| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২২১. পচ্ছিমৰিকপ্পনুপগচীৰরাদিকথা
221. Pacchimavikappanupagacīvarādikathā
৩৫৮. অথ খো ভিক্খূনং এতদহোসি – ‘‘যানি তানি ভগৰতা অনুঞ্ঞাতানি তিচীৰরন্তি ৰা ৰস্সিকসাটিকাতি ৰা নিসীদনন্তি ৰা পচ্চত্থরণন্তি ৰা কণ্ডুপ্পটিচ্ছাদীতি ৰা মুখপুঞ্ছনচোল়ন্তি ৰা পরিক্খারচোল়ন্তি ৰা, সব্বানি তানি অধিট্ঠাতব্বানি নু খো, উদাহু, ৰিকপ্পেতব্বানী’’তি? ভগৰতো এতমত্থং আরোচেসুং। অনুজানামি, ভিক্খৰে, তিচীৰরং অধিট্ঠাতুং ন ৰিকপ্পেতুং; ৰস্সিকসাটিকং ৰস্সানং চাতুমাসং অধিট্ঠাতুং, ততো পরং ৰিকপ্পেতুং; নিসীদনং অধিট্ঠাতুং ন ৰিকপ্পেতুং; পচ্চত্থরণং অধিট্ঠাতুং ন ৰিকপ্পেতুং; কণ্ডুপ্পটিচ্ছাদিং যাৰআবাধা অধিট্ঠাতুং ততো পরং ৰিকপ্পেতুং; মুখপুঞ্ছনচোল়ং অধিট্ঠাতুং ন ৰিকপ্পেতুং; পরিক্খারচোল়ং অধিট্ঠাতুং ন ৰিকপ্পেতুন্তি।
358. Atha kho bhikkhūnaṃ etadahosi – ‘‘yāni tāni bhagavatā anuññātāni ticīvaranti vā vassikasāṭikāti vā nisīdananti vā paccattharaṇanti vā kaṇḍuppaṭicchādīti vā mukhapuñchanacoḷanti vā parikkhāracoḷanti vā, sabbāni tāni adhiṭṭhātabbāni nu kho, udāhu, vikappetabbānī’’ti? Bhagavato etamatthaṃ ārocesuṃ. Anujānāmi, bhikkhave, ticīvaraṃ adhiṭṭhātuṃ na vikappetuṃ; vassikasāṭikaṃ vassānaṃ cātumāsaṃ adhiṭṭhātuṃ, tato paraṃ vikappetuṃ; nisīdanaṃ adhiṭṭhātuṃ na vikappetuṃ; paccattharaṇaṃ adhiṭṭhātuṃ na vikappetuṃ; kaṇḍuppaṭicchādiṃ yāvaābādhā adhiṭṭhātuṃ tato paraṃ vikappetuṃ; mukhapuñchanacoḷaṃ adhiṭṭhātuṃ na vikappetuṃ; parikkhāracoḷaṃ adhiṭṭhātuṃ na vikappetunti.
অথ খো ভিক্খূনং এতদহোসি – ‘‘কিত্তকং পচ্ছিমং নু খো চীৰরং ৰিকপ্পেতব্ব’’ন্তি? ভগৰতো এতমত্থং আরোচেসুং। অনুজানামি, ভিক্খৰে, আযামেন অট্ঠঙ্গুলং সুগতঙ্গুলেন চতুরঙ্গুলৰিত্থতং পচ্ছিমং চীৰরং ৰিকপ্পেতুন্তি।
Atha kho bhikkhūnaṃ etadahosi – ‘‘kittakaṃ pacchimaṃ nu kho cīvaraṃ vikappetabba’’nti? Bhagavato etamatthaṃ ārocesuṃ. Anujānāmi, bhikkhave, āyāmena aṭṭhaṅgulaṃ sugataṅgulena caturaṅgulavitthataṃ pacchimaṃ cīvaraṃ vikappetunti.
