| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
(3) பாசித்தியாதி³பஞ்ஹாவண்ணனா
(3) Pācittiyādipañhāvaṇṇanā
481. அதி⁴ட்டி²தந்தி கா³தா² நிஸ்ஸக்³கி³யசீவரங் அனிஸ்ஸஜ்ஜித்வா பரிபு⁴ஞ்ஜந்தங் ஸந்தா⁴ய வுத்தா.
481.Adhiṭṭhitanti gāthā nissaggiyacīvaraṃ anissajjitvā paribhuñjantaṃ sandhāya vuttā.
அத்த²ங்க³தே ஸூரியேதி கா³தா² ரோமந்த²கங் ஸந்தா⁴ய வுத்தா.
Atthaṅgate sūriyeti gāthā romanthakaṃ sandhāya vuttā.
ந ரத்தசித்தோதி கா³தா²ய அயமத்தோ² – ரத்தசித்தோ மேது²னத⁴ம்மபாராஜிகங் ஆபஜ்ஜதி. தெ²ய்யசித்தோ அதி³ன்னாதா³னபாராஜிகங், பரங் மரணாய சேதெந்தோ மனுஸ்ஸவிக்³க³ஹபாராஜிகங், ஸங்க⁴பே⁴த³கோ பன ந ரத்தசித்தோ ந ச பன தெ²ய்யசித்தோ ந சாபி ஸோ பரங் மரணாய சேதயி, ஸலாகங் பனஸ்ஸ தெ³ந்தஸ்ஸ ஹோதி சே²ஜ்ஜங், பாராஜிகங் ஹோதி, ஸலாகங் படிக்³க³ண்ஹந்தஸ்ஸ பே⁴த³கானுவத்தகஸ்ஸ து²ல்லச்சயங்.
Na rattacittoti gāthāya ayamattho – rattacitto methunadhammapārājikaṃ āpajjati. Theyyacitto adinnādānapārājikaṃ, paraṃ maraṇāya cetento manussaviggahapārājikaṃ, saṅghabhedako pana na rattacitto na ca pana theyyacitto na cāpi so paraṃ maraṇāya cetayi, salākaṃ panassa dentassa hoti chejjaṃ, pārājikaṃ hoti, salākaṃ paṭiggaṇhantassa bhedakānuvattakassa thullaccayaṃ.
க³ச்செ²ய்ய அட்³ட⁴யோஜனந்தி அயங் பஞ்ஹா ஸுப்பதிட்டி²தனிக்³ரோத⁴ஸதி³ஸங் ஏககுலஸ்ஸ ருக்க²மூலங் ஸந்தா⁴ய வுத்தா.
Gaccheyya aḍḍhayojananti ayaṃ pañhā suppatiṭṭhitanigrodhasadisaṃ ekakulassa rukkhamūlaṃ sandhāya vuttā.
காயிகானீதி அயங் கா³தா² ஸம்ப³ஹுலானங் இத்தீ²னங் கேஸே வா அங்கு³லியோ வா ஏகதோ க³ண்ஹந்தங் ஸந்தா⁴ய வுத்தா.
Kāyikānīti ayaṃ gāthā sambahulānaṃ itthīnaṃ kese vā aṅguliyo vā ekato gaṇhantaṃ sandhāya vuttā.
வாசஸிகானீதி அயங் கா³தா² ‘‘ஸப்³பா³ தும்ஹே ஸிக²ரணியோ’’திஆதி³னா நயேன து³ட்டு²ல்லபா⁴ணிங் ஸந்தா⁴ய வுத்தா.
Vācasikānīti ayaṃ gāthā ‘‘sabbā tumhe sikharaṇiyo’’tiādinā nayena duṭṭhullabhāṇiṃ sandhāya vuttā.
