Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā

    পাচিত্তিযকথাৰণ্ণনা

    Pācittiyakathāvaṇṇanā

    ৮৮৯. এৰং নাতিৰিত্থারসঙ্খেপতো নিস্সগ্গিযৰিনিচ্ছযং দস্সেত্ৰা ইদানি তদনন্তরং নিদ্দিট্ঠস্স পাচিত্তিযকণ্ডস্স ৰিনিচ্ছযং দস্সেতুং ‘‘সম্পজানমুসাৰাদে’’তিআদি আরদ্ধং। সম্পজানমুসাৰাদেতি অত্তনো ৰচনস্স মুসাভাৰং ঞত্ৰা, অদিট্ঠং ‘‘দিট্ঠ’’ন্তিআদিনা নযেন মুসাৰাদে সম্পজানন্তস্স মুসাভণনেতিপি অত্থো গহেতব্বো। যথাহ অট্ঠকথাযং ‘‘জানিত্ৰা জানন্তস্স চ মুসাভণনে’’তি (পাচি॰ অট্ঠ॰ ২)। ‘‘মুসাৰাদে’’তি হি নিমিত্তত্থে ভুম্মং, মুসাৰাদনিমিত্তন্তি অত্থো।

    889. Evaṃ nātivitthārasaṅkhepato nissaggiyavinicchayaṃ dassetvā idāni tadanantaraṃ niddiṭṭhassa pācittiyakaṇḍassa vinicchayaṃ dassetuṃ ‘‘sampajānamusāvāde’’tiādi āraddhaṃ. Sampajānamusāvādeti attano vacanassa musābhāvaṃ ñatvā, adiṭṭhaṃ ‘‘diṭṭha’’ntiādinā nayena musāvāde sampajānantassa musābhaṇanetipi attho gahetabbo. Yathāha aṭṭhakathāyaṃ ‘‘jānitvā jānantassa ca musābhaṇane’’ti (pāci. aṭṭha. 2). ‘‘Musāvāde’’ti hi nimittatthe bhummaṃ, musāvādanimittanti attho.

    দৰা ভণন্তস্সাতি যোজনা। অনুপপরিক্খিত্ৰা ৰেগেন দিট্ঠম্পি ‘‘অদিট্ঠং মে’’তি ৰদন্তস্সাতি অত্থো। যথাহ ‘‘দৰা ভণতি নাম সহসা ভণতী’’তি পদভাজনীঅট্ঠকথাযং ‘‘সহসা ভণতীতি অৰীমংসিত্ৰা অনুপধারেত্ৰা ৰেগেন দিট্ঠম্পি ‘অদিট্ঠং মে’তি ভণতী’’তি (পাচি॰ অট্ঠ॰ ১১)। রৰা ভণন্তস্সাতি ‘‘চীৰর’’ন্তি ৰত্তুকামস্স ‘‘চীর’’ন্তি ৰচনং ৰিয মন্দত্তা মোমূহত্তা ‘‘অঞ্ঞং ভণিস্সামী’’তি অঞ্ঞং ভণন্তস্স। যথাহ ‘‘রৰা ভণতি নাম ‘অঞ্ঞং ভণিস্সামী’তি অঞ্ঞং ভণতী’’তি।

    Davā bhaṇantassāti yojanā. Anupaparikkhitvā vegena diṭṭhampi ‘‘adiṭṭhaṃ me’’ti vadantassāti attho. Yathāha ‘‘davā bhaṇati nāma sahasā bhaṇatī’’ti padabhājanīaṭṭhakathāyaṃ ‘‘sahasā bhaṇatīti avīmaṃsitvā anupadhāretvā vegena diṭṭhampi ‘adiṭṭhaṃ me’ti bhaṇatī’’ti (pāci. aṭṭha. 11). Ravā bhaṇantassāti ‘‘cīvara’’nti vattukāmassa ‘‘cīra’’nti vacanaṃ viya mandattā momūhattā ‘‘aññaṃ bhaṇissāmī’’ti aññaṃ bhaṇantassa. Yathāha ‘‘ravā bhaṇati nāma ‘aññaṃ bhaṇissāmī’ti aññaṃ bhaṇatī’’ti.

    ৮৯০. অঞ্ঞত্থাতি চতুত্থপারাজিকাদীসু। অত্তনা অলদ্ধং উত্তরিমনুস্সধম্মং ‘‘লদ্ধং মযা’’তি মুসা যস্স ভণতি, তেন তঙ্খণমেৰ সুত্ৰা তদত্থে ঞাতে পারাজিকস্স, অঞ্ঞাতে কালন্তরেন ঞাতে চ পরিযাযৰচনে চ ঞাতে থুল্লচ্চযস্স, পরিযাযৰচনে অৰিঞ্ঞাতে দুক্কটস্স, দুট্ঠদোসসিক্খাপদে পারাজিকং অনাপন্নস্স ‘‘আপন্নো’’তি মুসাভণনে সঙ্ঘাদিসেসস্স, ওমসৰাদসিক্খাপদে দুব্ভাসিতস্স চ ৰুত্তত্তা আহ ‘‘মুসাৰাদস্স কারণা পঞ্চ আপত্তিযো’’তি। ইমায পাচিত্তিযা সদ্ধিং ছ আপত্তিক্খন্ধা হোন্তি।

    890.Aññatthāti catutthapārājikādīsu. Attanā aladdhaṃ uttarimanussadhammaṃ ‘‘laddhaṃ mayā’’ti musā yassa bhaṇati, tena taṅkhaṇameva sutvā tadatthe ñāte pārājikassa, aññāte kālantarena ñāte ca pariyāyavacane ca ñāte thullaccayassa, pariyāyavacane aviññāte dukkaṭassa, duṭṭhadosasikkhāpade pārājikaṃ anāpannassa ‘‘āpanno’’ti musābhaṇane saṅghādisesassa, omasavādasikkhāpade dubbhāsitassa ca vuttattā āha ‘‘musāvādassa kāraṇā pañca āpattiyo’’ti. Imāya pācittiyā saddhiṃ cha āpattikkhandhā honti.

    সম্পজানমুসাৰাদকথাৰণ্ণনা।

    Sampajānamusāvādakathāvaṇṇanā.

    ৮৯১-৩. ৰুত্তেসু জাতিআদীসু দসসু অক্কোসৰত্থূসূতি যোজনা, পদভাজনে ৰুত্তেসু জাতিনামগোত্তকম্মসিপ্পআবাধলিঙ্গকিলেসআপত্তিঅক্কোসানং ৰসেন দসসু অক্কোসৰত্থূসূতি অত্থো । তেসু কিলেসং ৰিনা সব্বেতে হীনুক্কট্ঠৰসেন দ্ৰিপ্পকারা হোন্তি। যথাহ পদভাজনে ‘‘জাতি নাম দ্ৰে জাতিযো হীনা চ জাতি উক্কট্ঠা চ জাতী’’তিআদি।

    891-3. Vuttesu jātiādīsu dasasu akkosavatthūsūti yojanā, padabhājane vuttesu jātināmagottakammasippaābādhaliṅgakilesaāpattiakkosānaṃ vasena dasasu akkosavatthūsūti attho . Tesu kilesaṃ vinā sabbete hīnukkaṭṭhavasena dvippakārā honti. Yathāha padabhājane ‘‘jāti nāma dve jātiyo hīnā ca jāti ukkaṭṭhā ca jātī’’tiādi.

    তত্থ চণ্ডালাদিজাতি হীনা, খত্তিযব্রাহ্মণজাতিযো উক্কট্ঠা। নামেসু অৰকণ্ণকজৰকণ্ণকাদিনামানি দাসনামত্তা হীনানি, বুদ্ধরক্খিতাদিনামানি উক্কট্ঠানি। কোসিযাদিগোত্তং হীনং, গোতমাদিগোত্তং উক্কট্ঠং। কম্মেসু ৰড্ঢকিমণিকারাদিকম্মানি হীনানি, কসিৰাণিজ্জাগোরক্খকম্মানি উক্কট্ঠানি। সিপ্পেসু নল়কারকুম্ভকারাদিসিপ্পং হীনং, মুদ্দাগণনাদিসিপ্পং উক্কট্ঠং। আবাধেসু সব্বেপি আবাধা হীনা, অপিচ মধুমেহো পীল়াজনকত্তাভাৰা উক্কট্ঠো। লিঙ্গেসু অতিদীঘতাদযো হীনা, নাতিদীঘতাদযো উক্কট্ঠা। সব্বেপি কিলেসা হীনা। সব্বাপত্তিযোপি হীনা, অপিচ সোতাপত্তিসমাপত্তি উক্কট্ঠা। অক্কোসেসু ‘‘ওট্ঠোসি মেণ্ডোসি গোণোসী’’তিআদিকো হীনো, ‘‘পণ্ডিতোসি ব্যত্তোসী’’তিআদিকো উক্কট্ঠো।

    Tattha caṇḍālādijāti hīnā, khattiyabrāhmaṇajātiyo ukkaṭṭhā. Nāmesu avakaṇṇakajavakaṇṇakādināmāni dāsanāmattā hīnāni, buddharakkhitādināmāni ukkaṭṭhāni. Kosiyādigottaṃ hīnaṃ, gotamādigottaṃ ukkaṭṭhaṃ. Kammesu vaḍḍhakimaṇikārādikammāni hīnāni, kasivāṇijjāgorakkhakammāni ukkaṭṭhāni. Sippesu naḷakārakumbhakārādisippaṃ hīnaṃ, muddāgaṇanādisippaṃ ukkaṭṭhaṃ. Ābādhesu sabbepi ābādhā hīnā, apica madhumeho pīḷājanakattābhāvā ukkaṭṭho. Liṅgesu atidīghatādayo hīnā, nātidīghatādayo ukkaṭṭhā. Sabbepi kilesā hīnā. Sabbāpattiyopi hīnā, apica sotāpattisamāpatti ukkaṭṭhā. Akkosesu ‘‘oṭṭhosi meṇḍosi goṇosī’’tiādiko hīno, ‘‘paṇḍitosi byattosī’’tiādiko ukkaṭṭho.

    অঞ্ঞত্রঞ্ঞাপদেসেনাতি পরিযাযকথনেন ৰিনা। ওমসন্তস্সাতি ৰচনপতোদেন ওৰিজ্ঝন্তস্স। সম্বুদ্ধেন পকাসিতাতি ‘‘চণ্ডালোসি ৰেনোসি নেসাদোসি রথকারোসি পুক্কুসোসী’তি ভণতি, আপত্তি ৰাচায ৰাচায পাচিত্তিযস্সা’’তি সামং সব্বধম্মাৰবোধতো ‘‘সম্বুদ্ধো’’তি পঞ্ঞাতেন ভগৰতা দেসিতা।

    Aññatraññāpadesenāti pariyāyakathanena vinā. Omasantassāti vacanapatodena ovijjhantassa. Sambuddhena pakāsitāti ‘‘caṇḍālosi venosi nesādosi rathakārosi pukkusosī’ti bhaṇati, āpatti vācāya vācāya pācittiyassā’’ti sāmaṃ sabbadhammāvabodhato ‘‘sambuddho’’ti paññātena bhagavatā desitā.

    ৮৯৪. তেহেৰাতি জাতিআদীহি অক্কোসৰত্থূহেৰ। অঞ্ঞাপদেসেন ভূতেন ৰা…পে॰… আপন্নমেৰ ৰা অনুপসম্পন্নং অক্কোসন্তস্স দুক্কটং সম্বুদ্ধেন পকাসিতন্তি সম্বন্ধো। ইধ ভূতাভূতপদানি তেহীতি অপেক্খিত্ৰা বহুৰচনন্তানি যোজেতব্বানি। এতেন ‘‘সন্তি ইধেকচ্চে’’তিআদিদুতিযৰারত্থং (পাচি॰ ২৬) দস্সেন্তেন দুক্কটসাধনত্থেন তদেককারিযং ততিযং যেনূনৰারঞ্চ চতুত্থং ন মযন্তিআদিৰারঞ্চ সঙ্গহিতন্তি দট্ঠব্বং। যথাহ অট্ঠকথাযং ‘‘সন্তি ইধেকচ্চে’তি ৰারে পন পরিহরিত্ৰা ৰুত্তভাৰেন দুক্কটং। এসেৰ নযো ‘যেনূন…পে॰… ন ময’ন্তি ৰারেসুপী’’তি (পাচি॰ অট্ঠ॰ ২৬)।

    894.Tehevāti jātiādīhi akkosavatthūheva. Aññāpadesena bhūtena vā…pe… āpannameva vā anupasampannaṃ akkosantassa dukkaṭaṃ sambuddhena pakāsitanti sambandho. Idha bhūtābhūtapadāni tehīti apekkhitvā bahuvacanantāni yojetabbāni. Etena ‘‘santi idhekacce’’tiādidutiyavāratthaṃ (pāci. 26) dassentena dukkaṭasādhanatthena tadekakāriyaṃ tatiyaṃ yenūnavārañca catutthaṃ na mayantiādivārañca saṅgahitanti daṭṭhabbaṃ. Yathāha aṭṭhakathāyaṃ ‘‘santi idhekacce’ti vāre pana pariharitvā vuttabhāvena dukkaṭaṃ. Eseva nayo ‘yenūna…pe… na maya’nti vāresupī’’ti (pāci. aṭṭha. 26).

    পাল়িমুত্তপদেহিপীতি এত্থাপি তথেৰ ‘‘ভূতেন ৰা’’তিআদীনি পদানি সম্বন্ধিতব্বানি। ‘‘চোরোসি, গণ্ঠিভেদকোসী’’তিআদি পাল়িমুত্তপদং নাম। সব্বত্থাতি সব্বেসু চতূসু ৰারেসু, পাল়িমুত্তপদেসু চ। ৰুত্তঞ্হি ‘‘অনুপসম্পন্নে পন চতূসুপি ৰারেসু দুক্কটমেৰ। ‘চোরোসি, গণ্ঠিভেদকোসী’তিআদিৰচনেহি পন উপসম্পন্নেপি অনুপসম্পন্নেপি সব্বৰারেসু দুক্কটমেৰা’’তি (পাচি॰ অট্ঠ॰ ২৬)। ‘‘অনুপসম্পন্ন’’ন্তি ইমিনা ‘‘ইমস্মিঞ্চ সিক্খাপদে ঠপেত্ৰা ভিক্খুং ভিক্খুনিআদযো সব্বে সত্তা অনুপসম্পন্নট্ঠানে ঠিতা’’তি (পাচি॰ অট্ঠ॰ ২৬) অট্ঠকথাযং ৰুত্তা অনুপসম্পন্না সঙ্গহিতা। তেনেৰেত্থাপি ৰক্খতি ‘‘পৰিট্ঠানুপসম্পন্নট্ঠানে ইধ চ ভিক্খুনী’’তি।

    Pāḷimuttapadehipīti etthāpi tatheva ‘‘bhūtena vā’’tiādīni padāni sambandhitabbāni. ‘‘Corosi, gaṇṭhibhedakosī’’tiādi pāḷimuttapadaṃ nāma. Sabbatthāti sabbesu catūsu vāresu, pāḷimuttapadesu ca. Vuttañhi ‘‘anupasampanne pana catūsupi vāresu dukkaṭameva. ‘Corosi, gaṇṭhibhedakosī’tiādivacanehi pana upasampannepi anupasampannepi sabbavāresu dukkaṭamevā’’ti (pāci. aṭṭha. 26). ‘‘Anupasampanna’’nti iminā ‘‘imasmiñca sikkhāpade ṭhapetvā bhikkhuṃ bhikkhuniādayo sabbe sattā anupasampannaṭṭhāne ṭhitā’’ti (pāci. aṭṭha. 26) aṭṭhakathāyaṃ vuttā anupasampannā saṅgahitā. Tenevetthāpi vakkhati ‘‘paviṭṭhānupasampannaṭṭhāne idha ca bhikkhunī’’ti.

    ৮৯৫. দৰকম্যতাতি এত্থ ‘‘পটিসঙ্খা যোনিসো’’তিআদীসু (ম॰ নি॰ ১.২২, ২৩, ৪২২; অ॰ নি॰ ৬.৫৮; ৯.৯; মহানি॰ ২০৬; ৰিভ॰ ৫১৮) ৰিয য-কারলোপো। সব্বত্থাতি সব্বেসু ৰুত্তপাচিত্তিযৰত্থূসু চ দুক্কটৰত্থূসু চাতি সব্বত্থেৰ। দুব্ভাসিতমুদীরিতন্তি ‘‘চণ্ডালোসি…পে॰… পুক্কুসোসী’তি ভণতি, আপত্তি ৰাচায ৰাচায দুব্ভাসিতস্সা’’তি (পাচি॰ ৩২) ৰুত্তন্তি অত্থো। পরম্মুখা পন পাচিত্তিযৰত্থূহি চ দুক্কটৰত্থূহি চ অক্কোসনে দুক্কটমেৰ। তথা দৰকম্যতায পরম্মুখা ৰদন্তস্সাপি দুব্ভাসিতমেৰাতি আচরিযা ৰদন্তি।

    895.Davakamyatāti ettha ‘‘paṭisaṅkhā yoniso’’tiādīsu (ma. ni. 1.22, 23, 422; a. ni. 6.58; 9.9; mahāni. 206; vibha. 518) viya ya-kāralopo. Sabbatthāti sabbesu vuttapācittiyavatthūsu ca dukkaṭavatthūsu cāti sabbattheva. Dubbhāsitamudīritanti ‘‘caṇḍālosi…pe… pukkusosī’ti bhaṇati, āpatti vācāya vācāya dubbhāsitassā’’ti (pāci. 32) vuttanti attho. Parammukhā pana pācittiyavatthūhi ca dukkaṭavatthūhi ca akkosane dukkaṭameva. Tathā davakamyatāya parammukhā vadantassāpi dubbhāsitamevāti ācariyā vadanti.

    ৮৯৬-৭. অত্থং পুরক্খত্ৰা ৰদতো ভিক্খুস্স অনাপত্তীতি যোজনা। ধম্মো নাম ‘‘চণ্ডালোসী’’তিআদিপাল়িযেৰ। যথাহ অট্ঠকথাযং ‘‘পাল়িং ৰাচেন্তো ধম্মপুরেক্খারো’’তি (পাচি॰ অট্ঠ॰ ৩৫)। অনুসাসনী নাম ‘‘ইদানিপি চণ্ডালোসি, মা পাপধম্মং অকাসি, মা তমো তমপরাযনো অহোসী’’তিআদিনা (পাচি॰ অট্ঠ॰ ৩৫) নযেন অট্ঠকথাযং ৰুত্তসরূপাযেৰ অনুসাসনীপুরেক্খতায ঠত্ৰা ৰদন্তস্স চিত্তস্স লহুপরিৰত্তিতভাৰতো অন্তরা কোধে উপ্পন্নেপি অনাপত্তি।

    896-7. Atthaṃ purakkhatvā vadato bhikkhussa anāpattīti yojanā. Dhammo nāma ‘‘caṇḍālosī’’tiādipāḷiyeva. Yathāha aṭṭhakathāyaṃ ‘‘pāḷiṃ vācento dhammapurekkhāro’’ti (pāci. aṭṭha. 35). Anusāsanī nāma ‘‘idānipi caṇḍālosi, mā pāpadhammaṃ akāsi, mā tamo tamaparāyano ahosī’’tiādinā (pāci. aṭṭha. 35) nayena aṭṭhakathāyaṃ vuttasarūpāyeva anusāsanīpurekkhatāya ṭhatvā vadantassa cittassa lahuparivattitabhāvato antarā kodhe uppannepi anāpatti.

    এত্থাতি ইমস্মিং ওমসৰাদসিক্খাপদে। পটিঘসম্পযুত্তচিত্তেনেৰ আপজ্জিতব্বত্তা মানসিকদুক্খৰেদনাৰ হোতি।

    Etthāti imasmiṃ omasavādasikkhāpade. Paṭighasampayuttacitteneva āpajjitabbattā mānasikadukkhavedanāva hoti.

    ওমসৰাদকথাৰণ্ণনা।

    Omasavādakathāvaṇṇanā.

    ৮৯৮. দুৰিধাকারতো ভিক্খুপেসুঞ্ঞে আপত্তি সিযাতি যোজনা। পিসতীতি পিসুণা, ৰাচা , সমগ্গে সত্তে অৰযৰভূতে ৰগ্গে ভিন্নে করোতীতি অত্থো। পিসুণা এৰ পেসুঞ্ঞং, তায ৰাচায সমন্নাগতো পুগ্গলো সহচরিযনযেন পিসুণো, তস্স কম্মং পেসুঞ্ঞং, ভিক্খূনং পেসুঞ্ঞং ভিক্খুপেসুঞ্ঞং, তস্মিং ভিক্খুপেসুঞ্ঞে। পদভাজনে ‘‘উপসম্পন্নো উপসম্পন্নস্স সুত্ৰা উপসম্পন্নস্স পেসুঞ্ঞং উপসংহরতি ‘ইত্থন্নামো তং ‘চণ্ডালো…পে॰… পুক্কুসো’তি ভণতী’তি আপত্তি…পে॰… পাচিত্তিযস্সা’’তি (পাচি॰ ৩৯) ৰুত্তত্তা সযং উপসম্পন্নো হুত্ৰা উপসম্পন্নস্স জাতিআদীসু দসসু অক্কোসৰত্থূসু অঞ্ঞতরেন অঞ্ঞং উপসম্পন্নং পরম্মুখা অক্কোসন্তস্স সুত্ৰা তস্স সন্তিকং গন্ত্ৰা ৰক্খমানসরূপেসু অত্তনো পিযকামতাভেদাধিপ্পাযসঙ্খাতেসু দ্ৰীসু কারণেসু অঞ্ঞতরকারণং পটিচ্চ ‘‘অসুকো তুয্হং এৰং ৰদতী’’তি পেসুঞ্ঞং হরতি, তস্স পেসুঞ্ঞকথননিমিত্তং পাচিত্তিযং হোতীতি অত্থো।

    898. Duvidhākārato bhikkhupesuññe āpatti siyāti yojanā. Pisatīti pisuṇā, vācā , samagge satte avayavabhūte vagge bhinne karotīti attho. Pisuṇā eva pesuññaṃ, tāya vācāya samannāgato puggalo sahacariyanayena pisuṇo, tassa kammaṃ pesuññaṃ, bhikkhūnaṃ pesuññaṃ bhikkhupesuññaṃ, tasmiṃ bhikkhupesuññe. Padabhājane ‘‘upasampanno upasampannassa sutvā upasampannassa pesuññaṃ upasaṃharati ‘itthannāmo taṃ ‘caṇḍālo…pe… pukkuso’ti bhaṇatī’ti āpatti…pe… pācittiyassā’’ti (pāci. 39) vuttattā sayaṃ upasampanno hutvā upasampannassa jātiādīsu dasasu akkosavatthūsu aññatarena aññaṃ upasampannaṃ parammukhā akkosantassa sutvā tassa santikaṃ gantvā vakkhamānasarūpesu attano piyakāmatābhedādhippāyasaṅkhātesu dvīsu kāraṇesu aññatarakāraṇaṃ paṭicca ‘‘asuko tuyhaṃ evaṃ vadatī’’ti pesuññaṃ harati, tassa pesuññakathananimittaṃ pācittiyaṃ hotīti attho.

    দুৰিধাকারতোতি এত্থ আকার-সদ্দো কারণপরিযাযো। যথাহ অট্ঠকথাযং ‘‘দ্ৰীহাকারেহীতি দ্ৰীহি কারণেহী’’তি (পাচি॰ অট্ঠ॰ ৩৮)। এত্থ কারণং নাম অধিপ্পাযৰিসেসো। তং কারণং অধিপ্পাযমুখেন দস্সেতুমাহ ‘‘অত্তনো’’তিআদি। অত্তনো পিযকামস্সাতি অত্তনো পিযভাৰকামস্স পেসুঞ্ঞং ভণন্তস্স, অত্তনো পিযভাৰং কামযন্তস্সাতি অত্থো, তাদিসেন অধিপ্পাযেনাতি ৰুত্তং হোতি। যথাহ অট্ঠকথাযং ‘‘এৰং অহং এতস্স পিযো ভৰিস্সামী’’তি অত্তনো পিযভাৰং পত্থযমানস্সা’’তি (পাচি॰ অট্ঠ॰ ৩৮)। পরভেদত্থিনোপি ৰাতি অক্কোসকস্স চ অত্তনো পেসুঞ্ঞৰচনং সুণন্তস্স চাতি উভিন্নং ভেদং ইচ্ছন্তস্সাতি অত্থো, ভেদাধিপ্পাযেনাতি ৰুত্তং হোতি। যথাহ অট্ঠকথাযং ‘‘পরস্স পরেন ভেদং ইচ্ছন্তস্সা’’তি (পাচি॰ অট্ঠ॰ ৩৮)।

    Duvidhākāratoti ettha ākāra-saddo kāraṇapariyāyo. Yathāha aṭṭhakathāyaṃ ‘‘dvīhākārehīti dvīhi kāraṇehī’’ti (pāci. aṭṭha. 38). Ettha kāraṇaṃ nāma adhippāyaviseso. Taṃ kāraṇaṃ adhippāyamukhena dassetumāha ‘‘attano’’tiādi. Attano piyakāmassāti attano piyabhāvakāmassa pesuññaṃ bhaṇantassa, attano piyabhāvaṃ kāmayantassāti attho, tādisena adhippāyenāti vuttaṃ hoti. Yathāha aṭṭhakathāyaṃ ‘‘evaṃ ahaṃ etassa piyo bhavissāmī’’ti attano piyabhāvaṃ patthayamānassā’’ti (pāci. aṭṭha. 38). Parabhedatthinopi vāti akkosakassa ca attano pesuññavacanaṃ suṇantassa cāti ubhinnaṃ bhedaṃ icchantassāti attho, bhedādhippāyenāti vuttaṃ hoti. Yathāha aṭṭhakathāyaṃ ‘‘parassa parena bhedaṃ icchantassā’’ti (pāci. aṭṭha. 38).

    ৮৯৯. পরিযাযনযেন অক্কোসন্তস্স ৰচনস্স…পে॰… দুক্কটন্তি যোজনা, পরিযাযঅক্কোসৰচনং সুত্ৰা পরস্স সন্তিকং গন্ত্ৰা ৰদন্তস্স ভিক্খুনো দুক্কটং হোতীতি অত্থো। যথাহ ‘‘ইত্থন্নামো সন্তি ইধেকচ্চে চণ্ডালা…পে॰… ভণতি, ন সো অঞ্ঞং ভণতি, তংযেৰ ভণতীতি আপত্তি ৰাচায ৰাচায দুক্কটস্সা’’তিআদি (পাচি॰ ৪১)। পাল়িমুত্তনযেন অক্কোসন্তস্স ৰচনস্স…পে॰… দুক্কটন্তি যোজনা। এত্থ ‘‘চোরোসি, গণ্ঠিভেদকোসী’’তিআদিনা দস্সিতো পাল়িমুত্তনযো নাম।

    899. Pariyāyanayena akkosantassa vacanassa…pe… dukkaṭanti yojanā, pariyāyaakkosavacanaṃ sutvā parassa santikaṃ gantvā vadantassa bhikkhuno dukkaṭaṃ hotīti attho. Yathāha ‘‘itthannāmo santi idhekacce caṇḍālā…pe… bhaṇati, na so aññaṃ bhaṇati, taṃyeva bhaṇatīti āpatti vācāya vācāya dukkaṭassā’’tiādi (pāci. 41). Pāḷimuttanayena akkosantassa vacanassa…pe… dukkaṭanti yojanā. Ettha ‘‘corosi, gaṇṭhibhedakosī’’tiādinā dassito pāḷimuttanayo nāma.

    ৯০০. অনুপসম্পন্নস্স অক্কোসং উপসম্পন্নং হরতোপি চ তথা দুক্কটন্তি যোজনা। চ-সদ্দেন উপসম্পন্নস্স অক্কোসং অনুপসম্পন্নং হরতোপি চ, অনুপসম্পন্নস্স অক্কোসং অনুপসম্পন্নং হরতোপি চ তথা দুক্কটন্তি ৰিকপ্পদ্ৰযঞ্চ সমুচ্চিনোতি। ‘‘ইধাপি ভিক্খুনিং আদিং কত্ৰা সব্বে অনুপসম্পন্না নামা’’তি (পাচি॰ অট্ঠ॰ ৩৮) অট্ঠকথাৰচনতো ‘‘ভিক্খুনী’’তি উপলক্খণং।

    900. Anupasampannassa akkosaṃ upasampannaṃ haratopi ca tathā dukkaṭanti yojanā. Ca-saddena upasampannassa akkosaṃ anupasampannaṃ haratopi ca, anupasampannassa akkosaṃ anupasampannaṃ haratopi ca tathā dukkaṭanti vikappadvayañca samuccinoti. ‘‘Idhāpi bhikkhuniṃ ādiṃ katvā sabbe anupasampannā nāmā’’ti (pāci. aṭṭha. 38) aṭṭhakathāvacanato ‘‘bhikkhunī’’ti upalakkhaṇaṃ.

    ৯০১. ন চেৰ পিযকামস্সাতি পিযভাৰং অকামযন্তস্স চ। ন ভেদত্থিনোপি চাতি ভেদং অনিচ্ছন্তস্স চ। পাপানং গরহত্থাযাতি এত্থ ‘‘কেৰল’’ন্তি সেসো। যথাহ অট্ঠকথাযং ‘‘একং অক্কোসন্তং, একঞ্চ খমন্তং দিস্ৰা ‘অহো নিল্লজ্জো, ঈদিসম্পি নাম আযস্মন্তং পুন ৰত্তব্বং মঞ্ঞিস্সতী’তি এৰং কেৰলং পাপগরহিতায ভণন্তস্স অনাপত্তী’’তি (পাচি॰ অট্ঠ॰ ৩৮)।

    901.Na ceva piyakāmassāti piyabhāvaṃ akāmayantassa ca. Na bhedatthinopi cāti bhedaṃ anicchantassa ca. Pāpānaṃ garahatthāyāti ettha ‘‘kevala’’nti seso. Yathāha aṭṭhakathāyaṃ ‘‘ekaṃ akkosantaṃ, ekañca khamantaṃ disvā ‘aho nillajjo, īdisampi nāma āyasmantaṃ puna vattabbaṃ maññissatī’ti evaṃ kevalaṃ pāpagarahitāya bhaṇantassa anāpattī’’ti (pāci. aṭṭha. 38).

    পেসুঞ্ঞকথাৰণ্ণনা।

    Pesuññakathāvaṇṇanā.

    ৯০৩. অঞ্ঞেনাতি সামণেরাদিনা। ‘‘যঞ্চ পদং যঞ্চ অনুপদং যঞ্চ অন্ৰক্খরং যঞ্চ অনুব্যঞ্জনং, সব্বমেতং পদসো নামা’’তি (পাচি॰ ৪৬) পদভাজনে ৰুত্তত্তা অৰযৰে সমুদাযোপচারৰসেন ‘‘পিটকত্তয’’ন্তি তদেকদেসপদাদি এৰ ৰুত্তোতি গহেতব্বো। এত্থ পদাদিসরূপং অট্ঠকথায ৰেদিতব্বং। ৰুত্তঞ্হি তত্থ ‘‘পদন্তি একো গাথাপাদো অধিপ্পেতো। অনুপদন্তি দুতিযো পাদো। অন্ৰক্খরন্তি একেকমক্খরং। অনুব্যঞ্জনন্তি পুরিমব্যঞ্জনেন সদিসং পচ্ছাব্যঞ্জন’’ন্তি (পাচি॰ অট্ঠ॰ ৪৫)। ইদং গাথামযদেসনং সন্ধায ৰুত্তং। ‘‘যং কিঞ্চি ৰা একমক্খরং অন্ৰক্খরং, অক্খরসমূহো অনুব্যঞ্জনং, অক্খরানুব্যঞ্জনসমূহো পদং, পঠমপদং পদমেৰ, দুতিযং অনুপদন্তি এৰমেত্থ নানাকরণং ৰেদিতব্ব’’ন্তিপি (পাচি॰ অট্ঠ॰ ৪৫) ৰুত্তং। ইদং চুণ্ণিযদেসনং সন্ধায ৰুত্তং।

    903.Aññenāti sāmaṇerādinā. ‘‘Yañca padaṃ yañca anupadaṃ yañca anvakkharaṃ yañca anubyañjanaṃ, sabbametaṃ padaso nāmā’’ti (pāci. 46) padabhājane vuttattā avayave samudāyopacāravasena ‘‘piṭakattaya’’nti tadekadesapadādi eva vuttoti gahetabbo. Ettha padādisarūpaṃ aṭṭhakathāya veditabbaṃ. Vuttañhi tattha ‘‘padanti eko gāthāpādo adhippeto. Anupadanti dutiyo pādo. Anvakkharanti ekekamakkharaṃ. Anubyañjananti purimabyañjanena sadisaṃ pacchābyañjana’’nti (pāci. aṭṭha. 45). Idaṃ gāthāmayadesanaṃ sandhāya vuttaṃ. ‘‘Yaṃ kiñci vā ekamakkharaṃ anvakkharaṃ, akkharasamūho anubyañjanaṃ, akkharānubyañjanasamūho padaṃ, paṭhamapadaṃ padameva, dutiyaṃ anupadanti evamettha nānākaraṇaṃ veditabba’’ntipi (pāci. aṭṭha. 45) vuttaṃ. Idaṃ cuṇṇiyadesanaṃ sandhāya vuttaṃ.

    ধম্মন্তি বুদ্ধভাসিতাদিপাল়িধম্মং। পটিসম্ভিদাযঞ্হি ধম্মপঞ্চকে পাল়িপি ধম্মোতি ৰুত্তা। ধম্মপঞ্চকং নাম ফলনিব্বত্তকো হেতু, অরিযমগ্গো, ভাসিতং, কুসলাকুসলং চেতি এতে ধম্মসঞ্ঞিতাতি নিদ্দিট্ঠং। এত্থ হি ভাসিতন্তি পাল়ি ৰুত্তা। অট্ঠকথানিস্সিতোপি এত্থেৰ সঙ্গহং গচ্ছতি। সো চ পুব্বে মগধভাসায ঠিতো সঙ্গীতিত্তযারুল়্হো গহেতব্বো।

    Dhammanti buddhabhāsitādipāḷidhammaṃ. Paṭisambhidāyañhi dhammapañcake pāḷipi dhammoti vuttā. Dhammapañcakaṃ nāma phalanibbattako hetu, ariyamaggo, bhāsitaṃ, kusalākusalaṃ ceti ete dhammasaññitāti niddiṭṭhaṃ. Ettha hi bhāsitanti pāḷi vuttā. Aṭṭhakathānissitopi ettheva saṅgahaṃ gacchati. So ca pubbe magadhabhāsāya ṭhito saṅgītittayāruḷho gahetabbo.

    ‘‘সহ ভণন্তস্স পাচিত্তিযং সিযা’’তি ইমিনা ‘‘একতো পট্ঠপেত্ৰা একতো ওসাপেন্তী’’তিআদিনা (পাচি॰ ৪৬) পদভাজনাগতনযেন অনুপসম্পন্নেন সদ্ধিং আরভিত্ৰা একতো উচ্চারণৰসেন পদং ৰা অনুপদং ৰা অন্ৰক্খরং ৰা অনুব্যঞ্জনং ৰা ৰদতো পদাদিগণনাৰসেন পাচিত্তিযন্তি ৰুত্তং হোতি।

    ‘‘Saha bhaṇantassa pācittiyaṃ siyā’’ti iminā ‘‘ekato paṭṭhapetvā ekato osāpentī’’tiādinā (pāci. 46) padabhājanāgatanayena anupasampannena saddhiṃ ārabhitvā ekato uccāraṇavasena padaṃ vā anupadaṃ vā anvakkharaṃ vā anubyañjanaṃ vā vadato padādigaṇanāvasena pācittiyanti vuttaṃ hoti.

    ৯০৪. সঙ্গীতিং অনারুল়্হেসু ধম্মেসু রাজোৰাদাদযো সুত্তন্তা আপত্তিজনকাযেৰাতি মহাপচ্চরিযাদিসু ৰুত্তাতি যোজনা। রাজোৰাদো নাম একো সুত্তন্তো। আদি-সদ্দেন তিক্খিন্দ্রিযাদিসুত্তন্তা গহিতা।

    904.Saṅgītiṃ anāruḷhesu dhammesu rājovādādayo suttantā āpattijanakāyevāti mahāpaccariyādisu vuttāti yojanā. Rājovādo nāma eko suttanto. Ādi-saddena tikkhindriyādisuttantā gahitā.

    ৯০৫. ভিক্খুস্মিম্পি ভিক্খুনিযাপি চ অনুপসম্পন্নসঞ্ঞিনো, ৰিমতিস্স ৰা ভিক্খুস্স তথা পদসোধম্মে দুক্কটং হোতীতি যোজনা।

    905. Bhikkhusmimpi bhikkhuniyāpi ca anupasampannasaññino, vimatissa vā bhikkhussa tathā padasodhamme dukkaṭaṃ hotīti yojanā.

    ৯০৬-৭. একতো উদ্দিসাপেতীতি একতো উদ্দেসং গণ্হন্তেহি অনুপসম্পন্নেহি সদ্ধিং উচ্চারণৰসেন উদ্দিসাপেতি। সজ্ঝাযং ৰা করোতীতি তথা একতো সজ্ঝাযতি।

    906-7.Ekato uddisāpetīti ekato uddesaṃ gaṇhantehi anupasampannehi saddhiṃ uccāraṇavasena uddisāpeti. Sajjhāyaṃ vā karotīti tathā ekato sajjhāyati.

    ‘‘সচে একগাথায একো পাদো ন আগচ্ছতি, সেসং আগচ্ছতি, অযং যেভুয্যেন পগুণগন্থো নাম। এস নযো সুত্তেপি ৰেদিতব্বোতী’’তি (পাচি॰ অট্ঠ॰ ৪৮) অট্ঠকথাৰচনতো পগুণগন্থন্তি এত্থ ‘‘যেভুয্যেনা’’তি সেসো। ওপাতেতীতি ‘‘এৰং ভণাহী’’তি একতো ভণতি। উদ্দেসন্তি উদ্দিসিতব্বং। তেনাতি অনুপসম্পন্নেন।

    ‘‘Sace ekagāthāya eko pādo na āgacchati, sesaṃ āgacchati, ayaṃ yebhuyyena paguṇagantho nāma. Esa nayo suttepi veditabbotī’’ti (pāci. aṭṭha. 48) aṭṭhakathāvacanato paguṇaganthanti ettha ‘‘yebhuyyenā’’ti seso. Opātetīti ‘‘evaṃ bhaṇāhī’’ti ekato bhaṇati. Uddesanti uddisitabbaṃ. Tenāti anupasampannena.

    ৯০৮. যস্মা ইদং পদসোধম্মসিক্খাপদং ৰাচতো চ সমুট্ঠাতি, ৰাচাচিত্তদ্ৰযাপি চ সমুট্ঠাতি, তস্মা ইদং সমুট্ঠানং পদসোধম্মসঞ্ঞিতন্তি ৰুত্তন্তি যোজনা।

    908. Yasmā idaṃ padasodhammasikkhāpadaṃ vācato ca samuṭṭhāti, vācācittadvayāpi ca samuṭṭhāti, tasmā idaṃ samuṭṭhānaṃ padasodhammasaññitanti vuttanti yojanā.

    পদসোধম্মকথাৰণ্ণনা।

    Padasodhammakathāvaṇṇanā.

    ৯০৯-১০. সব্বচ্ছন্নসব্বপরিচ্ছন্নে সেনাসনে তিস্সন্নং পন রত্তীনং যো পন ভিক্খু রত্তিযং ঠপেত্ৰা ভিক্খুং অঞ্ঞেন সচে নিপজ্জেয্য, তস্স পাচিত্তিযং সিযাতি যোজনা। ‘‘যং কিঞ্চি পটিচ্ছাদনসমত্থং ইধ ছদনঞ্চ পরিচ্ছন্নঞ্চ ৰেদিতব্ব’’ন্তি (পাচি॰ অট্ঠ॰ ৫১) অট্ঠকথাযং ৰুত্তত্তা ছদনারহং ইট্ঠকাসিলাসুধাতিণপণ্ণাদীনং যেন কেনচি সব্বসো ছাদিতং সেনাসনং সব্বচ্ছন্নং। ‘‘ভূমিতো পট্ঠায যাৰ ছদনং আহচ্চ পাকারেন ৰা অঞ্ঞেন ৰা কেনচি অন্তমসো ৰত্থেনপি পরিক্খিত্ত’’ন্তি (পাচি॰ অট্ঠ॰ ৫১) অট্ঠকথাযং ৰুত্তত্তা যেন কেনচি পরিক্খিপিত্ৰা পটিচ্ছাদিতসেনাসনং সব্বপরিচ্ছন্নং। ‘‘ছদনং অনাহচ্চ সব্বন্তিমেন পরিযাযেন দিযড্ঢহত্থুব্বেধেন পাকারাদিনা পরিক্খিত্তাপি সব্বপরিচ্ছন্নাযেৰা’’তি (পাচি॰ অট্ঠ॰ ৫১) কুরুন্দট্ঠকথাযং ৰুত্তং, তং ‘‘দিযড্ঢা’’তিআদিনা ৰক্খতি।

    909-10. Sabbacchannasabbaparicchanne senāsane tissannaṃ pana rattīnaṃ yo pana bhikkhu rattiyaṃ ṭhapetvā bhikkhuṃ aññena sace nipajjeyya, tassa pācittiyaṃ siyāti yojanā. ‘‘Yaṃ kiñci paṭicchādanasamatthaṃ idha chadanañca paricchannañca veditabba’’nti (pāci. aṭṭha. 51) aṭṭhakathāyaṃ vuttattā chadanārahaṃ iṭṭhakāsilāsudhātiṇapaṇṇādīnaṃ yena kenaci sabbaso chāditaṃ senāsanaṃ sabbacchannaṃ. ‘‘Bhūmito paṭṭhāya yāva chadanaṃ āhacca pākārena vā aññena vā kenaci antamaso vatthenapi parikkhitta’’nti (pāci. aṭṭha. 51) aṭṭhakathāyaṃ vuttattā yena kenaci parikkhipitvā paṭicchāditasenāsanaṃ sabbaparicchannaṃ. ‘‘Chadanaṃ anāhacca sabbantimena pariyāyena diyaḍḍhahatthubbedhena pākārādinā parikkhittāpi sabbaparicchannāyevā’’ti (pāci. aṭṭha. 51) kurundaṭṭhakathāyaṃ vuttaṃ, taṃ ‘‘diyaḍḍhā’’tiādinā vakkhati.

    এৰং সব্বচ্ছন্নসব্বপরিচ্ছন্নে একস্মিং সেনাসনে যো ভিক্খু উপসম্পন্নতো অঞ্ঞেন একেন ৰা অনেকেহি ৰা তিরত্তং সহসেয্যং কপ্পেত্ৰা চতুত্থরত্তিং আদিং কত্ৰা সব্বরত্তীসু সূরিযত্থঙ্গমতো পট্ঠায সকলরত্তিযং পঠমং ৰা পচ্ছা ৰা অপুব্বাচরিমং ৰা পিট্ঠিং পসারেত্ৰা সচে একসেনাসনে সেয্যং কপ্পেতি, তস্স দেৰসিকং পাচিত্তিযং হোতীতি ইদং ৰিধানং ‘‘অপিচেত্থ একাৰাসাদিকম্পি চতুক্কং ৰেদিতব্ব’’ন্তিআদিনা (পাচি॰ অট্ঠ॰ ৫১) অট্ঠকথাযং ৰুত্তং।

    Evaṃ sabbacchannasabbaparicchanne ekasmiṃ senāsane yo bhikkhu upasampannato aññena ekena vā anekehi vā tirattaṃ sahaseyyaṃ kappetvā catuttharattiṃ ādiṃ katvā sabbarattīsu sūriyatthaṅgamato paṭṭhāya sakalarattiyaṃ paṭhamaṃ vā pacchā vā apubbācarimaṃ vā piṭṭhiṃ pasāretvā sace ekasenāsane seyyaṃ kappeti, tassa devasikaṃ pācittiyaṃ hotīti idaṃ vidhānaṃ ‘‘apicettha ekāvāsādikampi catukkaṃ veditabba’’ntiādinā (pāci. aṭṭha. 51) aṭṭhakathāyaṃ vuttaṃ.

    ‘‘যেভুয্যেন পরিচ্ছন্নে ছন্নে’’তি ইমিনাপি এৰমেৰ যোজেত্ৰা অত্থো ৰেদিতব্বো। ‘‘যস্সা পন উপরি বহুতরং ঠানং ছন্নং, অপ্পং অচ্ছন্নং, সমন্ততো চ বহুতরং পরিক্খিত্তং, অপ্পং অপরিক্খিত্তং, অযং যেভুয্যেনছন্না যেভুয্যেনপরিচ্ছন্না নামা’’তি (পাচি॰ অট্ঠ॰ ৫১) অট্ঠকথাযং ৰুত্তনযেন যেভুয্যেন ছন্নপরিচ্ছন্নং ৰেদিতব্বং। অত্থো ৰুত্তনযোযেৰ। ‘‘যেভুয্যেন পংসুকা’’তি এতস্স অট্ঠকথাযং (পাচি॰ অট্ঠ॰ ৮৬) তীসু দ্ৰে যেভুয্যং নাম, ইধ পন পদসোধম্মে ‘‘যেভুয্যেন পগুণং গন্থ’’ন্তি এতস্স অট্ঠকথাযং (পাচি॰ অট্ঠ॰ ৪৮) ‘‘একগাথাযা’’তিআদিৰিৰরণে ৰিয চতূসু তযোপি ভাগা যেভুয্যং নামাতি ৰেদিতব্বং।

    ‘‘Yebhuyyena paricchanne channe’’ti imināpi evameva yojetvā attho veditabbo. ‘‘Yassā pana upari bahutaraṃ ṭhānaṃ channaṃ, appaṃ acchannaṃ, samantato ca bahutaraṃ parikkhittaṃ, appaṃ aparikkhittaṃ, ayaṃ yebhuyyenachannā yebhuyyenaparicchannā nāmā’’ti (pāci. aṭṭha. 51) aṭṭhakathāyaṃ vuttanayena yebhuyyena channaparicchannaṃ veditabbaṃ. Attho vuttanayoyeva. ‘‘Yebhuyyena paṃsukā’’ti etassa aṭṭhakathāyaṃ (pāci. aṭṭha. 86) tīsu dve yebhuyyaṃ nāma, idha pana padasodhamme ‘‘yebhuyyena paguṇaṃ gantha’’nti etassa aṭṭhakathāyaṃ (pāci. aṭṭha. 48) ‘‘ekagāthāyā’’tiādivivaraṇe viya catūsu tayopi bhāgā yebhuyyaṃ nāmāti veditabbaṃ.

    ৯১১. মেথুনস্স পহোনকং যং পন ৰত্থু পঠমপারাজিকায নিদ্দিট্ঠং অন্তমসো তিরচ্ছানগতেনপি, তেন পঠমপারাজিকৰত্থুনা পুগ্গলেন সহ নিপজ্জিত্ৰা আপত্তি সহসেয্যাপত্তি হোতীতি যোজনা।

    911. Methunassa pahonakaṃ yaṃ pana vatthu paṭhamapārājikāya niddiṭṭhaṃ antamaso tiracchānagatenapi, tena paṭhamapārājikavatthunā puggalena saha nipajjitvā āpatti sahaseyyāpatti hotīti yojanā.

    ৯১২-৩. ‘‘উভো ৰা নিপজ্জন্তী’’তি ৰিকপ্পস্স পঠমগাথাদ্ৰযেনেৰ অত্থতো দস্সিতত্তা পুব্বাপরিযৰসেনপি সম্ভৰন্তং দস্সেতুং ‘‘অনুপসম্পন্নে’’তিআদিনা (পাচি॰ ৫২-৫৪) নযেন দস্সিতপক্খদ্ৰযং নিদস্সেতুমাহ ‘‘নিপন্নে’’তিআদি। ‘‘উট্ঠহিত্ৰা’’তি ইদং ৰিচ্ছাৰসেন গহেতব্বং। অনুপসম্পন্নগণনাযপি ৰাতি বহূসু অনুপসম্পন্নেসু তেসং গণনায চ। অনুপসম্পন্নেসু বহূসু তেসং গণনায একস্স ভিক্খুনো বহূ আপত্তিযো হোন্তীতি এৰং দস্সনেন উপসম্পন্নেসু বহূসু একস্মিং অনুপসম্পন্নে সতি তেসঞ্চ তস্স পযোগগণনায আপজ্জিতব্বা বহূ আপত্তিযো চ উভোসুপি বহূসু একেকস্সেৰ উপসম্পন্নস্স অনুপসম্পন্নগণনায বহূ আপত্তিযো চ হোন্তীতিপি দস্সিতং হোতি।

    912-3. ‘‘Ubho vā nipajjantī’’ti vikappassa paṭhamagāthādvayeneva atthato dassitattā pubbāpariyavasenapi sambhavantaṃ dassetuṃ ‘‘anupasampanne’’tiādinā (pāci. 52-54) nayena dassitapakkhadvayaṃ nidassetumāha ‘‘nipanne’’tiādi. ‘‘Uṭṭhahitvā’’ti idaṃ vicchāvasena gahetabbaṃ. Anupasampannagaṇanāyapi vāti bahūsu anupasampannesu tesaṃ gaṇanāya ca. Anupasampannesu bahūsu tesaṃ gaṇanāya ekassa bhikkhuno bahū āpattiyo hontīti evaṃ dassanena upasampannesu bahūsu ekasmiṃ anupasampanne sati tesañca tassa payogagaṇanāya āpajjitabbā bahū āpattiyo ca ubhosupi bahūsu ekekasseva upasampannassa anupasampannagaṇanāya bahū āpattiyo ca hontītipi dassitaṃ hoti.

    ৯১৪. একেনেৰ দ্ৰারেন ৰল়ঞ্জিতব্বতো একূপচারে সতগব্ভেপি সেনাসনে উপসম্পন্নো একস্মিং গব্ভে ৰসন্তো অত্তনা সযনগব্ভে দ্ৰারং পিদহিত্ৰা ৰা অপিদহিত্ৰা ৰা চতুত্থরত্তিযং সযতি চে, উপরিমতলে, অৰসেসগব্ভেসু চ সযন্তেহি অনুপসম্পন্নেহি পুব্বে ৰুত্তআপত্তিনিযমোযেৰাতি দস্সনত্থমাহ ‘‘সচে পিধাযা’’তিআদি। গব্ভদ্ৰারং উত্তরপদলোপেন ‘‘গব্ভ’’ন্তি ৰুত্তং। চতুত্থদিৰসে অত্থঙ্গতে সূরিযে নিপজ্জতি, আপত্তি সিযাতি যোজনা। ‘‘অনুপসম্পন্নেন সহা’’তি পকরণতো লব্ভতি। আপত্তি পাচিত্তিযং।

    914. Ekeneva dvārena vaḷañjitabbato ekūpacāre satagabbhepi senāsane upasampanno ekasmiṃ gabbhe vasanto attanā sayanagabbhe dvāraṃ pidahitvā vā apidahitvā vā catuttharattiyaṃ sayati ce, uparimatale, avasesagabbhesu ca sayantehi anupasampannehi pubbe vuttaāpattiniyamoyevāti dassanatthamāha ‘‘sace pidhāyā’’tiādi. Gabbhadvāraṃ uttarapadalopena ‘‘gabbha’’nti vuttaṃ. Catutthadivase atthaṅgate sūriye nipajjati, āpatti siyāti yojanā. ‘‘Anupasampannena sahā’’ti pakaraṇato labbhati. Āpatti pācittiyaṃ.

    ৯১৫. দিযড্ঢহত্থুব্বেধেনাতি ৰড্ঢকিরতনেন দিযড্ঢরতনুব্বেধেন। পাকারো নাম নিট্ঠিতো। চযনং নাম ৰিপ্পকতপাকারোতিপি ৰদন্তি। ইমিনা চ আল়িন্দস্স অগ্গহণত্থং ‘‘দসহত্থুব্বেধাপি জগতি পরিক্খেপসঙ্খ্যং ন গচ্ছতী’’তি (পাচি॰ অট্ঠ॰ ৫১) অট্ঠকথা পমাণন্তি ৰদন্তি। জগতীতি আল়িন্দং। আদি-সদ্দেন ভিত্তিপণ্ণাৰরণাদিগহণং।

    915.Diyaḍḍhahatthubbedhenāti vaḍḍhakiratanena diyaḍḍharatanubbedhena. Pākāro nāma niṭṭhito. Cayanaṃ nāma vippakatapākārotipi vadanti. Iminā ca āḷindassa aggahaṇatthaṃ ‘‘dasahatthubbedhāpi jagati parikkhepasaṅkhyaṃ na gacchatī’’ti (pāci. aṭṭha. 51) aṭṭhakathā pamāṇanti vadanti. Jagatīti āḷindaṃ. Ādi-saddena bhittipaṇṇāvaraṇādigahaṇaṃ.

    ৯১৬. দুস্সকুটিযন্তি ৰত্থকুটিযং।

    916.Dussakuṭiyanti vatthakuṭiyaṃ.

    ৯১৭. ‘‘সব্বচ্ছন্নপরিচ্ছন্নাদিপ্পভেদতো যেভুয্যাদিপ্পভেদতো’’তি আদি-সদ্দো পচ্চেকং যোজেতব্বো। পঠমেন আদি-সদ্দেন সব্বচ্ছন্নযেভুয্যপরিচ্ছন্নসব্বচ্ছন্নউপড্ঢপরিচ্ছন্নসব্বপরিচ্ছন্নযেভুয্যচ্ছন্ন- সব্বপরিচ্ছন্নউপড্ঢচ্ছন্নসঙ্খাতানি চত্তারি সেনাসনানি গহিতানি। গাথায সরূপেন ৰুত্তসব্বচ্ছন্নসব্বপরিচ্ছন্নেন সদ্ধিং পঞ্চ সেনাসনানি দস্সিতানি হোন্তি। দুতিযেন আদি-সদ্দেন যেভুয্যচ্ছন্নযেভুয্যপরিচ্ছন্ন যেভুয্যচ্ছন্নউপড্ঢপরিচ্ছন্ন যেভুয্যপরিচ্ছন্নউপড্ঢচ্ছন্নসঙ্খাতানি তীণি সেনাসনানি গহিতানি। ইমে অট্ঠ ৰিকপ্পা লব্ভন্তি। কস্মা ৰুত্তং ‘‘সত্ত পাচিত্তিযানী’’তি? মহাঅট্ঠকথায ৰুত্তত্তা। যথাহ ‘‘মহাঅট্ঠকথাযং পন ‘সব্বচ্ছন্নে যেভুয্যেনপরিচ্ছন্নে পাচিত্তিযং, সব্বচ্ছন্নে উপড্ঢপরিচ্ছন্নে পাচিত্তিযং, যেভুয্যেনচ্ছন্নে উপড্ঢপরিচ্ছন্নে পাচিত্তিযং, সব্বপরিচ্ছন্নে যেভুয্যেনচ্ছন্নে পাচিত্তিযং, সব্বপরিচ্ছন্নে উপড্ঢচ্ছন্নে পাচিত্তিযং , যেভুয্যেনপরিচ্ছন্নে উপড্ঢচ্ছন্নে পাচিত্তিযং, পাল়িযং ৰুত্তপাচিত্তিযেন সদ্ধিং সত্ত পাচিত্তিযানী’তি ৰুত্ত’’ন্তি (পাচি॰ অট্ঠ॰ ৫৩)।

    917. ‘‘Sabbacchannaparicchannādippabhedato yebhuyyādippabhedato’’ti ādi-saddo paccekaṃ yojetabbo. Paṭhamena ādi-saddena sabbacchannayebhuyyaparicchannasabbacchannaupaḍḍhaparicchannasabbaparicchannayebhuyyacchanna- sabbaparicchannaupaḍḍhacchannasaṅkhātāni cattāri senāsanāni gahitāni. Gāthāya sarūpena vuttasabbacchannasabbaparicchannena saddhiṃ pañca senāsanāni dassitāni honti. Dutiyena ādi-saddena yebhuyyacchannayebhuyyaparicchanna yebhuyyacchannaupaḍḍhaparicchanna yebhuyyaparicchannaupaḍḍhacchannasaṅkhātāni tīṇi senāsanāni gahitāni. Ime aṭṭha vikappā labbhanti. Kasmā vuttaṃ ‘‘satta pācittiyānī’’ti? Mahāaṭṭhakathāya vuttattā. Yathāha ‘‘mahāaṭṭhakathāyaṃ pana ‘sabbacchanne yebhuyyenaparicchanne pācittiyaṃ, sabbacchanne upaḍḍhaparicchanne pācittiyaṃ, yebhuyyenacchanne upaḍḍhaparicchanne pācittiyaṃ, sabbaparicchanne yebhuyyenacchanne pācittiyaṃ, sabbaparicchanne upaḍḍhacchanne pācittiyaṃ , yebhuyyenaparicchanne upaḍḍhacchanne pācittiyaṃ, pāḷiyaṃ vuttapācittiyena saddhiṃ satta pācittiyānī’ti vutta’’nti (pāci. aṭṭha. 53).

    কস্মা পন অট্ঠকথাযং ‘‘অট্ঠ পাচিত্তিযানী’’তি ৰত্ৰা ‘‘সত্তা’’তি গণনপরিচ্ছেদো কতোতি? নিস্সন্দেহে তাৰ ‘‘সেয্যা নাম সব্বচ্ছন্না সব্বপরিচ্ছন্না, যেভুয্যেনচ্ছন্না যেভুয্যেনপরিচ্ছন্না’তি (পাচি॰ ৫২) পাল়িযং আগতেসু দ্ৰীসু ৰিকপ্পেসু একস্মিং ৰুত্তপাচিত্তিযং গহেত্ৰা পাল়িযং ৰুত্তেন পাচিত্তিযেন ‘সত্তা’তি ৰুত্ত’’ন্তি পরিহারো দস্সিতো। সারত্থদীপনিযঞ্চ ‘‘সত্ত পাচিত্তিযানী’তি পাল়িযং ৰুত্তপাচিত্তিযদ্ৰযং সামঞ্ঞতো একত্তেন গহেত্ৰা ৰুত্তং। ৰিসুং পন গয্হমানে সব্বচ্ছন্নে সব্বপরিচ্ছন্নে পাচিত্তিযং, যেভুয্যেনচ্ছন্নে যেভুয্যেনপরিচ্ছন্নে পাচিত্তিযন্তি অট্ঠেৰ পাচিত্তিযানি হোন্তী’’তি (সারত্থ॰ টী॰ পাচিত্তিয ৩.৫৩) পরিহারো ৰুত্তো।

    Kasmā pana aṭṭhakathāyaṃ ‘‘aṭṭha pācittiyānī’’ti vatvā ‘‘sattā’’ti gaṇanaparicchedo katoti? Nissandehe tāva ‘‘seyyā nāma sabbacchannā sabbaparicchannā, yebhuyyenacchannā yebhuyyenaparicchannā’ti (pāci. 52) pāḷiyaṃ āgatesu dvīsu vikappesu ekasmiṃ vuttapācittiyaṃ gahetvā pāḷiyaṃ vuttena pācittiyena ‘sattā’ti vutta’’nti parihāro dassito. Sāratthadīpaniyañca ‘‘satta pācittiyānī’ti pāḷiyaṃ vuttapācittiyadvayaṃ sāmaññato ekattena gahetvā vuttaṃ. Visuṃ pana gayhamāne sabbacchanne sabbaparicchanne pācittiyaṃ, yebhuyyenacchanne yebhuyyenaparicchanne pācittiyanti aṭṭheva pācittiyāni hontī’’ti (sārattha. ṭī. pācittiya 3.53) parihāro vutto.

    সব্বযেভুয্যউপড্ঢপদেসু ছন্নপরিচ্ছন্নপদেহি যোজিতেসু নৰ ৰিকপ্পা সম্ভৰন্তি, তেসু নৰমে উপড্ঢচ্ছন্নউপড্ঢপরিচ্ছন্নৰিকপ্পে দুক্কটস্স দস্সিতত্তা পারিসেসতো ইতরেসু অট্ঠসু অট্ঠ পাচিত্তিযানেৰ সম্ভৰন্তি। অট্ঠকথাযং পন অপ্পকং ঊনমধিকং ৰা গুণনূপগং ন হোতীতি কত্ৰা ‘‘সত্তা‘‘তি ৰুত্তন্তি গহেতব্বং। এত্থাতি ইমস্মিং সিক্খাপদে।

    Sabbayebhuyyaupaḍḍhapadesu channaparicchannapadehi yojitesu nava vikappā sambhavanti, tesu navame upaḍḍhacchannaupaḍḍhaparicchannavikappe dukkaṭassa dassitattā pārisesato itaresu aṭṭhasu aṭṭha pācittiyāneva sambhavanti. Aṭṭhakathāyaṃ pana appakaṃ ūnamadhikaṃ vā guṇanūpagaṃ na hotīti katvā ‘‘sattā‘‘ti vuttanti gahetabbaṃ. Etthāti imasmiṃ sikkhāpade.

    ৯১৮. ‘‘অড্ঢচ্ছন্নে অড্ঢপরিচ্ছন্নে’’তি যোজনা। ‘‘সব্বপরিচ্ছন্নে চূল়চ্ছন্নে’’তি যথাক্কমেন যোজনা। ইমিনা অট্ঠকথাগতেসু পঞ্চসু ৰিকপ্পেসু ততিযৰিকপ্পং দস্সেত্ৰা আদি-সদ্দেন সব্বচ্ছন্নাদযো সেসৰিকপ্পা গহিতা। যথাহ অট্ঠকথাযং ‘‘সব্বচ্ছন্নে চূল়কপরিচ্ছন্নে দুক্কটং, যেভুয্যেনচ্ছন্নে চূল়কপরিচ্ছন্নে দুক্কটং, সব্বপরিচ্ছন্নে চূল়কচ্ছন্নে দুক্কটং, যেভুয্যেনপরিচ্ছন্নে চূল়কচ্ছন্নে দুক্কটং, পাল়িযং আগতদুক্কটেন সহ পঞ্চ দুক্কটানীহি ৰুত্ত’’ন্তি (পাচি॰ অট্ঠ॰ ৫৩)। পাল়িযং আগতদুক্কটং নাম ইমিস্সাযেৰ গাথায আদিম্হিযেৰ ৰুত্তদুক্কটং। যথাহ ‘‘উপড্ঢচ্ছন্নে উপড্ঢপরিচ্ছন্নে আপত্তি দুক্কটস্সা’’তি (পাচি॰ ৫৩)।

    918. ‘‘Aḍḍhacchanne aḍḍhaparicchanne’’ti yojanā. ‘‘Sabbaparicchanne cūḷacchanne’’ti yathākkamena yojanā. Iminā aṭṭhakathāgatesu pañcasu vikappesu tatiyavikappaṃ dassetvā ādi-saddena sabbacchannādayo sesavikappā gahitā. Yathāha aṭṭhakathāyaṃ ‘‘sabbacchanne cūḷakaparicchanne dukkaṭaṃ, yebhuyyenacchanne cūḷakaparicchanne dukkaṭaṃ, sabbaparicchanne cūḷakacchanne dukkaṭaṃ, yebhuyyenaparicchanne cūḷakacchanne dukkaṭaṃ, pāḷiyaṃ āgatadukkaṭena saha pañca dukkaṭānīhi vutta’’nti (pāci. aṭṭha. 53). Pāḷiyaṃ āgatadukkaṭaṃ nāma imissāyeva gāthāya ādimhiyeva vuttadukkaṭaṃ. Yathāha ‘‘upaḍḍhacchanne upaḍḍhaparicchanne āpatti dukkaṭassā’’ti (pāci. 53).

    চূল়চ্ছন্নাদীনি চেত্থ এৰং ৰেদিতব্বানি – যস্স চতূসু ভাগেসু একো ছন্নো, সেসা অচ্ছন্না, ইদং চূল়কচ্ছন্নং। যস্স তীসু ভাগেসু দ্ৰে ছন্না, একো অচ্ছন্নো, ইদং যেভুয্যেনচ্ছন্নং। যস্স দ্ৰীসু ভাগেসু একো ছন্নো, একো অচ্ছন্নো, ইদং উপড্ঢচ্ছন্নং নাম সেনাসনং। চূল়পরিচ্ছন্নাদীনি ইমিনা নযেন ৰেদিতব্বানি। ছন্নাদীহিপীতি সহত্থে করণৰচনং। পি-সদ্দো সমুচ্চযত্থো। সব্বচূল়পরিচ্ছন্নছন্নাদীহি চতূহিপি সহ অড্ঢচ্ছন্নপরিচ্ছন্নে পঞ্চধা দুক্কটং পরিদীপিতন্তি যোজনা।

    Cūḷacchannādīni cettha evaṃ veditabbāni – yassa catūsu bhāgesu eko channo, sesā acchannā, idaṃ cūḷakacchannaṃ. Yassa tīsu bhāgesu dve channā, eko acchanno, idaṃ yebhuyyenacchannaṃ. Yassa dvīsu bhāgesu eko channo, eko acchanno, idaṃ upaḍḍhacchannaṃ nāma senāsanaṃ. Cūḷaparicchannādīni iminā nayena veditabbāni. Channādīhipīti sahatthe karaṇavacanaṃ. Pi-saddo samuccayattho. Sabbacūḷaparicchannachannādīhi catūhipi saha aḍḍhacchannaparicchanne pañcadhā dukkaṭaṃ paridīpitanti yojanā.

    ৯২০. সব্বচ্ছন্নাদিকেতি এত্থ আদি-সদ্দেন ‘‘সব্বপরিচ্ছন্নে সব্বঅচ্ছন্নে যেভুয্যেনঅচ্ছন্নে যেভুয্যেনঅপরিচ্ছন্নে’’তি (পাচি॰ ৫৪) পাল়িযং ৰুত্তা অনাপত্তিৰারসেসা চ অট্ঠকথাযং ৰুত্তা ‘‘উপড্ঢচ্ছন্নে চূল়কপরিচ্ছন্নে, উপড্ঢপরিচ্ছন্নে চূল়কচ্ছন্নে , চূল়কচ্ছন্নে চূল়কপরিচ্ছন্নে’’তি (পাচি॰ অট্ঠ॰ ৫৩) তযো অনাপত্তিৰারা চ গহিতা।

    920.Sabbacchannādiketi ettha ādi-saddena ‘‘sabbaparicchanne sabbaacchanne yebhuyyenaacchanne yebhuyyenaaparicchanne’’ti (pāci. 54) pāḷiyaṃ vuttā anāpattivārasesā ca aṭṭhakathāyaṃ vuttā ‘‘upaḍḍhacchanne cūḷakaparicchanne, upaḍḍhaparicchanne cūḷakacchanne , cūḷakacchanne cūḷakaparicchanne’’ti (pāci. aṭṭha. 53) tayo anāpattivārā ca gahitā.

    ৯২১. নিপন্নেপীতি এত্থ পি-সদ্দেন ‘‘ভিক্খু নিপন্নে অনুপসম্পন্নো নিসীদতি, উভো ৰা নিসীদন্তী’’তি (পাচি॰ ৫৪) পাল়িযং ৰুত্তপকারন্তরে সমুচ্চিনোতি।

    921.Nipannepīti ettha pi-saddena ‘‘bhikkhu nipanne anupasampanno nisīdati, ubho vā nisīdantī’’ti (pāci. 54) pāḷiyaṃ vuttapakārantare samuccinoti.

    সহসেয্যকথাৰণ্ণনা।

    Sahaseyyakathāvaṇṇanā.

    ৯২২. অপি-সদ্দেন পগেৰ মহত্তরিযাতি দস্সেতি। সহসেয্যং পকপ্পেয্যাতি যথাৰুত্তলক্খণং সব্বচ্ছন্নসব্বপরিচ্ছন্নাদিসেনাসনং পৰিসিত্ৰা সূরিযত্থঙ্গমতো পট্ঠায পুব্বে ৰুত্তপ্পকারেনেৰ পিট্ঠিপ্পসারণলক্খণং সেয্যং কপ্পেয্য।

    922.Api-saddena pageva mahattariyāti dasseti. Sahaseyyaṃ pakappeyyāti yathāvuttalakkhaṇaṃ sabbacchannasabbaparicchannādisenāsanaṃ pavisitvā sūriyatthaṅgamato paṭṭhāya pubbe vuttappakāreneva piṭṭhippasāraṇalakkhaṇaṃ seyyaṃ kappeyya.

    ৯২৩-৪. দেৰিযাতি দেৰিত্থিযা। তিরচ্ছানগতিত্থিযাতি গোধাদিকায। ‘‘মেথুনৰত্থুভূতাযা’’তি ইমিনা মেথুনধম্মস্স অৰত্থুভূতায সহসেয্যায দোসাভাৰং দস্সেতি। ৰত্থূনং গণনাযাতি মাতুগামস্স গণনায চ তাসঞ্চ অত্তনো চ পযোগগণনায চ। অস্সাতি ভিক্খুস্স। মাতুগামেন তযো দিৰসে সহসেয্যায ইমিনা সিক্খাপদেন আপত্তিং আপজ্জিত্ৰা চতুত্থদিৰসে সহসেয্যায দ্ৰীহিপি সিক্খাপদেহি আপত্তিং আপজ্জতীতি এত্থ দুক্কটৰত্থুভূতায ইত্থিযা তত্থেৰ সহসেয্যায ইমিনা সিক্খাপদেন দুক্কটং আপজ্জিত্ৰা চতুত্থদিৰসে রত্তিযং সহসেয্যায ইমিনা সিক্খাপদেন আপজ্জিতব্বদুক্কটেন সহ পুরিমসিক্খাপদেন পাচিত্তিযং আপজ্জতীতি ৰেদিতব্বং।

    923-4.Deviyāti devitthiyā. Tiracchānagatitthiyāti godhādikāya. ‘‘Methunavatthubhūtāyā’’ti iminā methunadhammassa avatthubhūtāya sahaseyyāya dosābhāvaṃ dasseti. Vatthūnaṃ gaṇanāyāti mātugāmassa gaṇanāya ca tāsañca attano ca payogagaṇanāya ca. Assāti bhikkhussa. Mātugāmena tayo divase sahaseyyāya iminā sikkhāpadena āpattiṃ āpajjitvā catutthadivase sahaseyyāya dvīhipi sikkhāpadehi āpattiṃ āpajjatīti ettha dukkaṭavatthubhūtāya itthiyā tattheva sahaseyyāya iminā sikkhāpadena dukkaṭaṃ āpajjitvā catutthadivase rattiyaṃ sahaseyyāya iminā sikkhāpadena āpajjitabbadukkaṭena saha purimasikkhāpadena pācittiyaṃ āpajjatīti veditabbaṃ.

    দুতিযসহসেয্যকথাৰণ্ণনা।

    Dutiyasahaseyyakathāvaṇṇanā.

    ৯২৬. ছপ্পঞ্চৰাচাহি উদ্ধং ইত্থিযা ধম্মং ভণন্তস্সাতি সম্বন্ধো। ইত্থিযাতি ‘‘মাতুগামো নাম মনুস্সিত্থী, ন যক্খী, ন পেতী, ন তিরচ্ছানগতা, ৰিঞ্ঞূ পটিবলা হোতি সুভাসিতদুব্ভাসিতং দুট্ঠুল্লাদুট্ঠুল্লং আজানিতু’’ন্তি পাল়িযং ৰুত্তমনুস্সিত্থিযা। ভণন্তস্সাতি ৰক্খমানলক্খণং ধম্মং ছহি পদেহি উত্তরি ভণন্তস্স। ৰিঞ্ঞুং পুরিসৰিগ্গহং ৰিনাতি ‘‘ৰিঞ্ঞূ নাম পুরিসৰিগ্গহো পটিবলো হোতি সুভাসিতদুব্ভাসিতং দুট্ঠুল্লাদুট্ঠুল্লং আজানিতু’’ন্তি (পাচি॰ ৬৪) পাল়িযং ৰুত্তসৰনূপচারগতমনুস্সপুরিসং ৰিনা। ধম্মন্তি ৰক্খমানপ্পকারসরূপং দেসনাধম্মং।

    926. Chappañcavācāhi uddhaṃ itthiyā dhammaṃ bhaṇantassāti sambandho. Itthiyāti ‘‘mātugāmo nāma manussitthī, na yakkhī, na petī, na tiracchānagatā, viññū paṭibalā hoti subhāsitadubbhāsitaṃ duṭṭhullāduṭṭhullaṃ ājānitu’’nti pāḷiyaṃ vuttamanussitthiyā. Bhaṇantassāti vakkhamānalakkhaṇaṃ dhammaṃ chahi padehi uttari bhaṇantassa. Viññuṃ purisaviggahaṃ vināti ‘‘viññū nāma purisaviggaho paṭibalo hoti subhāsitadubbhāsitaṃ duṭṭhullāduṭṭhullaṃ ājānitu’’nti (pāci. 64) pāḷiyaṃ vuttasavanūpacāragatamanussapurisaṃ vinā. Dhammanti vakkhamānappakārasarūpaṃ desanādhammaṃ.

    ৯২৭. গাথামযা, চুণ্ণিযগন্থমযাতি দুৰিধা দেসনা, তত্থ গাথামযদেসনায ৰাচা নাম গাথাপাদলক্খণাতি দস্সেতুমাহ ‘‘গাথাপাদো’’তিআদি। চুণ্ণিযদেসনাযং পন ৰাচাপরিচ্ছেদো ৰিভত্যন্তৰসেন ৰেদিতব্বো। তেনাহ গণ্ঠিপদে ‘‘একো গাথাপাদো’তি ইদং গাথাবন্ধমেৰ সন্ধায ৰুত্তং, অঞ্ঞত্থ পন ৰিভত্তিঅন্তপদমেৰ গহেতব্ব’’ন্তি। পদসোধম্মং নিদ্দিট্ঠং ধম্মন্তি পিটকত্তযং। ‘‘অট্ঠকথ’’ন্তি ইমিনা সঙ্গীতিত্তযারুল়্হং পোরাণট্ঠকথং গহেতব্বং। তেনেৰ গণ্ঠিপদে ৰুত্তং ‘‘অট্ঠকথং ধম্মপদজাতকাদিৰত্থুঞ্চা’’তি। ইমিনাপি পোরাণকং সঙ্গীতিআরুল়্হমেৰ অট্ঠকথং ৰুত্তন্তি ৰদন্তি। অট্ঠকথাদিপাঠং ঠপেত্ৰা দমিল়াদিভাসন্তরেন যথারুচি কথেতুং ৰট্টতীতি।

    927. Gāthāmayā, cuṇṇiyaganthamayāti duvidhā desanā, tattha gāthāmayadesanāya vācā nāma gāthāpādalakkhaṇāti dassetumāha ‘‘gāthāpādo’’tiādi. Cuṇṇiyadesanāyaṃ pana vācāparicchedo vibhatyantavasena veditabbo. Tenāha gaṇṭhipade ‘‘eko gāthāpādo’ti idaṃ gāthābandhameva sandhāya vuttaṃ, aññattha pana vibhattiantapadameva gahetabba’’nti. Padasodhammaṃ niddiṭṭhaṃ dhammanti piṭakattayaṃ. ‘‘Aṭṭhakatha’’nti iminā saṅgītittayāruḷhaṃ porāṇaṭṭhakathaṃ gahetabbaṃ. Teneva gaṇṭhipade vuttaṃ ‘‘aṭṭhakathaṃ dhammapadajātakādivatthuñcā’’ti. Imināpi porāṇakaṃ saṅgītiāruḷhameva aṭṭhakathaṃ vuttanti vadanti. Aṭṭhakathādipāṭhaṃ ṭhapetvā damiḷādibhāsantarena yathāruci kathetuṃ vaṭṭatīti.

    ৯২৮. পদাদীনং ৰসা ছন্নং ৰাচানং উপরি ধম্মং দেসেন্তস্সাতি যোজনা। দেসেন্তস্সাতি পদসোধম্মে ৰুত্তলক্খণপদাদিসরূপাহি ছহি ৰাচাহি উত্তরি ধম্মং দেসেন্তস্স। পদাদিগণনাযাতি যথাৰুত্তলক্খণপদঅনুপদঅন্ৰক্খরঅনুব্যঞ্জনগণনায।

    928. Padādīnaṃ vasā channaṃ vācānaṃ upari dhammaṃ desentassāti yojanā. Desentassāti padasodhamme vuttalakkhaṇapadādisarūpāhi chahi vācāhi uttari dhammaṃ desentassa. Padādigaṇanāyāti yathāvuttalakkhaṇapadaanupadaanvakkharaanubyañjanagaṇanāya.

    ৯২৯. পুরিসৰিগ্গহন্তি মনুস্সপুরিসৰেসং। এত্থ তিরচ্ছানগতা নাম ৰেসনিম্মানারহা ইদ্ধিমন্তা নাগসুপণ্ণা।

    929.Purisaviggahanti manussapurisavesaṃ. Ettha tiracchānagatā nāma vesanimmānārahā iddhimantā nāgasupaṇṇā.

    ৯৩১. ৰদতোতি অধিকং ধম্মং ভাসতো।

    931.Vadatoti adhikaṃ dhammaṃ bhāsato.

    ৯৩২. ইত্থিরূপন্তি মনুস্সিত্থিৰেসং। তিরচ্ছানগতিত্থিযাতি ৰুত্তসরূপায তিরচ্ছানগতিত্থিযা।

    932.Itthirūpanti manussitthivesaṃ. Tiracchānagatitthiyāti vuttasarūpāya tiracchānagatitthiyā.

    ৯৩৩. সযং উট্ঠায নিসীদিত্ৰা পুন ধম্মং দেসেন্তস্স অনাপত্তি পকাসিতাতি সম্বন্ধো। মাতুগামস্স ৰা তথাতি এত্থ ‘‘তথা’’তি ইমিনা ৰুত্তপ্পকারস্স গহিতত্তা উট্ঠায নিসিন্নস্স মাতুগামস্স পুন ধম্মং দেসেন্তস্স অনাপত্তি পকাসিতাতি ৰুত্তং হোতি। ‘‘উট্ঠাযা’’তিআদিনা ইরিযাপথপরিৰত্তনদস্সনেন নানাইরিযাপথেপি অনাপত্তিং দীপেতি।

    933. Sayaṃ uṭṭhāya nisīditvā puna dhammaṃ desentassa anāpatti pakāsitāti sambandho. Mātugāmassa vā tathāti ettha ‘‘tathā’’ti iminā vuttappakārassa gahitattā uṭṭhāya nisinnassa mātugāmassa puna dhammaṃ desentassa anāpatti pakāsitāti vuttaṃ hoti. ‘‘Uṭṭhāyā’’tiādinā iriyāpathaparivattanadassanena nānāiriyāpathepi anāpattiṃ dīpeti.

    ৯৩৪. অঞ্ঞিস্সা পুন অঞ্ঞিস্সাতি এত্থ ‘‘আগতাগতাযা’’তি সেসো। যথাহ অট্ঠকথাযং ‘‘অঞ্ঞস্স মাতুগামস্সাতি একিস্সা দেসেত্ৰা পুন আগতাগতায অঞ্ঞিস্সাপি দেসেতীতি এৰং একাসনে নিসিন্নো মাতুগামসতসহস্সন্নম্পি দেসেতীতি অত্থো’’তি (পাচি॰ অট্ঠ॰ ৬৬)। অৰুত্তসমুচ্চযত্থেন চ-সদ্দেন ‘‘পঞ্হং পুট্ঠো কথেতী’’তি (পাচি॰ ৬৬) ইদং সমুচ্চিনোতি। ‘‘দীঘনিকাযো কিমত্থিযো ভন্তে’’তি পঞ্হং পুচ্ছতো মাতুগামস্স সব্বং দীঘনিকাযং ৰদতোপি অনাপত্তি। যথাহ অট্ঠকথাযং ‘‘পঞ্হং পুচ্ছতি, পঞ্হং পুট্ঠো কথেতীতি মাতুগামো ‘দীঘনিকাযো নাম ভন্তে কিমত্থং দীপেতী’তি পুচ্ছতি, এৰং পঞ্হং পুট্ঠো ভিক্খু সব্বং চেপি দীঘনিকাযং কথেতি, অনাপত্তী’’তি (পাচি॰ অট্ঠ॰ ৬৬)। এত্থ চ সব্বং চেপি দীঘনিকাযং কথেতীতি যাৰ ন নিট্ঠাতি, তাৰ পুনদিৰসেপি কথেতি।

    934.Aññissā puna aññissāti ettha ‘‘āgatāgatāyā’’ti seso. Yathāha aṭṭhakathāyaṃ ‘‘aññassa mātugāmassāti ekissā desetvā puna āgatāgatāya aññissāpi desetīti evaṃ ekāsane nisinno mātugāmasatasahassannampi desetīti attho’’ti (pāci. aṭṭha. 66). Avuttasamuccayatthena ca-saddena ‘‘pañhaṃ puṭṭho kathetī’’ti (pāci. 66) idaṃ samuccinoti. ‘‘Dīghanikāyo kimatthiyo bhante’’ti pañhaṃ pucchato mātugāmassa sabbaṃ dīghanikāyaṃ vadatopi anāpatti. Yathāha aṭṭhakathāyaṃ ‘‘pañhaṃ pucchati, pañhaṃ puṭṭho kathetīti mātugāmo ‘dīghanikāyo nāma bhante kimatthaṃ dīpetī’ti pucchati, evaṃ pañhaṃ puṭṭho bhikkhu sabbaṃ cepi dīghanikāyaṃ katheti, anāpattī’’ti (pāci. aṭṭha. 66). Ettha ca sabbaṃ cepi dīghanikāyaṃ kathetīti yāva na niṭṭhāti, tāva punadivasepi katheti.

    ৯৩৫. ধম্মস্স দেসনায, ৰিঞ্ঞুমনুস্সপুরিসস্স অসন্নিহিতকরণেন চ আপজ্জিতব্বতো ক্রিযাক্রিযং।

    935. Dhammassa desanāya, viññumanussapurisassa asannihitakaraṇena ca āpajjitabbato kriyākriyaṃ.

    ধম্মদেসনাকথাৰণ্ণনা।

    Dhammadesanākathāvaṇṇanā.

    ৯৩৬. মহগ্গতং রূপারূপজ্ঝানং। পণীতং লোকুত্তরধম্মং। পধানভাৰং নীতন্তি পণীতং। আরোচেন্তস্সাতি ‘‘পঠমং ঝানং সমাপজ্জামী’’তিআদিনা (পারা॰ ২০১) নযেন চতুত্থপারাজিকে ৰুত্তনযেন ৰদন্তস্স। পরিনিব্বানকালে চ পুট্ঠকালে চ ভিক্খুভিক্খুনীনং অত্তনা লদ্ধস্স উত্তরিমনুস্সধম্মস্স আরোচেতব্বত্তা ‘‘ঠপেত্ৰা ভিক্খুনিং ভিক্খু’’ন্তি ৰুত্তং। ‘‘অঞ্ঞস্সা’’তি সেসো। যথাহ অট্ঠকথাযং ‘‘উপসম্পন্নস্স ভূতং আরোচেতীতি উত্তরিমনুস্সধম্মমেৰ সন্ধায ৰুত্তং। পরিনিব্বানকালে, হি অন্তরা ৰা অতিকড্ঢিযমানেন উপসম্পন্নস্স ভূতং আরোচেতুং ৰট্টতী’’তি (পাচি॰ অট্ঠ॰ ৭৭)। ভূতেতি এত্থ ‘‘উত্তরিমনুস্সধম্মে আরোচিতে’’তি ৰত্তব্বং, নিমিত্তত্থে ভুম্মং, অত্তনো সন্তানে ইমস্মিং অত্তভাৰে সিদ্ধউত্তরিমনুস্সধম্মস্স আরোচননিমিত্তন্তি অত্থো।

    936.Mahaggataṃ rūpārūpajjhānaṃ. Paṇītaṃ lokuttaradhammaṃ. Padhānabhāvaṃ nītanti paṇītaṃ. Ārocentassāti ‘‘paṭhamaṃ jhānaṃ samāpajjāmī’’tiādinā (pārā. 201) nayena catutthapārājike vuttanayena vadantassa. Parinibbānakāle ca puṭṭhakāle ca bhikkhubhikkhunīnaṃ attanā laddhassa uttarimanussadhammassa ārocetabbattā ‘‘ṭhapetvā bhikkhuniṃ bhikkhu’’nti vuttaṃ. ‘‘Aññassā’’ti seso. Yathāha aṭṭhakathāyaṃ ‘‘upasampannassa bhūtaṃ ārocetīti uttarimanussadhammameva sandhāya vuttaṃ. Parinibbānakāle, hi antarā vā atikaḍḍhiyamānena upasampannassa bhūtaṃ ārocetuṃ vaṭṭatī’’ti (pāci. aṭṭha. 77). Bhūteti ettha ‘‘uttarimanussadhamme ārocite’’ti vattabbaṃ, nimittatthe bhummaṃ, attano santāne imasmiṃ attabhāve siddhauttarimanussadhammassa ārocananimittanti attho.

    ৯৩৭. নো চে জানাতি সো ৰুত্তন্তি যস্স আরোচেতি, সো সচে সুতক্খণেযেৰ ৰুত্তনযেনেৰ ‘‘এস পঠমজ্ঝানস্স লাভী’’তিআদিনা নযেন ৰুত্তং নো জানাতি। পরিযাযৰচনেতি ‘‘যো তে ৰিহারে ৰসতি, সো পঠমস্স ঝানস্স লাভী’’তি এৰমাদিপরিযাযৰচনে। যস্স উত্তরিমনুস্সধম্মং আরোচেতি, সো সচে সুতসমনন্তরং ‘‘এস এৰং ৰদতী’’তি ৰুত্তং নো জানাতি, তাদিসস্স আরোচেন্তস্স ভিক্খুনো হোতি আপত্তি দুক্কটন্তি সম্বন্ধো। অস্স ভূতস্স পরিযাযৰচনে চ ভিক্খুনো আপত্তি দুক্কটং হোতীতি যোজনা।

    937.Noce jānāti so vuttanti yassa āroceti, so sace sutakkhaṇeyeva vuttanayeneva ‘‘esa paṭhamajjhānassa lābhī’’tiādinā nayena vuttaṃ no jānāti. Pariyāyavacaneti ‘‘yo te vihāre vasati, so paṭhamassa jhānassa lābhī’’ti evamādipariyāyavacane. Yassa uttarimanussadhammaṃ āroceti, so sace sutasamanantaraṃ ‘‘esa evaṃ vadatī’’ti vuttaṃ no jānāti, tādisassa ārocentassa bhikkhuno hoti āpatti dukkaṭanti sambandho. Assa bhūtassa pariyāyavacane ca bhikkhuno āpatti dukkaṭaṃ hotīti yojanā.

    ৯৩৮. তথারূপে কারণে সতীতি পরস্স কারণভাৰং ঞত্ৰাপি পটিপত্তিযা অমোঘভাৰদস্সনসমুত্তেজনসম্পহংসনাদিকরসঙ্খাতে কারণে সতি। সব্বস্সাপীতি উপসম্পন্নানুপসম্পন্নস্স সব্বস্স। সীলাদিন্তি সীলসুতপরিযত্তিগুণং। ৰদতোতি এত্থ ‘‘ভিক্খুনো’’তি পকরণতো লব্ভতি।

    938.Tathārūpekāraṇe satīti parassa kāraṇabhāvaṃ ñatvāpi paṭipattiyā amoghabhāvadassanasamuttejanasampahaṃsanādikarasaṅkhāte kāraṇe sati. Sabbassāpīti upasampannānupasampannassa sabbassa. Sīlādinti sīlasutapariyattiguṇaṃ. Vadatoti ettha ‘‘bhikkhuno’’ti pakaraṇato labbhati.

    ৯৩৯. তদসম্ভৰাতি দিট্ঠিসম্পন্নস্স উম্মাদাদীনং অসম্ভৰা। যথাহ অট্ঠকথাযং ‘‘দিট্ঠিসম্পন্নানং উম্মাদস্স ৰা চিত্তক্খেপস্স ৰা অভাৰাতি। মহাপচ্চরিযম্পি হি ৰিচারিত’’ন্তি (পাচি॰ অট্ঠ॰ ৭৭)। উম্মত্তকপদস্স অৰচনে কারণং ৰদন্তেনেৰ খিত্তচিত্তাদিপদানং অৰচনে কারণঞ্চ উপলক্খণতো দস্সিতমেৰাতি দট্ঠব্বং। এত্থ চ মগ্গফলদিট্ঠিযা সমন্নাগতানং অরিযানমেৰ হি উম্মত্তকাদিভাৰো নত্থি। ঝানলাভিনো পন তস্মিং সতি ঝানা পরিহাযন্তি, তস্মা তেসং অভূতারোচনপচ্চযা অনাপত্তি ৰত্তব্বা, ন ভূতারোচনপচ্চযা।

    939.Tadasambhavāti diṭṭhisampannassa ummādādīnaṃ asambhavā. Yathāha aṭṭhakathāyaṃ ‘‘diṭṭhisampannānaṃ ummādassa vā cittakkhepassa vā abhāvāti. Mahāpaccariyampi hi vicārita’’nti (pāci. aṭṭha. 77). Ummattakapadassa avacane kāraṇaṃ vadanteneva khittacittādipadānaṃ avacane kāraṇañca upalakkhaṇato dassitamevāti daṭṭhabbaṃ. Ettha ca maggaphaladiṭṭhiyā samannāgatānaṃ ariyānameva hi ummattakādibhāvo natthi. Jhānalābhino pana tasmiṃ sati jhānā parihāyanti, tasmā tesaṃ abhūtārocanapaccayā anāpatti vattabbā, na bhūtārocanapaccayā.

    ৯৪০. ইমিস্সাপত্তিযা অঞ্ঞত্র ঝানমগ্গাদিলাভীনং অঞ্ঞস্স অসম্ভৰা ‘‘কুসলাব্যাকতেহেৰ দ্ৰিচিত্ত’’ন্তি ৰুত্তং। ইদঞ্চ উক্কট্ঠপরিচ্ছেদেন অরিযপুগ্গলেযেৰ সন্ধায ৰুত্তং। পণ্ণত্তিং অজানন্তা পন ঝানলাভী পুথুজ্জনা নানাৰত্থুম্হি লোভৰসেন অকুসলচিত্তেনাপি ন আরোচেন্তীতি নত্থি, তস্মা ‘‘তিচিত্ত’’ন্তি ৰত্তব্বং সিযা, তথাপি বহুলেন কুসলাব্যাকতানমেৰ সম্ভৰোতি এৰং ৰুত্তন্তি দট্ঠব্বং। দ্ৰিৰেদনং সুখোপেক্খাৰসেন। ইদঞ্চ সিক্খাপদং পণ্ণত্তিঅজাননৰসেন অচিত্তকসমুট্ঠানং হোতি। অরিযা চেত্থ পণ্ণত্তিং জানন্তা ৰীতিক্কমং ন করোন্তি, পুথুজ্জনা পন পণ্ণত্তিং জানিত্ৰাপি ৰীতিক্কমং করোন্তি। তে চ সত্থুনো আণাৰীতিক্কমচেতনায বলৰঅকুসলভাৰতো ঝানা পরিহাযন্তীতি দট্ঠব্বং।

    940. Imissāpattiyā aññatra jhānamaggādilābhīnaṃ aññassa asambhavā ‘‘kusalābyākateheva dvicitta’’nti vuttaṃ. Idañca ukkaṭṭhaparicchedena ariyapuggaleyeva sandhāya vuttaṃ. Paṇṇattiṃ ajānantā pana jhānalābhī puthujjanā nānāvatthumhi lobhavasena akusalacittenāpi na ārocentīti natthi, tasmā ‘‘ticitta’’nti vattabbaṃ siyā, tathāpi bahulena kusalābyākatānameva sambhavoti evaṃ vuttanti daṭṭhabbaṃ. Dvivedanaṃ sukhopekkhāvasena. Idañca sikkhāpadaṃ paṇṇattiajānanavasena acittakasamuṭṭhānaṃ hoti. Ariyā cettha paṇṇattiṃ jānantā vītikkamaṃ na karonti, puthujjanā pana paṇṇattiṃ jānitvāpi vītikkamaṃ karonti. Te ca satthuno āṇāvītikkamacetanāya balavaakusalabhāvato jhānā parihāyantīti daṭṭhabbaṃ.

    ভূতারোচনকথাৰণ্ণনা।

    Bhūtārocanakathāvaṇṇanā.

    ৯৪১. ভিক্খুনো দুট্ঠুল্লং আপত্তিং ভিক্খুসম্মুতিং ঠপেত্ৰা অনুপসম্পন্নে আরোচেন্তস্স ভিক্খুনো আপত্তীতি যোজনা। দুট্ঠুল্লং আপত্তিন্তি সঙ্ঘাদিসেসো। ননু চ ‘‘দুট্ঠুল্লা নাম আপত্তি চত্তারি চ পারাজিকানি তেরস চ সঙ্ঘাদিসেসা’’তি (পাচি॰ ৭৯) পদভাজনে পারাজিকসঙ্ঘাদিসেসা দস্সিতা, কস্মা ইধ সঙ্ঘাদিসেসোৰ গহিতোতি? ৰুচ্চতে – পারাজিকং দুট্ঠুল্লসদ্দত্থদস্সনত্থং ৰুত্তং, ইধ পন সঙ্ঘাদিসেসোযেৰ ভগৰতা অধিপ্পেতোতি অট্ঠকথাযং ৰিচারিতমেতং। ৰুত্তঞ্হি তত্থ ‘‘পারাজিকানি দুট্ঠুল্লসদ্দত্থদস্সনত্থং ৰুত্তানি, সঙ্ঘাদিসেসং পন ইধ অধিপ্পেত’’ন্তি (পাচি॰ অট্ঠ॰ ৭৮)। ৰক্খতি চ ‘‘ইধ সঙ্ঘাদিসেসাৰ, দুট্ঠুল্লাপত্তিযো মতা’’তি। অনুপসম্পন্নেতি ‘‘ভিক্খুঞ্চ ভিক্খুনিঞ্চ ঠপেত্ৰা অৰসেসো অনুপসম্পন্নো’’তি (পাচি॰ ৮০) পদভাজনে নিদ্দিট্ঠঅনুপসম্পন্নস্স আরোচেন্তস্সাতি ৰুত্তং হোতি।

    941. Bhikkhuno duṭṭhullaṃ āpattiṃ bhikkhusammutiṃ ṭhapetvā anupasampanne ārocentassa bhikkhuno āpattīti yojanā. Duṭṭhullaṃ āpattinti saṅghādiseso. Nanu ca ‘‘duṭṭhullā nāma āpatti cattāri ca pārājikāni terasa ca saṅghādisesā’’ti (pāci. 79) padabhājane pārājikasaṅghādisesā dassitā, kasmā idha saṅghādisesova gahitoti? Vuccate – pārājikaṃ duṭṭhullasaddatthadassanatthaṃ vuttaṃ, idha pana saṅghādisesoyeva bhagavatā adhippetoti aṭṭhakathāyaṃ vicāritametaṃ. Vuttañhi tattha ‘‘pārājikāni duṭṭhullasaddatthadassanatthaṃ vuttāni, saṅghādisesaṃ pana idha adhippeta’’nti (pāci. aṭṭha. 78). Vakkhati ca ‘‘idha saṅghādisesāva, duṭṭhullāpattiyo matā’’ti. Anupasampanneti ‘‘bhikkhuñca bhikkhuniñca ṭhapetvā avaseso anupasampanno’’ti (pāci. 80) padabhājane niddiṭṭhaanupasampannassa ārocentassāti vuttaṃ hoti.

    ঠপেত্ৰা ভিক্খুসম্মুতিন্তি ‘‘অত্থি ভিক্খুসম্মুতি আপত্তিপরিযন্তা ন কুলপরিযন্তা’’তিআদিনা (পাচি॰ ৮০) পদভাজনে দস্সিতং অভিণ্হাপত্তিকস্স ভিক্খুনো আযতিং সংৰরত্থং হিরোত্তপ্পজননত্থং আপত্তিযো ৰা উপাসককুলানি ৰা উভযমেৰ ৰা পরিচ্ছিন্দিত্ৰা ৰা অপরিচ্ছিন্দিত্ৰা ৰা আপত্তিযো আরোচেতুং সঙ্ঘেন সঙ্ঘমজ্ঝে তিক্খত্তুং সাৰেত্ৰা কতসম্মুতিং ঠপেত্ৰাতি ৰুত্তং হোতি। যথাহ অট্ঠকথাযং ‘‘অভিণ্হাপত্তিকং ভিক্খুং দিস্ৰা ‘এৰমেস পরেসু হিরোত্তপ্পেনাপি আযতিং সংৰরং আপজ্জিস্সতী’তি তস্স ভিক্খুনো হিতেসিতায তিক্খত্তুং অপলোকেত্ৰা সঙ্ঘেন কাতব্বা’’তি (পাচি॰ অট্ঠ॰ ৮০)।

    Ṭhapetvā bhikkhusammutinti ‘‘atthi bhikkhusammuti āpattipariyantā na kulapariyantā’’tiādinā (pāci. 80) padabhājane dassitaṃ abhiṇhāpattikassa bhikkhuno āyatiṃ saṃvaratthaṃ hirottappajananatthaṃ āpattiyo vā upāsakakulāni vā ubhayameva vā paricchinditvā vā aparicchinditvā vā āpattiyo ārocetuṃ saṅghena saṅghamajjhe tikkhattuṃ sāvetvā katasammutiṃ ṭhapetvāti vuttaṃ hoti. Yathāha aṭṭhakathāyaṃ ‘‘abhiṇhāpattikaṃ bhikkhuṃ disvā ‘evamesa paresu hirottappenāpi āyatiṃ saṃvaraṃ āpajjissatī’ti tassa bhikkhuno hitesitāya tikkhattuṃ apaloketvā saṅghena kātabbā’’ti (pāci. aṭṭha. 80).

    ৯৪২. ঘটেত্ৰা ৰদন্তস্সেৰাতি এৰকারো যথাঠানে যোজেতব্বো। এৰকারেন ব্যৰচ্ছিন্নমত্থং ৰক্খতি ‘‘ৰত্থু’’ন্তিআদিনা। ‘‘অসুচিং মোচেত্ৰা’’তি ইমিনা ৰত্থুমাহ, ‘‘সঙ্ঘাদিসেস’’ন্তি ইমিনা আপত্তিং। ৰজ্জমেৰ ৰজ্জতা। ‘‘পাচিত্তিযাপত্তী’’তি ইমস্সাযং পরিযাযো। ‘‘অযং অসুচিং মোচেত্ৰা সঙ্ঘাদিসেসং আপন্নো’’তি ৰত্থুনা সদ্ধিং ঘটেত্ৰা আপত্তিং ৰদন্তস্স ৰজ্জতা পাচিত্তিযাপত্তি হোতীতি যোজনা।

    942.Ghaṭetvā vadantassevāti evakāro yathāṭhāne yojetabbo. Evakārena byavacchinnamatthaṃ vakkhati ‘‘vatthu’’ntiādinā. ‘‘Asuciṃ mocetvā’’ti iminā vatthumāha, ‘‘saṅghādisesa’’nti iminā āpattiṃ. Vajjameva vajjatā. ‘‘Pācittiyāpattī’’ti imassāyaṃ pariyāyo. ‘‘Ayaṃ asuciṃ mocetvā saṅghādisesaṃ āpanno’’ti vatthunā saddhiṃ ghaṭetvā āpattiṃ vadantassa vajjatā pācittiyāpatti hotīti yojanā.

    ৯৪৩. সুদ্ধস্সাতি পারাজিকমনাপন্নস্স। ৰদন্তি ৰদনহেতু, ৰত্থুনা সদ্ধিং সঙ্ঘাদিসেসস্স কথনতোতি অত্থো।

    943.Suddhassāti pārājikamanāpannassa. Vadanti vadanahetu, vatthunā saddhiṃ saṅghādisesassa kathanatoti attho.

    ৯৪৪. অদুট্ঠুল্লাযাতি সঙ্ঘাদিসেসতো অঞ্ঞায আপত্তিযা। দুট্ঠুল্লসঞ্ঞিনোতি সঙ্ঘাদিসেসসঞ্ঞিনো। সেসা আপত্তিযোপি ৰাতি সঙ্ঘাদিসেসং ৰিনা সেসে ছল়াপত্তিক্খন্ধে।

    944.Aduṭṭhullāyāti saṅghādisesato aññāya āpattiyā. Duṭṭhullasaññinoti saṅghādisesasaññino. Sesā āpattiyopi vāti saṅghādisesaṃ vinā sese chaḷāpattikkhandhe.

