanāni, sañchannapatto yathā pārichatto;
কাসাযৰত্থো অভিনিক্খমিত্ৰা, একো চরে খগ্গৰিসাণকপ্পো॥
Kāsāyavattho abhinikkhamitvā, eko care khaggavisāṇakappo.
১২১.
121.
‘‘‘রসেসু গেধং অকরং অলোলো, অনঞ্ঞপোসী সপদানচারী।
‘‘‘Rasesu gedhaṃ akaraṃ alolo, anaññaposī sapadānacārī;
কুলে কুলে অপ্পটিবদ্ধচিত্তো, একো চরে খগ্গৰিসাণকপ্পো॥
Kule kule appaṭibaddhacitto, eko care khaggavisāṇakappo.
১২২.
122.
‘‘‘পহায পঞ্চাৰরণানি চেতসো, উপক্কিলেসে ব্যপনুজ্জ সব্বে।
‘‘‘Pahāya pañcāvaraṇāni cetaso, upakkilese byapanujja sabbe;
অনিস্সিতো ছেজ্জ সিনেহদোসং, একো চরে খগ্গৰিসাণকপ্পো॥
Anissito chejja sinehadosaṃ, eko care khaggavisāṇakappo.
১২৩.
123.
‘‘‘ৰিপিট্ঠিকত্ৰান সুখঞ্চ দুক্খং, পুব্বেৰ সোমনস্সদোমনস্সং।
‘‘‘Vipiṭṭhikatvāna sukhañca dukkhaṃ, pubbeva somanassadomanassaṃ;
লদ্ধানুপেক্খং সমথং ৰিসুদ্ধং, একো চরে খগ্গৰিসাণকপ্পো॥
Laddhānupekkhaṃ samathaṃ visuddhaṃ, eko care khaggavisāṇakappo.
১২৪.
124.
‘‘‘আরদ্ধৰীরিযো পরমত্থপত্তিযা, অলীনচিত্তো অকুসীতৰুত্তি।
‘‘‘Āraddhavīriyo paramatthapattiyā, alīnacitto akusītavutti;
দল়্হনিক্কমো থামবলূপপন্নো, একো চরে খগ্গৰিসাণকপ্পো॥
Daḷhanikkamo thāmabalūpapanno, eko care khaggavisāṇakappo.
১২৫.
125.
‘‘‘পটিসল্লানং ঝানমরিঞ্চমানো, ধম্মেসু নিচ্চং অনুধম্মচারী।
‘‘‘Paṭisallānaṃ jhānamariñcamāno, dhammesu niccaṃ anudhammacārī;
আদীনৰং সম্মসিতা ভৰেসু, একো চরে খগ্গৰিসাণকপ্পো॥
Ādīnavaṃ sammasitā bhavesu, eko care khaggavisāṇakappo.
১২৬.
126.
‘‘‘তণ্হক্খযং পত্থযমপ্পমত্তো, অনেল়মূগো সুতৰা সতীমা।
‘‘‘Taṇhakkhayaṃ patthayamappamatto, aneḷamūgo sutavā satīmā;
সঙ্খাতধম্মো নিযতো পধানৰা, একো চরে খগ্গৰিসাণকপ্পো॥
Saṅkhātadhammo niyato padhānavā, eko care khaggavisāṇakappo.
১২৭.
127.
‘‘‘সীহোৰ সদ্দেসু অসন্তসন্তো, ৰাতোৰ জালম্হি অসজ্জমানো।
‘‘‘Sīhova saddesu asantasanto, vātova jālamhi asajjamāno;
পদুমংৰ তোযেন অলিম্পমানো, একো চরে খগ্গৰিসাণকপ্পো॥
Padumaṃva toyena alimpamāno, eko care khaggavisāṇakappo.
১২৮.
128.
‘‘‘সীহো যথা দাঠবলী পসয্হ, রাজা মিগানং অভিভুয্য চারী।
‘‘‘Sīho yathā dāṭhabalī pasayha, rājā migānaṃ abhibhuyya cārī;
সেৰেথ পন্তানি সেনাসনানি, একো চরে খগ্গৰিসাণকপ্পো॥
Sevetha pantāni senāsanāni, eko care khaggavisāṇakappo.
১২৯.
129.
‘‘‘মেত্তং উপেক্খং করুণং ৰিমুত্তিং, আসেৰমানো মুদিতঞ্চ কালে।
‘‘‘Mettaṃ upekkhaṃ karuṇaṃ vimuttiṃ, āsevamāno muditañca kāle;
সব্বেন লোকেন অৰিরুজ্ঝমানো, একো চরে খগ্গৰিসাণকপ্পো॥
Sabbena lokena avirujjhamāno, eko care khaggavisāṇakappo.
১৩০.
130.
‘‘‘রাগঞ্চ দোসঞ্চ পহায মোহং, সন্দালযিত্ৰান সংযোজনানি।
‘‘‘Rāgañca dosañca pahāya mohaṃ, sandālayitvāna saṃyojanāni;
অসন্তসং জীৰিতসঙ্খযম্হি, একো চরে খগ্গৰিসাণকপ্পো॥
Asantasaṃ jīvitasaṅkhayamhi, eko care khaggavisāṇakappo.
১৩১.
131.
