| Library / Tipiṭaka / д̇ибидага • Tipiṭaka / бариваара-адтагат̇аа • Parivāra-aṭṭhakathā |
(3) баажид̇д̇ияаад̣̇ибан̃хааван̣н̣анаа
(3) Pācittiyādipañhāvaṇṇanā
481. ад̇хидтид̇анд̇и г̇аат̇аа ниссаг̇г̇ияажийварам̣ аниссаж̇ж̇ид̇ваа барибхун̃ж̇анд̇ам̣ санд̇хааяа вуд̇д̇аа.
481.Adhiṭṭhitanti gāthā nissaggiyacīvaraṃ anissajjitvā paribhuñjantaṃ sandhāya vuttā.
ад̇т̇ан̇г̇ад̇з сууриязд̇и г̇аат̇аа романт̇агам̣ санд̇хааяа вуд̇д̇аа.
Atthaṅgate sūriyeti gāthā romanthakaṃ sandhāya vuttā.
на рад̇д̇ажид̇д̇од̇и г̇аат̇ааяа аяамад̇т̇о – рад̇д̇ажид̇д̇о мзт̇унад̇хаммабаарааж̇игам̣ аабаж̇ж̇ад̇и. т̇зяяажид̇д̇о ад̣̇иннаад̣̇аанабаарааж̇игам̣, барам̣ маран̣ааяа жзд̇знд̇о мануссавиг̇г̇ахабаарааж̇игам̣, сан̇гхабхзд̣̇аго бана на рад̇д̇ажид̇д̇о на жа бана т̇зяяажид̇д̇о на жааби со барам̣ маран̣ааяа жзд̇аяи, салаагам̣ банасса д̣̇знд̇асса ход̇и чзж̇ж̇ам̣, баарааж̇игам̣ ход̇и, салаагам̣ бадиг̇г̇ан̣ханд̇асса бхзд̣̇агаанувад̇д̇агасса т̇уллажжаяам̣.
Na rattacittoti gāthāya ayamattho – rattacitto methunadhammapārājikaṃ āpajjati. Theyyacitto adinnādānapārājikaṃ, paraṃ maraṇāya cetento manussaviggahapārājikaṃ, saṅghabhedako pana na rattacitto na ca pana theyyacitto na cāpi so paraṃ maraṇāya cetayi, salākaṃ panassa dentassa hoti chejjaṃ, pārājikaṃ hoti, salākaṃ paṭiggaṇhantassa bhedakānuvattakassa thullaccayaṃ.
г̇ажчзяяа ад̣дхаяож̇ананд̇и аяам̣ бан̃хаа суббад̇идтид̇аниг̇род̇хасад̣̇исам̣ згагуласса ругкамуулам̣ санд̇хааяа вуд̇д̇аа.
Gaccheyya aḍḍhayojananti ayaṃ pañhā suppatiṭṭhitanigrodhasadisaṃ ekakulassa rukkhamūlaṃ sandhāya vuttā.
гааяигаанийд̇и аяам̣ г̇аат̇аа самб̣ахулаанам̣ ид̇т̇ийнам̣ гзсз ваа ан̇г̇улияо ваа згад̇о г̇ан̣ханд̇ам̣ санд̇хааяа вуд̇д̇аа.
Kāyikānīti ayaṃ gāthā sambahulānaṃ itthīnaṃ kese vā aṅguliyo vā ekato gaṇhantaṃ sandhāya vuttā.
ваажасигаанийд̇и аяам̣ г̇аат̇аа ‘‘саб̣б̣аа д̇умхз сикаран̣ияо’’д̇иаад̣̇инаа наязна д̣̇удтуллабхаан̣им̣ санд̇хааяа вуд̇д̇аа.
Vācasikānīti ayaṃ gāthā ‘‘sabbā tumhe sikharaṇiyo’’tiādinā nayena duṭṭhullabhāṇiṃ sandhāya vuttā.
