| Library / Tipiṭaka / තිපිටක • Tipiṭaka / මහාවග්‌ග-අට්‌ඨකථා • Mahāvagga-aṭṭhakathā |
පච්‌ඡිමවිකප්‌පනුපගචීවරාදිකථා
Pacchimavikappanupagacīvarādikathā
359. පංසුකූලකතොති කතපංසුකූලො. ගරුකො හොතීති ජිණ්‌ණජිණ්‌ණට්‌ඨානෙ අග්‌ගළාරොපනෙන ගරුකො හොති. සුත්‌තලූඛං කාතුන්‌ති සුත්‌තෙනෙව අග්‌ගළං කාතුන්‌ති අත්‌ථො. විකණ්‌ණො හොතීති සුත්‌තං අච්‌ඡෙත්‌වා අච්‌ඡෙත්‌වා සිබ්‌බන්‌තානං එකො සඞ්‌ඝාටිකොණො දීඝො හොති. විකණ්‌ණං උද්‌ධරිතුන්‌ති දීඝකොණං ඡින්‌දිතුං. ඔකිරියන්‌තීති ඡින්‌නකොණතො ගළන්‌ති. අනුවාතං පරිභණ්‌ඩන්‌ති අනුවාතඤ්‌චෙව පරිභණ්‌ඩඤ්‌ච. පත්‌තා ලුජ්‌ජන්‌තීති මහන්‌තෙසු පත්‌තමුඛෙසු දින්‌නානි සුත්‌තානි ගළන්‌ති, තතො පත්‌තා ලුජ්‌ජන්‌ති. අට්‌ඨපදකං කාතුන්‌ති අට්‌ඨපදකච්‌ඡන්‌නෙන පත්‌තමුඛං සිබ්‌බිතුං.
359.Paṃsukūlakatoti katapaṃsukūlo. Garuko hotīti jiṇṇajiṇṇaṭṭhāne aggaḷāropanena garuko hoti. Suttalūkhaṃ kātunti sutteneva aggaḷaṃ kātunti attho. Vikaṇṇo hotīti suttaṃ acchetvā acchetvā sibbantānaṃ eko saṅghāṭikoṇo dīgho hoti. Vikaṇṇaṃ uddharitunti dīghakoṇaṃ chindituṃ. Okiriyantīti chinnakoṇato gaḷanti. Anuvātaṃ paribhaṇḍanti anuvātañceva paribhaṇḍañca. Pattā lujjantīti mahantesu pattamukhesu dinnāni suttāni gaḷanti, tato pattā lujjanti. Aṭṭhapadakaṃ kātunti aṭṭhapadakacchannena pattamukhaṃ sibbituṃ.
360. අන්‌වාධිකම්‌පි ආරොපෙතුන්‌ති ආගන්‌තුකපත්‌තම්‌පි දාතුං. ඉදං පන අප්‌පහොනකෙ ආරොපෙතබ්‌බං. සචෙ පහොති, ආගන්‌තුකපත්‌තං න වට්‌ටති, ඡින්‌දිතබ්‌බමෙව.
360.Anvādhikampi āropetunti āgantukapattampi dātuṃ. Idaṃ pana appahonake āropetabbaṃ. Sace pahoti, āgantukapattaṃ na vaṭṭati, chinditabbameva.
361. න ච භික්‌ඛවෙ සද්‌ධාදෙය්‍යන්‌ති එත්‌ථ සෙසඤාතීනං දෙන්‌තො විනිපාතෙතියෙව. මාතාපිතරො පන සචෙ රජ්‌ජෙ ඨිතා පත්‌ථයන්‌ති, දාතබ්‌බං.
361.Na ca bhikkhave saddhādeyyanti ettha sesañātīnaṃ dento vinipātetiyeva. Mātāpitaro pana sace rajje ṭhitā patthayanti, dātabbaṃ.
362. ගිලානොති ගිලානතාය ගහෙත්‌වා ගන්‌තුං අසමත්‌ථො. වස්‌සිකසඞ්‌කෙතන්‌ති වස්‌සිකෙ චත්‌තාරො මාසෙ. නදීපාරන්‌ති නදියා පාරෙ භත්‌තං භුඤ්‌ජිතබ්‌බං හොති. අග්‌ගළගුත්‌තිවිහාරොති සබ්‌බෙස්‌වෙව චෙතෙසු ගිලානවස්‌සිකසඞ්‌කෙතනදීපාරගමනඅත්‌ථතකථිනභාවෙසු අග්‌ගළගුත්‌තියෙව පමාණං. ගුත්‌තෙ එව හි විහාරෙ එතෙසු කාරණෙසු නික්‌ඛිපිත්‌වා බහි ගන්‌තුං වට්‌ටති, න අගුත්‌තෙ. ආරඤ්‌ඤකස්‌ස පන විහාරො න සුගුත්‌තො හොති, තෙන භණ්‌ඩුක්‌ඛලිකාය පක්‌ඛිපිත්‌වා පාසාණසුසිර රුක්‌ඛසුසිරාදීසු සුප්‌පටිච්‌ඡන්‌නෙසු ඨපෙත්‌වා ගන්‌තබ්‌බං.
362.Gilānoti gilānatāya gahetvā gantuṃ asamattho. Vassikasaṅketanti vassike cattāro māse. Nadīpāranti nadiyā pāre bhattaṃ bhuñjitabbaṃ hoti. Aggaḷaguttivihāroti sabbesveva cetesu gilānavassikasaṅketanadīpāragamanaatthatakathinabhāvesu aggaḷaguttiyeva pamāṇaṃ. Gutte eva hi vihāre etesu kāraṇesu nikkhipitvā bahi gantuṃ vaṭṭati, na agutte. Āraññakassa pana vihāro na sugutto hoti, tena bhaṇḍukkhalikāya pakkhipitvā pāsāṇasusira rukkhasusirādīsu suppaṭicchannesu ṭhapetvā gantabbaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 221. පච්‌ඡිමවිකප්‌පනුපගචීවරාදිකථා • 221. Pacchimavikappanupagacīvarādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පච්‌ඡිමවිකප්‌පනුපගචීවරාදිකථාවණ්‌ණනා • Pacchimavikappanupagacīvarādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / නිසීදනාදිඅනුජානනකථාවණ්‌ණනා • Nisīdanādianujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / චීවරරජනකථාදිවණ්‌ණනා • Cīvararajanakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 221. පච්‌ඡිමවිකප්‌පනුපගචීවරාදිකථා • 221. Pacchimavikappanupagacīvarādikathā