‘‘‘ভজন্তি সেৰন্তি চ কারণত্থা, নিক্কারণা দুল্লভা অজ্জ মিত্তা।
‘‘‘Bhajanti sevanti ca kāraṇatthā, nikkāraṇā dullabhā ajja mittā;
অত্তত্থপঞ্ঞা অসুচীমনুস্সা, একো চরে খগ্গৰিসাণকপ্পো॥
Attatthapaññā asucīmanussā, eko care khaggavisāṇakappo.
১৩২.
132.
‘‘‘ৰিসুদ্ধসীলা সুৰিসুদ্ধপঞ্ঞা, সমাহিতা জাগরিযানুযুত্তা।
‘‘‘Visuddhasīlā suvisuddhapaññā, samāhitā jāgariyānuyuttā;
ৰিপস্সকা ধম্মৰিসেসদস্সী, মগ্গঙ্গবোজ্ঝঙ্গগতে ৰিজঞ্ঞা॥
Vipassakā dhammavisesadassī, maggaṅgabojjhaṅgagate vijaññā.
১৩৩.
133.
‘‘‘সুঞ্ঞপ্পণিধিঞ্চ তথানিমিত্তং 23, আসেৰযিত্ৰা জিনসাসনম্হি।
‘‘‘Suññappaṇidhiñca tathānimittaṃ 24, āsevayitvā jinasāsanamhi;
যে সাৰকত্তং ন ৰজন্তি ধীরা, ভৰন্তি পচ্চেকজিনা সযম্ভূ॥
Ye sāvakattaṃ na vajanti dhīrā, bhavanti paccekajinā sayambhū.
১৩৪.
134.
‘‘‘মহন্তধম্মা বহুধম্মকাযা, চিত্তিস্সরা সব্বদুক্খোঘতিণ্ণা।
‘‘‘Mahantadhammā bahudhammakāyā, cittissarā sabbadukkhoghatiṇṇā;
উদগ্গচিত্তা পরমত্থদস্সী, সীহোপমা খগ্গৰিসাণকপ্পা॥
Udaggacittā paramatthadassī, sīhopamā khaggavisāṇakappā.
১৩৫.
135.
‘‘‘সন্তিন্দ্রিযা সন্তমনা সমাধী, পচ্চন্তসত্তেসু পতিপ্পচারা 25।
‘‘‘Santindriyā santamanā samādhī, paccantasattesu patippacārā 26;
দীপা পরত্থ ইধ ৰিজ্জলন্তা, পচ্চেকবুদ্ধা সততং হিতামে॥
Dīpā parattha idha vijjalantā, paccekabuddhā satataṃ hitāme.
১৩৬.
136.
‘‘‘পহীনসব্বাৰরণা জনিন্দা, লোকপ্পদীপা ঘনকঞ্চনাভা।
‘‘‘Pahīnasabbāvaraṇā janindā, lokappadīpā ghanakañcanābhā;
নিস্সংসযং লোকসুদক্খিণেয্যা, পচ্চেকবুদ্ধা সততপ্পিতামে॥
Nissaṃsayaṃ lokasudakkhiṇeyyā, paccekabuddhā satatappitāme.
১৩৭.
137.
‘‘‘পচ্চেকবুদ্ধানং সুভাসিতানি, চরন্তি লোকম্হি সদেৰকম্হি।
‘‘‘Paccekabuddhānaṃ subhāsitāni, caranti lokamhi sadevakamhi;
সুত্ৰা তথা যে ন করোন্তি বালা, চরন্তি দুক্খেসু পুনপ্পুনং তে॥
Sutvā tathā ye na karonti bālā, caranti dukkhesu punappunaṃ te.
১৩৮.
138.
‘‘‘পচ্চেকবুদ্ধানং সুভাসিতানি, মধুং যথা খুদ্দমৰস্সৰন্তং।
‘‘‘Paccekabuddhānaṃ subhāsitāni, madhuṃ yathā khuddamavassavantaṃ;
সুত্ৰা তথা যে পটিপত্তিযুত্তা, ভৰন্তি তে সচ্চদসা সপঞ্ঞা’॥
Sutvā tathā ye paṭipattiyuttā, bhavanti te saccadasā sapaññā’.
১৩৯.
139.
‘‘পচ্চেকবুদ্ধেহি জিনেহি ভাসিতা, কথা 27 উল়ারা অভিনিক্খমিত্ৰা।
‘‘Paccekabuddhehi jinehi bhāsitā, kathā 28 uḷārā abhinikkhamitvā;
তা সক্যসীহেন নরুত্তমেন, পকাসিতা ধম্মৰিজাননত্থং॥
Tā sakyasīhena naruttamena, pakāsitā dhammavijānanatthaṃ.
১৪০.
140.
‘‘লোকানুকম্পায ইমানি তেসং, পচ্চেকবুদ্ধান ৰিকুব্বিতানি।
‘‘Lokānukampāya imāni tesaṃ, paccekabuddhāna vikubbitāni;
সংৰেগসঙ্গমতিৰড্ঢনত্থং, সযম্ভুসীহেন পকাসিতানী’’তি॥
Saṃvegasaṅgamativaḍḍhanatthaṃ, sayambhusīhena pakāsitānī’’ti.
পচ্চেকবুদ্ধাপদানং সমত্তং।
Paccekabuddhāpadānaṃ samattaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / অপদান-অট্ঠকথা • Apadāna-aṭṭhakathā / ২.পচ্চেকবুদ্ধঅপদানৰণ্ণনা • 2.Paccekabuddhaapadānavaṇṇanā
