| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
(3) පාචිත්‌තියාදිපඤ්‌හාවණ්‌ණනා
(3) Pācittiyādipañhāvaṇṇanā
481. අධිට්‌ඨිතන්‌ති ගාථා නිස්‌සග්‌ගියචීවරං අනිස්‌සජ්‌ජිත්‌වා පරිභුඤ්‌ජන්‌තං සන්‌ධාය වුත්‌තා.
481.Adhiṭṭhitanti gāthā nissaggiyacīvaraṃ anissajjitvā paribhuñjantaṃ sandhāya vuttā.
අත්‌ථඞ්‌ගතෙ සූරියෙති ගාථා රොමන්‌ථකං සන්‌ධාය වුත්‌තා.
Atthaṅgate sūriyeti gāthā romanthakaṃ sandhāya vuttā.
න රත්‌තචිත්‌තොති ගාථාය අයමත්‌ථො – රත්‌තචිත්‌තො මෙථුනධම්‌මපාරාජිකං ආපජ්‌ජති. ථෙය්‍යචිත්‌තො අදින්‌නාදානපාරාජිකං, පරං මරණාය චෙතෙන්‌තො මනුස්‌සවිග්‌ගහපාරාජිකං, සඞ්‌ඝභෙදකො පන න රත්‌තචිත්‌තො න ච පන ථෙය්‍යචිත්‌තො න චාපි සො පරං මරණාය චෙතයි, සලාකං පනස්‌ස දෙන්‌තස්‌ස හොති ඡෙජ්‌ජං, පාරාජිකං හොති, සලාකං පටිග්‌ගණ්‌හන්‌තස්‌ස භෙදකානුවත්‌තකස්‌ස ථුල්‌ලච්‌චයං.
Na rattacittoti gāthāya ayamattho – rattacitto methunadhammapārājikaṃ āpajjati. Theyyacitto adinnādānapārājikaṃ, paraṃ maraṇāya cetento manussaviggahapārājikaṃ, saṅghabhedako pana na rattacitto na ca pana theyyacitto na cāpi so paraṃ maraṇāya cetayi, salākaṃ panassa dentassa hoti chejjaṃ, pārājikaṃ hoti, salākaṃ paṭiggaṇhantassa bhedakānuvattakassa thullaccayaṃ.
ගච්‌ඡෙය්‍ය අඩ්‌ඪයොජනන්‌ති අයං පඤ්‌හා සුප්‌පතිට්‌ඨිතනිග්‍රොධසදිසං එකකුලස්‌ස රුක්‌ඛමූලං සන්‌ධාය වුත්‌තා.
Gaccheyya aḍḍhayojananti ayaṃ pañhā suppatiṭṭhitanigrodhasadisaṃ ekakulassa rukkhamūlaṃ sandhāya vuttā.
කායිකානීති අයං ගාථා සම්‌බහුලානං ඉත්‌ථීනං කෙසෙ වා අඞ්‌ගුලියො වා එකතො ගණ්‌හන්‌තං සන්‌ධාය වුත්‌තා.
Kāyikānīti ayaṃ gāthā sambahulānaṃ itthīnaṃ kese vā aṅguliyo vā ekato gaṇhantaṃ sandhāya vuttā.
වාචසිකානීති අයං ගාථා ‘‘සබ්‌බා තුම්‌හෙ සිඛරණියො’’තිආදිනා නයෙන දුට්‌ඨුල්‌ලභාණිං සන්‌ධාය වුත්‌තා.
Vācasikānīti ayaṃ gāthā ‘‘sabbā tumhe sikharaṇiyo’’tiādinā nayena duṭṭhullabhāṇiṃ sandhāya vuttā.