    ৯৪৫. তথাতি দুক্কটং অতিদিসতি। পঞ্চধা মতং অনুপসম্পন্নস্স দুট্ঠুল্লং অজ্ঝাচারং আরোচেন্তস্স তথা দুক্কটন্তি যোজনা। অনুপসম্পন্নস্স পঞ্চধা মতং দুট্ঠুল্লং অজ্ঝাচারন্তি চ পাণাতিপাতাদিপঞ্চসিক্খাপদৰীতিক্কমা গহিতা। কেচি পন ‘‘সুক্কৰিস্সট্ঠিআদযো পঞ্চা’’তি ৰদন্তি, তং ন গহেতব্বং। পাণাতিপাতাদীনি হি দসেৰ সিক্খাপদানি সামণেরানং পঞ্ঞত্তানি। তেসং পঞ্ঞত্তেসুযেৰ চ সিক্খাপদেসু দুট্ঠুল্লাদুট্ঠুল্লৰিচারণা কাতব্বা, ন চ সুক্কৰিস্সট্ঠিআদীনি ৰিসুং তেসং পঞ্ঞত্তানি অত্থীতি।

    945.Tathāti dukkaṭaṃ atidisati. Pañcadhā mataṃ anupasampannassa duṭṭhullaṃ ajjhācāraṃ ārocentassa tathā dukkaṭanti yojanā. Anupasampannassa pañcadhā mataṃ duṭṭhullaṃ ajjhācāranti ca pāṇātipātādipañcasikkhāpadavītikkamā gahitā. Keci pana ‘‘sukkavissaṭṭhiādayo pañcā’’ti vadanti, taṃ na gahetabbaṃ. Pāṇātipātādīni hi daseva sikkhāpadāni sāmaṇerānaṃ paññattāni. Tesaṃ paññattesuyeva ca sikkhāpadesu duṭṭhullāduṭṭhullavicāraṇā kātabbā, na ca sukkavissaṭṭhiādīni visuṃ tesaṃ paññattāni atthīti.

    অথ ভিক্খুনো দুট্ঠুল্লসঙ্খাতানি সুক্কৰিস্সট্ঠিআদীনি অনুপসম্পন্নস্স কিং নাম হোন্তীতি? অজ্ঝাচারো নাম হোন্তীতি। যথাহ অট্ঠকথাযং ‘‘সুক্কৰিস্সট্ঠি…পে॰… অজ্ঝাচারো নামাতি ৰুত্ত’’ন্তি (পাচি॰ অট্ঠ॰ ৮২)। ইমিনাপি চেতং সিদ্ধং ‘‘অনুপসম্পন্নস্স সুক্কৰিস্সট্ঠিআদি দুট্ঠুল্লং নাম ন হোতী’’তি। ‘‘অজ্ঝাচারো নামা’’তি হি ৰদন্তো অনুপসম্পন্নস্স সুক্কৰিস্সট্ঠিআদি কেৰলং অজ্ঝাচারো নাম হোতি, ন পন দুট্ঠুল্লো নাম অজ্ঝাচারোতি দীপেতি। ‘‘অজ্ঝাচারো নামা’’তি চ অট্ঠকথাযং ৰুত্তত্তা, অকত্তব্বরূপত্তা চ অনুপসম্পন্নস্স সুক্কৰিস্সট্ঠিআদীনি দণ্ডকম্মৰত্থুপক্খং ভজন্তি। তানি চ অঞ্ঞস্স অনুপসম্পন্নস্স অৰণ্ণকামতায আরোচেন্তো ভিক্খু দুক্কটং আপজ্জতীতি ৰদন্তি। ইধ পন অনুপসম্পন্নগ্গহণেন সামণেরসামণেরিসিক্খমানানং গহণং ৰেদিতব্বং।

    Atha bhikkhuno duṭṭhullasaṅkhātāni sukkavissaṭṭhiādīni anupasampannassa kiṃ nāma hontīti? Ajjhācāro nāma hontīti. Yathāha aṭṭhakathāyaṃ ‘‘sukkavissaṭṭhi…pe… ajjhācāro nāmāti vutta’’nti (pāci. aṭṭha. 82). Imināpi cetaṃ siddhaṃ ‘‘anupasampannassa sukkavissaṭṭhiādi duṭṭhullaṃ nāma na hotī’’ti. ‘‘Ajjhācāro nāmā’’ti hi vadanto anupasampannassa sukkavissaṭṭhiādi kevalaṃ ajjhācāro nāma hoti, na pana duṭṭhullo nāma ajjhācāroti dīpeti. ‘‘Ajjhācāro nāmā’’ti ca aṭṭhakathāyaṃ vuttattā, akattabbarūpattā ca anupasampannassa sukkavissaṭṭhiādīni daṇḍakammavatthupakkhaṃ bhajanti. Tāni ca aññassa anupasampannassa avaṇṇakāmatāya ārocento bhikkhu dukkaṭaṃ āpajjatīti vadanti. Idha pana anupasampannaggahaṇena sāmaṇerasāmaṇerisikkhamānānaṃ gahaṇaṃ veditabbaṃ.

    অদুট্ঠুল্লং অজ্ঝাচারন্তি যোজনা। ‘‘অনুপসম্পন্নস্সা’’তি চ অজ্ঝাহরিতব্বানি। অনুপসম্পন্নস্স যথাৰুত্তেহি পঞ্চসিক্খাপদেহি অঞ্ঞং ৰিকালভোজনাদিং অদুট্ঠুল্লং অজ্ঝাচারং ৰা। যথাহ ‘‘অনুপসম্পন্নস্স দুট্ঠুল্লং ৰা অদুট্ঠুল্লং ৰা অজ্ঝাচার’’ন্তিআদি (পাচি॰ ৮২)।

    Aduṭṭhullaṃ ajjhācāranti yojanā. ‘‘Anupasampannassā’’ti ca ajjhāharitabbāni. Anupasampannassa yathāvuttehi pañcasikkhāpadehi aññaṃ vikālabhojanādiṃ aduṭṭhullaṃ ajjhācāraṃ vā. Yathāha ‘‘anupasampannassa duṭṭhullaṃ vā aduṭṭhullaṃ vā ajjhācāra’’ntiādi (pāci. 82).

    ৯৪৬. কেৰলং ৰত্থুং ৰা আরোচেন্তস্সাতি ‘‘অযং সুক্কৰিস্সট্ঠিং আপন্নো’’তিআদিনা নযেন ৰত্থুমত্তং আরোচেন্তস্স। কেৰলং আপত্তিং ৰা আরোচেন্তস্সাতি ‘‘অযং পারাজিকং আপন্নো, অযং সঙ্ঘাদিসেসং আপন্নো’’তিআদিনা নযেন আপত্তিমত্তং আরোচেন্তস্স চ। ভিক্খুসম্মুতিযাতি এত্থ ৰত্থুনা ঘটেত্ৰা আপত্তিং আরোচেন্তস্সাতি গহেতব্বং। ‘‘তথা’’তি ইমিনা ‘‘অনাপত্তী’’তি এতং পরামসতি।

    946.Kevalaṃvatthuṃ vā ārocentassāti ‘‘ayaṃ sukkavissaṭṭhiṃ āpanno’’tiādinā nayena vatthumattaṃ ārocentassa. Kevalaṃ āpattiṃ vā ārocentassāti ‘‘ayaṃ pārājikaṃ āpanno, ayaṃ saṅghādisesaṃ āpanno’’tiādinā nayena āpattimattaṃ ārocentassa ca. Bhikkhusammutiyāti ettha vatthunā ghaṭetvā āpattiṃ ārocentassāti gahetabbaṃ. ‘‘Tathā’’ti iminā ‘‘anāpattī’’ti etaṃ parāmasati.

    দুট্ঠুল্লারোচনকথাৰণ্ণনা।

    Duṭṭhullārocanakathāvaṇṇanā.

    ৯৪৮. অকপ্পিযং পথৰিন্তি পদভাজনে ‘‘দ্ৰে পথৰিযো জাতা চ পথৰী অজাতা চ পথৰী’’তি (পাচি॰ ৮৬) উদ্দিসিত্ৰা –

    948.Akappiyaṃ pathavinti padabhājane ‘‘dve pathaviyo jātā ca pathavī ajātā ca pathavī’’ti (pāci. 86) uddisitvā –

    ‘‘জাতা নাম পথৰী সুদ্ধপংসু সুদ্ধমত্তিকা অপ্পপাসাণা অপ্পসক্খরা অপ্পকথলা অপ্পমরুম্বা অপ্পৰালিকা যেভুয্যেনপংসুকা যেভুয্যেনমত্তিকা, অদড্ঢাপি ৰুচ্চতি জাতা পথৰী। যোপি পংসুপুঞ্জো ৰা মত্তিকাপুঞ্জো ৰা অতিরেকচাতুমাসং ওৰট্ঠো, অযম্পি ৰুচ্চতি জাতা পথৰী’’তি (পাচি॰ ৮৬) চ,

    ‘‘Jātā nāma pathavī suddhapaṃsu suddhamattikā appapāsāṇā appasakkharā appakathalā appamarumbā appavālikā yebhuyyenapaṃsukā yebhuyyenamattikā, adaḍḍhāpi vuccati jātā pathavī. Yopi paṃsupuñjo vā mattikāpuñjo vā atirekacātumāsaṃ ovaṭṭho, ayampi vuccati jātā pathavī’’ti (pāci. 86) ca,

    ‘‘অজাতা নাম পথৰী সুদ্ধপাসাণা সুদ্ধসক্খরা সুদ্ধকথলা সুদ্ধমরুম্বা সুদ্ধৰালিকা অপ্পপংসু অপ্পমত্তিকা যেভুয্যেনপাসাণা যেভুয্যেনসক্খরা যেভুয্যেনকথলা যেভুয্যেনমরুম্বা যেভুয্যেনৰালিকা, দড্ঢাপি ৰুচ্চতি অজাতা পথৰী। যোপি পংসুপুঞ্জো ৰা মত্তিকাপুঞ্জো ৰা ঊনচাতুমাসং ওৰট্ঠো, অযম্পি ৰুচ্চতি অজাতা পথৰী’’তি (পাচি॰ ৮৬) চ –

    ‘‘Ajātā nāma pathavī suddhapāsāṇā suddhasakkharā suddhakathalā suddhamarumbā suddhavālikā appapaṃsu appamattikā yebhuyyenapāsāṇā yebhuyyenasakkharā yebhuyyenakathalā yebhuyyenamarumbā yebhuyyenavālikā, daḍḍhāpi vuccati ajātā pathavī. Yopi paṃsupuñjo vā mattikāpuñjo vā ūnacātumāsaṃ ovaṭṭho, ayampi vuccati ajātā pathavī’’ti (pāci. 86) ca –

    নিদ্দিট্ঠাসু দ্ৰীসু পথৰীসু জাতপথৰিসঙ্খাতং অকপ্পিযপথৰিং।

    Niddiṭṭhāsu dvīsu pathavīsu jātapathavisaṅkhātaṃ akappiyapathaviṃ.

    এত্থ পাসাণাদীনং লক্খণং অট্ঠকথাযং ‘‘মুট্ঠিপ্পমাণতো উপরি পাসাণাতি ৰেদিতব্বা, মুট্ঠিপ্পমাণা সক্খরা। কথলাতি কপালখণ্ডানি। মরুম্বাতি কটসক্খরা। ৰালিকাতি ৰালুকাযেৰা’’তি ৰুত্তনযেনেৰ ৰেদিতব্বং। যেভুয্যেনপংসুকাদীনং লক্খণং ‘‘যেভুয্যেনপংসুকাতি তীসু কোট্ঠাসেসু দ্ৰে কোট্ঠাসা পংসু, একো পাসাণাদীসু অঞ্ঞতরো কোট্ঠাসো’’তি (পাচি॰ অট্ঠ॰ ৮৬) চ ‘‘অদড্ঢাপীতি উদ্ধনপত্তপচনকুম্ভকারাৰাপাদিৰসেন তথা তথা অদড্ঢা’’তিআদি অট্ঠকথাতো চ ৰেদিতব্বং। ‘‘অপ্পপংসুঅপ্পমত্তিকা’’তি দ্ৰীসুপি পদেসু নিদ্দেসরূপেন যেভুয্যেনপাসাণাদিপদপঞ্চকং ৰুত্তং, তত্থাপি অত্থো যেভুয্যেনপংসুপদাদীসু ৰুত্তৰিপল্লাসেন ৰেদিতব্বো। যথাহ অট্ঠকথাযং ‘‘তেসংযেৰ হি দ্ৰিন্নং পভেদদস্সনমেত’’ন্তি (পাচি॰ ৮৬)।

    Ettha pāsāṇādīnaṃ lakkhaṇaṃ aṭṭhakathāyaṃ ‘‘muṭṭhippamāṇato upari pāsāṇāti veditabbā, muṭṭhippamāṇā sakkharā. Kathalāti kapālakhaṇḍāni. Marumbāti kaṭasakkharā. Vālikāti vālukāyevā’’ti vuttanayeneva veditabbaṃ. Yebhuyyenapaṃsukādīnaṃ lakkhaṇaṃ ‘‘yebhuyyenapaṃsukāti tīsu koṭṭhāsesu dve koṭṭhāsā paṃsu, eko pāsāṇādīsu aññataro koṭṭhāso’’ti (pāci. aṭṭha. 86) ca ‘‘adaḍḍhāpīti uddhanapattapacanakumbhakārāvāpādivasena tathā tathā adaḍḍhā’’tiādi aṭṭhakathāto ca veditabbaṃ. ‘‘Appapaṃsuappamattikā’’ti dvīsupi padesu niddesarūpena yebhuyyenapāsāṇādipadapañcakaṃ vuttaṃ, tatthāpi attho yebhuyyenapaṃsupadādīsu vuttavipallāsena veditabbo. Yathāha aṭṭhakathāyaṃ ‘‘tesaṃyeva hi dvinnaṃ pabhedadassanameta’’nti (pāci. 86).

    খণেয্য ৰাতি এৰরূপং অকপ্পিযপথৰিপদেসং অন্তমসো পাদঙ্গুট্ঠেনাপি সম্মুঞ্জনিসলাকাযপি সযং ৰা খণতি। খণাপেয্য ৰাতি অঞ্ঞেন ৰা ‘‘ইদং খণাহী’’তিআদিনা অকপ্পিযৰোহারেন খণাপেয্য। ভেদাপেয্যাতি তথেৰ ভেদাপেয্য। ভিন্দেয্য ৰাতি পস্সাৰধারাদীহিপি ভিন্দেয্য। অধিকারৰসেন ৰা-সদ্দস্স সব্বকিরিযাপদেহি সম্বন্ধো লব্ভতীতি ভেদাপেয্য চাতি এত্থ চ-সদ্দো ইধ অৰুত্তস্স ‘‘দহতি ৰা, দহাপেতি ৰা’’তি পদদ্ৰযস্স সমুচ্চযকোতি ৰেদিতব্বো। অন্তমসো পত্তম্পি পচন্তো সযং ৰা দহতি, অঞ্ঞেন ৰা দহাপেতীতিআদি ইমেসং পদানং অট্ঠকথাৰসেন (পাচি॰ অট্ঠ॰ ৮৭) ৰেদিতব্বং। পাচিত্তিযং সিযাতি খণন্তস্স, ভিন্দন্তস্স চ পহারে পহারে পাচিত্তিযং।

    Khaṇeyya vāti evarūpaṃ akappiyapathavipadesaṃ antamaso pādaṅguṭṭhenāpi sammuñjanisalākāyapi sayaṃ vā khaṇati. Khaṇāpeyya vāti aññena vā ‘‘idaṃ khaṇāhī’’tiādinā akappiyavohārena khaṇāpeyya. Bhedāpeyyāti tatheva bhedāpeyya. Bhindeyya vāti passāvadhārādīhipi bhindeyya. Adhikāravasena vā-saddassa sabbakiriyāpadehi sambandho labbhatīti bhedāpeyya cāti ettha ca-saddo idha avuttassa ‘‘dahati vā, dahāpeti vā’’ti padadvayassa samuccayakoti veditabbo. Antamaso pattampi pacanto sayaṃ vā dahati, aññena vā dahāpetītiādi imesaṃ padānaṃ aṭṭhakathāvasena (pāci. aṭṭha. 87) veditabbaṃ. Pācittiyaṃ siyāti khaṇantassa, bhindantassa ca pahāre pahāre pācittiyaṃ.

    ৯৪৯. আণাপেন্তস্স আণত্তিগণনায, দহন্তস্স অগ্গিপাতগণনায হোতীতি ইদং ‘‘পহারে পহারে পাচিত্তিয’’ন্তিআদিঅট্ঠকথাৰচনৰসেন ৰেদিতব্বং, ইমমেৰ দস্সেতুমাহ ‘‘সযমেৰা’’তিআদি।

    949. Āṇāpentassa āṇattigaṇanāya, dahantassa aggipātagaṇanāya hotīti idaṃ ‘‘pahāre pahāre pācittiya’’ntiādiaṭṭhakathāvacanavasena veditabbaṃ, imameva dassetumāha ‘‘sayamevā’’tiādi.

    ৯৫০. আণাপেন্তস্সাতি সকিং আণাপেন্তস্স।

    950.Āṇāpentassāti sakiṃ āṇāpentassa.

    ৯৫১. ‘‘খণাপেয্যা’’তি সামঞ্ঞৰচনস্স অপৰাদদস্সনত্থং ‘‘খণ পোক্খরণি’’ন্তিআদিমাহ। কোচি দোসো ন ৰিজ্জতীতি এত্থ পোক্খরণিআৰাটাদিসদ্দানং পথৰিপরিযাযত্তাভাৰতো এৰংৰচনেন অনাপত্তীতি অধিপ্পাযো।

    951. ‘‘Khaṇāpeyyā’’ti sāmaññavacanassa apavādadassanatthaṃ ‘‘khaṇa pokkharaṇi’’ntiādimāha. Koci doso na vijjatīti ettha pokkharaṇiāvāṭādisaddānaṃ pathavipariyāyattābhāvato evaṃvacanena anāpattīti adhippāyo.

    ৯৫২. ‘‘ইমং ইধা’’তিআদীনং পদানং পচ্চক্খভূতাধিপ্পেতভূমিৰাচকত্তা তেহি যোজেত্ৰা ৰুত্তস্স তস্সেৰ পযোগস্স আপত্তিকরভাৰং দস্সেতুমাহ ‘‘ইম’’ন্তিআদি।

    952. ‘‘Imaṃ idhā’’tiādīnaṃ padānaṃ paccakkhabhūtādhippetabhūmivācakattā tehi yojetvā vuttassa tasseva payogassa āpattikarabhāvaṃ dassetumāha ‘‘ima’’ntiādi.

    ৯৫৩. কন্দন্তি তালাদিকন্দং। কুরুন্দন্তি কুলচোচরুক্খং। থূণন্তি থম্ভং। খাণুকন্তি সাখাৰিটপরহিতং রুক্খাৰযৰং। মূলন্তি পথৰিযা সুপ্পতিট্ঠিতভাৰকরং রুক্খাৰযৰং। ৰট্টতীতি অনিযমেত্ৰা ৰচনেন অনাপত্তিভাৰতো ৰট্টতি।

    953.Kandanti tālādikandaṃ. Kurundanti kulacocarukkhaṃ. Thūṇanti thambhaṃ. Khāṇukanti sākhāviṭaparahitaṃ rukkhāvayavaṃ. Mūlanti pathaviyā suppatiṭṭhitabhāvakaraṃ rukkhāvayavaṃ. Vaṭṭatīti aniyametvā vacanena anāpattibhāvato vaṭṭati.

    ৯৫৪. ইমন্তি পচ্চক্খপরামাসপদেন নিযমেত্ৰা ৰচনতো আপত্তি হোতীতি আহ ‘‘নিযমেত্ৰান ৰত্তুং পন ন ৰট্টতী’’তি।

    954.Imanti paccakkhaparāmāsapadena niyametvā vacanato āpatti hotīti āha ‘‘niyametvāna vattuṃ pana na vaṭṭatī’’ti.

    ৯৫৫. ঘটেহি উস্সিঞ্চিতুন্তি ঘটেহি গহেত্ৰা অৰসিঞ্চিতুং। তনুকদ্দমোতি জম্বালো। বহলং কদ্দমং ভিক্খুনা অপনেতুং ন চ ৰট্টতীতি যোজেতব্বং।

    955.Ghaṭehi ussiñcitunti ghaṭehi gahetvā avasiñcituṃ. Tanukaddamoti jambālo. Bahalaṃ kaddamaṃ bhikkhunā apanetuṃ na ca vaṭṭatīti yojetabbaṃ.

    ৯৫৬. নদিযাদীনন্তি এত্থ আদি-সদ্দেন গঙ্গাকন্দরাদীনং গহণং। ‘‘তট’’ন্তি ইমিনা সম্বন্ধো। ৰট্ঠন্তি ৰুট্ঠীহি ওৰট্ঠঞ্চ। চাতুমাসন্তি ৰিকোপনকিরিযায অচ্চন্তসংযোগে উপযোগৰচনং, চাতুমাসব্ভন্তরে ৰিকোপেতুং ৰট্টতীতি অত্থো।

    956.Nadiyādīnanti ettha ādi-saddena gaṅgākandarādīnaṃ gahaṇaṃ. ‘‘Taṭa’’nti iminā sambandho. Vaṭṭhanti vuṭṭhīhi ovaṭṭhañca. Cātumāsanti vikopanakiriyāya accantasaṃyoge upayogavacanaṃ, cātumāsabbhantare vikopetuṃ vaṭṭatīti attho.

    ৯৫৭. সচে তোযস্মিং পততি তটন্তি যোজনা, সচে কূলং ভিজ্জিত্ৰা অন্তোউদকে পততীতি। দেৰে ৰুট্ঠেপীতি পজ্জুন্নদেৰে ৰুট্ঠেপি। ৰুট্ঠ-সদ্দো কত্তুসাধনো। চাতুমাসমতিক্কন্তেপীতি যোজনা। তত্থ হেতুদস্সনত্থমাহ ‘‘তোযে দেৰো হি ৰস্সতী’’তি।

    957. Sace toyasmiṃ patati taṭanti yojanā, sace kūlaṃ bhijjitvā antoudake patatīti. Deve vuṭṭhepīti pajjunnadeve vuṭṭhepi. Vuṭṭha-saddo kattusādhano. Cātumāsamatikkantepīti yojanā. Tattha hetudassanatthamāha ‘‘toye devo hi vassatī’’ti.

    ৯৫৮. সোণ্ডিন্তি পাসাণপোক্খরণিং। তত্থ তূতি উদকরহিতে তস্মিং সোণ্ডিআৰাটে।

    958.Soṇḍinti pāsāṇapokkharaṇiṃ. Tattha tūti udakarahite tasmiṃ soṇḍiāvāṭe.

    ৯৫৯. অন্তোচাতুমাসং সোধেতুং ভিন্দিতুন্তি যোজনা। ‘‘সোধেতুং ভিন্দিতুং ৰিকোপেতু’’ন্তি কিরিযাপদেহি ‘‘রজ’’ন্তি কম্মপদং আনেত্ৰা সম্বন্ধিতব্বং। তং রজোরাসিং দেৰে ৰুট্ঠে পচ্ছা উদকস্স ছিন্নত্তা বহলভূমিসুক্খম্পি ৰুট্ঠিপাতদিৰসতো পট্ঠায অন্তোচাতুমাসে কোপেতুং ভিন্দিতুং ৰট্টতীতি অত্থো।

    959. Antocātumāsaṃ sodhetuṃ bhinditunti yojanā. ‘‘Sodhetuṃ bhindituṃ vikopetu’’nti kiriyāpadehi ‘‘raja’’nti kammapadaṃ ānetvā sambandhitabbaṃ. Taṃ rajorāsiṃ deve vuṭṭhe pacchā udakassa chinnattā bahalabhūmisukkhampi vuṭṭhipātadivasato paṭṭhāya antocātumāse kopetuṃ bhindituṃ vaṭṭatīti attho.

    ৯৬০. পুণ্ণে সোণ্ডিম্হি তং রজং ৰিকোপেতুং ৰট্টতি চাতুমাসতো উদ্ধন্তি যোজনা।

    960.Puṇṇe soṇḍimhi taṃ rajaṃ vikopetuṃ vaṭṭati cātumāsato uddhanti yojanā.

    ৯৬১. ‘‘ফুসাযন্তে’’তি এতেন ‘‘দেৰো’’তি ইদং ভুম্মৰসেন ৰিপরিণামেত্ৰা ‘‘দেৰে ফুসাযন্তে’’তি যোজেতব্বং, পজ্জুন্নদেৰে ৰুট্ঠিপাতং করোন্তেতি অত্থো। পিট্ঠিপাসাণকেতি পাসাণপিট্ঠে। তম্পীতি তথা পাসাণপিট্ঠে লগ্গং তম্পি রজং।

    961.‘‘Phusāyante’’ti etena ‘‘devo’’ti idaṃ bhummavasena vipariṇāmetvā ‘‘deve phusāyante’’ti yojetabbaṃ, pajjunnadeve vuṭṭhipātaṃ karonteti attho. Piṭṭhipāsāṇaketi pāsāṇapiṭṭhe. Tampīti tathā pāsāṇapiṭṭhe laggaṃ tampi rajaṃ.

    ৯৬২. অকতপব্ভারো নাম যথা হেট্ঠাভাগো ৰুট্ঠিফুসিতেহি ন তেমীযতি, তথা নমিত্ৰা ঠিতপব্বতপ্পদেসো। ইদং অনোৰস্সকট্ঠানে উট্ঠিতৰম্মিকানং উপলক্খণং।

    962.Akatapabbhāro nāma yathā heṭṭhābhāgo vuṭṭhiphusitehi na temīyati, tathā namitvā ṭhitapabbatappadeso. Idaṃ anovassakaṭṭhāne uṭṭhitavammikānaṃ upalakkhaṇaṃ.

    ৯৬৩. অব্ভোকাসে ৰুট্ঠিতো ৰম্মিকো সচে ওৰট্ঠো, কং চাতুমাসং ৰিকোপেতুং ৰট্টতীতি সম্বন্ধো। চাতুমাসন্তি ৰিকোপনকিরিযায অচ্চন্তসংযোগে উপযোগৰচনং। রুক্খেতি চ থম্ভপাসাণাদীনং উপলক্খণং। উপচিকাদীনন্তি আদি-সদ্দেন কাল়কিপিল্লিকাদীনং গহণং। সো নযোতি ‘‘ওৰট্ঠদিৰসতো উত্তরি চাতুমাসব্ভন্তরে কোপেতুং ৰট্টতী’’তি যথাৰুত্তো নযো।

    963. Abbhokāse vuṭṭhito vammiko sace ovaṭṭho, kaṃ cātumāsaṃ vikopetuṃ vaṭṭatīti sambandho. Cātumāsanti vikopanakiriyāya accantasaṃyoge upayogavacanaṃ. Rukkheti ca thambhapāsāṇādīnaṃ upalakkhaṇaṃ. Upacikādīnanti ādi-saddena kāḷakipillikādīnaṃ gahaṇaṃ. So nayoti ‘‘ovaṭṭhadivasato uttari cātumāsabbhantare kopetuṃ vaṭṭatī’’ti yathāvutto nayo.

    ৯৬৪. মূসিকুক্কিরং নাম মূসিকাহি উদ্ধটপংসু। মূসিকানং উক্কিরো মূসিকুক্কিরোতি ৰিগ্গহো। গোকণ্টকং নাম গুন্নং খুরানং উট্ঠিতমত্তিকা। গণ্ডুপ্পাদমলং নাম ভূলতায মলমত্তিকা। সম্বন্ধং পন পকতিভূমিং অকোপেন্তেন মত্থকতো গণ্হিতুং ৰট্টতি।

    964.Mūsikukkiraṃ nāma mūsikāhi uddhaṭapaṃsu. Mūsikānaṃ ukkiro mūsikukkiroti viggaho. Gokaṇṭakaṃ nāma gunnaṃ khurānaṃ uṭṭhitamattikā. Gaṇḍuppādamalaṃ nāma bhūlatāya malamattikā. Sambandhaṃ pana pakatibhūmiṃ akopentena matthakato gaṇhituṃ vaṭṭati.

    ৯৬৫. কসীতি কসিতট্ঠানং, তত্থ নঙ্গলেন উদ্ধটমত্তিকা কসিনঙ্গলমত্তিকা। ‘‘অচ্ছিন্না’’তিইমিনা খণ্ডাখণ্ডিকং কত্ৰা আযতং হুত্ৰা ঠিতমত্তিকাপটলম্পি অজাতপথৰী সিযাতি আসঙ্কানিৰত্তনত্থমাহ ‘‘ভূমিসম্বন্ধা’’তি। সাতি কসিনঙ্গলমত্তিকা।

    965.Kasīti kasitaṭṭhānaṃ, tattha naṅgalena uddhaṭamattikā kasinaṅgalamattikā. ‘‘Acchinnā’’tiiminā khaṇḍākhaṇḍikaṃ katvā āyataṃ hutvā ṭhitamattikāpaṭalampi ajātapathavī siyāti āsaṅkānivattanatthamāha ‘‘bhūmisambandhā’’ti. Sāti kasinaṅgalamattikā.

    ৯৬৬. সেনাসনন্তি এত্থ ‘‘পুরাণ’’ন্তি পাঠসেসো গহেতব্বো। ওৰট্ঠং চাতুমাসতো উদ্ধং ন ৰিকোপযেতি যোজনা।

    966.Senāsananti ettha ‘‘purāṇa’’nti pāṭhaseso gahetabbo. Ovaṭṭhaṃ cātumāsato uddhaṃ na vikopayeti yojanā.

    ৯৬৭. ততোতি ওৰট্ঠদিৰসতো পট্ঠায চাতুমাসাতিক্কন্তগেহতো। ‘‘গোপানসি’’ন্তি ইমিনা গোপানসিমত্থকে ঠিতউপচিকাপংসুম্হি ভিজ্জন্তেপি অনাপত্তিভাৰং দীপেতি। ‘‘ভিত্তি’’ন্তি ইমিনা তদেকদেসং ভিত্তিপাদাদিদারুমাহ। ইদম্পি ভিত্তিমত্তিকং উপচিকামত্তিকং সন্ধায ৰুত্তং। ‘‘থম্ভ’’ন্তি ইদম্পি তংসম্বন্ধপাকারভূমিমত্তিকাউপচিকাদিপংসুং সন্ধায ৰুত্তং। পদরত্থরন্তি অত্থতপদরং। ইদম্পি পদরানং উপরি মত্তিকাউপচিকাপংসুং সন্ধায ৰুত্তং। ‘‘গোপানসি’’ন্তিআদীহি পদেহি ‘‘গণ্হিস্সামী’’তি পচ্চেকং যোজনীযং। ‘‘গণ্হিস্সামী’’তি ইমিনা ৰিকোপনাধিপ্পাযাভাৰং দীপেতি।

    967.Tatoti ovaṭṭhadivasato paṭṭhāya cātumāsātikkantagehato. ‘‘Gopānasi’’nti iminā gopānasimatthake ṭhitaupacikāpaṃsumhi bhijjantepi anāpattibhāvaṃ dīpeti. ‘‘Bhitti’’nti iminā tadekadesaṃ bhittipādādidārumāha. Idampi bhittimattikaṃ upacikāmattikaṃ sandhāya vuttaṃ. ‘‘Thambha’’nti idampi taṃsambandhapākārabhūmimattikāupacikādipaṃsuṃ sandhāya vuttaṃ. Padarattharanti atthatapadaraṃ. Idampi padarānaṃ upari mattikāupacikāpaṃsuṃ sandhāya vuttaṃ. ‘‘Gopānasi’’ntiādīhi padehi ‘‘gaṇhissāmī’’ti paccekaṃ yojanīyaṃ. ‘‘Gaṇhissāmī’’ti iminā vikopanādhippāyābhāvaṃ dīpeti.

    ৯৬৮. গণ্হন্তস্সাতি এত্থ অনাদরে সামিৰচনং, ‘‘সুদ্ধচিত্তেনা’’তি পাঠসেসো। ইট্ঠকাতি ছদনিট্ঠকা। আদি-সদ্দেন পাসাণসমুদ্দফেণাদীনং গহণং। পততীতি সুদ্ধচিত্তেন গণ্হন্তে সচে মত্তিকা ছিজ্জিত্ৰা পততি, অনাপত্তীতি অত্থো। মত্তিকন্তি ভিত্তিযং, ছদনে চ চাতুমাসাধিকোৰট্ঠমত্তিকং, অনোৰট্ঠং চে, গণ্হিতুং ৰট্টতীতি। যথাহ অট্ঠকথাযং ‘‘সচে যা যা অতিন্তা, তং তং গণ্হাতি, অনাপত্তী’’তি (পাচি॰ অট্ঠ॰ ৮৬)। যদি গণ্হতি, আপত্তি সিযাতি যোজনা।

    968.Gaṇhantassāti ettha anādare sāmivacanaṃ, ‘‘suddhacittenā’’ti pāṭhaseso. Iṭṭhakāti chadaniṭṭhakā. Ādi-saddena pāsāṇasamuddapheṇādīnaṃ gahaṇaṃ. Patatīti suddhacittena gaṇhante sace mattikā chijjitvā patati, anāpattīti attho. Mattikanti bhittiyaṃ, chadane ca cātumāsādhikovaṭṭhamattikaṃ, anovaṭṭhaṃ ce, gaṇhituṃ vaṭṭatīti. Yathāha aṭṭhakathāyaṃ ‘‘sace yā yā atintā, taṃ taṃ gaṇhāti, anāpattī’’ti (pāci. aṭṭha. 86). Yadi gaṇhati, āpatti siyāti yojanā.

    ৯৬৯. অতিন্তোতি ৰস্সোদকেন অতিন্তো, ইমিনা ৰিনিচ্ছিতব্বৰত্থুং দস্সেতি। তস্স অন্তোগেহে চ বহি চ সম্ভৰতো অন্তোগেহে ঠিতস্স তাৰ ৰিনিচ্ছযং দস্সেতুমাহ ‘‘অন্তোগেহে সচে সিযা’’তি। ৰস্সোদকেন তিন্তাতিন্তেসু দ্ৰীসু মত্তিকাপুঞ্জেসু অতিন্তং তাৰ দস্সেতুমাহ ‘‘অনোৰট্ঠো চা’’তি।

    969.Atintoti vassodakena atinto, iminā vinicchitabbavatthuṃ dasseti. Tassa antogehe ca bahi ca sambhavato antogehe ṭhitassa tāva vinicchayaṃ dassetumāha ‘‘antogehe sace siyā’’ti. Vassodakena tintātintesu dvīsu mattikāpuñjesu atintaṃ tāva dassetumāha ‘‘anovaṭṭho cā’’ti.

    ৯৭০. ৰস্সোদকেন তিন্তে ৰিনিচ্ছযং দস্সেতুমাহ ‘‘ৰুট্ঠে পুন চা’’তিআদি। ‘‘ৰুট্ঠে’’তি ইমিনা ‘‘মত্তিকাপুঞ্জো’’তি পদং ভুম্মৰসেন ৰিপরিণামেত্ৰা ৰুট্ঠে মত্তিকাপুঞ্জেতি যোজেতব্বং, ‘‘একদিৰসম্পী’’তি সেসো, গেহস্মিন্তি এত্থ ‘‘ঠিতে’’তি ৰত্তব্বং, গেহস্মিং ঠিতে মত্তিকাপুঞ্জে ৰস্সোদকেন একদিৰসম্পি তিন্তেতি ৰুত্তং হোতি। ৰক্খমাননযেন অঞ্ঞত্থ পহরিত্ৰা উট্ঠিতেন তেন অতেমিত্ৰা উজুকং পতিতেহি ৰস্সফুসিতেহি তিন্তেতি গহেতব্বং। সচে সব্বো তিন্তো হোতীতি যোজনা। ‘‘মত্তিকাপুঞ্জো’’তি ইমিনা সম্বন্ধো।

    970. Vassodakena tinte vinicchayaṃ dassetumāha ‘‘vuṭṭhe puna cā’’tiādi. ‘‘Vuṭṭhe’’ti iminā ‘‘mattikāpuñjo’’ti padaṃ bhummavasena vipariṇāmetvā vuṭṭhe mattikāpuñjeti yojetabbaṃ, ‘‘ekadivasampī’’ti seso, gehasminti ettha ‘‘ṭhite’’ti vattabbaṃ, gehasmiṃ ṭhite mattikāpuñje vassodakena ekadivasampi tinteti vuttaṃ hoti. Vakkhamānanayena aññattha paharitvā uṭṭhitena tena atemitvā ujukaṃ patitehi vassaphusitehi tinteti gahetabbaṃ. Sace sabbo tinto hotīti yojanā. ‘‘Mattikāpuñjo’’ti iminā sambandho.

    ৯৭১. ‘‘সব্বো’’তি ইমিনা ৰিসেসনেন ব্যৰচ্ছিন্নং একদেসতিন্তে ৰিনিচ্ছযং দস্সেতুমাহ ‘‘যত্তক’’ন্তিআদি। তু-সদ্দো ইমমেৰ ৰিসেসং জোতেতি। যত্তকন্তি হেট্ঠা অনোতরিত্ৰা মত্থকতো, পরিযন্তকতো চ যত্তকপ্পমাণং। তত্থাতি মত্তিকাপুঞ্জে। ‘‘অকপ্পিয’’ন্তি এতস্স ‘‘চাতুমাসচ্চযেনা’’তি অনুৰত্ততি। ‘‘অতিন্তং…পে॰… কপ্পিয’’ন্তি ইমিনা অকপ্পিযট্ঠানং পরিহরিত্ৰা ৰা কপ্পিযকারকেহি কপ্পিযৰচনেন হরাপেত্ৰা ৰা অতিন্তং ঠানং যথাকামং ৰল়ঞ্জেতব্বন্তি অযমত্থো দস্সিতো হোতি। যথাহ অট্ঠকথাযং ‘‘কপ্পিযকারকেহী’’তিআদি (পাচি॰ অট্ঠ॰ ৮৬)।

    971. ‘‘Sabbo’’ti iminā visesanena byavacchinnaṃ ekadesatinte vinicchayaṃ dassetumāha ‘‘yattaka’’ntiādi. Tu-saddo imameva visesaṃ joteti. Yattakanti heṭṭhā anotaritvā matthakato, pariyantakato ca yattakappamāṇaṃ. Tatthāti mattikāpuñje. ‘‘Akappiya’’nti etassa ‘‘cātumāsaccayenā’’ti anuvattati. ‘‘Atintaṃ…pe… kappiya’’nti iminā akappiyaṭṭhānaṃ pariharitvā vā kappiyakārakehi kappiyavacanena harāpetvā vā atintaṃ ṭhānaṃ yathākāmaṃ vaḷañjetabbanti ayamattho dassito hoti. Yathāha aṭṭhakathāyaṃ ‘‘kappiyakārakehī’’tiādi (pāci. aṭṭha. 86).

    ৯৭২. ৰারিনাতি উজুকং আকাসতো পতিতৰস্সোদকেন। অঞ্ঞত্থ পহরিত্ৰা তত্থ পতিত্ৰা তেমিতে ৰট্টতি। সো মত্তিকাপুঞ্জো। ততো পরন্তি একাবদ্ধকালতো উত্তরিং সো মত্তিকাপুঞ্জো ৰারিনা তেমিতো ভূমিযা একাবদ্ধো চে হোতি, ততো পরং সা জাতা পথৰী এৰ, কোপেতুং ন ৰট্টতীতি যোজনা।

    972.Vārināti ujukaṃ ākāsato patitavassodakena. Aññattha paharitvā tattha patitvā temite vaṭṭati. So mattikāpuñjo. Tato paranti ekābaddhakālato uttariṃ so mattikāpuñjo vārinā temito bhūmiyā ekābaddho ce hoti, tato paraṃ sā jātā pathavī eva, kopetuṃ na vaṭṭatīti yojanā.

    ৯৭৩. ‘‘ওৰট্ঠো’’তি ইমিনা অনোৰট্ঠপাকারো কপ্পিযোতি ব্যতিরেকৰসেন দস্সেতি। ‘‘মত্তিকামযো’’তি ৰিসেসনেন ইট্ঠকপাকারাদিং ব্যৰচ্ছিন্দতি। তস্স পন কপ্পিযভাৰং ৰক্খতি ‘‘সচে ইট্ঠকপাকারো’’তিআদিনা। ‘‘চাতুমাসচ্চযে’’তি ইমিনা ততো অন্তো ৰিকোপনীযভাৰং দস্সেতি।

    973.‘‘Ovaṭṭho’’ti iminā anovaṭṭhapākāro kappiyoti byatirekavasena dasseti. ‘‘Mattikāmayo’’ti visesanena iṭṭhakapākārādiṃ byavacchindati. Tassa pana kappiyabhāvaṃ vakkhati ‘‘sace iṭṭhakapākāro’’tiādinā. ‘‘Cātumāsaccaye’’ti iminā tato anto vikopanīyabhāvaṃ dasseti.

    ৯৭৪. তত্থাতি ওৰট্ঠে মত্তিকপাকারে। অঘংসন্তোৰাতি পাকারমত্তিকং অকোপেন্তো। মত্তসো ছুপিত্ৰাতি পমাণতো মুদুকং কত্ৰা হত্থতলং ঠপেত্ৰা। অল্লহত্থেনাতি উদকতিন্তেন হত্থতলেন। হত্থেকদেসো হত্থো নাম।

    974.Tatthāti ovaṭṭhe mattikapākāre. Aghaṃsantovāti pākāramattikaṃ akopento. Mattaso chupitvāti pamāṇato mudukaṃ katvā hatthatalaṃ ṭhapetvā. Allahatthenāti udakatintena hatthatalena. Hatthekadeso hattho nāma.

    ৯৭৫. যেভুয্যকথলে ঠানেতি পুব্বে ৰুত্তনযেন যস্সা তীসু ভাগেসু দ্ৰে ভাগা কথলা হোন্তি, তাদিসে কপ্পিযপথৰিট্ঠানে।

    975.Yebhuyyakathaleṭhāneti pubbe vuttanayena yassā tīsu bhāgesu dve bhāgā kathalā honti, tādise kappiyapathaviṭṭhāne.

    ৯৭৬. অব্ভোকাসেতি উপলক্খণত্তা অন্তোগেহেপি থম্ভং চালেত্ৰা জাতপথৰিং ৰিকোপেতুং ন ৰট্টতীতি দট্ঠব্বং। দ্ৰীসুপি ঠানেসু সুদ্ধচিত্তেন নিদ্দোসভাৰং যথাৰুত্তেন ‘‘থম্ভং ৰা পদরত্থরং। গণ্হিস্সামী’তি সঞ্ঞায, গহেতুং পন ৰট্টতী’’তি ইমিনা নযেনাহ। পথৰিন্তি অকপ্পিযপথৰিং।

    976.Abbhokāseti upalakkhaṇattā antogehepi thambhaṃ cāletvā jātapathaviṃ vikopetuṃ na vaṭṭatīti daṭṭhabbaṃ. Dvīsupi ṭhānesu suddhacittena niddosabhāvaṃ yathāvuttena ‘‘thambhaṃ vā padarattharaṃ. Gaṇhissāmī’ti saññāya, gahetuṃ pana vaṭṭatī’’ti iminā nayenāha. Pathavinti akappiyapathaviṃ.

    ৯৭৭. উজুমুদ্ধরতো ন দোসোতি যোজনা।

    977. Ujumuddharato na dosoti yojanā.

    ৯৭৮. উচ্চালেত্ৰাতি উক্খিপিত্ৰা চালেত্ৰা পরিৰত্তেত্ৰা। পৰট্টতীতি পৰট্টেত্ৰা পৰট্টেত্ৰা নেতীতি অত্থো। সুদ্ধচিত্তস্সাতি ‘‘ভূমি ভিজ্জতী’’তি অসল্লক্খেত্ৰা ‘‘পাসাণং পৰট্টেত্ৰা পৰট্টেত্ৰা হরিস্সামী’’তি সুদ্ধচিত্তৰতো।

    978.Uccāletvāti ukkhipitvā cāletvā parivattetvā. Pavaṭṭatīti pavaṭṭetvā pavaṭṭetvā netīti attho. Suddhacittassāti ‘‘bhūmi bhijjatī’’ti asallakkhetvā ‘‘pāsāṇaṃ pavaṭṭetvā pavaṭṭetvā harissāmī’’ti suddhacittavato.

    ৯৭৯. ভূমিযং দারূনি ফালেন্তানম্পি ভূমিযং সাখাদীনি কড্ঢতো চাতি যোজনা।

    979. Bhūmiyaṃ dārūni phālentānampi bhūmiyaṃ sākhādīni kaḍḍhato cāti yojanā.

    ৯৮০. কণ্টকন্তি রুক্খকণ্টকং, মচ্ছকণ্টকঞ্চ। সূচি নাম অযোমযদন্তমযতম্বমযকট্ঠমযাদিসূচীনং অঞ্ঞতরা। অট্ঠিং ৰাতি গোমহিংসাদীনং অট্ঠিং ৰা। হীরং ৰাতি নাল়িকেরাদিহীরং ৰা। আকোটেতুন্তি যথা এককোটি ভূমিং পৰিসতি, তথা তাল়েতুং। পৰেসেতুন্তি ভূমিং গমযিতুং।

    980.Kaṇṭakanti rukkhakaṇṭakaṃ, macchakaṇṭakañca. Sūci nāma ayomayadantamayatambamayakaṭṭhamayādisūcīnaṃ aññatarā. Aṭṭhiṃ vāti gomahiṃsādīnaṃ aṭṭhiṃ vā. Hīraṃ vāti nāḷikerādihīraṃ vā. Ākoṭetunti yathā ekakoṭi bhūmiṃ pavisati, tathā tāḷetuṃ. Pavesetunti bhūmiṃ gamayituṃ.

    ৯৮১. পস্সাৰং মুত্তং। মেদনিন্তি এত্থ অকপ্পিযপথৰিমাহ। ভিন্দিস্সামীতি এত্থ ‘‘এৰং চিন্তেত্ৰা’’তি সেসো।

    981.Passāvaṃ muttaṃ. Medaninti ettha akappiyapathavimāha. Bhindissāmīti ettha ‘‘evaṃ cintetvā’’ti seso.

    ৯৮২. করোন্তস্সাতি সুদ্ধচিত্তেন পস্সাৰং করোন্তস্সাতিযোজেতব্বং। ‘‘সম্মজ্জতো’’তি ইদং ‘‘সম্মজ্জন্তেনা’’তি গহেতব্বং , ‘‘সম্মজ্জনিযা’’তি সেসো, অনন্তরং মেদনীপদং উপযোগৰসেন ‘‘মেদনি’’ন্তি গহেতব্বং, ‘‘ৰিসম’’ন্তি সেসো, ‘‘সমং কাতু’’ন্তি ইমিনা যোজেতব্বং, সম্মজ্জন্তেন উচ্চট্ঠানং মদ্দিত্ৰা, আৰাটট্ঠানং পৰেসেত্ৰা সমং কাতুং সম্মজ্জনিযা ঘংসেতুং ন ৰট্টতীতি অত্থো। যথাহ অট্ঠকথাযং ‘‘ৰিসমং ভূমিং সমং করিস্সামীতি সম্মজ্জনিযা ঘংসিতুম্পি ন ৰট্টতী’’তি (পাচি॰ অট্ঠ॰ ৮৬)।

    982.Karontassāti suddhacittena passāvaṃ karontassātiyojetabbaṃ. ‘‘Sammajjato’’ti idaṃ ‘‘sammajjantenā’’ti gahetabbaṃ , ‘‘sammajjaniyā’’ti seso, anantaraṃ medanīpadaṃ upayogavasena ‘‘medani’’nti gahetabbaṃ, ‘‘visama’’nti seso, ‘‘samaṃ kātu’’nti iminā yojetabbaṃ, sammajjantena uccaṭṭhānaṃ madditvā, āvāṭaṭṭhānaṃ pavesetvā samaṃ kātuṃ sammajjaniyā ghaṃsetuṃ na vaṭṭatīti attho. Yathāha aṭṭhakathāyaṃ ‘‘visamaṃ bhūmiṃ samaṃ karissāmīti sammajjaniyā ghaṃsitumpi na vaṭṭatī’’ti (pāci. aṭṭha. 86).

    ৯৮৩. পাদঙ্গুট্ঠেন ৰাতি এত্থ সমুচ্চযত্থেন ৰা-সদ্দেন অট্ঠকথাযং ৰুত্তং ‘‘কত্তরযট্ঠিযা ভূমিং কোট্টেন্তী’’তি ইদং সঙ্গণ্হাতি। লিখিতুম্পীতি রাজিং কাতুম্পি ভূমিং ভিন্দন্তেনাতি যোজনা। পাদেহীতি পাদতলেহি।

    983.Pādaṅguṭṭhena vāti ettha samuccayatthena vā-saddena aṭṭhakathāyaṃ vuttaṃ ‘‘kattarayaṭṭhiyā bhūmiṃ koṭṭentī’’ti idaṃ saṅgaṇhāti. Likhitumpīti rājiṃ kātumpi bhūmiṃ bhindantenāti yojanā. Pādehīti pādatalehi.

    ৯৮৫. ভূমিন্তি অকপ্পিযভূমিং। দহতি দহাপেতীতি এত্থ ‘‘যো’’তি চ ‘‘তস্সা’’তি চ সম্বন্ধৰসেন লব্ভতি। পত্তং দহন্তস্সাতি ছৰিযা থিরভাৰত্থং ধূমং গাহাপেত্ৰা তিণুক্কাদীহি পত্তং গণ্হন্তস্স।

    985.Bhūminti akappiyabhūmiṃ. Dahati dahāpetīti ettha ‘‘yo’’ti ca ‘‘tassā’’ti ca sambandhavasena labbhati. Pattaṃ dahantassāti chaviyā thirabhāvatthaṃ dhūmaṃ gāhāpetvā tiṇukkādīhi pattaṃ gaṇhantassa.

    ৯৮৬. তত্তকানেৰাতি ঠানপ্পমাণানেৰ। ইধাপি ‘‘যো’’তি চ ‘‘তস্সা’’তি চ সামত্থিযা লব্ভতি।

    986.Tattakānevāti ṭhānappamāṇāneva. Idhāpi ‘‘yo’’ti ca ‘‘tassā’’ti ca sāmatthiyā labbhati.

    ৯৮৭. ভূমিযন্তি অকপ্পিযভূমিযং। পত্তং পচীযতি এত্থাতি পত্তপচনং, কপালং, তস্মিং কপালে।

    987.Bhūmiyanti akappiyabhūmiyaṃ. Pattaṃ pacīyati etthāti pattapacanaṃ, kapālaṃ, tasmiṃ kapāle.

    ৯৮৮. সো অগ্গি তানি দারূনি দহন্তো গন্ত্ৰা চে একংসেন ভূমিং দহতি, তস্মা দারূনং উপরি অগ্গিং ঠপেতুং ন ৰট্টতীতি যোজনা।

    988.So aggi tāni dārūni dahanto gantvā ce ekaṃsena bhūmiṃ dahati, tasmā dārūnaṃ upari aggiṃ ṭhapetuṃ na vaṭṭatīti yojanā.

    ৯৮৯. ইট্ঠকা আৰপীযন্তি পচ্চন্তি এত্থাতি ইট্ঠকাৰাপো, সো এৰ ইট্ঠকাৰাপকো, ইট্ঠকাপচনট্ঠানং। আদি-সদ্দেন কুম্ভকারাৰাপাদিং সঙ্গণ্হাতি।

    989. Iṭṭhakā āvapīyanti paccanti etthāti iṭṭhakāvāpo, so eva iṭṭhakāvāpako, iṭṭhakāpacanaṭṭhānaṃ. Ādi-saddena kumbhakārāvāpādiṃ saṅgaṇhāti.

    ৯৯০. উপাদীযতীতি উপাদানং, ইন্ধনং, ন উপাদানং অনুপাদানং, ইন্ধনতো অঞ্ঞং, ততো অনুপাদানতোতি অত্থো। খাণুকেতি মতখাণুকে চ সুক্খরুক্খে চ ভূমিগতং অদত্ৰা ‘‘নিব্বাপেস্সামী’’তি অগ্গিদানং ৰট্টতি। পচ্ছা উস্সাহে কতেপি ন নিব্বাযতি, ন দোসোতি। যথাহ অট্ঠকথাযং ‘‘সচে পন ভূমিং অপ্পত্তমেৰা’’তিআদি (পাচি॰ অট্ঠ॰ ৮৭)।

    990. Upādīyatīti upādānaṃ, indhanaṃ, na upādānaṃ anupādānaṃ, indhanato aññaṃ, tato anupādānatoti attho. Khāṇuketi matakhāṇuke ca sukkharukkhe ca bhūmigataṃ adatvā ‘‘nibbāpessāmī’’ti aggidānaṃ vaṭṭati. Pacchā ussāhe katepi na nibbāyati, na dosoti. Yathāha aṭṭhakathāyaṃ ‘‘sace pana bhūmiṃ appattamevā’’tiādi (pāci. aṭṭha. 87).

    ৯৯১. তিণুক্কন্তি তিণেন বদ্ধউক্কং। তিণুক্কন্তি উপলক্খণং। নাল়িকেরপণ্ণাদীহি বদ্ধাপি সঙ্গয্হন্তি।

    991.Tiṇukkanti tiṇena baddhaukkaṃ. Tiṇukkanti upalakkhaṇaṃ. Nāḷikerapaṇṇādīhi baddhāpi saṅgayhanti.

    ৯৯২. তস্স অগ্গিস্স পতিতট্ঠানে ইন্ধনং দত্ৰা পুন তং অগ্গিং কাতুং ৰট্টতীতি মহাপচ্চরিযং রুতং কথিতন্তি যোজনা।

    992.Tassa aggissa patitaṭṭhāne indhanaṃ datvā puna taṃ aggiṃ kātuṃ vaṭṭatīti mahāpaccariyaṃ rutaṃ kathitanti yojanā.

    ৯৯৩. ‘‘তস্স অপথৰিয’’ন্তি পদচ্ছেদো। ৰিমতিস্সুভযত্থাপীতি পথৰিঅপথৰিদ্ৰযেপি ৰেমতিকস্স। তত্থ জাতা পথৰী, ইতরা অপথৰী।

    993. ‘‘Tassa apathaviya’’nti padacchedo. Vimatissubhayatthāpīti pathaviapathavidvayepi vematikassa. Tattha jātā pathavī, itarā apathavī.

    ৯৯৪. ইমন্তি আৰাটং, মত্তিকং, পংসুং ৰা।

    994.Imanti āvāṭaṃ, mattikaṃ, paṃsuṃ vā.

    পথৰীখণনকথাৰণ্ণনা।

    Pathavīkhaṇanakathāvaṇṇanā.

    মুসাৰাদৰগ্গো পঠমো।

    Musāvādavaggo paṭhamo.

    ৯৯৫. ভৰন্তস্সাতি জাযন্তস্স, ৰড্ঢমানস্স চ। ভূতস্সাতি জাতস্স, ৰড্ঢিতস্স চাতি অত্থো। যথাহ অট্ঠকথাযং ‘‘ভৰন্তি অহুৰুঞ্চাতি ভূতা, জাযন্তি ৰড্ঢন্তি, জাতা ৰড্ঢিতা চা’’তি (পাচি॰ অট্ঠ॰ ৯০)। এত্থ চ ‘‘ভৰন্তী’’তি ইমিনা ৰিরুল়্হমূলে নীলভাৰং আপজ্জিত্ৰা ৰড্ঢমানকে তরুণগচ্ছে দস্সেতি। ‘‘অহুৰু’’ন্তি ইমিনা পন ৰড্ঢিত্ৰা ঠিতে মহন্তে রুক্খগচ্ছাদিকে দস্সেতি। ‘‘ভৰন্তী’’তি ইমস্স ৰিৰরণং ‘‘জযন্তি ৰড্ঢন্তী’’তি, ‘‘অহুৰু’’ন্তি ইমস্স ‘‘জাতা ৰড্ঢিতা’’তি। এৰং ভূত-সদ্দো পচ্চুপ্পন্নাতীতৰিসযোতি দস্সেতি। ‘‘ভৰন্তস্স ভূতস্সা’’তি ইমিনা পদদ্ৰযেন ‘‘ভূতগামস্সা’’তি পদস্স তুল্যাধিকরণতাদস্সনেন গাম-সদ্দস্স দিট্ঠিগতৰনন্তাদিসদ্দানং দিট্ঠিৰনাদিসদ্দত্থে ৰিয ভূতসদ্দত্থে ৰুত্তিপক্খমাহ। যথাহ অট্ঠকথাযং (পাচি॰ অট্ঠ॰ ৯০) ‘‘ভূতা এৰ ৰা গামো ভূতগামো, পতিট্ঠিতহরিততিণরুক্খাদীনমেতং অধিৰচন’’ন্তি। ভূতানং দেৰতানং গামো নিৰাসোতি ৰা ভূতগামো। ভূমিযং পতিট্ঠহিত্ৰা হি হরিতভাৰমাপন্না তিণরুক্খগচ্ছাদযো দেৰতাহি পরিগয্হন্তীতি। জাযন্তস্স ৰড্ঢন্তস্স ৰা সম্পত্তৰুদ্ধিমরিযাদস্স ৰা রুক্খাদিনোতি অত্থো।

    995.Bhavantassāti jāyantassa, vaḍḍhamānassa ca. Bhūtassāti jātassa, vaḍḍhitassa cāti attho. Yathāha aṭṭhakathāyaṃ ‘‘bhavanti ahuvuñcāti bhūtā, jāyanti vaḍḍhanti, jātā vaḍḍhitā cā’’ti (pāci. aṭṭha. 90). Ettha ca ‘‘bhavantī’’ti iminā viruḷhamūle nīlabhāvaṃ āpajjitvā vaḍḍhamānake taruṇagacche dasseti. ‘‘Ahuvu’’nti iminā pana vaḍḍhitvā ṭhite mahante rukkhagacchādike dasseti. ‘‘Bhavantī’’ti imassa vivaraṇaṃ ‘‘jayanti vaḍḍhantī’’ti, ‘‘ahuvu’’nti imassa ‘‘jātā vaḍḍhitā’’ti. Evaṃ bhūta-saddo paccuppannātītavisayoti dasseti. ‘‘Bhavantassa bhūtassā’’ti iminā padadvayena ‘‘bhūtagāmassā’’ti padassa tulyādhikaraṇatādassanena gāma-saddassa diṭṭhigatavanantādisaddānaṃ diṭṭhivanādisaddatthe viya bhūtasaddatthe vuttipakkhamāha. Yathāha aṭṭhakathāyaṃ (pāci. aṭṭha. 90) ‘‘bhūtā eva vā gāmo bhūtagāmo, patiṭṭhitaharitatiṇarukkhādīnametaṃ adhivacana’’nti. Bhūtānaṃ devatānaṃ gāmo nivāsoti vā bhūtagāmo. Bhūmiyaṃ patiṭṭhahitvā hi haritabhāvamāpannā tiṇarukkhagacchādayo devatāhi parigayhantīti. Jāyantassa vaḍḍhantassa vā sampattavuddhimariyādassa vā rukkhādinoti attho.

    পাতব্যতানিমিত্তন্তি এত্থ পাতব্যভাৰো পাতব্যতা, ‘‘ছেদনভেদনাদীহি যথারুচি পরিভুঞ্জিতব্বতাতি অত্থো’’তি অট্ঠকথাৰচনতো পাতব্যতা-সদ্দস্স পরিভুঞ্জিতব্বতাতি অত্থো ৰেদিতব্বো, সা নিমিত্তং হেতু যস্স পাচিত্তিযস্স তং পাতব্যতানিমিত্তং। রুক্খাদীনং ছেদনফালনাদিৰসেন ৰিকোপনীযতাসঙ্খাতপাতব্যতানিমিত্তং পরিভুঞ্জিতব্বতাহেতু পাচিত্তিযং উদীরিতং ৰুত্তন্তি অত্থো।

    Pātabyatānimittanti ettha pātabyabhāvo pātabyatā, ‘‘chedanabhedanādīhi yathāruci paribhuñjitabbatāti attho’’ti aṭṭhakathāvacanato pātabyatā-saddassa paribhuñjitabbatāti attho veditabbo, sā nimittaṃ hetu yassa pācittiyassa taṃ pātabyatānimittaṃ. Rukkhādīnaṃ chedanaphālanādivasena vikopanīyatāsaṅkhātapātabyatānimittaṃ paribhuñjitabbatāhetu pācittiyaṃ udīritaṃ vuttanti attho.

    ৯৯৬-৭. সোতি ভূতগামো। তিলবীজাদিকোতি তিলবীজমেত্থ সুখুমপণ্ণসেৰালাদিকো। আদি-সদ্দেন চ তাদিসা ইতরা সেৰালজাতি গহিতা। ‘‘উপরি খুদ্দানুখুদ্দকপণ্ণঙ্কুরো, হেট্ঠা খুদ্দানুখুদ্দকমূলঙ্কুরো সেৰালো তিলবীজং নামা’’তি গণ্ঠিপদে ৰুত্তন্তি। ৰিকোপেন্তস্স তং সব্বন্তি ভূমিযং পতিট্ঠায উদকে জাযমানকসেৰালাদিং ভূমিযা উপ্পাটনচ্ছেদনৰসেন জলে এৰ পতিট্ঠিতং সুখুমপণ্ণনীলিকাদিং উদকতো উদ্ধরণচ্ছেদনৰসেন তং সব্বং সেৰালং ৰিকোপেন্তস্সাতি অত্থো।

    996-7.Soti bhūtagāmo. Tilabījādikoti tilabījamettha sukhumapaṇṇasevālādiko. Ādi-saddena ca tādisā itarā sevālajāti gahitā. ‘‘Upari khuddānukhuddakapaṇṇaṅkuro, heṭṭhā khuddānukhuddakamūlaṅkuro sevālo tilabījaṃ nāmā’’ti gaṇṭhipade vuttanti. Vikopentassa taṃ sabbanti bhūmiyaṃ patiṭṭhāya udake jāyamānakasevālādiṃ bhūmiyā uppāṭanacchedanavasena jale eva patiṭṭhitaṃ sukhumapaṇṇanīlikādiṃ udakato uddharaṇacchedanavasena taṃ sabbaṃ sevālaṃ vikopentassāti attho.

    ৯৯৮. হত্থেন ৰিযূহিত্ৰাতি জলতো অমোচেত্ৰা হত্থেন দূরতো অপনেত্ৰা। ‘‘হোতী’’তিআদি তস্স হেতুসন্দস্সনত্থং। সকলং অনৰসেসং সব্বং জলং তস্স যস্মা ঠানং হোতি, তস্মাতি অত্থো।

    998.Hatthenaviyūhitvāti jalato amocetvā hatthena dūrato apanetvā. ‘‘Hotī’’tiādi tassa hetusandassanatthaṃ. Sakalaṃ anavasesaṃ sabbaṃ jalaṃ tassa yasmā ṭhānaṃ hoti, tasmāti attho.

    ৯৯৯. চেচ্চাতি জানন্তো। তং সেৰালজাতিকং জলা উদ্ধরিতুং উদকেন ৰিনা ভিক্খুস্স ন ৰট্টতীতি যোজনা। ঠানসঙ্কমনঞ্হি তন্তি হেতুদস্সনং। তং তথাকরণং যস্মা ঠানসঙ্কমনং ঠানতো চাৰনং, তস্মা তং ন ৰট্টতীতি যোজনা।

    999.Ceccāti jānanto. Taṃ sevālajātikaṃ jalā uddharituṃ udakena vinā bhikkhussa na vaṭṭatīti yojanā. Ṭhānasaṅkamanañhi tanti hetudassanaṃ. Taṃ tathākaraṇaṃ yasmā ṭhānasaṅkamanaṃ ṭhānato cāvanaṃ, tasmā taṃ na vaṭṭatīti yojanā.

    ১০০০. যথাৰুত্তস্স ব্যতিরেকং দস্সেতুমাহ ‘‘উদকেনা’’তিআদি। তত্থ উদকেনাতি সহত্থে করণৰচনং। তং সেৰালজাতিকং। ৰারিসূতি এত্থ ৰাসং ৰারযন্তীতি ৰারী, তেসু।

    1000. Yathāvuttassa byatirekaṃ dassetumāha ‘‘udakenā’’tiādi. Tattha udakenāti sahatthe karaṇavacanaṃ. Taṃ sevālajātikaṃ. Vārisūti ettha vāsaṃ vārayantīti vārī, tesu.

    ১০০১. জলে ৰল্লিতিণাদীনীতি জলমত্থকে ৰল্লিঞ্চ জাযমানকরৰল্লিতিণাদীনি চ। উদ্ধরন্তস্সাতি ভূমিযং পতিট্ঠিতং ভূমিতো, উদকে পতিট্ঠিতং উদকতো চ উদ্ধরন্তস্স। তত্থ অন্তপক্খং দস্সেতুমাহ ‘‘তোযতো’’তি। ৰিকোপেন্তস্সাতি খণ্ডনাদিৰসেন কোপেন্তস্স। তত্থাতি তস্মিং উদকে, এৰ-কারো লুত্তনিদ্দিট্ঠো ‘‘তত্থেৰা’’তি (পাচি॰ অট্ঠ॰ ৯২) অট্ঠকথাৰচনতো।

    1001.Jale vallitiṇādīnīti jalamatthake valliñca jāyamānakaravallitiṇādīni ca. Uddharantassāti bhūmiyaṃ patiṭṭhitaṃ bhūmito, udake patiṭṭhitaṃ udakato ca uddharantassa. Tattha antapakkhaṃ dassetumāha ‘‘toyato’’ti. Vikopentassāti khaṇḍanādivasena kopentassa. Tatthāti tasmiṃ udake, eva-kāro luttaniddiṭṭho ‘‘tatthevā’’ti (pāci. aṭṭha. 92) aṭṭhakathāvacanato.

    ১০০২. এত্থাতি উদকে এৰ। ৰিকোপেন্তস্সাতি কপ্পিযং অকারাপেত্ৰা ছেদনাদিং করোন্তস্স। তানীতি তথা পরেহি উপ্পাটিতত্তা ভূতগামভাৰতো মুত্তানি ৰল্লিতিণাদীনি। বীজগামেনাতি মূলবীজগামাদিৰসেন।

    1002.Etthāti udake eva. Vikopentassāti kappiyaṃ akārāpetvā chedanādiṃ karontassa. Tānīti tathā parehi uppāṭitattā bhūtagāmabhāvato muttāni vallitiṇādīni. Bījagāmenāti mūlabījagāmādivasena.

    ১০০৩. এৰং উদকট্ঠে সঙ্খেপতো ৰিনিচ্ছযং দস্সেত্ৰা ইদানি ইতরত্রাপি ৰিনিচ্ছযং দস্সেতুমাহ ‘‘থলট্ঠে’’তিআদি। হরিতখাণুকোতি এত্থ ‘‘যো’’তি সেসো। ‘‘তস্সা’’তি ইমিনা সম্বন্ধো, ককুধকরঞ্জাদীনং ছিন্নাৰসিট্ঠখাণুকোতি ৰুত্তং হোতি। ‘‘ভূতগামেন সঙ্গহো’’তি ইমিনা তংৰিকোপনে পাচিত্তিযভাৰং দীপেতি। এৰমুপরিপি।

    1003. Evaṃ udakaṭṭhe saṅkhepato vinicchayaṃ dassetvā idāni itaratrāpi vinicchayaṃ dassetumāha ‘‘thalaṭṭhe’’tiādi. Haritakhāṇukoti ettha ‘‘yo’’ti seso. ‘‘Tassā’’ti iminā sambandho, kakudhakarañjādīnaṃ chinnāvasiṭṭhakhāṇukoti vuttaṃ hoti. ‘‘Bhūtagāmena saṅgaho’’ti iminā taṃvikopane pācittiyabhāvaṃ dīpeti. Evamuparipi.

    ১০০৪. নাল়িকেরাদিকানং খাণূতি এত্থাপি ‘‘উপরিহরিতো’’তি সামত্থিযা লব্ভতি। ‘‘বীজগামেন সঙ্গহো’’তি ইমিনা দুক্কটৰত্থুতমাহ। এৰমুপরিপি। কিঞ্চাপি হি তালনাল়িকেরাদীনং খাণু উদ্ধং অৰড্ঢনকো ভূতগামস্স কারণং ন হোতি, তথাপি ভূতগামসঙ্খাতনিব্বত্তপণ্ণমূলবীজতো সম্ভূতত্তা ভূতগামতো উপ্পন্নো নাম হোতীতি বীজগামেন সঙ্গহং গচ্ছতি।

    1004.Nāḷikerādikānaṃkhāṇūti etthāpi ‘‘upariharito’’ti sāmatthiyā labbhati. ‘‘Bījagāmena saṅgaho’’ti iminā dukkaṭavatthutamāha. Evamuparipi. Kiñcāpi hi tālanāḷikerādīnaṃ khāṇu uddhaṃ avaḍḍhanako bhūtagāmassa kāraṇaṃ na hoti, tathāpi bhūtagāmasaṅkhātanibbattapaṇṇamūlabījato sambhūtattā bhūtagāmato uppanno nāma hotīti bījagāmena saṅgahaṃ gacchati.

    ১০০৫. তথাপকাসিতোতি ‘‘বীজগামো’’তি ৰুত্তো।

    1005.Tathāpakāsitoti ‘‘bījagāmo’’ti vutto.

    ১০০৬. ফলিতা কদলী যাৰ নীলপণ্ণা, তাৰ সা চ ভূতগামোতি পকাসিতাতি যোজনা। যথাহ অট্ঠকথাযং ‘‘কদলী পন ফলিতা যাৰ নীলপণ্ণা, তাৰ ভূতগামেনেৰ সঙ্গহিতা’’তি (পাচি॰ অট্ঠ॰ ৯২)। নল়ন্তি খুদ্দকৰেল়ু। ৰেল়ূতি মহাৰেল়ু। তিণাদীনন্তি আদি-সদ্দেন সস্সাদযো গহিতা।

    1006. Phalitā kadalī yāva nīlapaṇṇā, tāva sā ca bhūtagāmoti pakāsitāti yojanā. Yathāha aṭṭhakathāyaṃ ‘‘kadalī pana phalitā yāva nīlapaṇṇā, tāva bhūtagāmeneva saṅgahitā’’ti (pāci. aṭṭha. 92). Naḷanti khuddakaveḷu. Veḷūti mahāveḷu. Tiṇādīnanti ādi-saddena sassādayo gahitā.

    ১০০৭. যো অযং পন ৰেল়ু অগ্গতো পট্ঠায যদা সুস্সতি, তদা সো বীজগামেন সঙ্গহিতো নাম হোতীতি যোজনা। বীজগামেনাতি ফল়ুবীজগামেন। যথাহ অট্ঠকথাযং ‘‘কতরবীজগামেন? ফল়ুবীজগামেনা’’তি।

    1007. Yo ayaṃ pana veḷu aggato paṭṭhāya yadā sussati, tadā so bījagāmena saṅgahito nāma hotīti yojanā. Bījagāmenāti phaḷubījagāmena. Yathāha aṭṭhakathāyaṃ ‘‘katarabījagāmena? Phaḷubījagāmenā’’ti.

    ১০০৮. ইন্দসালো সল্লকী। আদি-সদ্দেন সোভঞ্জনাদীনং সঙ্গহো। তু-সদ্দেন অট্ঠকথাযং ‘‘কিঞ্চাপি রাসিকতদণ্ডকেহি রতনপ্পমাণাপি সাখা নিক্খমন্তী’’তি (পাচি॰ অট্ঠ॰ ৯২) ৰুত্তৰিসেসং জোতেতি। ছিন্দিত্ৰা ঠপিতদণ্ডকেসু রতনমত্তাসুপি সাখাসু উট্ঠিতাসু ভূতগামং অহুত্ৰা বীজগামমেৰ হোতি অৰিরুল়্হমূলকত্তাতি অযং ৰিনিচ্ছযো ৰিনযঞ্ঞুনা ঞাতো কুক্কুচ্চকানমুপকারায হোতীতি আহ ‘‘ৰিঞ্ঞেয্যো ৰিনযঞ্ঞুনা’’তি। ইমমেৰত্থং ‘‘মূলমত্তেপি ৰা’’তিআদিনা ৰক্খতি।

    1008.Indasālo sallakī. Ādi-saddena sobhañjanādīnaṃ saṅgaho. Tu-saddena aṭṭhakathāyaṃ ‘‘kiñcāpi rāsikatadaṇḍakehi ratanappamāṇāpi sākhā nikkhamantī’’ti (pāci. aṭṭha. 92) vuttavisesaṃ joteti. Chinditvā ṭhapitadaṇḍakesu ratanamattāsupi sākhāsu uṭṭhitāsu bhūtagāmaṃ ahutvā bījagāmameva hoti aviruḷhamūlakattāti ayaṃ vinicchayo vinayaññunā ñāto kukkuccakānamupakārāya hotīti āha ‘‘viññeyyo vinayaññunā’’ti. Imamevatthaṃ ‘‘mūlamattepi vā’’tiādinā vakkhati.

    ১০০৯. মণ্ডপাদীনমত্থাযাতি মণ্ডপৰতিপাকারাদীনমত্থায। সচে তে নিক্খণন্তীতি যদি তে ইন্দসালাদিদণ্ডকে ভূমিযং নিখণন্তি। নিগ্গতে মূলপণ্ণস্মিন্তি তথা নিখাতদণ্ডতো মূলে চ পণ্ণে চ জাতে। ভূতগামেন সঙ্গহোতি এত্থ ‘‘তেস’’ন্তি সামত্থিযা লব্ভতি, ‘‘ৰিঞ্ঞেয্যো’’তি অধিকারো।

    1009.Maṇḍapādīnamatthāyāti maṇḍapavatipākārādīnamatthāya. Sace te nikkhaṇantīti yadi te indasālādidaṇḍake bhūmiyaṃ nikhaṇanti. Niggate mūlapaṇṇasminti tathā nikhātadaṇḍato mūle ca paṇṇe ca jāte. Bhūtagāmena saṅgahoti ettha ‘‘tesa’’nti sāmatthiyā labbhati, ‘‘viññeyyo’’ti adhikāro.

    ১০১০. নিগ্গতেপীতি ততিযেন পি-সদ্দেন অতিখুদ্দকতং সূচেতি।

    1010.Niggatepīti tatiyena pi-saddena atikhuddakataṃ sūceti.

    ১০১১. সকন্দা তালট্ঠীতি সকন্দতালবীজং। পত্তৰট্টীতি সূচিসণ্ঠানা অঙ্কুরপত্তৰট্টি। ন চ বীজগামোতি ৰুচ্চতীতি যোজনা। ‘‘ভূতগামো’’তি ইদং যথাৰুত্তস্স ব্যতিরেকৰসেন দস্সেতি।

    1011.Sakandā tālaṭṭhīti sakandatālabījaṃ. Pattavaṭṭīti sūcisaṇṭhānā aṅkurapattavaṭṭi. Na ca bījagāmoti vuccatīti yojanā. ‘‘Bhūtagāmo’’ti idaṃ yathāvuttassa byatirekavasena dasseti.

    ১০১২. নাল়িকেরতচন্তি নাল়িকেরফলছল্লিং। দন্তসূচীৰাতি দন্তমযসূচি ইৰ। সোপীতি নাল়িকেরোপি। রুক্খতচসদ্দানং ফলেসু ৰত্তমানকালেসুপি তংলিঙ্গতা ন ৰিরুজ্ঝতীতি ‘‘সো’’তি আহাতি ৰিঞ্ঞাযতি।

    1012.Nāḷikeratacanti nāḷikeraphalachalliṃ. Dantasūcīvāti dantamayasūci iva. Sopīti nāḷikeropi. Rukkhatacasaddānaṃ phalesu vattamānakālesupi taṃliṅgatā na virujjhatīti ‘‘so’’ti āhāti viññāyati.

    ১০১৩. মিগসিঙ্গসমানাযাতি হরিতৰিসাণসদিসায। পত্তৰট্টিযাতি অঙ্কুরপত্তৰট্টিযা। সতিযাতি ৰিজ্জমানায। ভূতগামোতি ৰুচ্চতীতি অমূলকভূতগামোতি ৰুচ্চতি। ইদং নাল়িকেরস্স আৰেণিকং কত্ৰা ৰুত্তং।

    1013.Migasiṅgasamānāyāti haritavisāṇasadisāya. Pattavaṭṭiyāti aṅkurapattavaṭṭiyā. Satiyāti vijjamānāya. Bhūtagāmoti vuccatīti amūlakabhūtagāmoti vuccati. Idaṃ nāḷikerassa āveṇikaṃ katvā vuttaṃ.

    চতুভাণৰারৰণ্ণনা নিট্ঠিতা।

    Catubhāṇavāravaṇṇanā niṭṭhitā.

    ১০১৫-৬. অম্বট্ঠীতি অম্ববীজং। জম্বুট্ঠীতি জম্বুবীজং। আদি-সদ্দেন মধুকপনসাদিবীজানং গহণং। ৰন্দাকাতি রুক্খাদনী। অঞ্ঞং ৰাতি ভণ্ডকদলিমনোরহং ৰা। অস্সাতি ৰন্দাকাদিনো। অমূলৰল্লীতি এৰংনামিকা ৰল্লি।

    1015-6.Ambaṭṭhīti ambabījaṃ. Jambuṭṭhīti jambubījaṃ. Ādi-saddena madhukapanasādibījānaṃ gahaṇaṃ. Vandākāti rukkhādanī. Aññaṃ vāti bhaṇḍakadalimanorahaṃ vā. Assāti vandākādino. Amūlavallīti evaṃnāmikā valli.

    ১০১৭. সো সেৰালোতি যোজনা।

    1017. So sevāloti yojanā.

    ১০১৮. ঘংসিত্ৰাতি যেন কেনচি ঘংসিত্ৰা। তং সেৰালং। তস্মাতি তস্মা পাকারা।

    1018.Ghaṃsitvāti yena kenaci ghaṃsitvā. Taṃ sevālaṃ. Tasmāti tasmā pākārā.

    ১০১৯. সেৰালে অপনীতে। অন্তোতি পানীযঘটাদীনং অন্তোকুচ্ছিম্হি। কণ্ণকং অব্বোহারন্তি যোজনা। পানীযঘটাদীনং বহি সেৰালো উদকে অট্ঠিতত্তা, বীজগামানুলোমত্তা চ দুক্কটৰত্থূতি ৰদন্তি। কণ্ণকং নীলৰণ্ণম্পি অব্বোহারিকমেৰ।

    1019.Sevāle apanīte. Antoti pānīyaghaṭādīnaṃ antokucchimhi. Kaṇṇakaṃ abbohāranti yojanā. Pānīyaghaṭādīnaṃ bahi sevālo udake aṭṭhitattā, bījagāmānulomattā ca dukkaṭavatthūti vadanti. Kaṇṇakaṃ nīlavaṇṇampi abbohārikameva.

    ১০২০. পাসাণদদ্দূতি মনুস্সসরীরে রোগাকারেন পাসাণে জাযমানস্সেতং অধিৰচনং। সেৰালন্তি পাসাণসেৰালং। সেলেয্যকা নাম সিলায সম্ভূতা একা সুগন্ধজাতি। অপত্তানীতি পণ্ণরহিতানি।

    1020.Pāsāṇadaddūti manussasarīre rogākārena pāsāṇe jāyamānassetaṃ adhivacanaṃ. Sevālanti pāsāṇasevālaṃ. Seleyyakā nāma silāya sambhūtā ekā sugandhajāti. Apattānīti paṇṇarahitāni.

    ১০২১. পুপ্ফিতন্তি ৰিকসিতং। তং অহিচ্ছত্তং। মকুলন্তি অৰিকসিতং।

    1021.Pupphitanti vikasitaṃ. Taṃ ahicchattaṃ. Makulanti avikasitaṃ.

    ১০২২. অল্লস্মিং রুক্খে তচং ৰিকোপেত্ৰা যথা গহেতুং ন ৰট্টতি, তথা পপ্পটিকম্পি নিয্যাসম্পি ৰিকোপেত্ৰা গহেতুং ন ৰট্টতীতি যোজনা, পাচিত্তিযমেৰাতি অধিপ্পাযো। পপ্পটিকম্পীতি অল্লতচমত্থকে সুক্খতচপটলম্পি। ‘‘অল্লস্মি’’ন্তি ইমিনা ব্যতিরেকেন মতরুক্খে দোসাভাৰং দীপেতি। ‘‘তচং ৰিকোপেত্ৰা’’তি ৰচনতো রুক্খতচম্পি পপ্পটিকম্পি সালকপিত্থাদিনিয্যাসম্পি রুক্খে অল্লতচং অৰিকোপেত্ৰা মত্থকতো ছিন্দিত্ৰা গহেতুং ৰট্টতি।

    1022. Allasmiṃ rukkhe tacaṃ vikopetvā yathā gahetuṃ na vaṭṭati, tathā pappaṭikampi niyyāsampi vikopetvā gahetuṃ na vaṭṭatīti yojanā, pācittiyamevāti adhippāyo. Pappaṭikampīti allatacamatthake sukkhatacapaṭalampi. ‘‘Allasmi’’nti iminā byatirekena matarukkhe dosābhāvaṃ dīpeti. ‘‘Tacaṃ vikopetvā’’ti vacanato rukkhatacampi pappaṭikampi sālakapitthādiniyyāsampi rukkhe allatacaṃ avikopetvā matthakato chinditvā gahetuṃ vaṭṭati.

    ১০২৩. অক্খরচ্ছিন্দনারহেসু নুহিকদলিআদীসু রুক্খেসু, তত্থজাতেসু তালপণ্ণাদিকেসু ৰা অক্খরং লিখতো পাচিত্তিযমুদীরযেতি যোজনা। ‘‘তত্থজাতেসূ’’তি ইমিনা রুক্খতো অপনীতপণ্ণেসু লিখিতুং ৰট্টতীতি ব্যতিরেকতো দীপেতি।

    1023. Akkharacchindanārahesu nuhikadaliādīsu rukkhesu, tatthajātesu tālapaṇṇādikesu vā akkharaṃ likhato pācittiyamudīrayeti yojanā. ‘‘Tatthajātesū’’ti iminā rukkhato apanītapaṇṇesu likhituṃ vaṭṭatīti byatirekato dīpeti.

    ১০২৪. ‘‘পক্কমেৰ ৰা’’তি ৰিসুং ৰচনতো ‘‘ফলং ৰা’’তি ইমিনা অপক্কং ফলং গহিতং।

    1024.‘‘Pakkameva vā’’ti visuṃ vacanato ‘‘phalaṃ vā’’ti iminā apakkaṃ phalaṃ gahitaṃ.

    ১০২৫. ফলিনিংসাখন্তি খাদনারহফলৰতিং জম্বুসাখাদিকং সাখং। গণ্হতো অনুপসম্পন্নস্সাতি গহেতব্বং। সযং খাদিতুকামো চেতি তথা ওনমিত্ৰা সাখতো ওচিনিত্ৰা দিন্নফলং সচে সযং খাদিতুকামো হোতি। এৰং দাতুন্তি যথাৰুত্তপ্পকারং নামেত্ৰা দাতুং।

    1025.Phaliniṃsākhanti khādanārahaphalavatiṃ jambusākhādikaṃ sākhaṃ. Gaṇhato anupasampannassāti gahetabbaṃ. Sayaṃ khāditukāmo ceti tathā onamitvā sākhato ocinitvā dinnaphalaṃ sace sayaṃ khāditukāmo hoti. Evaṃ dātunti yathāvuttappakāraṃ nāmetvā dātuṃ.

    ১০২৬. পরং কঞ্চি উক্খিপিত্ৰাতি অঞ্ঞং কঞ্চি অনুপসম্পন্নং উক্খিপিত্ৰা। পুপ্ফানি ওচিনন্তেসূতি কুসুমানি লুনন্তেসু। অযমেৰ ৰিনিচ্ছযোতি সামঞ্ঞনিদ্দেসেপি এত্থ অত্তনো নামেত্ৰা দিন্নসাখায পুপ্ফানি পানীযৰাসত্থায ন গহেতব্বানি। অনুপসম্পন্নং উক্খিপিত্ৰা পুপ্ফানি ওচিনাপেত্ৰা গহিতপুপ্ফানি গহেতব্বানীতি অযমেত্থ ৰিসেসো। যথাহ অট্ঠকথাযং ‘‘তেহি পন পুপ্ফেহি পানীযং ন ৰাসেতব্বং। পানীযৰাসত্থিকেন সামণেরং উক্খিপিত্ৰা ওচিনাপেতব্বানী’’তি (পাচি॰ অট্ঠ॰ ৯২)।

    1026.Paraṃ kañci ukkhipitvāti aññaṃ kañci anupasampannaṃ ukkhipitvā. Pupphāni ocinantesūti kusumāni lunantesu. Ayameva vinicchayoti sāmaññaniddesepi ettha attano nāmetvā dinnasākhāya pupphāni pānīyavāsatthāya na gahetabbāni. Anupasampannaṃ ukkhipitvā pupphāni ocināpetvā gahitapupphāni gahetabbānīti ayamettha viseso. Yathāha aṭṭhakathāyaṃ ‘‘tehi pana pupphehi pānīyaṃ na vāsetabbaṃ. Pānīyavāsatthikena sāmaṇeraṃ ukkhipitvā ocināpetabbānī’’ti (pāci. aṭṭha. 92).

    ১০২৭. ‘‘সাখা’’তি ভিন্দিত্ৰা ৰা ছিন্দিত্ৰা ৰা মোচিতা ৰুচ্চতি। সাখীনন্তি রুক্খানং। তন্তি যথাৰুত্তরুক্খতো মোচিতসাখং। যেসং রুক্খানং সাখা রুহতি, তেসং সাখীনং তং সাখং কপ্পিযং অকারাপেত্ৰা ৰিকোপেন্তস্স দুক্কটন্তি যোজনা। ‘‘যেসং রুক্খানং সাখা রুহতী’’তি ৰুত্তত্তা যেসং সাখা ন রুহতি, তেসং তস্সা কপ্পিযকরণকিচ্চং নত্থীতি ৰদন্তি।

    1027.‘‘Sākhā’’ti bhinditvā vā chinditvā vā mocitā vuccati. Sākhīnanti rukkhānaṃ. Tanti yathāvuttarukkhato mocitasākhaṃ. Yesaṃ rukkhānaṃ sākhā ruhati, tesaṃ sākhīnaṃ taṃ sākhaṃ kappiyaṃ akārāpetvā vikopentassa dukkaṭanti yojanā. ‘‘Yesaṃ rukkhānaṃ sākhā ruhatī’’ti vuttattā yesaṃ sākhā na ruhati, tesaṃ tassā kappiyakaraṇakiccaṃ natthīti vadanti.

    ১০২৮. অল্লসিঙ্গিৰেরাদিকেসুপীতি আদি-সদ্দেন ৰচলসুণাদীনং গহণং।

    1028.Allasiṅgiverādikesupīti ādi-saddena vacalasuṇādīnaṃ gahaṇaṃ.

    ১০২৯. অনিযামতো ৰট্টতেৰাতি যোজনা। নিযামসরূপং দস্সেতুং ‘‘ইমং রুক্খ’’ন্তিআদিৰক্খমানত্তা অনিযামতোতি সামঞ্ঞনিদ্দেসে ‘‘ইম’’ন্তি নিযামৰচনাভাৰতোতি গহেতব্বং।

    1029. Aniyāmato vaṭṭatevāti yojanā. Niyāmasarūpaṃ dassetuṃ ‘‘imaṃ rukkha’’ntiādivakkhamānattā aniyāmatoti sāmaññaniddese ‘‘ima’’nti niyāmavacanābhāvatoti gahetabbaṃ.

    ১০৩২. উচ্ছুখণ্ডানন্তি পূরণযোগে সামিৰচনং, উচ্ছুখণ্ডেহীতি ৰুত্তং হোতি। সব্বমেৰাতি পচ্ছিযং ঠিতং সব্বং খণ্ডং। কতং হোতীতি কতং কপ্পিযং হোতি। একস্মিং কপ্পিযে কতেতি পচ্ছিযং সব্বখণ্ডেসু ফুসিত্ৰা ঠিতেসু একস্মিং খণ্ডে কপ্পিযে কতে। ‘‘অনুজানামি ভিক্খৰে পঞ্চহি সমণকপ্পেহি ফলং পরিভুঞ্জিতুং অগ্গিপরিজিতং সত্থপরিজিতং নখপরিজিতং অবীজং নিব্বট্টবীজংযেৰ পঞ্চম’’ন্তি (চূল়ৰ॰ ২৫০) ইতি ৰুত্তেসু অগ্গিসত্থনখেসু অঞ্ঞতরেন তত্ত অযোখণ্ডেন ৰা জলিতগ্গিনা ৰা সূচিমুখেন ৰা নখচ্ছেদনেন ৰা সত্থকধারায ৰা মনুস্সসীহাদীনং উপ্পাটিতানুপ্পাটিতঅপূতিনখেন ৰা ৰিজ্ঝিত্ৰা ৰা ছিন্দিত্ৰা ৰা কপ্পিযং কাতব্বং। করোন্তেন চ অনুপসম্পন্নেন ভিক্খুনা ‘‘কপ্পিযং করোহী’’তি ৰুত্তেযেৰ ‘‘কপ্পিয’’ন্তি পঠমং ৰত্ৰা পচ্ছা অগ্গিপরিজিতাদি কাকব্বন্তি গহেতব্বং। ৰক্খতি চ ‘‘কপ্পিযন্তি…পে॰… ৰট্টতী’’তি। ‘‘কপ্পিয’’ন্তি ৰচনং পন যায কাযচি ৰাচায ৰত্তুং ৰট্টতীতি ৰদন্তি। পঠমং অগ্গিং নিক্খিপিত্ৰা নখাদীহি ৰা ৰিজ্ঝিত্ৰা ৰা ছিন্দিত্ৰা ৰা কপ্পিযং কাতব্বং। করোন্তেন চ তং অনুদ্ধরিত্ৰাৰ ‘‘কপ্পিয’’ন্তি ৰত্ৰা পচ্ছা উদ্ধরিতুং ৰট্টতীতি ৰদন্তি, ‘‘কপ্পিয’’ন্তি ৰত্তুকামো ‘‘কপ্প’’ন্তি চে ৰদতি, ৰট্টতীতি কেচি।

    1032.Ucchukhaṇḍānanti pūraṇayoge sāmivacanaṃ, ucchukhaṇḍehīti vuttaṃ hoti. Sabbamevāti pacchiyaṃ ṭhitaṃ sabbaṃ khaṇḍaṃ. Kataṃ hotīti kataṃ kappiyaṃ hoti. Ekasmiṃ kappiye kateti pacchiyaṃ sabbakhaṇḍesu phusitvā ṭhitesu ekasmiṃ khaṇḍe kappiye kate. ‘‘Anujānāmi bhikkhave pañcahi samaṇakappehi phalaṃ paribhuñjituṃ aggiparijitaṃ satthaparijitaṃ nakhaparijitaṃ abījaṃ nibbaṭṭabījaṃyeva pañcama’’nti (cūḷava. 250) iti vuttesu aggisatthanakhesu aññatarena tatta ayokhaṇḍena vā jalitagginā vā sūcimukhena vā nakhacchedanena vā satthakadhārāya vā manussasīhādīnaṃ uppāṭitānuppāṭitaapūtinakhena vā vijjhitvā vā chinditvā vā kappiyaṃ kātabbaṃ. Karontena ca anupasampannena bhikkhunā ‘‘kappiyaṃ karohī’’ti vutteyeva ‘‘kappiya’’nti paṭhamaṃ vatvā pacchā aggiparijitādi kākabbanti gahetabbaṃ. Vakkhati ca ‘‘kappiyanti…pe… vaṭṭatī’’ti. ‘‘Kappiya’’nti vacanaṃ pana yāya kāyaci vācāya vattuṃ vaṭṭatīti vadanti. Paṭhamaṃ aggiṃ nikkhipitvā nakhādīhi vā vijjhitvā vā chinditvā vā kappiyaṃ kātabbaṃ. Karontena ca taṃ anuddharitvāva ‘‘kappiya’’nti vatvā pacchā uddharituṃ vaṭṭatīti vadanti, ‘‘kappiya’’nti vattukāmo ‘‘kappa’’nti ce vadati, vaṭṭatīti keci.

    ১০৩৩. দারুন্তি উচ্ছূহি সদ্ধিং একতোবদ্ধদারুং। দারুং ৰিজ্ঝতীতি এত্থ জানিত্ৰাপি ৰিজ্ঝতি ৰা ৰিজ্ঝাপেতি ৰা, ৰট্টতিযেৰ। ‘‘একসিত্থেপী’’তি এত্থাপি এসেৰ নযো।

    1033.Dārunti ucchūhi saddhiṃ ekatobaddhadāruṃ. Dāruṃ vijjhatīti ettha jānitvāpi vijjhati vā vijjhāpeti vā, vaṭṭatiyeva. ‘‘Ekasitthepī’’ti etthāpi eseva nayo.

    ১০৩৪. তানি উচ্ছুদারূনি। তন্তি ৰল্লিং, রজ্জুং ৰা।

    1034.Tāni ucchudārūni. Tanti valliṃ, rajjuṃ vā.

    ১০৩৫. মরিচপক্কেহীতি পরিণতেহি মরিচপক্কেহি। অপরিণতানং পন অবীজত্তা কপ্পিযে অকতেপি ৰট্টতি। ইদঞ্চ সেতলসুণতচলসুণাদীহি মিস্সভত্তস্স উপলক্খণং। এত্থ চ ভত্তসিত্থসম্বন্ধৰসেন একাবদ্ধতা ৰেদিতব্বা, ন ফলাদীনমেৰ অঞ্ঞমঞ্ঞসম্বন্ধৰসেন।

    1035.Maricapakkehīti pariṇatehi maricapakkehi. Apariṇatānaṃ pana abījattā kappiye akatepi vaṭṭati. Idañca setalasuṇatacalasuṇādīhi missabhattassa upalakkhaṇaṃ. Ettha ca bhattasitthasambandhavasena ekābaddhatā veditabbā, na phalādīnameva aññamaññasambandhavasena.

    ১০৩৬. তিলতণ্ডুলকাদিসূতি কপ্পিযং কাতব্বতিলেহি মিস্সতণ্ডুলাদীসু। আদি-সদ্দেন কপ্পিযং কাতব্বৰত্থূহি মিস্সিতানি ইতরৰত্থূনি গহিতানি। একাবদ্ধে কপিত্থেপীতি কটাহেন বদ্ধবীজে পরিণতকপিত্থফলেপি। কটাহেতি বদ্ধমিঞ্জে কপালে।

    1036.Tilataṇḍulakādisūti kappiyaṃ kātabbatilehi missataṇḍulādīsu. Ādi-saddena kappiyaṃ kātabbavatthūhi missitāni itaravatthūni gahitāni. Ekābaddhe kapitthepīti kaṭāhena baddhabīje pariṇatakapitthaphalepi. Kaṭāheti baddhamiñje kapāle.

    ১০৩৭. কটাহং মুঞ্চিত্ৰাতি সুক্খত্তা সমন্ততো কটাহং মুঞ্চিত্ৰা। মিঞ্জকন্তি পরিণতকপিত্থফলমিঞ্জং। তং কপিত্থং ভিন্দাপেত্ৰাতি কপিত্থকটাহং ভিন্দাপেত্ৰা, ইদং বীজতো মুত্তস্স কটাহস্স ভাজনগতিকত্তা ৰুত্তং।

    1037.Kaṭāhaṃ muñcitvāti sukkhattā samantato kaṭāhaṃ muñcitvā. Miñjakanti pariṇatakapitthaphalamiñjaṃ. Taṃ kapitthaṃ bhindāpetvāti kapitthakaṭāhaṃ bhindāpetvā, idaṃ bījato muttassa kaṭāhassa bhājanagatikattā vuttaṃ.

    ১০৩৮. ‘‘অভূতগামঅবীজেসূ’’তি পদচ্ছেদো, অভূতগামে চ অবীজে চাতি অত্থো। ননু চ ‘‘অবীজে বীজসঞ্ঞী, ৰেমতিকো, আপত্তি দুক্কটস্সা’’তি (পাচি॰ ৯২) পাঠং ৰিনা ‘‘অভূতগামে ভূতগামসঞ্ঞী’’তি পাঠো নত্থীতি অভূতগামগ্গহণং কস্মা কতন্তি? ৰুচ্চতে – তস্মিং পাঠে বীজং ভূতগামঞ্চ বীজগামং বীজঞ্চ বীজবীজন্তি ৰত্তব্বে একসেসনযেন ‘‘বীজ’’ন্তি গহেত্ৰা ৰিনিচ্ছিতন্তি উভযং ৰিভজিত্ৰা দস্সনত্থং ৰুত্তং। তত্থ তস্মিং অভূতগামঅবীজগামদ্ৰযে। ইমিস্সা গাথায ‘‘অভূতগামে ভূতগামসঞ্ঞিনো দুক্কটং, ৰেমতিকস্স দুক্কটং, অবীজগামে বীজগামসঞ্ঞিনো দুক্কটং, ৰেমতিকস্স দুক্কট’’ন্তি চত্তারি দুক্কটানি দস্সিতানি। তত্থ অভূতগামন্তি বীজগামং গহেতব্বং। অবীজগামন্তি নো বীজং।

    1038. ‘‘Abhūtagāmaabījesū’’ti padacchedo, abhūtagāme ca abīje cāti attho. Nanu ca ‘‘abīje bījasaññī, vematiko, āpatti dukkaṭassā’’ti (pāci. 92) pāṭhaṃ vinā ‘‘abhūtagāme bhūtagāmasaññī’’ti pāṭho natthīti abhūtagāmaggahaṇaṃ kasmā katanti? Vuccate – tasmiṃ pāṭhe bījaṃ bhūtagāmañca bījagāmaṃ bījañca bījabījanti vattabbe ekasesanayena ‘‘bīja’’nti gahetvā vinicchitanti ubhayaṃ vibhajitvā dassanatthaṃ vuttaṃ. Tattha tasmiṃ abhūtagāmaabījagāmadvaye. Imissā gāthāya ‘‘abhūtagāme bhūtagāmasaññino dukkaṭaṃ, vematikassa dukkaṭaṃ, abījagāme bījagāmasaññino dukkaṭaṃ, vematikassa dukkaṭa’’nti cattāri dukkaṭāni dassitāni. Tattha abhūtagāmanti bījagāmaṃ gahetabbaṃ. Abījagāmanti no bījaṃ.

    ১০৩৯. তত্থ তস্মিং ভূতগামবীজগামদ্ৰযে। ‘‘অতথাসঞ্ঞিনো’’তিআদীসু ‘‘ভূতগামং ৰিকোপেন্তস্সা’’তি সেসো, অনাপত্তি পকাসিতাতি সম্বন্ধো, অভূতগামং, অবীজন্তি ৰা সঞ্ঞিনো ভূতগামং বীজম্পি ৰিকোপেন্তস্স অনাপত্তি পকাসিতাতি অত্থো গহেতব্বো। যথাহ পাল়িযং ‘‘বীজে অবীজসঞ্ঞী ছিন্দতি ৰা…পে॰… অনাপত্তী’’তি।

    1039.Tattha tasmiṃ bhūtagāmabījagāmadvaye. ‘‘Atathāsaññino’’tiādīsu ‘‘bhūtagāmaṃ vikopentassā’’ti seso, anāpatti pakāsitāti sambandho, abhūtagāmaṃ, abījanti vā saññino bhūtagāmaṃ bījampi vikopentassa anāpatti pakāsitāti attho gahetabbo. Yathāha pāḷiyaṃ ‘‘bīje abījasaññī chindati vā…pe… anāpattī’’ti.

