| Library / Tipiṭaka / तिपिटक • Tipiṭaka / विनयविनिच्छय-उत्तरविनिच्छय • Vinayavinicchaya-uttaravinicchaya |
पाचित्तियकथा
Pācittiyakathā
२१२९.
2129.
लसुणं भण्डिकं वुत्तं, न एकद्वितिमिञ्जकं।
Lasuṇaṃ bhaṇḍikaṃ vuttaṃ, na ekadvitimiñjakaṃ;
आमकं मागधंयेव, ‘‘खादिस्सामी’’ति गण्हति॥
Āmakaṃ māgadhaṃyeva, ‘‘khādissāmī’’ti gaṇhati.
२१३०.
2130.
गहणे दुक्कटं तस्सा, पाचित्ति यदि खादति।
Gahaṇe dukkaṭaṃ tassā, pācitti yadi khādati;
अज्झोहारवसेनेव, पाचित्तिं परिदीपये॥
Ajjhohāravaseneva, pācittiṃ paridīpaye.
२१३१.
2131.
द्वे तयो भण्डिके सद्धिं, सङ्खादित्वा सचे पन।
Dve tayo bhaṇḍike saddhiṃ, saṅkhāditvā sace pana;
अज्झोहरति या तस्सा, एकं पाचित्तियं सिया॥
Ajjhoharati yā tassā, ekaṃ pācittiyaṃ siyā.
२१३२.
2132.
भिन्दित्वा तत्थ एकेकं, मिञ्जं खादन्तिया पन।
Bhinditvā tattha ekekaṃ, miñjaṃ khādantiyā pana;
मिञ्जानं गणनायस्सा, पाचित्तिगणना सिया॥
Miñjānaṃ gaṇanāyassā, pācittigaṇanā siyā.
२१३३.
2133.
पलण्डुको भञ्जनको, हरितो चापलोपि च।
Palaṇḍuko bhañjanako, harito cāpalopi ca;
लसुणा पन चत्तारो, वट्टन्तेव सभावतो॥
Lasuṇā pana cattāro, vaṭṭanteva sabhāvato.
२१३४.
2134.
पलण्डुको पण्डुवण्णो, भञ्जनो लोहितोपि च।
Palaṇḍuko paṇḍuvaṇṇo, bhañjano lohitopi ca;
हरितो हरितवण्णो, चापलो सेतकोपि च॥
Harito haritavaṇṇo, cāpalo setakopi ca.
२१३५.
2135.
एका मिञ्जा पलण्डुस्स, भञ्जनस्स दुवे सियुं।
Ekā miñjā palaṇḍussa, bhañjanassa duve siyuṃ;
तिस्सो हरितकस्सापि, चापलो होत्यमिञ्जको॥
Tisso haritakassāpi, cāpalo hotyamiñjako.
२१३६.
2136.
सूपमंसादिसंपाके , साळवुत्तरिभङ्गके।
Sūpamaṃsādisaṃpāke , sāḷavuttaribhaṅgake;
न दोसुम्मत्तिकादीनं, समुट्ठानेळकूपमं॥
Na dosummattikādīnaṃ, samuṭṭhāneḷakūpamaṃ.
पठमं।
Paṭhamaṃ.
२१३७.
2137.
सम्बाधे उपकच्छेसु, मुत्तस्स करणेपि वा।
Sambādhe upakacchesu, muttassa karaṇepi vā;
एकलोमम्पि पाचित्ति, संहरापेन्तिया सिया॥
Ekalomampi pācitti, saṃharāpentiyā siyā.
२१३८.
2138.
बहुकेपि तथा लोमे, संहरापेन्तिया पन।
Bahukepi tathā lome, saṃharāpentiyā pana;
पयोगगणनायस्सा, न लोमगणनाय हि॥
Payogagaṇanāyassā, na lomagaṇanāya hi.
२१३९.
2139.
न दोसो सति आबाधे, लोमके संहरन्तिया।
Na doso sati ābādhe, lomake saṃharantiyā;
समुट्ठानादयो मग्ग- संविधानसमा मता॥
Samuṭṭhānādayo magga- saṃvidhānasamā matā.
दुतियं।
Dutiyaṃ.
२१४०.
2140.
होति अन्तमसो मुत्त-करणस्स तलघातने।
Hoti antamaso mutta-karaṇassa talaghātane;
केसरेनापि रागेन, पाचित्ति पदुमस्स वा॥
Kesarenāpi rāgena, pācitti padumassa vā.
२१४१.
2141.
गण्डं तत्थ वणं वापि, न दोसो पहरन्तिया।
Gaṇḍaṃ tattha vaṇaṃ vāpi, na doso paharantiyā;
समुट्ठानादयो तुल्या, पठमन्तिमवत्थुना॥
Samuṭṭhānādayo tulyā, paṭhamantimavatthunā.
ततियं।
Tatiyaṃ.
२१४२.
2142.
या पनुप्पलपत्तम्पि, ब्यञ्जने भिक्खुनत्तनो।
Yā panuppalapattampi, byañjane bhikkhunattano;
कामरागपरेता तु, पवेसेति न वट्टति॥
Kāmarāgaparetā tu, paveseti na vaṭṭati.
२१४३.
2143.
इदं वत्थुवसेनेव, वुत्तं तु जतुमट्ठकं।
Idaṃ vatthuvaseneva, vuttaṃ tu jatumaṭṭhakaṃ;
दण्डमेलाळुकं वापि, मुत्तस्स करणे पन॥
Daṇḍamelāḷukaṃ vāpi, muttassa karaṇe pana.
२१४४.
2144.
सम्फस्सं सादियन्तिया, पवेसेति सचे पन।
Samphassaṃ sādiyantiyā, paveseti sace pana;
पवेसापेति वा तस्मिं, तस्सा पाचित्तियं सिया॥
Pavesāpeti vā tasmiṃ, tassā pācittiyaṃ siyā.
२१४५.
2145.
आबाधपच्चया दोसो, नत्थि उम्मत्तिकाय वा।
Ābādhapaccayā doso, natthi ummattikāya vā;
तलघातकतुल्याव, समुट्ठानादयो मता॥
Talaghātakatulyāva, samuṭṭhānādayo matā.
चतुत्थं।
Catutthaṃ.
२१४६.
2146.
अङ्गुलीनं पन द्विन्नं, अग्गपब्बद्वयाधिकं।
Aṅgulīnaṃ pana dvinnaṃ, aggapabbadvayādhikaṃ;
पाचित्तियं पवेसेत्वा, दकसुद्धिं करोन्तिया॥
Pācittiyaṃ pavesetvā, dakasuddhiṃ karontiyā.
२१४७.
2147.
एकिस्साङ्गुलिया तीणि, पब्बानि पन दीघतो।
Ekissāṅguliyā tīṇi, pabbāni pana dīghato;
पाचित्तियं भवे सुद्धिं, पवेसेत्वादियन्तिया॥
Pācittiyaṃ bhave suddhiṃ, pavesetvādiyantiyā.
२१४८.
2148.
चतुन्नं वापि तिस्सन्नं, एकपब्बम्पि या पन।
Catunnaṃ vāpi tissannaṃ, ekapabbampi yā pana;
वित्थारतो पवेसेति, तस्सा पाचित्तियं सिया॥
Vitthārato paveseti, tassā pācittiyaṃ siyā.
२१४९.
2149.
इति सब्बप्पकारेन, महापच्चरिया पन।
Iti sabbappakārena, mahāpaccariyā pana;
अभिब्यत्ततरं कत्वा, अयमत्थो विभावितो॥
Abhibyattataraṃ katvā, ayamattho vibhāvito.
२१५०.
2150.
दोसो द्वङ्गुलपब्बे वा, नत्थि आबाधकारणा।
Doso dvaṅgulapabbe vā, natthi ābādhakāraṇā;
अधिकम्पि पवेसेत्वा, दकसुद्धिं करोन्तिया॥
Adhikampi pavesetvā, dakasuddhiṃ karontiyā.
२१५१.
2151.
तथा उम्मत्तिकादीन-मनापत्ति पकासिता।
Tathā ummattikādīna-manāpatti pakāsitā;
समुट्ठानादयो सब्बे, तलघातसमा मता॥
Samuṭṭhānādayo sabbe, talaghātasamā matā.
पञ्चमं।
Pañcamaṃ.
२१५२.
2152.
भुञ्जतो पन भिक्खुस्स, पानीयं वा विधूपनं।
Bhuñjato pana bhikkhussa, pānīyaṃ vā vidhūpanaṃ;
गहेत्वा उपतिट्ठेय्य, तस्सा पाचित्तियं सिया॥
Gahetvā upatiṭṭheyya, tassā pācittiyaṃ siyā.
२१५३.
2153.
गहिता उदकेनेव, खीरतक्कादयो रसा।
Gahitā udakeneva, khīratakkādayo rasā;
‘‘बीजनी’’ति च या काचि, वत्थकोणादि वुच्चति॥
‘‘Bījanī’’ti ca yā kāci, vatthakoṇādi vuccati.
२१५४.
2154.
हत्थपासे इधट्ठान-पच्चयापत्ति दीपिता।
Hatthapāse idhaṭṭhāna-paccayāpatti dīpitā;
पहारपच्चया वुत्तं, खन्धके दुक्कटं विसुं॥
Pahārapaccayā vuttaṃ, khandhake dukkaṭaṃ visuṃ.
२१५५.
2155.
हत्थपासं जहित्वा वा, उपतिट्ठन्तिया पन।
Hatthapāsaṃ jahitvā vā, upatiṭṭhantiyā pana;
खादतो खादनं वापि, होति आपत्ति दुक्कटं॥
Khādato khādanaṃ vāpi, hoti āpatti dukkaṭaṃ.
२१५६.
2156.
न दोसो देति दापेति, तथा उम्मत्तिकाय वा।
Na doso deti dāpeti, tathā ummattikāya vā;
इदं एळकलोमेन, समुट्ठानं समं मतं॥
Idaṃ eḷakalomena, samuṭṭhānaṃ samaṃ mataṃ.
छट्ठं।
Chaṭṭhaṃ.
२१५७.
2157.
विञ्ञत्वा आमकं धञ्ञं, भज्जित्वा यदि भिक्खुनी।
Viññatvā āmakaṃ dhaññaṃ, bhajjitvā yadi bhikkhunī;
कोट्टेत्वा च पचित्वा च, पाचित्ति परिभुञ्जति॥
Koṭṭetvā ca pacitvā ca, pācitti paribhuñjati.
२१५८.
2158.
न केवलं तु धञ्ञानं, गहणेयेव दुक्कटं।
Na kevalaṃ tu dhaññānaṃ, gahaṇeyeva dukkaṭaṃ;
हरणेपि च धञ्ञानं, तथा सुक्खापने पन॥
Haraṇepi ca dhaññānaṃ, tathā sukkhāpane pana.
२१५९.
2159.
भज्जनत्थाय धञ्ञानं, कपल्लुद्धनसज्जने।
Bhajjanatthāya dhaññānaṃ, kapalluddhanasajjane;
अग्गिस्स करणे दब्बि-सज्जने च, कपल्लके॥
Aggissa karaṇe dabbi-sajjane ca, kapallake.
२१६०.
2160.
धञ्ञपक्खिपने तत्थ, दब्बिया घट्टकोट्टने।
Dhaññapakkhipane tattha, dabbiyā ghaṭṭakoṭṭane;
पप्फोटनादिके सब्ब-पयोगे दुक्कटं भवे॥
Papphoṭanādike sabba-payoge dukkaṭaṃ bhave.
२१६१.
2161.
भोजनञ्चेव विञ्ञत्ति, पमाणं इदमेत्थ हि।
Bhojanañceva viññatti, pamāṇaṃ idamettha hi;
विञ्ञत्वा वा सयं तस्मा, भज्जनादीनि अञ्ञतो॥
Viññatvā vā sayaṃ tasmā, bhajjanādīni aññato.
२१६२.
2162.
विञ्ञापेत्वा पनञ्ञाय, भज्जनादीनि वा सयं।
Viññāpetvā panaññāya, bhajjanādīni vā sayaṃ;
कारापेत्वापि कत्वा वा, अज्झोहरति या पन॥
Kārāpetvāpi katvā vā, ajjhoharati yā pana.
२१६३.
2163.
अज्झोहारपयोगेसु, तस्सा पाचित्तियो सियुं।
Ajjhohārapayogesu, tassā pācittiyo siyuṃ;
मातरं वापि याचित्वा, पाचित्ति परिभुञ्जति॥
Mātaraṃ vāpi yācitvā, pācitti paribhuñjati.
२१६४.
2164.
भज्जनादीनि कत्वा वा, कारापेत्वापि वा पन।
Bhajjanādīni katvā vā, kārāpetvāpi vā pana;
अविञ्ञत्ति सयं लद्धं, दुक्कटं परिभुञ्जति॥
Aviññatti sayaṃ laddhaṃ, dukkaṭaṃ paribhuñjati.
२१६५.
2165.
विञ्ञत्तिया पनञ्ञाय, लद्धं ताय सयम्पि वा।
Viññattiyā panaññāya, laddhaṃ tāya sayampi vā;
कारापेत्वापि कत्वा वा, तथा अज्झोहरन्तिया॥
Kārāpetvāpi katvā vā, tathā ajjhoharantiyā.
२१६६.
2166.
सेदकम्मादिअत्थाय, धञ्ञविञ्ञत्तिया पन।
Sedakammādiatthāya, dhaññaviññattiyā pana;
ठपेत्वा सत्त धञ्ञानि, सेसविञ्ञत्तियापि च॥
Ṭhapetvā satta dhaññāni, sesaviññattiyāpi ca.
२१६७.
2167.
