| Library / Tipiṭaka / ತಿಪಿಟಕ • Tipiṭaka / ಪರಿವಾರ-ಅಟ್ಠಕಥಾ • Parivāra-aṭṭhakathā |
(೩) ಪಾಚಿತ್ತಿಯಾದಿಪಞ್ಹಾವಣ್ಣನಾ
(3) Pācittiyādipañhāvaṇṇanā
೪೮೧. ಅಧಿಟ್ಠಿತನ್ತಿ ಗಾಥಾ ನಿಸ್ಸಗ್ಗಿಯಚೀವರಂ ಅನಿಸ್ಸಜ್ಜಿತ್ವಾ ಪರಿಭುಞ್ಜನ್ತಂ ಸನ್ಧಾಯ ವುತ್ತಾ।
481.Adhiṭṭhitanti gāthā nissaggiyacīvaraṃ anissajjitvā paribhuñjantaṃ sandhāya vuttā.
ಅತ್ಥಙ್ಗತೇ ಸೂರಿಯೇತಿ ಗಾಥಾ ರೋಮನ್ಥಕಂ ಸನ್ಧಾಯ ವುತ್ತಾ।
Atthaṅgate sūriyeti gāthā romanthakaṃ sandhāya vuttā.
ನ ರತ್ತಚಿತ್ತೋತಿ ಗಾಥಾಯ ಅಯಮತ್ಥೋ – ರತ್ತಚಿತ್ತೋ ಮೇಥುನಧಮ್ಮಪಾರಾಜಿಕಂ ಆಪಜ್ಜತಿ। ಥೇಯ್ಯಚಿತ್ತೋ ಅದಿನ್ನಾದಾನಪಾರಾಜಿಕಂ, ಪರಂ ಮರಣಾಯ ಚೇತೇನ್ತೋ ಮನುಸ್ಸವಿಗ್ಗಹಪಾರಾಜಿಕಂ, ಸಙ್ಘಭೇದಕೋ ಪನ ನ ರತ್ತಚಿತ್ತೋ ನ ಚ ಪನ ಥೇಯ್ಯಚಿತ್ತೋ ನ ಚಾಪಿ ಸೋ ಪರಂ ಮರಣಾಯ ಚೇತಯಿ, ಸಲಾಕಂ ಪನಸ್ಸ ದೇನ್ತಸ್ಸ ಹೋತಿ ಛೇಜ್ಜಂ, ಪಾರಾಜಿಕಂ ಹೋತಿ, ಸಲಾಕಂ ಪಟಿಗ್ಗಣ್ಹನ್ತಸ್ಸ ಭೇದಕಾನುವತ್ತಕಸ್ಸ ಥುಲ್ಲಚ್ಚಯಂ।
Na rattacittoti gāthāya ayamattho – rattacitto methunadhammapārājikaṃ āpajjati. Theyyacitto adinnādānapārājikaṃ, paraṃ maraṇāya cetento manussaviggahapārājikaṃ, saṅghabhedako pana na rattacitto na ca pana theyyacitto na cāpi so paraṃ maraṇāya cetayi, salākaṃ panassa dentassa hoti chejjaṃ, pārājikaṃ hoti, salākaṃ paṭiggaṇhantassa bhedakānuvattakassa thullaccayaṃ.
ಗಚ್ಛೇಯ್ಯ ಅಡ್ಢಯೋಜನನ್ತಿ ಅಯಂ ಪಞ್ಹಾ ಸುಪ್ಪತಿಟ್ಠಿತನಿಗ್ರೋಧಸದಿಸಂ ಏಕಕುಲಸ್ಸ ರುಕ್ಖಮೂಲಂ ಸನ್ಧಾಯ ವುತ್ತಾ।
Gaccheyya aḍḍhayojananti ayaṃ pañhā suppatiṭṭhitanigrodhasadisaṃ ekakulassa rukkhamūlaṃ sandhāya vuttā.
ಕಾಯಿಕಾನೀತಿ ಅಯಂ ಗಾಥಾ ಸಮ್ಬಹುಲಾನಂ ಇತ್ಥೀನಂ ಕೇಸೇ ವಾ ಅಙ್ಗುಲಿಯೋ ವಾ ಏಕತೋ ಗಣ್ಹನ್ತಂ ಸನ್ಧಾಯ ವುತ್ತಾ।
Kāyikānīti ayaṃ gāthā sambahulānaṃ itthīnaṃ kese vā aṅguliyo vā ekato gaṇhantaṃ sandhāya vuttā.