৩৫৯. তেন খো পন সমযেন আযস্মতো মহাকস্সপস্স পংসুকূলকতো গরুকো হোতি। ভগৰতো এতমত্থং আরোচেসুং। অনুজানামি, ভিক্খৰে, সুত্তলূখং কাতুন্তি। ৰিকণ্ণো হোতি। ভগৰতো এতমত্থং আরোচেসুং। অনুজানামি, ভিক্খৰে, ৰিকণ্ণং উদ্ধরিতুন্তি। সুত্তা ওকিরিযন্তি। ভগৰতো এতমত্থং আরোচেসুং। অনুজানামি, ভিক্খৰে, অনুৰাতং পরিভণ্ডং আরোপেতুন্তি।
359. Tena kho pana samayena āyasmato mahākassapassa paṃsukūlakato garuko hoti. Bhagavato etamatthaṃ ārocesuṃ. Anujānāmi, bhikkhave, suttalūkhaṃ kātunti. Vikaṇṇo hoti. Bhagavato etamatthaṃ ārocesuṃ. Anujānāmi, bhikkhave, vikaṇṇaṃ uddharitunti. Suttā okiriyanti. Bhagavato etamatthaṃ ārocesuṃ. Anujānāmi, bhikkhave, anuvātaṃ paribhaṇḍaṃ āropetunti.
তেন খো পন সমযেন সঙ্ঘাটিযা পত্তা লুজ্জন্তি। ভগৰতো এতমত্থং আরোচেসুং। অনুজানামি, ভিক্খৰে, অট্ঠপদকং কাতুন্তি।
Tena kho pana samayena saṅghāṭiyā pattā lujjanti. Bhagavato etamatthaṃ ārocesuṃ. Anujānāmi, bhikkhave, aṭṭhapadakaṃ kātunti.
৩৬০. তেন খো পন সমযেন অঞ্ঞতরস্স ভিক্খুনো তিচীৰরে কযিরমানে সব্বং ছিন্নকং নপ্পহোতি। ভগৰতো এতমত্থং আরোচেসুং। অনুজানামি, ভিক্খৰে, দ্ৰে ছিন্নকানি একং অচ্ছিন্নকন্তি।
360. Tena kho pana samayena aññatarassa bhikkhuno ticīvare kayiramāne sabbaṃ chinnakaṃ nappahoti. Bhagavato etamatthaṃ ārocesuṃ. Anujānāmi, bhikkhave, dve chinnakāni ekaṃ acchinnakanti.
দ্ৰে ছিন্নকানি একং অচ্ছিন্নকং নপ্পহোতি। ভগৰতো এতমত্থং আরোচেসুং। অনুজানামি, ভিক্খৰে, দ্ৰে অচ্ছিন্নকানি একং ছিন্নকন্তি।
Dve chinnakāni ekaṃ acchinnakaṃ nappahoti. Bhagavato etamatthaṃ ārocesuṃ. Anujānāmi, bhikkhave, dve acchinnakāni ekaṃ chinnakanti.
দ্ৰে অচ্ছিন্নকানি একং ছিন্নকং নপ্পহোতি। ভগৰতো এতমত্থং আরোচেসুং। অনুজানামি, ভিক্খৰে, অন্ৰাধিকম্পি আরোপেতুং, ন চ, ভিক্খৰে, সব্বং অচ্ছিন্নকং ধারেতব্বং। যো ধারেয্য, আপত্তি দুক্কটস্সাতি।
Dve acchinnakāni ekaṃ chinnakaṃ nappahoti. Bhagavato etamatthaṃ ārocesuṃ. Anujānāmi, bhikkhave, anvādhikampi āropetuṃ, na ca, bhikkhave, sabbaṃ acchinnakaṃ dhāretabbaṃ. Yo dhāreyya, āpatti dukkaṭassāti.
