| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೨೨೧. ಪಚ್ಛಿಮವಿಕಪ್ಪನುಪಗಚೀವರಾದಿಕಥಾ
221. Pacchimavikappanupagacīvarādikathā
೩೫೯. ಕತಪಂಸುಕೂಲೋತಿ ಕತೋ ಪಂಸುಕೂಲೋ। ಇಮಿನಾ ‘‘ಪಂಸುಕೂಲತೋ’’ತಿ ಪದಸ್ಸ ವಿಸೇಸನಪರಪದತ್ತಂ ದಸ್ಸೇತಿ। ಅಗ್ಗಳಾರೋಪನೇನಾತಿ ಅಗ್ಗಳಸ್ಸ ಆರೋಪನೇನ। ‘‘ಸುತ್ತೇನೇವಾ’’ತಿ ಏತ್ಥ ಏವಸದ್ದೇನ ಪಿಲೋತಿಕಂ ನಿವತ್ತೇತಿ। ಅಞ್ಛಿತ್ವಾ ಅಞ್ಛಿತ್ವಾತಿ ಆಕಡ್ಢಿತ್ವಾ ಆಕಡ್ಢಿತ್ವಾ। ಅಭಿಧಾತು ಹಿ ಆಕಡ್ಢನತ್ಥೋ। ‘‘ಸಙ್ಘಾಟಿಕೋಣೋ ದೀಘೋ’’ತಿ ಇಮಿನಾ ವಿಕಣ್ಣೋತಿ ಏತ್ಥ ವಿಸಮೋ ಕಣ್ಣೋ ವಿಕಣ್ಣೋತಿ ಕತ್ವಾ ಕಣ್ಣಸದ್ದಸ್ಸ ಕೋಣತ್ಥಂ ದಸ್ಸೇತಿ। ತತೋತಿ ಗಳನತೋ। ಲುಜ್ಜನ್ತೀತಿ ವಲಿಂ ಗಣ್ಹನ್ತಿ। ಅಟ್ಠಪದಕನ್ತಿ ಪದಸ್ಸ ಅಟ್ಠಪದೇನ ಸಿಬ್ಬಿತಂ ಅಟ್ಠಪದಕನ್ತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಅಟ್ಠಪದಕಚ್ಛಿನ್ನೇನ ಪತ್ತಮುಖಂ ಸಿಬ್ಬಿತು’’ನ್ತಿ। ತತ್ಥ ಅಟ್ಠಪದಕಚ್ಛಿನ್ನೇನ ಪತ್ತಮುಖಂ ಸಿಬ್ಬಿತುನ್ತಿ ಅಟ್ಠಪದಲಿಖನೇನ ತತ್ಥ ತತ್ಥ ಗಬ್ಭಂ ದಸ್ಸೇತ್ವಾ ಪತ್ತಮುಖಂ ಸಿಬ್ಬಿತುಂ। ‘‘ಅಟ್ಠಪದಕಚ್ಛನ್ನೇನಾ’’ತಿಪಿ ಪಾಠೋ, ಅಟ್ಠಫಲಕಾಕಾರೇನಾತಿ ಅತ್ಥೋ।
359.Katapaṃsukūloti kato paṃsukūlo. Iminā ‘‘paṃsukūlato’’ti padassa visesanaparapadattaṃ dasseti. Aggaḷāropanenāti aggaḷassa āropanena. ‘‘Suttenevā’’ti ettha evasaddena pilotikaṃ nivatteti. Añchitvā añchitvāti ākaḍḍhitvā ākaḍḍhitvā. Abhidhātu hi ākaḍḍhanattho. ‘‘Saṅghāṭikoṇo dīgho’’ti iminā vikaṇṇoti ettha visamo kaṇṇo vikaṇṇoti katvā kaṇṇasaddassa koṇatthaṃ dasseti. Tatoti gaḷanato. Lujjantīti valiṃ gaṇhanti. Aṭṭhapadakanti padassa aṭṭhapadena sibbitaṃ aṭṭhapadakanti vacanatthaṃ dassento āha ‘‘aṭṭhapadakacchinnena pattamukhaṃ sibbitu’’nti. Tattha aṭṭhapadakacchinnena pattamukhaṃ sibbitunti aṭṭhapadalikhanena tattha tattha gabbhaṃ dassetvā pattamukhaṃ sibbituṃ. ‘‘Aṭṭhapadakacchannenā’’tipi pāṭho, aṭṭhaphalakākārenāti attho.