    অসঞ্চিচ্চ ভূতগামং ৰিকোপেন্তস্স অনাপত্তীতি যোজনা। এৰমুপরিপি যোজেতব্বং। গচ্ছন্তস্স পাদেসু গহেত্ৰা ৰা আলম্বণকত্তরযট্ঠিযা ঘংসিত্ৰা ৰা তিণাদীসু ছিজ্জেসুপি ‘‘ইমং ছিন্দিস্সামী’’তি অমনসিকতত্তা অনাপত্তীতি অত্থো। অসতিস্সাতি অঞ্ঞৰিহিতসতিস্স ৰা অঞ্ঞেন কথযতো ৰা পাদঙ্গুট্ঠাদীহি তিণাদীনি ছিন্দন্তস্স। চ-কারেন ইধ অৰুত্তং ‘‘অজানন্তস্সা’’তি ইদং সমুচ্চিতং। ‘‘ইমং ভূতগাম’’ন্তি ৰা ‘‘ইমস্মিং অগ্গিম্হি পতিতে ইমং ডয্হতী’’তি ৰা ‘‘ইমিনা ইদং ভিজ্জতি ছিজ্জতী’’তিআদিং ৰা অজানন্তস্স অনাপত্তীতি অত্থো।

    Asañcicca bhūtagāmaṃ vikopentassa anāpattīti yojanā. Evamuparipi yojetabbaṃ. Gacchantassa pādesu gahetvā vā ālambaṇakattarayaṭṭhiyā ghaṃsitvā vā tiṇādīsu chijjesupi ‘‘imaṃ chindissāmī’’ti amanasikatattā anāpattīti attho. Asatissāti aññavihitasatissa vā aññena kathayato vā pādaṅguṭṭhādīhi tiṇādīni chindantassa. Ca-kārena idha avuttaṃ ‘‘ajānantassā’’ti idaṃ samuccitaṃ. ‘‘Imaṃ bhūtagāma’’nti vā ‘‘imasmiṃ aggimhi patite imaṃ ḍayhatī’’ti vā ‘‘iminā idaṃ bhijjati chijjatī’’tiādiṃ vā ajānantassa anāpattīti attho.

    ১০৪০. ইদং চাতি ইদং ভূতগামসিক্খাপদঞ্চ। তিসমুট্ঠানন্তি কাযচিত্তৰাচাচিত্তকাযৰাচাচিত্তৰসেন তিসমুট্ঠানং। ছেদনাদিকিরিযায আপজ্জনতো ক্রিযং। তিচিত্তন্তি পণ্ণত্তিং অজানিত্ৰা চেতিযাদীসু তিণগহনাদিকং করোন্তস্স অখীণাসৰস্স কুসলং, খীণাসৰস্স কিরিযং, ফলপুপ্ফাদিলোভেন ৰিকোপেন্তানং সেখপুথুজ্জনানং অকুসলন্তি তিচিত্তং।

    1040.Idaṃcāti idaṃ bhūtagāmasikkhāpadañca. Tisamuṭṭhānanti kāyacittavācācittakāyavācācittavasena tisamuṭṭhānaṃ. Chedanādikiriyāya āpajjanato kriyaṃ. Ticittanti paṇṇattiṃ ajānitvā cetiyādīsu tiṇagahanādikaṃ karontassa akhīṇāsavassa kusalaṃ, khīṇāsavassa kiriyaṃ, phalapupphādilobhena vikopentānaṃ sekhaputhujjanānaṃ akusalanti ticittaṃ.

    ভূতগামকথাৰণ্ণনা।

    Bhūtagāmakathāvaṇṇanā.

    ১০৪১. অঞ্ঞৰাদৰিহেসকে কম্মস্মিং সঙ্ঘেন কতেতি যোজনা, অঞ্ঞৰাদকৰিহেসকারোপনকম্মে ঞত্তিদুতিযায কম্মৰাচায পচ্চেকং সঙ্ঘেন কতেতি অত্থো। ‘‘অঞ্ঞং ৰদতীতি অঞ্ঞৰাদকং, অঞ্ঞেনঞ্ঞং পটিচরণস্সেতং নামং। ৰিহেসেতীতি ৰিহেসকং, তুণ্হীভূতস্সেতং নাম’’ন্তি (পাচি॰ অট্ঠ॰ ৯৮) ৰচনতো সঙ্ঘমজ্ঝে ৰত্থুনা, আপত্তিযা ৰা চোদনায কতায তং অৰত্তুকামো হুত্ৰা ‘‘কো আপন্নো, কিং আপন্নো, কিস্মিং আপন্নো’’তিআদিনা (পাচি॰ ৯৪) পদভাজনানুক্কমেন পুচ্ছিতং ঠপেত্ৰা অঞ্ঞস্স অৰচনং অঞ্ঞেনঞ্ঞং পটিচরণং, তং করোন্তো অঞ্ঞৰাদকো। ইধ পন ভাৰপ্পধানৰসেন কিরিযা গহিতা।

    1041. Aññavādavihesake kammasmiṃ saṅghena kateti yojanā, aññavādakavihesakāropanakamme ñattidutiyāya kammavācāya paccekaṃ saṅghena kateti attho. ‘‘Aññaṃ vadatīti aññavādakaṃ, aññenaññaṃ paṭicaraṇassetaṃ nāmaṃ. Vihesetīti vihesakaṃ, tuṇhībhūtassetaṃ nāma’’nti (pāci. aṭṭha. 98) vacanato saṅghamajjhe vatthunā, āpattiyā vā codanāya katāya taṃ avattukāmo hutvā ‘‘ko āpanno, kiṃ āpanno, kismiṃ āpanno’’tiādinā (pāci. 94) padabhājanānukkamena pucchitaṃ ṭhapetvā aññassa avacanaṃ aññenaññaṃ paṭicaraṇaṃ, taṃ karonto aññavādako. Idha pana bhāvappadhānavasena kiriyā gahitā.

    তথেৰ চোদিযমানো হুত্ৰা পুচ্ছিতং অৰত্তুকামো হুত্ৰা আপত্তিভীরুকতায অঞ্ঞেনঞ্ঞং পটিচরণং অকত্ৰা সঙ্ঘং ৰিহেসেতুং তুণ্হীভূতো ৰিহেসকো নাম। এত্থাপি ভাৰপ্পধানৰসেন কিরিযাৰ গহেতব্বা। ইধ পন তব্ভাৰারোপনকম্মং ৰুচ্চতীতি সংখেপো। পুন তথা করোন্তস্সাতি পুনপি তেনেৰ পকারেন অঞ্ঞৰাদকৰিহেসকানি ৰিসুং ৰিসুং করোন্তস্স। পাচিত্তিযদ্ৰযং হোতীতি পদভাজনে ‘‘রোপিতে অঞ্ঞৰাদকে’’তিআদিনা (পাচি॰ ১০০) নযেন চ ‘‘রোপিতে ৰিহেসকে’’তিআদিনা (পাচি॰ ১০০) নযেন চ ৰিসুং ৰিসুং পাচিত্তিযস্স ৰুত্তত্তা একেকস্মিং ৰত্থুম্হি একেকায আপত্তিযা সম্ভৰতো পাচিত্তিযদ্ৰযং হোতীতি গহেতব্বং।

    Tatheva codiyamāno hutvā pucchitaṃ avattukāmo hutvā āpattibhīrukatāya aññenaññaṃ paṭicaraṇaṃ akatvā saṅghaṃ vihesetuṃ tuṇhībhūto vihesako nāma. Etthāpi bhāvappadhānavasena kiriyāva gahetabbā. Idha pana tabbhāvāropanakammaṃ vuccatīti saṃkhepo. Puna tathā karontassāti punapi teneva pakārena aññavādakavihesakāni visuṃ visuṃ karontassa. Pācittiyadvayaṃ hotīti padabhājane ‘‘ropite aññavādake’’tiādinā (pāci. 100) nayena ca ‘‘ropite vihesake’’tiādinā (pāci. 100) nayena ca visuṃ visuṃ pācittiyassa vuttattā ekekasmiṃ vatthumhi ekekāya āpattiyā sambhavato pācittiyadvayaṃ hotīti gahetabbaṃ.

    ১০৪২. ধম্মেতি এত্থ ‘‘কম্মে’’তি সেসো। ধম্মকম্মে ধম্মকম্মসঞ্ঞী, ৰেমতিকো, অধম্মকম্মসঞ্ঞীতি তীসু ৰিকপ্পেসু। অধম্মেতি এত্থাপি এসেৰ নযো। কম্মে অরোপিতেতি অঞ্ঞৰাদককম্মারোপনে অকতে। এৰং ৰদন্তস্সাতি ‘‘কো আপন্নো’’তিআদীনি ৰদন্তস্স। ৰদন্তস্স চাতি এত্থ চকারেন কম্মে অরোপিতে এৰং ৰিহেসন্তস্স চ দুক্কটন্তি সমুচ্চিনোতি। ইমস্মিং পক্খে কম্মে অরোপিতেতি ৰিহেসককালমাহ।

    1042.Dhammeti ettha ‘‘kamme’’ti seso. Dhammakamme dhammakammasaññī, vematiko, adhammakammasaññīti tīsu vikappesu. Adhammeti etthāpi eseva nayo. Kamme aropiteti aññavādakakammāropane akate. Evaṃ vadantassāti ‘‘ko āpanno’’tiādīni vadantassa. Vadantassa cāti ettha cakārena kamme aropite evaṃ vihesantassa ca dukkaṭanti samuccinoti. Imasmiṃ pakkhe kamme aropiteti vihesakakālamāha.

    ১০৪৩. আপন্নন্তি অত্তনা আপন্নং। ভণ্ডনং ভৰিস্সতীতি সঞ্ঞিস্সাতি মযা ইমস্মিং ৰুত্তে সঙ্ঘস্স ভণ্ডনকলহাদযো হোন্তীতি সঞ্ঞায তুণ্হী ভৰন্তস্স। গিলানস্সাতি ৰত্তুং অসক্কুণেয্যমুখরোগাদিযুত্তস্স।

    1043.Āpannanti attanā āpannaṃ. Bhaṇḍanaṃ bhavissatīti saññissāti mayā imasmiṃ vutte saṅghassa bhaṇḍanakalahādayo hontīti saññāya tuṇhī bhavantassa. Gilānassāti vattuṃ asakkuṇeyyamukharogādiyuttassa.

    ১০৪৪. ক্রিযাক্রিযন্তি অঞ্ঞেনঞ্ঞপটিচরণং ক্রিযং। তুণ্হীভাৰো অক্রিযং।

    1044.Kriyākriyanti aññenaññapaṭicaraṇaṃ kriyaṃ. Tuṇhībhāvo akriyaṃ.

    অঞ্ঞৰাদককথাৰণ্ণনা।

    Aññavādakakathāvaṇṇanā.

    ১০৪৫-৬. সম্মতস্সাতি খন্ধকাগতসেনাসনপঞ্ঞাপকসম্মুতিআদীসু তেরসসু সম্মুতীসু একং ৰা কতিপযা ৰা সব্বা ৰা দাতুং সঙ্ঘেন ঞত্তিং ঠপেত্ৰা কম্মৰাচং ৰত্ৰা দিন্নসম্মুতিকস্স। ‘‘উপসম্পন্নং সঙ্ঘেন সম্মত’’ন্তি (পাচি॰ ১০৬) ৰচনতো ভিক্খুনোতি উপসম্পন্নমাহ, অযসং কত্তুকামোতি সম্বন্ধো। ৰদন্তোতি ‘‘ছন্দেন ইত্থন্নামো সেনাসনং পঞ্ঞাপেতি, ছন্দেন ভত্তানি উদ্দিসতী’’তিআদিং ভণন্তো। ‘‘উপসম্পন্নে’’তি ইদং ‘‘উজ্ঝাপেতী’’তি কিরিযমপেক্খিত্ৰা কম্মনি উপযোগবহুৰচনং। অযঞ্হেত্থ অত্থো – উজ্ঝাপেতি অৰঞ্ঞায ওলোকাপেতি, লামকতো ৰা চিন্তাপেতি, খীযতীতি ‘‘ছন্দেন ইত্থন্নামো সেনাসনং পঞ্ঞপেতী’’তিআদিং কথেন্তো পকাসেতীতি। ইমস্মিং পক্খে ‘‘উপসম্পন্নান’’ন্তি ৰত্তব্বে সামিঅত্থে উপযোগৰসেন ‘‘উপসম্পন্নে’’তি ৰুত্তং, উপসম্পন্নানং সন্তিকে পকাসেতীতি অত্থো।

    1045-6.Sammatassāti khandhakāgatasenāsanapaññāpakasammutiādīsu terasasu sammutīsu ekaṃ vā katipayā vā sabbā vā dātuṃ saṅghena ñattiṃ ṭhapetvā kammavācaṃ vatvā dinnasammutikassa. ‘‘Upasampannaṃ saṅghena sammata’’nti (pāci. 106) vacanato bhikkhunoti upasampannamāha, ayasaṃ kattukāmoti sambandho. Vadantoti ‘‘chandena itthannāmo senāsanaṃ paññāpeti, chandena bhattāni uddisatī’’tiādiṃ bhaṇanto. ‘‘Upasampanne’’ti idaṃ ‘‘ujjhāpetī’’ti kiriyamapekkhitvā kammani upayogabahuvacanaṃ. Ayañhettha attho – ujjhāpeti avaññāya olokāpeti, lāmakato vā cintāpeti, khīyatīti ‘‘chandena itthannāmo senāsanaṃ paññapetī’’tiādiṃ kathento pakāsetīti. Imasmiṃ pakkhe ‘‘upasampannāna’’nti vattabbe sāmiatthe upayogavasena ‘‘upasampanne’’ti vuttaṃ, upasampannānaṃ santike pakāsetīti attho.

    ‘‘পাচিত্তিযদ্ৰযং হোতী’’তি ইদং ‘‘উজ্ঝাপনকে খিয্যনকে পাচিত্তিয’’ন্তি (পাচি॰ ১০৫) দ্ৰিন্নং ৰত্থূনং একতো ৰুত্তত্তা ইধাপি একতো ৰুত্তং, ৰিসুং ৰিসুং পন গহেতব্বং। ধম্মেতি এত্থ ‘‘কম্মে’’তি সেসো, উপসম্পন্নস্স সম্মতস্স সঙ্ঘেন দিন্নসম্মুতিকম্মং সচে ধম্মকম্মং হোতীতি অত্থো। অধম্মেতি এত্থাপি এসেৰ নযো।

    ‘‘Pācittiyadvayaṃ hotī’’ti idaṃ ‘‘ujjhāpanake khiyyanake pācittiya’’nti (pāci. 105) dvinnaṃ vatthūnaṃ ekato vuttattā idhāpi ekato vuttaṃ, visuṃ visuṃ pana gahetabbaṃ. Dhammeti ettha ‘‘kamme’’ti seso, upasampannassa sammatassa saṅghena dinnasammutikammaṃ sace dhammakammaṃ hotīti attho. Adhammeti etthāpi eseva nayo.

    ১০৪৭-৮. ভিক্খুনোতি সম্মতস্স ভিক্খুনো। অসম্মতস্স ভিক্খুস্স অৰণ্ণং ভাসতোতি যোজনা। যস্স কস্সচীতি এত্থ ‘‘সন্তিকে’’তি সেসো, উপসম্পন্নস্স চ অনুপসম্পন্নস্স চ যস্স কস্সচি সন্তিকেতি অত্থো। উপসম্পন্নকালে সম্মতং পচ্ছা সামণেরভাৰং উপগতং সন্ধায ‘‘সম্মতস্স সামণেরস্সা’’তি ৰুত্তং। অৰণ্ণং ৰদতোতি যোজনা।

    1047-8.Bhikkhunoti sammatassa bhikkhuno. Asammatassa bhikkhussa avaṇṇaṃ bhāsatoti yojanā. Yassa kassacīti ettha ‘‘santike’’ti seso, upasampannassa ca anupasampannassa ca yassa kassaci santiketi attho. Upasampannakāle sammataṃ pacchā sāmaṇerabhāvaṃ upagataṃ sandhāya ‘‘sammatassa sāmaṇerassā’’ti vuttaṃ. Avaṇṇaṃ vadatoti yojanā.

    ১০৪৯. করোন্তং সম্মতং। ভণতোতি উজ্ঝাপযতো, খীযতো। অত্থো পন ৰুত্তনযোৰ। উজ্ঝাপনখীযনকিরিযাহি আপজ্জনতো ক্রিযং। যস্মা উজ্ঝাপনং, খীযনঞ্চ মুসাৰাদৰসেনেৰ পৰত্তং, তস্মা ‘‘আদিকম্মিকস্স অনাপত্তী’’তি পাচিত্তিযট্ঠানে, দুক্কটট্ঠানে চ ইমিনা চ অনাপত্তিদস্সনত্থং ৰুত্তন্তি গহেতব্বং। এৰঞ্চ কত্ৰা উজ্ঝাপেন্তস্স, খীযন্তস্স চ একক্খণে দ্ৰে দ্ৰে আপত্তিযো হোন্তীতি আপন্নং।

    1049.Karontaṃ sammataṃ. Bhaṇatoti ujjhāpayato, khīyato. Attho pana vuttanayova. Ujjhāpanakhīyanakiriyāhi āpajjanato kriyaṃ. Yasmā ujjhāpanaṃ, khīyanañca musāvādavaseneva pavattaṃ, tasmā ‘‘ādikammikassa anāpattī’’ti pācittiyaṭṭhāne, dukkaṭaṭṭhāne ca iminā ca anāpattidassanatthaṃ vuttanti gahetabbaṃ. Evañca katvā ujjhāpentassa, khīyantassa ca ekakkhaṇe dve dve āpattiyo hontīti āpannaṃ.

    উজ্ঝাপনককথাৰণ্ণনা।

    Ujjhāpanakakathāvaṇṇanā.

    ১০৫০. সঙ্ঘস্স মঞ্চাদিন্তি সম্বন্ধো। ‘‘সঙ্ঘিকং মঞ্চং ৰা পীঠং ৰা ভিসিং ৰা কোচ্ছং ৰা’’তি পাল়িযং দস্সিতং সঙ্ঘসন্তকং মঞ্চাদিং। এত্থ চ মঞ্চো নাম পাল়িযং ‘‘চত্তারো মঞ্চা মসারকো বুন্দিকাবদ্ধো কুল়ীরপাদকো আহচ্চপাদকো’’তি (পাচি॰ ১১১) চ দস্সিতো চতুব্বিধো মঞ্চো। তত্থ মসারকো নাম মঞ্চপাদে ৰিজ্ঝিত্ৰা তত্থ অটনিসিখাহি আৰুণিত্ৰা কতমঞ্চো। সো ইদানি ৰত্তমানো ৰেত্তমঞ্চো। বুন্দিকাবদ্ধো নাম অটনিসীসেসু বুন্দিকরন্তরতো মঞ্চপাদে ডংসাপেত্ৰা কতো ৰেত্তমঞ্চপদরমঞ্চো দট্ঠব্বো। কুল়ীরপাদকো নাম পাদবুন্দে অস্সখুরাদিআকারং দস্সেত্ৰা কক্কটপাদেহি ৰিয ৰঙ্কপাদেহি যোজিতমঞ্চো। আহচ্চপাদকো নাম অটনিযো ৰিজ্ঝিত্ৰা অটনিছিদ্দে পাদসীসে সিখং কত্ৰা তং পৰেসেত্ৰা অটনিযা উপরি নিক্খন্তে পাদসিখামত্থকে তিরিযং ৰিজ্ঝিত্ৰা আণিং পৰেসেত্ৰা কতমঞ্চো।

    1050. Saṅghassa mañcādinti sambandho. ‘‘Saṅghikaṃ mañcaṃ vā pīṭhaṃ vā bhisiṃ vā kocchaṃ vā’’ti pāḷiyaṃ dassitaṃ saṅghasantakaṃ mañcādiṃ. Ettha ca mañco nāma pāḷiyaṃ ‘‘cattāro mañcā masārako bundikābaddho kuḷīrapādako āhaccapādako’’ti (pāci. 111) ca dassito catubbidho mañco. Tattha masārako nāma mañcapāde vijjhitvā tattha aṭanisikhāhi āvuṇitvā katamañco. So idāni vattamāno vettamañco. Bundikābaddho nāma aṭanisīsesu bundikarantarato mañcapāde ḍaṃsāpetvā kato vettamañcapadaramañco daṭṭhabbo. Kuḷīrapādako nāma pādabunde assakhurādiākāraṃ dassetvā kakkaṭapādehi viya vaṅkapādehi yojitamañco. Āhaccapādako nāma aṭaniyo vijjhitvā aṭanichidde pādasīse sikhaṃ katvā taṃ pavesetvā aṭaniyā upari nikkhante pādasikhāmatthake tiriyaṃ vijjhitvā āṇiṃ pavesetvā katamañco.

    পীঠং নাম এৰমেৰ কতং তন্নামকমেৰ চতুব্বিধং।

    Pīṭhaṃ nāma evameva kataṃ tannāmakameva catubbidhaṃ;

    ভিসি নাম ‘‘পঞ্চ ভিসিযো উণ্ণভিসি চোল়ভিসি ৰাকভিসি তিণভিসি পণ্ণভিসী’’তি গব্ভৰসেন দস্সিতা পঞ্চ ভিসিযো। তত্থ উণ্ণা নাম মনুস্সলোমং ঠপেত্ৰা অৰসেসলোমানি। চোল়া নাম পিলোতিকা। ৰাকং নাম মকচিৰাকাদিকং। তিণং নাম দব্বতিণাদি। পণ্ণং নাম তমালপণ্ণং ঠপেত্ৰা অৰসেসপণ্ণং।

    Bhisi nāma ‘‘pañca bhisiyo uṇṇabhisi coḷabhisi vākabhisi tiṇabhisi paṇṇabhisī’’ti gabbhavasena dassitā pañca bhisiyo. Tattha uṇṇā nāma manussalomaṃ ṭhapetvā avasesalomāni. Coḷā nāma pilotikā. Vākaṃ nāma makacivākādikaṃ. Tiṇaṃ nāma dabbatiṇādi. Paṇṇaṃ nāma tamālapaṇṇaṃ ṭhapetvā avasesapaṇṇaṃ.

    কোচ্ছন্তি পাল়িযং ‘‘কোচ্ছং নাম ৰাকমযং ৰা উসীরমযং ৰা মুঞ্জমযং ৰা পব্বজমযং ৰা অন্তো সংৰেঠেত্ৰা বদ্ধং হোতী’’তি (পাচি॰ ১১১) দস্সিতং ৰাকং ৰা উসীরং ৰা মুঞ্জতিণং ৰা এল়কলোমানি ৰা পব্বজতিণং ৰা আদায উভোহি কোটীহি ৰিত্থতং কত্ৰা মজ্ঝে পীল়েত্ৰা সঙ্কুচিত্ৰা তং বন্ধিত্ৰা সীহচম্মাদীহি ৰেঠনবন্ধনানি পটিচ্ছাদেত্ৰা পাদপুঞ্ছনী ৰিয নিসজ্জত্থায কতং আসনন্তি ৰদন্তি। যথাহ অট্ঠকথাযং ‘‘হেট্ঠা চ উপরি চ ৰিত্থতং, মজ্ঝে সংখিত্তং, পণৰসণ্ঠানং কত্ৰা বদ্ধং হোতি, তং কির মজ্ঝে সীহব্যগ্ঘচম্মপরিক্খিত্তম্পি করোন্তি। অকপ্পিযচম্মং নামেত্থ নত্থী’’তিআদি (পাচি॰ অট্ঠ॰ ১১১)। সন্থরাপেত্ৰাতি উপসম্পন্নেন ৰা অনুপসম্পন্নেন ৰা সন্থরাপেত্ৰা। এত্থ ৰিনিচ্ছযং ৰক্খতি। সন্থরিত্ৰাতি সযং সন্থরিত্ৰা ৰা।

    Kocchanti pāḷiyaṃ ‘‘kocchaṃ nāma vākamayaṃ vā usīramayaṃ vā muñjamayaṃ vā pabbajamayaṃ vā anto saṃveṭhetvā baddhaṃ hotī’’ti (pāci. 111) dassitaṃ vākaṃ vā usīraṃ vā muñjatiṇaṃ vā eḷakalomāni vā pabbajatiṇaṃ vā ādāya ubhohi koṭīhi vitthataṃ katvā majjhe pīḷetvā saṅkucitvā taṃ bandhitvā sīhacammādīhi veṭhanabandhanāni paṭicchādetvā pādapuñchanī viya nisajjatthāya kataṃ āsananti vadanti. Yathāha aṭṭhakathāyaṃ ‘‘heṭṭhā ca upari ca vitthataṃ, majjhe saṃkhittaṃ, paṇavasaṇṭhānaṃ katvā baddhaṃ hoti, taṃ kira majjhe sīhabyagghacammaparikkhittampi karonti. Akappiyacammaṃ nāmettha natthī’’tiādi (pāci. aṭṭha. 111). Santharāpetvāti upasampannena vā anupasampannena vā santharāpetvā. Ettha vinicchayaṃ vakkhati. Santharitvāti sayaṃ santharitvā vā.

    ১০৫১. নেৰুদ্ধরেয্যাতি পঞ্ঞত্তট্ঠানতো উদ্ধরিত্ৰা ন পটিসামেয্য। ন উদ্ধরাপেয্য ৰাতি অঞ্ঞেন ৰা তথা ন কারাপেয্য। তন্তি মঞ্চাদিং। পক্কমন্তোতি এত্থ ‘‘যো ভিক্খূ’’তি লব্ভতি, মঞ্চাদীনং অত্থতট্ঠানতো থামমজ্ঝিমস্স পুরিসস্স থামপ্পমাণেন হত্থং পসারেত্ৰা খিত্তপাসাণস্স পতনট্ঠানং অতিক্কম্ম গচ্ছন্তোতি অত্থো। যথাহ পাল়িযং ‘‘মজ্ঝিমস্স পুরিসস্স লেড্ডুপাতং অতিক্কমন্তস্সা’’তি।

    1051.Nevuddhareyyāti paññattaṭṭhānato uddharitvā na paṭisāmeyya. Na uddharāpeyya vāti aññena vā tathā na kārāpeyya. Tanti mañcādiṃ. Pakkamantoti ettha ‘‘yo bhikkhū’’ti labbhati, mañcādīnaṃ atthataṭṭhānato thāmamajjhimassa purisassa thāmappamāṇena hatthaṃ pasāretvā khittapāsāṇassa patanaṭṭhānaṃ atikkamma gacchantoti attho. Yathāha pāḷiyaṃ ‘‘majjhimassa purisassa leḍḍupātaṃ atikkamantassā’’ti.

    ১০৫২. ৰস্সিকে চতুরো মাসেতি অন্তোৰস্সং চাতুমাসে। সচে দেৰো ন ৰস্সতীতি এত্থ ‘‘কত্থচি জনপদে’’তি সেসো। তেনেৰ ‘‘সচে’’তি সাসঙ্কমাহ। ‘‘যেসু জনপদেসু ৰস্সকালে ন ৰস্সতি, তেসুপি চত্তারো মাসে নিক্খিপিতুং ন ৰট্টতিযেৰা’’তি (পাচি॰ অট্ঠ॰ ১১০) অট্ঠকথাযং ৰুত্তং। তথা চাপীতি তে চত্তারো মাসে অৰস্সন্তেপি।

    1052.Vassike caturo māseti antovassaṃ cātumāse. Sace devo na vassatīti ettha ‘‘katthaci janapade’’ti seso. Teneva ‘‘sace’’ti sāsaṅkamāha. ‘‘Yesu janapadesu vassakāle na vassati, tesupi cattāro māse nikkhipituṃ na vaṭṭatiyevā’’ti (pāci. aṭṭha. 110) aṭṭhakathāyaṃ vuttaṃ. Tathā cāpīti te cattāro māse avassantepi.

    ১০৫৩. যত্থাতি যস্মিং লঙ্কাদীপসদিসে দেসে। যত্থ অপরেপি হেমন্তে চত্তারো মাসে দেৰো ৰস্সতি, তত্থ অট্ঠ মাসে অজ্ঝোকাসে মঞ্চাদিং ঠপেতুং ন ৰট্টতীতি যোজনা। গিম্হানে পন চত্তারো মাসে বহি ঠপেতুং ৰট্টতীতি ব্যতিরেকতো দস্সেতি।

    1053.Yatthāti yasmiṃ laṅkādīpasadise dese. Yattha aparepi hemante cattāro māse devo vassati, tattha aṭṭha māse ajjhokāse mañcādiṃ ṭhapetuṃ na vaṭṭatīti yojanā. Gimhāne pana cattāro māse bahi ṭhapetuṃ vaṭṭatīti byatirekato dasseti.

    ১০৫৪. নিৰাসস্মিন্তি রুক্খে কুলাৰকং কত্ৰা নিরন্তরৰাসে সতি। যথাহ অট্ঠকথাযং ‘‘যস্মিং পন ধুৰনিৰাসেন কুলাৰকে কত্ৰা ৰসন্তী’’তি (পাচি॰ অট্ঠ॰ ১১০)। কদাচিপীতি অনোৰস্সকালেপি।

    1054.Nivāsasminti rukkhe kulāvakaṃ katvā nirantaravāse sati. Yathāha aṭṭhakathāyaṃ ‘‘yasmiṃ pana dhuvanivāsena kulāvake katvā vasantī’’ti (pāci. aṭṭha. 110). Kadācipīti anovassakālepi.

    ১০৫৫-৬. সঙ্ঘিকং যং কিঞ্চি মঞ্চাদীতি যোজনা। সন্থতং যদীতি অনাণত্তেন যদি অত্থতং, পঞ্ঞত্তন্তি ৰুত্তং হোতি। যত্থ কত্থচি ঠানেতি রুক্খমূলমণ্ডপঅব্ভোকাসাদিম্হি যত্থ কত্থচি ঠানে। যেন কেনচীতি সদ্ধিৰিহারিকেন ৰা অন্তেৰাসিকেন ৰা অঞ্ঞেন ৰা। ভিক্খুনাতি উপসম্পন্নেন। সোতি যস্সত্থায পঞ্ঞত্তং, সো ভিক্খু।

    1055-6. Saṅghikaṃ yaṃ kiñci mañcādīti yojanā. Santhataṃ yadīti anāṇattena yadi atthataṃ, paññattanti vuttaṃ hoti. Yattha katthaci ṭhāneti rukkhamūlamaṇḍapaabbhokāsādimhi yattha katthaci ṭhāne. Yena kenacīti saddhivihārikena vā antevāsikena vā aññena vā. Bhikkhunāti upasampannena. Soti yassatthāya paññattaṃ, so bhikkhu.

    ১০৫৭. তন্তি তং সঙ্ঘিকং ৰেত্তমঞ্চাদিং। সন্থরাপিত-সদ্দো কত্তুসাধনো, সন্থরিতুং নিযোজকস্সেৰ ভিক্খুনোতি অত্থো।

    1057.Tanti taṃ saṅghikaṃ vettamañcādiṃ. Santharāpita-saddo kattusādhano, santharituṃ niyojakasseva bhikkhunoti attho.

    ১০৫৮. ভিক্খুনাতি এত্থ ‘‘আণাপকো’’তি ৰক্খমানত্তা আণত্তেন ভিক্খুনা উপসম্পন্নেনাতি লব্ভতি। তস্সেৰাতি আণত্তিযা আসনপঞ্ঞাপকস্স তস্সেৰ ভিক্খুনো। ‘‘নিসীদতী’’তি ৰচনস্স উপলক্খণত্তা আগন্ত্ৰা থৰিকং ৰা চীৰরং ৰা যং কিঞ্চিদেৰ ঠপেতি, ‘‘ময্হমেৰ ভারো’’তি ৰা ৰদতি, পঞ্ঞাপকো মুচ্চতীতি গহেতব্বো।

    1058.Bhikkhunāti ettha ‘‘āṇāpako’’ti vakkhamānattā āṇattena bhikkhunā upasampannenāti labbhati. Tassevāti āṇattiyā āsanapaññāpakassa tasseva bhikkhuno. ‘‘Nisīdatī’’ti vacanassa upalakkhaṇattā āgantvā thavikaṃ vā cīvaraṃ vā yaṃ kiñcideva ṭhapeti, ‘‘mayhameva bhāro’’ti vā vadati, paññāpako muccatīti gahetabbo.

    ১০৫৯-৬০. অনাপুচ্ছাতি এত্থ ‘‘যো ভিক্খু ৰা সামণেরো ৰা আরামিকো ৰা লজ্জী হোতি, অত্তনো পলিবোধং ৰিয মঞ্ঞতী’’তি (পাচি॰ অট্ঠ॰ ১১৩) অট্ঠকথায ৰুত্তসরূপং যং কঞ্চি অনাপুচ্ছাতি অত্থো। ‘‘ভিক্খু ৰা সামণেরো ৰা আরামিকো ৰা লজ্জী হোতী’’তি (পাচি॰ অট্ঠ॰ ১১৩) ৰুত্তত্তা অলজ্জিং আপুচ্ছিত্ৰা গন্তুং ন ৰট্টতীতি ৰদন্তি। ‘‘মযং গমিস্সামা’’তি ৰত্ৰা অনুমতিগহণং আপুচ্ছনং নাম, তং অনাপত্তিযা কথং অঙ্গং হোতীতি চে? গমনস্স অনুমতিযা লদ্ধত্তা। ‘‘কপ্পং লভিত্ৰা গন্তব্ব’’ন্তি ৰচনতো অনুমতিদাযকেন ৰত্তাৰত্তং সম্পটিচ্ছিতং ৰিয হোতীতি লদ্ধকপ্পত্তা এৰং গচ্ছতি চে, ৰট্টতি। অনিয্যাতেত্ৰাতি নিয্যাতনং অকত্ৰা ৰত্তাৰত্তং অপ্পটিযাদেত্ৰা, অসম্পটিচ্ছাপেত্ৰাতি ৰুত্তং হোতি। ৰারেতি পদৰারে।

    1059-60.Anāpucchāti ettha ‘‘yo bhikkhu vā sāmaṇero vā ārāmiko vā lajjī hoti, attano palibodhaṃ viya maññatī’’ti (pāci. aṭṭha. 113) aṭṭhakathāya vuttasarūpaṃ yaṃ kañci anāpucchāti attho. ‘‘Bhikkhu vā sāmaṇero vā ārāmiko vā lajjī hotī’’ti (pāci. aṭṭha. 113) vuttattā alajjiṃ āpucchitvā gantuṃ na vaṭṭatīti vadanti. ‘‘Mayaṃ gamissāmā’’ti vatvā anumatigahaṇaṃ āpucchanaṃ nāma, taṃ anāpattiyā kathaṃ aṅgaṃ hotīti ce? Gamanassa anumatiyā laddhattā. ‘‘Kappaṃ labhitvā gantabba’’nti vacanato anumatidāyakena vattāvattaṃ sampaṭicchitaṃ viya hotīti laddhakappattā evaṃ gacchati ce, vaṭṭati. Aniyyātetvāti niyyātanaṃ akatvā vattāvattaṃ appaṭiyādetvā, asampaṭicchāpetvāti vuttaṃ hoti. Vāreti padavāre.

    ১০৬২. তস্মা ঠানাতি অত্তনা ঠত্ৰা আণাপিতভোজনসালতো। যথাহ অট্ঠকথাযং ‘‘ভোজনসালতো নিক্খমিত্ৰা অঞ্ঞত্থ গচ্ছতী’’তি (পাচি॰ অট্ঠ॰ ১১১)।

    1062.Tasmā ṭhānāti attanā ṭhatvā āṇāpitabhojanasālato. Yathāha aṭṭhakathāyaṃ ‘‘bhojanasālato nikkhamitvā aññattha gacchatī’’ti (pāci. aṭṭha. 111).

    ১০৬৩. সঙ্ঘিকে সঙ্ঘিকসঞ্ঞিৰেমতিকপুগ্গলিকসঞ্ঞীনং ৰসেন তিকপাচিত্তিযং। তিকাতীতেনাতি অকুসলমূলত্তিকাদিতো সৰাসনসমুচ্ছেদপ্পহানৰসেন অতিক্কন্তেন। তিকদুক্কটন্তি ‘‘পুগ্গলিকে সঙ্ঘিকসঞ্ঞী, ৰেমতিকো, পুগ্গলিকসঞ্ঞী অঞ্ঞস্স পুগ্গলিকে আপত্তি দুক্কটস্সা’’তি (পাচি॰ ১১২) ৰচনতো দুক্কটত্তযং হোতি।

    1063. Saṅghike saṅghikasaññivematikapuggalikasaññīnaṃ vasena tikapācittiyaṃ. Tikātītenāti akusalamūlattikādito savāsanasamucchedappahānavasena atikkantena. Tikadukkaṭanti ‘‘puggalike saṅghikasaññī, vematiko, puggalikasaññī aññassa puggalike āpatti dukkaṭassā’’ti (pāci. 112) vacanato dukkaṭattayaṃ hoti.

    ১০৬৪-৫. চিমিলিকং নাম পরিকম্মকতায ভূমিযা ছৰিরক্খনত্থং অত্থরিতব্বপিলোতিকং। তট্টিকা নাম তালপণ্ণাদীহি কততট্টিকা। চম্মং সীহচম্মাদি। সেনাসনপরিক্খারে অকপ্পিযচম্মং নাম নত্থি। যথাহ ‘‘অট্ঠকথাসু হি সেনাসনপরিভোগে পটিক্খিত্তচম্মং নাম ন দিস্সতি, তস্মা সীহচম্মাদীনং পরিহরণেযেৰ পটিক্খেপো ৰেদিতব্বো’’তি (পাচি॰ অট্ঠ॰ ১১২)। ইমস্স চ অট্ঠকথাপাঠস্স সারত্থদীপনিযা (সারত্থ॰ টী॰ পাচিত্তিয ৩.১১২) এৰং অত্থো ৰণ্ণিতো –

    1064-5.Cimilikaṃ nāma parikammakatāya bhūmiyā chavirakkhanatthaṃ attharitabbapilotikaṃ. Taṭṭikā nāma tālapaṇṇādīhi katataṭṭikā. Cammaṃ sīhacammādi. Senāsanaparikkhāre akappiyacammaṃ nāma natthi. Yathāha ‘‘aṭṭhakathāsu hi senāsanaparibhoge paṭikkhittacammaṃ nāma na dissati, tasmā sīhacammādīnaṃ pariharaṇeyeva paṭikkhepo veditabbo’’ti (pāci. aṭṭha. 112). Imassa ca aṭṭhakathāpāṭhassa sāratthadīpaniyā (sārattha. ṭī. pācittiya 3.112) evaṃ attho vaṇṇito –

    ‘‘সীহচম্মাদীনং পরিহরণেযেৰ পটিক্খেপো ৰেদিতব্বো’’তি ইমিনা ‘‘ন ভিক্খৰে মহাচম্মানি ধারেতব্বানি সীহচম্মং ব্যগ্ঘচম্মং দীপিচম্মং, যো ধারেয্য, আপত্তি দুক্কটস্সা’’তি এৰং ৰুত্তায খন্ধকপাল়িযা অধিপ্পাযং ৰিভাৰেতি। ইদং ৰুত্তং হোতি – ‘‘অন্তোপি মঞ্চে পঞ্ঞত্তানি হোন্তি, বহিপি মঞ্চে পঞ্ঞত্তানি হোন্তী’’তি (মহাৰ॰ ২৫৫) ইমস্মিং ৰত্থুস্মিং সিক্খাপদস্স পঞ্ঞত্তত্তা মঞ্চপীঠেসু অত্থরিত্ৰা পরিভোগোযেৰ পটিক্খিত্তো, ভূমত্থরণৰসেন পরিভোগো পন অপ্পটিক্খিত্তোতি। যদি এৰং ‘‘পরিহরণেযেৰ পটিক্খেপো’’তি ইদং কস্মা ৰুত্তন্তি? যথা ‘‘অনুজানামি ভিক্খৰে সব্বং পাসাদপরিভোগ’’ন্তি (চূল়ৰ॰ ৩২০) ৰচনতো পুগ্গলিকেপি সেনাসনে সেনাসনপরিভোগৰসেন নিযমিতং সুৰণ্ণঘটাদিকং পরিভুঞ্জিতুং ৰট্টমানম্পি কেৰলং অত্তনো সন্তকং কত্ৰা পরিভুঞ্জিতুং ন ৰট্টতি, এৰমিদং ভূমত্থরণৰসেন পরিভুঞ্জিযমানম্পি অত্তনো সন্তকং কত্ৰা তং তং ৰিহারং হরিত্ৰা পরিভুঞ্জিতুং ন ৰট্টতীতি দস্সনত্থং ‘‘পরিহরণেযেৰ পটিক্খেপো ৰেদিতব্বো’’তি ৰুত্তন্তি।

    ‘‘Sīhacammādīnaṃ pariharaṇeyeva paṭikkhepo veditabbo’’ti iminā ‘‘na bhikkhave mahācammāni dhāretabbāni sīhacammaṃ byagghacammaṃ dīpicammaṃ, yo dhāreyya, āpatti dukkaṭassā’’ti evaṃ vuttāya khandhakapāḷiyā adhippāyaṃ vibhāveti. Idaṃ vuttaṃ hoti – ‘‘antopi mañce paññattāni honti, bahipi mañce paññattāni hontī’’ti (mahāva. 255) imasmiṃ vatthusmiṃ sikkhāpadassa paññattattā mañcapīṭhesu attharitvā paribhogoyeva paṭikkhitto, bhūmattharaṇavasena paribhogo pana appaṭikkhittoti. Yadi evaṃ ‘‘pariharaṇeyeva paṭikkhepo’’ti idaṃ kasmā vuttanti? Yathā ‘‘anujānāmi bhikkhave sabbaṃ pāsādaparibhoga’’nti (cūḷava. 320) vacanato puggalikepi senāsane senāsanaparibhogavasena niyamitaṃ suvaṇṇaghaṭādikaṃ paribhuñjituṃ vaṭṭamānampi kevalaṃ attano santakaṃ katvā paribhuñjituṃ na vaṭṭati, evamidaṃ bhūmattharaṇavasena paribhuñjiyamānampi attano santakaṃ katvā taṃ taṃ vihāraṃ haritvā paribhuñjituṃ na vaṭṭatīti dassanatthaṃ ‘‘pariharaṇeyeva paṭikkhepo veditabbo’’ti vuttanti.

    ‘‘ফলক’’ন্তি ইমিনা পাঠাগতং ফলকপীঠমেৰ দস্সিতং। যথাহ অট্ঠকথাযং ‘‘ফলকপীঠং নাম ফলকমযং পীঠ’’ন্তি (পাচি॰ অট্ঠ॰ ১১২)। পাদপুঞ্ছনিন্তি কদলিৰাকাদীহি কতং পাদপুঞ্ছনিকং। ভূমত্থরণং নাম চিমিলিকায সতি তস্সা উপরি, অসতি সুদ্ধভূমিযং অত্থরিতব্বা কটসারকাদিৰিকতি। উত্তরত্থরণং নাম সঙ্ঘিকমঞ্চপীঠাদীনং উপরি অত্থরিতব্বপচ্চত্থরণং।

    ‘‘Phalaka’’nti iminā pāṭhāgataṃ phalakapīṭhameva dassitaṃ. Yathāha aṭṭhakathāyaṃ ‘‘phalakapīṭhaṃ nāma phalakamayaṃ pīṭha’’nti (pāci. aṭṭha. 112). Pādapuñchaninti kadalivākādīhi kataṃ pādapuñchanikaṃ. Bhūmattharaṇaṃ nāma cimilikāya sati tassā upari, asati suddhabhūmiyaṃ attharitabbā kaṭasārakādivikati. Uttarattharaṇaṃ nāma saṅghikamañcapīṭhādīnaṃ upari attharitabbapaccattharaṇaṃ.

    পত্তাধারকন্তি পত্তৰলযাধারকং। তং যথাৰুত্তপরিক্খারং। গচ্ছতোতি লেড্ডুপাতং অতিক্কম্ম গচ্ছতো। সচে পন দাযকেহি দানকালেযেৰ সহস্সগ্ঘনকম্পি কম্বলং ‘‘পাদপুঞ্ছনিং কত্ৰা পরিভুঞ্জথা’’তি দিন্নং, তথেৰ পরিভুঞ্জিতুং ৰট্টতি। তস্মা ইমং মঞ্চপীঠাদিসেনাসনম্পি ‘‘অব্ভোকাসেপি যথাসুখং পরিভুঞ্জথা’’তি দাযকেহি দিন্নং চে, সব্বস্মিম্পি কালে অব্ভোকাসে নিক্খিপিতুং ৰট্টতীতি ৰদন্তি।

    Pattādhārakanti pattavalayādhārakaṃ. Taṃ yathāvuttaparikkhāraṃ. Gacchatoti leḍḍupātaṃ atikkamma gacchato. Sace pana dāyakehi dānakāleyeva sahassagghanakampi kambalaṃ ‘‘pādapuñchaniṃ katvā paribhuñjathā’’ti dinnaṃ, tatheva paribhuñjituṃ vaṭṭati. Tasmā imaṃ mañcapīṭhādisenāsanampi ‘‘abbhokāsepi yathāsukhaṃ paribhuñjathā’’ti dāyakehi dinnaṃ ce, sabbasmimpi kāle abbhokāse nikkhipituṃ vaṭṭatīti vadanti.

    ১০৬৬. আরঞ্ঞকেনাপি সচে গন্তব্বং হোতি, অনোৰস্সকে নোসতি মঞ্চপীঠাদিং রুক্খস্মিং লগ্গেত্ৰা যথাসুখং গন্তব্বন্তি যোজনা।

    1066. Āraññakenāpi sace gantabbaṃ hoti, anovassake nosati mañcapīṭhādiṃ rukkhasmiṃ laggetvā yathāsukhaṃ gantabbanti yojanā.

    ১০৬৭. উপচিকাদীহীতি এত্থ আদি-সদ্দেন মূসিকা গহিতা। ন লুজ্জতীতি ন নস্সতি। তং সব্বন্তি মঞ্চাদিকং সকলং।

    1067.Upacikādīhīti ettha ādi-saddena mūsikā gahitā. Na lujjatīti na nassati. Taṃ sabbanti mañcādikaṃ sakalaṃ.

    ১০৬৮. অত্তনো সন্তকেতি অত্তনো পুগ্গলিকে মঞ্চাদিৰিসযে। রুদ্ধেতি ৰুড্ঢভিক্খুনা ৰা ইস্সরাদীহি ৰা যক্খসীহাদীহি ৰা মঞ্চাদিকে রুদ্ধে অজ্ঝাৰুত্থে, অভিভৰিত্ৰা গহিতেতি অত্থো । আপদাসুপীতি ব্রহ্মচরিযন্তরাযাদীসু চ সন্তেসু। গচ্ছতো ভিক্খুনো অনাপত্তীতি যোজনা।

    1068.Attano santaketi attano puggalike mañcādivisaye. Ruddheti vuḍḍhabhikkhunā vā issarādīhi vā yakkhasīhādīhi vā mañcādike ruddhe ajjhāvutthe, abhibhavitvā gahiteti attho . Āpadāsupīti brahmacariyantarāyādīsu ca santesu. Gacchato bhikkhuno anāpattīti yojanā.

    ১০৬৯. কাযৰাচতো, কাযৰাচাচিত্ততো চ সমুট্ঠানং কথিনসমুট্ঠানং নাম। পঞ্ঞত্তিং অজানিত্ৰা সযং অনুদ্ধরন্তস্স কাযেন হোতি, অনাপুচ্ছন্তস্স ৰাচায হোতি, পঞ্ঞত্তিং জানিত্ৰা এৰং অকরোন্তস্স সচিত্তকেন তেনেৰ দ্ৰযেন সমুট্ঠাতীতি ৰেদিতব্বং। লেড্ডুপাতাতিক্কমো ক্রিযং। মঞ্চাদীনং অনুদ্ধরণাদি অক্রিযং।

    1069. Kāyavācato, kāyavācācittato ca samuṭṭhānaṃ kathinasamuṭṭhānaṃ nāma. Paññattiṃ ajānitvā sayaṃ anuddharantassa kāyena hoti, anāpucchantassa vācāya hoti, paññattiṃ jānitvā evaṃ akarontassa sacittakena teneva dvayena samuṭṭhātīti veditabbaṃ. Leḍḍupātātikkamo kriyaṃ. Mañcādīnaṃ anuddharaṇādi akriyaṃ.

    পঠমসেনাসনকথাৰণ্ণনা।

    Paṭhamasenāsanakathāvaṇṇanā.

    ১০৭০-৩. ভিসীতি পঠমসিক্খাপদে ৰুত্তপঞ্চপ্পকারা ইমিস্সা অট্ঠকথায ‘‘মঞ্চকভিসি ৰা পীঠকভিসি ৰা’’তি (পাচি॰ অট্ঠ॰ ১১৬) এৰং দস্সিতভিসি চ। পচ্চত্থরণং নাম পাৰারো কোজৰো ৰা। ‘‘এত্তকমেৰ ৰুত্তন্তি অট্ঠকথাসু ৰুত্তং। ‘ইদঞ্চ অট্ঠকথাসু তথাৰুত্তভাৰদস্সনত্থং ৰুত্তং, অঞ্ঞম্পি তাদিসং মঞ্চপীঠেসু অত্থরিতব্বং পচ্চত্থরণমেৰা’তি তীসুপি গণ্ঠিপদেসু ৰুত্ত’’ন্তি (সারত্থ॰ অট্ঠ॰ পাচিত্তিয ৩.১১৬) সারত্থদীপনিযা লিখিতং। নিসীদনন্তি নিসীদনচীৰরং।

    1070-3.Bhisīti paṭhamasikkhāpade vuttapañcappakārā imissā aṭṭhakathāya ‘‘mañcakabhisi vā pīṭhakabhisi vā’’ti (pāci. aṭṭha. 116) evaṃ dassitabhisi ca. Paccattharaṇaṃ nāma pāvāro kojavo vā. ‘‘Ettakameva vuttanti aṭṭhakathāsu vuttaṃ. ‘Idañca aṭṭhakathāsu tathāvuttabhāvadassanatthaṃ vuttaṃ, aññampi tādisaṃ mañcapīṭhesu attharitabbaṃ paccattharaṇamevā’ti tīsupi gaṇṭhipadesu vutta’’nti (sārattha. aṭṭha. pācittiya 3.116) sāratthadīpaniyā likhitaṃ. Nisīdananti nisīdanacīvaraṃ.

    তিণসন্থারো এরকাদীনি তিণানি দ্ৰীসু তীসু ঠানেসু গোপেত্ৰা কতসন্থারো। পণ্ণসন্থারো নাম নাল়িকেরাদিপণ্ণে তথেৰ গোপেত্ৰা কতসন্থারো। সযন্তি এত্থাতি সেয্যা। ‘‘সব্বচ্ছন্নপরিচ্ছন্নে’’তি ইদং সহসেয্যকথায ৰুত্তত্থমেৰ।

    Tiṇasanthāro erakādīni tiṇāni dvīsu tīsu ṭhānesu gopetvā katasanthāro. Paṇṇasanthāro nāma nāḷikerādipaṇṇe tatheva gopetvā katasanthāro. Sayanti etthāti seyyā. ‘‘Sabbacchannaparicchanne’’ti idaṃ sahaseyyakathāya vuttatthameva.

    দসৰিধং সেয্যন্তি দসৰিধাসু সেয্যাসু অঞ্ঞতরন্তি ৰুত্তং হোতি। সন্থরিত্ৰাপি ৰাতি এত্থ পি-সদ্দো সম্পিণ্ডনত্থো, সো সন্থরাপেত্ৰাপীতি ইমং সম্পিণ্ডেতি। ৰা-সদ্দং ‘‘সযং অনুদ্ধরিত্ৰা’’তি এত্থ ‘‘অনুদ্ধরিত্ৰা ৰা’’তি যোজেত্ৰা ‘‘অনুদ্ধরাপেত্ৰা ৰা’’তি অযং ৰিকপ্পো সঙ্গয্হতি। তং সেয্যং।

    Dasavidhaṃ seyyanti dasavidhāsu seyyāsu aññataranti vuttaṃ hoti. Santharitvāpi vāti ettha pi-saddo sampiṇḍanattho, so santharāpetvāpīti imaṃ sampiṇḍeti. Vā-saddaṃ ‘‘sayaṃ anuddharitvā’’ti ettha ‘‘anuddharitvā vā’’ti yojetvā ‘‘anuddharāpetvā vā’’ti ayaṃ vikappo saṅgayhati. Taṃ seyyaṃ.

    আরামস্সূপচারন্তি ‘‘অপরিক্খিত্তস্স উপচারো নাম সেনাসনতো দ্ৰে লেড্ডুপাতা’’তি অট্ঠকথাযং ৰুত্তং উপচারমাহ। অস্সাতি ৰিহারস্স পরিক্খিত্তস্স।

    Ārāmassūpacāranti ‘‘aparikkhittassa upacāro nāma senāsanato dve leḍḍupātā’’ti aṭṭhakathāyaṃ vuttaṃ upacāramāha. Assāti vihārassa parikkhittassa.

    ১০৭৪. উভযেসন্তি সেনাসনসেয্যানং। অন্তোগব্ভে সন্থরিত্ৰা গচ্ছতোতি সম্বন্ধো।

    1074.Ubhayesanti senāsanaseyyānaṃ. Antogabbhe santharitvā gacchatoti sambandho.

    ১০৭৫. উপচারে ৰিহারস্সাতি এত্থ ৰিহারো নাম অন্তোগব্ভাদিসব্বপরিচ্ছন্নগুত্তসেনাসনং। যথাহ অট্ঠকথাযং ‘‘ৰিহারোতি অন্তোগব্ভো ৰা অঞ্ঞং ৰা সব্বপরিচ্ছন্নং গুত্তসেনাসনং ৰেদিতব্ব’’ন্তি (পাচি॰ অট্ঠ॰ ১১৭)। তত্থ উপচারো নাম তংসমীপং ঠানং। যথাহ ‘‘উপচারেতি তস্স বহি আসন্নে ওকাসে’’তি। মণ্ডপো নাম পরিচ্ছন্নাপরিচ্ছন্নসন্নিপাতমণ্ডপো। যথাহ ‘‘মণ্ডপে ৰাতি অপরিচ্ছন্নে পরিচ্ছন্নে ৰাপি বহূনং সন্নিপাতমণ্ডপে’’তি। আদি-সদ্দেন উপট্ঠানসালারুক্খমূলানি সঙ্গহিতানি। উপট্ঠানসালা নাম অগুত্তা ভোজনসালা। যথাহ ‘‘উপট্ঠানসালাযং ৰাতি ভোজনসালাযং ৰা’’তি (পাচি॰ অট্ঠ॰ ১১৭)। অগুত্ততা চ ‘‘ঠানস্স অগুত্ততাযা’’তি (পাচি॰ অট্ঠ॰ ১১৭) অট্ঠকথাৰচনতো ৰেদিতব্বাতি।

    1075.Upacāre vihārassāti ettha vihāro nāma antogabbhādisabbaparicchannaguttasenāsanaṃ. Yathāha aṭṭhakathāyaṃ ‘‘vihāroti antogabbho vā aññaṃ vā sabbaparicchannaṃ guttasenāsanaṃ veditabba’’nti (pāci. aṭṭha. 117). Tattha upacāro nāma taṃsamīpaṃ ṭhānaṃ. Yathāha ‘‘upacāreti tassa bahi āsanne okāse’’ti. Maṇḍapo nāma paricchannāparicchannasannipātamaṇḍapo. Yathāha ‘‘maṇḍape vāti aparicchanne paricchanne vāpi bahūnaṃ sannipātamaṇḍape’’ti. Ādi-saddena upaṭṭhānasālārukkhamūlāni saṅgahitāni. Upaṭṭhānasālā nāma aguttā bhojanasālā. Yathāha ‘‘upaṭṭhānasālāyaṃ vāti bhojanasālāyaṃ vā’’ti (pāci. aṭṭha. 117). Aguttatā ca ‘‘ṭhānassa aguttatāyā’’ti (pāci. aṭṭha. 117) aṭṭhakathāvacanato veditabbāti.

    ১০৭৬. তিকপাচিত্তিযং ৰুত্তন্তি ‘‘সঙ্ঘিকে সঙ্ঘিকসঞ্ঞী, ৰেমতিকো, পুগ্গলিকসঞ্ঞী’’তি ৰারত্তযে পাচিত্তিযত্তযং ৰুত্তং। দসৰত্থূসু ভৰং তদন্তোগধত্তাতি দসৰত্থুকং, দসন্নং ৰা ৰত্থু দসৰত্থু, তংযেৰ দসৰত্থুকন্তি ভিসিআদিকং অঞ্ঞতরং সেয্যাভণ্ডং। তস্সাতি সন্থারকস্স। ‘‘পুগ্গলিকে সঙ্ঘিকসঞ্ঞী, ৰেমতিকো, পুগ্গলিকসঞ্ঞী অঞ্ঞস্স পুগ্গলিকে আপত্তি দুক্কটস্সা’’তি (পাচি॰ ১১৭) তিকদুক্কটং দীপিতং।

    1076.Tikapācittiyaṃ vuttanti ‘‘saṅghike saṅghikasaññī, vematiko, puggalikasaññī’’ti vārattaye pācittiyattayaṃ vuttaṃ. Dasavatthūsu bhavaṃ tadantogadhattāti dasavatthukaṃ, dasannaṃ vā vatthu dasavatthu, taṃyeva dasavatthukanti bhisiādikaṃ aññataraṃ seyyābhaṇḍaṃ. Tassāti santhārakassa. ‘‘Puggalike saṅghikasaññī, vematiko, puggalikasaññī aññassa puggalike āpatti dukkaṭassā’’ti (pāci. 117) tikadukkaṭaṃ dīpitaṃ.

    ১০৭৭. উদ্ধরিত্ৰাতি অত্থতসেয্যং যথা উপচিকাহি ন খজ্জতি, তথা পটিসামেত্ৰা, ‘‘গচ্ছতো’’তি ইমিনা সম্বন্ধো। অঞ্ঞেন ৰুদ্ধভিক্খুইস্সরাদিনা। পলিবুদ্ধেতি সেনাসনে পরিবুদ্ধে নিৰারিতে।

    1077.Uddharitvāti atthataseyyaṃ yathā upacikāhi na khajjati, tathā paṭisāmetvā, ‘‘gacchato’’ti iminā sambandho. Aññena vuddhabhikkhuissarādinā. Palibuddheti senāsane paribuddhe nivārite.

    ১০৭৮. সাপেক্খোৰ চ গন্ত্ৰাতি ‘‘অজ্জেৰ গন্ত্ৰা ইদং পটিসামেস্সামী’’তি অপেক্খাসহিতোৰ গামন্তরাদিং গন্ত্ৰা। যথাহ ‘‘অজ্জেৰ আগন্ত্ৰা পটিজগ্গিস্সামী’তি এৰং সাপেক্খো নদীপারং ৰা গামন্তরং ৰা গন্ত্ৰা’’তি (পাচি॰ অট্ঠ॰ ১১৮)। তত্থ ঠত্ৰাতি গতট্ঠানে ঠত্ৰা, ততো বহি গচ্ছামীতি চিত্তে উপ্পন্নেতি ৰুত্তং হোতি। যথাহ ‘‘যত্থস্স গমনচিত্তং উপ্পন্নং, তত্থেৰ ঠিতো’’তি (পাচি॰ অট্ঠ॰ ১১৮)। তং পুচ্ছতীতি সম্বন্ধো। তং সেয্যং কঞ্চি পেসেত্ৰা আপুচ্ছতীতি ৰুত্তং হোতি। যথাহ ‘‘কঞ্চি পেসেত্ৰা আপুচ্ছতী’’তি (পাচি॰ অট্ঠ॰ ১১৮)। এত্থ চ পুরিমসিক্খাপদে মঞ্চাদীনং পঞ্ঞত্তট্ঠানতো অন্তোৰিহারে ৰা হোতু বহি ৰা, লেড্ডুপাতাতিক্কমেন, ইধ উপচারাতিক্কমেন পাচিত্তিযন্তি অযং ৰিসেসো ৰেদিতব্বো।

    1078.Sāpekkhova ca gantvāti ‘‘ajjeva gantvā idaṃ paṭisāmessāmī’’ti apekkhāsahitova gāmantarādiṃ gantvā. Yathāha ‘‘ajjeva āgantvā paṭijaggissāmī’ti evaṃ sāpekkho nadīpāraṃ vā gāmantaraṃ vā gantvā’’ti (pāci. aṭṭha. 118). Tattha ṭhatvāti gataṭṭhāne ṭhatvā, tato bahi gacchāmīti citte uppanneti vuttaṃ hoti. Yathāha ‘‘yatthassa gamanacittaṃ uppannaṃ, tattheva ṭhito’’ti (pāci. aṭṭha. 118). Taṃ pucchatīti sambandho. Taṃ seyyaṃ kañci pesetvā āpucchatīti vuttaṃ hoti. Yathāha ‘‘kañci pesetvā āpucchatī’’ti (pāci. aṭṭha. 118). Ettha ca purimasikkhāpade mañcādīnaṃ paññattaṭṭhānato antovihāre vā hotu bahi vā, leḍḍupātātikkamena, idha upacārātikkamena pācittiyanti ayaṃ viseso veditabbo.

    অব্ভোকাসম্হি মঞ্চাদিং, ৰিহারে সেয্যমত্তকং।

    Abbhokāsamhi mañcādiṃ, vihāre seyyamattakaṃ;

    হিত্ৰা ৰজন্তস্স দোসো, লেড্ডুপাতূপচারতোতি॥

    Hitvā vajantassa doso, leḍḍupātūpacāratoti.

    দুতিযসেনাসনকথাৰণ্ণনা।

    Dutiyasenāsanakathāvaṇṇanā.

    ১০৭৯. যো ভিক্খু সঙ্ঘিকাৰাসে পুব্বুপগতং ভিক্খুং জানং অনুপখজ্জ সেয্যং কপ্পেয্য চে, অস্স ভিক্খুনো পাচিত্তিযং সিযাতি যোজনা। পুব্বুপগতো নাম ৰস্সগ্গেন পাপেত্ৰা দিন্নং সেনাসনং গহেত্ৰা ৰসন্তো। জানন্তি ‘‘অনুট্ঠাপনীযো অয’’ন্তি জানন্তো। অনুট্ঠাপনীযা নাম ৰুদ্ধাদযো। যথাহ পদভাজনে ‘‘জানাতি নাম ৰুড্ঢোতি, গিলানোতি, সঙ্ঘেন দিন্নোতি জানাতী’’তি (পাচি॰ ১২১)। অনুপখজ্জাতি অনুপৰিসিত্ৰা, তস্স পঠমং পঞ্ঞত্তং মঞ্চাদীনং আসন্নতরং ৰক্খমানলক্খণং উপচারং পৰিসিত্ৰাতি অত্থো। সেয্যং কপ্পেয্যাতি দসৰিধাসু সেয্যাসু অঞ্ঞতরং অত্থরিত্ৰা সযনং করেয্য, নিপজ্জেয্যাতি ৰুত্তং হোতি। ৰক্খতি চ ‘‘দসস্ৰঞ্ঞতরং সেয্য’’ন্তিআদি। ‘‘নিসজ্জং ৰা’’তি সেসো। যথাহ পদভাজনে ‘‘অভিনিসীদতি ৰা অভিনিপজ্জতি ৰা’’তি।

    1079.Yo bhikkhu saṅghikāvāse pubbupagataṃ bhikkhuṃ jānaṃ anupakhajja seyyaṃ kappeyya ce, assa bhikkhuno pācittiyaṃ siyāti yojanā. Pubbupagato nāma vassaggena pāpetvā dinnaṃ senāsanaṃ gahetvā vasanto. Jānanti ‘‘anuṭṭhāpanīyo aya’’nti jānanto. Anuṭṭhāpanīyā nāma vuddhādayo. Yathāha padabhājane ‘‘jānāti nāma vuḍḍhoti, gilānoti, saṅghena dinnoti jānātī’’ti (pāci. 121). Anupakhajjāti anupavisitvā, tassa paṭhamaṃ paññattaṃ mañcādīnaṃ āsannataraṃ vakkhamānalakkhaṇaṃ upacāraṃ pavisitvāti attho. Seyyaṃ kappeyyāti dasavidhāsu seyyāsu aññataraṃ attharitvā sayanaṃ kareyya, nipajjeyyāti vuttaṃ hoti. Vakkhati ca ‘‘dasasvaññataraṃ seyya’’ntiādi. ‘‘Nisajjaṃ vā’’ti seso. Yathāha padabhājane ‘‘abhinisīdati vā abhinipajjati vā’’ti.

    ১০৮০-২. উদ্দিট্ঠমত্থং নিদ্দিসিতুকামো পঠমং ‘‘অনুপখজ্জসেয্যং কপ্পেয্যা’’তি এত্থ ৰিনিচ্ছযং দস্সেতুমাহ ‘‘পাদধোৰনপাসাণা…পে॰… দুক্কট’’ন্তি। সেনাসনং পৰিসন্তস্স ভিক্খুনো পাদধোৰনপাসাণা যাৰ তং মঞ্চং ৰা পীঠং ৰা নিক্খমন্তস্স পন মঞ্চপীঠতো যাৰ পস্সাৰট্ঠানং, এত্থন্তরে তু যং ঠানং, ইদমেৰ উপচারোতি ৰুচ্চতীতি যোজনা। তত্থ উপচারেতি যোজনা। বাধেতুকামস্সাতি ‘‘যস্স সম্বাধো ভৰিস্সতি, সো পক্কমিস্সতী’’তি এৰং উপ্পন্নচিত্তস্স। সযন্তি এত্থাতি ৰিগ্গহো।

    1080-2. Uddiṭṭhamatthaṃ niddisitukāmo paṭhamaṃ ‘‘anupakhajjaseyyaṃ kappeyyā’’ti ettha vinicchayaṃ dassetumāha ‘‘pādadhovanapāsāṇā…pe… dukkaṭa’’nti. Senāsanaṃ pavisantassa bhikkhuno pādadhovanapāsāṇā yāva taṃ mañcaṃ vā pīṭhaṃ vā nikkhamantassa pana mañcapīṭhato yāva passāvaṭṭhānaṃ, etthantare tu yaṃ ṭhānaṃ, idameva upacāroti vuccatīti yojanā. Tattha upacāreti yojanā. Bādhetukāmassāti ‘‘yassa sambādho bhavissati, so pakkamissatī’’ti evaṃ uppannacittassa. Sayanti etthāti viggaho.

    ১৯৮৩. ‘‘পাচিত্তিযস্সা’’তি উদ্দেসতো ৰুত্তং নিদ্দিসিতুমাহ ‘‘নিসীদন্তস্সা’’তিআদি। তত্থাতি তথা অনুপখজ্জ অত্থতায সেয্যায। ‘‘পাচিত্তিযদ্ৰয’’ন্তি ইদং ‘‘দ্ৰেপি করোন্তস্সা’’তি ইমং পচ্ছিমৰিকপ্পং সন্ধায ৰুত্তং। পুরিমৰিকপ্পদ্ৰযে পন ‘‘নিসীদন্তস্স ৰা পাচিত্তিযং, নিপজ্জন্তস্স ৰা পাচিত্তিয’’ন্তি ৰত্তব্বং। ইমস্মিং ৰিকপ্পত্তযে পচ্চেকং ‘‘তিকপাচিত্তিযং তিকদুক্কট’’ন্তি উভযস্সাপি ৰত্তব্বতা অট্ঠকথাযং ৰুত্তা। কথং? সঙ্ঘিকে সঙ্ঘিকসঞ্ঞী, ৰেমতিকো, পুগ্গলিকসঞ্ঞী নিসজ্জং কপ্পেতি, পাচিত্তিযন্তি নিসজ্জায তিকপাচিত্তিযং, এৰং সেয্যায তিকপাচিত্তিযং, উভযত্থ তিকপাচিত্তিযদ্ৰযন্তি এৰং ৰিকপ্পদ্ৰযে দ্ৰাদস পাচিত্তিযানি। পুগ্গলিকে সঙ্ঘিকসঞ্ঞী, ৰেমতিকো, পুগ্গলিকসঞ্ঞী অঞ্ঞস্স পুগ্গলিকে নিসজ্জং কপ্পেতি, দুক্কটন্তি নিসজ্জায তিকদুক্কটং, এৰং সেয্যায তিকদুক্কটং, উভযত্থ তিকদুক্কটদ্ৰযন্তি দ্ৰাদস দুক্কটানি চ ৰেদিতব্বানি।

    1983. ‘‘Pācittiyassā’’ti uddesato vuttaṃ niddisitumāha ‘‘nisīdantassā’’tiādi. Tatthāti tathā anupakhajja atthatāya seyyāya. ‘‘Pācittiyadvaya’’nti idaṃ ‘‘dvepi karontassā’’ti imaṃ pacchimavikappaṃ sandhāya vuttaṃ. Purimavikappadvaye pana ‘‘nisīdantassa vā pācittiyaṃ, nipajjantassa vā pācittiya’’nti vattabbaṃ. Imasmiṃ vikappattaye paccekaṃ ‘‘tikapācittiyaṃ tikadukkaṭa’’nti ubhayassāpi vattabbatā aṭṭhakathāyaṃ vuttā. Kathaṃ? Saṅghike saṅghikasaññī, vematiko, puggalikasaññī nisajjaṃ kappeti, pācittiyanti nisajjāya tikapācittiyaṃ, evaṃ seyyāya tikapācittiyaṃ, ubhayattha tikapācittiyadvayanti evaṃ vikappadvaye dvādasa pācittiyāni. Puggalike saṅghikasaññī, vematiko, puggalikasaññī aññassa puggalike nisajjaṃ kappeti, dukkaṭanti nisajjāya tikadukkaṭaṃ, evaṃ seyyāya tikadukkaṭaṃ, ubhayattha tikadukkaṭadvayanti dvādasa dukkaṭāni ca veditabbāni.

    ১০৮৪. করোন্তস্সাতি এত্থ ‘‘নিসীদনাদি’’ন্তি পকরণতো লব্ভতি। তিকপাচিত্তিযং ৰুত্তন্তি ‘‘সঙ্ঘিকে সঙ্ঘিকসঞ্ঞী, ৰেমতিকো, পুগ্গলিকসঞ্ঞী’’তি ৰিকপ্পত্তযে তিকপাচিত্তিযং পাল়িযং (পাচি॰ ১২২) ৰুত্তং। এৰং পুগ্গলিকেপি তিকদুক্কটং ৰুত্তং। তেনাহ ‘‘পুগ্গলে তিকদুক্কট’’ন্তি। ইমিনা যথাৰুত্তপাচিত্তিযদুক্কটানি সামঞ্ঞেন তিকে পক্খিপিত্ৰা এৰং ৰুত্তানীতি ৰেদিতব্বং।

    1084.Karontassāti ettha ‘‘nisīdanādi’’nti pakaraṇato labbhati. Tikapācittiyaṃ vuttanti ‘‘saṅghike saṅghikasaññī, vematiko, puggalikasaññī’’ti vikappattaye tikapācittiyaṃ pāḷiyaṃ (pāci. 122) vuttaṃ. Evaṃ puggalikepi tikadukkaṭaṃ vuttaṃ. Tenāha ‘‘puggale tikadukkaṭa’’nti. Iminā yathāvuttapācittiyadukkaṭāni sāmaññena tike pakkhipitvā evaṃ vuttānīti veditabbaṃ.

    ১০৮৫-৬. ‘‘ৰুত্তূপচার’’ন্তিআদিগাথাদ্ৰযে ৰিহারস্স ৰুত্তূপচারং মুঞ্চিত্ৰা উপচারে ৰা অব্ভোকাসেপি ৰা সন্থরতোপি ৰা সন্থরাপযতোপি ৰা তত্থ নিসীদতো ৰা দুক্কটং ৰুত্তং। তত্থ সব্বত্থেৰ তস্স নিৰাসো ৰারিতোতি যোজনা। তত্থ ৰিহারস্সাতি যথাৰুত্তসেনাসনস্স। উপচারেতি অৰিদূরে। অব্ভোকাসেতি তস্স সেনাসনস্স নচ্চাসন্নে অঙ্গণপ্পদেসে।

    1085-6.‘‘Vuttūpacāra’’ntiādigāthādvaye vihārassa vuttūpacāraṃ muñcitvā upacāre vā abbhokāsepi vā santharatopi vā santharāpayatopi vā tattha nisīdato vā dukkaṭaṃ vuttaṃ. Tattha sabbattheva tassa nivāso vāritoti yojanā. Tattha vihārassāti yathāvuttasenāsanassa. Upacāreti avidūre. Abbhokāseti tassa senāsanassa naccāsanne aṅgaṇappadese.

    নিসীদতো ৰাতি ৰাগ্গহণেন নিপজ্জতো ৰা দ্ৰেপি করোন্তস্স ৰাতি সঙ্গণ্হাতি। যথাহ পাল়িযং ‘‘অভিনিসীদতি ৰা অভিনিপজ্জতি ৰা, আপত্তি দুক্কটস্সা’’তি (পাচি॰ ১২২)। তত্থাতি তস্মিং পুব্বূপগতস্স পত্তে সেনাসনে। সব্বত্থেৰাতি যথাৰুত্তূপচারতো অন্তো চ বহি চ অন্তমসো অজ্ঝোকাসেপীতি সব্বত্থেৰ। তস্সাতি অনত্তমনস্স অনুপখজ্জ সেয্যং কপ্পযতো তস্স ৰিসভাগপুগ্গলস্স। নিৰাসো ৰারিতো পরৰিহেঠকেন সহৰাসস্স মহানত্থকরত্তাতি অধিপ্পাযো। যথাহ অট্ঠকথাযং ‘‘এৰরূপেন হি ৰিসভাগপুগ্গলেন একৰিহারে ৰা একঙ্গণে ৰা ৰসন্তেন অত্থো নত্থি, তস্মা সব্বত্থেৰস্স নিৰাসো ৰারিতো’’তি (পাচি॰ অট্ঠ॰ ১২২)।

    Nisīdato vāti vāggahaṇena nipajjato vā dvepi karontassa vāti saṅgaṇhāti. Yathāha pāḷiyaṃ ‘‘abhinisīdati vā abhinipajjati vā, āpatti dukkaṭassā’’ti (pāci. 122). Tatthāti tasmiṃ pubbūpagatassa patte senāsane. Sabbatthevāti yathāvuttūpacārato anto ca bahi ca antamaso ajjhokāsepīti sabbattheva. Tassāti anattamanassa anupakhajja seyyaṃ kappayato tassa visabhāgapuggalassa. Nivāso vārito paraviheṭhakena sahavāsassa mahānatthakarattāti adhippāyo. Yathāha aṭṭhakathāyaṃ ‘‘evarūpena hi visabhāgapuggalena ekavihāre vā ekaṅgaṇe vā vasantena attho natthi, tasmā sabbatthevassa nivāso vārito’’ti (pāci. aṭṭha. 122).

    ১০৮৭. ‘‘সীতাদিউপপীল়িতস্সা’’তি পদচ্ছেদো, সীতাদীহি উপপীল়িতস্স বাধিতস্সাতি অত্থো। আদি-সদ্দেন ‘‘উণ্হেন ৰা’’তিআদিকং সঙ্গণ্হাতি। যথাহ ‘‘সীতেন ৰা উণ্হেন ৰা পীল়িতো পৰিসতী’’তি। এত্থ আপদা নাম বহি সযন্তস্স জীৰিতব্রহ্মচরিযন্তরাযাপজ্জনং।

    1087. ‘‘Sītādiupapīḷitassā’’ti padacchedo, sītādīhi upapīḷitassa bādhitassāti attho. Ādi-saddena ‘‘uṇhena vā’’tiādikaṃ saṅgaṇhāti. Yathāha ‘‘sītena vā uṇhena vā pīḷito pavisatī’’ti. Ettha āpadā nāma bahi sayantassa jīvitabrahmacariyantarāyāpajjanaṃ.

    ১০৮৮. ইদং সিক্খাপদং দুক্খৰেদনং হোতীতি যোজনা।

    1088.Idaṃ sikkhāpadaṃ dukkhavedanaṃ hotīti yojanā.

    অনুপখজ্জকথাৰণ্ণনা।

    Anupakhajjakathāvaṇṇanā.

    ১০৮৯. নিক্কড্ঢেয্যাতি নীহরেয্য। নিক্কড্ঢাপেয্য ৰাতি নীহরাপেয্য ৰা।

    1089.Nikkaḍḍheyyāti nīhareyya. Nikkaḍḍhāpeyya vāti nīharāpeyya vā.

    ১৯৯০. বহূ ভূমিযো ৰালিকাতলসঙ্খাতা যস্স সো বহুভূমো, পাসাদো। সমাসন্তৰিধিৰসেন ‘‘বহুভূমো’’তি ৰুচ্চতি।

    1990. Bahū bhūmiyo vālikātalasaṅkhātā yassa so bahubhūmo, pāsādo. Samāsantavidhivasena ‘‘bahubhūmo’’ti vuccati.

    ১০৯১. ঠপেত্ৰা ঠপেত্ৰাতি তস্মিং তস্মিং ঠানে গতিনিৰত্তিং কত্ৰা কত্ৰা।

    1091.Ṭhapetvā ṭhapetvāti tasmiṃ tasmiṃ ṭhāne gatinivattiṃ katvā katvā.

    ১০৯২. অযং নযোতি ‘‘নিক্খমা’তি একৰচনেন গচ্ছন্তে অনেকেপি দ্ৰারকোট্ঠকে অতিক্কন্তে আণাপকস্স একাৰ আপত্তি হোতি, ঠিতট্ঠানতো ঠত্ৰা ঠত্ৰা নীহরন্তস্স দ্ৰারকোট্ঠগণনায হোতী’’তি অযং নযো। আণত্তিযা খণেযেৰাতি ‘‘ইমং নিক্কড্ঢাহী’’তি আণত্তিক্খণেযেৰ।

    1092.Ayaṃ nayoti ‘‘nikkhamā’ti ekavacanena gacchante anekepi dvārakoṭṭhake atikkante āṇāpakassa ekāva āpatti hoti, ṭhitaṭṭhānato ṭhatvā ṭhatvā nīharantassa dvārakoṭṭhagaṇanāya hotī’’ti ayaṃ nayo. Āṇattiyā khaṇeyevāti ‘‘imaṃ nikkaḍḍhāhī’’ti āṇattikkhaṇeyeva.

    ১০৯৩. একাৰাতি এত্থ ‘‘পাচিত্তি হোতী’’তি ৰত্তব্বো। বহুকানি চেতি এত্থ ‘‘দ্ৰারানী’’তি ৰত্তব্বং, অতিক্কামেতীতি সম্বন্ধো। ‘‘এত্তকে দ্ৰারকোট্ঠকে অতিক্কমাপেত্ৰা নিক্কড্ঢাহী’’তি চ ‘‘যাৰ পরিযন্তদ্ৰারকোট্ঠকা নিক্কড্ঢাহী’’তি চ ‘‘বহূ দ্ৰারকোট্ঠকে অতিক্কামেত্ৰা নিক্কড্ঢাহী’’তি চ আণত্তত্তা বহূ দ্ৰারকোট্ঠকে অতিক্কামেত্ৰা সচে নিক্কড্ঢতীতি অত্থো। যথাহ অট্ঠকথাযং ‘‘সচে পন এত্তকানি দ্ৰারানি নিক্কড্ঢাহী’তি ৰা ‘যাৰ মহাদ্ৰারং, তাৰ নিক্কড্ঢাহী’তি ৰা এৰং নিযমেত্ৰা আণত্তো হোতি, দ্ৰারগণনায পাচিত্তিযানী’’তি (পাচি॰ অট্ঠ॰ ১২৬)। বহূনি পাচিত্তিযানি হোন্তীতি যোজনা।

    1093.Ekāvāti ettha ‘‘pācitti hotī’’ti vattabbo. Bahukāni ceti ettha ‘‘dvārānī’’ti vattabbaṃ, atikkāmetīti sambandho. ‘‘Ettake dvārakoṭṭhake atikkamāpetvā nikkaḍḍhāhī’’ti ca ‘‘yāva pariyantadvārakoṭṭhakā nikkaḍḍhāhī’’ti ca ‘‘bahū dvārakoṭṭhake atikkāmetvā nikkaḍḍhāhī’’ti ca āṇattattā bahū dvārakoṭṭhake atikkāmetvā sace nikkaḍḍhatīti attho. Yathāha aṭṭhakathāyaṃ ‘‘sace pana ettakāni dvārāni nikkaḍḍhāhī’ti vā ‘yāva mahādvāraṃ, tāva nikkaḍḍhāhī’ti vā evaṃ niyametvā āṇatto hoti, dvāragaṇanāya pācittiyānī’’ti (pāci. aṭṭha. 126). Bahūni pācittiyāni hontīti yojanā.

    ১০৯৪. উপট্ঠানসালাদীতি এত্থ নিস্সক্কত্থে পচ্চত্তৰচনতো উপট্ঠানসালাদিতোতি অত্থো গহেতব্বো। ‘‘উপচারতো’’তি ইমিনা সমানাধিকরণত্তা ৰিহারস্স উপট্ঠানসালাদিতো উপচারতোতি ৰুত্তং হোতি। যথাহ গণ্ঠিপদে ‘‘উপচারো নাম উপট্ঠানসালাদিমত্তমেৰা’’তি। কাযেনপি ৰাচাযপি তথা নিক্কড্ঢনে চ দুক্কটন্তি ৰক্খমানেন সহ যোজনা। তস্সাতি উপসম্পন্নস্স। আদি-সদ্দেন মণ্ডপাদযো গহিতা। যথাহ ‘‘ৰিহারস্স উপচারা ৰা উপট্ঠানসালায ৰা মণ্ডপা ৰা রুক্খমূলা ৰা অজ্ঝোকাসা ৰা নিক্কড্ঢতি ৰা নিক্কড্ঢাপেতি ৰা, আপত্তি দুক্কটস্সা’’তি (পাচি॰ ১২৭)। ‘‘ৰাচাযা’’তি ইমিনা ‘‘নিক্খমা’’তি চ ‘‘ইমং নিক্কড্ঢাহী’’তি আণাপনঞ্চ গহিতং। ‘‘তথা’’তি ইমিনা একেন পযোগেন একাপত্তি, নানাপযোগেসু পযোগগণনায, দ্ৰারগণনায ৰা হোতীতি ৰুত্তমেৰ পকারং উপসংহরতি।

    1094.Upaṭṭhānasālādīti ettha nissakkatthe paccattavacanato upaṭṭhānasālāditoti attho gahetabbo. ‘‘Upacārato’’ti iminā samānādhikaraṇattā vihārassa upaṭṭhānasālādito upacāratoti vuttaṃ hoti. Yathāha gaṇṭhipade ‘‘upacāro nāma upaṭṭhānasālādimattamevā’’ti. Kāyenapi vācāyapi tathā nikkaḍḍhane ca dukkaṭanti vakkhamānena saha yojanā. Tassāti upasampannassa. Ādi-saddena maṇḍapādayo gahitā. Yathāha ‘‘vihārassa upacārā vā upaṭṭhānasālāya vā maṇḍapā vā rukkhamūlā vā ajjhokāsā vā nikkaḍḍhati vā nikkaḍḍhāpeti vā, āpatti dukkaṭassā’’ti (pāci. 127). ‘‘Vācāyā’’ti iminā ‘‘nikkhamā’’ti ca ‘‘imaṃ nikkaḍḍhāhī’’ti āṇāpanañca gahitaṃ. ‘‘Tathā’’ti iminā ekena payogena ekāpatti, nānāpayogesu payogagaṇanāya, dvāragaṇanāya vā hotīti vuttameva pakāraṃ upasaṃharati.

    ১০৯৫. ‘‘তথা’’তি ইদং ‘‘ইতরং নিক্কড্ঢন্তস্স দুক্কট’’ন্তি ইমিনাপি যোজেতব্বং। যথা ৰিহারূপচারতো উপট্ঠানসালাদিতো উপসম্পন্নং নিক্কড্ঢন্তস্স, নিক্কড্ঢাপেন্তস্স চ দুক্কটং হোতি, তথা অনুপসম্পন্নস্স ৰিহারতো চ ৰিহারূপচারতো চ নিক্কড্ঢনাদিং করোন্তস্স ভিক্খুনো দুক্কটং হোতীতি অত্থো। তথা ৰিহারস্সূপচারা ৰা ৰিহারা ৰা সব্বেসম্পি পরিক্খারং নিক্কড্ঢন্তস্স দুক্কটন্তি যোজনা। সব্বেসন্তি উপসম্পন্নানুপসম্পন্নানং। পরিক্খারন্তি অন্তমসো রজনছল্লিপি সঙ্গয্হতি। যথাহ অট্ঠকথাযং ‘‘অন্তমসো রজনছল্লিম্পী’’তি (পাচি॰ অট্ঠ॰ ১২৬)।

    1095. ‘‘Tathā’’ti idaṃ ‘‘itaraṃ nikkaḍḍhantassa dukkaṭa’’nti imināpi yojetabbaṃ. Yathā vihārūpacārato upaṭṭhānasālādito upasampannaṃ nikkaḍḍhantassa, nikkaḍḍhāpentassa ca dukkaṭaṃ hoti, tathā anupasampannassa vihārato ca vihārūpacārato ca nikkaḍḍhanādiṃ karontassa bhikkhuno dukkaṭaṃ hotīti attho. Tathā vihārassūpacārā vā vihārā vā sabbesampi parikkhāraṃ nikkaḍḍhantassa dukkaṭanti yojanā. Sabbesanti upasampannānupasampannānaṃ. Parikkhāranti antamaso rajanachallipi saṅgayhati. Yathāha aṭṭhakathāyaṃ ‘‘antamaso rajanachallimpī’’ti (pāci. aṭṭha. 126).

    ১০৯৬. ‘‘অসম্বদ্ধেসূ’’তি ইমিনা ব্যতিরেকতো অসিথিলবদ্ধেসু পরিক্খারেসু একিস্সাযেৰ আপত্তিযা সম্ভৰং দস্সেতি। যথাহ অট্ঠকথাযং ‘‘গাল়্হং বন্ধিত্ৰা ঠপিতেসু পন একাৰ আপত্তী’তি মহাপচ্চরিযং ৰুত্ত’’ন্তি (পাচি॰ অট্ঠ॰ ১২৬)। সিথিলবন্ধনং পন সম্মা বন্ধনং ন হোতীতি অসম্বদ্ধৰচনেন গহিতন্তি দট্ঠব্বং। অস্স ভিক্খুস্স ৰত্থূনং গণনায দুক্কটং পরিদীপযেতি যোজনা, পরিক্খারং নীহরন্তস্স, নীহরাপেন্তস্স চ অস্স ভিক্খুনোতি ৰুত্তং হোতি।

    1096.‘‘Asambaddhesū’’ti iminā byatirekato asithilabaddhesu parikkhāresu ekissāyeva āpattiyā sambhavaṃ dasseti. Yathāha aṭṭhakathāyaṃ ‘‘gāḷhaṃ bandhitvā ṭhapitesu pana ekāva āpattī’ti mahāpaccariyaṃ vutta’’nti (pāci. aṭṭha. 126). Sithilabandhanaṃ pana sammā bandhanaṃ na hotīti asambaddhavacanena gahitanti daṭṭhabbaṃ. Assa bhikkhussa vatthūnaṃ gaṇanāya dukkaṭaṃ paridīpayeti yojanā, parikkhāraṃ nīharantassa, nīharāpentassa ca assa bhikkhunoti vuttaṃ hoti.

    ১০৯৭-৮. অন্তেৰাসিন্তি চ সদ্ধিৰিহারিকন্তি চ এত্থ ‘‘অসম্মাৰত্তন্ত’’ন্তি সেসো। যথাহ অনাপত্তিৰারে ‘‘অন্তেৰাসিকং ৰা সদ্ধিৰিহারিকং ৰা ন সম্মা ৰত্তন্তং নিক্কড্ঢতী’’তিআদি (পাচি॰ ১২৮)। নিক্কড্ঢন্তস্সাতি এত্থ ‘‘নিক্কড্ঢাপেন্তস্সা’’তি সেসো। অসম্মাৰত্তন্তং অন্তেৰাসিং ৰা অলজ্জিং ৰা তথা অসম্মাৰত্তন্তং সদ্ধিৰিহারিকং ৰা উম্মত্তকং ৰা তেসং অন্তেৰাসিআদীনং পরিক্খারং ৰা অত্তনো ৰসনট্ঠানা ৰা তথা ৰিস্সাসিকস্স ৰসনট্ঠানা ৰা নিক্কড্ঢন্তস্স, নিক্কড্ঢাপেন্তস্স ৰা উপসম্পন্নং ৰা অনুপসম্পন্নং ৰা সঙ্ঘিকৰিহারা নিক্কড্ঢন্তস্স সযং উম্মত্তকস্স ৰা অনাপত্তি পকাসিতাতি যোজনা।

    1097-8.Antevāsinti ca saddhivihārikanti ca ettha ‘‘asammāvattanta’’nti seso. Yathāha anāpattivāre ‘‘antevāsikaṃ vā saddhivihārikaṃ vā na sammā vattantaṃ nikkaḍḍhatī’’tiādi (pāci. 128). Nikkaḍḍhantassāti ettha ‘‘nikkaḍḍhāpentassā’’ti seso. Asammāvattantaṃ antevāsiṃ vā alajjiṃ vā tathā asammāvattantaṃ saddhivihārikaṃ vā ummattakaṃ vā tesaṃ antevāsiādīnaṃ parikkhāraṃ vā attano vasanaṭṭhānā vā tathā vissāsikassa vasanaṭṭhānā vā nikkaḍḍhantassa, nikkaḍḍhāpentassa vā upasampannaṃ vā anupasampannaṃ vā saṅghikavihārā nikkaḍḍhantassa sayaṃ ummattakassa vā anāpatti pakāsitāti yojanā.

    অট্ঠকথাযং ‘‘অলজ্জীআদযো পন অত্তনো ৰসনট্ঠানতোযেৰ নিক্কড্ঢিতব্বা’’তি (পাচি॰ অট্ঠ॰ ১২৮) ৰুত্তং, পাল়িযঞ্চ ‘‘অত্তনো পুগ্গলিকে অনাপত্তী’’তি (পাচি॰ ১২৭) ৰুত্তং, ‘‘অত্তনো ৰিস্সাসিকস্স ৰসনট্ঠানা’’তি ইদং কস্মা ৰুত্তন্তি চে? ইমস্সেৰ পাঠস্স অনুলোমতো ৰুত্তং। অন্তেৰাসিকন্তিআদীসু পঠমং অসম্মাৰত্তনাদিভাৰেন ‘‘নিক্কড্ঢিস্সামী’’তি চিন্তেত্ৰা নিক্কড্ঢন্তস্স চিত্তলহুপরিৰত্তিতায কোপে উপ্পন্নেপি অনাপত্তি।

    Aṭṭhakathāyaṃ ‘‘alajjīādayo pana attano vasanaṭṭhānatoyeva nikkaḍḍhitabbā’’ti (pāci. aṭṭha. 128) vuttaṃ, pāḷiyañca ‘‘attano puggalike anāpattī’’ti (pāci. 127) vuttaṃ, ‘‘attano vissāsikassa vasanaṭṭhānā’’ti idaṃ kasmā vuttanti ce? Imasseva pāṭhassa anulomato vuttaṃ. Antevāsikantiādīsu paṭhamaṃ asammāvattanādibhāvena ‘‘nikkaḍḍhissāmī’’ti cintetvā nikkaḍḍhantassa cittalahuparivattitāya kope uppannepi anāpatti.

    ১০৯৯. ‘‘তথা’’তি ইমিনা ‘‘নিক্কড্ঢন্তস্সা’’তি চ তত্থেৰ সেসং ‘‘নিক্কড্ঢাপেন্তস্সা’’তি (পাচি॰ অট্ঠ॰ ১২৬) চ ‘‘তস্স পরিক্খারং ৰা’’তি চ যথাৰুত্তং উপসংহরতি। ‘‘সঙ্ঘারামাপি সব্বস্মা’’তি ইদং কলহকারকেনেৰ যোজেতব্বং। যথাহ অট্ঠকথাযং ‘‘ভণ্ডনকারককলহকারকমেৰ সকলসঙ্ঘারামতো নিক্কড্ঢিতুং লভতি। সো হি পক্খং লভিত্ৰা সঙ্ঘম্পি ভিন্দেয্যা’’তি (পাচি॰ অট্ঠ॰ ১২৮)। ইদং তূতি এত্থ ৰিসেসত্থজোতকেন তু-সদ্দেন ৰুত্তৰিসেসনং ৰিনা অৰসেসৰিনিচ্ছযো অনন্তরসদিসোযেৰাতি দীপেতি। তিসমুট্ঠানং কাযচিত্তৰাচাচিত্তকাযৰাচাচিত্ততো সমুট্ঠানতোতি।

    1099.‘‘Tathā’’ti iminā ‘‘nikkaḍḍhantassā’’ti ca tattheva sesaṃ ‘‘nikkaḍḍhāpentassā’’ti (pāci. aṭṭha. 126) ca ‘‘tassa parikkhāraṃ vā’’ti ca yathāvuttaṃ upasaṃharati. ‘‘Saṅghārāmāpi sabbasmā’’ti idaṃ kalahakārakeneva yojetabbaṃ. Yathāha aṭṭhakathāyaṃ ‘‘bhaṇḍanakārakakalahakārakameva sakalasaṅghārāmato nikkaḍḍhituṃ labhati. So hi pakkhaṃ labhitvā saṅghampi bhindeyyā’’ti (pāci. aṭṭha. 128). Idaṃ tūti ettha visesatthajotakena tu-saddena vuttavisesanaṃ vinā avasesavinicchayo anantarasadisoyevāti dīpeti. Tisamuṭṭhānaṃ kāyacittavācācittakāyavācācittato samuṭṭhānatoti.

    নিক্কড্ঢনকথাৰণ্ণনা।

    Nikkaḍḍhanakathāvaṇṇanā.

    ১১০০-১. মজ্ঝিমাসীসঘট্টাযাতি সীসং ন ঘট্টেতীতি অসীসঘট্টা, মজ্ঝিমস্স অসীসঘট্টা মজ্ঝিমাসীসঘট্টা, তায, পমাণমজ্ঝিমস্স পুরিসস্স সীসাঘট্টনপ্পমাণুব্বেধহেট্ঠিমতলাযাতি অত্থো। ৰেহাসকুটিযাতি পদরাদীহি উপরি অচ্ছন্নতলায দ্ৰিভূমিকাদিভেদায কুটিযা। উপরীতি মত্থকে, অকতপদরাদিঅত্থরণায তুলামত্তযুত্তায উপরিমতলেতি ৰুত্তং হোতি। যথাহ অট্ঠকথাযং ‘‘যাহি কাহিচি উপরি অচ্ছন্নতলা দ্ৰিভূমিককুটি ৰা তিভূমিকাদিকুটি ৰা ‘ৰেহাসকুটী’তি ৰুচ্চতি, ইধ পন অসীসঘট্টা অধিপ্পেতা’’তি (পাচি॰ অট্ঠ॰ ১৩১)। আহচ্চপাদকে মঞ্চেতি ‘‘আহচ্চপাদকো নাম মঞ্চো অঙ্গে ৰিজ্ঝিত্ৰা ঠিতো হোতী’’তি পাল়িযং দস্সিতে অটনিসীসানি ৰিজ্ঝিত্ৰা পাদসিখং আৰুণিত্ৰা উপরিসিখায অনাকোটিতআণিম্হি ঠিতমঞ্চেতি অত্থো। আহচ্চপাদকে পীঠেতি সম্বন্ধো। যথাহ পাল়িযং ‘‘আহচ্চপাদকং নাম পীঠং অঙ্গে ৰিজ্ঝিত্ৰা ঠিতং হোতী’’তি (পাচি॰ ১৩১)। সোযেৰত্থো।

    1100-1.Majjhimāsīsaghaṭṭāyāti sīsaṃ na ghaṭṭetīti asīsaghaṭṭā, majjhimassa asīsaghaṭṭā majjhimāsīsaghaṭṭā, tāya, pamāṇamajjhimassa purisassa sīsāghaṭṭanappamāṇubbedhaheṭṭhimatalāyāti attho. Vehāsakuṭiyāti padarādīhi upari acchannatalāya dvibhūmikādibhedāya kuṭiyā. Uparīti matthake, akatapadarādiattharaṇāya tulāmattayuttāya uparimataleti vuttaṃ hoti. Yathāha aṭṭhakathāyaṃ ‘‘yāhi kāhici upari acchannatalā dvibhūmikakuṭi vā tibhūmikādikuṭi vā ‘vehāsakuṭī’ti vuccati, idha pana asīsaghaṭṭā adhippetā’’ti (pāci. aṭṭha. 131). Āhaccapādakemañceti ‘‘āhaccapādako nāma mañco aṅge vijjhitvā ṭhito hotī’’ti pāḷiyaṃ dassite aṭanisīsāni vijjhitvā pādasikhaṃ āvuṇitvā uparisikhāya anākoṭitaāṇimhi ṭhitamañceti attho. Āhaccapādake pīṭheti sambandho. Yathāha pāḷiyaṃ ‘‘āhaccapādakaṃ nāma pīṭhaṃ aṅge vijjhitvā ṭhitaṃ hotī’’ti (pāci. 131). Soyevattho.

    তস্মিং আহচ্চপাদকে মঞ্চে ৰা পীঠে ৰা নিসীদন্তস্স ৰা নিপজ্জন্তস্স ৰা তস্স ভিক্খুনো পযোগগণনায পাচিত্তিযো সিযুন্তি যোজনা।

    Tasmiṃ āhaccapādake mañce vā pīṭhe vā nisīdantassa vā nipajjantassa vā tassa bhikkhuno payogagaṇanāya pācittiyo siyunti yojanā.

    ১১০২-৩. সঙ্ঘিকে সঙ্ঘিকসঞ্ঞিৰেমতিকপুগ্গলিকসঞ্ঞীনং ৰসেন তিকপাচিত্তিযং। পুগ্গলেতি পুগ্গলিকে ৰিহারে। ৰেহাসকুটিযা…পে॰… গণনাযেৰ তস্স তিকদুক্কটন্তি যোজনা। পুগ্গলিকে সঙ্ঘিকসঞ্ঞিৰেমতিকঅঞ্ঞপুগ্গলিকসঞ্ঞীনং ৰসেন তিকদুক্কটং।

    1102-3. Saṅghike saṅghikasaññivematikapuggalikasaññīnaṃ vasena tikapācittiyaṃ. Puggaleti puggalike vihāre. Vehāsakuṭiyā…pe… gaṇanāyeva tassa tikadukkaṭanti yojanā. Puggalike saṅghikasaññivematikaaññapuggalikasaññīnaṃ vasena tikadukkaṭaṃ.

    হেট্ঠা অপরিভোগে ৰাতি দারুসম্ভারাদীনং ৰসেন হেট্ঠিমতলে অৰলঞ্জে ৰা। সীসঘট্টায ৰাতি সীসঘট্টনপ্পমাণতলায কুটিযা ৰা। অৰেহাসৰিহারে ৰাতি অৰেহাসকুটিযা ভূমিযং কতপণ্ণসালাদীসু। এত্থাপি ‘‘ৰিস্সাসিকৰিহারে’’তি ইদং ‘‘অত্তনো পুগ্গলিকে অনাপত্তী’’তি (পাচি॰ ১৩২) ইমস্স অনুলোমনতো ৰুত্তং।

    Heṭṭhā aparibhoge vāti dārusambhārādīnaṃ vasena heṭṭhimatale avalañje vā. Sīsaghaṭṭāya vāti sīsaghaṭṭanappamāṇatalāya kuṭiyā vā. Avehāsavihāre vāti avehāsakuṭiyā bhūmiyaṃ katapaṇṇasālādīsu. Etthāpi ‘‘vissāsikavihāre’’ti idaṃ ‘‘attano puggalike anāpattī’’ti (pāci. 132) imassa anulomanato vuttaṃ.

    ১১০৪. যত্থ পটাণি ৰা দিন্নাতি যস্মিং মঞ্চে পাদসীসানং উপরি অটনিমত্থকতো তিরিযং আণি পৰেসিতা হোতি, তত্থ অভিনিসীদতো, অভিনিপজ্জতো ৰা ন দোসোতি যোজনা। তত্থাতি পুব্বে ৰুত্তঅপৰেসিতপটাণিম্হি মঞ্চে ৰা পীঠে ৰা। ‘‘ঠত্ৰা’’তি ইমিনা নিপজ্জনং নিৰত্তেতি। লগেতীতি উপরিবদ্ধঅঙ্কুসসিক্কাদীসু যং কিঞ্চি পরিক্খারং লগেতি। ইদং সিক্খাপদং সমুট্ঠানতো এল়কলোমেন সিক্খাপদেন সমং মতন্তি যোজনা।

    1104.Yattha paṭāṇi vā dinnāti yasmiṃ mañce pādasīsānaṃ upari aṭanimatthakato tiriyaṃ āṇi pavesitā hoti, tattha abhinisīdato, abhinipajjato vā na dosoti yojanā. Tatthāti pubbe vuttaapavesitapaṭāṇimhi mañce vā pīṭhe vā. ‘‘Ṭhatvā’’ti iminā nipajjanaṃ nivatteti. Lagetīti uparibaddhaaṅkusasikkādīsu yaṃ kiñci parikkhāraṃ lageti. Idaṃ sikkhāpadaṃ samuṭṭhānato eḷakalomena sikkhāpadena samaṃ matanti yojanā.

    ৰেহাসকুটিকথাৰণ্ণনা।

    Vehāsakuṭikathāvaṇṇanā.

