Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā

    பாசித்தியகதா²வண்ணனா

    Pācittiyakathāvaṇṇanā

    2129-30. ஏவங் திங்ஸ நிஸ்ஸக்³கி³யபாசித்தியானி த³ஸ்ஸெத்வா இதா³னி ஸுத்³த⁴பாசித்தியானி த³ஸ்ஸேதுமாஹ ‘‘லஸுண’’ந்திஆதி³. லஸுணந்தி எத்த² இதி-ஸத்³தோ³ லுத்தனித்³தி³ட்டோ². ‘‘லஸுணங்’’இதி ப⁴ண்டி³கங் வுத்தங் அட்ட²கதா²யங் (பாசி॰ அட்ட²॰ 793-795). சதுபஞ்சமிஞ்ஜாதி³ப்பபே⁴த³ங் ப⁴ண்டி³கங் லஸுணங் நாம, ந ததோ ஊனங். தேனாஹ ‘‘ந ஏகத்³விதிமிஞ்ஜக’’ந்தி. பக்கலஸுணதோ, ஸீஹளதீ³பஸம்ப⁴வதோ ச விஸேஸமாஹ ‘‘ஆமகங் மாக³த⁴ங்யேவா’’தி. மக³தே⁴ஸு ஜாதங் மாக³த⁴ங், ‘‘வுத்த’’ந்தி இமினா ஸம்ப³ந்தோ⁴. யதா²ஹ ‘‘மக³த⁴ரட்டே² ஜாதலஸுணமேவ ஹி இத⁴ லஸுணந்தி அதி⁴ப்பேத’’ந்தி (பாசி॰ அட்ட²॰ 795). தங் ‘‘கா²தி³ஸ்ஸாமீ’’தி க³ண்ஹதீதி ஸம்ப³ந்தோ⁴. வுத்தப்பகாரங் பாசித்தியஞ்ச அஜ்ஜோ²ஹாரவஸேனாதி த³ஸ்ஸேதுமாஹ ‘‘அஜ்ஜோ²ஹாரவஸேனேவ, பாசித்திங் பரிதீ³பயே’’தி.

    2129-30. Evaṃ tiṃsa nissaggiyapācittiyāni dassetvā idāni suddhapācittiyāni dassetumāha ‘‘lasuṇa’’ntiādi. Lasuṇanti ettha iti-saddo luttaniddiṭṭho. ‘‘Lasuṇaṃ’’iti bhaṇḍikaṃ vuttaṃ aṭṭhakathāyaṃ (pāci. aṭṭha. 793-795). Catupañcamiñjādippabhedaṃ bhaṇḍikaṃ lasuṇaṃ nāma, na tato ūnaṃ. Tenāha ‘‘na ekadvitimiñjaka’’nti. Pakkalasuṇato, sīhaḷadīpasambhavato ca visesamāha ‘‘āmakaṃ māgadhaṃyevā’’ti. Magadhesu jātaṃ māgadhaṃ, ‘‘vutta’’nti iminā sambandho. Yathāha ‘‘magadharaṭṭhe jātalasuṇameva hi idha lasuṇanti adhippeta’’nti (pāci. aṭṭha. 795). Taṃ ‘‘khādissāmī’’ti gaṇhatīti sambandho. Vuttappakāraṃ pācittiyañca ajjhohāravasenāti dassetumāha ‘‘ajjhohāravaseneva, pācittiṃ paridīpaye’’ti.

    2131. ததே³வ வக்க²தி ‘‘த்³வே தயோ’’திஆதி³னா. ஸத்³தி⁴ந்தி ஏகதோ. ஸங்கா²தி³த்வாதி க³லபி³லங் அப்பவேஸெத்வா த³ந்தேஹி ஸங்சுண்ணியந்தீ கா²தி³த்வா. அஜ்ஜோ²ஹரதி பரக³லங் கரோதி.

    2131. Tadeva vakkhati ‘‘dve tayo’’tiādinā. Saddhinti ekato. Saṅkhāditvāti galabilaṃ appavesetvā dantehi saṃcuṇṇiyantī khāditvā. Ajjhoharati paragalaṃ karoti.

    2132. தத்தா²தி தஸ்மிங் ப⁴ண்டி³கலஸுணே. ‘‘மிஞ்ஜானங் க³ணனாயா’’தி இமினா அஜ்ஜோ²ஹாரபயோக³க³ணனாயேவ தீ³பிதா. யதா²ஹ ‘‘பி⁴ந்தி³த்வா ஏகேகங் மிஞ்ஜங் கா²த³ந்தியா பன பயோக³க³ணனாய பாசித்தியானீ’’தி (பாசி॰ அட்ட²॰ 795).

    2132.Tatthāti tasmiṃ bhaṇḍikalasuṇe. ‘‘Miñjānaṃ gaṇanāyā’’ti iminā ajjhohārapayogagaṇanāyeva dīpitā. Yathāha ‘‘bhinditvā ekekaṃ miñjaṃ khādantiyā pana payogagaṇanāya pācittiyānī’’ti (pāci. aṭṭha. 795).

    2133. ஸபா⁴வதோ வட்டந்தேவாதி யோஜனா.

    2133. Sabhāvato vaṭṭantevāti yojanā.

    2135. யதா²வுத்தபலண்டு³காதீ³னங் நானத்தங் த³ஸ்ஸேதுமாஹ ‘‘ஏகா மிஞ்ஜா’’திஆதி³. இத⁴ மிஞ்ஜானங் வஸேனேவ நானத்தங் த³ஸ்ஸிதங். அட்ட²கதா²யங் பன வண்ணவஸேனாபி. யதா²ஹ ‘‘பலண்டு³கோ பண்டு³வண்ணோ ஹோதி. ப⁴ஞ்ஜனகோ லோஹிதவண்ணோ. ஹரிதகோ ஹரிதபண்ணவண்ணோ’’தி (பாசி॰ அட்ட²॰ 797).

    2135. Yathāvuttapalaṇḍukādīnaṃ nānattaṃ dassetumāha ‘‘ekā miñjā’’tiādi. Idha miñjānaṃ vaseneva nānattaṃ dassitaṃ. Aṭṭhakathāyaṃ pana vaṇṇavasenāpi. Yathāha ‘‘palaṇḍuko paṇḍuvaṇṇo hoti. Bhañjanako lohitavaṇṇo. Haritako haritapaṇṇavaṇṇo’’ti (pāci. aṭṭha. 797).

    2136. ‘‘ஸாளவே உத்தரிப⁴ங்க³கே’’தி பத³ச்சே²தோ³. ‘‘ப³த³ரஸாளவாதீ³ஸூ’’தி (பாசி॰ அட்ட²॰ 797) அட்ட²கதா²வசனதோ எத்த² ப³த³ர-ஸத்³தோ³ ஸேஸோ. ப³த³ரஸாளவங் நாம ப³த³ரப²லானி ஸுக்கா²பெத்வா சுண்ணெத்வா காதப்³பா³ கா²த³னீயவிகதி. உம்மத்திகாதீ³னந்தி எத்த² ஆதி³-ஸத்³தே³ன ஆதி³கம்மிகா க³ஹிதா. யதா²ஹ ‘‘உம்மத்திகாய ஆதி³கம்மிகாயா’’தி (பாசி॰ 797).

    2136. ‘‘Sāḷave uttaribhaṅgake’’ti padacchedo. ‘‘Badarasāḷavādīsū’’ti (pāci. aṭṭha. 797) aṭṭhakathāvacanato ettha badara-saddo seso. Badarasāḷavaṃ nāma badaraphalāni sukkhāpetvā cuṇṇetvā kātabbā khādanīyavikati. Ummattikādīnanti ettha ādi-saddena ādikammikā gahitā. Yathāha ‘‘ummattikāya ādikammikāyā’’ti (pāci. 797).

    பட²மங்.

    Paṭhamaṃ.

    2137. ஸம்பா³தே⁴தி படிச்ச²ன்னோகாஸே. தஸ்ஸ விபா⁴க³ங் த³ஸ்ஸேதுமாஹ ‘‘உபகச்சே²ஸு முத்தஸ்ஸ கரணேபி வா’’தி.

    2137.Sambādheti paṭicchannokāse. Tassa vibhāgaṃ dassetumāha ‘‘upakacchesu muttassa karaṇepi vā’’ti.

    2138. அஸ்ஸா ததா² பாசித்தீதி ஸம்ப³ந்தோ⁴. ‘‘ந லோமக³ணனாயா’’தி இமினா ‘‘பயோக³க³ணனாயா’’தி இத³மேவ ஸமத்த²யதி.

    2138. Assā tathā pācittīti sambandho. ‘‘Na lomagaṇanāyā’’ti iminā ‘‘payogagaṇanāyā’’ti idameva samatthayati.

    2139. ஆபா³தே⁴தி கண்டு³ஆதி³கே ரோகே³. யதா²ஹ – ‘‘ஆபா³த⁴பச்சயாதி கண்டு³கச்சு²ஆதி³ஆபா³த⁴பச்சயா’’தி (பாசி॰ அட்ட²॰ 801). மக்³க³ஸங்விதா⁴னஸமா மதாதி பி⁴க்கு²னியா ஸங்விதா⁴ய ஏகத்³தா⁴னஸிக்கா²பதே³ன ஸதி³ஸா மதா ஞாதாதி அத்தோ².

    2139.Ābādheti kaṇḍuādike roge. Yathāha – ‘‘ābādhapaccayāti kaṇḍukacchuādiābādhapaccayā’’ti (pāci. aṭṭha. 801). Maggasaṃvidhānasamā matāti bhikkhuniyā saṃvidhāya ekaddhānasikkhāpadena sadisā matā ñātāti attho.

    து³தியங்.

    Dutiyaṃ.

    2140. பது³மஸ்ஸ வா புண்ட³ரீகஸ்ஸ வா அந்தமஸோ கேஸரேனாபி காமராகே³ன முத்தகரணஸ்ஸ தலகா⁴தனே முத்தகரணம்பி பஹாரதா³னே பாசித்தி ஹோதீதி யோஜனா. கேஸரேனாபீதி அபி-ஸத்³தே³ன மஹாபது³மபண்ணேஹி வத்தப்³ப³மேவ நத்தீ²தி தீ³பேதி. யதா²ஹ – ‘‘அந்தமஸோ உப்பலபத்தேனாபீதி எத்த² பத்தங் தாவ மஹந்தங், கேஸரேனாபி பஹாரங் தெ³ந்தியா ஆபத்தியேவா’’தி (பாசி॰ அட்ட²॰ 803).

    2140. Padumassa vā puṇḍarīkassa vā antamaso kesarenāpi kāmarāgena muttakaraṇassa talaghātane muttakaraṇampi pahāradāne pācitti hotīti yojanā. Kesarenāpīti api-saddena mahāpadumapaṇṇehi vattabbameva natthīti dīpeti. Yathāha – ‘‘antamaso uppalapattenāpīti ettha pattaṃ tāva mahantaṃ, kesarenāpi pahāraṃ dentiyā āpattiyevā’’ti (pāci. aṭṭha. 803).

    2141. தத்தா²தி தஸ்மிங் முத்தகரணதலே.

    2141.Tatthāti tasmiṃ muttakaraṇatale.

    ததியங்.

    Tatiyaṃ.

    2142. யா பன பி⁴க்கு²னீ காமராக³பரேதா காமராகே³ன பீளிதா அத்தனோ ப்³யஞ்ஜனே முத்தபதே² உப்பலபத்தம்பி பவேஸேதி, ந வட்டதி பாசித்தி ஹோதீதி யோஜனா. பி-ஸத்³தே³ன ‘‘கேஸரமத்தம்பி பன பவேஸெந்தியா ஆபத்தியேவா’’தி (பாசி॰ அட்ட²॰ 812) அட்ட²கதா² உல்லிங்கி³தா.

    2142. Yā pana bhikkhunī kāmarāgaparetā kāmarāgena pīḷitā attano byañjane muttapathe uppalapattampi paveseti, na vaṭṭati pācitti hotīti yojanā. Pi-saddena ‘‘kesaramattampi pana pavesentiyā āpattiyevā’’ti (pāci. aṭṭha. 812) aṭṭhakathā ulliṅgitā.

    2143-4. யத்³யேவங் ‘‘ஜதுமட்ட²கே பாசித்திய’’ந்தி கஸ்மா வுத்தந்தி ஆஹ ‘‘இத³ங்…பே॰… ஜதுமட்ட²க’’ந்தி. இத³ங் ஜதுமட்ட²கங் வத்து²வஸேனேவ வுத்தந்தி ‘‘அத² கோ² ஸா பி⁴க்கு²னீ ஜதுமட்ட²கங் ஆதி³யித்வா தோ⁴விதுங் விஸ்ஸரித்வா ஏகமந்தங் ச²ட்³டே³ஸி. பி⁴க்கு²னியோ மக்கி²காஹி ஸம்பரிகிண்ணங் பஸ்ஸித்வா ஏவமாஹங்ஸு ‘கஸ்ஸித³ங் கம்ம’ந்தி. ஸா ஏவமாஹ ‘மய்ஹித³ங் கம்ம’ந்தி. யா தா பி⁴க்கு²னியோ அப்பிச்சா², தா உஜ்ஜா²யந்தி கி²ய்யந்தி விபாசெந்தி ‘கத²ஞ்ஹி நாம பி⁴க்கு²னீ ஜதுமட்ட²கங் ஆதி³யிஸ்ஸதீ’’தி (பாசி॰ 806) ஆக³தவத்து²வஸேனேவ வுத்தங், ந தங் வினா அஞ்ஞஸ்ஸ வட்டகஸ்ஸ ஸம்ப⁴வதோதி அதி⁴ப்பாயோ. ஜதுமட்ட²கங் நாம ஜதுனா கதோ மட்ட²த³ண்ட³கோ.

    2143-4. Yadyevaṃ ‘‘jatumaṭṭhake pācittiya’’nti kasmā vuttanti āha ‘‘idaṃ…pe… jatumaṭṭhaka’’nti. Idaṃ jatumaṭṭhakaṃ vatthuvaseneva vuttanti ‘‘atha kho sā bhikkhunī jatumaṭṭhakaṃ ādiyitvā dhovituṃ vissaritvā ekamantaṃ chaḍḍesi. Bhikkhuniyo makkhikāhi samparikiṇṇaṃ passitvā evamāhaṃsu ‘kassidaṃ kamma’nti. Sā evamāha ‘mayhidaṃ kamma’nti. Yā tā bhikkhuniyo appicchā, tā ujjhāyanti khiyyanti vipācenti ‘kathañhi nāma bhikkhunī jatumaṭṭhakaṃ ādiyissatī’’ti (pāci. 806) āgatavatthuvaseneva vuttaṃ, na taṃ vinā aññassa vaṭṭakassa sambhavatoti adhippāyo. Jatumaṭṭhakaṃ nāma jatunā kato maṭṭhadaṇḍako.

    த³ண்ட³ந்தி எத்த² ‘‘யங் கிஞ்சீ’’தி ஸேஸோ. யதா²ஹ ‘‘அந்தமஸோ உப்பலபத்தம்பி முத்தகரணங் பவேஸேதீ’’தி (பாசி॰ 808). ஏதம்பி ச அதிமஹந்தங், கேஸரமத்தம்பி பன பவேஸெந்தியா ஆபத்தி ஏவ. ஏளாலுகந்தி கக்காரிப²லங் வா. தஸ்மிந்தி அத்தனோ முத்தகரணே.

    Daṇḍanti ettha ‘‘yaṃ kiñcī’’ti seso. Yathāha ‘‘antamaso uppalapattampi muttakaraṇaṃ pavesetī’’ti (pāci. 808). Etampi ca atimahantaṃ, kesaramattampi pana pavesentiyā āpatti eva. Eḷālukanti kakkāriphalaṃ vā. Tasminti attano muttakaraṇe.

    2145. ஆபா³த⁴பச்சயாதி முத்தகரணப்பதே³ஸே ஜாதவணாதி³ம்ஹி வணட்டா²னநிருபனாதி³பச்சயா.

    2145.Ābādhapaccayāti muttakaraṇappadese jātavaṇādimhi vaṇaṭṭhānanirupanādipaccayā.

    சதுத்த²ங்.

    Catutthaṃ.

    2146. அக்³க³பப்³ப³த்³வயாதி⁴கந்தி அக்³க³பப்³ப³த்³வயதோ கேஸக்³க³மத்தம்பி அதி⁴கங். யதா²ஹ ‘‘அந்தமஸோ கேஸக்³க³மத்தம்பி அதிக்காமேதி, ஆபத்தி பாசித்தியஸ்ஸா’’தி (பாசி॰ 812). த³கஸுத்³தி⁴ங் கரொந்தியாதி முத்தகரணட்டா²னே தோ⁴வனங் கரொந்தியா. யதா²ஹ ‘‘உத³கஸுத்³தி⁴கங் நாம முத்தகரணஸ்ஸ தோ⁴வனா வுச்சதீ’’தி (பாசி॰ 812).

    2146.Aggapabbadvayādhikanti aggapabbadvayato kesaggamattampi adhikaṃ. Yathāha ‘‘antamaso kesaggamattampi atikkāmeti, āpatti pācittiyassā’’ti (pāci. 812). Dakasuddhiṃ karontiyāti muttakaraṇaṭṭhāne dhovanaṃ karontiyā. Yathāha ‘‘udakasuddhikaṃ nāma muttakaraṇassa dhovanā vuccatī’’ti (pāci. 812).

    2147. ‘‘தீணீ’’தி இமினா ஏகங்கு³லியா பப்³ப³த்³வயஸ்ஸ பவேஸெத்வா தோ⁴வனே தோ³ஸாபா⁴வங் தீ³பேதி. தீ³க⁴தோதி அங்கு³லியா தீ³க⁴தோ. தீணி பப்³பா³னி க³ம்பீ⁴ரதோ முத்தகரணே பவேஸெத்வா உத³கஸுத்³தி⁴ங் ஆதி³யந்தியா பாசித்தியங் ப⁴வேதி யோஜனா.

    2147.‘‘Tīṇī’’ti iminā ekaṅguliyā pabbadvayassa pavesetvā dhovane dosābhāvaṃ dīpeti. Dīghatoti aṅguliyā dīghato. Tīṇi pabbāni gambhīrato muttakaraṇe pavesetvā udakasuddhiṃ ādiyantiyā pācittiyaṃ bhaveti yojanā.

    2148. திஸ்ஸோ, சதஸ்ஸோ வா அங்கு³லியோ ஏகதோ கத்வா வித்தா²ரேன பவேஸனே ஏகபப்³பே³பி பவிட்டே² ‘‘த்³வங்கு³லபப்³ப³பரம’’ந்தி நியமிதப்பமாணாதிக்கமதோ ஆஹ ‘‘ஏகபப்³ப³ம்பி யா பனா’’தி. யா பன பி⁴க்கு²னீ சதுன்னங் வாபி அங்கு³லீனங் திஸ்ஸன்னங் வாபி அங்கு³லீனங் ஏகபப்³ப³ம்பி வித்தா²ரதோ பவேஸேதி, தஸ்ஸா பாசித்தியங் ஸியாதி யோஜனா.

    2148. Tisso, catasso vā aṅguliyo ekato katvā vitthārena pavesane ekapabbepi paviṭṭhe ‘‘dvaṅgulapabbaparama’’nti niyamitappamāṇātikkamato āha ‘‘ekapabbampi yā panā’’ti. Yā pana bhikkhunī catunnaṃ vāpi aṅgulīnaṃ tissannaṃ vāpi aṅgulīnaṃ ekapabbampi vitthārato paveseti, tassā pācittiyaṃ siyāti yojanā.

    2149. இதீதி ஏவங். ஸப்³ப³ப்பகாரேனாதி க³ம்பீ⁴ரபவேஸனாதி³னா ஸப்³பே³ன பகாரேன. அபி⁴ப்³யத்ததரங் கத்வாதி ஸுபாகடதரங் கத்வா. அயமத்தோ²தி ‘‘ஏகிஸ்ஸங்கு³லியா தீணீ’’திஆதி³னா வுத்தோ அயமத்தோ².

    2149.Itīti evaṃ. Sabbappakārenāti gambhīrapavesanādinā sabbena pakārena. Abhibyattataraṃ katvāti supākaṭataraṃ katvā. Ayamatthoti ‘‘ekissaṅguliyā tīṇī’’tiādinā vutto ayamattho.

    2150. த்³வங்கு³லபப்³பே³ தோ³ஸோ நத்தீ²தி யோஜனா. உத³கஸுத்³தி⁴பச்சயே பன ஸதிபி ப²ஸ்ஸஸாதி³யனே யதா²வுத்தபரிச்சே²தே³ அனாபத்தி. அதி⁴கம்பீதி த்³வங்கு³லபப்³ப³தோ அதி⁴கம்பி. உத³கஸுத்³தி⁴ங் கரொந்தியா தோ³ஸோ நத்தீ²தி யோஜனா.

    2150. Dvaṅgulapabbe doso natthīti yojanā. Udakasuddhipaccaye pana satipi phassasādiyane yathāvuttaparicchede anāpatti. Adhikampīti dvaṅgulapabbato adhikampi. Udakasuddhiṃ karontiyā doso natthīti yojanā.

    2151. ததா² உத³கஸுத்³தி⁴ங் கரொந்தீனங் உம்மத்திகாதீ³னங் அனாபத்தி பகாஸிதாதி யோஜனா.

    2151. Tathā udakasuddhiṃ karontīnaṃ ummattikādīnaṃ anāpatti pakāsitāti yojanā.

    பஞ்சமங்.

    Pañcamaṃ.

    2152. பு⁴ஞ்ஜதோ பன பி⁴க்கு²ஸ்ஸாதி பஞ்சன்னங் போ⁴ஜனானங் அஞ்ஞதரங் பு⁴ஞ்ஜதோ பி⁴க்கு²ஸ்ஸ. யதா²ஹ ‘‘பு⁴ஞ்ஜந்தஸ்ஸாதி பஞ்சன்னங் போ⁴ஜனானங் அஞ்ஞதரங் போ⁴ஜனங் பு⁴ஞ்ஜந்தஸ்ஸா’’தி (பாசி॰ 817). பானீயங் வா விதூ⁴பனங் வாதி வக்க²மானங் பானீயங், பீ³ஜனீயஞ்ச. உபதிட்டெ²ய்யாதி ‘‘ஹத்த²பாஸே திட்ட²தீ’’தி (பாசி॰ 817) வசனதோ எத்த² உப-ஸத்³தோ³ ஹத்த²பாஸஸங்கா²தங் ஸமீபங் வத³தீதி வேதி³தப்³ப³ங்.

    2152.Bhuñjato pana bhikkhussāti pañcannaṃ bhojanānaṃ aññataraṃ bhuñjato bhikkhussa. Yathāha ‘‘bhuñjantassāti pañcannaṃ bhojanānaṃ aññataraṃ bhojanaṃ bhuñjantassā’’ti (pāci. 817). Pānīyaṃ vā vidhūpanaṃvāti vakkhamānaṃ pānīyaṃ, bījanīyañca. Upatiṭṭheyyāti ‘‘hatthapāse tiṭṭhatī’’ti (pāci. 817) vacanato ettha upa-saddo hatthapāsasaṅkhātaṃ samīpaṃ vadatīti veditabbaṃ.

    2153. வத்த²கோணாதி³ யா காசி ‘‘பீ³ஜனீ’’தி வுச்சதீதி யோஜனா, இமினா ‘‘பீ³ஜனிகிச்சங் ஸம்பாதெ³ஸ்ஸாமீ’’தி அதி⁴ட்டா²ய க³ஹிதசீவரகோணப்பகாரங் யங் கிஞ்சி ‘‘பீ³ஜனீ’’தி வுச்சதீதி அத்தோ².

    2153. Vatthakoṇādi yā kāci ‘‘bījanī’’ti vuccatīti yojanā, iminā ‘‘bījanikiccaṃ sampādessāmī’’ti adhiṭṭhāya gahitacīvarakoṇappakāraṃ yaṃ kiñci ‘‘bījanī’’ti vuccatīti attho.

    2154. ‘‘அத² கோ² ஸா பி⁴க்கு²னீ தஸ்ஸ பி⁴க்கு²னோ பு⁴ஞ்ஜந்தஸ்ஸ பானீயேன ச விதூ⁴பனேன ச உபதிட்டி²த்வா அச்சாவத³தி. அத² கோ² ஸோ பி⁴க்கு² தங் பி⁴க்கு²னிங் அபஸாதே³தி ‘மா, ப⁴கி³னி, ஏவரூபங் அகாஸி, நேதங் கப்பதீ’தி. ‘புப்³பே³ மங் த்வங் ஏவஞ்ச ஏவஞ்ச கரோஸி, இதா³னி எத்தகங் ந ஸஹஸீ’தி பானீயதா²லகங் மத்த²கே ஆஸும்பி⁴த்வா விதூ⁴பனேன பஹாரங் அதா³ஸீ’’தி (பாசி॰ 815) இமஸ்மிங் வத்து²ம்ஹி பி⁴க்கூ²ஹி ஆரோசிதே ‘‘கத²ஞ்ஹி நாம, பி⁴க்க²வே, பி⁴க்கு²னீ பி⁴க்கு²ஸ்ஸ பஹாரங் த³ஸ்ஸதீ’’திஆதீ³னி (பாசி॰ 815) வத்வா ‘‘யா பன பி⁴க்கு²னீ பி⁴க்கு²ஸ்ஸ பு⁴ஞ்ஜந்தஸ்ஸ பானீயேன வா விதூ⁴பனேன வா உபதிட்டெ²ய்ய, பாசித்திய’’ந்தி (பாசி॰ 816) வுத்தத்தா பஹாரபச்சயா நு கோ²தி ஆஸங்கங் நிவத்தேதுமாஹ ‘‘ஹத்த²பாஸே இத⁴ டா²னபச்சயாபத்தி தீ³பிதா’’தி. எத்த² ச ஆஸும்பி⁴த்வாதி பாதெத்வா. இதா⁴தி இமஸ்மிங் ஸிக்கா²பதே³. ‘‘ந, பி⁴க்க²வே, பி⁴க்கு²னியா பி⁴க்கு²ஸ்ஸ பஹாரோ தா³தப்³போ³. யா த³தெ³ய்ய, ஆபத்தி து³க்கடஸ்ஸா’’தி (சூளவ॰ 420) பி⁴க்கு²னிக்க²ந்த⁴கே வுத்தங் க³ஹெத்வா ஆஹ ‘‘பஹாரபச்சயா வுத்தங், க²ந்த⁴கே து³க்கடங் விஸு’’ந்தி. இமினா வுத்தஸ்ஸேவத்த²ஸ்ஸ காரணங் த³ஸ்ஸிதங் ஹோதி.

    2154. ‘‘Atha kho sā bhikkhunī tassa bhikkhuno bhuñjantassa pānīyena ca vidhūpanena ca upatiṭṭhitvā accāvadati. Atha kho so bhikkhu taṃ bhikkhuniṃ apasādeti ‘mā, bhagini, evarūpaṃ akāsi, netaṃ kappatī’ti. ‘Pubbe maṃ tvaṃ evañca evañca karosi, idāni ettakaṃ na sahasī’ti pānīyathālakaṃ matthake āsumbhitvā vidhūpanena pahāraṃ adāsī’’ti (pāci. 815) imasmiṃ vatthumhi bhikkhūhi ārocite ‘‘kathañhi nāma, bhikkhave, bhikkhunī bhikkhussa pahāraṃ dassatī’’tiādīni (pāci. 815) vatvā ‘‘yā pana bhikkhunī bhikkhussa bhuñjantassa pānīyena vā vidhūpanena vā upatiṭṭheyya, pācittiya’’nti (pāci. 816) vuttattā pahārapaccayā nu khoti āsaṅkaṃ nivattetumāha ‘‘hatthapāse idha ṭhānapaccayāpatti dīpitā’’ti. Ettha ca āsumbhitvāti pātetvā. Idhāti imasmiṃ sikkhāpade. ‘‘Na, bhikkhave, bhikkhuniyā bhikkhussa pahāro dātabbo. Yā dadeyya, āpatti dukkaṭassā’’ti (cūḷava. 420) bhikkhunikkhandhake vuttaṃ gahetvā āha ‘‘pahārapaccayā vuttaṃ, khandhake dukkaṭaṃ visu’’nti. Iminā vuttassevatthassa kāraṇaṃ dassitaṃ hoti.

    2155. ஹத்த²பாஸங் ஜஹித்வாதி எத்த² ‘‘போ⁴ஜனங் பு⁴ஞ்ஜதோ’’தி ச கா²த³னங் கா²த³தோதி எத்த² ‘‘ஹத்த²பாஸே’’தி ச வத்தப்³ப³ங் . போ⁴ஜனங் பு⁴ஞ்ஜதோ ஹத்த²பாஸங் ஜஹித்வா உபதிட்ட²ந்தியா வா கா²த³னங் கா²த³தோ ஹத்த²பாஸே உபதிட்ட²ந்தியா வா ஹோதி ஆபத்தி து³க்கடந்தி யோஜனா.

    2155.Hatthapāsaṃ jahitvāti ettha ‘‘bhojanaṃ bhuñjato’’ti ca khādanaṃ khādatoti ettha ‘‘hatthapāse’’ti ca vattabbaṃ . Bhojanaṃ bhuñjato hatthapāsaṃ jahitvā upatiṭṭhantiyā vā khādanaṃ khādato hatthapāse upatiṭṭhantiyā vā hoti āpatti dukkaṭanti yojanā.

    2156. தே³தீதி பானீயங் வா ஸூபாதி³ங் வா ‘‘இமங் பிவத², இமினா பு⁴ஞ்ஜதா²’’தி தே³தி. தாலவண்டங் ‘‘இமினா பீ³ஜந்தா பு⁴ஞ்ஜதா²’’தி தே³தி. தா³பேதீதி அஞ்ஞேன உப⁴யம்பி தா³பேதி. இத³ங் ஸிக்கா²பத³ங் ஸமுட்டா²னதோ ஏளகலோமேன ஸமங் மதந்தி யோஜனா.

    2156.Detīti pānīyaṃ vā sūpādiṃ vā ‘‘imaṃ pivatha, iminā bhuñjathā’’ti deti. Tālavaṇṭaṃ ‘‘iminā bījantā bhuñjathā’’ti deti. Dāpetīti aññena ubhayampi dāpeti. Idaṃ sikkhāpadaṃ samuṭṭhānato eḷakalomena samaṃ matanti yojanā.

    ச²ட்ட²ங்.

    Chaṭṭhaṃ.

    2157. விஞ்ஞத்வாதி ஸயங் விஞ்ஞத்வா, அஞ்ஞாய வா விஞ்ஞாபெத்வா. ‘‘விஞ்ஞத்வா வா விஞ்ஞாபெத்வா வா’’தி (பாசி॰ 821) ஹி ஸிக்கா²பத³ங். ஆமகங் த⁴ஞ்ஞந்தி அபக்கங் அப⁴ட்ட²ங் ஸாலிஆதி³கங் ஸத்தவித⁴ங் த⁴ஞ்ஞங். யதா²ஹ – ‘‘ஆமகத⁴ஞ்ஞங் நாம ஸாலி வீஹி யவோ கோ³து⁴மோ கங்கு³ வரகோ குத்³ரூஸகோ’’தி (பாசி॰ 822). கொட்டெத்வாதி முஸலேஹி கொட்டெத்வா. யதி³ பரிபு⁴ஞ்ஜதீதி யோஜனா.

    2157.Viññatvāti sayaṃ viññatvā, aññāya vā viññāpetvā. ‘‘Viññatvā vā viññāpetvā vā’’ti (pāci. 821) hi sikkhāpadaṃ. Āmakaṃ dhaññanti apakkaṃ abhaṭṭhaṃ sāliādikaṃ sattavidhaṃ dhaññaṃ. Yathāha – ‘‘āmakadhaññaṃ nāma sāli vīhi yavo godhumo kaṅgu varako kudrūsako’’ti (pāci. 822). Koṭṭetvāti musalehi koṭṭetvā. Yadi paribhuñjatīti yojanā.

    2158-60. ‘‘பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸாதி இத³ங் பயோக³து³க்கடங் நாம, தஸ்மா ந கேவலங் படிக்³க³ஹணேயேவ து³க்கடங் ஹோதீ’’திஆதி³னா (பாசி॰ அட்ட²॰ 822) அட்ட²கதா²க³தங் விபா⁴க³ங் த³ஸ்ஸேதுமாஹ ‘‘ந கேவலங் து த⁴ஞ்ஞான’’ந்திஆதி³. பனாதி அபி-ஸத்³த³த்தே², ஸுக்கா²பனேபீதி அத்தோ². ப⁴ஜ்ஜனத்தா²யாதி எத்த² ‘‘வத்³த³லிதி³வஸே’’தி ஸேஸோ. ‘‘கபல்லஸஜ்ஜனே உத்³த⁴னஸஜ்ஜனே’’தி பச்சேகங் யோஜேதப்³ப³ங். த³ப்³பி³ஸஜ்ஜனேதி கடச்சு²ஸம்பாத³னே. தத்த² கபல்லகே த⁴ஞ்ஞபக்கி²பனேதி யோஜனா. ‘‘க⁴ட்டனகொட்டனே’’தி வத்தப்³பே³ கா³தா²ப³ந்த⁴வஸேன ந-காரலோபங் கத்வா ‘‘க⁴ட்டகொட்டனே’’தி வுத்தங்.

    2158-60. ‘‘Bhuñjissāmīti paṭiggaṇhāti, āpatti dukkaṭassāti idaṃ payogadukkaṭaṃ nāma, tasmā na kevalaṃ paṭiggahaṇeyeva dukkaṭaṃ hotī’’tiādinā (pāci. aṭṭha. 822) aṭṭhakathāgataṃ vibhāgaṃ dassetumāha ‘‘na kevalaṃ tu dhaññāna’’ntiādi. Panāti api-saddatthe, sukkhāpanepīti attho. Bhajjanatthāyāti ettha ‘‘vaddalidivase’’ti seso. ‘‘Kapallasajjane uddhanasajjane’’ti paccekaṃ yojetabbaṃ. Dabbisajjaneti kaṭacchusampādane. Tattha kapallake dhaññapakkhipaneti yojanā. ‘‘Ghaṭṭanakoṭṭane’’ti vattabbe gāthābandhavasena na-kāralopaṃ katvā ‘‘ghaṭṭakoṭṭane’’ti vuttaṃ.

    2161-3. பமாண-ஸத்³த³ஸ்ஸ ஆவத்தலிங்க³ஸங்க்²யத்தா ஆஹ ‘‘போ⁴ஜனஞ்சேவ விஞ்ஞத்திபமாண’’ந்தி . ஆவத்தலிங்க³ஸங்க்²யத்தங் நாம நியதலிங்கே³கத்தப³ஹுத்தங். ததா² ஹெத்த² பமாண-ஸத்³தோ³ நியதனபுங்ஸகலிங்கே³ நியதேகத்தங் வுச்சதி. எத்த² இமஸ்மிங் ஸிக்கா²பதே³ போ⁴ஜனஞ்சேவ விஞ்ஞத்தி சாதி இத³ங் த்³வயங் ஹி யஸ்மா பமாணங், தஸ்மா ஸயங் விஞ்ஞத்வா வா அஞ்ஞதோ ப⁴ஜ்ஜனாதீ³னி காராபெத்வா வா அஞ்ஞாய பன விஞ்ஞாபெத்வா ஸயங் ப⁴ஜ்ஜனாதீ³னி கத்வா வா யா பன பி⁴க்கு²னீ அஜ்ஜோ²ஹரதி, தஸ்ஸா அஜ்ஜோ²ஹாரபயோகே³ஸு பாசித்தியோ ஸியுந்தி யோஜனா.

    2161-3. Pamāṇa-saddassa āvattaliṅgasaṅkhyattā āha ‘‘bhojanañceva viññattipamāṇa’’nti . Āvattaliṅgasaṅkhyattaṃ nāma niyataliṅgekattabahuttaṃ. Tathā hettha pamāṇa-saddo niyatanapuṃsakaliṅge niyatekattaṃ vuccati. Ettha imasmiṃ sikkhāpade bhojanañceva viññatti cāti idaṃ dvayaṃ hi yasmā pamāṇaṃ, tasmā sayaṃ viññatvā vā aññato bhajjanādīni kārāpetvā vā aññāya pana viññāpetvā sayaṃ bhajjanādīni katvā vā yā pana bhikkhunī ajjhoharati, tassā ajjhohārapayogesu pācittiyo siyunti yojanā.

    மஹாபச்சரியங் (பாசி॰ அட்ட²॰ 823) வுத்தங் வினிச்ச²யங் த³ஸ்ஸேதுமாஹ ‘‘மாதரங் வா’’திஆதி³. மாதரங் வாபி யாசித்வாதி எத்த² வா-ஸத்³தோ³ அத்த²ந்தரவிகப்பனே. பி-ஸத்³தோ³ ஸம்பா⁴வனே. மாதரங் வா பிதரங் வா அஞ்ஞங் வா ஞாதகங் வா பவாரிதங் வா ஆமகத⁴ஞ்ஞங் யாசித்வா வா அஞ்ஞாய காராபெத்வா வா யா பரிபு⁴ஞ்ஜதி, தஸ்ஸா பாசித்தீதி யோஜனா.

    Mahāpaccariyaṃ (pāci. aṭṭha. 823) vuttaṃ vinicchayaṃ dassetumāha ‘‘mātaraṃ vā’’tiādi. Mātaraṃ vāpi yācitvāti ettha vā-saddo atthantaravikappane. Pi-saddo sambhāvane. Mātaraṃ vā pitaraṃ vā aññaṃ vā ñātakaṃ vā pavāritaṃ vā āmakadhaññaṃ yācitvā vā aññāya kārāpetvā vā yā paribhuñjati, tassā pācittīti yojanā.

    2164. அவிஞ்ஞத்தியா லத்³த⁴ங் ஸயங் வா ப⁴ஜ்ஜனாதீ³னி கத்வா வா அஞ்ஞாய காராபெத்வா வா யா பரிபு⁴ஞ்ஜதி, தஸ்ஸா து³க்கடந்தி யோஜனா.

    2164. Aviññattiyā laddhaṃ sayaṃ vā bhajjanādīni katvā vā aññāya kārāpetvā vā yā paribhuñjati, tassā dukkaṭanti yojanā.

    2165. அஞ்ஞாய பன விஞ்ஞத்தியா லத்³த⁴ங் தாய காராபெத்வாபி ஸயங் கத்வா வா அஜ்ஜோ²ஹரந்தியா ததா² ஆபத்தி து³க்கடந்தி யோஜனா. இத³ஞ்ச மஹாபச்சரியாக³தனயங் க³ஹெத்வா வுத்தங். மஹாஅட்ட²கதா²யங் பன ‘‘அஞ்ஞாய விஞ்ஞத்தங் பு⁴ஞ்ஜந்தியா து³க்கட’’ந்தி (பாசி॰ அட்ட²॰ 822) வுத்தத்தா விஞ்ஞத்தியாபி அஞ்ஞாய லத்³த⁴ங் ஆமகங் த⁴ஞ்ஞங் தாய காராபெத்வா வா ஸயங் கத்வா வா பரிபு⁴ஞ்ஜந்தஸ்ஸாபி து³க்கடமேவ வுத்தந்தி வேதி³தப்³ப³ங்.

    2165. Aññāya pana viññattiyā laddhaṃ tāya kārāpetvāpi sayaṃ katvā vā ajjhoharantiyā tathā āpatti dukkaṭanti yojanā. Idañca mahāpaccariyāgatanayaṃ gahetvā vuttaṃ. Mahāaṭṭhakathāyaṃ pana ‘‘aññāya viññattaṃ bhuñjantiyā dukkaṭa’’nti (pāci. aṭṭha. 822) vuttattā viññattiyāpi aññāya laddhaṃ āmakaṃ dhaññaṃ tāya kārāpetvā vā sayaṃ katvā vā paribhuñjantassāpi dukkaṭameva vuttanti veditabbaṃ.