अनापत्तीति ञातब्बं, तथा उम्मत्तिकाय च।
Anāpattīti ñātabbaṃ, tathā ummattikāya ca;
ञातकानम्पि धञ्ञं तु, आमकं न च वट्टति॥
Ñātakānampi dhaññaṃ tu, āmakaṃ na ca vaṭṭati.
२१६८.
2168.
विना विञ्ञत्तिया लद्धं, नवकम्मेसु वट्टति।
Vinā viññattiyā laddhaṃ, navakammesu vaṭṭati;
समुट्ठानादयो सब्बे, अद्धानसदिसा मता॥
Samuṭṭhānādayo sabbe, addhānasadisā matā.
सत्तमं।
Sattamaṃ.
२१६९.
2169.
उच्चारं वापि पस्सावं, सङ्कारं वा विघासकं।
Uccāraṃ vāpi passāvaṃ, saṅkāraṃ vā vighāsakaṃ;
छड्डेय्य वा तिरोकुट्टे, छड्डापेय्य परेहि वा॥
Chaḍḍeyya vā tirokuṭṭe, chaḍḍāpeyya parehi vā.
२१७०.
2170.
होति पाचित्तियं तस्सा, पाकारेपि अयं नयो।
Hoti pācittiyaṃ tassā, pākārepi ayaṃ nayo;
छड्डेन्तिया पनेकेक-मनेकापत्ति दीपिता॥
Chaḍḍentiyā panekeka-manekāpatti dīpitā.
२१७१.
2171.
एतानि पन वत्थूनि, चत्तारि सकलानिपि।
Etāni pana vatthūni, cattāri sakalānipi;
एकेनेव पयोगेन, एका छड्डेन्तिया सिया॥
Ekeneva payogena, ekā chaḍḍentiyā siyā.
२१७२.
2172.
आणत्तियम्पि एसेव, नयो ञेय्यो विभाविना।
Āṇattiyampi eseva, nayo ñeyyo vibhāvinā;
छड्डने दन्तकट्ठस्स, पाचित्ति परिदीपिता॥
Chaḍḍane dantakaṭṭhassa, pācitti paridīpitā.
२१७३.
2173.
सब्बत्थ पन भिक्खुस्स, होति आपत्ति दुक्कटं।
Sabbattha pana bhikkhussa, hoti āpatti dukkaṭaṃ;
अवलञ्जेपि वा ठाने, ओलोकेत्वापि वा पन॥
Avalañjepi vā ṭhāne, oloketvāpi vā pana.
२१७४.
2174.
छड्डेन्तिया अनापत्ति, तथा उम्मत्तिकाय वा।
Chaḍḍentiyā anāpatti, tathā ummattikāya vā;
सञ्चरित्तसमुट्ठानं, क्रियाक्रियमिदं सिया॥
Sañcarittasamuṭṭhānaṃ, kriyākriyamidaṃ siyā.
अट्ठमं।
Aṭṭhamaṃ.
२१७५.
2175.
खेत्ते वा नाळिकेरादि-आरामे वापि या पन।
Khette vā nāḷikerādi-ārāme vāpi yā pana;
रोपिमे हरितट्ठाने, यत्थ कत्थचि भिक्खुनी॥
Ropime haritaṭṭhāne, yattha katthaci bhikkhunī.
२१७६.
2176.
तानि चत्तारि वत्थूनि, सचे छड्डेति वा सयं।
Tāni cattāri vatthūni, sace chaḍḍeti vā sayaṃ;
छड्डापेति तथा वुत्त-नयो आपत्तिनिच्छयो॥
Chaḍḍāpeti tathā vutta-nayo āpattinicchayo.
२१७७.
2177.
भुञ्जमाना निसीदित्वा, खेत्ते तु हरिते तथा।
Bhuñjamānā nisīditvā, khette tu harite tathā;
उच्छुआदीनि खादन्ती, गच्छन्ती पन तत्थ या॥
Ucchuādīni khādantī, gacchantī pana tattha yā.
२१७८.
2178.
छड्डेति यदि उच्छिट्ठं, उदकं चलकानि वा।
Chaḍḍeti yadi ucchiṭṭhaṃ, udakaṃ calakāni vā;
होति पाचित्तियं तस्सा, भिक्खुनो होति दुक्कटं॥
Hoti pācittiyaṃ tassā, bhikkhuno hoti dukkaṭaṃ.
२१७९.
2179.
छड्डेन्तिया सियापत्ति, ठाने अन्तमसो जलं।
Chaḍḍentiyā siyāpatti, ṭhāne antamaso jalaṃ;
पिवित्वा मत्थकच्छिन्नं, नाळिकेरम्पि तादिसे॥
Pivitvā matthakacchinnaṃ, nāḷikerampi tādise.
२१८०.
2180.
कसिते तु पनट्ठाने, बीजनिक्खेपने कते।
Kasite tu panaṭṭhāne, bījanikkhepane kate;
न उट्ठेतङ्कुरं याव, सब्बेसं ताव दुक्कटं॥
Na uṭṭhetaṅkuraṃ yāva, sabbesaṃ tāva dukkaṭaṃ.
२१८१.
2181.
लायितम्पि मनुस्सानं, खेत्तं रक्खति चे पुन।
Lāyitampi manussānaṃ, khettaṃ rakkhati ce puna;
रोहनत्थाय तत्थस्सा, यथावत्थुकमेव हि॥
Rohanatthāya tatthassā, yathāvatthukameva hi.
२१८२.
2182.
न दोसो छड्डिते खेत्ते, सब्बं छड्डेन्तिया पन।
Na doso chaḍḍite khette, sabbaṃ chaḍḍentiyā pana;
समुट्ठानादयो सब्बे, अट्ठमेन समा मता॥
Samuṭṭhānādayo sabbe, aṭṭhamena samā matā.
नवमं।
Navamaṃ.
२१८३.
2183.
नच्चं वा पन गीतं वा, वादितं वापि भिक्खुनी।
Naccaṃ vā pana gītaṃ vā, vāditaṃ vāpi bhikkhunī;
दस्सनत्थाय गच्छेय्य, तस्सा पाचित्तियं सिया॥
Dassanatthāya gaccheyya, tassā pācittiyaṃ siyā.
२१८४.
2184.
दस्सनत्थाय नच्चस्स, गीतस्स सवनाय च।
Dassanatthāya naccassa, gītassa savanāya ca;
गच्छन्तिया सिया तस्सा, पदवारेन दुक्कटं॥
Gacchantiyā siyā tassā, padavārena dukkaṭaṃ.
२१८५.
2185.
सचे एकपयोगेन, ओलोकेन्ती च पस्सति।
Sace ekapayogena, olokentī ca passati;
सुणाति तेसं गीतम्पि, एका पाचित्ति दीपिता॥
Suṇāti tesaṃ gītampi, ekā pācitti dīpitā.
२१८६.
2186.
अञ्ञस्मिम्पि दिसाभागे, नच्चं पस्सति चे पन।
Aññasmimpi disābhāge, naccaṃ passati ce pana;
सुणाति अञ्ञतो गीतं, विसुं पाचित्तियो सियुं॥
Suṇāti aññato gītaṃ, visuṃ pācittiyo siyuṃ.
२१८७.
2187.
पयोगगणनायेत्थ, आपत्तिगणना सिया।
Payogagaṇanāyettha, āpattigaṇanā siyā;
नच्चितुं गायितुं नेव, सयं लभति भिक्खुनी॥
Naccituṃ gāyituṃ neva, sayaṃ labhati bhikkhunī.
२१८८.
2188.
‘‘अञ्ञं नच्चाति वादेहि’’, इति वत्तुं न वट्टति।
‘‘Aññaṃ naccāti vādehi’’, iti vattuṃ na vaṭṭati;
‘‘उपट्ठानं करोमा’’ति, वुत्ते वा सम्पटिच्छितुं॥
‘‘Upaṭṭhānaṃ karomā’’ti, vutte vā sampaṭicchituṃ.
२१८९.
2189.
तस्सा पाचित्ति सब्बत्थ, भिक्खुनो होति दुक्कटं।
Tassā pācitti sabbattha, bhikkhuno hoti dukkaṭaṃ;
‘‘उपट्ठानं करोमा’’ति, वुत्ते भिक्खुनिया पन॥
‘‘Upaṭṭhānaṃ karomā’’ti, vutte bhikkhuniyā pana.
२१९०.
2190.
‘‘उपट्ठानं पसत्थ’’न्ति, वत्तुमेवं तु वट्टति।
‘‘Upaṭṭhānaṃ pasattha’’nti, vattumevaṃ tu vaṭṭati;
आरामेयेव ठत्वा वा, या पस्सति सुणाति वा॥
Ārāmeyeva ṭhatvā vā, yā passati suṇāti vā.
२१९१.
2191.
अत्तनो च ठितोकासं, आगन्त्वा च पयोजितं।
Attano ca ṭhitokāsaṃ, āgantvā ca payojitaṃ;
गन्त्वा पस्सन्तिया वापि, तथारूपा हि कारणा॥
Gantvā passantiyā vāpi, tathārūpā hi kāraṇā.
२१९२.
2192.
पस्सन्तिया तथा मग्गं, नच्चं पटिपथेपि च।
Passantiyā tathā maggaṃ, naccaṃ paṭipathepi ca;
तथा उम्मत्तिकादीन-मनापत्तापदासुपि॥
Tathā ummattikādīna-manāpattāpadāsupi.
२१९३.
2193.
इदमेळकलोमेन, समुट्ठानं समं मतं।
Idameḷakalomena, samuṭṭhānaṃ samaṃ mataṃ;
लोकवज्जमिदं पाप-चित्तञ्चेव तिवेदनं॥
Lokavajjamidaṃ pāpa-cittañceva tivedanaṃ.
दसमं।
Dasamaṃ.
लसुणवग्गो पठमो।
Lasuṇavaggo paṭhamo.
२१९४.
2194.
याध रत्तन्धकारस्मिं, अप्पदीपे पनेकिका।
Yādha rattandhakārasmiṃ, appadīpe panekikā;
सन्तिट्ठति सचे सद्धिं, पुरिसेन च भिक्खुनी॥
Santiṭṭhati sace saddhiṃ, purisena ca bhikkhunī.
२१९५.
2195.
तस्सा पाचित्तियं वुत्तं, सद्धिं वा सल्लपन्तिया।
Tassā pācittiyaṃ vuttaṃ, saddhiṃ vā sallapantiyā;
हत्थपासं समागन्त्वा, रहस्सादवसेन तु॥
Hatthapāsaṃ samāgantvā, rahassādavasena tu.
२१९६.
2196.
हत्थपासं जहित्वा वा, पुरिसस्स सचे पन।
Hatthapāsaṃ jahitvā vā, purisassa sace pana;
अजहित्वापि वा यक्ख-पेतादीनम्पि भिक्खुनी॥
Ajahitvāpi vā yakkha-petādīnampi bhikkhunī.
२१९७.
2197.
सन्तिट्ठति च या तस्सा, दुक्कटं परिदीपितं।
Santiṭṭhati ca yā tassā, dukkaṭaṃ paridīpitaṃ;
अनापत्ति सचे कोचि, दुतिया विञ्ञु विज्जति॥
Anāpatti sace koci, dutiyā viññu vijjati.
२१९८.
2198.
तथा उम्मत्तिकादीन-मथञ्ञविहिताय वा।
Tathā ummattikādīna-mathaññavihitāya vā;
थेय्यसत्थसमुट्ठानं, क्रियं सञ्ञाविमोक्खकं॥
Theyyasatthasamuṭṭhānaṃ, kriyaṃ saññāvimokkhakaṃ.
पठमं।
Paṭhamaṃ.
२१९९.
2199.
दुतिये तु ‘‘पटिच्छन्ने, ओकासे’’ति इदं पन।
Dutiye tu ‘‘paṭicchanne, okāse’’ti idaṃ pana;
अधिकं इतरं सब्बं, पठमेन समं मतं॥
Adhikaṃ itaraṃ sabbaṃ, paṭhamena samaṃ mataṃ.
दुतियं।
Dutiyaṃ.
२२००.
2200.
ततियेपि चतुत्थेपि, अपुब्बं नत्थि किञ्चिपि।
Tatiyepi catutthepi, apubbaṃ natthi kiñcipi;
समानं पठमेनेव, समुट्ठानादिना सह॥
Samānaṃ paṭhameneva, samuṭṭhānādinā saha.
ततियचतुत्थानि।
Tatiyacatutthāni.
२२०१.
2201.
छदनन्तो निसीदित्वा, अनोवस्सप्पदेसकं।
Chadananto nisīditvā, anovassappadesakaṃ;
अज्झोकासे निसीदित्वा, उपचारम्पि वा सचे॥
Ajjhokāse nisīditvā, upacārampi vā sace.
२२०२.
2202.
अतिक्कमेति या, होति, दुक्कटं पठमे पदे।
Atikkameti yā, hoti, dukkaṭaṃ paṭhame pade;
दुतिये च पदे तस्सा, पाचित्ति परियापुता॥
Dutiye ca pade tassā, pācitti pariyāputā.
२२०३.
2203.
पल्लङ्कस्स अनोकासे, दुक्कटं समुदीरितं।
Pallaṅkassa anokāse, dukkaṭaṃ samudīritaṃ;
तथापुट्ठे अनापुट्ठ-सञ्ञाय विचिकिच्छतो॥
Tathāpuṭṭhe anāpuṭṭha-saññāya vicikicchato.
२२०४.
2204.
असंहारिमेनापत्ति, गिलानायापदासु वा।
Asaṃhārimenāpatti, gilānāyāpadāsu vā;
समुट्ठानादयो सब्बे, कथिनेन समा मता॥
Samuṭṭhānādayo sabbe, kathinena samā matā.
पञ्चमं।
Pañcamaṃ.
२२०५.
2205.
एकापत्ति निसीदित्वा, होति गच्छन्तिया पन।
Ekāpatti nisīditvā, hoti gacchantiyā pana;
एकाव अनिसीदित्वा, निपज्जित्वा वजन्तिया॥
Ekāva anisīditvā, nipajjitvā vajantiyā.