д̇иссид̇т̇ияо мзт̇унам̣ д̇ам̣ на сзвзд̇и д̇иссо ид̇т̇ияо вуд̇д̇аа, д̇аасуби яам̣ д̇ам̣ мзт̇унам̣ наама, д̇ам̣ на сзвад̇и. д̇аяо бурисзд̇и д̇аяо бурисзби убаг̇анд̇ваа мзт̇унам̣ на сзвад̇и. д̇аяо анарияабан̣д̣агзд̇и убхад̇об̣яан̃ж̇анасан̇каад̇з д̇аяо анарияз д̇аяо жа бан̣д̣агзд̇и имзби ча ж̇анз убаг̇анд̇ваа мзт̇унам̣ на сзвад̇и. на жаажарз мзт̇унам̣ б̣яан̃ж̇анасминд̇и ануломабаарааж̇игавасзнаби мзт̇унам̣ наажарад̇и. чзж̇ж̇ам̣ сияаа мзт̇унад̇хаммабажжаяаад̇и сияаа мзт̇унад̇хаммабажжаяаа баарааж̇иганд̇и. аяам̣ бан̃хаа адтавад̇т̇угам̣ санд̇хааяа вуд̇д̇аа, д̇ассаа хи мзт̇унад̇хаммасса буб̣б̣абхааг̇ам̣ гааяасам̣саг̇г̇ам̣ аабаж̇ж̇ид̇ум̣ вааяаманд̇ияаа мзт̇унад̇хаммабажжаяаа чзж̇ж̇ам̣ ход̇и.
Tissitthiyo methunaṃ taṃ na seveti tisso itthiyo vuttā, tāsupi yaṃ taṃ methunaṃ nāma, taṃ na sevati. Tayo puriseti tayo purisepi upagantvā methunaṃ na sevati. Tayo anariyapaṇḍaketi ubhatobyañjanasaṅkhāte tayo anariye tayo ca paṇḍaketi imepi cha jane upagantvā methunaṃ na sevati. Na cācare methunaṃ byañjanasminti anulomapārājikavasenapi methunaṃ nācarati. Chejjaṃ siyā methunadhammapaccayāti siyā methunadhammapaccayā pārājikanti. Ayaṃ pañhā aṭṭhavatthukaṃ sandhāya vuttā, tassā hi methunadhammassa pubbabhāgaṃ kāyasaṃsaggaṃ āpajjituṃ vāyamantiyā methunadhammapaccayā chejjaṃ hoti.
маад̇арам̣ жийваранд̇и аяам̣ г̇аат̇аа бидтисамаяз вассигасаадигад̇т̇ам̣ сад̇уббаад̣̇агаран̣ам̣ санд̇хааяа вуд̇д̇аа. винижчаяо банассаа вассигасаадигасигкаабад̣̇аван̣н̣анааяамзва вуд̇д̇о.
Mātaraṃ cīvaranti ayaṃ gāthā piṭṭhisamaye vassikasāṭikatthaṃ satuppādakaraṇaṃ sandhāya vuttā. Vinicchayo panassā vassikasāṭikasikkhāpadavaṇṇanāyameva vutto.
гуд̣̇д̇хо аараад̇хаго ход̇ийд̇и г̇аат̇аа д̇ид̇т̇ияавад̇д̇ам̣ санд̇хааяа вуд̇д̇аа. д̇ид̇т̇ияо хи вад̇д̇ам̣ буураяамаано д̇ид̇т̇ияаанам̣ ван̣н̣з бхан̃н̃амаанз гуд̣̇д̇хо аараад̇хаго ход̇и, вад̇т̇уд̇д̇аяасса ван̣н̣з бхан̃н̃амаанз гуд̣̇д̇хо г̇аараяхо ход̇ийд̇и д̇ад̇т̇звассаа вид̇т̇ааро вуд̇д̇о. д̣̇уд̇ияаг̇аат̇ааби д̇амзва санд̇хааяа вуд̇д̇аа.
