| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
221. பச்சி²மவிகப்பனுபக³சீவராதி³கதா²
221. Pacchimavikappanupagacīvarādikathā
358. அத² கோ² பி⁴க்கூ²னங் ஏதத³ஹோஸி – ‘‘யானி தானி ப⁴க³வதா அனுஞ்ஞாதானி திசீவரந்தி வா வஸ்ஸிகஸாடிகாதி வா நிஸீத³னந்தி வா பச்சத்த²ரணந்தி வா கண்டு³ப்படிச்சா²தீ³தி வா முக²புஞ்ச²னசோளந்தி வா பரிக்கா²ரசோளந்தி வா, ஸப்³பா³னி தானி அதி⁴ட்டா²தப்³பா³னி நு கோ², உதா³ஹு, விகப்பேதப்³பா³னீ’’தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, திசீவரங் அதி⁴ட்டா²துங் ந விகப்பேதுங்; வஸ்ஸிகஸாடிகங் வஸ்ஸானங் சாதுமாஸங் அதி⁴ட்டா²துங், ததோ பரங் விகப்பேதுங்; நிஸீத³னங் அதி⁴ட்டா²துங் ந விகப்பேதுங்; பச்சத்த²ரணங் அதி⁴ட்டா²துங் ந விகப்பேதுங்; கண்டு³ப்படிச்சா²தி³ங் யாவஆபா³தா⁴ அதி⁴ட்டா²துங் ததோ பரங் விகப்பேதுங்; முக²புஞ்ச²னசோளங் அதி⁴ட்டா²துங் ந விகப்பேதுங்; பரிக்கா²ரசோளங் அதி⁴ட்டா²துங் ந விகப்பேதுந்தி.
358. Atha kho bhikkhūnaṃ etadahosi – ‘‘yāni tāni bhagavatā anuññātāni ticīvaranti vā vassikasāṭikāti vā nisīdananti vā paccattharaṇanti vā kaṇḍuppaṭicchādīti vā mukhapuñchanacoḷanti vā parikkhāracoḷanti vā, sabbāni tāni adhiṭṭhātabbāni nu kho, udāhu, vikappetabbānī’’ti? Bhagavato etamatthaṃ ārocesuṃ. Anujānāmi, bhikkhave, ticīvaraṃ adhiṭṭhātuṃ na vikappetuṃ; vassikasāṭikaṃ vassānaṃ cātumāsaṃ adhiṭṭhātuṃ, tato paraṃ vikappetuṃ; nisīdanaṃ adhiṭṭhātuṃ na vikappetuṃ; paccattharaṇaṃ adhiṭṭhātuṃ na vikappetuṃ; kaṇḍuppaṭicchādiṃ yāvaābādhā adhiṭṭhātuṃ tato paraṃ vikappetuṃ; mukhapuñchanacoḷaṃ adhiṭṭhātuṃ na vikappetuṃ; parikkhāracoḷaṃ adhiṭṭhātuṃ na vikappetunti.
அத² கோ² பி⁴க்கூ²னங் ஏதத³ஹோஸி – ‘‘கித்தகங் பச்சி²மங் நு கோ² சீவரங் விகப்பேதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஆயாமேன அட்ட²ங்கு³லங் ஸுக³தங்கு³லேன சதுரங்கு³லவித்த²தங் பச்சி²மங் சீவரங் விகப்பேதுந்தி.
Atha kho bhikkhūnaṃ etadahosi – ‘‘kittakaṃ pacchimaṃ nu kho cīvaraṃ vikappetabba’’nti? Bhagavato etamatthaṃ ārocesuṃ. Anujānāmi, bhikkhave, āyāmena aṭṭhaṅgulaṃ sugataṅgulena caturaṅgulavitthataṃ pacchimaṃ cīvaraṃ vikappetunti.
359. தேன கோ² பன ஸமயேன ஆயஸ்மதோ மஹாகஸ்ஸபஸ்ஸ பங்ஸுகூலகதோ க³ருகோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸுத்தலூக²ங் காதுந்தி. விகண்ணோ ஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, விகண்ணங் உத்³த⁴ரிதுந்தி. ஸுத்தா ஓகிரியந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அனுவாதங் பரிப⁴ண்ட³ங் ஆரோபேதுந்தி.