ವಾಚಸಿಕಾನೀತಿ ಅಯಂ ಗಾಥಾ ‘‘ಸಬ್ಬಾ ತುಮ್ಹೇ ಸಿಖರಣಿಯೋ’’ತಿಆದಿನಾ ನಯೇನ ದುಟ್ಠುಲ್ಲಭಾಣಿಂ ಸನ್ಧಾಯ ವುತ್ತಾ।
Vācasikānīti ayaṃ gāthā ‘‘sabbā tumhe sikharaṇiyo’’tiādinā nayena duṭṭhullabhāṇiṃ sandhāya vuttā.
ತಿಸ್ಸಿತ್ಥಿಯೋ ಮೇಥುನಂ ತಂ ನ ಸೇವೇತಿ ತಿಸ್ಸೋ ಇತ್ಥಿಯೋ ವುತ್ತಾ, ತಾಸುಪಿ ಯಂ ತಂ ಮೇಥುನಂ ನಾಮ, ತಂ ನ ಸೇವತಿ। ತಯೋ ಪುರಿಸೇತಿ ತಯೋ ಪುರಿಸೇಪಿ ಉಪಗನ್ತ್ವಾ ಮೇಥುನಂ ನ ಸೇವತಿ। ತಯೋ ಅನರಿಯಪಣ್ಡಕೇತಿ ಉಭತೋಬ್ಯಞ್ಜನಸಙ್ಖಾತೇ ತಯೋ ಅನರಿಯೇ ತಯೋ ಚ ಪಣ್ಡಕೇತಿ ಇಮೇಪಿ ಛ ಜನೇ ಉಪಗನ್ತ್ವಾ ಮೇಥುನಂ ನ ಸೇವತಿ। ನ ಚಾಚರೇ ಮೇಥುನಂ ಬ್ಯಞ್ಜನಸ್ಮಿನ್ತಿ ಅನುಲೋಮಪಾರಾಜಿಕವಸೇನಪಿ ಮೇಥುನಂ ನಾಚರತಿ। ಛೇಜ್ಜಂ ಸಿಯಾ ಮೇಥುನಧಮ್ಮಪಚ್ಚಯಾತಿ ಸಿಯಾ ಮೇಥುನಧಮ್ಮಪಚ್ಚಯಾ ಪಾರಾಜಿಕನ್ತಿ। ಅಯಂ ಪಞ್ಹಾ ಅಟ್ಠವತ್ಥುಕಂ ಸನ್ಧಾಯ ವುತ್ತಾ, ತಸ್ಸಾ ಹಿ ಮೇಥುನಧಮ್ಮಸ್ಸ ಪುಬ್ಬಭಾಗಂ ಕಾಯಸಂಸಗ್ಗಂ ಆಪಜ್ಜಿತುಂ ವಾಯಮನ್ತಿಯಾ ಮೇಥುನಧಮ್ಮಪಚ್ಚಯಾ ಛೇಜ್ಜಂ ಹೋತಿ।
Tissitthiyo methunaṃ taṃ na seveti tisso itthiyo vuttā, tāsupi yaṃ taṃ methunaṃ nāma, taṃ na sevati. Tayo puriseti tayo purisepi upagantvā methunaṃ na sevati. Tayo anariyapaṇḍaketi ubhatobyañjanasaṅkhāte tayo anariye tayo ca paṇḍaketi imepi cha jane upagantvā methunaṃ na sevati. Na cācare methunaṃ byañjanasminti anulomapārājikavasenapi methunaṃ nācarati. Chejjaṃ siyā methunadhammapaccayāti siyā methunadhammapaccayā pārājikanti. Ayaṃ pañhā aṭṭhavatthukaṃ sandhāya vuttā, tassā hi methunadhammassa pubbabhāgaṃ kāyasaṃsaggaṃ āpajjituṃ vāyamantiyā methunadhammapaccayā chejjaṃ hoti.