    ১১০৫. যাৰ দ্ৰারস্স কোসম্হাতি এত্থ ‘‘মহল্লকস্স ৰিহারস্সা’’তি সেসো, ‘‘মহল্লকো নাম ৰিহারো সস্সামিকো ৰুচ্চতী’’তি (পাচি॰ ১৩৬) পাল়িযং ৰুত্তত্তা কারাপেতানং দাযকানং সম্ভৰতো মহল্লকস্স ‘‘ৰিহারো নাম উল্লিত্তো ৰা হোতি অৰলিত্তো ৰা উল্লিত্তাৰলিত্তো ৰা’’তি দস্সিতভেদস্স ৰিহারস্স দ্ৰারকোসসঙ্খাতপিট্ঠসঙ্ঘাটস্স ‘‘সমন্তা হত্থপাসা’’তি (পাচি॰ ১৩৬) পাল়িযং ৰুত্তদ্ৰারকৰাটপুথুলপ্পমাণদ্ৰারবাহসমীপং অৰধিং কত্ৰাতি অত্থো। যথাহ অট্ঠকথাযং ‘‘দ্ৰারকোসো নাম পিট্ঠসঙ্ঘাটস্স সমন্তা কৰাটৰিত্থারপ্পমাণো ওকাসো’’তি (পাচি॰ অট্ঠ॰ ১৩৫)।

    1105.Yāva dvārassa kosamhāti ettha ‘‘mahallakassa vihārassā’’ti seso, ‘‘mahallako nāma vihāro sassāmiko vuccatī’’ti (pāci. 136) pāḷiyaṃ vuttattā kārāpetānaṃ dāyakānaṃ sambhavato mahallakassa ‘‘vihāro nāma ullitto vā hoti avalitto vā ullittāvalitto vā’’ti dassitabhedassa vihārassa dvārakosasaṅkhātapiṭṭhasaṅghāṭassa ‘‘samantā hatthapāsā’’ti (pāci. 136) pāḷiyaṃ vuttadvārakavāṭaputhulappamāṇadvārabāhasamīpaṃ avadhiṃ katvāti attho. Yathāha aṭṭhakathāyaṃ ‘‘dvārakoso nāma piṭṭhasaṅghāṭassa samantā kavāṭavitthārappamāṇo okāso’’ti (pāci. aṭṭha. 135).

    অগ্গল়ট্ঠপনাযাতি এত্থ অগ্গল়সহচরিযেন তংসহিতদ্ৰারকৰাটেন যুত্তদ্ৰারবাহানমেৰ ৰুত্তত্তা দ্ৰারবাহানং নিচ্চলত্থাযাতি অত্থো। যথাহ অট্ঠকথাযং ‘‘সকৰাটস্স দ্ৰারবন্ধস্স নিচ্চলভাৰত্থাযাতি অত্থো’’তি (পাচি॰ অট্ঠ॰ ১৩৫)। লিম্পিতব্বন্তি এত্থ ‘‘পুনপ্পুন’’ন্তি সেসো। যথাহ অট্ঠকথাযং ‘‘পুনপ্পুনং লিম্পিতব্বো ৰা লেপাপেতব্বো ৰা’’তি (পাচি॰ অট্ঠ॰ ১৩৫)। তিণমত্তিকানং উপরি পুনপ্পুনং মত্তিকালেপো কাতব্বোতি অত্থো।

    Aggaḷaṭṭhapanāyāti ettha aggaḷasahacariyena taṃsahitadvārakavāṭena yuttadvārabāhānameva vuttattā dvārabāhānaṃ niccalatthāyāti attho. Yathāha aṭṭhakathāyaṃ ‘‘sakavāṭassa dvārabandhassa niccalabhāvatthāyāti attho’’ti (pāci. aṭṭha. 135). Limpitabbanti ettha ‘‘punappuna’’nti seso. Yathāha aṭṭhakathāyaṃ ‘‘punappunaṃ limpitabbo vā lepāpetabbo vā’’ti (pāci. aṭṭha. 135). Tiṇamattikānaṃ upari punappunaṃ mattikālepo kātabboti attho.

    ১১০৬-৭. যো ঞেয্যো, অযং নযোতি সম্বন্ধো, ‘‘পুনপ্পুনং লিম্পিতব্বং ৰা লেপাপেতব্বমেৰ ৰা’’তি যো ৰুত্তো, অযং নযো ৰেদিতব্বোতি অত্থো। আলোকং সন্ধেতি পিধেতীতি আলোকসন্ধি, ৰাতপানকৰাটানমেতং অধিৰচনং। যথাহ ‘‘আলোকসন্ধীতি ৰাতপানকৰাটকা ৰুচ্চন্তী’’তি (পাচি॰ অট্ঠ॰ ১৩৫)। এত্থ কৰাটস্স সামন্তা কৰাটদ্ৰারফলকৰিত্থারপ্পমাণং লেপট্ঠানং। যথাহ ‘‘সব্বদিসাসু কৰাটৰিত্থারপ্পমাণো ওকাসো’’তি (পাচি॰ অট্ঠ॰ ১৩৫)।

    1106-7. Yo ñeyyo, ayaṃ nayoti sambandho, ‘‘punappunaṃ limpitabbaṃ vā lepāpetabbameva vā’’ti yo vutto, ayaṃ nayo veditabboti attho. Ālokaṃ sandheti pidhetīti ālokasandhi, vātapānakavāṭānametaṃ adhivacanaṃ. Yathāha ‘‘ālokasandhīti vātapānakavāṭakā vuccantī’’ti (pāci. aṭṭha. 135). Ettha kavāṭassa sāmantā kavāṭadvāraphalakavitthārappamāṇaṃ lepaṭṭhānaṃ. Yathāha ‘‘sabbadisāsu kavāṭavitthārappamāṇo okāso’’ti (pāci. aṭṭha. 135).

    এত্থাযমধিপ্পাযো – ৰাতপানকৰাটস্স সামন্তা দ্ৰারফলকৰিত্থারপ্পমাণে ঠানে তিণ্ণং মত্তিকানং উপরিপি যত্তকং বহলং ইচ্ছতি, তত্তকে ঠানে আলোকসন্ধি পরিকম্মত্থায লিম্পিতব্বো ৰা লেপাপেতব্বো ৰাতি। ‘‘পুনপ্পুনং ছাদাপেসি পুনপ্পুনং লেপাপেসী’’তি (পাচি॰ ১৩৪) ইমস্মিং ৰত্থুস্মিং উপ্পন্নদোসেন সিক্খাপদস্স পঞ্ঞত্তত্তা লেপং অনুজানন্তেন চ দ্ৰারবন্ধনস্স সামন্তা অড্ঢতেয্যহত্থপ্পমাণেযেৰ পদেসে পুনপ্পুনং লেপস্স অনুঞ্ঞাতত্তা ততো অঞ্ঞত্থ পুনপ্পুনং লিম্পেন্তস্স ৰা লিম্পাপেন্তস্স ৰা ভিত্তিযং মত্তিকাহি কত্তব্বকিচ্চং নিট্ঠাপেত্ৰা পুন চতুত্থলেপে দিন্নে পাচিত্তিযেন ভৰিতব্বন্তি ৰদন্তি। গণ্ঠিপদেসু পন তীসুপি পুনপ্পুনং লেপদানস্স ৰুত্তপ্পমাণতো অঞ্ঞত্থ পটিক্খিত্তমত্তং ঠপেত্ৰা পাচিত্তিযস্স অৰুত্তত্তা দুক্কটং অনুরূপন্তি ৰুত্তং।

    Etthāyamadhippāyo – vātapānakavāṭassa sāmantā dvāraphalakavitthārappamāṇe ṭhāne tiṇṇaṃ mattikānaṃ uparipi yattakaṃ bahalaṃ icchati, tattake ṭhāne ālokasandhi parikammatthāya limpitabbo vā lepāpetabbo vāti. ‘‘Punappunaṃ chādāpesi punappunaṃ lepāpesī’’ti (pāci. 134) imasmiṃ vatthusmiṃ uppannadosena sikkhāpadassa paññattattā lepaṃ anujānantena ca dvārabandhanassa sāmantā aḍḍhateyyahatthappamāṇeyeva padese punappunaṃ lepassa anuññātattā tato aññattha punappunaṃ limpentassa vā limpāpentassa vā bhittiyaṃ mattikāhi kattabbakiccaṃ niṭṭhāpetvā puna catutthalepe dinne pācittiyena bhavitabbanti vadanti. Gaṇṭhipadesu pana tīsupi punappunaṃ lepadānassa vuttappamāṇato aññattha paṭikkhittamattaṃ ṭhapetvā pācittiyassa avuttattā dukkaṭaṃ anurūpanti vuttaṃ.

    ছদনস্সাতি পদভাজনে ৰুত্তানং ইট্ঠকাসিলাসুধাতিণপণ্ণচ্ছদনানং অঞ্ঞতরস্স। দ্ৰত্তিপরিযাযন্তি এত্থ অট্ঠকথাযং ‘‘পরিযাযেনাতি পরিক্খেপেন, এৰং ছদনং পন তিণপণ্ণেহি লব্ভতী’’তি (পাচি॰ অট্ঠ॰ ১৩৬) ৰুত্তত্তা পরিযাযন্তি তিণেহি ৰা পণ্ণেহি ৰা পরিক্খিপিত্ৰা ছদনমেৰ গহেতব্বং। ইট্ঠকায ৰা সিলায ৰা সুধায ৰা ছদনে লব্ভমানং মগ্গেন ছদনং পন উপলক্খণৰসেন লব্ভতি। দ্ৰত্তিপরিযাযেন ছদনঞ্চ ‘‘সব্বম্পি চেতং ছদনং ছদনূপরি ৰেদিতব্ব’’ন্তি (পাচি॰ অট্ঠ॰ ১৩৬) অট্ঠকথাৰচনতো উপরূপরি ছদনৰসেন ৰেদিতব্বং। হরিতং নাম পুব্বণ্ণাদি। যথাহ অট্ঠকথাযং ‘‘হরিতন্তি চেত্থ সত্তধঞ্ঞভেদং পুব্বণ্ণং, মুগ্গমাসতিলকুলত্থঅলাবুকুম্ভণ্ডাদিভেদঞ্চ অপরণ্ণং অধিপ্পেত’’ন্তি (পাচি॰ অট্ঠ॰ ১৩৫)। ইমেসু অঞ্ঞতরস্সাভাৰেন অহরিতং নাম।

    Chadanassāti padabhājane vuttānaṃ iṭṭhakāsilāsudhātiṇapaṇṇacchadanānaṃ aññatarassa. Dvattipariyāyanti ettha aṭṭhakathāyaṃ ‘‘pariyāyenāti parikkhepena, evaṃ chadanaṃ pana tiṇapaṇṇehi labbhatī’’ti (pāci. aṭṭha. 136) vuttattā pariyāyanti tiṇehi vā paṇṇehi vā parikkhipitvā chadanameva gahetabbaṃ. Iṭṭhakāya vā silāya vā sudhāya vā chadane labbhamānaṃ maggena chadanaṃ pana upalakkhaṇavasena labbhati. Dvattipariyāyena chadanañca ‘‘sabbampi cetaṃ chadanaṃ chadanūpari veditabba’’nti (pāci. aṭṭha. 136) aṭṭhakathāvacanato uparūpari chadanavasena veditabbaṃ. Haritaṃ nāma pubbaṇṇādi. Yathāha aṭṭhakathāyaṃ ‘‘haritanti cettha sattadhaññabhedaṃ pubbaṇṇaṃ, muggamāsatilakulatthaalābukumbhaṇḍādibhedañca aparaṇṇaṃ adhippeta’’nti (pāci. aṭṭha. 135). Imesu aññatarassābhāvena aharitaṃ nāma.

    অধিট্ঠেয্যন্তি ৰিধাতব্বং। ততো উদ্ধন্তি তীহি পরিযাযেহি ৰা তীহি মগ্গেহি ৰা উদ্ধং। যথাহ অট্ঠকথাযং ‘‘তিণ্ণং মগ্গানং ৰা পরিযাযানং ৰা উপরী’’তি (পাচি॰ অট্ঠ॰ ১৩৬)। পাচিত্তিযং হোতীতি ৰক্খমানদূরতায যুত্তে অহরিতট্ঠানে ঠত্ৰা সংৰিদহিত্ৰা তিক্খত্তুং ছাদাপেত্ৰা ততিযৰারে ‘‘এৰং করোহী’’তি আণাপেত্ৰা পক্কমিতব্বং। অপক্কমন্তেন তুণ্হীভূতেন ঠাতব্বং, ততো উত্তরি চতুত্থৰারে ছদনত্থং ৰিদহন্তস্স ইট্ঠকাদিগণনায, তিণেসু তিণগণনায, পণ্ণেসু পণ্ণগণনায পাচিত্তিযন্তি ৰুত্তং হোতি। যথাহ পাল়িযং ‘‘মগ্গেন ছাদেন্তস্স দ্ৰে মগ্গে অধিট্ঠহিত্ৰা ততিযায মগ্গং আণাপেত্ৰা পক্কমিতব্ব’’ন্তিআদি (পাচি॰ ১৩৬)। ততিযায মগ্গন্তি এত্থ ততিযাযাতি উপযোগত্থে সম্পদানৰচনং, ততিযং মগ্গন্তি অত্থো। তত্থাতি হরিতে, ‘‘সচে হরিতে ঠিতো অধিট্ঠাতি, আপত্তি দুক্কটস্সা’’তি (পাচি॰ ১৩৭) ৰচনতো অধিট্ঠানায তিট্ঠতোতি লব্ভতি। বীজরোপনতো পট্ঠায যাৰ সস্সং তিট্ঠতি, তাৰ হরিতং নাম। যথাহ অট্ঠকথাযং ‘‘যস্মিম্পি খেত্তে ৰুত্তং বীজং ন তাৰ সম্পজ্জতি, ৰস্সে পন পতিতে সম্পজ্জিস্সতী’’তিআদি (পাচি॰ অট্ঠ॰ ১৩৫)।

    Adhiṭṭheyyanti vidhātabbaṃ. Tato uddhanti tīhi pariyāyehi vā tīhi maggehi vā uddhaṃ. Yathāha aṭṭhakathāyaṃ ‘‘tiṇṇaṃ maggānaṃ vā pariyāyānaṃ vā uparī’’ti (pāci. aṭṭha. 136). Pācittiyaṃ hotīti vakkhamānadūratāya yutte aharitaṭṭhāne ṭhatvā saṃvidahitvā tikkhattuṃ chādāpetvā tatiyavāre ‘‘evaṃ karohī’’ti āṇāpetvā pakkamitabbaṃ. Apakkamantena tuṇhībhūtena ṭhātabbaṃ, tato uttari catutthavāre chadanatthaṃ vidahantassa iṭṭhakādigaṇanāya, tiṇesu tiṇagaṇanāya, paṇṇesu paṇṇagaṇanāya pācittiyanti vuttaṃ hoti. Yathāha pāḷiyaṃ ‘‘maggena chādentassa dve magge adhiṭṭhahitvā tatiyāya maggaṃ āṇāpetvā pakkamitabba’’ntiādi (pāci. 136). Tatiyāya magganti ettha tatiyāyāti upayogatthe sampadānavacanaṃ, tatiyaṃ magganti attho. Tatthāti harite, ‘‘sace harite ṭhito adhiṭṭhāti, āpatti dukkaṭassā’’ti (pāci. 137) vacanato adhiṭṭhānāya tiṭṭhatoti labbhati. Bījaropanato paṭṭhāya yāva sassaṃ tiṭṭhati, tāva haritaṃ nāma. Yathāha aṭṭhakathāyaṃ ‘‘yasmimpi khette vuttaṃ bījaṃ na tāva sampajjati, vasse pana patite sampajjissatī’’tiādi (pāci. aṭṭha. 135).

    ১১০৮-৯. অহরিতট্ঠানেপি তিট্ঠতো পরিচ্ছেদং দস্সেতুমাহ ‘‘পিট্ঠিৰংসে’’তিআদি। ‘‘পিট্ঠিৰংসে’’তি ইদং ৰংসযুত্তসেনাসনৰসেন ৰুত্তং। কণ্ণিকং গাহাপেত্ৰা কতসেনাসনস্সাপি উপলক্খণং হোতি। পিট্ঠিৰংসেতি চ ‘‘গঙ্গাযং ঘোসো’’তিআদীসু ৰিয সামীপিকাধারে ভুম্মং। কুতোযং ৰিসেসো লব্ভতীতি? অট্ঠকথাযং ‘‘পিট্ঠিৰংসস্স ৰা কূটাগারকণ্ণিকায ৰা উপরি, থুপিকায ৰা পস্সে নিসিন্নো হোতী’’তি (পাচি॰ অট্ঠ॰ ১৩৫) ৰুত্তৰিধানতো লব্ভতি। ‘‘নিসিন্নো’’তি অট্ঠকথাৰচনতো ঠিতোতি এত্থ গতিনিৰত্তিসামঞ্ঞেন নিসিন্নো চ ৰুত্তোতি গহেতব্বো। যস্মিং ঠানেতি এত্থ ‘‘অহরিতে’’তি পকরণতো লব্ভতি। ‘‘ঠাতু’’ন্তি ইদং অধিট্ঠানকরণত্থায ঠানং গহেত্ৰা ৰুত্তন্তি ‘‘তস্স অন্তো অহরিতেপি ঠত্ৰা অধিট্ঠাতুং ন লব্ভতী’’তি (পাচি॰ অট্ঠ॰ ১৩৬) অট্ঠকথাৰচনতো ৰিঞ্ঞাযতি।

    1108-9. Aharitaṭṭhānepi tiṭṭhato paricchedaṃ dassetumāha ‘‘piṭṭhivaṃse’’tiādi. ‘‘Piṭṭhivaṃse’’ti idaṃ vaṃsayuttasenāsanavasena vuttaṃ. Kaṇṇikaṃ gāhāpetvā katasenāsanassāpi upalakkhaṇaṃ hoti. Piṭṭhivaṃseti ca ‘‘gaṅgāyaṃ ghoso’’tiādīsu viya sāmīpikādhāre bhummaṃ. Kutoyaṃ viseso labbhatīti? Aṭṭhakathāyaṃ ‘‘piṭṭhivaṃsassa vā kūṭāgārakaṇṇikāya vā upari, thupikāya vā passe nisinno hotī’’ti (pāci. aṭṭha. 135) vuttavidhānato labbhati. ‘‘Nisinno’’ti aṭṭhakathāvacanato ṭhitoti ettha gatinivattisāmaññena nisinno ca vuttoti gahetabbo. Yasmiṃ ṭhāneti ettha ‘‘aharite’’ti pakaraṇato labbhati. ‘‘Ṭhātu’’nti idaṃ adhiṭṭhānakaraṇatthāya ṭhānaṃ gahetvā vuttanti ‘‘tassa anto aharitepi ṭhatvā adhiṭṭhātuṃ na labbhatī’’ti (pāci. aṭṭha. 136) aṭṭhakathāvacanato viññāyati.

    পতনোকাসতোতি এত্থ পঠমত্থে তো-পচ্চযো। তঞ্হি ঠানং ৰিহারস্স পতনোকাসোতি যোজনা। হীতি হেতুঅত্থে ৰত্তমানতো যস্মা অহরিতে পতন্তস্স ৰিহারস্সেতং ঠানং পতনোকাসো, তস্মা তত্থ ঠাতুং ন ৰট্টতীতি গহেতব্বং।

    Patanokāsatoti ettha paṭhamatthe to-paccayo. Tañhi ṭhānaṃ vihārassa patanokāsoti yojanā. Hīti hetuatthe vattamānato yasmā aharite patantassa vihārassetaṃ ṭhānaṃ patanokāso, tasmā tattha ṭhātuṃ na vaṭṭatīti gahetabbaṃ.

    ১১১১. ইমস্মিং সিক্খাপদে আদো তাৰ ৰিহারপদস্স পদভাজনে ‘‘ৰিহারো নাম উল্লিত্তো ৰা’’তিআদিৰুত্তত্তা (পাচি॰ অট্ঠ॰ ১৩৬) তব্বিপরিযাযতো তিণেহেৰ কতছদনভিত্তিকা কুটি তিণকুটিকাতি ৰিঞ্ঞাযতীতি তিণছদনা কুটিকা তিণকুটিকা।

    1111. Imasmiṃ sikkhāpade ādo tāva vihārapadassa padabhājane ‘‘vihāro nāma ullitto vā’’tiādivuttattā (pāci. aṭṭha. 136) tabbipariyāyato tiṇeheva katachadanabhittikā kuṭi tiṇakuṭikāti viññāyatīti tiṇachadanā kuṭikā tiṇakuṭikā.

    দ্ৰত্তিপরিযাযকথাৰণ্ণনা।

    Dvattipariyāyakathāvaṇṇanā.

    ১১১২. জানন্তি তোযস্স সপ্পাণকভাৰং জানন্তো। সিঞ্চেয্য সিঞ্চাপেয্যাতি এত্থ ‘‘তেন উদকেনা’’তি ৰত্তব্বং। যথাহ অট্ঠকথাযং ‘‘তেন উদকেন সযং ৰা সিঞ্চেয্যা’’তিআদি (পাচি॰ অট্ঠ॰ ১৪০)।

    1112.Jānanti toyassa sappāṇakabhāvaṃ jānanto. Siñceyya siñcāpeyyāti ettha ‘‘tena udakenā’’ti vattabbaṃ. Yathāha aṭṭhakathāyaṃ ‘‘tena udakena sayaṃ vā siñceyyā’’tiādi (pāci. aṭṭha. 140).

    ১১১৩. যো পন ধারং অচ্ছিন্দিত্ৰা সচে মত্তিকং সিঞ্চেয্য, এৰং সিঞ্চতো তস্সাতি যোজনা।

    1113. Yo pana dhāraṃ acchinditvā sace mattikaṃ siñceyya, evaṃ siñcato tassāti yojanā.

    ১১১৪-৫. সন্দমানকন্তি তোযৰাহিনিং। মাতিকং আল়িং। সম্মুখং করোন্তস্সাতি উদকং ন্হাযিতুমিচ্ছিতং যদি, সযং অভিমুখং করোন্তস্স। তত্থ তত্থ বন্ধতো অস্স ভিক্খুস্স পযোগগণনায আপত্তি সিযাতি যোজনা। পযোগগণনাতি পযোগগণনায, উদকং বন্ধিত্ৰা বন্ধিত্ৰা যথিচ্ছিতদিসাভিমুখকরণপযোগানং গণনাযাতি অত্থো।

    1114-5.Sandamānakanti toyavāhiniṃ. Mātikaṃ āḷiṃ. Sammukhaṃ karontassāti udakaṃ nhāyitumicchitaṃ yadi, sayaṃ abhimukhaṃ karontassa. Tattha tattha bandhato assa bhikkhussa payogagaṇanāya āpatti siyāti yojanā. Payogagaṇanāti payogagaṇanāya, udakaṃ bandhitvā bandhitvā yathicchitadisābhimukhakaraṇapayogānaṃ gaṇanāyāti attho.

    ১১১৬-৭. যং জলং তিণাদিম্হি পক্খিত্তে সচে খযং ৰা আৰিলত্তং ৰা গচ্ছতি, তাদিসে উদকে মত্তিকং, তিণমেৰ ৰা সচে সকটপুণ্ণম্পি একতো পক্খিপেয্য, এৰং পক্খিপন্তস্স একা পাচিত্তি। একেকং মত্তিকং, তিণমেৰ ৰা। ৰা-সদ্দেন কট্ঠগোমযাদিং ৰা পক্খিপন্তস্স পযোগগণনায পাচিত্তিযন্তি যোজনা। আৰিলত্তন্তি পাণকা যথা নস্সন্তি, তথা আলুল়িতভাৰং। ইমিনা এৰং অৰিনস্সমানপাণকে মহাউদকে তিণাদিং পক্খিপন্তস্স অনাপত্তিভাৰং দীপেতি। যথাহ অট্ঠকথাযং ‘‘ইদং পন মহাউদকং…পে॰… সন্ধায ৰুত্ত’’ন্তি (পাচি॰ অট্ঠ॰ ১৪০)।

    1116-7. Yaṃ jalaṃ tiṇādimhi pakkhitte sace khayaṃ vā āvilattaṃ vā gacchati, tādise udake mattikaṃ, tiṇameva vā sace sakaṭapuṇṇampi ekato pakkhipeyya, evaṃ pakkhipantassa ekā pācitti. Ekekaṃ mattikaṃ, tiṇameva vā. Vā-saddena kaṭṭhagomayādiṃ vā pakkhipantassa payogagaṇanāya pācittiyanti yojanā. Āvilattanti pāṇakā yathā nassanti, tathā āluḷitabhāvaṃ. Iminā evaṃ avinassamānapāṇake mahāudake tiṇādiṃ pakkhipantassa anāpattibhāvaṃ dīpeti. Yathāha aṭṭhakathāyaṃ ‘‘idaṃ pana mahāudakaṃ…pe… sandhāya vutta’’nti (pāci. aṭṭha. 140).

    ১১১৮. দুক্কটং হোতীতি আণাপনপচ্চযা দুক্কটং হোতি। একা পাচিত্তি।

    1118.Dukkaṭaṃ hotīti āṇāpanapaccayā dukkaṭaṃ hoti. Ekā pācitti.

    ১১১৯. সব্বত্থাতি সপ্পাণকে চ অপ্পাণকে চ। ৰিমতিস্সাতি সহচরিযেন ৰিমতিসহিতমাহ।

    1119.Sabbatthāti sappāṇake ca appāṇake ca. Vimatissāti sahacariyena vimatisahitamāha.

    ১১২০. ‘‘সব্বত্থাপাণসঞ্ঞিস্সা’’তিআদীসু অধিকারতো লব্ভমানং ‘‘সিঞ্চনাদীসু যং কিঞ্চি করোন্তস্সা’’তি ইদং পচ্চেকং সম্বন্ধনীযং। সব্বত্থাতি সপ্পাণকে, অপ্পাণকে চ। অপাণসঞ্ঞিস্সাতি এৰং কতেন পযোগেন নস্সমানা পাণকা ন সন্তীতিসঞ্ঞিস্স। অসঞ্চিচ্চাতি যথা পাণকা ন নস্সন্তি, এৰং ঘটাদীহি গহিতং সপ্পাণকউদকং উদকেযেৰ ওসিঞ্চন্তস্স ৰা ওসিঞ্চাপেন্তস্স ৰা ৰট্টিত্ৰা তস্মিং উদকে তিণাদিম্হি পতিতে অসঞ্চিচ্চ কতং নাম হোতি। অসতিস্সাতি অসতিযা করোন্তস্স। অজানতোতি পাণকানং অত্থিভাৰং অজানিত্ৰা করোন্তস্স।

    1120.‘‘Sabbatthāpāṇasaññissā’’tiādīsu adhikārato labbhamānaṃ ‘‘siñcanādīsu yaṃ kiñci karontassā’’ti idaṃ paccekaṃ sambandhanīyaṃ. Sabbatthāti sappāṇake, appāṇake ca. Apāṇasaññissāti evaṃ katena payogena nassamānā pāṇakā na santītisaññissa. Asañciccāti yathā pāṇakā na nassanti, evaṃ ghaṭādīhi gahitaṃ sappāṇakaudakaṃ udakeyeva osiñcantassa vā osiñcāpentassa vā vaṭṭitvā tasmiṃ udake tiṇādimhi patite asañcicca kataṃ nāma hoti. Asatissāti asatiyā karontassa. Ajānatoti pāṇakānaṃ atthibhāvaṃ ajānitvā karontassa.

    ১১২১-২. ৰধকচিত্তে সতি সত্তমে সপ্পাণকৰগ্গে পঠমসিক্খাপদস্স ৰিসযভাৰতো ততো ৰিসেসেতুমাহ ‘‘ৰিনা ৰধকচিত্তেনা’’তি। ইমস্মিং সিক্খাপদে পাল়িযং (পাচি॰ ১৪০) ‘‘সপ্পাণকং উদক’’ন্তি ইমিনা অট্ঠকথাগতং পঠমঙ্গঞ্চ ‘‘জান’’ন্তি ইমিনা দুতিযঙ্গঞ্চ ‘‘সিঞ্চেয্য ৰা সিঞ্চাপেয্য ৰা’’তি ইমিনা চতুত্থঙ্গঞ্চ ৰুত্তং, ন ৰুত্তং ততিযঙ্গং। তঞ্চ খো ৰধকচিত্তস্স সত্তমৰগ্গে পঠমসিক্খাপদেন পাচিত্তিযৰচনতো এত্থ তদভাৰলক্খণং ততিযঙ্গং ৰুত্তমেৰ হোতীতিঅধিপ্পাযেন অট্ঠকথাযং ৰুত্তন্তি আহ ‘‘ৰিনা ৰধকচিত্তেনা’’তি। তেনেৰাহ ‘‘চত্তারেৰস্স অঙ্গানি, নিদ্দিট্ঠানি মহেসিনা’’তি। অস্সাতি ইমস্স সিক্খাপদস্স।

    1121-2. Vadhakacitte sati sattame sappāṇakavagge paṭhamasikkhāpadassa visayabhāvato tato visesetumāha ‘‘vinā vadhakacittenā’’ti. Imasmiṃ sikkhāpade pāḷiyaṃ (pāci. 140) ‘‘sappāṇakaṃ udaka’’nti iminā aṭṭhakathāgataṃ paṭhamaṅgañca ‘‘jāna’’nti iminā dutiyaṅgañca ‘‘siñceyya vā siñcāpeyya vā’’ti iminā catutthaṅgañca vuttaṃ, na vuttaṃ tatiyaṅgaṃ. Tañca kho vadhakacittassa sattamavagge paṭhamasikkhāpadena pācittiyavacanato ettha tadabhāvalakkhaṇaṃ tatiyaṅgaṃ vuttameva hotītiadhippāyena aṭṭhakathāyaṃ vuttanti āha ‘‘vinā vadhakacittenā’’ti. Tenevāha ‘‘cattārevassa aṅgāni, niddiṭṭhāni mahesinā’’ti. Assāti imassa sikkhāpadassa.

    ১১২৩. সপ্পাণকসঞ্ঞিস্স ‘‘পরিভোগেন পাণকা মরিস্সন্তী’’তি পুব্বভাগে জানন্তস্সাপি সিঞ্চনসিঞ্চাপনং ‘‘পদীপে নিপতিত্ৰা পটঙ্গাদিপাণকা মরিস্সন্তী’’তি জানন্তস্স পদীপুজ্জলনং ৰিয ৰিনাপি ৰধকচেতনায হোতীতি আহ ‘‘পণ্ণত্তিৰজ্জং তিচিত্ত’’ন্তি। এত্থ কিস্মিঞ্চি কুপিতস্স ৰা কীল়াপসুতস্স ৰা সিঞ্চতো অকুসলচিত্তং, মালাগচ্ছাদিং সিঞ্চতো কুসলচিত্তং, পণ্ণত্তিং অজানতো খীণাসৰস্স অব্যাকতচিত্তন্তি তিচিত্তং ৰেদিতব্বং। তস্সাতি সত্তমৰগ্গে পঠমসিক্খাপদস্স। অস্স চাতি ইমস্স সিঞ্চনসিক্খাপদস্স চ। ইদং ৰিসেসনন্তি ইদং নানাকরণং। এত্থ ইমস্মিং পকরণে নিদ্দিট্ঠং পকাসিতন্তি অত্থো। তং লোকৰজ্জং, ইদং পণ্ণত্তিৰজ্জং। তং অকুসলচিত্তং, ইদং তিচিত্তং। তং দুক্খৰেদনং, ইদং তিৰেদনন্তি ৰুত্তং হোতি।

    1123. Sappāṇakasaññissa ‘‘paribhogena pāṇakā marissantī’’ti pubbabhāge jānantassāpi siñcanasiñcāpanaṃ ‘‘padīpe nipatitvā paṭaṅgādipāṇakā marissantī’’ti jānantassa padīpujjalanaṃ viya vināpi vadhakacetanāya hotīti āha ‘‘paṇṇattivajjaṃ ticitta’’nti. Ettha kismiñci kupitassa vā kīḷāpasutassa vā siñcato akusalacittaṃ, mālāgacchādiṃ siñcato kusalacittaṃ, paṇṇattiṃ ajānato khīṇāsavassa abyākatacittanti ticittaṃ veditabbaṃ. Tassāti sattamavagge paṭhamasikkhāpadassa. Assa cāti imassa siñcanasikkhāpadassa ca. Idaṃ visesananti idaṃ nānākaraṇaṃ. Ettha imasmiṃ pakaraṇe niddiṭṭhaṃ pakāsitanti attho. Taṃ lokavajjaṃ, idaṃ paṇṇattivajjaṃ. Taṃ akusalacittaṃ, idaṃ ticittaṃ. Taṃ dukkhavedanaṃ, idaṃ tivedananti vuttaṃ hoti.

    সত্তমৰগ্গে দুতিযস্স ইমস্স চ কো ৰিসেসোতি চে? ইমস্স সিক্খাপদস্স ‘‘সিঞ্চেয্য ৰা সিঞ্চাপেয্য ৰা’’তি বাহিরপরিভোগৰসেন পঠমং পঞ্ঞত্তত্তা ‘‘সপ্পাণকং উদকং পরিভুঞ্জেয্যা’’তি (পাচি॰ ৩৮৮) সিক্খাপদং অত্তনো নহানপানাদিপরিভোগৰসেন পঞ্ঞত্তন্তি ৰেদিতব্বং। তস্মিং ৰা পঠমং পঞ্ঞত্তেপি অত্তনো পরিভোগৰসেনেৰ পঞ্ঞত্তত্তা পুন ইদং সিক্খাপদং বাহিরপরিভোগৰসেন পঞ্ঞত্তন্তি গহেতব্বং।

    Sattamavagge dutiyassa imassa ca ko visesoti ce? Imassa sikkhāpadassa ‘‘siñceyya vā siñcāpeyya vā’’ti bāhiraparibhogavasena paṭhamaṃ paññattattā ‘‘sappāṇakaṃ udakaṃ paribhuñjeyyā’’ti (pāci. 388) sikkhāpadaṃ attano nahānapānādiparibhogavasena paññattanti veditabbaṃ. Tasmiṃ vā paṭhamaṃ paññattepi attano paribhogavaseneva paññattattā puna idaṃ sikkhāpadaṃ bāhiraparibhogavasena paññattanti gahetabbaṃ.

    সপ্পাণককথাৰণ্ণনা।

    Sappāṇakakathāvaṇṇanā.

    সেনাসনৰগ্গো দুতিযো।

    Senāsanavaggo dutiyo.

    ১১২৪-৬. অট্ঠঙ্গযুত্তস্সাতি এত্থ ‘‘সীলৰা’’তিআদি একমঙ্গং, ‘‘বহুস্সুতো’’তিআদি দুতিযং, ‘‘উভযানি খো পনস্সা’’তিআদি ততিযং, ‘‘কল্যাণৰাচো হোতী’’তিআদি চতুত্থং, ‘‘যেভুয্যেন ভিক্খুনীনং পিযো হোতি মনাপো’’তি পঞ্চমং, ‘‘পটিবলো হোতি ভিক্খুনিযো ওৰদিতু’’ন্তি ছট্ঠং, ‘‘ন খো পনেতং ভগৰন্তং উদ্দিস্সা’’তিআদি সত্তমং, ‘‘ৰীসতিৰস্সো ৰা হোতি অতিরেকৰীসতিৰস্সো ৰা’’তি অট্ঠমন্তি এতানি পাঠাগতানি অট্ঠ অঙ্গানি নাম। ভিক্খুনীনং ওৰাদো, তদত্থায সম্মুতীতি ৰিগ্গহো। ইধাতি ইমস্মিং সিক্খাপদে। ঞত্তি চতুত্থী যস্স কম্মস্সাতি ৰিগ্গহো। ‘‘কম্মেনা’’তি সেসো।

    1124-6.Aṭṭhaṅgayuttassāti ettha ‘‘sīlavā’’tiādi ekamaṅgaṃ, ‘‘bahussuto’’tiādi dutiyaṃ, ‘‘ubhayāni kho panassā’’tiādi tatiyaṃ, ‘‘kalyāṇavāco hotī’’tiādi catutthaṃ, ‘‘yebhuyyena bhikkhunīnaṃ piyo hoti manāpo’’ti pañcamaṃ, ‘‘paṭibalo hoti bhikkhuniyo ovaditu’’nti chaṭṭhaṃ, ‘‘na kho panetaṃ bhagavantaṃ uddissā’’tiādi sattamaṃ, ‘‘vīsativasso vā hoti atirekavīsativasso vā’’ti aṭṭhamanti etāni pāṭhāgatāni aṭṭha aṅgāni nāma. Bhikkhunīnaṃ ovādo, tadatthāya sammutīti viggaho. Idhāti imasmiṃ sikkhāpade. Ñatti catutthī yassa kammassāti viggaho. ‘‘Kammenā’’ti seso.

    অট্ঠঙ্গযুত্তস্স ভিক্খুস্স মহেসিনা ঞত্তিচতুত্থেন কম্মেন যা ভিক্খুনোৰাদকসম্মুতি ইধ অনুঞ্ঞাতা, তায অসম্মতো যো ভিক্খূতি যোজনা।

    Aṭṭhaṅgayuttassa bhikkhussa mahesinā ñatticatutthena kammena yā bhikkhunovādakasammuti idha anuññātā, tāya asammato yo bhikkhūti yojanā.

    গরুধম্মেহি অট্ঠহীতি ‘‘ৰস্সসতূপসম্পন্নায ভিক্খুনিযা তদহুপসম্পন্নস্স ভিক্খুনো অভিৰাদনং পচ্চুপট্ঠানং অঞ্জলিকম্মং সামীচিকম্মং কাতব্ব’’ন্তিআদীহি (পাচি॰ ১৪৯) পাল়িযং আগতেহি অট্ঠহি গরুধম্মেহি। একং ভিক্খুনিং, সম্বহুলা ৰা ভিক্খুনিযোতি ইদং পকরণতো লব্ভতি। ওসারেন্তোৰাতি পাল়িং উচ্চারেন্তোৰ। যথাহ অট্ঠকথাযং ‘‘ওসারেতব্বাতি পাল়ি ৰত্তব্বা’’তি (পাচি॰ অট্ঠ॰ ১৪৯)। তে ধম্মেতি পুব্বে ৰুত্তে তে অট্ঠ গরুধম্মে। ওৰদেয্যাতি অট্ঠগরুধম্মপাল়িভাসনসঙ্খাতং ওৰাদং করেয্য।

    Garudhammehi aṭṭhahīti ‘‘vassasatūpasampannāya bhikkhuniyā tadahupasampannassa bhikkhuno abhivādanaṃ paccupaṭṭhānaṃ añjalikammaṃ sāmīcikammaṃ kātabba’’ntiādīhi (pāci. 149) pāḷiyaṃ āgatehi aṭṭhahi garudhammehi. Ekaṃ bhikkhuniṃ, sambahulā vā bhikkhuniyoti idaṃ pakaraṇato labbhati. Osārentovāti pāḷiṃ uccārentova. Yathāha aṭṭhakathāyaṃ ‘‘osāretabbāti pāḷi vattabbā’’ti (pāci. aṭṭha. 149). Te dhammeti pubbe vutte te aṭṭha garudhamme. Ovadeyyāti aṭṭhagarudhammapāḷibhāsanasaṅkhātaṃ ovādaṃ kareyya.

    কিং ৰুত্তং হোতি? পাটিপদে ওৰাদত্থায আগন্ত্ৰা ৰন্দিত্ৰা একমন্তং নিসিন্না ভিক্খুনিযো ‘‘তেন ভিক্খুনা’’তিআদিনা পাঠাগতনযেন ‘‘সমগ্গত্থ ভগিনিযো’’তি পুচ্ছিত্ৰা ‘‘সমগ্গম্হয্যা’’তি যদি ৰদেয্যুং, ‘‘ৰত্তন্তি ভগিনিযো অট্ঠ গরুধম্মা’’তি পুনপি পুচ্ছিত্ৰা ‘‘ৰত্তন্তয্যা’’তি যদি ৰদেয্যুং, ‘‘এসো ভগিনিযো ওৰাদো’’তি নিয্যাদেয্য। ‘‘ন ৰত্তন্তয্যা’’তি যদি ৰদেয্যুং, ‘‘ৰস্সসতূপসম্পন্নাযা’’তিআদিনা অট্ঠগরুধম্মপাল়িভাসনৰসেন ওৰাদং করেয্যাতি ৰুত্তং হোতি। যথাহ ‘‘ওসারেন্তোৰ তে ধম্মে ওৰদেয্যা’’তি।

    Kiṃ vuttaṃ hoti? Pāṭipade ovādatthāya āgantvā vanditvā ekamantaṃ nisinnā bhikkhuniyo ‘‘tena bhikkhunā’’tiādinā pāṭhāgatanayena ‘‘samaggattha bhaginiyo’’ti pucchitvā ‘‘samaggamhayyā’’ti yadi vadeyyuṃ, ‘‘vattanti bhaginiyo aṭṭha garudhammā’’ti punapi pucchitvā ‘‘vattantayyā’’ti yadi vadeyyuṃ, ‘‘eso bhaginiyo ovādo’’ti niyyādeyya. ‘‘Na vattantayyā’’ti yadi vadeyyuṃ, ‘‘vassasatūpasampannāyā’’tiādinā aṭṭhagarudhammapāḷibhāsanavasena ovādaṃ kareyyāti vuttaṃ hoti. Yathāha ‘‘osārentova te dhamme ovadeyyā’’ti.

    ১১২৭. অঞ্ঞেন ধম্মেনাতি সুত্তন্তেন ৰা অভিধম্মেন ৰা। একতোউপসম্পন্নন্তি ভিক্খুনিসঙ্ঘেযেৰ উপসম্পন্নং। যথাহ অট্ঠকথাযং ‘‘ভিক্খুনীনং সন্তিকে একতোউপসম্পন্নাযা’’তি। তথাতি ওৰদন্তস্স দুক্কটন্তি দস্সেতি।

    1127.Aññena dhammenāti suttantena vā abhidhammena vā. Ekatoupasampannanti bhikkhunisaṅgheyeva upasampannaṃ. Yathāha aṭṭhakathāyaṃ ‘‘bhikkhunīnaṃ santike ekatoupasampannāyā’’ti. Tathāti ovadantassa dukkaṭanti dasseti.

    ১১২৮. ভিক্খূনং সন্তিকেযেৰ উপসম্পন্নন্তি মহাপজাপতিযা গোতমিযা সদ্ধিং পব্বজিতা পঞ্চসতা সাকিযানিযো সঙ্গণ্হাতি। লিঙ্গৰিপল্লাসে উপসম্পন্নভিক্খুনো লিঙ্গপরিৰত্তনে সতি তথা পাচিত্তি এৰ পকাসিতাতি অত্থো।

    1128.Bhikkhūnaṃ santikeyeva upasampannanti mahāpajāpatiyā gotamiyā saddhiṃ pabbajitā pañcasatā sākiyāniyo saṅgaṇhāti. Liṅgavipallāse upasampannabhikkhuno liṅgaparivattane sati tathā pācitti eva pakāsitāti attho.

    ১১২৯. ওৰাদং অনিয্যাদেত্ৰাতি ‘‘ৰত্তন্তি ভগিনিযো অট্ঠ গরুধম্মা’’তি পুচ্ছিত্ৰা ‘‘ৰত্তন্তয্যা’’তি ৰুত্তেতি এত্থাপি সোযেৰত্থো।

    1129.Ovādaṃaniyyādetvāti ‘‘vattanti bhaginiyo aṭṭha garudhammā’’ti pucchitvā ‘‘vattantayyā’’ti vutteti etthāpi soyevattho.

    ১১৩০. গরুধম্মেহি ওৰদতো দুক্কটন্তি যোজনা।

    1130. Garudhammehi ovadato dukkaṭanti yojanā.

    ১১৩১. অগণ্হন্তস্স ওৰাদন্তি এত্থ ওৰাদত্থং যাচনসন্দেসো তদত্থতায ওৰাদোতি গহিতোতি ওৰাদসাসনং অসম্পটিচ্ছন্তস্সাতি অত্থো। অপচ্চাহরতোপি তন্তি তং অত্তনা গহিতং ওৰাদসাসনং উপোসথগ্গে আরোচেত্ৰা পাতিমোক্খুদ্দেসকেন দিন্নং পটিসাসনং ভিক্খুনিসঙ্ঘস্স নেত্ৰা অৰদন্তস্সাপি। বালন্তি সাসনসম্পটিচ্ছনঞ্চ উপোসথগ্গং নেত্ৰা আরোচনঞ্চ পটিসাসনং হরিত্ৰা পাটিপদে ভিক্খুনিসঙ্ঘগণপুগ্গলানং যথানুরূপং পচ্চারোচনঞ্চ কাতুং অজাননতায বালং। গিলানন্তি উপোসথগ্গং গন্ত্ৰাপি আরোচনস্স বাধকেন গেলঞ্ঞেন সমন্নাগতং গিলানং। গমিকন্তি পাটিপদং অনিসীদিত্ৰা গন্তব্বং অচ্চাযিকগমনং গমিকঞ্চ ঠপেত্ৰা দুক্কটং সিযাতি সম্বন্ধো।

    1131.Agaṇhantassa ovādanti ettha ovādatthaṃ yācanasandeso tadatthatāya ovādoti gahitoti ovādasāsanaṃ asampaṭicchantassāti attho. Apaccāharatopi tanti taṃ attanā gahitaṃ ovādasāsanaṃ uposathagge ārocetvā pātimokkhuddesakena dinnaṃ paṭisāsanaṃ bhikkhunisaṅghassa netvā avadantassāpi. Bālanti sāsanasampaṭicchanañca uposathaggaṃ netvā ārocanañca paṭisāsanaṃ haritvā pāṭipade bhikkhunisaṅghagaṇapuggalānaṃ yathānurūpaṃ paccārocanañca kātuṃ ajānanatāya bālaṃ. Gilānanti uposathaggaṃ gantvāpi ārocanassa bādhakena gelaññena samannāgataṃ gilānaṃ. Gamikanti pāṭipadaṃ anisīditvā gantabbaṃ accāyikagamanaṃ gamikañca ṭhapetvā dukkaṭaṃ siyāti sambandho.

    ১১৩২. কম্মস্মিন্তি এত্থ কম্ম-সদ্দেন ভিক্খুনোৰাদকস্স ঞত্তিচতুত্থেন কম্মেন দিন্নং সম্মুতিকম্মং অধিপ্পেতন্তি অট্ঠকথাযং ৰুত্তং। ঞত্তিং, কম্মৰাচঞ্চ পরিহাপেত্ৰা, পরিৰত্তেত্ৰা ৰা কতং চে, অধম্মকম্মং নাম। ৰগ্গেতি ছন্দারহানং ছন্দস্স অনাহরণেন ৰা সন্নিপতিতানং উক্কোটেন ৰা ৰগ্গে সতি। তিকপাচিত্তিযং সিযাতি ‘‘অধম্মকম্মে অধম্মকম্মসঞ্ঞী ৰগ্গং ভিক্খুনিসঙ্ঘং ৰগ্গসঞ্ঞী ওৰদতি, ৰেমতিকো ওৰদতি, সমগ্গসঞ্ঞী ওৰদতি, আপত্তি পাচিত্তিযস্সা’’তি (পাচি॰ ১৫০) অধম্মকম্মে অধম্মকম্মসঞ্ঞিপক্খে ৰুত্তপাচিত্তিযত্তযং হোতি।

    1132.Kammasminti ettha kamma-saddena bhikkhunovādakassa ñatticatutthena kammena dinnaṃ sammutikammaṃ adhippetanti aṭṭhakathāyaṃ vuttaṃ. Ñattiṃ, kammavācañca parihāpetvā, parivattetvā vā kataṃ ce, adhammakammaṃ nāma. Vaggeti chandārahānaṃ chandassa anāharaṇena vā sannipatitānaṃ ukkoṭena vā vagge sati. Tikapācittiyaṃ siyāti ‘‘adhammakamme adhammakammasaññī vaggaṃ bhikkhunisaṅghaṃ vaggasaññī ovadati, vematiko ovadati, samaggasaññī ovadati, āpatti pācittiyassā’’ti (pāci. 150) adhammakamme adhammakammasaññipakkhe vuttapācittiyattayaṃ hoti.

    ১১৩৩. অধম্মে পন কম্মস্মিং ৰেমতিকস্সাপীতি যোজনা। ‘‘তথা’’তি ইমিনা ‘‘ৰগ্গে ভিক্খুনিসঙ্ঘস্মিং, তিকপাচিত্তিযং সিযা’’তি ইদং সঙ্গণ্হাতি। কিং ৰুত্তং হোতি? অধম্মকম্মে ৰেমতিকপক্খে ‘‘ৰগ্গং ভিক্খুনিসঙ্ঘং ৰগ্গসঞ্ঞী, ৰেমতিকো, সমগ্গসঞ্ঞী ওৰদতি, আপত্তি পাচিত্তিযস্সা’’তি (পাচি॰ ১৫০) অধম্মিককম্মেযেৰ ৰিমতিৰারে ৰুত্ততিকপাচিত্তিযং হোতীতি ৰুত্তং হোতি। ‘‘ধম্মকম্মন্তি সঞ্ঞিনো’’তি ইমিনাপি ‘‘অধম্মে পন কম্মস্মি’’ন্তি ইদং যোজেতব্বং, ‘‘তথা’’তি সম্বন্ধো, তেন ‘‘ৰগ্গে’’তিআদিকং সঙ্গণ্হাতি। ‘‘অধম্মকম্মে ধম্মকম্মসঞ্ঞী ৰগ্গং ভিক্খুনিসঙ্ঘং ৰগ্গসঞ্ঞী ওৰদতি, ৰেমতিকো, সমগ্গসঞ্ঞী ওৰদতি, আপত্তি পাচিত্তিযস্সা’’তি (পাচি॰ ১৫০) ৰুত্তং তিকপাচিত্তিযং হোতি। এৰমেতা পাচিত্তিযো সন্ধাযাহ ‘‘নৰ পাচিত্তিযো ৰুত্তা’’তি।

    1133. Adhamme pana kammasmiṃ vematikassāpīti yojanā. ‘‘Tathā’’ti iminā ‘‘vagge bhikkhunisaṅghasmiṃ, tikapācittiyaṃ siyā’’ti idaṃ saṅgaṇhāti. Kiṃ vuttaṃ hoti? Adhammakamme vematikapakkhe ‘‘vaggaṃ bhikkhunisaṅghaṃ vaggasaññī, vematiko, samaggasaññī ovadati, āpatti pācittiyassā’’ti (pāci. 150) adhammikakammeyeva vimativāre vuttatikapācittiyaṃ hotīti vuttaṃ hoti. ‘‘Dhammakammanti saññino’’ti imināpi ‘‘adhamme pana kammasmi’’nti idaṃ yojetabbaṃ, ‘‘tathā’’ti sambandho, tena ‘‘vagge’’tiādikaṃ saṅgaṇhāti. ‘‘Adhammakamme dhammakammasaññī vaggaṃ bhikkhunisaṅghaṃ vaggasaññī ovadati, vematiko, samaggasaññī ovadati, āpatti pācittiyassā’’ti (pāci. 150) vuttaṃ tikapācittiyaṃ hoti. Evametā pācittiyo sandhāyāha ‘‘nava pācittiyo vuttā’’ti.

    ইমস্মিং ৰিয অধম্মকম্মৰারে ‘‘সমগ্গে ভিক্খুনিসঙ্ঘস্মি’’ন্তি ৰিকপ্পে চ এৰমেৰ নৰ পাচিত্তিযো হোন্তীতি অতিদিসন্তো ‘‘সমগ্গেপি চ তত্তকা’’তি আহ। যথাহ ‘‘অধম্মকম্মে অধম্মকম্মসঞ্ঞী সমগ্গং ভিক্খুনিসঙ্ঘং ৰগ্গসঞ্ঞী, ৰেমতিকো, সমগ্গসঞ্ঞী ওৰদতি, আপত্তি পাচিত্তিযস্স। অধম্মকম্মে ৰেমতিকো সমগ্গং ভিক্খুনিসঙ্ঘং ৰগ্গসঞ্ঞী, ৰেমতিকো, সমগ্গসঞ্ঞী ওৰদতি, আপত্তি পাচিত্তিযস্স। অধম্মকম্মে ধম্মকম্মসঞ্ঞী সমগ্গং ভিক্খুনিসঙ্ঘং ৰগ্গসঞ্ঞী, ৰেমতিকো, সমগ্গসঞ্ঞী ওৰদতি, আপত্তি পাচিত্তিযস্সা’’তি (পাচি॰ ১৫০)।

    Imasmiṃ viya adhammakammavāre ‘‘samagge bhikkhunisaṅghasmi’’nti vikappe ca evameva nava pācittiyo hontīti atidisanto ‘‘samaggepi ca tattakā’’ti āha. Yathāha ‘‘adhammakamme adhammakammasaññī samaggaṃ bhikkhunisaṅghaṃ vaggasaññī, vematiko, samaggasaññī ovadati, āpatti pācittiyassa. Adhammakamme vematiko samaggaṃ bhikkhunisaṅghaṃ vaggasaññī, vematiko, samaggasaññī ovadati, āpatti pācittiyassa. Adhammakamme dhammakammasaññī samaggaṃ bhikkhunisaṅghaṃ vaggasaññī, vematiko, samaggasaññī ovadati, āpatti pācittiyassā’’ti (pāci. 150).

    ১১৩৪. দ্ৰিন্নং নৰকানং ৰসাতি যথাদস্সিতং ৰগ্গনৰকং, সমগ্গনৰকন্তি দ্ৰিন্নং নৰকানং ৰসেন। তাতি পাচিত্তিযো।

    1134.Dvinnaṃ navakānaṃ vasāti yathādassitaṃ vagganavakaṃ, samagganavakanti dvinnaṃ navakānaṃ vasena. Tāti pācittiyo.

    ‘‘ধম্মকম্মে অধম্মকম্মসঞ্ঞী ৰগ্গং ভিক্খুনিসঙ্ঘং ৰগ্গসঞ্ঞী, ৰেমতিকো, সমগ্গসঞ্ঞী ওৰদতি, আপত্তি দুক্কটস্স। ধম্মকম্মে ৰেমতিকো ৰগ্গং ভিক্খুনিসঙ্ঘং ৰগ্গসঞ্ঞী, ৰেমতিকো, সমগ্গসঞ্ঞী ওৰদতি, আপত্তি দুক্কটস্স। ধম্মকম্মে ধম্মকম্মসঞ্ঞী ৰগ্গং ভিক্খুনিসঙ্ঘং ৰগ্গসঞ্ঞী, ৰেমতিকো, সমগ্গসঞ্ঞী ওৰদতি, আপত্তি দুক্কটস্সা’’তি ৰগ্গপক্খে নৰ দুক্কটানি। ‘‘ধম্মকম্মে অধম্মকম্মসঞ্ঞী সমগ্গং ভিক্খুনিসঙ্ঘং ৰগ্গসঞ্ঞী, ৰেমতিকো, সমগ্গসঞ্ঞী ওৰদতি, আপত্তি দুক্কটস্স। ধম্মকম্মে ৰেমতিকো সমগ্গং ভিক্খুনিসঙ্ঘং ৰগ্গসঞ্ঞী, ৰেমতিকো, সমগ্গসঞ্ঞী ওৰদতি, আপত্তি দুক্কটস্স। ধম্মকম্মে ধম্মকম্মসঞ্ঞী সমগ্গং ভিক্খুনিসঙ্ঘং ৰগ্গসঞ্ঞী, ৰেমতিকো ওৰদতি, আপত্তি দুক্কটস্স। ধম্মকম্মে ধম্মকম্মসঞ্ঞী সমগ্গং ভিক্খুনিসঙ্ঘং সমগ্গসঞ্ঞী ওৰদতি, অনাপত্তী’’তি (পাচি॰ ১৫১) এত্থ অন্তে ৰুত্তং অনাপত্তিৰারং ৰিনা অৰসেসেসু অট্ঠসু ৰারেসু সমগ্গপক্খে অট্ঠ দুক্কটানি। এৰং পুরিমানি নৰ, ইমানি অট্ঠাতি ধম্মকম্মপক্খে সত্তরস দুক্কটানি হোন্তীতি আহ ‘‘দুক্কটং ধম্মকম্মেপি, সত্তরসৰিধং সিযা’’তি।

    ‘‘Dhammakamme adhammakammasaññī vaggaṃ bhikkhunisaṅghaṃ vaggasaññī, vematiko, samaggasaññī ovadati, āpatti dukkaṭassa. Dhammakamme vematiko vaggaṃ bhikkhunisaṅghaṃ vaggasaññī, vematiko, samaggasaññī ovadati, āpatti dukkaṭassa. Dhammakamme dhammakammasaññī vaggaṃ bhikkhunisaṅghaṃ vaggasaññī, vematiko, samaggasaññī ovadati, āpatti dukkaṭassā’’ti vaggapakkhe nava dukkaṭāni. ‘‘Dhammakamme adhammakammasaññī samaggaṃ bhikkhunisaṅghaṃ vaggasaññī, vematiko, samaggasaññī ovadati, āpatti dukkaṭassa. Dhammakamme vematiko samaggaṃ bhikkhunisaṅghaṃ vaggasaññī, vematiko, samaggasaññī ovadati, āpatti dukkaṭassa. Dhammakamme dhammakammasaññī samaggaṃ bhikkhunisaṅghaṃ vaggasaññī, vematiko ovadati, āpatti dukkaṭassa. Dhammakamme dhammakammasaññī samaggaṃ bhikkhunisaṅghaṃ samaggasaññī ovadati, anāpattī’’ti (pāci. 151) ettha ante vuttaṃ anāpattivāraṃ vinā avasesesu aṭṭhasu vāresu samaggapakkhe aṭṭha dukkaṭāni. Evaṃ purimāni nava, imāni aṭṭhāti dhammakammapakkhe sattarasa dukkaṭāni hontīti āha ‘‘dukkaṭaṃ dhammakammepi, sattarasavidhaṃ siyā’’ti.

    ১১৩৫. ‘‘ওসারেহী’’তি ৰুত্তো কথেতি ৰাতি যোজনা। ‘‘অট্ঠগরুধম্মং কথেহী’’তি ৰুত্তো তং কথেতি ৰা। পঞ্হং পুট্ঠো কথেতি ৰাতি অট্ঠগরুধম্মৰিসযে পঞ্হং পুট্ঠো তমেৰ ৰদতি ৰা। সিক্খমানায কথেতি ৰাতি সম্বন্ধো। সিক্খমানায অট্ঠগরুধম্মে কথেতি ৰা, নেৰ দোসোতি অত্থো। উম্মত্তকাদিনো কথযতো নেৰ দোসোতি যোজনা।

    1135. ‘‘Osārehī’’ti vutto katheti vāti yojanā. ‘‘Aṭṭhagarudhammaṃ kathehī’’ti vutto taṃ katheti vā. Pañhaṃ puṭṭho katheti vāti aṭṭhagarudhammavisaye pañhaṃ puṭṭho tameva vadati vā. Sikkhamānāya katheti vāti sambandho. Sikkhamānāya aṭṭhagarudhamme katheti vā, neva dosoti attho. Ummattakādino kathayato neva dosoti yojanā.

    ১১৩৬. ইদানি তিণ্ণম্পি বহুস্সুতানং লক্খণে একত্থ দস্সিতে ভিক্খুনোৰাদকস্স ৰিসেসো সুৰিঞ্ঞেয্যো হোতীতি তং দস্সেতুমাহ ‘‘ৰাচুগ্গতাৰ কাতব্বা’’তিআদি। দ্ৰে মাতিকা পগুণা ৰাচুগ্গতা কাতব্বাতি যোজনা। ভিক্খুভিক্খুনিৰিভঙ্গে মাতিকা পগুণা ৰাচুগ্গতাৰ কাতব্বাতি যোজনা, ভিক্খুভিক্খুনিৰিভঙ্গমাতিকা পগুণা কত্ৰা তাসং অট্ঠকথং উগ্গহেত্ৰা পাল়িতো, অত্থতো চ ৰচনপথারুল়্হা ৰোহারক্খমাযেৰ কাতব্বাতি ৰুত্তং হোতি। চত্তারো ভাণৰারা পগুণা ৰাচুগ্গতাৰ কাতব্বাতি পকাসিতাতি যোজনা। ‘‘পগুণা’’তি ইমিনা পাল়িযং পগুণং কত্ৰা ধারেত্ৰা পরিপুচ্ছিতব্বন্তি দস্সেতি। ‘‘ৰাচুগ্গতাৰ কাতব্বা’’তি ইমিনা তদত্থং সুত্ৰা ধারেত্ৰা পরিপুচ্ছিতব্বমেৰাতি দস্সেতি।

    1136. Idāni tiṇṇampi bahussutānaṃ lakkhaṇe ekattha dassite bhikkhunovādakassa viseso suviññeyyo hotīti taṃ dassetumāha ‘‘vācuggatāva kātabbā’’tiādi. Dve mātikā paguṇā vācuggatā kātabbāti yojanā. Bhikkhubhikkhunivibhaṅge mātikā paguṇā vācuggatāva kātabbāti yojanā, bhikkhubhikkhunivibhaṅgamātikā paguṇā katvā tāsaṃ aṭṭhakathaṃ uggahetvā pāḷito, atthato ca vacanapathāruḷhā vohārakkhamāyeva kātabbāti vuttaṃ hoti. Cattāro bhāṇavārā paguṇā vācuggatāva kātabbāti pakāsitāti yojanā. ‘‘Paguṇā’’ti iminā pāḷiyaṃ paguṇaṃ katvā dhāretvā paripucchitabbanti dasseti. ‘‘Vācuggatāva kātabbā’’ti iminā tadatthaṃ sutvā dhāretvā paripucchitabbamevāti dasseti.

    ১১৩৭. পরিকথত্থাযাতি সম্পত্তানং ধম্মকথনত্থায। কথামগ্গোতি মহাসুদস্সনকথামগ্গো। মঙ্গল…পে॰… অনুমোদনাতি অগ্গস্স দানাদিমঙ্গলেসু ভত্তানুমোদনাসঙ্খাতা দানকথা চ, কুমারমঙ্গলাদীসু মহামঙ্গলসুত্তাদিমঙ্গলানুমোদনা চ, অমঙ্গলং নাম কালকিরিযা, তত্থ মতকভত্তাদীসু তিরোকুট্টাদিকথা চাতি এৰং তিস্সোযেৰানুমোদনা।

    1137.Parikathatthāyāti sampattānaṃ dhammakathanatthāya. Kathāmaggoti mahāsudassanakathāmaggo. Maṅgala…pe… anumodanāti aggassa dānādimaṅgalesu bhattānumodanāsaṅkhātā dānakathā ca, kumāramaṅgalādīsu mahāmaṅgalasuttādimaṅgalānumodanā ca, amaṅgalaṃ nāma kālakiriyā, tattha matakabhattādīsu tirokuṭṭādikathā cāti evaṃ tissoyevānumodanā.

    ১১৩৮. উপোসথাদিঅত্থাযাতি এত্থ আদি-সদ্দেন পৰারণাদীনং সঙ্গহো। কম্মাকম্মৰিনিচ্ছযোতি কম্মৰগ্গে ৰুত্তৰিনিচ্ছযো, পরিৰারে কম্মৰগ্গে আগতখুদ্দানুখুদ্দককম্মৰিনিচ্ছযোতি ৰুত্তং হোতি। ‘‘কম্মট্ঠান’’ন্তি ইমিনা ‘‘উত্তমত্থস্স পাপক’’ন্তি ৰক্খমানত্তা ৰিপস্সনাকম্মট্ঠানমাহ। ৰিপস্সনাৰসেন উগ্গণ্হন্তেন চ ধাতুৰৰত্থানমুখেন উগ্গহেতব্বন্তি গণ্ঠিপদেসু ৰুত্তং। উত্তমত্থস্সাতি অরহত্তস্স।

    1138.Uposathādiatthāyāti ettha ādi-saddena pavāraṇādīnaṃ saṅgaho. Kammākammavinicchayoti kammavagge vuttavinicchayo, parivāre kammavagge āgatakhuddānukhuddakakammavinicchayoti vuttaṃ hoti. ‘‘Kammaṭṭhāna’’nti iminā ‘‘uttamatthassa pāpaka’’nti vakkhamānattā vipassanākammaṭṭhānamāha. Vipassanāvasena uggaṇhantena ca dhātuvavatthānamukhena uggahetabbanti gaṇṭhipadesu vuttaṃ. Uttamatthassāti arahattassa.

    ১১৩৯. এত্তকং উগ্গহেত্ৰান বহুস্সুতোতি যথাৰুত্তধম্মানং উগ্গহিতত্তা বহুস্সুতো। পঞ্চৰস্সোতি উপসম্পদতো পট্ঠায পরিপুণ্ণপঞ্চসংৰচ্ছরো। ‘‘দসৰস্সো’’তি এত্থাপি এসেৰ নযো। সংৰচ্ছরৰসেন পঞ্চৰস্সেসু পরিপুণ্ণেসু ৰুত্থৰস্সৰসেন অপরিপুণ্ণেসুপি পঞ্চৰস্সোযেৰ। ইতরথা ঊনপঞ্চৰস্সোতি ৰেদিতব্বো। পরিপুণ্ণৰীসতিৰস্সূপসম্পদাদীসু ৰিয কেচি সংৰচ্ছরগণনং অৰিচারেত্ৰা ‘‘পঞ্চৰস্সো’’তিৰচনসামঞ্ঞেন ৰুত্থৰস্সগণনমেৰ গণ্হন্তি, তদযুত্তং। তথা গহণেসু যুত্তি ৰা মগ্গিতব্বা। মুঞ্চিত্ৰা নিস্সযন্তি নিস্সযৰাসং জহিত্ৰা। ইস্সরোতি নিস্সযাচরিযৰিরহেন ইস্সরো, ইমিনা নিস্সযমুত্তলক্খণং দস্সিতং।

    1139.Ettakaṃ uggahetvāna bahussutoti yathāvuttadhammānaṃ uggahitattā bahussuto. Pañcavassoti upasampadato paṭṭhāya paripuṇṇapañcasaṃvaccharo. ‘‘Dasavasso’’ti etthāpi eseva nayo. Saṃvaccharavasena pañcavassesu paripuṇṇesu vutthavassavasena aparipuṇṇesupi pañcavassoyeva. Itarathā ūnapañcavassoti veditabbo. Paripuṇṇavīsativassūpasampadādīsu viya keci saṃvaccharagaṇanaṃ avicāretvā ‘‘pañcavasso’’tivacanasāmaññena vutthavassagaṇanameva gaṇhanti, tadayuttaṃ. Tathā gahaṇesu yutti vā maggitabbā. Muñcitvā nissayanti nissayavāsaṃ jahitvā. Issaroti nissayācariyavirahena issaro, iminā nissayamuttalakkhaṇaṃ dassitaṃ.

    ১১৪০. দ্ৰে ৰিভঙ্গাতি ভিক্খুভিক্খুনিৰিভঙ্গদ্ৰযং। ইধ ‘‘ৰাচুগ্গতা’’তি ইদং পরিপুচ্ছম্পি সন্ধাযাহাতিপি ৰুত্তং। তেনাহ সারত্থদীপনিযং ‘‘দ্ৰে ৰিভঙ্গা পগুণা ৰাচুগ্গতা কাতব্বা’তিইদং পরিপুচ্ছাৰসেন উগ্গহণম্পি সন্ধায ৰুত্ত’ন্তি ৰদন্তী’’তি (সারত্থ॰ টী॰ পাচিত্তিয ৩.১৪৫-১৪৭)। ব্যঞ্জনাদিতোতি এত্থ ব্যঞ্জনং নাম পদং, আদি-সদ্দেন সঙ্গহিতং অনুব্যঞ্জনং নাম অক্খরং, পদক্খরানি অপরিহাপেত্ৰাতি ৰুত্তং হোতি। চতূস্ৰপি নিকাযেসূতি দীঘমজ্ঝিমসংযুত্ত অঙ্গুত্তরনিকাযেসু, নিদ্ধারণে ভুম্মং। একো ৰা নিকাযো পোত্থকোপি চ একোতি যোজনা। অপি-সদ্দেন খুদ্দকনিকাযস্সাপি সঙ্গহো ৰেদিতব্বো। ‘‘পি ৰা’’তি ইমিনা খুদ্দকনিকাযে জাতকভাণকেন সাট্ঠকথং জাতকং উগ্গহেত্ৰাপি ধম্মপদং সহ ৰত্থুনা উগ্গহেতব্বমেৰাতি দস্সিতে দ্ৰে পোত্থকে সমুচ্চিনোতি, চত্তারি খন্ধকৰত্তানি ৰা।

    1140.Dvevibhaṅgāti bhikkhubhikkhunivibhaṅgadvayaṃ. Idha ‘‘vācuggatā’’ti idaṃ paripucchampi sandhāyāhātipi vuttaṃ. Tenāha sāratthadīpaniyaṃ ‘‘dve vibhaṅgā paguṇā vācuggatā kātabbā’tiidaṃ paripucchāvasena uggahaṇampi sandhāya vutta’nti vadantī’’ti (sārattha. ṭī. pācittiya 3.145-147). Byañjanāditoti ettha byañjanaṃ nāma padaṃ, ādi-saddena saṅgahitaṃ anubyañjanaṃ nāma akkharaṃ, padakkharāni aparihāpetvāti vuttaṃ hoti. Catūsvapi nikāyesūti dīghamajjhimasaṃyutta aṅguttaranikāyesu, niddhāraṇe bhummaṃ. Eko vā nikāyo potthakopi ca ekoti yojanā. Api-saddena khuddakanikāyassāpi saṅgaho veditabbo. ‘‘Pi vā’’ti iminā khuddakanikāye jātakabhāṇakena sāṭṭhakathaṃ jātakaṃ uggahetvāpi dhammapadaṃ saha vatthunā uggahetabbamevāti dassite dve potthake samuccinoti, cattāri khandhakavattāni vā.

    ১১৪২. দিসাপামোক্খো যত্থ যত্থ ৰসতি, তস্সা তস্সাদিসায পামোক্খো পধানো। যেনকামংগমোতি যত্থ কত্থচি দিসাভাগে যথাকামং ৰুত্তিকো হোতীতি অত্থো । পরিসং উপট্ঠাপেতুং কামং লভতে ইস্সরোতি যোজনা, ইস্সরো হুত্ৰা ভিক্খুপরিসায অত্তানং উপট্ঠাপেতুং যথারুচিযা লভতীতি অত্থো। এত্তাৰতা পরিসূপট্ঠাপকলক্খণং ৰুত্তং।

    1142.Disāpāmokkho yattha yattha vasati, tassā tassādisāya pāmokkho padhāno. Yenakāmaṃgamoti yattha katthaci disābhāge yathākāmaṃ vuttiko hotīti attho . Parisaṃ upaṭṭhāpetuṃ kāmaṃ labhate issaroti yojanā, issaro hutvā bhikkhuparisāya attānaṃ upaṭṭhāpetuṃ yathāruciyā labhatīti attho. Ettāvatā parisūpaṭṭhāpakalakkhaṇaṃ vuttaṃ.

    ১১৪৩. ৰাচুগ্গন্তি ৰাচুগ্গতং। এত্থ চ ‘‘ইদানি অযং ভণ্ডপাথাৰিধি ন হোতীতি মিহকপরিপুচ্ছনকথানুরূপতো অত্থকরণং ন ৰাচুগ্গতকরণং নামাতি ৰিঞ্ঞাযতী’’তি নিস্সন্দেহে ৰুত্তং। ইমিনা যথাৰুত্তং দুতিযঙ্গমেৰ সঙ্গহিতং।

    1143.Vācugganti vācuggataṃ. Ettha ca ‘‘idāni ayaṃ bhaṇḍapāthāvidhi na hotīti mihakaparipucchanakathānurūpato atthakaraṇaṃ na vācuggatakaraṇaṃ nāmāti viññāyatī’’ti nissandehe vuttaṃ. Iminā yathāvuttaṃ dutiyaṅgameva saṅgahitaṃ.

    ১১৪৪. অস্সাতি ইমস্স সিক্খাপদস্স। অসম্মততাদীনি তীণি অঙ্গানীতি অত্তনো অসম্মততা, ভিক্খুনিযা পরিপুণ্ণূপসম্পন্নতা, ওৰাদৰসেন অট্ঠগরুধম্মভণনন্তি ইমানি তীণি অঙ্গানি।

    1144.Assāti imassa sikkhāpadassa. Asammatatādīni tīṇi aṅgānīti attano asammatatā, bhikkhuniyā paripuṇṇūpasampannatā, ovādavasena aṭṭhagarudhammabhaṇananti imāni tīṇi aṅgāni.

    ওৰাদকথাৰণ্ণনা।

    Ovādakathāvaṇṇanā.

    ১১৪৬. তিকপাচিত্তিযন্তি ‘‘অত্থঙ্গতে সূরিযে অত্থঙ্গতসঞ্ঞী, ৰেমতিকো, অনত্থঙ্গতসঞ্ঞী’’তি ৰিকপ্পত্তযে। একতোউপসম্পন্নন্তি ভিক্খুনিসঙ্ঘে উপসম্পন্নং। ‘‘ভিক্খুসঙ্ঘে উপসম্পন্নং পন ওৰদতো পাচিত্তিযমেৰা’’তি অট্ঠকথাযং ৰুত্তং।

    1146.Tikapācittiyanti ‘‘atthaṅgate sūriye atthaṅgatasaññī, vematiko, anatthaṅgatasaññī’’ti vikappattaye. Ekatoupasampannanti bhikkhunisaṅghe upasampannaṃ. ‘‘Bhikkhusaṅghe upasampannaṃ pana ovadato pācittiyamevā’’ti aṭṭhakathāyaṃ vuttaṃ.

    ১১৪৮. উদ্দেসাদিনযেনাতি ‘‘অনাপত্তি উদ্দেসং দেন্তো, পরিপুচ্ছং দেন্তো’’তিআদিনা অনাপত্তিৰারনযেন। অস্সাতি ভিক্খুস্স।

    1148.Uddesādinayenāti ‘‘anāpatti uddesaṃ dento, paripucchaṃ dento’’tiādinā anāpattivāranayena. Assāti bhikkhussa.

    অত্থঙ্গতসূরিযকথাৰণ্ণনা।

    Atthaṅgatasūriyakathāvaṇṇanā.

    ১১৪৯. ‘‘সচে অসম্মতো’’তি ৰক্খমানত্তা ওৰদন্তস্সাতি এত্থ ‘‘সম্মতস্সা’’তি লব্ভতি। ভিক্খুনুপস্সযন্তি ভিক্খুনিৰিহারং। অঞ্ঞত্র কালাতি ‘‘তত্থাযং সমযো , গিলানা হোতি ভিক্খুনী’’তি ৰুত্তকালতো অঞ্ঞত্র। ‘‘গিলানা নাম ভিক্খুনী ন সক্কোতি ওৰাদায ৰা সংৰাসায ৰা গন্তু’’ন্তি (পাচি॰ ১৬১) দস্সিতে গিলানকালে অনাপত্তীতি ৰুত্তং হোতি।

    1149. ‘‘Sace asammato’’ti vakkhamānattā ovadantassāti ettha ‘‘sammatassā’’ti labbhati. Bhikkhunupassayanti bhikkhunivihāraṃ. Aññatra kālāti ‘‘tatthāyaṃ samayo , gilānā hoti bhikkhunī’’ti vuttakālato aññatra. ‘‘Gilānā nāma bhikkhunī na sakkoti ovādāya vā saṃvāsāya vā gantu’’nti (pāci. 161) dassite gilānakāle anāpattīti vuttaṃ hoti.

    ১১৫০. পাচিত্তিযদ্ৰযং হোতীতি পঠমসিক্খাপদেন, ইমিনা চ সিক্খাপদেন দ্ৰে পাচিত্তিযানি হোন্তীতি। ‘‘তীণিপি পাচিত্তিযানী’’তি যোজেতব্বা, পঠমদুতিযততিযেহি সিক্খাপদেহি তীণি পাচিত্তিযানি হোন্তীতি অত্থো।

    1150.Pācittiyadvayaṃ hotīti paṭhamasikkhāpadena, iminā ca sikkhāpadena dve pācittiyāni hontīti. ‘‘Tīṇipi pācittiyānī’’ti yojetabbā, paṭhamadutiyatatiyehi sikkhāpadehi tīṇi pācittiyāni hontīti attho.

    ১১৫১. অঞ্ঞেন ধম্মেনাতি গরুধম্মতো অঞ্ঞেন বুদ্ধৰচনেন। দুক্কটদ্ৰযন্তি অসম্মতভিক্খুনুপস্সযগমনমূলকং দুক্কটদ্ৰযং। ভিক্খুনোতি অসম্মতস্স ‘‘সম্মতস্সাপী’’তি ৰক্খমানত্তা। ‘‘অট্ঠহি ৰা গরুধম্মেহি অঞ্ঞেন ৰা ধম্মেন ওৰদতি, আপত্তি পাচিত্তিযস্সা’’তি (পাচি॰ ১৫৫) অত্থঙ্গতসিক্খাপদে ৰুত্তত্তা ‘‘রত্তিহেতুক’’ন্তি আহ, রত্তিওৰাদনমূলন্তি অত্থো।

    1151.Aññena dhammenāti garudhammato aññena buddhavacanena. Dukkaṭadvayanti asammatabhikkhunupassayagamanamūlakaṃ dukkaṭadvayaṃ. Bhikkhunoti asammatassa ‘‘sammatassāpī’’ti vakkhamānattā. ‘‘Aṭṭhahi vā garudhammehi aññena vā dhammena ovadati, āpatti pācittiyassā’’ti (pāci. 155) atthaṅgatasikkhāpade vuttattā ‘‘rattihetuka’’nti āha, rattiovādanamūlanti attho.

    ১১৫২. পাচিত্তিযদ্ৰযন্তি দুতিযততিযমূলকং। গরুধম্মেন ওৰাদো গরুধম্মো, সো নিদানং যস্স পাচিত্তিযস্সাতি ৰিগ্গহো। সম্মতত্তা গরুধম্মনিদানস্স পাচিত্তিযস্স অভাৰতোতি সম্বন্ধো। ইমিনা পঠমসিক্খাপদেন অনাপত্তিভাৰং দস্সেতি।

    1152.Pācittiyadvayanti dutiyatatiyamūlakaṃ. Garudhammena ovādo garudhammo, so nidānaṃ yassa pācittiyassāti viggaho. Sammatattā garudhammanidānassa pācittiyassa abhāvatoti sambandho. Iminā paṭhamasikkhāpadena anāpattibhāvaṃ dasseti.

    ১১৫৩. তস্সেৰাতি সম্মতস্সেৰ। দুক্কটং ইমিনা ততিযসিক্খাপদেন। অনাপত্তি পঠমসিক্খাপদেন, তেনেৰাহ ‘‘সম্মতত্তা’’তি। পাচিত্তি দুতিযসিক্খাপদেন, তেনেৰাহ ‘‘রত্তিয’’ন্তি।

    1153.Tassevāti sammatasseva. Dukkaṭaṃ iminā tatiyasikkhāpadena. Anāpatti paṭhamasikkhāpadena, tenevāha ‘‘sammatattā’’ti. Pācitti dutiyasikkhāpadena, tenevāha ‘‘rattiya’’nti.

    ১১৫৪. তিকপাচিত্তিযং ৰুত্তন্তি ‘‘উপসম্পন্নায উপসম্পন্নসঞ্ঞী, ৰেমতিকো, অনুপসম্পন্নসঞ্ঞী ভিক্খুনুপস্সযং উপসঙ্কমিত্ৰা অঞ্ঞত্র সমযা ওৰদতি, আপত্তি পাচিত্তিযস্সা’’তি (পাচি॰ ১৬২) তিকপাচিত্তিযং ৰুত্তং। ইতরদ্ৰযেতি ‘‘অনুপসম্পন্নায উপসম্পন্নসঞ্ঞী, আপত্তি দুক্কটস্স। অনুপসম্পন্নায ৰেমতিকো, আপত্তি দুক্কটস্সা’’তি (পাচি॰ ১৬২) দস্সিতে ইতরদ্ৰযে। ওৰদন্তস্সাতি যেন কেনচি ওৰদন্তস্স।

    1154.Tikapācittiyaṃvuttanti ‘‘upasampannāya upasampannasaññī, vematiko, anupasampannasaññī bhikkhunupassayaṃ upasaṅkamitvā aññatra samayā ovadati, āpatti pācittiyassā’’ti (pāci. 162) tikapācittiyaṃ vuttaṃ. Itaradvayeti ‘‘anupasampannāya upasampannasaññī, āpatti dukkaṭassa. Anupasampannāya vematiko, āpatti dukkaṭassā’’ti (pāci. 162) dassite itaradvaye. Ovadantassāti yena kenaci ovadantassa.

    ১১৫৫. তিকপাচিত্তিযং, দুক্কটট্ঠানে দুক্কটমেৰ হোতীতি দস্সেতুমাহ ‘‘তথা’’তি। ভিক্খুনুপস্সযং গন্ত্ৰা অঞ্ঞেন ধম্মেন ওৰদন্তস্স তথাতি যোজনা।

    1155. Tikapācittiyaṃ, dukkaṭaṭṭhāne dukkaṭameva hotīti dassetumāha ‘‘tathā’’ti. Bhikkhunupassayaṃ gantvā aññena dhammena ovadantassa tathāti yojanā.

    ভিক্খুনুপস্সযকথাৰণ্ণনা।

    Bhikkhunupassayakathāvaṇṇanā.

    ১১৫৬. চীৰরাদীনন্তি আদি-সদ্দেন পিণ্ডপাতাদিইতরপচ্চযত্তযঞ্চ সক্কারগরুকারমাননৰন্দনপূজনানি চ সঙ্গহিতানি। সম্মতেতি ভিক্খুনোৰাদকসম্মুতিযা সম্মতে।

    1156.Cīvarādīnanti ādi-saddena piṇḍapātādiitarapaccayattayañca sakkāragarukāramānanavandanapūjanāni ca saṅgahitāni. Sammateti bhikkhunovādakasammutiyā sammate.

    ১১৫৭. তিকপাচিত্তিযং ৰুত্তন্তি ‘‘ধম্মকম্মে ধম্মকম্মসঞ্ঞী, ৰেমতিকো, অধম্মকম্মসঞ্ঞী এৰং ৰদতি, আপত্তি পাচিত্তিযস্সা’’তি (পাচি॰ ১৬৭) তিকপাচিত্তিযং পাল়িযং দস্সিতমেৰ। ইধ কম্মং নাম যথাৰুত্তং সম্মুতিকম্মং। অধম্মকম্মে ধম্মকম্মসঞ্ঞিৰেমতিকঅধম্মকম্মসঞ্ঞীনং ৰসেন তিকদুক্কটং। ৰীসতিৰস্সো ৰা অতিরেকৰীসতিৰস্সো ৰাতি সম্মুতিযা অঙ্গানি।

    1157.Tikapācittiyaṃ vuttanti ‘‘dhammakamme dhammakammasaññī, vematiko, adhammakammasaññī evaṃ vadati, āpatti pācittiyassā’’ti (pāci. 167) tikapācittiyaṃ pāḷiyaṃ dassitameva. Idha kammaṃ nāma yathāvuttaṃ sammutikammaṃ. Adhammakamme dhammakammasaññivematikaadhammakammasaññīnaṃ vasena tikadukkaṭaṃ. Vīsativasso vā atirekavīsativasso vāti sammutiyā aṅgāni.

    ১১৫৮. ‘‘সম্মতং অনুপসম্পন্ন’’ন্তি কং সন্ধাযাহাতি চে? সম্মতেন হুত্ৰা সিক্খং পচ্চক্খায সামণেরভাৰমুপগতং সন্ধায ৰুত্তং। আমিসত্থাযাতি চীৰরাদীনমত্থায।

    1158. ‘‘Sammataṃ anupasampanna’’nti kaṃ sandhāyāhāti ce? Sammatena hutvā sikkhaṃ paccakkhāya sāmaṇerabhāvamupagataṃ sandhāya vuttaṃ. Āmisatthāyāti cīvarādīnamatthāya.

    আমিসকথাৰণ্ণনা।

    Āmisakathāvaṇṇanā.

    ১১৬২. ভিক্খুনিযা দিন্নন্তি এত্থ ‘‘ভিক্খুস্সা’’তি ৰত্তব্বং। ভিক্খুনা দিন্নন্তি যোজনা। ‘‘ভিক্খুনিযা’’তি সেসো । তত্থাতি চীৰরপটিগ্গহণসিক্খাপদে। সূচিতাতি পকাসিতা।

    1162.Bhikkhuniyā dinnanti ettha ‘‘bhikkhussā’’ti vattabbaṃ. Bhikkhunā dinnanti yojanā. ‘‘Bhikkhuniyā’’ti seso . Tatthāti cīvarapaṭiggahaṇasikkhāpade. Sūcitāti pakāsitā.

    চীৰরদানকথাৰণ্ণনা।

    Cīvaradānakathāvaṇṇanā.

    ১১৬৩. অঞ্ঞাতিকায ভিক্খুনিযা চীৰরন্তি যোজনা।

    1163. Aññātikāya bhikkhuniyā cīvaranti yojanā.

    ১১৬৪. এত্থাতি ইমস্মিং সিক্খাপদে।

    1164.Etthāti imasmiṃ sikkhāpade.

    ১১৬৫. সূচিং চীৰরং পৰেসেত্ৰাতি সম্বন্ধো। সূচিনীহরণেতি চীৰরতো।

    1165. Sūciṃ cīvaraṃ pavesetvāti sambandho. Sūcinīharaṇeti cīvarato.

    ১১৬৬. পযোগস্স ৰসাতি একক্খণে বহূ আৰুণিত্ৰা সূচিযা নীহরণপযোগগণনায। বহূ পাচিত্তিযোতি যোজনা, পযোগপ্পমাণাপত্তিযো হোন্তীতি অত্থো।

    1166.Payogassa vasāti ekakkhaṇe bahū āvuṇitvā sūciyā nīharaṇapayogagaṇanāya. Bahū pācittiyoti yojanā, payogappamāṇāpattiyo hontīti attho.

    ১১৬৯. অনেকা পাচিত্তিযাপত্তী হোন্তীতি যোজনা। আরপথেতি সূচিমগ্গে। দুতিযে পথেতি এত্থ আর-সদ্দো গাথাবন্ধসুখত্থং লুত্তোতি ৰেদিতব্বো।

    1169. Anekā pācittiyāpattī hontīti yojanā. Ārapatheti sūcimagge. Dutiye patheti ettha āra-saddo gāthābandhasukhatthaṃ luttoti veditabbo.

    ১১৭০. কা হি নাম কথাতি ‘‘অনেকাপত্তিযো হোন্তী’’তি এত্থ কিং ৰত্তব্বন্তি অত্থো। তিকপাচিত্তিযন্তি ‘‘অঞ্ঞাতিকায অঞ্ঞাতিকসঞ্ঞী, ৰেমতিকো, ঞাতিকসঞ্ঞী চীৰরং সিব্বতি ৰা সিব্বাপেতি ৰা, আপত্তি পাচিত্তিযস্সা’’তি (পাচি॰ ১৭৮) ৰুত্তং তিকপাচিত্তিযং।

    1170.Kā hi nāma kathāti ‘‘anekāpattiyo hontī’’ti ettha kiṃ vattabbanti attho. Tikapācittiyanti ‘‘aññātikāya aññātikasaññī, vematiko, ñātikasaññī cīvaraṃ sibbati vā sibbāpeti vā, āpatti pācittiyassā’’ti (pāci. 178) vuttaṃ tikapācittiyaṃ.

    ১১৭২. অঞ্ঞং পরিক্খারন্তি উপাহনত্থৰিকাদিং। সিব্বতোতি এত্থ ‘‘সিব্বাপযতো’’তি অধিকারতো লব্ভতি। সিক্খমানসামণেরিযো সিক্খমানাদিকা নাম।

    1172.Aññaṃ parikkhāranti upāhanatthavikādiṃ. Sibbatoti ettha ‘‘sibbāpayato’’ti adhikārato labbhati. Sikkhamānasāmaṇeriyo sikkhamānādikā nāma.

    ১১৭৩. সিব্বনকিরিযায আপজ্জিতব্বতো ক্রিযং।

    1173. Sibbanakiriyāya āpajjitabbato kriyaṃ.

    চীৰরসিব্বনকথাৰণ্ণনা।

    Cīvarasibbanakathāvaṇṇanā.

    ১১৭৪-৫. সংৰিধাযাতি ‘‘অজ্জ যাম, স্ৰে যামা’’তিআদিনা নযেন সংৰিদহিত্ৰা। যথাহ ‘‘অজ্জ ৰা হিয্যো ৰা পরে ৰা গচ্ছামাতি সংৰিদহতী’’তি (পাচি॰ ১৮৩)। মগ্গন্তি একদ্ধানমগ্গং, অন্তমসো গামন্তরম্পি। অঞ্ঞত্র সমযাতি ‘‘তত্থাযং সমযো, সত্থগমনীযো হোতি মগ্গো সাসঙ্কসম্মতো সপ্পটিভযো’’তি (পাচি॰ ১৮২) ৰুত্তকালৰিসেসা অঞ্ঞত্রাতি ৰুত্তং হোতি। সত্থৰাহেহি ৰিনা অগমনীযো মগ্গো সত্থগমনীযো নাম। চোরানং সযিতনিসিন্নট্ঠিতখাদিতপীতট্ঠানানি যত্থ দিস্সন্তি, তাদিসো মগ্গো সাসঙ্কো নাম। চোরেহি হতমারিতঘাতৰিলুত্তমনুস্সা যত্থ পঞ্ঞাযন্তি, সো সপ্পটিভযো নাম। ইধাতি ইমস্মিং ভিক্খুনিযা সদ্ধিং কতসংৰিধানং অৰিরাধেত্ৰা তায একদ্ধানমগ্গং পটিপজ্জনকালেতি অত্থো।

    1174-5.Saṃvidhāyāti ‘‘ajja yāma, sve yāmā’’tiādinā nayena saṃvidahitvā. Yathāha ‘‘ajja vā hiyyo vā pare vā gacchāmāti saṃvidahatī’’ti (pāci. 183). Magganti ekaddhānamaggaṃ, antamaso gāmantarampi. Aññatra samayāti ‘‘tatthāyaṃ samayo, satthagamanīyo hoti maggo sāsaṅkasammato sappaṭibhayo’’ti (pāci. 182) vuttakālavisesā aññatrāti vuttaṃ hoti. Satthavāhehi vinā agamanīyo maggo satthagamanīyo nāma. Corānaṃ sayitanisinnaṭṭhitakhāditapītaṭṭhānāni yattha dissanti, tādiso maggo sāsaṅko nāma. Corehi hatamāritaghātaviluttamanussā yattha paññāyanti, so sappaṭibhayo nāma. Idhāti imasmiṃ bhikkhuniyā saddhiṃ katasaṃvidhānaṃ avirādhetvā tāya ekaddhānamaggaṃ paṭipajjanakāleti attho.

    অঞ্ঞো গামো গামন্তরং, তত্থ ওক্কমনং উপগমনং গামন্তরোক্কমো, তস্মিং কতেতি অত্থো। অগামকে অরঞ্ঞে অদ্ধযোজনাতিক্কমে ৰাতি যোজনা, গামরহিতং অরঞ্ঞমগ্গম্পি দ্ৰিগাৰুতং অতিক্কন্তে ৰাতি অত্থো।

    Añño gāmo gāmantaraṃ, tattha okkamanaṃ upagamanaṃ gāmantarokkamo, tasmiṃ kateti attho. Agāmake araññe addhayojanātikkame vāti yojanā, gāmarahitaṃ araññamaggampi dvigāvutaṃ atikkante vāti attho.

    ১১৭৬. ‘‘আপত্তি হোতী’’তি সামঞ্ঞতো দস্সিতআপত্তিযা ভেদাভেদং দস্সেতুমাহ ‘‘এত্থা’’তিআদি। এত্থাতি ইমস্মিং সিক্খাপদৰিনিচ্ছযে, পকরণে ৰা। দুক্কটং দীপিতন্তি সম্বন্ধো। অকপ্পিযভূমট্ঠোতি এত্থ অকপ্পিযা ভূমি নাম অন্তোগামে ভিক্খুনুপস্সযদ্ৰারকোট্ঠকোতি এৰমাদি। যথাহ অট্ঠকথাযং ‘‘সচে পন অন্তোগামে ভিক্খুনুপস্সযদ্ৰারে রথিকায, অঞ্ঞেসু ৰা চতুক্কসিঙ্ঘাটকহত্থিসালাদীসু সংৰিদহন্তি, ভিক্খুনো আপত্তি দুক্কটস্সা’’তি (পাচি॰ অট্ঠ॰ ১৮২-১৮৩)। এত্থ চ চতুন্নং মগ্গানং সম্বন্ধট্ঠানং চতুক্কং। তিণ্ণং মগ্গানং সম্বন্ধট্ঠানং সিঙ্ঘাটকং।

    1176. ‘‘Āpatti hotī’’ti sāmaññato dassitaāpattiyā bhedābhedaṃ dassetumāha ‘‘etthā’’tiādi. Etthāti imasmiṃ sikkhāpadavinicchaye, pakaraṇe vā. Dukkaṭaṃ dīpitanti sambandho. Akappiyabhūmaṭṭhoti ettha akappiyā bhūmi nāma antogāme bhikkhunupassayadvārakoṭṭhakoti evamādi. Yathāha aṭṭhakathāyaṃ ‘‘sace pana antogāme bhikkhunupassayadvāre rathikāya, aññesu vā catukkasiṅghāṭakahatthisālādīsu saṃvidahanti, bhikkhuno āpatti dukkaṭassā’’ti (pāci. aṭṭha. 182-183). Ettha ca catunnaṃ maggānaṃ sambandhaṭṭhānaṃ catukkaṃ. Tiṇṇaṃ maggānaṃ sambandhaṭṭhānaṃ siṅghāṭakaṃ.

    ১১৭৭. কপ্পিযভূমি নাম ভিক্খুনুপস্সযাদি। যথাহ ‘‘সচে উভোপি ভিক্খুনুপস্সযে ৰা অন্তরারামে ৰা আসনসালায ৰা তিত্থিযসেয্যায ৰা ঠত্ৰা সংৰিদহন্তি, অনাপত্তি। কপ্পিযভূমি কিরাযং। তস্মা এত্থ সংৰিদহনপচ্চযা দুক্কটাপত্তিং ন ৰদন্তী’’তি (পাচি॰ অট্ঠ॰ ১৮২-১৮৩)। তেনেৰাহ ‘‘ন ৰদন্তস্স দুক্কট’’ন্তি। ‘‘ন ৰদন্তি অস্সা’’তি পদচ্ছেদো।

    1177.Kappiyabhūmi nāma bhikkhunupassayādi. Yathāha ‘‘sace ubhopi bhikkhunupassaye vā antarārāme vā āsanasālāya vā titthiyaseyyāya vā ṭhatvā saṃvidahanti, anāpatti. Kappiyabhūmi kirāyaṃ. Tasmā ettha saṃvidahanapaccayā dukkaṭāpattiṃ na vadantī’’ti (pāci. aṭṭha. 182-183). Tenevāha ‘‘na vadantassa dukkaṭa’’nti. ‘‘Na vadanti assā’’ti padacchedo.

    ১১৭৮. উভযত্থাতি অকপ্পিযভূমিযং ঠত্ৰা সংৰিধায গমনে, কপ্পিযভূমিযং ঠত্ৰা সংৰিধায গমনে চাতি উভযৰিকপ্পে। গচ্ছন্তস্সেৰাতি এৰকারেন নিক্খন্তস্স জোতকং। যথাহ ‘‘নিক্খমনে অনাপত্তী’’তি। ‘‘ভিক্খুনো’’তি ইমিনা ভিক্খুনিযা অনাপত্তিভাৰং দীপেতি। আপত্তিখেত্তনিযমনত্থমাহ ‘‘অনন্তরস্সা’’তিআদি।

    1178.Ubhayatthāti akappiyabhūmiyaṃ ṭhatvā saṃvidhāya gamane, kappiyabhūmiyaṃ ṭhatvā saṃvidhāya gamane cāti ubhayavikappe. Gacchantassevāti evakārena nikkhantassa jotakaṃ. Yathāha ‘‘nikkhamane anāpattī’’ti. ‘‘Bhikkhuno’’ti iminā bhikkhuniyā anāpattibhāvaṃ dīpeti. Āpattikhettaniyamanatthamāha ‘‘anantarassā’’tiādi.

    ১১৭৯. তত্রাপীতি কপ্পিযভূমিউপচারোক্কমনেপি। উদীরিতন্তি মহাপচ্চরিযং। যথাহ ‘‘মহাপচ্চরিযং ৰুত্ত’’ন্তি।

    1179.Tatrāpīti kappiyabhūmiupacārokkamanepi. Udīritanti mahāpaccariyaṃ. Yathāha ‘‘mahāpaccariyaṃ vutta’’nti.

    ১১৮০. অন্তরাতি অত্তনো নিক্খন্তগামস্স, অনন্তরগামস্স চ ৰেমজ্ঝে। যথাহ ‘‘গামতো নিক্খমিত্ৰা পন যাৰ অনন্তরগামস্স উপচারং ন ওক্কমতি, এত্থন্তরে সংৰিদহিতেপি ভিক্খুনো দুক্কট’’ন্তি (পাচি॰ অট্ঠ॰ ১৮২-১৮৩)। ইমস্মিং সিক্খাপদে কালদ্ৰারমগ্গানং ৰসেন তযো সঙ্কেতৰিসঙ্কেতাতি তেসু মগ্গদ্ৰারৰিসঙ্কেতেপি আপত্তি হোতেৰাতি দস্সেতুমাহ ‘‘দ্ৰার…পে॰… ৰুচ্চতী’’তি। কালৰিসঙ্কেতে পন অনাপত্তিং ৰক্খতি। আপত্তি পাচিত্তি।

    1180.Antarāti attano nikkhantagāmassa, anantaragāmassa ca vemajjhe. Yathāha ‘‘gāmato nikkhamitvā pana yāva anantaragāmassa upacāraṃ na okkamati, etthantare saṃvidahitepi bhikkhuno dukkaṭa’’nti (pāci. aṭṭha. 182-183). Imasmiṃ sikkhāpade kāladvāramaggānaṃ vasena tayo saṅketavisaṅketāti tesu maggadvāravisaṅketepi āpatti hotevāti dassetumāha ‘‘dvāra…pe… vuccatī’’ti. Kālavisaṅkete pana anāpattiṃ vakkhati. Āpatti pācitti.

    ১১৮১. অসংৰিদহিতে কালেতি ‘‘পুরেভত্তং গমিস্সামা’’তিআদিনা কতসংৰিধানানং পচ্ছাভত্তাদি অসংৰিদহিতকালং নাম, তস্মিং। ভিক্খুস্সেৰ ৰিধানস্মিন্তি ভিক্খুনিযা সংৰিধানং ৰিনা ভিক্খুস্সেৰ ৰিধানে সতি আপত্তি দুক্কটং।

    1181.Asaṃvidahite kāleti ‘‘purebhattaṃ gamissāmā’’tiādinā katasaṃvidhānānaṃ pacchābhattādi asaṃvidahitakālaṃ nāma, tasmiṃ. Bhikkhusseva vidhānasminti bhikkhuniyā saṃvidhānaṃ vinā bhikkhusseva vidhāne sati āpatti dukkaṭaṃ.

    ১১৮২. সমযে ৰিদহিত্ৰা গচ্ছতো ৰা অসমযে ৰিদহিত্ৰা ৰিসঙ্কেতেন গচ্ছতো ৰা আপদাসু ৰিদহিত্ৰা গচ্ছতো ৰা অনাপত্তীতি যোজনা। তথাতি ‘‘ৰিদহিত্ৰা গচ্ছতো অনাপত্তী’’তি ইদং অতিদিসতি।

    1182. Samaye vidahitvā gacchato vā asamaye vidahitvā visaṅketena gacchato vā āpadāsu vidahitvā gacchato vā anāpattīti yojanā. Tathāti ‘‘vidahitvā gacchato anāpattī’’ti idaṃ atidisati.