359. Tena kho pana samayena āyasmato mahākassapassa paṃsukūlakato garuko hoti. Bhagavato etamatthaṃ ārocesuṃ. Anujānāmi, bhikkhave, suttalūkhaṃ kātunti. Vikaṇṇo hoti. Bhagavato etamatthaṃ ārocesuṃ. Anujānāmi, bhikkhave, vikaṇṇaṃ uddharitunti. Suttā okiriyanti. Bhagavato etamatthaṃ ārocesuṃ. Anujānāmi, bhikkhave, anuvātaṃ paribhaṇḍaṃ āropetunti.
தேன கோ² பன ஸமயேன ஸங்கா⁴டியா பத்தா லுஜ்ஜந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அட்ட²பத³கங் காதுந்தி.
Tena kho pana samayena saṅghāṭiyā pattā lujjanti. Bhagavato etamatthaṃ ārocesuṃ. Anujānāmi, bhikkhave, aṭṭhapadakaṃ kātunti.
360. தேன கோ² பன ஸமயேன அஞ்ஞதரஸ்ஸ பி⁴க்கு²னோ திசீவரே கயிரமானே ஸப்³ப³ங் சி²ன்னகங் நப்பஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, த்³வே சி²ன்னகானி ஏகங் அச்சி²ன்னகந்தி.
360. Tena kho pana samayena aññatarassa bhikkhuno ticīvare kayiramāne sabbaṃ chinnakaṃ nappahoti. Bhagavato etamatthaṃ ārocesuṃ. Anujānāmi, bhikkhave, dve chinnakāni ekaṃ acchinnakanti.
த்³வே சி²ன்னகானி ஏகங் அச்சி²ன்னகங் நப்பஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, த்³வே அச்சி²ன்னகானி ஏகங் சி²ன்னகந்தி.
Dve chinnakāni ekaṃ acchinnakaṃ nappahoti. Bhagavato etamatthaṃ ārocesuṃ. Anujānāmi, bhikkhave, dve acchinnakāni ekaṃ chinnakanti.
த்³வே அச்சி²ன்னகானி ஏகங் சி²ன்னகங் நப்பஹோதி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, அன்வாதி⁴கம்பி ஆரோபேதுங், ந ச, பி⁴க்க²வே, ஸப்³ப³ங் அச்சி²ன்னகங் தா⁴ரேதப்³ப³ங். யோ தா⁴ரெய்ய, ஆபத்தி து³க்கடஸ்ஸாதி.
Dve acchinnakāni ekaṃ chinnakaṃ nappahoti. Bhagavato etamatthaṃ ārocesuṃ. Anujānāmi, bhikkhave, anvādhikampi āropetuṃ, na ca, bhikkhave, sabbaṃ acchinnakaṃ dhāretabbaṃ. Yo dhāreyya, āpatti dukkaṭassāti.
361. தேன கோ² பன ஸமயேன அஞ்ஞதரஸ்ஸ பி⁴க்கு²னோ ப³ஹுங் சீவரங் உப்பன்னங் ஹோதி. ஸோ ச தங் சீவரங் மாதாபிதூனங் தா³துகாமோ ஹோதி. ப⁴க³வதோ ஏதமத்த²ங் ஆரோசேஸுங். மாதாபிதரோதி 1 கோ², பி⁴க்க²வே, த³த³மானே 2 கிங் வதெ³ய்யாம? அனுஜானாமி , பி⁴க்க²வே, மாதாபிதூனங் தா³துங். ந ச, பி⁴க்க²வே, ஸத்³தா⁴தெ³ய்யங் வினிபாதேதப்³ப³ங். யோ வினிபாதெய்ய, ஆபத்தி து³க்கடஸ்ஸாதி.
361. Tena kho pana samayena aññatarassa bhikkhuno bahuṃ cīvaraṃ uppannaṃ hoti. So ca taṃ cīvaraṃ mātāpitūnaṃ dātukāmo hoti. Bhagavato etamatthaṃ ārocesuṃ. Mātāpitaroti 3 kho, bhikkhave, dadamāne 4 kiṃ vadeyyāma? Anujānāmi , bhikkhave, mātāpitūnaṃ dātuṃ. Na ca, bhikkhave, saddhādeyyaṃ vinipātetabbaṃ. Yo vinipāteyya, āpatti dukkaṭassāti.
