| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
(৩) পাচিত্তিযাদিপঞ্হাৰণ্ণনা
(3) Pācittiyādipañhāvaṇṇanā
৪৮১. সলাকং দেন্তস্স অস্স ভিক্খুস্স ছেজ্জং হোতীতি যোজনা। ‘‘পারাজিকং হোতী’’তি ইমিনা হোতিছেজ্জন্তি পদস্স অত্থং দস্সেতি।
481. Salākaṃ dentassa assa bhikkhussa chejjaṃ hotīti yojanā. ‘‘Pārājikaṃ hotī’’ti iminā hotichejjanti padassa atthaṃ dasseti.
সুপ্পতিট্ঠিতনিগ্রোধসদিসং রুক্খমূলং, তমেৰ ৰা গহেতব্বং।
Suppatiṭṭhitanigrodhasadisaṃ rukkhamūlaṃ, tameva vā gahetabbaṃ.
তিস্সিত্থিযোতি এত্থ ভুম্মত্থে উপযোগৰচনং, পচ্চত্তৰচনং ৰাতি আহ ‘‘তাসুপী’’তি। ‘‘যং তং মেথুনং নাম ত’’ন্তি ইমিনা ‘‘মেথুনং যং ত’’ন্তি পদানং সমানাধিকরণভাৰং দস্সেতি। ‘‘ন সেৰতী’’তি ইমিনা ন সেৰেতি এত্থ তিকারস্স একারাদেসভাৰং (জা॰ অট্ঠ॰ ৪.১১.৭৬ পুত্তো ৰা পিতরং যাচে ৰিয) দস্সেতি। তযো পুরিসেতি এত্থ ‘‘উপগন্ত্ৰা’’তি পদং অজ্ঝাহরিত্ৰা সম্বন্ধিতব্বন্তি দস্সেন্তো আহ‘‘তযো পুরিসেপি উপগন্ত্ৰা’’তি। ইমিনা তযো পুরিসেতি এত্থ উপযোগত্থে উপযোগৰচনন্তি দস্সেতি। পুরিমনযং গহেত্ৰা এত্থাপি ‘‘তীসু পুরিসেসূ’’তি ভুম্মত্থে উপযোগৰচনন্তি অত্থোপি যুজ্জতেৰ। ইমং নযং গহেত্ৰা পুরিমপদেপি তিস্সিত্থিযো উপগন্ত্ৰাতি উপযোগত্থে উপযোগৰচনন্তি অত্থোপি যুজ্জতেৰ। তস্মা তে দ্ৰে নযা অঞ্ঞমঞ্ঞোপদেসদাযকনযা নামাতি দট্ঠব্বং। ‘‘উভতোব্যঞ্জনসঙ্খাতে’’তি ইমিনা অনরিযসদ্দেন উভতোব্যঞ্জনোৰ ইধ গহেতব্বোতি দস্সেতি। ‘‘নাচরতী’’তি ইমিনা ন চাচরেতি এত্থাপি তিসদ্দস্স একারাদেসভাৰমেৰ দস্সেতি। মেথুনধম্মস্স পুব্বভাগং কাযসংসগ্গং আপজ্জিতুং ৰাযমন্তিযা তস্সা ভিক্খুনিযাতি যোজনা।
Tissitthiyoti ettha bhummatthe upayogavacanaṃ, paccattavacanaṃ vāti āha ‘‘tāsupī’’ti. ‘‘Yaṃ taṃ methunaṃ nāma ta’’nti iminā ‘‘methunaṃ yaṃ ta’’nti padānaṃ samānādhikaraṇabhāvaṃ dasseti. ‘‘Na sevatī’’ti iminā na seveti ettha tikārassa ekārādesabhāvaṃ (jā. aṭṭha. 4.11.76 putto vā pitaraṃ yāce viya) dasseti. Tayo puriseti ettha ‘‘upagantvā’’ti padaṃ ajjhāharitvā sambandhitabbanti dassento āha‘‘tayo purisepi upagantvā’’ti. Iminā tayo puriseti ettha upayogatthe upayogavacananti dasseti. Purimanayaṃ gahetvā etthāpi ‘‘tīsu purisesū’’ti bhummatthe upayogavacananti atthopi yujjateva. Imaṃ nayaṃ gahetvā purimapadepi tissitthiyo upagantvāti upayogatthe upayogavacananti atthopi yujjateva. Tasmā te dve nayā aññamaññopadesadāyakanayā nāmāti daṭṭhabbaṃ. ‘‘Ubhatobyañjanasaṅkhāte’’ti iminā anariyasaddena ubhatobyañjanova idha gahetabboti dasseti. ‘‘Nācaratī’’ti iminā na cācareti etthāpi tisaddassa ekārādesabhāvameva dasseti. Methunadhammassa pubbabhāgaṃ kāyasaṃsaggaṃ āpajjituṃ vāyamantiyā tassā bhikkhuniyāti yojanā.