    2166-7. ஸேத³கம்மாதி³அத்தா²யாதி வாதரோகா³தி³னா ஆதுரானங் ஸேத³னாதி³படிகாரத்தா²ய. இத⁴ ‘‘அஞ்ஞாதகஅப்பவாரிதட்டா²னேபீ’’தி ஸேஸோ. பி⁴க்கூ²னம்பி ஏஸேவ நயோ. ட²பெத்வா ஸத்த த⁴ஞ்ஞானி ஞாதகபவாரிதட்டா²னே ஸேஸவிஞ்ஞத்தியாபி அனாபத்தீதி ஞாதப்³ப³ந்தி யோஜனா. ஸேஸவிஞ்ஞத்தியாதி முக்³க³மாஸஅலாபு³கும்ப⁴ண்ட³காதீ³னங் வுத்தத⁴ஞ்ஞாவஸேஸானங் விஞ்ஞத்தியா.

    2166-7.Sedakammādiatthāyāti vātarogādinā āturānaṃ sedanādipaṭikāratthāya. Idha ‘‘aññātakaappavāritaṭṭhānepī’’ti seso. Bhikkhūnampi eseva nayo. Ṭhapetvā satta dhaññāni ñātakapavāritaṭṭhāne sesaviññattiyāpi anāpattīti ñātabbanti yojanā. Sesaviññattiyāti muggamāsaalābukumbhaṇḍakādīnaṃ vuttadhaññāvasesānaṃ viññattiyā.

    ஸாலிஆதீ³னங் ஸத்தன்னங் த⁴ஞ்ஞானங் து³க்கடஸ்ஸ வுத்தத்தா, அனாமாஸத்தா ச ஸப்³பே³ன ஸப்³ப³ங் ந வட்டந்தீதி த³ஸ்ஸேதுமாஹ ‘‘ஞாதகானம்பீ’’திஆதி³.

    Sāliādīnaṃ sattannaṃ dhaññānaṃ dukkaṭassa vuttattā, anāmāsattā ca sabbena sabbaṃ na vaṭṭantīti dassetumāha ‘‘ñātakānampī’’tiādi.

    2168. லத்³த⁴ந்தி லப்³ப⁴மானங். நவகம்மேஸூதி நவகம்மத்தா²ய, நிமித்தத்தே² பு⁴ம்மங். எத்த² ‘‘ஸம்படிச்சி²து’’ந்தி ஸேஸோ. ‘‘அவிஞ்ஞத்தியா லப்³ப⁴மானங் பன நவகம்மத்தா²ய ஸம்படிச்சி²துங் வட்டதீ’’தி (பாசி॰ அட்ட²॰ 823) மஹாபச்சரியங் வுத்தங்.

    2168.Laddhanti labbhamānaṃ. Navakammesūti navakammatthāya, nimittatthe bhummaṃ. Ettha ‘‘sampaṭicchitu’’nti seso. ‘‘Aviññattiyā labbhamānaṃ pana navakammatthāya sampaṭicchituṃ vaṭṭatī’’ti (pāci. aṭṭha. 823) mahāpaccariyaṃ vuttaṃ.

    ஸத்தமங்.

    Sattamaṃ.

    2169. ஸங்காரந்தி கசவரங். விகா⁴ஸகங் வாதி உச்சி²ட்ட²கமச்ச²கண்டகமங்ஸட்டி²சலகமுக²தோ⁴வனாதி³கங் யங் கிஞ்சி. ச²ட்³டெ³ய்ய வாதி எத்த² ‘‘ஸய’’ந்தி ஸேஸோ ‘‘ச²ட்³டா³பெய்ய பரேஹீ’’தி வக்க²மானத்தா. குட்டஸ்ஸ திரோ திரோகுட்டங், தஸ்மிங், குட்டஸ்ஸ பரபா⁴கே³தி அத்தோ². ‘‘பாகாரேபி அயங் நயோ’’தி வக்க²மானத்தா குட்டந்தி வா ப்³யதிரித்தா பி⁴த்தி க³ஹேதப்³பா³.

    2169.Saṅkāranti kacavaraṃ. Vighāsakaṃ vāti ucchiṭṭhakamacchakaṇṭakamaṃsaṭṭhicalakamukhadhovanādikaṃ yaṃ kiñci. Chaḍḍeyya vāti ettha ‘‘saya’’nti seso ‘‘chaḍḍāpeyya parehī’’ti vakkhamānattā. Kuṭṭassa tiro tirokuṭṭaṃ, tasmiṃ, kuṭṭassa parabhāgeti attho. ‘‘Pākārepi ayaṃ nayo’’ti vakkhamānattā kuṭṭanti vā byatirittā bhitti gahetabbā.

    2171. ஏகாதி எத்த² ஆபத்தீதி ஸேஸோ. ‘‘தஸ்ஸா’’தி இமினா ஸம்ப³ந்தோ⁴.

    2171.Ekāti ettha āpattīti seso. ‘‘Tassā’’ti iminā sambandho.

    2172. ச²ட்³ட³னேதி எத்த² பி-ஸத்³தோ³ லுத்தனித்³தி³ட்டோ². த³ந்தகட்ட²ஸ்ஸ ச²ட்³ட³னேபி பி⁴க்கு²னியா பாசித்தி பரிதீ³பிதாதி யோஜனா.

    2172.Chaḍḍaneti ettha pi-saddo luttaniddiṭṭho. Dantakaṭṭhassa chaḍḍanepi bhikkhuniyā pācitti paridīpitāti yojanā.

    2173-4. ஸப்³ப³த்தா²தி வுத்தப்பகாரேஸு ஸப்³பே³ஸு விகப்பேஸு. அனாபத்திவிஸயங் த³ஸ்ஸேதுமாஹ ‘‘அவலஞ்ஜேபீ’’திஆதி³. அவலஞ்ஜே டா²னே அனோலோகெத்வா ச²ட்³டெ³ந்தியாபி வா வலஞ்ஜே டா²னே ஓலோகெத்வாபி வா பன ச²ட்³டெ³ந்தியா அனாபத்தீதி யோஜனா. ச²ட்³ட³னங் க்ரியங். அனோலோகனங் அக்ரியங்.

    2173-4.Sabbatthāti vuttappakāresu sabbesu vikappesu. Anāpattivisayaṃ dassetumāha ‘‘avalañjepī’’tiādi. Avalañje ṭhāne anoloketvā chaḍḍentiyāpi vā valañje ṭhāne oloketvāpi vā pana chaḍḍentiyā anāpattīti yojanā. Chaḍḍanaṃ kriyaṃ. Anolokanaṃ akriyaṃ.

    அட்ட²மங்.

    Aṭṭhamaṃ.

    2175-6. யா பன பி⁴க்கு²னீ கெ²த்தே வா நாளிகேராதி³ஆராமே வா யத்த² கத்த²சி ரோபிமே ஹரிதட்டா²னே தானி விகா⁴ஸுச்சாரஸங்காரமுத்தஸங்கா²தானி சத்தாரி வத்தூ²னி ஸசே ஸயங் ச²ட்³டே³தி வா, ததா² பரே ச²ட்³டா³பேதி வா, தஸ்ஸா பி⁴க்கு²னியா ஆபத்திவினிச்ச²யோ வுத்தனயோ ‘‘ஏகேக’’மிச்சாதி³னா யதா²வுத்தபகாரோதி யோஜனா.

    2175-6. Yā pana bhikkhunī khette vā nāḷikerādiārāme vā yattha katthaci ropime haritaṭṭhāne tāni vighāsuccārasaṅkāramuttasaṅkhātāni cattāri vatthūni sace sayaṃ chaḍḍeti vā, tathā pare chaḍḍāpeti vā, tassā bhikkhuniyā āpattivinicchayo vuttanayo ‘‘ekeka’’miccādinā yathāvuttapakāroti yojanā.

    2177-8. யா பன பி⁴க்கு²னீ ஹரிதே கெ²த்தே நிஸீதி³த்வா பு⁴ஞ்ஜமானா வா ததா² ஹரிதே தத்த² கெ²த்தே உச்சு²ஆதீ³னி கா²த³ந்தி கா²த³மானா க³ச்ச²ந்தீ வா யதி³ உச்சி²ட்ட²ங் உத³கங் வா சலகாதி³ங் வா ச²ட்³டே³தி, தஸ்ஸா பாசித்தியங் ஹோதீதி யோஜனா. சலகங் நாம வமிகரங்.

    2177-8.Yā pana bhikkhunī harite khette nisīditvā bhuñjamānā vā tathā harite tattha khette ucchuādīni khādanti khādamānā gacchantī vā yadi ucchiṭṭhaṃ udakaṃ vā calakādiṃ vā chaḍḍeti, tassā pācittiyaṃ hotīti yojanā. Calakaṃ nāma vamikaraṃ.

    2179. தாதி³ஸே ஹரிதே டா²னே அந்தமஸோ மத்த²கசி²ன்னங் நாளிகேரம்பி ஜலங் பிவித்வா ச²ட்³டெ³ந்தியா ஆபத்தி ஸியாதி யோஜனா.

    2179.Tādise harite ṭhāne antamaso matthakachinnaṃ nāḷikerampi jalaṃ pivitvā chaḍḍentiyā āpatti siyāti yojanā.

    2180. ஸப்³பே³ஸந்தி பி⁴க்கு²பி⁴க்கு²னீனங்.

    2180.Sabbesanti bhikkhubhikkhunīnaṃ.

    2181. லாயிதம்பி கெ²த்தங் புன ரோஹணத்தா²ய மனுஸ்ஸா ரக்க²ந்தி சே, தத்த² தஸ்மிங் கெ²த்தே விகா⁴ஸுச்சாராதீ³னி ச²ட்³டெ³ந்தியா அஸ்ஸா பி⁴க்கு²னியா யதா²வத்து²கமேவ ஹி பாசித்தியமேவாதி யோஜனா. ‘‘அஸ்ஸா யதா²வத்து²க’’ந்தி இமினா பி⁴க்கு²ஸ்ஸ து³க்கடந்தி வுத்தமேவ ஹோதி.

    2181. Lāyitampi khettaṃ puna rohaṇatthāya manussā rakkhanti ce, tattha tasmiṃ khette vighāsuccārādīni chaḍḍentiyā assā bhikkhuniyā yathāvatthukameva hi pācittiyamevāti yojanā. ‘‘Assā yathāvatthuka’’nti iminā bhikkhussa dukkaṭanti vuttameva hoti.

    2182. ச²ட்³டி³தே கெ²த்தேதி மனுஸ்ஸேஹி உத்³த⁴டஸஸ்ஸே கெ²த்தே. யதா²ஹ – ‘‘மனுஸ்ஸேஸு ஸஸ்ஸங் உத்³த⁴ரித்வா க³தேஸு ச²ட்³டி³தகெ²த்தங் நாம ஹோதி, தத்த² வட்டதீ’’தி (பாசி॰ அட்ட²॰ 830). ஏவங் அகதேபி கெ²த்தே ஸாமிகே ஆபுச்சி²த்வா காதுங் வட்டதி. யதா²ஹ ‘‘ஸாமிகே அபலோகெத்வா ச²ட்³டே³தீ’’தி (பாசி॰ 832). இத⁴ கெ²த்தபாலகா, ஆராமாதி³கோ³பகா ச ஸாமிகா ஏவ. ஸங்க⁴ஸ்ஸ கெ²த்தே, ஆராமே ச ஸசே ‘‘தத்த² கசவரங் ந ச²ட்³டே³தப்³ப³’’ந்தி கதிகா நத்தி², பி⁴க்கு²ஸ்ஸ ச²ட்³டே³துங் வட்டதி ஸங்க⁴பரியாபன்னத்தா, ந பி⁴க்கு²னீனங். தாஸங் பன பி⁴க்கு²ஸங்கே⁴ வுத்தனயேன ந வட்டதி, ந தஸ்ஸ பி⁴க்கு²ஸ்ஸ, ஏவங் ஸந்தேபி ஸாருப்பவஸேன காதப்³ப³ந்தி. ஸப்³ப³ந்தி உச்சாராதி³ சதுப்³பி³த⁴ங்.

    2182.Chaḍḍite khetteti manussehi uddhaṭasasse khette. Yathāha – ‘‘manussesu sassaṃ uddharitvā gatesu chaḍḍitakhettaṃ nāma hoti, tattha vaṭṭatī’’ti (pāci. aṭṭha. 830). Evaṃ akatepi khette sāmike āpucchitvā kātuṃ vaṭṭati. Yathāha ‘‘sāmike apaloketvā chaḍḍetī’’ti (pāci. 832). Idha khettapālakā, ārāmādigopakā ca sāmikā eva. Saṅghassa khette, ārāme ca sace ‘‘tattha kacavaraṃ na chaḍḍetabba’’nti katikā natthi, bhikkhussa chaḍḍetuṃ vaṭṭati saṅghapariyāpannattā, na bhikkhunīnaṃ. Tāsaṃ pana bhikkhusaṅghe vuttanayena na vaṭṭati, na tassa bhikkhussa, evaṃ santepi sāruppavasena kātabbanti. Sabbanti uccārādi catubbidhaṃ.

    நவமங்.

    Navamaṃ.

    2183. எத்த² ‘‘நச்சங் நாம யங் கிஞ்சி நச்சங். கீ³தங் நாம யங் கிஞ்சி கீ³தங். வாதி³தங் நாம யங் கிஞ்சி வாதி³த’’ந்தி (பாசி॰ 835) வசனதோ ‘‘யங் கிஞ்சீ’’தி ஸேஸோ. யா பன பி⁴க்கு²னீ யங் கிஞ்சி நச்சங் வா யங் கிஞ்சி கீ³தங் வா யங் கிஞ்சி வாதி³தங் வா த³ஸ்ஸனத்தா²ய க³ச்செ²ய்யாதி யோஜனா. தத்த² யங் கிஞ்சி நச்சந்தி நடாத³யோ வா நச்சந்து ஸொண்டா³ வா, அந்தமஸோ மோரஸுகமக்கடாத³யோபி, ஸப்³ப³ம்பேதங் நச்சமேவ. யங் கிஞ்சி கீ³தந்தி நடாதீ³னங் வா கீ³தங் ஹோது அரியானங் பரினிப்³பா³னகாலே ரதனத்தயகு³ணூபஸங்ஹிதங் ஸாது⁴கீளிதகீ³தங் வா அஸஞ்ஞதபி⁴க்கூ²னங் த⁴ம்மபா⁴ணககீ³தங் வா, ஸப்³ப³ம்பேதங் கீ³தமேவ. யங் கிஞ்சி வாதி³தந்தி க⁴னாதி³வாத³னீயப⁴ண்ட³வாதி³தங் வா ஹோது குடபே⁴ரிவாதி³தங் வா அந்தமஸோ உத³ரபே⁴ரிவாதி³தம்பி , ஸப்³ப³ம்பேதங் வாதி³தமேவ. ‘‘த³ஸ்ஸனஸவனத்தா²யா’’தி வத்தப்³பே³ விரூபேகஸேஸனயேன ‘‘த³ஸ்ஸனத்தா²யா’’தி வுத்தங். பஞ்சன்னங் விஞ்ஞாணானங் யதா²ஸகங் விஸயஸ்ஸ ஆலோசனஸபா⁴வதாய வா ‘‘த³ஸ்ஸனத்தா²ய’’ இச்சேவ வுத்தங்.

    2183. Ettha ‘‘naccaṃ nāma yaṃ kiñci naccaṃ. Gītaṃ nāma yaṃ kiñci gītaṃ. Vāditaṃ nāma yaṃ kiñci vādita’’nti (pāci. 835) vacanato ‘‘yaṃ kiñcī’’ti seso. Yā pana bhikkhunī yaṃ kiñci naccaṃ vā yaṃ kiñci gītaṃ vā yaṃ kiñci vāditaṃ vā dassanatthāya gaccheyyāti yojanā. Tattha yaṃ kiñci naccanti naṭādayo vā naccantu soṇḍā vā, antamaso morasukamakkaṭādayopi, sabbampetaṃ naccameva. Yaṃ kiñci gītanti naṭādīnaṃ vā gītaṃ hotu ariyānaṃ parinibbānakāle ratanattayaguṇūpasaṃhitaṃ sādhukīḷitagītaṃ vā asaññatabhikkhūnaṃ dhammabhāṇakagītaṃ vā, sabbampetaṃ gītameva. Yaṃ kiñci vāditanti ghanādivādanīyabhaṇḍavāditaṃ vā hotu kuṭabherivāditaṃ vā antamaso udarabherivāditampi , sabbampetaṃ vāditameva. ‘‘Dassanasavanatthāyā’’ti vattabbe virūpekasesanayena ‘‘dassanatthāyā’’ti vuttaṃ. Pañcannaṃ viññāṇānaṃ yathāsakaṃ visayassa ālocanasabhāvatāya vā ‘‘dassanatthāya’’ icceva vuttaṃ.

    2184. புப்³ப³பயோக³து³க்கடேன ஸஹ பாசித்தியங் த³ஸ்ஸேதுமாஹ ‘‘த³ஸ்ஸனத்தா²ய நச்சஸ்ஸா’’திஆதி³. கீ³தஸ்ஸாதி எத்த² ‘‘வாதி³தஸ்ஸா’’தி பகரணதோ லப்³ப⁴தி.

    2184. Pubbapayogadukkaṭena saha pācittiyaṃ dassetumāha ‘‘dassanatthāya naccassā’’tiādi. Gītassāti ettha ‘‘vāditassā’’ti pakaraṇato labbhati.

    2185. ஏகபயோகே³னாதி ஏகதி³ஸாவலோகனபயோகே³ன. தேனேவ வக்க²தி ‘‘அஞ்ஞஸ்மிம்பி…பே॰… ஸியு’’ந்தி. பஸ்ஸதீதி எத்த² ‘‘நச்ச’’ந்தி ஸேஸோ. தேஸந்தி யேஸங் நச்சங் பஸ்ஸதி. பி-ஸத்³தே³ன வாதி³தம்பி ஸம்பிண்டே³தி. யதா²ஹ ‘‘தேஸங்யேவ கீ³தவாதி³தங் ஸுணாதி, ஏகமேவ பாசித்திய’’ந்தி (பாசி॰ அட்ட²॰ 836).

    2185.Ekapayogenāti ekadisāvalokanapayogena. Teneva vakkhati ‘‘aññasmimpi…pe… siyu’’nti. Passatīti ettha ‘‘nacca’’nti seso. Tesanti yesaṃ naccaṃ passati. Pi-saddena vāditampi sampiṇḍeti. Yathāha ‘‘tesaṃyeva gītavāditaṃ suṇāti, ekameva pācittiya’’nti (pāci. aṭṭha. 836).

    2186. அஞ்ஞதோதி அஞ்ஞஸ்மிங் தி³ஸாபா⁴கே³.

    2186.Aññatoti aññasmiṃ disābhāge.

    2187. ‘‘விஸுங் பாசித்தியோ ஸியு’’ந்தி இத³மேவ பகாஸேதுமாஹ ‘‘பயோக³க³ணனாயெத்த², ஆபத்திக³ணனா ஸியா’’தி. எத்தா²தி இமஸ்மிங் நானாதி³ஸாபா⁴கே³. நச்சகீ³தவாதி³தானங் த³ஸ்ஸனஸவனே அட்ட²கதா²க³தங் வினிச்ச²யங் த³ஸ்ஸேதுமாஹ ‘‘நச்சிது’’ந்திஆதி³.

    2187. ‘‘Visuṃ pācittiyo siyu’’nti idameva pakāsetumāha ‘‘payogagaṇanāyettha, āpattigaṇanā siyā’’ti. Etthāti imasmiṃ nānādisābhāge. Naccagītavāditānaṃ dassanasavane aṭṭhakathāgataṃ vinicchayaṃ dassetumāha ‘‘naccitu’’ntiādi.

    2188. ‘‘நச்ச இதீ’’தி பத³ச்சே²தோ³, ‘‘நச்சாஹீ’’திபி பாடோ². உபட்டா²னந்தி பே⁴ரிஸத்³த³பூஜங். ஸம்படிச்சி²துந்தி ‘‘ஸாதூ⁴’’தி அதி⁴வாஸேதுங். இமஸ்ஸ உபலக்க²ணவஸேன வுத்தத்தா நச்சகீ³தேபி ஏஸேவ நயோ.

    2188. ‘‘Nacca itī’’ti padacchedo, ‘‘naccāhī’’tipi pāṭho. Upaṭṭhānanti bherisaddapūjaṃ. Sampaṭicchitunti ‘‘sādhū’’ti adhivāsetuṃ. Imassa upalakkhaṇavasena vuttattā naccagītepi eseva nayo.

    2189-90. ஸப்³ப³த்தா²தி நச்சனாதீ³ஸு ஸப்³ப³த்த². உபட்டா²னங் கரோமாதி தும்ஹாகங் சேதியஸ்ஸ நச்சாதீ³ஹி உபஹாரங் கரோமாதி. உபட்டா²னங் பஸத்த²ந்தி உபட்டா²னகரணங் நாம ஸுந்த³ரந்தி.

    2189-90.Sabbatthāti naccanādīsu sabbattha. Upaṭṭhānaṃ karomāti tumhākaṃ cetiyassa naccādīhi upahāraṃ karomāti. Upaṭṭhānaṃ pasatthanti upaṭṭhānakaraṇaṃ nāma sundaranti.

    யா ஆராமேயேவ ச ட²த்வா பஸ்ஸதி வா ஸுணாதி வாதி யோஜனா, இத⁴ ‘‘அந்தராராமே வா’’திஆதி³ ஸேஸோ. ‘‘ஆராமே ட²த்வா அந்தராராமே வா ப³ஹிஆராமே வா நச்சாதீ³னி பஸ்ஸதி வா ஸுணாதி வா, அனாபத்தீ’’தி (பாசி॰ அட்ட²॰ 837) அட்ட²கதா²ய வுத்தங். ‘‘ட²த்வா’’தி வுத்தேபி ஸப்³பே³ஸுபி இரியாபதே²ஸு லப்³ப⁴தி. ஆராமே ட²த்வாதி ந கேவலங் ட²த்வாவ, ததோ க³ந்த்வாபி ஸப்³பி³ரியாபதே²ஹிபி லப⁴தி. ‘‘ஆராமே டி²தா’’தி (பாசி॰ 837) பன ஆராமபரியாபன்னத³ஸ்ஸனத்த²ங் வுத்தங். இதரதா² நிஸின்னாபி ந லபெ⁴ய்யாதி க³ண்டி²பதா³தீ³ஸு வுத்தங். பி⁴க்கூ²னம்பி ஏஸேவ நயோ.

    Yā ārāmeyeva ca ṭhatvā passati vā suṇāti vāti yojanā, idha ‘‘antarārāme vā’’tiādi seso. ‘‘Ārāme ṭhatvā antarārāme vā bahiārāme vā naccādīni passati vā suṇāti vā, anāpattī’’ti (pāci. aṭṭha. 837) aṭṭhakathāya vuttaṃ. ‘‘Ṭhatvā’’ti vuttepi sabbesupi iriyāpathesu labbhati. Ārāme ṭhatvāti na kevalaṃ ṭhatvāva, tato gantvāpi sabbiriyāpathehipi labhati. ‘‘Ārāme ṭhitā’’ti (pāci. 837) pana ārāmapariyāpannadassanatthaṃ vuttaṃ. Itarathā nisinnāpi na labheyyāti gaṇṭhipadādīsu vuttaṃ. Bhikkhūnampi eseva nayo.

    2191. யா அத்தனோ டி²தோகாஸங் ஆக³ந்த்வா பயோஜிதங் பஸ்ஸதி வா ஸுணாதி வாதி யோஜனா. டி²தோகாஸந்தி எத்த² க³தினிவத்திஸாமஞ்ஞேன ஸயிதனிஸின்னம்பி க³ய்ஹதி. ததா²ரூபா ஹி காரணா க³ந்த்வா பஸ்ஸந்தியா வாபீதி யோஜனா. காரணங் நாம ஸலாகப⁴த்தாதி³காரணங். யதா²ஹ ‘‘ஸதி கரணீயேதி ஸலாகப⁴த்தாதீ³னங் வா அத்தா²ய அஞ்ஞேன வா கேனசி கரணீயேன க³ந்த்வா க³தட்டா²னே பஸ்ஸதி வா ஸுணாதி வா, அனாபத்தீ’’தி (பாசி॰ அட்ட²॰ 837).

    2191. Yā attano ṭhitokāsaṃ āgantvā payojitaṃ passati vā suṇāti vāti yojanā. Ṭhitokāsanti ettha gatinivattisāmaññena sayitanisinnampi gayhati. Tathārūpā hi kāraṇā gantvā passantiyā vāpīti yojanā. Kāraṇaṃ nāma salākabhattādikāraṇaṃ. Yathāha ‘‘sati karaṇīyeti salākabhattādīnaṃ vā atthāya aññena vā kenaci karaṇīyena gantvā gataṭṭhāne passati vā suṇāti vā, anāpattī’’ti (pāci. aṭṭha. 837).

    2192. மக்³க³ங் க³ச்ச²ந்தீ படிபதே² நச்சங் அட்ட²த்வா பஸ்ஸதீதி ஏவங் பஸ்ஸந்தியாபி ச ததா² அனாபத்தீதி அஜ்ஜா²ஹாரயோஜனா. படிபதே²தி க³மனமக்³கா³பி⁴முகே². ஆபதா³ஸுபீதி தாதி³ஸேன உபத்³த³வேன உபத்³து³தா ஸமஜ்ஜட்டா²னங் பவிஸதி, ஏவங் பவிஸித்வா பஸ்ஸந்தியா வா ஸுணந்தியா வா அனாபத்தி.

    2192. Maggaṃ gacchantī paṭipathe naccaṃ aṭṭhatvā passatīti evaṃ passantiyāpi ca tathā anāpattīti ajjhāhārayojanā. Paṭipatheti gamanamaggābhimukhe. Āpadāsupīti tādisena upaddavena upaddutā samajjaṭṭhānaṃ pavisati, evaṃ pavisitvā passantiyā vā suṇantiyā vā anāpatti.

    2193. இத³ங் ஸிக்கா²பத³ங் ஸமுட்டா²னதோ ஏளகலோமஸிக்கா²பதே³ன ஸமங் மதங் ‘‘ஸமான’’ந்தி விஞ்ஞாதங்.

    2193.Idaṃ sikkhāpadaṃ samuṭṭhānato eḷakalomasikkhāpadena samaṃ mataṃ ‘‘samāna’’nti viññātaṃ.

    த³ஸமங்.

    Dasamaṃ.

    லஸுணவக்³கோ³ பட²மோ.

    Lasuṇavaggo paṭhamo.

    2194-5. இத⁴ இமஸ்மிங் ஸாஸனே யா பன பி⁴க்கு²னீ ரத்தந்த⁴காரஸ்மிங் அப்பதீ³பே புரிஸேன ஸத்³தி⁴ங் ஏகிகா ஸசே ஸந்திட்ட²தி, தஸ்ஸா பாசித்தியங் வுத்தந்தி யோஜனா. ரத்தந்த⁴காரஸ்மிந்தி ரத்தியங். ரத்திபரியாயோ ஹி ரத்தந்த⁴கார-ஸத்³தோ³. யதா²ஹ பத³பா⁴ஜனே ‘‘ரத்தந்த⁴காரேதி ஒக்³க³தே ஸூரியே’’தி (பாசி॰ 840). அப்பதீ³பேதி பஜ்ஜோதசந்த³ஸூரியஅக்³கீ³ஸு ஏகேனாபி அனோபா⁴ஸிதே, இமினா ரத்திக்கெ²த்தங் த³ஸ்ஸேதி. ‘‘ஸந்திட்ட²தீ’’தி இமினா க³மனநிஸின்னஸயனஸங்கா²தங் இரியாபத²த்திகஞ்ச உபலக்கி²தந்தி த³ட்ட²ப்³ப³ங். வுத்தஞ்ஹி வஜிரபு³த்³தி⁴னா ‘‘ஸந்திட்டெ²ய்யாதி எத்த² டா²னாபதே³ஸேன சதுப்³பி³தோ⁴பி இரியாபதோ² ஸங்க³ஹிதோ, தஸ்மா புரிஸேன ஸத்³தி⁴ங் சங்கமனாதீ³னி கரொந்தியாபி பாசித்தியஞ்ச உபலப்³ப⁴தீ’’தி (வஜிர॰ டீ॰ பாசித்திய 839 தோ²கங் விஸதி³ஸங்). புரிஸேன ஸத்³தி⁴ந்தி ஸந்திட்டி²துங், ஸல்லபிதுஞ்ச விஞ்ஞுனா மனுஸ்ஸபுரிஸேன ஸத்³தி⁴ங்.

    2194-5.Idha imasmiṃ sāsane yā pana bhikkhunī rattandhakārasmiṃ appadīpe purisena saddhiṃ ekikā sace santiṭṭhati, tassā pācittiyaṃ vuttanti yojanā. Rattandhakārasminti rattiyaṃ. Rattipariyāyo hi rattandhakāra-saddo. Yathāha padabhājane ‘‘rattandhakāreti oggate sūriye’’ti (pāci. 840). Appadīpeti pajjotacandasūriyaaggīsu ekenāpi anobhāsite, iminā rattikkhettaṃ dasseti. ‘‘Santiṭṭhatī’’ti iminā gamananisinnasayanasaṅkhātaṃ iriyāpathattikañca upalakkhitanti daṭṭhabbaṃ. Vuttañhi vajirabuddhinā ‘‘santiṭṭheyyāti ettha ṭhānāpadesena catubbidhopi iriyāpatho saṅgahito, tasmā purisena saddhiṃ caṅkamanādīni karontiyāpi pācittiyañca upalabbhatī’’ti (vajira. ṭī. pācittiya 839 thokaṃ visadisaṃ). Purisena saddhinti santiṭṭhituṃ, sallapituñca viññunā manussapurisena saddhiṃ.

    ரஹஸ்ஸாத³வஸேன புரிஸஸ்ஸ ஹத்த²பாஸங் ஸமாக³ந்த்வா தேன ஸத்³தி⁴ங் ஸல்லபந்தியா வா பாசித்தியங் வுத்தந்தி யோஜனா.

    Rahassādavasena purisassa hatthapāsaṃ samāgantvā tena saddhiṃ sallapantiyā vā pācittiyaṃ vuttanti yojanā.

    2196-7. யா பன பி⁴க்கு²னீ ஸசே மனுஸ்ஸபுரிஸஸ்ஸ ஹத்த²பாஸங் விஜஹித்வா ஸந்திட்ட²தி வா ஸல்லபதி வா, யக்க²பேததிரச்சா²னக³தானங் ஹத்த²பாஸங் அவிஜஹித்வா ஸந்திட்ட²தி வா ஸல்லபதி வா, தஸ்ஸா து³க்கடங் பரிதீ³பிதந்தி யோஜனா.

    2196-7. Yā pana bhikkhunī sace manussapurisassa hatthapāsaṃ vijahitvā santiṭṭhati vā sallapati vā, yakkhapetatiracchānagatānaṃ hatthapāsaṃ avijahitvā santiṭṭhati vā sallapati vā, tassā dukkaṭaṃ paridīpitanti yojanā.

    விஞ்ஞுக்³க³ஹணேன அவிஞ்ஞூ புரிஸோ அனாபத்திங் ந கரோதீதி தீ³பேதி.

    Viññuggahaṇena aviññū puriso anāpattiṃ na karotīti dīpeti.

    2198. அஞ்ஞவிஹிதாயாதி ரஹோஅஸ்ஸாத³தோ அஞ்ஞங் சிந்தெந்தியா. யதா²ஹ ‘‘ரஹோஅஸ்ஸாத³தோ அஞ்ஞவிஹிதாவ ஹுத்வா’’தி (பாசி॰ அட்ட²॰ 841). சதுத்தே²ன, ச²ட்டே²ன ச ஸமுட்டா²னேன ஸமுட்டா²னதோ தெ²ய்யஸத்த²ஸமுட்டா²னங். ஸந்திட்ட²னஸல்லபனவஸேன க்ரியங். ஸஞ்ஞாய விமொக்கோ² ஏதஸ்மிந்தி ஸஞ்ஞாவிமொக்க²கங்.

    2198.Aññavihitāyāti rahoassādato aññaṃ cintentiyā. Yathāha ‘‘rahoassādato aññavihitāva hutvā’’ti (pāci. aṭṭha. 841). Catutthena, chaṭṭhena ca samuṭṭhānena samuṭṭhānato theyyasatthasamuṭṭhānaṃ. Santiṭṭhanasallapanavasena kriyaṃ. Saññāya vimokkho etasminti saññāvimokkhakaṃ.

    பட²மங்.

    Paṭhamaṃ.

    2199. படிச்ச²ன்னே ஓகாஸேதி குட்டாதீ³ஸு யேன கேனசி படிச்ச²ன்னே ஓகாஸே. இத³ங் வசனங்.

    2199.Paṭicchanne okāseti kuṭṭādīsu yena kenaci paṭicchanne okāse. Idaṃ vacanaṃ.

    து³தியங்.

    Dutiyaṃ.

    2200. ததியே ‘‘அஜ்ஜோ²காஸே’’தி ச சதுத்தே² ‘‘ரதி²காய, ப்³யூஹே, ஸிங்கா⁴டகே’’தி பதா³னி ச வஜ்ஜெத்வா அவஸேஸங் ஸந்தா⁴யாஹ ‘‘அபுப்³ப³ங் நத்தி² கிஞ்சிபீ’’தி. எத்த² ‘‘வத்தப்³ப³’’ந்தி ஸேஸோ. எத்த² ச ரதி²காயாதி ரச்சா²ய. ப்³யூஹேதி அனிப்³பி³த்³த⁴ரச்சா²ய. ஸிங்கா⁴டகேதி சச்சரே ஓகாஸே, திகோணங் வா சதுகோணங் வா மக்³க³ஸமோதா⁴னட்டா²னேதி வுத்தங் ஹோதி.

    2200. Tatiye ‘‘ajjhokāse’’ti ca catutthe ‘‘rathikāya, byūhe, siṅghāṭake’’ti padāni ca vajjetvā avasesaṃ sandhāyāha ‘‘apubbaṃ natthi kiñcipī’’ti. Ettha ‘‘vattabba’’nti seso. Ettha ca rathikāyāti racchāya. Byūheti anibbiddharacchāya. Siṅghāṭaketi caccare okāse, tikoṇaṃ vā catukoṇaṃ vā maggasamodhānaṭṭhāneti vuttaṃ hoti.

    ததியசதுத்தா²னி.

    Tatiyacatutthāni.

    2201-2. ‘‘யா பன பி⁴க்கு²னீ புரேப⁴த்தங் குலானி உபஸங்கமித்வா ஆஸனே நிஸீதி³த்வா ஸாமிகே அனாபுச்சா² பக்கமெய்ய, பாசித்திய’’ந்தி (பாசி॰ 855) வசனதோ யா பன பி⁴க்கு²னீ புரேப⁴த்தங் குலானி உபஸங்கமித்வா ச²த³னந்தோ ஆஸனே நிஸீதி³த்வா ஸாமிகே அனாபுச்சா² அனோவஸ்ஸகப்பதே³ஸங் அதிக்கமேதி, யா ச அஜ்ஜோ²காஸே வா நிஸீதி³த்வா ஸசே உபசாரங் அதிக்கமேதி, தஸ்ஸா பட²மே பதே³ து³க்கடங் ஹோதி, து³தியே பதே³ பாசித்தி பரியாபுதாதி யோஜனா. ‘‘ஆஸனே’’தி இமினா பல்லங்கமாபு⁴ஜித்வா நிஸீத³னாரஹமாஸனங் அதி⁴ப்பேதங். யதா²ஹ – ‘‘ஆஸனங் நாம பல்லங்கஸ்ஸ ஓகாஸோ வுச்சதீ’’தி (பாசி॰ 856). அனோவஸ்ஸப்பதே³ஸந்தி நிப்³ப³கோஸப்³ப⁴ந்தரங். அப்³போ⁴காஸே ஆபத்திகெ²த்தங் த³ஸ்ஸேதுமாஹ ‘‘உபசாரம்பி வா ஸசே’’தி. உபசாரந்தி த்³வாத³ஸஹத்த²ப்பமாணங் பதே³ஸங். யதா²ஹ க³ண்டி²பதே³ ‘‘உபசாரோ த்³வாத³ஸஹத்தோ²’’தி.

    2201-2. ‘‘Yā pana bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkameyya, pācittiya’’nti (pāci. 855) vacanato yā pana bhikkhunī purebhattaṃ kulāni upasaṅkamitvā chadananto āsane nisīditvā sāmike anāpucchā anovassakappadesaṃ atikkameti, yā ca ajjhokāse vā nisīditvā sace upacāraṃ atikkameti, tassā paṭhame pade dukkaṭaṃ hoti, dutiye pade pācitti pariyāputāti yojanā. ‘‘Āsane’’ti iminā pallaṅkamābhujitvā nisīdanārahamāsanaṃ adhippetaṃ. Yathāha – ‘‘āsanaṃ nāma pallaṅkassa okāso vuccatī’’ti (pāci. 856). Anovassappadesanti nibbakosabbhantaraṃ. Abbhokāse āpattikhettaṃ dassetumāha ‘‘upacārampi vā sace’’ti. Upacāranti dvādasahatthappamāṇaṃ padesaṃ. Yathāha gaṇṭhipade ‘‘upacāro dvādasahattho’’ti.

    2203. ‘‘ததா²’’தி இமினா ‘‘து³க்கடங் ஸமுதீ³ரித’’ந்தி இத³ங் பச்சாமஸதி. ஆபுட்டே² அனாபுட்ட²ஸஞ்ஞாய ஆபுட்டே² விசிகிச்ச²தோ பக்கமந்தியா ததா² து³க்கடந்தி யோஜனா. எத்த² ச ‘‘பி⁴க்கு²னியா’’தி ஸம்ப³ந்தி⁴னியா ஸமானத்தா ‘‘விசிகிச்ச²ந்தியா’’தி வத்தப்³பே³ லிங்க³விபல்லாஸவஸேன ‘‘விசிகிச்ச²தோ’’தி வுத்தந்தி த³ட்ட²ப்³ப³ங்.

    2203.‘‘Tathā’’ti iminā ‘‘dukkaṭaṃ samudīrita’’nti idaṃ paccāmasati. Āpuṭṭhe anāpuṭṭhasaññāya āpuṭṭhe vicikicchato pakkamantiyā tathā dukkaṭanti yojanā. Ettha ca ‘‘bhikkhuniyā’’ti sambandhiniyā samānattā ‘‘vicikicchantiyā’’ti vattabbe liṅgavipallāsavasena ‘‘vicikicchato’’ti vuttanti daṭṭhabbaṃ.

    2204. கி³லானாயாதி யா தாதி³ஸேன கே³லஞ்ஞேன ஆபுச்சி²துங் ந ஸக்கோதி. ஆபதா³ஸூதி க⁴ரே அக்³கி³ உட்டி²தோ ஹோதி சோரா வா, ஏவரூபே உபத்³த³வே அனாபுச்சா² பக்கமந்தியா அனாபத்தி.

    2204.Gilānāyāti yā tādisena gelaññena āpucchituṃ na sakkoti. Āpadāsūti ghare aggi uṭṭhito hoti corā vā, evarūpe upaddave anāpucchā pakkamantiyā anāpatti.

    பஞ்சமங்.

    Pañcamaṃ.