362. தேன கோ² பன ஸமயேன அஞ்ஞதரோ பி⁴க்கு² அந்த⁴வனே சீவரங் நிக்கி²பித்வா ஸந்தருத்தரேன கா³மங் பிண்டா³ய பாவிஸி. சோரா தங் சீவரங் அவஹரிங்ஸு. ஸோ பி⁴க்கு² து³ச்சோளோ ஹோதி லூக²சீவரோ. பி⁴க்கூ² ஏவமாஹங்ஸு – ‘‘கிஸ்ஸ த்வங், ஆவுஸோ, து³ச்சோளோ லூக²சீவரோஸீ’’தி? ‘‘இதா⁴ஹங் 5, ஆவுஸோ, அந்த⁴வனே சீவரங் நிக்கி²பித்வா ஸந்தருத்தரேன கா³மங் பிண்டா³ய பாவிஸிங். சோரா தங் சீவரங் அவஹரிங்ஸு. தேனாஹங் து³ச்சோளோ லூக²சீவரோ’’தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, ஸந்தருத்தரேன கா³மோ பவிஸிதப்³போ³. யோ பவிஸெய்ய, ஆபத்தி து³க்கடஸ்ஸாதி.
362. Tena kho pana samayena aññataro bhikkhu andhavane cīvaraṃ nikkhipitvā santaruttarena gāmaṃ piṇḍāya pāvisi. Corā taṃ cīvaraṃ avahariṃsu. So bhikkhu duccoḷo hoti lūkhacīvaro. Bhikkhū evamāhaṃsu – ‘‘kissa tvaṃ, āvuso, duccoḷo lūkhacīvarosī’’ti? ‘‘Idhāhaṃ 6, āvuso, andhavane cīvaraṃ nikkhipitvā santaruttarena gāmaṃ piṇḍāya pāvisiṃ. Corā taṃ cīvaraṃ avahariṃsu. Tenāhaṃ duccoḷo lūkhacīvaro’’ti. Bhagavato etamatthaṃ ārocesuṃ. Na, bhikkhave, santaruttarena gāmo pavisitabbo. Yo paviseyya, āpatti dukkaṭassāti.
தேன கோ² பன ஸமயேன ஆயஸ்மா ஆனந்தோ³ அஸ்ஸதியா ஸந்தருத்தரேன கா³மங் பிண்டா³ய பாவிஸி. பி⁴க்கூ² ஆயஸ்மந்தங் ஆனந்த³ங் ஏதத³வோசுங் – ‘‘நனு , ஆவுஸோ ஆனந்த³, ப⁴க³வதா பஞ்ஞத்தங் – ‘ந ஸந்தருத்தரேன கா³மோ பவிஸிதப்³போ³’தி? கிஸ்ஸ த்வங், ஆவுஸோ ஆனந்த³, ஸந்தருத்தரேன கா³மங் பவிட்டோ²’’தி? ‘‘ஸச்சங், ஆவுஸோ, ப⁴க³வதா பஞ்ஞத்தங் – ‘ந ஸந்தருத்தரேன கா³மோ பவிஸிதப்³போ³’தி. அபி சாஹங் அஸ்ஸதியா பவிட்டோ²’’தி. ப⁴க³வதோ ஏதமத்த²ங் ஆரோசேஸுங்.
Tena kho pana samayena āyasmā ānando assatiyā santaruttarena gāmaṃ piṇḍāya pāvisi. Bhikkhū āyasmantaṃ ānandaṃ etadavocuṃ – ‘‘nanu , āvuso ānanda, bhagavatā paññattaṃ – ‘na santaruttarena gāmo pavisitabbo’ti? Kissa tvaṃ, āvuso ānanda, santaruttarena gāmaṃ paviṭṭho’’ti? ‘‘Saccaṃ, āvuso, bhagavatā paññattaṃ – ‘na santaruttarena gāmo pavisitabbo’ti. Api cāhaṃ assatiyā paviṭṭho’’ti. Bhagavato etamatthaṃ ārocesuṃ.
