| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
221. පච්‌ඡිමවිකප්‌පනුපගචීවරාදිකථා
221. Pacchimavikappanupagacīvarādikathā
359. කතපංසුකූලොති කතො පංසුකූලො. ඉමිනා ‘‘පංසුකූලතො’’ති පදස්‌ස විසෙසනපරපදත්‌තං දස්‌සෙති. අග්‌ගළාරොපනෙනාති අග්‌ගළස්‌ස ආරොපනෙන. ‘‘සුත්‌තෙනෙවා’’ති එත්‌ථ එවසද්‌දෙන පිලොතිකං නිවත්‌තෙති. අඤ්‌ඡිත්‌වා අඤ්‌ඡිත්‌වාති ආකඩ්‌ඪිත්‌වා ආකඩ්‌ඪිත්‌වා. අභිධාතු හි ආකඩ්‌ඪනත්‌ථො. ‘‘සඞ්‌ඝාටිකොණො දීඝො’’ති ඉමිනා විකණ්‌ණොති එත්‌ථ විසමො කණ්‌ණො විකණ්‌ණොති කත්‌වා කණ්‌ණසද්‌දස්‌ස කොණත්‌ථං දස්‌සෙති. තතොති ගළනතො. ලුජ්‌ජන්‌තීති වලිං ගණ්‌හන්‌ති. අට්‌ඨපදකන්‌ති පදස්‌ස අට්‌ඨපදෙන සිබ්‌බිතං අට්‌ඨපදකන්‌ති වචනත්‌ථං දස්‌සෙන්‌තො ආහ ‘‘අට්‌ඨපදකච්‌ඡින්‌නෙන පත්‌තමුඛං සිබ්‌බිතු’’න්‌ති. තත්‌ථ අට්‌ඨපදකච්‌ඡින්‌නෙන පත්‌තමුඛං සිබ්‌බිතුන්‌ති අට්‌ඨපදලිඛනෙන තත්‌ථ තත්‌ථ ගබ්‌භං දස්‌සෙත්‌වා පත්‌තමුඛං සිබ්‌බිතුං. ‘‘අට්‌ඨපදකච්‌ඡන්‌නෙනා’’තිපි පාඨො, අට්‌ඨඵලකාකාරෙනාති අත්‌ථො.
359.Katapaṃsukūloti kato paṃsukūlo. Iminā ‘‘paṃsukūlato’’ti padassa visesanaparapadattaṃ dasseti. Aggaḷāropanenāti aggaḷassa āropanena. ‘‘Suttenevā’’ti ettha evasaddena pilotikaṃ nivatteti. Añchitvā añchitvāti ākaḍḍhitvā ākaḍḍhitvā. Abhidhātu hi ākaḍḍhanattho. ‘‘Saṅghāṭikoṇo dīgho’’ti iminā vikaṇṇoti ettha visamo kaṇṇo vikaṇṇoti katvā kaṇṇasaddassa koṇatthaṃ dasseti. Tatoti gaḷanato. Lujjantīti valiṃ gaṇhanti. Aṭṭhapadakanti padassa aṭṭhapadena sibbitaṃ aṭṭhapadakanti vacanatthaṃ dassento āha ‘‘aṭṭhapadakacchinnena pattamukhaṃ sibbitu’’nti. Tattha aṭṭhapadakacchinnena pattamukhaṃ sibbitunti aṭṭhapadalikhanena tattha tattha gabbhaṃ dassetvā pattamukhaṃ sibbituṃ. ‘‘Aṭṭhapadakacchannenā’’tipi pāṭho, aṭṭhaphalakākārenāti attho.
360. ‘‘ආගන්‌තුකපත්‌තම්‌පි දාතු’’න්‌ති ඉමිනා අන්‌වාදිකන්‌ති පදස්‌ස අනුපච්‌ඡා ආගන්‌තුකභාවෙන දීයතීති අන්‌වාදිකන්‌ති වචනත්‌ථං දස්‌සෙති. චතුත්‌ථක්‌ඛරෙනපි පාඨො, අනුපච්‌ඡා ආගන්‌තුකභාවෙන ධීයති ඨපීයතීති අන්‌වාධිකන්‌ති කාතබ්‌බො. ඉදං පනාති අන්‌වාධිකං පන.
360. ‘‘Āgantukapattampi dātu’’nti iminā anvādikanti padassa anupacchā āgantukabhāvena dīyatīti anvādikanti vacanatthaṃ dasseti. Catutthakkharenapi pāṭho, anupacchā āgantukabhāvena dhīyati ṭhapīyatīti anvādhikanti kātabbo. Idaṃ panāti anvādhikaṃ pana.
361. සෙසඤාතීනන්‌ති මාතාපිතූහි සෙසඤාතීනං. විනිපාතෙතියෙවාති විනස්‌සන්‌තො නිපාතෙතියෙව.
361.Sesañātīnanti mātāpitūhi sesañātīnaṃ. Vinipātetiyevāti vinassanto nipātetiyeva.
362. ‘‘වස්‌සිකො’’ති සඞ්‌කෙතීයති ගණ්‌හීයතීති වස්‌සිකසඞ්‌කෙතන්‌ති වුත්‌තෙ චත්‌තාරො මාසාති ආහ ‘‘චත්‌තාරො මාසෙ’’ති. හීති සච්‌චං, යස්‌මා වා. ආරඤ්‌ඤකස්‌ස භික්‌ඛුනොති සම්‌බන්‌ධො. තෙනාති ආරඤ්‌ඤකෙන භික්‌ඛුනා.
362. ‘‘Vassiko’’ti saṅketīyati gaṇhīyatīti vassikasaṅketanti vutte cattāro māsāti āha ‘‘cattāro māse’’ti. Hīti saccaṃ, yasmā vā. Āraññakassa bhikkhunoti sambandho. Tenāti āraññakena bhikkhunā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 221. පච්‌ඡිමවිකප්‌පනුපගචීවරාදිකථා • 221. Pacchimavikappanupagacīvarādikathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / පච්‌ඡිමවිකප්‌පනුපගචීවරාදිකථා • Pacchimavikappanupagacīvarādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පච්‌ඡිමවිකප්‌පනුපගචීවරාදිකථාවණ්‌ණනා • Pacchimavikappanupagacīvarādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / නිසීදනාදිඅනුජානනකථාවණ්‌ණනා • Nisīdanādianujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / චීවරරජනකථාදිවණ්‌ණනා • Cīvararajanakathādivaṇṇanā