திஸ்ஸித்தி²யோ மேது²னங் தங் ந ஸேவேதி திஸ்ஸோ இத்தி²யோ வுத்தா, தாஸுபி யங் தங் மேது²னங் நாம, தங் ந ஸேவதி. தயோ புரிஸேதி தயோ புரிஸேபி உபக³ந்த்வா மேது²னங் ந ஸேவதி. தயோ அனரியபண்ட³கேதி உப⁴தொப்³யஞ்ஜனஸங்கா²தே தயோ அனரியே தயோ ச பண்ட³கேதி இமேபி ச² ஜனே உபக³ந்த்வா மேது²னங் ந ஸேவதி. ந சாசரே மேது²னங் ப்³யஞ்ஜனஸ்மிந்தி அனுலோமபாராஜிகவஸேனபி மேது²னங் நாசரதி. சே²ஜ்ஜங் ஸியா மேது²னத⁴ம்மபச்சயாதி ஸியா மேது²னத⁴ம்மபச்சயா பாராஜிகந்தி. அயங் பஞ்ஹா அட்ட²வத்து²கங் ஸந்தா⁴ய வுத்தா, தஸ்ஸா ஹி மேது²னத⁴ம்மஸ்ஸ புப்³ப³பா⁴க³ங் காயஸங்ஸக்³க³ங் ஆபஜ்ஜிதுங் வாயமந்தியா மேது²னத⁴ம்மபச்சயா சே²ஜ்ஜங் ஹோதி.
Tissitthiyo methunaṃ taṃ na seveti tisso itthiyo vuttā, tāsupi yaṃ taṃ methunaṃ nāma, taṃ na sevati. Tayo puriseti tayo purisepi upagantvā methunaṃ na sevati. Tayo anariyapaṇḍaketi ubhatobyañjanasaṅkhāte tayo anariye tayo ca paṇḍaketi imepi cha jane upagantvā methunaṃ na sevati. Na cācare methunaṃ byañjanasminti anulomapārājikavasenapi methunaṃ nācarati. Chejjaṃ siyā methunadhammapaccayāti siyā methunadhammapaccayā pārājikanti. Ayaṃ pañhā aṭṭhavatthukaṃ sandhāya vuttā, tassā hi methunadhammassa pubbabhāgaṃ kāyasaṃsaggaṃ āpajjituṃ vāyamantiyā methunadhammapaccayā chejjaṃ hoti.
மாதரங் சீவரந்தி அயங் கா³தா² பிட்டி²ஸமயே வஸ்ஸிகஸாடிகத்த²ங் ஸதுப்பாத³கரணங் ஸந்தா⁴ய வுத்தா. வினிச்ச²யோ பனஸ்ஸா வஸ்ஸிகஸாடிகஸிக்கா²பத³வண்ணனாயமேவ வுத்தோ.
Mātaraṃ cīvaranti ayaṃ gāthā piṭṭhisamaye vassikasāṭikatthaṃ satuppādakaraṇaṃ sandhāya vuttā. Vinicchayo panassā vassikasāṭikasikkhāpadavaṇṇanāyameva vutto.
குத்³தோ⁴ ஆராத⁴கோ ஹோதீதி கா³தா² தித்தி²யவத்தங் ஸந்தா⁴ய வுத்தா. தித்தி²யோ ஹி வத்தங் பூரயமானோ தித்தி²யானங் வண்ணே ப⁴ஞ்ஞமானே குத்³தோ⁴ ஆராத⁴கோ ஹோதி, வத்து²த்தயஸ்ஸ வண்ணே ப⁴ஞ்ஞமானே குத்³தோ⁴ கா³ரய்ஹோ ஹோதீதி தத்தே²வஸ்ஸா வித்தா²ரோ வுத்தோ. து³தியகா³தா²பி தமேவ ஸந்தா⁴ய வுத்தா.
Kuddho ārādhako hotīti gāthā titthiyavattaṃ sandhāya vuttā. Titthiyo hi vattaṃ pūrayamāno titthiyānaṃ vaṇṇe bhaññamāne kuddho ārādhako hoti, vatthuttayassa vaṇṇe bhaññamāne kuddho gārayho hotīti tatthevassā vitthāro vutto. Dutiyagāthāpi tameva sandhāya vuttā.