२२०६.
2206.
निसीदित्वा निपज्जित्वा, होन्ति गच्छन्तिया दुवे।
Nisīditvā nipajjitvā, honti gacchantiyā duve;
सेसं अनन्तरेनेव, समुट्ठानादिना समं॥
Sesaṃ anantareneva, samuṭṭhānādinā samaṃ.
छट्ठं।
Chaṭṭhaṃ.
२२०७.
2207.
छट्ठेन सत्तमं तुल्यं, अट्ठमे नत्थि किञ्चिपि।
Chaṭṭhena sattamaṃ tulyaṃ, aṭṭhame natthi kiñcipi;
वत्तब्बं तिसमुट्ठानं, सचित्तं दुक्खवेदनं॥
Vattabbaṃ tisamuṭṭhānaṃ, sacittaṃ dukkhavedanaṃ.
सत्तमट्ठमानि।
Sattamaṭṭhamāni.
२२०८.
2208.
निरयब्रह्मचरियेहि, अत्तानं वा परम्पि वा।
Nirayabrahmacariyehi, attānaṃ vā parampi vā;
अभिसपेय्य पाचित्ति, वाचतो वाचतो सिया॥
Abhisapeyya pācitti, vācato vācato siyā
२२०९.
2209.
ठपेत्वा निरयञ्चेव, ब्रह्मचरियञ्च या पन।
Ṭhapetvā nirayañceva, brahmacariyañca yā pana;
‘‘सुनखी सूकरी काकी, काणा कुणी’’तिआदिना॥
‘‘Sunakhī sūkarī kākī, kāṇā kuṇī’’tiādinā.
२२१०.
2210.
अक्कोसति च वाचाय, वाचायापत्ति दुक्कटं।
Akkosati ca vācāya, vācāyāpatti dukkaṭaṃ;
तिकपाचित्तियं वुत्तं, सेसाय तिकदुक्कटं॥
Tikapācittiyaṃ vuttaṃ, sesāya tikadukkaṭaṃ.
२२११.
2211.
पुरक्खत्वा वदन्तीन-मत्थधम्मानुसासनिं।
Purakkhatvā vadantīna-matthadhammānusāsaniṃ;
अनापत्तट्ठमेनेव, समुट्ठानादयो समा॥
Anāpattaṭṭhameneva, samuṭṭhānādayo samā.
नवमं।
Navamaṃ.
२२१२.
2212.
रोदन्तिया वधित्वा वा, पाचित्ति परिदीपिता।
Rodantiyā vadhitvā vā, pācitti paridīpitā;
द्वीसु तेसु पनेकेकं, दुक्कटं तु करोन्तिया॥
Dvīsu tesu panekekaṃ, dukkaṭaṃ tu karontiyā.
२२१३.
2213.
सेसमुत्तानमेवेत्थ, समुट्ठानादयो पन।
Sesamuttānamevettha, samuṭṭhānādayo pana;
धुरनिक्खेपतुल्याव, क्रियामत्तं विसेसकं॥
Dhuranikkhepatulyāva, kriyāmattaṃ visesakaṃ.
दसमं।
Dasamaṃ.
अन्धकारवग्गो दुतियो।
Andhakāravaggo dutiyo.
२२१४.
2214.
न्हायति नग्गा या पन हुत्वा।
Nhāyati naggā yā pana hutvā;
सब्बपयोगे दुक्कटमस्सा।
Sabbapayoge dukkaṭamassā;
तस्स च वोसाने जिनवुत्तं।
Tassa ca vosāne jinavuttaṃ;
भिक्खुनि दोसं सा समुपेति॥
Bhikkhuni dosaṃ sā samupeti.
२२१५.
2215.
अच्छिन्नचीवरा नट्ठ-चीवरा आपदासु वा।
Acchinnacīvarā naṭṭha-cīvarā āpadāsu vā;
न दोसेळकलोमेन, समुट्ठानादयो समा॥
Na doseḷakalomena, samuṭṭhānādayo samā.
पठमं।
Paṭhamaṃ.
२२१६.
2216.
दुतिये पन वत्तब्बं, अपुब्बं नत्थि किञ्चिपि।
Dutiye pana vattabbaṃ, apubbaṃ natthi kiñcipi;
समुट्ठानादयो सब्बे, सञ्चरित्तसमा मता॥
Samuṭṭhānādayo sabbe, sañcarittasamā matā.
दुतियं।
Dutiyaṃ.
२२१७.
2217.
दुस्सिब्बितं विसिब्बेत्वा, सिब्बनत्थाय चीवरं।
Dussibbitaṃ visibbetvā, sibbanatthāya cīvaraṃ;
अनन्तराय तं पच्छा, या न सिब्बेय्य भिक्खुनी॥
Anantarāya taṃ pacchā, yā na sibbeyya bhikkhunī.
२२१८.
2218.
ठपेत्वा चतुपञ्चाहं, ‘‘न सिब्बिस्साम्यह’’न्ति हि।
Ṭhapetvā catupañcāhaṃ, ‘‘na sibbissāmyaha’’nti hi;
धुरे निक्खित्तमत्तेव, तस्सा पाचित्तियं सिया॥
Dhure nikkhittamatteva, tassā pācittiyaṃ siyā.
२२१९.
2219.
पच्छा सिब्बति पाचित्ति, निक्खिपित्वा धुरं सचे।
Pacchā sibbati pācitti, nikkhipitvā dhuraṃ sace;
तिकपाचित्तियं वुत्तं, सेसाय तिकदुक्कटं॥
Tikapācittiyaṃ vuttaṃ, sesāya tikadukkaṭaṃ.
२२२०.
2220.
वुत्तं उभिन्नमञ्ञस्मिं, परिक्खारे तु दुक्कटं।
Vuttaṃ ubhinnamaññasmiṃ, parikkhāre tu dukkaṭaṃ;
अनापत्ति गिलानाय, अन्तरायेपि वा सति॥
Anāpatti gilānāya, antarāyepi vā sati.
२२२१.
2221.
अतिक्कमेति पञ्चाहं, करोन्ती वापि चीवरं।
Atikkameti pañcāhaṃ, karontī vāpi cīvaraṃ;
धुरनिक्खेपनं नाम, समुट्ठानमिदं मतं॥
Dhuranikkhepanaṃ nāma, samuṭṭhānamidaṃ mataṃ.
ततियं।
Tatiyaṃ.
२२२२.
2222.
पञ्चाहिकं तु सङ्घाटि-चारं यातिक्कमेय्य हि।
Pañcāhikaṃ tu saṅghāṭi-cāraṃ yātikkameyya hi;
होति पाचित्तियापत्ति, छट्ठे तस्सारुणुग्गमे॥
Hoti pācittiyāpatti, chaṭṭhe tassāruṇuggame.
२२२३.
2223.
एकस्मिं चीवरे एका, पञ्च पञ्चसु दीपिता।
Ekasmiṃ cīvare ekā, pañca pañcasu dīpitā;
तिचीवरञ्च संकच्चि, दकसाटीति पञ्च तु॥
Ticīvarañca saṃkacci, dakasāṭīti pañca tu.
२२२४.
2224.
तिकपाचित्ति पञ्चाहा-नतिक्कन्ते द्विदुक्कटं।
Tikapācitti pañcāhā-natikkante dvidukkaṭaṃ;
पञ्चमे दिवसे पञ्च, चीवरानि निसेवति॥
Pañcame divase pañca, cīvarāni nisevati.
२२२५.
2225.
ओतापेति गिलानाय, अनापत्तिपदासुपि।
Otāpeti gilānāya, anāpattipadāsupi;
समुट्ठानादयो सब्बे, कथिनेन समा मता॥
Samuṭṭhānādayo sabbe, kathinena samā matā.
चतुत्थं।
Catutthaṃ.
२२२६.
2226.
गहेत्वा या अनापुच्छा, सङ्कमेतब्बचीवरं।
Gahetvā yā anāpucchā, saṅkametabbacīvaraṃ;
परिभुञ्जति अञ्ञिस्सा, तस्सा पाचित्तियं सिया॥
Paribhuñjati aññissā, tassā pācittiyaṃ siyā.
२२२७.
2227.
तिकपाचित्तियं वुत्तं, सेसाय तिकदुक्कटं।
Tikapācittiyaṃ vuttaṃ, sesāya tikadukkaṭaṃ;
अच्छिन्नचीवरा नट्ठ-चीवरा आपदासु वा॥
Acchinnacīvarā naṭṭha-cīvarā āpadāsu vā.
२२२८.
2228.
तथा उम्मत्तिकादीन-मनापत्ति पकासिता।
Tathā ummattikādīna-manāpatti pakāsitā;
कथिनेन समुट्ठानं, तुल्यमेतं क्रियाक्रियं॥
Kathinena samuṭṭhānaṃ, tulyametaṃ kriyākriyaṃ.
पञ्चमं।
Pañcamaṃ.
२२२९.
2229.
या हि भिक्खुनि सङ्घस्स, लभितब्बं तु चीवरं।
Yā hi bhikkhuni saṅghassa, labhitabbaṃ tu cīvaraṃ;
निवारेति सचे तस्सा, पाचित्ति परिदीपये॥
Nivāreti sace tassā, pācitti paridīpaye.
२२३०.
2230.
गणस्सापि च एकिस्सा, लाभे आपत्ति दुक्कटं।
Gaṇassāpi ca ekissā, lābhe āpatti dukkaṭaṃ;
तथेवञ्ञं परिक्खारं, निवारेति सचे पन॥
Tathevaññaṃ parikkhāraṃ, nivāreti sace pana.
२२३१.
2231.
आनिसंसं निदस्सेत्वा, निवारेति न दोसता।
Ānisaṃsaṃ nidassetvā, nivāreti na dosatā;
अदिन्नादानतुल्याव, समुट्ठानादयो मता॥
Adinnādānatulyāva, samuṭṭhānādayo matā.
छट्ठं।
Chaṭṭhaṃ.
२२३२.
2232.
चीवरानं विभङ्गं या, पटिसेधेय्य धम्मिकं।
Cīvarānaṃ vibhaṅgaṃ yā, paṭisedheyya dhammikaṃ;
होति पाचित्तियं तस्सा, दुक्कटं परिदीपितं॥
Hoti pācittiyaṃ tassā, dukkaṭaṃ paridīpitaṃ.
२२३३.
2233.
अधम्मे धम्मसञ्ञाय, उभो वेमतिकाय वा।
Adhamme dhammasaññāya, ubho vematikāya vā;
आनिसंसं निदस्सेत्वा, पटिसेधेन्तिया पन॥
Ānisaṃsaṃ nidassetvā, paṭisedhentiyā pana.
२२३४.
2234.
तथा उम्मत्तिकादीन-मनापत्ति पकासिता।
Tathā ummattikādīna-manāpatti pakāsitā;
समुट्ठानादयो सब्बे, अनन्तरसमा मता॥
Samuṭṭhānādayo sabbe, anantarasamā matā.
सत्तमं।
Sattamaṃ.
२२३५.
2235.
निवासनूपगं वापि, तथा पारुपनूपगं।
Nivāsanūpagaṃ vāpi, tathā pārupanūpagaṃ;
कप्पबिन्दुकतं किञ्चि, मुञ्चित्वा सहधम्मिके॥
Kappabindukataṃ kiñci, muñcitvā sahadhammike.
२२३६.
2236.
पितरोपि पनञ्ञस्स, ददेय्य यदि चीवरं।
Pitaropi panaññassa, dadeyya yadi cīvaraṃ;
यस्स कस्सचि तस्सापि, पाचित्ति परियापुता॥
Yassa kassaci tassāpi, pācitti pariyāputā.
२२३७.
2237.
गणनाय वसेनेत्थ, चीवरानं तु ता पन।
Gaṇanāya vasenettha, cīvarānaṃ tu tā pana;
पाचित्तियो गणेतब्बा, भिक्खुनो दुक्कटं सिया॥
Pācittiyo gaṇetabbā, bhikkhuno dukkaṭaṃ siyā.
२२३८.
2238.
तावकालिकमञ्ञेस-मनापत्ति ददाति चे।
Tāvakālikamaññesa-manāpatti dadāti ce;
सञ्चरित्तसमा वुत्ता, समुट्ठानादयो नया॥
Sañcarittasamā vuttā, samuṭṭhānādayo nayā.
अट्ठमं।
Aṭṭhamaṃ.
२२३९.
2239.
चीवरस्स विभङ्गं या, निसेधेत्वान चीवरे।
Cīvarassa vibhaṅgaṃ yā, nisedhetvāna cīvare;
कालं अतिक्कमेय्यस्सा, दुब्बलासाय दोसता॥
Kālaṃ atikkameyyassā, dubbalāsāya dosatā.
२२४०.
2240.
अदुब्बले तु चीवरे, सुदुब्बलन्ति चेतसा।
Adubbale tu cīvare, sudubbalanti cetasā;
उभोसु कङ्खिताय वा, अवोच दुक्कटं जिनो॥
Ubhosu kaṅkhitāya vā, avoca dukkaṭaṃ jino.
२२४१.
2241.
आनिसंसं निदस्सेत्वा, निवारेति न दोसता।
Ānisaṃsaṃ nidassetvā, nivāreti na dosatā;
अदिन्नादानतुल्याव, समुट्ठानादयो मता॥
Adinnādānatulyāva, samuṭṭhānādayo matā.
नवमं।
Navamaṃ.
२२४२.
2242.
धम्मिकं कथिनुद्धारं, या निवारेय्य भिक्खुनी।
Dhammikaṃ kathinuddhāraṃ, yā nivāreyya bhikkhunī;
तस्सा पाचित्तियापत्ति, मुनिन्देन पकासिता॥
Tassā pācittiyāpatti, munindena pakāsitā.