    তত্থ সমযো নাম যথাৰুত্তকালৰিসেসো। ৰিসঙ্কেতো নাম কালৰিসঙ্কেতো, ‘‘অসুকস্মিং দিৰসে অসুকৰেলায গমিস্সামা’’তি সংৰিদহিত্ৰা গমনকালে তস্স কালসঙ্কেতস্স ৰিভৰনন্তি ৰুত্তং হোতি। যথাহ ‘‘কালৰিসঙ্কেতেযেৰ অনাপত্তী’’তি (পাচি॰ অট্ঠ॰ ১৮৫)। আপদা নাম রট্ঠভেদে জনপদানং পলাযনকালো। যথাহ ‘‘রট্ঠভেদে চক্কসমারুল়্হা জনপদা পরিযাযন্তি, এৰরূপাসু আপদাসূ’’তি (পাচি॰ অট্ঠ॰ ১৮৫)। এত্থ চ রট্ঠভেদেতি রট্ঠৰিলোপে। চক্কসমারুল়্হাতি ইরিযাপথচক্কং, সকটচক্কং ৰা সমারুল়্হা। উম্মত্তকাদিনোতি আদি-সদ্দেন খিত্তচিত্তাদযো গহিতা।

    Tattha samayo nāma yathāvuttakālaviseso. Visaṅketo nāma kālavisaṅketo, ‘‘asukasmiṃ divase asukavelāya gamissāmā’’ti saṃvidahitvā gamanakāle tassa kālasaṅketassa vibhavananti vuttaṃ hoti. Yathāha ‘‘kālavisaṅketeyeva anāpattī’’ti (pāci. aṭṭha. 185). Āpadā nāma raṭṭhabhede janapadānaṃ palāyanakālo. Yathāha ‘‘raṭṭhabhede cakkasamāruḷhā janapadā pariyāyanti, evarūpāsu āpadāsū’’ti (pāci. aṭṭha. 185). Ettha ca raṭṭhabhedeti raṭṭhavilope. Cakkasamāruḷhāti iriyāpathacakkaṃ, sakaṭacakkaṃ vā samāruḷhā. Ummattakādinoti ādi-saddena khittacittādayo gahitā.

    ১১৮৩. কাযৰাচাদিকত্তযাতি এত্থ আদি-সদ্দেন চিত্তং গহিতং, কাযৰাচাচিত্তাতি ৰুত্তং হোতি।

    1183.Kāyavācādikattayāti ettha ādi-saddena cittaṃ gahitaṃ, kāyavācācittāti vuttaṃ hoti.

    সংৰিধানকথাৰণ্ণনা।

    Saṃvidhānakathāvaṇṇanā.

    ১১৮৪. উদ্ধং জৰতীতি উজ্জৰনী, পটিসোতগামিনী নাৰা, তং। অধো জৰনতো ওজৰনী, অনুসোতগামিনী নাৰা, তং। অভিরুহেয্যাতি এত্থ ‘‘সংৰিধাযা’’তি সেসো। যথাহ ‘‘যো পন ভিক্খু ভিক্খুনিযা সদ্ধিং সংৰিধায একং নাৰং অভিরুহেয্যা’’তি (পাচি॰ ১৮৬)। লোকস্সাদসঙ্খাতমিত্তসন্থৰেন তং নাৰং আরুয্হ কীল়নচিত্তং পুব্বঙ্গমং কত্ৰা অঞ্ঞমঞ্ঞং সংৰিধাযাতি অত্থো। যথাহ অট্ঠকথাযং ‘‘লোকস্সাদমিত্তসন্থৰৰসেন কীল়াপুরেক্খারো সংৰিদহিত্ৰা’’তি (পাচি॰ অট্ঠ॰ ১৮৮)।

    1184. Uddhaṃ javatīti ujjavanī, paṭisotagāminī nāvā, taṃ. Adho javanato ojavanī, anusotagāminī nāvā, taṃ. Abhiruheyyāti ettha ‘‘saṃvidhāyā’’ti seso. Yathāha ‘‘yo pana bhikkhu bhikkhuniyā saddhiṃ saṃvidhāya ekaṃ nāvaṃ abhiruheyyā’’ti (pāci. 186). Lokassādasaṅkhātamittasanthavena taṃ nāvaṃ āruyha kīḷanacittaṃ pubbaṅgamaṃ katvā aññamaññaṃ saṃvidhāyāti attho. Yathāha aṭṭhakathāyaṃ ‘‘lokassādamittasanthavavasena kīḷāpurekkhāro saṃvidahitvā’’ti (pāci. aṭṭha. 188).

    ১১৮৫. সগামতীরপস্সেন গমনে গামন্তরৰসেন ৰা পাচিত্তি, অগামতীরপস্সেন গমনে অদ্ধযোজনে পাচিত্তি অদ্ধযোজনাতিরেকে ঠানে গামে ৰিজ্জমানেপি অৰিজ্জমানেপি।

    1185. Sagāmatīrapassena gamane gāmantaravasena vā pācitti, agāmatīrapassena gamane addhayojane pācitti addhayojanātireke ṭhāne gāme vijjamānepi avijjamānepi.

    ১১৮৬. যোজনপুথুলায নদিযা মজ্ঝেন গচ্ছতো অদ্ধযোজনৰসেন আপত্তিদস্সনত্থমাহ ‘‘তথা’’তিআদি। ‘‘ঊনযোজনপুথুলায নদিযা মজ্ঝং উভযভাগং ভজতীতি তাদিসিকায নদিযা মজ্ঝেন গচ্ছন্তস্স গামন্তরগণনায, অদ্ধযোজনগণনায চ আপত্তী’’তি ৰদন্তি।

    1186. Yojanaputhulāya nadiyā majjhena gacchato addhayojanavasena āpattidassanatthamāha ‘‘tathā’’tiādi. ‘‘Ūnayojanaputhulāya nadiyā majjhaṃ ubhayabhāgaṃ bhajatīti tādisikāya nadiyā majjhena gacchantassa gāmantaragaṇanāya, addhayojanagaṇanāya ca āpattī’’ti vadanti.

    ১১৮৭. যথাসুখং সমুদ্দস্মিন্তি এত্থ ‘‘গন্তব্ব’’ন্তি সেসো। ‘‘সব্বঅট্ঠকথাসূ’’তিআদিনা যথাসুখগমনানুঞ্ঞায হেতুং দস্সেতি। ইমিনাৰ অসন্দমানোদকেসু ৰাপিতল়াকাদীসু অনাপত্তীতি ৰিঞ্ঞাযতি।

    1187.Yathāsukhaṃ samuddasminti ettha ‘‘gantabba’’nti seso. ‘‘Sabbaaṭṭhakathāsū’’tiādinā yathāsukhagamanānuññāya hetuṃ dasseti. Imināva asandamānodakesu vāpitaḷākādīsu anāpattīti viññāyati.

    ১১৮৮. তিত্থসম্পাদনত্থাযাতি পরতিত্থং পাপেতুং। তং নাৰং। যুত্তাতি নাৰাপাজকা।

    1188.Titthasampādanatthāyāti paratitthaṃ pāpetuṃ. Taṃ nāvaṃ. Yuttāti nāvāpājakā.

    ১১৮৯. ‘‘তথা’’তি ইমিনা ‘‘অনাপত্তি পকাসিতা’’তি ইমং সঙ্গণ্হাতি। অসংৰিদহিত্ৰা ভিক্খুনিযা সদ্ধিং একং নাৰং অভিরুহেয্য ৰা, তিরিযং তরণায ভিক্খুনিযা সদ্ধিং সংৰিদহিত্ৰাপি একং নাৰং অভিরুহেয্য ৰা, আপদাসু ভিক্খুনিযা সদ্ধিং সংৰিদহিত্ৰাপি একং নাৰং অভিরুহেয্য ৰা, তথা অনাপত্তি পকাসিতাতি যোজনা।

    1189.‘‘Tathā’’ti iminā ‘‘anāpatti pakāsitā’’ti imaṃ saṅgaṇhāti. Asaṃvidahitvā bhikkhuniyā saddhiṃ ekaṃ nāvaṃ abhiruheyya vā, tiriyaṃ taraṇāya bhikkhuniyā saddhiṃ saṃvidahitvāpi ekaṃ nāvaṃ abhiruheyya vā, āpadāsu bhikkhuniyā saddhiṃ saṃvidahitvāpi ekaṃ nāvaṃ abhiruheyya vā, tathā anāpatti pakāsitāti yojanā.

    ‘‘অনন্তরসমো’’তি ইমিনা ‘‘অসংৰিদহিতে কালে’’তিআদিনা ৰুত্তৰিনিচ্ছযং সঙ্গণ্হাতি। ইধাপি কালৰিসঙ্কেতে অনাপত্তি, তিত্থনাৰাৰিসঙ্কেতে আপত্তিযেৰ। যথাহ ‘‘ইধাপি কালৰিসঙ্কেতেনেৰ অনাপত্তী’’তিআদি (পাচি॰ অট্ঠ॰ ১৯১)। ‘‘লোকস্সাদমিত্তসন্থৰৰসেন কীল়াপুরেক্খারো সংৰিদহিত্ৰা’’তি (পাচি॰ অট্ঠ॰ ১৮৮) ৰচনতো কেচি ‘‘ইমং সিক্খাপদং অকুসলচিত্তং লোকৰজ্জ’’ন্তি ৰদন্তি, তং ন গহেতব্বং। কীল়াপুরেক্খারতায হি অভিরুহিত্ৰা গামন্তরোক্কমনে, অদ্ধযোজনাতিক্কমে ৰা কুসলাব্যাকতচিত্তসমঙ্গীপি হুত্ৰা আপত্তিং আপজ্জতি। যদি হি সো সংৰেগং পটিলভিত্ৰা অরহত্তং ৰা সচ্ছিকরেয্য, নিদ্দং ৰা ওক্কমেয্য, কম্মট্ঠানং ৰা মনসি করোন্তো গচ্ছেয্য, কুতো তস্স অকুসলচিত্তসমঙ্গিতা, যেনিদং সিক্খাপদং ‘‘অকুসলচিত্তং, লোকৰজ্জ’’ন্তি ৰুচ্চতি, তস্মা পণ্ণত্তিৰজ্জং, তিচিত্তন্তি সিদ্ধং।

    ‘‘Anantarasamo’’ti iminā ‘‘asaṃvidahite kāle’’tiādinā vuttavinicchayaṃ saṅgaṇhāti. Idhāpi kālavisaṅkete anāpatti, titthanāvāvisaṅkete āpattiyeva. Yathāha ‘‘idhāpi kālavisaṅketeneva anāpattī’’tiādi (pāci. aṭṭha. 191). ‘‘Lokassādamittasanthavavasena kīḷāpurekkhāro saṃvidahitvā’’ti (pāci. aṭṭha. 188) vacanato keci ‘‘imaṃ sikkhāpadaṃ akusalacittaṃ lokavajja’’nti vadanti, taṃ na gahetabbaṃ. Kīḷāpurekkhāratāya hi abhiruhitvā gāmantarokkamane, addhayojanātikkame vā kusalābyākatacittasamaṅgīpi hutvā āpattiṃ āpajjati. Yadi hi so saṃvegaṃ paṭilabhitvā arahattaṃ vā sacchikareyya, niddaṃ vā okkameyya, kammaṭṭhānaṃ vā manasi karonto gaccheyya, kuto tassa akusalacittasamaṅgitā, yenidaṃ sikkhāpadaṃ ‘‘akusalacittaṃ, lokavajja’’nti vuccati, tasmā paṇṇattivajjaṃ, ticittanti siddhaṃ.

    নাৰাভিরুহনকথাৰণ্ণনা।

    Nāvābhiruhanakathāvaṇṇanā.

    ১১৯০. গিহিসমারম্ভং হিত্ৰা ভিক্খুনিযা পরিপাচিতং ভত্তং ঞত্ৰা ভুঞ্জতো ভিক্খুনো পাচিত্তি হোতীতি যোজনা। পরিপাচিতং নাম ভিক্খুনো সীলসুতাদিগুণং কুলানং ৰত্ৰা নিপ্ফাদিতং। যথাহ ‘‘ভিক্খুনিযা পরিপাচিতং, গুণপ্পকাসনেন নিপ্ফাদিতং লদ্ধব্বং কতন্তি অত্থো’’তি (পাচি॰ অট্ঠ॰ ১৯৪)। গিহিসমারম্ভন্তি ভিক্খুনিযা পরিপাচনতো পুব্বেযেৰ গিহিপটিযত্তং। যথাহ ‘‘ভিক্খুনিযা পরিপাচনতো পঠমমেৰ যং গিহীনং পটিযাদিতং ভত্ত’’ন্তি (পাচি॰ অট্ঠ॰ ১৯৪)। ৰক্খতি হি ‘‘গিহিসম্পাদিতম্পি ৰা ৰিনা’’তি।

    1190. Gihisamārambhaṃ hitvā bhikkhuniyā paripācitaṃ bhattaṃ ñatvā bhuñjato bhikkhuno pācitti hotīti yojanā. Paripācitaṃ nāma bhikkhuno sīlasutādiguṇaṃ kulānaṃ vatvā nipphāditaṃ. Yathāha ‘‘bhikkhuniyā paripācitaṃ, guṇappakāsanena nipphāditaṃ laddhabbaṃ katanti attho’’ti (pāci. aṭṭha. 194). Gihisamārambhanti bhikkhuniyā paripācanato pubbeyeva gihipaṭiyattaṃ. Yathāha ‘‘bhikkhuniyā paripācanato paṭhamameva yaṃ gihīnaṃ paṭiyāditaṃ bhatta’’nti (pāci. aṭṭha. 194). Vakkhati hi ‘‘gihisampāditampi vā vinā’’ti.

    ১১৯১. ‘‘তস্সা’’তি ৰক্খমানত্তা ‘‘যং ভোজন’’ন্তি যোজেতব্বং। তস্সাতি পঞ্চধা ৰুত্তস্স ভোজনস্স। সব্বেসু অজ্ঝোহারেসূতি সব্বেসু পরগলকরণপ্পযোগেসু।

    1191. ‘‘Tassā’’ti vakkhamānattā ‘‘yaṃ bhojana’’nti yojetabbaṃ. Tassāti pañcadhā vuttassa bhojanassa. Sabbesuajjhohāresūti sabbesu paragalakaraṇappayogesu.

    ১১৯২. ভিক্খুনিযা পরিপাচিতং ভুঞ্জতো দোসোতি যোজনা।

    1192. Bhikkhuniyā paripācitaṃ bhuñjato dosoti yojanā.

    ১১৯৩. উভোসূতি পরিপাচিতেপি অপরিপাচিতেপি। সব্বত্থাতি ইমেসু দ্ৰীসু পরিভুঞ্জতো অজ্ঝোহারৰসেনেৰ দুক্কটন্তি যোজনা।

    1193.Ubhosūti paripācitepi aparipācitepi. Sabbatthāti imesu dvīsu paribhuñjato ajjhohāravaseneva dukkaṭanti yojanā.

    ১১৯৫. পঞ্চভোজনং ঠপেত্ৰা অঞ্ঞং পন যং কিঞ্চি যাগুখজ্জফলাদিকং ভুঞ্জন্তস্স অনাপত্তীতি যোজনা।

    1195. Pañcabhojanaṃ ṭhapetvā aññaṃ pana yaṃ kiñci yāgukhajjaphalādikaṃ bhuñjantassa anāpattīti yojanā.

    পরিপাচিতকথাৰণ্ণনা।

    Paripācitakathāvaṇṇanā.

    ১১৯৭. ইদং সব্বং দসমং সিক্খাপদং সমুট্ঠাননযাদিনা দুতিযানিযতেনেৰ সদিসং মতন্তি যোজনা। ইদং সিক্খাপদন্তি ‘‘যো পন ভিক্খু ভিক্খুনিযা সদ্ধিং একো একায রহো নিসজ্জং কপ্পেয্য, পাচিত্তিয’’ন্তি (পাচি॰ ১৯৯) ৰুত্তং রহোনিসজ্জসিক্খাপদং।

    1197. Idaṃ sabbaṃ dasamaṃ sikkhāpadaṃ samuṭṭhānanayādinā dutiyāniyateneva sadisaṃ matanti yojanā. Idaṃ sikkhāpadanti ‘‘yo pana bhikkhu bhikkhuniyā saddhiṃ eko ekāya raho nisajjaṃ kappeyya, pācittiya’’nti (pāci. 199) vuttaṃ rahonisajjasikkhāpadaṃ.

    রহোনিসজ্জকথাৰণ্ণনা।

    Rahonisajjakathāvaṇṇanā.

    ভিক্খুনিৰগ্গো ততিযো।

    Bhikkhunivaggo tatiyo.

    ১১৯৮. একোতি একদিৰসিকো। আৰসথো পিণ্ডোতি পুঞ্ঞত্থিকেহি একং পাসণ্ডং অনুদ্দিস্স যাৰদত্থং দাতুং সালাদীসু পঞ্ঞত্তং পঞ্চসু ভোজনেসু অঞ্ঞতরং ভোজনং। যথাহ ‘‘আৰসথপিণ্ডো নাম পঞ্চন্নং ভোজনানং অঞ্ঞতরং ভোজনং সালায ৰা মণ্ডপে ৰা রুক্খমূলে ৰা অজ্ঝোকাসে ৰা অনোদিস্স যাৰদত্থো পঞ্ঞত্তো হোতী’’তি (পাচি॰ ২০৬)। অগিলানেনাতি এত্থ ‘‘অগিলানো নাম সক্কোতি তম্হা আৰসথা পক্কমিতু’’ন্তি ৰুত্ত পদভাজনিযঅট্ঠকথাযং ‘‘অদ্ধযোজনং ৰা যোজনং ৰা গন্তুং সক্কোতী’’তি (পাচি॰ অট্ঠ॰ ২০৬) ৰুত্তত্তা তম্হা আৰসথা অদ্ধযোজনং ৰা যোজনং ৰা গন্তুং সমত্থেন অগিলানেনাতি অত্থো। ততো উদ্ধন্তি দুতিযদিৰসতো উত্তরি।

    1198.Ekoti ekadivasiko. Āvasatho piṇḍoti puññatthikehi ekaṃ pāsaṇḍaṃ anuddissa yāvadatthaṃ dātuṃ sālādīsu paññattaṃ pañcasu bhojanesu aññataraṃ bhojanaṃ. Yathāha ‘‘āvasathapiṇḍo nāma pañcannaṃ bhojanānaṃ aññataraṃ bhojanaṃ sālāya vā maṇḍape vā rukkhamūle vā ajjhokāse vā anodissa yāvadattho paññatto hotī’’ti (pāci. 206). Agilānenāti ettha ‘‘agilāno nāma sakkoti tamhā āvasathā pakkamitu’’nti vutta padabhājaniyaaṭṭhakathāyaṃ ‘‘addhayojanaṃ vā yojanaṃ vā gantuṃ sakkotī’’ti (pāci. aṭṭha. 206) vuttattā tamhā āvasathā addhayojanaṃ vā yojanaṃ vā gantuṃ samatthena agilānenāti attho. Tato uddhanti dutiyadivasato uttari.

    ১১৯৯. অনোদিস্সেৰ পঞ্ঞত্তে পিণ্ডেতি যোজনা, ‘‘ইমেসংযেৰ ৰা’’তি অঞ্ঞতরং পাসণ্ডং ৰা ‘‘এত্তকানংযেৰ ৰা’’তি তত্থ পুগ্গলপরিচ্ছেদং ৰা অকত্ৰা সব্বসাধারণং কত্ৰা পঞ্ঞত্তে আৰসথপিণ্ডেতি অত্থো। যাৰদত্থে এৰ পিণ্ডে পঞ্ঞত্তেতি যোজনা, যাৰতা অত্থো কুচ্ছিপূরণাদিকং পযোজনমেত্থ পিণ্ডেতি ৰিগ্গহো, ‘‘এত্তকং দাতব্ব’’ন্তি অপরিচ্ছিন্দিত্ৰা ‘‘ভুঞ্জন্তানং যাৰদত্থং দাতব্ব’’ন্তি পঞ্ঞত্তে পিণ্ডে এৰাতি অত্থো। ভুঞ্জিতব্বন্তি কম্মসাধনং ৰা ভাৰসাধনং ৰা। ‘‘ভোজন’’ন্তি অজ্ঝাহরণীযং। সকিন্তি একৰারং। তত্থাতি আৰসথে।

    1199. Anodisseva paññatte piṇḍeti yojanā, ‘‘imesaṃyeva vā’’ti aññataraṃ pāsaṇḍaṃ vā ‘‘ettakānaṃyeva vā’’ti tattha puggalaparicchedaṃ vā akatvā sabbasādhāraṇaṃ katvā paññatte āvasathapiṇḍeti attho. Yāvadatthe eva piṇḍe paññatteti yojanā, yāvatā attho kucchipūraṇādikaṃ payojanamettha piṇḍeti viggaho, ‘‘ettakaṃ dātabba’’nti aparicchinditvā ‘‘bhuñjantānaṃ yāvadatthaṃ dātabba’’nti paññatte piṇḍe evāti attho. Bhuñjitabbanti kammasādhanaṃ vā bhāvasādhanaṃ vā. ‘‘Bhojana’’nti ajjhāharaṇīyaṃ. Sakinti ekavāraṃ. Tatthāti āvasathe.

    ১২০০. তস্স পিণ্ডস্স। অজ্ঝোহারেসু সব্বেসূতি সব্বেসু অজ্ঝোহারপ্পযোগেসু কতেসু। তস্স অজ্ঝোহারকস্স। পাচিত্তিযো পযোগগণনায।

    1200.Tassa piṇḍassa. Ajjhohāresu sabbesūti sabbesu ajjhohārappayogesu katesu. Tassa ajjhohārakassa. Pācittiyo payogagaṇanāya.

    ১২০১. ‘‘একেন কুলেন নানেকট্ঠানভেদেসু পঞ্ঞত্তে’’তি, ‘‘নানাকুলেহি ৰা নানেকট্ঠানভেদেসু পঞ্ঞত্তে’’তি চাতি যোজনা। ‘‘পিণ্ডে’’তি অধিকারো। নানা চ একো চ নানেকা, ঠানানং ভেদা ঠানভেদা, নানেকা চ তে ঠানভেদা চাতি ৰিগ্গহো, তেসু। একভোগোতি একপিণ্ডপরিভোগো। এৰকারেন দুতিযদিৰসাদিপরিভোগং নিৰত্তেতি।

    1201. ‘‘Ekena kulena nānekaṭṭhānabhedesu paññatte’’ti, ‘‘nānākulehi vā nānekaṭṭhānabhedesu paññatte’’ti cāti yojanā. ‘‘Piṇḍe’’ti adhikāro. Nānā ca eko ca nānekā, ṭhānānaṃ bhedā ṭhānabhedā, nānekā ca te ṭhānabhedā cāti viggaho, tesu. Ekabhogoti ekapiṇḍaparibhogo. Evakārena dutiyadivasādiparibhogaṃ nivatteti.

    ১২০৪. গিলানস্সাতি ৰুত্তলক্খণেন গিলানো হুত্ৰা পুনপ্পুনং ভুঞ্জন্তস্স গচ্ছতো ৰা আগচ্ছন্তস্স ৰা অনাপত্তীতি যোজনা, অন্তমসো অদ্ধযোজনম্পি গচ্ছতো, গন্ত্ৰা আগচ্ছতো ৰা অন্তরামগ্গে চ গতট্ঠানে চ একস্মিং দিৰসে ভুঞ্জন্তস্স অনাপত্তীতি ৰুত্তং হোতি। যথাহ ‘‘যো গচ্ছন্তো অন্তরামগ্গে একদিৰসং, গতট্ঠানে চ একদিৰসং ভুঞ্জতি, তস্সাপি অনাপত্তি। আগচ্ছন্তেপি এসেৰ নযো’’তি (পাচি॰ অট্ঠ॰ ২০৮)। ওদিস্স পঞ্ঞত্তেতি এত্থ ‘‘ভিক্খূ’’তি সেসো। যথাহ ‘‘ভিক্খূনংযেৰ অত্থায উদ্দিসিত্ৰা পঞ্ঞত্তো হোতী’’তি (পাচি॰ অট্ঠ॰ ২০৮)। পরিত্তেতি উদরপূরণায অপ্পহোনকে থোকে ভোজনে। যথাহ ‘‘যাৰদত্থং পঞ্ঞত্তো ন হোতি, থোকং থোকং লব্ভতি, তাদিসং নিচ্চম্পি পরিভুঞ্জিতুং ৰট্টতী’’তি (পাচি॰ অট্ঠ॰ ২০৮)। সকিন্তি যাৰদত্থং পঞ্ঞত্তং ৰুত্তনযেন একৰারং ভুঞ্জতো অনাপত্তি।

    1204.Gilānassāti vuttalakkhaṇena gilāno hutvā punappunaṃ bhuñjantassa gacchato vā āgacchantassa vā anāpattīti yojanā, antamaso addhayojanampi gacchato, gantvā āgacchato vā antarāmagge ca gataṭṭhāne ca ekasmiṃ divase bhuñjantassa anāpattīti vuttaṃ hoti. Yathāha ‘‘yo gacchanto antarāmagge ekadivasaṃ, gataṭṭhāne ca ekadivasaṃ bhuñjati, tassāpi anāpatti. Āgacchantepi eseva nayo’’ti (pāci. aṭṭha. 208). Odissa paññatteti ettha ‘‘bhikkhū’’ti seso. Yathāha ‘‘bhikkhūnaṃyeva atthāya uddisitvā paññatto hotī’’ti (pāci. aṭṭha. 208). Paritteti udarapūraṇāya appahonake thoke bhojane. Yathāha ‘‘yāvadatthaṃ paññatto na hoti, thokaṃ thokaṃ labbhati, tādisaṃ niccampi paribhuñjituṃ vaṭṭatī’’ti (pāci. aṭṭha. 208). Sakinti yāvadatthaṃ paññattaṃ vuttanayena ekavāraṃ bhuñjato anāpatti.

    ১২০৫. যাগুআদীনীতি আদি-সদ্দেন পঞ্চভোজনতো অঞ্ঞেসং অজ্ঝোহরণীযানং গহণং।

    1205.Yāguādīnīti ādi-saddena pañcabhojanato aññesaṃ ajjhoharaṇīyānaṃ gahaṇaṃ.

    আৰসথকথাৰণ্ণনা।

    Āvasathakathāvaṇṇanā.

    ১২০৬. ৰুত্তা সমযা অঞ্ঞত্রাতি যোজনা, ‘‘তত্থাযং সমযো, গিলানসমযো চীৰরদানসমযো চীৰরকারসমযো অদ্ধানগমনসমযো নাৰাভিরুহনসমযো মহাসমযো সমণভত্তসমযো’’তি (পাচি॰ ২১৭) ৰুত্তা সত্তৰিধকালা অঞ্ঞত্র।

    1206. Vuttā samayā aññatrāti yojanā, ‘‘tatthāyaṃ samayo, gilānasamayo cīvaradānasamayo cīvarakārasamayo addhānagamanasamayo nāvābhiruhanasamayo mahāsamayo samaṇabhattasamayo’’ti (pāci. 217) vuttā sattavidhakālā aññatra.

    তত্থ যদা পাদানং ফলিতত্তা ন সক্কোতি পিণ্ডায চরিতুং, অযং গিলানসমযো। অত্থতকথিনানং পঞ্চ মাসা, ইতরেসং কত্তিকমাসোতি অযং চীৰরদানসমযো। যদা চীৰরে করিযমানে কিঞ্চিদেৰ চীৰরে কত্তব্বং করোতি, অযং চীৰরকারসমযো। যদা অদ্ধযোজনম্পি গন্তুকামো ৰা হোতি, গচ্ছতি ৰা, গতো ৰা, অযং অদ্ধানগমনসমযো। নাৰাভিরুহনসমযেপি এসেৰ নযো। যদা গোচরগামে চত্তারো ভিক্খূ পিণ্ডায চরিত্ৰা ন যাপেন্তি, অযং মহাসমযো। যদা যো কোচি পব্বজিতো ভত্তেন নিমন্তেতি, অযং সমণভত্তসমযো। গণো কতমোতি আহ ‘‘গণো’’তিআদি।

    Tattha yadā pādānaṃ phalitattā na sakkoti piṇḍāya carituṃ, ayaṃ gilānasamayo. Atthatakathinānaṃ pañca māsā, itaresaṃ kattikamāsoti ayaṃ cīvaradānasamayo. Yadā cīvare kariyamāne kiñcideva cīvare kattabbaṃ karoti, ayaṃ cīvarakārasamayo. Yadā addhayojanampi gantukāmo vā hoti, gacchati vā, gato vā, ayaṃ addhānagamanasamayo. Nāvābhiruhanasamayepi eseva nayo. Yadā gocaragāme cattāro bhikkhū piṇḍāya caritvā na yāpenti, ayaṃ mahāsamayo. Yadā yo koci pabbajito bhattena nimanteti, ayaṃ samaṇabhattasamayo. Gaṇo katamoti āha ‘‘gaṇo’’tiādi.

    ১২০৭. গণভোজনং নাম কিন্তি আহ ‘‘য’’ন্তিআদি। যং পঞ্চন্নং অঞ্ঞতরং নিমন্তনতো, ৰিঞ্ঞত্তিতো ৰা লদ্ধং, তং ইধ ভোজনন্তি অধিপ্পেতং হোতীতি যোজনা। নিমন্তনতোতি ‘‘ভোজনান’’ন্তিআদিনা ৰক্খমানপ্পকারেন কতং অকপ্পিযনিমন্তনমাহ। ৰিঞ্ঞত্তিতোপি ৰাতি ‘‘সচেপী’’তিআদিনা ৰক্খমাননযেন কতমকপ্পিযৰিঞ্ঞত্তিমাহ।

    1207. Gaṇabhojanaṃ nāma kinti āha ‘‘ya’’ntiādi. Yaṃ pañcannaṃ aññataraṃ nimantanato, viññattito vā laddhaṃ, taṃ idha bhojananti adhippetaṃ hotīti yojanā. Nimantanatoti ‘‘bhojanāna’’ntiādinā vakkhamānappakārena kataṃ akappiyanimantanamāha. Viññattitopi vāti ‘‘sacepī’’tiādinā vakkhamānanayena katamakappiyaviññattimāha.

    ১২০৮-১১. ভোজনানন্তি নিদ্ধারণে সামিৰচনং, ‘‘অঞ্ঞতরস্সা’’তি সেসো, ‘‘ওদনো সত্তু কুম্মাসো, মচ্ছো মংসঞ্চ ভোজন’’ন্তি সঙ্গহিতানং পঞ্চন্নং ভোজনানং অঞ্ঞতরস্স। নামন্তি ৰক্খমানং ওদনাদিনামং। ভিক্খূ নিমন্তেতীতি এত্থ ‘‘একতো, নানতো ৰা’’তি সেসো। যথাহ ‘‘একতো নিমন্তিতা। নানতো নিমন্তিতা’’তি (পাচি॰ অট্ঠ॰ ২১৭-২১৮)। একতো নিমন্তনং নাম সব্বেসং ভিক্খূনং একতো ঠিতানং নিমন্তনং। নানতো নিমন্তনং নাম ভিক্খূনং ৰিসুং ৰিসুং ৰসনট্ঠানং গন্ত্ৰা ৰা একতো ঠিতট্ঠানং গন্ত্ৰা ৰা অনেকেহি নিমন্তনং। যথাহ ‘‘চত্তারি পরিৰেণানি ৰা ৰিহারে ৰা গন্ত্ৰা নানতো নিমন্তিতা, একট্ঠানে ঠিতেসুযেৰ ৰা একো পুত্তেন, একো পিতরাতি এৰম্পি নানতো নিমন্তিতা’’তি (পাচি॰ অট্ঠ॰ ২১৭-২১৮)।

    1208-11.Bhojanānanti niddhāraṇe sāmivacanaṃ, ‘‘aññatarassā’’ti seso, ‘‘odano sattu kummāso, maccho maṃsañca bhojana’’nti saṅgahitānaṃ pañcannaṃ bhojanānaṃ aññatarassa. Nāmanti vakkhamānaṃ odanādināmaṃ. Bhikkhū nimantetīti ettha ‘‘ekato, nānato vā’’ti seso. Yathāha ‘‘ekato nimantitā. Nānato nimantitā’’ti (pāci. aṭṭha. 217-218). Ekato nimantanaṃ nāma sabbesaṃ bhikkhūnaṃ ekato ṭhitānaṃ nimantanaṃ. Nānato nimantanaṃ nāma bhikkhūnaṃ visuṃ visuṃ vasanaṭṭhānaṃ gantvā vā ekato ṭhitaṭṭhānaṃ gantvā vā anekehi nimantanaṃ. Yathāha ‘‘cattāri pariveṇāni vā vihāre vā gantvā nānato nimantitā, ekaṭṭhāne ṭhitesuyeva vā eko puttena, eko pitarāti evampi nānato nimantitā’’ti (pāci. aṭṭha. 217-218).

    ৰেৰচনং নাম ওদনাদিসব্বপদানং, সম্পটিচ্ছথাতিআদিকিরিযাপদানঞ্চ পরিযাযৰচনং। ভাসন্তরং নাম মাগধৰচনতো অঞ্ঞং সীহল়দমিল়াদিৰোহারন্তরং। ৰেৰচনেহি এৰ ৰা ভাসন্তরেন ৰা নিমন্তেতীতি সম্বন্ধো।

    Vevacanaṃ nāma odanādisabbapadānaṃ, sampaṭicchathātiādikiriyāpadānañca pariyāyavacanaṃ. Bhāsantaraṃ nāma māgadhavacanato aññaṃ sīhaḷadamiḷādivohārantaraṃ. Vevacanehi eva vā bhāsantarena vā nimantetīti sambandho.

    ততো নিমন্তনানন্তরং। নিমন্তনন্তি যথাৰুত্তং অকপ্পিযনিমন্তনং। একতো গণ্হন্তীতি অঞ্ঞমঞ্ঞস্স দ্ৰাদসহত্থং অমুঞ্চিত্ৰা ঠিতা ৰা নিসিন্না ৰা একতো গণ্হন্তি।

    Tato nimantanānantaraṃ. Nimantananti yathāvuttaṃ akappiyanimantanaṃ. Ekato gaṇhantīti aññamaññassa dvādasahatthaṃ amuñcitvā ṭhitā vā nisinnā vā ekato gaṇhanti.

    ‘‘গণভোজনকারণ’’ন্তি ইদং ভোজনপচ্চযা পাচিত্তিযং এৰং গহণমন্তরেন ন হোতীতি ৰুত্তং।

    ‘‘Gaṇabhojanakāraṇa’’nti idaṃ bhojanapaccayā pācittiyaṃ evaṃ gahaṇamantarena na hotīti vuttaṃ.

    ১২১২. একতো, নানতো ৰাপি যং গমনং, ভোজনম্পি ৰা, তং গণভোজনে ন কারণন্তিপি ৰিঞ্ঞূ ভণন্তীতি যোজনা। একতো নানতো ৰাপীতি এত্থ ‘‘ঠিতা ৰা নিসিন্না ৰা’’তি সেসো।

    1212. Ekato, nānato vāpi yaṃ gamanaṃ, bhojanampi vā, taṃ gaṇabhojane na kāraṇantipi viññū bhaṇantīti yojanā. Ekato nānato vāpīti ettha ‘‘ṭhitā vā nisinnā vā’’ti seso.

    ১২১৩-৪. ৰিঞ্ঞাপেত্ৰাতি ‘‘অম্হাকং চতুন্নম্পি ভত্তং দেহী’’তিআদিনা একতো ৰা ‘‘ময্হং দেহি, ময্হং দেহী’’তি পাটেক্কং ৰা ৰিঞ্ঞাপেত্ৰা। এৰম্পীতি ৰিঞ্ঞত্তিতোপি।

    1213-4.Viññāpetvāti ‘‘amhākaṃ catunnampi bhattaṃ dehī’’tiādinā ekato vā ‘‘mayhaṃ dehi, mayhaṃ dehī’’ti pāṭekkaṃ vā viññāpetvā. Evampīti viññattitopi.

    ১২১৫. দুৰিধস্সাতি নিমন্তকস্স, ৰিঞ্ঞাপকস্স চ।

    1215.Duvidhassāti nimantakassa, viññāpakassa ca.

    ১২১৬. সত্তসুপি সমযেসু ভুঞ্জতং অনাপত্তীতি যোজনা, ‘‘গণভোজন’’ন্তি পকরণতো লব্ভতি, যথাৰুত্তেসু গিলানাদীসু সত্তসু কালেসু লেসং ৰিনা ভুঞ্জন্তানন্তি অত্থো। ‘‘একতো’’তি ইদং ‘‘গহেত্ৰা’’তি ইমিনা যোজেতব্বং। ভুঞ্জতন্তি ভুঞ্জন্তানং। তথাতি ‘‘অনাপত্তী’’তি ইদং পচ্চামসতি।

    1216. Sattasupi samayesu bhuñjataṃ anāpattīti yojanā, ‘‘gaṇabhojana’’nti pakaraṇato labbhati, yathāvuttesu gilānādīsu sattasu kālesu lesaṃ vinā bhuñjantānanti attho. ‘‘Ekato’’ti idaṃ ‘‘gahetvā’’ti iminā yojetabbaṃ. Bhuñjatanti bhuñjantānaṃ. Tathāti ‘‘anāpattī’’ti idaṃ paccāmasati.

    ১২১৭. অনুপসম্পন্নো চ চারী চ পত্তো চ অনিমন্তিতো চ অনুপসম্পন্ন…পে॰… নিমন্তিতা, তে চতুত্থে কত্ৰাতি অত্থো , অনুপসম্পন্নং ৰা পিণ্ডচারিং ৰা চতুত্থস্স পত্তং ৰা অনিমন্তিতং ৰা চতুত্থং কত্ৰা একতো গহেত্ৰা ভুঞ্জন্তানং গণভেদো মুনিনা পকাসিতো, গণস্স অপরিপুণ্ণতা দীপিতাতি ৰুত্তং হোতি। পিণ্ডায চরতি সীলেনাতি পিণ্ডচারী, সো ইধ পুব্বপদলোপেন ‘‘চারী’’তি ৰুত্তো, পিণ্ডপাতিকো। সো হি নিমন্তনং অসাদিযন্তো গণভোজনকো গণখাদকো ন হোতীতি অধিপ্পাযো। পত্তো নাম ৰিহারে নিসীদিত্ৰা চতুত্থেন অত্তনা লদ্ধব্বভোজনত্থায পেসিতো পত্তো। অনিমন্তিতো নাম পঠমং অকপ্পিযনিমন্তনায নিমন্তিতে অনন্তোগধো উপসম্পন্নো। এত্থাতি ইমস্মিং সিক্খাপদে। অপি-সদ্দো হেট্ঠা দস্সিতং দ্ৰিন্নং, তিণ্ণং ৰা ৰসেন ৰুত্তৰিনিচ্ছযং অপেক্খতি।

    1217. Anupasampanno ca cārī ca patto ca animantito ca anupasampanna…pe… nimantitā, te catutthe katvāti attho , anupasampannaṃ vā piṇḍacāriṃ vā catutthassa pattaṃ vā animantitaṃ vā catutthaṃ katvā ekato gahetvā bhuñjantānaṃ gaṇabhedo muninā pakāsito, gaṇassa aparipuṇṇatā dīpitāti vuttaṃ hoti. Piṇḍāya carati sīlenāti piṇḍacārī, so idha pubbapadalopena ‘‘cārī’’ti vutto, piṇḍapātiko. So hi nimantanaṃ asādiyanto gaṇabhojanako gaṇakhādako na hotīti adhippāyo. Patto nāma vihāre nisīditvā catutthena attanā laddhabbabhojanatthāya pesito patto. Animantito nāma paṭhamaṃ akappiyanimantanāya nimantite anantogadho upasampanno. Etthāti imasmiṃ sikkhāpade. Api-saddo heṭṭhā dassitaṃ dvinnaṃ, tiṇṇaṃ vā vasena vuttavinicchayaṃ apekkhati.

    ১২১৮. সমযলদ্ধানন্তি গিলানাদযো সত্তসমযা লদ্ধা যেহি তে সমযলদ্ধা, তেসং, নিদ্ধারণে সামিৰচনং। ‘‘অঞ্ঞতরস্সা’’তি সেসো, ‘‘ৰসেনা’’তি ইমিনা সম্বন্ধো। নেৰ গণভেদোতি যোজনা। সমযলদ্ধকস্স অত্তনো অনাপত্তিভাৰমন্তরেন তং চতুত্থং কত্ৰা গণভোজনং গণ্হন্তানং পন আপত্তিসম্ভৰতো আহ ‘‘আপত্তি পন ৰেদিতব্বা’’তি। যথাহ মহাপচ্চরিযং ‘‘সমযলদ্ধকো সযমেৰ মুচ্চতি, সেসানং গণপূরকত্তা আপত্তিকরো হোতী’’তি (পাচি॰ অট্ঠ॰ ২২০)।

    1218.Samayaladdhānanti gilānādayo sattasamayā laddhā yehi te samayaladdhā, tesaṃ, niddhāraṇe sāmivacanaṃ. ‘‘Aññatarassā’’ti seso, ‘‘vasenā’’ti iminā sambandho. Neva gaṇabhedoti yojanā. Samayaladdhakassa attano anāpattibhāvamantarena taṃ catutthaṃ katvā gaṇabhojanaṃ gaṇhantānaṃ pana āpattisambhavato āha ‘‘āpatti pana veditabbā’’ti. Yathāha mahāpaccariyaṃ ‘‘samayaladdhako sayameva muccati, sesānaṃ gaṇapūrakattā āpattikaro hotī’’ti (pāci. aṭṭha. 220).

    ১২১৯. পঞ্চভোজনেসু অঞ্ঞতরস্স নামং গহেত্ৰা নিমন্তেত্ৰা তেসুযেৰ অঞ্ঞং দিয্যমানং গণ্হন্তস্স ৰিসঙ্কেতাভাৰং দস্সেতুমাহ ‘‘ভোজনানঞ্চা’’তিআদি। ভোজনানন্তি নিদ্ধারণে সামিৰচনং, অঞ্ঞতরস্স ৰসেনাতি ৰুত্তং হোতি। তং ৰিসঙ্কেতং, ওদনাদীনং নামেন নিমন্তেত্ৰা দিয্যমানং যাগুআদিং গণ্হন্তস্স গণভোজনং ন হোতীতি ৰুত্তং হোতি।

    1219. Pañcabhojanesu aññatarassa nāmaṃ gahetvā nimantetvā tesuyeva aññaṃ diyyamānaṃ gaṇhantassa visaṅketābhāvaṃ dassetumāha ‘‘bhojanānañcā’’tiādi. Bhojanānanti niddhāraṇe sāmivacanaṃ, aññatarassa vasenāti vuttaṃ hoti. Taṃ visaṅketaṃ, odanādīnaṃ nāmena nimantetvā diyyamānaṃ yāguādiṃ gaṇhantassa gaṇabhojanaṃ na hotīti vuttaṃ hoti.

    ১২২১. ‘‘নিচ্চভত্ত’’ন্তি ধুৰভত্তং ৰুচ্চতি। ‘‘নিচ্চভত্তং গণ্হথা’’তি ৰদন্তি, বহূনম্পি একতো গহেতুং ৰট্টতি। সলাকভত্তাদীসুপি এসেৰ নযো।

    1221.‘‘Niccabhatta’’nti dhuvabhattaṃ vuccati. ‘‘Niccabhattaṃ gaṇhathā’’ti vadanti, bahūnampi ekato gahetuṃ vaṭṭati. Salākabhattādīsupi eseva nayo.

    গণভোজনকথাৰণ্ণনা।

    Gaṇabhojanakathāvaṇṇanā.

    ১২২৩-৪. বহূহি মনুস্সকেহীতি ৰিসুং ৰিসুং নিমন্তিতেহি অনেকেহি মনুস্সেহি। পঞ্চসু যস্স কস্সাতি এত্থ ‘‘সহধম্মিকেসূ’’তি সেসো, নিদ্ধারণে ভুম্মং, পঞ্চসু সহধম্মিকেসু যস্স কস্সচীতি অত্থো। ‘‘হিত্ৰা’’তিআদিনা কিমাহাতি? যস্স ৰিকপ্পেতি, তস্মিং সন্নিহিতে ‘‘ময্হং ভত্তপচ্চাসং তুয্হং দম্মী’’তি সম্মুখা ৰিকপ্পনৰসেন ৰা তস্মিং অসন্নিহিতে তস্স নামং গহেত্ৰা ‘‘ময্হং ভত্তপচ্চাসং ইত্থন্নামস্স দম্মী’’তি অসম্মুখা ৰিকপ্পনৰসেন ৰা পঠমনিমন্তনায ৰিকপ্পনং হিত্ৰা, তং অৰিকপ্পেত্ৰাতি ৰুত্তং হোতি।

    1223-4.Bahūhi manussakehīti visuṃ visuṃ nimantitehi anekehi manussehi. Pañcasu yassa kassāti ettha ‘‘sahadhammikesū’’ti seso, niddhāraṇe bhummaṃ, pañcasu sahadhammikesu yassa kassacīti attho. ‘‘Hitvā’’tiādinā kimāhāti? Yassa vikappeti, tasmiṃ sannihite ‘‘mayhaṃ bhattapaccāsaṃ tuyhaṃ dammī’’ti sammukhā vikappanavasena vā tasmiṃ asannihite tassa nāmaṃ gahetvā ‘‘mayhaṃ bhattapaccāsaṃ itthannāmassa dammī’’ti asammukhā vikappanavasena vā paṭhamanimantanāya vikappanaṃ hitvā, taṃ avikappetvāti vuttaṃ hoti.

    ভত্তন্তি এত্থ ‘‘যো ভুঞ্জতী’’তি সেসো। নিমন্তিতো যো পচ্ছা নিমন্তিতং ভত্তং ভুঞ্জতি, তস্স পাচিত্তিযন্তি যোজনা। উপ্পটিপাটিযা একসিত্থম্পি ভুঞ্জতো তস্স পাচিত্তিযং সিযাতি যোজনাতি। কিং ৰুত্তং হোতি? পচ্ছা নিমন্তিতানং ভোজনং পঠমং ভুঞ্জিত্ৰা পঠমং নিমন্তিতানং ভোজনং পচ্ছা ভুঞ্জন্তস্স চ একপত্তেযেৰ হেট্ঠা পঠমং নিমন্তিতানং ভোজনং পক্খিপিত্ৰা ইতরং উপরি পক্খিপিত্ৰা হেট্ঠা হত্থং ওতারেত্ৰা হেট্ঠা ঠিতভোজনে একসিত্থম্পি পঠমং অভুঞ্জিত্ৰা উপরি ঠিতং পঠমং ভুঞ্জন্তস্স চাতি ৰুত্তং হোতি। তেনেৰ যথা উপ্পটিপাটি ন হোতি, তথা মিস্সীকতং ভোজনং ভুঞ্জন্তস্স ন দোসোতি মহাপচ্চরিযং ৰিনিচ্ছযো ব্যতিরেকতো দস্সিতো হোতি। যথাহ ‘‘দ্ৰে তীণি কুলানি নিমন্তেত্ৰা একস্মিং ঠানে নিসীদাপেত্ৰা ইতো চিতো চ আহরিত্ৰা ভত্তং আকিরন্তি, সূপব্যঞ্জনং আকিরন্তি, একমিস্সকং হোতি, এত্থ অনাপত্তীতি মহাপচ্চরিযং ৰুত্ত’’ন্তি (পাচি॰ অট্ঠ॰ ২২৯)।

    Bhattanti ettha ‘‘yo bhuñjatī’’ti seso. Nimantito yo pacchā nimantitaṃ bhattaṃ bhuñjati, tassa pācittiyanti yojanā. Uppaṭipāṭiyā ekasitthampi bhuñjato tassa pācittiyaṃ siyāti yojanāti. Kiṃ vuttaṃ hoti? Pacchā nimantitānaṃ bhojanaṃ paṭhamaṃ bhuñjitvā paṭhamaṃ nimantitānaṃ bhojanaṃ pacchā bhuñjantassa ca ekapatteyeva heṭṭhā paṭhamaṃ nimantitānaṃ bhojanaṃ pakkhipitvā itaraṃ upari pakkhipitvā heṭṭhā hatthaṃ otāretvā heṭṭhā ṭhitabhojane ekasitthampi paṭhamaṃ abhuñjitvā upari ṭhitaṃ paṭhamaṃ bhuñjantassa cāti vuttaṃ hoti. Teneva yathā uppaṭipāṭi na hoti, tathā missīkataṃ bhojanaṃ bhuñjantassa na dosoti mahāpaccariyaṃ vinicchayo byatirekato dassito hoti. Yathāha ‘‘dve tīṇi kulāni nimantetvā ekasmiṃ ṭhāne nisīdāpetvā ito cito ca āharitvā bhattaṃ ākiranti, sūpabyañjanaṃ ākiranti, ekamissakaṃ hoti, ettha anāpattīti mahāpaccariyaṃ vutta’’nti (pāci. aṭṭha. 229).

    ১২২৫-৬. পরম্পরভোজনস্স সরূপং পদভাজনে ৰুত্তনযেন দস্সেতুমাহ ‘‘ভোজনানম্পী’’তিআদি। তেসমেৰ পঞ্চন্নং ভোজনানং অঞ্ঞতরং ভোজনং পরিভুঞ্জতীতি যোজনা। মহেসিনা পরিদীপিতন্তি পদভাজনে ‘‘পরম্পরভোজনং নাম পঞ্চন্নং ভোজনান’’ন্তিআদিনা (পাচি॰ ২২৭) নযেন ৰুত্তং।

    1225-6. Paramparabhojanassa sarūpaṃ padabhājane vuttanayena dassetumāha ‘‘bhojanānampī’’tiādi. Tesameva pañcannaṃ bhojanānaṃ aññataraṃ bhojanaṃ paribhuñjatīti yojanā. Mahesinā paridīpitanti padabhājane ‘‘paramparabhojanaṃ nāma pañcannaṃ bhojanāna’’ntiādinā (pāci. 227) nayena vuttaṃ.

    ১২২৭. যত্থাতি অনেকেহি একভাজনে পক্খিত্তে যস্মিং ভোজনেতি ৰুত্তং হোতি একেনেৰ দিন্নে ৰিচারণাভাৰা। সব্বমেকরসং সিযাতি ৰিসুং ৰিসুং ৰিঞ্ঞাযমানরসং অহুত্ৰা একরসমেৰ হোতি।

    1227.Yatthāti anekehi ekabhājane pakkhitte yasmiṃ bhojaneti vuttaṃ hoti ekeneva dinne vicāraṇābhāvā. Sabbamekarasaṃ siyāti visuṃ visuṃ viññāyamānarasaṃ ahutvā ekarasameva hoti.

    ১২৩০. ‘‘গামেনা’’তি ইমিনা গামট্ঠাযেৰ ৰুত্তা। ‘‘নিমন্তিতস্স দোসো ন ৰিজ্জতী’’তি ইদং গামপূগনিগমেহি পচ্চেকং যোজেতব্বং। গাম-সদ্দেন ‘‘গামা ৰা অরঞ্ঞা ৰা’’তি (পারা॰ ৯১) এত্থ ৰিয নগরম্পি সঙ্গহিতং। পূগো নাম ৰিসুং ৰিসুং সমূহা হুত্ৰা পুঞ্ঞকারিনো ধম্মিকমনুস্সা। নিগমো নাম সাপণো মহাগামো। সকলগামেন নিমন্তিতো হুত্ৰা সম্পত্তে যত্থ কত্থচি গেহে ভুঞ্জন্তস্স অনাপত্তীতি অত্থো। পূগাদীসুপি এসেৰ নযো। যথাহ ‘‘সকলেন গামেন একতো হুত্ৰা নিমন্তিতস্সেৰ যত্থ কত্থচি ভুঞ্জতো অনাপত্তি। পূগেপি এসেৰ নযো’’তি (পাচি॰ অট্ঠ॰ ২২৯)। নিচ্চভত্তে দোসো ন ৰিজ্জতীতি অনেকট্ঠানতো দিয্যমানং নিচ্চভত্তম্পি উপ্পটিপাটিযা ভুঞ্জন্তস্স ন দোসোতি ৰুত্তং হোতি।

    1230.‘‘Gāmenā’’ti iminā gāmaṭṭhāyeva vuttā. ‘‘Nimantitassa doso na vijjatī’’ti idaṃ gāmapūganigamehi paccekaṃ yojetabbaṃ. Gāma-saddena ‘‘gāmā vā araññā vā’’ti (pārā. 91) ettha viya nagarampi saṅgahitaṃ. Pūgo nāma visuṃ visuṃ samūhā hutvā puññakārino dhammikamanussā. Nigamo nāma sāpaṇo mahāgāmo. Sakalagāmena nimantito hutvā sampatte yattha katthaci gehe bhuñjantassa anāpattīti attho. Pūgādīsupi eseva nayo. Yathāha ‘‘sakalena gāmena ekato hutvā nimantitasseva yattha katthaci bhuñjato anāpatti. Pūgepi eseva nayo’’ti (pāci. aṭṭha. 229). Niccabhatte doso na vijjatīti anekaṭṭhānato diyyamānaṃ niccabhattampi uppaṭipāṭiyā bhuñjantassa na dosoti vuttaṃ hoti.

    ১২৩১. কাযো ৰাচা কাযৰাচাচিত্তন্তি ইমেহি আপজ্জনং কথিনসমুট্ঠানং নাম। ইধ ক্রিযং নাম ভোজনং, অক্রিযং নাম পঠমনিমন্তনস্স অৰিকপ্পনং, ইদং দ্ৰযমেৰাহ ‘‘ভোজনঞ্চাৰিকপ্পন’’ন্তি।

    1231. Kāyo vācā kāyavācācittanti imehi āpajjanaṃ kathinasamuṭṭhānaṃ nāma. Idha kriyaṃ nāma bhojanaṃ, akriyaṃ nāma paṭhamanimantanassa avikappanaṃ, idaṃ dvayamevāha ‘‘bhojanañcāvikappana’’nti.

    পরম্পরভোজনকথাৰণ্ণনা।

    Paramparabhojanakathāvaṇṇanā.

    ১২৩২-৩. পূৰাতি অতিরসাদযো রসা। পহেণকত্থাযাতি পণ্ণাকারত্থায। পটিযত্তাতি সম্পাদিতা। পাথেয্যত্থাযাতি গমিকস্স সম্বলত্থায। পটিযত্তা মন্থা ৰাতি সম্বন্ধো। মন্থা নাম বদ্ধসত্তুঅবদ্ধসত্তুতিলতণ্ডুলাদযো। যথাহ ‘‘বদ্ধসত্তুঅবদ্ধসত্তুতিলতণ্ডুলাদি সব্বং ইধ মন্থোত্ৰেৰ সঙ্খং গচ্ছতী’’তি (পাচি॰ অট্ঠ॰ ২৩৩)। যে পূৰা, মন্থা ৰাতি যোজনা। হীতি নিপাতমত্তং। তত্থ পটিযত্তেসু তেসু পূৰেসু ৰা মন্থেসু ৰা। ভিক্খুনাতি এত্থ ‘‘আকঙ্খমানেনা’’তি সেসো।

    1232-3.Pūvāti atirasādayo rasā. Paheṇakatthāyāti paṇṇākāratthāya. Paṭiyattāti sampāditā. Pātheyyatthāyāti gamikassa sambalatthāya. Paṭiyattā manthā vāti sambandho. Manthā nāma baddhasattuabaddhasattutilataṇḍulādayo. Yathāha ‘‘baddhasattuabaddhasattutilataṇḍulādi sabbaṃ idha manthotveva saṅkhaṃ gacchatī’’ti (pāci. aṭṭha. 233). Ye pūvā, manthā vāti yojanā. Hīti nipātamattaṃ. Tattha paṭiyattesu tesu pūvesu vā manthesu vā. Bhikkhunāti ettha ‘‘ākaṅkhamānenā’’ti seso.

    দ্ৰত্তিপত্তাতি দ্ৰে ৰা তযো ৰা পত্তাতি ৰিগ্গহো। পূরাতি মুখৰট্টিযা হেট্ঠিমরাজিসমং পুণ্ণা। যথাহ ‘‘মুখৰট্টিযা হেট্ঠিমলেখায সমপূরে পত্তে গহেত্ৰা’’তি (পাচি॰ অট্ঠ॰ ২৩৩)। ‘‘দ্ৰত্তিপত্তা পূরা’’তি চেত্থ পরিমাণং দস্সিতং, পরিমাণপরিমেয্যানং অভেদোপচারেন পূৰমন্থা গহেতব্বা যথা ‘‘দ্ৰে তিস্সো তণ্ডুলনাল়িযো’’তি। পূৰেহি ৰা সত্তূহি ৰাতি যোজনা। সত্তূতি বদ্ধসত্তুঅবদ্ধসত্তূনং গহণং, ইমিনাৰ তিলাদীনি উপলক্খিতানি। ততিযপত্তস্স মুখৰট্টিযা হেট্ঠারাজিযা উদ্ধং কত্ৰা পক্খিত্তঞ্চেতং ‘‘ততো উত্তরি’’ন্তি ইমিনা চ গয্হতি। যথাহ ‘‘সচে ততিযং পত্তং থূপীকতং গণ্হাতি, পূৰগণনায পাচিত্তিয’’ন্তি (পাচি॰ অট্ঠ॰ ২৩৩)।

    Dvattipattāti dve vā tayo vā pattāti viggaho. Pūrāti mukhavaṭṭiyā heṭṭhimarājisamaṃ puṇṇā. Yathāha ‘‘mukhavaṭṭiyā heṭṭhimalekhāya samapūre patte gahetvā’’ti (pāci. aṭṭha. 233). ‘‘Dvattipattā pūrā’’ti cettha parimāṇaṃ dassitaṃ, parimāṇaparimeyyānaṃ abhedopacārena pūvamanthā gahetabbā yathā ‘‘dve tisso taṇḍulanāḷiyo’’ti. Pūvehi vā sattūhi vāti yojanā. Sattūti baddhasattuabaddhasattūnaṃ gahaṇaṃ, imināva tilādīni upalakkhitāni. Tatiyapattassa mukhavaṭṭiyā heṭṭhārājiyā uddhaṃ katvā pakkhittañcetaṃ ‘‘tato uttari’’nti iminā ca gayhati. Yathāha ‘‘sace tatiyaṃ pattaṃ thūpīkataṃ gaṇhāti, pūvagaṇanāya pācittiya’’nti (pāci. aṭṭha. 233).

    ১২৩৭. তত্থ তেসু পূৰেসু ৰা মন্থেসু ৰা দ্ৰে চে পত্তপূরা লদ্ধাতি যোজনা। একো পত্তপূরো পদাতব্বোতি যোজনা। একতোতি একপত্তপূরতো ন পদাতব্বোতি যোজনা, কিঞ্চিপি অকামা ন দাতব্বন্তি অত্থো। যথাহ ‘‘যেন একো গহিতো, ন তেন কিঞ্চি অকামা দাতব্বং। যথারুচি কাতব্ব’’ন্তি (পাচি॰ অট্ঠ॰ ২৩৩)। এৰং দদন্তেন আসনসালায ৰা অত্তনো নিবদ্ধৰাসট্ঠানে ৰা দিট্ঠস্স ভিক্খুসঙ্ঘস্স সাধারণং কত্ৰা দানমন্তরেন ন মিত্তানমেৰ দাতব্বং। যথাহ ‘‘যথামিত্তং পন দাতুং ন লব্ভতী’’তি (পাচি॰ অট্ঠ॰ ২৩৩)।

    1237.Tattha tesu pūvesu vā manthesu vā dve ce pattapūrā laddhāti yojanā. Eko pattapūro padātabboti yojanā. Ekatoti ekapattapūrato na padātabboti yojanā, kiñcipi akāmā na dātabbanti attho. Yathāha ‘‘yena eko gahito, na tena kiñci akāmā dātabbaṃ. Yathāruci kātabba’’nti (pāci. aṭṭha. 233). Evaṃ dadantena āsanasālāya vā attano nibaddhavāsaṭṭhāne vā diṭṭhassa bhikkhusaṅghassa sādhāraṇaṃ katvā dānamantarena na mittānameva dātabbaṃ. Yathāha ‘‘yathāmittaṃ pana dātuṃ na labbhatī’’ti (pāci. aṭṭha. 233).

    ১২৩৮-৯. অপহেণকং অপাথেয্যং দেন্তানন্তি সম্বন্ধো। যথাহ ‘‘ন পহেণকত্থায ন পাথেয্যত্থায পটিযত্তং দেন্তী’’তি (পাচি॰ ২৩৫)। ততোতি পহেণকপাথেয্যতো। ৰা-সদ্দেন ইধ অৰুত্তং ‘‘গমনে পটিপ্পস্সদ্ধে দেন্তী’’তি (পাচি॰ ২৩৫) অনাপত্তিৰারে ৰুত্তং সঙ্গণ্হাতি। তদূনকন্তি ততো দ্ৰত্তিপত্ততো ঊনকং। যথাহ ‘‘ঊনকদ্ৰত্তিপত্তপূরে পটিগ্গণ্হাতী’’তি (পাচি॰ ২৩৫)। অপাথেয্যাদিঅত্থায পটিযাদিতন্তি সঞ্ঞায পাথেয্যাদিং গণ্হন্তস্সাপি আপত্তিযেৰ অচিত্তকত্তা সিক্খাপদস্স। অত্তনোযেৰ গহণত্থং ‘‘ইমস্স হত্থে দেহী’’তি ৰচনেনাপি আপজ্জনতো ৰচীকম্মং।

    1238-9. Apaheṇakaṃ apātheyyaṃ dentānanti sambandho. Yathāha ‘‘na paheṇakatthāya na pātheyyatthāya paṭiyattaṃ dentī’’ti (pāci. 235). Tatoti paheṇakapātheyyato. Vā-saddena idha avuttaṃ ‘‘gamane paṭippassaddhe dentī’’ti (pāci. 235) anāpattivāre vuttaṃ saṅgaṇhāti. Tadūnakanti tato dvattipattato ūnakaṃ. Yathāha ‘‘ūnakadvattipattapūre paṭiggaṇhātī’’ti (pāci. 235). Apātheyyādiatthāya paṭiyāditanti saññāya pātheyyādiṃ gaṇhantassāpi āpattiyeva acittakattā sikkhāpadassa. Attanoyeva gahaṇatthaṃ ‘‘imassa hatthe dehī’’ti vacanenāpi āpajjanato vacīkammaṃ.

    কাণমাতুকথাৰণ্ণনা।

    Kāṇamātukathāvaṇṇanā.

    ১২৪০. অঞ্ঞেনাতি তদ্ধিতলোপেন নিদ্দেসো, অঞ্ঞতরেনাতি অত্থো, পৰারিতোতি সম্বন্ধো। ভোজনানন্তি নিদ্ধারণে ভুম্মং। পৰারিতোতি ‘‘গণ্হথ ভন্তে যাৰ ইচ্ছথা’তি এৰং যাৰদত্থপৰারণায, সযঞ্চ ‘অলং আৰুসো থোকং থোকং দেহী’তি এৰং পটিক্খেপপৰারণাযা’’তি অট্ঠকথায ৰুত্তপ্পকারদ্ৰযেন পৰারিতোতি অত্থো । ৰিকপ্পদ্ৰযে পকারদ্ৰযে পৰারিত-সদ্দে ৰর-ধাতুস্স পত্থনৰারণত্থৰসেনাযমত্থো ৰেদিতব্বো, ‘‘পাচিত্তি অনতিরিত্ত’’ন্তি পদচ্ছেদো। ‘‘অনতিরিত্তং ভোজন’’ন্তি ৰিসেসিতব্বমপেক্খিত্ৰা ‘‘অঞ্ঞেনা’’তি এত্থ ৰিভত্তিং ৰিপরিণামেত্ৰা ‘‘পঞ্চন্নং ভোজনানং অঞ্ঞতরং ভোজন’’ন্তি যোজেতব্বং, ৰক্খমানে অনতিরিত্তকতভোজননিদ্দেসে ৰুত্তেসু পঞ্চসু ভোজনেসু অঞ্ঞতরং ভোজনন্তি অত্থো। ‘‘খাদনীযং ৰা ভোজনীযং ৰা’’তি (পাচি॰ ২৩৬, ২৩৮) সহ দেসিতত্তা একযোগঞাযেন ‘‘খাদনীযং ৰা’’তি চ গহেতব্বং। পঞ্চ ভোজনানি, কালিকত্তযঞ্চ ঠপেত্ৰা সব্বং যাৰকালিকং খাদনীযন্তি ৰুত্তং।

    1240.Aññenāti taddhitalopena niddeso, aññatarenāti attho, pavāritoti sambandho. Bhojanānanti niddhāraṇe bhummaṃ. Pavāritoti ‘‘gaṇhatha bhante yāva icchathā’ti evaṃ yāvadatthapavāraṇāya, sayañca ‘alaṃ āvuso thokaṃ thokaṃ dehī’ti evaṃ paṭikkhepapavāraṇāyā’’ti aṭṭhakathāya vuttappakāradvayena pavāritoti attho . Vikappadvaye pakāradvaye pavārita-sadde vara-dhātussa patthanavāraṇatthavasenāyamattho veditabbo, ‘‘pācitti anatiritta’’nti padacchedo. ‘‘Anatirittaṃ bhojana’’nti visesitabbamapekkhitvā ‘‘aññenā’’ti ettha vibhattiṃ vipariṇāmetvā ‘‘pañcannaṃ bhojanānaṃ aññataraṃ bhojana’’nti yojetabbaṃ, vakkhamāne anatirittakatabhojananiddese vuttesu pañcasu bhojanesu aññataraṃ bhojananti attho. ‘‘Khādanīyaṃ vā bhojanīyaṃ vā’’ti (pāci. 236, 238) saha desitattā ekayogañāyena ‘‘khādanīyaṃ vā’’ti ca gahetabbaṃ. Pañca bhojanāni, kālikattayañca ṭhapetvā sabbaṃ yāvakālikaṃ khādanīyanti vuttaṃ.

    ১২৪১. অসনন্তি এত্থ ৰিপ্পকতভোজনং দিস্সতি, ভুঞ্জমানো চে পুগ্গলো হোতি, ভোজনকিরিযানুপচ্ছিন্না ৰত্ততীতি অত্থো। ভোজনন্তি পৰারণপহোনকওদনাদি হত্থাদীসু দিস্সতি। হত্থপাসোতি পৰারণপহোনকং ভোজনং দাতুং অভিহরিত্ৰা ঠিতোকাসো অড্ঢতেয্যহত্থপ্পমাণো হোতীতি ৰুত্তং হোতি। অভিহরণং অভিহারো, সো এৰ অভিহারতা, তথা দাতুং ঠিতস্স কাযেন কতো অভিহারো দিস্সতীতি ৰুত্তং হোতি। কাযৰাচাপটিক্খেপোতি তথা অভিহটে ভোজনে পটিগ্গাহকস্স হত্থৰিকারাদিকো কাযিকো ৰা ‘‘অল’’ন্তিআদিকো ৰাচসিকো ৰা পটিক্খেপো পঞ্ঞাযতীতি অত্থো।

    1241.Asananti ettha vippakatabhojanaṃ dissati, bhuñjamāno ce puggalo hoti, bhojanakiriyānupacchinnā vattatīti attho. Bhojananti pavāraṇapahonakaodanādi hatthādīsu dissati. Hatthapāsoti pavāraṇapahonakaṃ bhojanaṃ dātuṃ abhiharitvā ṭhitokāso aḍḍhateyyahatthappamāṇo hotīti vuttaṃ hoti. Abhiharaṇaṃ abhihāro, so eva abhihāratā, tathā dātuṃ ṭhitassa kāyena kato abhihāro dissatīti vuttaṃ hoti. Kāyavācāpaṭikkhepoti tathā abhihaṭe bhojane paṭiggāhakassa hatthavikārādiko kāyiko vā ‘‘ala’’ntiādiko vācasiko vā paṭikkhepo paññāyatīti attho.

    ১২৪২. নিপ্পপঞ্চেনাতি সহ ৰাসনায পহীনতণ্হাদিপপঞ্চত্তযরহিতেন তথাগতেন।

    1242.Nippapañcenāti saha vāsanāya pahīnataṇhādipapañcattayarahitena tathāgatena.

    ১২৪৩. তত্থাতি ওদনাদীসু। সত্তন্নন্তি ‘‘সালী’’তিআদিনা ৰক্খমানানুরূপানং।

    1243.Tatthāti odanādīsu. Sattannanti ‘‘sālī’’tiādinā vakkhamānānurūpānaṃ.

    ১২৪৪. ওদকোতি উদকে ভৰো। এত্থাতি পঞ্চঙ্গপৰারণায। অযংনিচ্ছযোতি ৰক্খমানৰিধিপ্পকারং ৰিনিচ্ছযং দস্সেতি।

    1244.Odakoti udake bhavo. Etthāti pañcaṅgapavāraṇāya. Ayaṃnicchayoti vakkhamānavidhippakāraṃ vinicchayaṃ dasseti.

    ১২৪৫. সালীতি সব্বসালিজাতি। ৰীহীতি সব্বৰীহিজাতি। কঙ্গূতি সেতরত্তকাল়ভেদা সব্বা কঙ্গুজাতি। ৰরকো সেতৰরকো। ধঞ্ঞেন সম্ভতপুঞ্ঞসম্ভারেন ভগৰতা।

    1245.Sālīti sabbasālijāti. Vīhīti sabbavīhijāti. Kaṅgūti setarattakāḷabhedā sabbā kaṅgujāti. Varako setavarako. Dhaññena sambhatapuññasambhārena bhagavatā.

    ১২৪৬. তিণন্তি তিণবীজমেৰ ৰুত্তং। দীপিতং সঙ্গহিতং। ৰরকচোরকোতি সুখুমৰরকো।

    1246.Tiṇanti tiṇabījameva vuttaṃ. Dīpitaṃ saṅgahitaṃ. Varakacorakoti sukhumavarako.

    ১২৪৮. অঙ্গসম্পত্তিং দস্সেতুমাহ ‘‘হত্থেনা’’তিআদি।

    1248. Aṅgasampattiṃ dassetumāha ‘‘hatthenā’’tiādi.

    ১২৪৯. তনূতি তনুকা।

    1249.Tanūti tanukā.

    ১২৫০. ন রক্খতি পৰারণং।

    1250.Na rakkhati pavāraṇaṃ.

    ১২৫১-২. ধঞ্ঞরসাদীনীতি আদি-সদ্দেন দধিআদযো গহিতা। আরোপেত্ৰাতি উদ্ধনং আরোপেত্ৰা। ফলন্তি এলাল়ুকাদিফলং। পণ্ণন্তি সূপসাকং। কল়ীরন্তি ৰেল়ুআদীনং কল়ীরং। বহূনীতি তেসমেৰ ৰিসেসনং। তত্থ চাতি পক্খিত্তপণ্ণাদিম্হি তক্কাদিকে। ওধিং দস্সেতীতি এত্থ ‘‘পরিভোগকালে’’তি সেসো। সঞ্জনেতীতি এত্থ ‘‘ফলাদিযাগূ’’তি লব্ভতি।

    1251-2.Dhaññarasādīnīti ādi-saddena dadhiādayo gahitā. Āropetvāti uddhanaṃ āropetvā. Phalanti elāḷukādiphalaṃ. Paṇṇanti sūpasākaṃ. Kaḷīranti veḷuādīnaṃ kaḷīraṃ. Bahūnīti tesameva visesanaṃ. Tattha cāti pakkhittapaṇṇādimhi takkādike. Odhiṃ dassetīti ettha ‘‘paribhogakāle’’ti seso. Sañjanetīti ettha ‘‘phalādiyāgū’’ti labbhati.

    ১২৫৩-৪. রসেতি মংসাদিরসে। ‘‘যাগুং গণ্হথা’’তি ৰা ‘‘যাগু’’ন্তি ৰা ৰত্ৰাতি যোজেতব্বা। যাগু সঙ্গহিতাতি এত্থ ওধিপঞ্ঞাযনঅপঞ্ঞাযনৰিকপ্পদ্ৰযে যাগুযা সমো ৰিনিচ্ছযোতি অধিপ্পাযো।

    1253-4.Raseti maṃsādirase. ‘‘Yāguṃ gaṇhathā’’ti vā ‘‘yāgu’’nti vā vatvāti yojetabbā. Yāgu saṅgahitāti ettha odhipaññāyanaapaññāyanavikappadvaye yāguyā samo vinicchayoti adhippāyo.

    ১২৫৫. ছুপন্তীতি সম্ফুসন্তি। ছুপ সম্ফস্সেতি ধাতু, পক্খিপন্তীতি ৰুত্তং হোতি। যথাহ ‘‘যত্থ মচ্ছমংসং পক্খিপন্তী’’তি (পাচি॰ অট্ঠ॰ ২৩৮-২৩৯)। সাসপমত্তম্পি মচ্ছমংসং ৰা সচে পঞ্ঞাযতীতি যোজনা। পৰারণন্তি এত্থ ‘‘জনেতী’’তি সেসো। যাগুযাতি পদং পচ্চত্তৰসেন ৰিপরিণামেত্ৰা যাগু জনেতীতি যোজেতব্বং।

    1255.Chupantīti samphusanti. Chupa samphasseti dhātu, pakkhipantīti vuttaṃ hoti. Yathāha ‘‘yattha macchamaṃsaṃ pakkhipantī’’ti (pāci. aṭṭha. 238-239). Sāsapamattampi macchamaṃsaṃ vā sace paññāyatīti yojanā. Pavāraṇanti ettha ‘‘janetī’’ti seso. Yāguyāti padaṃ paccattavasena vipariṇāmetvā yāgu janetīti yojetabbaṃ.

    ১২৫৬. সংসট্ঠোতি পরিস্সাৰিতো ন সঞ্জনেতীতি যোজনা।

    1256.Saṃsaṭṭhoti parissāvito na sañjanetīti yojanā.

    ১২৫৭. সব্বসো ঠপেত্ৰাতি সম্বন্ধো। মংসাদিপক্খিত্তওদনাদিপ্পকরণাৰসেসতো অঙ্গং দস্সেতুমাহ ‘‘সব্বসো’’তি। সব্বসো ন পৰারেতীতি যোজনা। ৰেল়ুতণ্ডুলন্তি ৰেল়ুৰীহীনং তণ্ডুলং। আদি-সদ্দেন কন্দমূলং সঙ্গহিতং। যথাহ ‘‘ৰেণুতণ্ডুলাদীহি ৰা কন্দমূলফলেহি ৰা যেহি কেহিচি কতভত্ত’’ন্তি।

    1257. Sabbaso ṭhapetvāti sambandho. Maṃsādipakkhittaodanādippakaraṇāvasesato aṅgaṃ dassetumāha ‘‘sabbaso’’ti. Sabbaso na pavāretīti yojanā. Veḷutaṇḍulanti veḷuvīhīnaṃ taṇḍulaṃ. Ādi-saddena kandamūlaṃ saṅgahitaṃ. Yathāha ‘‘veṇutaṇḍulādīhi vā kandamūlaphalehi vā yehi kehici katabhatta’’nti.

    ১২৫৮. ততোতি সালিআদিতো, ৰেল়ুআদিতো চ, ততো নিব্বত্তা পুথুকা ৰাতি অত্থো। তাহীতি পুথুকাহি। সুদ্ধাতি পুথুকাদীহি অমিস্সা ন পৰারেন্তীতি সম্বন্ধো।

    1258.Tatoti sāliādito, veḷuādito ca, tato nibbattā puthukā vāti attho. Tāhīti puthukāhi. Suddhāti puthukādīhi amissā na pavārentīti sambandho.

    ১২৫৯. ভট্ঠানন্তি ভজ্জিতানং। সত্তূহি সঙ্গহিতং সত্তুসঙ্গহিতং।

    1259.Bhaṭṭhānanti bhajjitānaṃ. Sattūhi saṅgahitaṃ sattusaṅgahitaṃ.

    ১২৬১. সত্তূনং মোদকোতি সত্তুবদ্ধং, বদ্ধসত্তূতি অত্থো।

    1261.Sattūnaṃ modakoti sattubaddhaṃ, baddhasattūti attho.

    ১২৬৩. তেহেৰাতি লাজেহি এৰ। সুদ্ধং খজ্জকং ৰাতি ৰক্খমাননযেন মচ্ছাদীহি অসম্মিস্সং খজ্জকং।

    1263.Tehevāti lājehi eva. Suddhaṃ khajjakaṃ vāti vakkhamānanayena macchādīhi asammissaṃ khajjakaṃ.

    ১২৬৪. ‘‘পূরিত’’ন্তিআদিনা তব্বিপরিযাযং দস্সেতি। তন্তি কুণ্ডকাদি।

    1264.‘‘Pūrita’’ntiādinā tabbipariyāyaṃ dasseti. Tanti kuṇḍakādi.

    ১২৬৬. অকপ্পিযং মংসং। অৰত্থুত্তাতি অকপ্পিযমংসানং ৰারেতব্বত্তা পৰারণায অৰত্থুত্তা।

    1266.Akappiyaṃ maṃsaṃ. Avatthuttāti akappiyamaṃsānaṃ vāretabbattā pavāraṇāya avatthuttā.

    ১২৬৭. ৰত্থুকত্তাতি কপ্পিযমংসস্স পৰারণায ৰত্থুভূতত্তা। পৰারেতীতি এত্থ ‘‘খাদিযমানস্স চ মংসত্তা’’তি সেসো দট্ঠব্বো। যথাহ ‘‘যং পন খাদতি, তং কিঞ্চাপি পটিক্খিপিতব্বট্ঠানে ঠিতং, খাদিযমানং পন মংসভাৰং ন জহতী’’তি (পাচি॰ অট্ঠ॰ ২৩৮-২৩৯)।

    1267.Vatthukattāti kappiyamaṃsassa pavāraṇāya vatthubhūtattā. Pavāretīti ettha ‘‘khādiyamānassa ca maṃsattā’’ti seso daṭṭhabbo. Yathāha ‘‘yaṃ pana khādati, taṃ kiñcāpi paṭikkhipitabbaṭṭhāne ṭhitaṃ, khādiyamānaṃ pana maṃsabhāvaṃ na jahatī’’ti (pāci. aṭṭha. 238-239).

    ১২৬৮. কিঞ্চি কপ্পিযভোজনন্তি পঞ্চসু ভোজনেসু যং কিঞ্চি কপ্পিযভোজনং।

    1268.Kiñci kappiyabhojananti pañcasu bhojanesu yaṃ kiñci kappiyabhojanaṃ.

    ১২৬৯. অকপ্পিযং মংসং অঞ্ঞন্তি অকপ্পিযমংসতো অৰসেসং কুলদূসনাদিৰসেন উপ্পন্নভোজনং গহিতং। যথাহ ‘‘কুলদূসনৰেজ্জকম্মউত্তরিমনুস্সধম্মারোচনসাদিতরূপিযাদীহি নিব্বত্তং বুদ্ধপটিকুট্ঠং অনেসনায উপ্পন্নং অকপ্পিযভোজনং পটিক্খিপতি, ন পৰারেতী’’তি।

    1269.Akappiyaṃ maṃsaṃ aññanti akappiyamaṃsato avasesaṃ kuladūsanādivasena uppannabhojanaṃ gahitaṃ. Yathāha ‘‘kuladūsanavejjakammauttarimanussadhammārocanasāditarūpiyādīhi nibbattaṃ buddhapaṭikuṭṭhaṃ anesanāya uppannaṃ akappiyabhojanaṃ paṭikkhipati, na pavāretī’’ti.

    ১২৭০-১. অসনং ভোজনন্তি অঙ্গদ্ৰযে ৰিনিচ্ছযং দস্সেতুমাহ ‘‘সচে অজ্ঝোহট’’ন্তিআদি। অজ্ঝোহটন্তি পরগলগতং হোতি। ‘‘পত্তে’’তি ইমিনা থালকাদিভাজনঞ্চ গহিতং। কত্থচি ভোজনং নত্থীতি যোজনা। পত্তে, হত্থে, মুখে ৰা যত্থ কত্থচি পঞ্চন্নং ভোজনানং কিঞ্চি ন ৰিজ্জতি, গন্ধমত্তং পঞ্ঞাযতীতি ৰুত্তং হোতি।

    1270-1. Asanaṃ bhojananti aṅgadvaye vinicchayaṃ dassetumāha ‘‘sace ajjhohaṭa’’ntiādi. Ajjhohaṭanti paragalagataṃ hoti. ‘‘Patte’’ti iminā thālakādibhājanañca gahitaṃ. Katthaci bhojanaṃ natthīti yojanā. Patte, hatthe, mukhe vā yattha katthaci pañcannaṃ bhojanānaṃ kiñci na vijjati, gandhamattaṃ paññāyatīti vuttaṃ hoti.

    ১২৭২. আদাযাতি এত্থ ‘‘অঞ্ঞত্র ভুঞ্জিতু’’ন্তি সেসো। ‘‘যোপি অঞ্ঞত্র গন্ত্ৰা ভুঞ্জিতুকামো মুখে ভত্তং গিলিত্ৰা সেসং আদাযা’’তিআদিনা (পাচি॰ অট্ঠ॰ ২৩৮-২৩৯) মহাপচ্চরিযট্ঠকথাযং ৰুত্তৰচনস্স পমাণত্তা আহ ‘‘ন পৰারেতী’’তি।

    1272.Ādāyāti ettha ‘‘aññatra bhuñjitu’’nti seso. ‘‘Yopi aññatra gantvā bhuñjitukāmo mukhe bhattaṃ gilitvā sesaṃ ādāyā’’tiādinā (pāci. aṭṭha. 238-239) mahāpaccariyaṭṭhakathāyaṃ vuttavacanassa pamāṇattā āha ‘‘na pavāretī’’ti.

    ১২৭৩. ‘‘মুখে ভত্তং গিলিতং, হত্থে ভত্তং ৰিঘাসাদস্স দাতুকামো, পত্তে ভত্তং ভিক্খুস্স দাতুকামো, সচে তস্মিং খণে পটিক্খিপতি, ন পৰারেতী’’তি (পাচি॰ অট্ঠ॰ ২৩৮-২৩৯) এৰমাগতং কুরুন্দট্ঠকথং সঙ্গহেতুং ‘‘মুখে চ ভত্ত’’ন্তিআদিৰচনতো চ ‘‘অসনস্স উপচ্ছেদা’’তিআদিনা ৰক্খমানায যুত্তিযা অসনাৰসানে যুজ্জমানত্তা চ ইমিস্সা গাথায ‘‘ভোত্তুকামো’’তি পাঠং অগ্গহেত্ৰা ‘‘দাতুকামো’’তি পাঠো গহেতব্বো।

    1273. ‘‘Mukhe bhattaṃ gilitaṃ, hatthe bhattaṃ vighāsādassa dātukāmo, patte bhattaṃ bhikkhussa dātukāmo, sace tasmiṃ khaṇe paṭikkhipati, na pavāretī’’ti (pāci. aṭṭha. 238-239) evamāgataṃ kurundaṭṭhakathaṃ saṅgahetuṃ ‘‘mukhe ca bhatta’’ntiādivacanato ca ‘‘asanassa upacchedā’’tiādinā vakkhamānāya yuttiyā asanāvasāne yujjamānattā ca imissā gāthāya ‘‘bhottukāmo’’ti pāṭhaṃ aggahetvā ‘‘dātukāmo’’ti pāṭho gahetabbo.

    ১২৭৪. ‘‘অসনস্স উপচ্ছেদা’’তি ইমিনা তস্মিংযেৰ আসনে যথানিসিন্নেনেৰ কাতব্বে অসনে আসাৰচ্ছেদো দীপিতো। যথাহ অট্ঠকথাযং ‘‘তস্মিং পন আসনে ন ভুঞ্জিতুকামো, ৰিহারং পৰিসিত্ৰা ভুঞ্জিতুকামো, অঞ্ঞস্স ৰা দাতুকামো’’তি (পাচি॰ অট্ঠ॰ ২৩৮-২৩৯)। কুরুন্দট্ঠকথাযং তস্স ৰিনিচ্ছযস্স দস্সিতত্তা ‘‘মহাপঞ্ঞা’’তি কুরুন্দট্ঠকথাচরিযং সন্ধাযাহ। কারণাকারণঞ্ঞুনোতি ‘‘পৰারণস্স ইদং কারণং, ইদং অকারণ’’ন্তি জানন্তা। ‘‘কারণাকারণঞ্ঞুনা’’তি কত্থচি পোত্থকে লিখন্তি। তত্থ মহাপঞ্ঞা কারণাকারণঞ্ঞুনো আচরিযা অসনস্স…পে॰… সোতি হি কারণং কথযন্তীতি যোজনা।

    1274.‘‘Asanassa upacchedā’’ti iminā tasmiṃyeva āsane yathānisinneneva kātabbe asane āsāvacchedo dīpito. Yathāha aṭṭhakathāyaṃ ‘‘tasmiṃ pana āsane na bhuñjitukāmo, vihāraṃ pavisitvā bhuñjitukāmo, aññassa vā dātukāmo’’ti (pāci. aṭṭha. 238-239). Kurundaṭṭhakathāyaṃ tassa vinicchayassa dassitattā ‘‘mahāpaññā’’ti kurundaṭṭhakathācariyaṃ sandhāyāha. Kāraṇākāraṇaññunoti ‘‘pavāraṇassa idaṃ kāraṇaṃ, idaṃ akāraṇa’’nti jānantā. ‘‘Kāraṇākāraṇaññunā’’ti katthaci potthake likhanti. Tattha mahāpaññā kāraṇākāraṇaññuno ācariyā asanassa…pe… soti hi kāraṇaṃ kathayantīti yojanā.

    ১২৭৫. হত্থপাসঙ্গে ৰিনিচ্ছযং দস্সেতুমাহ ‘‘গণ্হতো…পে॰… পসারিত’’ন্তি। গণ্হতোতি যেন ইরিযাপথেন সমন্নাগতো হুত্ৰা গণ্হাতি, এৰং গণ্হতো। পচ্ছিমং অঙ্গন্তি দাযকেন দিন্নস্স পটিগ্গাহকস্স যো অৰযৰো পরভাগে হোতি , তং ঠানাদিইরিযাপথসমন্নাগতস্স পটিগ্গাহকস্স পণ্হিআদিং পচ্ছিমং অঙ্গং। দদতো পসারিতং হত্থং ৰিনা পুরিমং অঙ্গন্তি যোজনা। পসারিতং হত্থন্তি এত্থ ‘‘দাতু’’ন্তি সেসো। উভিন্নন্তি এত্থ ‘‘অন্তরে’’তি সেসো। পটিগ্গাহকদাযকানং পচ্ছিমপুরিমানং উভিন্নং অঙ্গানং অন্তরে ওকাসে। অড্ঢং উপড্ঢং হত্থং তেয্যং ততিযং যস্সাতি ৰিগ্গহো, অতিরেকৰিদত্থিদ্ৰিরতনপ্পমাণন্তি অত্থো।

    1275. Hatthapāsaṅge vinicchayaṃ dassetumāha ‘‘gaṇhato…pe… pasārita’’nti. Gaṇhatoti yena iriyāpathena samannāgato hutvā gaṇhāti, evaṃ gaṇhato. Pacchimaṃ aṅganti dāyakena dinnassa paṭiggāhakassa yo avayavo parabhāge hoti , taṃ ṭhānādiiriyāpathasamannāgatassa paṭiggāhakassa paṇhiādiṃ pacchimaṃ aṅgaṃ. Dadato pasāritaṃ hatthaṃ vinā purimaṃ aṅganti yojanā. Pasāritaṃ hatthanti ettha ‘‘dātu’’nti seso. Ubhinnanti ettha ‘‘antare’’ti seso. Paṭiggāhakadāyakānaṃ pacchimapurimānaṃ ubhinnaṃ aṅgānaṃ antare okāse. Aḍḍhaṃ upaḍḍhaṃ hatthaṃ teyyaṃ tatiyaṃ yassāti viggaho, atirekavidatthidviratanappamāṇanti attho.

    ১২৭৬. অভিহারঙ্গে ৰিনিচ্ছযং দস্সেতুমাহ ‘‘তস্মি’’ন্তিআদি। অড্ঢতেয্যে তস্মিং ঠানে ঠত্ৰাতি যোজনা, দ্ৰিরতনৰিদত্থিপমাণে তস্মিং ঠানে ঠত্ৰাতি অত্থো। অভিহটন্তি উপনীতং। তাদিসন্তি অভিহটসদিসং, পৰারণপহোনকানং পঞ্চন্নং ভোজনানং অঞ্ঞতরন্তি অত্থো।

    1276. Abhihāraṅge vinicchayaṃ dassetumāha ‘‘tasmi’’ntiādi. Aḍḍhateyye tasmiṃ ṭhāne ṭhatvāti yojanā, dviratanavidatthipamāṇe tasmiṃ ṭhāne ṭhatvāti attho. Abhihaṭanti upanītaṃ. Tādisanti abhihaṭasadisaṃ, pavāraṇapahonakānaṃ pañcannaṃ bhojanānaṃ aññataranti attho.

    ১২৭৭-৮. আধারকে ৰাপীতি ৰলযাদিপত্তাধারকেপি। ঊরূসূতি দ্ৰিন্নং ঊরূনং মজ্ঝে, অঙ্কেতি অত্থো। আহরিত্ৰাতি অভিহরিত্ৰা। ভত্তং গণ্হাতীতি এত্থ ‘‘ইতো’’তি সেসো, ‘‘ইতো ভত্তং গণ্হা’’তি অনন্তরে নিসিন্নো চ ভাসতীতি যোজনা। ভত্তন্তি উপলক্খণং, পঞ্চসু ভোজনেসু যং কিঞ্চীতি অত্থো। তন্তি তথা গণ্হিতুং ৰুত্তভত্তাদিভোজনং। অভিহারস্স চাতি এত্থ চ-সদ্দো পদপূরণত্থো, এৰকারত্থো ৰা, অভাৰা এৰাতি যোজনা।

    1277-8.Ādhārake vāpīti valayādipattādhārakepi. Ūrūsūti dvinnaṃ ūrūnaṃ majjhe, aṅketi attho. Āharitvāti abhiharitvā. Bhattaṃ gaṇhātīti ettha ‘‘ito’’ti seso, ‘‘ito bhattaṃ gaṇhā’’ti anantare nisinno ca bhāsatīti yojanā. Bhattanti upalakkhaṇaṃ, pañcasu bhojanesu yaṃ kiñcīti attho. Tanti tathā gaṇhituṃ vuttabhattādibhojanaṃ. Abhihārassa cāti ettha ca-saddo padapūraṇattho, evakārattho vā, abhāvā evāti yojanā.

    ১২৭৯. ‘‘ভত্তপচ্ছি’’ন্তি ইদং উপলক্খণং।

    1279.‘‘Bhattapacchi’’nti idaṃ upalakkhaṇaṃ.

    ১২৮০. দীযমানেতি এত্থ ‘‘ভোজনে’’তি সেসো। ইতরোতি হত্থপাসে নিসিন্নো। অভিহারঙ্গস্স অভাৰা সো ন পৰারিতোতি।

    1280.Dīyamāneti ettha ‘‘bhojane’’ti seso. Itaroti hatthapāse nisinno. Abhihāraṅgassa abhāvā so na pavāritoti.

    ১২৮১. পটিক্খেপঙ্গে ৰিনিচ্ছযং দস্সেতুমাহ ‘‘কাযেনা’’তিআদি। ৰাচাভিহারস্স অনঙ্গত্তা আহ ‘‘কাযেনাভিহট’’ন্তি। যথাহ ‘‘ৰাচায অভিহটং পটিক্খিপতো পৰারণা নত্থী’’তি (পাচি॰ অট্ঠ॰ ২৩৮-২৩৯)। অভিহটভোজনং পটিক্খিপিতুং অঙ্গুলিযো ৰা হত্থং ৰা হত্থগতস্স কস্সচি চলনাদিং যং কঞ্চি কাযৰিকারং করোন্তো, ভমুং উক্খিপন্তো, কুজ্ঝিত্ৰা ওলোকেন্তো ৰা কাযেন পটিক্খিপতীতি ৰুচ্চতি। ‘‘অল’’ন্তি ৰা ‘‘ন গণ্হামী’’তি ৰা ‘‘আগমেহী’’তি ৰা ‘‘অধিৰাসেহী’’তি ৰা ‘‘মা আকিরা’’তি ৰা ‘‘অপগচ্ছাহী’’তি ৰা এৰমাদিকং ৰদন্তো ৰাচায পটিক্খিপতীতি ৰুচ্চতি।

    1281. Paṭikkhepaṅge vinicchayaṃ dassetumāha ‘‘kāyenā’’tiādi. Vācābhihārassa anaṅgattā āha ‘‘kāyenābhihaṭa’’nti. Yathāha ‘‘vācāya abhihaṭaṃ paṭikkhipato pavāraṇā natthī’’ti (pāci. aṭṭha. 238-239). Abhihaṭabhojanaṃ paṭikkhipituṃ aṅguliyo vā hatthaṃ vā hatthagatassa kassaci calanādiṃ yaṃ kañci kāyavikāraṃ karonto, bhamuṃ ukkhipanto, kujjhitvā olokento vā kāyena paṭikkhipatīti vuccati. ‘‘Ala’’nti vā ‘‘na gaṇhāmī’’ti vā ‘‘āgamehī’’ti vā ‘‘adhivāsehī’’ti vā ‘‘mā ākirā’’ti vā ‘‘apagacchāhī’’ti vā evamādikaṃ vadanto vācāya paṭikkhipatīti vuccati.

    ১২৮২-৩. আকিরাতি এত্থাপি ‘‘ইতি চা’’তি যোজেতব্বং। এৰং ৰদন্তস্স নিৰারেতুকামতাচিত্তে সতিপি নিৰারণৰচনেন হোন্তং পৰারণং আকিরাতিআদিৰিধিৰচনে ন হোতীতি আহ ‘‘ন পন’ন্তি পৰারণা’’তি। পৰারণা পন ন অত্থীতি যোজনা।

    1282-3.Ākirāti etthāpi ‘‘iti cā’’ti yojetabbaṃ. Evaṃ vadantassa nivāretukāmatācitte satipi nivāraṇavacanena hontaṃ pavāraṇaṃ ākirātiādividhivacane na hotīti āha ‘‘na pana’nti pavāraṇā’’ti. Pavāraṇā pana na atthīti yojanā.

    ১২৮৪. ‘‘রসং গণ্হথা’’তি ৰদেতি সম্বন্ধো। তং সুত্ৰাতি তং ৰচনং সুত্ৰা।

    1284. ‘‘Rasaṃ gaṇhathā’’ti vadeti sambandho. Taṃ sutvāti taṃ vacanaṃ sutvā.

    ১২৮৫. ‘‘সার’’ন্তি ইদং ৰণ্ণভণনমত্তং। ‘‘ইদ’’ন্তি সামঞ্ঞেন মচ্ছমংসং ৰদতি, পৰারণঙ্গং হোতি। মচ্ছরসং মংসরসন্তি এত্থ দ্ৰন্দসমাসস্সপি সম্ভৰতো ‘‘মচ্ছং, মংসং গণ্হা’’তি চ ৰুত্তং হোতি, তঞ্চ অঙ্গং হোতি।

    1285.‘‘Sāra’’nti idaṃ vaṇṇabhaṇanamattaṃ. ‘‘Ida’’nti sāmaññena macchamaṃsaṃ vadati, pavāraṇaṅgaṃ hoti. Maccharasaṃ maṃsarasanti ettha dvandasamāsassapi sambhavato ‘‘macchaṃ, maṃsaṃ gaṇhā’’ti ca vuttaṃ hoti, tañca aṅgaṃ hoti.

    ১২৮৬. ‘‘রসং গণ্হা’’তি ৰুত্তে পনস্স ৰিকপ্পস্স অভাৰা পৰারণস্স অঙ্গং ন হোতি। তেনেৰাহ ‘‘অত্থি চ মংসং চে’’তি।

    1286. ‘‘Rasaṃ gaṇhā’’ti vutte panassa vikappassa abhāvā pavāraṇassa aṅgaṃ na hoti. Tenevāha ‘‘atthi ca maṃsaṃ ce’’ti.

    ১২৮৭. মুহুত্তং আগমেহীতি কঞ্চি কালং ওলোকেহি।

    1287.Muhuttaṃāgamehīti kañci kālaṃ olokehi.

    ১২৮৮. পনসাদীহীতি আদি-সদ্দেন ৰেত্তঙ্গাদীনং গহণং।

    1288.Panasādīhīti ādi-saddena vettaṅgādīnaṃ gahaṇaṃ.

    ১২৯০. মচ্ছসূপং মংসসূপন্তি এত্থ সমাসৰিকপ্পা ‘‘মচ্ছরসং মংসরস’’ন্তি এত্থ ৰিয দট্ঠব্বা।

    1290.Macchasūpaṃ maṃsasūpanti ettha samāsavikappā ‘‘maccharasaṃ maṃsarasa’’nti ettha viya daṭṭhabbā.

    ১২৯১. করম্বকন্তি মচ্ছমংসেন ৰা অঞ্ঞেন ৰা মিস্সস্সেৰ সূপৰিসেসস্স নামং। তেনেৰ চ ‘‘মংসকরম্বকং গণ্হথ, মচ্ছকরম্বকং গণ্হথা’’তি ৰুত্তে নিসেধেন পৰারণা হোতি, ‘‘করম্বকং গণ্হথা’’তি ৰুত্তে অনিযতৰচনত্তা ন হোতি। কল়ীরসূপাদীহি সমানৰিনিচ্ছযভাৰং দস্সেতুমাহ ‘‘এসেৰ নযো ৰুত্তো’’তি।

    1291.Karambakanti macchamaṃsena vā aññena vā missasseva sūpavisesassa nāmaṃ. Teneva ca ‘‘maṃsakarambakaṃ gaṇhatha, macchakarambakaṃ gaṇhathā’’ti vutte nisedhena pavāraṇā hoti, ‘‘karambakaṃ gaṇhathā’’ti vutte aniyatavacanattā na hoti. Kaḷīrasūpādīhi samānavinicchayabhāvaṃ dassetumāha ‘‘eseva nayo vutto’’ti.

    ১২৯২. ৰুত্তস্মিন্তি ৰুত্তে।

    1292.Vuttasminti vutte.

    ১২৯৩. যেনাতি ভত্তেন। আপুচ্ছিতোতি ‘‘গণ্হথা’’তি ৰুত্তো। তস্স ভত্তস্স। অত্থিতায যাগুযা ৰিজ্জমানত্তা। ইতি কারণন্তি ইদং পৰারণকারণং।

    1293.Yenāti bhattena. Āpucchitoti ‘‘gaṇhathā’’ti vutto. Tassa bhattassa. Atthitāya yāguyā vijjamānattā. Iti kāraṇanti idaṃ pavāraṇakāraṇaṃ.

    ১২৯৪. ‘‘যাগুমিস্সকং গণ্হা’’তি ৰুত্তে সা যাগু তত্থ তস্মিং অভিহটে ভাজনে পক্খিত্তভত্তেন সমা ৰা বহুতরা ৰা চে হোতি, সো এৰং ৰত্ৰা অভিহটং পটিক্খেপং ভিক্খু ন পৰারেতি কিরাতি যোজনা। কিরাতি অরুচিং সূচেতি। তেনেৰ ৰক্খতি ‘‘কারণং পন দুদ্দস’’ন্তি।

    1294. ‘‘Yāgumissakaṃ gaṇhā’’ti vutte sā yāgu tattha tasmiṃ abhihaṭe bhājane pakkhittabhattena samā vā bahutarā vā ce hoti, so evaṃ vatvā abhihaṭaṃ paṭikkhepaṃ bhikkhu na pavāreti kirāti yojanā. Kirāti aruciṃ sūceti. Teneva vakkhati ‘‘kāraṇaṃ pana duddasa’’nti.

    ১২৯৫. সব্বত্থাতি সব্বঅট্ঠকথাসু।

    1295.Sabbatthāti sabbaaṭṭhakathāsu.

    ১২৯৬. ৰিসুং কত্ৰাতি একসিত্থম্পি যথা ন হোতি, তথা রসং ৰা খীরং ৰা ভত্ততো ৰিযোজেত্ৰা।

    1296.Visuṃ katvāti ekasitthampi yathā na hoti, tathā rasaṃ vā khīraṃ vā bhattato viyojetvā.

    ১২৯৭. গচ্ছন্তেনেৰাতি যাৰ ভোজননিট্ঠানং, তাৰ গচ্ছন্তেনেৰ। যথাহ ‘‘গচ্ছন্তেন নদিপূরং পত্তেনপি অট্ঠত্ৰা নদিতীরে গুম্বং পরিক্খিপিত্ৰা ৰিচরন্তেন নাৰং ৰা সেতুং ৰা আরুল়্হেন অট্ঠত্ৰা ৰট্টেত্ৰা ৰিচরন্তেনা’’তি।

    1297.Gacchantenevāti yāva bhojananiṭṭhānaṃ, tāva gacchanteneva. Yathāha ‘‘gacchantena nadipūraṃ pattenapi aṭṭhatvā naditīre gumbaṃ parikkhipitvā vicarantena nāvaṃ vā setuṃ vā āruḷhena aṭṭhatvā vaṭṭetvā vicarantenā’’ti.

