| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
9. පච්‌චුපට්‌ඨානසඤ්‌ඤකත්‌ථෙරඅපදානවණ්‌ණනා
9. Paccupaṭṭhānasaññakattheraapadānavaṇṇanā
අත්‌ථදස්‌සිම්‌හි සුගතෙතිආදිකං ආයස්‌මතො පච්‌චුපට්‌ඨානසඤ්‌ඤකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො අත්‌ථදස්‌සිස්‌ස භගවතො කාලෙ යක්‌ඛයොනියං නිබ්‌බත්‌තො භගවති ධරමානෙ දස්‌සනස්‌ස අලද්‌ධත්‌තා පච්‌ඡා පරිනිබ්‌බුතෙ මහාසොකප්‌පත්‌තො විහාසි. තදා හිස්‌ස භගවතො සාගතො නාම අග්‌ගසාවකො අනුසාසන්‌තො භගවතො සාරීරිකධාතුපූජා භගවති ධරමානෙ කතපූජා විය චිත්‌තප්‌පසාදවසා මහප්‌ඵලං භවතී’’ති වත්‌වා ‘‘ථූපං කරොහී’’ති නියොජිතො ථූපං කාරෙසි, තං පූජෙත්‌වා තතො චුතො දෙවමනුස්‌සෙසු සක්‌කචක්‌කවත්‌තිසම්‌පත්‌තිමනුභවිත්‌වා ඉමස්‌මිං බුද්‌ධුප්‌පාදෙ සාවත්‌ථියං එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌තො සත්‌ථරි පසීදිත්‌වා පබ්‌බජිත්‌වා නචිරස්‌සෙව අරහා අහොසි.
Atthadassimhi sugatetiādikaṃ āyasmato paccupaṭṭhānasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle yakkhayoniyaṃ nibbatto bhagavati dharamāne dassanassa aladdhattā pacchā parinibbute mahāsokappatto vihāsi. Tadā hissa bhagavato sāgato nāma aggasāvako anusāsanto bhagavato sārīrikadhātupūjā bhagavati dharamāne katapūjā viya cittappasādavasā mahapphalaṃ bhavatī’’ti vatvā ‘‘thūpaṃ karohī’’ti niyojito thūpaṃ kāresi, taṃ pūjetvā tato cuto devamanussesu sakkacakkavattisampattimanubhavitvā imasmiṃ buddhuppāde sāvatthiyaṃ ekasmiṃ kulagehe nibbatto viññutaṃ patto satthari pasīditvā pabbajitvā nacirasseva arahā ahosi.
72. සො අපරභාගෙ අත්‌තනො පුඤ්‌ඤකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො අත්‌ථදස්‌සිම්‌හි සුගතෙතිආදිමාහ. තං හෙට්‌ඨා වුත්‌තමෙව. යක්‌ඛයොනිං උපපජ්‌ජින්‌ති එත්‌ථ පන අත්‌තනො සකාසං සම්‌පත්‌තසම්‌පත්‌තෙ ඛාදන්‌තා යන්‌ති ගච්‌ඡන්‌තීති යක්‌ඛා, යක්‌ඛානං යොනි ජාතීති යක්‌ඛයොනි, යක්‌ඛයොනියං නිබ්‌බත්‌තොති අත්‌ථො.
72. So aparabhāge attano puññakammaṃ saritvā somanassajāto pubbacaritāpadānaṃ pakāsento atthadassimhi sugatetiādimāha. Taṃ heṭṭhā vuttameva. Yakkhayoniṃ upapajjinti ettha pana attano sakāsaṃ sampattasampatte khādantā yanti gacchantīti yakkhā, yakkhānaṃ yoni jātīti yakkhayoni, yakkhayoniyaṃ nibbattoti attho.
73. දුල්‌ලද්‌ධං වත මෙ ආසීති මෙ මයා ලද්‌ධයසං දුල්‌ලද්‌ධං, බුද්‌ධභූතස්‌ස සත්‌ථුනො සක්‌කාරං අකතත්‌තා විරාධෙත්‌වා ලද්‌ධන්‌ති අත්‌ථො. දුප්‌පභාතන්‌ති දුට්‌ඨු පභාතං රත්‌තියා පභාතකරණං, මය්‌හං න සුට්‌ඨුං පභාතන්‌ති අත්‌ථො. දුරුට්‌ඨිතන්‌ති දුඋට්‌ඨිතං, සූරියස්‌ස උග්‌ගමනං මය්‌හං දුඋග්‌ගමනන්‌ති අත්‌ථො. සෙසං සබ්‌බත්‌ථ උත්‌තානමෙවාති.
73.Dulladdhaṃvata me āsīti me mayā laddhayasaṃ dulladdhaṃ, buddhabhūtassa satthuno sakkāraṃ akatattā virādhetvā laddhanti attho. Duppabhātanti duṭṭhu pabhātaṃ rattiyā pabhātakaraṇaṃ, mayhaṃ na suṭṭhuṃ pabhātanti attho. Duruṭṭhitanti duuṭṭhitaṃ, sūriyassa uggamanaṃ mayhaṃ duuggamananti attho. Sesaṃ sabbattha uttānamevāti.
පච්‌චුපට්‌ඨානසඤ්‌ඤකත්‌ථෙරඅපදානවණ්‌ණනා සමත්‌තා.
Paccupaṭṭhānasaññakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 9. පච්‌චුපට්‌ඨානසඤ්‌ඤකත්‌ථෙරඅපදානං • 9. Paccupaṭṭhānasaññakattheraapadānaṃ