තිස්‌සිත්‌ථියො මෙථුනං තං න සෙවෙති තිස්‌සො ඉත්‌ථියො වුත්‌තා, තාසුපි යං තං මෙථුනං නාම, තං න සෙවති. තයො පුරිසෙති තයො පුරිසෙපි උපගන්‌ත්‌වා මෙථුනං න සෙවති. තයො අනරියපණ්‌ඩකෙති උභතොබ්‍යඤ්‌ජනසඞ්‌ඛාතෙ තයො අනරියෙ තයො ච පණ්‌ඩකෙති ඉමෙපි ඡ ජනෙ උපගන්‌ත්‌වා මෙථුනං න සෙවති. න චාචරෙ මෙථුනං බ්‍යඤ්‌ජනස්‌මින්‌ති අනුලොමපාරාජිකවසෙනපි මෙථුනං නාචරති. ඡෙජ්‌ජං සියා මෙථුනධම්‌මපච්‌චයාති සියා මෙථුනධම්‌මපච්‌චයා පාරාජිකන්‌ති. අයං පඤ්‌හා අට්‌ඨවත්‌ථුකං සන්‌ධාය වුත්‌තා, තස්‌සා හි මෙථුනධම්‌මස්‌ස පුබ්‌බභාගං කායසංසග්‌ගං ආපජ්‌ජිතුං වායමන්‌තියා මෙථුනධම්‌මපච්‌චයා ඡෙජ්‌ජං හොති.
Tissitthiyo methunaṃ taṃ na seveti tisso itthiyo vuttā, tāsupi yaṃ taṃ methunaṃ nāma, taṃ na sevati. Tayo puriseti tayo purisepi upagantvā methunaṃ na sevati. Tayo anariyapaṇḍaketi ubhatobyañjanasaṅkhāte tayo anariye tayo ca paṇḍaketi imepi cha jane upagantvā methunaṃ na sevati. Na cācare methunaṃ byañjanasminti anulomapārājikavasenapi methunaṃ nācarati. Chejjaṃ siyā methunadhammapaccayāti siyā methunadhammapaccayā pārājikanti. Ayaṃ pañhā aṭṭhavatthukaṃ sandhāya vuttā, tassā hi methunadhammassa pubbabhāgaṃ kāyasaṃsaggaṃ āpajjituṃ vāyamantiyā methunadhammapaccayā chejjaṃ hoti.
මාතරං චීවරන්‌ති අයං ගාථා පිට්‌ඨිසමයෙ වස්‌සිකසාටිකත්‌ථං සතුප්‌පාදකරණං සන්‌ධාය වුත්‌තා. විනිච්‌ඡයො පනස්‌සා වස්‌සිකසාටිකසික්‌ඛාපදවණ්‌ණනායමෙව වුත්‌තො.
Mātaraṃ cīvaranti ayaṃ gāthā piṭṭhisamaye vassikasāṭikatthaṃ satuppādakaraṇaṃ sandhāya vuttā. Vinicchayo panassā vassikasāṭikasikkhāpadavaṇṇanāyameva vutto.
කුද්‌ධො ආරාධකො හොතීති ගාථා තිත්‌ථියවත්‌තං සන්‌ධාය වුත්‌තා. තිත්‌ථියො හි වත්‌තං පූරයමානො තිත්‌ථියානං වණ්‌ණෙ භඤ්‌ඤමානෙ කුද්‌ධො ආරාධකො හොති, වත්‌ථුත්‌තයස්‌ස වණ්‌ණෙ භඤ්‌ඤමානෙ කුද්‌ධො ගාරය්‌හො හොතීති තත්‌ථෙවස්‌සා විත්‌ථාරො වුත්‌තො. දුතියගාථාපි තමෙව සන්‌ධාය වුත්‌තා.
Kuddho ārādhako hotīti gāthā titthiyavattaṃ sandhāya vuttā. Titthiyo hi vattaṃ pūrayamāno titthiyānaṃ vaṇṇe bhaññamāne kuddho ārādhako hoti, vatthuttayassa vaṇṇe bhaññamāne kuddho gārayho hotīti tatthevassā vitthāro vutto. Dutiyagāthāpi tameva sandhāya vuttā.