Kuddho ārādhako hotīti gāthā titthiyavattaṃ sandhāya vuttā. Titthiyo hi vattaṃ pūrayamāno titthiyānaṃ vaṇṇe bhaññamāne kuddho ārādhako hoti, vatthuttayassa vaṇṇe bhaññamāne kuddho gārayho hotīti tatthevassā vitthāro vutto. Dutiyagāthāpi tameva sandhāya vuttā.
сан̇гхаад̣̇исзсанд̇иаад̣̇и г̇аат̇аа яаа бхигкуний авассуд̇аава авассуд̇асса бурисасса хад̇т̇ад̇о бин̣д̣абаад̇ам̣ г̇ахзд̇ваа мануссамам̣саласун̣абан̣ийд̇абхож̇анасзсаагаббияамам̣сзхи сад̣̇д̇хим̣ омад̣̇д̣̇ид̇ваа аж̇жхохарад̇и, д̇ам̣ санд̇хааяа вуд̇д̇аа.
Saṅghādisesantiādi gāthā yā bhikkhunī avassutāva avassutassa purisassa hatthato piṇḍapātaṃ gahetvā manussamaṃsalasuṇapaṇītabhojanasesaakappiyamaṃsehi saddhiṃ omadditvā ajjhoharati, taṃ sandhāya vuttā.
зго убасамбанно зго анубасамбаннод̇и г̇аат̇аа аагаасаг̇ад̇ам̣ санд̇хааяа вуд̇д̇аа. сажз хи д̣̇вийсу сааман̣зрзсу зго ид̣̇д̇хияаа гзсаг̇г̇амад̇д̇амби бат̇авим̣ мун̃жид̇ваа нисинно ход̇и, со анубасамбанно наама ход̇и. сан̇гхзнааби аагаасз нисийд̣̇ид̇ваа бхуумиг̇ад̇асса гаммам̣ на гаад̇аб̣б̣ам̣. сажз гарод̇и, губбад̇и.
Eko upasampanno eko anupasampannoti gāthā ākāsagataṃ sandhāya vuttā. Sace hi dvīsu sāmaṇeresu eko iddhiyā kesaggamattampi pathaviṃ muñcitvā nisinno hoti, so anupasampanno nāma hoti. Saṅghenāpi ākāse nisīditvā bhūmigatassa kammaṃ na kātabbaṃ. Sace karoti, kuppati.
агаббагад̇анд̇и г̇аат̇аа ажчиннажийварагам̣ бхигкум̣ санд̇хааяа вуд̇д̇аа. д̇асмим̣язва жассаа сигкаабад̣̇з вид̇т̇аарзна винижчаяоби вуд̇д̇о.
Akappakatanti gāthā acchinnacīvarakaṃ bhikkhuṃ sandhāya vuttā. Tasmiṃyeva cassā sikkhāpade vitthārena vinicchayopi vutto.
на д̣̇зд̇и на бадиг̇г̇ан̣хаад̇ийд̇и нааби уяяож̇игаа д̣̇зд̇и, на уяяож̇ид̇аа д̇ассаа хад̇т̇ад̇о г̇ан̣хаад̇и. бадиг̇г̇ахо д̇зна на виж̇ж̇ад̇ийд̇и д̇знзва гааран̣зна уяяож̇игааяа хад̇т̇ад̇о уяяож̇ид̇ааяа бадиг̇г̇ахо на виж̇ж̇ад̇и. аабаж̇ж̇ад̇и г̇аруганд̇и звам̣ санд̇зби авассуд̇асса хад̇т̇ад̇о бин̣д̣абаад̇аг̇г̇ахан̣з уяяож̇знд̇ий сан̇гхаад̣̇исзсаабад̇д̇им̣ аабаж̇ж̇ад̇и. д̇ан̃жа барибхог̇абажжаяаад̇и д̇ан̃жа бана аабад̇д̇им̣ аабаж̇ж̇амаанаа д̇ассаа уяяож̇ид̇ааяа барибхог̇абажжаяаа аабаж̇ж̇ад̇и . д̇ассаа хи бхож̇анабарияосаанз уяяож̇игааяа сан̇гхаад̣̇исзсо ход̇ийд̇и. д̣̇уд̇ияаг̇аат̇аа д̇ассааязва уд̣̇агад̣̇анд̇абонаг̇г̇ахан̣з уяяож̇анам̣ санд̇хааяа вуд̇д̇аа.
