| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
(৩) পাচিত্তিযাদিপঞ্হাৰণ্ণনা
(3) Pācittiyādipañhāvaṇṇanā
৪৮১. অধিট্ঠিতন্তি গাথা নিস্সগ্গিযচীৰরং অনিস্সজ্জিত্ৰা পরিভুঞ্জন্তং সন্ধায ৰুত্তা।
481.Adhiṭṭhitanti gāthā nissaggiyacīvaraṃ anissajjitvā paribhuñjantaṃ sandhāya vuttā.
অত্থঙ্গতে সূরিযেতি গাথা রোমন্থকং সন্ধায ৰুত্তা।
Atthaṅgate sūriyeti gāthā romanthakaṃ sandhāya vuttā.
ন রত্তচিত্তোতি গাথায অযমত্থো – রত্তচিত্তো মেথুনধম্মপারাজিকং আপজ্জতি। থেয্যচিত্তো অদিন্নাদানপারাজিকং, পরং মরণায চেতেন্তো মনুস্সৰিগ্গহপারাজিকং, সঙ্ঘভেদকো পন ন রত্তচিত্তো ন চ পন থেয্যচিত্তো ন চাপি সো পরং মরণায চেতযি, সলাকং পনস্স দেন্তস্স হোতি ছেজ্জং, পারাজিকং হোতি, সলাকং পটিগ্গণ্হন্তস্স ভেদকানুৰত্তকস্স থুল্লচ্চযং।
Na rattacittoti gāthāya ayamattho – rattacitto methunadhammapārājikaṃ āpajjati. Theyyacitto adinnādānapārājikaṃ, paraṃ maraṇāya cetento manussaviggahapārājikaṃ, saṅghabhedako pana na rattacitto na ca pana theyyacitto na cāpi so paraṃ maraṇāya cetayi, salākaṃ panassa dentassa hoti chejjaṃ, pārājikaṃ hoti, salākaṃ paṭiggaṇhantassa bhedakānuvattakassa thullaccayaṃ.
গচ্ছেয্য অড্ঢযোজনন্তি অযং পঞ্হা সুপ্পতিট্ঠিতনিগ্রোধসদিসং এককুলস্স রুক্খমূলং সন্ধায ৰুত্তা।
Gaccheyya aḍḍhayojananti ayaṃ pañhā suppatiṭṭhitanigrodhasadisaṃ ekakulassa rukkhamūlaṃ sandhāya vuttā.
কাযিকানীতি অযং গাথা সম্বহুলানং ইত্থীনং কেসে ৰা অঙ্গুলিযো ৰা একতো গণ্হন্তং সন্ধায ৰুত্তা।
Kāyikānīti ayaṃ gāthā sambahulānaṃ itthīnaṃ kese vā aṅguliyo vā ekato gaṇhantaṃ sandhāya vuttā.
ৰাচসিকানীতি অযং গাথা ‘‘সব্বা তুম্হে সিখরণিযো’’তিআদিনা নযেন দুট্ঠুল্লভাণিং সন্ধায ৰুত্তা।
Vācasikānīti ayaṃ gāthā ‘‘sabbā tumhe sikharaṇiyo’’tiādinā nayena duṭṭhullabhāṇiṃ sandhāya vuttā.
তিস্সিত্থিযো মেথুনং তং ন সেৰেতি তিস্সো ইত্থিযো ৰুত্তা, তাসুপি যং তং মেথুনং নাম, তং ন সেৰতি। তযো পুরিসেতি তযো পুরিসেপি উপগন্ত্ৰা মেথুনং ন সেৰতি। তযো অনরিযপণ্ডকেতি উভতোব্যঞ্জনসঙ্খাতে তযো অনরিযে তযো চ পণ্ডকেতি ইমেপি ছ জনে উপগন্ত্ৰা মেথুনং ন সেৰতি। ন চাচরে মেথুনং ব্যঞ্জনস্মিন্তি অনুলোমপারাজিকৰসেনপি মেথুনং নাচরতি। ছেজ্জং সিযা মেথুনধম্মপচ্চযাতি সিযা মেথুনধম্মপচ্চযা পারাজিকন্তি। অযং পঞ্হা অট্ঠৰত্থুকং সন্ধায ৰুত্তা, তস্সা হি মেথুনধম্মস্স পুব্বভাগং কাযসংসগ্গং আপজ্জিতুং ৰাযমন্তিযা মেথুনধম্মপচ্চযা ছেজ্জং হোতি।
Tissitthiyo methunaṃ taṃ na seveti tisso itthiyo vuttā, tāsupi yaṃ taṃ methunaṃ nāma, taṃ na sevati. Tayo puriseti tayo purisepi upagantvā methunaṃ na sevati. Tayo anariyapaṇḍaketi ubhatobyañjanasaṅkhāte tayo anariye tayo ca paṇḍaketi imepi cha jane upagantvā methunaṃ na sevati. Na cācare methunaṃ byañjanasminti anulomapārājikavasenapi methunaṃ nācarati. Chejjaṃ siyā methunadhammapaccayāti siyā methunadhammapaccayā pārājikanti. Ayaṃ pañhā aṭṭhavatthukaṃ sandhāya vuttā, tassā hi methunadhammassa pubbabhāgaṃ kāyasaṃsaggaṃ āpajjituṃ vāyamantiyā methunadhammapaccayā chejjaṃ hoti.