    2205-6. ‘‘க³ச்ச²ந்தியா வஜந்தியா’’தி ச நிஸீத³னநிபஜ்ஜனாவஸானத³ஸ்ஸனத்த²ங் வுத்தங். பாசித்தியங் பன பச்சா²ப⁴த்தங் ஸாமிகே ‘‘இத⁴ நிஸீதா³ம வா ஸயாம வா’’தி அனாபுச்சி²த்வா நிஸின்னநிபன்னபச்சயா ஹோதீதி வேதி³தப்³ப³ங். பச்சா²ப⁴த்தங் ஸாமிகே அனாபுச்சா² ஆஸனே நிஸீதி³த்வா க³ச்ச²ந்தியா ஏகா பாசித்தி ஹோதீதி யோஜனா. ஏஸ நயோ ‘‘நிபஜ்ஜித்வா’’திஆதீ³ஸுபி.

    2205-6.‘‘Gacchantiyā vajantiyā’’ti ca nisīdananipajjanāvasānadassanatthaṃ vuttaṃ. Pācittiyaṃ pana pacchābhattaṃ sāmike ‘‘idha nisīdāma vā sayāma vā’’ti anāpucchitvā nisinnanipannapaccayā hotīti veditabbaṃ. Pacchābhattaṃ sāmike anāpucchā āsane nisīditvā gacchantiyā ekā pācitti hotīti yojanā. Esa nayo ‘‘nipajjitvā’’tiādīsupi.

    யதா² பன தத்த² அஸங்ஹாரிமே அனாபத்தி, ஏவமித⁴ து⁴வபஞ்ஞத்தே வா அனாபத்தீதி.

    Yathā pana tattha asaṃhārime anāpatti, evamidha dhuvapaññatte vā anāpattīti.

    ச²ட்ட²ங்.

    Chaṭṭhaṃ.

    2207. திஸமுட்டா²னந்தி ஸசித்தகேஹி தீஹி ஸமுட்டா²னேஹி ஸமுட்டா²னதோ.

    2207.Tisamuṭṭhānanti sacittakehi tīhi samuṭṭhānehi samuṭṭhānato.

    அட்ட²மங்.

    Aṭṭhamaṃ.

    2208. யா பன பி⁴க்கு²னீ அத்தானம்பி வா பரம்பி வா நிரயப்³ரஹ்மசரியேஹி அபி⁴ஸபெய்ய, தஸ்ஸா வாசதோ வாசதோ ஸியா பாசித்தீதி யோஜனா. தத்த² அபி⁴ஸபெய்யாதி ஸபத²ங் கரெய்ய, ‘‘நிரயே நிப்³ப³த்தாமி, அவீசிம்ஹி நிப்³ப³த்தாமீ’’தி அத்தானங் வா ‘‘நிரயே நிப்³ப³த்தது, அவீசிம்ஹி நிப்³ப³த்ததூ’’தி பரங் வா ‘‘கி³ஹினீ ஹோமி, ஓதா³தவத்தா² ஹோமீ’’தி அத்தானங் வா ‘‘கி³ஹினீ ஹோது, ஓதா³தவத்தா² ஹோதூ’’தி பரங் வா அபி⁴ஸபெய்யாதி வுத்தங் ஹோதி.

    2208. Yā pana bhikkhunī attānampi vā parampi vā nirayabrahmacariyehi abhisapeyya, tassā vācato vācato siyā pācittīti yojanā. Tattha abhisapeyyāti sapathaṃ kareyya, ‘‘niraye nibbattāmi, avīcimhi nibbattāmī’’ti attānaṃ vā ‘‘niraye nibbattatu, avīcimhi nibbattatū’’ti paraṃ vā ‘‘gihinī homi, odātavatthā homī’’ti attānaṃ vā ‘‘gihinī hotu, odātavatthā hotū’’ti paraṃ vā abhisapeyyāti vuttaṃ hoti.

    2210. அக்கோஸதி அத்தானங் வா பரங் வாதி ஸம்ப³ந்தோ⁴. திகபாசித்தியந்தி உபஸம்பன்னாய உபஸம்பன்னஸஞ்ஞாவேமதிகாஅனுபஸம்பன்னஸஞ்ஞாவஸேன. ஸேஸாயாதி அனுபஸம்பன்னாய. அனுபஸம்பன்னாய உபஸம்பன்னஸஞ்ஞா, வேமதிகா, அனுபஸம்பன்னஸஞ்ஞா அக்கோஸதி, து³க்கடந்தி ஏவங் திகது³க்கடங்.

    2210. Akkosati attānaṃ vā paraṃ vāti sambandho. Tikapācittiyanti upasampannāya upasampannasaññāvematikāanupasampannasaññāvasena. Sesāyāti anupasampannāya. Anupasampannāya upasampannasaññā, vematikā, anupasampannasaññā akkosati, dukkaṭanti evaṃ tikadukkaṭaṃ.

    2211. அத்த²த⁴ம்மானுஸாஸனிங் புரக்க²த்வா வத³ந்தீனங் அனாபத்தீதி யோஜனா. யதா²ஹ அட்ட²கதா²யங் ‘‘அத்த²புரெக்கா²ராயாதி அட்ட²கத²ங் கதெ²ந்தியா. த⁴ம்மபுரெக்கா²ராயாதி பாளிங் வாசெந்தியா. அனுஸாஸனிபுரெக்கா²ராயாதி ‘இதா³னிபி த்வங் ஏதி³ஸா, ஸாது⁴ விரமஸ்ஸு, நோ சே விரமஸி, அத்³தா⁴ புன ஏவரூபானி கம்மானி கத்வா நிரயே உப்பஜ்ஜிஸ்ஸஸி, திரச்சா²னயோனியா உப்பஜ்ஜிஸ்ஸஸீ’தி ஏவங் அனுஸாஸனியங் ட²த்வா வத³ந்தியா அனாபத்தீ’’தி (பாசி॰ அட்ட²॰ 878).

    2211. Atthadhammānusāsaniṃ purakkhatvā vadantīnaṃ anāpattīti yojanā. Yathāha aṭṭhakathāyaṃ ‘‘atthapurekkhārāyāti aṭṭhakathaṃ kathentiyā. Dhammapurekkhārāyāti pāḷiṃ vācentiyā. Anusāsanipurekkhārāyāti ‘idānipi tvaṃ edisā, sādhu viramassu, no ce viramasi, addhā puna evarūpāni kammāni katvā niraye uppajjissasi, tiracchānayoniyā uppajjissasī’ti evaṃ anusāsaniyaṃ ṭhatvā vadantiyā anāpattī’’ti (pāci. aṭṭha. 878).

    நவமங்.

    Navamaṃ.

    2212. வதி⁴த்வாதி ஸத்தா²தீ³ஹி பஹரித்வா. வதி⁴த்வா வாதி எத்த² வா-ஸத்³தோ³ பாளியங் ‘‘வதி⁴த்வா வதி⁴த்வா’’தி (பாசி॰ 880) வுத்தங் ஆமேடி³தங் ஸூசேதி.

    2212.Vadhitvāti satthādīhi paharitvā. Vadhitvā vāti ettha vā-saddo pāḷiyaṃ ‘‘vadhitvā vadhitvā’’ti (pāci. 880) vuttaṃ āmeḍitaṃ sūceti.

    2213. எத்தா²தி இமஸ்மிங் ஸிக்கா²பதே³. காயவாசாசித்தஸமுட்டா²னங் து⁴ரனிக்கே²பஸமுட்டா²னங் நாம, ஸமனுபா⁴ஸனஸமுட்டா²னந்திபி ஏதஸ்ஸேவ நாமங்.

    2213.Etthāti imasmiṃ sikkhāpade. Kāyavācācittasamuṭṭhānaṃ dhuranikkhepasamuṭṭhānaṃ nāma, samanubhāsanasamuṭṭhānantipi etasseva nāmaṃ.

    த³ஸமங்.

    Dasamaṃ.

    அந்த⁴காரவக்³கோ³ து³தியோ.

    Andhakāravaggo dutiyo.

    2214. யா பன பி⁴க்கு²னீ நக்³கா³ அனிவத்தா² அபாருதா ஹுத்வா நஹாயதி, அஸ்ஸா ஸப்³ப³பயோகே³ து³க்கடங். தஸ்ஸ நஹானஸ்ஸ வோஸானே பரியோஸானே ஸா பி⁴க்கு²னீ ஜினவுத்தங் ஜினேன ப⁴க³வதா பி⁴க்கு²னீனங் பஞ்ஞத்தங் தோ³ஸங் பாசித்தியாபத்திங் ஸமுபேதி ஆபஜ்ஜதீதி யோஜனா. பி⁴க்கு²னி தோ³ஸந்தி எத்த² கா³தா²ப³ந்த⁴வஸேன ரஸ்ஸோ கதோ.

    2214. Yā pana bhikkhunī naggā anivatthā apārutā hutvā nahāyati, assā sabbapayoge dukkaṭaṃ. Tassa nahānassa vosāne pariyosāne sā bhikkhunī jinavuttaṃ jinena bhagavatā bhikkhunīnaṃ paññattaṃ dosaṃ pācittiyāpattiṃ samupeti āpajjatīti yojanā. Bhikkhuni dosanti ettha gāthābandhavasena rasso kato.

    2215. அச்சி²ன்னசீவராதி அச்சி²ன்னஉத³கஸாடிகசீவரா. நட்ட²சீவராதி சோராதீ³ஹி நட்ட²உத³கஸாடிகசீவரா. ஆபதா³ஸு வாதி ‘‘மஹக்³க⁴ங் இமங் தி³ஸ்வா சோராபி ஹரெய்யு’’ந்தி ஏவரூபாஸு ஆபதா³ஸு வா நக்³கா³ய நஹாயந்தியா ந தோ³ஸோ.

    2215.Acchinnacīvarāti acchinnaudakasāṭikacīvarā. Naṭṭhacīvarāti corādīhi naṭṭhaudakasāṭikacīvarā. Āpadāsu vāti ‘‘mahagghaṃ imaṃ disvā corāpi hareyyu’’nti evarūpāsu āpadāsu vā naggāya nahāyantiyā na doso.

    பட²மங்.

    Paṭhamaṃ.

    2216. து³தியேதி ‘‘உத³கஸாடிகங் பன பி⁴க்கு²னியா காரயமானாயா’’திஆதி³ஸிக்கா²பதே³ (பாசி॰ 888).

    2216.Dutiyeti ‘‘udakasāṭikaṃ pana bhikkhuniyā kārayamānāyā’’tiādisikkhāpade (pāci. 888).

    து³தியங்.

    Dutiyaṃ.

    2217-8. து³ஸ்ஸிப்³பி³தங் சீவரந்தி அஸக்கச்சஸிப்³பி³தங் சீவரங். விஸிப்³பெ³த்வாதி து³ஸ்ஸிப்³பி³தங் புன ஸிப்³ப³னத்தா²ய ஸயங் வா விக³தஸிப்³ப³னங் கத்வா. ‘‘விஸிப்³பா³பெத்வா’’தி ஸேஸோ. யதா²ஹ ‘‘விஸிப்³பெ³த்வா வா விஸிப்³பா³பெத்வா வா’’தி (பாசி॰ 893). அனந்தராயாதி த³ஸஸு அந்தராயேஸு அஞ்ஞதரந்தராயரஹிதா. தங் விஸிப்³பி³தங், விஸிப்³பா³பிதங் வா சீவரங். ‘‘அனந்தராயா தங் பச்சா²’’தி வத்தப்³பே³ கா³தா²ப³ந்த⁴வஸேன ரஸ்ஸோ கதோ. ந ஸிப்³பெ³ய்யாதி எத்தா²பி ‘‘ந ஸிப்³பா³பெய்யா’’தி ஸேஸோ. யதா²ஹ ‘‘நேவ ஸிப்³பெ³ய்ய, ந ஸிப்³பா³பனாய உஸ்ஸுக்கங் கரெய்யா’’தி (பாசி॰ 893).

    2217-8.Dussibbitaṃ cīvaranti asakkaccasibbitaṃ cīvaraṃ. Visibbetvāti dussibbitaṃ puna sibbanatthāya sayaṃ vā vigatasibbanaṃ katvā. ‘‘Visibbāpetvā’’ti seso. Yathāha ‘‘visibbetvā vā visibbāpetvā vā’’ti (pāci. 893). Anantarāyāti dasasu antarāyesu aññatarantarāyarahitā. Taṃ visibbitaṃ, visibbāpitaṃ vā cīvaraṃ. ‘‘Anantarāyā taṃ pacchā’’ti vattabbe gāthābandhavasena rasso kato. Na sibbeyyāti etthāpi ‘‘na sibbāpeyyā’’ti seso. Yathāha ‘‘neva sibbeyya, na sibbāpanāya ussukkaṃ kareyyā’’ti (pāci. 893).

    சதுபஞ்சாஹந்தி எத்த² ‘‘உத்தரிச²ப்பஞ்சவாசாஹி (பாசி॰ 62-64), உத்தரிதி³ரத்ததிரத்த’’ந்திஆதீ³ஸு (பாசி॰ 51-52) விய அப்பஸங்க்²யாய ப³ஹுஸங்க்²யாயங் அந்தோக³த⁴த்தேபி உப⁴யவசனங் லோகவோஹாரவஸேன வசனஸிலிட்ட²தாயாதி த³ட்ட²ப்³ப³ங். து⁴ரேதி ஸிப்³ப³னுஸ்ஸாஹே. நிக்கி²த்தமத்தேதி விஸ்ஸட்ட²மத்தே.

    Catupañcāhanti ettha ‘‘uttarichappañcavācāhi (pāci. 62-64), uttaridirattatiratta’’ntiādīsu (pāci. 51-52) viya appasaṅkhyāya bahusaṅkhyāyaṃ antogadhattepi ubhayavacanaṃ lokavohāravasena vacanasiliṭṭhatāyāti daṭṭhabbaṃ. Dhureti sibbanussāhe. Nikkhittamatteti vissaṭṭhamatte.

    2219. திகபாசித்தியங் வுத்தந்தி உபஸம்பன்னாய உபஸம்பன்னஸஞ்ஞா, வேமதிகா, அனுபஸம்பன்னஸஞ்ஞாதி தீஸு வாரேஸு திகபாசித்தியங் வுத்தங். ஸேஸாயாதி அனுபஸம்பன்னாய. திகது³க்கடந்தி வாரத்தயே து³க்கடத்தயங்.

    2219.Tikapācittiyaṃ vuttanti upasampannāya upasampannasaññā, vematikā, anupasampannasaññāti tīsu vāresu tikapācittiyaṃ vuttaṃ. Sesāyāti anupasampannāya. Tikadukkaṭanti vārattaye dukkaṭattayaṃ.

    2220. உபி⁴ன்னந்தி உபஸம்பன்னானுபஸம்பன்னானங். அஞ்ஞஸ்மிந்தி சீவரதோ அஞ்ஞஸ்மிங். அந்தராயேபி வா ஸதீதி ராஜசோராதி³அந்தராயானங் த³ஸன்னங் அஞ்ஞதரே ஸதி.

    2220.Ubhinnanti upasampannānupasampannānaṃ. Aññasminti cīvarato aññasmiṃ. Antarāyepi vā satīti rājacorādiantarāyānaṃ dasannaṃ aññatare sati.

    2221. ‘‘து⁴ரனிக்கே²பனங் நாம, ஸமுட்டா²னமித³ங் மத’’ந்தி இத³ங் அட்ட²கதா²ய ‘‘து⁴ரனிக்கே²பஸமுட்டா²ன’’ந்தி (பாசி॰ அட்ட²॰ 893) வுத்தமேவ க³ஹெத்வா வுத்தங், தேரஸஸு ஸமுட்டா²னஸீஸேஸு ‘‘து⁴ரனிக்கே²பஸமுட்டா²ன’’ந்தி விஸுங் ஸமுட்டா²னஸீஸங் நாம நத்தி². மாதிகட்ட²கதா²யஞ்ச ‘‘ஸமனுபா⁴ஸனஸமுட்டா²ன’’ந்தி (கங்கா²॰ அட்ட²॰ சீவரஸிப்³ப³னஸிக்கா²பத³வண்ணனா, அத்த²தோ ஸமானங்) வுத்தங், தங் ஸமுட்டா²னஸீஸேஸு அந்தோக³த⁴மேவ. தஸ்மா ‘‘து⁴ரனிக்கே²பஸமுட்டா²ன’’ந்தி இத³ங் ஸமனுபா⁴ஸனஸமுட்டா²னஸ்ஸேவ பரியாயோதி க³ஹேதப்³ப³ங்.

    2221.‘‘Dhuranikkhepanaṃ nāma, samuṭṭhānamidaṃ mata’’nti idaṃ aṭṭhakathāya ‘‘dhuranikkhepasamuṭṭhāna’’nti (pāci. aṭṭha. 893) vuttameva gahetvā vuttaṃ, terasasu samuṭṭhānasīsesu ‘‘dhuranikkhepasamuṭṭhāna’’nti visuṃ samuṭṭhānasīsaṃ nāma natthi. Mātikaṭṭhakathāyañca ‘‘samanubhāsanasamuṭṭhāna’’nti (kaṅkhā. aṭṭha. cīvarasibbanasikkhāpadavaṇṇanā, atthato samānaṃ) vuttaṃ, taṃ samuṭṭhānasīsesu antogadhameva. Tasmā ‘‘dhuranikkhepasamuṭṭhāna’’nti idaṃ samanubhāsanasamuṭṭhānasseva pariyāyoti gahetabbaṃ.

    ததியங்.

    Tatiyaṃ.

    2222. பஞ்ச அஹானி பஞ்சாஹங், பஞ்சாஹமேவ பஞ்சாஹிகங். ‘‘அதிக்கமெய்யா’’தி கிரியாய த்³விகம்மகத்தா ‘‘பஞ்சாஹிக’’ந்தி ச ‘‘ஸங்கா⁴டிசார’’ந்தி ச உபயோக³த்தே² ஏவ உபயோக³வசனங். ஸங்க⁴டிதட்டே²ன ஸங்கா⁴டி, இதி வக்க²மானானங் பஞ்சன்னங் சீவரானமேவாதி⁴வசனங், ஸங்கா⁴டீனங் சாரோ ஸங்கா⁴டிசாரோ, பரிபோ⁴க³வஸேன வா ஓதாபனவஸேன வா பரிவத்தனந்தி அத்தோ². ‘‘பஞ்சாஹிகங் ஸங்கா⁴டிசாரங் அதிக்கமெய்யாதி பஞ்சமங் தி³வஸங் பஞ்ச சீவரானி நேவ நிவாஸேதி ந பாருபதி ந ஓதாபேதி பஞ்சமங் தி³வஸங் அதிக்காமேதி, ஆபத்தி பாசித்தியஸ்ஸா’’தி (பாசி॰ 899) வசனதோ பஞ்சதி³வஸப்³ப⁴ந்தரே யங் கிஞ்சி அகத்வா அதிக்காமெந்தியா சீவரக³ணனாய பாசித்தி ஹோதீதி த³ஸ்ஸேதுமாஹ ‘‘யாதிக்கமெய்யா’’திஆதி³.

    2222. Pañca ahāni pañcāhaṃ, pañcāhameva pañcāhikaṃ. ‘‘Atikkameyyā’’ti kiriyāya dvikammakattā ‘‘pañcāhika’’nti ca ‘‘saṅghāṭicāra’’nti ca upayogatthe eva upayogavacanaṃ. Saṅghaṭitaṭṭhena saṅghāṭi, iti vakkhamānānaṃ pañcannaṃ cīvarānamevādhivacanaṃ, saṅghāṭīnaṃ cāro saṅghāṭicāro, paribhogavasena vā otāpanavasena vā parivattananti attho. ‘‘Pañcāhikaṃ saṅghāṭicāraṃ atikkameyyāti pañcamaṃ divasaṃ pañca cīvarāni neva nivāseti na pārupati na otāpeti pañcamaṃ divasaṃ atikkāmeti, āpatti pācittiyassā’’ti (pāci. 899) vacanato pañcadivasabbhantare yaṃ kiñci akatvā atikkāmentiyā cīvaragaṇanāya pācitti hotīti dassetumāha ‘‘yātikkameyyā’’tiādi.

    2223. திசீவரந்தி அந்தரவாஸகஉத்தராஸங்க³ஸங்கா⁴டிஸங்கா²தங் திசீவரஞ்ச. ஸங்கச்சீதி த²னவேட²னஸங்கா²தங் சீவரஞ்ச. த³கஸாடீதி உதுனிகாலே நிவாஸேதப்³ப³உத³கஸாடிசீவரஞ்ச. இதி இமே பஞ்ச. பஞ்ச தூதி பஞ்ச சீவரானி நாம.

    2223.Ticīvaranti antaravāsakauttarāsaṅgasaṅghāṭisaṅkhātaṃ ticīvarañca. Saṃkaccīti thanaveṭhanasaṅkhātaṃ cīvarañca. Dakasāṭīti utunikāle nivāsetabbaudakasāṭicīvarañca. Iti ime pañca. Pañca tūti pañca cīvarāni nāma.

    2224-5. திகபாசித்தீதி பஞ்சாஹாதிக்கந்தஸஞ்ஞா, வேமதிகா, அனதிக்கந்தஸஞ்ஞாதி விகப்பத்தயே பாசித்தியத்தயங் ஹோதி. பஞ்சாஹானதிக்கந்தே அதிக்கந்தஸஞ்ஞாவேமதிகானங் வஸேன த்³விகது³க்கடங்.

    2224-5.Tikapācittīti pañcāhātikkantasaññā, vematikā, anatikkantasaññāti vikappattaye pācittiyattayaṃ hoti. Pañcāhānatikkante atikkantasaññāvematikānaṃ vasena dvikadukkaṭaṃ.

    ‘‘பஞ்சமே தி³வஸே’’திஆதி³ அனாபத்திவாரஸந்த³ஸ்ஸனங். நிஸேவதீதி நிவாஸேதி வா பாருபதி வா. ஓதாபேதீதி எத்த² வா-ஸத்³தோ³ லுத்தனித்³தி³ட்டோ², ஓதாபேதி வாதி அத்தோ². ஆபதா³ஸுபீதி மஹக்³க⁴ங் சீவரங், ந ஸக்கா ஹோதி சோரப⁴யாதீ³ஸு பரிபு⁴ஞ்ஜிதுங், ஏவரூபே உபத்³த³வே அனாபத்தி.

    ‘‘Pañcame divase’’tiādi anāpattivārasandassanaṃ. Nisevatīti nivāseti vā pārupati vā. Otāpetīti ettha vā-saddo luttaniddiṭṭho, otāpeti vāti attho. Āpadāsupīti mahagghaṃ cīvaraṃ, na sakkā hoti corabhayādīsu paribhuñjituṃ, evarūpe upaddave anāpatti.

    சதுத்த²ங்.

    Catutthaṃ.

    2226. அஞ்ஞிஸ்ஸா ஸங்கமேதப்³ப³சீவரங் அனாபுச்சா² க³ஹெத்வா யா பரிபு⁴ஞ்ஜதி, தஸ்ஸா பாசித்தியங் ஸியாதி யோஜனா, அஞ்ஞிஸ்ஸா உபஸம்பன்னாய ஸந்தகங் பஞ்சன்னங் சீவரானங் அஞ்ஞதரங் தஸ்ஸா அவத்வா ஆதா³ய புன தஸ்ஸா தா³தப்³ப³ங், அத³த்வா யா பி⁴க்கு²னீ படிஸேவதி, தஸ்ஸா பாசித்தியங் ஹோதீதி அத்தோ². ‘‘ஸங்கமேதப்³ப³சீவரங் ஸங்கமனீய’’ந்தி பரியாயஸத்³தா³ ஏதே. யதா²ஹ ‘‘சீவரஸங்கமனீயந்தி ஸங்கமேதப்³ப³சீவரங், அஞ்ஞிஸ்ஸா ஸந்தகங் அனாபுச்சா² க³ஹிதங் புன படிதா³தப்³ப³சீவரந்தி அத்தோ²’’தி (பாசி॰ அட்ட²॰ 903).

    2226. Aññissā saṅkametabbacīvaraṃ anāpucchā gahetvā yā paribhuñjati, tassā pācittiyaṃ siyāti yojanā, aññissā upasampannāya santakaṃ pañcannaṃ cīvarānaṃ aññataraṃ tassā avatvā ādāya puna tassā dātabbaṃ, adatvā yā bhikkhunī paṭisevati, tassā pācittiyaṃ hotīti attho. ‘‘Saṅkametabbacīvaraṃ saṅkamanīya’’nti pariyāyasaddā ete. Yathāha ‘‘cīvarasaṅkamanīyanti saṅkametabbacīvaraṃ, aññissā santakaṃ anāpucchā gahitaṃ puna paṭidātabbacīvaranti attho’’ti (pāci. aṭṭha. 903).

    2227. திகபாசித்தியங் வுத்தந்தி ‘‘உபஸம்பன்னாய உபஸம்பன்னஸஞ்ஞா…பே॰… வேமதிகா …பே॰… அனுபஸம்பன்னஸஞ்ஞா சீவரஸங்கமனீயங் தா⁴ரேதி, ஆபத்தி பாசித்தியஸ்ஸா’’தி (பாசி॰ 905) ஏவங் திகபாசித்தியங் பாளியங் வுத்தங். ஸேஸாயாதி அனுபஸம்பன்னாய. ‘‘திகது³க்கட’’ந்தி இத³ஞ்ச வுத்தனயமேவ. ஆபதா³ஸூதி ஸசே அபாருதங் வா அனிவத்த²ங் வா சோரா ஹரந்தி, ஏவரூபாஸு ஆபதா³ஸு வா.

    2227.Tikapācittiyaṃ vuttanti ‘‘upasampannāya upasampannasaññā…pe… vematikā …pe… anupasampannasaññā cīvarasaṅkamanīyaṃ dhāreti, āpatti pācittiyassā’’ti (pāci. 905) evaṃ tikapācittiyaṃ pāḷiyaṃ vuttaṃ. Sesāyāti anupasampannāya. ‘‘Tikadukkaṭa’’nti idañca vuttanayameva. Āpadāsūti sace apārutaṃ vā anivatthaṃ vā corā haranti, evarūpāsu āpadāsu vā.

    2228. ஏதங் ஸமுட்டா²னங் கதி²னேன துல்யந்தி யோஜனா. க³ஹணங், பரிபோ⁴கோ³ ச க்ரியங். அனாபுச்ச²னங் அக்ரியங்.

    2228. Etaṃ samuṭṭhānaṃ kathinena tulyanti yojanā. Gahaṇaṃ, paribhogo ca kriyaṃ. Anāpucchanaṃ akriyaṃ.

    பஞ்சமங்.

    Pañcamaṃ.

    2229. லபி⁴தப்³ப³ங் து சீவரந்தி லபி⁴தப்³ப³ங் விகப்பனுபக³ங் சீவரங். நிவாரேதீதி யதா² தே தா³துகாமா ந தெ³ந்தி, ஏவங் அந்தராயங் பரக்கமதி. பாசித்திங் பரிதீ³பயேதி ஸசே தஸ்ஸா வசனேன தே ந தெ³ந்தி, பி⁴க்கு²னியா பாசித்தியங் வதெ³ய்யாதி அத்தோ².

    2229.Labhitabbaṃ tu cīvaranti labhitabbaṃ vikappanupagaṃ cīvaraṃ. Nivāretīti yathā te dātukāmā na denti, evaṃ antarāyaṃ parakkamati. Pācittiṃ paridīpayeti sace tassā vacanena te na denti, bhikkhuniyā pācittiyaṃ vadeyyāti attho.

    2230. எத்த² பட²மங் ‘‘ஸங்க⁴ஸ்ஸா’’தி வுத்தத்தா க³ணஸ்ஸாதி த்³வே தயோவ க³ஹேதப்³பா³. லாபே⁴தி எத்த² ‘‘நிவாரிதே’’தி ஸேஸோ. ஸசே அஞ்ஞங் பரிக்கா²ரங் நிவாரேதி, ததே²வ து³க்கடந்தி யோஜனா. அஞ்ஞந்தி விகப்பனுபக³சீவரதோ அஞ்ஞங். பரிக்கா²ரந்தி யங் கிஞ்சி தா²லகாதீ³னங் வா ஸப்பிதேலாதீ³னங் வா அஞ்ஞதரங்.

    2230. Ettha paṭhamaṃ ‘‘saṅghassā’’ti vuttattā gaṇassāti dve tayova gahetabbā. Lābheti ettha ‘‘nivārite’’ti seso. Sace aññaṃ parikkhāraṃ nivāreti, tatheva dukkaṭanti yojanā. Aññanti vikappanupagacīvarato aññaṃ. Parikkhāranti yaṃ kiñci thālakādīnaṃ vā sappitelādīnaṃ vā aññataraṃ.

    2231. ஆனிஸங்ஸங் நித³ஸ்ஸெத்வாதி ‘‘கித்தகங் அக்³க⁴னகங் தா³துகாமத்தா²தி புச்ச²தி, ‘எத்தகங் நாமா’தி வத³ந்தி, ‘ஆக³மேத² தாவ, இதா³னி வத்து² மஹக்³க⁴ங், கதிபாஹேன கப்பாஸே ஆக³தே ஸமக்³க⁴ங் ப⁴விஸ்ஸதீ’’தி ஏவங் ஆனிஸங்ஸங் த³ஸ்ஸெத்வா. ந தோ³ஸதாதி ந தோ³ஸோ, அனாபத்தீதி அத்தோ².

    2231.Ānisaṃsaṃ nidassetvāti ‘‘kittakaṃ agghanakaṃ dātukāmatthāti pucchati, ‘ettakaṃ nāmā’ti vadanti, ‘āgametha tāva, idāni vatthu mahagghaṃ, katipāhena kappāse āgate samagghaṃ bhavissatī’’ti evaṃ ānisaṃsaṃ dassetvā. Na dosatāti na doso, anāpattīti attho.

    ச²ட்ட²ங்.

    Chaṭṭhaṃ.

    2232-3. த⁴ம்மிகங் ஸமக்³கே³ன ஸங்கே⁴ன ஸன்னிபதித்வா கரியமானங் சீவரானங் விப⁴ங்க³ங் பா⁴ஜனங் யா பி⁴க்கு²னீ படிஸேதெ⁴ய்ய படிபா³ஹெய்ய, தஸ்ஸா ஏவங் படிஸேதெ⁴ந்தியா பாசித்தியங் ஹோதீதி யோஜனா. அத⁴ம்மே த⁴ம்மஸஞ்ஞாய து³க்கடங் பரிதீ³பிதந்தி யோஜனா. உபோ⁴ வேமதிகாய வாதி உபோ⁴ஸு வேமதிகாய. கா³தா²ப³ந்த⁴வஸேன ஸு-ஸத்³த³லோபோ. த⁴ம்மிகே அத⁴ம்மிகே சீவரவிப⁴ங்கே³ வேமதிகாய படிபா³ஹந்தியா து³க்கடங் பரிதீ³பிதந்தி யோஜனா. யதா²ஹ ‘‘த⁴ம்மிகே வேமதிகா படிபா³ஹதி, ஆபத்தி து³க்கடஸ்ஸ. அத⁴ம்மிகே வேமதிகா படிபா³ஹதி, ஆபத்தி து³க்கடஸ்ஸா’’தி. ஆனிஸங்ஸங் நித³ஸ்ஸெத்வாதி ‘‘ஏகிஸ்ஸா ஏகங் ஸாடகங் நப்பஹோதி, ஆக³மேத² தாவ, கதிபாஹேனேவ உப்பஜ்ஜிஸ்ஸதி, ததோ பா⁴ஜெஸ்ஸாமீ’’தி (பாசி॰ 914) ஏவங் ஆனிஸங்ஸங் த³ஸ்ஸெத்வா.

    2232-3.Dhammikaṃ samaggena saṅghena sannipatitvā kariyamānaṃ cīvarānaṃ vibhaṅgaṃ bhājanaṃ yā bhikkhunī paṭisedheyya paṭibāheyya, tassā evaṃ paṭisedhentiyā pācittiyaṃ hotīti yojanā. Adhamme dhammasaññāya dukkaṭaṃ paridīpitanti yojanā. Ubho vematikāya vāti ubhosu vematikāya. Gāthābandhavasena su-saddalopo. Dhammike adhammike cīvaravibhaṅge vematikāya paṭibāhantiyā dukkaṭaṃ paridīpitanti yojanā. Yathāha ‘‘dhammike vematikā paṭibāhati, āpatti dukkaṭassa. Adhammike vematikā paṭibāhati, āpatti dukkaṭassā’’ti. Ānisaṃsaṃ nidassetvāti ‘‘ekissā ekaṃ sāṭakaṃ nappahoti, āgametha tāva, katipāheneva uppajjissati, tato bhājessāmī’’ti (pāci. 914) evaṃ ānisaṃsaṃ dassetvā.

    ஸத்தமங்.

    Sattamaṃ.

    2235-6. நிவாஸனுபக³ங் வா ததா² பாருபனுபக³ங் வா கப்பபி³ந்து³கதங் வா யங் கிஞ்சி சீவரங் பஞ்ச ஸஹத⁴ம்மிகே ச மாதாபிதரோபி முஞ்சித்வா அஞ்ஞஸ்ஸ யஸ்ஸ கஸ்ஸசி க³ஹட்ட²ஸ்ஸ வா பரிப்³பா³ஜகஸ்ஸ வா யதி³ த³தெ³ய்ய, தஸ்ஸாபி பாசித்தியங் பரியாபுதந்தி யோஜனா. எத்த² ச ‘‘பிதரோ’’தி மாதா ச பிதா ச மாதாபிதரோதி வத்தப்³பே³ விரூபேகஸேஸவஸேன நித்³தே³ஸோ த³ட்ட²ப்³போ³.

    2235-6. Nivāsanupagaṃ vā tathā pārupanupagaṃ vā kappabindukataṃ vā yaṃ kiñci cīvaraṃ pañca sahadhammike ca mātāpitaropi muñcitvā aññassa yassa kassaci gahaṭṭhassa vā paribbājakassa vā yadi dadeyya, tassāpi pācittiyaṃ pariyāputanti yojanā. Ettha ca ‘‘pitaro’’ti mātā ca pitā ca mātāpitaroti vattabbe virūpekasesavasena niddeso daṭṭhabbo.

    2237. எத்த² இமஸ்மிங் ஸிக்கா²பதே³ தா பன பாசித்தியோ சீவரானங் க³ணனாய வஸேன க³ணேதப்³பா³தி யோஜனா.

    2237.Ettha imasmiṃ sikkhāpade tā pana pācittiyo cīvarānaṃ gaṇanāya vasena gaṇetabbāti yojanā.

    2238. தாவ ஸம்படிச்சி²தோ காலோ ஏதஸ்ஸாதி தாவகாலிகங், சீவரங். ‘‘அஞ்ஞஸ்ஸா’’தி புப்³பே³ வுத்தஸ்ஸ தூ³ரத்தா புனபி ‘‘அஞ்ஞேஸ’’ந்தி ஆஹ, ஸோயேவத்தோ².

    2238. Tāva sampaṭicchito kālo etassāti tāvakālikaṃ, cīvaraṃ. ‘‘Aññassā’’ti pubbe vuttassa dūrattā punapi ‘‘aññesa’’nti āha, soyevattho.

    அட்ட²மங்.

    Aṭṭhamaṃ.

    2239. யா பன பி⁴க்கு²னீ ‘‘ஸசே மயங் ஸக்கோம, த³ஸ்ஸாம கரிஸ்ஸாமாதி ஏவங் வாசா பி⁴ன்னா ஹோதீ’’தி வுத்தாய து³ப்³ப³லாய சீவரபச்சாஸாய சீவரஸ்ஸ விப⁴ங்க³ங் நிஸேதெ⁴த்வா சீவரே காலங் அதிக்கமெய்ய, அஸ்ஸா தோ³ஸதா பாசித்தியாபத்தி ஹோதீதி யோஜனா. சீவரே காலந்தி ‘‘சீவரகாலஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்சமாஸா’’தி (பாசி॰ 922) பத³பா⁴ஜனே வுத்தங் சீவரகாலங். அதிக்கமெய்யாதி ‘‘அனத்த²தே கதி²னே வஸ்ஸானஸ்ஸ பச்சி²மங் தி³வஸங், அத்த²தே கதி²னே கதி²னுத்³தா⁴ரதி³வஸங் அதிக்காமேதீ’’தி வுத்தவிதி⁴ங் அதிக்காமெய்ய.

    2239. Yā pana bhikkhunī ‘‘sace mayaṃ sakkoma, dassāma karissāmāti evaṃ vācā bhinnā hotī’’ti vuttāya dubbalāya cīvarapaccāsāya cīvarassa vibhaṅgaṃ nisedhetvā cīvare kālaṃ atikkameyya, assā dosatā pācittiyāpatti hotīti yojanā. Cīvare kālanti ‘‘cīvarakālasamayo nāma anatthate kathine vassānassa pacchimo māso, atthate kathine pañcamāsā’’ti (pāci. 922) padabhājane vuttaṃ cīvarakālaṃ. Atikkameyyāti ‘‘anatthate kathine vassānassa pacchimaṃ divasaṃ, atthate kathine kathinuddhāradivasaṃ atikkāmetī’’ti vuttavidhiṃ atikkāmeyya.

    2240. ‘‘அது³ப்³ப³லசீவரே து³ப்³ப³லசீவரஸஞ்ஞா, ஆபத்தி து³க்கடஸ்ஸா’’தி வசனதோ ஸுது³ப்³ப³லந்தி சேதஸாதி எத்த² ஸு-ஸத்³தோ³ பத³பூரணே. உபோ⁴ஸூதி து³ப்³ப³லே, அது³ப்³ப³லே ச. கங்கி²தாய வாதி வேமதிகாய வா.

    2240. ‘‘Adubbalacīvare dubbalacīvarasaññā, āpatti dukkaṭassā’’ti vacanato sudubbalanti cetasāti ettha su-saddo padapūraṇe. Ubhosūti dubbale, adubbale ca. Kaṅkhitāya vāti vematikāya vā.

    2241. ஆனிஸங்ஸங் நித³ஸ்ஸெத்வாதி ‘‘கிஞ்சாபி ‘ந மயங் அய்யே ஸக்கோமா’தி வத³ந்தி, இதா³னி பன தேஸங் கப்பாஸோ ஆக³மிஸ்ஸதி, ஸத்³தோ⁴ பஸன்னோ புரிஸோ ஆக³மிஸ்ஸதி , அத்³தா⁴ த³ஸ்ஸதீ’’தி (பாசி॰ அட்ட²॰ 921) ஏவங் அட்ட²கதா²ய வுத்தனயேன ஆனிஸங்ஸங் த³ஸ்ஸெத்வா.

    2241.Ānisaṃsaṃ nidassetvāti ‘‘kiñcāpi ‘na mayaṃ ayye sakkomā’ti vadanti, idāni pana tesaṃ kappāso āgamissati, saddho pasanno puriso āgamissati , addhā dassatī’’ti (pāci. aṭṭha. 921) evaṃ aṭṭhakathāya vuttanayena ānisaṃsaṃ dassetvā.

    நவமங்.

    Navamaṃ.

    2242. த⁴ம்மிகங் கதி²னுத்³தா⁴ரந்தி ‘‘த⁴ம்மிகோ நாம கதி²னுத்³தா⁴ரோ ஸமக்³கோ³ பி⁴க்கு²னிஸங்கோ⁴ ஸன்னிபதித்வா உத்³த⁴ரதீ’’தி (பாசி॰ 929) வுத்தங் கதி²னுத்³தா⁴ரங்.

    2242.Dhammikaṃ kathinuddhāranti ‘‘dhammiko nāma kathinuddhāro samaggo bhikkhunisaṅgho sannipatitvā uddharatī’’ti (pāci. 929) vuttaṃ kathinuddhāraṃ.

