| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
баажийнавам̣сад̣̇ааяаг̇аманагат̇ааван̣н̣анаа
Pācīnavaṃsadāyagamanakathāvaṇṇanā
466. язна баажийнавам̣сад̣̇ааяод̇и д̇ад̇т̇а гасмаа убасан̇гами? яат̇аа наама ж̇игхажчид̇асса бхож̇анз, бибаасид̇асса баанийяз, сийд̇зна пудтасса ун̣хз, ун̣хзна пудтасса сийд̇з, д̣̇угкид̇асса сукз абхиружи уббаж̇ж̇ад̇и, звамзва бхаг̇авад̇о госамб̣агз бхигкуу ан̃н̃аман̃н̃ам̣ виваад̣̇аабаннз асамаг̇г̇аваасам̣ васанд̇з, самаг̇г̇аваасам̣ васанд̇з ааваж̇ж̇знд̇асса имз д̇аяо гулабуд̇д̇аа аабаат̇амааг̇амим̣су, ат̇а нзсам̣ баг̇г̇ан̣хид̇угаамо убасан̇гами ‘‘звааяам̣ бадибад̇д̇иануггамзна госамб̣агаанам̣ бхигкуунам̣ винаяануубааяо ход̇ий’’д̇и. вихаранд̇ийд̇и саамаг̇г̇ирасам̣ анубхавамаанаа вихаранд̇и.
466.Yena pācīnavaṃsadāyoti tattha kasmā upasaṅkami? Yathā nāma jighacchitassa bhojane, pipāsitassa pānīye, sītena phuṭṭhassa uṇhe, uṇhena phuṭṭhassa sīte, dukkhitassa sukhe abhiruci uppajjati, evameva bhagavato kosambake bhikkhū aññamaññaṃ vivādāpanne asamaggavāsaṃ vasante, samaggavāsaṃ vasante āvajjentassa ime tayo kulaputtā āpāthamāgamiṃsu, atha nesaṃ paggaṇhitukāmo upasaṅkami ‘‘evāyaṃ paṭipattianukkamena kosambakānaṃ bhikkhūnaṃ vinayanūpāyo hotī’’ti. Viharantīti sāmaggirasaṃ anubhavamānā viharanti.
д̣̇ааяабаалод̇и (ма. ни. адта. 1.325) аран̃н̃абаало. со аран̃н̃ам̣ яат̇аа ижчид̇ижчид̇аббад̣̇зсзна мануссаа бависид̇ваа д̇ад̇т̇а бубпам̣ ваа палам̣ ваа нияяаасам̣ ваа д̣̇аб̣б̣асамбхаарам̣ ваа на харанд̇и, звам̣ вад̇ияаа баригкид̇д̇асса аран̃н̃асса яож̇ид̇з д̣̇ваарз нисийд̣̇ид̇ваа аран̃н̃ам̣ рагкад̇и, д̇асмаа ‘‘д̣̇ааяабаало’’д̇и вуд̇д̇о. ад̇д̇агаамаруубаа вихаранд̇ийд̇и ад̇д̇ано хид̇ам̣ гаамаяамаанасабхааваа худ̇ваа вихаранд̇и. яо хи имасмим̣ саасанз баб̣б̣аж̇ид̇вааби взж̇ж̇агаммад̣̇ууд̇агаммабахин̣аг̇аманаад̣̇ийнам̣ васзна згавийсад̇ианзсанаахи ж̇ийвигам̣ габбзд̇и, аяам̣ на ад̇д̇агаамаруубо наама. яо бана имасмим̣ саасанз баб̣б̣аж̇ид̇ваа згавийсад̇ианзсанам̣ бахааяа жад̇убаарисуд̣̇д̇хисийлз бад̇идтааяа б̣уд̣̇д̇хаважанам̣ уг̇г̇ан̣хид̇ваа саббааяад̇худ̇ан̇г̇ам̣ ад̇хидтааяа адтад̇им̣сааяа аарамман̣зсу жид̇д̇аружияам̣ гаммадтаанам̣ г̇ахзд̇ваа г̇ааманд̇ам̣ бахааяа аран̃н̃ам̣ бависид̇ваа самаабад̇д̇ияо ниб̣б̣ад̇д̇зд̇ваа вибассанааяа гаммам̣ гурумаано вижарад̇и, аяам̣ ад̇д̇агаамо наама. д̇зби д̇аяо гулабуд̇д̇аа зваруубаа ахзсум̣. д̇зна вуд̇д̇ам̣ ‘‘ад̇д̇агаамаруубаа вихаранд̇ий’’д̇и.
Dāyapāloti (ma. ni. aṭṭha. 1.325) araññapālo. So araññaṃ yathā icchiticchitappadesena manussā pavisitvā tattha pupphaṃ vā phalaṃ vā niyyāsaṃ vā dabbasambhāraṃ vā na haranti, evaṃ vatiyā parikkhittassa araññassa yojite dvāre nisīditvā araññaṃ rakkhati, tasmā ‘‘dāyapālo’’ti vutto. Attakāmarūpā viharantīti attano hitaṃ kāmayamānasabhāvā hutvā viharanti. Yo hi imasmiṃ sāsane pabbajitvāpi vejjakammadūtakammapahiṇagamanādīnaṃ vasena ekavīsatianesanāhi jīvikaṃ kappeti, ayaṃ na attakāmarūpo nāma. Yo pana imasmiṃ sāsane pabbajitvā ekavīsatianesanaṃ pahāya catupārisuddhisīle patiṭṭhāya buddhavacanaṃ uggaṇhitvā sappāyadhutaṅgaṃ adhiṭṭhāya aṭṭhatiṃsāya ārammaṇesu cittaruciyaṃ kammaṭṭhānaṃ gahetvā gāmantaṃ pahāya araññaṃ pavisitvā samāpattiyo nibbattetvā vipassanāya kammaṃ kurumāno vicarati, ayaṃ attakāmo nāma. Tepi tayo kulaputtā evarūpā ahesuṃ. Tena vuttaṃ ‘‘attakāmarūpā viharantī’’ti.