মাতরং চীৰরন্তি অযং গাথা পিট্ঠিসমযে ৰস্সিকসাটিকত্থং সতুপ্পাদকরণং সন্ধায ৰুত্তা। ৰিনিচ্ছযো পনস্সা ৰস্সিকসাটিকসিক্খাপদৰণ্ণনাযমেৰ ৰুত্তো।
Mātaraṃ cīvaranti ayaṃ gāthā piṭṭhisamaye vassikasāṭikatthaṃ satuppādakaraṇaṃ sandhāya vuttā. Vinicchayo panassā vassikasāṭikasikkhāpadavaṇṇanāyameva vutto.
কুদ্ধো আরাধকো হোতীতি গাথা তিত্থিযৰত্তং সন্ধায ৰুত্তা। তিত্থিযো হি ৰত্তং পূরযমানো তিত্থিযানং ৰণ্ণে ভঞ্ঞমানে কুদ্ধো আরাধকো হোতি, ৰত্থুত্তযস্স ৰণ্ণে ভঞ্ঞমানে কুদ্ধো গারয্হো হোতীতি তত্থেৰস্সা ৰিত্থারো ৰুত্তো। দুতিযগাথাপি তমেৰ সন্ধায ৰুত্তা।
Kuddho ārādhako hotīti gāthā titthiyavattaṃ sandhāya vuttā. Titthiyo hi vattaṃ pūrayamāno titthiyānaṃ vaṇṇe bhaññamāne kuddho ārādhako hoti, vatthuttayassa vaṇṇe bhaññamāne kuddho gārayho hotīti tatthevassā vitthāro vutto. Dutiyagāthāpi tameva sandhāya vuttā.
সঙ্ঘাদিসেসন্তিআদি গাথা যা ভিক্খুনী অৰস্সুতাৰ অৰস্সুতস্স পুরিসস্স হত্থতো পিণ্ডপাতং গহেত্ৰা মনুস্সমংসলসুণপণীতভোজনসেসঅকপ্পিযমংসেহি সদ্ধিং ওমদ্দিত্ৰা অজ্ঝোহরতি, তং সন্ধায ৰুত্তা।
Saṅghādisesantiādi gāthā yā bhikkhunī avassutāva avassutassa purisassa hatthato piṇḍapātaṃ gahetvā manussamaṃsalasuṇapaṇītabhojanasesaakappiyamaṃsehi saddhiṃ omadditvā ajjhoharati, taṃ sandhāya vuttā.
একো উপসম্পন্নো একো অনুপসম্পন্নোতি গাথা আকাসগতং সন্ধায ৰুত্তা। সচে হি দ্ৰীসু সামণেরেসু একো ইদ্ধিযা কেসগ্গমত্তম্পি পথৰিং মুঞ্চিত্ৰা নিসিন্নো হোতি, সো অনুপসম্পন্নো নাম হোতি। সঙ্ঘেনাপি আকাসে নিসীদিত্ৰা ভূমিগতস্স কম্মং ন কাতব্বং। সচে করোতি, কুপ্পতি।
Eko upasampanno eko anupasampannoti gāthā ākāsagataṃ sandhāya vuttā. Sace hi dvīsu sāmaṇeresu eko iddhiyā kesaggamattampi pathaviṃ muñcitvā nisinno hoti, so anupasampanno nāma hoti. Saṅghenāpi ākāse nisīditvā bhūmigatassa kammaṃ na kātabbaṃ. Sace karoti, kuppati.
অকপ্পকতন্তি গাথা অচ্ছিন্নচীৰরকং ভিক্খুং সন্ধায ৰুত্তা। তস্মিংযেৰ চস্সা সিক্খাপদে ৰিত্থারেন ৰিনিচ্ছযোপি ৰুত্তো।
Akappakatanti gāthā acchinnacīvarakaṃ bhikkhuṃ sandhāya vuttā. Tasmiṃyeva cassā sikkhāpade vitthārena vinicchayopi vutto.