    2243. யஸ்ஸாதி யஸ்ஸ கதி²னஸ்ஸ. அத்தா²ரமூலகோ ஆனிஸங்ஸோ நாம ‘‘யோ ச தத்த² சீவருப்பாதோ³, ஸோ நேஸங் ப⁴விஸ்ஸதீ’’தி (மஹாவ॰ 306) அனுஞ்ஞாதோ தஸ்மிங் விஹாரே உப்பஜ்ஜனகசீவரவத்தா²னிஸங்ஸோ. உத்³தா⁴ரமூலகோ நாம அந்தருப்³பா⁴ரங் காராபெந்தேஹி உபாஸகேஹி தி³ய்யமானசீவரவத்தா²னிஸங்ஸோ.

    2243.Yassāti yassa kathinassa. Atthāramūlako ānisaṃso nāma ‘‘yo ca tattha cīvaruppādo, so nesaṃ bhavissatī’’ti (mahāva. 306) anuññāto tasmiṃ vihāre uppajjanakacīvaravatthānisaṃso. Uddhāramūlako nāma antarubbhāraṃ kārāpentehi upāsakehi diyyamānacīvaravatthānisaṃso.

    2245. ஸமானிஸங்ஸோபீதி அத்தா²ரஆனிஸங்ஸேன ஸமானிஸங்ஸோபி உப்³பா⁴ரோ. ஸத்³தா⁴பாலனகஆரணாதி பஸாதா³னுரக்க²னத்தா²ய தா³தப்³போ³தி யோஜனா. ஆனிஸங்ஸங் நித³ஸ்ஸெத்வாதி ‘‘பி⁴க்கு²னிஸங்கோ⁴ ஜிண்ணசீவரோ, கதி²னானிஸங்ஸமூலகோ மஹாலாபோ⁴’’தி ஏவரூபங் ஆனிஸங்ஸங் த³ஸ்ஸெத்வா.

    2245.Samānisaṃsopīti atthāraānisaṃsena samānisaṃsopi ubbhāro. Saddhāpālanakaāraṇāti pasādānurakkhanatthāya dātabboti yojanā. Ānisaṃsaṃ nidassetvāti ‘‘bhikkhunisaṅgho jiṇṇacīvaro, kathinānisaṃsamūlako mahālābho’’ti evarūpaṃ ānisaṃsaṃ dassetvā.

    2246. ஸமுட்டா²னாதி³னா ஸத்³தி⁴ங் ஸேஸங் பன வினிச்ச²யஜாதங் அஸேஸேன ஸப்³பா³காரேன ஸத்தமேன ஸிக்கா²பதே³ன ஸமங் மதங் ‘‘ஸதி³ஸ’’ந்தி விஞ்ஞாதங். கிஞ்சிபி அப்பகம்பி அபுப்³ப³ங் தத்த² வுத்தனயதோ அஞ்ஞங் நத்தீ²தி யோஜனா.

    2246. Samuṭṭhānādinā saddhiṃ sesaṃ pana vinicchayajātaṃ asesena sabbākārena sattamena sikkhāpadena samaṃ mataṃ ‘‘sadisa’’nti viññātaṃ. Kiñcipi appakampi apubbaṃ tattha vuttanayato aññaṃ natthīti yojanā.

    த³ஸமங்.

    Dasamaṃ.

    நக்³க³வக்³கோ³ ததியோ.

    Naggavaggo tatiyo.

    2247. ‘‘யா பன பி⁴க்கு²னியோ த்³வே ஏகமஞ்சே துவட்டெய்யுங், பாசித்திய’’ந்தி (பாசி॰ 933) பஞ்ஞத்தஸிக்கா²பதே³ வினிச்ச²யங் த³ஸ்ஸேதுமாஹ ‘‘ஏகாயா’’திஆதி³. ஏகாயாதி ஏகாய பி⁴க்கு²னியா. அபராதி அஞ்ஞா உபஸம்பன்னா. நிபஜ்ஜெய்யுந்தி எத்த² ‘‘ஏகமஞ்சே’’தி ஸேஸோ. த்³வேதி த்³வே பி⁴க்கு²னியோ.

    2247. ‘‘Yā pana bhikkhuniyo dve ekamañce tuvaṭṭeyyuṃ, pācittiya’’nti (pāci. 933) paññattasikkhāpade vinicchayaṃ dassetumāha ‘‘ekāyā’’tiādi. Ekāyāti ekāya bhikkhuniyā. Aparāti aññā upasampannā. Nipajjeyyunti ettha ‘‘ekamañce’’ti seso. Dveti dve bhikkhuniyo.

    2248-9. ‘‘ஏகாய சா’’திஆதி³ அனாபத்திவாரனித்³தே³ஸோ. உபோ⁴ வாபி ஸமங் நிஸீத³ந்தீதி யோஜனா. ஏளகேனாதி ஏளகலோமஸிக்கா²பதே³ன.

    2248-9.‘‘Ekāya cā’’tiādi anāpattivāraniddeso. Ubho vāpi samaṃ nisīdantīti yojanā. Eḷakenāti eḷakalomasikkhāpadena.

    பட²மங்.

    Paṭhamaṃ.

    2250-1. பாவாரகடஸாராதி³ந்தி எத்த² பு⁴ம்மேகவசனங். ‘‘ஸங்ஹாரிமேஸூ’’தி இமினா ஸமானாதி⁴கரணத்தா ப³ஹுவசனப்பஸங்கே³ வசனவிபல்லாஸேனெத்த² ஏகவசனநித்³தே³ஸோதி த³ட்ட²ப்³போ³. பாவாரோ ச கடஸாரோ ச தே ஆதி³ யஸ்ஸாதி விக்³க³ஹோ, நித்³தா⁴ரணே சேதங் பு⁴ம்மங். ஏககந்தி நித்³தா⁴ரிதப்³ப³னித³ஸ்ஸனங். ஏகமேவ ஏககங். ஸங்ஹாரிமேஸு பாவாராதீ³ஸு அஞ்ஞதரந்தி அத்தோ². ‘‘பாவாரோதி கோஜவாத³யோ’’தி வத³ந்தி. கடஸாரோதி கடோயேவ. ஆதி³-ஸத்³தே³ன அத்த²ரித்வா ஸயனாரஹங் ஸப்³ப³ங் ஸங்க³ண்ஹாதி. தேனேவாதி யங் அத்த²தங், தேனேவ. பாருபித்வா ஸசே யா பன த்³வே ஸஹேவ நிபஜ்ஜந்தி, தாஸங் பாசித்தியங் ஸியாதி யோஜனா. எத்த² ச அத்த²ரணபாவுரணகிச்சே ஏகஸ்ஸேவ நித்³தி³ட்ட²த்தா ஏகஸ்ஸ அந்தஸ்ஸ அத்த²ரணஞ்ச ஏகஸ்ஸ அந்தஸ்ஸ பாருபனஞ்ச விஞ்ஞாயதி. யதா²ஹ ‘‘ஸங்ஹாரிமானங் பாவாரத்த²ரணகடஸாரகாதீ³னங் ஏகங் அந்தங் அத்த²ரித்வா ஏகங் பாருபித்வா துவட்டெந்தீனமேதங் அதி⁴வசன’’ந்தி (பாசி॰ அட்ட²॰ 937).

    2250-1.Pāvārakaṭasārādinti ettha bhummekavacanaṃ. ‘‘Saṃhārimesū’’ti iminā samānādhikaraṇattā bahuvacanappasaṅge vacanavipallāsenettha ekavacananiddesoti daṭṭhabbo. Pāvāro ca kaṭasāro ca te ādi yassāti viggaho, niddhāraṇe cetaṃ bhummaṃ. Ekakanti niddhāritabbanidassanaṃ. Ekameva ekakaṃ. Saṃhārimesu pāvārādīsu aññataranti attho. ‘‘Pāvāroti kojavādayo’’ti vadanti. Kaṭasāroti kaṭoyeva. Ādi-saddena attharitvā sayanārahaṃ sabbaṃ saṅgaṇhāti. Tenevāti yaṃ atthataṃ, teneva. Pārupitvā sace yā pana dve saheva nipajjanti, tāsaṃ pācittiyaṃ siyāti yojanā. Ettha ca attharaṇapāvuraṇakicce ekasseva niddiṭṭhattā ekassa antassa attharaṇañca ekassa antassa pārupanañca viññāyati. Yathāha ‘‘saṃhārimānaṃ pāvārattharaṇakaṭasārakādīnaṃ ekaṃ antaṃ attharitvā ekaṃ pārupitvā tuvaṭṭentīnametaṃ adhivacana’’nti (pāci. aṭṭha. 937).

    ஏகஸ்மிங் ஏகத்த²ரணே வா ஏகபாவுரணே வா நிபஜ்ஜனே ஸதி தாஸங் த்³வின்னங் பி⁴க்கு²னீனங் து³க்கடந்தி ஸம்ப³ந்தோ⁴. த்³விகது³க்கடங் வுத்தந்தி ‘‘நானத்த²ரணபாவுரணே ஏகத்த²ரணபாவுரணஸஞ்ஞா…பே॰… வேமதிகா, ஆபத்தி து³க்கடஸ்ஸா’’தி (பாசி॰ 939) வுத்தங் து³க்கடத்³வயங்.

    Ekasmiṃ ekattharaṇe vā ekapāvuraṇe vā nipajjane sati tāsaṃ dvinnaṃ bhikkhunīnaṃ dukkaṭanti sambandho. Dvikadukkaṭaṃ vuttanti ‘‘nānattharaṇapāvuraṇe ekattharaṇapāvuraṇasaññā…pe… vematikā, āpatti dukkaṭassā’’ti (pāci. 939) vuttaṃ dukkaṭadvayaṃ.

    2252. வவத்தா²னங் நித³ஸ்ஸெத்வாதி மஜ்ஜே² காஸாவங் வா கத்தரயட்டி²ங் வா அந்தமஸோ காயப³ந்த⁴னம்பி ட²பெத்வா நிபஜ்ஜந்தி, அனாபத்தீதி அத்தோ². ஸேஸங் ஸமுட்டா²னாதி³விதா⁴னங். ஆதி³னாதி இமஸ்மிங்யேவ வக்³கே³ பட²மஸிக்கா²பதே³ன. துல்யந்தி ஸமானங்.

    2252.Vavatthānaṃ nidassetvāti majjhe kāsāvaṃ vā kattarayaṭṭhiṃ vā antamaso kāyabandhanampi ṭhapetvā nipajjanti, anāpattīti attho. Sesaṃ samuṭṭhānādividhānaṃ. Ādināti imasmiṃyeva vagge paṭhamasikkhāpadena. Tulyanti samānaṃ.

    து³தியங்.

    Dutiyaṃ.

    2253. அஞ்ஞிஸ்ஸா பி⁴க்கு²னியா. அபா²ஸுகாரணாதி அபா²ஸுகரணஹேது. அனாபுச்சா²தி அனாபுச்சி²த்வா. தஸ்ஸா புரதோ ச சங்கமனாத³யோ யதி³ கரெய்ய, ஏவங் கரொந்தியா பாசித்தியாபத்தி ஹோதீதி யோஜனா. சங்கமனாத³யோதி எத்த² ஆதி³-ஸத்³தே³ன ‘‘திட்ட²தி வா நிஸீத³தி வா ஸெய்யங் வா கப்பேதி உத்³தி³ஸதி வா உத்³தி³ஸாபேதி வா ஸஜ்ஜா²யங் வா கரோதீ’’தி (பாசி॰ 943) பத³பா⁴ஜனே வுத்தானங் ஸங்க³ஹோ.

    2253.Aññissā bhikkhuniyā. Aphāsukāraṇāti aphāsukaraṇahetu. Anāpucchāti anāpucchitvā. Tassā purato ca caṅkamanādayo yadi kareyya, evaṃ karontiyā pācittiyāpatti hotīti yojanā. Caṅkamanādayoti ettha ādi-saddena ‘‘tiṭṭhati vā nisīdati vā seyyaṃ vā kappeti uddisati vā uddisāpeti vā sajjhāyaṃ vā karotī’’ti (pāci. 943) padabhājane vuttānaṃ saṅgaho.

    2254. நிவத்தனானங் க³ணனாயாதி சங்கமந்தியா சங்கமஸ்ஸ உப⁴யகோடிங் பத்வா நிவத்தந்தியா நிவத்தனக³ணனாய. பயோக³தோயேவாதி பயோக³க³ணனாயேவ, இரியாபத²பரிவத்தனக³ணனாயேவாதி வுத்தங் ஹோதி. தோ³ஸாதி பாசித்தியாபத்தியோ.

    2254.Nivattanānaṃ gaṇanāyāti caṅkamantiyā caṅkamassa ubhayakoṭiṃ patvā nivattantiyā nivattanagaṇanāya. Payogatoyevāti payogagaṇanāyeva, iriyāpathaparivattanagaṇanāyevāti vuttaṃ hoti. Dosāti pācittiyāpattiyo.

    2255. பதா³னங் க³ணனாவஸாதி எத்த² ஆதி³-ஸத்³தோ³ லுத்தனித்³தி³ட்டோ². யதா²ஹ ‘‘பதா³தி³க³ணனாயா’’தி (பாசி॰ அட்ட²॰ 943). திகபாசித்தியங் வுத்தந்தி உபஸம்பன்னாய உபஸம்பன்னஸஞ்ஞா, வேமதிகா, அனுபஸம்பன்னஸஞ்ஞாதி விகப்பத்தயஸ்ஸ வஸேன பாசித்தியத்தயங் வுத்தங். ஸேஸாயாதி அனுபஸம்பன்னாய.

    2255.Padānaṃ gaṇanāvasāti ettha ādi-saddo luttaniddiṭṭho. Yathāha ‘‘padādigaṇanāyā’’ti (pāci. aṭṭha. 943). Tikapācittiyaṃ vuttanti upasampannāya upasampannasaññā, vematikā, anupasampannasaññāti vikappattayassa vasena pācittiyattayaṃ vuttaṃ. Sesāyāti anupasampannāya.

    2256. ந ச அபா²ஸுகாமாயாதி ஆபுச்சி²த்வா தஸ்ஸா பி⁴க்கு²னியா புரதோ சங்கமனாதீ³னி கரொந்தியா அனாபத்தீதி யோஜனா.

    2256.Naca aphāsukāmāyāti āpucchitvā tassā bhikkhuniyā purato caṅkamanādīni karontiyā anāpattīti yojanā.

    2257. க்ரியாக்ரியந்தி சங்கமனாதி³கரணங் கிரியங். ஆபுச்சா²ய அகரணங் அகிரியங். பாபமானஸந்தி அகுஸலசித்தங்.

    2257.Kriyākriyanti caṅkamanādikaraṇaṃ kiriyaṃ. Āpucchāya akaraṇaṃ akiriyaṃ. Pāpamānasanti akusalacittaṃ.

    ததியங்.

    Tatiyaṃ.

    2258-9. அனந்தராயாதி வக்க²மானேஸு ராஜந்தராயாதீ³ஸு த³ஸஸு அந்தராயேஸு அஞ்ஞதரரஹிதா பி⁴க்கு²னீ. து³க்கி²தந்தி கி³லானங். யதா²ஹ ‘‘து³க்கி²தா நாம கி³லானா வுச்சதீ’’தி (பாசி॰ 948). ஸஹஜீவினிந்தி ஸத்³தி⁴விஹாரினிங். யதா²ஹ ‘‘ஸஹஜீவினீ நாம ஸத்³தி⁴விஹாரினீ வுச்சதீ’’தி. அஞ்ஞாய வா நுபட்டா²பெய்யாதி அஞ்ஞாய பி⁴க்கு²னியா, ஸிக்க²மானாய, ஸாமணேரியா வா கி³ஹினியா வா உபட்டா²னங் ந காராபெய்ய. நுபட்டெ²ய்ய ஸயம்பி வாதி யா உபட்டா²னங் ந கரெய்ய. து⁴ரே நிக்கி²த்தமத்தே வாதி ‘‘நேவ உபட்டெ²ஸ்ஸாமி, ந உபட்டா²பனாய உஸ்ஸுக்கங் கரிஸ்ஸாமீ’’தி து⁴ரே உஸ்ஸாஹே நிக்கி²த்தமத்தேயேவ. தஸ்ஸாதி உபஜ்ஜா²யாய.

    2258-9.Anantarāyāti vakkhamānesu rājantarāyādīsu dasasu antarāyesu aññatararahitā bhikkhunī. Dukkhitanti gilānaṃ. Yathāha ‘‘dukkhitā nāma gilānā vuccatī’’ti (pāci. 948). Sahajīvininti saddhivihāriniṃ. Yathāha ‘‘sahajīvinī nāma saddhivihārinī vuccatī’’ti. Aññāya vā nupaṭṭhāpeyyāti aññāya bhikkhuniyā, sikkhamānāya, sāmaṇeriyā vā gihiniyā vā upaṭṭhānaṃ na kārāpeyya. Nupaṭṭheyya sayampi vāti yā upaṭṭhānaṃ na kareyya. Dhure nikkhittamatte vāti ‘‘neva upaṭṭhessāmi, na upaṭṭhāpanāya ussukkaṃ karissāmī’’ti dhure ussāhe nikkhittamatteyeva. Tassāti upajjhāyāya.

    அந்தேவாஸினியா வாபீதி பப்³ப³ஜ்ஜாஉபஸம்பதா³த⁴ம்மனிஸ்ஸயவஸேன சதுப்³பி³தா⁴ஸு அந்தேவாஸினீஸு அஞ்ஞதராய. இதராயாதி அனுபஸம்பன்னாய.

    Antevāsiniyā vāpīti pabbajjāupasampadādhammanissayavasena catubbidhāsu antevāsinīsu aññatarāya. Itarāyāti anupasampannāya.

    2260. கி³லானாயாதி ஸயங் கி³லானாய. ‘‘க³வேஸித்வா அலப⁴ந்தியா’’தி பத³ச்சே²தோ³, அஞ்ஞங் உபட்டா²யிகங் பரியேஸித்வா அலப⁴மானாயாதி அத்தோ². ‘‘ஆபதா³ஸு உம்மத்திகாதீ³ன’’ந்தி பத³ச்சே²தோ³. கா³தா²ப³ந்த⁴வஸேன வண்ணலோபோபி த³ட்ட²ப்³போ³. ஆபதா³ஸூதி ததா²ரூபே உபத்³த³வே ஸதி. து⁴ரனிக்கே²பனோத³யந்தி து⁴ரனிக்கே²பஸமுட்டா²னங். யதெ³த்த² வத்தப்³ப³ங், தங் ஹெட்டா² வுத்தமேவ.

    2260.Gilānāyāti sayaṃ gilānāya. ‘‘Gavesitvā alabhantiyā’’ti padacchedo, aññaṃ upaṭṭhāyikaṃ pariyesitvā alabhamānāyāti attho. ‘‘Āpadāsu ummattikādīna’’nti padacchedo. Gāthābandhavasena vaṇṇalopopi daṭṭhabbo. Āpadāsūti tathārūpe upaddave sati. Dhuranikkhepanodayanti dhuranikkhepasamuṭṭhānaṃ. Yadettha vattabbaṃ, taṃ heṭṭhā vuttameva.

    சதுத்த²ங்.

    Catutthaṃ.

    2261-2. புக்³க³லிகஸ்ஸ அத்தாயத்தபராயத்தவஸேன அனியமிதத்தா ‘‘ஸக’’ந்தி இமினா நியமேதி. ஸகங் புக்³க³லிகந்தி அத்தனோ புக்³க³லிகங். த³த்வாதி எத்த² ‘‘பி⁴க்கு²னியா’’தி ஸேஸோ. ஸகவாடந்தி பரிவத்தகத்³வாரகவாடஸஹிதங். உபஸ்ஸயந்தி கே³ஹங். த்³வாராதீ³ஸூதி எத்த² ஆதி³-ஸத்³தே³ன க³ப்³ப⁴பமுகா²னங் ஸங்க³ஹோ, நித்³தா⁴ரணே சேதங் பு⁴ம்மங். ப³ஹூனிபீதி நித்³தா⁴ரேதப்³ப³னித³ஸ்ஸனங். ப³ஹூனிபி த்³வாரானி வா ப³ஹூ க³ப்³பே⁴ வா ப³ஹூனி பமுகா²னி வா. தந்தி யஸ்ஸா உபஸ்ஸயோ தி³ன்னோ, தங் பி⁴க்கு²னிங். நிக்கட்³ட⁴ந்தியாதி அதிக்காமெந்தியா. தஸ்ஸாதி யா நிக்கட்³ட⁴தி, தஸ்ஸா.

    2261-2. Puggalikassa attāyattaparāyattavasena aniyamitattā ‘‘saka’’nti iminā niyameti. Sakaṃ puggalikanti attano puggalikaṃ. Datvāti ettha ‘‘bhikkhuniyā’’ti seso. Sakavāṭanti parivattakadvārakavāṭasahitaṃ. Upassayanti gehaṃ. Dvārādīsūti ettha ādi-saddena gabbhapamukhānaṃ saṅgaho, niddhāraṇe cetaṃ bhummaṃ. Bahūnipīti niddhāretabbanidassanaṃ. Bahūnipi dvārāni vā bahū gabbhe vā bahūni pamukhāni vā. Tanti yassā upassayo dinno, taṃ bhikkhuniṃ. Nikkaḍḍhantiyāti atikkāmentiyā. Tassāti yā nikkaḍḍhati, tassā.

    2263. எத்தா²தி நிக்கட்³ட⁴னே. ஏஸேவ நயோதி ‘‘பயோக³க³ணனாய ஆபத்தீ’’தி த³ஸ்ஸிதனயோ. எத்த² பயோகோ³ நாம ஆணாபனங், இமினா ‘‘ஏகாயாணத்தியா அனேகேஸு த்³வாரேஸு அதிக்காமிதேஸுபி ஏகாவ ஆபத்தி ஹோதீ’’தி ஏவமாதி³கங் அட்ட²கதா²க³தவினிச்ச²யங் (பாசி॰ அட்ட²॰ 943, 952 அத்த²தோ ஸமானங்) ஸங்க³ண்ஹாதி.

    2263.Etthāti nikkaḍḍhane. Eseva nayoti ‘‘payogagaṇanāya āpattī’’ti dassitanayo. Ettha payogo nāma āṇāpanaṃ, iminā ‘‘ekāyāṇattiyā anekesu dvāresu atikkāmitesupi ekāva āpatti hotī’’ti evamādikaṃ aṭṭhakathāgatavinicchayaṃ (pāci. aṭṭha. 943, 952 atthato samānaṃ) saṅgaṇhāti.

    2264. தேஸு வினிச்ச²யேஸு ஏகங் வினிச்ச²யவிஸேஸங் த³ஸ்ஸேதுமாஹ ‘‘எத்தகாவ இமங் த்³வாரா’’திஆதி³. த்³வாரக³ணனாய ஆபத்தியோ த்³வாரக³ணனாபத்தியோ.

    2264. Tesu vinicchayesu ekaṃ vinicchayavisesaṃ dassetumāha ‘‘ettakāva imaṃ dvārā’’tiādi. Dvāragaṇanāya āpattiyo dvāragaṇanāpattiyo.

    2265. அகவாடம்ஹாதி அகவாடப³ந்த⁴தோ உபஸ்ஸயா நிக்கட்³ட⁴ந்தியா து³க்கடந்தி யோஜனா. ஸேஸாயாதி அனுபஸம்பன்னாய. திகது³க்கடந்தி அனுபஸம்பன்னாய உபஸம்பன்னஸஞ்ஞாய, வேமதிகாய, அனுபஸம்பன்னஸஞ்ஞாய ச வஸேன திகது³க்கடங். உபி⁴ன்னந்தி உபஸம்பன்னானுபஸம்பன்னானங். பரிக்கா²ரேஸூதி பத்தசீவராதீ³ஸு பரிக்கா²ரேஸு . ஸப்³ப³த்தா²தி ஸப்³பே³ஸு பயோகே³ஸு, நிக்கட்³டி⁴யமானேஸு, நிக்கட்³டா⁴பியமானேஸு சாதி வுத்தங் ஹோதி.

    2265.Akavāṭamhāti akavāṭabandhato upassayā nikkaḍḍhantiyā dukkaṭanti yojanā. Sesāyāti anupasampannāya. Tikadukkaṭanti anupasampannāya upasampannasaññāya, vematikāya, anupasampannasaññāya ca vasena tikadukkaṭaṃ. Ubhinnanti upasampannānupasampannānaṃ. Parikkhāresūti pattacīvarādīsu parikkhāresu . Sabbatthāti sabbesu payogesu, nikkaḍḍhiyamānesu, nikkaḍḍhāpiyamānesu cāti vuttaṃ hoti.

    2266. எத்த² இமஸ்மிங் ஸிக்கா²பதே³ ஸமுட்டா²னாதி³வினிச்ச²யேன ஸஹ ஸேஸங் வினிச்ச²யஜாதங் அஸேஸேன ஸப்³ப³ப்பகாரேன ஸங்கி⁴கா விஹாரஸ்மா நிக்கட்³ட⁴னஸிக்கா²பதே³ன ஸமங் மதங் ‘‘ஸதி³ஸ’’ந்தி ஸல்லக்கி²தந்தி யோஜனா.

    2266.Ettha imasmiṃ sikkhāpade samuṭṭhānādivinicchayena saha sesaṃ vinicchayajātaṃ asesena sabbappakārena saṅghikā vihārasmā nikkaḍḍhanasikkhāpadena samaṃ mataṃ ‘‘sadisa’’nti sallakkhitanti yojanā.

    பஞ்சமங்.

    Pañcamaṃ.

    2267. ச²ட்டே²தி ‘‘யா பன பி⁴க்கு²னீ ஸங்ஸட்டா² விஹரெய்ய க³ஹபதினா வா க³ஹபதிபுத்தேன வா’’திஆதி³மாதிகாய (பாசி॰ 956) நித்³தி³ட்டே² ச²ட்ட²ஸிக்கா²பதே³. இத⁴ வத்தப்³ப³ந்தி இமஸ்மிங் வினயவினிச்ச²யே கதே²தப்³ப³ங். அரிட்ட²ஸ்ஸ ஸிக்கா²பதே³னாதி அரிட்ட²ஸிக்கா²பதே³ன. வினிச்ச²யோதி ஸமுட்டா²னாதி³கோ.

    2267.Chaṭṭheti ‘‘yā pana bhikkhunī saṃsaṭṭhā vihareyya gahapatinā vā gahapatiputtena vā’’tiādimātikāya (pāci. 956) niddiṭṭhe chaṭṭhasikkhāpade. Idha vattabbanti imasmiṃ vinayavinicchaye kathetabbaṃ. Ariṭṭhassa sikkhāpadenāti ariṭṭhasikkhāpadena. Vinicchayoti samuṭṭhānādiko.

    ச²ட்ட²ங்.

    Chaṭṭhaṃ.

    2268. ஸாஸங்கஸம்மதேதி எத்த² ‘‘ஸப்படிப⁴யே’’தி ஸேஸோ. உப⁴யம்பி ஹெட்டா² வுத்தத்த²மேவ. அந்தோரட்டே²தி யஸ்ஸ விஜிதே விஹரதி, தஸ்ஸேவ ரட்டே². ஸாஸங்கஸம்மதே ஸப்படிப⁴யே அந்தோரட்டே² ஸத்தே²ன வினா சாரிகங் சரந்தியா பி⁴க்கு²னியா ஆபத்தி ஸியாதி யோஜனா.

    2268.Sāsaṅkasammateti ettha ‘‘sappaṭibhaye’’ti seso. Ubhayampi heṭṭhā vuttatthameva. Antoraṭṭheti yassa vijite viharati, tasseva raṭṭhe. Sāsaṅkasammate sappaṭibhaye antoraṭṭhe satthena vinā cārikaṃ carantiyā bhikkhuniyā āpatti siyāti yojanā.

    2269. ஏவங் சரந்தியா ஸகா³மகட்டா²னே கா³மந்தரப்பவேஸே ச அகா³மகே அரஞ்ஞே அத்³த⁴யோஜனே ச வினயஞ்ஞுனா பி⁴க்கு²னா பாசித்தியனயோ பாசித்தியாபத்திவிதா⁴னக்கமோ ஞெய்யோ ஞாதப்³போ³தி யோஜனா.

    2269. Evaṃ carantiyā sagāmakaṭṭhāne gāmantarappavese ca agāmake araññe addhayojane ca vinayaññunā bhikkhunā pācittiyanayo pācittiyāpattividhānakkamo ñeyyo ñātabboti yojanā.

    2270. ஸஹ ஸத்தே²ன சரந்தியா ந தோ³ஸோதி யோஜனா. கே²மட்டா²னே சரந்தியா, ஆபதா³ஸு வா சரந்தியா ந தோ³ஸோதி யோஜனா.

    2270. Saha satthena carantiyā na dosoti yojanā. Khemaṭṭhāne carantiyā, āpadāsu vā carantiyā na dosoti yojanā.

    ஸத்தமங்.

    Sattamaṃ.

    2271. அட்ட²மே நவமே வாபீதி ‘‘யா பன பி⁴க்கு²னீ திரோரட்டே²’’திஆதி³கே (பாசி॰ 966) அட்ட²மஸிக்கா²பதே³ ச ‘‘யா பன பி⁴க்கு²னீ அந்தோவஸ்ஸங் சாரிகங் சரெய்ய, பாசித்திய’’ந்தி (பாசி॰ 970) வுத்தனவமஸிக்கா²பதே³ ச. அனுத்தானங் ந விஜ்ஜதி, ஸப்³ப³ங் உத்தானமேவ, தஸ்மா எத்த² மயா ந விசாரீயதீதி அதி⁴ப்பாயோ.

    2271.Aṭṭhamenavame vāpīti ‘‘yā pana bhikkhunī tiroraṭṭhe’’tiādike (pāci. 966) aṭṭhamasikkhāpade ca ‘‘yā pana bhikkhunī antovassaṃ cārikaṃ careyya, pācittiya’’nti (pāci. 970) vuttanavamasikkhāpade ca. Anuttānaṃ na vijjati, sabbaṃ uttānameva, tasmā ettha mayā na vicārīyatīti adhippāyo.

    அட்ட²மனவமானி.

    Aṭṭhamanavamāni.

    2272. ‘‘யா பன பி⁴க்கு²னீ வஸ்ஸங்வுத்தா² சாரிகங் ந பக்கமெய்ய அந்தமஸோ ச²ப்பஞ்சயோஜனானிபி, பாசித்திய’’ந்தி (பாசி॰ 974) வுத்தஸிக்கா²பதே³ வினிச்ச²யங் த³ஸ்ஸேதுமாஹ ‘‘பாசித்தீ’’திஆதி³. அஹங் ந க³மிஸ்ஸாமி ந பக்கமிஸ்ஸாமீதி து⁴ரனிக்கே²பே கதே பாசித்தீதி யோஜனா. ததா²தி பாசித்தி.

    2272. ‘‘Yā pana bhikkhunī vassaṃvutthā cārikaṃ na pakkameyya antamaso chappañcayojanānipi, pācittiya’’nti (pāci. 974) vuttasikkhāpade vinicchayaṃ dassetumāha ‘‘pācittī’’tiādi. Ahaṃ na gamissāmi na pakkamissāmīti dhuranikkhepe kate pācittīti yojanā. Tathāti pācitti.

    2273. வஸ்ஸங்வுத்தா²ய பவாரெத்வா அந்தமஸோ பஞ்ச யோஜனானி க³ந்துங் வட்டதி. எத்த² அபி-ஸத்³த³ஸ்ஸ ஸம்பா⁴வனத்த²தங் த³ஸ்ஸேதுமாஹ ‘‘ச²ஸூ’’திஆதி³. இத⁴ இமஸ்மிங் அனாபத்திவாரே ச²ஸு யோஜனேஸு யத³த்தி² வத்தப்³ப³ங், தங் கின்னு நாம ஸியா, நத்தி² கிஞ்சி வத்தப்³ப³ந்தி அத்தோ². பவாரெத்வா ச² யோஜனானி க³ச்ச²ந்தியா அனாபத்திபா⁴வோ அவுத்தஸித்³தோ⁴வாதி தீ³பேதி.

    2273. Vassaṃvutthāya pavāretvā antamaso pañca yojanāni gantuṃ vaṭṭati. Ettha api-saddassa sambhāvanatthataṃ dassetumāha ‘‘chasū’’tiādi. Idha imasmiṃ anāpattivāre chasu yojanesu yadatthi vattabbaṃ, taṃ kinnu nāma siyā, natthi kiñci vattabbanti attho. Pavāretvā cha yojanāni gacchantiyā anāpattibhāvo avuttasiddhovāti dīpeti.

    2274. தீணி யோஜனானி. தேனேவாதி யேன க³தா, தேனேவ மக்³கே³ன. அஞ்ஞேன மக்³கே³னாதி க³தமக்³க³தோ அஞ்ஞேன பதே²ன.

    2274.Tīṇi yojanāni. Tenevāti yena gatā, teneva maggena. Aññena maggenāti gatamaggato aññena pathena.

    2275. த³ஸவிதே⁴ அந்தராயஸ்மிங் ஸதீதி வக்க²மானேஸு அந்தராயேஸு அஞ்ஞதரஸ்மிங் ஸதி. தஸ்ஸா அனாபத்தீதி யோஜனா. ஆபதா³ஸூதி அட்டாதி³காரணேன கேனசி பலிபு³த்³தா⁴தி³பா⁴வஸங்கா²தாஸு ஆபதா³ஸு. கி³லானாயாதி ஸயங் கி³லானாய. து³தியாய பி⁴க்கு²னியா அலாபே⁴ வா அபக்கமந்தியா அனாபத்தி.

    2275.Dasavidhe antarāyasmiṃ satīti vakkhamānesu antarāyesu aññatarasmiṃ sati. Tassā anāpattīti yojanā. Āpadāsūti aṭṭādikāraṇena kenaci palibuddhādibhāvasaṅkhātāsu āpadāsu. Gilānāyāti sayaṃ gilānāya. Dutiyāya bhikkhuniyā alābhe vā apakkamantiyā anāpatti.

    2276. ராஜா ச சோரா ச அமனுஸ்ஸா ச அக்³கி³ ச தோயஞ்ச வாளா ச ஸரீஸபா சாதி விக்³க³ஹோ. மனுஸ்ஸோதி எத்த² கா³தா²ப³ந்த⁴வஸேன புப்³ப³பத³லோபோ ‘‘லாபூ³னி ஸீத³ந்தீ’’திஆதீ³ஸு (ஜா॰ 1.1.77) விய. ஜீவிதஞ்ச ப்³ரஹ்மசரியா ச ஜீவிதப்³ரஹ்மசரியந்தி ஸமாஹாரத்³வந்தே³ ஸமாஸோ, தஸ்ஸ ஜீவிதப்³ரஹ்மசரியஸ்ஸ. அந்தராயா ஏவ அந்தராயிகா. ஏதேஸங் த³ஸன்னங் அஞ்ஞதரஸ்மிங் அபக்கமந்தியா அனாபத்தி. யதா²ஹ ‘‘அந்தராயேதி த³ஸவிதே⁴ அந்தராயே. ‘பரங் க³ச்சி²ஸ்ஸாமீ’தி நிக்க²ந்தா, நதி³பூரோ பன ஆக³தோ, சோரா வா மக்³கே³ ஹொந்தி, மேகோ⁴ வா உட்டா²தி, நிவத்திதுங் வட்டதீ’’தி (பாசி॰ அட்ட²॰ 976).

    2276. Rājā ca corā ca amanussā ca aggi ca toyañca vāḷā ca sarīsapā cāti viggaho. Manussoti ettha gāthābandhavasena pubbapadalopo ‘‘lābūni sīdantī’’tiādīsu (jā. 1.1.77) viya. Jīvitañca brahmacariyā ca jīvitabrahmacariyanti samāhāradvande samāso, tassa jīvitabrahmacariyassa. Antarāyā eva antarāyikā. Etesaṃ dasannaṃ aññatarasmiṃ apakkamantiyā anāpatti. Yathāha ‘‘antarāyeti dasavidhe antarāye. ‘Paraṃ gacchissāmī’ti nikkhantā, nadipūro pana āgato, corā vā magge honti, megho vā uṭṭhāti, nivattituṃ vaṭṭatī’’ti (pāci. aṭṭha. 976).

    2277. அபக்கமனங் அக்ரியங். அனாத³ரியேன ஆபஜ்ஜனதோ ஆஹ ‘‘து³க்க²வேத³ன’’ந்தி.

    2277. Apakkamanaṃ akriyaṃ. Anādariyena āpajjanato āha ‘‘dukkhavedana’’nti.

    த³ஸமங்.

    Dasamaṃ.

    துவட்டவக்³கோ³ சதுத்தோ².

    Tuvaṭṭavaggo catuttho.

    2278-80. ராஜாகா³ரந்தி ரஞ்ஞோ கீளனக⁴ரங். சித்தாகா³ரந்தி கீளனசித்தஸாலங். ஆராமந்தி கீளனஉபவனங். கீளுய்யானந்தி கீளனத்தா²ய கதங் உய்யானங். கீளாவாபிந்தி எத்த² கிஞ்சாபி பாளியங் (பாசி॰ 979) பொக்க²ரணீ வுத்தா, ஸா பன ஸப்³ப³ஜலாஸயானங் கீளாய கதானங் உபலக்க²ணவஸேன வுத்தாதி ஆஹ ‘‘கீளாவாபி’’ந்தி, கீளனத்தா²ய கதவாபிந்தி அத்தோ². ‘‘நானாகார’’ந்தி இத³ங் யதா²வுத்தபதே³ஹி பச்சேகங் யோஜேதப்³ப³ங். ஸப்³ப³ஸங்கா³ஹிகவஸேன ‘‘தானீ’’தி வுத்தங். நானாகாரங் ராஜாகா³ரங் சித்தாகா³ரங் ஆராமங் கீளுய்யானங் வா கீளாவாபிங் த³ட்டு²ங் க³ச்ச²ந்தீனங் தானி ஸப்³பா³னி ஏகதோ த³ட்டு²ங் க³ச்ச²ந்தீனங் தாஸங் பி⁴க்கு²னீனங் பதே³ பதே³ து³க்கடங் முனினா நித்³தி³ட்ட²ந்தி யோஜனா.

    2278-80.Rājāgāranti rañño kīḷanagharaṃ. Cittāgāranti kīḷanacittasālaṃ. Ārāmanti kīḷanaupavanaṃ. Kīḷuyyānanti kīḷanatthāya kataṃ uyyānaṃ. Kīḷāvāpinti ettha kiñcāpi pāḷiyaṃ (pāci. 979) pokkharaṇī vuttā, sā pana sabbajalāsayānaṃ kīḷāya katānaṃ upalakkhaṇavasena vuttāti āha ‘‘kīḷāvāpi’’nti, kīḷanatthāya katavāpinti attho. ‘‘Nānākāra’’nti idaṃ yathāvuttapadehi paccekaṃ yojetabbaṃ. Sabbasaṅgāhikavasena ‘‘tānī’’ti vuttaṃ. Nānākāraṃ rājāgāraṃ cittāgāraṃ ārāmaṃ kīḷuyyānaṃ vā kīḷāvāpiṃ daṭṭhuṃ gacchantīnaṃ tāni sabbāni ekato daṭṭhuṃ gacchantīnaṃ tāsaṃ bhikkhunīnaṃ pade pade dukkaṭaṃ muninā niddiṭṭhanti yojanā.

    பஞ்சபீதி ராஜாகா³ராதீ³னி பஞ்சபி. ஏகாயேவ பாசித்தி ஆபத்தி பரிதீ³பிதாதி யோஜனா. தங் தங் தி³ஸாபா⁴க³ங் க³ந்த்வா பஸ்ஸந்தி சே, பாடேக்காபத்தியோ பயோக³க³ணனாய ஸியுந்தி யோஜனா.