සඞ්‌ඝාදිසෙසන්‌තිආදි ගාථා යා භික්‌ඛුනී අවස්‌සුතාව අවස්‌සුතස්‌ස පුරිසස්‌ස හත්‌ථතො පිණ්‌ඩපාතං ගහෙත්‌වා මනුස්‌සමංසලසුණපණීතභොජනසෙසඅකප්‌පියමංසෙහි සද්‌ධිං ඔමද්‌දිත්‌වා අජ්‌ඣොහරති, තං සන්‌ධාය වුත්‌තා.
Saṅghādisesantiādi gāthā yā bhikkhunī avassutāva avassutassa purisassa hatthato piṇḍapātaṃ gahetvā manussamaṃsalasuṇapaṇītabhojanasesaakappiyamaṃsehi saddhiṃ omadditvā ajjhoharati, taṃ sandhāya vuttā.
එකො උපසම්‌පන්‌නො එකො අනුපසම්‌පන්‌නොති ගාථා ආකාසගතං සන්‌ධාය වුත්‌තා. සචෙ හි ද්‌වීසු සාමණෙරෙසු එකො ඉද්‌ධියා කෙසග්‌ගමත්‌තම්‌පි පථවිං මුඤ්‌චිත්‌වා නිසින්‌නො හොති, සො අනුපසම්‌පන්‌නො නාම හොති. සඞ්‌ඝෙනාපි ආකාසෙ නිසීදිත්‌වා භූමිගතස්‌ස කම්‌මං න කාතබ්‌බං. සචෙ කරොති, කුප්‌පති.
Eko upasampanno eko anupasampannoti gāthā ākāsagataṃ sandhāya vuttā. Sace hi dvīsu sāmaṇeresu eko iddhiyā kesaggamattampi pathaviṃ muñcitvā nisinno hoti, so anupasampanno nāma hoti. Saṅghenāpi ākāse nisīditvā bhūmigatassa kammaṃ na kātabbaṃ. Sace karoti, kuppati.
අකප්‌පකතන්‌ති ගාථා අච්‌ඡින්‌නචීවරකං භික්‌ඛුං සන්‌ධාය වුත්‌තා. තස්‌මිංයෙව චස්‌සා සික්‌ඛාපදෙ විත්‌ථාරෙන විනිච්‌ඡයොපි වුත්‌තො.
Akappakatanti gāthā acchinnacīvarakaṃ bhikkhuṃ sandhāya vuttā. Tasmiṃyeva cassā sikkhāpade vitthārena vinicchayopi vutto.
න දෙති න පටිග්‌ගණ්‌හාතීති නාපි උය්‍යොජිකා දෙති, න උය්‍යොජිතා තස්‌සා හත්‌ථතො ගණ්‌හාති. පටිග්‌ගහො තෙන න විජ්‌ජතීති තෙනෙව කාරණෙන උය්‍යොජිකාය හත්‌ථතො උය්‍යොජිතාය පටිග්‌ගහො න විජ්‌ජති. ආපජ්‌ජති ගරුකන්‌ති එවං සන්‌තෙපි අවස්‌සුතස්‌ස හත්‌ථතො පිණ්‌ඩපාතග්‌ගහණෙ උය්‍යොජෙන්‌තී සඞ්‌ඝාදිසෙසාපත්‌තිං ආපජ්‌ජති. තඤ්‌ච පරිභොගපච්‌චයාති තඤ්‌ච පන ආපත්‌තිං ආපජ්‌ජමානා තස්‌සා උය්‍යොජිතාය පරිභොගපච්‌චයා ආපජ්‌ජති . තස්‌සා හි භොජනපරියොසානෙ උය්‍යොජිකාය සඞ්‌ඝාදිසෙසො හොතීති. දුතියගාථා තස්‌සායෙව උදකදන්‌තපොනග්‌ගහණෙ උය්‍යොජනං සන්‌ධාය වුත්‌තා.
Na deti na paṭiggaṇhātīti nāpi uyyojikā deti, na uyyojitā tassā hatthato gaṇhāti. Paṭiggaho tena na vijjatīti teneva kāraṇena uyyojikāya hatthato uyyojitāya paṭiggaho na vijjati. Āpajjati garukanti evaṃ santepi avassutassa hatthato piṇḍapātaggahaṇe uyyojentī saṅghādisesāpattiṃ āpajjati. Tañca paribhogapaccayāti tañca pana āpattiṃ āpajjamānā tassā uyyojitāya paribhogapaccayā āpajjati . Tassā hi bhojanapariyosāne uyyojikāya saṅghādiseso hotīti. Dutiyagāthā tassāyeva udakadantaponaggahaṇe uyyojanaṃ sandhāya vuttā.
න භික්‌ඛුනී නො ච ඵුසෙය්‍ය වජ්‌ජන්‌ති සත්‌තරසකෙසු හි අඤ්‌ඤතරං ආපත්‌තිං ආපජ්‌ජිත්‌වා අනාදරියෙන ඡාදයමානාපි භික්‌ඛුනී ඡාදනපච්‌චයා වජ්‌ජං න ඵුසති, අඤ්‌ඤං නවං ආපත්‌තිං නාපජ්‌ජති, පටිච්‌ඡන්‌නාය වා අප්‌පටිච්‌ඡන්‌නාය වා ආපත්‌තියා පක්‌ඛමානත්‌තමෙව ලභති. අයං පන භික්‌ඛුනීපි න හොති, සාවසෙසඤ්‌ච ගරුකං ආපජ්‌ජිත්‌වා ඡාදෙත්‌වා වජ්‌ජං න ඵුසති. පඤ්‌හා මෙසා කුසලෙහි චින්‌තිතාති අයං කිර පඤ්‌හා උක්‌ඛිත්‌තකභික්‌ඛුං සන්‌ධාය වුත්‌තා. තෙන හි සද්‌ධිං විනයකම්‌මං නත්‌ථි, තස්‌මා සො සඞ්‌ඝාදිසෙසං ආපජ්‌ජිත්‌වා ඡාදෙන්‌තො වජ්‌ජං න ඵුසතීති.
Na bhikkhunī no ca phuseyya vajjanti sattarasakesu hi aññataraṃ āpattiṃ āpajjitvā anādariyena chādayamānāpi bhikkhunī chādanapaccayā vajjaṃ na phusati, aññaṃ navaṃ āpattiṃ nāpajjati, paṭicchannāya vā appaṭicchannāya vā āpattiyā pakkhamānattameva labhati. Ayaṃ pana bhikkhunīpi na hoti, sāvasesañca garukaṃ āpajjitvā chādetvā vajjaṃ na phusati. Pañhā mesā kusalehi cintitāti ayaṃ kira pañhā ukkhittakabhikkhuṃ sandhāya vuttā. Tena hi saddhiṃ vinayakammaṃ natthi, tasmā so saṅghādisesaṃ āpajjitvā chādento vajjaṃ na phusatīti.
සෙදමොචනගාථාවණ්‌ණනා නිට්‌ඨිතා.
Sedamocanagāthāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 3. පාචිත්‌තියාදිපඤ්‌හා • 3. Pācittiyādipañhā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පාරාජිකාදිපඤ්‌හවණ්‌ණනා • Pārājikādipañhavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පාචිත්‌තියාදිපඤ්‌හාවණ්‌ණනා • Pācittiyādipañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පාරාජිකාදිපඤ්‌හාවණ්‌ණනා • Pārājikādipañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / (3) පාචිත්‌තියාදිපඤ්‌හාවණ්‌ණනා • (3) Pācittiyādipañhāvaṇṇanā