२२४३.
2243.
आनिसंसो महा होति, यस्स अत्थारमूलको।
Ānisaṃso mahā hoti, yassa atthāramūlako;
उद्धारमूलको अप्पो, न दातब्बो पनीदिसो॥
Uddhāramūlako appo, na dātabbo panīdiso.
२२४४.
2244.
आनिसंसो महा होति, यस्स उब्भारमूलको।
Ānisaṃso mahā hoti, yassa ubbhāramūlako;
अत्थारमूलको अप्पो, दातब्बो एवरूपको॥
Atthāramūlako appo, dātabbo evarūpako.
२२४५.
2245.
तथा समानिसंसोपि, सद्धापालनकारणा।
Tathā samānisaṃsopi, saddhāpālanakāraṇā;
आनिसंसं निदस्सेत्वा, पटिसेधेति वट्टति॥
Ānisaṃsaṃ nidassetvā, paṭisedheti vaṭṭati.
२२४६.
2246.
सेसं पन असेसेन, सत्तमेन समं मतं।
Sesaṃ pana asesena, sattamena samaṃ mataṃ;
समुट्ठानादिना सद्धिं, अपुब्बं नत्थि किञ्चिपि॥
Samuṭṭhānādinā saddhiṃ, apubbaṃ natthi kiñcipi.
दसमं।
Dasamaṃ.
नग्गवग्गो ततियो।
Naggavaggo tatiyo.
२२४७.
2247.
एकाय तु निपन्नाय, अपरा वा निपज्जतु।
Ekāya tu nipannāya, aparā vā nipajjatu;
निपज्जेय्युं सहेव द्वे, द्विन्नं पाचित्तियं सिया॥
Nipajjeyyuṃ saheva dve, dvinnaṃ pācittiyaṃ siyā.
२२४८.
2248.
आपत्तिबहुका ञेय्या, पुनप्पुनं निपज्जने।
Āpattibahukā ñeyyā, punappunaṃ nipajjane;
एकाय च निपन्नाय, सचे एका निसीदति॥
Ekāya ca nipannāya, sace ekā nisīdati.
२२४९.
2249.
उभो वापि निसीदन्ति, समं, उम्मत्तिकाय वा।
Ubho vāpi nisīdanti, samaṃ, ummattikāya vā;
अनापत्ति समुट्ठानं, एळकेन समं मतं॥
Anāpatti samuṭṭhānaṃ, eḷakena samaṃ mataṃ.
पठमं।
Paṭhamaṃ.
२२५०.
2250.
पावारकटसारादिं, सन्थरित्वा पनेककं।
Pāvārakaṭasārādiṃ, santharitvā panekakaṃ;
संहारिमेसु तेनेव, पारुपित्वा सचे पन॥
Saṃhārimesu teneva, pārupitvā sace pana.
२२५१.
2251.
निपज्जन्ति सहेव द्वे, तासं पाचित्तियं सिया।
Nipajjanti saheva dve, tāsaṃ pācittiyaṃ siyā;
एकस्मिं दुक्कटं द्विन्नं, वुत्तं तु द्विकदुक्कटं॥
Ekasmiṃ dukkaṭaṃ dvinnaṃ, vuttaṃ tu dvikadukkaṭaṃ.
२२५२.
2252.
ववत्थानं निदस्सेत्वा, निपज्जन्ति सचे पन।
Vavatthānaṃ nidassetvā, nipajjanti sace pana;
न दोसुम्मत्तिकादीनं, सेसं तुल्यं पनादिना॥
Na dosummattikādīnaṃ, sesaṃ tulyaṃ panādinā.
दुतियं।
Dutiyaṃ.
२२५३.
2253.
पुरतो च अनापुच्छा, यदि चङ्कमनादयो।
Purato ca anāpucchā, yadi caṅkamanādayo;
करेय्य पन पाचित्ति, अञ्ञिस्साफासुकारणा॥
Kareyya pana pācitti, aññissāphāsukāraṇā.
२२५४.
2254.
निवत्तनानं गणनाय तस्सा।
Nivattanānaṃ gaṇanāya tassā;
पाचित्तियानं गणना च ञेय्या।
Pācittiyānaṃ gaṇanā ca ñeyyā;
पयोगतोयेव भवन्ति दोसा।
Payogatoyeva bhavanti dosā;
निपज्जनट्ठाननिसीदनानं॥
Nipajjanaṭṭhānanisīdanānaṃ.
२२५५.
2255.
उद्देसादीसु पाचित्ति, पदानं गणनावसा।
Uddesādīsu pācitti, padānaṃ gaṇanāvasā;
तिकपाचित्तियं वुत्तं, सेसाय तिकदुक्कटं॥
Tikapācittiyaṃ vuttaṃ, sesāya tikadukkaṭaṃ.
२२५६.
2256.
न च अफासुकामाय, आपुच्छा पुरतो पन।
Na ca aphāsukāmāya, āpucchā purato pana;
तस्सा चङ्कमनादीनि, अनापत्ति करोन्तिया॥
Tassā caṅkamanādīni, anāpatti karontiyā.
२२५७.
2257.
अदिन्नादानतुल्याव , समुट्ठानादयो नया।
Adinnādānatulyāva , samuṭṭhānādayo nayā;
क्रियाक्रियमिदं पाप- मानसं दुक्खवेदनं॥
Kriyākriyamidaṃ pāpa- mānasaṃ dukkhavedanaṃ.
ततियं।
Tatiyaṃ.
२२५८.
2258.
सयं अनन्तराया या, दुक्खितं सहजीविनिं।
Sayaṃ anantarāyā yā, dukkhitaṃ sahajīviniṃ;
नुपट्ठापेय्य चञ्ञाय, नुपट्ठेय्य सयम्पि वा॥
Nupaṭṭhāpeyya caññāya, nupaṭṭheyya sayampi vā.
२२५९.
2259.
धुरे निक्खित्तमत्तेव, तस्सा पाचित्तियं सिया।
Dhure nikkhittamatteva, tassā pācittiyaṃ siyā;
अन्तेवासिनिया वापि, दुक्कटं इतराय वा॥
Antevāsiniyā vāpi, dukkaṭaṃ itarāya vā.
२२६०.
2260.
अनापत्ति गिलानाय, गवेसित्वालभन्तिया।
Anāpatti gilānāya, gavesitvālabhantiyā;
आपदुम्मत्तिकादीनं, धुरनिक्खेपनोदयं॥
Āpadummattikādīnaṃ, dhuranikkhepanodayaṃ.
चतुत्थं।
Catutthaṃ.
२२६१.
2261.
सकं पुग्गलिकं दत्वा, सकवाटं उपस्सयं।
Sakaṃ puggalikaṃ datvā, sakavāṭaṃ upassayaṃ;
सयं उपस्सया तम्हा, निक्कड्ढति सचे पन॥
Sayaṃ upassayā tamhā, nikkaḍḍhati sace pana.
२२६२.
2262.
एकेनेव पयोगेन, द्वारादीसु बहूनिपि।
Ekeneva payogena, dvārādīsu bahūnipi;
तं निक्कड्ढन्तिया तस्सा, एकं पाचित्तियं सिया॥
Taṃ nikkaḍḍhantiyā tassā, ekaṃ pācittiyaṃ siyā.
२२६३.
2263.
पयोगगणनायेत्थ, पाचित्तिगणना मता।
Payogagaṇanāyettha, pācittigaṇanā matā;
आणत्तियम्पि एसेव, नयो वुत्तो महेसिना॥
Āṇattiyampi eseva, nayo vutto mahesinā.
२२६४.
2264.
‘‘एत्तकाव इमं द्वारा, निक्कड्ढाही’’ति भासति।
‘‘Ettakāva imaṃ dvārā, nikkaḍḍhāhī’’ti bhāsati;
एकायाणत्तिया द्वार-गणनापत्तियो सियुं॥
Ekāyāṇattiyā dvāra-gaṇanāpattiyo siyuṃ.
२२६५.
2265.
दुक्कटं अकवाटम्हा, सेसाय तिकदुक्कटं।
Dukkaṭaṃ akavāṭamhā, sesāya tikadukkaṭaṃ;
उभिन्नं पन सब्बत्थ, परिक्खारेसु दुक्कटं॥
Ubhinnaṃ pana sabbattha, parikkhāresu dukkaṭaṃ.
२२६६.
2266.
सेसमेत्थ असेसेन, समुट्ठानादिना सह।
Sesamettha asesena, samuṭṭhānādinā saha;
सङ्घिका हि विहारस्मा, निक्कड्ढनसमं मतं॥
Saṅghikā hi vihārasmā, nikkaḍḍhanasamaṃ mataṃ.
पञ्चमं।
Pañcamaṃ.
२२६७.
2267.
छट्ठे पनिध वत्तब्बं, अपुब्बं नत्थि किञ्चिपि।
Chaṭṭhe panidha vattabbaṃ, apubbaṃ natthi kiñcipi;
सिक्खापदेनरिट्ठस्स, सदिसोव विनिच्छयो॥
Sikkhāpadenariṭṭhassa, sadisova vinicchayo.
छट्ठं।
Chaṭṭhaṃ.
२२६८.
2268.
सासङ्कसम्मते अन्तो-रट्ठे भिक्खुनिया पन।
Sāsaṅkasammate anto-raṭṭhe bhikkhuniyā pana;
चरन्तिया सियापत्ति, विना सत्थेन चारिकं॥
Carantiyā siyāpatti, vinā satthena cārikaṃ.
२२६९.
2269.
गामन्तरपवेसे च, अरञ्ञे अद्धयोजने।
Gāmantarapavese ca, araññe addhayojane;
पाचित्तियनयो ञेय्यो, भिक्खुना विनयञ्ञुना॥
Pācittiyanayo ñeyyo, bhikkhunā vinayaññunā.
२२७०.
2270.
न दोसो सह सत्थेन, खेमट्ठानापदासु वा।
Na doso saha satthena, khemaṭṭhānāpadāsu vā;
इदं एळकलोमेन, समुट्ठानादिना समं॥
Idaṃ eḷakalomena, samuṭṭhānādinā samaṃ.
सत्तमं।
Sattamaṃ.
२२७१.
2271.
अट्ठमे नवमे वापि, अनुत्तानं न विज्जति।
Aṭṭhame navame vāpi, anuttānaṃ na vijjati;
सत्तमेन समानानि, समुट्ठानादिना सह॥
Sattamena samānāni, samuṭṭhānādinā saha.
अट्ठमनवमानि।
Aṭṭhamanavamāni.
२२७२.
2272.
पाचित्ति धुरनिक्खेपे, ‘‘न गमिस्साम्यह’’न्ति च।
Pācitti dhuranikkhepe, ‘‘na gamissāmyaha’’nti ca;
कत्वा च धुरनिक्खेपं, पच्छा गच्छन्तिया तथा॥
Katvā ca dhuranikkhepaṃ, pacchā gacchantiyā tathā.
२२७३.
2273.
योजनानि पवारेत्वा, पञ्च गन्तुम्पि वट्टति।
Yojanāni pavāretvā, pañca gantumpi vaṭṭati;
छसु वत्तब्बमेवत्थि, किन्नु नामिध तं सिया॥
Chasu vattabbamevatthi, kinnu nāmidha taṃ siyā.
२२७४.
2274.
तीणि गन्त्वा च तेनेव, पच्चागन्तुं न वट्टति।
Tīṇi gantvā ca teneva, paccāgantuṃ na vaṭṭati;
अञ्ञेन पन मग्गेन, पच्छागच्छति वट्टति॥
Aññena pana maggena, pacchāgacchati vaṭṭati.
२२७५.
2275.
अनापत्तन्तरायस्मिं, तस्सा दसविधे सति।
Anāpattantarāyasmiṃ, tassā dasavidhe sati;
आपदासु गिलानाय, अलाभे दुतियाय वा॥
Āpadāsu gilānāya, alābhe dutiyāya vā.
२२७६.
2276.
राजचोरमनुस्सग्गि-तोयवाळसरीसपा।
Rājacoramanussaggi-toyavāḷasarīsapā;
मनुस्सजीवितब्रह्म-चरियस्सन्तरायिका॥
Manussajīvitabrahma-cariyassantarāyikā.
२२७७.
2277.
समुट्ठानादिना तुल्यं, पठमन्तिमवत्थुना।
Samuṭṭhānādinā tulyaṃ, paṭhamantimavatthunā;
अयमेव विसेसो हि, अक्रियं दुक्खवेदनं॥
Ayameva viseso hi, akriyaṃ dukkhavedanaṃ.
दसमं।
Dasamaṃ.
तुवट्टवग्गो चतुत्थो।
Tuvaṭṭavaggo catuttho.
२२७८.
2278.
राजागारं चित्तागारं, आरामं कीळुय्यानं वा।
Rājāgāraṃ cittāgāraṃ, ārāmaṃ kīḷuyyānaṃ vā;
कीळावापिं नानाकारं, दट्ठुं गच्छन्तिनं तानि॥
Kīḷāvāpiṃ nānākāraṃ, daṭṭhuṃ gacchantinaṃ tāni.
२२७९.
2279.
निद्दिट्ठं मुनिना तासं, दुक्कटं तु पदे पदे।
Niddiṭṭhaṃ muninā tāsaṃ, dukkaṭaṃ tu pade pade;
पदं अनुद्धरित्वाव, सचे पस्सन्ति पञ्चपि॥
Padaṃ anuddharitvāva, sace passanti pañcapi.
२२८०.
2280.
एकायेव पनापत्ति, पाचित्ति परिदीपिता।
Ekāyeva panāpatti, pācitti paridīpitā;
गन्त्वा पस्सन्ति चे तं तं, पाटेक्कापत्तियो सियुं॥
Gantvā passanti ce taṃ taṃ, pāṭekkāpattiyo siyuṃ.
२२८१.