    Pañcapīti rājāgārādīni pañcapi. Ekāyeva pācitti āpatti paridīpitāti yojanā. Taṃ taṃ disābhāgaṃ gantvā passanti ce, pāṭekkāpattiyo payogagaṇanāya siyunti yojanā.

    2281. க³மனபா³ஹுல்லேன ஆபத்திபா³ஹுல்லங் பகாஸெத்வா கீ³வாபரிவத்தனஸங்கா²தேன பயோக³பா³ஹுல்லேனாபி ஆபத்திபா³ஹுல்லங் பகாஸேதுமாஹ ‘‘பயோக³ப³ஹுதாயாபி, பாசித்திப³ஹுதா ஸியா’’தி. ஸப்³ப³த்தா²தி யத்த² பி⁴க்கு²னியா பாசித்தியங் வுத்தங், தத்த² ஸப்³ப³த்த².

    2281. Gamanabāhullena āpattibāhullaṃ pakāsetvā gīvāparivattanasaṅkhātena payogabāhullenāpi āpattibāhullaṃ pakāsetumāha ‘‘payogabahutāyāpi, pācittibahutā siyā’’ti. Sabbatthāti yattha bhikkhuniyā pācittiyaṃ vuttaṃ, tattha sabbattha.

    2282. ‘‘அவஸேஸோபி அனாபத்தீ’’தி பத³ச்சே²தோ³. அனாபத்தி ச கதா²மக்³கோ³ ச அனாபத்திகதா²மக்³கோ³, தேஸங் வினிச்ச²யோ அனாபத்திகதா²மக்³க³வினிச்ச²யோ, ‘‘அனாபத்தி ஆராமே டி²தா பஸ்ஸதீ’’திஆதி³கோ (பாசி॰ 981) அனாபத்திவினிச்ச²யோ ச அட்ட²கதா²க³தோ (பாசி॰ அட்ட²॰ 981) அவஸேஸவினிச்ச²யோ சாதி அத்தோ². ‘‘ஆராமே டி²தா’’தி ஏதேன அஜ்ஜா²ராமே ராஜாகா³ராதீ³னி கரொந்தி, தானி பஸ்ஸந்தியா அனாபத்தீதி அயமனாபத்திவாரோ த³ஸ்ஸிதோ. ஏதேனேவ அந்தோஆராமே தத்த² தத்த² க³ந்த்வா நச்சாதீ³னி விய ராஜாகா³ராதீ³னிபி பஸ்ஸிதுங் லப⁴தீதிபி ஸித்³த⁴ங். ஆதி³-ஸத்³தே³ன ‘‘பிண்ட³பாதாதீ³னங் அத்தா²ய க³ச்ச²ந்தியா மக்³கே³ ஹொந்தி, தானி பஸ்ஸதி, அனாபத்தி. ரஞ்ஞோ ஸந்திகங் கேனசி கரணீயேன க³ந்த்வா பஸ்ஸதி, அனாபத்தி. கேனசி உபத்³து³தா பவிஸித்வா பஸ்ஸதி, அனாபத்தீ’’தி ஏதே அனாபத்திவாரா ஸங்க³ஹிதா. நச்சத³ஸ்ஸன…பே॰… ஸஹாதி ஸமுட்டா²னாதி³னா வினிச்ச²யேன ஸஹ நச்சத³ஸ்ஸனஸிக்கா²பத³ஸதி³ஸோவ.

    2282. ‘‘Avasesopi anāpattī’’ti padacchedo. Anāpatti ca kathāmaggo ca anāpattikathāmaggo, tesaṃ vinicchayo anāpattikathāmaggavinicchayo, ‘‘anāpatti ārāme ṭhitā passatī’’tiādiko (pāci. 981) anāpattivinicchayo ca aṭṭhakathāgato (pāci. aṭṭha. 981) avasesavinicchayo cāti attho. ‘‘Ārāme ṭhitā’’ti etena ajjhārāme rājāgārādīni karonti, tāni passantiyā anāpattīti ayamanāpattivāro dassito. Eteneva antoārāme tattha tattha gantvā naccādīni viya rājāgārādīnipi passituṃ labhatītipi siddhaṃ. Ādi-saddena ‘‘piṇḍapātādīnaṃ atthāya gacchantiyā magge honti, tāni passati, anāpatti. Rañño santikaṃ kenaci karaṇīyena gantvā passati, anāpatti. Kenaci upaddutā pavisitvā passati, anāpattī’’ti ete anāpattivārā saṅgahitā. Naccadassana…pe… sahāti samuṭṭhānādinā vinicchayena saha naccadassanasikkhāpadasadisova.

    பட²மங்.

    Paṭhamaṃ.

    2283. மானதோ பமாணதோ அதீதா அபேதா மானாதீதா, ஆஸந்தீ³, தங். வாளேஹி உபேதோ வாளூபேதோ, பல்லங்கோ, தங். ‘‘ஆஸந்தீ³ நாம அதிக்கந்தப்பமாணா வுச்சதீ’’தி வசனதோ ஹெட்டா² அட்டனியா வட்³ட⁴கிஹத்த²தோ உச்சதரபாதோ³ ஆயாமசதுரஸ்ஸோ மஞ்சபீட²விஸேஸோ ஆஸந்தீ³ நாம ஸமசதுரஸ்ஸானங் அதிக்கந்தப்பமாணானம்பி அனுஞ்ஞாதத்தா. ‘‘பல்லங்கோ நாம ஆஹரிமேஹி வாளேஹி கதோ’’தி (பாசி॰ 984) வசனதோ பமாணயுத்தோபி ஏவரூபோ ந வட்டதி. ஆஹரித்வா யதா²னுரூபட்டா²னே ட²பேதப்³ப³வாளரூபானி ஆஹரிமவாளா நாம, ஸங்ஹரிமவாளரூபயுத்தோதி வுத்தங் ஹோதி. மானாதீதங் ஆஸந்தி³ங் வா வாளூபேதங் பல்லங்கங் வா ஸேவந்தீனங் அபி⁴னிஸீத³ந்தீனங், அபி⁴னிபஜ்ஜந்தீனஞ்ச யாஸங் பி⁴க்கு²னீனங் ஸத்தா² பாசித்தியாபத்திங் ஆஹ.

    2283. Mānato pamāṇato atītā apetā mānātītā, āsandī, taṃ. Vāḷehi upeto vāḷūpeto, pallaṅko, taṃ. ‘‘Āsandī nāma atikkantappamāṇā vuccatī’’ti vacanato heṭṭhā aṭṭaniyā vaḍḍhakihatthato uccatarapādo āyāmacaturasso mañcapīṭhaviseso āsandī nāma samacaturassānaṃ atikkantappamāṇānampi anuññātattā. ‘‘Pallaṅko nāma āharimehi vāḷehi kato’’ti (pāci. 984) vacanato pamāṇayuttopi evarūpo na vaṭṭati. Āharitvā yathānurūpaṭṭhāne ṭhapetabbavāḷarūpāni āharimavāḷā nāma, saṃharimavāḷarūpayuttoti vuttaṃ hoti. Mānātītaṃ āsandiṃ vā vāḷūpetaṃ pallaṅkaṃ vā sevantīnaṃ abhinisīdantīnaṃ, abhinipajjantīnañca yāsaṃ bhikkhunīnaṃ satthā pācittiyāpattiṃ āha.

    2284. தாஸங் நிஸீத³னஸ்ஸாபி நிபஜ்ஜனஸ்ஸாபி பயோக³பா³ஹுல்லவஸேன பாசித்தியானங் க³ணனா ஹோதி இதி ஏவங் நித்³தி³ட்டா² ஏவங் அயங் க³ணனா அச்சந்தயஸேன அனந்தபரிவாரேன ப⁴க³வதா வுத்தாதி யோஜனா. எத்த² ச இச்சேவந்தி நிபாதஸமுதா³யோ, இதி-ஸத்³தோ³ நித³ஸ்ஸனே, ஏவங்-ஸத்³தோ³ இத³மத்தே² த³ட்ட²ப்³போ³.

    2284. Tāsaṃ nisīdanassāpi nipajjanassāpi payogabāhullavasena pācittiyānaṃ gaṇanā hoti iti evaṃ niddiṭṭhā evaṃ ayaṃ gaṇanā accantayasena anantaparivārena bhagavatā vuttāti yojanā. Ettha ca iccevanti nipātasamudāyo, iti-saddo nidassane, evaṃ-saddo idamatthe daṭṭhabbo.

    2285. பாதே³ ஆஸந்தி³யா செ²த்வாதி ஆஸந்தி³யா பாதே³ பமாணதோ அதி⁴கட்டா²னசி²ந்த³னேன செ²த்வா. பல்லங்கஸ்ஸ பாதே³ வாளகா பல்லங்கவாளகா, தே ஹித்வா அபனெத்வா, அனாபத்தீதி ஸேவந்தீனங் அனாபத்தி.

    2285.Pāde āsandiyā chetvāti āsandiyā pāde pamāṇato adhikaṭṭhānachindanena chetvā. Pallaṅkassa pāde vāḷakā pallaṅkavāḷakā, te hitvā apanetvā, anāpattīti sevantīnaṃ anāpatti.

    து³தியங்.

    Dutiyaṃ.

    2286-7. ச²ன்னந்தி கோ²மாதீ³னங் ச²ன்னங், நித்³தா⁴ரணே ஸாமிவசனங். அஞ்ஞதரங் ஸுத்தந்தி நித்³தா⁴ரிதப்³ப³னித³ஸ்ஸனங். ஹத்தா²தி ஹத்தே²ன, கரணத்தே² சேதங் நிஸ்ஸக்கவசனங். அஞ்சிதந்தி ஹத்தா²யாமேன ஆகட்³டி⁴தங் . தஸ்மிந்தி தஸ்மிங் அஞ்சி²தே ஸுத்தப்பதே³ஸே. தக்கம்ஹீதி கந்தனஸூசிம்ஹி. வேடி²தேதி பலிவேடி²தே.

    2286-7.Channanti khomādīnaṃ channaṃ, niddhāraṇe sāmivacanaṃ. Aññataraṃ suttanti niddhāritabbanidassanaṃ. Hatthāti hatthena, karaṇatthe cetaṃ nissakkavacanaṃ. Añcitanti hatthāyāmena ākaḍḍhitaṃ . Tasminti tasmiṃ añchite suttappadese. Takkamhīti kantanasūcimhi. Veṭhiteti paliveṭhite.

    ஸுத்தகந்தனதோ ஸப்³ப³புப்³ப³பயோகே³ஸூதி ஸுத்தகந்தனதோ புப்³பே³ஸு கப்பாஸவிசினநாதி³ஸப்³ப³பயோகே³ஸு. ஹத்த²வாரதோதி ஹத்த²வாரக³ணனாய. யதா²ஹ ‘‘கப்பாஸவிசினநங் ஆதி³ங் கத்வா ஸப்³ப³புப்³ப³பயோகே³ஸு ஹத்த²வாரக³ணனாய து³க்கட’’ந்தி (பாசி॰ அட்ட²॰ 988).

    Suttakantanato sabbapubbapayogesūti suttakantanato pubbesu kappāsavicinanādisabbapayogesu. Hatthavāratoti hatthavāragaṇanāya. Yathāha ‘‘kappāsavicinanaṃ ādiṃ katvā sabbapubbapayogesu hatthavāragaṇanāya dukkaṭa’’nti (pāci. aṭṭha. 988).

    2288. கந்திதங் ஸுத்தந்தி பட²மமேவ கந்திதங் த³ஸிகஸுத்தாதி³ங். புன கந்தந்தியாதி கோடியா கோடிங் ஸங்கா⁴டெத்வா புன கந்தந்தியா.

    2288.Kantitaṃ suttanti paṭhamameva kantitaṃ dasikasuttādiṃ. Puna kantantiyāti koṭiyā koṭiṃ saṅghāṭetvā puna kantantiyā.

    ததியங்.

    Tatiyaṃ.

    2289. தண்டு³லானங் கொட்டனங் து ஆதி³ங் கத்வா கி³ஹீனங் வெய்யாவச்சங் கரொந்தியா ஸப்³ப³புப்³ப³பயோகே³ஸு து³க்கடந்தி யோஜனா.

    2289. Taṇḍulānaṃ koṭṭanaṃ tu ādiṃ katvā gihīnaṃ veyyāvaccaṃ karontiyā sabbapubbapayogesu dukkaṭanti yojanā.

    2290. யாகு³ஆதி³ஸு நிப்பா²தே³தப்³பே³ஸு ததா³தா⁴ரானி பா⁴ஜனானி க³ணெத்வாவ பாசித்திங் பரிதீ³பயே, க²ஜ்ஜகாதீ³ஸு ரூபானங் க³ணனாய பாசித்திங் பரிதீ³பயேதி யோஜனா. யாகு³ஆதி³ஸூதி எத்த² ஆதி³-ஸத்³தே³ன ப⁴த்தஸூபாதீ³னங் ஸங்க³ஹோ. க²ஜ்ஜகாதீ³ஸூதி ஆதி³-ஸத்³தே³ன மச்ச²மங்ஸாதி³உத்தரிப⁴ங்கா³னங் ஸங்க³ஹோ.

    2290.Yāguādisu nipphādetabbesu tadādhārāni bhājanāni gaṇetvāva pācittiṃ paridīpaye, khajjakādīsu rūpānaṃ gaṇanāya pācittiṃ paridīpayeti yojanā. Yāguādisūti ettha ādi-saddena bhattasūpādīnaṃ saṅgaho. Khajjakādīsūti ādi-saddena macchamaṃsādiuttaribhaṅgānaṃ saṅgaho.

    2291. ‘‘ஸசேபி மாதாபிதரோ ஆக³ச்ச²ந்தி, யங்கிஞ்சி பீ³ஜனிங் வா ஸம்மஜ்ஜனித³ண்ட³ங் வா காராபெத்வா வெய்யாவச்சகரட்டா²னே ட²பெத்வாவ யங் கிஞ்சி பசிதுங் வட்டதீ’’தி அட்ட²கதா²க³தங் வினிச்ச²யங் த³ஸ்ஸேதுமாஹ ‘‘ஸசே’’திஆதி³. ஸசேதி எத்த² ‘‘மாதாபிதரோ ஆக³ச்ச²ந்தீ’’தி ஸேஸோ. அத்தனோ ஏவமாக³தானங் மாதாபிதூனம்பி கிஞ்சி கம்மங் அகாரெத்வா கிஞ்சி கம்மங் காதுங் ந வட்டதீதி யோஜனா. அபி-ஸத்³தோ³ ஸம்பா⁴வனே, தேன அஞ்ஞேஸங் கதா²யேவ நத்தீ²தி தீ³பேதி.

    2291. ‘‘Sacepi mātāpitaro āgacchanti, yaṃkiñci bījaniṃ vā sammajjanidaṇḍaṃ vā kārāpetvā veyyāvaccakaraṭṭhāne ṭhapetvāva yaṃ kiñci pacituṃ vaṭṭatī’’ti aṭṭhakathāgataṃ vinicchayaṃ dassetumāha ‘‘sace’’tiādi. Saceti ettha ‘‘mātāpitaro āgacchantī’’ti seso. Attano evamāgatānaṃ mātāpitūnampi kiñci kammaṃ akāretvā kiñci kammaṃ kātuṃ na vaṭṭatīti yojanā. Api-saddo sambhāvane, tena aññesaṃ kathāyeva natthīti dīpeti.

    2292-3. ஸங்க⁴ஸ்ஸ யாகு³பானே வெய்யாவச்சங் கரொந்தியா அனாபத்தீதி யோஜனா. ‘‘ஸங்க⁴ப⁴த்தேபீ’’திஆதீ³ஸுபி ஏஸேவ நயோ. அத்தனோ வெய்யாவச்சகரஸ்ஸ வாதி ஸம்ப³ந்தோ⁴. யதா²ஹ ‘‘யாகு³பானேதி மனுஸ்ஸேஹி ஸங்க⁴ஸ்ஸத்தா²ய கரியமானே யாகு³பானே வா ஸங்க⁴ப⁴த்தே வா தேஸங் ஸஹாயிகபா⁴வேன யங் கிஞ்சி பசந்தியா அனாபத்தி. சேதியபூஜாய ஸஹாயிகா ஹுத்வா க³ந்த⁴மாலாதீ³னி பூஜேதி, வட்டதீ’’தி (பாசி॰ அட்ட²॰ 993).

    2292-3. Saṅghassa yāgupāne veyyāvaccaṃ karontiyā anāpattīti yojanā. ‘‘Saṅghabhattepī’’tiādīsupi eseva nayo. Attano veyyāvaccakarassa vāti sambandho. Yathāha ‘‘yāgupāneti manussehi saṅghassatthāya kariyamāne yāgupāne vā saṅghabhatte vā tesaṃ sahāyikabhāvena yaṃ kiñci pacantiyā anāpatti. Cetiyapūjāya sahāyikā hutvā gandhamālādīni pūjeti, vaṭṭatī’’ti (pāci. aṭṭha. 993).

    சதுத்த²ங்.

    Catutthaṃ.

    2294. ‘‘யா பன பி⁴க்கு²னீ ‘ஏஹாய்யே இமங் அதி⁴கரணங் வூபஸமேஹீ’தி வுச்சமானா ‘ஸாதூ⁴’தி படிஸ்ஸுணித்வா ஸா பச்சா² அனந்தராயிகினீ நேவ வூபஸமெய்ய ந வூபஸமாய உஸ்ஸுக்கங் கரெய்ய, பாசித்திய’’ந்தி (பாசி॰ 995) ஸிக்கா²பத³ஸ்ஸ வினிச்ச²யங் த³ஸ்ஸேதுமாஹ ‘‘பாசித்தி து⁴ரனிக்கே²பே’’திஆதி³. து⁴ரனிக்கே²பேதி ந தா³னி தங் வூபஸமெஸ்ஸாமி, அஞ்ஞாஹி வா ந வூபஸமாபெஸ்ஸாமீ’’தி ஏவங் து⁴ரஸ்ஸ உஸ்ஸாஹஸ்ஸ நிக்கே²பே பாசித்தீதி யோஜனா. சீவரஸிப்³ப³னே யதா² பஞ்சாஹபரிஹாரோ லப்³ப⁴தி, இத⁴ பன ததா² ஏகாஹம்பி பரிஹாரோ ந லப்³ப⁴தீதி யோஜனா.

    2294. ‘‘Yā pana bhikkhunī ‘ehāyye imaṃ adhikaraṇaṃ vūpasamehī’ti vuccamānā ‘sādhū’ti paṭissuṇitvā sā pacchā anantarāyikinī neva vūpasameyya na vūpasamāya ussukkaṃ kareyya, pācittiya’’nti (pāci. 995) sikkhāpadassa vinicchayaṃ dassetumāha ‘‘pācitti dhuranikkhepe’’tiādi. Dhuranikkhepeti na dāni taṃ vūpasamessāmi, aññāhi vā na vūpasamāpessāmī’’ti evaṃ dhurassa ussāhassa nikkhepe pācittīti yojanā. Cīvarasibbane yathā pañcāhaparihāro labbhati, idha pana tathā ekāhampi parihāro na labbhatīti yojanā.

    2295. ஸேஸந்தி ‘‘து⁴ரங் நிக்கி²பித்வா பச்சா² வினிச்சி²னந்தீ ஆபத்திங் ஆபஜ்ஜித்வாவ வினிச்சி²னாதீ’’திஆதி³கங் வினிச்ச²யஜாதங். தத்த² சீவரஸிப்³ப³னே வுத்தனயேனேவ வேதி³தப்³ப³ந்தி யோஜனா.

    2295.Sesanti ‘‘dhuraṃ nikkhipitvā pacchā vinicchinantī āpattiṃ āpajjitvāva vinicchinātī’’tiādikaṃ vinicchayajātaṃ. Tattha cīvarasibbane vuttanayeneva veditabbanti yojanā.

    பஞ்சமங்.

    Pañcamaṃ.

    2296-7. யா பன பி⁴க்கு²னீ கி³ஹீனங் வா ஸஹத⁴ம்மிகே ட²பெத்வா அஞ்ஞேஸங் பரிப்³பா³ஜகபரிப்³பா³ஜிகானங் வா த³ந்தபோனோத³கங் வினா அஞ்ஞங் யங் கிஞ்சி அஜ்ஜோ²ஹரணீயங் கா²த³னீயங், போ⁴ஜனீயங் வா காயேன வா காயபடிப³த்³தே⁴ன வா நிஸ்ஸக்³கி³யேன வா த³தா³தி, தஸ்ஸா பாசித்தியங் ஹோதீதி யோஜனா.

    2296-7.Yāpana bhikkhunī gihīnaṃ vā sahadhammike ṭhapetvā aññesaṃ paribbājakaparibbājikānaṃ vā dantaponodakaṃ vinā aññaṃ yaṃ kiñci ajjhoharaṇīyaṃ khādanīyaṃ, bhojanīyaṃ vā kāyena vā kāyapaṭibaddhena vā nissaggiyena vā dadāti, tassā pācittiyaṃ hotīti yojanā.

    2298-9. இத⁴ இமஸ்மிங் ஸிக்கா²பதே³ முனினா த³ந்தகட்டோ²த³கே து³க்கடங் வுத்தந்தி யோஜனா. யா பன பி⁴க்கு²னீ காயாதீ³ஹி ஸயங் ந தே³தி அஞ்ஞேன தா³பேதி, தஸ்ஸா ச காயாதீ³ஹி அத³த்வா பூ⁴மியங் நிக்கி²பித்வா தெ³ந்தியாபி யா பா³ஹிரலேபங் வா தே³தி, தஸ்ஸாபி உம்மத்திகாய ச ந தோ³ஸோ அனாபத்தீதி யோஜனா.

    2298-9.Idha imasmiṃ sikkhāpade muninā dantakaṭṭhodake dukkaṭaṃ vuttanti yojanā. Yā pana bhikkhunī kāyādīhi sayaṃ na deti aññena dāpeti, tassā ca kāyādīhi adatvā bhūmiyaṃ nikkhipitvā dentiyāpi yā bāhiralepaṃ vā deti, tassāpi ummattikāya ca na doso anāpattīti yojanā.

    ச²ட்ட²ங்.

    Chaṭṭhaṃ.

    2300-1. ஆவஸத²சீவரந்தி ‘‘உதுனியோ பி⁴க்கு²னியோ பரிபு⁴ஞ்ஜந்தூ’’தி தி³ன்னங் சீவரங். யா பி⁴க்கு²னீ யங் ‘‘ஆவஸத²சீவர’’ந்தி நியமிதங் சீவரங், தங் சதுத்தே² தி³வஸே தோ⁴வித்வா அந்தமஸோ உதுனியா ஸாமணேராய வா அத³த்வா ஸசே பரிபு⁴ஞ்ஜெய்ய, தஸ்ஸா பாசித்தியங் வுத்தந்தி யோஜனா. திகபாசித்தியங் ஸியாதி ‘‘அனிஸ்ஸஜ்ஜிதே அனிஸ்ஸஜ்ஜிதஸஞ்ஞா…பே॰… வேமதிகா…பே॰… நிஸ்ஸஜ்ஜிதஸஞ்ஞா பரிபு⁴ஞ்ஜதி, ஆபத்தி பாசித்தியஸ்ஸா’’தி (பாசி॰ 1006) வுத்தங் பாசித்தியங் ஹோதீதி யோஜனா.

    2300-1.Āvasathacīvaranti ‘‘utuniyo bhikkhuniyo paribhuñjantū’’ti dinnaṃ cīvaraṃ. Yā bhikkhunī yaṃ ‘‘āvasathacīvara’’nti niyamitaṃ cīvaraṃ, taṃ catutthe divase dhovitvā antamaso utuniyā sāmaṇerāya vā adatvā sace paribhuñjeyya, tassā pācittiyaṃ vuttanti yojanā. Tikapācittiyaṃ siyāti ‘‘anissajjite anissajjitasaññā…pe… vematikā…pe… nissajjitasaññā paribhuñjati, āpatti pācittiyassā’’ti (pāci. 1006) vuttaṃ pācittiyaṃ hotīti yojanā.

    2302-3. தஸ்மிங் சீவரே நிஸ்ஸஜ்ஜிதே அனிஸ்ஸஜ்ஜிதஸஞ்ஞாய வா வேமதிகாய வா தஸ்ஸா பி⁴க்கு²னியா த்³விகது³க்கடங் வுத்தந்தி யோஜனா. அஞ்ஞாஸங் உதுனீனங் அபா⁴வே அத³த்வாபி பரிபு⁴ஞ்ஜந்தியா அனாபத்தி. புன பரியயேதி புன உதுனிவாரே யதா²காலங் பரிபு⁴ஞ்ஜந்தியா அனாபத்தி. அச்சி²ன்னசீவராதீ³னஞ்ச அனாபத்தீதி யோஜனா. பரியயேதி கா³தா²ப³ந்த⁴வஸேன ரஸ்ஸத்தங் . அச்சி²ன்னசீவராதீ³னந்தி எத்த² ஆதி³-ஸத்³தே³ன நட்ட²சீவராதீ³னங் ஸங்க³ஹோ. ஆபதா³ஸுபீதி மஹக்³க⁴சீவரங் ஸரீரதோ மோசெத்வா ஸுப்படிஸாமிதம்பி சோரா ஹரந்தி, ஏவரூபாஸு ஆபதா³ஸு பரிபு⁴ஞ்ஜந்தியா அனாபத்தீதி யோஜனா.

    2302-3.Tasmiṃ cīvare nissajjite anissajjitasaññāya vā vematikāya vā tassā bhikkhuniyā dvikadukkaṭaṃ vuttanti yojanā. Aññāsaṃ utunīnaṃ abhāve adatvāpi paribhuñjantiyā anāpatti. Puna pariyayeti puna utunivāre yathākālaṃ paribhuñjantiyā anāpatti. Acchinnacīvarādīnañca anāpattīti yojanā. Pariyayeti gāthābandhavasena rassattaṃ . Acchinnacīvarādīnanti ettha ādi-saddena naṭṭhacīvarādīnaṃ saṅgaho. Āpadāsupīti mahagghacīvaraṃ sarīrato mocetvā suppaṭisāmitampi corā haranti, evarūpāsu āpadāsu paribhuñjantiyā anāpattīti yojanā.

    ஸத்தமங்.

    Sattamaṃ.

    2304. ஸகவாடகங் விஹாரந்தி கவாடப³ந்த⁴விஹாரங், த்³வாரகவாடயுத்தங் ஸுகு³த்தஸேனாஸனந்தி வுத்தங் ஹோதி. ரக்க²னத்தா²ய அத³த்வாதி ‘‘இமங் ஜக்³கெ³ய்யாஸீ’’தி ஏவங் அனாபுச்சி²த்வா.

    2304.Sakavāṭakaṃvihāranti kavāṭabandhavihāraṃ, dvārakavāṭayuttaṃ suguttasenāsananti vuttaṃ hoti. Rakkhanatthāya adatvāti ‘‘imaṃ jaggeyyāsī’’ti evaṃ anāpucchitvā.

    2305-6. ‘‘ஹோதி பாசித்தியங் தஸ்ஸா, சாரிகங் பக்கமந்தியா’’தி வுத்தமேவ பகாஸேதுமாஹ ‘‘அத்தனோ கா³மதோ’’திஆதி³. அத்தனோ கா³மதோதி அத்தனோ வஸனககா³மதோ. ததா² இதரஸ்ஸாதி அபரிக்கி²த்தஸ்ஸ விஹாரஸ்ஸ பரிக்கே²பங் உபசாரங். தந்திஆதி³பத³த்தயே பு⁴ம்மத்தே² உபயோக³வசனங் வேதி³தப்³ப³ங். பரிக்கி²த்தஸ்ஸ விஹாரஸ்ஸ பரிக்கே²பே பட²மேன பதே³ன ஸமதிக்கந்தே து³க்கடங், ததா² இதரஸ்ஸ அபரிக்கி²த்தஸ்ஸ விஹாரஸ்ஸ தஸ்மிங் உபசாரே அதிக்கந்தே து³க்கடங். து³தியேன பதே³ன பரிக்கே²பே, உபசாரே ஸமதிக்கந்தமத்தே பாசித்தீதி யோஜனா.

    2305-6. ‘‘Hoti pācittiyaṃ tassā, cārikaṃ pakkamantiyā’’ti vuttameva pakāsetumāha ‘‘attano gāmato’’tiādi. Attano gāmatoti attano vasanakagāmato. Tathā itarassāti aparikkhittassa vihārassa parikkhepaṃ upacāraṃ. Tantiādipadattaye bhummatthe upayogavacanaṃ veditabbaṃ. Parikkhittassa vihārassa parikkhepe paṭhamena padena samatikkante dukkaṭaṃ, tathā itarassa aparikkhittassa vihārassa tasmiṃ upacāre atikkante dukkaṭaṃ. Dutiyena padena parikkhepe, upacāre samatikkantamatte pācittīti yojanā.

    2307. அகவாடப³ந்த⁴னஸ்மிங் கவாடப³ந்த⁴ரஹிதே விஹாரே ததா² அனிஸ்ஸஜ்ஜந்தியா து³க்கடங் பரிதீ³பிதங். ஜக்³கி³கங் அலப⁴ந்தியாதி எத்த² ‘‘பரியேஸித்வா’’தி ஸேஸோ. ஜக்³கி³கந்தி விஹாரபடிஜக்³கி³கங்.

    2307.Akavāṭabandhanasmiṃ kavāṭabandharahite vihāre tathā anissajjantiyā dukkaṭaṃ paridīpitaṃ. Jaggikaṃ alabhantiyāti ettha ‘‘pariyesitvā’’ti seso. Jaggikanti vihārapaṭijaggikaṃ.

    2308. ஆபதா³ஸூதி ரட்டே² பி⁴ஜ்ஜந்தே ஆவாஸே ச²ட்³டெ³த்வா க³ச்ச²ந்தி, ஏவரூபாஸு ஆபதா³ஸு. கி³லானாயாதி வசீபே⁴த³ங் காதுங் அஸமத்தா²யாதி.

    2308.Āpadāsūti raṭṭhe bhijjante āvāse chaḍḍetvā gacchanti, evarūpāsu āpadāsu. Gilānāyāti vacībhedaṃ kātuṃ asamatthāyāti.

    அட்ட²மங்.

    Aṭṭhamaṃ.

    2309-10. ஹத்தீ² ச அஸ்ஸோ ச ரதோ² ச ஹத்தி²அஸ்ஸரதா², தே ஆதி³ யேஸங் தே ஹத்தி²அஸ்ஸரதா²த³யோ, தேஹி. ஆதி³-ஸத்³தே³ன த⁴னு த²ரூதி பத³த்³வயங் க³ஹிதங். ஸங்யுத்தந்தி யதா²வுத்தேஹி ஹத்தி²அஸ்ஸாதி³பதே³ஹி ஸங்யோஜிதங், ‘‘ஹத்தீ²னங் ஸிப்பங் ஹத்தி²ஸிப்ப’’ந்திஆதி³னா கதஸமாஸந்தி அத்தோ², ‘‘ஹத்தி²ஸிப்பங் அஸ்ஸஸிப்பங் ரத²ஸிப்பங் த⁴னுஸிப்பங் த²ருஸிப்ப’’ந்தி ஏவங் வுத்தங் யங் கிஞ்சி ஸிப்பந்தி வுத்தங் ஹோதி. ஹத்தி²ஸிக்கா²தி³ஸிப்பங் ஸந்தீ³பகோ க³ந்தோ² வச்சவாசகானங் அபே⁴தோ³பசாரேன ஏவங் வுத்தோதி க³ஹேதப்³ப³ங். தேனேவ வக்க²தி ‘‘பதா³தீ³னங் வஸேனிதா⁴’’தி. பரூபகா⁴தகங் மந்தாக³த³யோக³ப்பபே⁴த³கங் கிஞ்சீதி பரேஸங் அந்தராயகரங் கி²லனவஸீகரணஸோஸாபனாதி³பே⁴த³ங் ஆத²ப்³ப³ணமந்தஞ்ச விஸயோகா³தி³ப்பபே⁴த³கஞ்ச யங் கிஞ்சி ஸிப்பந்தி அத்தோ².

    2309-10. Hatthī ca asso ca ratho ca hatthiassarathā, te ādi yesaṃ te hatthiassarathādayo, tehi. Ādi-saddena dhanu tharūti padadvayaṃ gahitaṃ. Saṃyuttanti yathāvuttehi hatthiassādipadehi saṃyojitaṃ, ‘‘hatthīnaṃ sippaṃ hatthisippa’’ntiādinā katasamāsanti attho, ‘‘hatthisippaṃ assasippaṃ rathasippaṃ dhanusippaṃ tharusippa’’nti evaṃ vuttaṃ yaṃ kiñci sippanti vuttaṃ hoti. Hatthisikkhādisippaṃ sandīpako gantho vaccavācakānaṃ abhedopacārena evaṃ vuttoti gahetabbaṃ. Teneva vakkhati ‘‘padādīnaṃ vasenidhā’’ti. Parūpaghātakaṃ mantāgadayogappabhedakaṃ kiñcīti paresaṃ antarāyakaraṃ khilanavasīkaraṇasosāpanādibhedaṃ āthabbaṇamantañca visayogādippabhedakañca yaṃ kiñci sippanti attho.

    எத்த² ச கி²லனமந்தோ நாம தா³ருஸாரகி²லங் மந்தெத்வா பத²வியங் பவேஸெத்வா மாரணமந்தோ. வஸீகரணமந்தோ நாம பரங் அத்தனோ வஸே வத்தாபனகமந்தோ. ஸோஸாபனகமந்தோ நாம பரஸரீரங் ரஸாதி³தா⁴துக்க²யேன ஸுக்க²பா⁴வங் பாபனகமந்தோ. ஆதி³-ஸத்³தே³ன விதெ³ஸ்ஸனாதி³மந்தானங் ஸங்க³ஹோ. விதெ³ஸ்ஸனங் நாம மித்தானங் அஞ்ஞமஞ்ஞஸ்ஸ வேரிபா⁴வாபாத³னங். இத⁴ இமஸ்மிங் ஸாஸனே யா பி⁴க்கு²னீ ஹத்தி²…பே॰… கிஞ்சி யஸ்ஸ கஸ்ஸசி ஸந்திகே பதா³தீ³னங் வஸேன பரியாபுணெய்ய அதீ⁴யெய்ய சே, தஸ்ஸா பாசித்தியங் ஹோதீதி யோஜனா.

    Ettha ca khilanamanto nāma dārusārakhilaṃ mantetvā pathaviyaṃ pavesetvā māraṇamanto. Vasīkaraṇamanto nāma paraṃ attano vase vattāpanakamanto. Sosāpanakamanto nāma parasarīraṃ rasādidhātukkhayena sukkhabhāvaṃ pāpanakamanto. Ādi-saddena videssanādimantānaṃ saṅgaho. Videssanaṃ nāma mittānaṃ aññamaññassa veribhāvāpādanaṃ. Idha imasmiṃ sāsane yā bhikkhunī hatthi…pe… kiñci yassa kassaci santike padādīnaṃ vasena pariyāpuṇeyya adhīyeyya ce, tassā pācittiyaṃ hotīti yojanā.

    2311. லேகே²தி லிகி²தஸிப்பே. தா⁴ரணாய சாதி தா⁴ரணஸத்தே², யஸ்மிங் வுத்தனயேன படிபஜ்ஜந்தா ப³ஹூனிபி க³ந்தா²னி தா⁴ரெந்தி. கு³த்தியாதி அத்தனோ வா பரேஸங் வா கு³த்தத்தா²ய. பரித்தேஸு ச ஸப்³பே³ஸூதி யக்க²பரித்தசோரவாளாதி³ஸப்³பே³ஸு பரித்தேஸு ச.

    2311.Lekheti likhitasippe. Dhāraṇāya cāti dhāraṇasatthe, yasmiṃ vuttanayena paṭipajjantā bahūnipi ganthāni dhārenti. Guttiyāti attano vā paresaṃ vā guttatthāya. Parittesu ca sabbesūti yakkhaparittacoravāḷādisabbesu parittesu ca.

    நவமங்.

    Navamaṃ.

    2312. த³ஸமேதி ‘‘யா பன பி⁴க்கு²னீ திரச்சா²னவிஜ்ஜங் வாசெய்ய, பாசித்திய’’ந்தி (பாசி॰ 1018) ஸமுத்³தி³ட்டே² த³ஸமஸிக்கா²பதே³. இத³ங் த³ஸமஸிக்கா²பத³ங்.

    2312.Dasameti ‘‘yā pana bhikkhunī tiracchānavijjaṃ vāceyya, pācittiya’’nti (pāci. 1018) samuddiṭṭhe dasamasikkhāpade. Idaṃ dasamasikkhāpadaṃ.

    த³ஸமங்.

    Dasamaṃ.

    சித்தாகா³ரவக்³கோ³ பஞ்சமோ.

    Cittāgāravaggo pañcamo.

    2313. ஸபி⁴க்கு²கங் ஆராமந்தி யத்த² பி⁴க்கூ² ருக்க²மூலேபி வஸந்தி, தங் பதே³ஸங். ஜானித்வாதி ‘‘ஸபி⁴க்கு²க’’ந்தி ஜானித்வா. யங் கிஞ்சீதி பி⁴க்கு²ங் வா ஸாமணேரங் வா ஆராமிகங் வா யங் கிஞ்சி.

    2313.Sabhikkhukaṃ ārāmanti yattha bhikkhū rukkhamūlepi vasanti, taṃ padesaṃ. Jānitvāti ‘‘sabhikkhuka’’nti jānitvā. Yaṃ kiñcīti bhikkhuṃ vā sāmaṇeraṃ vā ārāmikaṃ vā yaṃ kiñci.

    2314-5. ‘‘ஸபி⁴க்கு²கோ நாம ஆராமோ யத்த² பி⁴க்கூ² ருக்க²மூலேபி வஸந்தீ’’தி (பாசி॰ 1025) வசனதோ ஆஹ ‘‘ஸசே அந்தமஸோ’’திஆதி³. யா பன பி⁴க்கு²னீ அந்தமஸோ ருக்க²மூலஸ்ஸபி அனாபுச்சா² ஸசே பரிக்கே²பங் அதிக்காமேதி, தஸ்ஸா பட²மே பாதே³ து³க்கடங், அபரிக்கி²த்தே தஸ்ஸ விஹாரஸ்ஸ உபசாரோக்கமே வாபி பி⁴க்கு²னியா து³க்கடங், து³தியே பாதே³ அதிக்காமிதே பாசித்தி ஸியாதி யோஜனா.

    2314-5. ‘‘Sabhikkhuko nāma ārāmo yattha bhikkhū rukkhamūlepi vasantī’’ti (pāci. 1025) vacanato āha ‘‘sace antamaso’’tiādi. Yā pana bhikkhunī antamaso rukkhamūlassapi anāpucchā sace parikkhepaṃ atikkāmeti, tassā paṭhame pāde dukkaṭaṃ, aparikkhitte tassa vihārassa upacārokkame vāpi bhikkhuniyā dukkaṭaṃ, dutiye pāde atikkāmite pācitti siyāti yojanā.

    2316. அபி⁴க்கு²கே ஆராமே ஸபி⁴க்கூ²தி ஸஞ்ஞாய உபோ⁴ஸுபி ஸபி⁴க்கு²காபி⁴க்கு²கேஸு ஆராமேஸு ஜாதகங்கா²ய ஸஞ்ஜாதவிசிகிச்சா²ய, வேமதிகாயாதி அத்தோ². தஸ்ஸா ஆபத்தி து³க்கடங் ஹோதீதி யோஜனா.