ಮಾತರಂ ಚೀವರನ್ತಿ ಅಯಂ ಗಾಥಾ ಪಿಟ್ಠಿಸಮಯೇ ವಸ್ಸಿಕಸಾಟಿಕತ್ಥಂ ಸತುಪ್ಪಾದಕರಣಂ ಸನ್ಧಾಯ ವುತ್ತಾ। ವಿನಿಚ್ಛಯೋ ಪನಸ್ಸಾ ವಸ್ಸಿಕಸಾಟಿಕಸಿಕ್ಖಾಪದವಣ್ಣನಾಯಮೇವ ವುತ್ತೋ।
Mātaraṃ cīvaranti ayaṃ gāthā piṭṭhisamaye vassikasāṭikatthaṃ satuppādakaraṇaṃ sandhāya vuttā. Vinicchayo panassā vassikasāṭikasikkhāpadavaṇṇanāyameva vutto.
ಕುದ್ಧೋ ಆರಾಧಕೋ ಹೋತೀತಿ ಗಾಥಾ ತಿತ್ಥಿಯವತ್ತಂ ಸನ್ಧಾಯ ವುತ್ತಾ। ತಿತ್ಥಿಯೋ ಹಿ ವತ್ತಂ ಪೂರಯಮಾನೋ ತಿತ್ಥಿಯಾನಂ ವಣ್ಣೇ ಭಞ್ಞಮಾನೇ ಕುದ್ಧೋ ಆರಾಧಕೋ ಹೋತಿ, ವತ್ಥುತ್ತಯಸ್ಸ ವಣ್ಣೇ ಭಞ್ಞಮಾನೇ ಕುದ್ಧೋ ಗಾರಯ್ಹೋ ಹೋತೀತಿ ತತ್ಥೇವಸ್ಸಾ ವಿತ್ಥಾರೋ ವುತ್ತೋ। ದುತಿಯಗಾಥಾಪಿ ತಮೇವ ಸನ್ಧಾಯ ವುತ್ತಾ।
Kuddho ārādhako hotīti gāthā titthiyavattaṃ sandhāya vuttā. Titthiyo hi vattaṃ pūrayamāno titthiyānaṃ vaṇṇe bhaññamāne kuddho ārādhako hoti, vatthuttayassa vaṇṇe bhaññamāne kuddho gārayho hotīti tatthevassā vitthāro vutto. Dutiyagāthāpi tameva sandhāya vuttā.
ಸಙ್ಘಾದಿಸೇಸನ್ತಿಆದಿ ಗಾಥಾ ಯಾ ಭಿಕ್ಖುನೀ ಅವಸ್ಸುತಾವ ಅವಸ್ಸುತಸ್ಸ ಪುರಿಸಸ್ಸ ಹತ್ಥತೋ ಪಿಣ್ಡಪಾತಂ ಗಹೇತ್ವಾ ಮನುಸ್ಸಮಂಸಲಸುಣಪಣೀತಭೋಜನಸೇಸಅಕಪ್ಪಿಯಮಂಸೇಹಿ ಸದ್ಧಿಂ ಓಮದ್ದಿತ್ವಾ ಅಜ್ಝೋಹರತಿ, ತಂ ಸನ್ಧಾಯ ವುತ್ತಾ।
Saṅghādisesantiādi gāthā yā bhikkhunī avassutāva avassutassa purisassa hatthato piṇḍapātaṃ gahetvā manussamaṃsalasuṇapaṇītabhojanasesaakappiyamaṃsehi saddhiṃ omadditvā ajjhoharati, taṃ sandhāya vuttā.