பஞ்சிமே, பி⁴க்க²வே, பச்சயா ஸங்கா⁴டியா நிக்கே²பாய – கி³லானோ வா ஹோதி, வஸ்ஸிகஸங்கேதங் வா ஹோதி, நதீ³பாரங் க³ந்துங் வா ஹோதி, அக்³க³ளகு³த்திவிஹாரோ வா ஹோதி, அத்த²தகதி²னங் வா ஹோதி. இமே கோ², பி⁴க்க²வே, பஞ்ச பச்சயா ஸங்கா⁴டியா நிக்கே²பாய.
Pañcime, bhikkhave, paccayā saṅghāṭiyā nikkhepāya – gilāno vā hoti, vassikasaṅketaṃ vā hoti, nadīpāraṃ gantuṃ vā hoti, aggaḷaguttivihāro vā hoti, atthatakathinaṃ vā hoti. Ime kho, bhikkhave, pañca paccayā saṅghāṭiyā nikkhepāya.
பஞ்சிமே, பி⁴க்க²வே, பச்சயா உத்தராஸங்க³ஸ்ஸ நிக்கே²பாய…பே॰… அந்தரவாஸகஸ்ஸ நிக்கே²பாய – கி³லானோ வா ஹோதி, வஸ்ஸிகஸங்கேதங் வா ஹோதி, நதீ³பாரங் க³ந்துங் வா ஹோதி, அக்³க³ளகு³த்திவிஹாரோ வா ஹோதி, அத்த²தகதி²னங் வா ஹோதி. இமே கோ², பி⁴க்க²வே, பஞ்ச பச்சயா உத்தராஸங்க³ஸ்ஸ அந்தரவாஸகஸ்ஸ நிக்கே²பாய.
Pañcime, bhikkhave, paccayā uttarāsaṅgassa nikkhepāya…pe… antaravāsakassa nikkhepāya – gilāno vā hoti, vassikasaṅketaṃ vā hoti, nadīpāraṃ gantuṃ vā hoti, aggaḷaguttivihāro vā hoti, atthatakathinaṃ vā hoti. Ime kho, bhikkhave, pañca paccayā uttarāsaṅgassa antaravāsakassa nikkhepāya.
பஞ்சிமே, பி⁴க்க²வே, பச்சயா வஸ்ஸிகஸாடிகாய நிக்கே²பாய – கி³லானோ வா ஹோதி, நிஸ்ஸீமங் க³ந்துங் வா ஹோதி, நதீ³பாரங் க³ந்துங் வா ஹோதி, அக்³க³ளகு³த்திவிஹாரோ வா ஹோதி, வஸ்ஸிகஸாடிகா அகதா வா ஹோதி விப்பகதா வா. இமே கோ², பி⁴க்க²வே, பஞ்ச பச்சயா வஸ்ஸிகஸாடிகாய நிக்கே²பாயாதி.
Pañcime, bhikkhave, paccayā vassikasāṭikāya nikkhepāya – gilāno vā hoti, nissīmaṃ gantuṃ vā hoti, nadīpāraṃ gantuṃ vā hoti, aggaḷaguttivihāro vā hoti, vassikasāṭikā akatā vā hoti vippakatā vā. Ime kho, bhikkhave, pañca paccayā vassikasāṭikāya nikkhepāyāti.
பச்சி²மவிகப்பனுபக³சீவராதி³கதா² நிட்டி²தா.
Pacchimavikappanupagacīvarādikathā niṭṭhitā.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பச்சி²மவிகப்பனுபக³சீவராதி³கதா² • Pacchimavikappanupagacīvarādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பச்சி²மவிகப்பனுபக³சீவராதி³கதா²வண்ணனா • Pacchimavikappanupagacīvarādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / நிஸீத³னாதி³அனுஜானநகதா²வண்ணனா • Nisīdanādianujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சீவரரஜனகதா²தி³வண்ணனா • Cīvararajanakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 221. பச்சி²மவிகப்பனுபக³சீவராதி³கதா² • 221. Pacchimavikappanupagacīvarādikathā