    ১২৯৮. সোতি গচ্ছন্তো। ততোতি ঠানতো, গমনইরিযাপথস্স ৰিকোপিতত্তাতি অধিপ্পাযো।

    1298.Soti gacchanto. Tatoti ṭhānato, gamanairiyāpathassa vikopitattāti adhippāyo.

    ১২৯৯. আসনং অৰিচালেত্ৰাতি নিসজ্জাৰসেন ফুট্ঠট্ঠানং অচালেত্ৰা, অনুট্ঠহিত্ৰাতি ৰুত্তং হোতি। ‘‘অদিন্নাদানে ৰিয ঠানাচাৰনং গহেতব্ব’’ন্তি গণ্ঠিপদে ৰুত্তং।

    1299.Āsanaṃavicāletvāti nisajjāvasena phuṭṭhaṭṭhānaṃ acāletvā, anuṭṭhahitvāti vuttaṃ hoti. ‘‘Adinnādāne viya ṭhānācāvanaṃ gahetabba’’nti gaṇṭhipade vuttaṃ.

    ১৩০০. ততোতি পৰারিতকালতো উদ্ধং, ততো নিসিন্নট্ঠানতো ৰা। ইতো, এত্তো ৰা। ঈসকম্পি সংসরিতুন্তি নিসিন্নট্ঠানতো ইতো চিতো চ থোকম্পি সংসরিতুং, অপগন্তুন্তি অত্থো।

    1300.Tatoti pavāritakālato uddhaṃ, tato nisinnaṭṭhānato vā. Ito, etto vā. Īsakampi saṃsaritunti nisinnaṭṭhānato ito cito ca thokampi saṃsarituṃ, apagantunti attho.

    ১৩০১. সব্বত্থাতি পীঠকাদিসংহারিমে সব্বস্মিং আসনে। ‘‘ৰিনযঞ্ঞুনা’’তি ইমিনা ‘‘সচে পন নং সহ মঞ্চেন উক্খিপিত্ৰা অঞ্ঞত্র নেন্তি, ৰট্টতী’’তি (পাচি॰ অট্ঠ॰ ২৩৮-২৩৯) অট্ঠকথাযং ‘‘পীঠকাদীসুপি অযমেৰ ৰিনিচ্ছযো’’তি ৰুত্তভাৰং জানন্তেনাতি ৰুত্তং হোতি।

    1301.Sabbatthāti pīṭhakādisaṃhārime sabbasmiṃ āsane. ‘‘Vinayaññunā’’ti iminā ‘‘sace pana naṃ saha mañcena ukkhipitvā aññatra nenti, vaṭṭatī’’ti (pāci. aṭṭha. 238-239) aṭṭhakathāyaṃ ‘‘pīṭhakādīsupi ayameva vinicchayo’’ti vuttabhāvaṃ jānantenāti vuttaṃ hoti.

    ১৩০২. নিপজ্জিত্ৰাতি এত্থ ‘‘পরিৰত্তন্তেন যেন পস্সেন নিপন্নো, তস্স ঠানং নাতিক্কমেতব্ব’’ন্তি ৰচনতো পুব্বসযিতট্ঠানং অৰিজহিত্ৰা সযিত্ৰাযেৰাতি অত্থো। তথেৰাতি উক্কুটিকো হুত্ৰাৰাতি ৰুত্তং হোতি। ‘‘তস্স পন হেট্ঠা পলালপীঠং ৰা কিঞ্চি ৰা নিসীদনকং দাতব্ব’’ন্তি (পাচি॰ অট্ঠ॰ ২৩৮-২৩৯) অট্ঠকথাযং ৰুত্তং।

    1302.Nipajjitvāti ettha ‘‘parivattantena yena passena nipanno, tassa ṭhānaṃ nātikkametabba’’nti vacanato pubbasayitaṭṭhānaṃ avijahitvā sayitvāyevāti attho. Tathevāti ukkuṭiko hutvāvāti vuttaṃ hoti. ‘‘Tassa pana heṭṭhā palālapīṭhaṃ vā kiñci vā nisīdanakaṃ dātabba’’nti (pāci. aṭṭha. 238-239) aṭṭhakathāyaṃ vuttaṃ.

    ১৩০৩. অতিরিত্তং করোন্তেন সিক্খুনা ভাজনং ওনমেত্ৰান ভোজনে দস্সিতে অথ ‘‘অলমেতং সব্ব’’ন্তি ৰত্তব্বন্তি যোজনা। তত্থ অতিরিত্তং করোন্তেনাতি ‘‘অতিরিত্তং নাম কপ্পিযকতং হোতি, পটিগ্গহিতকতং হোতি, উচ্চারিতকতং হোতি, হত্থপাসে কতং হোতি, ভুত্তাৰিনা কতং হোতি, ভুত্তাৰিনা পৰারিতেন আসনা অৰুট্ঠিতেন কতং হোতি, ‘অলমেতং সব্ব’ন্তি ৰুত্তং হোতি, গিলানাতিরিত্তং হোতী’’তি (পাচি॰ ২৩৯) ৰুত্তেসু অট্ঠসু আকারেসু অন্তং ৰিনা পুরিমেহি সত্তহি ৰিনযকম্মাকারেহি অতিরিত্তং করোন্তেনাতি ৰুত্তং হোতি। যথাহ ‘‘ইমেহি সত্তহি ৰিনযকম্মাকারেহি যং অতিরিত্ত’’ন্তিআদি (পাচি॰ অট্ঠ॰ ২৩৮-২৩৯)।

    1303. Atirittaṃ karontena sikkhunā bhājanaṃ onametvāna bhojane dassite atha ‘‘alametaṃ sabba’’nti vattabbanti yojanā. Tattha atirittaṃ karontenāti ‘‘atirittaṃ nāma kappiyakataṃ hoti, paṭiggahitakataṃ hoti, uccāritakataṃ hoti, hatthapāse kataṃ hoti, bhuttāvinā kataṃ hoti, bhuttāvinā pavāritena āsanā avuṭṭhitena kataṃ hoti, ‘alametaṃ sabba’nti vuttaṃ hoti, gilānātirittaṃ hotī’’ti (pāci. 239) vuttesu aṭṭhasu ākāresu antaṃ vinā purimehi sattahi vinayakammākārehi atirittaṃ karontenāti vuttaṃ hoti. Yathāha ‘‘imehi sattahi vinayakammākārehi yaṃ atiritta’’ntiādi (pāci. aṭṭha. 238-239).

    ইধ অতিরিত্তং কাতুং অভিহটভোজনং কপ্পিযঞ্চ নাম হোতি, কপ্পিযকতেন সিঙ্গিৰেরলসুণাদিৰত্থুনা যুত্ততায চ অকপ্পিযমংসাভাৰেন চ কুলদূসনাদীহি অনুপ্পন্নভাৰেন চ কতঞ্চ নাম হোতি। ‘‘অলমেতং সব্ব’’ন্তি অতিরিত্তকতভাৰতো এৰং কপ্পিযঞ্চ তং কতং চাতি কপ্পিযকতন্তি ৰুত্তং হোতি। এৰমুপরিপি কত-সদ্দস্স অত্থো চ সমাসৰিগ্গহো চ ৰেদিতব্বো । অৰসিট্ঠপদেসু ভিক্খুনা পটিগ্গহিতং পটিগ্গহিতং নাম। তং কারাপেত্ৰা আগতেন ভিক্খুনা থোকং উচ্চারেত্ৰা, ওতারেত্ৰা ৰা দস্সিতং উচ্চারিতকতং নাম। কপ্পিযং কারাপেতুমাগতস্স অড্ঢতেয্যহত্থপ্পমাণহত্থপাসব্ভন্তরগতেন অতিরিত্তকতং ‘‘হত্থপাসে কত’’ন্তি ৰুচ্চতি। অন্তমসো পৰারণজনকং যং কিঞ্চি ভোজনং কুসগ্গেনাপি গহেত্ৰা ভুত্তত্তা ভুত্তাৰিনা। যথাহ ‘‘পঞ্চন্নং ভোজনানং অঞ্ঞতরং ভোজনং অন্তমসো কুসগ্গেনাপি ভুত্তং হোতী’’তি। ভুঞ্জন্তো পৰারিতো হুত্ৰা যো আসনং ন কোপেতি, সো ভুত্তাৰী পৰারিতো ‘‘আসনা অৰুট্ঠিতো’’তি ৰুচ্চতি, তেন কতং ‘‘ভুত্তাৰিনা…পে॰… অৰুট্ঠিতেন কত’’ন্তি ৰুত্তং। ‘‘অলমেতং সব্ব’’ন্তি ৰচীভেদং কত্ৰা ৰুত্তং ‘‘অলমেতং সব্বন্তি ৰুত্তং হোতী’’তি দস্সিতং। অযং সত্তৰিধো ৰিনযকম্মাকারো নাম।

    Idha atirittaṃ kātuṃ abhihaṭabhojanaṃ kappiyañca nāma hoti, kappiyakatena siṅgiveralasuṇādivatthunā yuttatāya ca akappiyamaṃsābhāvena ca kuladūsanādīhi anuppannabhāvena ca katañca nāma hoti. ‘‘Alametaṃ sabba’’nti atirittakatabhāvato evaṃ kappiyañca taṃ kataṃ cāti kappiyakatanti vuttaṃ hoti. Evamuparipi kata-saddassa attho ca samāsaviggaho ca veditabbo . Avasiṭṭhapadesu bhikkhunā paṭiggahitaṃ paṭiggahitaṃ nāma. Taṃ kārāpetvā āgatena bhikkhunā thokaṃ uccāretvā, otāretvā vā dassitaṃ uccāritakataṃ nāma. Kappiyaṃ kārāpetumāgatassa aḍḍhateyyahatthappamāṇahatthapāsabbhantaragatena atirittakataṃ ‘‘hatthapāse kata’’nti vuccati. Antamaso pavāraṇajanakaṃ yaṃ kiñci bhojanaṃ kusaggenāpi gahetvā bhuttattā bhuttāvinā. Yathāha ‘‘pañcannaṃ bhojanānaṃ aññataraṃ bhojanaṃ antamaso kusaggenāpi bhuttaṃ hotī’’ti. Bhuñjanto pavārito hutvā yo āsanaṃ na kopeti, so bhuttāvī pavārito ‘‘āsanā avuṭṭhito’’ti vuccati, tena kataṃ ‘‘bhuttāvinā…pe… avuṭṭhitena kata’’nti vuttaṃ. ‘‘Alametaṃ sabba’’nti vacībhedaṃ katvā vuttaṃ ‘‘alametaṃ sabbanti vuttaṃ hotī’’ti dassitaṃ. Ayaṃ sattavidho vinayakammākāro nāma.

    গিলানাতিরিত্তকং পন ইমিস্সা গাথায অৰুত্তম্পি অনতিরিত্তসন্দস্সনত্থং ৰক্খমানায ‘‘কত’’ন্তিআদিগাথায ‘‘ন গিলানাতিরিত্তঞ্চা’’তি ইমস্স ৰিপরিযাযতো ৰেদিতব্বং। গিলানতো অতিরিত্তং, তস্স অঞ্ঞদিনেসু ভুঞ্জনত্থায উপট্ঠাপিতম্পি গিলানাতিরিত্তং নাম।

    Gilānātirittakaṃ pana imissā gāthāya avuttampi anatirittasandassanatthaṃ vakkhamānāya ‘‘kata’’ntiādigāthāya ‘‘na gilānātirittañcā’’ti imassa vipariyāyato veditabbaṃ. Gilānato atirittaṃ, tassa aññadinesu bhuñjanatthāya upaṭṭhāpitampi gilānātirittaṃ nāma.

    ‘‘তেন ভিক্খুনা’’তি ইমিনা ‘‘ভুত্তাৰিনা’’তি চ ‘‘ভুত্তাৰিনা পৰারিতেন আসনা ৰুট্ঠিতেনা’’তি চ ৰুত্তপ্পকারেন ৰিসিট্ঠং তেনেৰ পাকটং ভিক্খুং পরামসতি, পৰারণজনকানং পঞ্চন্নং ভোজনানং অঞ্ঞতরং অপ্পমত্তকম্পি ভুত্তাৰিনা, ভুত্তাৰী পৰারিতোপি হুত্ৰা আসনা অৰুট্ঠিতেন ৰা ভিক্খুনাতি ৰুত্তং হোতি। ওনমিত্ৰান ভাজনেতি এত্থ ‘‘দস্সিতে ভোজনে’’তি সেসো, ‘‘অথা’’তি ইমিনা সম্বন্ধো। কপ্পিযকরণারহানি সিঙ্গিৰেরাদীনি কপ্পিযং কারেত্ৰা পটিগ্গহাপেত্ৰা আগন্ত্ৰা হত্থপাসব্ভন্তরে পত্ৰা অতিরিত্তং কারাপেন্তেন ভিক্খুনা ভাজনং থোকং ওনামেত্ৰা উচ্চারেত্ৰা দস্সিতকালানন্তরাতি ৰুত্তং হোতি। উত্তরি কাতব্বং দস্সেতুমাহ ‘‘অল’’ন্তিআদি।

    ‘‘Tena bhikkhunā’’ti iminā ‘‘bhuttāvinā’’ti ca ‘‘bhuttāvinā pavāritena āsanā vuṭṭhitenā’’ti ca vuttappakārena visiṭṭhaṃ teneva pākaṭaṃ bhikkhuṃ parāmasati, pavāraṇajanakānaṃ pañcannaṃ bhojanānaṃ aññataraṃ appamattakampi bhuttāvinā, bhuttāvī pavāritopi hutvā āsanā avuṭṭhitena vā bhikkhunāti vuttaṃ hoti. Onamitvāna bhājaneti ettha ‘‘dassite bhojane’’ti seso, ‘‘athā’’ti iminā sambandho. Kappiyakaraṇārahāni siṅgiverādīni kappiyaṃ kāretvā paṭiggahāpetvā āgantvā hatthapāsabbhantare patvā atirittaṃ kārāpentena bhikkhunā bhājanaṃ thokaṃ onāmetvā uccāretvā dassitakālānantarāti vuttaṃ hoti. Uttari kātabbaṃ dassetumāha ‘‘ala’’ntiādi.

    এত্তাৰতা ‘‘তেন ভিক্খুনা’’তি ইমিনা ‘‘ভুত্তাৰিনা কতং, ভুত্তাৰিনা পৰারিতেন আসনা অৰুট্ঠিতেন কত’’ন্তি অঙ্গদ্ৰযং সঙ্গহিতং। ‘‘ওনমেত্ৰান ভাজন’’ন্তি ইমিনা ‘‘উচ্চারিতকতং হোতী’’তি ইদং সঙ্গহিতং। ‘‘কপ্পিযকতং, পটিগ্গহিতকতং, হত্থপাসেকত’’ন্তি ইদং তযং অনন্তরিযৰাচিনা অথ-সদ্দেন সঙ্গহিতং। ‘‘অলমেতং সব্ব’’ন্তি ইদং পনেত্থ সরূপেনেৰ দস্সিতন্তি দট্ঠব্বং।

    Ettāvatā ‘‘tena bhikkhunā’’ti iminā ‘‘bhuttāvinā kataṃ, bhuttāvinā pavāritena āsanā avuṭṭhitena kata’’nti aṅgadvayaṃ saṅgahitaṃ. ‘‘Onametvāna bhājana’’nti iminā ‘‘uccāritakataṃ hotī’’ti idaṃ saṅgahitaṃ. ‘‘Kappiyakataṃ, paṭiggahitakataṃ, hatthapāsekata’’nti idaṃ tayaṃ anantariyavācinā atha-saddena saṅgahitaṃ. ‘‘Alametaṃ sabba’’nti idaṃ panettha sarūpeneva dassitanti daṭṭhabbaṃ.

    ১৩০৪. পত্তে ঠিতভোজনমেৰ অতিরিত্তং কাতব্বন্তি নত্থি, পচ্ছিআদীসু যত্থ কত্থচি ভাজনে ঠিতম্পি কাতব্বন্তি দস্সেতুমাহ ‘‘কপ্পিযং পনা’’তি। কুণ্ডেতি ভণ্ডুক্খলিযং। ভাজনেতি যং কিঞ্চি ভাজনং গহিতং।

    1304. Patte ṭhitabhojanameva atirittaṃ kātabbanti natthi, pacchiādīsu yattha katthaci bhājane ṭhitampi kātabbanti dassetumāha ‘‘kappiyaṃ panā’’ti. Kuṇḍeti bhaṇḍukkhaliyaṃ. Bhājaneti yaṃ kiñci bhājanaṃ gahitaṃ.

    ১৩০৫. এতন্তি অতিরিত্তকতং এতং ভোজনং। তং একমেৰ ঠপেত্ৰাতি যোজনা। ‘‘ৰট্টতেৰা’’তি ৰুত্তেপি অব্ভঙ্গাদীনমত্থাযাতি গণ্হেয্যুন্তি আহ ‘‘ভুঞ্জিতব্ব’’ন্তি, তমেকং ৰিনা পরেহি পরিভুঞ্জিতব্বন্তি অত্থো।

    1305.Etanti atirittakataṃ etaṃ bhojanaṃ. Taṃ ekameva ṭhapetvāti yojanā. ‘‘Vaṭṭatevā’’ti vuttepi abbhaṅgādīnamatthāyāti gaṇheyyunti āha ‘‘bhuñjitabba’’nti, tamekaṃ vinā parehi paribhuñjitabbanti attho.

    ১৩০৬-৭. কপ্পিযং কারেত্ৰাতি অতিরিত্তং কারেত্ৰা। আকিরন্তি চেতি যদি পক্খিপন্তি। পুন তথা অতিরিত্তং কারেত্ৰা ভুঞ্জিতব্বন্তি যোজনা।

    1306-7.Kappiyaṃ kāretvāti atirittaṃ kāretvā. Ākiranti ceti yadi pakkhipanti. Puna tathā atirittaṃ kāretvā bhuñjitabbanti yojanā.

    তং কেন অতিরিত্তং কাতব্বন্তি আহ ‘‘যেনা’’তিআদি। তন্তি অতিরিত্তকতং ভোজনং। যেন অকতন্তি যেন ভিক্খুনা পঠমং অতিরিত্তং ন কতং, তেন কাতব্বন্তি সম্বন্ধো। যথাহ ‘‘যেন অকতন্তি অঞ্ঞেন ভিক্খুনা যেন পঠমং ন কতং, তেন কাতব্ব’’ন্তি (পাচি॰ অট্ঠ॰ ২৩৮-২৩৯)। যং ৰা অকতং, তং ৰিসুং তেন ৰা কাতব্বন্তি যোজনা। যং ৰা অকতন্তি তস্মিং অতিরিত্তকতভোজনে অপক্খিত্তং যং ভোজনং অতিরিত্তং ন কতং। তং ৰিসুং তেন ৰা কাতব্বন্তি পচ্ছা পক্খিত্তং ভোজনং অতিরিত্তং কতেন যথা অমিস্সং হোতি, তথা অঞ্ঞস্স ভাজনস্স গহণৰসেন ৰিসুং কারেত্ৰা তেন পঠমং কতাতিরিত্তেনাপি অতিরিত্তং কাতব্বং। যথাহ – ‘‘যঞ্চ অকতন্তি যেন পঠমং কপ্পিযং কতং, তেনাপি যং অকতং, তং কাতব্বং। পঠমভাজনে পন কাতুং ন লব্ভতি। তত্থ হি করিযমানং পঠমং কতেন সদ্ধিং কতং হোতি, তস্মা অঞ্ঞস্মিং ভাজনে কাতুং ৰট্টতীতি অধিপ্পাযো’’তি।

    Taṃ kena atirittaṃ kātabbanti āha ‘‘yenā’’tiādi. Tanti atirittakataṃ bhojanaṃ. Yena akatanti yena bhikkhunā paṭhamaṃ atirittaṃ na kataṃ, tena kātabbanti sambandho. Yathāha ‘‘yena akatanti aññena bhikkhunā yena paṭhamaṃ na kataṃ, tena kātabba’’nti (pāci. aṭṭha. 238-239). Yaṃ vā akataṃ, taṃ visuṃ tena vā kātabbanti yojanā. Yaṃ vā akatanti tasmiṃ atirittakatabhojane apakkhittaṃ yaṃ bhojanaṃ atirittaṃ na kataṃ. Taṃ visuṃ tena vā kātabbanti pacchā pakkhittaṃ bhojanaṃ atirittaṃ katena yathā amissaṃ hoti, tathā aññassa bhājanassa gahaṇavasena visuṃ kāretvā tena paṭhamaṃ katātirittenāpi atirittaṃ kātabbaṃ. Yathāha – ‘‘yañca akatanti yena paṭhamaṃ kappiyaṃ kataṃ, tenāpi yaṃ akataṃ, taṃ kātabbaṃ. Paṭhamabhājane pana kātuṃ na labbhati. Tattha hi kariyamānaṃ paṭhamaṃ katena saddhiṃ kataṃ hoti, tasmā aññasmiṃ bhājane kātuṃ vaṭṭatīti adhippāyo’’ti.

    ১৩০৮. অকপ্পিযাদীহি সত্তহীতি ‘‘অনতিরিত্তং নাম অকপ্পিযকতং হোতি, অপ্পটিগ্গহিতকতং হোতি, অনুচ্চারিতকতং হোতি, অহত্থপাসে কতং হোতি, অভুত্তাৰিনা কতং হোতি, ভুত্তাৰিনা চ পৰারিতেন আসনা ৰুট্ঠিতেন কতং হোতি, ‘অলমেতং সব্ব’ন্তি অৰুত্তং হোতী’’তি (পাচি॰ ২৩৯) ৰুত্তেহি সত্তহি ৰিনযকম্মাকারেহি। অতিরিত্তং কতন্তি যোজনা। ‘‘হোতি অনতিরিত্তক’’ন্তি পদচ্ছেদো।

    1308.Akappiyādīhisattahīti ‘‘anatirittaṃ nāma akappiyakataṃ hoti, appaṭiggahitakataṃ hoti, anuccāritakataṃ hoti, ahatthapāse kataṃ hoti, abhuttāvinā kataṃ hoti, bhuttāvinā ca pavāritena āsanā vuṭṭhitena kataṃ hoti, ‘alametaṃ sabba’nti avuttaṃ hotī’’ti (pāci. 239) vuttehi sattahi vinayakammākārehi. Atirittaṃ katanti yojanā. ‘‘Hoti anatirittaka’’nti padacchedo.

    ১৩০৯. উপকট্ঠৰেলাযপি অতিরিত্তং করোন্তেন ‘‘অহং পাতোৰ ভুঞ্জি’’ন্তি ৰা ‘‘থোকং পরিভুঞ্জি’’ন্তি ৰা অচিন্তেত্ৰা কাতব্বন্তি দস্সেতুমাহ ‘‘যোপী’’তিআদি। উপকট্ঠূপনীতম্পীতি উপকট্ঠৰেলায উপনীতম্পি ভোজনং।

    1309. Upakaṭṭhavelāyapi atirittaṃ karontena ‘‘ahaṃ pātova bhuñji’’nti vā ‘‘thokaṃ paribhuñji’’nti vā acintetvā kātabbanti dassetumāha ‘‘yopī’’tiādi. Upakaṭṭhūpanītampīti upakaṭṭhavelāya upanītampi bhojanaṃ.

    ১৩১০. যামাদিকালিকন্তি যামসত্তাহযাৰজীৰিককালিকং। অনামিস্সন্তি আমিসেন অমিস্সং। তং যামাদিকালিকং পরিভুঞ্জতোতি সম্বন্ধো।

    1310.Yāmādikālikanti yāmasattāhayāvajīvikakālikaṃ. Anāmissanti āmisena amissaṃ. Taṃ yāmādikālikaṃ paribhuñjatoti sambandho.

    ১৩১২. গিলানস্স ভুত্তাতিরিত্তং ৰিয কদাচি ভুঞ্জিস্সতীতি উদ্দিস্স ঠপিতম্পি গিলানাতিরিত্তং নামাতি অট্ঠকথাযং (পাচি॰ অট্ঠ॰ ২৩৮-২৩৯ অত্থতো সমানং) ৰুত্তং। ‘‘ৰিহারাদীসু গিলানস্স পাপুণনকোট্ঠাসম্পি গিলানাতিরিত্তং নামা’’তি ৰদন্তি।

    1312. Gilānassa bhuttātirittaṃ viya kadāci bhuñjissatīti uddissa ṭhapitampi gilānātirittaṃ nāmāti aṭṭhakathāyaṃ (pāci. aṭṭha. 238-239 atthato samānaṃ) vuttaṃ. ‘‘Vihārādīsu gilānassa pāpuṇanakoṭṭhāsampi gilānātirittaṃ nāmā’’ti vadanti.

    ১৩১৩. কথিনেনাতি পঠমকথিনেন।

    1313.Kathinenāti paṭhamakathinena.

    পঠমপৰারণকথাৰণ্ণনা।

    Paṭhamapavāraṇakathāvaṇṇanā.

    ১৩১৪. অনতিরিত্তেনাতি এত্থ ‘‘খাদনীযেন ৰা ভোজনীযেন ৰা’’তি সেসো। এত্থ ‘‘খাদনীযং নাম পঞ্চভোজনানি যামকালিকং সত্তাহকালিকং যাৰজীৰিকং ঠপেত্ৰা অৰসেস’’ন্তি (পাচি॰ ২৩৯) ৰুত্তং পঞ্চভোজনতো অঞ্ঞং সব্বং যাৰকালিকং খাদনীযং নাম। ‘‘ভোজনীযং নাম পঞ্চ ভোজনানি ওদনো কুম্মাসো সত্তু মচ্ছো মংস’’ন্তি (পাচি॰ ২৩৯) ৰুত্তং। এত্থ ৰিনিচ্ছযো অনন্তরসিক্খাপদে ৰুত্তো। পৰারেয্যাতি এত্থ ‘‘অভিহট্ঠু’’ন্তি সেসো। অভিহট্ঠুং পৰারেয্যাতি অভিহরিত্ৰা ‘‘হন্দ ভিক্খু যাৰতকং ইচ্ছসি, তাৰতকং গহেত্ৰা খাদ ৰা ভুঞ্জ ৰা’’তি এৰং পৰারেয্য। ‘‘পৰারিত’’ন্তিপদং ৰুত্তত্থমেৰ। জানন্তি সুত্ৰা ৰা দিস্ৰা ৰা তস্স পৰারিতভাৰং জানন্তো। আসাদনাপেক্খোতি আসাদনং চোদনং মঙ্কুকরণভাৰং অপেক্খমানো। ভুত্তেতি তস্স পযোগেন ইতরেন ভুঞ্জিত্ৰা পরিযোসাপিতে। তস্সাতি যো তস্স পৰারিতভাৰং ঞত্ৰা ‘‘ভুঞ্জা’’তি নিযোজেসি, তস্স।

    1314.Anatirittenāti ettha ‘‘khādanīyena vā bhojanīyena vā’’ti seso. Ettha ‘‘khādanīyaṃ nāma pañcabhojanāni yāmakālikaṃ sattāhakālikaṃ yāvajīvikaṃ ṭhapetvā avasesa’’nti (pāci. 239) vuttaṃ pañcabhojanato aññaṃ sabbaṃ yāvakālikaṃ khādanīyaṃ nāma. ‘‘Bhojanīyaṃ nāma pañca bhojanāni odano kummāso sattu maccho maṃsa’’nti (pāci. 239) vuttaṃ. Ettha vinicchayo anantarasikkhāpade vutto. Pavāreyyāti ettha ‘‘abhihaṭṭhu’’nti seso. Abhihaṭṭhuṃ pavāreyyāti abhiharitvā ‘‘handa bhikkhu yāvatakaṃ icchasi, tāvatakaṃ gahetvā khāda vā bhuñja vā’’ti evaṃ pavāreyya. ‘‘Pavārita’’ntipadaṃ vuttatthameva. Jānanti sutvā vā disvā vā tassa pavāritabhāvaṃ jānanto. Āsādanāpekkhoti āsādanaṃ codanaṃ maṅkukaraṇabhāvaṃ apekkhamāno. Bhutteti tassa payogena itarena bhuñjitvā pariyosāpite. Tassāti yo tassa pavāritabhāvaṃ ñatvā ‘‘bhuñjā’’ti niyojesi, tassa.

    ১৩১৫-৬. একস্স ভুঞ্জনেন অঞ্ঞস্স পাচিত্তি হোতীতি কথমেতন্তি আসঙ্কায তথা ৰুত্তত্তা পরিহরিতুমাহ ‘‘দুক্কটং…পে॰… দস্সিত’’ন্তি। ইতরস্স গহণেতি পৰারিতভিক্খুনো ভুঞ্জনত্থায পটিগ্গহণে। অজ্ঝোহারপযোগেসু চাতি এত্থাপি ‘‘ইতরস্সা’’তি সম্বন্ধো। সব্বং দুক্কটং, পাচিত্তিযঞ্চ। দস্সিতন্তি ‘‘অভিহরতি, আপত্তি দুক্কটস্স। তস্স ৰচনেন ‘খাদিস্সামি ভুঞ্জিস্সামী’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। ভোজনপরিযোসানে আপত্তি পাচিত্তিযস্সা’’তি (পাচি॰ ২৪৪) দেসিতং ভগৰতাতি অত্থো।

    1315-6. Ekassa bhuñjanena aññassa pācitti hotīti kathametanti āsaṅkāya tathā vuttattā pariharitumāha ‘‘dukkaṭaṃ…pe… dassita’’nti. Itarassa gahaṇeti pavāritabhikkhuno bhuñjanatthāya paṭiggahaṇe. Ajjhohārapayogesu cāti etthāpi ‘‘itarassā’’ti sambandho. Sabbaṃ dukkaṭaṃ, pācittiyañca. Dassitanti ‘‘abhiharati, āpatti dukkaṭassa. Tassa vacanena ‘khādissāmi bhuñjissāmī’ti paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Bhojanapariyosāne āpatti pācittiyassā’’ti (pāci. 244) desitaṃ bhagavatāti attho.

    ১৩১৭. উভযত্থাপি ৰিমতিস্সাতি পৰারিতে চ অপৰারিতে চ ৰিমতিস্স। দুক্কটং পরিদীপিতন্তি ‘‘পৰারিতে ৰেমতিকো। অপ্পৰারিতে ৰেমতিকো, আপত্তি দুক্কটস্সা’’তি (পাচি॰ ২৪৫) দেসিতং।

    1317.Ubhayatthāpi vimatissāti pavārite ca apavārite ca vimatissa. Dukkaṭaṃ paridīpitanti ‘‘pavārite vematiko. Appavārite vematiko, āpatti dukkaṭassā’’ti (pāci. 245) desitaṃ.

    ১৩১৮. কারাপেত্ৰাতি এত্থ ‘‘ভুঞ্জাহী’’তি সেসো। অঞ্ঞস্সত্থাযাতি এত্থ ‘‘অভিহরন্তো গচ্ছাহী’’তি সেসো।

    1318.Kārāpetvāti ettha ‘‘bhuñjāhī’’ti seso. Aññassatthāyāti ettha ‘‘abhiharanto gacchāhī’’ti seso.

    ১৩১৯. ওমসৰাদতুল্যাৰাতি ইদং অদিন্নাদানসমুট্ঠানং সন্ধাযাহ।

    1319.Omasavādatulyāvāti idaṃ adinnādānasamuṭṭhānaṃ sandhāyāha.

    দুতিযপৰারণকথাৰণ্ণনা।

    Dutiyapavāraṇakathāvaṇṇanā.

    ১৩২০. খাদনীযং ৰাতি পঞ্চ ভোজনানি চ কালিকত্তযঞ্চ ৰিনা অৰসেসেসু যং কিঞ্চি ৰা। ভোজনীযং ৰাতি পঞ্চসু ভোজনেসু অঞ্ঞতরম্পি। ৰিকালেতি ৰিগতে কালে। কালো নাম অরুণুগ্গমনতো যাৰ মজ্ঝন্তিকা, তদঞ্ঞো ৰিকালো। যথাহ ‘‘ৰিকালো নাম মজ্ঝন্তিকে ৰীতিৰত্তে যাৰ অরুণুগ্গমনা’’তি (পাচি॰ ২৪৯)। ঠিতমজ্ঝন্তিকোপি কালেযেৰ সঙ্গয্হতি। যথাহ ‘‘ঠিতমজ্ঝন্তিকোপি কালসঙ্গহং গচ্ছতি। ততো পট্ঠায পন খাদিতুং ৰা ভুঞ্জিতুং ৰা ন সক্কা, সহসা পিৰিতুং পন সক্কা ভৰেয্য। কুক্কুচ্চকেন পন ন কাতব্বং। কালপরিচ্ছেদজাননত্থঞ্চ কালত্থম্ভো যোজেতব্বো, কালব্ভন্তরেৰ ভত্তকিচ্চং কাতব্ব’’ন্তি (পাচি॰ অট্ঠ॰ ২৪৮-২৪৯)। দোসন্তি পাচিত্তিযং।

    1320.Khādanīyaṃ vāti pañca bhojanāni ca kālikattayañca vinā avasesesu yaṃ kiñci vā. Bhojanīyaṃ vāti pañcasu bhojanesu aññatarampi. Vikāleti vigate kāle. Kālo nāma aruṇuggamanato yāva majjhantikā, tadañño vikālo. Yathāha ‘‘vikālo nāma majjhantike vītivatte yāva aruṇuggamanā’’ti (pāci. 249). Ṭhitamajjhantikopi kāleyeva saṅgayhati. Yathāha ‘‘ṭhitamajjhantikopi kālasaṅgahaṃ gacchati. Tato paṭṭhāya pana khādituṃ vā bhuñjituṃ vā na sakkā, sahasā pivituṃ pana sakkā bhaveyya. Kukkuccakena pana na kātabbaṃ. Kālaparicchedajānanatthañca kālatthambho yojetabbo, kālabbhantareva bhattakiccaṃ kātabba’’nti (pāci. aṭṭha. 248-249). Dosanti pācittiyaṃ.

    ১৩২১. ‘‘খাদনীযং ৰা ভোজনীযং ৰা’’তি এত্থ ভোজনীযস্স পৰারণসিক্খাপদে দস্সিতসরূপত্তা খাদনীযং তাৰ সরূপতো দস্সেতুমাহ ‘‘যমামিসগত’’ন্তিআদি। এত্থাতি এতেসু খাদনীযভোজনীযেসু। যং পন ৰনমূলফলাদিকং আমিসগতং আমিসে যাৰকালিকে পরিযাপন্নং, তং খাদনীযন্তি যোজনা। কালিকেস্ৰসমোহত্থন্তি এত্থ গাথাবন্ধৰসেন ম-কারলোপো, অসম্মোহত্থন্তি ৰুত্তং হোতি। ইদন্তি ৰক্খমানং সন্ধাযাহ।

    1321. ‘‘Khādanīyaṃ vā bhojanīyaṃ vā’’ti ettha bhojanīyassa pavāraṇasikkhāpade dassitasarūpattā khādanīyaṃ tāva sarūpato dassetumāha ‘‘yamāmisagata’’ntiādi. Etthāti etesu khādanīyabhojanīyesu. Yaṃ pana vanamūlaphalādikaṃ āmisagataṃ āmise yāvakālike pariyāpannaṃ, taṃ khādanīyanti yojanā. Kālikesvasamohatthanti ettha gāthābandhavasena ma-kāralopo, asammohatthanti vuttaṃ hoti. Idanti vakkhamānaṃ sandhāyāha.

    ১৩২২. মূলন্তি যং কিঞ্চি রুক্খলতানং মূলং। কন্দন্তি রুক্খলতানমেৰ কন্দং। মুল়ালন্তি পদুমগচ্ছমূলকন্দং। মত্থকন্তি তালনাল়িকেরাদীনং মত্থকং, ৰেল়ুকল়ীরপল্লৰঙ্কুরানঞ্চ এত্থেৰ সঙ্গহো। খন্ধকন্তি উচ্ছুআদিখন্ধকং। তচন্তি ছল্লি। পত্তন্তি পণ্ণং। পুপ্ফন্তি কুসুমং। ফলন্তি রুক্খলতাদীনং ফলং। অট্ঠীতি রুক্খলতাদিবীজং। পিট্ঠন্তি ধঞ্ঞাদিপিট্ঠং। নিয্যাসন্তি সিলেসং। ‘‘খাদনীয’’ন্তি সব্বত্থ পকরণতো লব্ভতি।

    1322.Mūlanti yaṃ kiñci rukkhalatānaṃ mūlaṃ. Kandanti rukkhalatānameva kandaṃ. Muḷālanti padumagacchamūlakandaṃ. Matthakanti tālanāḷikerādīnaṃ matthakaṃ, veḷukaḷīrapallavaṅkurānañca ettheva saṅgaho. Khandhakanti ucchuādikhandhakaṃ. Tacanti challi. Pattanti paṇṇaṃ. Pupphanti kusumaṃ. Phalanti rukkhalatādīnaṃ phalaṃ. Aṭṭhīti rukkhalatādibījaṃ. Piṭṭhanti dhaññādipiṭṭhaṃ. Niyyāsanti silesaṃ. ‘‘Khādanīya’’nti sabbattha pakaraṇato labbhati.

    ১৩২৩. এৰং খাদনীযানং মাতিকং নিক্খিপিত্ৰা তে সরূপতো দস্সেতুমাহ ‘‘মূলখাদনীযাদীন’’ন্তিআদি। তত্থ রুক্খমূলমেৰ খাদনীযং, তং আদি যেসন্তি ৰিগ্গহো। মুখমত্তনিদস্সনং নিবোধথাতি এত্থ ‘‘মযা করিযমান’’ন্তি সেসো। মুখমত্তন্তি পৰেসদ্ৰারমত্তং, নিরৰসেসতো দস্সনে পপঞ্চভীরুকানং পুব্বে ভযং হোতীতি সঙ্খেপতো খাদনীযানি দস্সিস্সন্তি ৰুত্তং হোতি। তথা দস্সনে পযোজনমাহ ‘‘নামত্থেসু ভিক্খূনং পাটৰত্থাযা’’তি, মূলখাদনীযাদীনং নামেসু চ তদত্থেসু চ ভিক্খূনং পাটৰুপ্পাদনত্থন্তি অত্থো।

    1323. Evaṃ khādanīyānaṃ mātikaṃ nikkhipitvā te sarūpato dassetumāha ‘‘mūlakhādanīyādīna’’ntiādi. Tattha rukkhamūlameva khādanīyaṃ, taṃ ādi yesanti viggaho. Mukhamattanidassanaṃ nibodhathāti ettha ‘‘mayā kariyamāna’’nti seso. Mukhamattanti pavesadvāramattaṃ, niravasesato dassane papañcabhīrukānaṃ pubbe bhayaṃ hotīti saṅkhepato khādanīyāni dassissanti vuttaṃ hoti. Tathā dassane payojanamāha ‘‘nāmatthesu bhikkhūnaṃ pāṭavatthāyā’’ti, mūlakhādanīyādīnaṃ nāmesu ca tadatthesu ca bhikkhūnaṃ pāṭavuppādanatthanti attho.

    ১৩২৪-৫. মূলকমূলাদীনি উপদেসতোযেৰ ৰেদিতব্বানি। ন হি তানি পরিযাযন্তরেন ৰুচ্চমানানিপি সক্কা ৰিঞ্ঞাতুং। পরিযাযন্তরেনপি হি ৰুচ্চমানে তং তং নামং অজানন্তানং সম্মোহোযেৰ সিযা, তস্মা তত্থ ন কিঞ্চি ৰক্খাম। সাকানন্তি সূপেয্যপণ্ণানং। ইধাতি ইমস্মিং সিক্খাপদে। আহারত্থন্তি আহারেন কত্তব্বপযোজনং, আহারকিচ্চন্তি ৰুত্তং হোতি। ‘‘আমিসত্থ’’ন্তিপি লিখন্তি। ফরন্তীতি ৰিত্থারেন্তি।

    1324-5. Mūlakamūlādīni upadesatoyeva veditabbāni. Na hi tāni pariyāyantarena vuccamānānipi sakkā viññātuṃ. Pariyāyantarenapi hi vuccamāne taṃ taṃ nāmaṃ ajānantānaṃ sammohoyeva siyā, tasmā tattha na kiñci vakkhāma. Sākānanti sūpeyyapaṇṇānaṃ. Idhāti imasmiṃ sikkhāpade. Āhāratthanti āhārena kattabbapayojanaṃ, āhārakiccanti vuttaṃ hoti. ‘‘Āmisattha’’ntipi likhanti. Pharantīti vitthārenti.

    ১৩২৬. জরট্ঠন্তি পুরাণকন্দং। যং তং জরট্ঠন্তি সম্বন্ধো। সেসানং জরট্ঠং যাৰকালিকন্তি যোজনা। সেসানন্তি মূলকাদীনি ৰুত্তানি। যথাহ ‘‘মূলকখারকজজ্ঝরীমূলানং পন জরট্ঠানিপি আমিসগতিকানেৰা’’তি (পাচি॰ অট্ঠ॰ ২৪৮-২৪৯)।

    1326.Jaraṭṭhanti purāṇakandaṃ. Yaṃ taṃ jaraṭṭhanti sambandho. Sesānaṃ jaraṭṭhaṃ yāvakālikanti yojanā. Sesānanti mūlakādīni vuttāni. Yathāha ‘‘mūlakakhārakajajjharīmūlānaṃ pana jaraṭṭhānipi āmisagatikānevā’’ti (pāci. aṭṭha. 248-249).

    ১৩৩১. ধোতোতি নিব্বত্তিতপিট্ঠো।

    1331.Dhototi nibbattitapiṭṭho.

    ১৩৩২. অধোতো খীরৰল্লিযা কন্দোতি যোজনা। ৰাক্যপথাতীতাতি ‘‘অসুকো ৰা অসুকো ৰা’’তি ৰত্ৰা পরিযন্তং পাপেতুং অসক্কুণেয্যত্তা ৰচনপথাতীতা।

    1332. Adhoto khīravalliyā kandoti yojanā. Vākyapathātītāti ‘‘asuko vā asuko vā’’ti vatvā pariyantaṃ pāpetuṃ asakkuṇeyyattā vacanapathātītā.

    ১৩৩৩. পুণ্ডরীকং সেতং। পদুমং রত্তং।

    1333.Puṇḍarīkaṃ setaṃ. Padumaṃ rattaṃ.

    ১৩৩৪. সম্ভৰং জাতং।

    1334.Sambhavaṃ jātaṃ.

    ১৩৩৮. জরট্ঠবুন্দোতি কন্দস্স হেট্ঠা অতীৰ পরিণতট্ঠানং।

    1338.Jaraṭṭhabundoti kandassa heṭṭhā atīva pariṇataṭṭhānaṃ.

    ১৩৩৯. পথৰিযং গতোতি অন্তোপথৰিযং গতো, পথৰিযং নিমুজ্জিত্ৰা গততরুণদণ্ডোতি ৰুত্তং হোতি।

    1339.Pathaviyaṃ gatoti antopathaviyaṃ gato, pathaviyaṃ nimujjitvā gatataruṇadaṇḍoti vuttaṃ hoti.

    ১৩৪০. এৰং অন্তোভূমিযং গতো। ‘‘পণ্ণদণ্ডো উপ্পলাদীন’’ন্তি পদচ্ছেদো। সব্বোতি তরুণোপি পরিণতোপি। উপ্পলাদীনং, পদুমজাতিযা চ সব্বো পণ্ণদণ্ডো যাৰকালিকোতি যোজনা।

    1340. Evaṃ antobhūmiyaṃ gato. ‘‘Paṇṇadaṇḍo uppalādīna’’nti padacchedo. Sabboti taruṇopi pariṇatopi. Uppalādīnaṃ, padumajātiyā ca sabbo paṇṇadaṇḍo yāvakālikoti yojanā.

    ১৩৪৫. পত্তখাদনীযংনামাতি পত্তসঙ্খাতং খাদনীযং নাম।

    1345.Pattakhādanīyaṃnāmāti pattasaṅkhātaṃ khādanīyaṃ nāma.

    ১৩৪৮. মূলকাদীনন্তি ‘‘মূলকং খারকঞ্চেৰা’’তিআদিকায গাথায ৰুত্তমূলকাদীনং।

    1348.Mūlakādīnanti ‘‘mūlakaṃ khārakañcevā’’tiādikāya gāthāya vuttamūlakādīnaṃ.

    ১৩৪৯. কণ্ণিকাতি পদুমকণ্ণিকা।

    1349.Kaṇṇikāti padumakaṇṇikā.

    ১৩৬০. কেতকাদীনন্তি এত্থ আদি-সদ্দেন তিম্বরুসকং গহিতং। তালফলট্ঠীতি তরুণফলানং অট্ঠি।

    1360.Ketakādīnanti ettha ādi-saddena timbarusakaṃ gahitaṃ. Tālaphalaṭṭhīti taruṇaphalānaṃ aṭṭhi.

    ১৩৬১. ‘‘পুন্নাগমধুকট্ঠীনী’’তি চ ‘‘পুন্নাগমধুকট্ঠিচা’’তি চ পোত্থকেসু উভযথা পাঠো দিস্সতি, অত্থো পন একোযেৰ। ‘‘সেলু অট্ঠী’’তি পদচ্ছেদো। অনামিসেতি যাৰজীৰিকে।

    1361.‘‘Punnāgamadhukaṭṭhīnī’’ti ca ‘‘punnāgamadhukaṭṭhicā’’ti ca potthakesu ubhayathā pāṭho dissati, attho pana ekoyeva. ‘‘Selu aṭṭhī’’ti padacchedo. Anāmiseti yāvajīvike.

    ১৩৬৩. ধোতং তালপিট্ঠন্তি তালফেগ্গুং কোট্টেত্ৰা উদকে মদ্দিত্ৰা পরিস্সাৰেত্ৰা কললে ভাজনতলং ওতিণ্ণে পসন্নোদকং অপনেত্ৰা গহিততালপিট্ঠন্তি ৰুত্তং হোতি। তথা খীরৰল্লিযা পিট্ঠন্তি যোজনা, তথেৰ কোট্টেত্ৰা পরিস্সাৰেত্ৰা গহিতখীরৰল্লিযা পিট্ঠন্তি অত্থো।

    1363.Dhotaṃtālapiṭṭhanti tālaphegguṃ koṭṭetvā udake madditvā parissāvetvā kalale bhājanatalaṃ otiṇṇe pasannodakaṃ apanetvā gahitatālapiṭṭhanti vuttaṃ hoti. Tathā khīravalliyā piṭṭhanti yojanā, tatheva koṭṭetvā parissāvetvā gahitakhīravalliyā piṭṭhanti attho.

    ১৩৬৪. অধোতং ৰুত্তৰিপরিযাযতো গহেতব্বং। ‘‘আহারত্থমসাধেন্তং, সব্বং তং যাৰজীৰিক’’ন্তি ৰচনতো তেসু তেসু জনপদেসু মনুস্সানং আহারকিচ্চং অকরোন্তং মূলাদি যাৰজীৰিকং, তদঞ্ঞং যাৰকালিকন্তি সঙ্খেপলক্খণং কাতব্বন্তি।

    1364.Adhotaṃ vuttavipariyāyato gahetabbaṃ. ‘‘Āhāratthamasādhentaṃ, sabbaṃ taṃ yāvajīvika’’nti vacanato tesu tesu janapadesu manussānaṃ āhārakiccaṃ akarontaṃ mūlādi yāvajīvikaṃ, tadaññaṃ yāvakālikanti saṅkhepalakkhaṇaṃ kātabbanti.

    ৰিকালভোজনকথাৰণ্ণনা।

    Vikālabhojanakathāvaṇṇanā.

    ১৩৬৯. ভোজনং সন্নিধিং কত্ৰা খাদনং ৰাতি এত্থ ভোজনখাদনীযানি যথাৰুত্তভেদসরূপানেৰ। সন্নিধিং কত্ৰাতি পটিগ্গহেত্ৰা একরত্তম্পি অতিক্কামেত্ৰা, সন্নিদহিত্ৰাতি ৰুত্তং হোতি। যথাহ ‘‘পটিগ্গহেত্ৰা একরত্তম্পি ৰীতিনামিতস্সেতং অধিৰচন’’ন্তি (পাচি॰ অট্ঠ॰ ২৫৩)। তদেৰ ৰক্খতি ‘‘সয’’ন্তিআদিনা। খাদনন্তি কম্মসাধনোযং, ‘‘খজ্জ’’ন্তি ইমিনা সমানত্থো।

    1369.Bhojanaṃ sannidhiṃ katvā khādanaṃ vāti ettha bhojanakhādanīyāni yathāvuttabhedasarūpāneva. Sannidhiṃ katvāti paṭiggahetvā ekarattampi atikkāmetvā, sannidahitvāti vuttaṃ hoti. Yathāha ‘‘paṭiggahetvā ekarattampi vītināmitassetaṃ adhivacana’’nti (pāci. aṭṭha. 253). Tadeva vakkhati ‘‘saya’’ntiādinā. Khādananti kammasādhanoyaṃ, ‘‘khajja’’nti iminā samānattho.

    ১৩৭১. ‘‘সন্নিধিং কত্ৰা’’তি এত্থ নিদ্দেসং দস্সেতুমাহ ‘‘সয’’ন্তিআদি।

    1371. ‘‘Sannidhiṃ katvā’’ti ettha niddesaṃ dassetumāha ‘‘saya’’ntiādi.

    ১৩৭২. ‘‘তং ন ৰট্টতী’’তি এত্থ অত্থং দস্সেতুমাহ ‘‘ততো’’তিআদি। ততোতি সন্নিধিকতভোজনতো। সুদ্ধচিত্তেনাতি সৰাসনসকলকিলেসপ্পহানতো নিম্মলচিত্তেন। তাদিনাতি অট্ঠসু লোকধম্মেসু নিব্বিকারভাৰেন তাদিনা। অথ ৰা যাদিসা পুরিমকা সম্মাসম্বুদ্ধা রূপারূপগুণেহি অহেসুং, তাদিসেন ভগৰতা।

    1372. ‘‘Taṃ na vaṭṭatī’’ti ettha atthaṃ dassetumāha ‘‘tato’’tiādi. Tatoti sannidhikatabhojanato. Suddhacittenāti savāsanasakalakilesappahānato nimmalacittena. Tādināti aṭṭhasu lokadhammesu nibbikārabhāvena tādinā. Atha vā yādisā purimakā sammāsambuddhā rūpārūpaguṇehi ahesuṃ, tādisena bhagavatā.

    ১৩৭৩. ওদনাদীসু পঞ্চসু ভোজনেসু তাৰ অকপ্পিযমংসেন সন্নিধিৰসেন পাচিত্তিযঞ্চ আপত্তিৰিসেসঞ্চ দস্সেতুমাহ ‘‘অকপ্পিযেসূ’’তিআদি। পাচিত্তীতি সন্নিধিপাচিত্তিযমাহ। ইতরেতি সীহাদিমংসম্হি। দুক্কটেন সহ পাচিত্তীতি যোজনা।

    1373. Odanādīsu pañcasu bhojanesu tāva akappiyamaṃsena sannidhivasena pācittiyañca āpattivisesañca dassetumāha ‘‘akappiyesū’’tiādi. Pācittīti sannidhipācittiyamāha. Itareti sīhādimaṃsamhi. Dukkaṭena saha pācittīti yojanā.

    ১৩৭৪. যামকালিকসঙ্খাতং পরিভুঞ্জতোতি এত্থ ‘‘সন্নিধিং কত্ৰা’’তি অধিকারতো লব্ভতি । ‘‘দুক্কটেন সহা’’তি অৰত্ৰা ‘‘পাচিত্তী’’তি ৰুত্তত্তা সতি পচ্চযে পরিভুঞ্জতোতি গহেতব্বং। যথাহ ‘‘যামকালিকং সতি পচ্চযে অজ্ঝোহারতো পাচিত্তিযং। আহারত্থায অজ্ঝোহারতো দুক্কটেন সদ্ধিং পাচিত্তিয’’ন্তি (পাচি॰ অট্ঠ॰ ২৫৩)।

    1374.Yāmakālikasaṅkhātaṃ paribhuñjatoti ettha ‘‘sannidhiṃ katvā’’ti adhikārato labbhati . ‘‘Dukkaṭena sahā’’ti avatvā ‘‘pācittī’’ti vuttattā sati paccaye paribhuñjatoti gahetabbaṃ. Yathāha ‘‘yāmakālikaṃ sati paccaye ajjhohārato pācittiyaṃ. Āhāratthāya ajjhohārato dukkaṭena saddhiṃ pācittiya’’nti (pāci. aṭṭha. 253).

    ১৩৭৫. অন্নন্তি এত্থাপি ‘‘সন্নিধিকত’’ন্তি ইদং পুরে ৰিয লব্ভতি, ‘‘পকতি’’ন্তি ইদং ‘‘অন্ন’’ন্তি এতস্স ৰিসেসনং, মনুস্সমংসাদীহি অসম্মিস্সং নাতিরিত্তকতং অন্নমত্তন্তি অত্থো। পাচিত্তিযদ্ৰযন্তি অনতিরিত্তপচ্চযা চ সন্নিধিপচ্চযা চ দ্ৰে পাচিত্তিযানি।

    1375. Annanti etthāpi ‘‘sannidhikata’’nti idaṃ pure viya labbhati, ‘‘pakati’’nti idaṃ ‘‘anna’’nti etassa visesanaṃ, manussamaṃsādīhi asammissaṃ nātirittakataṃ annamattanti attho. Pācittiyadvayanti anatirittapaccayā ca sannidhipaccayā ca dve pācittiyāni.

    ১৩৭৬. ‘‘দ্ৰে , দ্ৰয’’ন্তি উভযত্থাপি অযমেৰত্থো।

    1376. ‘‘Dve , dvaya’’nti ubhayatthāpi ayamevattho.

    ১৩৭৭. সামিসেন মুখেন দ্ৰেতি এত্থ ‘‘পঞ্চ ভোজনানি যামকালিকং সত্তাহকালিকং যাৰজীৰিকং ঠপেত্ৰা অৰসেসং খাদনীযং নামা’’তি (পাচি॰ ২৫৪) ৰুত্তত্তা খাদনীযাসঙ্গহিতেন যামকালিকেন চ তেন সম্মিস্সত্তা সন্নিধিনামেন মুখগতআমিসমূলকেন চ সন্নিধিপাচিত্তিযানি দ্ৰে হোন্তীতি অত্থো। সামিসেন মুখেনাতি উপলক্খণত্তা যথাকথঞ্চি আমিসে মিস্সীভূতে এত্তকা আপত্তিযোতি দট্ঠব্বং। নিরামিসং যামকালিকং ভুঞ্জতো একমেৰ পাচিত্তিযন্তি যোজনা, যেন কেনচি আকারেন অসম্মিস্সং যামকালিকং পরিভুঞ্জতো একমেৰ পাচিত্তিযং হোতীতি অত্থো।

    1377.Sāmisena mukhena dveti ettha ‘‘pañca bhojanāni yāmakālikaṃ sattāhakālikaṃ yāvajīvikaṃ ṭhapetvā avasesaṃ khādanīyaṃ nāmā’’ti (pāci. 254) vuttattā khādanīyāsaṅgahitena yāmakālikena ca tena sammissattā sannidhināmena mukhagataāmisamūlakena ca sannidhipācittiyāni dve hontīti attho. Sāmisena mukhenāti upalakkhaṇattā yathākathañci āmise missībhūte ettakā āpattiyoti daṭṭhabbaṃ. Nirāmisaṃ yāmakālikaṃ bhuñjato ekameva pācittiyanti yojanā, yena kenaci ākārena asammissaṃ yāmakālikaṃ paribhuñjato ekameva pācittiyaṃ hotīti attho.

    ১৩৭৮. তমেৰাতি সন্নিহিতমেৰ কালিকং। তেসু দ্ৰীসু ৰিকপ্পেসূতি সামিসনিরামিসৰিকপ্পদ্ৰযে। কেৰলং দুক্কটং ৰড্ঢতীতি পঠমৰিকপ্পে দ্ৰীহি পাচিত্তিযেহি সদ্ধিং দুক্কটং, দুতিযৰিকপ্পে পাচিত্তিযেন সদ্ধিং দুক্কটং হোতীতি ৰুত্তং হোতি।

    1378.Tamevāti sannihitameva kālikaṃ. Tesu dvīsu vikappesūti sāmisanirāmisavikappadvaye. Kevalaṃ dukkaṭaṃ vaḍḍhatīti paṭhamavikappe dvīhi pācittiyehi saddhiṃ dukkaṭaṃ, dutiyavikappe pācittiyena saddhiṃ dukkaṭaṃ hotīti vuttaṃ hoti.

    ১৩৭৯. সুদ্ধন্তি এত্থ ‘‘সন্নিধিকতং ভোজন’’ন্তি সেসো। ইদং ‘‘পকতিভোজনে’’তি (পাচি॰ অট্ঠ॰ ২৫৩) অট্ঠকথাযং, ইধ চ ‘‘ন দোসো যামকালিকে’’তি যামকালিকস্স ৰিসুং ৰক্খমানত্তা ৰিঞ্ঞাযতি, অকপ্পিযমংসযামকালিকেহি অমিস্সং ভোজনন্তি ৰুত্তং হোতি।

    1379.Suddhanti ettha ‘‘sannidhikataṃ bhojana’’nti seso. Idaṃ ‘‘pakatibhojane’’ti (pāci. aṭṭha. 253) aṭṭhakathāyaṃ, idha ca ‘‘na doso yāmakālike’’ti yāmakālikassa visuṃ vakkhamānattā viññāyati, akappiyamaṃsayāmakālikehi amissaṃ bhojananti vuttaṃ hoti.

    ১৩৮০. মংসেতি এত্থ ‘‘অকপ্পিযে’’তি ইদং থুল্লচ্চযাদিৰচনেনেৰ লব্ভতি। ৰড্ঢতীতি পুব্বে ৰুত্তেহি পাচিত্তিযদ্ৰযেহি সদ্ধিং মনুস্সমংসে থুল্লচ্চযঞ্চ সীহাদিমংসে দুক্কটঞ্চ ৰড্ঢতি। মনুস্সমংসে চ সেসে সীহমংসাদিকে অকপ্পিযমংসে চ যথানুক্কমতো থুল্লচ্চযঞ্চেৰ দুক্কটঞ্চাতি দ্ৰযং ৰড্ঢতীতি যোজনা।

    1380.Maṃseti ettha ‘‘akappiye’’ti idaṃ thullaccayādivacaneneva labbhati. Vaḍḍhatīti pubbe vuttehi pācittiyadvayehi saddhiṃ manussamaṃse thullaccayañca sīhādimaṃse dukkaṭañca vaḍḍhati. Manussamaṃse ca sese sīhamaṃsādike akappiyamaṃse ca yathānukkamato thullaccayañceva dukkaṭañcāti dvayaṃ vaḍḍhatīti yojanā.

    ১৩৮১. অনতিরিত্তম্পি ভোজনং ৰিকালে পরিভুঞ্জতো ভিক্খুনো তন্নিমিত্তকো দোসো যথাৰুত্তেসু সব্বৰিকপ্পেসু নত্থীতি যোজনা। ‘‘ৰিকাল…পে॰… কালিকে’’তি যামকালিকস্স ৰিসুং ৰক্খমানত্তা চ অতিরিত্তকারাপনঞ্চ ভোজনেযেৰ সম্ভৰতীতি অনতিরিত্তন্তি এত্থ ‘‘নিহিতভোজন’’ন্তি সেসো। ‘‘অনতিরিত্তপচ্চযা পন ৰিকালে সব্বৰিকপ্পেসু অনাপত্তী’’তি (পাচি॰ অট্ঠ॰ ২৫৩) অট্ঠকথাৰচনতো দোসোতি অনতিরিত্তপচ্চযা পাচিত্তিযমাহ। তেনেৰ ৰক্খতি ‘‘তন্নিমিত্তকো’’তি, অনতিরিত্তনিমিত্তকোতি অত্থো। সব্বৰিকপ্পেসূতি ‘‘সুদ্ধং ৰা মনুস্সমংসমিস্সং ৰা সীহাদিমংসমিস্সং ৰা যামকালিকমিস্সং ৰা’’তি সব্বেসু ৰিকপ্পেসু। ‘‘তন্নিমিত্তকো’’তি ৰচনেনেৰ ৰারিতৰিকালাদিনিমিত্তস্স দোসস্স সম্ভৰং দস্সেতি।

    1381.Anatirittampi bhojanaṃ vikāle paribhuñjato bhikkhuno tannimittako doso yathāvuttesu sabbavikappesu natthīti yojanā. ‘‘Vikāla…pe… kālike’’ti yāmakālikassa visuṃ vakkhamānattā ca atirittakārāpanañca bhojaneyeva sambhavatīti anatirittanti ettha ‘‘nihitabhojana’’nti seso. ‘‘Anatirittapaccayā pana vikāle sabbavikappesu anāpattī’’ti (pāci. aṭṭha. 253) aṭṭhakathāvacanato dosoti anatirittapaccayā pācittiyamāha. Teneva vakkhati ‘‘tannimittako’’ti, anatirittanimittakoti attho. Sabbavikappesūti ‘‘suddhaṃ vā manussamaṃsamissaṃ vā sīhādimaṃsamissaṃ vā yāmakālikamissaṃ vā’’ti sabbesu vikappesu. ‘‘Tannimittako’’ti vacaneneva vāritavikālādinimittassa dosassa sambhavaṃ dasseti.

    ১৩৮২-৩. ৰিকালপচ্চযা ৰাতি এত্থ ৰা-সদ্দেন ‘‘অনতিরিত্তপচ্চযা’’তি ইদং সমুচ্চিতং। অপি-সদ্দো ‘‘যামকালিকেপী’’তি যোজেতব্বো। সত্তাহকালিকং, যাৰজীৰিকং আহারস্সেৰ অত্থায পটিগ্গণ্হতো গহণে, যথাৰুত্তস্স সত্তাহকালিকযাৰজীৰিকভেদেন দুৰিধস্স তু অজ্ঝোহারপযোগেসু নিরামিসে ৰা দুক্কটন্তি যোজনা। তু-সদ্দো এৰ-কারত্থো।

    1382-3.Vikālapaccayā vāti ettha vā-saddena ‘‘anatirittapaccayā’’ti idaṃ samuccitaṃ. Api-saddo ‘‘yāmakālikepī’’ti yojetabbo. Sattāhakālikaṃ, yāvajīvikaṃ āhārasseva atthāya paṭiggaṇhato gahaṇe, yathāvuttassa sattāhakālikayāvajīvikabhedena duvidhassa tu ajjhohārapayogesu nirāmise vā dukkaṭanti yojanā. Tu-saddo eva-kārattho.

    ১৩৮৪. অথাতি ৰাক্যারম্ভে নিপাতো। আমিসসংসট্ঠং সত্তাহকালিকং, যাৰজীৰিকং ৰাতি যোজনা। গহেত্ৰাতি পটিগ্গহেত্ৰা। ঠপিতন্তি অরুণং অতিক্কামেত্ৰা ঠপিতং। পাচিত্তীতি সন্নিধিপাচিত্তি।

    1384.Athāti vākyārambhe nipāto. Āmisasaṃsaṭṭhaṃ sattāhakālikaṃ, yāvajīvikaṃ vāti yojanā. Gahetvāti paṭiggahetvā. Ṭhapitanti aruṇaṃ atikkāmetvā ṭhapitaṃ. Pācittīti sannidhipācitti.

    ১৩৮৫. কালোতি অরুণুগ্গমনাদিমজ্ঝন্তিকাৰসানো কালো। যামোতি মজ্ঝন্তিকাদিদুতিযঅরুণুগ্গমনাৰসানো। তং তং কালং কালিকং অতিক্কামযতো তু দোসোতি যোজনা। তু-সদ্দো এৰকারত্থো। তং ৰা কালিকন্তি যথাক্কমং যাৰকালিকং যামকালিকং সত্তাহকালিকন্তি ৰুত্তং হোতি।

    1385.Kāloti aruṇuggamanādimajjhantikāvasāno kālo. Yāmoti majjhantikādidutiyaaruṇuggamanāvasāno. Taṃ taṃ kālaṃ kālikaṃ atikkāmayato tu dosoti yojanā. Tu-saddo evakārattho. Taṃ vā kālikanti yathākkamaṃ yāvakālikaṃ yāmakālikaṃ sattāhakālikanti vuttaṃ hoti.

    ১৩৮৬. যাৰকালিকং অত্তনা সম্ভিন্নানি ইতরানি তীণি কালিকানি অত্তনোযেৰ সভাৰং উপনেতীতি যোজনা। সকো ভাৰো সভাৰো, তং।

    1386. Yāvakālikaṃ attanā sambhinnāni itarāni tīṇi kālikāni attanoyeva sabhāvaṃ upanetīti yojanā. Sako bhāvo sabhāvo, taṃ.

    ১৩৮৭-৮. এৰমেৰ ৰিনিদ্দিসেতি ‘‘পুরিমং পুরিমং কালিকং অত্তনা সম্মিস্সং পচ্ছিমং পচ্ছিমং অত্তনো সভাৰমেৰ গাহাপেতী’’তি কথেয্যাতি ৰুত্তং হোতি।

    1387-8.Evamevaviniddiseti ‘‘purimaṃ purimaṃ kālikaṃ attanā sammissaṃ pacchimaṃ pacchimaṃ attano sabhāvameva gāhāpetī’’ti katheyyāti vuttaṃ hoti.

    ইমেসূতিআদীসু নিদ্ধারণে ভুম্মং। অন্তোৰুত্থং হোতীতি অকপ্পিযকুটিযং ঠপেত্ৰা অরুণুট্ঠাপনেন অন্তোৰুত্থং নাম হোতি। সন্নিধি চ হোতীতি পটিগ্গহেত্ৰা পটিগ্গহণং অৰিজহিত্ৰা অরুণুট্ঠাপনেন সন্নিধি চ নাম হোতি। পোত্থকেসু ‘‘সন্নিধি’’ন্তি সানুনাসিকো পাঠো দিস্সতি, ‘‘হোতী’’তি কিরিযায সম্বন্ধত্তা সন্নিধি-সদ্দো পঠমেকৰচনন্তোতি অনুনাসিকো আগমসন্ধিজোতি ৰেদিতব্বো। উভযম্পীতি যথাৰুত্তং অন্তোৰুত্থং, সন্নিধি চাতি উভযম্পি। ন হোতেৰাতি পুরিমকালিকদ্ৰযেন অমিস্সং ন হোতেৰ।

    Imesūtiādīsu niddhāraṇe bhummaṃ. Antovutthaṃ hotīti akappiyakuṭiyaṃ ṭhapetvā aruṇuṭṭhāpanena antovutthaṃ nāma hoti. Sannidhi ca hotīti paṭiggahetvā paṭiggahaṇaṃ avijahitvā aruṇuṭṭhāpanena sannidhi ca nāma hoti. Potthakesu ‘‘sannidhi’’nti sānunāsiko pāṭho dissati, ‘‘hotī’’ti kiriyāya sambandhattā sannidhi-saddo paṭhamekavacanantoti anunāsiko āgamasandhijoti veditabbo. Ubhayampīti yathāvuttaṃ antovutthaṃ, sannidhi cāti ubhayampi. Na hotevāti purimakālikadvayena amissaṃ na hoteva.

    ১৩৮৯. কপ্পিযকুটিনামেন অকতং, অসম্মতং, অপরিগ্গহং, পাকারাদীহি পরিক্খিত্তং সেনাসনং অকপ্পিযকুটি নামাতি সঙ্খেপতো গহেতব্বং। অন্তদ্ৰযেনাতি সত্তাহকালিকযাৰজীৰিকেন, সহত্থে করণৰচনং। ‘‘মিস্সিত’’ন্তি সেসো। গহিতন্তি পটিগ্গহিতং। তং পুব্বং দ্ৰযন্তি যাৰকালিকযামকালিকদ্ৰযং। পুরিমকালিকদ্ৰযে যং কিঞ্চি তদহুপটিগ্গহিতম্পি অকপ্পিযকুটিযাযেৰ ঠপেত্ৰা অরুণং উট্ঠাপিতেন পচ্ছিমকালিকদ্ৰযে যেন কেনচি সম্মিস্সং অন্তোৰুত্থং নাম হোতীতি ৰুত্তং হোতি।

    1389. Kappiyakuṭināmena akataṃ, asammataṃ, apariggahaṃ, pākārādīhi parikkhittaṃ senāsanaṃ akappiyakuṭi nāmāti saṅkhepato gahetabbaṃ. Antadvayenāti sattāhakālikayāvajīvikena, sahatthe karaṇavacanaṃ. ‘‘Missita’’nti seso. Gahitanti paṭiggahitaṃ. Taṃ pubbaṃ dvayanti yāvakālikayāmakālikadvayaṃ. Purimakālikadvaye yaṃ kiñci tadahupaṭiggahitampi akappiyakuṭiyāyeva ṭhapetvā aruṇaṃ uṭṭhāpitena pacchimakālikadvaye yena kenaci sammissaṃ antovutthaṃ nāma hotīti vuttaṃ hoti.

    ১৩৯০. অন্তোৰুত্থেন পচ্ছিমকালিকদ্ৰযেন সংসট্ঠং যদিদং পুরিমকালিকদ্ৰযং, অযং মুখসন্নিধি নাম হোতীতি অট্ঠকথাযং (মহাৰ॰ অট্ঠ॰ ২৯৫ অত্থতো সমানং) ৰুত্তং। মহাপচ্চরিযং পন অন্তোৰুত্থং হোতি, ন কপ্পতি ইতি দল়্হং কত্ৰা ৰুত্তন্তি যোজনা।

    1390. Antovutthena pacchimakālikadvayena saṃsaṭṭhaṃ yadidaṃ purimakālikadvayaṃ, ayaṃ mukhasannidhi nāma hotīti aṭṭhakathāyaṃ (mahāva. aṭṭha. 295 atthato samānaṃ) vuttaṃ. Mahāpaccariyaṃ pana antovutthaṃ hoti, na kappati iti daḷhaṃ katvā vuttanti yojanā.

    তত্থ ‘‘মুখসন্নিধী’’তি চ ‘‘অন্তোৰুত্থ’’ন্তি চ নামমত্তমেৰ নানাকরণং, সোযেৰত্থোতি উভিন্নং অট্ঠকথাৰচনানং অনত্থন্তরতা ৰেদিতব্বা। তথা হি মুখ-সদ্দো অন্তো-সদ্দপরিযাযো, সন্নিধি-সদ্দো পরিৰুত্থ-সদ্দপরিযাযো। মুখে সন্নিধি মুখসন্নিধীতি কম্মসাধনং। বহি সন্নিধিনিৰত্তনত্থং অট্ঠকথাসু মুখ-গ্গহণং, অন্তো-গহণঞ্চ কতং। বহীতি চ পটিগ্গহেত্ৰা অকপ্পিযকুটিযা বহি যত্থ কত্থচি পরিৰুত্থং পচ্ছিমকালিকদ্ৰযং পুরিমেন কালিকদ্ৰযেন সংসট্ঠং অধিপ্পেতং। মুখসন্নিধিঅন্তোৰুত্থপদানং অনত্থন্তরভাৰো সমন্তপাসাদিকাযং ৰুত্তো।

    Tattha ‘‘mukhasannidhī’’ti ca ‘‘antovuttha’’nti ca nāmamattameva nānākaraṇaṃ, soyevatthoti ubhinnaṃ aṭṭhakathāvacanānaṃ anatthantaratā veditabbā. Tathā hi mukha-saddo anto-saddapariyāyo, sannidhi-saddo parivuttha-saddapariyāyo. Mukhe sannidhi mukhasannidhīti kammasādhanaṃ. Bahi sannidhinivattanatthaṃ aṭṭhakathāsu mukha-ggahaṇaṃ, anto-gahaṇañca kataṃ. Bahīti ca paṭiggahetvā akappiyakuṭiyā bahi yattha katthaci parivutthaṃ pacchimakālikadvayaṃ purimena kālikadvayena saṃsaṭṭhaṃ adhippetaṃ. Mukhasannidhiantovutthapadānaṃ anatthantarabhāvo samantapāsādikāyaṃ vutto.

    যথাহ ‘‘সামণেরো ভিক্খুস্স তণ্ডুলাদিকং আমিসং আহরিত্ৰা কপ্পিযকুটিযং নিক্খিপিত্ৰা পুনদিৰসে পচিত্ৰা দেতি, অন্তোৰুত্থং ন হোতি। তত্থ অকপ্পিযকুটিযং নিক্খিত্তসপ্পিআদীসু যং কিঞ্চি পক্খিপিত্ৰা দেতি, মুখসন্নিধি নাম হোতি। মহাপচ্চরিযং পন ‘অন্তোৰুত্থং হোতী’তি ৰুত্তং, তত্থ নামমত্তমেৰ নানাকরণ’’ন্তি (মহাৰ॰ অট্ঠ॰ ২৯৫)। নিস্সন্দেহে পন অঞ্ঞথা ৰুত্তো ৰিয ৰিঞ্ঞাযতি, তত্থপি অযমেৰ নযো ৰেদিতব্বো।

    Yathāha ‘‘sāmaṇero bhikkhussa taṇḍulādikaṃ āmisaṃ āharitvā kappiyakuṭiyaṃ nikkhipitvā punadivase pacitvā deti, antovutthaṃ na hoti. Tattha akappiyakuṭiyaṃ nikkhittasappiādīsu yaṃ kiñci pakkhipitvā deti, mukhasannidhi nāma hoti. Mahāpaccariyaṃ pana ‘antovutthaṃ hotī’ti vuttaṃ, tattha nāmamattameva nānākaraṇa’’nti (mahāva. aṭṭha. 295). Nissandehe pana aññathā vutto viya viññāyati, tatthapi ayameva nayo veditabbo.

    ১৩৯১. ন দোসোতি সন্নিধিদোসো ন হোতি। নিদহিত্ৰাতি পটিগ্গহেত্ৰা পটিগ্গহণং অৰিজহিত্ৰা সকসককালব্ভন্তরেযেৰ নিদহিত্ৰা। এত্থ চ হেট্ঠিমন্ততো সন্নিধিং দস্সেতুং ‘‘পত্তং ধোৰিত্ৰা পুন তত্থ অচ্ছোদকং ৰা আসিঞ্চিত্ৰা অঙ্গুলিযা ৰা ঘংসিত্ৰা নিস্নেহভাৰো জানিতব্বো’’তি (পাচি॰ অট্ঠ॰ ২৫৩) অট্ঠকথাযং ৰুত্তং। এতেন নিরপেক্খেন পটিগ্গহণং অৰিস্সজ্জেত্ৰাৰ সযং ৰা অঞ্ঞেন ৰা তুচ্ছং কত্ৰান সম্মা ধোৰিত্ৰা নিট্ঠাপিতে পত্তে লগ্গম্পি অৰিজহিতপটিগ্গহিতমেৰ হোতীতি তত্থ আপত্তি ৰুত্তাতি গণ্ঠিপদেসু ৰুত্তং। এতেন নিরপেক্খেন পটিগ্গহণে ৰিস্সট্ঠে তাদিসেপি পত্তে দোসো নত্থীতি সিদ্ধং।

    1391.Nadosoti sannidhidoso na hoti. Nidahitvāti paṭiggahetvā paṭiggahaṇaṃ avijahitvā sakasakakālabbhantareyeva nidahitvā. Ettha ca heṭṭhimantato sannidhiṃ dassetuṃ ‘‘pattaṃ dhovitvā puna tattha acchodakaṃ vā āsiñcitvā aṅguliyā vā ghaṃsitvā nisnehabhāvo jānitabbo’’ti (pāci. aṭṭha. 253) aṭṭhakathāyaṃ vuttaṃ. Etena nirapekkhena paṭiggahaṇaṃ avissajjetvāva sayaṃ vā aññena vā tucchaṃ katvāna sammā dhovitvā niṭṭhāpite patte laggampi avijahitapaṭiggahitameva hotīti tattha āpatti vuttāti gaṇṭhipadesu vuttaṃ. Etena nirapekkhena paṭiggahaṇe vissaṭṭhe tādisepi patte doso natthīti siddhaṃ.

    সন্নিধিকথাৰণ্ণনা।

    Sannidhikathāvaṇṇanā.

    ১৩৯৩. পণীতানি ভোজনানীতি পাল়িযং ‘‘সেয্যথিদং? সপ্পি নৰনীতং তেলং মধু ফাণিতং মচ্ছো মংসং খীরং দধী’’তি (পাচি॰ ২৫৯) উদ্দিসিত্ৰা –

    1393.Paṇītāni bhojanānīti pāḷiyaṃ ‘‘seyyathidaṃ? Sappi navanītaṃ telaṃ madhu phāṇitaṃ maccho maṃsaṃ khīraṃ dadhī’’ti (pāci. 259) uddisitvā –

    ‘‘সপ্পি নাম গোসপ্পি ৰা অজিকাসপ্পি ৰা মহিংসসপ্পি ৰা, যেসং মংসং কপ্পতি, তেসং সপ্পি। নৰনীতং নাম তেসঞ্ঞেৰ নৰনীতং। তেলং নাম তিলতেলং সাসপতেলং মধুকতেলং এরণ্ডকতেলং ৰসাতেলং। মধু নাম মক্খিকামধু। ফাণিতং নাম উচ্ছুম্হা নিব্বত্তং। মচ্ছো নাম ওদকো ৰুচ্চতি। মংসং নাম যেসং মংসং কপ্পতি, তেসং মংসং। খীরং নাম গোখীরং ৰা অজিকাখীরং ৰা মহিংসখীরং ৰা, যেসং মংসং কপ্পতি, তেসং খীরং। দধি নাম তেসঞ্ঞেৰ দধী’’তি (পাচি॰ ২৬০) –

    ‘‘Sappi nāma gosappi vā ajikāsappi vā mahiṃsasappi vā, yesaṃ maṃsaṃ kappati, tesaṃ sappi. Navanītaṃ nāma tesaññeva navanītaṃ. Telaṃ nāma tilatelaṃ sāsapatelaṃ madhukatelaṃ eraṇḍakatelaṃ vasātelaṃ. Madhu nāma makkhikāmadhu. Phāṇitaṃ nāma ucchumhā nibbattaṃ. Maccho nāma odako vuccati. Maṃsaṃ nāma yesaṃ maṃsaṃ kappati, tesaṃ maṃsaṃ. Khīraṃ nāma gokhīraṃ vā ajikākhīraṃ vā mahiṃsakhīraṃ vā, yesaṃ maṃsaṃ kappati, tesaṃ khīraṃ. Dadhi nāma tesaññeva dadhī’’ti (pāci. 260) –

    নিদ্দিট্ঠানি নৰ পণীতভোজনানীতি অত্থো। অগিলানোতি ‘‘অগিলানো নাম যস্স ৰিনা পণীতভোজনানি ফাসু হোতী’’তি (পাচি॰ ২৬০) ৰুত্তো। অগিলানোতি এত্থ ‘‘হুত্ৰা’’তি সেসো।

    Niddiṭṭhāni nava paṇītabhojanānīti attho. Agilānoti ‘‘agilāno nāma yassa vinā paṇītabhojanāni phāsu hotī’’ti (pāci. 260) vutto. Agilānoti ettha ‘‘hutvā’’ti seso.

    ১৩৯৪. সপ্পিনা দেহীতিআদি ৰিঞ্ঞাপনপ্পকারো। সপ্পিভত্তন্তি এত্থ কিঞ্চাপি সপ্পিসংসট্ঠং ভত্তং, সপ্পি চ ভত্তঞ্চ সপ্পিভত্তন্তি ৰিঞ্ঞাযতি, অট্ঠকথাসু পন ‘‘সালিভত্তং ৰিয সপ্পিভত্তং নাম নত্থী’’তি (পাচি॰ অট্ঠ॰ ২৫৯) কারণং ৰত্ৰা দুক্কটস্সেৰ দল়্হতরং কত্ৰা ৰুত্তত্তা ন সক্কা অঞ্ঞং ৰত্তুং। অট্ঠকথাচরিযা এৰ হি ঈদিসেসু ঠানেসু পমাণং।

    1394.Sappinā dehītiādi viññāpanappakāro. Sappibhattanti ettha kiñcāpi sappisaṃsaṭṭhaṃ bhattaṃ, sappi ca bhattañca sappibhattanti viññāyati, aṭṭhakathāsu pana ‘‘sālibhattaṃ viya sappibhattaṃ nāma natthī’’ti (pāci. aṭṭha. 259) kāraṇaṃ vatvā dukkaṭasseva daḷhataraṃ katvā vuttattā na sakkā aññaṃ vattuṃ. Aṭṭhakathācariyā eva hi īdisesu ṭhānesu pamāṇaṃ.

    ১৩৯৫. পাচিত্তি পরিযাপুতাতি ‘‘অজ্ঝোহারে অজ্ঝোহারে আপত্তি পাচিত্তিযস্সা’’তি (পাচি॰ ২৬০) এৰং অজ্ঝোহারগণনায পাচিত্তি ৰুত্তা।

    1395.Pācitti pariyāputāti ‘‘ajjhohāre ajjhohāre āpatti pācittiyassā’’ti (pāci. 260) evaṃ ajjhohāragaṇanāya pācitti vuttā.

    ১৩৯৬. সুদ্ধানীতি অন্নেন অমিস্সানি। সেখিযেসূতি সিক্খাকরণীযে ৰুত্তন্তি অত্থো।

    1396.Suddhānīti annena amissāni. Sekhiyesūti sikkhākaraṇīye vuttanti attho.

    ১৩৯৭. যস্মা সুদ্ধানং পণীতভোজনানং ৰিঞ্ঞাপেত্ৰা পরিভুঞ্জনং দুক্কটৰিসযং, তস্মা। সত্তধঞ্ঞমযন্তি সালিআদীনং সত্তন্নং ধঞ্ঞানং অঞ্ঞতরস্স ৰিকারভূতং।

    1397. Yasmā suddhānaṃ paṇītabhojanānaṃ viññāpetvā paribhuñjanaṃ dukkaṭavisayaṃ, tasmā. Sattadhaññamayanti sāliādīnaṃ sattannaṃ dhaññānaṃ aññatarassa vikārabhūtaṃ.

    ১৩৯৮. সচে দদাতীতি যোজনা। ৰিসঙ্কেতন্তি অনাপত্তি হোতীতি ৰুত্তং হোতি।

    1398. Sace dadātīti yojanā. Visaṅketanti anāpatti hotīti vuttaṃ hoti.

    ১৩৯৯. দেতি চেতি সম্বন্ধো। অঞ্ঞতরেনাতি সহত্থে করণৰচনং। ‘‘ভত্ত’’ন্তি অধিকারতো লব্ভতি। অস্স ভিক্খুস্স। ৰিসঙ্কেতন্তি অঞ্ঞং যাচিতস্স অঞ্ঞস্স দিন্নত্তা সঙ্কেতস্স ৰিরাধনেন অনাপত্তীতি ৰুত্তং হোতি।

    1399. Deti ceti sambandho. Aññatarenāti sahatthe karaṇavacanaṃ. ‘‘Bhatta’’nti adhikārato labbhati. Assa bhikkhussa. Visaṅketanti aññaṃ yācitassa aññassa dinnattā saṅketassa virādhanena anāpattīti vuttaṃ hoti.

    ১৪০০. যেন যেন হীতি এত্থাপি তথেৰ করণৰচনং। ‘‘ৰিঞ্ঞত্ত’’ন্তি ইদং অধিকতস্স ‘‘ভত্ত’’ন্তি এতস্স ৰিসেসনং। যেন যেনাতি অনিযমেন পণীতেন। তেন সপ্পিআদি ৰিসুং ৰিসুং গহিতমেৰ, সপ্পিআদীনং গোসপ্পিআদিভেদো চ সঙ্গহিতো। তস্মিং লদ্ধেপীতি যাচিতেযেৰ লদ্ধে সতি। তস্স তস্স মূলেপি লদ্ধেতি ৰিচ্ছাৰসেন যোজনা।

    1400.Yena yena hīti etthāpi tatheva karaṇavacanaṃ. ‘‘Viññatta’’nti idaṃ adhikatassa ‘‘bhatta’’nti etassa visesanaṃ. Yenayenāti aniyamena paṇītena. Tena sappiādi visuṃ visuṃ gahitameva, sappiādīnaṃ gosappiādibhedo ca saṅgahito. Tasmiṃ laddhepīti yāciteyeva laddhe sati. Tassa tassa mūlepi laddheti vicchāvasena yojanā.

    কিং ৰুত্তং হোতি? ‘‘সপ্পিনা ভত্তং দেহী’’তি সামঞ্ঞেন ৰিঞ্ঞাপেন্তস্স তমেৰ ৰা ‘‘ইমিনা সপ্পিং কত্ৰা গণ্হথা’’তি নৰনীতাদীসু অঞ্ঞতরং ৰা ধেনুং ৰা মূলং ৰা দেতি চে, ‘‘গোসপ্পিনা ভত্তং দেহী’’তি ৰিসেসযুত্তং কত্ৰা ৰিঞ্ঞাপেন্তস্স তমেৰ ৰা গোনৰনীতাদীনি ৰা গাৰিং ৰা ‘‘ইদং দত্ৰা সপ্পিং গণ্হথা’’তি মূলং ৰা সচে দেতি, ৰিসঙ্কেতং ন হোতি, যথাৰত্থুকমেৰ আপত্তিং আপজ্জতীতি ৰুত্তং হোতি।

    Kiṃ vuttaṃ hoti? ‘‘Sappinā bhattaṃ dehī’’ti sāmaññena viññāpentassa tameva vā ‘‘iminā sappiṃ katvā gaṇhathā’’ti navanītādīsu aññataraṃ vā dhenuṃ vā mūlaṃ vā deti ce, ‘‘gosappinā bhattaṃ dehī’’ti visesayuttaṃ katvā viññāpentassa tameva vā gonavanītādīni vā gāviṃ vā ‘‘idaṃ datvā sappiṃ gaṇhathā’’ti mūlaṃ vā sace deti, visaṅketaṃ na hoti, yathāvatthukameva āpattiṃ āpajjatīti vuttaṃ hoti.

    ন অঞ্ঞথাতি সপ্পিং যাচিতৰতো ‘‘ইমং গহেত্ৰা সপ্পিং কত্ৰা গণ্হথা’’তি অৰত্ৰা ‘‘সপ্পি নত্থি, ইদং গণ্হথা’’তি ৰত্ৰা ৰা তুণ্হীভূতেন ৰা নৰনীতাদীসু কিস্মিঞ্চি দিন্নে ৰিসেসৰিঞ্ঞাপকস্স তদঞ্ঞদানেপি ৰিসঙ্কেতমেৰ হোতীতি অত্থো। পাল়িযা অনাগতেপি দিন্নে ৰিসঙ্কেতমেৰ হোতি। ‘‘সচে পন অঞ্ঞং পাল়িযা আগতং ৰা অনাগতং ৰা দেতি, ৰিসঙ্কেত’’ন্তি (পাচি॰ অট্ঠ॰ ২৫৯) অট্ঠকথাযং ৰুত্তং।

    Na aññathāti sappiṃ yācitavato ‘‘imaṃ gahetvā sappiṃ katvā gaṇhathā’’ti avatvā ‘‘sappi natthi, idaṃ gaṇhathā’’ti vatvā vā tuṇhībhūtena vā navanītādīsu kismiñci dinne visesaviññāpakassa tadaññadānepi visaṅketameva hotīti attho. Pāḷiyā anāgatepi dinne visaṅketameva hoti. ‘‘Sace pana aññaṃ pāḷiyā āgataṃ vā anāgataṃ vā deti, visaṅketa’’nti (pāci. aṭṭha. 259) aṭṭhakathāyaṃ vuttaṃ.

    ১৪০১. পাল়িযন্তি পুব্বে দস্সিতং ‘‘সপ্পি নাম গোসপ্পী’’তিআদিং নিদ্দেসপাল়িমাহ। যথাহ ‘‘পাল়িযং আগতনৰনীতাদীনি ঠপেত্ৰা’’তিআদি (পাচি॰ অট্ঠ॰ ২৫৯)। অঞ্ঞেহি নৰনীতাদীহি। সহত্থে করণৰচনং।

    1401.Pāḷiyanti pubbe dassitaṃ ‘‘sappi nāma gosappī’’tiādiṃ niddesapāḷimāha. Yathāha ‘‘pāḷiyaṃ āgatanavanītādīni ṭhapetvā’’tiādi (pāci. aṭṭha. 259). Aññehi navanītādīhi. Sahatthe karaṇavacanaṃ.

    ১৪০২. ‘‘ৰিঞ্ঞাপেত্ৰা’’তি ইমস্স কম্মভূতং ‘‘ভত্ত’’ন্তি অধিকতং। গাথাবন্ধৰসেন ৰা-সদ্দস্স রস্সো কতো। একতো ৰাতি যোজনা, ‘‘নানতো’’তিপি গহিতমেৰ, একট্ঠানতো ৰা নানট্ঠানতো ৰাতি ৰুত্তং হোতি। যথাহ ‘‘সচে পন সব্বেহিপি সপ্পিআদীহি একট্ঠানে ৰা নানট্ঠানে ৰা ৰিঞ্ঞাপেত্ৰা’’তিআদি (পাচি॰ অট্ঠ॰ ২৫৯)। তেনেৰ ভুঞ্জতীতি এত্থ পরিকপ্পসূচকং ‘‘চে’’তি ইদঞ্চ অৰকংসসন্দস্সনত্থং ‘‘কুসগ্গেন একবিন্দুম্পী’’তি ইদঞ্চ অজ্ঝাহরিতব্বং। মতাতি অট্ঠকথাযং (পাচি॰ অট্ঠ॰ ২৫৯) ৰুত্তং সন্ধাযাহ। একতো ৰা নানতো ৰা ঠানা ভত্তং ৰিঞ্ঞাপেত্ৰা একরসং কত্ৰা অন্তমসো কুসগ্গেন একবিন্দুম্পি ভুঞ্জতি চে, নৰ পাচিত্তিযো মতাতি যোজনা।

    1402.‘‘Viññāpetvā’’ti imassa kammabhūtaṃ ‘‘bhatta’’nti adhikataṃ. Gāthābandhavasena vā-saddassa rasso kato. Ekato vāti yojanā, ‘‘nānato’’tipi gahitameva, ekaṭṭhānato vā nānaṭṭhānato vāti vuttaṃ hoti. Yathāha ‘‘sace pana sabbehipi sappiādīhi ekaṭṭhāne vā nānaṭṭhāne vā viññāpetvā’’tiādi (pāci. aṭṭha. 259). Teneva bhuñjatīti ettha parikappasūcakaṃ ‘‘ce’’ti idañca avakaṃsasandassanatthaṃ ‘‘kusaggena ekabindumpī’’ti idañca ajjhāharitabbaṃ. Matāti aṭṭhakathāyaṃ (pāci. aṭṭha. 259) vuttaṃ sandhāyāha. Ekato vā nānato vā ṭhānā bhattaṃ viññāpetvā ekarasaṃ katvā antamaso kusaggena ekabindumpi bhuñjati ce, nava pācittiyo matāti yojanā.

    ১৪০৩. অকপ্পিযেন সপ্পিনা দেহীতি ৰুত্তেপীতি যোজনা, সহত্থে করণৰচনং। ‘‘ভত্ত’’ন্তি অধিকতং। ‘‘যেসং মংসং কপ্পতি, তেসং সপ্পী’’তি (পাচি॰ ২৬০) ৰুত্তপ্পকারস্স ৰিপরিযাযতো অকপ্পিযং দট্ঠব্বং। তেন চে দেতীতি যদি তেন যাচিতেন তেনেৰ অকপ্পিযেন সদ্ধিং ওদনং দেতীতি।

    1403. Akappiyena sappinā dehīti vuttepīti yojanā, sahatthe karaṇavacanaṃ. ‘‘Bhatta’’nti adhikataṃ. ‘‘Yesaṃ maṃsaṃ kappati, tesaṃ sappī’’ti (pāci. 260) vuttappakārassa vipariyāyato akappiyaṃ daṭṭhabbaṃ. Tena ce detīti yadi tena yācitena teneva akappiyena saddhiṃ odanaṃ detīti.

    ১৪০৪. তথাসঞ্ঞিস্সাতি তথাসঞ্ঞিনো, গিলানোম্হীতিসঞ্ঞিনোতি অত্থো। যথাহ ‘‘গিলানো গিলানসঞ্ঞী, অনাপত্তী’’তি (পাচি॰ ২৬১)।

    1404.Tathāsaññissāti tathāsaññino, gilānomhītisaññinoti attho. Yathāha ‘‘gilāno gilānasaññī, anāpattī’’ti (pāci. 261).

    ১৪০৫. গিলানকালে ৰিঞ্ঞত্তং অগিলানস্স ভুঞ্জতো অনাপত্তি পকাসিতাতি যোজনা। এৰমিতরেহিপি দ্ৰীহি পদেহি যোজেতব্বং। যথাহ ‘‘অনাপত্তি গিলানো হুত্ৰা ৰিঞ্ঞাপেত্ৰা অগিলানো ভুঞ্জতী’’তিআদি (পাচি॰ ২৬২)। ঞাতকাদীনন্তি এত্থ ‘‘আযত্ত’’ন্তি সেসো। আদি-সদ্দেন ‘‘পৰারিতানং অঞ্ঞস্সত্থায অত্তনো ধনেন উম্মত্তকস্স আদিকম্মিকস্সা’’তি ইদং সঙ্গণ্হাতীতি।

    1405. Gilānakāle viññattaṃ agilānassa bhuñjato anāpatti pakāsitāti yojanā. Evamitarehipi dvīhi padehi yojetabbaṃ. Yathāha ‘‘anāpatti gilāno hutvā viññāpetvā agilāno bhuñjatī’’tiādi (pāci. 262). Ñātakādīnanti ettha ‘‘āyatta’’nti seso. Ādi-saddena ‘‘pavāritānaṃ aññassatthāya attano dhanena ummattakassa ādikammikassā’’ti idaṃ saṅgaṇhātīti.

    ১৪০৬. চত্তারি সমুট্ঠানানি দস্সেতুমাহ ‘‘কাযতো’’তিআদি।

    1406. Cattāri samuṭṭhānāni dassetumāha ‘‘kāyato’’tiādi.

    পণীতভোজনকথাৰণ্ণনা।

    Paṇītabhojanakathāvaṇṇanā.

    ১৪০৭. ‘‘অদিন্ন’’ন্তি ইমিনা অদিন্নাদানসিক্খাপদে (পারা॰ ৯১ আদযো) ৰিয পরপরিগ্গহিতং অৰত্ৰা অপ্পটিগ্গহিতমেৰ ৰত্তব্বং। যথাহ ‘‘অদিন্নং নাম অপ্পটিগ্গহিতকং ৰুচ্চতী’’তি (পাচি॰ ২৬৬)। মুখদ্ৰারন্তি মুখে দ্ৰারং মুখদ্ৰারং, গলনাল়িকা, ইমিনা পন ৰচনেন যং কিঞ্চি অজ্ঝোহরণীযং, তং মুখেন ৰা পৰিসতু নাসিকায ৰা, গলবিলং পৰিট্ঠমেৰ আপত্তিকরন্তি দীপেতি। আহারন্তি উদকদন্তপোনেহি অঞ্ঞং অজ্ঝোহরিতব্বং যং কিঞ্চি যাৰকালিকাদিং। যথাহ ‘‘আহারো নাম উদকদন্তপোনং ঠপেত্ৰা যং কিঞ্চি অজ্ঝোহরণীয’’ন্তি (পাচি॰ ২৬৬)।

    1407.‘‘Adinna’’nti iminā adinnādānasikkhāpade (pārā. 91 ādayo) viya parapariggahitaṃ avatvā appaṭiggahitameva vattabbaṃ. Yathāha ‘‘adinnaṃ nāma appaṭiggahitakaṃ vuccatī’’ti (pāci. 266). Mukhadvāranti mukhe dvāraṃ mukhadvāraṃ, galanāḷikā, iminā pana vacanena yaṃ kiñci ajjhoharaṇīyaṃ, taṃ mukhena vā pavisatu nāsikāya vā, galabilaṃ paviṭṭhameva āpattikaranti dīpeti. Āhāranti udakadantaponehi aññaṃ ajjhoharitabbaṃ yaṃ kiñci yāvakālikādiṃ. Yathāha ‘‘āhāro nāma udakadantaponaṃ ṭhapetvā yaṃ kiñci ajjhoharaṇīya’’nti (pāci. 266).

    আহরেয্যাতি মুখদ্ৰারং পৰেসেয্য, ইমিনা পরগলং অকত্ৰা মুখেন পটিগ্গহিতগ্গহণেপি নত্থি দোসোতি সূচিতং। তেনেৰাহ ‘‘দন্তপোনোদকং হিত্ৰা’’তি। তেনেৰ ৰুত্তং গণ্ঠিপদে ‘‘ভগৰতো দন্তকট্ঠস্স মুখদ্ৰারঠপনে অনাপত্তিৰচনেনেৰ যং কিঞ্চি ৰত্থুং পরগলং অকত্ৰা মুখে ঠপনে অনাপত্তিভাৰো ৰুত্তো’’তি। উদকঞ্হি যথাসুখং পাতুং, দন্তকট্ঠঞ্চ দন্তপোনপরিভোগেন পরিভুঞ্জিতুং ৰট্টতি, তস্স পন রসং গিলিতুং ন ৰট্টতি। সচেপি দন্তকট্ঠরসো অজানন্তস্স অন্তো পৰিসতি, পাচিত্তিযমেৰ। দন্তে পুনন্তি নিম্মলে করোন্তি এতেনাতি দন্তপোনং।

    Āhareyyāti mukhadvāraṃ paveseyya, iminā paragalaṃ akatvā mukhena paṭiggahitaggahaṇepi natthi dosoti sūcitaṃ. Tenevāha ‘‘dantaponodakaṃ hitvā’’ti. Teneva vuttaṃ gaṇṭhipade ‘‘bhagavato dantakaṭṭhassa mukhadvāraṭhapane anāpattivacaneneva yaṃ kiñci vatthuṃ paragalaṃ akatvā mukhe ṭhapane anāpattibhāvo vutto’’ti. Udakañhi yathāsukhaṃ pātuṃ, dantakaṭṭhañca dantaponaparibhogena paribhuñjituṃ vaṭṭati, tassa pana rasaṃ gilituṃ na vaṭṭati. Sacepi dantakaṭṭharaso ajānantassa anto pavisati, pācittiyameva. Dante punanti nimmale karonti etenāti dantaponaṃ.

    ১৪০৮-৯. ব্যতিরেকমুখেন অদিন্নলক্খণং, পদভাজনে চ ৰুত্তনযেন পঠমং দিন্নলক্খণং দস্সেন্তো আহ ‘‘হত্থপাসো’’তিআদি। হত্থপাসোতি পৰারণসিক্খাপদে –

    1408-9. Byatirekamukhena adinnalakkhaṇaṃ, padabhājane ca vuttanayena paṭhamaṃ dinnalakkhaṇaṃ dassento āha ‘‘hatthapāso’’tiādi. Hatthapāsoti pavāraṇasikkhāpade –

    ‘‘গণ্হতো পচ্ছিমং অঙ্গং, দদতো পুরিমং পন।

    ‘‘Gaṇhato pacchimaṃ aṅgaṃ, dadato purimaṃ pana;

    উভিন্নং অড্ঢতেয্যং চে, ৰিনা হত্থং পসারিত’’ন্তি॥ (ৰি॰ ৰি॰ ১২৭৫) –

    Ubhinnaṃ aḍḍhateyyaṃ ce, vinā hatthaṃ pasārita’’nti. (vi. vi. 1275) –

    ৰুত্তলক্খণো হত্থপাসো। অভিনীহারোতি তত্থেৰ ৰুত্তনযেন অভিমুখং কত্ৰা হরণঞ্চ। মজ্ঝিমুচ্চারণক্খমোতি পটিগ্গহেতব্বভারস্স উক্কট্ঠপরিচ্ছেদেন থামমজ্ঝিমেন পুরিসেন উক্খিপনারহতা। ভাৰপ্পধানোযং নিদ্দেসো। অৰকংসো পন ‘‘অন্তমসো রথরেণুমত্তম্পী’’তি (পাচি॰ অট্ঠ॰ ২৬৯) অট্ঠকথাৰচনতো ৰেদিতব্বো। উচ্চারণং উক্খিপনং। ‘‘অমনুস্সো’’তি ইমিনা তদঞ্ঞসত্তসামঞ্ঞেন তিরচ্ছানগতাপি ৰেদিতব্বা। ‘‘পক্খী ৰা’’তিআদিৰক্খমানেন ৰা ৰেদিতব্বা। কাযাদিনাতি কাযকাযপটিবদ্ধনিস্সগ্গিযানং অঞ্ঞতরেন। তেনেৰাহ ‘‘তিধা’’তি।

    Vuttalakkhaṇo hatthapāso. Abhinīhāroti tattheva vuttanayena abhimukhaṃ katvā haraṇañca. Majjhimuccāraṇakkhamoti paṭiggahetabbabhārassa ukkaṭṭhaparicchedena thāmamajjhimena purisena ukkhipanārahatā. Bhāvappadhānoyaṃ niddeso. Avakaṃso pana ‘‘antamaso rathareṇumattampī’’ti (pāci. aṭṭha. 269) aṭṭhakathāvacanato veditabbo. Uccāraṇaṃ ukkhipanaṃ. ‘‘Amanusso’’ti iminā tadaññasattasāmaññena tiracchānagatāpi veditabbā. ‘‘Pakkhī vā’’tiādivakkhamānena vā veditabbā. Kāyādināti kāyakāyapaṭibaddhanissaggiyānaṃ aññatarena. Tenevāha ‘‘tidhā’’ti.

