| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೯. ಪಚ್ಚುಪಟ್ಠಾನಸಞ್ಞಕತ್ಥೇರಅಪದಾನವಣ್ಣನಾ
9. Paccupaṭṭhānasaññakattheraapadānavaṇṇanā
ಅತ್ಥದಸ್ಸಿಮ್ಹಿ ಸುಗತೇತಿಆದಿಕಂ ಆಯಸ್ಮತೋ ಪಚ್ಚುಪಟ್ಠಾನಸಞ್ಞಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಅತ್ಥದಸ್ಸಿಸ್ಸ ಭಗವತೋ ಕಾಲೇ ಯಕ್ಖಯೋನಿಯಂ ನಿಬ್ಬತ್ತೋ ಭಗವತಿ ಧರಮಾನೇ ದಸ್ಸನಸ್ಸ ಅಲದ್ಧತ್ತಾ ಪಚ್ಛಾ ಪರಿನಿಬ್ಬುತೇ ಮಹಾಸೋಕಪ್ಪತ್ತೋ ವಿಹಾಸಿ। ತದಾ ಹಿಸ್ಸ ಭಗವತೋ ಸಾಗತೋ ನಾಮ ಅಗ್ಗಸಾವಕೋ ಅನುಸಾಸನ್ತೋ ಭಗವತೋ ಸಾರೀರಿಕಧಾತುಪೂಜಾ ಭಗವತಿ ಧರಮಾನೇ ಕತಪೂಜಾ ವಿಯ ಚಿತ್ತಪ್ಪಸಾದವಸಾ ಮಹಪ್ಫಲಂ ಭವತೀ’’ತಿ ವತ್ವಾ ‘‘ಥೂಪಂ ಕರೋಹೀ’’ತಿ ನಿಯೋಜಿತೋ ಥೂಪಂ ಕಾರೇಸಿ, ತಂ ಪೂಜೇತ್ವಾ ತತೋ ಚುತೋ ದೇವಮನುಸ್ಸೇಸು ಸಕ್ಕಚಕ್ಕವತ್ತಿಸಮ್ಪತ್ತಿಮನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಸತ್ಥರಿ ಪಸೀದಿತ್ವಾ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Atthadassimhi sugatetiādikaṃ āyasmato paccupaṭṭhānasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle yakkhayoniyaṃ nibbatto bhagavati dharamāne dassanassa aladdhattā pacchā parinibbute mahāsokappatto vihāsi. Tadā hissa bhagavato sāgato nāma aggasāvako anusāsanto bhagavato sārīrikadhātupūjā bhagavati dharamāne katapūjā viya cittappasādavasā mahapphalaṃ bhavatī’’ti vatvā ‘‘thūpaṃ karohī’’ti niyojito thūpaṃ kāresi, taṃ pūjetvā tato cuto devamanussesu sakkacakkavattisampattimanubhavitvā imasmiṃ buddhuppāde sāvatthiyaṃ ekasmiṃ kulagehe nibbatto viññutaṃ patto satthari pasīditvā pabbajitvā nacirasseva arahā ahosi.
೭೨. ಸೋ ಅಪರಭಾಗೇ ಅತ್ತನೋ ಪುಞ್ಞಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಅತ್ಥದಸ್ಸಿಮ್ಹಿ ಸುಗತೇತಿಆದಿಮಾಹ। ತಂ ಹೇಟ್ಠಾ ವುತ್ತಮೇವ। ಯಕ್ಖಯೋನಿಂ ಉಪಪಜ್ಜಿನ್ತಿ ಏತ್ಥ ಪನ ಅತ್ತನೋ ಸಕಾಸಂ ಸಮ್ಪತ್ತಸಮ್ಪತ್ತೇ ಖಾದನ್ತಾ ಯನ್ತಿ ಗಚ್ಛನ್ತೀತಿ ಯಕ್ಖಾ, ಯಕ್ಖಾನಂ ಯೋನಿ ಜಾತೀತಿ ಯಕ್ಖಯೋನಿ, ಯಕ್ಖಯೋನಿಯಂ ನಿಬ್ಬತ್ತೋತಿ ಅತ್ಥೋ।
72. So aparabhāge attano puññakammaṃ saritvā somanassajāto pubbacaritāpadānaṃ pakāsento atthadassimhi sugatetiādimāha. Taṃ heṭṭhā vuttameva. Yakkhayoniṃ upapajjinti ettha pana attano sakāsaṃ sampattasampatte khādantā yanti gacchantīti yakkhā, yakkhānaṃ yoni jātīti yakkhayoni, yakkhayoniyaṃ nibbattoti attho.
೭೩. ದುಲ್ಲದ್ಧಂ ವತ ಮೇ ಆಸೀತಿ ಮೇ ಮಯಾ ಲದ್ಧಯಸಂ ದುಲ್ಲದ್ಧಂ, ಬುದ್ಧಭೂತಸ್ಸ ಸತ್ಥುನೋ ಸಕ್ಕಾರಂ ಅಕತತ್ತಾ ವಿರಾಧೇತ್ವಾ ಲದ್ಧನ್ತಿ ಅತ್ಥೋ। ದುಪ್ಪಭಾತನ್ತಿ ದುಟ್ಠು ಪಭಾತಂ ರತ್ತಿಯಾ ಪಭಾತಕರಣಂ, ಮಯ್ಹಂ ನ ಸುಟ್ಠುಂ ಪಭಾತನ್ತಿ ಅತ್ಥೋ। ದುರುಟ್ಠಿತನ್ತಿ ದುಉಟ್ಠಿತಂ, ಸೂರಿಯಸ್ಸ ಉಗ್ಗಮನಂ ಮಯ್ಹಂ ದುಉಗ್ಗಮನನ್ತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
73.Dulladdhaṃvata me āsīti me mayā laddhayasaṃ dulladdhaṃ, buddhabhūtassa satthuno sakkāraṃ akatattā virādhetvā laddhanti attho. Duppabhātanti duṭṭhu pabhātaṃ rattiyā pabhātakaraṇaṃ, mayhaṃ na suṭṭhuṃ pabhātanti attho. Duruṭṭhitanti duuṭṭhitaṃ, sūriyassa uggamanaṃ mayhaṃ duuggamananti attho. Sesaṃ sabbattha uttānamevāti.
ಪಚ್ಚುಪಟ್ಠಾನಸಞ್ಞಕತ್ಥೇರಅಪದಾನವಣ್ಣನಾ ಸಮತ್ತಾ।
Paccupaṭṭhānasaññakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೯. ಪಚ್ಚುಪಟ್ಠಾನಸಞ್ಞಕತ್ಥೇರಅಪದಾನಂ • 9. Paccupaṭṭhānasaññakattheraapadānaṃ