৩৬১. তেন খো পন সমযেন অঞ্ঞতরস্স ভিক্খুনো বহুং চীৰরং উপ্পন্নং হোতি। সো চ তং চীৰরং মাতাপিতূনং দাতুকামো হোতি। ভগৰতো এতমত্থং আরোচেসুং। মাতাপিতরোতি 1 খো, ভিক্খৰে, দদমানে 2 কিং ৰদেয্যাম? অনুজানামি , ভিক্খৰে, মাতাপিতূনং দাতুং। ন চ, ভিক্খৰে, সদ্ধাদেয্যং ৰিনিপাতেতব্বং। যো ৰিনিপাতেয্য, আপত্তি দুক্কটস্সাতি।
361. Tena kho pana samayena aññatarassa bhikkhuno bahuṃ cīvaraṃ uppannaṃ hoti. So ca taṃ cīvaraṃ mātāpitūnaṃ dātukāmo hoti. Bhagavato etamatthaṃ ārocesuṃ. Mātāpitaroti 3 kho, bhikkhave, dadamāne 4 kiṃ vadeyyāma? Anujānāmi , bhikkhave, mātāpitūnaṃ dātuṃ. Na ca, bhikkhave, saddhādeyyaṃ vinipātetabbaṃ. Yo vinipāteyya, āpatti dukkaṭassāti.
৩৬২. তেন খো পন সমযেন অঞ্ঞতরো ভিক্খু অন্ধৰনে চীৰরং নিক্খিপিত্ৰা সন্তরুত্তরেন গামং পিণ্ডায পাৰিসি। চোরা তং চীৰরং অৰহরিংসু। সো ভিক্খু দুচ্চোল়ো হোতি লূখচীৰরো। ভিক্খূ এৰমাহংসু – ‘‘কিস্স ত্ৰং, আৰুসো, দুচ্চোল়ো লূখচীৰরোসী’’তি? ‘‘ইধাহং 5, আৰুসো, অন্ধৰনে চীৰরং নিক্খিপিত্ৰা সন্তরুত্তরেন গামং পিণ্ডায পাৰিসিং। চোরা তং চীৰরং অৰহরিংসু। তেনাহং দুচ্চোল়ো লূখচীৰরো’’তি। ভগৰতো এতমত্থং আরোচেসুং। ন, ভিক্খৰে, সন্তরুত্তরেন গামো পৰিসিতব্বো। যো পৰিসেয্য, আপত্তি দুক্কটস্সাতি।
362. Tena kho pana samayena aññataro bhikkhu andhavane cīvaraṃ nikkhipitvā santaruttarena gāmaṃ piṇḍāya pāvisi. Corā taṃ cīvaraṃ avahariṃsu. So bhikkhu duccoḷo hoti lūkhacīvaro. Bhikkhū evamāhaṃsu – ‘‘kissa tvaṃ, āvuso, duccoḷo lūkhacīvarosī’’ti? ‘‘Idhāhaṃ 6, āvuso, andhavane cīvaraṃ nikkhipitvā santaruttarena gāmaṃ piṇḍāya pāvisiṃ. Corā taṃ cīvaraṃ avahariṃsu. Tenāhaṃ duccoḷo lūkhacīvaro’’ti. Bhagavato etamatthaṃ ārocesuṃ. Na, bhikkhave, santaruttarena gāmo pavisitabbo. Yo paviseyya, āpatti dukkaṭassāti.
তেন খো পন সমযেন আযস্মা আনন্দো অস্সতিযা সন্তরুত্তরেন গামং পিণ্ডায পাৰিসি। ভিক্খূ আযস্মন্তং আনন্দং এতদৰোচুং – ‘‘ননু , আৰুসো আনন্দ, ভগৰতা পঞ্ঞত্তং – ‘ন সন্তরুত্তরেন গামো পৰিসিতব্বো’তি? কিস্স ত্ৰং, আৰুসো আনন্দ, সন্তরুত্তরেন গামং পৰিট্ঠো’’তি? ‘‘সচ্চং, আৰুসো, ভগৰতা পঞ্ঞত্তং – ‘ন সন্তরুত্তরেন গামো পৰিসিতব্বো’তি। অপি চাহং অস্সতিযা পৰিট্ঠো’’তি। ভগৰতো এতমত্থং আরোচেসুং।
Tena kho pana samayena āyasmā ānando assatiyā santaruttarena gāmaṃ piṇḍāya pāvisi. Bhikkhū āyasmantaṃ ānandaṃ etadavocuṃ – ‘‘nanu , āvuso ānanda, bhagavatā paññattaṃ – ‘na santaruttarena gāmo pavisitabbo’ti? Kissa tvaṃ, āvuso ānanda, santaruttarena gāmaṃ paviṭṭho’’ti? ‘‘Saccaṃ, āvuso, bhagavatā paññattaṃ – ‘na santaruttarena gāmo pavisitabbo’ti. Api cāhaṃ assatiyā paviṭṭho’’ti. Bhagavato etamatthaṃ ārocesuṃ.