ஸங்கா⁴தி³ஸேஸந்திஆதி³ கா³தா² யா பி⁴க்கு²னீ அவஸ்ஸுதாவ அவஸ்ஸுதஸ்ஸ புரிஸஸ்ஸ ஹத்த²தோ பிண்ட³பாதங் க³ஹெத்வா மனுஸ்ஸமங்ஸலஸுணபணீதபோ⁴ஜனஸேஸஅகப்பியமங்ஸேஹி ஸத்³தி⁴ங் ஓமத்³தி³த்வா அஜ்ஜோ²ஹரதி, தங் ஸந்தா⁴ய வுத்தா.
Saṅghādisesantiādi gāthā yā bhikkhunī avassutāva avassutassa purisassa hatthato piṇḍapātaṃ gahetvā manussamaṃsalasuṇapaṇītabhojanasesaakappiyamaṃsehi saddhiṃ omadditvā ajjhoharati, taṃ sandhāya vuttā.
ஏகோ உபஸம்பன்னோ ஏகோ அனுபஸம்பன்னோதி கா³தா² ஆகாஸக³தங் ஸந்தா⁴ய வுத்தா. ஸசே ஹி த்³வீஸு ஸாமணேரேஸு ஏகோ இத்³தி⁴யா கேஸக்³க³மத்தம்பி பத²விங் முஞ்சித்வா நிஸின்னோ ஹோதி, ஸோ அனுபஸம்பன்னோ நாம ஹோதி. ஸங்கே⁴னாபி ஆகாஸே நிஸீதி³த்வா பூ⁴மிக³தஸ்ஸ கம்மங் ந காதப்³ப³ங். ஸசே கரோதி, குப்பதி.
Eko upasampanno eko anupasampannoti gāthā ākāsagataṃ sandhāya vuttā. Sace hi dvīsu sāmaṇeresu eko iddhiyā kesaggamattampi pathaviṃ muñcitvā nisinno hoti, so anupasampanno nāma hoti. Saṅghenāpi ākāse nisīditvā bhūmigatassa kammaṃ na kātabbaṃ. Sace karoti, kuppati.
அகப்பகதந்தி கா³தா² அச்சி²ன்னசீவரகங் பி⁴க்கு²ங் ஸந்தா⁴ய வுத்தா. தஸ்மிங்யேவ சஸ்ஸா ஸிக்கா²பதே³ வித்தா²ரேன வினிச்ச²யோபி வுத்தோ.
Akappakatanti gāthā acchinnacīvarakaṃ bhikkhuṃ sandhāya vuttā. Tasmiṃyeva cassā sikkhāpade vitthārena vinicchayopi vutto.
ந தே³தி ந படிக்³க³ண்ஹாதீதி நாபி உய்யோஜிகா தே³தி, ந உய்யோஜிதா தஸ்ஸா ஹத்த²தோ க³ண்ஹாதி. படிக்³க³ஹோ தேன ந விஜ்ஜதீதி தேனேவ காரணேன உய்யோஜிகாய ஹத்த²தோ உய்யோஜிதாய படிக்³க³ஹோ ந விஜ்ஜதி. ஆபஜ்ஜதி க³ருகந்தி ஏவங் ஸந்தேபி அவஸ்ஸுதஸ்ஸ ஹத்த²தோ பிண்ட³பாதக்³க³ஹணே உய்யோஜெந்தீ ஸங்கா⁴தி³ஸேஸாபத்திங் ஆபஜ்ஜதி. தஞ்ச பரிபோ⁴க³பச்சயாதி தஞ்ச பன ஆபத்திங் ஆபஜ்ஜமானா தஸ்ஸா உய்யோஜிதாய பரிபோ⁴க³பச்சயா ஆபஜ்ஜதி . தஸ்ஸா ஹி போ⁴ஜனபரியோஸானே உய்யோஜிகாய ஸங்கா⁴தி³ஸேஸோ ஹோதீதி. து³தியகா³தா² தஸ்ஸாயேவ உத³கத³ந்தபோனக்³க³ஹணே உய்யோஜனங் ஸந்தா⁴ய வுத்தா.