    দ্ৰিধাতি কাযেন ৰা কাযপটিবদ্ধেন ৰা। পঞ্চঙ্গসংযোগেতি এত্থ ‘‘হত্থপাসো’’তি পঠমঙ্গং, ‘‘অভিনীহারো’’তি দুতিযং, ‘‘মজ্ঝিমুচ্চারণক্খমো’’তি ততিযং, ‘‘মনুস্সো…পে॰… তিধা’’তি চতুত্থং, ‘‘পটিগ্গণ্হাতি…পে॰… দ্ৰিধা’’তি পঞ্চমন্তি ইমানি পঞ্চ অঙ্গানি, পঞ্চন্নং অঙ্গানং সংযোগো সমাগমো সন্নিপাতো পঞ্চঙ্গসংযোগো, তস্মিং। গহণন্তি পটিগ্গহণং। তস্স ভিক্খুনো। রূহতি সম্পজ্জতি।

    Dvidhāti kāyena vā kāyapaṭibaddhena vā. Pañcaṅgasaṃyogeti ettha ‘‘hatthapāso’’ti paṭhamaṅgaṃ, ‘‘abhinīhāro’’ti dutiyaṃ, ‘‘majjhimuccāraṇakkhamo’’ti tatiyaṃ, ‘‘manusso…pe… tidhā’’ti catutthaṃ, ‘‘paṭiggaṇhāti…pe… dvidhā’’ti pañcamanti imāni pañca aṅgāni, pañcannaṃ aṅgānaṃ saṃyogo samāgamo sannipāto pañcaṅgasaṃyogo, tasmiṃ. Gahaṇanti paṭiggahaṇaṃ. Tassa bhikkhuno. Rūhati sampajjati.

    ১৪১০-১২. ইতরোতি পটিগ্গাহকো। তস্স অঙ্গস্স। ন গচ্ছতীতি নগো, ‘‘নগো’’তি রুক্খোপি পব্বতোপি ৰুচ্চতি। এৰরূপেতি ঈদিসে উচ্চনীচট্ঠানে।

    1410-12.Itaroti paṭiggāhako. Tassa aṅgassa. Na gacchatīti nago, ‘‘nago’’ti rukkhopi pabbatopi vuccati. Evarūpeti īdise uccanīcaṭṭhāne.

    ১৪১৩. সোণ্ডাযাতি হত্থেন।

    1413.Soṇḍāyāti hatthena.

    ১৪১৫-৬. ঈসকং ওনত্ৰা থোকং নামেত্ৰা তেন ভিক্খুনা তং হেট্ঠিমং ভাজনং একদেসেনাপি পটিচ্ছিতব্বন্তি যোজনা।

    1415-6.Īsakaṃ onatvā thokaṃ nāmetvā tena bhikkhunā taṃ heṭṭhimaṃ bhājanaṃ ekadesenāpi paṭicchitabbanti yojanā.

    ১৪১৭. উগ্ঘাটেত্ৰা উচ্চারেত্ৰা, ভাজনানি ৰিসুং ৰিসুং ওরোপেত্ৰাতি ৰুত্তং হোতি।

    1417.Ugghāṭetvā uccāretvā, bhājanāni visuṃ visuṃ oropetvāti vuttaṃ hoti.

    ১৪১৮. কাজভত্তন্তি ভত্তকাজং, ভত্তভরিতং পিটকন্তি ৰুত্তং হোতি। ওনত্ৰা দেতীতি সযং ওনমিত্ৰা ব্যাভঙ্গিং দেতি।

    1418.Kājabhattanti bhattakājaṃ, bhattabharitaṃ piṭakanti vuttaṃ hoti. Onatvā detīti sayaṃ onamitvā byābhaṅgiṃ deti.

    ১৪১৯. ‘‘তিংসহত্থো’’তি ইদং তিংসরতনমত্তো চে হোতি, ‘‘দূর’’ন্তি ন পরিসঙ্কিতব্বোতি দস্সনত্থমাহ। গহিতেকস্মিন্তি উভযকোটীসু ঠপিতে দ্ৰে ঘটে পটিগ্গহাপেতুং হত্থপাসে ঠিতেন দাযকেন দিয্যমানং তিংসহত্থৰেণুং পটিগ্গণ্হন্তেন যেন কেনচি কাযপ্পদেসেন ৰা কাযপটিবদ্ধেন ৰা ‘‘ইমং গণ্হামী’’তি আভোগং কত্ৰা মঞ্চাদীসু যত্থ কত্থচি ফুসিত্ৰা পটিগ্গহিতেতি ৰুত্তং হোতি। তং সব্বন্তি তেসু দ্ৰীসু ঘটেসু পক্খিত্তং সব্বমেৰ। গহিতমেৰাতি পটিগ্গহিতমেৰ হোতি, দাযকস্স হত্থপাসব্ভন্তরে গতত্তা ইদং তস্স কাযপটিবদ্ধন্তি ‘‘দূর’’ন্তি সঙ্কা ন কাতব্বাতি এৰকারেন দীপেতি। ‘‘দ্ৰীসু ঘটেসু ভূমিযং ঠপিতেসুপি তত্থ বন্ধনৰেল়ুযং পটিগ্গণ্হনমত্তেনেৰ পটিগ্গহিতং হোতী’’তি গণ্ঠিপদে ৰুত্তং।

    1419.‘‘Tiṃsahattho’’ti idaṃ tiṃsaratanamatto ce hoti, ‘‘dūra’’nti na parisaṅkitabboti dassanatthamāha. Gahitekasminti ubhayakoṭīsu ṭhapite dve ghaṭe paṭiggahāpetuṃ hatthapāse ṭhitena dāyakena diyyamānaṃ tiṃsahatthaveṇuṃ paṭiggaṇhantena yena kenaci kāyappadesena vā kāyapaṭibaddhena vā ‘‘imaṃ gaṇhāmī’’ti ābhogaṃ katvā mañcādīsu yattha katthaci phusitvā paṭiggahiteti vuttaṃ hoti. Taṃ sabbanti tesu dvīsu ghaṭesu pakkhittaṃ sabbameva. Gahitamevāti paṭiggahitameva hoti, dāyakassa hatthapāsabbhantare gatattā idaṃ tassa kāyapaṭibaddhanti ‘‘dūra’’nti saṅkā na kātabbāti evakārena dīpeti. ‘‘Dvīsu ghaṭesu bhūmiyaṃ ṭhapitesupi tattha bandhanaveḷuyaṃ paṭiggaṇhanamatteneva paṭiggahitaṃ hotī’’ti gaṇṭhipade vuttaṃ.

    ১৪২০-২৪. ‘‘কটসারকে’’তি ইমিনা দোণিফলকাদযো উপলক্খিতা। ‘‘নিসীদতী’’তি ইদং ‘‘তিট্ঠতী’’তিআদীনং উপলক্খণং। মঞ্চাদীনি ফুসিত্ৰাতি এত্থ ‘‘অঙ্গুলিযাপী’’তি সেসো। যথাহ ‘‘পটিগ্গহণসঞ্ঞায মঞ্চাদীনি অঙ্গুলিযাপি ফুসিত্ৰা ঠিতেন ৰা নিসিন্নেন ৰা নিপন্নেন ৰা’’তিআদি (পাচি॰ অট্ঠ॰ ২৬৫)। পত্তেসূতি তথা ঠপিতেসু সব্বেসু পত্তেসুযেৰ। যঞ্চ দীযতীতি এত্থ ‘‘তথা ঠিতেনা’’তি সামত্থিযা লব্ভতি।

    1420-24.‘‘Kaṭasārake’’ti iminā doṇiphalakādayo upalakkhitā. ‘‘Nisīdatī’’ti idaṃ ‘‘tiṭṭhatī’’tiādīnaṃ upalakkhaṇaṃ. Mañcādīni phusitvāti ettha ‘‘aṅguliyāpī’’ti seso. Yathāha ‘‘paṭiggahaṇasaññāya mañcādīni aṅguliyāpi phusitvā ṭhitena vā nisinnena vā nipannena vā’’tiādi (pāci. aṭṭha. 265). Pattesūti tathā ṭhapitesu sabbesu pattesuyeva. Yañca dīyatīti ettha ‘‘tathā ṭhitenā’’ti sāmatthiyā labbhati.

    মঞ্চাদীসু অঙ্গুলিআদিনা যেন কেনচি ফুট্ঠমত্তেপি পটিগ্গহণস্স রুহণভাৰং দস্সেত্ৰা ইদানি তদারোহণেনাপি সিজ্ঝতীতি দস্সেতুমাহ ‘‘পটিগ্গহেস্সামী’’তিআদি। সচে পন পটিগ্গহেস্সামিচ্চেৰ মঞ্চাদীনি আরুহিত্ৰা নিসীদতি, দাযকোপি হত্থপাসে ঠত্ৰান দেতি চে, তং সব্বং গহিতং হোতীতি যোজনা।

    Mañcādīsu aṅguliādinā yena kenaci phuṭṭhamattepi paṭiggahaṇassa ruhaṇabhāvaṃ dassetvā idāni tadārohaṇenāpi sijjhatīti dassetumāha ‘‘paṭiggahessāmī’’tiādi. Sace pana paṭiggahessāmicceva mañcādīni āruhitvā nisīdati, dāyakopi hatthapāse ṭhatvāna deti ce, taṃ sabbaṃ gahitaṃ hotīti yojanā.

    কুচ্ছিযা কুচ্ছিং আহচ্চ যে পত্তা ভূমিযং ঠিতা, তেসু যং যং পত্তং অঙ্গুলিযাপি ৰা সূচিযাপি ৰা ফুসিত্ৰা নিসিন্নো, তত্থ তত্থেৰ দীযমানম্পি পটিগ্গণ্হাতি, ৰট্টতীতি যোজনা।

    Kucchiyā kucchiṃ āhacca ye pattā bhūmiyaṃ ṭhitā, tesu yaṃ yaṃ pattaṃ aṅguliyāpi vā sūciyāpi vā phusitvā nisinno, tattha tattheva dīyamānampi paṭiggaṇhāti, vaṭṭatīti yojanā.

    ১৪২৫. কটসারাদযো সচে মহন্তা, পটিগ্গহণং ন রুহেয্যাতি ৰিকপ্পো সিযাতি তন্নিৰত্তনত্থমাহ ‘‘কটসারকে’’তিআদি। ‘‘মহন্তস্মি’’ন্তি ইমিনা কটসারকস্স পুন ৰচনে হেতুমাহ। হত্থত্থরং নাম হত্থিপিট্ঠে অত্থরিতব্বং অত্থরণং। আদি-সদ্দেন অস্সত্থররথত্থরাদিং সঙ্গণ্হাতি। ঠিতপত্তেসু দিয্যমানং গণ্হতো পটিগ্গহণরুহণহেতুং দস্সেতি ‘‘হত্থপাসস্মিং ৰিজ্জমানে তূ’’তি। তু-সদ্দো ৰুত্তৰিসেসমেৰ জোতেতি।

    1425. Kaṭasārādayo sace mahantā, paṭiggahaṇaṃ na ruheyyāti vikappo siyāti tannivattanatthamāha ‘‘kaṭasārake’’tiādi. ‘‘Mahantasmi’’nti iminā kaṭasārakassa puna vacane hetumāha. Hatthattharaṃ nāma hatthipiṭṭhe attharitabbaṃ attharaṇaṃ. Ādi-saddena assatthararathattharādiṃ saṅgaṇhāti. Ṭhitapattesu diyyamānaṃ gaṇhato paṭiggahaṇaruhaṇahetuṃ dasseti ‘‘hatthapāsasmiṃ vijjamāne tū’’ti. Tu-saddo vuttavisesameva joteti.

    ১৪২৬. তত্থজাতকপণ্ণেসূতি রুক্খেযেৰ ঠিতেসু পণ্ণেসু। গহেতুন্তি পটিগ্গহেতুং। ‘‘ন পনেতানী’’তিআদি যেন হেতুনা ন ৰট্টতি, তস্স দস্সনং। হি-সদ্দো পসিদ্ধিং সূচেতি।

    1426.Tatthajātakapaṇṇesūti rukkheyeva ṭhitesu paṇṇesu. Gahetunti paṭiggahetuṃ. ‘‘Na panetānī’’tiādi yena hetunā na vaṭṭati, tassa dassanaṃ. Hi-saddo pasiddhiṃ sūceti.

    ১৪২৭. থামমজ্ঝিমেন পুরিসেন উক্খিপিতুং অসক্কুণেয্যং অসংহারিযং। তাদিসেতি তথারূপে, অসংহারিযেতি ৰুত্তং হোতি। খাণুবদ্ধেতি ভূমিযং নিখাতখাণুকে বদ্ধে।

    1427. Thāmamajjhimena purisena ukkhipituṃ asakkuṇeyyaṃ asaṃhāriyaṃ. Tādiseti tathārūpe, asaṃhāriyeti vuttaṃ hoti. Khāṇubaddheti bhūmiyaṃ nikhātakhāṇuke baddhe.

    ১৪২৮. তিন্তিণিকাতি চিঞ্চা। আদি-সদ্দেন তথা খুদ্দকানং কদম্বপুপ্ফপণ্ণাদীনং গহণং। ‘‘তিন্তিণিকাদিপণ্ণেসূ’’তি ৰচনতো সাখাসু পটিগ্গহণং রুহতীতি দট্ঠব্বং। ভূমিযং পত্থটেসূতি যোজেতব্বং। যথাহ ‘‘ভূমিযং অত্থতেসু সুখুমেসু তিন্তিণিকাদিপণ্ণেসুপি পটিগ্গহণং ন রুহতী’’তি (পাচি॰ অট্ঠ॰ ২৬৫)।

    1428.Tintiṇikāti ciñcā. Ādi-saddena tathā khuddakānaṃ kadambapupphapaṇṇādīnaṃ gahaṇaṃ. ‘‘Tintiṇikādipaṇṇesū’’ti vacanato sākhāsu paṭiggahaṇaṃ ruhatīti daṭṭhabbaṃ. Bhūmiyaṃ patthaṭesūti yojetabbaṃ. Yathāha ‘‘bhūmiyaṃ atthatesu sukhumesu tintiṇikādipaṇṇesupi paṭiggahaṇaṃ na ruhatī’’ti (pāci. aṭṭha. 265).

    ১৪২৯. পরিৰেসকোতি দাযকো।

    1429.Parivesakoti dāyako.

    ১৪৩০. অসেসতো পুঞ্ছিত্ৰাতি যোজনা।

    1430. Asesato puñchitvāti yojanā.

    ১৪৩১. পটিগ্গহেত্ৰাৰাতি পত্তং পটিগ্গহেত্ৰাৰ। ভিক্খা গহেতব্বাতি সম্বন্ধো।

    1431.Paṭiggahetvāvāti pattaṃ paṭiggahetvāva. Bhikkhā gahetabbāti sambandho.

    ১৪৩২. অপটিগ্গহিতেতি এত্থ ‘‘পত্তে’’তি সেসো। তং পচ্ছা পটিগ্গহেত্ৰা পরিভুঞ্জতো অনাপত্তীতি যোজনা।

    1432.Apaṭiggahiteti ettha ‘‘patte’’ti seso. Taṃ pacchā paṭiggahetvā paribhuñjato anāpattīti yojanā.

    ১৪৩৩. অনাদিযিত্ৰাতি অগ্গহেত্ৰা, তস্মিং ৰচনে আদরং অকত্ৰাতি ৰুত্তং হোতি।

    1433.Anādiyitvāti aggahetvā, tasmiṃ vacane ādaraṃ akatvāti vuttaṃ hoti.

    ১৪৩৫. অঞ্ঞস্স অনুপসম্পন্নস্স।

    1435.Aññassa anupasampannassa.

    ১৪৩৬. পুব্বাভোগস্স অনুরূপৰসেন ‘‘সামণেরস্স তং দত্ৰা…পে॰… পন ৰট্টতী’’তি ৰুত্তং। যস্মা পন তং ‘‘অঞ্ঞস্স দস্সামী’’তি চিত্তুপ্পাদমত্তেন পরসন্তকং নাম ন হোতি, তস্মা তস্স অদত্ৰাপি পটিগ্গহেত্ৰা পরিভুঞ্জিতুং ৰট্টতি।

    1436. Pubbābhogassa anurūpavasena ‘‘sāmaṇerassa taṃ datvā…pe… pana vaṭṭatī’’ti vuttaṃ. Yasmā pana taṃ ‘‘aññassa dassāmī’’ti cittuppādamattena parasantakaṃ nāma na hoti, tasmā tassa adatvāpi paṭiggahetvā paribhuñjituṃ vaṭṭati.

    ১৪৩৭-৯. ভিক্খুনোতি অঞ্ঞস্স ভিক্খুস্স। ভত্তস্সাতি কঞ্জিকাদিদ্রৰমিস্সভত্তমাহ। উপ্লৰতীতি উপরি প্লৰতি। কঞ্জিকন্তি আরনালং, ইমস্স উপলক্খণত্তা খীরতক্কাদিদ্রৰং সঙ্গহিতং। পৰাহেত্ৰাতি মত্থকতো পলাপেত্ৰা। অন্তো পৰিট্ঠং সচে তন্তি তং রজং যদি ভত্তস্স অন্তো পৰিট্ঠং হোতি। পটিগ্গহেতব্বন্তি অনুপসম্পন্নে অসতি হত্থতো অমোচেন্তেনেৰ যত্থ অনুপসম্পন্নো অত্থি, তং তত্থ নেত্ৰা পটিগ্গহেতব্বং।

    1437-9.Bhikkhunoti aññassa bhikkhussa. Bhattassāti kañjikādidravamissabhattamāha. Uplavatīti upari plavati. Kañjikanti āranālaṃ, imassa upalakkhaṇattā khīratakkādidravaṃ saṅgahitaṃ. Pavāhetvāti matthakato palāpetvā. Anto paviṭṭhaṃ sace tanti taṃ rajaṃ yadi bhattassa anto paviṭṭhaṃ hoti. Paṭiggahetabbanti anupasampanne asati hatthato amocenteneva yattha anupasampanno atthi, taṃ tattha netvā paṭiggahetabbaṃ.

    ১৪৪০. অপনীযাৰাতি এত্থ ‘‘থূল’’ন্তি ইদং ‘‘সুখুমং চে’’তি ৰক্খমানৰিপরিযাযতো লব্ভতি। সভত্তং অপনীযাতি সম্বন্ধো। যথাহ ‘‘উপরিভত্তেন সদ্ধিং অপনেতব্বং, পটিগ্গহেত্ৰা ৰা ভুঞ্জিতব্ব’’ন্তি (পাচি॰ অট্ঠ॰ ২৬৫)।

    1440.Apanīyāvāti ettha ‘‘thūla’’nti idaṃ ‘‘sukhumaṃ ce’’ti vakkhamānavipariyāyato labbhati. Sabhattaṃ apanīyāti sambandho. Yathāha ‘‘uparibhattena saddhiṃ apanetabbaṃ, paṭiggahetvā vā bhuñjitabba’’nti (pāci. aṭṭha. 265).

    ১৪৪১. থেৰোতি বিন্দু। থেৰো…পে॰… ৰট্টতীতি এত্থ যথা পঠমতরং পতিতথেৰে দোসো নত্থি, তথা আকিরিত্ৰা অপনেন্তানং পচ্ছা পতিতথেৰেপি অভিহটত্তা নেৰত্থি দোসো।

    1441.Thevoti bindu. Thevo…pe… vaṭṭatīti ettha yathā paṭhamataraṃ patitatheve doso natthi, tathā ākiritvā apanentānaṃ pacchā patitathevepi abhihaṭattā nevatthi doso.

    ১৪৪২-৪. চরুকেনাতি খুদ্দকউক্খলিযা। ততো চরুকতো। মসীতি জল্লিকাআদিকা ভস্মা। ভাজনেতি ভাজনপত্তাদিভাজনে। তস্স চাতি তস্স মসিআদিনো চ।

    1442-4.Carukenāti khuddakaukkhaliyā. Tato carukato. Masīti jallikāādikā bhasmā. Bhājaneti bhājanapattādibhājane. Tassa cāti tassa masiādino ca.

    অনন্তরস্স ভিক্খুস্স দীযমানং যং পত্ততো উপ্পতিত্ৰা ইতরস্স ভিক্খুনো পত্তে সচে পততি, তং পটিগ্গহিতমেৰ হোতি, তস্মা ৰট্টতেৰাতি যোজনা। ‘‘দীযমান’’ন্তি এত্থ ‘‘ভত্তাদিকং যং কিঞ্চী’’তি পকরণতো লব্ভতি। ৰট্টতেৰা যন্তি এত্থ ‘‘ৰট্টতেৰ অয’’ন্তি পদচ্ছেদো ন কাতব্বো ‘‘অয’’ন্তি ইমিনা সম্বন্ধনীযস্স অভাৰতো। তস্মা ৰ-কারো গাথাছন্দৰসেন দীঘং কত্ৰা ৰুত্তোতি ৰেদিতব্বো।

    Anantarassa bhikkhussa dīyamānaṃ yaṃ pattato uppatitvā itarassa bhikkhuno patte sace patati, taṃ paṭiggahitameva hoti, tasmā vaṭṭatevāti yojanā. ‘‘Dīyamāna’’nti ettha ‘‘bhattādikaṃ yaṃ kiñcī’’ti pakaraṇato labbhati. Vaṭṭatevā yanti ettha ‘‘vaṭṭateva aya’’nti padacchedo na kātabbo ‘‘aya’’nti iminā sambandhanīyassa abhāvato. Tasmā va-kāro gāthāchandavasena dīghaṃ katvā vuttoti veditabbo.

    ১৪৪৫-৬. পাযাসস্সাতি এত্থ পূরণযোগে সামিৰচনং, পাযাসেনাতি ৰুত্তং হোতি। উণ্হতোতি উণ্হত্তা। ন সক্কতীতি ন সক্কোতি। মুখৰট্টিযং ৰট্টতীতি মুখৰট্টিং উক্খিপিত্ৰা হত্থে ফুসাপিতে গণ্হিতুং ৰট্টতি। তথা মুখৰট্টিযা গহেতুং ন সক্কা চে, আধারকেনপি গহেতব্বোতি যোজনা।

    1445-6.Pāyāsassāti ettha pūraṇayoge sāmivacanaṃ, pāyāsenāti vuttaṃ hoti. Uṇhatoti uṇhattā. Na sakkatīti na sakkoti. Mukhavaṭṭiyaṃ vaṭṭatīti mukhavaṭṭiṃ ukkhipitvā hatthe phusāpite gaṇhituṃ vaṭṭati. Tathā mukhavaṭṭiyā gahetuṃ na sakkā ce, ādhārakenapi gahetabboti yojanā.

    ১৪৪৭-৮. আহরিযমানং ৰা নেৰ জানাতি, দীযমানং ৰা ন জানাতীতি যোজনা। গাথাবন্ধৰসেন ‘‘জানতী’’তি রস্সো কতো। আভোগন্তি ‘‘গণ্হামী’’তি আভোগং। যথাহ মহাপচ্চরিযং ‘‘আভোগমত্তমেৰ হি এত্থ পমাণ’’ন্তি (পাচি॰ অট্ঠ॰ ২৬৫)। ‘‘কাযেন ৰা কাযপটিবদ্ধেন ৰা পটিগ্গণ্হাতী’’তি (পাচি॰ অট্ঠ॰ ২৬৫) ৰুত্তত্তা পত্তং গহেত্ৰা নিসিন্নত্তা ‘‘কাযপটিবদ্ধেন গণ্হিস্সামী’’তি আভোগং কত্ৰাতিপি যুজ্জতেৰ।

    1447-8. Āhariyamānaṃ vā neva jānāti, dīyamānaṃ vā na jānātīti yojanā. Gāthābandhavasena ‘‘jānatī’’ti rasso kato. Ābhoganti ‘‘gaṇhāmī’’ti ābhogaṃ. Yathāha mahāpaccariyaṃ ‘‘ābhogamattameva hi ettha pamāṇa’’nti (pāci. aṭṭha. 265). ‘‘Kāyena vā kāyapaṭibaddhena vā paṭiggaṇhātī’’ti (pāci. aṭṭha. 265) vuttattā pattaṃ gahetvā nisinnattā ‘‘kāyapaṭibaddhena gaṇhissāmī’’ti ābhogaṃ katvātipi yujjateva.

    ১৪৪৯. ‘‘হত্থেন মুঞ্চিত্ৰা’’তি ইদং ‘‘আধারকম্পি ৰা’’তি ইমিনাপি যোজেতব্বং। ‘‘পাদেন পেল্লেত্ৰা’’তি ইমিনা পন ‘‘আধারক’’ন্তি ইদমেৰ যোজেতব্বং। যথাহ ‘‘হত্থেন আধারকং মুঞ্চিত্ৰা পাদেন পেল্লেত্ৰা নিদ্দাযতী’’তি (পাচি॰ অট্ঠ॰ ২৬৫)। পেল্লেত্ৰাতি পীল়েত্ৰা, অক্কমিত্ৰাতি ৰুত্তং হোতি।

    1449.‘‘Hatthena muñcitvā’’ti idaṃ ‘‘ādhārakampi vā’’ti imināpi yojetabbaṃ. ‘‘Pādena pelletvā’’ti iminā pana ‘‘ādhāraka’’nti idameva yojetabbaṃ. Yathāha ‘‘hatthena ādhārakaṃ muñcitvā pādena pelletvā niddāyatī’’ti (pāci. aṭṭha. 265). Pelletvāti pīḷetvā, akkamitvāti vuttaṃ hoti.

    ১৪৫০. কমি-ধাতুস্স মজ্ঝে ‘‘অক্ক’’ইতি পদচ্ছেদো যতিহীনদোসোতি।

    1450. Kami-dhātussa majjhe ‘‘akka’’iti padacchedo yatihīnadosoti.

    ‘‘সিলোকে নিযতট্ঠানং, পদচ্ছেদং যতিং ৰিদূ।

    ‘‘Siloke niyataṭṭhānaṃ, padacchedaṃ yatiṃ vidū;

    তদপেতং যতিব্ভট্ঠং, সৰনুব্বেজনং যথা’’তি॥ –

    Tadapetaṃ yatibbhaṭṭhaṃ, savanubbejanaṃ yathā’’ti. –

    দণ্ডিনা ৰুত্তলক্খণতো সিদ্ধতায দোসো যথা ন হোতি, তথা ৰিচারেত্ৰা গহেতব্বং। কেচি পনেত্থ ই-কারাগমস্স পচ্চযভাৰত্তা তংসহিতো ম-কারো তগ্গহণেন সঙ্গয্হতীতি উভযপক্খভাগীতি ধাতুপচ্চযানং মজ্ঝে যতিযা ইচ্ছিতত্তা ন দোসোতি পরিহরন্তি। জাগরস্সাপীতি অনিদ্দাযন্তস্সাপি। অনাদরোতি অনাদরভাৰো।

    Daṇḍinā vuttalakkhaṇato siddhatāya doso yathā na hoti, tathā vicāretvā gahetabbaṃ. Keci panettha i-kārāgamassa paccayabhāvattā taṃsahito ma-kāro taggahaṇena saṅgayhatīti ubhayapakkhabhāgīti dhātupaccayānaṃ majjhe yatiyā icchitattā na dosoti pariharanti. Jāgarassāpīti aniddāyantassāpi. Anādaroti anādarabhāvo.

    ১৪৫১. তস্মাতি তথা গহণস্স অনাদরভাৰতো। তন্তি তং আধারকং পাদেন অক্কমিত্ৰা পটিগ্গহণঞ্চ। দীযমানন্তি দাযকেন পটিগ্গহাপিযমানং। পততীতি পটিগ্গাহকস্স হত্থং অফুসিত্ৰা রজোরহিতায সুদ্ধভূমিযা ৰা পদুমিনিপণ্ণাদীসু ৰা পততি। যথাহ ‘‘যং দিয্যমানং দাযকস্স হত্থতো পরিগল়িত্ৰা সুদ্ধায ভূমিযা ৰা পদুমিনিপণ্ণৰত্থকটসারকাদীসু ৰা পততি, তং সামং গহেত্ৰা পরিভুঞ্জিতুং ৰট্টতী’’তি (পাচি॰ অট্ঠ॰ ২৬৫)। সরজায ভূমিযা পতিতে রজং পুঞ্ছিত্ৰা ৰা ধোৰিত্ৰা ৰা পটিগ্গহাপেত্ৰা ৰা পরিভুঞ্জিতব্বন্তি ইদং অট্ঠকথাযং পন ‘‘সরজায ভূমিযং পততী’’তিআদিনা দস্সিতং। গহেতুন্তি এত্থ ‘‘ভুঞ্জিতু’’ন্তি চ ৰট্টতীতি এত্থ ‘‘পরিচ্চত্তং দাযকেহী’’তি চ সেসো। যথাহ ‘‘অনুজানামি ভিক্খৰে যং দিয্যমানং পততি, তং সামং গহেত্ৰা পরিভুঞ্জিতুং। পরিচ্চত্তং তং ভিক্খৰে দাযকেহী’’তি (চূল়ৰ॰ ২৭৩)। ‘‘যং দিয্যমানং পততী’’তি অৰিসেসেন ৰুত্তত্তা চতূসুপি কালিকেসু অযং নযো ৰেদিতব্বো।

    1451.Tasmāti tathā gahaṇassa anādarabhāvato. Tanti taṃ ādhārakaṃ pādena akkamitvā paṭiggahaṇañca. Dīyamānanti dāyakena paṭiggahāpiyamānaṃ. Patatīti paṭiggāhakassa hatthaṃ aphusitvā rajorahitāya suddhabhūmiyā vā paduminipaṇṇādīsu vā patati. Yathāha ‘‘yaṃ diyyamānaṃ dāyakassa hatthato parigaḷitvā suddhāya bhūmiyā vā paduminipaṇṇavatthakaṭasārakādīsu vā patati, taṃ sāmaṃ gahetvā paribhuñjituṃ vaṭṭatī’’ti (pāci. aṭṭha. 265). Sarajāya bhūmiyā patite rajaṃ puñchitvā vā dhovitvā vā paṭiggahāpetvā vā paribhuñjitabbanti idaṃ aṭṭhakathāyaṃ pana ‘‘sarajāya bhūmiyaṃ patatī’’tiādinā dassitaṃ. Gahetunti ettha ‘‘bhuñjitu’’nti ca vaṭṭatīti ettha ‘‘pariccattaṃ dāyakehī’’ti ca seso. Yathāha ‘‘anujānāmi bhikkhave yaṃ diyyamānaṃ patati, taṃ sāmaṃ gahetvā paribhuñjituṃ. Pariccattaṃ taṃ bhikkhave dāyakehī’’ti (cūḷava. 273). ‘‘Yaṃ diyyamānaṃ patatī’’ti avisesena vuttattā catūsupi kālikesu ayaṃ nayo veditabbo.

    ১৪৫২. অব্বোহারিকনযং দস্সেতুমাহ ‘‘ভুঞ্জন্তান’’ন্তি।

    1452. Abbohārikanayaṃ dassetumāha ‘‘bhuñjantāna’’nti.

    ১৪৫৩-৪. তং মলং। তেসূতি উচ্ছুআদীসু ৰত্থূসু। তন্তি মলমিস্সকং উচ্ছুআদিকং ৰত্থু। ন পঞ্ঞাযতীতি ন পন পঞ্ঞাযতি। তস্মিন্তি উচ্ছুআদিৰত্থুস্মিং।

    1453-4.Taṃ malaṃ. Tesūti ucchuādīsu vatthūsu. Tanti malamissakaṃ ucchuādikaṃ vatthu. Na paññāyatīti na pana paññāyati. Tasminti ucchuādivatthusmiṃ.

    ১৪৫৫. নিসদোদুক্খলাদীনন্তি আদি-সদ্দেন নিসদপোতমুসলাদীনং গহণং।

    1455.Nisadodukkhalādīnanti ādi-saddena nisadapotamusalādīnaṃ gahaṇaṃ.

    ১৪৫৬. ৰাসিযা উপলক্খণত্তা তজ্জাতিকং যং কিঞ্চি সত্থম্পি গহেতব্বং। খীরেতি অনুপসম্পন্নেন তাপিতখীরে, ইদং উপরি আমকস্স ৰিসুং গহণেন ৰিঞ্ঞাযতি। নীলিকাতি নীলৰণ্ণং। সত্থকে ৰিয নিচ্ছযোতি সত্থেন উট্ঠিতমলে উচ্ছুখণ্ডে ৰিয পটিগ্গহেত্ৰা পরিভুঞ্জিতব্বন্তি ৰিনিচ্ছযো ৰেদিতব্বো।

    1456. Vāsiyā upalakkhaṇattā tajjātikaṃ yaṃ kiñci satthampi gahetabbaṃ. Khīreti anupasampannena tāpitakhīre, idaṃ upari āmakassa visuṃ gahaṇena viññāyati. Nīlikāti nīlavaṇṇaṃ. Satthake viya nicchayoti satthena uṭṭhitamale ucchukhaṇḍe viya paṭiggahetvā paribhuñjitabbanti vinicchayo veditabbo.

    ১৪৫৭. তন্তি তং অগ্গিসন্তত্তৰাসিআদিং, তাপৰত্থুতো ৰাসি গহেতব্বা।

    1457.Tanti taṃ aggisantattavāsiādiṃ, tāpavatthuto vāsi gahetabbā.

    ১৪৫৯. তন্তি তং হত্থাদিকাযাৰযৰং ৰা চীৰরং ৰা ধোৰিত্ৰা পতিতকিলিট্ঠজলমিস্সমোদনং। রুক্খমূলাদীসু নিসীদিত্ৰা ভুঞ্জন্তস্স পত্তাদীসু রুক্খপণ্ণাদিং ধোৰিত্ৰা পতিতকিলিট্ঠোদকেপি এসেৰ ৰিনিচ্ছযোতি দস্সেতুমাহ ‘‘এসেৰা’’তিআদি।

    1459.Tanti taṃ hatthādikāyāvayavaṃ vā cīvaraṃ vā dhovitvā patitakiliṭṭhajalamissamodanaṃ. Rukkhamūlādīsu nisīditvā bhuñjantassa pattādīsu rukkhapaṇṇādiṃ dhovitvā patitakiliṭṭhodakepi eseva vinicchayoti dassetumāha ‘‘esevā’’tiādi.

    ১৪৬০. জলং সচে সুদ্ধং পততি, ৰট্টতীতি যোজনা, ‘‘রুক্খতো’’তি লব্ভতি। অব্ভোকাসে চ সচে সুদ্ধং তোযং পততি, ৰট্টতীতি এত্থ ‘‘আকাসতো’’তি লব্ভতি। উভযত্থাপি রুক্খপণ্ণেসু, আকাসে চ রজস্স পঠমমেৰ ৰস্সোদকেন ধোৰিতত্তা আহ ‘‘সুদ্ধ’’ন্তি।

    1460. Jalaṃ sace suddhaṃ patati, vaṭṭatīti yojanā, ‘‘rukkhato’’ti labbhati. Abbhokāse ca sace suddhaṃ toyaṃ patati, vaṭṭatīti ettha ‘‘ākāsato’’ti labbhati. Ubhayatthāpi rukkhapaṇṇesu, ākāse ca rajassa paṭhamameva vassodakena dhovitattā āha ‘‘suddha’’nti.

    ১৪৬১. অচ্ছুপন্তেনাতি অফুসন্তেন। তস্স সামণেরস্স।

    1461.Acchupantenāti aphusantena. Tassa sāmaṇerassa.

    ১৪৬২. পত্তন্তি অনুপসম্পন্নস্স পত্তং। ছুপিত্ৰাতি অনুপসম্পন্নপত্তগতোদনং ফুসিত্ৰা। তং অত্তনো পত্তে ভত্তং। যথাহ ‘‘অপ্পটিগ্গহিতে ওদনং ছুপিত্ৰা পুন অত্তনো পত্তে ওদনং গণ্হন্তস্স উগ্গহিতকো হোতী’’তি (পাচি॰ অট্ঠ॰ ২৬৫)।

    1462.Pattanti anupasampannassa pattaṃ. Chupitvāti anupasampannapattagatodanaṃ phusitvā. Taṃ attano patte bhattaṃ. Yathāha ‘‘appaṭiggahite odanaṃ chupitvā puna attano patte odanaṃ gaṇhantassa uggahitako hotī’’ti (pāci. aṭṭha. 265).

    ১৪৬৪. পচ্ছাতি তস্মিং গহিতেপি অগহিতেপি পচ্ছা। তং পটিগ্গহিতভোজনং।

    1464.Pacchāti tasmiṃ gahitepi agahitepi pacchā. Taṃ paṭiggahitabhojanaṃ.

    ১৪৬৭. তস্স অত্তনো পত্তগতস্স ভত্তস্স।

    1467.Tassa attano pattagatassa bhattassa.

    ১৪৬৮. পরেনাতি অপ্পটিগ্গহিতপত্তেন।

    1468.Parenāti appaṭiggahitapattena.

    ১৪৬৯-৭০. ‘‘যাগুআদীনং পচনে ভিক্খূনং ভাজনে’’তি সম্বন্ধো। পচন্তি এত্থাতি পচনং, ভাজনং। ভাজনূপরি হত্থেসু সামণেরস্সাতি ভাজনস্স উপরি কতেসু সামণেরস্স হত্থেসু। পতিতং হত্থতো তস্মিন্তি তস্স সামণেরস্স হত্থতো পরিগল়িত্ৰা তস্মিং ভাজনে পতিতং।

    1469-70. ‘‘Yāguādīnaṃ pacane bhikkhūnaṃ bhājane’’ti sambandho. Pacanti etthāti pacanaṃ, bhājanaṃ. Bhājanūpari hatthesu sāmaṇerassāti bhājanassa upari katesu sāmaṇerassa hatthesu. Patitaṃ hatthato tasminti tassa sāmaṇerassa hatthato parigaḷitvā tasmiṃ bhājane patitaṃ.

    ১৪৭১. ‘‘ন করোতি অকপ্পিয’’ন্তি এত্থ কারণমাহ ‘‘পরিচ্চত্তঞ্হি ত’’ন্তি। তঞ্হি যস্মা পরিচ্চত্তং, তস্মা অকপ্পিযং ন করোতীতি ৰুত্তং হোতি। এৰং অকত্ৰাতি যথাৰুত্তপকারেন অকত্ৰা। আকিরতেৰ চেতি সচে ভাজনে আকিরতি এৰ। তং তথা পক্খিত্তং ভত্তভাজনং। নিরামিসং কত্ৰাতি তত্থ পতিতং আমিসং যথা ন তিট্ঠতি, এৰং ধোৰিত্ৰা ভুঞ্জিতব্বন্তি সম্বন্ধো।

    1471. ‘‘Na karoti akappiya’’nti ettha kāraṇamāha ‘‘pariccattañhi ta’’nti. Tañhi yasmā pariccattaṃ, tasmā akappiyaṃ na karotīti vuttaṃ hoti. Evaṃ akatvāti yathāvuttapakārena akatvā. Ākirateva ceti sace bhājane ākirati eva. Taṃ tathā pakkhittaṃ bhattabhājanaṃ. Nirāmisaṃ katvāti tattha patitaṃ āmisaṃ yathā na tiṭṭhati, evaṃ dhovitvā bhuñjitabbanti sambandho.

    ১৪৭২-৩. কুটন্তি ঘটং। আৰজ্জেতীতি কুটং নামেত্ৰা যাগুং আসিঞ্চতি।

    1472-3.Kuṭanti ghaṭaṃ. Āvajjetīti kuṭaṃ nāmetvā yāguṃ āsiñcati.

    ১৪৭৪. হত্থেতি দ্ৰে হত্থে। তত্থাতি তত্থ ভূমিযং ঠপিতেসু দ্ৰীসু হত্থতলেসু।

    1474.Hattheti dve hatthe. Tatthāti tattha bhūmiyaṃ ṭhapitesu dvīsu hatthatalesu.

    ১৪৭৫-৬. একস্স গহণূপগং চে ভারন্তি থামমজ্ঝিমেন একেন পুরিসেন উক্খিপনপ্পমাণং ভারং সচে ভৰেয্য। ‘‘তথা’’তি ইমিনা ‘‘একস্স গহণূপগং ভার’’ন্তি ইদং পচ্চামসতি।

    1475-6.Ekassa gahaṇūpagaṃ ce bhāranti thāmamajjhimena ekena purisena ukkhipanappamāṇaṃ bhāraṃ sace bhaveyya. ‘‘Tathā’’ti iminā ‘‘ekassa gahaṇūpagaṃ bhāra’’nti idaṃ paccāmasati.

    ১৪৭৭. লগ্গেন্তীতি ওলম্বন্তি। তত্থাতি তস্মিং মঞ্চপীঠে। ৰট্টতেৰাতি উগ্গহিতকং ন হোতীতি দীপেতি।

    1477.Laggentīti olambanti. Tatthāti tasmiṃ mañcapīṭhe. Vaṭṭatevāti uggahitakaṃ na hotīti dīpeti.

    ১৪৭৮. সম্মুজ্জন্তোতি সম্মজ্জন্তো। ঘট্টেতীতি অসঞ্চিচ্চ সম্মজ্জনিযা ফুসতি।

    1478.Sammujjantoti sammajjanto. Ghaṭṭetīti asañcicca sammajjaniyā phusati.

    ১৪৭৯. তং ঞত্ৰাতি পটিগ্গহিতভাৰং ঞত্ৰা। ঠপেতুং ৰট্টতি উগ্গহিতকং ন হোতীতি অধিপ্পাযো।

    1479.Taṃ ñatvāti paṭiggahitabhāvaṃ ñatvā. Ṭhapetuṃ vaṭṭati uggahitakaṃ na hotīti adhippāyo.

    ১৪৮০. তন্তি পটিগ্গহিতসঞ্ঞায গহিতং তং অপ্পটিগ্গহিতং। অঞ্ঞথা পন ন কত্তব্বন্তি অপিহিতং পিধাতুঞ্চ পিহিতং ৰিৰরিতুঞ্চ ন ৰট্টতীতি অত্থো।

    1480.Tanti paṭiggahitasaññāya gahitaṃ taṃ appaṭiggahitaṃ. Aññathā pana na kattabbanti apihitaṃ pidhātuñca pihitaṃ vivarituñca na vaṭṭatīti attho.

    ১৪৮১. বহি ঠপেতি চেতি যদি পুব্বে ঠপিতট্ঠানতো বহি ঠপেতি। তেনাতি বহি ঠপেত্ৰা মুত্তহত্থেন তেন ভিক্খুনা। তন্তি বহি ঠপিতং হত্থতো মুত্তং। ঞত্ৰাতি অপ্পটিগ্গহিতভাৰং ঞত্ৰা। তং তথা ঞত্ৰা ঠপিতং।

    1481.Bahiṭhapeti ceti yadi pubbe ṭhapitaṭṭhānato bahi ṭhapeti. Tenāti bahi ṭhapetvā muttahatthena tena bhikkhunā. Tanti bahi ṭhapitaṃ hatthato muttaṃ. Ñatvāti appaṭiggahitabhāvaṃ ñatvā. Taṃ tathā ñatvā ṭhapitaṃ.

    ১৪৮২-৩. উট্ঠেতি যদি কণ্ণিকাতি সচে কণ্ণিকা সঞ্জাযতি। সিঙ্গিৰেরাদিকেতি এত্থ আদি-সদ্দেন পিপ্ফলিআদীনং গহণং। মূলেতি পঞ্চমূলাদিকে মূলে। ঘুণচুণ্ণন্তি ঘুণপাণকেহি উপ্পাদিতচুণ্ণং। ‘‘তথা’’তি ইমিনা ‘‘উট্ঠেতী’’তি কিরিযং পচ্চামসতি। তংসমুট্ঠানতোতি পটিগ্গহিততেলাদীসু সমুপ্পন্নত্তা। তঞ্ঞেৰাতি পৰুচ্চতীতি পঠমপটিগ্গহিতং তমেৰ তেলাদিকন্তি ৰুচ্চতি। তেনাহ ‘‘পটিগ্গহণ…পে॰… ন ৰিজ্জতী’’তি।

    1482-3.Uṭṭheti yadi kaṇṇikāti sace kaṇṇikā sañjāyati. Siṅgiverādiketi ettha ādi-saddena pipphaliādīnaṃ gahaṇaṃ. Mūleti pañcamūlādike mūle. Ghuṇacuṇṇanti ghuṇapāṇakehi uppāditacuṇṇaṃ. ‘‘Tathā’’ti iminā ‘‘uṭṭhetī’’ti kiriyaṃ paccāmasati. Taṃsamuṭṭhānatoti paṭiggahitatelādīsu samuppannattā. Taññevāti pavuccatīti paṭhamapaṭiggahitaṃ tameva telādikanti vuccati. Tenāha ‘‘paṭiggahaṇa…pe… na vijjatī’’ti.

    ১৪৮৪-৫. কোচি পুগ্গলোতি সামণেরগমিকাদীসুপি যো কোচি সত্তো। তালপিণ্ডিন্তি তালকণ্ণিকং ফলং। অঞ্ঞো ভূমট্ঠোতি ভূমিযং ঠিতো অঞ্ঞো কোচি পুগ্গলো ইত্থী ৰা পুরিসো ৰা।

    1484-5.Kocipuggaloti sāmaṇeragamikādīsupi yo koci satto. Tālapiṇḍinti tālakaṇṇikaṃ phalaṃ. Añño bhūmaṭṭhoti bhūmiyaṃ ṭhito añño koci puggalo itthī vā puriso vā.

    ১৪৮৬. ছিন্দিত্ৰাতি ছিন্দং কত্ৰা। ৰতিন্তি হত্থপাসপ্পহোনকবহলৰতিং। যথাহ ‘‘হত্থপাসে সতী’’তি (পাচি॰ অট্ঠ॰ ২৬৫)। দণ্ডকে অফুসিত্ৰাৰাতি যত্তকেন গমনৰেগো নিব্বাযতি, এত্তকং, পহরণতো ৰতিদণ্ডকে ৰা অপ্পহরিত্ৰাতি ৰুত্তং হোতি। পহরিত্ৰা ঠত্ৰা গচ্ছতি চে, ন ৰট্টতি। যথাহ অট্ঠকথাযং ‘‘মযং পন ‘যং ঠানং পহটং, ততো সযং পতিতমিৰ হোতী’তি তক্কযাম। তস্মিম্পি অট্ঠত্ৰা গচ্ছন্তে যুজ্জতি সুঙ্কঘাতকতো পৰট্টেত্ৰা বহি পতিতভণ্ডং ৰিযা’’তি (পাচি॰ অট্ঠ॰ ২৬৫)।

    1486.Chinditvāti chindaṃ katvā. Vatinti hatthapāsappahonakabahalavatiṃ. Yathāha ‘‘hatthapāse satī’’ti (pāci. aṭṭha. 265). Daṇḍake aphusitvāvāti yattakena gamanavego nibbāyati, ettakaṃ, paharaṇato vatidaṇḍake vā appaharitvāti vuttaṃ hoti. Paharitvā ṭhatvā gacchati ce, na vaṭṭati. Yathāha aṭṭhakathāyaṃ ‘‘mayaṃ pana ‘yaṃ ṭhānaṃ pahaṭaṃ, tato sayaṃ patitamiva hotī’ti takkayāma. Tasmimpi aṭṭhatvā gacchante yujjati suṅkaghātakato pavaṭṭetvā bahi patitabhaṇḍaṃ viyā’’ti (pāci. aṭṭha. 265).

    ১৪৮৭-৮. পাকারোতি এত্থ ‘‘ৰতিং ৰা’’তি (পাচি॰ অট্ঠ॰ ২৬৫) অট্ঠকথাযং আগতত্তা ইদং অধিকারতো গহেতব্বং। ‘‘ন পুথুলো’’তি এত্থ অধিপ্পেতপ্পমাণং দস্সেতুমাহ ‘‘অন্তো…পে॰… পহোতি চে’’তি। ‘‘উদ্ধং হত্থসতং গন্ত্ৰা’’তি ইমিনা দাযকস্স দাতুমিচ্ছায আকাসং তং উক্খিপিত্ৰা ৰিস্সট্ঠভাৰং ঞাপেতি। সম্পত্তন্তি হত্থপ্পত্তং। গণ্হতোতি পটিগ্গহণসঞ্ঞায গণ্হতো।

    1487-8.Pākāroti ettha ‘‘vatiṃ vā’’ti (pāci. aṭṭha. 265) aṭṭhakathāyaṃ āgatattā idaṃ adhikārato gahetabbaṃ. ‘‘Na puthulo’’ti ettha adhippetappamāṇaṃ dassetumāha ‘‘anto…pe… pahoti ce’’ti. ‘‘Uddhaṃ hatthasataṃ gantvā’’ti iminā dāyakassa dātumicchāya ākāsaṃ taṃ ukkhipitvā vissaṭṭhabhāvaṃ ñāpeti. Sampattanti hatthappattaṃ. Gaṇhatoti paṭiggahaṇasaññāya gaṇhato.

    ১৪৮৯. ‘‘সামণের’’ন্তি ইদং উপলক্খণন্তি গিহিনোপি গহণং। তত্থেৰাতি খন্ধে এৰ। নিসিন্নো সামণেরো।

    1489.‘‘Sāmaṇera’’nti idaṃ upalakkhaṇanti gihinopi gahaṇaṃ. Tatthevāti khandhe eva. Nisinno sāmaṇero.

    ১৪৯১-২. ফলিনিং সাখন্তি ফলৰতিং সাখং। ‘‘খাদিতু’’ন্তি ইদং ‘‘চিত্তে সমুপ্পন্নে’’তি ইমিনা যোজেতব্বং। সচে ফলং খাদতি, এৰং খাদিতুং ৰট্টতীতি যোজনা। মক্খিকানং নিৰারত্থন্তি মক্খিকানং নিৰারেতুং।

    1491-2.Phaliniṃ sākhanti phalavatiṃ sākhaṃ. ‘‘Khāditu’’nti idaṃ ‘‘citte samuppanne’’ti iminā yojetabbaṃ. Sace phalaṃ khādati, evaṃ khādituṃ vaṭṭatīti yojanā. Makkhikānaṃ nivāratthanti makkhikānaṃ nivāretuṃ.

    ১৪৯৩. ছাযত্থঞ্চ মক্খিকা নিৰারেতুঞ্চ গয্হমানা ফলসাখা সুখপরিভোগত্থায কপ্পিযং কারাপেত্ৰা পটিগ্গহিতা চে, খাদিতুমিচ্ছায সতি পুন অপ্পটিগ্গহিতাপি ৰট্টতীতি দস্সেতুমাহ ‘‘কপ্পিযং পন কারেত্ৰা’’তিআদি।

    1493. Chāyatthañca makkhikā nivāretuñca gayhamānā phalasākhā sukhaparibhogatthāya kappiyaṃ kārāpetvā paṭiggahitā ce, khāditumicchāya sati puna appaṭiggahitāpi vaṭṭatīti dassetumāha ‘‘kappiyaṃ pana kāretvā’’tiādi.

    ১৪৯৪-৫. ‘‘তং সো পটিগ্গহাপেত্ৰা’’তি ৰক্খমানত্তা ‘‘গহেত্ৰা’’তি ইদং অপ্পটিগ্গহাপেত্ৰা গহণং সন্ধায ৰুত্তন্তি গহেতব্বং। তং পটিগ্গহিতন্তি এত্থ ‘‘চে পুব্বমেৰা’’তি সেসো।

    1494-5. ‘‘Taṃ so paṭiggahāpetvā’’ti vakkhamānattā ‘‘gahetvā’’ti idaṃ appaṭiggahāpetvā gahaṇaṃ sandhāya vuttanti gahetabbaṃ. Taṃ paṭiggahitanti ettha ‘‘ce pubbamevā’’ti seso.

    ১৪৯৬-৯. ভিক্খুস্স পাথেয্যতণ্ডুলেতি সম্বন্ধো। সোতি সামণেরো। ইতরেহীতি ভিক্খুনা গহিতেহি অত্তনো তণ্ডুলেহি।

    1496-9. Bhikkhussa pātheyyataṇḍuleti sambandho. Soti sāmaṇero. Itarehīti bhikkhunā gahitehi attano taṇḍulehi.

    দ্ৰীসু পত্তেসূতি উপলক্খণং। বহূসুপি এসেৰ নযো। অত্তনা লদ্ধং ভিক্খূনং দত্ৰা তেহি লদ্ধং অত্তনা গহেত্ৰা অঞ্ঞেসং দানৰসেন বহুন্নম্পি দাতুং ৰট্টতীতি অট্ঠকথাযং (পাচি॰ অট্ঠ॰ ২৬৫ অত্থতো সমানং) ৰুত্তং তমেৰ দস্সেতুমাহ ‘‘যাগুং ভিক্খুস্সা’’তিআদি। ‘‘আৰুসো তুয্হং যাগুং ময্হং দেহী’তি এৰং থেরেহি পটিপাটিযা যাচিত্ৰাপি পিৰিতুং ৰট্টতি, সব্বেহি সামণেরস্স সন্তকমেৰ ভুত্তং হোতী’’তি (পাচি॰ অট্ঠ॰ ২৬৫) অট্ঠকথাযং ৰুত্তং। সামণেরস্স পীতত্তাতি এত্থ ‘‘যাগুযা’’তিইদং অধিকারতো লব্ভতি।

    Dvīsu pattesūti upalakkhaṇaṃ. Bahūsupi eseva nayo. Attanā laddhaṃ bhikkhūnaṃ datvā tehi laddhaṃ attanā gahetvā aññesaṃ dānavasena bahunnampi dātuṃ vaṭṭatīti aṭṭhakathāyaṃ (pāci. aṭṭha. 265 atthato samānaṃ) vuttaṃ tameva dassetumāha ‘‘yāguṃ bhikkhussā’’tiādi. ‘‘Āvuso tuyhaṃ yāguṃ mayhaṃ dehī’ti evaṃ therehi paṭipāṭiyā yācitvāpi pivituṃ vaṭṭati, sabbehi sāmaṇerassa santakameva bhuttaṃ hotī’’ti (pāci. aṭṭha. 265) aṭṭhakathāyaṃ vuttaṃ. Sāmaṇerassa pītattāti ettha ‘‘yāguyā’’tiidaṃ adhikārato labbhati.

    ১৫০০. ইমস্সাতি পাথেয্যতণ্ডুলহারকস্স। ‘‘ন ৰিসেসতা’’তি ইমিনা ৰিসুং অৰত্তব্বতং দীপেতি।

    1500.Imassāti pātheyyataṇḍulahārakassa. ‘‘Na visesatā’’ti iminā visuṃ avattabbataṃ dīpeti.

    ১৫০১. অস্স ৰিসেসস্সাতি যথাৰুত্তৰিনিচ্ছযৰিসেসস্স ৰিসুং ৰত্তব্বভাৰেতি সেসো। তস্সাতি সামণেরতণ্ডুলহারকস্স ভিক্খুস্স। সালযভাৰন্তি অত্তনা হটতণ্ডুলেসু পরিক্খীণেসু ‘‘ইদং অম্হাকম্পি পদস্সতী’’তি সালযভাৰো। ছাযাদীনমত্থায গয্হমানায সাখায ইমিস্সা ফলং খাদিতুকামতায সতি খাদনারহন্তি আলযস্স কাতুং সক্কুণেয্যত্তা অযম্পি অৰিসেসোতি ৰিঞ্ঞাযতি, তত্থ সম্ভৰন্তং পন ৰিসেসং দস্সেতুমাহাতি ৰত্তুং যুজ্জতি।

    1501.Assa visesassāti yathāvuttavinicchayavisesassa visuṃ vattabbabhāveti seso. Tassāti sāmaṇerataṇḍulahārakassa bhikkhussa. Sālayabhāvanti attanā haṭataṇḍulesu parikkhīṇesu ‘‘idaṃ amhākampi padassatī’’ti sālayabhāvo. Chāyādīnamatthāya gayhamānāya sākhāya imissā phalaṃ khāditukāmatāya sati khādanārahanti ālayassa kātuṃ sakkuṇeyyattā ayampi avisesoti viññāyati, tattha sambhavantaṃ pana visesaṃ dassetumāhāti vattuṃ yujjati.

    ১৫০২-৪. নিচ্চালেতুং ন সক্কোতীতি নিচ্চালেত্ৰা সক্খরা অপনেতুং ন সক্কোতি। চেলকোতি চূল়সামণেরো। পক্ককালস্মিং ৰিৰরিত্ৰা পক্কতা ঞাতব্বাতি যোজনা। পি-সদ্দো পন-সদ্দত্থে। ওরোপেত্ৰাতি উদ্ধনতো ওরোপেত্ৰা। পুব্বতণ্ডুলধোৰনত্থায কতপটিগ্গহণস্সেৰ পমাণত্তা আহ ‘‘ন পচ্ছস্স পটিগ্গহণকারণ’’ন্তি। অস্সাতি ভোজনস্স।

    1502-4.Niccāletuṃ na sakkotīti niccāletvā sakkharā apanetuṃ na sakkoti. Celakoti cūḷasāmaṇero. Pakkakālasmiṃ vivaritvā pakkatā ñātabbāti yojanā. Pi-saddo pana-saddatthe. Oropetvāti uddhanato oropetvā. Pubbataṇḍuladhovanatthāya katapaṭiggahaṇasseva pamāṇattā āha ‘‘na pacchassa paṭiggahaṇakāraṇa’’nti. Assāti bhojanassa.

    ১৫০৫. কারিতন্তস্স দ্ৰিকম্মকত্তা আহ ‘‘উদ্ধনং সুদ্ধভাজন’’ন্তি, উদ্ধনেতি ৰুত্তং হোতি।

    1505. Kāritantassa dvikammakattā āha ‘‘uddhanaṃ suddhabhājana’’nti, uddhaneti vuttaṃ hoti.

    ১৫০৬. কোচীতি অনুপসম্পন্নো। তেন ভিক্খুনাতি উদ্ধনং সুদ্ধভাজনং আরোপেত্ৰা যেন অগ্গি কতো, তেন ভিক্খুনা। ইদঞ্চ উপলক্খণং অঞ্ঞেনপি ন কাতব্বত্তা।

    1506.Kocīti anupasampanno. Tena bhikkhunāti uddhanaṃ suddhabhājanaṃ āropetvā yena aggi kato, tena bhikkhunā. Idañca upalakkhaṇaṃ aññenapi na kātabbattā.

    ১৫০৭. পচ্ছাতি তণ্ডুলপক্খেপতো পচ্ছা। তং যাগুং। সচে পচতীতি অগ্গিং করোন্তো পচতি। সামপাকা ন মুচ্চতীতি তং যাগুং পিৰন্তো সামপাকদুক্কটতো ন মুচ্চতি।

    1507.Pacchāti taṇḍulapakkhepato pacchā. Taṃ yāguṃ. Sace pacatīti aggiṃ karonto pacati. Sāmapākā na muccatīti taṃ yāguṃ pivanto sāmapākadukkaṭato na muccati.

    ১৫০৮. ৰল্লিযা সহ তত্থ ৰল্লিযং জাতং ফলং কিঞ্চি ঈসকম্পি চালেতি, ততো লদ্ধং কিঞ্চি ফলং তস্সেৰ ভিক্খুনো ন ৰট্টতীতি যোজনা, তং পরিভুঞ্জতো দুরুপচিণ্ণদুক্কটং হোতীতি অধিপ্পাযো। তস্সেৰাতি এৰকারেন অঞ্ঞেসং ৰট্টতীতি দীপেতি।

    1508. Valliyā saha tattha valliyaṃ jātaṃ phalaṃ kiñci īsakampi cāleti, tato laddhaṃ kiñci phalaṃ tasseva bhikkhuno na vaṭṭatīti yojanā, taṃ paribhuñjato durupaciṇṇadukkaṭaṃ hotīti adhippāyo. Tassevāti evakārena aññesaṃ vaṭṭatīti dīpeti.

    ১৫০৯. পরামট্ঠুন্তি আমসিতুং। অপস্সযিতুন্তি অৰলম্বিতুং, অপস্সনং ৰা কাতুং। ‘‘কিরা’’তি ইমিনা কেৰলং মহাপচ্চরিযং (পাচি॰ অট্ঠ॰ ২৬৫) ৰুত্তভাৰং সূচেতি।

    1509.Parāmaṭṭhunti āmasituṃ. Apassayitunti avalambituṃ, apassanaṃ vā kātuṃ. ‘‘Kirā’’ti iminā kevalaṃ mahāpaccariyaṃ (pāci. aṭṭha. 265) vuttabhāvaṃ sūceti.

    ১৫১০-১. তত্থাতি তস্মিং তেলে। হত্থেন সণ্ডাসগ্গহণং অমুঞ্চন্তেন। তং তেলং।

    1510-1.Tatthāti tasmiṃ tele. Hatthena saṇḍāsaggahaṇaṃ amuñcantena. Taṃ telaṃ.

    ১৫১৫-৬. লোণকিচ্চন্তি অলৰণট্ঠানে লোণেন কাতব্বকিচ্চং। সন্নিহিতসেসকালিকসম্মিস্সং যাৰজীৰিকং ৰিয সমুদ্দোদকস্স অসন্নিধিভাৰং দস্সেতুমাহ ‘‘যাৰজীৰিকসঙ্খাত’’ন্তিআদি। কালৰিনিম্মুত্তন্তি অকালিকং, চতূসু কালিকেসু অসঙ্গহিতন্তি অত্থো।

    1515-6.Loṇakiccanti alavaṇaṭṭhāne loṇena kātabbakiccaṃ. Sannihitasesakālikasammissaṃ yāvajīvikaṃ viya samuddodakassa asannidhibhāvaṃ dassetumāha ‘‘yāvajīvikasaṅkhāta’’ntiādi. Kālavinimmuttanti akālikaṃ, catūsu kālikesu asaṅgahitanti attho.

    ১৫১৭. হিমস্স করকাতি হিমোদকস্স মুত্তা ৰিয পত্থিনসক্খরা। বহলম্পি চাতি পক্খিত্তট্ঠানে মুখে ৰা কদ্দমৰণ্ণস্স অপঞ্ঞাযনপ্পমাণবহলং পানীযঞ্চ। অপ্পটিগ্গহিতং ৰট্টতি। সচে কদ্দমৰণ্ণং পঞ্ঞাযতি, ন ৰট্টতীতি। যথাহ ‘‘সচে পন মুখে চ হত্থে চ লগ্গতি, ন ৰট্টতি, পটিগ্গহেত্ৰা পরিভুঞ্জিতব্ব’’ন্তি (পাচি॰ অট্ঠ॰ ২৬৫)।

    1517.Himassa karakāti himodakassa muttā viya patthinasakkharā. Bahalampi cāti pakkhittaṭṭhāne mukhe vā kaddamavaṇṇassa apaññāyanappamāṇabahalaṃ pānīyañca. Appaṭiggahitaṃ vaṭṭati. Sace kaddamavaṇṇaṃ paññāyati, na vaṭṭatīti. Yathāha ‘‘sace pana mukhe ca hatthe ca laggati, na vaṭṭati, paṭiggahetvā paribhuñjitabba’’nti (pāci. aṭṭha. 265).

    ১৫১৮. কসিতট্ঠানেতি কট্ঠট্ঠানে। ন ৰট্টতি অপ্পটিগ্গহিতং। এৰং সব্বত্থ।

    1518.Kasitaṭṭhāneti kaṭṭhaṭṭhāne. Na vaṭṭati appaṭiggahitaṃ. Evaṃ sabbattha.

    ১৫১৯. সোব্ভো দুক্খোগাহনজলাসযো। ‘‘আৰাটো’’তি কেচি। ককুধোতি অজ্জুনো।

    1519.Sobbho dukkhogāhanajalāsayo. ‘‘Āvāṭo’’ti keci. Kakudhoti ajjuno.

    ১৫২০. পানীযস্স ঘটেতি পানীযঘটে। তং পানীযঘটং।

    1520.Pānīyassa ghaṭeti pānīyaghaṭe. Taṃ pānīyaghaṭaṃ.

    ১৫২১. ৰাসত্থায পুপ্ফানি ৰাসপুপ্ফানি। তত্থাতি তস্মিং পানীযঘটে। কমল্লিকাসূতি পাটলিকুসুমাদীহিপি সহ কণ্টকমল্লিকাসু। দিন্নাসূতি পানীযে পক্খিত্তাসু।

    1521. Vāsatthāya pupphāni vāsapupphāni. Tatthāti tasmiṃ pānīyaghaṭe. Kamallikāsūti pāṭalikusumādīhipi saha kaṇṭakamallikāsu. Dinnāsūti pānīye pakkhittāsu.

    ১৫২২. ৰিসতীতি অন্তোগলং পৰিসতি। তেনেৰ অট্ঠকথাযং ‘‘অপ্পটিগ্গহেত্ৰা ঠপিতং পটিগ্গহেতব্ব’’ন্তি (পাচি॰ অট্ঠ॰ ২৬৫) ৰুত্তং। ইদং অট্ঠকথাৰচনং ‘‘অঞ্ঞত্র উদকদন্তপোনা’’তি (পাচি॰ ২৬৬) পাল়িযা ৰিরুজ্ঝতীতি চে? ন ৰিরুজ্ঝতি। সা হি কেৰলং দন্তকিচ্চং সন্ধায ৰুত্তা, ইদং রসং সন্ধায ৰুত্তন্তি। তেনেৰ তদনন্তরং ‘‘অজানন্তস্স রসে পৰিট্ঠেপি আপত্তিযেৰ। অচিত্তকঞ্হি ইদং সিক্খাপদ’’ন্তি (পাচি॰ অট্ঠ॰ ২৬৫) ৰুত্তং। তস্স সিক্খাপদস্স অচিত্তকতা ‘‘অপ্পটিগ্গহিতকে পটিগ্গহিতসঞ্ঞী’’তিআদিকায পাল়িযা কপ্পিযসঞ্ঞিনোপি পাচিত্তিযস্স ৰুত্তত্তা ৰিঞ্ঞাযতি। পসন্নোদকস্স পন অপ্পটিগ্গহেত্ৰাপি পাতব্বতায দন্তকট্ঠেন সদিসত্তা একযোগনিদ্দিট্ঠানং সহেৰ পৰত্তীতি ৰিঞ্ঞাযতি। উদকস্স চ দন্তপোনস্স চ তুল্যদোসেন ভৰিতব্বন্তি।

    1522.Visatīti antogalaṃ pavisati. Teneva aṭṭhakathāyaṃ ‘‘appaṭiggahetvā ṭhapitaṃ paṭiggahetabba’’nti (pāci. aṭṭha. 265) vuttaṃ. Idaṃ aṭṭhakathāvacanaṃ ‘‘aññatra udakadantaponā’’ti (pāci. 266) pāḷiyā virujjhatīti ce? Na virujjhati. Sā hi kevalaṃ dantakiccaṃ sandhāya vuttā, idaṃ rasaṃ sandhāya vuttanti. Teneva tadanantaraṃ ‘‘ajānantassa rase paviṭṭhepi āpattiyeva. Acittakañhi idaṃ sikkhāpada’’nti (pāci. aṭṭha. 265) vuttaṃ. Tassa sikkhāpadassa acittakatā ‘‘appaṭiggahitake paṭiggahitasaññī’’tiādikāya pāḷiyā kappiyasaññinopi pācittiyassa vuttattā viññāyati. Pasannodakassa pana appaṭiggahetvāpi pātabbatāya dantakaṭṭhena sadisattā ekayoganiddiṭṭhānaṃ saheva pavattīti viññāyati. Udakassa ca dantaponassa ca tulyadosena bhavitabbanti.

    ১৫২৩. মুত্তোদকসিঙ্ঘাণিকাদিদ্রৰঅস্সুখীরাদিদ্রৰস্স আপোধাতুপ্পকারত্তা, কণ্ণমলাদিনো ঘনদব্বস্স পথৰিধাতুপ্পকারত্তা ‘‘সরীরট্ঠেসু ভূতেসূ’’তি ইমিনা খীরাদিমাহ। ‘‘কি’’ন্তি ইদং ন ৰট্টতীতি পদেনপি যোজেতব্বং। কপ্পাকপ্পিযমংসানন্তি এত্থ ‘‘সত্তান’’ন্তি সামত্থিযা লব্ভতি।

    1523. Muttodakasiṅghāṇikādidravaassukhīrādidravassa āpodhātuppakārattā, kaṇṇamalādino ghanadabbassa pathavidhātuppakārattā ‘‘sarīraṭṭhesu bhūtesū’’ti iminā khīrādimāha. ‘‘Ki’’nti idaṃ na vaṭṭatīti padenapi yojetabbaṃ. Kappākappiyamaṃsānanti ettha ‘‘sattāna’’nti sāmatthiyā labbhati.

    ১৫২৪. লোণন্তি এত্থ ‘‘এতং সব্বম্পী’’তি ইদং অধিকারতো লব্ভতি।

    1524.Loṇanti ettha ‘‘etaṃ sabbampī’’ti idaṃ adhikārato labbhati.

    ১৫২৫. এত্থাতি এতেসু যথাৰুত্তেসু কণ্ণমলাদীসু।

    1525.Etthāti etesu yathāvuttesu kaṇṇamalādīsu.

    ১৫২৮. চত্তারি ৰিকটানীতি মহাৰিকটং নাম গূথং, মত্তিকা, মুত্তং, ছারিকা চাতি ৰুত্তানি চত্তারি ৰিকটানি। তানি হি ৰিরুদ্ধানি সপ্পৰিসানি কতানি ৰিহতানীতি ‘‘ৰিকটানী’’তি ৰুচ্চন্তি। নত্থি দাযকো এত্থাতি নদাযকং, ঠানং, তস্মিং। ‘‘ন অ নো মা অলং পটিসেধে’’তি ৰুত্তত্তা পটিসেধৰাচিনা ন-সদ্দেন সমাসো, ‘‘অদাযকে’’তি ইমিনা অনত্থন্তরং। ইধ দুব্বচো চ অসমত্থো চ অসন্তো নামাতি অট্ঠকথাযং (পাচি॰ অট্ঠ॰ ২৬৫; কঙ্খা॰ অট্ঠ॰ দন্তপোনসিক্খাপদৰণ্ণনা, অত্থতো সমানং) ৰুত্তং। ইদং কালোদিস্সং নাম।

    1528.Cattārivikaṭānīti mahāvikaṭaṃ nāma gūthaṃ, mattikā, muttaṃ, chārikā cāti vuttāni cattāri vikaṭāni. Tāni hi viruddhāni sappavisāni katāni vihatānīti ‘‘vikaṭānī’’ti vuccanti. Natthi dāyako etthāti nadāyakaṃ, ṭhānaṃ, tasmiṃ. ‘‘Na a no mā alaṃ paṭisedhe’’ti vuttattā paṭisedhavācinā na-saddena samāso, ‘‘adāyake’’ti iminā anatthantaraṃ. Idha dubbaco ca asamattho ca asanto nāmāti aṭṭhakathāyaṃ (pāci. aṭṭha. 265; kaṅkhā. aṭṭha. dantaponasikkhāpadavaṇṇanā, atthato samānaṃ) vuttaṃ. Idaṃ kālodissaṃ nāma.

    ১৫২৯. পথৰিন্তি অকপ্পিযপথৰিং। তরুন্তি অল্লরুক্খং। ইমিনা সপ্পদট্ঠকালে অসতি কপ্পিযকারকে ৰিকটত্থায অত্তনা চ কত্তব্বন্তি দস্সেতি।

    1529.Pathavinti akappiyapathaviṃ. Tarunti allarukkhaṃ. Iminā sappadaṭṭhakāle asati kappiyakārake vikaṭatthāya attanā ca kattabbanti dasseti.

    ১৫৩০. অচ্ছেদগাহতোতি ৰিলুম্পিত্ৰা গণ্হনতো। ‘‘তস্সা’’তি ইদং সব্বেহি হেতুপদেহি যুজ্জতি। তস্সাতি অপ্পটিগ্গহিতস্সাতি অত্থো। অপরস্স অভিক্খুকস্স দানেন চাতি যোজনা। ‘‘অভিক্খুকস্সা’’তি পন ৰিসেসনেন উপসম্পন্নস্স দিন্নে পটিগ্গহণং ন ৰিজহতীতি দীপেতি। সব্বন্তি যথাৰুত্তং কাযেন গহণাদিপ্পকারস্স কল্যং গহিতং। এৰন্তি ইমিনা নিযামেন।

    1530.Acchedagāhatoti vilumpitvā gaṇhanato. ‘‘Tassā’’ti idaṃ sabbehi hetupadehi yujjati. Tassāti appaṭiggahitassāti attho. Aparassa abhikkhukassa dānena cāti yojanā. ‘‘Abhikkhukassā’’ti pana visesanena upasampannassa dinne paṭiggahaṇaṃ na vijahatīti dīpeti. Sabbanti yathāvuttaṃ kāyena gahaṇādippakārassa kalyaṃ gahitaṃ. Evanti iminā niyāmena.

    ১৫৩১. দুরুপচিণ্ণেতি দুট্ঠু উপচিণ্ণে দুরামট্ঠে, অপ্পটিগ্গহিতস্স আমিসভত্তভাজনাদিনো কীল়াৰসেন হত্থেন পরামসনে চ তত্থজাতকফলিনিং সাখায ৰা ৰল্লিযা ৰা গহেত্ৰা চালনে চাতি অত্থো। উগ্গহিতস্স গহণেতি অপ্পটিগ্গহিতভাৰং ঞত্ৰাৰ গহিতস্স কস্সচি ৰত্থুনো পটিগ্গহণে চ। অন্তোৰুত্থে চাতি অকপ্পিযকুটিযা অন্তো ঠপেত্ৰা অরুণং উট্ঠাপিতে চ। সযংপক্কে চাতি যত্থ কত্থচি অত্তনা পক্কে চ। অন্তোপক্কে চাতি অকপ্পিযকুটিযা অন্তোযেৰ পক্কে চ। দুক্কটং নিদ্দিট্ঠন্তি সম্বন্ধো।

    1531.Durupaciṇṇeti duṭṭhu upaciṇṇe durāmaṭṭhe, appaṭiggahitassa āmisabhattabhājanādino kīḷāvasena hatthena parāmasane ca tatthajātakaphaliniṃ sākhāya vā valliyā vā gahetvā cālane cāti attho. Uggahitassa gahaṇeti appaṭiggahitabhāvaṃ ñatvāva gahitassa kassaci vatthuno paṭiggahaṇe ca. Antovutthe cāti akappiyakuṭiyā anto ṭhapetvā aruṇaṃ uṭṭhāpite ca. Sayaṃpakke cāti yattha katthaci attanā pakke ca. Antopakke cāti akappiyakuṭiyā antoyeva pakke ca. Dukkaṭaṃ niddiṭṭhanti sambandho.

    ১৫৩২-৩. পটিগ্গহিতকে তস্মিং পটিগ্গহিতসঞ্ঞিস্সাতি সম্বন্ধো। দন্তপোনং দন্তকট্ঠং।

    1532-3. Paṭiggahitake tasmiṃ paṭiggahitasaññissāti sambandho. Dantaponaṃ dantakaṭṭhaṃ.

    ১৫৩৪. ভিক্খুনীনন্তি ভিক্খুনো চ ভিক্খুনিযা চ ভিক্খুনীনং, একদেসসরূপেকসেসো। এত্থ ইমস্মিং সিক্খাপদে। ৰিনিচ্ছযো নৰমজ্ঝিমথেরভিক্খুনীনং যতো অৰিসেসেন ইচ্ছিতব্বকো, ততো তস্মা হেতুনা সকলো অযং ৰিনিচ্ছযো অসমাসতো মযা কথিতোতি যোজনা। কুসলত্তিকাদীসু ৰিয অত্থসাকল্যস্স অত্থসঙ্খেপতোৰ ৰত্তুং সক্কুণেয্যত্তা ‘‘সকলো’’তি ৰত্ৰাপি কথায ৰিত্থারিতভাৰং দস্সেতুমাহ ‘‘অসমাসতো’’তি।

    1534.Bhikkhunīnanti bhikkhuno ca bhikkhuniyā ca bhikkhunīnaṃ, ekadesasarūpekaseso. Ettha imasmiṃ sikkhāpade. Vinicchayo navamajjhimatherabhikkhunīnaṃ yato avisesena icchitabbako, tato tasmā hetunā sakalo ayaṃ vinicchayo asamāsato mayā kathitoti yojanā. Kusalattikādīsu viya atthasākalyassa atthasaṅkhepatova vattuṃ sakkuṇeyyattā ‘‘sakalo’’ti vatvāpi kathāya vitthāritabhāvaṃ dassetumāha ‘‘asamāsato’’ti.

    দন্তপোনকথাৰণ্ণনা।

    Dantaponakathāvaṇṇanā.

    ভোজনৰগ্গো চতুত্থো।

    Bhojanavaggo catuttho.

    ১৫৩৫. ‘‘অচেলকাদীন’’ন্তিআদীসু ‘‘অচেলকো নাম যো কোচি পরিব্বাজকসমাপন্নো নগ্গো’’তি (পাচি॰ ২৭১) পদভাজনে ৰুত্তং, তদট্ঠকথায ‘‘পরিব্বাজকসমাপন্নোতি পব্বজ্জং সমাপন্নো’’তি (পাচি॰ অট্ঠ॰ ২৬৯) ৰুত্তং, তস্মা অচেলকপব্বজ্জমুপগতোযেৰেত্থ অচেলকো নাম। আদি-সদ্দেন ‘‘পরিব্বাজকস্স ৰা পরিব্বাজিকায ৰা’’তি (পাচি॰ ২৭০) মাতিকা-গতে দ্ৰে সঙ্গণ্হাতি। ইমেসু চ দ্ৰীসু ‘‘পরিব্বাজকো নাম ভিক্খুঞ্চ সামণেরঞ্চ ঠপেত্ৰা যো কোচি পরিব্বাজকসমাপন্নো’’তি (পাচি॰ ২৭১) ৰুত্তো পরিব্বাজকো নাম। ‘‘ভিক্খুনিঞ্চ সিক্খমানঞ্চ সামণেরিঞ্চ ঠপেত্ৰা যা কাচি পরিব্বাজিকসমাপন্না’’তি (পাচি॰ ২৭১) ৰুত্তা পরিব্বাজিকা নামাতি গহেতব্বা। পরিব্বাজকা পনেত্থ ছন্নাযেৰ গহেতব্বা। দেন্তস্সাতি এত্থ ‘‘ভিক্খুস্সা’’তি পকরণতো লব্ভতি, এত্থ ‘‘কাযাদিনা’’তি সেসো। যথাহ ‘‘দদেয্যাতি কাযেন ৰা কাযপটিবদ্ধেন ৰা নিস্সগ্গিযেন ৰা দেতী’’তি (পাচি॰ ২৭১)।

    1535.‘‘Acelakādīna’’ntiādīsu ‘‘acelako nāma yo koci paribbājakasamāpanno naggo’’ti (pāci. 271) padabhājane vuttaṃ, tadaṭṭhakathāya ‘‘paribbājakasamāpannoti pabbajjaṃ samāpanno’’ti (pāci. aṭṭha. 269) vuttaṃ, tasmā acelakapabbajjamupagatoyevettha acelako nāma. Ādi-saddena ‘‘paribbājakassa vā paribbājikāya vā’’ti (pāci. 270) mātikā-gate dve saṅgaṇhāti. Imesu ca dvīsu ‘‘paribbājako nāma bhikkhuñca sāmaṇerañca ṭhapetvā yo koci paribbājakasamāpanno’’ti (pāci. 271) vutto paribbājako nāma. ‘‘Bhikkhuniñca sikkhamānañca sāmaṇeriñca ṭhapetvā yā kāci paribbājikasamāpannā’’ti (pāci. 271) vuttā paribbājikā nāmāti gahetabbā. Paribbājakā panettha channāyeva gahetabbā. Dentassāti ettha ‘‘bhikkhussā’’ti pakaraṇato labbhati, ettha ‘‘kāyādinā’’ti seso. Yathāha ‘‘dadeyyāti kāyena vā kāyapaṭibaddhena vā nissaggiyena vā detī’’ti (pāci. 271).

    ১৫৩৬. তিকপাচিত্তিযন্তি তিত্থিযে তিত্থিযসঞ্ঞী, ৰেমতিকো, অতিত্থিযসঞ্ঞীতি তিকে পাচিত্তিযত্তযং।

    1536.Tikapācittiyanti titthiye titthiyasaññī, vematiko, atitthiyasaññīti tike pācittiyattayaṃ.

    ১৫৩৭. অতিত্থিযে তিত্থিযসঞ্ঞিস্স, ৰেমতিকস্স চ তস্স ভিক্খুনো দুক্কটন্তি যোজনা।

    1537. Atitthiye titthiyasaññissa, vematikassa ca tassa bhikkhuno dukkaṭanti yojanā.

    ১৫৩৮-৯. তেসন্তি তিত্থিযানং। বহিলেপনন্তি বহিসরীরে লিম্পিতব্বং কিঞ্চি দেন্তস্স। তেসং তিত্থিযানং সন্তিকে সমীপে অত্তনো ভত্তপত্তাদিকং ভোজনং ঠপেত্ৰা ‘‘ভোজনং গণ্হথা’’তি ৰদন্তস্স চ অনাপত্তীতি যোজনা। ‘‘সমুট্ঠানং এল়কূপম’’ন্তি পদচ্ছেদো।

    1538-9.Tesanti titthiyānaṃ. Bahilepananti bahisarīre limpitabbaṃ kiñci dentassa. Tesaṃ titthiyānaṃ santike samīpe attano bhattapattādikaṃ bhojanaṃ ṭhapetvā ‘‘bhojanaṃ gaṇhathā’’ti vadantassa ca anāpattīti yojanā. ‘‘Samuṭṭhānaṃ eḷakūpama’’nti padacchedo.

    অচেলককথাৰণ্ণনা।

    Acelakakathāvaṇṇanā.

    ১৫৪০-২. ভিক্খু ভিক্খুনো যং কিঞ্চি আমিসং দাপেত্ৰা ৰা অদাপেত্ৰা ৰাতি যোজনা। কিং ৰুত্তং হোতি? ‘‘এহাৰুসো, গামং ৰা নিগমং ৰা পিণ্ডায পৰিসিস্সামা’’তি (পাচি॰ ২৭৫) সিক্খাপদে ৰুত্তনযেনেৰ ৰত্ৰা যেন সদ্ধিং গামং পিণ্ডায পৰিট্ঠো, তস্স ভিক্খুস্স খাদনীযাদিভেদং যং কিঞ্চি আমিসং দাপেত্ৰা ৰা অদাপেত্ৰা ৰাতি।

    1540-2. Bhikkhu bhikkhuno yaṃ kiñci āmisaṃ dāpetvā vā adāpetvā vāti yojanā. Kiṃ vuttaṃ hoti? ‘‘Ehāvuso, gāmaṃ vā nigamaṃ vā piṇḍāya pavisissāmā’’ti (pāci. 275) sikkhāpade vuttanayeneva vatvā yena saddhiṃ gāmaṃ piṇḍāya paviṭṭho, tassa bhikkhussa khādanīyādibhedaṃ yaṃ kiñci āmisaṃ dāpetvā vā adāpetvā vāti.

    তং ভিক্খুং ‘‘গচ্ছা’’তি ৰত্ৰা উয্যোজেতীতি যোজনা। কিং ৰুত্তং হোতি? এৰং যো ভিক্খু তেন সদ্ধিং গামং পৰিট্ঠো, তং ‘‘গচ্ছাৰুসো, ন মে তযা সদ্ধিং কথা ৰা নিসজ্জা ৰা ফাসু হোতি, এককস্স মে কথা ৰা নিসজ্জা ৰা ফাসু হোতী’’তি (পাচি॰ ২৭৫) ৰত্ৰা তপ্পচ্চযা তেসং ইত্থিযাসদ্ধিং ৰচনাদীনং অনাচারানং পচ্চযা গন্তুং নিযোজেতীতি। তপ্পচ্চযাতি ‘‘উয্যোজনমত্তস্মি’’ন্তি ৰিসেসনং। পঠমেন চাতি এত্থ চ-সদ্দো অট্ঠানপ্পযুত্তো ‘‘উয্যোজনমত্তস্মিঞ্চা’’তি যোজেতব্বো। তস্সাতি উয্যোজকস্স।

    Taṃ bhikkhuṃ ‘‘gacchā’’ti vatvā uyyojetīti yojanā. Kiṃ vuttaṃ hoti? Evaṃ yo bhikkhu tena saddhiṃ gāmaṃ paviṭṭho, taṃ ‘‘gacchāvuso, na me tayā saddhiṃ kathā vā nisajjā vā phāsu hoti, ekakassa me kathā vā nisajjā vā phāsu hotī’’ti (pāci. 275) vatvā tappaccayā tesaṃ itthiyāsaddhiṃ vacanādīnaṃ anācārānaṃ paccayā gantuṃ niyojetīti. Tappaccayāti ‘‘uyyojanamattasmi’’nti visesanaṃ. Paṭhamena cāti ettha ca-saddo aṭṭhānappayutto ‘‘uyyojanamattasmiñcā’’ti yojetabbo. Tassāti uyyojakassa.

    অস্সাতি উয্যোজিতস্স, অৰযৰসম্বন্ধে সামিৰচনং। উপচারস্মিং অতিক্কন্তেতি ৰক্খমানলক্খণে দস্সনূপচারে ৰা সৰনূপচারে ৰা অতিক্কন্তেতি অত্থো, ভাৰলক্খণে ভুম্মং। পুন অস্সাতি উপচারস্স। দ্ৰাদসরতনপরিযোসানং, তদন্তোগধং পাকারাদি এৰ ৰা উপচারস্স সীমা নাম।

    Assāti uyyojitassa, avayavasambandhe sāmivacanaṃ. Upacārasmiṃ atikkanteti vakkhamānalakkhaṇe dassanūpacāre vā savanūpacāre vā atikkanteti attho, bhāvalakkhaṇe bhummaṃ. Puna assāti upacārassa. Dvādasaratanapariyosānaṃ, tadantogadhaṃ pākārādi eva vā upacārassa sīmā nāma.

    ১৫৪৩. তং সরূপতো দস্সেতুমাহ ‘‘দস্সনে’’তিআদি। অজ্ঝোকাসে দস্সনে উপচারস্স দ্ৰাদস হত্থা পমাণং দেসিতাতি যোজনা। সৰনে চ অজ্ঝোকাসে এৰং সৰনূপচারস্স অজ্ঝোকাসে দ্ৰাদস হত্থা পমাণং দেসিতাতি যোজনা, সৰনে চ উপচারস্স অৰধি দ্ৰাদসহত্থপ্পমাণমেৰাতি ৰুত্তন্তি অত্থো। ন চেতরেতি ইতরস্মিং অনজ্ঝোকাসে এৰং উপচারস্স পমাণং দ্ৰাদসহত্থা ন চ দেসিতা, কিং নু ব্যাৰধাকরা কুট্টাদযো উপচারস্স পমাণন্তি দেসিতাতি ৰুত্তং হোতি। ৰুত্তঞ্চেতং অট্ঠকথাযং ‘‘সচে পন অন্তরা কুট্টদ্ৰারপাকারাদযো হোন্তি, তেহি অন্তরিতভাৰোযেৰ দস্সনূপচারাতিক্কমো, তস্স ৰসেন আপত্তি ৰেদিতব্বা’’তি (পাচি॰ অট্ঠ॰ ২৭৬)। ইধ উপচারদ্ৰযে সমানেপি উয্যোজিতমৰধিঅন্তং সন্ধায অসৰনূপচারং ৰুত্তন্তি ৰিঞ্ঞাযতি।

    1543. Taṃ sarūpato dassetumāha ‘‘dassane’’tiādi. Ajjhokāse dassane upacārassa dvādasa hatthā pamāṇaṃ desitāti yojanā. Savane ca ajjhokāse evaṃ savanūpacārassa ajjhokāse dvādasa hatthā pamāṇaṃ desitāti yojanā, savane ca upacārassa avadhi dvādasahatthappamāṇamevāti vuttanti attho. Na cetareti itarasmiṃ anajjhokāse evaṃ upacārassa pamāṇaṃ dvādasahatthā na ca desitā, kiṃ nu byāvadhākarā kuṭṭādayo upacārassa pamāṇanti desitāti vuttaṃ hoti. Vuttañcetaṃ aṭṭhakathāyaṃ ‘‘sace pana antarā kuṭṭadvārapākārādayo honti, tehi antaritabhāvoyeva dassanūpacārātikkamo, tassa vasena āpatti veditabbā’’ti (pāci. aṭṭha. 276). Idha upacāradvaye samānepi uyyojitamavadhiantaṃ sandhāya asavanūpacāraṃ vuttanti viññāyati.

    ১৫৪৪. ‘‘তিকপাচিত্তীতি উপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীহি তিকপাচিত্তিযং । ইতরেতি অনুপসম্পন্নে। তিকদুক্কটন্তি অনুপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন তিকদুক্কটং। ‘‘ইতরেতি সামণেরেযেৰা’’তি নিস্সন্দেহে লিখিতং। এতস্সেৰত্থস্স ৰজিরবুদ্ধিনাপি ৰুত্তভাৰো দস্সিতো। তথাদস্সনং পঞ্চসহধম্মিকেসু ইধাধিপ্পেতমনুপসম্পন্নং সন্ধায ৰুত্তং চে, যুজ্জতি। অঞ্ঞথা পাল়িঅট্ঠকথাসু ‘‘অনুপসম্পন্নে’’তি সামঞ্ঞেন নিদ্দিট্ঠত্তা গহট্ঠানুপসম্পন্নম্পি তথা উয্যোজেন্তস্স অনাপত্তি ন ৰত্তব্বাতি অম্হাকং খন্তি।

    1544.‘‘Tikapācittīti upasampanne upasampannasaññivematikaanupasampannasaññīhi tikapācittiyaṃ . Itareti anupasampanne. Tikadukkaṭanti anupasampanne upasampannasaññivematikaanupasampannasaññīnaṃ vasena tikadukkaṭaṃ. ‘‘Itareti sāmaṇereyevā’’ti nissandehe likhitaṃ. Etassevatthassa vajirabuddhināpi vuttabhāvo dassito. Tathādassanaṃ pañcasahadhammikesu idhādhippetamanupasampannaṃ sandhāya vuttaṃ ce, yujjati. Aññathā pāḷiaṭṭhakathāsu ‘‘anupasampanne’’ti sāmaññena niddiṭṭhattā gahaṭṭhānupasampannampi tathā uyyojentassa anāpatti na vattabbāti amhākaṃ khanti.

    উভিন্নন্তি উপসম্পন্নানুপসম্পন্নানং। নিস্সন্দেহে পন ‘‘ভিক্খুসামণেরান’’ন্তি লিখিতং। কলিসাসনারোপনেতি এত্থ কলীতি কোধো, তস্স সাসনং আণা কলিসাসনং, তস্স আরোপনং পৰত্তনং কলিসাসনারোপনং, তস্মিং, কোধৰসেন ঠাননিসজ্জাদীসু দোসং দস্সেত্ৰা ‘‘পস্সথ ভো ইমস্স ঠানং নিসজ্জং আলোকিতং ৰিলোকিতং, খাণুকো ৰিয তিট্ঠতি, সুনখো ৰিয নিসীদতি, মক্কটো ৰিয ইতো চিতো চ ৰিলোকেতী’’তি এৰং ‘‘অপ্পেৰ নাম ইমিনাপি উব্বাল়্হো পক্কমেয্যা’’তি অমনাপৰচনস্স ভণনেতি ৰুত্তং হোতি।

    Ubhinnanti upasampannānupasampannānaṃ. Nissandehe pana ‘‘bhikkhusāmaṇerāna’’nti likhitaṃ. Kalisāsanāropaneti ettha kalīti kodho, tassa sāsanaṃ āṇā kalisāsanaṃ, tassa āropanaṃ pavattanaṃ kalisāsanāropanaṃ, tasmiṃ, kodhavasena ṭhānanisajjādīsu dosaṃ dassetvā ‘‘passatha bho imassa ṭhānaṃ nisajjaṃ ālokitaṃ vilokitaṃ, khāṇuko viya tiṭṭhati, sunakho viya nisīdati, makkaṭo viya ito cito ca viloketī’’ti evaṃ ‘‘appeva nāma imināpi ubbāḷho pakkameyyā’’ti amanāpavacanassa bhaṇaneti vuttaṃ hoti.

    ১৫৪৫. উয্যোজেন্তস্স কিচ্চেনাতি ৰিহারপালকাদীনং ভোজনহরণাদিকিচ্চেন পেসেন্তস্স, ইমস্স উপলক্খণত্তা ‘‘অনাপত্তি ‘উভো একতো ন যাপেস্সামা’তি উয্যোজেতী’’তিআদিনা (পাচি॰ ২৭৮) অনাপত্তিৰারাগতা সব্বেপি পকারা গহেতব্বা।

    1545.Uyyojentassakiccenāti vihārapālakādīnaṃ bhojanaharaṇādikiccena pesentassa, imassa upalakkhaṇattā ‘‘anāpatti ‘ubho ekato na yāpessāmā’ti uyyojetī’’tiādinā (pāci. 278) anāpattivārāgatā sabbepi pakārā gahetabbā.

    উয্যোজনকথাৰণ্ণনা।

    Uyyojanakathāvaṇṇanā.

    ১৫৪৬. খুদ্দকেতি এত্থ ‘‘সযনিঘরে’’তি সেসো উপরি ‘‘অসযনিঘরে তস্স, সযনিঘরসঞ্ঞিনো’’তি ৰক্খমানত্তা লব্ভতি। ‘‘মহল্লকে’’তি এত্থাপি এসেৰ নযো। পিট্ঠিসঙ্ঘাটতো অড্ঢতেয্যহত্থপ্পমাণং যস্স ৰেমজ্ঝে হোতি, ঈদিসে খুদ্দকে সযনিঘরেতি অত্থো। পিট্ঠিৰংসন্তি পিট্ঠিৰংসেন নিযমিতং গেহমজ্ঝং। তেনাহ অট্ঠকথাযং ‘‘পিট্ঠিৰংসং অতিক্কমিত্ৰা’তি ইমিনা মজ্ঝাতিক্কমং দস্সেতী’’তি (পাচি॰ অট্ঠ॰ ২৮০)। সভোজনেতি সহ ভোজনেহীতি সভোজনং, তস্মিং সভোজনে। অথ ৰা সভোজনেতি সভোগে। রাগপরিযুট্ঠিতস্স পুরিসস্স হি ইত্থী ভোগো, ইত্থিযা চ পুরিসো, মেথুনরাগেন সারত্তপুরিসিত্থিসহিতেতি ৰুত্তং হোতি। যথাহ পদভাজনে ‘‘সভোজনং নাম কুলং ইত্থী চেৰ হোতি পুরিসো চ, ইত্থী চ পুরিসো চ উভো অনিক্খন্তা হোন্তি, উভো অৰীতরাগা’’তি (পাচি॰ অট্ঠ॰ ২৮১)। ইমিনা পরিযুট্ঠিতস্স মেথুনরাগগ্গিনো তঙ্খণে নিব্বত্তভাৰো দীপিতো। কুলেতি ঘরে।

    1546.Khuddaketi ettha ‘‘sayanighare’’ti seso upari ‘‘asayanighare tassa, sayanigharasaññino’’ti vakkhamānattā labbhati. ‘‘Mahallake’’ti etthāpi eseva nayo. Piṭṭhisaṅghāṭato aḍḍhateyyahatthappamāṇaṃ yassa vemajjhe hoti, īdise khuddake sayanighareti attho. Piṭṭhivaṃsanti piṭṭhivaṃsena niyamitaṃ gehamajjhaṃ. Tenāha aṭṭhakathāyaṃ ‘‘piṭṭhivaṃsaṃ atikkamitvā’ti iminā majjhātikkamaṃ dassetī’’ti (pāci. aṭṭha. 280). Sabhojaneti saha bhojanehīti sabhojanaṃ, tasmiṃ sabhojane. Atha vā sabhojaneti sabhoge. Rāgapariyuṭṭhitassa purisassa hi itthī bhogo, itthiyā ca puriso, methunarāgena sārattapurisitthisahiteti vuttaṃ hoti. Yathāha padabhājane ‘‘sabhojanaṃ nāma kulaṃ itthī ceva hoti puriso ca, itthī ca puriso ca ubho anikkhantā honti, ubho avītarāgā’’ti (pāci. aṭṭha. 281). Iminā pariyuṭṭhitassa methunarāgaggino taṅkhaṇe nibbattabhāvo dīpito. Kuleti ghare.

    ১৫৪৭. হত্থপাসন্তি অড্ঢতেয্যরতনপ্পমাণদেসং। পিট্ঠিসঙ্ঘাটকস্স চাতি দ্ৰারসবন্ধস্স চ। সযনস্সাতি সযন্তি এত্থাতি সযনং, তস্স, আসন্নে ঠানে যো নিসীদতি সভোজনে কুলে, ‘‘তস্সা’’তি ইমিনা যোজেতব্বং, সযনস্স সমীপে ঠানে যো নিসীদতীতি অত্থো। মহল্লকেতি পুব্বে ৰুত্তপ্পমাণতো মহন্তে সযনিঘরে। ‘‘ঈদিসঞ্চ সযনিঘরং মহাচতুসালাদীসু হোতী’’তি (পাচি॰ অট্ঠ॰ ২৮০) অট্ঠকথাযং ৰুত্তং।

    1547.Hatthapāsanti aḍḍhateyyaratanappamāṇadesaṃ. Piṭṭhisaṅghāṭakassa cāti dvārasabandhassa ca. Sayanassāti sayanti etthāti sayanaṃ, tassa, āsanne ṭhāne yo nisīdati sabhojane kule, ‘‘tassā’’ti iminā yojetabbaṃ, sayanassa samīpe ṭhāne yo nisīdatīti attho. Mahallaketi pubbe vuttappamāṇato mahante sayanighare. ‘‘Īdisañca sayanigharaṃ mahācatusālādīsu hotī’’ti (pāci. aṭṭha. 280) aṭṭhakathāyaṃ vuttaṃ.

    ১৫৪৮. সযনমেতস্স অত্থীতি সযনী, সযনী চ তং ঘরঞ্চাতি ৰিগ্গহো। তত্থাতি সযনিঘরে।

    1548. Sayanametassa atthīti sayanī, sayanī ca taṃ gharañcāti viggaho. Tatthāti sayanighare.

    ১৫৪৯-৫০. দুতিযে সতীতি দুতিযে ভিক্খুম্হি সতি। যথাহ অনাপত্তিৰারে ‘‘ভিক্খু দুতিযো হোতী’’তি (পাচি॰ ২৮৩)। ৰীতরাগেসূতি ৰীতরাগপরিযুট্ঠানেসু। ৰুত্তলক্খণং পদেসন্তি খুদ্দকমহন্তসেনাসনে ৰুত্তলক্খণপদেস। অনতিক্কম্ম নিসিন্নস্সাতি অনতিক্কমিত্ৰা নিসীদতো।

    1549-50.Dutiye satīti dutiye bhikkhumhi sati. Yathāha anāpattivāre ‘‘bhikkhu dutiyo hotī’’ti (pāci. 283). Vītarāgesūti vītarāgapariyuṭṭhānesu. Vuttalakkhaṇaṃ padesanti khuddakamahantasenāsane vuttalakkhaṇapadesa. Anatikkamma nisinnassāti anatikkamitvā nisīdato.

    সভোজনকথাৰণ্ণনা।

    Sabhojanakathāvaṇṇanā.