2281.
पयोगबहुतायापि, पाचित्तिबहुता सिया।
Payogabahutāyāpi, pācittibahutā siyā;
भिक्खुस्स पन सब्बत्थ, होति आपत्ति दुक्कटं॥
Bhikkhussa pana sabbattha, hoti āpatti dukkaṭaṃ.
२२८२.
2282.
अवसेसो अनापत्ति-कथामग्गविनिच्छयो।
Avaseso anāpatti-kathāmaggavinicchayo;
नच्चदस्सनतुल्योव, समुट्ठानादिना सह॥
Naccadassanatulyova, samuṭṭhānādinā saha.
पठमं।
Paṭhamaṃ.
२२८३.
2283.
आसन्दिं वा पल्लङ्कं वा, माणनातीतं वाळूपेतं।
Āsandiṃ vā pallaṅkaṃ vā, māṇanātītaṃ vāḷūpetaṃ;
सेवन्तीनं यासं तासं, पाचित्तापत्तिं सत्थाह॥
Sevantīnaṃ yāsaṃ tāsaṃ, pācittāpattiṃ satthāha.
२२८४.
2284.
निसीदनस्सापि निपज्जनस्स।
Nisīdanassāpi nipajjanassa;
पयोगबाहुल्लवसेन होति।
Payogabāhullavasena hoti;
इच्चेवमच्चन्तयसेन वुत्ता।
Iccevamaccantayasena vuttā;
पाचित्तियानं गणना पनेवं॥
Pācittiyānaṃ gaṇanā panevaṃ.
२२८५.
2285.
पादे आसन्दिया छेत्वा, भित्वा पल्लङ्कवाळके।
Pāde āsandiyā chetvā, bhitvā pallaṅkavāḷake;
अनापत्ति समुट्ठान-मनन्तरसमं मतं॥
Anāpatti samuṭṭhāna-manantarasamaṃ mataṃ.
दुतियं।
Dutiyaṃ.
२२८६.
2286.
छन्नं अञ्ञतरं सुत्तं, यदि कन्तति भिक्खुनी।
Channaṃ aññataraṃ suttaṃ, yadi kantati bhikkhunī;
यत्तकं अञ्छितं हत्था, तस्मिं तक्कम्हि वेठिते॥
Yattakaṃ añchitaṃ hatthā, tasmiṃ takkamhi veṭhite.
२२८७.
2287.
एका पाचित्ति निद्दिट्ठा, सुत्तकन्तनतो पन।
Ekā pācitti niddiṭṭhā, suttakantanato pana;
सब्बपुब्बपयोगेसु, दुक्कटं हत्थवारतो॥
Sabbapubbapayogesu, dukkaṭaṃ hatthavārato.
२२८८.
2288.
न दोसो कन्तितं सुत्तं, पुन कन्तन्तिया पन।
Na doso kantitaṃ suttaṃ, puna kantantiyā pana;
इदं एळकलोमेन, समुट्ठानादिना समं॥
Idaṃ eḷakalomena, samuṭṭhānādinā samaṃ.
ततियं।
Tatiyaṃ.
२२८९.
2289.
कोट्टनं तण्डुलानं तु, आदिं कत्वान दुक्कटं।
Koṭṭanaṃ taṇḍulānaṃ tu, ādiṃ katvāna dukkaṭaṃ;
सब्बपुब्बपयोगेसु, वेय्यावच्चं करोन्तिया॥
Sabbapubbapayogesu, veyyāvaccaṃ karontiyā.
२२९०.
2290.
भाजनानि गणेत्वाव, पाचित्ति यागुआदिसु।
Bhājanāni gaṇetvāva, pācitti yāguādisu;
खज्जकादीसु रूपानं, गणनाय हि दीपये॥
Khajjakādīsu rūpānaṃ, gaṇanāya hi dīpaye.
२२९१.
2291.
सचे मातापितूनम्पि, आगतानं पनत्तनो।
Sace mātāpitūnampi, āgatānaṃ panattano;
किञ्चि कम्मं अकारेत्वा, किञ्चि कातुं न वट्टति॥
Kiñci kammaṃ akāretvā, kiñci kātuṃ na vaṭṭati.
२२९२.
2292.
सङ्घस्स यागुपाने वा, सङ्घभत्तेपि वा तथा।
Saṅghassa yāgupāne vā, saṅghabhattepi vā tathā;
चेतियस्स च पूजाय, वेय्यावच्चकरस्स वा॥
Cetiyassa ca pūjāya, veyyāvaccakarassa vā.
२२९३.
2293.
अत्तनो च अनापत्ति, तथा उम्मत्तिकाय वा।
Attano ca anāpatti, tathā ummattikāya vā;
समुट्ठानादयो सब्बे, ततियेन समा मता॥
Samuṭṭhānādayo sabbe, tatiyena samā matā.
चतुत्थं।
Catutthaṃ.
२२९४.
2294.
पाचित्ति धुरनिक्खेपे, यथा चीवरसिब्बने।
Pācitti dhuranikkhepe, yathā cīvarasibbane;
तथा इध पनेकाहं, परिहारो न लब्भति॥
Tathā idha panekāhaṃ, parihāro na labbhati.
२२९५.
2295.
सेसं वुत्तनयेनेव, तत्थ चीवरसिब्बने।
Sesaṃ vuttanayeneva, tattha cīvarasibbane;
समुट्ठानादिना सद्धिं, वेदितब्बं विभाविना।
Samuṭṭhānādinā saddhiṃ, veditabbaṃ vibhāvinā;
पञ्चमं।
Pañcamaṃ.
२२९६.
2296.
कायेन कायबद्धेन, तथा निस्सग्गियेन वा।
Kāyena kāyabaddhena, tathā nissaggiyena vā;
गिहीनं पन यं किञ्चि, दन्तपोनोदकं विना॥
Gihīnaṃ pana yaṃ kiñci, dantaponodakaṃ vinā.
२२९७.
2297.
अज्झोहरणियं अञ्ञं, अञ्ञेसं तु ददाति या।
Ajjhoharaṇiyaṃ aññaṃ, aññesaṃ tu dadāti yā;
होति पाचित्तियं तस्सा, ठपेत्वा सहधम्मिके॥
Hoti pācittiyaṃ tassā, ṭhapetvā sahadhammike.
२२९८.
2298.
दन्तकट्ठोदके वुत्तं, दुक्कटं मुनिना इध।
Dantakaṭṭhodake vuttaṃ, dukkaṭaṃ muninā idha;
या न देति च दापेति, निक्खमित्वापि देन्तिया॥
Yā na deti ca dāpeti, nikkhamitvāpi dentiyā.
२२९९.
2299.
देति बाहिरलेपं वा, न दोसुम्मत्तिकाय वा।
Deti bāhiralepaṃ vā, na dosummattikāya vā;
समुट्ठानादयो सब्बे, ततियेन समा मता॥
Samuṭṭhānādayo sabbe, tatiyena samā matā.
छट्ठं।
Chaṭṭhaṃ.
२३००.
2300.
अदत्वा परिभुञ्जेय्य, या चावसथचीवरं।
Adatvā paribhuñjeyya, yā cāvasathacīvaraṃ;
दिवसे तु चतुत्थे तं, धोवित्वा पुन चीवरं॥
Divase tu catutthe taṃ, dhovitvā puna cīvaraṃ.
२३०१.
2301.
सामणेराय वा अन्त-मसो उतुनिया सचे।
Sāmaṇerāya vā anta-maso utuniyā sace;
तस्सा पाचित्तियं वुत्तं, तिकपाचित्तियं सिया॥
Tassā pācittiyaṃ vuttaṃ, tikapācittiyaṃ siyā.
२३०२.
2302.
तस्सा निस्सज्जिते तस्मिं, वुत्तं तु द्विकदुक्कटं।
Tassā nissajjite tasmiṃ, vuttaṃ tu dvikadukkaṭaṃ;
उतुनीनं अभावे तु, अञ्ञासं पुन परियये॥
Utunīnaṃ abhāve tu, aññāsaṃ puna pariyaye.
२३०३.
2303.
अच्छिन्नचीवरादीन-मनापत्तापदासुपि।
Acchinnacīvarādīna-manāpattāpadāsupi;
समुट्ठानादयो सब्बे, कथिनेन समा मता॥
Samuṭṭhānādayo sabbe, kathinena samā matā.
सत्तमं।
Sattamaṃ.
२३०४.
2304.
अदत्वा रक्खणत्थाय, विहारं सकवाटकं।
Adatvā rakkhaṇatthāya, vihāraṃ sakavāṭakaṃ;
होति पाचित्तियं तस्सा, चारिकं पक्कमन्तिया॥
Hoti pācittiyaṃ tassā, cārikaṃ pakkamantiyā.
२३०५.
2305.
अत्तनो गामतो अञ्ञं, गामं गच्छन्तिया पन।
Attano gāmato aññaṃ, gāmaṃ gacchantiyā pana;
परिक्खित्तविहारस्स, परिक्खेपम्पि वा तथा॥
Parikkhittavihārassa, parikkhepampi vā tathā.
२३०६.
2306.
इतरस्सुपचारं वा, पठमेन पदेन तं।
Itarassupacāraṃ vā, paṭhamena padena taṃ;
दुक्कटं समतिक्कन्ते, पाचित्ति दुतियेन तु॥
Dukkaṭaṃ samatikkante, pācitti dutiyena tu.
२३०७.
2307.
अकवाटबन्धनस्मिं, दुक्कटं परिदीपितं।
Akavāṭabandhanasmiṃ, dukkaṭaṃ paridīpitaṃ;
अन्तराये अनापत्ति, जग्गिकं अलभन्तिया॥
Antarāye anāpatti, jaggikaṃ alabhantiyā.
२३०८.
2308.
आपदासु गिलानाय, तथा उम्मत्तिकाय वा।
Āpadāsu gilānāya, tathā ummattikāya vā;
समुट्ठानादयो सब्बे, कथिनेन समा मता॥
Samuṭṭhānādayo sabbe, kathinena samā matā.
अट्ठमं।
Aṭṭhamaṃ.
२३०९.
2309.
हत्थिअस्सरथादीहि, संयुत्तं सिप्पमेव वा।
Hatthiassarathādīhi, saṃyuttaṃ sippameva vā;
परूपघातकं मन्ता-गदयोगप्पभेदकं॥
Parūpaghātakaṃ mantā-gadayogappabhedakaṃ.
२३१०.
2310.
परियापुणेय्य चे किञ्चि, यस्स कस्सचि सन्तिके।
Pariyāpuṇeyya ce kiñci, yassa kassaci santike;
होति पाचित्तियं तस्सा, पदादीनं वसेनिध॥
Hoti pācittiyaṃ tassā, padādīnaṃ vasenidha.
२३११.
2311.
लेखे पन अनापत्ति, धारणाय च गुत्तिया।
Lekhe pana anāpatti, dhāraṇāya ca guttiyā;
परित्तेसु च सब्बेसु, तथा उम्मत्तिकाय वा॥
Parittesu ca sabbesu, tathā ummattikāya vā.
नवमं।
Navamaṃ.
२३१२.
2312.
दसमे नत्थि वत्तब्बं, नवमेन समं इदं।
Dasame natthi vattabbaṃ, navamena samaṃ idaṃ;
समुट्ठानादयो द्विन्नं, पदसोधम्मसादिसा॥
Samuṭṭhānādayo dvinnaṃ, padasodhammasādisā.
दसमं।
Dasamaṃ.
चित्तागारवग्गो पञ्चमो।
Cittāgāravaggo pañcamo.
२३१३.
2313.
सभिक्खुकं पनारामं, जानित्वा पविसन्तिया।
Sabhikkhukaṃ panārāmaṃ, jānitvā pavisantiyā;
अनापुच्छाव यं किञ्चि, पाचित्ति परियापुता॥
Anāpucchāva yaṃ kiñci, pācitti pariyāputā.
२३१४.
2314.
सचे अन्तमसो रुक्ख-मूलस्सपि च भिक्खुनी।
Sace antamaso rukkha-mūlassapi ca bhikkhunī;
अनापुच्छा परिक्खेपं, अतिक्कामेति या पन॥
Anāpucchā parikkhepaṃ, atikkāmeti yā pana.
२३१५.
2315.
उपचारोक्कमे वापि, अपरिक्खित्तकस्स तु।
Upacārokkame vāpi, aparikkhittakassa tu;
दुक्कटं पठमे पादे, पाचित्ति दुतिये सिया॥
Dukkaṭaṃ paṭhame pāde, pācitti dutiye siyā.
२३१६.
2316.
अभिक्खुके सभिक्खूति, सञ्ञाय पनुभोसुपि।
Abhikkhuke sabhikkhūti, saññāya panubhosupi;
जातकङ्खाय वा तस्सा, होति आपत्ति दुक्कटं॥
Jātakaṅkhāya vā tassā, hoti āpatti dukkaṭaṃ.
२३१७.
2317.
पठमं पविसन्तीनं, तासं सीसानुलोकिका।
Paṭhamaṃ pavisantīnaṃ, tāsaṃ sīsānulokikā;
ता सन्निपतिता यत्थ, तासं गच्छति सन्तिकं॥
Tā sannipatitā yattha, tāsaṃ gacchati santikaṃ.
२३१८.
2318.
सन्तं भिक्खुं पनापुच्छा, मग्गो वाराममज्झतो।
Santaṃ bhikkhuṃ panāpucchā, maggo vārāmamajjhato;
तेन गच्छन्तिया वापि, आपदासु विसन्तिया॥
Tena gacchantiyā vāpi, āpadāsu visantiyā.
२३१९.
2319.
तथा उम्मत्तिकादीन-मनापत्ति पकासिता।
Tathā ummattikādīna-manāpatti pakāsitā;
धुरनिक्खेपतुल्याव, समुट्ठानादयो नया॥
Dhuranikkhepatulyāva, samuṭṭhānādayo nayā.