Na deti na paṭiggaṇhātīti nāpi uyyojikā deti, na uyyojitā tassā hatthato gaṇhāti. Paṭiggaho tena na vijjatīti teneva kāraṇena uyyojikāya hatthato uyyojitāya paṭiggaho na vijjati. Āpajjati garukanti evaṃ santepi avassutassa hatthato piṇḍapātaggahaṇe uyyojentī saṅghādisesāpattiṃ āpajjati. Tañca paribhogapaccayāti tañca pana āpattiṃ āpajjamānā tassā uyyojitāya paribhogapaccayā āpajjati . Tassā hi bhojanapariyosāne uyyojikāya saṅghādiseso hotīti. Dutiyagāthā tassāyeva udakadantaponaggahaṇe uyyojanaṃ sandhāya vuttā.
ந பி⁴க்கு²னீ நோ ச பு²ஸெய்ய வஜ்ஜந்தி ஸத்தரஸகேஸு ஹி அஞ்ஞதரங் ஆபத்திங் ஆபஜ்ஜித்வா அனாத³ரியேன சா²த³யமானாபி பி⁴க்கு²னீ சா²த³னபச்சயா வஜ்ஜங் ந பு²ஸதி, அஞ்ஞங் நவங் ஆபத்திங் நாபஜ்ஜதி, படிச்ச²ன்னாய வா அப்படிச்ச²ன்னாய வா ஆபத்தியா பக்க²மானத்தமேவ லப⁴தி. அயங் பன பி⁴க்கு²னீபி ந ஹோதி, ஸாவஸேஸஞ்ச க³ருகங் ஆபஜ்ஜித்வா சா²தெ³த்வா வஜ்ஜங் ந பு²ஸதி. பஞ்ஹா மேஸா குஸலேஹி சிந்திதாதி அயங் கிர பஞ்ஹா உக்கி²த்தகபி⁴க்கு²ங் ஸந்தா⁴ய வுத்தா. தேன ஹி ஸத்³தி⁴ங் வினயகம்மங் நத்தி², தஸ்மா ஸோ ஸங்கா⁴தி³ஸேஸங் ஆபஜ்ஜித்வா சா²தெ³ந்தோ வஜ்ஜங் ந பு²ஸதீதி.
Na bhikkhunī no ca phuseyya vajjanti sattarasakesu hi aññataraṃ āpattiṃ āpajjitvā anādariyena chādayamānāpi bhikkhunī chādanapaccayā vajjaṃ na phusati, aññaṃ navaṃ āpattiṃ nāpajjati, paṭicchannāya vā appaṭicchannāya vā āpattiyā pakkhamānattameva labhati. Ayaṃ pana bhikkhunīpi na hoti, sāvasesañca garukaṃ āpajjitvā chādetvā vajjaṃ na phusati. Pañhā mesā kusalehi cintitāti ayaṃ kira pañhā ukkhittakabhikkhuṃ sandhāya vuttā. Tena hi saddhiṃ vinayakammaṃ natthi, tasmā so saṅghādisesaṃ āpajjitvā chādento vajjaṃ na phusatīti.
ஸேத³மோசனகா³தா²வண்ணனா நிட்டி²தா.
Sedamocanagāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 3. பாசித்தியாதி³பஞ்ஹா • 3. Pācittiyādipañhā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாராஜிகாதி³பஞ்ஹவண்ணனா • Pārājikādipañhavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாசித்தியாதி³பஞ்ஹாவண்ணனா • Pācittiyādipañhāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாராஜிகாதி³பஞ்ஹாவண்ணனா • Pārājikādipañhāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / (3) பாசித்தியாதி³பஞ்ஹாவண்ணனா • (3) Pācittiyādipañhāvaṇṇanā
