பச்சி²மவிகப்பனுபக³சீவராதி³கதா²

359. பங்ஸுகூலகதோதி கதபங்ஸுகூலோ. க³ருகோ ஹோதீதி ஜிண்ணஜிண்ணட்டா²னே அக்³க³ளாரோபனேன க³ருகோ ஹோதி. ஸுத்தலூக²ங் காதுந்தி ஸுத்தேனேவ அக்³க³ளங் காதுந்தி அத்தோ². விகண்ணோ ஹோதீதி ஸுத்தங் அச்செ²த்வா அச்செ²த்வா ஸிப்³ப³ந்தானங் ஏகோ ஸங்கா⁴டிகோணோ தீ³கோ⁴ ஹோதி. விகண்ணங் உத்³த⁴ரிதுந்தி தீ³க⁴கோணங் சி²ந்தி³துங். ஓகிரியந்தீதி சி²ன்னகோணதோ க³ளந்தி. அனுவாதங் பரிப⁴ண்ட³ந்தி அனுவாதஞ்சேவ பரிப⁴ண்ட³ஞ்ச. பத்தா லுஜ்ஜந்தீதி மஹந்தேஸு பத்தமுகே²ஸு தி³ன்னானி ஸுத்தானி க³ளந்தி, ததோ பத்தா லுஜ்ஜந்தி. அட்ட²பத³கங் காதுந்தி அட்ட²பத³கச்ச²ன்னேன பத்தமுக²ங் ஸிப்³பி³துங்.

360. அன்வாதி⁴கம்பி ஆரோபேதுந்தி ஆக³ந்துகபத்தம்பி தா³துங். இத³ங் பன அப்பஹோனகே ஆரோபேதப்³ப³ங். ஸசே பஹோதி, ஆக³ந்துகபத்தங் ந வட்டதி, சி²ந்தி³தப்³ப³மேவ.

361. ந ச பி⁴க்க²வே ஸத்³தா⁴தெ³ய்யந்தி எத்த² ஸேஸஞாதீனங் தெ³ந்தோ வினிபாதேதியேவ. மாதாபிதரோ பன ஸசே ரஜ்ஜே டி²தா பத்த²யந்தி, தா³தப்³ப³ங்.

362. கி³லானோதி கி³லானதாய க³ஹெத்வா க³ந்துங் அஸமத்தோ². வஸ்ஸிகஸங்கேதந்தி வஸ்ஸிகே சத்தாரோ மாஸே. நதீ³பாரந்தி நதி³யா பாரே ப⁴த்தங் பு⁴ஞ்ஜிதப்³ப³ங் ஹோதி. அக்³க³ளகு³த்திவிஹாரோதி ஸப்³பெ³ஸ்வேவ சேதேஸு கி³லானவஸ்ஸிகஸங்கேதனதீ³பாரக³மனஅத்த²தகதி²னபா⁴வேஸு அக்³க³ளகு³த்தியேவ பமாணங். கு³த்தே ஏவ ஹி விஹாரே ஏதேஸு காரணேஸு நிக்கி²பித்வா ப³ஹி க³ந்துங் வட்டதி, ந அகு³த்தே. ஆரஞ்ஞகஸ்ஸ பன விஹாரோ ந ஸுகு³த்தோ ஹோதி, தேன ப⁴ண்டு³க்க²லிகாய பக்கி²பித்வா பாஸாணஸுஸிர ருக்க²ஸுஸிராதீ³ஸு ஸுப்படிச்ச²ன்னேஸு ட²பெத்வா க³ந்தப்³ப³ங்.