೩೬೦. ‘‘ಆಗನ್ತುಕಪತ್ತಮ್ಪಿ ದಾತು’’ನ್ತಿ ಇಮಿನಾ ಅನ್ವಾದಿಕನ್ತಿ ಪದಸ್ಸ ಅನುಪಚ್ಛಾ ಆಗನ್ತುಕಭಾವೇನ ದೀಯತೀತಿ ಅನ್ವಾದಿಕನ್ತಿ ವಚನತ್ಥಂ ದಸ್ಸೇತಿ। ಚತುತ್ಥಕ್ಖರೇನಪಿ ಪಾಠೋ, ಅನುಪಚ್ಛಾ ಆಗನ್ತುಕಭಾವೇನ ಧೀಯತಿ ಠಪೀಯತೀತಿ ಅನ್ವಾಧಿಕನ್ತಿ ಕಾತಬ್ಬೋ। ಇದಂ ಪನಾತಿ ಅನ್ವಾಧಿಕಂ ಪನ।
360. ‘‘Āgantukapattampi dātu’’nti iminā anvādikanti padassa anupacchā āgantukabhāvena dīyatīti anvādikanti vacanatthaṃ dasseti. Catutthakkharenapi pāṭho, anupacchā āgantukabhāvena dhīyati ṭhapīyatīti anvādhikanti kātabbo. Idaṃ panāti anvādhikaṃ pana.
೩೬೧. ಸೇಸಞಾತೀನನ್ತಿ ಮಾತಾಪಿತೂಹಿ ಸೇಸಞಾತೀನಂ। ವಿನಿಪಾತೇತಿಯೇವಾತಿ ವಿನಸ್ಸನ್ತೋ ನಿಪಾತೇತಿಯೇವ।
361.Sesañātīnanti mātāpitūhi sesañātīnaṃ. Vinipātetiyevāti vinassanto nipātetiyeva.
೩೬೨. ‘‘ವಸ್ಸಿಕೋ’’ತಿ ಸಙ್ಕೇತೀಯತಿ ಗಣ್ಹೀಯತೀತಿ ವಸ್ಸಿಕಸಙ್ಕೇತನ್ತಿ ವುತ್ತೇ ಚತ್ತಾರೋ ಮಾಸಾತಿ ಆಹ ‘‘ಚತ್ತಾರೋ ಮಾಸೇ’’ತಿ। ಹೀತಿ ಸಚ್ಚಂ, ಯಸ್ಮಾ ವಾ। ಆರಞ್ಞಕಸ್ಸ ಭಿಕ್ಖುನೋತಿ ಸಮ್ಬನ್ಧೋ। ತೇನಾತಿ ಆರಞ್ಞಕೇನ ಭಿಕ್ಖುನಾ।
362. ‘‘Vassiko’’ti saṅketīyati gaṇhīyatīti vassikasaṅketanti vutte cattāro māsāti āha ‘‘cattāro māse’’ti. Hīti saccaṃ, yasmā vā. Āraññakassa bhikkhunoti sambandho. Tenāti āraññakena bhikkhunā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೨೨೧. ಪಚ್ಛಿಮವಿಕಪ್ಪನುಪಗಚೀವರಾದಿಕಥಾ • 221. Pacchimavikappanupagacīvarādikathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಪಚ್ಛಿಮವಿಕಪ್ಪನುಪಗಚೀವರಾದಿಕಥಾ • Pacchimavikappanupagacīvarādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಚ್ಛಿಮವಿಕಪ್ಪನುಪಗಚೀವರಾದಿಕಥಾವಣ್ಣನಾ • Pacchimavikappanupagacīvarādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ನಿಸೀದನಾದಿಅನುಜಾನನಕಥಾವಣ್ಣನಾ • Nisīdanādianujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಚೀವರರಜನಕಥಾದಿವಣ್ಣನಾ • Cīvararajanakathādivaṇṇanā