पठमं।
Paṭhamaṃ.
२३२०.
2320.
अक्कोसेय्य च या भिक्खुं, परिभासेय्य वा पन।
Akkoseyya ca yā bhikkhuṃ, paribhāseyya vā pana;
तिकपाचित्तियं तस्सा, सेसे च तिकदुक्कटं॥
Tikapācittiyaṃ tassā, sese ca tikadukkaṭaṃ.
२३२१.
2321.
पुरक्खत्वा वदन्तीन-।
Purakkhatvā vadantīna-;
मत्थधम्मानुसासनिं।
Matthadhammānusāsaniṃ;
न दोसोमसवादेन।
Na dosomasavādena;
तुल्यो सेसनयो मतो॥
Tulyo sesanayo mato.
दुतियं।
Dutiyaṃ.
२३२२.
2322.
या सङ्घं परिभासेय्य, तस्सा पाचित्तियं सिया।
Yā saṅghaṃ paribhāseyya, tassā pācittiyaṃ siyā;
एकं सम्बहुला वापि, तथेव इतराय वा॥
Ekaṃ sambahulā vāpi, tatheva itarāya vā.
२३२३.
2323.
परिभासन्तिया तस्सा, दुक्कटं परिदीपितं।
Paribhāsantiyā tassā, dukkaṭaṃ paridīpitaṃ;
सेसं अनन्तरेनेव, समुट्ठानादिना समं॥
Sesaṃ anantareneva, samuṭṭhānādinā samaṃ.
ततियं।
Tatiyaṃ.
२३२४.
2324.
निमन्तितापि वा सचे, पवारितापि वा पन।
Nimantitāpi vā sace, pavāritāpi vā pana;
निमन्तनपवारणा, उभोपि वुत्तलक्खणा॥
Nimantanapavāraṇā, ubhopi vuttalakkhaṇā.
२३२५.
2325.
पुरेभत्तं तु यागुञ्च, ठपेत्वा कालिकत्तयं।
Purebhattaṃ tu yāguñca, ṭhapetvā kālikattayaṃ;
या चज्झोहरणत्थाय, यं किञ्चि पन आमिसं॥
Yā cajjhoharaṇatthāya, yaṃ kiñci pana āmisaṃ.
२३२६.
2326.
पटिग्गण्हाति चे तस्सा, गहणे दुक्कटं सिया।
Paṭiggaṇhāti ce tassā, gahaṇe dukkaṭaṃ siyā;
अज्झोहारवसेनेत्थ, पाचित्ति परिदीपिता॥
Ajjhohāravasenettha, pācitti paridīpitā.
२३२७.
2327.
कालिकानि च तीणेव, आहारत्थाय गण्हति।
Kālikāni ca tīṇeva, āhāratthāya gaṇhati;
गहणे दुक्कटं वुत्तं, तथा अज्झोहरन्तिया॥
Gahaṇe dukkaṭaṃ vuttaṃ, tathā ajjhoharantiyā.
२३२८.
2328.
निमन्तिता या पन अप्पवारिता।
Nimantitā yā pana appavāritā;
सचेपि यागुं पिवतीध वट्टति।
Sacepi yāguṃ pivatīdha vaṭṭati;
तथा कथेत्वा पुन सामिकस्स वा।
Tathā kathetvā puna sāmikassa vā;
सचेपि सा भुञ्जति अञ्ञभोजनं॥
Sacepi sā bhuñjati aññabhojanaṃ.
२३२९.
2329.
कालिकानि च तीणेव, पच्चये सति भुञ्जति।
Kālikāni ca tīṇeva, paccaye sati bhuñjati;
तथा उम्मत्तिकादीनं, अनापत्ति पकासिता॥
Tathā ummattikādīnaṃ, anāpatti pakāsitā.
२३३०.
2330.
समुट्ठानमिदं तुल्यं, अद्धानेन क्रियाक्रियं।
Samuṭṭhānamidaṃ tulyaṃ, addhānena kriyākriyaṃ;
निमन्तिता अनापुच्छा, सामिं भुञ्जति चे पन॥
Nimantitā anāpucchā, sāmiṃ bhuñjati ce pana.
२३३१.
2331.
कप्पियं पन कारेत्वा, अकारेत्वापि वा यदि।
Kappiyaṃ pana kāretvā, akāretvāpi vā yadi;
परिभुञ्जति या तस्सा, पाचित्ति क्रियतो सिया॥
Paribhuñjati yā tassā, pācitti kriyato siyā.
चतुत्थं।
Catutthaṃ.
२३३२.
2332.
भिक्खुनीनं अवण्णं वा, पाचित्ति कुलसन्तिके।
Bhikkhunīnaṃ avaṇṇaṃ vā, pācitti kulasantike;
कुलस्सावण्णनं वापि, भिक्खुनीनं वदन्तिया॥
Kulassāvaṇṇanaṃ vāpi, bhikkhunīnaṃ vadantiyā.
२३३३.
2333.
सन्तं भासन्तिया दोसं, न दोसुम्मत्तिकाय वा।
Santaṃ bhāsantiyā dosaṃ, na dosummattikāya vā;
ओमसवादतुल्याव, समुट्ठानादयो नया॥
Omasavādatulyāva, samuṭṭhānādayo nayā.
पञ्चमं।
Pañcamaṃ.
२३३४.
2334.
अद्धयोजनतो ओरे, भिक्खु ओवाददायको।
Addhayojanato ore, bhikkhu ovādadāyako;
न वसति सचे मग्गो, अखेमो वा सचे सिया॥
Na vasati sace maggo, akhemo vā sace siyā.
२३३५.
2335.
अयं अभिक्खुको नाम, आवासो पन तत्थ हि।
Ayaṃ abhikkhuko nāma, āvāso pana tattha hi;
उपगच्छन्तिया वस्सं, आपत्ति अरुणुग्गमे॥
Upagacchantiyā vassaṃ, āpatti aruṇuggame.
२३३६.
2336.
पक्कन्ता पक्खसङ्कन्ता, विब्भन्ता वा मतापि वा।
Pakkantā pakkhasaṅkantā, vibbhantā vā matāpi vā;
वस्सं उपगता भिक्खू, अनापत्तापदासुपि॥
Vassaṃ upagatā bhikkhū, anāpattāpadāsupi.
२३३७.
2337.
सेसो ञेय्यो कथामग्गो।
Seso ñeyyo kathāmaggo;
भिक्खुनोवादको पन।
Bhikkhunovādako pana;
इदं एळकलोमेन।
Idaṃ eḷakalomena;
समुट्ठानादिना समं॥
Samuṭṭhānādinā samaṃ.
छट्ठं।
Chaṭṭhaṃ.
२३३८.
2338.
या भिक्खुनुभतोसङ्घे, वस्संवुट्ठा ततो पुन।
Yā bhikkhunubhatosaṅghe, vassaṃvuṭṭhā tato puna;
‘‘नाहं पवारेस्सामी’’ति, सा निक्खिपति चे धुरं॥
‘‘Nāhaṃ pavāressāmī’’ti, sā nikkhipati ce dhuraṃ.
२३३९.
2339.
धुरे निक्खित्तमत्तस्मिं, तस्सा पाचित्तियं सिया।
Dhure nikkhittamattasmiṃ, tassā pācittiyaṃ siyā;
सति वा अन्तरायस्मिं, गिलानायापदासुपि॥
Sati vā antarāyasmiṃ, gilānāyāpadāsupi.
२३४०.
2340.
परियेसित्वापि वा भिक्खुं, न दोसो अलभन्तिया।
Pariyesitvāpi vā bhikkhuṃ, na doso alabhantiyā;
इदं तु धुरनिक्खेप-समुट्ठानमुदीरितं॥
Idaṃ tu dhuranikkhepa-samuṭṭhānamudīritaṃ.
सत्तमं।
Sattamaṃ.
२३४१.
2341.
‘‘ओवादादीनमत्थाय, न गच्छिस्साम्यह’’न्ति हि।
‘‘Ovādādīnamatthāya, na gacchissāmyaha’’nti hi;
धुरे निक्खित्तमत्तस्मिं, पाचित्ति परिदीपये॥
Dhure nikkhittamattasmiṃ, pācitti paridīpaye.
२३४२.
2342.
सदिसं तु समुट्ठानं, पठमन्तिमवत्थुना।
Sadisaṃ tu samuṭṭhānaṃ, paṭhamantimavatthunā;
अक्रियं लोकवज्जञ्च, कायिकं दुक्खवेदनं॥
Akriyaṃ lokavajjañca, kāyikaṃ dukkhavedanaṃ.
अट्ठमं।
Aṭṭhamaṃ.
२३४३.
2343.
‘‘न याचिस्सामि ओवादं, न पुच्छिस्सामुपोसथं’’।
‘‘Na yācissāmi ovādaṃ, na pucchissāmuposathaṃ’’;
इच्चेवं पन निक्खित्ते, धुरे पाचित्तियं सिया॥
Iccevaṃ pana nikkhitte, dhure pācittiyaṃ siyā.
२३४४.
2344.
सति वा अन्तरायस्मिं, गिलानायापदासु वा।
Sati vā antarāyasmiṃ, gilānāyāpadāsu vā;
न दोसो परियेसित्वा, दुतियं अलभन्तिया॥
Na doso pariyesitvā, dutiyaṃ alabhantiyā.
२३४५.
2345.
अट्ठमेपि अनापत्ति, एवमेव पकासिता।
Aṭṭhamepi anāpatti, evameva pakāsitā;
इदं तु धुरनिक्खेप-समुट्ठानमुदीरितं॥
Idaṃ tu dhuranikkhepa-samuṭṭhānamudīritaṃ.
नवमं।
Navamaṃ.
२३४६.
2346.
पसाखे पन सञ्जातं, गण्डं रुचितमेव वा।
Pasākhe pana sañjātaṃ, gaṇḍaṃ rucitameva vā;
अनापुच्छाव सङ्घं वा, गणं एकेन एकिका॥
Anāpucchāva saṅghaṃ vā, gaṇaṃ ekena ekikā.
२३४७.
2347.
‘‘भिन्द फालेहि धोवा’’ति, सब्बानेवाणापेन्तिया।
‘‘Bhinda phālehi dhovā’’ti, sabbānevāṇāpentiyā;
कतेसु दुक्कटानिच्छ, तस्सा पाचित्तियो छ च॥
Katesu dukkaṭāniccha, tassā pācittiyo cha ca.
२३४८.
2348.
‘‘यमेत्थ अत्थि कातब्बं, तं सब्बं त्वं करोहि’’ति।
‘‘Yamettha atthi kātabbaṃ, taṃ sabbaṃ tvaṃ karohi’’ti;
आणापेति सचे एवं, सो च सब्बं करोति चे॥
Āṇāpeti sace evaṃ, so ca sabbaṃ karoti ce.
२३४९.
2349.
एकाय पन वाचाय, दुक्कटानि पनच्छ च।
Ekāya pana vācāya, dukkaṭāni panaccha ca;
तस्सा पाचित्तियच्छक्कं, द्वादसापत्तियो सियुं॥
Tassā pācittiyacchakkaṃ, dvādasāpattiyo siyuṃ.
२३५०.
2350.
भेदनादीसु एकं सा, आणापेति सचे पन।
Bhedanādīsu ekaṃ sā, āṇāpeti sace pana;
सो करोति च सब्बानि, एकं पाचित्तियं सिया॥
So karoti ca sabbāni, ekaṃ pācittiyaṃ siyā.
२३५१.
2351.
आपुच्छित्वापि वा विञ्ञुं, गहेत्वा दुतियम्पि वा।
Āpucchitvāpi vā viññuṃ, gahetvā dutiyampi vā;
भेदनादीनि सब्बानि, कारापेति सचे पन॥
Bhedanādīni sabbāni, kārāpeti sace pana.
२३५२.
2352.
तस्सा उम्मत्तिकादीन-मनापत्ति पकासिता।
Tassā ummattikādīna-manāpatti pakāsitā;
समुट्ठानादयो सब्बे, कथिनेन समा मता॥
Samuṭṭhānādayo sabbe, kathinena samā matā.
दसमं।
Dasamaṃ.
आरामवग्गो छट्ठो।
Ārāmavaggo chaṭṭho.
२३५३.
2353.
गणंपरियेसनादिस्मिं, गब्भिनिं वुट्ठपेन्तिया।
Gaṇaṃpariyesanādismiṃ, gabbhiniṃ vuṭṭhapentiyā;
ञत्तिया कम्मवाचाहि, उपज्झायाय दुक्कटं॥
Ñattiyā kammavācāhi, upajjhāyāya dukkaṭaṃ.
२३५४.
2354.
कम्मवाचाय ओसाने, पाचित्ति परियापुता।
Kammavācāya osāne, pācitti pariyāputā;
तथा गब्भिनिसञ्ञाय, न च गब्भिनिया पन॥
Tathā gabbhinisaññāya, na ca gabbhiniyā pana.
२३५५.
2355.
उभो सञ्जातकङ्खाय, होति आपत्ति दुक्कटं।
Ubho sañjātakaṅkhāya, hoti āpatti dukkaṭaṃ;
तथाचरिनिया तस्सा, गणस्सापि च दीपितं॥
Tathācariniyā tassā, gaṇassāpi ca dīpitaṃ.
२३५६.
2356.
द्वीस्वगब्भिनिसञ्ञाय, न दोसुम्मत्तिकाय वा।
Dvīsvagabbhinisaññāya, na dosummattikāya vā;
अदिन्नादानतुल्याव, समुट्ठानादयो नया॥
Adinnādānatulyāva, samuṭṭhānādayo nayā.
पठमं।
Paṭhamaṃ.
२३५७.
2357.