    2316.Abhikkhuke ārāme sabhikkhūti saññāya ubhosupi sabhikkhukābhikkhukesu ārāmesu jātakaṅkhāya sañjātavicikicchāya, vematikāyāti attho. Tassā āpatti dukkaṭaṃ hotīti yojanā.

    2317. ஸீஸானுலோகிகா யா பி⁴க்கு²னீ க³ச்ச²தி, தஸ்ஸா ச அனாபத்தி பகாஸிதாதி யோஜனா. ஏவமுபரிபி. தா பி⁴க்கு²னியோ யத்த² ஸன்னிபதிதா ஹொந்தி, தாஸங் ஸந்திகங் ‘‘க³ச்சா²மீ’’தி க³ச்ச²தி. யதா²ஹ ‘‘யத்த² பி⁴க்கு²னியோ பட²மதரங் பவிஸித்வா ஸஜ்ஜா²யங் வா சேதியவந்த³னாதீ³னி வா கரொந்தி, தத்த² தாஸங் ஸந்திகங் க³ச்சா²மீதி க³ந்துங் வட்டதீ’’தி (பாசி॰ அட்ட²॰ 1027).

    2317. Sīsānulokikā yā bhikkhunī gacchati, tassā ca anāpatti pakāsitāti yojanā. Evamuparipi. Tā bhikkhuniyo yattha sannipatitā honti, tāsaṃ santikaṃ ‘‘gacchāmī’’ti gacchati. Yathāha ‘‘yattha bhikkhuniyo paṭhamataraṃ pavisitvā sajjhāyaṃ vā cetiyavandanādīni vā karonti, tattha tāsaṃ santikaṃ gacchāmīti gantuṃ vaṭṭatī’’ti (pāci. aṭṭha. 1027).

    2318. ‘‘ஸந்தங் பி⁴க்கு²ங் அனாபுச்சா²’’தி வசனேனேவ அபி⁴க்கு²கங் ஆராமங் கிஞ்சி அனாபுச்சா² பவிஸந்தியா அனாபத்தீதி தீ³பிதங் ஹோதி. ஆராமமஜ்ஜ²தோ வா மக்³கோ³ ஹோதி, தேன க³ச்ச²ந்தியாபி. ஆபதா³ஸூதி யேன கேனசி உபத்³து³தா ஹோதி, ஏவரூபாஸு ஆபதா³ஸு பவிஸந்தியா.

    2318.‘‘Santaṃ bhikkhuṃ anāpucchā’’ti vacaneneva abhikkhukaṃ ārāmaṃ kiñci anāpucchā pavisantiyā anāpattīti dīpitaṃ hoti. Ārāmamajjhato vā maggo hoti, tena gacchantiyāpi. Āpadāsūti yena kenaci upaddutā hoti, evarūpāsu āpadāsu pavisantiyā.

    பட²மங்.

    Paṭhamaṃ.

    2320. அக்கோஸெய்யாதி த³ஸன்னங் அக்கோஸவத்தூ²னங் அஞ்ஞதரேன ஸம்முகா², பரம்முகா² வா அக்கோஸெய்ய வா. பரிபா⁴ஸெய்ய வாதி ப⁴ய’மஸ்ஸ உபத³ங்ஸெய்ய வா. திகபாசித்தியந்தி ‘‘உபஸம்பன்னே உபஸம்பன்னஸஞ்ஞா…பே॰… வேமதிகா…பே॰… அனுபஸம்பன்னஸஞ்ஞா அக்கோஸதி வா பரிபா⁴ஸதி வா, ஆபத்தி பாசித்தியஸ்ஸா’’தி (பாசி॰ 1031) திகபாசித்தியங் வுத்தங். ஸேஸேதி அனுபஸம்பன்னே. திகது³க்கடங் தஸ்ஸா ஹோதீதி யோஜனா.

    2320.Akkoseyyāti dasannaṃ akkosavatthūnaṃ aññatarena sammukhā, parammukhā vā akkoseyya vā. Paribhāseyya vāti bhaya’massa upadaṃseyya vā. Tikapācittiyanti ‘‘upasampanne upasampannasaññā…pe… vematikā…pe… anupasampannasaññā akkosati vā paribhāsati vā, āpatti pācittiyassā’’ti (pāci. 1031) tikapācittiyaṃ vuttaṃ. Seseti anupasampanne. Tikadukkaṭaṃ tassā hotīti yojanā.

    2321. ‘‘புரக்க²த்வா’’திஆதீ³ஸு யங் வத்தப்³ப³ங், தங் ‘‘அபி⁴ஸபெய்யா’’தி (பாசி॰ 875) வுத்தஸிக்கா²பதே³ வுத்தனயமேவ.

    2321.‘‘Purakkhatvā’’tiādīsu yaṃ vattabbaṃ, taṃ ‘‘abhisapeyyā’’ti (pāci. 875) vuttasikkhāpade vuttanayameva.

    து³தியங்.

    Dutiyaṃ.

    2322-3. ஸங்க⁴ந்தி பி⁴க்கு²னிஸங்க⁴ங். பரிபா⁴ஸெய்யாதி ‘‘பா³லா ஏதா, அப்³யத்தா ஏதா, நேதா ஜானந்தி கம்மங் வா கம்மதோ³ஸங் வா கம்மவிபத்திங் வா கம்மஸம்பத்திங் வா’’தி (பாசி॰ 1035) ஆக³தனயேன பரிபா⁴ஸெய்யாதி அத்தோ². இதராயாதி எத்த² உபயோக³த்தே² கரணவசனங். ஏகங் பி⁴க்கு²னிங் வா ஸம்ப³ஹுலா பி⁴க்கு²னியோ வா ததே²வ இதரங் அனுபஸம்பன்னங் வா பரிபா⁴ஸந்தியா தஸ்ஸா து³க்கடங் பரிதீ³பிதந்தி யோஜனா.

    2322-3.Saṅghanti bhikkhunisaṅghaṃ. Paribhāseyyāti ‘‘bālā etā, abyattā etā, netā jānanti kammaṃ vā kammadosaṃ vā kammavipattiṃ vā kammasampattiṃ vā’’ti (pāci. 1035) āgatanayena paribhāseyyāti attho. Itarāyāti ettha upayogatthe karaṇavacanaṃ. Ekaṃ bhikkhuniṃ vā sambahulā bhikkhuniyo vā tatheva itaraṃ anupasampannaṃ vā paribhāsantiyā tassā dukkaṭaṃ paridīpitanti yojanā.

    ததியங்.

    Tatiyaṃ.

    2324-6. யா நிமந்தனபவாரணா உபோ⁴பி க³ணபோ⁴ஜனஸிக்கா²பதே³ (பாசி॰ 217-219), பவாரணஸிக்கா²பதே³ (பாசி॰ 238-239) ச வுத்தலக்க²ணா, தாஹி உபோ⁴ஹி நிமந்தனபவாரணாஹி யா ச பி⁴க்கு²னீ ஸசே நிமந்திதாபி வா பவாரிதாபி வா ப⁴வெய்ய, ஸா புரேப⁴த்தங் யாகு³ஞ்ச யாமகாலிகாதி³காலிகத்தயஞ்ச ட²பெத்வா யங் கிஞ்சி ஆமிஸங் யாவகாலிகங் அஜ்ஜோ²ஹரணத்தா²ய படிக்³க³ண்ஹாதி சே, தஸ்ஸா க³ஹணே து³க்கடங் ஸியா, அஜ்ஜோ²ஹாரவஸேன எத்த² இமஸ்மிங் ஸிக்கா²பதே³ பாசித்தி பரிதீ³பிதாதி யோஜனா.

    2324-6. Yā nimantanapavāraṇā ubhopi gaṇabhojanasikkhāpade (pāci. 217-219), pavāraṇasikkhāpade (pāci. 238-239) ca vuttalakkhaṇā, tāhi ubhohi nimantanapavāraṇāhi yā ca bhikkhunī sace nimantitāpi vā pavāritāpi vā bhaveyya, sā purebhattaṃ yāguñca yāmakālikādikālikattayañca ṭhapetvā yaṃ kiñci āmisaṃ yāvakālikaṃ ajjhoharaṇatthāya paṭiggaṇhāti ce, tassā gahaṇe dukkaṭaṃ siyā, ajjhohāravasena ettha imasmiṃ sikkhāpade pācitti paridīpitāti yojanā.

    எத்த² ச நிமந்திதா நாம ‘‘பஞ்சன்னங் போ⁴ஜனானங் அஞ்ஞதரேன போ⁴ஜனேன நிமந்திதா’’தி க³ணபோ⁴ஜனஸிக்கா²பதே³ வுத்தலக்க²ணா. பவாரணா ச ‘‘பவாரிதோ நாம அஸனங் பஞ்ஞாயதி, போ⁴ஜனங் பஞ்ஞாயதி, ஹத்த²பாஸே டி²தோ அபி⁴ஹரதி, படிக்கே²போ பஞ்ஞாயதீ’’தி பவாரணஸிக்கா²பதே³ வுத்தலக்க²ணாதி வேதி³தப்³பா³.

    Ettha ca nimantitā nāma ‘‘pañcannaṃ bhojanānaṃ aññatarena bhojanena nimantitā’’ti gaṇabhojanasikkhāpade vuttalakkhaṇā. Pavāraṇā ca ‘‘pavārito nāma asanaṃ paññāyati, bhojanaṃ paññāyati, hatthapāse ṭhito abhiharati, paṭikkhepo paññāyatī’’ti pavāraṇasikkhāpade vuttalakkhaṇāti veditabbā.

    2327. காலிகானி ச தீணேவாதி யாமகாலிகாதீ³னி தீணி காலிகானி ஏவ.

    2327.Kālikāni ca tīṇevāti yāmakālikādīni tīṇi kālikāni eva.

    2328-9. நிமந்திதபவாரிதானங் த்³வின்னங் ஸாதா⁴ரணாபத்திங் த³ஸ்ஸெத்வா அனாபத்திங் த³ஸ்ஸேதுமாஹ ‘‘நிமந்திதா’’திஆதி³. இத⁴ இமஸ்மிங் ஸாஸனே யா பன பி⁴க்கு²னீ நிமந்திதா அப்பவாரிதா ஸசே யாகு³ங் பிவதி, வட்டதி அனாபத்தீதி அத்தோ². ஸாமிகஸ்ஸாதி யேன நிமந்திதா, தஸ்ஸ நிமந்தனஸாமிகஸ்ஸேவ. அஞ்ஞபோ⁴ஜனந்தி யேன நிமந்திதா, ததோ அஞ்ஞஸ்ஸ போ⁴ஜனங். ஸசே ஸா பு⁴ஞ்ஜதி, ததா² வட்டதீதி யோஜனா.

    2328-9. Nimantitapavāritānaṃ dvinnaṃ sādhāraṇāpattiṃ dassetvā anāpattiṃ dassetumāha ‘‘nimantitā’’tiādi. Idha imasmiṃ sāsane yā pana bhikkhunī nimantitā appavāritā sace yāguṃ pivati, vaṭṭati anāpattīti attho. Sāmikassāti yena nimantitā, tassa nimantanasāmikasseva. Aññabhojananti yena nimantitā, tato aññassa bhojanaṃ. Sace sā bhuñjati, tathā vaṭṭatīti yojanā.

    காலிகானி ச தீணேவாதி யாமகாலிகாதீ³னி தீணி காலிகானேவ. பச்சயே ஸதீதி பிபாஸாதி³பச்சயே ஸதி.

    Kālikāni ca tīṇevāti yāmakālikādīni tīṇi kālikāneva. Paccaye satīti pipāsādipaccaye sati.

    2330. இமஸ்ஸ ஸிக்கா²பத³ஸ்ஸ இத³ங் ஸமுட்டா²னங் அத்³தா⁴னேன துல்யந்தி யோஜனா. பவாரிதாய, அப்பவாரிதாய வா நிமந்திதாய வஸேன கிரியாகிரியதங் த³ஸ்ஸேதுமாஹ ‘‘நிமந்திதா’’திஆதி³. நிமந்திதா பன ஸாமிகங் அனாபுச்சா² பு⁴ஞ்ஜதி சே, தஸ்ஸா வஸேன இத³ங் ஸிக்கா²பத³ங் கிரியாகிரியங் ஹோதி. எத்த² பு⁴ஞ்ஜனங் க்ரியங். ஸாமிகஸ்ஸ அனாபுச்ச²னங் அக்ரியங்.

    2330. Imassa sikkhāpadassa idaṃ samuṭṭhānaṃ addhānena tulyanti yojanā. Pavāritāya, appavāritāya vā nimantitāya vasena kiriyākiriyataṃ dassetumāha ‘‘nimantitā’’tiādi. Nimantitā pana sāmikaṃ anāpucchā bhuñjati ce, tassā vasena idaṃ sikkhāpadaṃ kiriyākiriyaṃ hoti. Ettha bhuñjanaṃ kriyaṃ. Sāmikassa anāpucchanaṃ akriyaṃ.

    2331. ‘‘கப்பியங் காராபெத்வா’’திஆதி³ங் பவாரிதமேவ ஸந்தா⁴யாஹ. யா யதி³ பரிபு⁴ஞ்ஜதி, தஸ்ஸா ச பாசித்தி ஸியா கிரியதோ ஹோதீதி யோஜனா. ஸியாதி அவஸ்ஸங். பவாரணஸிக்கா²பதே³ வுத்தனயேன கப்பியங் காரெத்வா வா அகாராபெத்வா வா பரிபு⁴ஞ்ஜந்தியா தஸ்ஸா பரிபோ⁴கே³னேவ இமினா ஸிக்கா²பதே³ன அவஸ்ஸங் ஆபத்தி ஹோதீதி அத்தோ².

    2331.‘‘Kappiyaṃ kārāpetvā’’tiādiṃ pavāritameva sandhāyāha. Yā yadi paribhuñjati, tassā ca pācitti siyā kiriyato hotīti yojanā. Siyāti avassaṃ. Pavāraṇasikkhāpade vuttanayena kappiyaṃ kāretvā vā akārāpetvā vā paribhuñjantiyā tassā paribhogeneva iminā sikkhāpadena avassaṃ āpatti hotīti attho.

    சதுத்த²ங்.

    Catutthaṃ.

    2332. ‘‘யா பன பி⁴க்கு²னீ குலமச்ச²ரினீ அஸ்ஸ, பாசித்திய’’ந்தி (பாசி॰ 1043) இமஸ்மிங் ஸிக்கா²பதே³ வினிச்ச²யங் த³ஸ்ஸேதுமாஹ ‘‘பி⁴க்கு²னீன’’ந்திஆதி³. குலஸந்திகே பி⁴க்கு²னீனங் அவண்ணங் வத³ந்தியா பாசித்தீதி ஸம்ப³ந்தோ⁴, குலஸ்ஸ ஸந்திகே ‘‘பி⁴க்கு²னியோ து³ஸ்ஸீலா பாபத⁴ம்மா’’தி பி⁴க்கு²னீனங் அவண்ணங் பா⁴ஸந்தியாதி அத்தோ². குலஸ்ஸாவண்ணனங் வாபீதி ‘‘தங் குலங் அஸ்ஸத்³த⁴ங் அப்பஸன்ன’’ந்தி பி⁴க்கு²னீனங் ஸந்திகே குலஸ்ஸ அவண்ணங் அகு³ணங் வத³ந்தியா பாசித்தீதி ஸம்ப³ந்தோ⁴.

    2332. ‘‘Yā pana bhikkhunī kulamaccharinī assa, pācittiya’’nti (pāci. 1043) imasmiṃ sikkhāpade vinicchayaṃ dassetumāha ‘‘bhikkhunīna’’ntiādi. Kulasantike bhikkhunīnaṃ avaṇṇaṃ vadantiyā pācittīti sambandho, kulassa santike ‘‘bhikkhuniyo dussīlā pāpadhammā’’ti bhikkhunīnaṃ avaṇṇaṃ bhāsantiyāti attho. Kulassāvaṇṇanaṃ vāpīti ‘‘taṃ kulaṃ assaddhaṃ appasanna’’nti bhikkhunīnaṃ santike kulassa avaṇṇaṃ aguṇaṃ vadantiyā pācittīti sambandho.

    2333. ஸந்தங் பா⁴ஸந்தியா தோ³ஸந்தி அமச்ச²ராயித்வா குலஸ்ஸ வா பி⁴க்கு²னீனங் வா ஸந்தங் தோ³ஸங் ஆதீ³னவங் கதெ²ந்தியா.

    2333.Santaṃbhāsantiyā dosanti amaccharāyitvā kulassa vā bhikkhunīnaṃ vā santaṃ dosaṃ ādīnavaṃ kathentiyā.

    பஞ்சமங்.

    Pañcamaṃ.

    2334-5. ஓவாத³தா³யகோதி அட்ட²ஹி க³ருத⁴ம்மேஹி ஓவாத³ங் தெ³ந்தோ. வஸ்ஸங் உபக³ச்ச²ந்தியாதி வஸ்ஸங் வஸந்தியா.

    2334-5.Ovādadāyakoti aṭṭhahi garudhammehi ovādaṃ dento. Vassaṃ upagacchantiyāti vassaṃ vasantiyā.

    2336. பி⁴க்கூ²தி ஓவாத³தா³யகா பி⁴க்கூ².

    2336.Bhikkhūti ovādadāyakā bhikkhū.

    ச²ட்ட²ங்.

    Chaṭṭhaṃ.

    2338. யா ஸா பி⁴க்கு²னீ வஸ்ஸங் வுத்தா² புரிமங் வா பச்சி²மங் வா தேமாஸங் வுத்தா² ததோ அனந்தரங் உப⁴தோஸங்கே⁴ பி⁴க்கு²னிஸங்கே⁴ ச பி⁴க்கு²ஸங்கே⁴ ச ‘‘நாஹங் பவாரெஸ்ஸாமீ’’தி து⁴ரங் நிக்கி²பதி சேதி யோஜனா.

    2338. Yā sā bhikkhunī vassaṃ vutthā purimaṃ vā pacchimaṃ vā temāsaṃ vutthā tato anantaraṃ ubhatosaṅghe bhikkhunisaṅghe ca bhikkhusaṅghe ca ‘‘nāhaṃ pavāressāmī’’ti dhuraṃ nikkhipati ceti yojanā.

    ஸத்தமங்.

    Sattamaṃ.

    2341. ஓவாதா³தீ³னமத்தா²யாதி அட்ட²க³ருத⁴ம்மஸ்ஸவனாதீ³னமத்தா²ய. ஆதி³-ஸத்³தே³ன உபோஸத²புச்ச²னபவாரணானங் க³ஹணங்.

    2341.Ovādādīnamatthāyāti aṭṭhagarudhammassavanādīnamatthāya. Ādi-saddena uposathapucchanapavāraṇānaṃ gahaṇaṃ.

    2342. ஓவாதா³தீ³னமத்தா²ய அக³மனேன அக்ரியங். காயிகந்தி காயகம்மங்.

    2342. Ovādādīnamatthāya agamanena akriyaṃ. Kāyikanti kāyakammaṃ.

    அட்ட²மங்.

    Aṭṭhamaṃ.

    2343. ‘‘அன்வத்³த⁴மாஸங் பி⁴க்கு²னியா பி⁴க்கு²ஸங்க⁴தோ த்³வே த⁴ம்மா பச்சாஸீஸிதப்³பா³ உபோஸத²புச்ச²னஞ்ச ஓவாதூ³பஸங்கமனஞ்ச, தங் அதிக்காமெந்தியா பாசித்திய’’ந்தி (பாசி॰ 1059) இமஸ்மிங் ஸிக்கா²பதே³ வினிச்ச²யங் த³ஸ்ஸேதுமாஹ ‘‘ந யாசிஸ்ஸாமீ’’திஆதி³. தங் உத்தானத்த²மேவ.

    2343. ‘‘Anvaddhamāsaṃ bhikkhuniyā bhikkhusaṅghato dve dhammā paccāsīsitabbā uposathapucchanañca ovādūpasaṅkamanañca, taṃ atikkāmentiyā pācittiya’’nti (pāci. 1059) imasmiṃ sikkhāpade vinicchayaṃ dassetumāha ‘‘na yācissāmī’’tiādi. Taṃ uttānatthameva.

    நவமங்.

    Navamaṃ.

    2346-7. பஸாகோ² நாம நாபி⁴யா ஹெட்டா², ஜாணுமண்ட³லானங் உபரி பதே³ஸோ. ததா² ஹி யஸ்மா ருக்க²ஸ்ஸ ஸாகா² விய உபோ⁴ ஊரூ பபி⁴ஜ்ஜித்வா க³தா, தஸ்மா ஸோ பஸாகோ²தி வுச்சதி, தஸ்மிங் பஸாகே². ஸஞ்ஜாதந்தி உட்டி²தங். க³ண்ட³ந்தி யங் கிஞ்சி க³ண்ட³ங். ருதி⁴தந்தி யங் கிஞ்சி வணங். ஸங்க⁴ங் வாதி பி⁴க்கு²னிஸங்க⁴ங் வா. க³ணங் வாதி ஸம்ப³ஹுலா பி⁴க்கு²னியோ வா. ஏகேனாதி எத்த² ‘‘புரிஸேனா’’தி ஸேஸோ, ஸஹத்தே² இத³ங் கரணவசனங். யதா²ஹ ‘‘புரிஸேன ஸத்³தி⁴ங் ஏகேனேகா’’தி. புரிஸோதி ச மனுஸ்ஸபுரிஸோவ க³ஹேதப்³போ³.

    2346-7.Pasākho nāma nābhiyā heṭṭhā, jāṇumaṇḍalānaṃ upari padeso. Tathā hi yasmā rukkhassa sākhā viya ubho ūrū pabhijjitvā gatā, tasmā so pasākhoti vuccati, tasmiṃ pasākhe. Sañjātanti uṭṭhitaṃ. Gaṇḍanti yaṃ kiñci gaṇḍaṃ. Rudhitanti yaṃ kiñci vaṇaṃ. Saṅghaṃ vāti bhikkhunisaṅghaṃ vā. Gaṇaṃ vāti sambahulā bhikkhuniyo vā. Ekenāti ettha ‘‘purisenā’’ti seso, sahatthe idaṃ karaṇavacanaṃ. Yathāha ‘‘purisena saddhiṃ ekenekā’’ti. Purisoti ca manussapurisova gahetabbo.

    தோ⁴வாதி எத்த² ஆதி³-அத்தே² வத்தமானேன இதி-ஸத்³தே³ன ‘‘ஆலிம்பாபெய்ய வா ப³ந்தா⁴பெய்ய வா மோசாபெய்ய வா’’தி (பாசி॰ 1063) ஸிக்கா²பதா³க³தானங் இதரேஸங் திண்ணங் ஸங்க³ண்ஹனதோ ‘‘ஆலிம்ப ப³ந்த⁴ மோசேஹீ’’தி ஆணத்தித்தயங் ஸங்க³ஹிதங். தேனேவ வக்க²தி ‘‘து³க்கடானிச்ச² பாசித்தியோ ச² சா’’தி.

    Dhovāti ettha ādi-atthe vattamānena iti-saddena ‘‘ālimpāpeyya vā bandhāpeyya vā mocāpeyya vā’’ti (pāci. 1063) sikkhāpadāgatānaṃ itaresaṃ tiṇṇaṃ saṅgaṇhanato ‘‘ālimpa bandha mocehī’’ti āṇattittayaṃ saṅgahitaṃ. Teneva vakkhati ‘‘dukkaṭāniccha pācittiyo cha cā’’ti.

    யா பன பி⁴க்கு²னீ பஸாகே² ஜாதங் க³ண்ட³ங் வா ருதி⁴தங் வா ஸங்க⁴ங் வா க³ணங் வா அனாபுச்சி²த்வா ஏகேன புரிஸேன ஏகிகா ‘‘பி⁴ந்த³ பா²லேஹி தோ⁴வ ஆலிம்ப ப³ந்த⁴ மோசேஹீ’’தி ஸப்³பா³னி காதப்³பா³னி ஆணாபேதி, தஸ்ஸா ச² து³க்கடானி, கதேஸு பி⁴ந்த³னாதீ³ஸு ச²ஸு கிச்சேஸு தஸ்ஸா ச² பாசித்தியோ ஹொந்தீதி யோஜனா.

    Yā pana bhikkhunī pasākhe jātaṃ gaṇḍaṃ vā rudhitaṃ vā saṅghaṃ vā gaṇaṃ vā anāpucchitvā ekena purisena ekikā ‘‘bhinda phālehi dhova ālimpa bandha mocehī’’ti sabbāni kātabbāni āṇāpeti, tassā cha dukkaṭāni, katesu bhindanādīsu chasu kiccesu tassā cha pācittiyo hontīti yojanā.

    2348-9. எத்தா²தி க³ண்டே³ வா வணே வா. ‘‘யங் காதப்³ப³ங் அத்தி², தங் ஸப்³ப³ங் த்வங் கரோஹி’’இதி ஸசே ஏவங் யா ஆணாபேதீதி யோஜனா. தஸ்ஸா ஏகாய ஆணாபனவாசாய ச² து³க்கடானி ச பாசித்தியச்ச²க்கஞ்சேதி த்³வாத³ஸாபத்தியோ ஸியுந்தி யோஜனா.

    2348-9.Etthāti gaṇḍe vā vaṇe vā. ‘‘Yaṃ kātabbaṃ atthi, taṃ sabbaṃ tvaṃ karohi’’iti sace evaṃ yā āṇāpetīti yojanā. Tassā ekāya āṇāpanavācāya cha dukkaṭāni ca pācittiyacchakkañceti dvādasāpattiyo siyunti yojanā.

    2351. ஆபுச்சி²த்வா வாதி ஸங்க⁴ங் வா க³ணங் வா ஆபுச்சி²த்வா. து³தியந்தி து³தியிகங். விஞ்ஞுங் து³தியங் க³ஹெத்வாபி வாதி யோஜனா.

    2351.Āpucchitvāvāti saṅghaṃ vā gaṇaṃ vā āpucchitvā. Dutiyanti dutiyikaṃ. Viññuṃ dutiyaṃ gahetvāpi vāti yojanā.

    த³ஸமங்.

    Dasamaṃ.

    ஆராமவக்³கோ³ ச²ட்டோ².

    Ārāmavaggo chaṭṭho.

    2353. ‘‘க³ணபரியேஸனாதி³ஸ்மி’’ந்தி வத்தப்³பே³ ச²ந்தா³னுரக்க²னத்த²ங் நிக்³க³ஹிதாக³மோ. க³ப்³பி⁴னிந்தி ஆபன்னஸத்தங், குச்சி²பவிட்ட²ஸத்தந்தி அத்தோ². வுட்டா²பெந்தியாதி உபஸம்பாதெ³ந்தியா. கம்மவாசாஹீதி த்³வீஹி கம்மவாசாஹி.

    2353. ‘‘Gaṇapariyesanādismi’’nti vattabbe chandānurakkhanatthaṃ niggahitāgamo. Gabbhininti āpannasattaṃ, kucchipaviṭṭhasattanti attho. Vuṭṭhāpentiyāti upasampādentiyā. Kammavācāhīti dvīhi kammavācāhi.

    2354-5. கம்மவாசாய ஓஸானேதி ததியகம்மவாசாய பரியோஸானே, ய்யகாரப்பத்தேதி அத்தோ². க³ப்³பி⁴னிஸஞ்ஞாய ந ச க³ப்³பி⁴னியாதி அக³ப்³பி⁴னியா க³ப்³பி⁴னிஸஞ்ஞாய ச. உபோ⁴ ஸஞ்ஜாதகங்கா²யாதி உபோ⁴ஸு ஸமுப்பன்னஸங்ஸயாய, க³ப்³பி⁴னியா, அக³ப்³பி⁴னியா ச வேமதிகாயாதி அத்தோ². கா³தா²ப³ந்த⁴வஸேனெத்த² ஸு-ஸத்³த³லோபோ. ததா² வுட்டா²பெந்தியா உபஜ்ஜா²யாய ஆபத்தி து³க்கடங் ஹோதீதி யோஜனா. ஆசரினியா தஸ்ஸாதி உபஜ்ஜா²யா க³ப்³பி⁴னிங் வுட்டா²பேதி, தஸ்ஸா கம்மவாசங் ஸாவெந்தியா ஆசரினியா ச. க³ணஸ்ஸாதி உபஜ்ஜா²யாசரினீஹி அஞ்ஞஸ்ஸ பி⁴க்கு²னிக³ணஸ்ஸ ச. ததா² து³க்கடங் தீ³பிதந்தி யோஜனா.

    2354-5.Kammavācāya osāneti tatiyakammavācāya pariyosāne, yyakārappatteti attho. Gabbhinisaññāya na ca gabbhiniyāti agabbhiniyā gabbhinisaññāya ca. Ubho sañjātakaṅkhāyāti ubhosu samuppannasaṃsayāya, gabbhiniyā, agabbhiniyā ca vematikāyāti attho. Gāthābandhavasenettha su-saddalopo. Tathā vuṭṭhāpentiyā upajjhāyāya āpatti dukkaṭaṃ hotīti yojanā. Ācariniyā tassāti upajjhāyā gabbhiniṃ vuṭṭhāpeti, tassā kammavācaṃ sāventiyā ācariniyā ca. Gaṇassāti upajjhāyācarinīhi aññassa bhikkhunigaṇassa ca. Tathā dukkaṭaṃ dīpitanti yojanā.

    2356. ‘‘த்³வீஸு அக³ப்³பி⁴னிஸஞ்ஞாயா’’தி பத³ச்சே²தோ³. த்³வீஸூதி க³ப்³பி⁴னியா, அக³ப்³பி⁴னியா ச.

    2356. ‘‘Dvīsu agabbhinisaññāyā’’ti padacchedo. Dvīsūti gabbhiniyā, agabbhiniyā ca.

    பட²மங்.

    Paṭhamaṃ.

    2357. து³தியேதி ‘‘யா பன பி⁴க்கு²னீ பாயந்திங் வுட்டா²பெய்ய, பாசித்திய’’ந்தி (பாசி॰ 1073) ஸிக்கா²பதே³. இமஸ்மிங் ஸிக்கா²பதே³ பாயந்தீ நாம மாதா வா ஹோதி தா⁴தி வாதி அயங் விஸேஸோ.

    2357.Dutiyeti ‘‘yā pana bhikkhunī pāyantiṃ vuṭṭhāpeyya, pācittiya’’nti (pāci. 1073) sikkhāpade. Imasmiṃ sikkhāpade pāyantī nāma mātā vā hoti dhāti vāti ayaṃ viseso.

    து³தியங்.

    Dutiyaṃ.

    2358. யா பன பி⁴க்கு²னீ த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ங் ஸிக்க²மானங் ஸசே வுட்டா²பெய்ய, பாசித்தி ஸியாதி யோஜனா. தத்த² த்³வே வஸ்ஸானீதி பவாரணவஸேன த்³வே ஸங்வச்ச²ரானி. ச²ஸு த⁴ம்மேஸூதி பாணாதிபாதாவேரமணிஆதீ³ஸு விகாலபோ⁴ஜனாவேரமணிபரியோஸானேஸு ச²ஸு த⁴ம்மேஸு. அஸிக்கி²தஸிக்க²ந்தி ‘‘பாணாதிபாதாவேரமணிங் த்³வே வஸ்ஸானி அவீதிக்கம்ம ஸமாதா³னங் ஸமாதி³யாமீ’’திஆதி³னா (பாசி॰ 1079) நயேன அனாதி³ன்னஸிக்கா²பத³ங் வா ஏவங் ஸமாதி³யித்வாபி குபிதஸிக்க²ங் வா. ஸிக்க²மானங் தேஸு ச²ஸு த⁴ம்மேஸு ஸிக்க²னதோ வா தே வா ஸிக்கா²ஸங்கா²தே த⁴ம்மே மானநதோ ஏவங் லத்³த⁴னாமங் அனுபஸம்பன்னங். வுட்டா²பெய்யாதி உபஸம்பாதெ³ய்ய. ஆபத்தி ஸியாதி பட²மஸிக்கா²பதே³ வுத்தனயேனேவ கம்மவாசாபரியோஸானே பாசித்தி ஆபத்தி ஸியா, பாசித்தி ஹோதீதி அத்தோ².

    2358. Yā pana bhikkhunī dve vassāni chasu dhammesu asikkhitasikkhaṃ sikkhamānaṃ sace vuṭṭhāpeyya, pācitti siyāti yojanā. Tattha dve vassānīti pavāraṇavasena dve saṃvaccharāni. Chasu dhammesūti pāṇātipātāveramaṇiādīsu vikālabhojanāveramaṇipariyosānesu chasu dhammesu. Asikkhitasikkhanti ‘‘pāṇātipātāveramaṇiṃ dve vassāni avītikkamma samādānaṃ samādiyāmī’’tiādinā (pāci. 1079) nayena anādinnasikkhāpadaṃ vā evaṃ samādiyitvāpi kupitasikkhaṃ vā. Sikkhamānaṃ tesu chasu dhammesu sikkhanato vā te vā sikkhāsaṅkhāte dhamme mānanato evaṃ laddhanāmaṃ anupasampannaṃ. Vuṭṭhāpeyyāti upasampādeyya. Āpatti siyāti paṭhamasikkhāpade vuttanayeneva kammavācāpariyosāne pācitti āpatti siyā, pācitti hotīti attho.

    2359. ‘‘த⁴ம்மகம்மே த⁴ம்மகம்மஸஞ்ஞா வுட்டா²பேதி, ஆபத்தி பாசித்தியஸ்ஸ. த⁴ம்மகம்மே வேமதிகா வுட்டா²பேதி, ஆபத்தி பாசித்தியஸ்ஸ. த⁴ம்மகம்மே அத⁴ம்மகம்மஸஞ்ஞா வுட்டா²பேதி, ஆபத்தி பாசித்தியஸ்ஸா’’தி ஏவங் த⁴ம்மகம்மே ஸத்து²னா திகபாசித்தியங் வுத்தங். ‘‘அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா வுட்டா²பேதி, ஆபத்தி து³க்கடஸ்ஸா’’தி (பாசி॰ 1082) ஏவங் அத⁴ம்மே பன கம்மஸ்மிங் ஸத்து²னா திகது³க்கடங் தீ³பிதங்.

    2359. ‘‘Dhammakamme dhammakammasaññā vuṭṭhāpeti, āpatti pācittiyassa. Dhammakamme vematikā vuṭṭhāpeti, āpatti pācittiyassa. Dhammakamme adhammakammasaññā vuṭṭhāpeti, āpatti pācittiyassā’’ti evaṃ dhammakamme satthunā tikapācittiyaṃ vuttaṃ. ‘‘Adhammakamme dhammakammasaññā, āpatti dukkaṭassa. Adhammakamme vematikā āpatti dukkaṭassa. Adhammakamme adhammakammasaññā vuṭṭhāpeti, āpatti dukkaṭassā’’ti (pāci. 1082) evaṃ adhamme pana kammasmiṃ satthunā tikadukkaṭaṃ dīpitaṃ.

    2360. அக²ண்ட³தோ க²ண்ட³ங் அகத்வா.

    2360.Akhaṇḍato khaṇḍaṃ akatvā.

    2361. ஸசே உபஸம்பதா³பெக்கா² பப்³ப³ஜ்ஜாய ஸட்டி²வஸ்ஸாபி ஹோதி, தஸ்ஸா இமா ச² ஸிக்கா²யோ த்³வே வஸ்ஸானி அவீதிக்கமனீயா பதா³தப்³பா³, இமா அத³த்வா ந காரயே நேவ வுட்டா²பெய்யாதி யோஜனா.

    2361. Sace upasampadāpekkhā pabbajjāya saṭṭhivassāpi hoti, tassā imā cha sikkhāyo dve vassāni avītikkamanīyā padātabbā, imā adatvā na kāraye neva vuṭṭhāpeyyāti yojanā.

    ததியங்.

    Tatiyaṃ.

    2362. சதுத்தே² நத்தி² வத்தப்³ப³ந்தி வக்க²மானவிஸேஸதோ அஞ்ஞங் வத்தப்³ப³ங் நத்தீ²தி யதா²வுத்தனயமேவாதி அதி⁴ப்பாயோ. ‘‘இதா⁴’’திஆதி³னா இமஸ்மிங் ஸிக்கா²பதே³ லப்³ப⁴மானவிஸேஸங் த³ஸ்ஸேதி. இத⁴ இமஸ்மிங் ஸிக்கா²பதே³ ஸங்கே⁴ன ஸம்மதங் தங் ஸிக்க²மானங் வுட்டா²பெந்தியா பி⁴க்கு²னியா அனாபத்தி ஹோதீதி யோஜனா.

    2362.Catutthe natthi vattabbanti vakkhamānavisesato aññaṃ vattabbaṃ natthīti yathāvuttanayamevāti adhippāyo. ‘‘Idhā’’tiādinā imasmiṃ sikkhāpade labbhamānavisesaṃ dasseti. Idha imasmiṃ sikkhāpade saṅghena sammataṃ taṃ sikkhamānaṃ vuṭṭhāpentiyā bhikkhuniyā anāpatti hotīti yojanā.

    2363. த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா²ய ஸிக்க²மானாய பி⁴க்கு²னிஸங்கே⁴ன உபஸம்பத³தோ பட²மங் ஞத்திது³தியாய கம்மவாசாய யா வுட்டா²னஸம்முதி தா³தப்³பா³ ஹோதி, ஸா வுட்டா²னஸம்முதி ஸசே பட²மங் அதி³ன்னா ஹோதி. தத்த² தஸ்மிங் உபஸம்பத³மாளகேபி பதா³தப்³பா³யேவாதி யோஜனா.

    2363. Dve vassāni chasu dhammesu sikkhitasikkhāya sikkhamānāya bhikkhunisaṅghena upasampadato paṭhamaṃ ñattidutiyāya kammavācāya yā vuṭṭhānasammuti dātabbā hoti, sā vuṭṭhānasammuti sace paṭhamaṃ adinnā hoti. Tattha tasmiṃ upasampadamāḷakepi padātabbāyevāti yojanā.

    2364. ததியஞ்சாதி ததியஸிக்கா²பத³ஞ்ச. சதுத்த²ஞ்சாதி இத³ங் சதுத்த²ஸிக்கா²பத³ஞ்ச. பட²மேன ஸமங் ஞெய்யந்தி பட²மேன ஸிக்கா²பதே³ன ஸமுட்டா²னாதி³னா வினிச்ச²யேன ஸமானந்தி ஞாதப்³ப³ங். சதுத்த²ங் பன ஸிக்கா²பத³ங் வுட்டா²பனஸம்முதிங் அதா³பெத்வா வுட்டா²பனவஸேன க்ரியாக்ரியங் ஹோதி.

    2364.Tatiyañcāti tatiyasikkhāpadañca. Catutthañcāti idaṃ catutthasikkhāpadañca. Paṭhamena samaṃ ñeyyanti paṭhamena sikkhāpadena samuṭṭhānādinā vinicchayena samānanti ñātabbaṃ. Catutthaṃ pana sikkhāpadaṃ vuṭṭhāpanasammutiṃ adāpetvā vuṭṭhāpanavasena kriyākriyaṃ hoti.

    சதுத்த²ங்.

    Catutthaṃ.

    2365. கி³ஹிக³தந்தி புரிஸந்தரக³தங், புரிஸஸமாக³மப்பத்தந்தி அத்தோ². பரிபுண்ணத்³வாத³ஸவஸ்ஸா பரிபுண்ணா உத்தரபத³லோபேன. கிஞ்சாபி ந தோ³ஸோதி யோஜனா. வுட்டா²பெந்தியாதி உபஜ்ஜா²யா ஹுத்வா உபஸம்பாதெ³ந்தியா.

    2365.Gihigatanti purisantaragataṃ, purisasamāgamappattanti attho. Paripuṇṇadvādasavassā paripuṇṇā uttarapadalopena. Kiñcāpi na dosoti yojanā. Vuṭṭhāpentiyāti upajjhāyā hutvā upasampādentiyā.