Na deti na paṭiggaṇhātīti nāpi uyyojikā deti, na uyyojitā tassā hatthato gaṇhāti. Paṭiggaho tena na vijjatīti teneva kāraṇena uyyojikāya hatthato uyyojitāya paṭiggaho na vijjati. Āpajjati garukanti evaṃ santepi avassutassa hatthato piṇḍapātaggahaṇe uyyojentī saṅghādisesāpattiṃ āpajjati. Tañca paribhogapaccayāti tañca pana āpattiṃ āpajjamānā tassā uyyojitāya paribhogapaccayā āpajjati . Tassā hi bhojanapariyosāne uyyojikāya saṅghādiseso hotīti. Dutiyagāthā tassāyeva udakadantaponaggahaṇe uyyojanaṃ sandhāya vuttā.
на бхигкуний но жа пусзяяа важ̇ж̇анд̇и сад̇д̇арасагзсу хи ан̃н̃ад̇арам̣ аабад̇д̇им̣ аабаж̇ж̇ид̇ваа анаад̣̇ариязна чаад̣̇аяамаанааби бхигкуний чаад̣̇анабажжаяаа важ̇ж̇ам̣ на пусад̇и, ан̃н̃ам̣ навам̣ аабад̇д̇им̣ наабаж̇ж̇ад̇и, бадижчаннааяа ваа аббадижчаннааяа ваа аабад̇д̇ияаа багкамаанад̇д̇амзва лабхад̇и. аяам̣ бана бхигкунийби на ход̇и, саавасзсан̃жа г̇аругам̣ аабаж̇ж̇ид̇ваа чаад̣̇зд̇ваа важ̇ж̇ам̣ на пусад̇и. бан̃хаа мзсаа гусалзхи жинд̇ид̇аад̇и аяам̣ гира бан̃хаа угкид̇д̇агабхигкум̣ санд̇хааяа вуд̇д̇аа. д̇зна хи сад̣̇д̇хим̣ винаяагаммам̣ над̇т̇и, д̇асмаа со сан̇гхаад̣̇исзсам̣ аабаж̇ж̇ид̇ваа чаад̣̇знд̇о важ̇ж̇ам̣ на пусад̇ийд̇и.
Na bhikkhunī no ca phuseyya vajjanti sattarasakesu hi aññataraṃ āpattiṃ āpajjitvā anādariyena chādayamānāpi bhikkhunī chādanapaccayā vajjaṃ na phusati, aññaṃ navaṃ āpattiṃ nāpajjati, paṭicchannāya vā appaṭicchannāya vā āpattiyā pakkhamānattameva labhati. Ayaṃ pana bhikkhunīpi na hoti, sāvasesañca garukaṃ āpajjitvā chādetvā vajjaṃ na phusati. Pañhā mesā kusalehi cintitāti ayaṃ kira pañhā ukkhittakabhikkhuṃ sandhāya vuttā. Tena hi saddhiṃ vinayakammaṃ natthi, tasmā so saṅghādisesaṃ āpajjitvā chādento vajjaṃ na phusatīti.
сзд̣̇аможанаг̇аат̇ааван̣н̣анаа нидтид̇аа.
Sedamocanagāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / бариваарабаал̣и • Parivārapāḷi / 3. баажид̇д̇ияаад̣̇ибан̃хаа • 3. Pācittiyādipañhā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / баарааж̇игаад̣̇ибан̃хаван̣н̣анаа • Pārājikādipañhavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / баажид̇д̇ияаад̣̇ибан̃хааван̣н̣анаа • Pācittiyādipañhāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / баарааж̇игаад̣̇ибан̃хааван̣н̣анаа • Pārājikādipañhāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / (3) баажид̇д̇ияаад̣̇ибан̃хааван̣н̣анаа • (3) Pācittiyādipañhāvaṇṇanā
