| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
11. பச்சா²ஜாதபச்சயனித்³தே³ஸவண்ணனா
11. Pacchājātapaccayaniddesavaṇṇanā
11. பச்சா²ஜாதபச்சயனித்³தே³ஸே பச்சா²ஜாதாதி யஸ்ஸ காயஸ்ஸ பச்சயா ஹொந்தி, தஸ்மிங் உப்பஜ்ஜித்வா டி²தே ஜாதா. புரேஜாதஸ்ஸாதி தேஸங் உப்பாத³தோ பட²மதரங் ஜாதஸ்ஸ ஜாதிக்க²ணங் அதிக்கமித்வா டி²திப்பத்தஸ்ஸ. இமஸ்ஸ காயஸ்ஸாதி இமஸ்ஸ சதுஸமுட்டா²னிகதிஸமுட்டா²னிகபூ⁴தஉபாதா³ரூபஸங்கா²தஸ்ஸ காயஸ்ஸ. எத்த² ச திஸமுட்டா²னிககாயோதி ஆஹாரஸமுட்டா²னஸ்ஸ அபா⁴வதோ ப்³ரஹ்மபாரிஸஜ்ஜாதீ³னங் காயோ வேதி³தப்³போ³. அயமெத்த² பாளிவண்ணனா. அயங் பன பச்சா²ஜாதபச்சயோ நாம ஸங்கே²பதோ ட²பெத்வா ஆருப்பவிபாகே அவஸேஸா சதுபூ⁴மகா அரூபக்க²ந்தா⁴. ஸோ ஜாதிவஸேன குஸலாகுஸலவிபாககிரியபே⁴தே³ன சதுதா⁴ பி⁴ஜ்ஜதீதி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
11. Pacchājātapaccayaniddese pacchājātāti yassa kāyassa paccayā honti, tasmiṃ uppajjitvā ṭhite jātā. Purejātassāti tesaṃ uppādato paṭhamataraṃ jātassa jātikkhaṇaṃ atikkamitvā ṭhitippattassa. Imassa kāyassāti imassa catusamuṭṭhānikatisamuṭṭhānikabhūtaupādārūpasaṅkhātassa kāyassa. Ettha ca tisamuṭṭhānikakāyoti āhārasamuṭṭhānassa abhāvato brahmapārisajjādīnaṃ kāyo veditabbo. Ayamettha pāḷivaṇṇanā. Ayaṃ pana pacchājātapaccayo nāma saṅkhepato ṭhapetvā āruppavipāke avasesā catubhūmakā arūpakkhandhā. So jātivasena kusalākusalavipākakiriyabhedena catudhā bhijjatīti evamettha nānappakārabhedato viññātabbo vinicchayo.
ஏவங் பி⁴ன்னே பனெத்த² பஞ்சவோகாரப⁴வே உப்பன்னங் சதுபூ⁴மககுஸலஞ்ச அகுஸலஞ்ச உப்பாத³க்க²ணங் அதிக்கமித்வா டி²திப்பத்தஸ்ஸ சதுஸமுட்டா²னிகதிஸமுட்டா²னிகரூபகாயஸ்ஸ பச்சா²ஜாதபச்சயோ ஹோதி. விபாகேபி ட²பெத்வா படிஸந்தி⁴விபாகங் அவஸேஸோ காமாவசரரூபாவசரவிபாகோ தஸ்ஸேவ ஏகந்தேன பச்சா²ஜாதபச்சயோ ஹோதி. லோகுத்தரோபி பஞ்சவோகாரே உப்பன்னவிபாகோ தஸ்ஸேவ பச்சா²ஜாதபச்சயோ ஹோதி. தேபூ⁴மககிரியாபி பஞ்சவோகாரே உப்பன்னாவ வுத்தப்பகாரஸ்ஸ காயஸ்ஸ பச்சா²ஜாதபச்சயோ ஹோதீதி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Evaṃ bhinne panettha pañcavokārabhave uppannaṃ catubhūmakakusalañca akusalañca uppādakkhaṇaṃ atikkamitvā ṭhitippattassa catusamuṭṭhānikatisamuṭṭhānikarūpakāyassa pacchājātapaccayo hoti. Vipākepi ṭhapetvā paṭisandhivipākaṃ avaseso kāmāvacararūpāvacaravipāko tasseva ekantena pacchājātapaccayo hoti. Lokuttaropi pañcavokāre uppannavipāko tasseva pacchājātapaccayo hoti. Tebhūmakakiriyāpi pañcavokāre uppannāva vuttappakārassa kāyassa pacchājātapaccayo hotīti evamettha paccayuppannatopi viññātabbo vinicchayoti.
பச்சா²ஜாதபச்சயனித்³தே³ஸவண்ணனா.
Pacchājātapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
