| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੧੧. ਪਚ੍ਛਾਜਾਤਪਚ੍ਚਯਨਿਦ੍ਦੇਸવਣ੍ਣਨਾ
11. Pacchājātapaccayaniddesavaṇṇanā
੧੧. ਪਚ੍ਛਾਜਾਤਪਚ੍ਚਯਨਿਦ੍ਦੇਸੇ ਪਚ੍ਛਾਜਾਤਾਤਿ ਯਸ੍ਸ ਕਾਯਸ੍ਸ ਪਚ੍ਚਯਾ ਹੋਨ੍ਤਿ, ਤਸ੍ਮਿਂ ਉਪ੍ਪਜ੍ਜਿਤ੍વਾ ਠਿਤੇ ਜਾਤਾ। ਪੁਰੇਜਾਤਸ੍ਸਾਤਿ ਤੇਸਂ ਉਪ੍ਪਾਦਤੋ ਪਠਮਤਰਂ ਜਾਤਸ੍ਸ ਜਾਤਿਕ੍ਖਣਂ ਅਤਿਕ੍ਕਮਿਤ੍વਾ ਠਿਤਿਪ੍ਪਤ੍ਤਸ੍ਸ। ਇਮਸ੍ਸ ਕਾਯਸ੍ਸਾਤਿ ਇਮਸ੍ਸ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਭੂਤਉਪਾਦਾਰੂਪਸਙ੍ਖਾਤਸ੍ਸ ਕਾਯਸ੍ਸ। ਏਤ੍ਥ ਚ ਤਿਸਮੁਟ੍ਠਾਨਿਕਕਾਯੋਤਿ ਆਹਾਰਸਮੁਟ੍ਠਾਨਸ੍ਸ ਅਭਾવਤੋ ਬ੍ਰਹ੍ਮਪਾਰਿਸਜ੍ਜਾਦੀਨਂ ਕਾਯੋ વੇਦਿਤਬ੍ਬੋ। ਅਯਮੇਤ੍ਥ ਪਾਲ਼ਿવਣ੍ਣਨਾ। ਅਯਂ ਪਨ ਪਚ੍ਛਾਜਾਤਪਚ੍ਚਯੋ ਨਾਮ ਸਙ੍ਖੇਪਤੋ ਠਪੇਤ੍વਾ ਆਰੁਪ੍ਪવਿਪਾਕੇ ਅવਸੇਸਾ ਚਤੁਭੂਮਕਾ ਅਰੂਪਕ੍ਖਨ੍ਧਾ। ਸੋ ਜਾਤਿવਸੇਨ ਕੁਸਲਾਕੁਸਲવਿਪਾਕਕਿਰਿਯਭੇਦੇਨ ਚਤੁਧਾ ਭਿਜ੍ਜਤੀਤਿ ਏવਮੇਤ੍ਥ ਨਾਨਪ੍ਪਕਾਰਭੇਦਤੋ વਿਞ੍ਞਾਤਬ੍ਬੋ વਿਨਿਚ੍ਛਯੋ।
11. Pacchājātapaccayaniddese pacchājātāti yassa kāyassa paccayā honti, tasmiṃ uppajjitvā ṭhite jātā. Purejātassāti tesaṃ uppādato paṭhamataraṃ jātassa jātikkhaṇaṃ atikkamitvā ṭhitippattassa. Imassa kāyassāti imassa catusamuṭṭhānikatisamuṭṭhānikabhūtaupādārūpasaṅkhātassa kāyassa. Ettha ca tisamuṭṭhānikakāyoti āhārasamuṭṭhānassa abhāvato brahmapārisajjādīnaṃ kāyo veditabbo. Ayamettha pāḷivaṇṇanā. Ayaṃ pana pacchājātapaccayo nāma saṅkhepato ṭhapetvā āruppavipāke avasesā catubhūmakā arūpakkhandhā. So jātivasena kusalākusalavipākakiriyabhedena catudhā bhijjatīti evamettha nānappakārabhedato viññātabbo vinicchayo.
ਏવਂ ਭਿਨ੍ਨੇ ਪਨੇਤ੍ਥ ਪਞ੍ਚવੋਕਾਰਭવੇ ਉਪ੍ਪਨ੍ਨਂ ਚਤੁਭੂਮਕਕੁਸਲਞ੍ਚ ਅਕੁਸਲਞ੍ਚ ਉਪ੍ਪਾਦਕ੍ਖਣਂ ਅਤਿਕ੍ਕਮਿਤ੍વਾ ਠਿਤਿਪ੍ਪਤ੍ਤਸ੍ਸ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਰੂਪਕਾਯਸ੍ਸ ਪਚ੍ਛਾਜਾਤਪਚ੍ਚਯੋ ਹੋਤਿ। વਿਪਾਕੇਪਿ ਠਪੇਤ੍વਾ ਪਟਿਸਨ੍ਧਿવਿਪਾਕਂ ਅવਸੇਸੋ ਕਾਮਾવਚਰਰੂਪਾવਚਰવਿਪਾਕੋ ਤਸ੍ਸੇવ ਏਕਨ੍ਤੇਨ ਪਚ੍ਛਾਜਾਤਪਚ੍ਚਯੋ ਹੋਤਿ। ਲੋਕੁਤ੍ਤਰੋਪਿ ਪਞ੍ਚવੋਕਾਰੇ ਉਪ੍ਪਨ੍ਨવਿਪਾਕੋ ਤਸ੍ਸੇવ ਪਚ੍ਛਾਜਾਤਪਚ੍ਚਯੋ ਹੋਤਿ। ਤੇਭੂਮਕਕਿਰਿਯਾਪਿ ਪਞ੍ਚવੋਕਾਰੇ ਉਪ੍ਪਨ੍ਨਾવ વੁਤ੍ਤਪ੍ਪਕਾਰਸ੍ਸ ਕਾਯਸ੍ਸ ਪਚ੍ਛਾਜਾਤਪਚ੍ਚਯੋ ਹੋਤੀਤਿ ਏવਮੇਤ੍ਥ ਪਚ੍ਚਯੁਪ੍ਪਨ੍ਨਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋਤਿ।
Evaṃ bhinne panettha pañcavokārabhave uppannaṃ catubhūmakakusalañca akusalañca uppādakkhaṇaṃ atikkamitvā ṭhitippattassa catusamuṭṭhānikatisamuṭṭhānikarūpakāyassa pacchājātapaccayo hoti. Vipākepi ṭhapetvā paṭisandhivipākaṃ avaseso kāmāvacararūpāvacaravipāko tasseva ekantena pacchājātapaccayo hoti. Lokuttaropi pañcavokāre uppannavipāko tasseva pacchājātapaccayo hoti. Tebhūmakakiriyāpi pañcavokāre uppannāva vuttappakārassa kāyassa pacchājātapaccayo hotīti evamettha paccayuppannatopi viññātabbo vinicchayoti.
ਪਚ੍ਛਾਜਾਤਪਚ੍ਚਯਨਿਦ੍ਦੇਸવਣ੍ਣਨਾ।
Pacchājātapaccayaniddesavaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਪਟ੍ਠਾਨਪਾਲ਼ਿ • Paṭṭhānapāḷi / (੨) ਪਚ੍ਚਯਨਿਦ੍ਦੇਸੋ • (2) Paccayaniddeso