ন দেতি ন পটিগ্গণ্হাতীতি নাপি উয্যোজিকা দেতি, ন উয্যোজিতা তস্সা হত্থতো গণ্হাতি। পটিগ্গহো তেন ন ৰিজ্জতীতি তেনেৰ কারণেন উয্যোজিকায হত্থতো উয্যোজিতায পটিগ্গহো ন ৰিজ্জতি। আপজ্জতি গরুকন্তি এৰং সন্তেপি অৰস্সুতস্স হত্থতো পিণ্ডপাতগ্গহণে উয্যোজেন্তী সঙ্ঘাদিসেসাপত্তিং আপজ্জতি। তঞ্চ পরিভোগপচ্চযাতি তঞ্চ পন আপত্তিং আপজ্জমানা তস্সা উয্যোজিতায পরিভোগপচ্চযা আপজ্জতি । তস্সা হি ভোজনপরিযোসানে উয্যোজিকায সঙ্ঘাদিসেসো হোতীতি। দুতিযগাথা তস্সাযেৰ উদকদন্তপোনগ্গহণে উয্যোজনং সন্ধায ৰুত্তা।
Na deti na paṭiggaṇhātīti nāpi uyyojikā deti, na uyyojitā tassā hatthato gaṇhāti. Paṭiggaho tena na vijjatīti teneva kāraṇena uyyojikāya hatthato uyyojitāya paṭiggaho na vijjati. Āpajjati garukanti evaṃ santepi avassutassa hatthato piṇḍapātaggahaṇe uyyojentī saṅghādisesāpattiṃ āpajjati. Tañca paribhogapaccayāti tañca pana āpattiṃ āpajjamānā tassā uyyojitāya paribhogapaccayā āpajjati . Tassā hi bhojanapariyosāne uyyojikāya saṅghādiseso hotīti. Dutiyagāthā tassāyeva udakadantaponaggahaṇe uyyojanaṃ sandhāya vuttā.
ন ভিক্খুনী নো চ ফুসেয্য ৰজ্জন্তি সত্তরসকেসু হি অঞ্ঞতরং আপত্তিং আপজ্জিত্ৰা অনাদরিযেন ছাদযমানাপি ভিক্খুনী ছাদনপচ্চযা ৰজ্জং ন ফুসতি, অঞ্ঞং নৰং আপত্তিং নাপজ্জতি, পটিচ্ছন্নায ৰা অপ্পটিচ্ছন্নায ৰা আপত্তিযা পক্খমানত্তমেৰ লভতি। অযং পন ভিক্খুনীপি ন হোতি, সাৰসেসঞ্চ গরুকং আপজ্জিত্ৰা ছাদেত্ৰা ৰজ্জং ন ফুসতি। পঞ্হা মেসা কুসলেহি চিন্তিতাতি অযং কির পঞ্হা উক্খিত্তকভিক্খুং সন্ধায ৰুত্তা। তেন হি সদ্ধিং ৰিনযকম্মং নত্থি, তস্মা সো সঙ্ঘাদিসেসং আপজ্জিত্ৰা ছাদেন্তো ৰজ্জং ন ফুসতীতি।
Na bhikkhunī no ca phuseyya vajjanti sattarasakesu hi aññataraṃ āpattiṃ āpajjitvā anādariyena chādayamānāpi bhikkhunī chādanapaccayā vajjaṃ na phusati, aññaṃ navaṃ āpattiṃ nāpajjati, paṭicchannāya vā appaṭicchannāya vā āpattiyā pakkhamānattameva labhati. Ayaṃ pana bhikkhunīpi na hoti, sāvasesañca garukaṃ āpajjitvā chādetvā vajjaṃ na phusati. Pañhā mesā kusalehi cintitāti ayaṃ kira pañhā ukkhittakabhikkhuṃ sandhāya vuttā. Tena hi saddhiṃ vinayakammaṃ natthi, tasmā so saṅghādisesaṃ āpajjitvā chādento vajjaṃ na phusatīti.
সেদমোচনগাথাৰণ্ণনা নিট্ঠিতা।
Sedamocanagāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৩. পাচিত্তিযাদিপঞ্হা • 3. Pācittiyādipañhā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পারাজিকাদিপঞ্হৰণ্ণনা • Pārājikādipañhavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পাচিত্তিযাদিপঞ্হাৰণ্ণনা • Pācittiyādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পারাজিকাদিপঞ্হাৰণ্ণনা • Pārājikādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / (৩) পাচিত্তিযাদিপঞ্হাৰণ্ণনা • (3) Pācittiyādipañhāvaṇṇanā