    2366. ஸேஸந்தி வுத்தங். அஸேஸேன ஸப்³ப³ஸோ.

    2366.Sesanti vuttaṃ. Asesena sabbaso.

    பஞ்சமங்.

    Pañcamaṃ.

    2368. து³க்கி²தங் ஸஹஜீவினிந்தி எத்த² ‘‘ஸிக்கா²பத³’’ந்தி ஸேஸோ. துவட்டகவக்³க³ஸ்மிங் ‘‘து³க்கி²தங் ஸஹஜீவினி’’ந்தி இமேஹி பதே³ஹி யுத்தங் யங் ஸிக்கா²பத³ங் வுத்தங், தேன ஸிக்கா²பதே³ன அட்ட²மங் ஸமங் ஞெய்யங், ந விஸேஸதா விஸேஸோ நத்தீ²தி யோஜனா. அட்ட²மந்தி ‘‘யா பன பி⁴க்கு²னீ ஸஹஜீவினிங் வுட்டா²பெத்வா த்³வே வஸ்ஸானி நேவ அனுக்³க³ண்ஹெய்ய ந அனுக்³க³ண்ஹாபெய்ய, பாசித்திய’’ந்தி (பாசி॰ 1108) வுத்தஸிக்கா²பத³ங். தத்த² ஸஹஜீவினிந்தி ஸத்³தி⁴விஹாரினிங். நேவ அனுக்³க³ண்ஹெய்யாதி ஸயங் உத்³தே³ஸாதீ³ஹி நானுக்³க³ண்ஹெய்ய. ந அனுக்³க³ண்ஹாபெய்யாதி ‘‘இமிஸ்ஸா அய்யே உத்³தே³ஸாதீ³னி தே³ஹீ’’தி ஏவங் ந அஞ்ஞாய அனுக்³க³ண்ஹாபெய்ய. பாசித்தியந்தி து⁴ரே நிக்கி²த்தமத்தே பாசித்தியங்.

    2368.Dukkhitaṃ sahajīvininti ettha ‘‘sikkhāpada’’nti seso. Tuvaṭṭakavaggasmiṃ ‘‘dukkhitaṃ sahajīvini’’nti imehi padehi yuttaṃ yaṃ sikkhāpadaṃ vuttaṃ, tena sikkhāpadena aṭṭhamaṃ samaṃ ñeyyaṃ, na visesatā viseso natthīti yojanā. Aṭṭhamanti ‘‘yā pana bhikkhunī sahajīviniṃ vuṭṭhāpetvā dve vassāni neva anuggaṇheyya na anuggaṇhāpeyya, pācittiya’’nti (pāci. 1108) vuttasikkhāpadaṃ. Tattha sahajīvininti saddhivihāriniṃ. Neva anuggaṇheyyāti sayaṃ uddesādīhi nānuggaṇheyya. Na anuggaṇhāpeyyāti ‘‘imissā ayye uddesādīni dehī’’ti evaṃ na aññāya anuggaṇhāpeyya. Pācittiyanti dhure nikkhittamatte pācittiyaṃ.

    அட்ட²மங்.

    Aṭṭhamaṃ.

    2369. யா காசி பி⁴க்கு²னீ வுட்டா²பிதபவத்தினிங் த்³வே வஸ்ஸானி நானுப³ந்தெ⁴ய்ய சே, தஸ்ஸா பாசித்தி பரியாபுதா கதி²தாதி யோஜனா. வுட்டா²பேதீதி வுட்டா²பிதா, பவத்தேதி ஸுஸிக்கா²பேதீதி பவத்தினீ, வுட்டா²பிதா ச ஸா பவத்தினீ சாதி வுட்டா²பிதபவத்தினீ, உபஜ்ஜா²யாயேதங் அதி⁴வசனங், தங், உபஜ்ஜா²யங். நானுப³ந்தெ⁴ய்யாதி சுண்ணேன, மத்திகாய, த³ந்தகட்டே²ன, முகோ²த³கேனாதி ஏவங் தேன தேன கரணீயேன உபட்ட²ஹெய்ய.

    2369.Yā kāci bhikkhunī vuṭṭhāpitapavattiniṃ dve vassāni nānubandheyya ce, tassā pācitti pariyāputā kathitāti yojanā. Vuṭṭhāpetīti vuṭṭhāpitā, pavatteti susikkhāpetīti pavattinī, vuṭṭhāpitā ca sā pavattinī cāti vuṭṭhāpitapavattinī, upajjhāyāyetaṃ adhivacanaṃ, taṃ, upajjhāyaṃ. Nānubandheyyāti cuṇṇena, mattikāya, dantakaṭṭhena, mukhodakenāti evaṃ tena tena karaṇīyena upaṭṭhaheyya.

    2370. ‘‘த்³வே வஸ்ஸானி அஹங் நானுப³ந்தி⁴ஸ்ஸாமீ’’தி து⁴ரங் நிக்கி²பதி சே, ஏவங் து⁴ரே நிக்கி²த்தமத்தஸ்மிங் பன தஸ்ஸா பாசித்தியங் ஸியாதி யோஜனா.

    2370. ‘‘Dve vassāni ahaṃ nānubandhissāmī’’ti dhuraṃ nikkhipati ce, evaṃ dhure nikkhittamattasmiṃ pana tassā pācittiyaṃ siyāti yojanā.

    2371. யா பன பி⁴க்கு²னீ உபஜ்ஜா²யங் பா³லங் வா அலஜ்ஜிங் வா நானுப³ந்த⁴தி, தஸ்ஸா, கி³லானாய வா ஆபதா³ஸு வா உம்மத்திகாய வா நானுப³ந்த⁴ந்தியா ந தோ³ஸோதி யோஜனா.

    2371. Yā pana bhikkhunī upajjhāyaṃ bālaṃ vā alajjiṃ vā nānubandhati, tassā, gilānāya vā āpadāsu vā ummattikāya vā nānubandhantiyā na dosoti yojanā.

    2372. அனுபட்டா²னேன ஹோதீதி ஆஹ ‘‘அக்ரியங் வுத்த’’ந்தி.

    2372. Anupaṭṭhānena hotīti āha ‘‘akriyaṃ vutta’’nti.

    நவமங்.

    Navamaṃ.

    2373-5. யா காசி பி⁴க்கு²னீ ஸஹஜீவினிங் ஸத்³தி⁴விஹாரினிங் வுட்டா²பெத்வா உபஸம்பாதெ³த்வா தங் க³ஹெத்வா அந்தமஸோ ச²ப்பஞ்சயோஜனானிபி ந க³ச்செ²ய்ய ந சஞ்ஞங் ஆணாபெய்ய ‘‘இமங், அய்யே, க³ஹெத்வா க³ச்சா²’’தி அஞ்ஞஞ்ச ந நியோஜெய்ய சே, து⁴ரே நிக்கி²த்தமத்தஸ்மிங் ‘‘ந தா³னி க³ச்சி²ஸ்ஸாமி, அஞ்ஞஞ்ச க³ஹெத்வா க³ந்துங் ந நியோஜெஸ்ஸாமீ’’தி உஸ்ஸாஹே விஸ்ஸட்ட²மத்தே தஸ்ஸா பாசித்தியங் ஸியாதி யோஜனா.

    2373-5. Yā kāci bhikkhunī sahajīviniṃ saddhivihāriniṃ vuṭṭhāpetvā upasampādetvā taṃ gahetvā antamaso chappañcayojanānipi na gaccheyya na caññaṃ āṇāpeyya ‘‘imaṃ, ayye, gahetvā gacchā’’ti aññañca na niyojeyya ce, dhure nikkhittamattasmiṃ ‘‘na dāni gacchissāmi, aññañca gahetvā gantuṃ na niyojessāmī’’ti ussāhe vissaṭṭhamatte tassā pācittiyaṃ siyāti yojanā.

    அந்தராயஸ்மிங் ஸதி வா து³தியங் அலப⁴ந்தியா வா ஆபதா³ஸு வா கி³லானாய வா உம்மத்திகாய வா ந தோ³ஸோதி யோஜனா.

    Antarāyasmiṃ sati vā dutiyaṃ alabhantiyā vā āpadāsu vā gilānāya vā ummattikāya vā na dosoti yojanā.

    த³ஸமங்.

    Dasamaṃ.

    க³ப்³பி⁴னிவக்³கோ³ ஸத்தமோ.

    Gabbhinivaggo sattamo.

    2376. கி³ஹிக³தேஹி தீஹேவாதி அனந்தரே க³ப்³பி⁴னிவக்³கே³ கி³ஹிக³தபத³யுத்தேஹி பஞ்சமச²ட்ட²ஸத்தமேஹி தீஹேவ ஸிக்கா²பதே³ஹி. ஸதி³ஸானீதி இத⁴ வீஸதிவஸ்ஸவசனஞ்ச குமாரிபூ⁴தவசனஞ்ச தத்த² த்³வாத³ஸவஸ்ஸவசனஞ்ச கி³ஹிக³தவசனஞ்ச ட²பெத்வா அவஸேஸேஹி வினிச்ச²யேஹி யதா²க்கமங் ஸதி³ஸானேவாதி.

    2376.Gihigatehi tīhevāti anantare gabbhinivagge gihigatapadayuttehi pañcamachaṭṭhasattamehi tīheva sikkhāpadehi. Sadisānīti idha vīsativassavacanañca kumāribhūtavacanañca tattha dvādasavassavacanañca gihigatavacanañca ṭhapetvā avasesehi vinicchayehi yathākkamaṃ sadisānevāti.

    2377. மஹூபபதா³தி மஹா உபபதோ³ யாஸங் ஸிக்க²மானானங் தா மஹூபபதா³. உபபத³ங் நாம பதா³னமேவ யுஜ்ஜதி, ந அத்தா²னந்தி ‘‘யாஸ’’ந்தி அஞ்ஞபதே³ன ஸிக்க²மானாதி³பதா³னங் க³ஹணங், ஸத்³த³த்தா²னமபே⁴தோ³பசாரஸ்ஸ பன இச்சி²தத்தா ஸிக்க²மானபத³க³ஹிதானமெத்த² க³ஹணங் வேதி³தப்³ப³ங், மஹாஸிக்க²மானாதி வுத்தங் ஹோதி. ஆதி³தோதி எத்த² ‘‘வுத்தா’’தி ஸேஸோ, க³ப்³பி⁴னிவக்³கே³ திஸ்ஸன்னங் கி³ஹிக³தானங் புரிமேஸு ததியசதுத்த²ஸிக்கா²பதே³ஸு ஆக³தா த்³வே ஸிக்க²மானாதி அத்தோ². கி³ஹிக³தாய ‘‘பரிபுண்ணத்³வாத³ஸவஸ்ஸா’’தி ச குமாரிபூ⁴தாய ‘‘பரிபுண்ணவீஸதிவஸ்ஸா’’தி ச வஸ்ஸவஸேன நானாகரணஸ்ஸ வுத்தத்தா தாஹி த்³வீஹி மஹாஸிக்க²மானாய வஸ்ஸவஸேனேவ நானாகரணங் த³ஸ்ஸேதுமாஹ ‘‘க³தா வீஸதிவஸ்ஸாதி, விஞ்ஞாதப்³பா³ விபா⁴வினா’’தி, அதிக்கந்தவீஸதிவஸ்ஸா மஹாஸிக்க²மானா நாம ஹோதீதி அத்தோ².

    2377.Mahūpapadāti mahā upapado yāsaṃ sikkhamānānaṃ tā mahūpapadā. Upapadaṃ nāma padānameva yujjati, na atthānanti ‘‘yāsa’’nti aññapadena sikkhamānādipadānaṃ gahaṇaṃ, saddatthānamabhedopacārassa pana icchitattā sikkhamānapadagahitānamettha gahaṇaṃ veditabbaṃ, mahāsikkhamānāti vuttaṃ hoti. Āditoti ettha ‘‘vuttā’’ti seso, gabbhinivagge tissannaṃ gihigatānaṃ purimesu tatiyacatutthasikkhāpadesu āgatā dve sikkhamānāti attho. Gihigatāya ‘‘paripuṇṇadvādasavassā’’ti ca kumāribhūtāya ‘‘paripuṇṇavīsativassā’’ti ca vassavasena nānākaraṇassa vuttattā tāhi dvīhi mahāsikkhamānāya vassavaseneva nānākaraṇaṃ dassetumāha ‘‘gatā vīsativassāti, viññātabbā vibhāvinā’’ti, atikkantavīsativassā mahāsikkhamānā nāma hotīti attho.

    2378. தா த்³வே மஹாஸிக்க²மானா ஸசே கி³ஹிக³தா வா ஹொந்து, ந ச புரிஸக³தா வா ஹொந்து , ஸம்முதிஆதி³ஸு கம்மவாசாய ‘‘ஸிக்க²மானா’’தி வத்தப்³பா³தி யோஜனா. எத்த² ச ஸம்முதி நாம ஞத்திது³தியாய கம்மவாசாய காதப்³பா³ய ஸிக்கா²ய ஸம்முதி சேவ வுட்டா²னஸம்முதி ச. ஆதி³-ஸத்³தே³ன உபஸம்பதா³கம்மங் க³ஹிதங்.

    2378.Tā dve mahāsikkhamānā sace gihigatā vā hontu, na ca purisagatā vā hontu , sammutiādisu kammavācāya ‘‘sikkhamānā’’ti vattabbāti yojanā. Ettha ca sammuti nāma ñattidutiyāya kammavācāya kātabbāya sikkhāya sammuti ceva vuṭṭhānasammuti ca. Ādi-saddena upasampadākammaṃ gahitaṃ.

    2379. இமாஸங் த்³வின்னங் ஸம்முதிதா³னாதீ³ஸு ஞத்தியா ச கம்மவாசாய ச வத்தப்³ப³ங் த³ஸ்ஸெத்வா இதா³னி அவத்தப்³ப³ங் த³ஸ்ஸேதுமாஹ ‘‘ந தா’’திஆதி³. தா ஏதா உபோ⁴பி மஹாஸிக்க²மானா ‘‘குமாரிபூ⁴தா’’தி வா ததா² ‘‘கி³ஹிக³தா’’தி வா கம்மவாசாய ந வத்தப்³பா³ யஸ்மா, தஸ்மா ஏவங் வத்துங் ந வட்டதீதி யோஜனா. ‘‘ந வத்தப்³பா³’’தி இமினா ததா² சே கம்மவாசா வுச்செய்ய, தங் கம்மங் குப்பதீதி தீ³பேதி. இத⁴ பன-ஸத்³தோ³ யஸ்மா-பத³த்தோ²தி தத³த்த²வஸேன யோஜனா த³ஸ்ஸிதா.

    2379. Imāsaṃ dvinnaṃ sammutidānādīsu ñattiyā ca kammavācāya ca vattabbaṃ dassetvā idāni avattabbaṃ dassetumāha ‘‘na tā’’tiādi. Tā etā ubhopi mahāsikkhamānā ‘‘kumāribhūtā’’ti vā tathā ‘‘gihigatā’’ti vā kammavācāya na vattabbā yasmā, tasmā evaṃ vattuṃ na vaṭṭatīti yojanā. ‘‘Na vattabbā’’ti iminā tathā ce kammavācā vucceyya, taṃ kammaṃ kuppatīti dīpeti. Idha pana-saddo yasmā-padatthoti tadatthavasena yojanā dassitā.

    2380. ஸம்முதிந்தி ஸிக்க²மானஸம்முதிங். த³ஸவஸ்ஸாயாதி எத்த² ‘‘கி³ஹிக³தாயா’’தி ஸேஸோ. யதா²ஹ – ‘‘கி³ஹிக³தாய த³ஸவஸ்ஸகாலே ஸிக்கா²ஸம்முதிங் த³த்வா த்³வாத³ஸவஸ்ஸகாலே உபஸம்பதா³ காதப்³பா³’’தி (பாசி॰ அட்ட²॰ 1119). ஸேஸாஸுபீதி ஏகாத³ஸவஸ்ஸகாலே த³த்வா தேரஸவஸ்ஸகாலே காதப்³பா³, த்³வாத³ஸ, தேரஸ, சுத்³த³ஸ, பன்னரஸ, ஸோளஸ, ஸத்தரஸ, அட்டா²ரஸவஸ்ஸகாலே ஸிக்கா²ஸம்முதிங் த³த்வா வீஸதிவஸ்ஸகாலே காதப்³பா³தி ஏவங் அட்டா²ரஸவஸ்ஸபரியந்தாஸு ஸேஸாஸுபி ஸிக்க²மானாஸு. அயங் நயோதி ‘‘ஸம்முதியா தி³ன்னஸங்வச்ச²ரதோ ஆகா³மினி து³தியே ஸங்வச்ச²ரே உபஸம்பாதே³தப்³பா³’’தி அயங் நயோ. தேனேவ வுத்தங் ‘‘ஏகாத³ஸவஸ்ஸகாலே த³த்வா தேரஸவஸ்ஸகாலே காதப்³பா³’’திஆதி³.

    2380.Sammutinti sikkhamānasammutiṃ. Dasavassāyāti ettha ‘‘gihigatāyā’’ti seso. Yathāha – ‘‘gihigatāya dasavassakāle sikkhāsammutiṃ datvā dvādasavassakāle upasampadā kātabbā’’ti (pāci. aṭṭha. 1119). Sesāsupīti ekādasavassakāle datvā terasavassakāle kātabbā, dvādasa, terasa, cuddasa, pannarasa, soḷasa, sattarasa, aṭṭhārasavassakāle sikkhāsammutiṃ datvā vīsativassakāle kātabbāti evaṃ aṭṭhārasavassapariyantāsu sesāsupi sikkhamānāsu. Ayaṃ nayoti ‘‘sammutiyā dinnasaṃvaccharato āgāmini dutiye saṃvacchare upasampādetabbā’’ti ayaṃ nayo. Teneva vuttaṃ ‘‘ekādasavassakāle datvā terasavassakāle kātabbā’’tiādi.

    2381. ‘‘குமாரிபூ⁴தா’’திபி ‘‘கி³ஹிக³தா’’திபி வத்துங் வட்டதீதி அட்ட²கதா²யங் வுத்தாதி யோஜனா.

    2381. ‘‘Kumāribhūtā’’tipi ‘‘gihigatā’’tipi vattuṃ vaṭṭatīti aṭṭhakathāyaṃ vuttāti yojanā.

    2382. யா பன பரிபுண்ணவீஸதிவஸ்ஸா ஸாமணேரீ ‘‘குமாரிபூ⁴தா’’தி வுத்தா, ஸா கம்மவாசாய ‘‘குமாரிபூ⁴தா’’இச்சேவ வத்தப்³பா³, அஞ்ஞதா² பன ந வத்தப்³பா³ ‘‘கி³ஹிக³தா’’தி வா ‘‘புரிஸந்தரக³தா’’தி வா ந வத்தப்³பா³தி யோஜனா. யதா²ஹ ‘‘குமாரிபூ⁴தா பன ‘கி³ஹிக³தா’தி ந வத்தப்³பா³, ‘குமாரிபூ⁴தா’இச்சேவ வத்தப்³பா³’’தி.

    2382.Yā pana paripuṇṇavīsativassā sāmaṇerī ‘‘kumāribhūtā’’ti vuttā, sā kammavācāya ‘‘kumāribhūtā’’icceva vattabbā, aññathā pana na vattabbā ‘‘gihigatā’’ti vā ‘‘purisantaragatā’’ti vā na vattabbāti yojanā. Yathāha ‘‘kumāribhūtā pana ‘gihigatā’ti na vattabbā, ‘kumāribhūtā’icceva vattabbā’’ti.

    2383. ஏதா து பன திஸ்ஸோபீதி மஹாஸிக்க²மானா கி³ஹிக³தா, குமாரிபூ⁴தாதி வுத்தா பன ஏதா திஸ்ஸோபி. அபி-ஸத்³தே³ன கி³ஹிக³தா குமாரிபூ⁴தா த்³வே ஸகஸகனாமேனாபி வத்துங் வட்டந்தீதி தீ³பேதி. ‘‘குமாரிபூ⁴தஸிக்க²மானாயா’’தி பாளியங் அவுத்தத்தா ந வட்டதீதி கோசி மஞ்ஞெய்யாதி ஆஹ ‘‘ந ஸங்ஸயோ’’தி. ததா² வத்தப்³ப³தாஹேதுத³ஸ்ஸனத்த²மாஹ ‘‘ஸிக்கா²ஸம்முதிதா³னதோ’’தி.

    2383.Etā tu pana tissopīti mahāsikkhamānā gihigatā, kumāribhūtāti vuttā pana etā tissopi. Api-saddena gihigatā kumāribhūtā dve sakasakanāmenāpi vattuṃ vaṭṭantīti dīpeti. ‘‘Kumāribhūtasikkhamānāyā’’ti pāḷiyaṃ avuttattā na vaṭṭatīti koci maññeyyāti āha ‘‘na saṃsayo’’ti. Tathā vattabbatāhetudassanatthamāha ‘‘sikkhāsammutidānato’’ti.

    பட²மது³தியததியானி.

    Paṭhamadutiyatatiyāni.

    2384-5. யா பன பி⁴க்கு²னீ ஊனத்³வாத³ஸவஸ்ஸாவ உபஸம்பதா³வஸேன அபரிபுண்ணத்³வாத³ஸவஸ்ஸா ஏவ ஸயங் உபஜ்ஜா²யா ஹுத்வா பரங் ஸிக்க²மானங் ஸசே வுட்டா²பேதி, புப்³பே³ வுத்தனயேனேவ க³ணபரியேஸனாதி³து³தியானுஸ்ஸாவனபரியோஸானேஸு ஆபன்னானங் து³க்கடானங் அனந்தரங் கம்மவாசானங் ஓஸானே ததியானுஸ்ஸாவனாய ய்யதாரப்பத்தாய தஸ்ஸா பாசித்தி பரிதீ³பிதாதி யோஜனா.

    2384-5. Yā pana bhikkhunī ūnadvādasavassāva upasampadāvasena aparipuṇṇadvādasavassā eva sayaṃ upajjhāyā hutvā paraṃ sikkhamānaṃ sace vuṭṭhāpeti, pubbe vuttanayeneva gaṇapariyesanādidutiyānussāvanapariyosānesu āpannānaṃ dukkaṭānaṃ anantaraṃ kammavācānaṃ osāne tatiyānussāvanāya yyatārappattāya tassā pācitti paridīpitāti yojanā.

    சதுத்த²ங்.

    Catutthaṃ.

    2386. பஞ்சமேதி ‘‘யா பன பி⁴க்கு²னீ பரிபுண்ணத்³வாத³ஸவஸ்ஸா ஸங்கே⁴ன அஸம்மதா வுட்டா²பெய்ய, பாசித்திய’’ந்தி (பாசி॰ 1142) ஸிக்கா²பதே³. காயசித்தவாசாசித்தகாயவாசாசித்தவஸேன திஸமுட்டா²னங். க்ரியாக்ரியந்தி வுட்டா²பனங் கிரியங், ஸங்க⁴ஸம்முதியா அக்³க³ஹணங் அகிரியங்.

    2386.Pañcameti ‘‘yā pana bhikkhunī paripuṇṇadvādasavassā saṅghena asammatā vuṭṭhāpeyya, pācittiya’’nti (pāci. 1142) sikkhāpade. Kāyacittavācācittakāyavācācittavasena tisamuṭṭhānaṃ. Kriyākriyanti vuṭṭhāpanaṃ kiriyaṃ, saṅghasammutiyā aggahaṇaṃ akiriyaṃ.

    பஞ்சமங்.

    Pañcamaṃ.

    2387. ஸங்கே⁴னாதி பி⁴க்கு²னிஸங்கே⁴ன. உபபரிக்கி²த்வாதி அலஜ்ஜிபா⁴வாதி³ங் உபபரிக்கி²த்வா. அலங் தாவாதி எத்த² ‘‘தே அய்யே’’தி ஸேஸோ. வாரிதாதி எத்த² ‘‘ஸாதூ⁴தி படிஸ்ஸுணித்வா’’தி ஸேஸோ. ‘‘அலங் தாவ தே, அய்யே, உபஸம்பாதி³தேனா’’தி வாரிதா ‘‘ஸாதூ⁴’’தி படிஸ்ஸுணித்வா எத்த² ஏதஸ்மிங் பவாரணே பச்சா² கீ²யதி ‘‘அஹமேவ நூன பா³லா, அஹமேவ நூன அலஜ்ஜினீ’’திஆதி³னா அவண்ணங் பகாஸேதி, தோ³ஸதா பாசித்தியாபத்தி ஹோதீதி யோஜனா.

    2387.Saṅghenāti bhikkhunisaṅghena. Upaparikkhitvāti alajjibhāvādiṃ upaparikkhitvā. Alaṃ tāvāti ettha ‘‘te ayye’’ti seso. Vāritāti ettha ‘‘sādhūti paṭissuṇitvā’’ti seso. ‘‘Alaṃ tāva te, ayye, upasampāditenā’’ti vāritā ‘‘sādhū’’ti paṭissuṇitvā ettha etasmiṃ pavāraṇe pacchā khīyati ‘‘ahameva nūna bālā, ahameva nūna alajjinī’’tiādinā avaṇṇaṃ pakāseti, dosatā pācittiyāpatti hotīti yojanā.

    2388. ச²ந்த³தோ³ஸாதீ³ஹி கரொந்தியாதி எத்த² ‘‘பகதியா’’தி ஸேஸோ. பகதியா ச²ந்த³தோ³ஸாதீ³ஹி அக³திக³மனேஹி நிவாரணங் கரொந்தியா ஸசே உஜ்ஜா²யதி, ந தோ³ஸோதி யோஜனா.

    2388.Chandadosādīhikarontiyāti ettha ‘‘pakatiyā’’ti seso. Pakatiyā chandadosādīhi agatigamanehi nivāraṇaṃ karontiyā sace ujjhāyati, na dosoti yojanā.

    ச²ட்ட²ங்.

    Chaṭṭhaṃ.

    2389-90. லத்³தே⁴ சீவரேதி ஸிக்கா²மானாய ‘‘ஸசே மே த்வங், அய்யே, சீவரங் த³ஸ்ஸஸி, ஏவாஹங் தங் வுட்டா²பெஸ்ஸாமீ’’தி வத்வா யாசிதே தஸ்மிங் சீவரே லத்³தே⁴. பச்சா²தி சீவரலாப⁴தோ பச்சா². அஸந்தே அந்தராயிகேதி த³ஸன்னங் அந்தராயானங் அஞ்ஞதரஸ்மிங் அந்தராயே அவிஜ்ஜமானே. வுட்டா²பெஸ்ஸாமினாஹந்தி அஹங் தங் ந ஸமுட்டா²பெஸ்ஸாமீதி து⁴ரனிக்கே²பனே தஸ்ஸா பாசித்தியங் ஹோதீதி யோஜனா.

    2389-90.Laddhecīvareti sikkhāmānāya ‘‘sace me tvaṃ, ayye, cīvaraṃ dassasi, evāhaṃ taṃ vuṭṭhāpessāmī’’ti vatvā yācite tasmiṃ cīvare laddhe. Pacchāti cīvaralābhato pacchā. Asante antarāyiketi dasannaṃ antarāyānaṃ aññatarasmiṃ antarāye avijjamāne. Vuṭṭhāpessāmināhanti ahaṃ taṃ na samuṭṭhāpessāmīti dhuranikkhepane tassā pācittiyaṃ hotīti yojanā.

    2391. இத³ந்தி இத³ங் ஸிக்கா²பத³ங். அவுட்டா²பனேன அக்ரியங்.

    2391.Idanti idaṃ sikkhāpadaṃ. Avuṭṭhāpanena akriyaṃ.

    ஸத்தமங்.

    Sattamaṃ.

    2392. அட்ட²மந்தி ‘‘யா பன பி⁴க்கு²னீ ஸிக்க²மானங் ‘ஸசே மங் த்வங், அய்யே, த்³வே வஸ்ஸானி அனுப³ந்தி⁴ஸ்ஸஸி, ஏவாஹங் தங் வுட்டா²பெஸ்ஸாமீ’’திஆதி³ (பாசி॰ 1155) ஸிக்கா²பத³ங். நவமேதி ‘‘யா பன பி⁴க்கு²னீ புரிஸஸங்ஸட்ட²ங் குமாரகஸங்ஸட்ட²ங் சண்டி³ங் ஸோகாவாஸங் ஸிக்க²மானங் வுட்டா²பெய்ய, பாசித்திய’’ந்தி (பாசி॰ 1159) வுத்தஸிக்கா²பதே³. ‘‘வத்தப்³ப³ங் நத்தீ²’’தி இத³ங் ஸத்³த³த்த²விஸேஸமந்தரேன வினிச்ச²யஸ்ஸ ஸுவிஞ்ஞெய்யத்தா வுத்தங். தேனேவாஹ ‘‘உத்தானமேவித³’’ந்தி.

    2392.Aṭṭhamanti ‘‘yā pana bhikkhunī sikkhamānaṃ ‘sace maṃ tvaṃ, ayye, dve vassāni anubandhissasi, evāhaṃ taṃ vuṭṭhāpessāmī’’tiādi (pāci. 1155) sikkhāpadaṃ. Navameti ‘‘yā pana bhikkhunī purisasaṃsaṭṭhaṃ kumārakasaṃsaṭṭhaṃ caṇḍiṃ sokāvāsaṃ sikkhamānaṃ vuṭṭhāpeyya, pācittiya’’nti (pāci. 1159) vuttasikkhāpade. ‘‘Vattabbaṃ natthī’’ti idaṃ saddatthavisesamantarena vinicchayassa suviññeyyattā vuttaṃ. Tenevāha ‘‘uttānamevida’’nti.

    ஸத்³த³த்தோ² பன ஏவங் வேதி³தப்³போ³ – புரிஸஸங்ஸட்ட²ந்தி பரிபுண்ணவீஸதிவஸ்ஸேன புரிஸேன அனநுலோமிகேன காயவசீகம்மேன ஸங்ஸட்ட²ங். குமாரகஸங்ஸட்ட²ந்தி ஊனவீஸதிவஸ்ஸேன குமாரேன ததே²வ ஸங்ஸட்ட²ங். சண்டி³ந்தி கோத⁴னங். ஸோகாவாஸந்தி ஸங்கேதங் கத்வா ஆக³ச்ச²மானா புரிஸானங் அந்தோ ஸோகங் பவேஸேதீதி ஸோகாவாஸா, தங் ஸோகாவாஸங். அத² வா க⁴ரங் விய க⁴ரஸாமிகா, அயம்பி புரிஸஸமாக³மங் அலப⁴மானா ஸோகங் ஆவிஸதி, இதி யங் ஆவிஸதி, ஸ்வாஸ்ஸா ஆவாஸோ ஹோதீதி ஸோகாவாஸா. தேனேவஸ்ஸ பத³பா⁴ஜனே ‘‘ஸோகாவாஸா நாம பரேஸங் து³க்க²ங் உப்பாதே³தி, ஸோகங் ஆவிஸதீ’’தி (பாசி॰ 1160) த்³வேதா⁴ அத்தோ² வுத்தோ. பாசித்தியந்தி ஏவரூபங் வுட்டா²பெந்தியா வுத்தனயேனேவ கம்மவாசாபரியோஸானே உபஜ்ஜா²யாய பாசித்தியங்.

    Saddattho pana evaṃ veditabbo – purisasaṃsaṭṭhanti paripuṇṇavīsativassena purisena ananulomikena kāyavacīkammena saṃsaṭṭhaṃ. Kumārakasaṃsaṭṭhanti ūnavīsativassena kumārena tatheva saṃsaṭṭhaṃ. Caṇḍinti kodhanaṃ. Sokāvāsanti saṅketaṃ katvā āgacchamānā purisānaṃ anto sokaṃ pavesetīti sokāvāsā, taṃ sokāvāsaṃ. Atha vā gharaṃ viya gharasāmikā, ayampi purisasamāgamaṃ alabhamānā sokaṃ āvisati, iti yaṃ āvisati, svāssā āvāso hotīti sokāvāsā. Tenevassa padabhājane ‘‘sokāvāsā nāma paresaṃ dukkhaṃ uppādeti, sokaṃ āvisatī’’ti (pāci. 1160) dvedhā attho vutto. Pācittiyanti evarūpaṃ vuṭṭhāpentiyā vuttanayeneva kammavācāpariyosāne upajjhāyāya pācittiyaṃ.

    2393. ‘‘நத்தி² அஜானந்தியா’’தி பச்சே²தோ³, ஸிக்க²மானாய புரிஸஸங்ஸட்டா²தி³பா⁴வங் அஜானந்தியாதி அத்தோ².

    2393. ‘‘Natthi ajānantiyā’’ti pacchedo, sikkhamānāya purisasaṃsaṭṭhādibhāvaṃ ajānantiyāti attho.

    அட்ட²மனவமானி.

    Aṭṭhamanavamāni.

    2394. விஜாதமாதரா வா ஜனகபிதரா வா ஸாமினா பரிக்³கா³ஹகஸாமினா வா நானுஞ்ஞாதங் உபஸம்பத³த்தா²ய அனநுஞ்ஞாதங் தங் ஸிக்க²மானங் வுட்டா²பெந்தியா தஸ்ஸா பாசித்தியாபத்தி ஸியாதி யோஜனா.

    2394. Vijātamātarāvā janakapitarā vā sāminā pariggāhakasāminā vā nānuññātaṃ upasampadatthāya ananuññātaṃ taṃ sikkhamānaṃ vuṭṭhāpentiyā tassā pācittiyāpatti siyāti yojanā.

    2395. ந பி⁴க்கு²னாதி பி⁴க்கு²னா த்³விக்க²த்துங் ந புச்சி²தப்³ப³ங், ஸகிமேவ புச்சி²தப்³ப³ந்தி வுத்தங் ஹோதி. யதா²ஹ ‘‘பி⁴க்கு²னீஹி த்³விக்க²த்துங் ஆபுச்சி²தப்³ப³ங் பப்³ப³ஜ்ஜாகாலே ச உபஸம்பதா³காலே ச, பி⁴க்கூ²னங் பன ஸகிங் ஆபுச்சி²தேபி வட்டதீ’’தி (பாசி॰ அட்ட²॰ 1162).

    2395.Na bhikkhunāti bhikkhunā dvikkhattuṃ na pucchitabbaṃ, sakimeva pucchitabbanti vuttaṃ hoti. Yathāha ‘‘bhikkhunīhi dvikkhattuṃ āpucchitabbaṃ pabbajjākāle ca upasampadākāle ca, bhikkhūnaṃ pana sakiṃ āpucchitepi vaṭṭatī’’ti (pāci. aṭṭha. 1162).

    2396-7. அத்தி²தந்தி அத்தி²பா⁴வங். சதூஹி ஸமுட்டா²தி, சத்தாரி வா ஸமுட்டா²னானி ஏதஸ்ஸாதி சதுஸமுட்டா²னங். கதமேஹி சதூஹி ஸமுட்டா²தீதி ஆஹ ‘‘வாசதோ…பே॰… காயவாசாதி³தோபி சா’’தி. கத²ங் வாசாதீ³ஹி சதூஹி ஸமுட்டா²தி? அப்³பா⁴னகம்மாதீ³ஸு கேனசிதே³வ கரணீயேன க²ண்ட³ஸீமாயங் நிஸின்னா ‘‘பக்கோஸத² ஸிக்க²மானங், இதே⁴வ நங் உபஸம்பாதெ³ஸ்ஸாமா’’தி உபஸம்பாதே³தி, ஏவங் வாசதோ ஸமுட்டா²தி. ‘‘உபஸ்ஸயதோ பட்டா²ய உபஸம்பாதெ³ஸ்ஸாமீ’’தி வத்வா க²ண்ட³ஸீமங் க³ச்ச²ந்தியா காயவாசதோ ஸமுட்டா²தி. த்³வீஸுபி டா²னேஸு பண்ணத்திங் ஜானித்வா வீதிக்கமங் கரொந்தியா வாசாசித்ததோ, காயவாசாசித்ததோ ச ஸமுட்டா²தி. உபஸம்பாத³னங் க்ரியங், அனாபுச்ச²னங் அக்ரியங்.

    2396-7.Atthitanti atthibhāvaṃ. Catūhi samuṭṭhāti, cattāri vā samuṭṭhānāni etassāti catusamuṭṭhānaṃ. Katamehi catūhi samuṭṭhātīti āha ‘‘vācato…pe… kāyavācāditopi cā’’ti. Kathaṃ vācādīhi catūhi samuṭṭhāti? Abbhānakammādīsu kenacideva karaṇīyena khaṇḍasīmāyaṃ nisinnā ‘‘pakkosatha sikkhamānaṃ, idheva naṃ upasampādessāmā’’ti upasampādeti, evaṃ vācato samuṭṭhāti. ‘‘Upassayato paṭṭhāya upasampādessāmī’’ti vatvā khaṇḍasīmaṃ gacchantiyā kāyavācato samuṭṭhāti. Dvīsupi ṭhānesu paṇṇattiṃ jānitvā vītikkamaṃ karontiyā vācācittato, kāyavācācittato ca samuṭṭhāti. Upasampādanaṃ kriyaṃ, anāpucchanaṃ akriyaṃ.

    த³ஸமங்.

    Dasamaṃ.

    2398. எத்த² இமஸ்மிங் ஸாஸனே யா பி⁴க்கு²னீ பாரிவாஸிகேன ச²ந்த³தா³னேன ஸிக்க²மானங் ஸசே வுட்டா²பேதி, தஸ்ஸா பாசித்தியங் ஸியாதி யோஜனா. தத்த² பாரிவாஸிகேன ச²ந்த³தா³னேனாதி சதுப்³பி³த⁴ங் பாரிவாஸியங் பரிஸபாரிவாஸியங், ரத்திபாரிவாஸியங், ச²ந்த³பாரிவாஸியங், அஜ்ஜா²ஸயபாரிவாஸியந்தி.

    2398.Ettha imasmiṃ sāsane yā bhikkhunī pārivāsikena chandadānena sikkhamānaṃ sace vuṭṭhāpeti, tassā pācittiyaṃ siyāti yojanā. Tattha pārivāsikena chandadānenāti catubbidhaṃ pārivāsiyaṃ parisapārivāsiyaṃ, rattipārivāsiyaṃ, chandapārivāsiyaṃ, ajjhāsayapārivāsiyanti.

    தத்த² பரிஸபாரிவாஸியங் நாம பி⁴க்கூ² கேனசிதே³வ கரணீயேன ஸன்னிபதிதா ஹொந்தி, அத² மேகோ⁴ வா உட்ட²ஹதி, உஸ்ஸாரணா வா கரீயதி, மனுஸ்ஸா வா அஜ்ஜொ²த்த²ரந்தா ஆக³ச்ச²ந்தி, பி⁴க்கூ² ‘‘அனோகாஸோ அயங், அஞ்ஞத்ர க³ச்சா²மா’’தி ச²ந்த³ங் அவிஸ்ஸஜ்ஜெத்வாவ உட்ட²ஹந்தி. இத³ங் பரிஸபாரிவாஸியங். கிஞ்சாபி பரிஸபாரிவாஸியங், ச²ந்த³ஸ்ஸ பன அவிஸ்ஸட்ட²த்தா கம்மங் காதுங் வட்டதி.

    Tattha parisapārivāsiyaṃ nāma bhikkhū kenacideva karaṇīyena sannipatitā honti, atha megho vā uṭṭhahati, ussāraṇā vā karīyati, manussā vā ajjhottharantā āgacchanti, bhikkhū ‘‘anokāso ayaṃ, aññatra gacchāmā’’ti chandaṃ avissajjetvāva uṭṭhahanti. Idaṃ parisapārivāsiyaṃ. Kiñcāpi parisapārivāsiyaṃ, chandassa pana avissaṭṭhattā kammaṃ kātuṃ vaṭṭati.