ಏಕೋ ಉಪಸಮ್ಪನ್ನೋ ಏಕೋ ಅನುಪಸಮ್ಪನ್ನೋತಿ ಗಾಥಾ ಆಕಾಸಗತಂ ಸನ್ಧಾಯ ವುತ್ತಾ। ಸಚೇ ಹಿ ದ್ವೀಸು ಸಾಮಣೇರೇಸು ಏಕೋ ಇದ್ಧಿಯಾ ಕೇಸಗ್ಗಮತ್ತಮ್ಪಿ ಪಥವಿಂ ಮುಞ್ಚಿತ್ವಾ ನಿಸಿನ್ನೋ ಹೋತಿ, ಸೋ ಅನುಪಸಮ್ಪನ್ನೋ ನಾಮ ಹೋತಿ। ಸಙ್ಘೇನಾಪಿ ಆಕಾಸೇ ನಿಸೀದಿತ್ವಾ ಭೂಮಿಗತಸ್ಸ ಕಮ್ಮಂ ನ ಕಾತಬ್ಬಂ। ಸಚೇ ಕರೋತಿ, ಕುಪ್ಪತಿ।
Eko upasampanno eko anupasampannoti gāthā ākāsagataṃ sandhāya vuttā. Sace hi dvīsu sāmaṇeresu eko iddhiyā kesaggamattampi pathaviṃ muñcitvā nisinno hoti, so anupasampanno nāma hoti. Saṅghenāpi ākāse nisīditvā bhūmigatassa kammaṃ na kātabbaṃ. Sace karoti, kuppati.
ಅಕಪ್ಪಕತನ್ತಿ ಗಾಥಾ ಅಚ್ಛಿನ್ನಚೀವರಕಂ ಭಿಕ್ಖುಂ ಸನ್ಧಾಯ ವುತ್ತಾ। ತಸ್ಮಿಂಯೇವ ಚಸ್ಸಾ ಸಿಕ್ಖಾಪದೇ ವಿತ್ಥಾರೇನ ವಿನಿಚ್ಛಯೋಪಿ ವುತ್ತೋ।
Akappakatanti gāthā acchinnacīvarakaṃ bhikkhuṃ sandhāya vuttā. Tasmiṃyeva cassā sikkhāpade vitthārena vinicchayopi vutto.
ನ ದೇತಿ ನ ಪಟಿಗ್ಗಣ್ಹಾತೀತಿ ನಾಪಿ ಉಯ್ಯೋಜಿಕಾ ದೇತಿ, ನ ಉಯ್ಯೋಜಿತಾ ತಸ್ಸಾ ಹತ್ಥತೋ ಗಣ್ಹಾತಿ। ಪಟಿಗ್ಗಹೋ ತೇನ ನ ವಿಜ್ಜತೀತಿ ತೇನೇವ ಕಾರಣೇನ ಉಯ್ಯೋಜಿಕಾಯ ಹತ್ಥತೋ ಉಯ್ಯೋಜಿತಾಯ ಪಟಿಗ್ಗಹೋ ನ ವಿಜ್ಜತಿ। ಆಪಜ್ಜತಿ ಗರುಕನ್ತಿ ಏವಂ ಸನ್ತೇಪಿ ಅವಸ್ಸುತಸ್ಸ ಹತ್ಥತೋ ಪಿಣ್ಡಪಾತಗ್ಗಹಣೇ ಉಯ್ಯೋಜೇನ್ತೀ ಸಙ್ಘಾದಿಸೇಸಾಪತ್ತಿಂ ಆಪಜ್ಜತಿ। ತಞ್ಚ ಪರಿಭೋಗಪಚ್ಚಯಾತಿ ತಞ್ಚ ಪನ ಆಪತ್ತಿಂ ಆಪಜ್ಜಮಾನಾ ತಸ್ಸಾ ಉಯ್ಯೋಜಿತಾಯ ಪರಿಭೋಗಪಚ್ಚಯಾ ಆಪಜ್ಜತಿ । ತಸ್ಸಾ ಹಿ ಭೋಜನಪರಿಯೋಸಾನೇ ಉಯ್ಯೋಜಿಕಾಯ ಸಙ್ಘಾದಿಸೇಸೋ ಹೋತೀತಿ। ದುತಿಯಗಾಥಾ ತಸ್ಸಾಯೇವ ಉದಕದನ್ತಪೋನಗ್ಗಹಣೇ ಉಯ್ಯೋಜನಂ ಸನ್ಧಾಯ ವುತ್ತಾ।
Na deti na paṭiggaṇhātīti nāpi uyyojikā deti, na uyyojitā tassā hatthato gaṇhāti. Paṭiggaho tena na vijjatīti teneva kāraṇena uyyojikāya hatthato uyyojitāya paṭiggaho na vijjati. Āpajjati garukanti evaṃ santepi avassutassa hatthato piṇḍapātaggahaṇe uyyojentī saṅghādisesāpattiṃ āpajjati. Tañca paribhogapaccayāti tañca pana āpattiṃ āpajjamānā tassā uyyojitāya paribhogapaccayā āpajjati . Tassā hi bhojanapariyosāne uyyojikāya saṅghādiseso hotīti. Dutiyagāthā tassāyeva udakadantaponaggahaṇe uyyojanaṃ sandhāya vuttā.