दुतिये नत्थि वत्तब्बं, पठमेन समं मतं।
Dutiye natthi vattabbaṃ, paṭhamena samaṃ mataṃ;
समुट्ठानादिना सद्धिं, नत्थि काचि विसेसता॥
Samuṭṭhānādinā saddhiṃ, natthi kāci visesatā.
दुतियं।
Dutiyaṃ.
२३५८.
2358.
छस्वसिक्खितसिक्खं तु, सिक्खमानञ्हि भिक्खुनी।
Chasvasikkhitasikkhaṃ tu, sikkhamānañhi bhikkhunī;
द्वे वस्सानि सियापत्ति, वुट्ठापेय्य सचे पन॥
Dve vassāni siyāpatti, vuṭṭhāpeyya sace pana.
२३५९.
2359.
तिकपाचित्तियं वुत्तं, धम्मकम्मे तु सत्थुना।
Tikapācittiyaṃ vuttaṃ, dhammakamme tu satthunā;
अधम्मे पन कम्मस्मिं, दीपितं तिकदुक्कटं॥
Adhamme pana kammasmiṃ, dīpitaṃ tikadukkaṭaṃ.
२३६०.
2360.
छसु सिक्खितसिक्खं या, द्वे वस्सानि अखण्डतो।
Chasu sikkhitasikkhaṃ yā, dve vassāni akhaṇḍato;
वुट्ठापेति अनापत्ति, तथा उम्मत्तिकाय वा॥
Vuṭṭhāpeti anāpatti, tathā ummattikāya vā.
२३६१.
2361.
इमा हि छ च सिक्खायो, सट्ठिवस्सापि चे पन।
Imā hi cha ca sikkhāyo, saṭṭhivassāpi ce pana;
पब्बज्जाय पदातब्बा, अदत्वा न च कारये॥
Pabbajjāya padātabbā, adatvā na ca kāraye.
ततियं।
Tatiyaṃ.
२३६२.
2362.
चतुत्थे नत्थि वत्तब्बं, इध सङ्घेन सम्मतं।
Catutthe natthi vattabbaṃ, idha saṅghena sammataṃ;
सिक्खमानमनापत्ति, होति तं वुट्ठपेन्तिया॥
Sikkhamānamanāpatti, hoti taṃ vuṭṭhapentiyā.
२३६३.
2363.
अदिन्ना पठमं होति, सचे वुट्ठानसम्मुति।
Adinnā paṭhamaṃ hoti, sace vuṭṭhānasammuti;
तत्थापि च पदातब्बा, उपसम्पदमाळके॥
Tatthāpi ca padātabbā, upasampadamāḷake.
२३६४.
2364.
ततियञ्च चतुत्थञ्च, समुट्ठानादिना पन।
Tatiyañca catutthañca, samuṭṭhānādinā pana;
पठमेन समं ञेय्यं, चतुत्थं तु क्रियाक्रियं॥
Paṭhamena samaṃ ñeyyaṃ, catutthaṃ tu kriyākriyaṃ.
चतुत्थं।
Catutthaṃ.
२३६५.
2365.
ऊनद्वादसवस्सं तु, कञ्चि गिहिगतं पन।
Ūnadvādasavassaṃ tu, kañci gihigataṃ pana;
परिपुण्णाति सञ्ञाय, न दोसो वुट्ठपेन्तिया॥
Paripuṇṇāti saññāya, na doso vuṭṭhapentiyā.
२३६६.
2366.
होति वानुपसम्पन्ना, उपसम्पादितापि सा।
Hoti vānupasampannā, upasampāditāpi sā;
असेसेन च सेसं तु, पठमेन समं मतं॥
Asesena ca sesaṃ tu, paṭhamena samaṃ mataṃ.
पञ्चमं।
Pañcamaṃ.
२३६७.
2367.
छट्ठं तु ततिये वुत्त-नयेनेव विभावये।
Chaṭṭhaṃ tu tatiye vutta-nayeneva vibhāvaye;
सत्तमम्पि तथा सब्बं, चतुत्थेन समं मतं॥
Sattamampi tathā sabbaṃ, catutthena samaṃ mataṃ.
छट्ठसत्तमानि।
Chaṭṭhasattamāni.
२३६८.
2368.
यं तुवट्टकवग्गस्मिं, दुक्खितं सहजीविनिं।
Yaṃ tuvaṭṭakavaggasmiṃ, dukkhitaṃ sahajīviniṃ;
वुत्तं तेन समं ञेय्यं, अट्ठमं न विसेसता॥
Vuttaṃ tena samaṃ ñeyyaṃ, aṭṭhamaṃ na visesatā.
अट्ठमं।
Aṭṭhamaṃ.
२३६९.
2369.
द्वे वस्सानि च या काचि, वुट्ठापितपवत्तिनिं।
Dve vassāni ca yā kāci, vuṭṭhāpitapavattiniṃ;
नानुबन्धेय्य चे तस्सा, पाचित्ति परियापुता॥
Nānubandheyya ce tassā, pācitti pariyāputā.
२३७०.
2370.
‘‘द्वे वस्सानि अहं नानु-बन्धिस्सामी’’ति चे पन।
‘‘Dve vassāni ahaṃ nānu-bandhissāmī’’ti ce pana;
धुरे निक्खित्तमत्तस्मिं, तस्सा पाचित्तियं सिया॥
Dhure nikkhittamattasmiṃ, tassā pācittiyaṃ siyā.
२३७१.
2371.
तञ्च बालमलज्जिं वा, गिलानायापदासु वा।
Tañca bālamalajjiṃ vā, gilānāyāpadāsu vā;
नानुबन्धन्तिया तस्सा, न दोसुम्मत्तिकाय वा॥
Nānubandhantiyā tassā, na dosummattikāya vā.
२३७२.
2372.
समुट्ठानादयो तुल्या, पठमन्तिमवत्थुना।
Samuṭṭhānādayo tulyā, paṭhamantimavatthunā;
इदं पनाक्रियं वुत्तं, वेदना दुक्खवेदना॥
Idaṃ panākriyaṃ vuttaṃ, vedanā dukkhavedanā.
नवमं।
Navamaṃ.
२३७३.
2373.
वुट्ठापेत्वा तु या काचि, भिक्खुनी सहजीविनिं।
Vuṭṭhāpetvā tu yā kāci, bhikkhunī sahajīviniṃ;
तं गहेत्वा न गच्छेय्य, न चञ्ञं आणापेय्य चे॥
Taṃ gahetvā na gaccheyya, na caññaṃ āṇāpeyya ce.
२३७४.
2374.
धुरे निक्खित्तमत्तस्मिं, तस्सा पाचित्तियं सिया।
Dhure nikkhittamattasmiṃ, tassā pācittiyaṃ siyā;
सति वा अन्तरायस्मिं, दुतियं अलभन्तिया॥
Sati vā antarāyasmiṃ, dutiyaṃ alabhantiyā.
२३७५.
2375.
आपदासु गिलानाय, तथा उम्मत्तिकाय वा।
Āpadāsu gilānāya, tathā ummattikāya vā;
न दोसो धुरनिक्खेप-समुट्ठानमिदं पन॥
Na doso dhuranikkhepa-samuṭṭhānamidaṃ pana.
दसमं।
Dasamaṃ.
गब्भिनिवग्गो सत्तमो।
Gabbhinivaggo sattamo.
२३७६.
2376.
कुमारिभूतवग्गस्स, पठमादीनि तीणिपि।
Kumāribhūtavaggassa, paṭhamādīni tīṇipi;
गिहिगतेहि तीहेव, सदिसानीति निद्दिसे॥
Gihigatehi tīheva, sadisānīti niddise.
२३७७.
2377.
या महूपपदा द्वे तु, सिक्खमाना पनादितो।
Yā mahūpapadā dve tu, sikkhamānā panādito;
‘‘गता वीसतिवस्सा’’ति, विञ्ञातब्बा विभाविना॥
‘‘Gatā vīsativassā’’ti, viññātabbā vibhāvinā.
२३७८.
2378.
सचे गिहिगता होन्ति, न च वा पुरिसं गता।
Sace gihigatā honti, na ca vā purisaṃ gatā;
‘‘सिक्खमाना’’ति वत्तब्बा, ता हि सम्मुतिआदिसु॥
‘‘Sikkhamānā’’ti vattabbā, tā hi sammutiādisu.
२३७९.
2379.
न ता ‘‘कुमारिभूता’’ति, तथा ‘‘गिहिगता’’ति वा।
Na tā ‘‘kumāribhūtā’’ti, tathā ‘‘gihigatā’’ti vā;
वत्तब्बा पनुभोपेता, एवं वत्तुं न वट्टति॥
Vattabbā panubhopetā, evaṃ vattuṃ na vaṭṭati.
२३८०.
2380.
सम्मुतिं दसवस्साय, दत्वा द्वादसवस्सिका।
Sammutiṃ dasavassāya, datvā dvādasavassikā;
कत्तब्बा उपसम्पन्ना, सेसासुपि अयं नयो॥
Kattabbā upasampannā, sesāsupi ayaṃ nayo.
२३८१.
2381.
या अट्ठारसवस्सा तु, ततो पट्ठाय सा पन।
Yā aṭṭhārasavassā tu, tato paṭṭhāya sā pana;
वुत्ता ‘‘कुमारिभूता’’ति, तथा ‘‘गिहिगता’’तिपि॥
Vuttā ‘‘kumāribhūtā’’ti, tathā ‘‘gihigatā’’tipi.
२३८२.
2382.
वुत्ता ‘‘कुमारिभूता’’ति, सामणेरी हि या पन।
Vuttā ‘‘kumāribhūtā’’ti, sāmaṇerī hi yā pana;
‘‘कुमारिभूता’’ इच्चेव, वत्तब्बा न पनञ्ञथा॥
‘‘Kumāribhūtā’’ icceva, vattabbā na panaññathā.
२३८३.
2383.
एता तु पन तिस्सोपि, सिक्खासम्मुतिदानतो।
Etā tu pana tissopi, sikkhāsammutidānato;
‘‘सिक्खमाना’’ति वत्तुम्पि, वट्टतेव न संसयो॥
‘‘Sikkhamānā’’ti vattumpi, vaṭṭateva na saṃsayo.
ततियं।
Tatiyaṃ.
२३८४.
2384.
ऊनद्वादसवस्साव, वुट्ठापेति सचे परं।
Ūnadvādasavassāva, vuṭṭhāpeti sace paraṃ;
हुत्वा सयमुपज्झाया, सिक्खमानं तु भिक्खुनी॥
Hutvā sayamupajjhāyā, sikkhamānaṃ tu bhikkhunī.
२३८५.
2385.
पुब्बे वुत्तनयेनेव, दुक्कटानमनन्तरं।
Pubbe vuttanayeneva, dukkaṭānamanantaraṃ;
कम्मवाचानमोसाने, तस्सा पाचित्ति दीपिता॥
Kammavācānamosāne, tassā pācitti dīpitā.
चतुत्थं।
Catutthaṃ.
२३८६.
2386.
पञ्चमे नत्थि वत्तब्बं, चतुत्थं पञ्चमम्पि च।
Pañcame natthi vattabbaṃ, catutthaṃ pañcamampi ca;
उभयं तिसमुट्ठानं, पञ्चमं तु क्रियाक्रियं॥
Ubhayaṃ tisamuṭṭhānaṃ, pañcamaṃ tu kriyākriyaṃ.
पञ्चमं।
Pañcamaṃ.
२३८७.
2387.
सङ्घेनुपपरिक्खित्वा, ‘‘अलं तावा’’ति वारिता।
Saṅghenupaparikkhitvā, ‘‘alaṃ tāvā’’ti vāritā;
उपसम्पादितेनेत्थ, पच्छा खीयति दोसता॥
Upasampāditenettha, pacchā khīyati dosatā.
२३८८.
2388.
उज्झायति सचे छन्द-दोसादीहि करोन्तिया।
Ujjhāyati sace chanda-dosādīhi karontiyā;
न दोसो तिसमुट्ठानं, सचित्तं दुक्खवेदनं॥
Na doso tisamuṭṭhānaṃ, sacittaṃ dukkhavedanaṃ.
छट्ठं।
Chaṭṭhaṃ.
२३८९.
2389.
लद्धे च चीवरे पच्छा, असन्ते अन्तरायिके।
Laddhe ca cīvare pacchā, asante antarāyike;
‘‘वुट्ठापेस्सामि नाह’’न्ति, धुरनिक्खेपने पन॥
‘‘Vuṭṭhāpessāmi nāha’’nti, dhuranikkhepane pana.
२३९०.
2390.
होति पाचित्तियं तस्सा, गिलानायापदासुपि।
Hoti pācittiyaṃ tassā, gilānāyāpadāsupi;
न दोसो परियेसित्वा, परिसं अलभन्तिया॥
Na doso pariyesitvā, parisaṃ alabhantiyā.
२३९१.
2391.
इदञ्हि धुरनिक्खेप-समुट्ठानं सचित्तकं।
Idañhi dhuranikkhepa-samuṭṭhānaṃ sacittakaṃ;
अक्रियं लोकवज्जञ्च, होतिदं दुक्खवेदनं॥
Akriyaṃ lokavajjañca, hotidaṃ dukkhavedanaṃ.
सत्तमं।
Sattamaṃ.
२३९२.
2392.
अट्ठमं सत्तमेनेव, सदिसं पन सब्बथा।
Aṭṭhamaṃ sattameneva, sadisaṃ pana sabbathā;
नवमेपि च वत्तब्बं, नत्थि उत्तानमेविदं॥
Navamepi ca vattabbaṃ, natthi uttānamevidaṃ.
२३९३.
2393.
नत्थाजानन्तिया दोसो, तथा उम्मत्तिकाय वा।
Natthājānantiyā doso, tathā ummattikāya vā;
अदिन्नादानतुल्याव, समुट्ठानादयो नया॥
Adinnādānatulyāva, samuṭṭhānādayo nayā.