маа д̇зсам̣ апаасумагаасийд̇и д̇зсам̣ апаасугам̣ маа агаасийд̇и бхаг̇аванд̇ам̣ ваарзси. звам̣ гирасса ахоси ‘‘имз гулабуд̇д̇аа самаг̇г̇аа вихаранд̇и, згажжасса жа г̇ад̇адтаанз бхан̣д̣анагалахавиваад̣̇аа вад̇д̇анд̇и, д̇икин̣асин̇г̇о жан̣д̣аг̇он̣о вияа овиж̇жханд̇о вижарад̇и, ат̇згамаг̇г̇зна д̣̇виннам̣ г̇аманам̣ на ход̇и, гад̣̇аажи аяамби звам̣ гаронд̇о имзсам̣ гулабуд̇д̇аанам̣ самаг̇г̇аваасам̣ бхинд̣̇зяяа, баасаад̣̇иго жа банзса суван̣н̣аван̣н̣о расаг̇ид̣̇д̇хо ман̃н̃з, г̇ад̇агаалад̇о бадтааяа бан̣ийд̇ад̣̇ааяагаанам̣ ад̇д̇ано убадтаагаанам̣ ван̣н̣агат̇анаад̣̇ийхи имзсам̣ гулабуд̇д̇аанам̣ аббамаад̣̇авихаарам̣ бхинд̣̇зяяа, васанадтаанаани жааби зд̇зсам̣ гулабуд̇д̇аанам̣ ниб̣ад̣̇д̇хаани барижчиннаани д̇иссова бан̣н̣асаалаа д̇аяо жан̇гамаа д̇ийн̣и д̣̇иваадтаанаани д̇ийн̣и ман̃жабийтаани, аяам̣ бана саман̣о махаагааяо вуд̣дхад̇аро ман̃н̃з бхависсад̇и, со агаалз имз гулабуд̇д̇з сзнаасанаа вудтабзссад̇и, звам̣ саб̣б̣ат̇ааби зд̇зсам̣ апаасу бхависсад̇ий’’д̇и. д̇ам̣ анижчанд̇о ‘‘маа д̇зсам̣ апаасумагаасий’’д̇и бхаг̇аванд̇ам̣ ваарзд̇и.
Mā tesaṃ aphāsumakāsīti tesaṃ aphāsukaṃ mā akāsīti bhagavantaṃ vāresi. Evaṃ kirassa ahosi ‘‘ime kulaputtā samaggā viharanti, ekaccassa ca gataṭṭhāne bhaṇḍanakalahavivādā vattanti, tikhiṇasiṅgo caṇḍagoṇo viya ovijjhanto vicarati, athekamaggena dvinnaṃ gamanaṃ na hoti, kadāci ayampi evaṃ karonto imesaṃ kulaputtānaṃ samaggavāsaṃ bhindeyya, pāsādiko ca panesa suvaṇṇavaṇṇo rasagiddho maññe, gatakālato paṭṭhāya paṇītadāyakānaṃ attano upaṭṭhākānaṃ vaṇṇakathanādīhi imesaṃ kulaputtānaṃ appamādavihāraṃ bhindeyya, vasanaṭṭhānāni cāpi etesaṃ kulaputtānaṃ nibaddhāni paricchinnāni tissova paṇṇasālā tayo caṅkamā tīṇi divāṭṭhānāni tīṇi mañcapīṭhāni, ayaṃ pana samaṇo mahākāyo vuḍḍhataro maññe bhavissati, so akāle ime kulaputte senāsanā vuṭṭhapessati, evaṃ sabbathāpi etesaṃ aphāsu bhavissatī’’ti. Taṃ anicchanto ‘‘mā tesaṃ aphāsumakāsī’’ti bhagavantaṃ vāreti.
гим̣ банзса ж̇аананд̇о ваарзси аж̇аананд̇од̇и? аж̇аананд̇о. саммаасамб̣уд̣̇д̇хо хи наама яад̣̇аа анзгабхигкусахассабаривааро б̣яаамаббабхааяа асийд̇иануб̣яан̃ж̇анзхи д̣̇вад̇д̇им̣самахаабурисалагкан̣асирияаа жа б̣уд̣̇д̇хаанубхаавам̣ д̣̇ассзнд̇о вижарад̇и, д̇ад̣̇аа ‘‘го зсо’’д̇и абужчид̇ваава ж̇аанид̇аб̣б̣о ход̇и. д̇ад̣̇аа бана бхаг̇аваа ‘‘маассу гожи мама б̣уд̣̇д̇хаанубхаавам̣ ан̃н̃аасий’’д̇и д̇ат̇ааруубзна ид̣̇д̇хаабхисан̇каарзна саб̣б̣амби д̇ам̣ б̣уд̣̇д̇хаанубхаавам̣ жийвараг̇аб̣бхзна вияа бадижчаад̣̇зд̇ваа валаахагаг̇аб̣бхзна бадижчанно бун̣н̣ажанд̣̇о вияа саяамзва бад̇д̇ажийварамаад̣̇ааяа ан̃н̃аад̇агавзсзна аг̇амааси. ид̇и д̇ам̣ аж̇аананд̇ова д̣̇ааяабаало ваарзси.
Kiṃ panesa jānanto vāresi ajānantoti? Ajānanto. Sammāsambuddho hi nāma yadā anekabhikkhusahassaparivāro byāmappabhāya asītianubyañjanehi dvattiṃsamahāpurisalakkhaṇasiriyā ca buddhānubhāvaṃ dassento vicarati, tadā ‘‘ko eso’’ti apucchitvāva jānitabbo hoti. Tadā pana bhagavā ‘‘māssu koci mama buddhānubhāvaṃ aññāsī’’ti tathārūpena iddhābhisaṅkhārena sabbampi taṃ buddhānubhāvaṃ cīvaragabbhena viya paṭicchādetvā valāhakagabbhena paṭicchanno puṇṇacando viya sayameva pattacīvaramādāya aññātakavesena agamāsi. Iti taṃ ajānantova dāyapālo vāresi.
зд̇ад̣̇авожаад̇и т̇зро гира ‘‘маа саман̣аа’’д̇и д̣̇ааяабааласса гат̇ам̣ суд̇ваа жинд̇зси ‘‘маяам̣ д̇аяо ж̇анаа ид̇ха вихараама, ан̃н̃о баб̣б̣аж̇ид̇о наама над̇т̇и, аяан̃жа д̣̇ааяабаало баб̣б̣аж̇ид̇зна вияа сад̣̇д̇хим̣ гат̇зд̇и, го ну ко бхависсад̇ий’’д̇и д̣̇иваадтаанад̇о удтааяа д̣̇ваарз тад̇ваа маг̇г̇ам̣ ологзнд̇о бхаг̇аванд̇ам̣ ад̣̇д̣̇аса. бхаг̇авааби т̇зрасса саха д̣̇ассанзнзва сарийробхаасам̣ мун̃жи, асийд̇иануб̣яан̃ж̇анавирааж̇ид̇аа б̣яаамаббабхаа басаарид̇асуван̣н̣абадо вияа вирожид̇т̇а. т̇зро ‘‘аяам̣ д̣̇ааяабаало пан̣агад̇ааасийвисам̣ г̇ийвааяа г̇ахзд̇ум̣ хад̇т̇ам̣ басаарзнд̇о вияа логз аг̇г̇абуг̇г̇алзна сад̣̇д̇хим̣ гат̇знд̇ова на ж̇аанаад̇и, ан̃н̃ад̇арабхигкунаа вияа сад̣̇д̇хим̣ гат̇зд̇ий’’д̇и ниваарзнд̇о зд̇ам̣ ‘‘маавусо, д̣̇ааяабаалаа’’д̇иаад̣̇иважанам̣ авожа.
Etadavocāti thero kira ‘‘mā samaṇā’’ti dāyapālassa kathaṃ sutvā cintesi ‘‘mayaṃ tayo janā idha viharāma, añño pabbajito nāma natthi, ayañca dāyapālo pabbajitena viya saddhiṃ katheti, ko nu kho bhavissatī’’ti divāṭṭhānato uṭṭhāya dvāre ṭhatvā maggaṃ olokento bhagavantaṃ addasa. Bhagavāpi therassa saha dassaneneva sarīrobhāsaṃ muñci, asītianubyañjanavirājitā byāmappabhā pasāritasuvaṇṇapaṭo viya virocittha. Thero ‘‘ayaṃ dāyapālo phaṇakataāsīvisaṃ gīvāya gahetuṃ hatthaṃ pasārento viya loke aggapuggalena saddhiṃ kathentova na jānāti, aññatarabhikkhunā viya saddhiṃ kathetī’’ti nivārento etaṃ ‘‘māvuso, dāyapālā’’tiādivacanaṃ avoca.
д̇знубасан̇гамийд̇и гасмаа бхаг̇авад̇о бажжуг̇г̇аманам̣ агад̇ваава убасан̇гами? звам̣ гирасса ахоси ‘‘маяам̣ д̇аяо ж̇анаа самаг̇г̇аваасам̣ васаама, сажаахам̣ згагова бажжуг̇г̇аманам̣ гариссаами, самаг̇г̇аваасо наама на бхависсад̇и, бияамид̇д̇з г̇ахзд̇ваава бажжуг̇г̇аманам̣ гариссаами. яат̇аа жа бхаг̇аваа маяхам̣ бияо, звам̣ сахааяаанамби мз бияо’’д̇и д̇зхи сад̣̇д̇хим̣ бажжуг̇г̇аманам̣ гаад̇угаамо саяам̣ агад̇ваа убасан̇гами. гзжи бана ‘‘д̇зсам̣ т̇зраанам̣ бан̣н̣асаалад̣̇ваарз жан̇гаманагодияаа бхаг̇авад̇о ааг̇аманамаг̇г̇о ход̇и, д̇асмаа т̇зро д̇зсам̣ сан̃н̃ам̣ д̣̇ад̣̇амаанова г̇ад̇о’’д̇и вад̣̇анд̇и. абхиггамат̇аад̇и ид̇о ааг̇ажчат̇а. баад̣̇з багкаалзсийд̇и вигасид̇абад̣̇умасаннибхзхи ж̇аалахад̇т̇зхи ман̣иван̣н̣ам̣ уд̣̇агам̣ г̇ахзд̇ваа суван̣н̣аван̣н̣зсу бидтибаад̣̇зсу уд̣̇агам̣ аасин̃жид̇ваа баад̣̇зна баад̣̇ам̣ гхам̣сзнд̇о багкаалзси. б̣уд̣̇д̇хаанам̣ гааяз раж̇ож̇аллам̣ наама на убалимбад̇и, гасмаа багкаалзсийд̇и? сарийрасса уд̇уг̇г̇ахан̣ад̇т̇ам̣ д̇зсан̃жа жид̇д̇асамбахам̣санад̇т̇ам̣. амхзхи абхихадзна уд̣̇агзна бхаг̇аваа баад̣̇з багкаалзси, барибхог̇ам̣ агаасийд̇и д̇зсам̣ бхигкуунам̣ б̣алавасоманассавасзна жид̇д̇ам̣ бийн̣ид̇ам̣ ход̇и, д̇асмаа багкаалзси.
Tenupasaṅkamīti kasmā bhagavato paccuggamanaṃ akatvāva upasaṅkami? Evaṃ kirassa ahosi ‘‘mayaṃ tayo janā samaggavāsaṃ vasāma, sacāhaṃ ekakova paccuggamanaṃ karissāmi, samaggavāso nāma na bhavissati, piyamitte gahetvāva paccuggamanaṃ karissāmi. Yathā ca bhagavā mayhaṃ piyo, evaṃ sahāyānampi me piyo’’ti tehi saddhiṃ paccuggamanaṃ kātukāmo sayaṃ akatvā upasaṅkami. Keci pana ‘‘tesaṃ therānaṃ paṇṇasāladvāre caṅkamanakoṭiyā bhagavato āgamanamaggo hoti, tasmā thero tesaṃ saññaṃ dadamānova gato’’ti vadanti. Abhikkamathāti ito āgacchatha. Pāde pakkhālesīti vikasitapadumasannibhehi jālahatthehi maṇivaṇṇaṃ udakaṃ gahetvā suvaṇṇavaṇṇesu piṭṭhipādesu udakaṃ āsiñcitvā pādena pādaṃ ghaṃsento pakkhālesi. Buddhānaṃ kāye rajojallaṃ nāma na upalimpati, kasmā pakkhālesīti? Sarīrassa utuggahaṇatthaṃ tesañca cittasampahaṃsanatthaṃ. Amhehi abhihaṭena udakena bhagavā pāde pakkhālesi, paribhogaṃ akāsīti tesaṃ bhikkhūnaṃ balavasomanassavasena cittaṃ pīṇitaṃ hoti, tasmā pakkhālesi.
ааяасманд̇ам̣ ануруд̣̇д̇хам̣ бхаг̇аваа зд̇ад̣̇авожаад̇и со гира д̇зсам̣ вуд̣дхад̇аро, д̇асса сан̇г̇ахз гад̇з сзсаанам̣ гад̇ова ход̇ийд̇и т̇зран̃н̃зва зд̇ам̣ ‘‘гажжи во ануруд̣̇д̇хаа’’д̇иаад̣̇иважанам̣ авожа. ануруд̣̇д̇хаад̇и ваа згасзсанаязна вуд̇д̇ам̣ вируубзгасзсассаби ижчид̇аб̣б̣ад̇д̇аа, зван̃жа гад̇ваа б̣ахуважананид̣̇д̣̇зсо жа самад̇т̇ид̇о ход̇и. гажжийд̇и бужчанад̇т̇з нибаад̇о. вод̇и саамиважанам̣. ид̣̇ам̣ вуд̇д̇ам̣ ход̇и – гажжи ануруд̣̇д̇хаа д̇умхаагам̣ каманийяам̣, ирияаабат̇о во камад̇и, гажжи яаабанийяам̣, гажжи во ж̇ийвид̇ам̣ яаабзд̇и гхадияад̇и, гажжи бин̣д̣агзна на гиламат̇а, гажжи д̇умхаагам̣ сулабхабин̣д̣ам̣, самбад̇д̇з во д̣̇исваа мануссаа ул̣ун̇гаяааг̇ум̣ ваа гадажчубхигкам̣ ваа д̣̇аад̇аб̣б̣ам̣ ман̃н̃анд̇ийд̇и бхигкаажааравад̇д̇ам̣ бужчад̇и. гасмаа? яасмаа бажжаязна агиламанд̇зна саггаа саман̣ад̇хаммо гаад̇ум̣, вад̇д̇амзва ваа зд̇ам̣ баб̣б̣аж̇ид̇аанам̣.
Āyasmantaṃ anuruddhaṃ bhagavā etadavocāti so kira tesaṃ vuḍḍhataro, tassa saṅgahe kate sesānaṃ katova hotīti theraññeva etaṃ ‘‘kacci vo anuruddhā’’tiādivacanaṃ avoca. Anuruddhāti vā ekasesanayena vuttaṃ virūpekasesassapi icchitabbattā, evañca katvā bahuvacananiddeso ca samatthito hoti. Kaccīti pucchanatthe nipāto. Voti sāmivacanaṃ. Idaṃ vuttaṃ hoti – kacci anuruddhā tumhākaṃ khamanīyaṃ, iriyāpatho vo khamati, kacci yāpanīyaṃ, kacci vo jīvitaṃ yāpeti ghaṭiyati, kacci piṇḍakena na kilamatha, kacci tumhākaṃ sulabhapiṇḍaṃ, sampatte vo disvā manussā uḷuṅkayāguṃ vā kaṭacchubhikkhaṃ vā dātabbaṃ maññantīti bhikkhācāravattaṃ pucchati. Kasmā? Yasmā paccayena akilamantena sakkā samaṇadhammo kātuṃ, vattameva vā etaṃ pabbajitānaṃ.
ат̇а д̇зна бадиважанз д̣̇иннз ‘‘ануруд̣̇д̇хаа д̇умхз рааж̇абаб̣б̣аж̇ид̇аа махаабун̃н̃аа, мануссаа д̇умхаагам̣ аран̃н̃з васанд̇аанам̣ ад̣̇ад̇ваа гасса ан̃н̃асса д̣̇аад̇аб̣б̣ам̣ ман̃н̃иссанд̇и, д̇умхз бана зд̇ам̣ бхун̃ж̇ид̇ваа гим̣ ну ко миг̇абод̇агаа вияа ан̃н̃аман̃н̃ам̣ гхаддзнд̇аа вихарат̇а, уд̣̇ааху саамаг̇г̇ибхааво во ад̇т̇ий’’д̇и саамаг̇г̇ирасам̣ бужчанд̇о ‘‘гажжи бана во ануруд̣̇д̇хаа самаг̇г̇аа’’д̇иаад̣̇имааха. д̇ад̇т̇а кийрод̣̇агийбхууд̇аад̇и яат̇аа кийран̃жа уд̣̇аган̃жа ан̃н̃аман̃н̃ам̣ сам̣санд̣̇ад̇и, висум̣ на ход̇и, згад̇д̇ам̣ вияа убзд̇и, гажжи звам̣ саамаг̇г̇ивасзна згад̇д̇убаг̇ад̇ажид̇д̇уббаад̣̇аа вихарат̇аад̇и бужчад̇и. бияажагкуухийд̇и мзд̇д̇ажид̇д̇ам̣ бажжубадтаабзд̇ваа ологанад̇о бияабхаавад̣̇ийбагаани жагкууни бияажагкууни наама, ‘‘гажжи д̇ат̇ааруубзхи жагкуухи ан̃н̃аман̃н̃ам̣ бассанд̇аа вихарат̇аа’’д̇и бужчад̇и. д̇аг̇гхаад̇и згам̣сад̇т̇з нибаад̇о, згам̣сзна маяам̣ бханд̇зд̇и вуд̇д̇ам̣ ход̇и. яат̇аа гат̇ам̣ банаад̇и зд̇т̇а яат̇аад̇и нибаад̇амад̇д̇ам̣, гат̇анд̇и гааран̣абужчаа, гат̇ам̣ бана д̇умхз звам̣ вихарат̇а, гзна гааран̣зна вихарат̇а, д̇ам̣ мз гааран̣ам̣ б̣руухийд̇и вуд̇д̇ам̣ ход̇и.
Atha tena paṭivacane dinne ‘‘anuruddhā tumhe rājapabbajitā mahāpuññā, manussā tumhākaṃ araññe vasantānaṃ adatvā kassa aññassa dātabbaṃ maññissanti, tumhe pana etaṃ bhuñjitvā kiṃ nu kho migapotakā viya aññamaññaṃ ghaṭṭentā viharatha, udāhu sāmaggibhāvo vo atthī’’ti sāmaggirasaṃ pucchanto ‘‘kacci pana vo anuruddhā samaggā’’tiādimāha. Tattha khīrodakībhūtāti yathā khīrañca udakañca aññamaññaṃ saṃsandati, visuṃ na hoti, ekattaṃ viya upeti, kacci evaṃ sāmaggivasena ekattupagatacittuppādā viharathāti pucchati. Piyacakkhūhīti mettacittaṃ paccupaṭṭhāpetvā olokanato piyabhāvadīpakāni cakkhūni piyacakkhūni nāma, ‘‘kacci tathārūpehi cakkhūhi aññamaññaṃ passantā viharathā’’ti pucchati. Tagghāti ekaṃsatthe nipāto, ekaṃsena mayaṃ bhanteti vuttaṃ hoti. Yathā kathaṃ panāti ettha yathāti nipātamattaṃ, kathanti kāraṇapucchā, kathaṃ pana tumhe evaṃ viharatha, kena kāraṇena viharatha, taṃ me kāraṇaṃ brūhīti vuttaṃ hoti.
мзд̇д̇ам̣ гааяагамманд̇и мзд̇д̇ажид̇д̇авасзна бавад̇д̇ам̣ гааяагаммам̣. аави жзва рахо жаад̇и саммукаа жзва бараммукаа жа. ид̇арзсуби зсзва наяо. д̇ад̇т̇а саммукаа гааяаважийгаммаани сахаваасз лаб̣бханд̇и, ид̇араани виббаваасз, маногаммам̣ саб̣б̣ад̇т̇а лаб̣бхад̇и. яан̃хи сахзва васанд̇зсу згзна ман̃жабийтам̣ ваа д̣̇аарубхан̣д̣ам̣ ваа мад̇д̇игаабхан̣д̣ам̣ ваа б̣ахи д̣̇уннигкид̇д̇ам̣ ход̇и, д̇ам̣ д̣̇исваа ‘‘гзнид̣̇ам̣ вал̣ан̃ж̇ид̇а’’нд̇и аван̃н̃ам̣ агад̇ваа ад̇д̇анаа д̣̇уннигкид̇д̇ам̣ вияа г̇ахзд̇ваа бадисаамзнд̇асса бадиж̇аг̇г̇ид̇аб̣б̣аяуд̇д̇ам̣ ваа бана таанам̣ бадиж̇аг̇г̇анд̇асса саммукаа мзд̇д̇ам̣ гааяагаммам̣ наама ход̇и. згасмим̣ багганд̇з д̇зна д̣̇уннигкид̇д̇ам̣ сзнаасанабаригкаарам̣ д̇ат̇зва нигкибанд̇асса бадиж̇аг̇г̇ид̇аб̣б̣аяуд̇д̇ам̣ ваа бана таанам̣ бадиж̇аг̇г̇анд̇асса бараммукаа мзд̇д̇ам̣ гааяагаммам̣ наама ход̇и. сахавасанд̇асса бана т̇зрзхи сад̣̇д̇хим̣ мад̇хурам̣ саммод̣̇анийяагат̇ам̣ бадисант̇аарагат̇ам̣ сааран̣ийяагат̇ам̣ д̇хаммагат̇ам̣ сарабхан̃н̃ам̣ саагажчам̣ бан̃хабужчанам̣ бан̃хависсаж̇ж̇ананд̇и звамаад̣̇игаран̣з саммукаа мзд̇д̇ам̣ важийгаммам̣ наама ход̇и. т̇зрзсу бана багганд̇зсу ‘‘маяхам̣ бияасахааяо нанд̣̇ияад̇т̇зро гимилад̇т̇зро звам̣ сийласамбанно звам̣ аажаарасамбанно’’д̇иаад̣̇иг̇ун̣агат̇анз бараммукаа мзд̇д̇ам̣ важийгаммам̣ наама ход̇и. ‘‘маяхам̣ бияамид̇д̇о нанд̣̇ияад̇т̇зро гимилад̇т̇зро авзро ход̇у аб̣яаабаж̇ж̇о сукий’’д̇и звам̣ саманнаахарад̇о бана саммукааби бараммукааби мзд̇д̇ам̣ маногаммам̣ ход̇иязва.
Mettaṃkāyakammanti mettacittavasena pavattaṃ kāyakammaṃ. Āvi ceva raho cāti sammukhā ceva parammukhā ca. Itaresupi eseva nayo. Tattha sammukhā kāyavacīkammāni sahavāse labbhanti, itarāni vippavāse, manokammaṃ sabbattha labbhati. Yañhi saheva vasantesu ekena mañcapīṭhaṃ vā dārubhaṇḍaṃ vā mattikābhaṇḍaṃ vā bahi dunnikkhittaṃ hoti, taṃ disvā ‘‘kenidaṃ vaḷañjita’’nti avaññaṃ akatvā attanā dunnikkhittaṃ viya gahetvā paṭisāmentassa paṭijaggitabbayuttaṃ vā pana ṭhānaṃ paṭijaggantassa sammukhā mettaṃ kāyakammaṃ nāma hoti. Ekasmiṃ pakkante tena dunnikkhittaṃ senāsanaparikkhāraṃ tatheva nikkhipantassa paṭijaggitabbayuttaṃ vā pana ṭhānaṃ paṭijaggantassa parammukhā mettaṃ kāyakammaṃ nāma hoti. Sahavasantassa pana therehi saddhiṃ madhuraṃ sammodanīyakathaṃ paṭisanthārakathaṃ sāraṇīyakathaṃ dhammakathaṃ sarabhaññaṃ sākacchaṃ pañhapucchanaṃ pañhavissajjananti evamādikaraṇe sammukhā mettaṃ vacīkammaṃ nāma hoti. Theresu pana pakkantesu ‘‘mayhaṃ piyasahāyo nandiyatthero kimilatthero evaṃ sīlasampanno evaṃ ācārasampanno’’tiādiguṇakathane parammukhā mettaṃ vacīkammaṃ nāma hoti. ‘‘Mayhaṃ piyamitto nandiyatthero kimilatthero avero hotu abyāpajjo sukhī’’ti evaṃ samannāharato pana sammukhāpi parammukhāpi mettaṃ manokammaṃ hotiyeva.
наанаа хи ко но бханд̇з гааяаад̇и аяан̃хи гааяо бидтам̣ вияа мад̇д̇игаа вияа жа омад̣̇д̣̇ид̇ваа згад̇о гаад̇ум̣ на саггаа. зган̃жа бана ман̃н̃з жид̇д̇анд̇и жид̇д̇ам̣ бана но ад̇д̇ано вияа ан̃н̃аман̃н̃асса хид̇абхаавзна авирод̇хабхаавзна бхзд̣̇аабхаавзна самаг̇г̇абхаавзна згамзваад̇и д̣̇ассзд̇и. гат̇ам̣ банзд̇з сагам̣ жид̇д̇ам̣ нигкибид̇ваа ид̇арзсам̣ жид̇д̇авасзна вад̇д̇им̣сууд̇и? згасса бад̇д̇з малам̣ удтахад̇и, згасса жийварам̣ гилидтам̣ ход̇и, згасса барибхан̣д̣агаммам̣ ход̇и. д̇ад̇т̇а яасса бад̇д̇з малам̣ удтид̇ам̣, д̇зна ‘‘мамаавусо бад̇д̇з малам̣ удтид̇ам̣, бажид̇ум̣ ваддад̇ий’’д̇и вуд̇д̇з ид̇арз ‘‘маяхам̣ жийварам̣ гилидтам̣ д̇ховид̇аб̣б̣ам̣, маяхам̣ барибхан̣д̣ам̣ гаад̇аб̣б̣а’’нд̇и авад̇ваа аран̃н̃ам̣ бависид̇ваа д̣̇аарууни аахарид̇ваа бхинд̣̇ид̇ваа бад̇д̇агадаахз б̣ахалад̇анумад̇д̇игаахи лзбам̣ гад̇ваа бад̇д̇ам̣ бажид̇ваа д̇ад̇о барам̣ жийварам̣ ваа д̇хованд̇и, барибхан̣д̣ам̣ ваа гаронд̇и. ‘‘мамаавусо жийварам̣ гилидтам̣, д̇ховид̇ум̣ ваддад̇ий’’д̇и ‘‘мама бан̣н̣асаалаа углаабаа, барибхан̣д̣ам̣ гаад̇ум̣ ваддад̇ий’’д̇и батамад̇арам̣ аарожид̇зби зсзва наяо.
Nānā hi kho no bhante kāyāti ayañhi kāyo piṭṭhaṃ viya mattikā viya ca omadditvā ekato kātuṃ na sakkā. Ekañca pana maññe cittanti cittaṃ pana no attano viya aññamaññassa hitabhāvena avirodhabhāvena bhedābhāvena samaggabhāvena ekamevāti dasseti. Kathaṃ panete sakaṃ cittaṃ nikkhipitvā itaresaṃ cittavasena vattiṃsūti? Ekassa patte malaṃ uṭṭhahati, ekassa cīvaraṃ kiliṭṭhaṃ hoti, ekassa paribhaṇḍakammaṃ hoti. Tattha yassa patte malaṃ uṭṭhitaṃ, tena ‘‘mamāvuso patte malaṃ uṭṭhitaṃ, pacituṃ vaṭṭatī’’ti vutte itare ‘‘mayhaṃ cīvaraṃ kiliṭṭhaṃ dhovitabbaṃ, mayhaṃ paribhaṇḍaṃ kātabba’’nti avatvā araññaṃ pavisitvā dārūni āharitvā bhinditvā pattakaṭāhe bahalatanumattikāhi lepaṃ katvā pattaṃ pacitvā tato paraṃ cīvaraṃ vā dhovanti, paribhaṇḍaṃ vā karonti. ‘‘Mamāvuso cīvaraṃ kiliṭṭhaṃ, dhovituṃ vaṭṭatī’’ti ‘‘mama paṇṇasālā uklāpā, paribhaṇḍaṃ kātuṃ vaṭṭatī’’ti paṭhamataraṃ ārocitepi eseva nayo.
ид̣̇аани д̇зсам̣ аббамаад̣̇алагкан̣ам̣ бужчанд̇о ‘‘гажжи бана во ануруд̣̇д̇хаа’’д̇иаад̣̇имааха. д̇ад̇т̇а вод̇и нибаад̇амад̇д̇ам̣, бажжад̇д̇аважанам̣ ваа, гажжи д̇умхзд̇и ад̇т̇о. амхааганд̇и амхзсу д̇ийсу ж̇анзсу. бин̣д̣ааяа бадиггамад̇ийд̇и г̇аамз бин̣д̣ааяа жарид̇ваа бажжааг̇ажчад̇и. аваггаарабаад̇инд̇и ад̇ирзгабин̣д̣абаад̇ам̣ абанзд̇ваа табанад̇т̇ааяа згам̣ самуг̇г̇абаад̇им̣ д̇ховид̇ваа табзд̇и. яо бажчаад̇и д̇з гира т̇зраа на згад̇ова бхигкаажаарам̣ бависанд̇и. паласамаабад̇д̇ирад̇аа хзд̇з баад̇ова сарийрабадиж̇аг̇г̇анам̣ гад̇ваа вад̇д̇абадибад̇д̇им̣ буурзд̇ваа сзнаасанам̣ бависид̇ваа гаалабарижчзд̣̇ам̣ гад̇ваа паласамаабад̇д̇им̣ аббзд̇ваа нисийд̣̇анд̇и. д̇зсу яо батамад̇арам̣ нисинно ад̇д̇ано гаалабарижчзд̣̇авасзна батамад̇арам̣ удтаад̇и, со бин̣д̣ааяа жарид̇ваа бадинивад̇д̇о бхад̇д̇агижжадтаанам̣ ааг̇анд̇ваа ж̇аанаад̇и ‘‘д̣̇вз бхигкуу бажчад̇о, ахам̣ батамад̇арам̣ ааг̇ад̇о’’д̇и. ат̇а бад̇д̇ам̣ бид̣̇ахид̇ваа аасанабан̃н̃аабанаад̣̇ийни гад̇ваа яад̣̇и бад̇д̇з бадивийсамад̇д̇амзва ход̇и, нисийд̣̇ид̇ваа бхун̃ж̇ад̇и, яад̣̇и ад̇ирзгам̣ ход̇и, аваггаарабаад̇ияам̣ багкибид̇ваа баад̇им̣ бид̇хааяа бхун̃ж̇ад̇и, гад̇абхад̇д̇агижжо бад̇д̇ам̣ д̇ховид̇ваа вод̣̇агам̣ гад̇ваа т̇авигааяа осаабзд̇ваа бад̇д̇ажийварам̣ г̇ахзд̇ваа ад̇д̇ано васанадтаанам̣ бависад̇и.
Idāni tesaṃ appamādalakkhaṇaṃ pucchanto ‘‘kacci pana vo anuruddhā’’tiādimāha. Tattha voti nipātamattaṃ, paccattavacanaṃ vā, kacci tumheti attho. Amhākanti amhesu tīsu janesu. Piṇḍāya paṭikkamatīti gāme piṇḍāya caritvā paccāgacchati. Avakkārapātinti atirekapiṇḍapātaṃ apanetvā ṭhapanatthāya ekaṃ samuggapātiṃ dhovitvā ṭhapeti. Yo pacchāti te kira therā na ekatova bhikkhācāraṃ pavisanti. Phalasamāpattiratā hete pātova sarīrapaṭijagganaṃ katvā vattapaṭipattiṃ pūretvā senāsanaṃ pavisitvā kālaparicchedaṃ katvā phalasamāpattiṃ appetvā nisīdanti. Tesu yo paṭhamataraṃ nisinno attano kālaparicchedavasena paṭhamataraṃ uṭṭhāti, so piṇḍāya caritvā paṭinivatto bhattakiccaṭṭhānaṃ āgantvā jānāti ‘‘dve bhikkhū pacchato, ahaṃ paṭhamataraṃ āgato’’ti. Atha pattaṃ pidahitvā āsanapaññāpanādīni katvā yadi patte paṭivīsamattameva hoti, nisīditvā bhuñjati, yadi atirekaṃ hoti, avakkārapātiyaṃ pakkhipitvā pātiṃ pidhāya bhuñjati, katabhattakicco pattaṃ dhovitvā vodakaṃ katvā thavikāya osāpetvā pattacīvaraṃ gahetvā attano vasanaṭṭhānaṃ pavisati.
д̣̇уд̇ияоби ааг̇анд̇ваава ж̇аанаад̇и ‘‘зго батамам̣ ааг̇ад̇о, зго бажчад̇о’’д̇и. со сажз бад̇д̇з бхад̇д̇ам̣ бамаан̣амзва ход̇и, бхун̃ж̇ад̇и. сажз манд̣̇ам̣, аваггаарабаад̇ид̇о г̇ахзд̇ваа бхун̃ж̇ад̇и. сажз ад̇ирзгам̣ ход̇и, аваггаарабаад̇ияам̣ багкибид̇ваа бамаан̣амзва бхун̃ж̇ид̇ваа буримад̇т̇зро вияа васанадтаанам̣ бависад̇и. д̇ад̇ияоби ааг̇анд̇ваава ж̇аанаад̇и ‘‘д̣̇вз батамам̣ ааг̇ад̇аа, ахам̣ бажчимо’’д̇и. соби д̣̇уд̇ияад̇т̇зро вияа бхун̃ж̇ид̇ваа гад̇абхад̇д̇агижжо бад̇д̇ам̣ д̇ховид̇ваа вод̣̇агам̣ гад̇ваа т̇авигааяа осаабзд̇ваа аасанаани угкибид̇ваа бадисаамзд̇и, баанийяагхадз ваа барибхож̇анийяагхадз ваа авасзсауд̣̇агам̣ чад̣д̣зд̇ваа гхадз нигуж̇ж̇ид̇ваа аваггаарабаад̇ияам̣ сажз авасзсабхад̇д̇ам̣ ход̇и, д̇ам̣ вуд̇д̇анаязна ж̇ахид̇ваа баад̇им̣ д̇ховид̇ваа бадисаамзд̇и, бхад̇д̇аг̇г̇ам̣ саммаж̇ж̇ад̇и, со гажаварам̣ чад̣д̣зд̇ваа саммаж̇ж̇аним̣ угкибид̇ваа убажигаахи муд̇д̇адтаанз табзд̇ваа бад̇д̇ажийварамаад̣̇ааяа васанадтаанам̣ бависад̇и. ид̣̇ам̣ т̇зраанам̣ б̣ахивихаарз аран̃н̃з бхад̇д̇агижжагаран̣адтаанз бхож̇анасаалааяа вад̇д̇ам̣. ид̣̇ам̣ санд̇хааяа ‘‘яо бажчаа’’д̇иаад̣̇и вуд̇д̇ам̣.
Dutiyopi āgantvāva jānāti ‘‘eko paṭhamaṃ āgato, eko pacchato’’ti. So sace patte bhattaṃ pamāṇameva hoti, bhuñjati. Sace mandaṃ, avakkārapātito gahetvā bhuñjati. Sace atirekaṃ hoti, avakkārapātiyaṃ pakkhipitvā pamāṇameva bhuñjitvā purimatthero viya vasanaṭṭhānaṃ pavisati. Tatiyopi āgantvāva jānāti ‘‘dve paṭhamaṃ āgatā, ahaṃ pacchimo’’ti. Sopi dutiyatthero viya bhuñjitvā katabhattakicco pattaṃ dhovitvā vodakaṃ katvā thavikāya osāpetvā āsanāni ukkhipitvā paṭisāmeti, pānīyaghaṭe vā paribhojanīyaghaṭe vā avasesaudakaṃ chaḍḍetvā ghaṭe nikujjitvā avakkārapātiyaṃ sace avasesabhattaṃ hoti, taṃ vuttanayena jahitvā pātiṃ dhovitvā paṭisāmeti, bhattaggaṃ sammajjati, so kacavaraṃ chaḍḍetvā sammajjaniṃ ukkhipitvā upacikāhi muttaṭṭhāne ṭhapetvā pattacīvaramādāya vasanaṭṭhānaṃ pavisati. Idaṃ therānaṃ bahivihāre araññe bhattakiccakaraṇaṭṭhāne bhojanasālāya vattaṃ. Idaṃ sandhāya ‘‘yo pacchā’’tiādi vuttaṃ.
яо бассад̇ийд̇иаад̣̇и бана нзсам̣ анд̇овихаарз вад̇д̇анд̇и взд̣̇ид̇аб̣б̣ам̣. д̇ад̇т̇а важжагхаданд̇и аажаманагумбхим̣. рид̇д̇анд̇и рид̇д̇агам̣. д̇ужчанд̇и д̇ассзва взважанам̣. ависаяханд̇и угкибид̇ум̣ асаггун̣зяяам̣ ад̇ибхаарияам̣. хад̇т̇авигаарзнаад̇и хад̇т̇асан̃н̃ааяа. д̇з гира баанийяагхадаад̣̇ийсу яам̣гин̃жи д̇ужчагам̣ г̇ахзд̇ваа богкаран̣им̣ г̇анд̇ваа анд̇о жа б̣ахи жа д̇ховид̇ваа уд̣̇агам̣ бариссаавзд̇ваа д̇ийрз табзд̇ваа ан̃н̃ам̣ бхигкум̣ хад̇т̇авигаарзна ааманд̇знд̇и, од̣̇исса ваа анод̣̇исса ваа сад̣̇д̣̇ам̣ на гаронд̇и. гасмаа од̣̇исса на гаронд̇и? д̇ан̃хи бхигкум̣ сад̣̇д̣̇о б̣аад̇хзяяаад̇и. гасмаа анод̣̇исса на гаронд̇и? анод̣̇исса сад̣̇д̣̇з д̣̇иннз ‘‘ахам̣ бурз, ахам̣ бурз’’д̇и д̣̇взби нигкамзяяум̣. д̇ад̇о д̣̇вийхи гад̇д̇аб̣б̣агаммз д̇ад̇ияасса гаммажчзд̣̇о бхавзяяа. сам̣яад̇абад̣̇асад̣̇д̣̇о бана худ̇ваа абарасса бхигкуно д̣̇иваадтаанасанд̇игам̣ г̇анд̇ваа д̇зна д̣̇идтабхаавам̣ н̃ад̇ваа хад̇т̇асан̃н̃ам̣ гарод̇и, д̇ааяа сан̃н̃ааяа ид̇аро ааг̇ажчад̇и, д̇ад̇о д̣̇вз ж̇анаа хад̇т̇зна хад̇т̇ам̣ сам̣сиб̣б̣анд̇аа д̣̇вийсу хад̇т̇зсу табзд̇ваа удтаабзнд̇и. д̇ам̣ санд̇хааяааха ‘‘хад̇т̇авигаарзна д̣̇уд̇ияам̣ ааманд̇зд̇ваа хад̇т̇авилан̇гхагзна убадтаабзмаа’’д̇и.
Yopassatītiādi pana nesaṃ antovihāre vattanti veditabbaṃ. Tattha vaccaghaṭanti ācamanakumbhiṃ. Rittanti rittakaṃ. Tucchanti tasseva vevacanaṃ. Avisayhanti ukkhipituṃ asakkuṇeyyaṃ atibhāriyaṃ. Hatthavikārenāti hatthasaññāya. Te kira pānīyaghaṭādīsu yaṃkiñci tucchakaṃ gahetvā pokkharaṇiṃ gantvā anto ca bahi ca dhovitvā udakaṃ parissāvetvā tīre ṭhapetvā aññaṃ bhikkhuṃ hatthavikārena āmantenti, odissa vā anodissa vā saddaṃ na karonti. Kasmā odissa na karonti? Tañhi bhikkhuṃ saddo bādheyyāti. Kasmā anodissa na karonti? Anodissa sadde dinne ‘‘ahaṃ pure, ahaṃ pure’’ti dvepi nikkhameyyuṃ. Tato dvīhi kattabbakamme tatiyassa kammacchedo bhaveyya. Saṃyatapadasaddo pana hutvā aparassa bhikkhuno divāṭṭhānasantikaṃ gantvā tena diṭṭhabhāvaṃ ñatvā hatthasaññaṃ karoti, tāya saññāya itaro āgacchati, tato dve janā hatthena hatthaṃ saṃsibbantā dvīsu hatthesu ṭhapetvā uṭṭhāpenti. Taṃ sandhāyāha ‘‘hatthavikārena dutiyaṃ āmantetvā hatthavilaṅghakena upaṭṭhāpemā’’ti.
бан̃жаахигам̣ ко банаад̇и жаад̇уд̣̇д̣̇асз баннарасз адтамияанд̇и ид̣̇ам̣ д̇аава багад̇ид̇хаммассаванамзва, д̇ам̣ акан̣д̣ам̣ гад̇ваа бан̃жамз бан̃жамз д̣̇ивасз д̣̇вз т̇зраа наад̇ивигаалз нахааяид̇ваа ануруд̣̇д̇хад̇т̇зрасса васанадтаанам̣ г̇ажчанд̇и. д̇ад̇т̇а д̇аяоби нисийд̣̇ид̇ваа д̇ин̣н̣ам̣ бидагаанам̣ ан̃н̃ад̇арасмим̣ ан̃н̃аман̃н̃ам̣ бан̃хам̣ бужчанд̇и, ан̃н̃аман̃н̃ам̣ виссаж̇ж̇знд̇и. д̇зсам̣ звам̣ гаронд̇аанам̣язва арун̣ам̣ уг̇г̇ажчад̇и. д̇ам̣ санд̇хааязд̇ам̣ вуд̇д̇ам̣. зд̇д̇аавад̇аа т̇зрзна бхаг̇авад̇аа аббамаад̣̇алагкан̣ам̣ бужчид̇зна бамаад̣̇адтаанзсуязва аббамаад̣̇алагкан̣ам̣ виссаж̇ж̇ид̇ам̣ ход̇и. ан̃н̃зсан̃хи бхигкуунам̣ бхигкаажаарабависанагаало нигкаманагаало ниваасанабаривад̇д̇анам̣ жийварабаарубанам̣ анд̇ог̇аамз бин̣д̣ааяа жаран̣ам̣ д̇хаммагат̇анам̣ анумод̣̇анам̣ анд̇ог̇аамад̇о нигкамид̇ваа бхад̇д̇агижжагаран̣ам̣ бад̇д̇ад̇хованам̣ бад̇д̇аосаабанам̣ бад̇д̇ажийварабадисаамананд̇и бабан̃жагаран̣адтаанаани зд̇аани. д̇асмаа т̇зро ‘‘амхаагам̣ зд̇д̇агам̣ таанам̣ мун̃жид̇ваа виссадтагат̇аабавад̇д̇анзна гаммадтаанз бамаж̇ж̇анадтаанаани, д̇ад̇т̇ааби маяам̣, бханд̇з, гаммадтаанавируд̣̇д̇хам̣ на бадибаж̇ж̇аамаа’’д̇и ан̃н̃зсам̣ бамаад̣̇адтаанзсуязва сикааббад̇д̇ам̣ ад̇д̇ано аббамаад̣̇алагкан̣ам̣ виссаж̇ж̇зси. иминаава зд̇аани таанаани мун̃жид̇ваа ан̃н̃ад̇т̇а вихаарасамаабад̇д̇ийнам̣ авал̣ан̃ж̇анавасзна бамаад̣̇агаало наама амхаагам̣ над̇т̇ийд̇и д̣̇ийбзд̇и.
Pañcāhikaṃ kho panāti cātuddase pannarase aṭṭhamiyanti idaṃ tāva pakatidhammassavanameva, taṃ akhaṇḍaṃ katvā pañcame pañcame divase dve therā nātivikāle nahāyitvā anuruddhattherassa vasanaṭṭhānaṃ gacchanti. Tattha tayopi nisīditvā tiṇṇaṃ piṭakānaṃ aññatarasmiṃ aññamaññaṃ pañhaṃ pucchanti, aññamaññaṃ vissajjenti. Tesaṃ evaṃ karontānaṃyeva aruṇaṃ uggacchati. Taṃ sandhāyetaṃ vuttaṃ. Ettāvatā therena bhagavatā appamādalakkhaṇaṃ pucchitena pamādaṭṭhānesuyeva appamādalakkhaṇaṃ vissajjitaṃ hoti. Aññesañhi bhikkhūnaṃ bhikkhācārapavisanakālo nikkhamanakālo nivāsanaparivattanaṃ cīvarapārupanaṃ antogāme piṇḍāya caraṇaṃ dhammakathanaṃ anumodanaṃ antogāmato nikkhamitvā bhattakiccakaraṇaṃ pattadhovanaṃ pattaosāpanaṃ pattacīvarapaṭisāmananti papañcakaraṇaṭṭhānāni etāni. Tasmā thero ‘‘amhākaṃ ettakaṃ ṭhānaṃ muñcitvā vissaṭṭhakathāpavattanena kammaṭṭhāne pamajjanaṭṭhānāni, tatthāpi mayaṃ, bhante, kammaṭṭhānaviruddhaṃ na paṭipajjāmā’’ti aññesaṃ pamādaṭṭhānesuyeva sikhāppattaṃ attano appamādalakkhaṇaṃ vissajjesi. Imināva etāni ṭhānāni muñcitvā aññattha vihārasamāpattīnaṃ avaḷañjanavasena pamādakālo nāma amhākaṃ natthīti dīpeti.
баажийнавам̣сад̣̇ааяаг̇аманагат̇ааван̣н̣анаа нидтид̇аа.
Pācīnavaṃsadāyagamanakathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 274. баажийнавам̣сад̣̇ааяаг̇аманагат̇аа • 274. Pācīnavaṃsadāyagamanakathā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / госамб̣агавиваад̣̇агат̇ааван̣н̣анаа • Kosambakavivādakathāvaṇṇanā