ನ ಭಿಕ್ಖುನೀ ನೋ ಚ ಫುಸೇಯ್ಯ ವಜ್ಜನ್ತಿ ಸತ್ತರಸಕೇಸು ಹಿ ಅಞ್ಞತರಂ ಆಪತ್ತಿಂ ಆಪಜ್ಜಿತ್ವಾ ಅನಾದರಿಯೇನ ಛಾದಯಮಾನಾಪಿ ಭಿಕ್ಖುನೀ ಛಾದನಪಚ್ಚಯಾ ವಜ್ಜಂ ನ ಫುಸತಿ, ಅಞ್ಞಂ ನವಂ ಆಪತ್ತಿಂ ನಾಪಜ್ಜತಿ, ಪಟಿಚ್ಛನ್ನಾಯ ವಾ ಅಪ್ಪಟಿಚ್ಛನ್ನಾಯ ವಾ ಆಪತ್ತಿಯಾ ಪಕ್ಖಮಾನತ್ತಮೇವ ಲಭತಿ। ಅಯಂ ಪನ ಭಿಕ್ಖುನೀಪಿ ನ ಹೋತಿ, ಸಾವಸೇಸಞ್ಚ ಗರುಕಂ ಆಪಜ್ಜಿತ್ವಾ ಛಾದೇತ್ವಾ ವಜ್ಜಂ ನ ಫುಸತಿ। ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾತಿ ಅಯಂ ಕಿರ ಪಞ್ಹಾ ಉಕ್ಖಿತ್ತಕಭಿಕ್ಖುಂ ಸನ್ಧಾಯ ವುತ್ತಾ। ತೇನ ಹಿ ಸದ್ಧಿಂ ವಿನಯಕಮ್ಮಂ ನತ್ಥಿ, ತಸ್ಮಾ ಸೋ ಸಙ್ಘಾದಿಸೇಸಂ ಆಪಜ್ಜಿತ್ವಾ ಛಾದೇನ್ತೋ ವಜ್ಜಂ ನ ಫುಸತೀತಿ।
Na bhikkhunī no ca phuseyya vajjanti sattarasakesu hi aññataraṃ āpattiṃ āpajjitvā anādariyena chādayamānāpi bhikkhunī chādanapaccayā vajjaṃ na phusati, aññaṃ navaṃ āpattiṃ nāpajjati, paṭicchannāya vā appaṭicchannāya vā āpattiyā pakkhamānattameva labhati. Ayaṃ pana bhikkhunīpi na hoti, sāvasesañca garukaṃ āpajjitvā chādetvā vajjaṃ na phusati. Pañhā mesā kusalehi cintitāti ayaṃ kira pañhā ukkhittakabhikkhuṃ sandhāya vuttā. Tena hi saddhiṃ vinayakammaṃ natthi, tasmā so saṅghādisesaṃ āpajjitvā chādento vajjaṃ na phusatīti.
ಸೇದಮೋಚನಗಾಥಾವಣ್ಣನಾ ನಿಟ್ಠಿತಾ।
Sedamocanagāthāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi / ೩. ಪಾಚಿತ್ತಿಯಾದಿಪಞ್ಹಾ • 3. Pācittiyādipañhā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಾರಾಜಿಕಾದಿಪಞ್ಹವಣ್ಣನಾ • Pārājikādipañhavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪಾಚಿತ್ತಿಯಾದಿಪಞ್ಹಾವಣ್ಣನಾ • Pācittiyādipañhāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಪಾರಾಜಿಕಾದಿಪಞ್ಹಾವಣ್ಣನಾ • Pārājikādipañhāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / (೩) ಪಾಚಿತ್ತಿಯಾದಿಪಞ್ಹಾವಣ್ಣನಾ • (3) Pācittiyādipañhāvaṇṇanā