অস্সাতি গাথায, তিত্থিযো আরাধকো হোতীতি যোজনা। তত্থেৰাতি তিত্থিযৰত্তে এৰ। অস্সাতি তিত্থিযস্স। তমেৰাতি তিত্থিযৰত্তমেৰ।
Assāti gāthāya, titthiyo ārādhako hotīti yojanā. Tatthevāti titthiyavatte eva. Assāti titthiyassa. Tamevāti titthiyavattameva.
সঙ্ঘাদিসেসন্তিআদিগাথা ৰুত্তাতি সম্বন্ধো। তন্তি অজ্ঝোহরণং।
Saṅghādisesantiādigāthā vuttāti sambandho. Tanti ajjhoharaṇaṃ.
আকাসগতং সামণেরন্তি সম্বন্ধো। সঙ্ঘেনপীতি পিসদ্দো ন কম্মারহেনেৰাতি দস্সেতি। ‘‘ন কাতব্ব’’ন্তি ইমিনা সঙ্ঘোপি কম্মারহোপি ভূমিগতোৰ ৰট্টতীতি দস্সেতি।
Ākāsagataṃ sāmaṇeranti sambandho. Saṅghenapīti pisaddo na kammārahenevāti dasseti. ‘‘Na kātabba’’nti iminā saṅghopi kammārahopi bhūmigatova vaṭṭatīti dasseti.
অস্সাতি গাথায ৰিনিচ্ছযোতি সম্বন্ধো।
Assāti gāthāya vinicchayoti sambandho.
‘‘ন দেতি, ন পটিগ্গণ্হাতী’’তি কিরিযাপদানং কত্তারং দস্সেন্তো আহ ‘‘নাপি উয্যোজিকা’’তিআদি। তস্সাতি অৰস্সুতপুরিসস্স। ‘‘কারণেনা’’তি ইমিনা তেনাতি পদস্স কারণত্থং দস্সেতি। এৰসদ্দো পন সম্ভৰৰসেন যোজিতো, ন অঞ্ঞেন কারণেনাতি অত্থো, অৰস্সুতস্স পুরিসস্সাতি সম্বন্ধো। গহণেতি উয্যোজিতায গহণে। তঞ্চ পরিভোগপচ্চযাতি এত্থ তসদ্দস্স ৰিসযং, পরিভোগস্স চ সম্বন্ধং দস্সেন্তো আহ ‘‘তঞ্চ পনা’’তিআদি। তত্থ ‘‘আপত্তি’’ন্তি ইমিনা তসদ্দস্স ৰিসযং দস্সেতি। ‘‘তস্সা উয্যোজিতাযা’’তি ইমিনা পরিভোগস্স সম্বন্ধং দস্সেতি। তস্সাতি উয্যোজিতায।
‘‘Na deti, na paṭiggaṇhātī’’ti kiriyāpadānaṃ kattāraṃ dassento āha ‘‘nāpi uyyojikā’’tiādi. Tassāti avassutapurisassa. ‘‘Kāraṇenā’’ti iminā tenāti padassa kāraṇatthaṃ dasseti. Evasaddo pana sambhavavasena yojito, na aññena kāraṇenāti attho, avassutassa purisassāti sambandho. Gahaṇeti uyyojitāya gahaṇe. Tañca paribhogapaccayāti ettha tasaddassa visayaṃ, paribhogassa ca sambandhaṃ dassento āha ‘‘tañca panā’’tiādi. Tattha ‘‘āpatti’’nti iminā tasaddassa visayaṃ dasseti. ‘‘Tassā uyyojitāyā’’ti iminā paribhogassa sambandhaṃ dasseti. Tassāti uyyojitāya.
সত্তরসকেসু সঙ্ঘাদিসেসেসূতি সম্বন্ধো। ৰজ্জং ন ফুসতীতি পদস্স অত্থং দস্সেন্তো আহ ‘‘অঞ্ঞং নৰং আপত্তি’’ন্তি।
Sattarasakesu saṅghādisesesūti sambandho. Vajjaṃ na phusatīti padassa atthaṃ dassento āha ‘‘aññaṃ navaṃ āpatti’’nti.
ইতি সেদমোচিকগাথাৰণ্ণনায যোজনা সমত্তা।
Iti sedamocikagāthāvaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৩. পাচিত্তিযাদিপঞ্হা • 3. Pācittiyādipañhā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / (৩) পাচিত্তিযাদিপঞ্হাৰণ্ণনা • (3) Pācittiyādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পারাজিকাদিপঞ্হৰণ্ণনা • Pārājikādipañhavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পাচিত্তিযাদিপঞ্হাৰণ্ণনা • Pācittiyādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পারাজিকাদিপঞ্হাৰণ্ণনা • Pārājikādipañhāvaṇṇanā