अट्ठमनवमानि।
Aṭṭhamanavamāni.
२३९४.
2394.
मातरा पितरा वाथ, नानुञ्ञातं तु सामिना।
Mātarā pitarā vātha, nānuññātaṃ tu sāminā;
तस्सा पाचित्तियापत्ति, तं वुट्ठापेन्तिया सिया॥
Tassā pācittiyāpatti, taṃ vuṭṭhāpentiyā siyā.
२३९५.
2395.
उपसम्पदकालस्मिं, तथा पब्बाजनक्खणे।
Upasampadakālasmiṃ, tathā pabbājanakkhaṇe;
द्विक्खत्तुं पुच्छितब्बं तु, भिक्खुनीहि, न भिक्खुना॥
Dvikkhattuṃ pucchitabbaṃ tu, bhikkhunīhi, na bhikkhunā.
२३९६.
2396.
अनापत्ति न जानाति, मातुआदीनमत्थितं।
Anāpatti na jānāti, mātuādīnamatthitaṃ;
इदं चतुसमुट्ठानं, वाचतो कायवाचतो॥
Idaṃ catusamuṭṭhānaṃ, vācato kāyavācato.
२३९७.
2397.
वाचामानसतो चेव, कायवाचादितोपि च।
Vācāmānasato ceva, kāyavācāditopi ca;
क्रियाक्रियमचित्तञ्च, तिचित्तञ्च तिवेदनं॥
Kriyākriyamacittañca, ticittañca tivedanaṃ.
दसमं।
Dasamaṃ.
२३९८.
2398.
या पारिवासिकेनेत्थ, छन्ददानेन भिक्खुनी।
Yā pārivāsikenettha, chandadānena bhikkhunī;
वुट्ठापेति सचे सिक्ख-मानं पाचित्तियं सिया॥
Vuṭṭhāpeti sace sikkha-mānaṃ pācittiyaṃ siyā.
२३९९.
2399.
अवुट्ठितायनापत्ति, परिसायाविहाय वा।
Avuṭṭhitāyanāpatti, parisāyāvihāya vā;
छन्दं तु तिसमुट्ठानं, तिचित्तञ्च तिवेदनं॥
Chandaṃ tu tisamuṭṭhānaṃ, ticittañca tivedanaṃ.
एकादसमं।
Ekādasamaṃ.
२४००.
2400.
द्वादसे तेरसे वापि, वत्तब्बं नत्थि किञ्चिपि।
Dvādase terase vāpi, vattabbaṃ natthi kiñcipi;
समुट्ठानादयो सब्बे, अनन्तरसमा मता॥
Samuṭṭhānādayo sabbe, anantarasamā matā.
द्वादसमतेरसमानि।
Dvādasamaterasamāni.
कुमारीभूतवग्गो अट्ठमो।
Kumārībhūtavaggo aṭṭhamo.
२४०१.
2401.
समणी अगिलाना या, धारेय्य छत्तुपाहनं।
Samaṇī agilānā yā, dhāreyya chattupāhanaṃ;
तस्सा पाचित्तियापत्ति, होतीति परियापुता॥
Tassā pācittiyāpatti, hotīti pariyāputā.
२४०२.
2402.
सचे एकपयोगेन, मग्गस्स गमने पन।
Sace ekapayogena, maggassa gamane pana;
दिवसम्पि च धारेति, एकं पाचित्तियं सिया॥
Divasampi ca dhāreti, ekaṃ pācittiyaṃ siyā.
२४०३.
2403.
कद्दमादीनि पस्सित्वा, ओमुञ्चित्वा उपाहना।
Kaddamādīni passitvā, omuñcitvā upāhanā;
छत्तमेव च धारेन्ती, यदि गच्छति दुक्कटं॥
Chattameva ca dhārentī, yadi gacchati dukkaṭaṃ.
२४०४.
2404.
सचे उपाहनारुळ्हा, दिस्वा गच्छादिकं पन।
Sace upāhanāruḷhā, disvā gacchādikaṃ pana;
तं छत्तमपनामेत्वा, दुक्कटं होति गच्छति॥
Taṃ chattamapanāmetvā, dukkaṭaṃ hoti gacchati.
२४०५.
2405.
छत्तम्पि अपनामेत्वा, ओमुञ्चित्वा उपाहना।
Chattampi apanāmetvā, omuñcitvā upāhanā;
पुन धारेन्तिया तस्सा, होति पाचित्तियं पन॥
Puna dhārentiyā tassā, hoti pācittiyaṃ pana.
२४०६.
2406.
पयोगगणनायेव , पाचित्तिगणना सिया।
Payogagaṇanāyeva , pācittigaṇanā siyā;
तिकपाचित्तियं वुत्तं, तथेव द्विकदुक्कटं॥
Tikapācittiyaṃ vuttaṃ, tatheva dvikadukkaṭaṃ.
२४०७.
2407.
आरामे उपचारे वा, दोसो नत्थापदासुपि।
Ārāme upacāre vā, doso natthāpadāsupi;
इदं एळकलोमेन, समुट्ठानादिना समं॥
Idaṃ eḷakalomena, samuṭṭhānādinā samaṃ.
पठमं।
Paṭhamaṃ.
२४०८.
2408.
होति भिक्खुनिया याना, ओरोहित्वा पुनप्पुनं।
Hoti bhikkhuniyā yānā, orohitvā punappunaṃ;
अभिरूहन्तियापत्ति, पयोगगणनावसा॥
Abhirūhantiyāpatti, payogagaṇanāvasā.
२४०९.
2409.
आपदासु अनापत्ति, तथा उम्मत्तिकाय वा।
Āpadāsu anāpatti, tathā ummattikāya vā;
सेसं अनन्तरेनेव, समुट्ठानादिना समं॥
Sesaṃ anantareneva, samuṭṭhānādinā samaṃ.
दुतियं।
Dutiyaṃ.
२४१०.
2410.
या च धारेय्य सङ्घाणिं, यं किञ्चिपि कटूपियं।
Yā ca dhāreyya saṅghāṇiṃ, yaṃ kiñcipi kaṭūpiyaṃ;
तस्सा पाचित्तियापत्ति, होतीति परियापुता॥
Tassā pācittiyāpatti, hotīti pariyāputā.
२४११.
2411.
धारेन्तिया पनेत्थापि, ओमुञ्चित्वा पुनप्पुनं।
Dhārentiyā panetthāpi, omuñcitvā punappunaṃ;
पयोगगणनायेव, तस्सा पाचित्तियो सियुं॥
Payogagaṇanāyeva, tassā pācittiyo siyuṃ.
२४१२.
2412.
आबाधपच्चया या तु, धारेति कटिसुत्तकं।
Ābādhapaccayā yā tu, dhāreti kaṭisuttakaṃ;
तथा उम्मत्तिकादीन-मनापत्ति पकासिता॥
Tathā ummattikādīna-manāpatti pakāsitā.
२४१३.
2413.
सेसं तु पठमेनेव, सदिसन्ति पकासितं।
Sesaṃ tu paṭhameneva, sadisanti pakāsitaṃ;
इध चाकुसलं चित्तं, लोकवज्जं विसेसता॥
Idha cākusalaṃ cittaṃ, lokavajjaṃ visesatā.
ततियं।
Tatiyaṃ.
२४१४.
2414.
धारेति पन यं किञ्चि, सचे सीसूपगादिसु।
Dhāreti pana yaṃ kiñci, sace sīsūpagādisu;
तस्सा तस्स च वत्थुस्स, गणनापत्तियो सियुं॥
Tassā tassa ca vatthussa, gaṇanāpattiyo siyuṃ.
२४१५.
2415.
आबाधपच्चया दोसो, किञ्चि धारेन्तिया न च।
Ābādhapaccayā doso, kiñci dhārentiyā na ca;
सेसं अनन्तरेनेव, सदिसं परिदीपितं॥
Sesaṃ anantareneva, sadisaṃ paridīpitaṃ.
चतुत्थं।
Catutthaṃ.
२४१६.
2416.
येन केनचि गन्धेन, सवण्णावण्णकेन च।
Yena kenaci gandhena, savaṇṇāvaṇṇakena ca;
न्हासन्तिया पनापत्ति, न्हानोसाने पकासिता॥
Nhāsantiyā panāpatti, nhānosāne pakāsitā.
२४१७.
2417.
गन्धयोजनतो सब्ब-पयोगे दुक्कटं सिया।
Gandhayojanato sabba-payoge dukkaṭaṃ siyā;
आबाधपच्चया दोसो, नत्थि उम्मत्तिकाय वा॥
Ābādhapaccayā doso, natthi ummattikāya vā.
२४१८.
2418.
सेसं तु ततियेनेव, सदिसं सब्बथा मतं।
Sesaṃ tu tatiyeneva, sadisaṃ sabbathā mataṃ;
छट्ठम्पि ततियेनेव, सदिसन्ति पकासितं॥
Chaṭṭhampi tatiyeneva, sadisanti pakāsitaṃ.
पञ्चमछट्ठानि।
Pañcamachaṭṭhāni.
२४१९.
2419.
उब्बट्टापेय्य चञ्ञाय, सम्बाहापेय्य वा तथा।
Ubbaṭṭāpeyya caññāya, sambāhāpeyya vā tathā;
होति भिक्खुनियापत्ति, सचे भिक्खुनिया पन॥
Hoti bhikkhuniyāpatti, sace bhikkhuniyā pana.
२४२०.
2420.
एत्थ हत्थममोचेत्वा, एका उब्बट्टने सिया।
Ettha hatthamamocetvā, ekā ubbaṭṭane siyā;
मोचेत्वा पन मोचेत्वा, पयोगगणना सिया॥
Mocetvā pana mocetvā, payogagaṇanā siyā.
२४२१.
2421.
सम्बाहनेपि एसेव, नयो ञेय्यो विभाविना।
Sambāhanepi eseva, nayo ñeyyo vibhāvinā;
आपदासु गिलानाय, अनापत्ति पकासिता॥
Āpadāsu gilānāya, anāpatti pakāsitā.
२४२२.
2422.
सेसं तु ततियेनेव, समुट्ठानादिना समं।
Sesaṃ tu tatiyeneva, samuṭṭhānādinā samaṃ;
सत्तमेन समानाव, अट्ठमादीनि तीणिपि॥
Sattamena samānāva, aṭṭhamādīni tīṇipi.
सत्तमट्ठमनवमदसमानि।
Sattamaṭṭhamanavamadasamāni.
२४२३.
2423.
या अन्तोउपचारस्मिं, भिक्खुस्स पुरतो पन।
Yā antoupacārasmiṃ, bhikkhussa purato pana;
अनापुच्छा निसीदेय्य, छमायपि न वट्टति॥
Anāpucchā nisīdeyya, chamāyapi na vaṭṭati.
२४२४.
2424.
तिकपाचित्तियं वुत्तं, पुच्छिते दुक्कटद्वयं।
Tikapācittiyaṃ vuttaṃ, pucchite dukkaṭadvayaṃ;
आपदासु गिलानाय, न दोसुम्मत्तिकाय वा॥
Āpadāsu gilānāya, na dosummattikāya vā.
२४२५.
2425.
इदं पन समुट्ठानं, कथिनेन समं मतं।
Idaṃ pana samuṭṭhānaṃ, kathinena samaṃ mataṃ;
क्रियाक्रियमचित्तञ्च, तिचित्तञ्च तिवेदनं॥
Kriyākriyamacittañca, ticittañca tivedanaṃ.
एकादसमं।
Ekādasamaṃ.
२४२६.
2426.
अनोकासकतं भिक्खुं, पञ्हं पुच्छेय्य दोसता।
Anokāsakataṃ bhikkhuṃ, pañhaṃ puccheyya dosatā;
विनये च कतोकासं, सुत्तं पुच्छन्तियापि च॥
Vinaye ca katokāsaṃ, suttaṃ pucchantiyāpi ca.
२४२७.
2427.
कारेत्वा पन ओकासं, अनोदिस्सापि पुच्छति।
Kāretvā pana okāsaṃ, anodissāpi pucchati;
न दोसो पदसोधम्म-समुट्ठानमिदं पन॥
Na doso padasodhamma-samuṭṭhānamidaṃ pana.
द्वादसमं।
Dvādasamaṃ.
२४२८.
2428.
संकच्चिकं विना गामं, पदसा पविसन्तिया।
Saṃkaccikaṃ vinā gāmaṃ, padasā pavisantiyā;
परिक्खित्तस्स गामस्स, परिक्खेपोक्कमे पन॥
Parikkhittassa gāmassa, parikkhepokkame pana.
२४२९.
2429.
दुक्कटं पठमे पादे, पाचित्ति दुतिये सिया।
Dukkaṭaṃ paṭhame pāde, pācitti dutiye siyā;
उपचारोक्कमेपेत्थ, एसेव च नयो मतो॥
Upacārokkamepettha, eseva ca nayo mato.
२४३०.
2430.
यस्सा संकच्चिकं नट्ठं, अच्छिन्नं वापि केनचि।
Yassā saṃkaccikaṃ naṭṭhaṃ, acchinnaṃ vāpi kenaci;
अनापत्ति सिया तस्सा, गिलानायापदासुपि॥
Anāpatti siyā tassā, gilānāyāpadāsupi.
२४३१.
2431.
इदमेळकलोमेन, समुट्ठानादिना समं।
Idameḷakalomena, samuṭṭhānādinā samaṃ;
सेसं वुत्तनयेनेव, विञ्ञातब्बं विभाविना॥
Sesaṃ vuttanayeneva, viññātabbaṃ vibhāvinā.
तेरसमं।
Terasamaṃ.
छत्तुपाहनवग्गो नवमो।
Chattupāhanavaggo navamo.
इति विनयविनिच्छये पाचित्तियकथा निट्ठिता।
Iti vinayavinicchaye pācittiyakathā niṭṭhitā.
