| Library / Tipiṭaka / तिपिटक • Tipiṭaka / महावग्ग-अट्ठकथा • Mahāvagga-aṭṭhakathā |
पच्छिमविकप्पनुपगचीवरादिकथा
Pacchimavikappanupagacīvarādikathā
३५९. पंसुकूलकतोति कतपंसुकूलो। गरुको होतीति जिण्णजिण्णट्ठाने अग्गळारोपनेन गरुको होति। सुत्तलूखं कातुन्ति सुत्तेनेव अग्गळं कातुन्ति अत्थो। विकण्णो होतीति सुत्तं अच्छेत्वा अच्छेत्वा सिब्बन्तानं एको सङ्घाटिकोणो दीघो होति। विकण्णं उद्धरितुन्ति दीघकोणं छिन्दितुं। ओकिरियन्तीति छिन्नकोणतो गळन्ति। अनुवातं परिभण्डन्ति अनुवातञ्चेव परिभण्डञ्च। पत्ता लुज्जन्तीति महन्तेसु पत्तमुखेसु दिन्नानि सुत्तानि गळन्ति, ततो पत्ता लुज्जन्ति। अट्ठपदकं कातुन्ति अट्ठपदकच्छन्नेन पत्तमुखं सिब्बितुं।
359.Paṃsukūlakatoti katapaṃsukūlo. Garuko hotīti jiṇṇajiṇṇaṭṭhāne aggaḷāropanena garuko hoti. Suttalūkhaṃ kātunti sutteneva aggaḷaṃ kātunti attho. Vikaṇṇo hotīti suttaṃ acchetvā acchetvā sibbantānaṃ eko saṅghāṭikoṇo dīgho hoti. Vikaṇṇaṃ uddharitunti dīghakoṇaṃ chindituṃ. Okiriyantīti chinnakoṇato gaḷanti. Anuvātaṃ paribhaṇḍanti anuvātañceva paribhaṇḍañca. Pattā lujjantīti mahantesu pattamukhesu dinnāni suttāni gaḷanti, tato pattā lujjanti. Aṭṭhapadakaṃ kātunti aṭṭhapadakacchannena pattamukhaṃ sibbituṃ.
३६०. अन्वाधिकम्पि आरोपेतुन्ति आगन्तुकपत्तम्पि दातुं। इदं पन अप्पहोनके आरोपेतब्बं। सचे पहोति, आगन्तुकपत्तं न वट्टति, छिन्दितब्बमेव।
360.Anvādhikampi āropetunti āgantukapattampi dātuṃ. Idaṃ pana appahonake āropetabbaṃ. Sace pahoti, āgantukapattaṃ na vaṭṭati, chinditabbameva.
३६१. न च भिक्खवे सद्धादेय्यन्ति एत्थ सेसञातीनं देन्तो विनिपातेतियेव। मातापितरो पन सचे रज्जे ठिता पत्थयन्ति, दातब्बं।
361.Na ca bhikkhave saddhādeyyanti ettha sesañātīnaṃ dento vinipātetiyeva. Mātāpitaro pana sace rajje ṭhitā patthayanti, dātabbaṃ.
३६२. गिलानोति गिलानताय गहेत्वा गन्तुं असमत्थो। वस्सिकसङ्केतन्ति वस्सिके चत्तारो मासे। नदीपारन्ति नदिया पारे भत्तं भुञ्जितब्बं होति। अग्गळगुत्तिविहारोति सब्बेस्वेव चेतेसु गिलानवस्सिकसङ्केतनदीपारगमनअत्थतकथिनभावेसु अग्गळगुत्तियेव पमाणं। गुत्ते एव हि विहारे एतेसु कारणेसु निक्खिपित्वा बहि गन्तुं वट्टति, न अगुत्ते। आरञ्ञकस्स पन विहारो न सुगुत्तो होति, तेन भण्डुक्खलिकाय पक्खिपित्वा पासाणसुसिर रुक्खसुसिरादीसु सुप्पटिच्छन्नेसु ठपेत्वा गन्तब्बं।
362.Gilānoti gilānatāya gahetvā gantuṃ asamattho. Vassikasaṅketanti vassike cattāro māse. Nadīpāranti nadiyā pāre bhattaṃ bhuñjitabbaṃ hoti. Aggaḷaguttivihāroti sabbesveva cetesu gilānavassikasaṅketanadīpāragamanaatthatakathinabhāvesu aggaḷaguttiyeva pamāṇaṃ. Gutte eva hi vihāre etesu kāraṇesu nikkhipitvā bahi gantuṃ vaṭṭati, na agutte. Āraññakassa pana vihāro na sugutto hoti, tena bhaṇḍukkhalikāya pakkhipitvā pāsāṇasusira rukkhasusirādīsu suppaṭicchannesu ṭhapetvā gantabbaṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi / २२१. पच्छिमविकप्पनुपगचीवरादिकथा • 221. Pacchimavikappanupagacīvarādikathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / पच्छिमविकप्पनुपगचीवरादिकथावण्णना • Pacchimavikappanupagacīvarādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / निसीदनादिअनुजाननकथावण्णना • Nisīdanādianujānanakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / चीवररजनकथादिवण्णना • Cīvararajanakathādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / २२१. पच्छिमविकप्पनुपगचीवरादिकथा • 221. Pacchimavikappanupagacīvarādikathā
