| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. பச்சுபட்டா²னஸஞ்ஞகத்தே²ரஅபதா³னவண்ணனா
9. Paccupaṭṭhānasaññakattheraapadānavaṇṇanā
அத்த²த³ஸ்ஸிம்ஹி ஸுக³தேதிஆதி³கங் ஆயஸ்மதோ பச்சுபட்டா²னஸஞ்ஞகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அத்த²த³ஸ்ஸிஸ்ஸ ப⁴க³வதோ காலே யக்க²யோனியங் நிப்³ப³த்தோ ப⁴க³வதி த⁴ரமானே த³ஸ்ஸனஸ்ஸ அலத்³த⁴த்தா பச்சா² பரினிப்³பு³தே மஹாஸோகப்பத்தோ விஹாஸி. ததா³ ஹிஸ்ஸ ப⁴க³வதோ ஸாக³தோ நாம அக்³க³ஸாவகோ அனுஸாஸந்தோ ப⁴க³வதோ ஸாரீரிகதா⁴துபூஜா ப⁴க³வதி த⁴ரமானே கதபூஜா விய சித்தப்பஸாத³வஸா மஹப்ப²லங் ப⁴வதீ’’தி வத்வா ‘‘தூ²பங் கரோஹீ’’தி நியோஜிதோ தூ²பங் காரேஸி, தங் பூஜெத்வா ததோ சுதோ தே³வமனுஸ்ஸேஸு ஸக்கசக்கவத்திஸம்பத்திமனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ ஸத்த²ரி பஸீதி³த்வா பப்³ப³ஜித்வா நசிரஸ்ஸேவ அரஹா அஹோஸி.
Atthadassimhi sugatetiādikaṃ āyasmato paccupaṭṭhānasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle yakkhayoniyaṃ nibbatto bhagavati dharamāne dassanassa aladdhattā pacchā parinibbute mahāsokappatto vihāsi. Tadā hissa bhagavato sāgato nāma aggasāvako anusāsanto bhagavato sārīrikadhātupūjā bhagavati dharamāne katapūjā viya cittappasādavasā mahapphalaṃ bhavatī’’ti vatvā ‘‘thūpaṃ karohī’’ti niyojito thūpaṃ kāresi, taṃ pūjetvā tato cuto devamanussesu sakkacakkavattisampattimanubhavitvā imasmiṃ buddhuppāde sāvatthiyaṃ ekasmiṃ kulagehe nibbatto viññutaṃ patto satthari pasīditvā pabbajitvā nacirasseva arahā ahosi.
72. ஸோ அபரபா⁴கே³ அத்தனோ புஞ்ஞகம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ அத்த²த³ஸ்ஸிம்ஹி ஸுக³தேதிஆதி³மாஹ. தங் ஹெட்டா² வுத்தமேவ. யக்க²யோனிங் உபபஜ்ஜிந்தி எத்த² பன அத்தனோ ஸகாஸங் ஸம்பத்தஸம்பத்தே கா²த³ந்தா யந்தி க³ச்ச²ந்தீதி யக்கா², யக்கா²னங் யோனி ஜாதீதி யக்க²யோனி, யக்க²யோனியங் நிப்³ப³த்தோதி அத்தோ².
72. So aparabhāge attano puññakammaṃ saritvā somanassajāto pubbacaritāpadānaṃ pakāsento atthadassimhi sugatetiādimāha. Taṃ heṭṭhā vuttameva. Yakkhayoniṃ upapajjinti ettha pana attano sakāsaṃ sampattasampatte khādantā yanti gacchantīti yakkhā, yakkhānaṃ yoni jātīti yakkhayoni, yakkhayoniyaṃ nibbattoti attho.
73. து³ல்லத்³த⁴ங் வத மே ஆஸீதி மே மயா லத்³த⁴யஸங் து³ல்லத்³த⁴ங், பு³த்³த⁴பூ⁴தஸ்ஸ ஸத்து²னோ ஸக்காரங் அகதத்தா விராதெ⁴த்வா லத்³த⁴ந்தி அத்தோ². து³ப்பபா⁴தந்தி து³ட்டு² பபா⁴தங் ரத்தியா பபா⁴தகரணங், மய்ஹங் ந ஸுட்டு²ங் பபா⁴தந்தி அத்தோ². து³ருட்டி²தந்தி து³உட்டி²தங், ஸூரியஸ்ஸ உக்³க³மனங் மய்ஹங் து³உக்³க³மனந்தி அத்தோ². ஸேஸங் ஸப்³ப³த்த² உத்தானமேவாதி.
73.Dulladdhaṃvata me āsīti me mayā laddhayasaṃ dulladdhaṃ, buddhabhūtassa satthuno sakkāraṃ akatattā virādhetvā laddhanti attho. Duppabhātanti duṭṭhu pabhātaṃ rattiyā pabhātakaraṇaṃ, mayhaṃ na suṭṭhuṃ pabhātanti attho. Duruṭṭhitanti duuṭṭhitaṃ, sūriyassa uggamanaṃ mayhaṃ duuggamananti attho. Sesaṃ sabbattha uttānamevāti.
பச்சுபட்டா²னஸஞ்ஞகத்தே²ரஅபதா³னவண்ணனா ஸமத்தா.
Paccupaṭṭhānasaññakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. பச்சுபட்டா²னஸஞ்ஞகத்தே²ரஅபதா³னங் • 9. Paccupaṭṭhānasaññakattheraapadānaṃ