    புன பி⁴க்கூ² ‘‘உபோஸதா²தீ³னி கரிஸ்ஸாமா’’தி ரத்திங் ஸன்னிபதித்வா ‘‘யாவ ஸப்³பே³ ஸன்னிபதந்தி, தாவ த⁴ம்மங் ஸுணிஸ்ஸாமா’’தி ஏகங் அஜ்ஜே²ஸந்தி, தஸ்மிங் த⁴ம்மகத²ங் கதெ²ந்தேயேவ அருணோ உக்³க³ச்ச²தி. ஸசே ‘‘சாதுத்³த³ஸிகங் உபோஸத²ங் கரிஸ்ஸாமா’’தி நிஸின்னா, ‘‘பன்னரஸோ’’தி காதுங் வட்டதி. ஸசே பன்னரஸிகங் காதுங் நிஸின்னா, பாடிபதே³ அனுபோஸதே² உபோஸத²ங் காதுங் ந வட்டதி. அஞ்ஞங் பன ஸங்க⁴கிச்சங் காதுங் வட்டதி. இத³ங் பன ரத்திபாரிவாஸியங் நாம.

    Puna bhikkhū ‘‘uposathādīni karissāmā’’ti rattiṃ sannipatitvā ‘‘yāva sabbe sannipatanti, tāva dhammaṃ suṇissāmā’’ti ekaṃ ajjhesanti, tasmiṃ dhammakathaṃ kathenteyeva aruṇo uggacchati. Sace ‘‘cātuddasikaṃ uposathaṃ karissāmā’’ti nisinnā, ‘‘pannaraso’’ti kātuṃ vaṭṭati. Sace pannarasikaṃ kātuṃ nisinnā, pāṭipade anuposathe uposathaṃ kātuṃ na vaṭṭati. Aññaṃ pana saṅghakiccaṃ kātuṃ vaṭṭati. Idaṃ pana rattipārivāsiyaṃ nāma.

    புன பி⁴க்கூ² ‘‘கிஞ்சிதே³வ அப்³பா⁴னாதி³ஸங்க⁴கம்மங் கரிஸ்ஸாமா’’தி நிஸின்னா ஹொந்தி, தத்ரேகோ நக்க²த்தபாட²கோ பி⁴க்கு² ஏவங் வத³தி ‘‘அஜ்ஜ நக்க²த்தங் தா³ருணங், மா இத³ங் கம்மங் கரோதா²’’தி, தே தஸ்ஸ வசனேன ச²ந்த³ங் விஸ்ஸஜ்ஜெத்வா தத்தே²வ நிஸின்னா ஹொந்தி, அத²ஞ்ஞோ ஆக³ந்த்வா –

    Puna bhikkhū ‘‘kiñcideva abbhānādisaṅghakammaṃ karissāmā’’ti nisinnā honti, tatreko nakkhattapāṭhako bhikkhu evaṃ vadati ‘‘ajja nakkhattaṃ dāruṇaṃ, mā idaṃ kammaṃ karothā’’ti, te tassa vacanena chandaṃ vissajjetvā tattheva nisinnā honti, athañño āgantvā –

    ‘‘நக்க²த்தங் படிமானெந்தங், அத்தோ² பா³லங் உபச்சகா³’’தி. (ஜா॰ 1.1.49) –

    ‘‘Nakkhattaṃ paṭimānentaṃ, attho bālaṃ upaccagā’’ti. (jā. 1.1.49) –

    வத்வா ‘‘கிங் நக்க²த்தேன, கரோதா²’’தி வத³தி. இத³ங் ச²ந்த³பாரிவாஸியஞ்சேவ அஜ்ஜா²ஸயபாரிவாஸியஞ்ச. ஏதஸ்மிங் பாரிவாஸியே புன ச²ந்த³பாரிஸுத்³தி⁴ங் அனாஹரித்வா கம்மங் காதுங் ந வட்டதி. இத³ங் ஸந்தா⁴ய வுத்தங் ‘‘பாரிவாஸிகேன ச²ந்த³தா³னேனா’’தி.

    Vatvā ‘‘kiṃ nakkhattena, karothā’’ti vadati. Idaṃ chandapārivāsiyañceva ajjhāsayapārivāsiyañca. Etasmiṃ pārivāsiye puna chandapārisuddhiṃ anāharitvā kammaṃ kātuṃ na vaṭṭati. Idaṃ sandhāya vuttaṃ ‘‘pārivāsikena chandadānenā’’ti.

    பாசித்தியங் ஸியாதி ஏவங் வுட்டா²பெந்தியா வுத்தனயேனேவ கம்மவாசாபரியோஸானே பாசித்தியங் ஸியாதி அத்தோ².

    Pācittiyaṃ siyāti evaṃ vuṭṭhāpentiyā vuttanayeneva kammavācāpariyosāne pācittiyaṃ siyāti attho.

    2399. ச²ந்த³ங் அவிஹாய வா அவிஸ்ஸஜ்ஜெத்வாவ அவுட்டி²தாய பரிஸாய து யதா²னிஸின்னாய பரிஸாய வுட்டா²பெந்தியா அனாபத்தீதி யோஜனா. வா-ஸத்³தோ³ ஏவகாரத்தோ².

    2399. Chandaṃ avihāya vā avissajjetvāva avuṭṭhitāya parisāya tu yathānisinnāya parisāya vuṭṭhāpentiyā anāpattīti yojanā. Vā-saddo evakārattho.

    ஏகாத³ஸமங்.

    Ekādasamaṃ.

    2400. த்³வாத³ஸேதி ‘‘யா பன பி⁴க்கு²னீ அனுவஸ்ஸங் வுட்டா²பெய்ய, பாசித்திய’’ந்தி (பாசி॰ 1171) ஸிக்கா²பதே³. தேரஸேதி ‘‘யா பன பி⁴க்கு²னீ ஏகங் வஸ்ஸங் த்³வே வுட்டா²பெய்ய, பாசித்திய’’ந்தி (பாசி॰ 1175) ஸிக்கா²பதே³.

    2400.Dvādaseti ‘‘yā pana bhikkhunī anuvassaṃ vuṭṭhāpeyya, pācittiya’’nti (pāci. 1171) sikkhāpade. Teraseti ‘‘yā pana bhikkhunī ekaṃ vassaṃ dve vuṭṭhāpeyya, pācittiya’’nti (pāci. 1175) sikkhāpade.

    த்³வாத³ஸமதேரஸமானி.

    Dvādasamaterasamāni.

    குமாரிபூ⁴தவக்³கோ³ அட்ட²மோ.

    Kumāribhūtavaggo aṭṭhamo.

    2401. அகி³லானாதி ச²த்துபாஹனேன வூபஸமேதப்³ப³ரோக³ரஹிதா. யதா²ஹ ‘‘அகி³லானா நாம யஸ்ஸா வினா ச²த்துபாஹனா பா²ஸு ஹோதீ’’தி. ச²த்தஞ்ச உபாஹனா ச ச²த்துபாஹனங். தத்த² ச²த்தங் வுத்தலக்க²ணங், உபாஹனா வக்க²மானலக்க²ணா. தா⁴ரெய்யாதி உப⁴யங் ஏகதோ தா⁴ரெய்ய. விஸுங் தா⁴ரெந்தியா ஹி து³க்கடங் வக்க²தி.

    2401.Agilānāti chattupāhanena vūpasametabbarogarahitā. Yathāha ‘‘agilānā nāma yassā vinā chattupāhanā phāsu hotī’’ti. Chattañca upāhanā ca chattupāhanaṃ. Tattha chattaṃ vuttalakkhaṇaṃ, upāhanā vakkhamānalakkhaṇā. Dhāreyyāti ubhayaṃ ekato dhāreyya. Visuṃ dhārentiyā hi dukkaṭaṃ vakkhati.

    2402. தி³வஸந்தி அச்சந்தஸங்யோகே³ உபயோக³வசனங். ஸசே தா⁴ரேதீதி யோஜனா.

    2402.Divasanti accantasaṃyoge upayogavacanaṃ. Sace dhāretīti yojanā.

    2403. கத்³த³மாதீ³னீதி எத்த² ஆதி³-ஸத்³தே³ன மஹாவாலுகாதீ³னங் க³ஹணங்.

    2403.Kaddamādīnīti ettha ādi-saddena mahāvālukādīnaṃ gahaṇaṃ.

    2404. ஸசே க³ச்ச²தீதி ஸம்ப³ந்தோ⁴. தி³ஸ்வா க³ச்சா²தி³கந்தி ச²த்தே லக்³க³னயொக்³க³ங் நீசதரங் க³ச்சா²தி³கங் தி³ஸ்வா. ஆதி³-ஸத்³தே³ன கு³ம்பா³தீ³னங் க³ஹணங். து³க்கடந்தி உபாஹனமத்தஸ்ஸேவ தா⁴ரணே து³க்கடங்.

    2404. Sace gacchatīti sambandho. Disvā gacchādikanti chatte lagganayoggaṃ nīcataraṃ gacchādikaṃ disvā. Ādi-saddena gumbādīnaṃ gahaṇaṃ. Dukkaṭanti upāhanamattasseva dhāraṇe dukkaṭaṃ.

    2405. அபனாமெத்வாதி ஸீஸதோ அபனாமெத்வா. ஓமுஞ்சித்வாதி பாத³தோ ஓமுஞ்சித்வா. ஹோதி பாசித்தியந்தி புன பாசித்தியங் ஹோதி.

    2405.Apanāmetvāti sīsato apanāmetvā. Omuñcitvāti pādato omuñcitvā. Hoti pācittiyanti puna pācittiyaṃ hoti.

    2406. பயோக³க³ணனாயேவாதி ச²த்துபாஹனஸ்ஸ அபனெத்வா அபனெத்வா ஏகதோ தா⁴ரணபயோக³க³ணனாய. திகபாசித்தியங் வுத்தந்தி ‘‘அகி³லானா அகி³லானஸஞ்ஞா, வேமதிகா, கி³லானஸஞ்ஞா ச²த்துபாஹனங் தா⁴ரேதி, ஆபத்தி பாசித்தியஸ்ஸா’’தி (பாசி॰ 1181) ஏவங் திகபாசித்தியங் வுத்தங். ‘‘கி³லானா அகி³லானஸஞ்ஞா, கி³லானா வேமதிகா, ச²த்துபாஹனங் தா⁴ரேதி, ஆபத்தி து³க்கடஸ்ஸா’’தி (பாசி॰ 1182) ஏவங் த்³விகது³க்கடங் ததே²வ வுத்தந்தி ஸம்ப³ந்தோ⁴.

    2406.Payogagaṇanāyevāti chattupāhanassa apanetvā apanetvā ekato dhāraṇapayogagaṇanāya. Tikapācittiyaṃ vuttanti ‘‘agilānā agilānasaññā, vematikā, gilānasaññā chattupāhanaṃ dhāreti, āpatti pācittiyassā’’ti (pāci. 1181) evaṃ tikapācittiyaṃ vuttaṃ. ‘‘Gilānā agilānasaññā, gilānā vematikā, chattupāhanaṃ dhāreti, āpatti dukkaṭassā’’ti (pāci. 1182) evaṃ dvikadukkaṭaṃ tatheva vuttanti sambandho.

    2407. யத்த² பி⁴க்கூ² வா பி⁴க்கு²னியோ வா நிவஸந்தி, தஸ்மிங் ஆராமே வா உபசாரே வா அபரிக்கி²த்தஸ்ஸ ஆராமஸ்ஸ உபசாரே வா. ஆபதா³ஸூதி ரட்ட²பே⁴தா³தி³ஆபதா³ஸு.

    2407. Yattha bhikkhū vā bhikkhuniyo vā nivasanti, tasmiṃ ārāme vā upacāre vā aparikkhittassa ārāmassa upacāre vā. Āpadāsūti raṭṭhabhedādiāpadāsu.

    பட²மங்.

    Paṭhamaṃ.

    2408. பி⁴க்கு²னியாதி எத்த² ‘‘அகி³லானாயா’’தி ஸேஸோ, பாதே³ன க³ந்துங் ஸமத்தா²ய அகி³லானாய பி⁴க்கு²னியாதி அத்தோ². யதா²ஹ ‘‘அகி³லானா நாம ஸக்கோதி பத³ஸா க³ந்து’’ந்தி (பாசி॰ 1187). யானங் நாம ரதா²தி³, தங் ஹெட்டா² வுத்தஸரூபமேவ.

    2408.Bhikkhuniyāti ettha ‘‘agilānāyā’’ti seso, pādena gantuṃ samatthāya agilānāya bhikkhuniyāti attho. Yathāha ‘‘agilānā nāma sakkoti padasā gantu’’nti (pāci. 1187). Yānaṃ nāma rathādi, taṃ heṭṭhā vuttasarūpameva.

    2409. ஆபதா³ஸூதி ரட்ட²பே⁴தா³தி³ஆபதா³ஸு. ச²த்துபாஹனஸிக்கா²பதே³ ஆராமே, ஆராமூபசாரே ச அனாபத்தி வுத்தா, இத⁴ ததா² அவுத்தத்தா ஸப்³ப³த்தா²பி ஆபத்தியேவ வேதி³தப்³பா³.

    2409.Āpadāsūti raṭṭhabhedādiāpadāsu. Chattupāhanasikkhāpade ārāme, ārāmūpacāre ca anāpatti vuttā, idha tathā avuttattā sabbatthāpi āpattiyeva veditabbā.

    து³தியங்.

    Dutiyaṃ.

    2410. ‘‘யங் கிஞ்சிபி கடூபிய’’ந்தி இத³ங் ‘‘ஸங்கா⁴ணி’’ந்தி ஏதஸ்ஸ அத்த²பத³ங். யதா²ஹ – ‘‘ஸங்கா⁴ணி நாம யா காசி கடூபகா³’’தி. ஸங்கா⁴ணி நாம மேக²லாதி³கடிபிளந்த⁴னங். கடூபியந்தி கடிப்பதே³ஸோபக³ங்.

    2410.‘‘Yaṃ kiñcipi kaṭūpiya’’nti idaṃ ‘‘saṅghāṇi’’nti etassa atthapadaṃ. Yathāha – ‘‘saṅghāṇi nāma yā kāci kaṭūpagā’’ti. Saṅghāṇi nāma mekhalādikaṭipiḷandhanaṃ. Kaṭūpiyanti kaṭippadesopagaṃ.

    2412. கடிஸுத்தங் நாம கடியங் பிளந்த⁴னரஜ்ஜுஸுத்தகங்.

    2412.Kaṭisuttaṃ nāma kaṭiyaṃ piḷandhanarajjusuttakaṃ.

    2413. இத⁴ இமஸ்மிங் ஸிக்கா²பதே³ சித்தங் அகுஸலங், இத³ங் பன ஸிக்கா²பத³ங் லோகவஜ்ஜங், இதி இத³ங் உப⁴யமேவ விஸேஸதா புரிமஸிக்கா²பத³தோ இமஸ்ஸ நானாகரணங்.

    2413.Idha imasmiṃ sikkhāpade cittaṃ akusalaṃ, idaṃ pana sikkhāpadaṃ lokavajjaṃ, iti idaṃ ubhayameva visesatā purimasikkhāpadato imassa nānākaraṇaṃ.

    ததியங்.

    Tatiyaṃ.

    2414. ஸீஸூபகா³தி³ஸு யங் கிஞ்சி ஸசே யா தா⁴ரேதி, தஸ்ஸா தஸ்ஸ வத்து²ஸ்ஸ க³ணனாய ஆபத்தியோ ஸியுந்தி யோஜனா. ஸீஸங் உபக³ச்ச²தீதி ஸீஸூபக³ங், ஸீஸே பிளந்த⁴னாரஹந்தி அத்தோ². ஆதி³-ஸத்³தே³ன கீ³வூபகா³தீ³னங் க³ஹணங். யதா²ஹ – ‘‘இத்தா²லங்காரோ நாம ஸீஸூபகோ³ கீ³வூபகோ³ ஹத்தூ²பகோ³ பாதூ³பகோ³ கடூபகோ³’’தி.

    2414. Sīsūpagādisu yaṃ kiñci sace yā dhāreti, tassā tassa vatthussa gaṇanāya āpattiyo siyunti yojanā. Sīsaṃ upagacchatīti sīsūpagaṃ, sīse piḷandhanārahanti attho. Ādi-saddena gīvūpagādīnaṃ gahaṇaṃ. Yathāha – ‘‘itthālaṅkāro nāma sīsūpago gīvūpago hatthūpago pādūpago kaṭūpago’’ti.

    2415. ந ச தோ³ஸோதி யோஜனா. ‘‘ஸதி³ஸந்தி பரிதீ³பித’’ந்தி வத்தப்³பே³ இதி-ஸத்³தோ³ லுத்தனித்³தி³ட்டோ².

    2415. Na ca dosoti yojanā. ‘‘Sadisanti paridīpita’’nti vattabbe iti-saddo luttaniddiṭṭho.

    சதுத்த²ங்.

    Catutthaṃ.

    2416. யேன கேனசி க³ந்தே⁴னாதி சந்த³னதக³ராதி³னா யேன கேனசி க³ந்த⁴கக்கேன. ஸவண்ணாவண்ணகேன சாதி வண்ணேன ஸஹ வத்ததீதி ஸவண்ணகங், ஹலித்³தி³கக்காதி³, நத்தி² ஏதஸ்ஸ உப்³ப³ட்டனபச்சயா தி³ஸ்ஸமானோ வண்ணவிஸேஸோதி அவண்ணகங், ஸாஸபகக்காதி³, ஸவண்ணகஞ்ச அவண்ணகஞ்ச ஸவண்ணாவண்ணகங், தேன ஸவண்ணாவண்ணகேன ச. உப்³ப³ட்டெத்வா ந்ஹாயந்தியா ந்ஹானோஸானே பாசித்தியாபத்தி பகாஸிதாதி யோஜனா.

    2416.Yenakenaci gandhenāti candanatagarādinā yena kenaci gandhakakkena. Savaṇṇāvaṇṇakena cāti vaṇṇena saha vattatīti savaṇṇakaṃ, haliddikakkādi, natthi etassa ubbaṭṭanapaccayā dissamāno vaṇṇavisesoti avaṇṇakaṃ, sāsapakakkādi, savaṇṇakañca avaṇṇakañca savaṇṇāvaṇṇakaṃ, tena savaṇṇāvaṇṇakena ca. Ubbaṭṭetvā nhāyantiyā nhānosāne pācittiyāpatti pakāsitāti yojanā.

    2417. ஸப்³ப³பயோகே³தி ஸப்³ப³ஸ்மிங் புப்³ப³பயோகே³. ஆபா³த⁴பச்சயாதி த³த்³து³குட்டா²தி³ரோக³பச்சயா.

    2417.Sabbapayogeti sabbasmiṃ pubbapayoge. Ābādhapaccayāti daddukuṭṭhādirogapaccayā.

    2418. ச²ட்ட²ந்தி ‘‘யா பன பி⁴க்கு²னீ வாஸிதகேன பிஞ்ஞாகேன நஹாயெய்ய, பாசித்திய’’ந்தி (பாசி॰ 1203) ஸிக்கா²பத³ங்.

    2418.Chaṭṭhanti ‘‘yā pana bhikkhunī vāsitakena piññākena nahāyeyya, pācittiya’’nti (pāci. 1203) sikkhāpadaṃ.

    பஞ்சமச²ட்டா²னி.

    Pañcamachaṭṭhāni.

    2419. யா பன பி⁴க்கு²னீ அஞ்ஞாய பி⁴க்கு²னியா ஸசே உப்³ப³ட்டாபெய்ய வா ஸம்பா³ஹாபெய்ய வா, தஸ்ஸா பி⁴க்கு²னியா ததா² பாசித்தியாபத்தி ஹோதீதி யோஜனா.

    2419. Yā pana bhikkhunī aññāya bhikkhuniyā sace ubbaṭṭāpeyya vā sambāhāpeyya vā, tassā bhikkhuniyā tathā pācittiyāpatti hotīti yojanā.

    2420. எத்த² இமஸ்மிங் உப்³ப³ட்டனே, ஸம்பா³ஹனே ச ஹத்த²ங் அமோசெத்வா உப்³ப³ட்டனே ஏகா ஆபத்தி ஸியா, ஹத்த²ங் மோசெத்வா மோசெத்வா உப்³ப³ட்டனே பயோக³க³ணனாய ஸியாதி யோஜனா.

    2420.Ettha imasmiṃ ubbaṭṭane, sambāhane ca hatthaṃ amocetvā ubbaṭṭane ekā āpatti siyā, hatthaṃ mocetvā mocetvā ubbaṭṭane payogagaṇanāya siyāti yojanā.

    2421. ஆபதா³ஸூதி சோரப⁴யாதீ³ஹி ஸரீரகம்பனாதீ³ஸு. கி³லானாயாதி அந்தமஸோ மக்³க³க³மனபரிஸ்ஸமேனாபி ஆபா³தி⁴காய.

    2421.Āpadāsūti corabhayādīhi sarīrakampanādīsu. Gilānāyāti antamaso maggagamanaparissamenāpi ābādhikāya.

    2422. அட்ட²மஸிக்கா²பதே³ ‘‘ஸிக்க²மானாயா’’தி ச நவமஸிக்கா²பதே³ ‘‘ஸாமணேரியா’’தி ச த³ஸமஸிக்கா²பதே³ ‘‘கி³ஹினியா’’தி ச விஸேஸங் வஜ்ஜெத்வா அவஸேஸவினிச்ச²யோ ஸத்தமேனேவ ஸமானோதி த³ஸ்ஸேதுமாஹ ‘‘அட்ட²மாதீ³னி தீணிபீ’’தி.

    2422. Aṭṭhamasikkhāpade ‘‘sikkhamānāyā’’ti ca navamasikkhāpade ‘‘sāmaṇeriyā’’ti ca dasamasikkhāpade ‘‘gihiniyā’’ti ca visesaṃ vajjetvā avasesavinicchayo sattameneva samānoti dassetumāha ‘‘aṭṭhamādīni tīṇipī’’ti.

    ஸத்தமட்ட²மனவமத³ஸமானி.

    Sattamaṭṭhamanavamadasamāni.

    2423. அந்தோஉபசாரஸ்மிந்தி த்³வாத³ஸரதனப்³ப⁴ந்தரே. ‘‘பி⁴க்கு²ஸ்ஸ புரதோ’’தி இத³ங் உபலக்க²ணங். தஸ்மா புரதோ வா ஹோது பச்ச²தோ வா பஸ்ஸதோ வா, ஸமந்ததோ த்³வாத³ஸரதனப்³ப⁴ந்தரேதி நித³ஸ்ஸனபத³மேதங். ச²மாயபீதி அனந்தரஹிதாய பூ⁴மியாபி. யா நிஸீதெ³ய்யாதி ஸம்ப³ந்தோ⁴. ந வட்டதி பாசித்தியாபத்தி ஹோதீதி அத்தோ².

    2423.Antoupacārasminti dvādasaratanabbhantare. ‘‘Bhikkhussa purato’’ti idaṃ upalakkhaṇaṃ. Tasmā purato vā hotu pacchato vā passato vā, samantato dvādasaratanabbhantareti nidassanapadametaṃ. Chamāyapīti anantarahitāya bhūmiyāpi. Yā nisīdeyyāti sambandho. Na vaṭṭati pācittiyāpatti hotīti attho.

    2424. திகபாசித்தியங் வுத்தந்தி அனாபுச்சி²தே அனாபுச்சி²தஸஞ்ஞா, வேமதிகா, ஆபுச்சி²தஸஞ்ஞாதி தீஸு விகப்பேஸு பாசித்தியத்தயங் வுத்தங். ஆபுச்சி²தே அனாபுச்சி²தஸஞ்ஞா, வேமதிகா வா பி⁴க்கு²ஸ்ஸ புரதோ நிஸீதெ³ய்யாதி விகப்பத்³வயே து³க்கடத்³வயங் ஹோதி. ஆபதா³ஸூதி ரட்ட²பே⁴தா³தி³ஆபதா³ஸு. ஆபுச்சி²துஞ்ச டா²துஞ்ச அஸக்கொந்தியா கி³லானாய.

    2424.Tikapācittiyaṃ vuttanti anāpucchite anāpucchitasaññā, vematikā, āpucchitasaññāti tīsu vikappesu pācittiyattayaṃ vuttaṃ. Āpucchite anāpucchitasaññā, vematikā vā bhikkhussa purato nisīdeyyāti vikappadvaye dukkaṭadvayaṃ hoti. Āpadāsūti raṭṭhabhedādiāpadāsu. Āpucchituñca ṭhātuñca asakkontiyā gilānāya.

    2425. நிபஜ்ஜனங் க்ரியங். அனாபுச்ச²னங் அக்ரியங்.

    2425. Nipajjanaṃ kriyaṃ. Anāpucchanaṃ akriyaṃ.

    ஏகாத³ஸமங்.

    Ekādasamaṃ.

    2426. ஓகாஸோ கதோ யேன ஸோ ஓகாஸகதோ, ந ஓகாஸகதோ அனோகாஸகதோ, தங், அகதோகாஸந்தி அத்தோ², ‘‘அஸுகஸ்மிங் நாம டா²னே புச்சா²மீ’’தி அத்தனா புச்சி²தப்³ப³வினயாதீ³னங் நாமங் க³ஹெத்வா ஓகாஸங் காராபனகாலே அதி⁴வாஸனவஸேன அகதோகாஸந்தி வுத்தங் ஹோதி. தோ³ஸதாதி பாசித்தியாபத்தி. ஏகஸ்மிங் பிடகே ஓகாஸங் காராபெத்வா அஞ்ஞஸ்மிங் பிடகே பஞ்ஹங் புச்ச²ந்தியாபி பாசித்தியங் ஹோதீதி த³ஸ்ஸேதுமாஹ ‘‘வினயே சா’’திஆதி³.

    2426. Okāso kato yena so okāsakato, na okāsakato anokāsakato, taṃ, akatokāsanti attho, ‘‘asukasmiṃ nāma ṭhāne pucchāmī’’ti attanā pucchitabbavinayādīnaṃ nāmaṃ gahetvā okāsaṃ kārāpanakāle adhivāsanavasena akatokāsanti vuttaṃ hoti. Dosatāti pācittiyāpatti. Ekasmiṃ piṭake okāsaṃ kārāpetvā aññasmiṃ piṭake pañhaṃ pucchantiyāpi pācittiyaṃ hotīti dassetumāha ‘‘vinaye cā’’tiādi.

    புச்ச²ந்தியாபி சாதி எத்த² பி-ஸத்³தே³ன ‘‘அபி⁴த⁴ம்மங் புச்ச²ந்தியாபீ’’தி இத³ஞ்ச அனுத்தஸமுச்சயத்தே²ன ச-ஸத்³தே³ன ‘‘ஸுத்தந்தே ஓகாஸங் காராபெத்வா வினயங் வா அபி⁴த⁴ம்மங் வா புச்ச²தி, ஆபத்தி பாசித்தியஸ்ஸ. அபி⁴த⁴ம்மே ஓகாஸங் காராபெத்வா ஸுத்தந்தங் வா வினயங் வா புச்ச²தி, ஆபத்தி பாசித்தியஸ்ஸா’’தி இத³ஞ்ச ஸங்க³ஹிதங்.

    Pucchantiyāpi cāti ettha pi-saddena ‘‘abhidhammaṃ pucchantiyāpī’’ti idañca anuttasamuccayatthena ca-saddena ‘‘suttante okāsaṃ kārāpetvā vinayaṃ vā abhidhammaṃ vā pucchati, āpatti pācittiyassa. Abhidhamme okāsaṃ kārāpetvā suttantaṃ vā vinayaṃ vā pucchati, āpatti pācittiyassā’’ti idañca saṅgahitaṃ.

    2427. அனோதி³ஸ்ஸாதி ‘‘அஸுகஸ்மிங் நாம புச்சா²மீ’’தி ஏவங் அனியமெத்வா கேவலங் ‘‘புச்சி²தப்³ப³ங் அத்தி², புச்சா²மி அய்யா’’தி ஏவங் வத்வா.

    2427.Anodissāti ‘‘asukasmiṃ nāma pucchāmī’’ti evaṃ aniyametvā kevalaṃ ‘‘pucchitabbaṃ atthi, pucchāmi ayyā’’ti evaṃ vatvā.

    த்³வாத³ஸமங்.

    Dvādasamaṃ.

    2428-9. ஸங்கச்சிகந்தி த²னவேட²னசீவரங், தங் பன பாருபந்தியா அத⁴க்க²கங் உப்³ப⁴னாபி⁴மண்ட³லங் படிச்சா²தெ³ந்தியா பாருபிதப்³ப³ங். தேனாஹ மாதிகட்ட²கதா²யங் ‘‘அஸங்கச்சிகாதி அத⁴க்க²கஉப்³ப⁴னாபி⁴மண்ட³லஸங்கா²தஸ்ஸ ஸரீரஸ்ஸ படிச்சா²த³னத்த²ங் அனுஞ்ஞாதஸங்கச்சிகசீவரரஹிதா’’தி (கங்கா²॰ அட்ட²॰ அஸங்கச்சிகஸிக்கா²பத³வண்ணனா). ‘‘ஸங்கச்சிகாய பமாணங் திரியங் தி³யட்³ட⁴ஹத்த²ந்தி போராணக³ண்டி²பதே³ வுத்த’’ந்தி (வஜிர॰ டீ॰ பாசித்திய 1224-1226) வஜிரபு³த்³தி⁴த்தே²ரோ. பரிக்கே²போக்கமேதி பரிக்கே²பஸ்ஸ அந்தோபவேஸனே. உபசாரோக்கமேபீதி அபரிக்கி²த்தஸ்ஸ கா³மஸ்ஸ து³தியலெட்³டு³பாதப்³ப⁴ந்தரபவேஸனேபி. எத்தா²தி இமஸ்மிங் ஸிக்கா²பதே³. ஏஸேவ நயோதி ‘‘பட²மே பாதே³ து³க்கடங், து³தியே பாசித்திய’’ந்தி யதா²வுத்தோயேவ நயோ மதோ விஞ்ஞாதோதி அத்தோ².

    2428-9.Saṃkaccikanti thanaveṭhanacīvaraṃ, taṃ pana pārupantiyā adhakkhakaṃ ubbhanābhimaṇḍalaṃ paṭicchādentiyā pārupitabbaṃ. Tenāha mātikaṭṭhakathāyaṃ ‘‘asaṃkaccikāti adhakkhakaubbhanābhimaṇḍalasaṅkhātassa sarīrassa paṭicchādanatthaṃ anuññātasaṃkaccikacīvararahitā’’ti (kaṅkhā. aṭṭha. asaṃkaccikasikkhāpadavaṇṇanā). ‘‘Saṃkaccikāya pamāṇaṃ tiriyaṃ diyaḍḍhahatthanti porāṇagaṇṭhipade vutta’’nti (vajira. ṭī. pācittiya 1224-1226) vajirabuddhitthero. Parikkhepokkameti parikkhepassa antopavesane. Upacārokkamepīti aparikkhittassa gāmassa dutiyaleḍḍupātabbhantarapavesanepi. Etthāti imasmiṃ sikkhāpade. Eseva nayoti ‘‘paṭhame pāde dukkaṭaṃ, dutiye pācittiya’’nti yathāvuttoyeva nayo mato viññātoti attho.

    2430. ஆபதா³ஸுபீதி மஹக்³க⁴ங் ஹோதி ஸங்கச்சிகங், பாருபித்வா க³ச்ச²ந்தியா ச உபத்³த³வோ உப்பஜ்ஜதி, ஏவரூபாஸு ஆபதா³ஸு அனாபத்தி.

    2430.Āpadāsupīti mahagghaṃ hoti saṃkaccikaṃ, pārupitvā gacchantiyā ca upaddavo uppajjati, evarūpāsu āpadāsu anāpatti.

    2431. ஸேஸந்தி இத⁴ ஸரூபதோ அத³ஸ்ஸிதஞ்ச. வுத்தனயேனேவாதி மாதிகாபத³பா⁴ஜனாதீ³ஸு வுத்தனயேனேவ. ஸுனிபுணஸ்மிங் த⁴ம்மஜாதங், அத்த²ஜாதஞ்ச விபா⁴வேதி விவிதே⁴னாகாரேன பகாஸேதீதி விபா⁴வீ, தேன விபா⁴வினா.

    2431.Sesanti idha sarūpato adassitañca. Vuttanayenevāti mātikāpadabhājanādīsu vuttanayeneva. Sunipuṇasmiṃ dhammajātaṃ, atthajātañca vibhāveti vividhenākārena pakāsetīti vibhāvī, tena vibhāvinā.

    தேரஸமங்.

    Terasamaṃ.

    ச²த்துபாஹனவக்³கோ³ நவமோ.

    Chattupāhanavaggo navamo.

    ஏவங் நவஹி வக்³கே³ஹி பி⁴க்கு²னீனங் பி⁴க்கூ²ஹி அஸாதா⁴ரணானி ச²ன்னவுதி ஸிக்கா²பதா³னி த³ஸ்ஸெத்வா இதோ பரேஸு முஸாவாத³வக்³கா³தீ³ஸு ஸத்தஸு வக்³கே³ஸு பி⁴க்கூ²ஹி ஸாதா⁴ரணஸிக்கா²பதா³னி பி⁴க்கு²பாதிமொக்க²வினிச்ச²யகதா²ய வுத்தனயேனேவ வேதி³தப்³பா³னீதி தானி இத⁴ ந த³ஸ்ஸிதானி.

    Evaṃ navahi vaggehi bhikkhunīnaṃ bhikkhūhi asādhāraṇāni channavuti sikkhāpadāni dassetvā ito paresu musāvādavaggādīsu sattasu vaggesu bhikkhūhi sādhāraṇasikkhāpadāni bhikkhupātimokkhavinicchayakathāya vuttanayeneva veditabbānīti tāni idha na dassitāni.

    ஸப்³பா³னேவ பி⁴க்கு²னீனங் கு²த்³த³கேஸு ச²ன்னவுதி, பி⁴க்கூ²னங் த்³வேனவுதீதி அட்டா²ஸீதிஸதங் ஸிக்கா²பதா³னி. ததோ பரங் ஸகலங் பி⁴க்கு²னிவக்³க³ங், பரம்பரபோ⁴ஜனங், அனதிரித்தபோ⁴ஜனங், அனதிரித்தேன அபி⁴ஹட்டு²ங் பவாரணங், பணீதபோ⁴ஜனவிஞ்ஞத்தி, அசேலகஸிக்கா²பத³ங், து³ட்டு²ல்லபஅச்சா²த³னங், ஊனவீஸதிவஸ்ஸஉபஸம்பாத³னங், மாதுகா³மேன ஸத்³தி⁴ங் ஸங்விதா⁴ய அத்³தா⁴னக³மனங், ராஜந்தேபுரப்பவேஸனங் , ஸந்தங் பி⁴க்கு²ங் அனாபுச்சா² விகாலே கா³மப்பவேஸனங், நிஸீத³னங், வஸ்ஸிகஸாடிகந்தி இமானி பா³வீஸதி ஸிக்கா²பதா³னி அபனெத்வா ஸேஸானி ஸதஞ்ச ச²ஸட்டி² ச ஸிக்கா²பதா³னி பி⁴க்கு²னிபாதிமொக்கு²த்³தே³ஸமக்³கே³ன உத்³தி³ட்டா²னீதி வேதி³தப்³பா³னி.

    Sabbāneva bhikkhunīnaṃ khuddakesu channavuti, bhikkhūnaṃ dvenavutīti aṭṭhāsītisataṃ sikkhāpadāni. Tato paraṃ sakalaṃ bhikkhunivaggaṃ, paramparabhojanaṃ, anatirittabhojanaṃ, anatirittena abhihaṭṭhuṃ pavāraṇaṃ, paṇītabhojanaviññatti, acelakasikkhāpadaṃ, duṭṭhullapaacchādanaṃ, ūnavīsativassaupasampādanaṃ, mātugāmena saddhiṃ saṃvidhāya addhānagamanaṃ, rājantepurappavesanaṃ , santaṃ bhikkhuṃ anāpucchā vikāle gāmappavesanaṃ, nisīdanaṃ, vassikasāṭikanti imāni bāvīsati sikkhāpadāni apanetvā sesāni satañca chasaṭṭhi ca sikkhāpadāni bhikkhunipātimokkhuddesamaggena uddiṭṭhānīti veditabbāni.

    தத்ராயங் ஸங்கே²பதோ அஸாதா⁴ரணஸிக்கா²பதே³ஸு ஸமுட்டா²னவினிச்ச²யோ – கி³ரக்³க³ஸமஜ்ஜா, சித்தாகா³ரஸிக்கா²பத³ங், ஸங்கா⁴ணி, இத்தா²லங்காரோ, க³ந்த⁴வண்ணகோ, வாஸிதகபிஞ்ஞாகோ, பி⁴க்கு²னிஆதீ³ஹி உம்மத்³த³னபரிமத்³த³னானீதி இமானி த³ஸ ஸிக்கா²பதா³னி அசித்தகானி, லோகவஜ்ஜானி, அகுஸலசித்தானி. அயங் பனெத்த² அதி⁴ப்பாயோ – வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி சேவ அகுஸலசித்தானி ச. அவஸேஸானி அசித்தகானி பண்ணத்திவஜ்ஜானேவ. சோரிவுட்டா²பனங், கா³மந்தரங், ஆராமஸிக்கா²பத³ங், க³ப்³பி⁴னிவக்³கே³ ஆதி³தோ பட்டா²ய ஸத்த, குமாரிபூ⁴தவக்³கே³ ஆதி³தோ பட்டா²ய பஞ்ச, புரிஸஸங்ஸட்ட²ங், பாரிவாஸியச²ந்த³தா³னங், அனுவஸ்ஸவுட்டா²பனங், ஏகந்தரிகவுட்டா²பனந்தி இமானி ஏகூனவீஸதி ஸிக்கா²பதா³னி ஸசித்தகானி, பண்ணத்திவஜ்ஜானி. அவஸேஸானி ஸசித்தகானி லோகவஜ்ஜானேவாதி.

    Tatrāyaṃ saṅkhepato asādhāraṇasikkhāpadesu samuṭṭhānavinicchayo – giraggasamajjā, cittāgārasikkhāpadaṃ, saṅghāṇi, itthālaṅkāro, gandhavaṇṇako, vāsitakapiññāko, bhikkhuniādīhi ummaddanaparimaddanānīti imāni dasa sikkhāpadāni acittakāni, lokavajjāni, akusalacittāni. Ayaṃ panettha adhippāyo – vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni ceva akusalacittāni ca. Avasesāni acittakāni paṇṇattivajjāneva. Corivuṭṭhāpanaṃ, gāmantaraṃ, ārāmasikkhāpadaṃ, gabbhinivagge ādito paṭṭhāya satta, kumāribhūtavagge ādito paṭṭhāya pañca, purisasaṃsaṭṭhaṃ, pārivāsiyachandadānaṃ, anuvassavuṭṭhāpanaṃ, ekantarikavuṭṭhāpananti imāni ekūnavīsati sikkhāpadāni sacittakāni, paṇṇattivajjāni. Avasesāni sacittakāni lokavajjānevāti.

    இதி வினயத்த²ஸாரஸந்தீ³பனியா வினயவினிச்ச²யவண்ணனாய

    Iti vinayatthasārasandīpaniyā vinayavinicchayavaṇṇanāya

    பாசித்தியகதா²வண்ணனா நிட்டி²தா.

    Pācittiyakathāvaṇṇanā niṭṭhitā.




    Next: பாடிதே³ஸனீயகதா²வண்ணனா • Pāṭidesanīyakathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact