| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৩. পাচিত্তিযাদিপঞ্হা
3. Pācittiyādipañhā
৪৮১.
481.
অধিট্ঠিতং রজনায রত্তং।
Adhiṭṭhitaṃ rajanāya rattaṃ;
কপ্পকতম্পি সন্তং।
Kappakatampi santaṃ;
পরিভুঞ্জন্তস্স আপত্তি।
Paribhuñjantassa āpatti;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
অত্থঙ্গতে সূরিযে ভিক্খু মংসানি খাদতি।
Atthaṅgate sūriye bhikkhu maṃsāni khādati;
ন উম্মত্তকো ন চ পন খিত্তচিত্তো।
Na ummattako na ca pana khittacitto;
ন চাপি সো ৰেদনাট্টো ভৰেয্য।
Na cāpi so vedanāṭṭo bhaveyya;
ন চস্স হোতি আপত্তি।
Na cassa hoti āpatti;
সো চ ধম্মো সুগতেন দেসিতো।
So ca dhammo sugatena desito;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
ন রত্তচিত্তো ন চ পন থেয্যচিত্তো।
Na rattacitto na ca pana theyyacitto;
ন চাপি সো পরং মরণায চেতযি।
Na cāpi so paraṃ maraṇāya cetayi;
সলাকং দেন্তস্স হোতি ছেজ্জং।
Salākaṃ dentassa hoti chejjaṃ;
পটিগ্গণ্হন্তস্স থুল্লচ্চযং।
Paṭiggaṇhantassa thullaccayaṃ;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
ন চাপি আরঞ্ঞকং সাসঙ্কসম্মতং।
Na cāpi āraññakaṃ sāsaṅkasammataṃ;
ন চাপি সঙ্ঘেন সম্মুতি দিন্না।
Na cāpi saṅghena sammuti dinnā;
ন চস্স কথিনং অত্থতং তত্থেৰ।
Na cassa kathinaṃ atthataṃ tattheva;
চীৰরং নিক্খিপিত্ৰা গচ্ছেয্য অড্ঢযোজনং।
Cīvaraṃ nikkhipitvā gaccheyya aḍḍhayojanaṃ;
তত্থেৰ অরুণং উগ্গচ্ছন্তস্স অনাপত্তি।
Tattheva aruṇaṃ uggacchantassa anāpatti;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
কাযিকানি ন ৰাচসিকানি।
Kāyikāni na vācasikāni;
সব্বানি নানাৰত্থুকানি।
Sabbāni nānāvatthukāni;
অপুব্বং অচরিমং আপজ্জেয্য একতো।
Apubbaṃ acarimaṃ āpajjeyya ekato;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
ৰাচসিকানি ন কাযিকানি।
Vācasikāni na kāyikāni;
সব্বানি নানাৰত্থুকানি।
Sabbāni nānāvatthukāni;
অপুব্বং অচরিমং আপজ্জেয্য একতো।
Apubbaṃ acarimaṃ āpajjeyya ekato;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
তিস্সিত্থিযো মেথুনং তং ন সেৰে।
Tissitthiyo methunaṃ taṃ na seve;
তযো পুরিসে তযো অনরিযপণ্ডকে।
Tayo purise tayo anariyapaṇḍake;
ন চাচরে মেথুনং ব্যঞ্জনস্মিং।
Na cācare methunaṃ byañjanasmiṃ;
ছেজ্জং সিযা মেথুনধম্মপচ্চযা।
Chejjaṃ siyā methunadhammapaccayā;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
কেনস্স হোতি আপত্তি, অনাপত্তি চ ঞাতকে।
Kenassa hoti āpatti, anāpatti ca ñātake;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
কুদ্ধো আরাধকো হোতি, কুদ্ধো হোতি গরহিযো।
Kuddho ārādhako hoti, kuddho hoti garahiyo;
অথ কো নাম সো ধম্মো, যেন কুদ্ধো পসংসিযো।
Atha ko nāma so dhammo, yena kuddho pasaṃsiyo;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
তুট্ঠো আরাধকো হোতি, তুট্ঠো হোতি গরহিযো।
Tuṭṭho ārādhako hoti, tuṭṭho hoti garahiyo;
অথ কো নাম সো ধম্মো, যেন তুট্ঠো গরহিযো।
Atha ko nāma so dhammo, yena tuṭṭho garahiyo;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
সঙ্ঘাদিসেসং থুল্লচ্চযং।
Saṅghādisesaṃ thullaccayaṃ;
পাচিত্তিযং পাটিদেসনীযং।
Pācittiyaṃ pāṭidesanīyaṃ;
দুক্কটং আপজ্জেয্য একতো।
Dukkaṭaṃ āpajjeyya ekato;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
উভো পরিপুণ্ণৰীসতিৰস্সা।
Ubho paripuṇṇavīsativassā;
উভিন্নং একুপজ্ঝাযো।
Ubhinnaṃ ekupajjhāyo;
একাচরিযো একা কম্মৰাচা।
Ekācariyo ekā kammavācā;
একো উপসম্পন্নো একো অনুপসম্পন্নো।
Eko upasampanno eko anupasampanno;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
অকপ্পকতং নাপি রজনায রত্তং।
Akappakataṃ nāpi rajanāya rattaṃ;
তেন নিৰত্থো যেন কামং ৰজেয্য।
Tena nivattho yena kāmaṃ vajeyya;
ন চস্স হোতি আপত্তি।
Na cassa hoti āpatti;
সো চ ধম্মো সুগতেন দেসিতো।
So ca dhammo sugatena desito;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
ন দেতি ন পটিগ্গণ্হাতি, পটিগ্গহো তেন ন ৰিজ্জতি।
Na deti na paṭiggaṇhāti, paṭiggaho tena na vijjati;
আপজ্জতি গরুকং ন লহুকং, তঞ্চ পরিভোগপচ্চযা।
Āpajjati garukaṃ na lahukaṃ, tañca paribhogapaccayā;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
ন দেতি ন পটিগ্গণ্হাতি, পটিগ্গহো তেন ন ৰিজ্জতি।
Na deti na paṭiggaṇhāti, paṭiggaho tena na vijjati;
আপজ্জতি লহুকং ন গরুকং, তঞ্চ পরিভোগপচ্চযা।
Āpajjati lahukaṃ na garukaṃ, tañca paribhogapaccayā;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
আপজ্জতি গরুকং সাৰসেসং।
Āpajjati garukaṃ sāvasesaṃ;
ছাদেতি অনাদরিযং পটিচ্চ।
Chādeti anādariyaṃ paṭicca;
ন ভিক্খুনী নো চ ফুসেয্য ৰজ্জং।
Na bhikkhunī no ca phuseyya vajjaṃ;
পঞ্হা মেসা কুসলেহি চিন্তিতা॥
Pañhā mesā kusalehi cintitā.
সেদমোচনগাথা নিট্ঠিতা।
Sedamocanagāthā niṭṭhitā.
তস্সুদ্দানং –
Tassuddānaṃ –
অসংৰাসো অৰিস্সজ্জি, দস চ অনুক্খিত্তকো।
Asaṃvāso avissajji, dasa ca anukkhittako;
উপেতি ধম্মং উব্ভক্খকং, ততো সঞ্ঞাচিকা চ দ্ৰে॥
Upeti dhammaṃ ubbhakkhakaṃ, tato saññācikā ca dve.
অনালপন্তো সিক্খা চ, উভো চ চতুরো জনা॥
Anālapanto sikkhā ca, ubho ca caturo janā.
ইত্থী তেলঞ্চ নিস্সগ্গি, ভিক্খু চ পদৰীতিযো।
Itthī telañca nissaggi, bhikkhu ca padavītiyo;
নিৰত্থো চ ন চ ঞত্তি, ন মাতরং পিতরং হনে॥
Nivattho ca na ca ñatti, na mātaraṃ pitaraṃ hane.
অচোদযিত্ৰা চোদযিত্ৰা, ছিন্দন্তং সচ্চমেৰ চ।
Acodayitvā codayitvā, chindantaṃ saccameva ca;
অধিট্ঠিতঞ্চত্থঙ্গতে, ন রত্তং ন চারঞ্ঞকং॥
Adhiṭṭhitañcatthaṅgate, na rattaṃ na cāraññakaṃ.
কাযিকা ৰাচসিকা চ, তিস্সিত্থী চাপি মাতরং।
Kāyikā vācasikā ca, tissitthī cāpi mātaraṃ;
কুদ্ধো আরাধকো তুট্ঠো, সঙ্ঘাদিসেসা চ উভো॥
Kuddho ārādhako tuṭṭho, saṅghādisesā ca ubho.
অকপ্পকতং ন দেতি, ন দেতাপজ্জতী গরুং।
Akappakataṃ na deti, na detāpajjatī garuṃ;
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / (৩) পাচিত্তিযাদিপঞ্হাৰণ্ণনা • (3) Pācittiyādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পারাজিকাদিপঞ্হৰণ্ণনা • Pārājikādipañhavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পাচিত্তিযাদিপঞ্হাৰণ্ণনা • Pācittiyādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পারাজিকাদিপঞ্হাৰণ্ণনা • Pārājikādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / (৩) পাচিত্তিযাদিপঞ্হাৰণ্ণনা • (3) Pācittiyādipañhāvaṇṇanā