পঞ্চিমে, ভিক্খৰে, পচ্চযা সঙ্ঘাটিযা নিক্খেপায – গিলানো ৰা হোতি, ৰস্সিকসঙ্কেতং ৰা হোতি, নদীপারং গন্তুং ৰা হোতি, অগ্গল়গুত্তিৰিহারো ৰা হোতি, অত্থতকথিনং ৰা হোতি। ইমে খো, ভিক্খৰে, পঞ্চ পচ্চযা সঙ্ঘাটিযা নিক্খেপায।
Pañcime, bhikkhave, paccayā saṅghāṭiyā nikkhepāya – gilāno vā hoti, vassikasaṅketaṃ vā hoti, nadīpāraṃ gantuṃ vā hoti, aggaḷaguttivihāro vā hoti, atthatakathinaṃ vā hoti. Ime kho, bhikkhave, pañca paccayā saṅghāṭiyā nikkhepāya.
পঞ্চিমে, ভিক্খৰে, পচ্চযা উত্তরাসঙ্গস্স নিক্খেপায…পে॰… অন্তরৰাসকস্স নিক্খেপায – গিলানো ৰা হোতি, ৰস্সিকসঙ্কেতং ৰা হোতি, নদীপারং গন্তুং ৰা হোতি, অগ্গল়গুত্তিৰিহারো ৰা হোতি, অত্থতকথিনং ৰা হোতি। ইমে খো, ভিক্খৰে, পঞ্চ পচ্চযা উত্তরাসঙ্গস্স অন্তরৰাসকস্স নিক্খেপায।
Pañcime, bhikkhave, paccayā uttarāsaṅgassa nikkhepāya…pe… antaravāsakassa nikkhepāya – gilāno vā hoti, vassikasaṅketaṃ vā hoti, nadīpāraṃ gantuṃ vā hoti, aggaḷaguttivihāro vā hoti, atthatakathinaṃ vā hoti. Ime kho, bhikkhave, pañca paccayā uttarāsaṅgassa antaravāsakassa nikkhepāya.
পঞ্চিমে, ভিক্খৰে, পচ্চযা ৰস্সিকসাটিকায নিক্খেপায – গিলানো ৰা হোতি, নিস্সীমং গন্তুং ৰা হোতি, নদীপারং গন্তুং ৰা হোতি, অগ্গল়গুত্তিৰিহারো ৰা হোতি, ৰস্সিকসাটিকা অকতা ৰা হোতি ৰিপ্পকতা ৰা। ইমে খো, ভিক্খৰে, পঞ্চ পচ্চযা ৰস্সিকসাটিকায নিক্খেপাযাতি।
Pañcime, bhikkhave, paccayā vassikasāṭikāya nikkhepāya – gilāno vā hoti, nissīmaṃ gantuṃ vā hoti, nadīpāraṃ gantuṃ vā hoti, aggaḷaguttivihāro vā hoti, vassikasāṭikā akatā vā hoti vippakatā vā. Ime kho, bhikkhave, pañca paccayā vassikasāṭikāya nikkhepāyāti.
পচ্ছিমৰিকপ্পনুপগচীৰরাদিকথা নিট্ঠিতা।
Pacchimavikappanupagacīvarādikathā niṭṭhitā.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পচ্ছিমৰিকপ্পনুপগচীৰরাদিকথা • Pacchimavikappanupagacīvarādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পচ্ছিমৰিকপ্পনুপগচীৰরাদিকথাৰণ্ণনা • Pacchimavikappanupagacīvarādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / নিসীদনাদিঅনুজাননকথাৰণ্ণনা • Nisīdanādianujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / চীৰররজনকথাদিৰণ্ণনা • Cīvararajanakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২২১. পচ্ছিমৰিকপ্পনুপগচীৰরাদিকথা • 221. Pacchimavikappanupagacīvarādikathā