    ১৫৫২. তেসন্তি দ্ৰিন্নং অনিযতসিক্খাপদানং। এসন্তি ইমেসং দ্ৰিন্নং রহোপটিচ্ছন্নরহোনিসজ্জসিক্খাপদানং, অযমেৰ ৰিসেসোতি অনন্তরসিক্খাপদেন সমুট্ঠানভাৰসঙ্খাতো অযং ৰিসেসো দীপিতোতি যোজনা।

    1552.Tesanti dvinnaṃ aniyatasikkhāpadānaṃ. Esanti imesaṃ dvinnaṃ rahopaṭicchannarahonisajjasikkhāpadānaṃ, ayameva visesoti anantarasikkhāpadena samuṭṭhānabhāvasaṅkhāto ayaṃ viseso dīpitoti yojanā.

    রহোপটিচ্ছন্নরহোনিসজ্জকথাৰণ্ণনা।

    Rahopaṭicchannarahonisajjakathāvaṇṇanā.

    ১৫৫৩-৬. ৰুত্তোতি নিমন্তিতো। সন্তং ভিক্খুন্তি ‘‘কুলং উপসঙ্কমিস্সামী’’তি যস্মিং পদেসে চিত্তং উপ্পন্নং, তস্স সামন্তা দ্ৰাদসহত্থব্ভন্তরে ঠিতং ভিক্খুন্তি অত্থো। যথাহ ‘‘যত্থ ঠিতস্স কুলানি পযিরুপাসনচিত্তং উপ্পন্নং, ততো পট্ঠায যং পস্সে ৰা অভিমুখে ৰা পস্সতি, যস্স চ সক্কা হোতি পকতিৰচনেন আরোচেতুং, অযং সন্তো নামা’’তি (পাচি॰ অট্ঠ॰ ২৯৮)। এত্থ যং দ্ৰাদসহত্থব্ভন্তরে ঠিতেন সোতুং সক্কা ভৰেয্য, তং পকতিৰচনং নাম। অনাপুচ্ছাতি ‘‘অহং ইত্থন্নামস্স ঘরং গচ্ছামী’’তি ৰা ‘‘চারিত্তং আপুচ্ছামী’’তি ৰা ঈদিসেন ৰচনেন অনাপুচ্ছিত্ৰা। চারিত্তং আপজ্জেয্য চেতি যদি সঞ্চরেয্যাতি ৰুত্তং হোতি। অঞ্ঞত্র সমযাতি ‘‘তত্থাযং সমযো, চীৰরদানসমযো চীৰরকারসমযো’’তি (পাচি॰ ২৯৯) সিক্খাপদে অনুপঞ্ঞত্তিৰসেন ৰুত্তা দুৰিধা সমযা অঞ্ঞস্মিং কালে।

    1553-6.Vuttoti nimantito. Santaṃ bhikkhunti ‘‘kulaṃ upasaṅkamissāmī’’ti yasmiṃ padese cittaṃ uppannaṃ, tassa sāmantā dvādasahatthabbhantare ṭhitaṃ bhikkhunti attho. Yathāha ‘‘yattha ṭhitassa kulāni payirupāsanacittaṃ uppannaṃ, tato paṭṭhāya yaṃ passe vā abhimukhe vā passati, yassa ca sakkā hoti pakativacanena ārocetuṃ, ayaṃ santo nāmā’’ti (pāci. aṭṭha. 298). Ettha yaṃ dvādasahatthabbhantare ṭhitena sotuṃ sakkā bhaveyya, taṃ pakativacanaṃ nāma. Anāpucchāti ‘‘ahaṃ itthannāmassa gharaṃ gacchāmī’’ti vā ‘‘cārittaṃ āpucchāmī’’ti vā īdisena vacanena anāpucchitvā. Cārittaṃ āpajjeyya ceti yadi sañcareyyāti vuttaṃ hoti. Aññatra samayāti ‘‘tatthāyaṃ samayo, cīvaradānasamayo cīvarakārasamayo’’ti (pāci. 299) sikkhāpade anupaññattivasena vuttā duvidhā samayā aññasmiṃ kāle.

    আপত্তিভেদং দস্সেতুমাহ ‘‘ঠপেত্ৰা’’তিআদি। ‘‘অৰীতিৰত্তে মজ্ঝন্হে’’তি ইমিনা পুরেভত্তং, পচ্ছাভত্তঞ্চ সঙ্গহিতং। এত্থ চ পুরেভত্তং পচ্ছাভত্তন্তি যেন ভত্তেন নিমন্তিতো, তস্মিং অভুত্তে ৰা ভুত্তে ৰাতি অত্থো। যথাহ ‘‘পুরেভত্তং নাম যেন নিমন্তিতো, তং অভুত্তাৰী। পচ্ছাভত্তং নাম যেন নিমন্তিতো, তং অন্তমসো কুসগ্গেনপি ভুত্তং হোতী’’তি (পাচি॰ ৩০০) পদভাজনে ৰুত্তং। অঞ্ঞস্স ঘরন্তি নিমন্তিততো অঞ্ঞস্স গেহং। ঘরূপচারোক্কমনে দুক্কটন্তি সম্বন্ধো, অত্তনা গতগেহস্স উপচারোক্কমনে দুক্কটন্তি অত্থো। পঠমেন পাদেনাতি সম্বন্ধো।

    Āpattibhedaṃ dassetumāha ‘‘ṭhapetvā’’tiādi. ‘‘Avītivatte majjhanhe’’ti iminā purebhattaṃ, pacchābhattañca saṅgahitaṃ. Ettha ca purebhattaṃ pacchābhattanti yena bhattena nimantito, tasmiṃ abhutte vā bhutte vāti attho. Yathāha ‘‘purebhattaṃ nāma yena nimantito, taṃ abhuttāvī. Pacchābhattaṃ nāma yena nimantito, taṃ antamaso kusaggenapi bhuttaṃ hotī’’ti (pāci. 300) padabhājane vuttaṃ. Aññassa gharanti nimantitato aññassa gehaṃ. Gharūpacārokkamane dukkaṭanti sambandho, attanā gatagehassa upacārokkamane dukkaṭanti attho. Paṭhamena pādenāti sambandho.

    ঘরুম্মারেতি অঞ্ঞস্স গেহুম্মারে। ঘরূপচারে দুক্কটং সন্ধায ‘‘অপরম্পি চা’’তি ৰুত্তং। ‘‘সমতিক্কমে’’তি ইমিনা সহ ‘‘ঘরুম্মারে’’তি পদং ‘‘ঘরুম্মারস্সা’’তি ৰিভত্তিৰিপরিণামেন যোজেতব্বং।

    Gharummāreti aññassa gehummāre. Gharūpacāre dukkaṭaṃ sandhāya ‘‘aparampi cā’’ti vuttaṃ. ‘‘Samatikkame’’ti iminā saha ‘‘gharummāre’’ti padaṃ ‘‘gharummārassā’’ti vibhattivipariṇāmena yojetabbaṃ.

    ১৫৫৭. ঠিতট্ঠানেতি যত্থ ঠিতস্স গমনচিত্তং উপ্পন্নং, তস্মিং ঠানে দ্ৰাদসহত্থব্ভন্তরেতি ইদং যথাৰুত্তনিযামেনেৰ গহেতব্বং। ওলোকেত্ৰাতি উভযপস্সং, অভিমুখঞ্চ ওলোকেত্ৰা। ‘‘যং পস্সে ৰা অভিমুখে ৰা পস্সতী’’তি (পাচি॰ অট্ঠ॰ ২৯৮) অট্ঠকথাযং ৰুত্তং।

    1557.Ṭhitaṭṭhāneti yattha ṭhitassa gamanacittaṃ uppannaṃ, tasmiṃ ṭhāne dvādasahatthabbhantareti idaṃ yathāvuttaniyāmeneva gahetabbaṃ. Oloketvāti ubhayapassaṃ, abhimukhañca oloketvā. ‘‘Yaṃ passe vā abhimukhe vā passatī’’ti (pāci. aṭṭha. 298) aṭṭhakathāyaṃ vuttaṃ.

    ১৫৫৮. দূরেতি দ্ৰাদসহত্থতো দূরমেৰাহ। ইতো চিতো চ গৰেসিত্ৰা আরোচনে কিচ্চং নত্থীতি যোজনা।

    1558.Dūreti dvādasahatthato dūramevāha. Ito cito ca gavesitvā ārocane kiccaṃ natthīti yojanā.

    ১৫৫৯. ন দোসোতি অনাপত্তি। সমযেতি এত্থ ‘‘অনাপুচ্ছতো’’তি সেসো। এত্থ চ উপরি চ ‘‘ন দোসো’’তি পচ্চেকং যুজ্জতি। সন্তং ভিক্খুন্তি সম্বন্ধো। ঘরেনাতি অঞ্ঞস্স ঘরেন, এত্থ ‘‘ঘরূপচারেন চা’’তি সেসো। আরামং গচ্ছতোতি এত্থ তেন মগ্গেনাতি ৰুত্তং হোতি।

    1559.Na dosoti anāpatti. Samayeti ettha ‘‘anāpucchato’’ti seso. Ettha ca upari ca ‘‘na doso’’ti paccekaṃ yujjati. Santaṃ bhikkhunti sambandho. Gharenāti aññassa gharena, ettha ‘‘gharūpacārena cā’’ti seso. Ārāmaṃ gacchatoti ettha tena maggenāti vuttaṃ hoti.

    ১৫৬০. ‘‘তেন মগ্গেনা’’তি চ ‘‘গচ্ছতো’’তি চ পদদ্ৰযং ‘‘তিত্থিযানং পস্সয’’ন্তি চ ‘‘ভিক্খুনিপস্সয’’ন্তি চ উভযত্থ তথা-সদ্দেন লব্ভতি। তেন ঘরেন, ঘরূপচারেন ৰা গন্তব্বমগ্গেন তিত্থিযারামং ৰা ভিক্খুনিপস্সযং ৰা গচ্ছতো অনাপত্তীতি অত্থো। আপদায গচ্ছতীতি যোজনা। জীৰিতব্রহ্মচরিযন্তরাযা আপদা। আসনসালং ৰাতি সীহল়দীপে ৰিয ভিক্খূনং ভুঞ্জনত্থায যত্থ দানপতীহি আসনানি পঞ্ঞাপীযন্তি, তং আসনসালং ৰা, ভোজনসালন্তি অত্থো। ‘‘আপদাযাসনসাল’’ন্তি ৰত্তব্বে গাথাবন্ধৰসেন যকারলোপো। ভত্তিযস্স ঘরন্তি নিমন্তিতঘরং ৰা সলাকভত্তদাযকানং ৰা ঘরং।

    1560. ‘‘Tena maggenā’’ti ca ‘‘gacchato’’ti ca padadvayaṃ ‘‘titthiyānaṃ passaya’’nti ca ‘‘bhikkhunipassaya’’nti ca ubhayattha tathā-saddena labbhati. Tena gharena, gharūpacārena vā gantabbamaggena titthiyārāmaṃ vā bhikkhunipassayaṃ vā gacchato anāpattīti attho. Āpadāya gacchatīti yojanā. Jīvitabrahmacariyantarāyā āpadā. Āsanasālaṃ vāti sīhaḷadīpe viya bhikkhūnaṃ bhuñjanatthāya yattha dānapatīhi āsanāni paññāpīyanti, taṃ āsanasālaṃ vā, bhojanasālanti attho. ‘‘Āpadāyāsanasāla’’nti vattabbe gāthābandhavasena yakāralopo. Bhattiyassa gharanti nimantitagharaṃ vā salākabhattadāyakānaṃ vā gharaṃ.

    ১৫৬১. পৰেসনং ক্রিযং। অনাপুচ্ছনং অক্রিযং। অচিত্তকসমুট্ঠানমিস্সকত্তা ‘‘অচিত্ত’’ন্তি ৰুত্তং। কুসলাকুসলাব্যাকতানং অঞ্ঞতরচিত্তসমঙ্গিনা আপজ্জিতব্বং সন্ধায ‘‘তিচিত্তঞ্চা’’তি ৰুত্তং।

    1561. Pavesanaṃ kriyaṃ. Anāpucchanaṃ akriyaṃ. Acittakasamuṭṭhānamissakattā ‘‘acitta’’nti vuttaṃ. Kusalākusalābyākatānaṃ aññataracittasamaṅginā āpajjitabbaṃ sandhāya ‘‘ticittañcā’’ti vuttaṃ.

    চারিত্তকথাৰণ্ণনা।

    Cārittakathāvaṇṇanā.

    ১৫৬২. ‘‘সব্বা’’তি ইদং ৰিৰরন্তো ‘‘চতুমাসপৰারণা পুনপৰারণা নিচ্চপৰারণা’’তি পৰারণত্তযং দস্সেতি। এত্থ চ ‘‘চতুমাসপচ্চযপৰারণা সাদিতব্বাতি গিলানপচ্চযপৰারণা সাদিতব্বা’’তি (পাচি॰ ৩০৭) পদভাজনে ৰুত্তং। পুনপৰারণা চ চত্তারোযেৰ মাসে ভেসজ্জেন পৰারণং। তেনাহ অট্ঠুপ্পত্তিযং ‘‘তেন হি ত্ৰং মহানাম সঙ্ঘং অপরম্পি চতুমাসং ভেসজ্জেন পৰারেহী’’তি। নিচ্চপৰারণা নাম যাৰজীৰং ভেসজ্জেহেৰ পৰারণা। ৰুত্তম্পি চেতং ভগৰতা অট্ঠুপ্পত্তিযং ‘‘তেন হি ত্ৰং মহানাম সঙ্ঘং যাৰজীৰং ভেসজ্জেন পৰারেহী’’তি (পাচি॰ ৩০৩)।

    1562.‘‘Sabbā’’ti idaṃ vivaranto ‘‘catumāsapavāraṇā punapavāraṇā niccapavāraṇā’’ti pavāraṇattayaṃ dasseti. Ettha ca ‘‘catumāsapaccayapavāraṇā sāditabbāti gilānapaccayapavāraṇā sāditabbā’’ti (pāci. 307) padabhājane vuttaṃ. Punapavāraṇā ca cattāroyeva māse bhesajjena pavāraṇaṃ. Tenāha aṭṭhuppattiyaṃ ‘‘tena hi tvaṃ mahānāma saṅghaṃ aparampi catumāsaṃ bhesajjena pavārehī’’ti. Niccapavāraṇā nāma yāvajīvaṃ bhesajjeheva pavāraṇā. Vuttampi cetaṃ bhagavatā aṭṭhuppattiyaṃ ‘‘tena hi tvaṃ mahānāma saṅghaṃ yāvajīvaṃ bhesajjena pavārehī’’ti (pāci. 303).

    সব্বা চেতা পৰারণা ভেসজ্জপরিযন্তরত্তিপরিযন্ততদুভযপরিযন্তঅপরিযন্তৰসেন চতুব্বিধা হোন্তি। যথাহ –

    Sabbā cetā pavāraṇā bhesajjapariyantarattipariyantatadubhayapariyantaapariyantavasena catubbidhā honti. Yathāha –

    ‘‘ভেসজ্জপরিযন্তা নাম ভেসজ্জানি পরিগ্গহিতানি হোন্তি ‘এত্তকেহি ভেসজ্জেহি পৰারেমী’তি। রত্তিপরিযন্তা নাম রত্তিযো পরিগ্গহিতাযো হোন্তি ‘এত্তকাসু রত্তীসু পৰারেমী’তি। ভেসজ্জপরিযন্তা চ রত্তিপরিযন্তা চ নাম ভেসজ্জানি চ পরিগ্গহিতানি হোন্তি রত্তিযো চ পরিগ্গহিতাযো হোন্তি ‘এত্তকেহি ভেসজ্জেহি এত্তকাসু রত্তীসু পৰারেমী’তি। নেৰভেসজ্জপরিযন্তা নরত্তিপরিযন্তা নাম ভেসজ্জানি চ অপরিগ্গহিতানি হোন্তি রত্তিযো চ অপরিগ্গহিতাযো হোন্তী’’তি (পাচি॰ ৩০৭)।

    ‘‘Bhesajjapariyantā nāma bhesajjāni pariggahitāni honti ‘ettakehi bhesajjehi pavāremī’ti. Rattipariyantā nāma rattiyo pariggahitāyo honti ‘ettakāsu rattīsu pavāremī’ti. Bhesajjapariyantā ca rattipariyantā ca nāma bhesajjāni ca pariggahitāni honti rattiyo ca pariggahitāyo honti ‘ettakehi bhesajjehi ettakāsu rattīsu pavāremī’ti. Nevabhesajjapariyantā narattipariyantā nāma bhesajjāni ca apariggahitāni honti rattiyo ca apariggahitāyo hontī’’ti (pāci. 307).

    ১৫৬৩. ‘‘সাদিতব্বা’’তি ৰুত্তে সাদিযনপ্পকারে দস্সেতুমাহ ‘‘ৰিঞ্ঞাপেস্সামী’’তিআদি। ভেসজ্জম্পি সতি মে পচ্চযে ৰিঞ্ঞাপেস্সামীতি যোজনা, ‘‘সাদিতব্বা’’তি ইমিনা সম্বন্ধো। তদেৰ ব্যতিরেকতো দস্সেতুমাহ ‘‘ন পটিক্খিপিতব্বা’’তি। পটিক্খেপকারণং দস্সেতুমাহ ‘‘রোগোদানি ন মেতি চা’’তি। সা তিৰিধা পৰারণা।

    1563. ‘‘Sāditabbā’’ti vutte sādiyanappakāre dassetumāha ‘‘viññāpessāmī’’tiādi. Bhesajjampi sati me paccaye viññāpessāmīti yojanā, ‘‘sāditabbā’’ti iminā sambandho. Tadeva byatirekato dassetumāha ‘‘na paṭikkhipitabbā’’ti. Paṭikkhepakāraṇaṃ dassetumāha ‘‘rogodāni na meti cā’’ti. Sā tividhā pavāraṇā.

    ১৫৬৪. তিকপাচিত্তিযং ৰুত্তন্তি ‘‘ততুত্তরি ততুত্তরিসঞ্ঞী, ৰেমতিকো, নততুত্তরিসঞ্ঞী ভেসজ্জং ৰিঞ্ঞাপেতি, আপত্তি পাচিত্তিযস্সা’’তি (পাচি॰ ৩০৯) ৰুত্তং পাচিত্তিযত্তযং। ইধ ততুত্তরীতি এত্থ যেহি ভেসজ্জেহি পৰারিতো, যাসু চ রত্তীসু পৰারিতো, ততো চে উত্তরি অধিকন্তি অত্থো। যথাহ ‘‘ভেসজ্জপরিযন্তে যেহি ভেসজ্জেহি পৰারিতো হোতি, তানি ভেসজ্জানি ঠপেত্ৰা অঞ্ঞানি ভেসজ্জানি ৰিঞ্ঞাপেতি, আপত্তি পাচিত্তিযস্সা’’তি চ ‘‘রত্তিপরিযন্তে যাসু রত্তীসু পৰারিতো হোতি, তা রত্তিযো ঠপেত্ৰা অঞ্ঞাসু রত্তীসু ৰিঞ্ঞাপেতি, আপত্তি পাচিত্তিযস্সা’’তি (পাচি॰ ৩০৮) চ। তত্থ ৰেমতিকস্স চ দুক্কটং ৰুত্তন্তি যোজনা।

    1564.Tikapācittiyaṃvuttanti ‘‘tatuttari tatuttarisaññī, vematiko, natatuttarisaññī bhesajjaṃ viññāpeti, āpatti pācittiyassā’’ti (pāci. 309) vuttaṃ pācittiyattayaṃ. Idha tatuttarīti ettha yehi bhesajjehi pavārito, yāsu ca rattīsu pavārito, tato ce uttari adhikanti attho. Yathāha ‘‘bhesajjapariyante yehi bhesajjehi pavārito hoti, tāni bhesajjāni ṭhapetvā aññāni bhesajjāni viññāpeti, āpatti pācittiyassā’’ti ca ‘‘rattipariyante yāsu rattīsu pavārito hoti, tā rattiyo ṭhapetvā aññāsu rattīsu viññāpeti, āpatti pācittiyassā’’ti (pāci. 308) ca. Tattha vematikassa ca dukkaṭaṃ vuttanti yojanā.

    ১৫৬৫. ততো চতুমাসতো উত্তরি অতিরেকং ততুত্তরি, ততুত্তরি ন হোতীতি নততুত্তরি, নততুত্তরীতি সঞ্ঞা অস্স অত্থীতি নততুত্তরিসঞ্ঞী, ভিক্খু, তস্স অনাপত্তীতি যোজনা। যেহি ভেসজ্জেহি পৰারিতো, তানি ৰিঞ্ঞাপেন্তস্স অনাপত্তীতি সহ সেসেন যোজেতব্বং। যথাহ ‘‘অনাপত্তি যেহি ভেসজ্জেহি পৰারিতো হোতি, তানি ভেসজ্জানি ৰিঞ্ঞাপেতী’’তি (পাচি॰ ৩১০)। যেন ৰা যেহি ভেসজ্জেহি যাসু ৰা রত্তীসু পৰারিতো, ততো অঞ্ঞম্পি যথাতথং আচিক্খিত্ৰা ভিয্যো ৰিঞ্ঞাপেন্তস্স অনাপত্তীতি সহ সেসেন যোজেতব্বং। যথাতথং আচিক্খিত্ৰা ভিয্যো ৰিঞ্ঞাপেন্তস্সাতি এত্থ ‘‘ইমেহি তযা ভেসজ্জেহি পৰারিতম্হ, অম্হাকঞ্চ ইমিনা চ ইমিনা চ ভেসজ্জেন অত্থো’তি আচিক্খিত্ৰা ৰিঞ্ঞাপেতি, ‘যাসু তযা রত্তীসু পৰারিতম্হ, তাযো চ রত্তিযো ৰীতিৰত্তা, অম্হাকঞ্চ ভেসজ্জেন অত্থো’তি আচিক্খিত্ৰা ৰিঞ্ঞাপেতী’’তি (পাচি॰ ৩১০) ৰচনতো যথাতথং ৰত্ৰা অধিকং ৰিঞ্ঞাপেন্তস্সাতি অত্থো।

    1565. Tato catumāsato uttari atirekaṃ tatuttari, tatuttari na hotīti natatuttari, natatuttarīti saññā assa atthīti natatuttarisaññī, bhikkhu, tassa anāpattīti yojanā. Yehi bhesajjehi pavārito, tāni viññāpentassa anāpattīti saha sesena yojetabbaṃ. Yathāha ‘‘anāpatti yehi bhesajjehi pavārito hoti, tāni bhesajjāni viññāpetī’’ti (pāci. 310). Yena vā yehi bhesajjehi yāsu vā rattīsu pavārito, tato aññampi yathātathaṃ ācikkhitvā bhiyyo viññāpentassa anāpattīti saha sesena yojetabbaṃ. Yathātathaṃ ācikkhitvā bhiyyo viññāpentassāti ettha ‘‘imehi tayā bhesajjehi pavāritamha, amhākañca iminā ca iminā ca bhesajjena attho’ti ācikkhitvā viññāpeti, ‘yāsu tayā rattīsu pavāritamha, tāyo ca rattiyo vītivattā, amhākañca bhesajjena attho’ti ācikkhitvā viññāpetī’’ti (pāci. 310) vacanato yathātathaṃ vatvā adhikaṃ viññāpentassāti attho.

    ১৫৬৬. অঞ্ঞস্স ভিক্খুস্স অত্থায ৰা ৰিঞ্ঞাপেন্তস্স ভিক্খুস্স অনাপত্তীতি যোজনা। ঞাতকানং ৰিঞ্ঞাপেন্তস্স অনাপত্তীতি এত্থ ঞাতকানং সন্তকং ৰিঞ্ঞাপেন্তস্স অনাপত্তীতি অত্থো। অত্তনো ৰা ধনেন ৰিঞ্ঞাপেন্তস্স অনাপত্তীতি যোজনা। এত্থ ধনং নাম তণ্ডুলাদি কপ্পিযৰত্থু।

    1566. Aññassa bhikkhussa atthāya vā viññāpentassa bhikkhussa anāpattīti yojanā. Ñātakānaṃ viññāpentassa anāpattīti ettha ñātakānaṃ santakaṃ viññāpentassa anāpattīti attho. Attano vā dhanena viññāpentassa anāpattīti yojanā. Ettha dhanaṃ nāma taṇḍulādi kappiyavatthu.

    ১৫৬৭. ‘‘তথা’’তি ইমিনা ‘‘ৰিঞ্ঞাপেন্তস্সা’’তি ইদং পচ্চামসতি। উম্মত্তকাদীনন্তি ৰিসেসিতব্বমপেক্খিত্ৰা ‘‘ৰিঞ্ঞাপেন্তান’’ন্তি বহুৰচনং কাতব্বং।

    1567.‘‘Tathā’’ti iminā ‘‘viññāpentassā’’ti idaṃ paccāmasati. Ummattakādīnanti visesitabbamapekkhitvā ‘‘viññāpentāna’’nti bahuvacanaṃ kātabbaṃ.

    ভেসজ্জকথাৰণ্ণনা।

    Bhesajjakathāvaṇṇanā.

    ১৫৬৮. উয্যুত্তন্তি সঙ্গামত্থায কতউয্যোগং, গামতো নিক্খম্ম গচ্ছন্তং ৰা একত্থ সন্নিৰিট্ঠং ৰা। যথাহ ‘‘উয্যুত্তা নাম সেনা গামতো নিক্খমিত্ৰা নিৰিট্ঠা ৰা হোতি পযাতা ৰা’’তি (পাচি॰ ৩১৪)। অঞ্ঞত্র পচ্চযাতি ঠপেত্ৰা তথারূপপচ্চযং।

    1568.Uyyuttanti saṅgāmatthāya katauyyogaṃ, gāmato nikkhamma gacchantaṃ vā ekattha sanniviṭṭhaṃ vā. Yathāha ‘‘uyyuttā nāma senā gāmato nikkhamitvā niviṭṭhā vā hoti payātā vā’’ti (pāci. 314). Aññatra paccayāti ṭhapetvā tathārūpapaccayaṃ.

    ১৫৬৯. দস্সনস্সুপচারস্মিন্তি এত্থ দস্সনূপচারং নাম যস্মিং ঠানে ঠিতস্স সেনা পঞ্ঞাযতি, তং ঠানং। যথাহ ‘‘যত্থ ঠিতো পস্সতি, আপত্তি পাচিত্তিযস্সা’’তি (পাচি॰ ৩১৪)। উপচারং ৰিমুঞ্চিত্ৰা পস্সন্তস্সাতি যথাৰুত্তদস্সনোপচারট্ঠানং এত্থ ঠত্ৰা ওলোকেতুং ন সুকরন্তিআদিনা কারণেন তং ঠানং পহায অঞ্ঞত্থ ৰিলোকেন্তস্সাতি ৰুত্তং হোতি। কেনচি পটিচ্ছন্নং হুত্ৰা অদিস্সমানম্পি নিন্নং ঠানং ওতিণ্ণং অপঞ্ঞাযমানম্পি পঞ্ঞাযন্তম্পি ওলোকেতুং ন সক্কা এৰমেৰ ৰিনিচ্ছযো ৰেদিতব্বো। যথাহ ‘‘কেনচি অন্তরিতা ৰা নিন্নং ওরুল়্হা ৰা ন দিস্সতী’’তিআদি (পাচি॰ অট্ঠ॰ ৩১৪)। পযোগতোতি যথাৰুত্তদস্সনপযোগগণনায।

    1569.Dassanassupacārasminti ettha dassanūpacāraṃ nāma yasmiṃ ṭhāne ṭhitassa senā paññāyati, taṃ ṭhānaṃ. Yathāha ‘‘yattha ṭhito passati, āpatti pācittiyassā’’ti (pāci. 314). Upacāraṃ vimuñcitvā passantassāti yathāvuttadassanopacāraṭṭhānaṃ ettha ṭhatvā oloketuṃ na sukarantiādinā kāraṇena taṃ ṭhānaṃ pahāya aññattha vilokentassāti vuttaṃ hoti. Kenaci paṭicchannaṃ hutvā adissamānampi ninnaṃ ṭhānaṃ otiṇṇaṃ apaññāyamānampi paññāyantampi oloketuṃ na sakkā evameva vinicchayo veditabbo. Yathāha ‘‘kenaci antaritā vā ninnaṃ oruḷhā vā na dissatī’’tiādi (pāci. aṭṭha. 314). Payogatoti yathāvuttadassanapayogagaṇanāya.

    ১৫৭০. ইদানি চতুরঙ্গসেনালক্খণং দস্সেতুমাহ ‘‘আরোহা পন চত্তারো’’তিআদি। আরোহাতি এত্থ হত্থারোহা দট্ঠব্বা। তপ্পাদরক্খকাতি তস্স পাদরক্খকাতি ৰিগ্গহো। দ্ৰে দ্ৰেতি একেকং পাদং রক্খন্তা দ্ৰে দ্ৰে। দ্ৰাদসপোসোতি দ্ৰাদস পোসা এতস্সাতি ৰিগ্গহো। দ্ৰাদসপুরিসযুত্তো একো হত্থী নাম।

    1570. Idāni caturaṅgasenālakkhaṇaṃ dassetumāha ‘‘ārohā pana cattāro’’tiādi. Ārohāti ettha hatthārohā daṭṭhabbā. Tappādarakkhakāti tassa pādarakkhakāti viggaho. Dve dveti ekekaṃ pādaṃ rakkhantā dve dve. Dvādasaposoti dvādasa posā etassāti viggaho. Dvādasapurisayutto eko hatthī nāma.

    ১৫৭১. আরোহোতি এত্থ অস্সারোহো ৰুচ্চতি। তিপুরিসোতি তযো পুরিসা অস্সাতি ৰিগ্গহো। হযোতি অস্সো। একো সারথীতি রথচারিকো। ‘‘যোধো একো’’তি পদচ্ছেদো। আণিরক্খাতি রথচক্কদ্ৰযস্স অগল়নত্থং অক্খকস্স উভোসু কোটীসু আকোটিতা দ্ৰে আণিযো রক্খনকা।

    1571.Ārohoti ettha assāroho vuccati. Tipurisoti tayo purisā assāti viggaho. Hayoti asso. Eko sārathīti rathacāriko. ‘‘Yodho eko’’ti padacchedo. Āṇirakkhāti rathacakkadvayassa agaḷanatthaṃ akkhakassa ubhosu koṭīsu ākoṭitā dve āṇiyo rakkhanakā.

    ১৫৭২. চতুপোসোতি চত্তারো পোসা যস্সাতি ৰিগ্গহো। চতুসচ্চৰিভাৰিনাতি চতুন্নং অরিযসচ্চানং দেসকেন ভগৰতা। পদহত্থাতি আৰুধহত্থা। পজ্জতে গম্যতে অনেন পরে হনিতুন্তি পদং, আৰুধং, পদানি হত্থেসু যেসং তে পদহত্থাতি ভিন্নাধিকরণো বাহিরত্থসমাসো যথা ‘‘ৰজিরপাণী’’তি। পত্তিপদাতি-সদ্দো অনত্থন্তরা, মনুস্সসেনায অধিৰচনং।

    1572.Catuposoti cattāro posā yassāti viggaho. Catusaccavibhāvināti catunnaṃ ariyasaccānaṃ desakena bhagavatā. Padahatthāti āvudhahatthā. Pajjate gamyate anena pare hanitunti padaṃ, āvudhaṃ, padāni hatthesu yesaṃ te padahatthāti bhinnādhikaraṇo bāhiratthasamāso yathā ‘‘vajirapāṇī’’ti. Pattipadāti-saddo anatthantarā, manussasenāya adhivacanaṃ.

    ১৫৭৩. চতুরঙ্গসমাযুত্তাতি চতূহি অঙ্গেহি অৰযৰেহি সমাযুত্তাতি ৰিগ্গহো।

    1573.Caturaṅgasamāyuttāti catūhi aṅgehi avayavehi samāyuttāti viggaho.

    ১৫৭৪. হত্থিআদীসূতি যথাৰুত্তলক্খণহত্থিঅস্সরথপদাতিনামকেসু চতূসু অঙ্গেসু, নিদ্ধারণে ভুম্মং। একেকন্তি একেকং অঙ্গং। এতেসু অৰকংসতো একং পুরিসারুল়্হমপি হত্থিঞ্চ তথা অস্সঞ্চ একং পদহত্থপুরিসঞ্চ একমেকং কত্ৰা আহ ‘‘একেকং দস্সনত্থায গচ্ছতো’’তি। যথাহ অট্ঠকথাযং ‘‘অন্তমসো একপুরিসারুল়্হং একম্পি হত্থিম্পী’’তিআদি (পাচি॰ অট্ঠ॰ ৩১৫)। অনুয্যুত্তেপীতি সঙ্গামং ৰিনা অঞ্ঞেন কারণেন নিক্খন্তে। যথাহ ‘‘অনুয্যুত্তা নাম রাজা উয্যানং ৰা নদিং ৰা গচ্ছতি, এৰং অনুয্যুত্তা হোতী’’তি (পাচি॰ অট্ঠ॰ ৩১৫)।

    1574.Hatthiādīsūti yathāvuttalakkhaṇahatthiassarathapadātināmakesu catūsu aṅgesu, niddhāraṇe bhummaṃ. Ekekanti ekekaṃ aṅgaṃ. Etesu avakaṃsato ekaṃ purisāruḷhamapi hatthiñca tathā assañca ekaṃ padahatthapurisañca ekamekaṃ katvā āha ‘‘ekekaṃ dassanatthāya gacchato’’ti. Yathāha aṭṭhakathāyaṃ ‘‘antamaso ekapurisāruḷhaṃ ekampi hatthimpī’’tiādi (pāci. aṭṭha. 315). Anuyyuttepīti saṅgāmaṃ vinā aññena kāraṇena nikkhante. Yathāha ‘‘anuyyuttā nāma rājā uyyānaṃ vā nadiṃ vā gacchati, evaṃ anuyyuttā hotī’’ti (pāci. aṭṭha. 315).

    ১৫৭৫. সম্পত্তন্তি এত্থ ‘‘সেন’’ন্তি পকরণতো লব্ভতি। আপদাসূতি জীৰিতব্রহ্মচরিযন্তরাযে সতি ‘‘এত্থ গতো মুচ্চিস্সামী’’তি গচ্ছতো অনাপত্তি। তথারূপে পচ্চযে গিলানাৰলোকনাদিকে গমনানুরূপপচ্চযে সতি অনাপত্তীতি যোজনা।

    1575.Sampattanti ettha ‘‘sena’’nti pakaraṇato labbhati. Āpadāsūti jīvitabrahmacariyantarāye sati ‘‘ettha gato muccissāmī’’ti gacchato anāpatti. Tathārūpe paccaye gilānāvalokanādike gamanānurūpapaccaye sati anāpattīti yojanā.

    উয্যুত্তকথাৰণ্ণনা।

    Uyyuttakathāvaṇṇanā.

    ১৫৭৬-৭. ‘‘সিযা চ তস্স ভিক্খুনো কোচিদেৰ পচ্চযো সেনং গমনায, দিরত্ততিরত্তং তেন ভিক্খুনা সেনায ৰসিতব্ব’’ন্তি (পাচি॰ ৩১৮) অনুঞ্ঞাতত্তা কেনচি করণীযেন সঙ্গামত্থং উয্যুত্তায সেনায দিরত্ততিরত্তং পটিপাটিযা ৰসিত্ৰা চতুত্থরত্তিযং ৰসন্তস্স পন ভিক্খুনো আপত্তিং দস্সেতুমাহ ‘‘চতুত্থে’’তিআদি। অনাপত্তিৰারে ‘‘গিলানো ৰসতী’’তি (পাচি॰ ৩২১) ৰুত্তত্তা আহ ‘‘অরোগৰা’’তি। সেনাযাতি এত্থ পরিক্খেপারহট্ঠানেন ৰা সঞ্চরণপরিযন্তেন ৰা সেনা পরিচ্ছিন্দিতব্বা, এৰং পরিচ্ছিন্নায সেনায অন্তোৰাতি অত্থো।

    1576-7. ‘‘Siyā ca tassa bhikkhuno kocideva paccayo senaṃ gamanāya, dirattatirattaṃ tena bhikkhunā senāya vasitabba’’nti (pāci. 318) anuññātattā kenaci karaṇīyena saṅgāmatthaṃ uyyuttāya senāya dirattatirattaṃ paṭipāṭiyā vasitvā catuttharattiyaṃ vasantassa pana bhikkhuno āpattiṃ dassetumāha ‘‘catutthe’’tiādi. Anāpattivāre ‘‘gilāno vasatī’’ti (pāci. 321) vuttattā āha ‘‘arogavā’’ti. Senāyāti ettha parikkhepārahaṭṭhānena vā sañcaraṇapariyantena vā senā paricchinditabbā, evaṃ paricchinnāya senāya antovāti attho.

    তিকপাচিত্তিযন্তি ‘‘অতিরেকতিরত্তে অতিরেকসঞ্ঞী, ৰেমতিকো, ঊনকসঞ্ঞী সেনায ৰসতি, আপত্তি পাচিত্তিযস্সা’’তি (পাচি॰ ৩২০) পাচিত্তিযত্তযং ৰুত্তং।

    Tikapācittiyanti ‘‘atirekatiratte atirekasaññī, vematiko, ūnakasaññī senāya vasati, āpatti pācittiyassā’’ti (pāci. 320) pācittiyattayaṃ vuttaṃ.

    সেনাৰাসকথাৰণ্ণনা।

    Senāvāsakathāvaṇṇanā.

    ১৫৮০. উয্যোধিকং নাম সঙ্গামট্ঠানং। যথাহ অট্ঠকথাযং ‘‘উগ্গন্ত্ৰা উগ্গন্ত্ৰা এত্থ যুজ্ঝন্তীতি উয্যোধিকং, সম্পহারট্ঠানস্সেতং অধিৰচন’’ন্তি (পাচি॰ অট্ঠ॰ ৩২২)। বলগ্গন্তি ‘‘এত্তকা হত্থী’’তিআদিনা (পাচি॰ ৩২৪) পদভাজনাগতনযেন বলস্স গণনট্ঠানং বলগ্গং। যথাহ ‘‘বলস্স অগ্গং জানন্তি এত্থাতি বলগ্গং, বলগণনট্ঠানন্তি অত্থো’’তি (পাচি॰ অট্ঠ॰ ৩২২)। সেনাব্যূহন্তি ‘‘ইতো হত্থী হোন্তু, ইতো অস্সা, ইতো রথা, ইতো পত্তী হোন্তূ’’তি (পাচি॰ ৩২৪) পদভাজনে ৰুত্তসেনাসন্নিৰেসট্ঠানং সেনাব্যূহং। যথাহ ‘‘সেনায ৰিযূহং সেনাব্যূহং, সেনাসন্নিৰেসস্সেতং অধিৰচন’’ন্তি (পাচি॰ অট্ঠ॰ ৩২২)।

    1580.Uyyodhikaṃ nāma saṅgāmaṭṭhānaṃ. Yathāha aṭṭhakathāyaṃ ‘‘uggantvā uggantvā ettha yujjhantīti uyyodhikaṃ, sampahāraṭṭhānassetaṃ adhivacana’’nti (pāci. aṭṭha. 322). Balagganti ‘‘ettakā hatthī’’tiādinā (pāci. 324) padabhājanāgatanayena balassa gaṇanaṭṭhānaṃ balaggaṃ. Yathāha ‘‘balassa aggaṃ jānanti etthāti balaggaṃ, balagaṇanaṭṭhānanti attho’’ti (pāci. aṭṭha. 322). Senābyūhanti ‘‘ito hatthī hontu, ito assā, ito rathā, ito pattī hontū’’ti (pāci. 324) padabhājane vuttasenāsannivesaṭṭhānaṃ senābyūhaṃ. Yathāha ‘‘senāya viyūhaṃ senābyūhaṃ, senāsannivesassetaṃ adhivacana’’nti (pāci. aṭṭha. 322).

    ১৫৮১. পুরিমেতি অনন্তরসিক্খাপদে। ‘‘দ্ৰাদসপুরিসো হত্থী’’ইতি যো হত্থী ৰুত্তোতি যোজনা। তেনাতি তেন হত্থিনা হেতুভূতেন।

    1581.Purimeti anantarasikkhāpade. ‘‘Dvādasapuriso hatthī’’iti yo hatthī vuttoti yojanā. Tenāti tena hatthinā hetubhūtena.

    ১৫৮২. ‘‘সেসেসূ’’তি ইমিনা অস্সানীকরথানীকপত্তানীকা গহিতা। পত্তানীকং নাম ‘‘চত্তারো পুরিসা পদহত্থা পত্তী পচ্ছিমং পত্তানীক’’ন্তি (পাচি॰ ৩২৪) সেনঙ্গেসু পটিনিদ্দেসেন নিব্বিসেসং কত্ৰা ৰুত্তং। তিণ্ণন্তি এতেসং উয্যুত্তাদীনং।

    1582.‘‘Sesesū’’ti iminā assānīkarathānīkapattānīkā gahitā. Pattānīkaṃ nāma ‘‘cattāro purisā padahatthā pattī pacchimaṃ pattānīka’’nti (pāci. 324) senaṅgesu paṭiniddesena nibbisesaṃ katvā vuttaṃ. Tiṇṇanti etesaṃ uyyuttādīnaṃ.

    উয্যোধিককথাৰণ্ণনা।

    Uyyodhikakathāvaṇṇanā.

    অচেলকৰগ্গো পঞ্চমো।

    Acelakavaggo pañcamo.

    ১৫৮৩. পিট্ঠাদীহীতি এত্থ আদি-সদ্দেন পূৰাদিং সঙ্গণ্হাতি। যথাহ ‘‘সুরা নাম পিট্ঠসুরা পূৰসুরা ওদনসুরা কিণ্ণপক্খিত্তা সম্ভারসংযুত্তা’’তি (পাচি॰ ৩২৮)। এত্থ চ পিট্ঠং ভাজনে পক্খিপিত্ৰা তজ্জং উদকং দত্ৰা পক্খিপিত্ৰা কতা পিট্ঠসুরা। এৰং পূৰে, ওদনে চ ভাজনে পক্খিপিত্ৰা তজ্জং উদকং দত্ৰা মদ্দিত্ৰা কতা ‘‘পূৰসুরা, ওদনসুরা’’তি ৰুচ্চতি। ‘‘কিণ্ণা’’তি পন তস্সা সুরায বীজং ৰুচ্চতি, যে ‘‘সুরামোদকা’’তিপি ৰুচ্চন্তি, তে পক্খিপিত্ৰা কতা কিণ্ণপক্খিত্তা। হরীতকিসাসপাদিনানাসম্ভারেহি সংযোজিতা সম্ভারসংযুত্তা।

    1583.Piṭṭhādīhīti ettha ādi-saddena pūvādiṃ saṅgaṇhāti. Yathāha ‘‘surā nāma piṭṭhasurā pūvasurā odanasurā kiṇṇapakkhittā sambhārasaṃyuttā’’ti (pāci. 328). Ettha ca piṭṭhaṃ bhājane pakkhipitvā tajjaṃ udakaṃ datvā pakkhipitvā katā piṭṭhasurā. Evaṃ pūve, odane ca bhājane pakkhipitvā tajjaṃ udakaṃ datvā madditvā katā ‘‘pūvasurā, odanasurā’’ti vuccati. ‘‘Kiṇṇā’’ti pana tassā surāya bījaṃ vuccati, ye ‘‘surāmodakā’’tipi vuccanti, te pakkhipitvā katā kiṇṇapakkhittā. Harītakisāsapādinānāsambhārehi saṃyojitā sambhārasaṃyuttā.

    পুপ্ফাদীহীতি এত্থ আদি-সদ্দেন ফলাদীনং গহণং। যথাহ ‘‘মেরযো নাম পুপ্ফাসৰো ফলাসৰো মধ্ৰাসৰো গুল়াসৰো সম্ভারসংযুত্তো’’তি (পাচি॰ ৩২৮)। তত্থ চ পুপ্ফাসৰো নাম মধুকপুপ্ফাদীনং জাতিরসকতো চেৰ তালনাল়িকেরপুপ্ফানঞ্চ রসো চিরপরিৰাসিতো। ফলাসৰো পন মুদ্দিকাপনসফলাদীনি মদ্দিত্ৰা তেসং রসেন কতো। মধ্ৰাসৰো নাম মুদ্দিকানং জাতিরসেন কতো। মক্খিকামধুনাপি করীযতীতি ৰদন্তি। উচ্ছুরসো গুল়াসৰো। হরীতকামলককটুকভণ্ডাদিনানাসম্ভারানং রসো চিরপরিৰাসিতো সম্ভারসংযুত্তো। আসৰো মেরযং হোতীতি যোজনা।

    Pupphādīhīti ettha ādi-saddena phalādīnaṃ gahaṇaṃ. Yathāha ‘‘merayo nāma pupphāsavo phalāsavo madhvāsavo guḷāsavo sambhārasaṃyutto’’ti (pāci. 328). Tattha ca pupphāsavo nāma madhukapupphādīnaṃ jātirasakato ceva tālanāḷikerapupphānañca raso ciraparivāsito. Phalāsavo pana muddikāpanasaphalādīni madditvā tesaṃ rasena kato. Madhvāsavo nāma muddikānaṃ jātirasena kato. Makkhikāmadhunāpi karīyatīti vadanti. Ucchuraso guḷāsavo. Harītakāmalakakaṭukabhaṇḍādinānāsambhārānaṃ raso ciraparivāsito sambhārasaṃyutto. Āsavo merayaṃ hotīti yojanā.

    ১৫৮৪. বীজতো পট্ঠাযাতি সম্ভারে পটিযাদিত্ৰা চাটিযং পক্খিত্তকালতো পট্ঠায তালনাল়িকেরাদীনং পুপ্ফরসে পুপ্ফতো গল়িতাভিনৰকালতোযেৰ চ পট্ঠায। পিৰন্তস্সাতি এত্থ ‘‘কুসগ্গেনা’’তিপি সেসো। উভযম্পি চাতি সুরং, মেরযঞ্চাতি উভযম্পি। বীজতো পন পট্ঠায কুসগ্গেন পিৰন্তস্সপি ভিক্খুনো পাচিত্তিযং হোতীতি যোজেতব্বং। পযোগবাহুল্লেন আপত্তিবাহুল্লং দস্সেতুমাহ ‘‘পযোগে চ পযোগে চা’’তি। ইদঞ্চ ৰিচ্ছিন্দিত্ৰা ৰিচ্ছিন্দিত্ৰা পিৰন্তস্স ভিক্খুনো পযোগে চ পযোগে চ পাচিত্তিযং হোতীতি যোজেতব্বং। যথাহ ‘‘ৰিচ্ছিন্দিত্ৰা ৰিচ্ছিন্দিত্ৰা পিৰতো পযোগগণনায আপত্তিযো’’তি (পাচি॰ অট্ঠ॰ ৩২৮)। একেনেৰ পযোগেন বহুম্পি পিৰন্তস্স একং এৰ আপত্তিং ব্যতিরেকতো দীপেতি। যথাহ ‘‘একেন পন পযোগেন বহুম্পি পিৰন্তস্স একা আপত্তী’’তি (পাচি॰ অট্ঠ॰ ৩২৮)।

    1584.Bījato paṭṭhāyāti sambhāre paṭiyāditvā cāṭiyaṃ pakkhittakālato paṭṭhāya tālanāḷikerādīnaṃ puppharase pupphato gaḷitābhinavakālatoyeva ca paṭṭhāya. Pivantassāti ettha ‘‘kusaggenā’’tipi seso. Ubhayampi cāti suraṃ, merayañcāti ubhayampi. Bījato pana paṭṭhāya kusaggena pivantassapi bhikkhuno pācittiyaṃ hotīti yojetabbaṃ. Payogabāhullena āpattibāhullaṃ dassetumāha ‘‘payoge ca payoge cā’’ti. Idañca vicchinditvā vicchinditvā pivantassa bhikkhuno payoge ca payoge ca pācittiyaṃ hotīti yojetabbaṃ. Yathāha ‘‘vicchinditvā vicchinditvā pivato payogagaṇanāya āpattiyo’’ti (pāci. aṭṭha. 328). Ekeneva payogena bahumpi pivantassa ekaṃ eva āpattiṃ byatirekato dīpeti. Yathāha ‘‘ekena pana payogena bahumpi pivantassa ekā āpattī’’ti (pāci. aṭṭha. 328).

    ১৫৮৫. তিকপাচিত্তিযং ৰুত্তন্তি ‘‘মজ্জে মজ্জসঞ্ঞী, মজ্জে ৰেমতিকো, মজ্জে অমজ্জসঞ্ঞী পিৰতি, আপত্তি পাচিত্তিযস্সা’’তি (পাচি॰ ৩২৮) তিকপাচিত্তিযং ৰুত্তং।

    1585.Tikapācittiyaṃ vuttanti ‘‘majje majjasaññī, majje vematiko, majje amajjasaññī pivati, āpatti pācittiyassā’’ti (pāci. 328) tikapācittiyaṃ vuttaṃ.

    ১৫৮৬. ‘‘অনাপত্তি নমজ্জং হোতি মজ্জৰণ্ণং মজ্জগন্ধং মজ্জরসং, তং পিৰতী’’তি (পাচি॰ ৩২৮) ৰুত্তত্তা আহ ‘‘অমজ্জং মজ্জৰণ্ণ’’ন্তিআদি। অরিট্ঠং নাম আমলকফলরসাদীহি কতো আসৰৰিসেসো। লোণসোৰীরকং নাম অট্ঠকথাযং –

    1586. ‘‘Anāpatti namajjaṃ hoti majjavaṇṇaṃ majjagandhaṃ majjarasaṃ, taṃ pivatī’’ti (pāci. 328) vuttattā āha ‘‘amajjaṃ majjavaṇṇa’’ntiādi. Ariṭṭhaṃ nāma āmalakaphalarasādīhi kato āsavaviseso. Loṇasovīrakaṃ nāma aṭṭhakathāyaṃ –

    ‘‘হরীতকামলকৰিভীতককসাৰে, সব্বধঞ্ঞানি, সব্বঅপরণ্ণানি, সত্তন্নম্পি ধঞ্ঞানং ওদনং, কদলিফলাদীনি সব্বফলানি, ৰেত্তকেতকখজ্জূরিকল়ীরাদযো সব্বকল়ীরে, মচ্ছমংসখণ্ডানি, অনেকানি চ মধুফাণিতসিন্ধৰলোণতিকটুকাদীনি ভেসজ্জানি পক্খিপিত্ৰা কুম্ভিমুখং লিম্পিত্ৰা একং ৰা দ্ৰে ৰা তীণি ৰা সংৰচ্ছরানি ঠপেন্তি, তং পরিপচ্চিত্ৰা জম্বুরসৰণ্ণং হোতি। ৰাতকাসকুট্ঠপণ্ডুভগন্দলাদীনঞ্চ সিনিদ্ধভোজনভুত্তানঞ্চ উত্তরপানং ভত্তজীরণকভেসজ্জং তাদিসং নত্থি। তং পনেতং ভিক্খূনং পচ্ছাভত্তম্পি ৰট্টতি, গিলানানং পাকতিকমেৰ। অগিলানানং পন উদকসম্ভিন্নং পানপরিভোগেনা’’তি (পারা॰ অট্ঠ॰ ২.১৯২) –

    ‘‘Harītakāmalakavibhītakakasāve, sabbadhaññāni, sabbaaparaṇṇāni, sattannampi dhaññānaṃ odanaṃ, kadaliphalādīni sabbaphalāni, vettaketakakhajjūrikaḷīrādayo sabbakaḷīre, macchamaṃsakhaṇḍāni, anekāni ca madhuphāṇitasindhavaloṇatikaṭukādīni bhesajjāni pakkhipitvā kumbhimukhaṃ limpitvā ekaṃ vā dve vā tīṇi vā saṃvaccharāni ṭhapenti, taṃ paripaccitvā jamburasavaṇṇaṃ hoti. Vātakāsakuṭṭhapaṇḍubhagandalādīnañca siniddhabhojanabhuttānañca uttarapānaṃ bhattajīraṇakabhesajjaṃ tādisaṃ natthi. Taṃ panetaṃ bhikkhūnaṃ pacchābhattampi vaṭṭati, gilānānaṃ pākatikameva. Agilānānaṃ pana udakasambhinnaṃ pānaparibhogenā’’ti (pārā. aṭṭha. 2.192) –

    ৰিভাৰিতো ভেসজ্জৰিসেসো। সুত্তং নাম অনেকেহি ভেসজ্জেহি অভিসঙ্খতো অমজ্জভূতো আসৰৰিসেসো।

    Vibhāvito bhesajjaviseso. Suttaṃ nāma anekehi bhesajjehi abhisaṅkhato amajjabhūto āsavaviseso.

    ১৫৮৭. ৰাসগাহাপনত্থাযাতি সুগন্ধিভাৰগাহাপনত্থং। ঈসকন্তি মজ্জৰণ্ণগন্ধরসা যথা ন পঞ্ঞাযন্তি, এৰং অপ্পমত্তকং। যথাহ ‘‘অনতিক্খিত্তমজ্জেযেৰ অনাপত্তি। যং পন অতিক্খিত্তমজ্জং হোতি, যত্থ মজ্জস্স ৰণ্ণগন্ধরসা পঞ্ঞাযন্তি, তস্মিং আপত্তিযেৰা’’তি (পাচি॰ অট্ঠ॰ ৩২৯)। সূপাদীনং তু পাকেতি এত্থ আদি-সদ্দেন মংসপাকাদযো সঙ্গহিতা। যথাহ ‘‘সূপসম্পাকে মংসসম্পাকে তেলসম্পাকে’’তি (পাচি॰ ৩২৮)।

    1587.Vāsagāhāpanatthāyāti sugandhibhāvagāhāpanatthaṃ. Īsakanti majjavaṇṇagandharasā yathā na paññāyanti, evaṃ appamattakaṃ. Yathāha ‘‘anatikkhittamajjeyeva anāpatti. Yaṃ pana atikkhittamajjaṃ hoti, yattha majjassa vaṇṇagandharasā paññāyanti, tasmiṃ āpattiyevā’’ti (pāci. aṭṭha. 329). Sūpādīnaṃ tu pāketi ettha ādi-saddena maṃsapākādayo saṅgahitā. Yathāha ‘‘sūpasampāke maṃsasampāke telasampāke’’ti (pāci. 328).

    ১৫৮৮. ৰত্থুঅজাননা অচিত্তন্তি সম্বন্ধো। যথাহ ‘‘ৰত্থুঅজাননতায চেত্থ অচিত্তকতা ৰেদিতব্বা’’তি (পাচি॰ অট্ঠ॰ ৩২৯)। ৰত্থুঅজাননতা চ নাম ‘‘মজ্জ’’ন্তি অজাননভাৰো। ইদন্তি ইদং সিক্খাপদং। চ-সদ্দেন অঞ্ঞানি চ গিরগ্গসমজ্জাদিসিক্খাপদানি সমুচ্চিনোতি। অকুসলেনেৰাতি অকুসলচিত্তেনেৰ। পানতোতি পাতব্বতো। লোকৰজ্জকন্তি সাধুলোকেন ৰজ্জেতব্বন্তি অত্থো। লোকৰজ্জমেৰ লোকৰজ্জকং।

    1588. Vatthuajānanā acittanti sambandho. Yathāha ‘‘vatthuajānanatāya cettha acittakatā veditabbā’’ti (pāci. aṭṭha. 329). Vatthuajānanatā ca nāma ‘‘majja’’nti ajānanabhāvo. Idanti idaṃ sikkhāpadaṃ. Ca-saddena aññāni ca giraggasamajjādisikkhāpadāni samuccinoti. Akusalenevāti akusalacitteneva. Pānatoti pātabbato. Lokavajjakanti sādhulokena vajjetabbanti attho. Lokavajjameva lokavajjakaṃ.

    ননু চেত্থ ৰত্থুঅজাননতায অচিত্তকত্তে তংৰত্থুঅজাননং কুসলাব্যাকতচিত্তসমঙ্গিনোপি সম্ভৰতি, কস্মা ‘‘অকুসলেনেৰ পানতো লোকৰজ্জক’’ন্তি ৰুত্তন্তি? ৰুচ্চতে – যস্মা অমজ্জসঞ্ঞায পিৰতো, মজ্জসঞ্ঞায চ পিৰতো মজ্জং ৰত্থুনিযামেন কিলেসুপ্পত্তিযাৰ পচ্চযো হোতি, যথা মজ্জং পীতং অজানন্তস্সাপি অকুসলানমেৰ পচ্চযো হোতি, ন কুসলানং, তথা অজ্ঝোহরণকালেপি ৰত্থুনিযামেন অকুসলস্সেৰ পচ্চযো হোতীতি কত্ৰা ৰুত্তং ‘‘অকুসলেনেৰ পানতো লোকৰজ্জক’’ন্তি। যথা তং নিল়িনিজাতকে (জা॰ ২.১৮.১ আদযো; জা॰ অট্ঠ॰ ৫.১৮.১ আদযো) ভেসজ্জসঞ্ঞায ইত্থিযা মগ্গে অঙ্গজাতং পৰেসেন্তস্স কুমারস্স ‘‘ইত্থী’’তি ৰা ‘‘তস্সা মগ্গে মেথুনং পটিসেৰামী’’তি ৰা সঞ্ঞায অভাৰেপি কামরাগুপ্পত্তিযা সীলাদিগুণপরিহানি ৰত্থুনিযামতো চ অহোসি, এৰমিধাপি দট্ঠব্বো।

    Nanu cettha vatthuajānanatāya acittakatte taṃvatthuajānanaṃ kusalābyākatacittasamaṅginopi sambhavati, kasmā ‘‘akusaleneva pānato lokavajjaka’’nti vuttanti? Vuccate – yasmā amajjasaññāya pivato, majjasaññāya ca pivato majjaṃ vatthuniyāmena kilesuppattiyāva paccayo hoti, yathā majjaṃ pītaṃ ajānantassāpi akusalānameva paccayo hoti, na kusalānaṃ, tathā ajjhoharaṇakālepi vatthuniyāmena akusalasseva paccayo hotīti katvā vuttaṃ ‘‘akusaleneva pānato lokavajjaka’’nti. Yathā taṃ niḷinijātake (jā. 2.18.1 ādayo; jā. aṭṭha. 5.18.1 ādayo) bhesajjasaññāya itthiyā magge aṅgajātaṃ pavesentassa kumārassa ‘‘itthī’’ti vā ‘‘tassā magge methunaṃ paṭisevāmī’’ti vā saññāya abhāvepi kāmarāguppattiyā sīlādiguṇaparihāni vatthuniyāmato ca ahosi, evamidhāpi daṭṭhabbo.

    কেচি পন ‘‘অকুসলেনেৰ পানতো’’তি ইদং ইমস্স সিক্খাপদস্স সচিত্তকপক্খং সন্ধায ৰুত্তং, অঞ্ঞথা পাণাতিপাতাদীসুপি অতিপ্পসঙ্গোতি মঞ্ঞমানা বহুকারণং, নিযমনঞ্চ দস্সেসুং। ৰিনযট্ঠকথাযং (পাচি॰ অট্ঠ॰ ৩২৯), পন খুদ্দকপাঠট্ঠকথাযং (খু॰ পা॰ অট্ঠ॰ সিক্খাপদৰণ্ণনা), ৰিভঙ্গট্ঠকথাদীসু চ ‘‘তিচিত্ত’’ন্তি অৰত্ৰা ‘‘অকুসলচিত্ত’’মিচ্চেৰ ৰুত্তত্তা, সিক্খাপদস্স সামঞ্ঞলক্খণং দস্সেন্তেন পক্খন্তরলক্খণদস্সনস্স অযুত্তত্তা চ অট্ঠকথাসু যথারুতৰসেনেৰ অত্থগ্গহণে চ কস্সচি ৰিরোধস্স অসম্ভৰতো সচিত্তকপক্খমেৰ সন্ধায অকুসলচিত্ততা, লোকৰজ্জতা চেত্থ ন ৰত্তব্বা। ‘‘ৰত্থুং জানিত্ৰাপি অজানিত্ৰাপি মজ্জং পিৰতো ভিক্খুস্স পাচিত্তিযং। সামণেরস্স পন জানিত্ৰাৰ পিৰতো সীলভেদো, ন অজানিত্ৰা’’তি (মাহাৰ॰ অট্ঠ॰ ১০৮ অত্থতো সমানং) যং ৰুত্তং, তত্থ কারণং মগ্গিতব্বং। সিক্খাপদপঞ্ঞত্তিযা বুদ্ধানমেৰ ৰিসযত্তা ন তং মগ্গিতব্বং, যথাপঞ্ঞত্তেযেৰ ৰত্তিতব্বং। ইদং পন সিক্খাপদং অকুসলচিত্তং, সুখোপেক্খাৰেদনানং ৰসেন দুৰেদনঞ্চ হোতি। ৰিনযট্ঠকথাযং (পাচি॰ অট্ঠ॰ ৩২৯), পন মাতিকট্ঠকথাযঞ্চ (কঙ্খা॰ অট্ঠ॰ সুরাপানসিক্খাপদৰণ্ণনা) ‘‘তিৰেদন’’ন্তি পাঠো দিস্সতি, খুদ্দকপাঠৰণ্ণনায (খু॰ পা॰ অট্ঠ॰ সিক্খাপদৰণ্ণনা), ৰিভঙ্গট্ঠকথাদীসু (ৰিভ॰ অট্ঠ॰ ৭০৩ আদযো) চ ‘‘সুখমজ্ঝত্তৰেদনাৰসেন দুৰেদন’’ন্তি চ ‘‘লোভমোহমূলৰসেন দ্ৰিমূলক’’ন্তি চ ৰুত্তত্তা সো ‘‘পমাদপাঠো’’তি গহেতব্বো।

    Keci pana ‘‘akusaleneva pānato’’ti idaṃ imassa sikkhāpadassa sacittakapakkhaṃ sandhāya vuttaṃ, aññathā pāṇātipātādīsupi atippasaṅgoti maññamānā bahukāraṇaṃ, niyamanañca dassesuṃ. Vinayaṭṭhakathāyaṃ (pāci. aṭṭha. 329), pana khuddakapāṭhaṭṭhakathāyaṃ (khu. pā. aṭṭha. sikkhāpadavaṇṇanā), vibhaṅgaṭṭhakathādīsu ca ‘‘ticitta’’nti avatvā ‘‘akusalacitta’’micceva vuttattā, sikkhāpadassa sāmaññalakkhaṇaṃ dassentena pakkhantaralakkhaṇadassanassa ayuttattā ca aṭṭhakathāsu yathārutavaseneva atthaggahaṇe ca kassaci virodhassa asambhavato sacittakapakkhameva sandhāya akusalacittatā, lokavajjatā cettha na vattabbā. ‘‘Vatthuṃ jānitvāpi ajānitvāpi majjaṃ pivato bhikkhussa pācittiyaṃ. Sāmaṇerassa pana jānitvāva pivato sīlabhedo, na ajānitvā’’ti (māhāva. aṭṭha. 108 atthato samānaṃ) yaṃ vuttaṃ, tattha kāraṇaṃ maggitabbaṃ. Sikkhāpadapaññattiyā buddhānameva visayattā na taṃ maggitabbaṃ, yathāpaññatteyeva vattitabbaṃ. Idaṃ pana sikkhāpadaṃ akusalacittaṃ, sukhopekkhāvedanānaṃ vasena duvedanañca hoti. Vinayaṭṭhakathāyaṃ (pāci. aṭṭha. 329), pana mātikaṭṭhakathāyañca (kaṅkhā. aṭṭha. surāpānasikkhāpadavaṇṇanā) ‘‘tivedana’’nti pāṭho dissati, khuddakapāṭhavaṇṇanāya (khu. pā. aṭṭha. sikkhāpadavaṇṇanā), vibhaṅgaṭṭhakathādīsu (vibha. aṭṭha. 703 ādayo) ca ‘‘sukhamajjhattavedanāvasena duvedana’’nti ca ‘‘lobhamohamūlavasena dvimūlaka’’nti ca vuttattā so ‘‘pamādapāṭho’’ti gahetabbo.

    সুরাপানকথাৰণ্ণনা।

    Surāpānakathāvaṇṇanā.

    ১৫৮৯. যেন কেনচি অঙ্গেনাতি অঙ্গুলিআদিনা যেন কেনচি সরীরাৰযৰেন। হসাধিপ্পাযিনোতি হসে অধিপ্পাযো হসাধিপ্পাযো, সো এতস্স অত্থীতি ৰিগ্গহো, তস্স, ইমিনা কীল়াধিপ্পাযরহিতস্স অনাপত্তিং ব্যতিরেকতো দীপেতি। ৰক্খতি চ ‘‘অনাপত্তি নহসাধিপ্পাযস্সা’’তি। ফুসতো ফুসন্তস্স।

    1589.Yenakenaci aṅgenāti aṅguliādinā yena kenaci sarīrāvayavena. Hasādhippāyinoti hase adhippāyo hasādhippāyo, so etassa atthīti viggaho, tassa, iminā kīḷādhippāyarahitassa anāpattiṃ byatirekato dīpeti. Vakkhati ca ‘‘anāpatti nahasādhippāyassā’’ti. Phusato phusantassa.

    ১৫৯০. সব্বত্থাতি সব্বেসু উপসম্পন্নানুপসম্পন্নেসু। কাযপটিবদ্ধাদিকে নযেতি ‘‘কাযেন কাযপটিবদ্ধং আমসতি, আপত্তি দুক্কটস্সা’’তিএৰমাদিনা (পাচি॰ ৩৩২) দস্সিতে নযে। অনুপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন তীণি দুক্কটানি ৰুত্তানীতি আহ ‘‘তথেৰানুপসম্পন্নে, দীপিতং তিকদুক্কট’’ন্তি। এত্থ চ ‘‘তথেৰা’’তি ইমিনা উপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন তিকপাচিত্তিযস্স ৰুত্তভাৰো দীপিতো হোতি। যথা উপসম্পন্নে তিকপাচিত্তিযং দীপিতং, তথেৰ অনুপসম্পন্নে তিকদুক্কটং দীপিতন্তি যোজনা।

    1590.Sabbatthāti sabbesu upasampannānupasampannesu. Kāyapaṭibaddhādike nayeti ‘‘kāyena kāyapaṭibaddhaṃ āmasati, āpatti dukkaṭassā’’tievamādinā (pāci. 332) dassite naye. Anupasampanne upasampannasaññivematikaanupasampannasaññīnaṃ vasena tīṇi dukkaṭāni vuttānīti āha ‘‘tathevānupasampanne, dīpitaṃ tikadukkaṭa’’nti. Ettha ca ‘‘tathevā’’ti iminā upasampanne upasampannasaññivematikaanupasampannasaññīnaṃ vasena tikapācittiyassa vuttabhāvo dīpito hoti. Yathā upasampanne tikapācittiyaṃ dīpitaṃ, tatheva anupasampanne tikadukkaṭaṃ dīpitanti yojanā.

    ১৫৯১. এত্থ…পে॰… ভিক্খুনীতি এত্থ ভিক্খুপি ভিক্খুনিযা অনুপসম্পন্নট্ঠানে ঠিতোতি ৰেদিতব্বো।

    1591.Ettha…pe… bhikkhunīti ettha bhikkhupi bhikkhuniyā anupasampannaṭṭhāne ṭhitoti veditabbo.

    ১৫৯২. নহসাধিপ্পাযস্স ফুসতোতি হসাধিপ্পাযং ৰিনা ৰন্দনাদীসু পাদাদিসরীরাৰযৰেন পরং ফুসন্তস্স। কিচ্চে সতীতি পিট্ঠিপরিকম্মাদিকিচ্চে সতি।

    1592.Nahasādhippāyassa phusatoti hasādhippāyaṃ vinā vandanādīsu pādādisarīrāvayavena paraṃ phusantassa. Kicce satīti piṭṭhiparikammādikicce sati.

    অঙ্গুলিপতোদককথাৰণ্ণনা।

    Aṅgulipatodakakathāvaṇṇanā.

    ১৫৯৩. জলেতি এত্থ ‘‘উপরিগোপ্ফকে’’তি সেসো। যথাহ ‘‘উপরিগোপ্ফকে উদকে’’তি (পাচি॰ ৩৩৭)। নিমুজ্জনাদীনন্তি এত্থ আদি-সদ্দেন উম্মুজ্জনপ্লৰনানি গহিতানি। যথাহ ‘‘উপরিগোপ্ফকে উদকে হসাধিপ্পাযো নিমুজ্জতি ৰা উম্মুজ্জতি ৰা পলৰতি ৰা’’তি (পাচি॰ ৩৩৭)। ‘‘কেৰল’’ন্তি ইমিনা নহানাদিকিচ্চেন ওতরন্তস্স অনাপত্তীতি দীপেতি।

    1593.Jaleti ettha ‘‘uparigopphake’’ti seso. Yathāha ‘‘uparigopphake udake’’ti (pāci. 337). Nimujjanādīnanti ettha ādi-saddena ummujjanaplavanāni gahitāni. Yathāha ‘‘uparigopphake udake hasādhippāyo nimujjati vā ummujjati vā palavati vā’’ti (pāci. 337). ‘‘Kevala’’nti iminā nahānādikiccena otarantassa anāpattīti dīpeti.

    ১৫৯৪. উপরিগোপ্ফকে জলেতি গোপ্ফকানং উপরিভাগপ্পমাণে জলে। নিমুজ্জেয্যপি ৰাতি অন্তোজলং পৰিসন্তো নিমুজ্জেয্য ৰা। তরেয্য ৰাতি প্লৰেয্য ৰা।

    1594.Uparigopphake jaleti gopphakānaṃ uparibhāgappamāṇe jale. Nimujjeyyapi vāti antojalaṃ pavisanto nimujjeyya vā. Tareyya vāti plaveyya vā.

    ১৫৯৫-৬. অন্তোযেৰোদকে নিমুজ্জিত্ৰান গচ্ছতো তস্স হত্থপাদপযোগেহি পাচিত্তিং পরিদীপযেতি যোজনা।

    1595-6. Antoyevodake nimujjitvāna gacchato tassa hatthapādapayogehi pācittiṃ paridīpayeti yojanā.

    ১৫৯৭. হত্থাদিসকলসরীরাৰযৰং সঙ্গণ্হিতুং ‘‘যেন যেনা’’তি অনিযমামেডিতমাহ। জলং তরতো ভিক্খুনো যেন যেন পন অঙ্গেন তরণং হোতীতি যোজনা।

    1597. Hatthādisakalasarīrāvayavaṃ saṅgaṇhituṃ ‘‘yena yenā’’ti aniyamāmeḍitamāha. Jalaṃ tarato bhikkhuno yena yena pana aṅgena taraṇaṃ hotīti yojanā.

    ১৫৯৮. তরুতো ৰাপীতি রুক্খতোপি ৰা। তিকপাচিত্তিযন্তি উদকে হসধম্মে হসধম্মসঞ্ঞিৰেমতিকঅহসধম্মসঞ্ঞীনং ৰসেন তিকপাচিত্তিযং। ‘‘তিকদুক্কট’’ন্তি পাঠো দিস্সতি, ‘‘উদকে অহসধম্মে হসধম্মসঞ্ঞী, আপত্তি দুক্কটস্স। উদকে অহসধম্মে ৰেমতিকো, আপত্তি দুক্কটস্সা’’তি (পাচি॰ ৩৩৮) ৰত্ৰা ‘‘উদকে অহসধম্মে অহসধম্মসঞ্ঞী, অনাপত্তী’’তি (পাচি॰ ৩৩৮) ততিযৰিকপ্পে পাল়িযং অনাপত্তি ৰুত্তাতি সো পমাদপাঠো, ‘‘দ্ৰিকদুক্কট’’ন্তি পাঠোযেৰ গহেতব্বো।

    1598.Taruto vāpīti rukkhatopi vā. Tikapācittiyanti udake hasadhamme hasadhammasaññivematikaahasadhammasaññīnaṃ vasena tikapācittiyaṃ. ‘‘Tikadukkaṭa’’nti pāṭho dissati, ‘‘udake ahasadhamme hasadhammasaññī, āpatti dukkaṭassa. Udake ahasadhamme vematiko, āpatti dukkaṭassā’’ti (pāci. 338) vatvā ‘‘udake ahasadhamme ahasadhammasaññī, anāpattī’’ti (pāci. 338) tatiyavikappe pāḷiyaṃ anāpatti vuttāti so pamādapāṭho, ‘‘dvikadukkaṭa’’nti pāṭhoyeva gahetabbo.

    ১৫৯৯. নাৰং তীরে উস্সারেন্তোপি ৰাতি সম্বন্ধো। উস্সারেন্তোতি তীরমারোপেন্তো। ‘‘কীল়তী’’তি ইদং ‘‘পাজেন্তো’’তি ইমিনাপি যোজেতব্বং।

    1599. Nāvaṃ tīre ussārentopi vāti sambandho. Ussārentoti tīramāropento. ‘‘Kīḷatī’’ti idaṃ ‘‘pājento’’ti imināpi yojetabbaṃ.

    ১৬০০. কথলায ৰাতি খুদ্দককপালিকায ৰা। উদকন্তি এত্থ ‘‘ভাজনগতং ৰা’’তি সেসো। ‘‘ভাজনগতং উদকং ৰা’’তি (পাচি॰ ৩৩৮) হি পদভাজনে ৰুত্তং।

    1600.Kathalāya vāti khuddakakapālikāya vā. Udakanti ettha ‘‘bhājanagataṃ vā’’ti seso. ‘‘Bhājanagataṃ udakaṃ vā’’ti (pāci. 338) hi padabhājane vuttaṃ.

    ১৬০১. কঞ্চিকং ৰাতি ধঞ্ঞরসং ৰা। অপি-সদ্দো ‘‘খীরং ৰা তক্কং ৰা রজনং ৰা পস্সাৰং ৰা’’তি (পাচি॰ ৩৩৮) পাল়িযং আগতে সম্পিণ্ডেতি। চিক্খল্লং ৰাপীতি উদককদ্দমং ৰা। এত্থ ৰিসেসজোতকেন অপি-সদ্দেন ‘‘অপিচ উপরিগোপ্ফকে ৰুত্তানি উম্মুজ্জনাদীনি ঠপেত্ৰা অঞ্ঞেন যেন কেনচি আকারেন উদকং ওতরিত্ৰা ৰা অনোতরিত্ৰা ৰা যত্থ কত্থচি ঠিতং উদকং অন্তমসো বিন্দুং গহেত্ৰা খিপনকীল়াযপি কীল়ন্তস্স দুক্কটমেৰা’’তি (পাচি॰ অট্ঠ॰ ৩৩৬) অট্ঠকথাগতং ৰিনিচ্ছযৰিসেসং সম্পিণ্ডেতি। ৰিক্খিপন্তি ৰিক্খিপিত্ৰা।

    1601.Kañcikaṃvāti dhaññarasaṃ vā. Api-saddo ‘‘khīraṃ vā takkaṃ vā rajanaṃ vā passāvaṃ vā’’ti (pāci. 338) pāḷiyaṃ āgate sampiṇḍeti. Cikkhallaṃ vāpīti udakakaddamaṃ vā. Ettha visesajotakena api-saddena ‘‘apica uparigopphake vuttāni ummujjanādīni ṭhapetvā aññena yena kenaci ākārena udakaṃ otaritvā vā anotaritvā vā yattha katthaci ṭhitaṃ udakaṃ antamaso binduṃ gahetvā khipanakīḷāyapi kīḷantassa dukkaṭamevā’’ti (pāci. aṭṭha. 336) aṭṭhakathāgataṃ vinicchayavisesaṃ sampiṇḍeti. Vikkhipanti vikkhipitvā.

    ১৬০২. সতি কিচ্চে জলং ৰিগাহিত্ৰা নিমুজ্জনাদিকং করোন্তস্স অনাপত্তীতি যোজনা। কিচ্চং নাম নহানাদিকং।

    1602. Sati kicce jalaṃ vigāhitvā nimujjanādikaṃ karontassa anāpattīti yojanā. Kiccaṃ nāma nahānādikaṃ.

    ১৬০৩. অনন্তরস্সাতি অঙ্গুলিপতোদকসিক্খাপদস্স। ৰিসেসোৰ ৰিসেসতা, কোচি ৰিসেসো নত্থীতি অত্থো।

    1603.Anantarassāti aṅgulipatodakasikkhāpadassa. Visesova visesatā, koci viseso natthīti attho.

    হসধম্মকথাৰণ্ণনা।

    Hasadhammakathāvaṇṇanā.

    ১৬০৪-৫. যো ভিক্খু ভিক্খুনা পঞ্ঞত্তেন ৰুচ্চমানো অস্স ৰচনং অকত্তুকামতায আদরং পন সচে ন করোতি, তস্স তস্মিং অনাদরিযে পাচিত্তিযমুদীরযেতি যোজনা, ইমিনা ৰাক্যেন পুগ্গলানাদরমূলকং পাচিত্তিযং ৰুত্তং। যথাহ ‘‘অনাদরিযং নাম দ্ৰে অনাদরিযানি পুগ্গলানাদরিযঞ্চ ধম্মানাদরিযঞ্চা’’তি (পাচি॰ ৩৪২), ‘‘পুগ্গলানাদরিযং নাম উপসম্পন্নেন পঞ্ঞত্তেন ৰুচ্চমানো ‘অযং উক্খিত্তকো ৰা ৰম্ভিতো ৰা গরহিতো ৰা ইমস্স ৰচনং অকতং ভৰিস্সতী’তি অনাদরিযং করোতি, আপত্তি পাচিত্তিযস্সা’’তি (পাচি॰ ৩৪২) চ।

    1604-5. Yo bhikkhu bhikkhunā paññattena vuccamāno assa vacanaṃ akattukāmatāya ādaraṃ pana sace na karoti, tassa tasmiṃ anādariye pācittiyamudīrayeti yojanā, iminā vākyena puggalānādaramūlakaṃ pācittiyaṃ vuttaṃ. Yathāha ‘‘anādariyaṃ nāma dve anādariyāni puggalānādariyañca dhammānādariyañcā’’ti (pāci. 342), ‘‘puggalānādariyaṃ nāma upasampannena paññattena vuccamāno ‘ayaṃ ukkhittako vā vambhito vā garahito vā imassa vacanaṃ akataṃ bhavissatī’ti anādariyaṃ karoti, āpatti pācittiyassā’’ti (pāci. 342) ca.

    ধম্মমেৰ ৰা অসিক্খিতুকামো যো ভিক্খু ভিক্খুনা পঞ্ঞত্তেন ৰুচ্চমানো অস্স ৰচনং অকত্তুকামতায আদরং পন সচে ন করোতি, তস্স তস্মিং অনাদরিযে পাচিত্তিযমুদীরযেতি যোজনা, ইমিনা ধম্মানাদরিযমূলকং পাচিত্তিযং ৰুত্তং। যথাহ ‘‘ধম্মানাদরিযং নাম উপসম্পন্নেন পঞ্ঞত্তেন ৰুচ্চমানো কথাযং নস্সেয্য ৰা ৰিনস্সেয্য ৰা অন্তরধাযেয্য ৰা, তং নসিক্খিতুকামো অনাদরিযং করোতি, আপত্তি পাচিত্তিযস্সা’’তি (পাচি॰ ৩৪২)। অনাদরিযেতি নিমিত্তত্থে ভুম্মং।

    Dhammameva vā asikkhitukāmo yo bhikkhu bhikkhunā paññattena vuccamāno assa vacanaṃ akattukāmatāya ādaraṃ pana sace na karoti, tassa tasmiṃ anādariye pācittiyamudīrayeti yojanā, iminā dhammānādariyamūlakaṃ pācittiyaṃ vuttaṃ. Yathāha ‘‘dhammānādariyaṃ nāma upasampannena paññattena vuccamāno kathāyaṃ nasseyya vā vinasseyya vā antaradhāyeyya vā, taṃ nasikkhitukāmo anādariyaṃ karoti, āpatti pācittiyassā’’ti (pāci. 342). Anādariyeti nimittatthe bhummaṃ.

    ১৬০৬. তিকপাচিত্তিযং ৰুত্তন্তি ‘‘উপসম্পন্নে উপসম্পন্নসঞ্ঞী, ৰেমতিকো, অনুপসম্পন্নসঞ্ঞী অনাদরিযং করোতি, আপত্তি পাচিত্তিযস্সা’’তি (পাচি॰ ৩৪৩) তিকপাচিত্তিযং ৰুত্তং। তিকাতীতেনাতি লোকত্তিকমতিক্কন্তেন। অনুপসম্পন্নানাদরে তিকদুক্কটন্তি অনুপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন তিকদুক্কটং।

    1606.Tikapācittiyaṃ vuttanti ‘‘upasampanne upasampannasaññī, vematiko, anupasampannasaññī anādariyaṃ karoti, āpatti pācittiyassā’’ti (pāci. 343) tikapācittiyaṃ vuttaṃ. Tikātītenāti lokattikamatikkantena. Anupasampannānādare tikadukkaṭanti anupasampanne upasampannasaññivematikaanupasampannasaññīnaṃ vasena tikadukkaṭaṃ.

    ১৬০৭. সুত্তেনেৰাভিধম্মেনাতি এত্থ এৰকারো ‘‘দুক্কট’’ন্তি ইমিনা যোজেতব্বো। ‘‘সুত্তেন অভিধম্মেনা’’তি পদদ্ৰযেন অভেদোপচারতো সুত্তাভিধম্মাগতো পরিযত্তিধম্মো ৰুত্তো। অপঞ্ঞত্তেনাতি পঞ্ঞত্তসঙ্খাতৰিনযতো অঞ্ঞত্তা অপঞ্ঞত্তেন। ‘‘অপঞ্ঞত্তেনা’’তি ইদং ‘‘সুত্তেন অভিধম্মেনা’’তি পদদ্ৰযৰিসেসনং। ভিক্খুনা ৰুত্তস্স তস্মিং ভিক্খুম্হি ৰা ধম্মে ৰা অনাদরং করোতো দুক্কটমেৰ। সামণেরেন উভযেনপি পঞ্ঞত্তেন ৰা অপঞ্ঞত্তেন ৰা ৰুত্তস্স তস্মিং সামণেরে ৰা পঞ্ঞত্তে ৰা অপঞ্ঞত্তে ৰা ধম্মে অনাদরং করোতো ভিক্খুস্স দুক্কটমেৰাতি যোজনা।

    1607.Suttenevābhidhammenāti ettha evakāro ‘‘dukkaṭa’’nti iminā yojetabbo. ‘‘Suttenaabhidhammenā’’ti padadvayena abhedopacārato suttābhidhammāgato pariyattidhammo vutto. Apaññattenāti paññattasaṅkhātavinayato aññattā apaññattena. ‘‘Apaññattenā’’ti idaṃ ‘‘suttena abhidhammenā’’ti padadvayavisesanaṃ. Bhikkhunā vuttassa tasmiṃ bhikkhumhi vā dhamme vā anādaraṃ karoto dukkaṭameva. Sāmaṇerena ubhayenapi paññattena vā apaññattena vā vuttassa tasmiṃ sāmaṇere vā paññatte vā apaññatte vā dhamme anādaraṃ karoto bhikkhussa dukkaṭamevāti yojanā.

    ১৬০৮. দোসোতি পাচিত্তিযদুক্কটসঙ্খাতো কোচি দোসো।

    1608.Dosoti pācittiyadukkaṭasaṅkhāto koci doso.

    ১৬০৯. এত্থাতি ইমস্মিং আচরিযানং গাহে। গারয্হো আচরিযুগ্গহো নেৰ গহেতব্বোতি যোজনা। গারয্হো আচরিযুগ্গহোতি এত্থ ‘‘যস্মা উচ্ছুরসো সত্তাহকালিকো, তস্স কসটো যাৰজীৰিকো, দ্ৰিন্নংযেৰ সমৰাযো উচ্ছুযট্ঠি, তস্মা ৰিকালে উচ্ছুযট্ঠিং খাদিতুং ৰট্টতি গুল়হরীতকে ৰিযা’’তি এৰমাদিকো সম্পতি নিব্বত্তো গারয্হাচরিযৰাদো। কতরো পন গহেতব্বোতি? পৰেণিযা আগতো আচরিযুগ্গহোৰ গহেতব্বো।

    1609.Etthāti imasmiṃ ācariyānaṃ gāhe. Gārayho ācariyuggaho neva gahetabboti yojanā. Gārayho ācariyuggahoti ettha ‘‘yasmā ucchuraso sattāhakāliko, tassa kasaṭo yāvajīviko, dvinnaṃyeva samavāyo ucchuyaṭṭhi, tasmā vikāle ucchuyaṭṭhiṃ khādituṃ vaṭṭati guḷaharītake viyā’’ti evamādiko sampati nibbatto gārayhācariyavādo. Kataro pana gahetabboti? Paveṇiyā āgato ācariyuggahova gahetabbo.

    কুরুন্দিযং পন ‘‘লোকৰজ্জে আচরিযুগ্গহো ন ৰট্টতি, পণ্ণত্তিৰজ্জে পন ৰট্টতী’’তি (পাচি॰ অট্ঠ॰ ৩৪৪) ৰুত্তং। মহাপচ্চরিযং ‘‘সুত্তং, সুত্তানুলোমঞ্চ উগ্গহিতকানংযেৰ আচরিযানং উগ্গহো পমাণং, অজানন্তানং কথা অপ্পমাণ’’ন্তি (পাচি॰ অট্ঠ॰ ৩৪৪) ৰুত্তং। ‘‘তং সব্বং পৰেণিযা আগতে সমোধানং গচ্ছতী’’তি (পাচি॰ অট্ঠ॰ ৩৪৪) অট্ঠকথাযং ৰুত্তং। এত্থ লোকৰজ্জে আচরিযুগ্গহো ন ৰট্টতীতি লোকৰজ্জসিক্খাপদে আপত্তিট্ঠানে যো আচরিযৰাদো, সো ন গহেতব্বো, লোকৰজ্জমতিক্কমিত্ৰা ‘‘ইদং অম্হাকং আচরিযুগ্গহো’’তি ৰদন্তস্স উগ্গহো ন ৰট্টতীতি অধিপ্পাযো। সুত্তানুলোমং নাম অট্ঠকথা। পৰেণিযা আগতে সমোধানং গচ্ছতীতি ‘‘পৰেণিযা আগতো আচরিযুগ্গহোৰ গহেতব্বো’’তি (পাচি॰ অট্ঠ॰ ৩৪৪) এৰং ৰুত্তে মহাঅট্ঠকথাৰাদেযেৰ সঙ্গহং গচ্ছতীতি অধিপ্পাযো।

    Kurundiyaṃ pana ‘‘lokavajje ācariyuggaho na vaṭṭati, paṇṇattivajje pana vaṭṭatī’’ti (pāci. aṭṭha. 344) vuttaṃ. Mahāpaccariyaṃ ‘‘suttaṃ, suttānulomañca uggahitakānaṃyeva ācariyānaṃ uggaho pamāṇaṃ, ajānantānaṃ kathā appamāṇa’’nti (pāci. aṭṭha. 344) vuttaṃ. ‘‘Taṃ sabbaṃ paveṇiyā āgate samodhānaṃ gacchatī’’ti (pāci. aṭṭha. 344) aṭṭhakathāyaṃ vuttaṃ. Ettha lokavajje ācariyuggaho na vaṭṭatīti lokavajjasikkhāpade āpattiṭṭhāne yo ācariyavādo, so na gahetabbo, lokavajjamatikkamitvā ‘‘idaṃ amhākaṃ ācariyuggaho’’ti vadantassa uggaho na vaṭṭatīti adhippāyo. Suttānulomaṃ nāma aṭṭhakathā. Paveṇiyā āgate samodhānaṃ gacchatīti ‘‘paveṇiyā āgato ācariyuggahova gahetabbo’’ti (pāci. aṭṭha. 344) evaṃ vutte mahāaṭṭhakathāvādeyeva saṅgahaṃ gacchatīti adhippāyo.

    অনাদরিযকথাৰণ্ণনা।

    Anādariyakathāvaṇṇanā.

    ১৬১০-১. ‘‘যো পন ভিক্খু ভিক্খুং ভিংসাপেয্য, পাচিত্তিয’’ন্তি (পাচি॰ ৩৪৬) মাতিকাৰচনতো ভযসঞ্জননত্থাযাতি এত্থ ‘‘ভিক্খুস্সা’’তি সেসো। তেনেৰ ৰক্খতি ‘‘ইতরস্স তু ভিক্খুস্সা’’তি। রূপাদিন্তি রূপসদ্দগন্ধাদিং। উপসংহরেতি উপট্ঠপেতি , দস্সেতীতি ৰুত্তং হোতি। ভযানকং কথন্তি চোরকন্তারাদিকথং। যথাহ ‘‘চোরকন্তারং ৰা ৰাল়কন্তারং ৰা পিসাচকন্তারং ৰা আচিক্খতী’’তি (পাচি॰ ৩৪৮)। পরসন্তিকেতি এত্থ ‘‘পরো’’তি ৰুত্তনযেন লব্ভমানো উপসম্পন্নো গহেতব্বো।

    1610-1. ‘‘Yo pana bhikkhu bhikkhuṃ bhiṃsāpeyya, pācittiya’’nti (pāci. 346) mātikāvacanato bhayasañjananatthāyāti ettha ‘‘bhikkhussā’’ti seso. Teneva vakkhati ‘‘itarassa tu bhikkhussā’’ti. Rūpādinti rūpasaddagandhādiṃ. Upasaṃhareti upaṭṭhapeti , dassetīti vuttaṃ hoti. Bhayānakaṃ kathanti corakantārādikathaṃ. Yathāha ‘‘corakantāraṃ vā vāḷakantāraṃ vā pisācakantāraṃ vā ācikkhatī’’ti (pāci. 348). Parasantiketi ettha ‘‘paro’’ti vuttanayena labbhamāno upasampanno gahetabbo.

    দিস্ৰা ৰাতি উপট্ঠাপিতং তং রূপাদিং দিস্ৰা ৰা। সুত্ৰা ৰাতি তং ভযানকং কথং সুত্ৰা ৰা। যস্স ভযদস্সনত্থায তং উপট্ঠাপেসি, সো ভাযতু ৰা মা ৰা ভাযতু। ইতরস্সাতি তদুপট্ঠাপকস্স ভিক্খুস্স। তঙ্খণেতি উপট্ঠাপিতক্খণে।

    Disvā vāti upaṭṭhāpitaṃ taṃ rūpādiṃ disvā vā. Sutvā vāti taṃ bhayānakaṃ kathaṃ sutvā vā. Yassa bhayadassanatthāya taṃ upaṭṭhāpesi, so bhāyatu vā mā vā bhāyatu. Itarassāti tadupaṭṭhāpakassa bhikkhussa. Taṅkhaṇeti upaṭṭhāpitakkhaṇe.

    ১৬১২. তিকপাচিত্তিযং ৰুত্তন্তি ‘‘উপসম্পন্নে উপসম্পন্নসঞ্ঞী, ৰেমতিকো, অনুপসম্পন্নসঞ্ঞী ভিংসাপেতি, আপত্তি পাচিত্তিযস্সা’’তি (পাচি॰ ৩৪৮) তিকপাচিত্তিযং ৰুত্তং। তিকদুক্কটন্তি অনুপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন তিকদুক্কটং। ‘‘অনুপসম্পন্নং ভিংসাপেতুকামো’’তিআদিকে দুক্কটৰারে অনুপসম্পন্নগ্গহণেন গিহিনোপি সঙ্গয্হমানত্তা ‘‘সামণেরং গহট্ঠং ৰা’’তি আহ। সামণেরং…পে॰… ভিক্খুনো তথেৰ ভিংসাপেন্তস্স তিকদুক্কটং ৰুত্তন্তি যোজনা।

    1612.Tikapācittiyaṃ vuttanti ‘‘upasampanne upasampannasaññī, vematiko, anupasampannasaññī bhiṃsāpeti, āpatti pācittiyassā’’ti (pāci. 348) tikapācittiyaṃ vuttaṃ. Tikadukkaṭanti anupasampanne upasampannasaññivematikaanupasampannasaññīnaṃ vasena tikadukkaṭaṃ. ‘‘Anupasampannaṃ bhiṃsāpetukāmo’’tiādike dukkaṭavāre anupasampannaggahaṇena gihinopi saṅgayhamānattā ‘‘sāmaṇeraṃ gahaṭṭhaṃ vā’’ti āha. Sāmaṇeraṃ…pe… bhikkhuno tatheva bhiṃsāpentassa tikadukkaṭaṃ vuttanti yojanā.

    ভিংসাপনকথাৰণ্ণনা।

    Bhiṃsāpanakathāvaṇṇanā.

    ১৬১৪. জোতিন্তি অগ্গিং। তপ্পেতুকামোতি ৰিসিব্বেতুকামো। ‘‘তেন খো পন সমযেন ভিক্খূ পদীপেপি জোতিকেপি জন্তাঘরেপি কুক্কুচ্চাযন্তী’’তি (পাচি॰ ৩৫২) উপ্পন্নৰত্থুম্হি ‘‘অনুজানামি ভিক্খৰে তথারূপপচ্চযা জোতিং সমাদহিতুং সমাদহাপেতু’’ন্তি (পাচি॰ ৩৫২) ৰুত্তত্তা এত্থ ‘‘তথারূপং পচ্চয’’ন্তি ইমিনা পদীপুজ্জলনঞ্চ পত্তপচনসরীরসেদনাদিকম্মঞ্চ জন্তাঘরৰত্তঞ্চ গহেতব্বং। এত্থ চ জোতিকেপীতি পত্তপচনসেদনকম্মাদীসু জোতিকরণেতি অত্থো।

    1614.Jotinti aggiṃ. Tappetukāmoti visibbetukāmo. ‘‘Tena kho pana samayena bhikkhū padīpepi jotikepi jantāgharepi kukkuccāyantī’’ti (pāci. 352) uppannavatthumhi ‘‘anujānāmi bhikkhave tathārūpapaccayā jotiṃ samādahituṃ samādahāpetu’’nti (pāci. 352) vuttattā ettha ‘‘tathārūpaṃ paccaya’’nti iminā padīpujjalanañca pattapacanasarīrasedanādikammañca jantāgharavattañca gahetabbaṃ. Ettha ca jotikepīti pattapacanasedanakammādīsu jotikaraṇeti attho.

    ১৬১৫. সযংসমাদহন্তস্সাতি অত্তনা জালেন্তস্স।

    1615.Sayaṃsamādahantassāti attanā jālentassa.

    ১৬১৬. জালাপেন্তস্স …পে॰… দুক্কটন্তি আণত্তিযা আপজ্জিতব্বং দুক্কটং সন্ধাযাহ। আণত্তিযা জলিতে আপজ্জিতব্বাপত্তি ‘‘জালুট্ঠানে পনাপত্তি, পাচিত্তি পরিকিত্তিতা’’তি অনুৰত্তমানত্তা সিদ্ধাতি ৰিসুং ন ৰুত্তা।

    1616.Jālāpentassa…pe… dukkaṭanti āṇattiyā āpajjitabbaṃ dukkaṭaṃ sandhāyāha. Āṇattiyā jalite āpajjitabbāpatti ‘‘jāluṭṭhāne panāpatti, pācitti parikittitā’’ti anuvattamānattā siddhāti visuṃ na vuttā.

    ১৬১৭. গিলানস্সাতি ‘‘গিলানো নাম যস্স ৰিনা অগ্গিনা ন ফাসু হোতী’’তি (পাচি॰ ৩৫৪) ৰুত্তস্স গিলানস্স। অৰিজ্ঝাতং অলাতং উক্খিপন্তস্সাতি গহণেন ভট্ঠং অনিব্বুতালাতং অগ্গিনো সমীপং করোন্তস্স, যথাঠানে ঠপেন্তস্সাতি ৰুত্তং হোতি।

    1617.Gilānassāti ‘‘gilāno nāma yassa vinā agginā na phāsu hotī’’ti (pāci. 354) vuttassa gilānassa. Avijjhātaṃ alātaṃ ukkhipantassāti gahaṇena bhaṭṭhaṃ anibbutālātaṃ aggino samīpaṃ karontassa, yathāṭhāne ṭhapentassāti vuttaṃ hoti.

    ১৬১৮-৯. ৰিজ্ঝাতং অলাতন্তি নিব্বুতালাতং। যথাৰত্থুকং পাচিত্তিযন্তি ৰুত্তং হোতি। অঞ্ঞেন ৰা কতং ৰিসিব্বেন্তস্স অনাপত্তীতি যোজনা। ৰিসিব্বেন্তস্সাতি তপ্পেন্তস্স। অঙ্গারন্তি ৰীতচ্চিকং অঙ্গারং। পদীপুজ্জলনাদিকেতি আদি-সদ্দেন ‘‘জোতিকে জন্তাঘরে তথারূপপচ্চযা’’তি (পাচি॰ ৩৫২) আগতং সঙ্গণ্হাতি। এত্থ চ তথারূপপচ্চযাতি ঠপেত্ৰা পদীপাদীনি অঞ্ঞেনপি তথারূপেন পচ্চযেন।

    1618-9.Vijjhātaṃ alātanti nibbutālātaṃ. Yathāvatthukaṃ pācittiyanti vuttaṃ hoti. Aññena vā kataṃ visibbentassa anāpattīti yojanā. Visibbentassāti tappentassa. Aṅgāranti vītaccikaṃ aṅgāraṃ. Padīpujjalanādiketi ādi-saddena ‘‘jotike jantāghare tathārūpapaccayā’’ti (pāci. 352) āgataṃ saṅgaṇhāti. Ettha ca tathārūpapaccayāti ṭhapetvā padīpādīni aññenapi tathārūpena paccayena.

    জোতিসমাদহনকথাৰণ্ণনা।

    Jotisamādahanakathāvaṇṇanā.

    ১৬২০-১. মজ্ঝিমে দেসেতি জম্বুদীপে যত্থ বোধিমণ্ডলং হোতি, তস্মিং নৰযোজনসতাৰট্টে মজ্ঝিমমণ্ডলে, ইমিনা ইদং সিক্খাপদং তত্থেৰ দেসোদিস্সকতায নিযতন্তি দস্সেতি। তেনেৰ ৰক্খতি অনাপত্তিৰারে ‘‘পচ্চন্তিমেপি ৰা দেসে’’তি। চুণ্ণন্তি সিরীসচুণ্ণাদিকং চুণ্ণং। অভিসঙ্খরতোতি পটিযাদেন্তস্স।

    1620-1.Majjhime deseti jambudīpe yattha bodhimaṇḍalaṃ hoti, tasmiṃ navayojanasatāvaṭṭe majjhimamaṇḍale, iminā idaṃ sikkhāpadaṃ tattheva desodissakatāya niyatanti dasseti. Teneva vakkhati anāpattivāre ‘‘paccantimepi vā dese’’ti. Cuṇṇanti sirīsacuṇṇādikaṃ cuṇṇaṃ. Abhisaṅkharatoti paṭiyādentassa.

    ১৬২২-৩. ‘‘মাসে ঊনসঞ্ঞিনো’’তি পদচ্ছেদো। অতিরেকদ্ধমাসে ঊনসঞ্ঞিনো ৰা অতিরেকদ্ধমাসে ৰিমতিস্স ৰা দুক্কটন্তি যোজনা। অতিরেকদ্ধমাসে ন্হাযন্তস্স অনাপত্তীতি যোজনা। সমযেসু চ ন্হাযন্তস্স অনাপত্তীতি এত্থ ‘‘উণ্হসমযো পরিল়াহসমযো গিলানসমযো কম্মসমযো অদ্ধানগমনসমযো ৰাতৰুট্ঠিসমযো’’তি (পাচি॰ ৩৬৩) দস্সিতেসু ছসু সমযেসু অঞ্ঞতরে সম্পত্তে সমযে সতিং পচ্চুপট্ঠপেত্ৰা ঊনমাসেপি নহাযন্তস্স অনাপত্তীতি অত্থো।

    1622-3. ‘‘Māse ūnasaññino’’ti padacchedo. Atirekaddhamāse ūnasaññino vā atirekaddhamāse vimatissa vā dukkaṭanti yojanā. Atirekaddhamāse nhāyantassa anāpattīti yojanā. Samayesu ca nhāyantassa anāpattīti ettha ‘‘uṇhasamayo pariḷāhasamayo gilānasamayo kammasamayo addhānagamanasamayo vātavuṭṭhisamayo’’ti (pāci. 363) dassitesu chasu samayesu aññatare sampatte samaye satiṃ paccupaṭṭhapetvā ūnamāsepi nahāyantassa anāpattīti attho.

    তত্থ জেট্ঠমাসো চ আসাল়্হিমাসস্স পুরিমপক্খো চাতি দিযড্ঢমাসো উণ্হসমযো নাম। যথাহ ‘‘উণ্হসমযো নাম দিযড্ঢো মাসো সেসো গিম্হান’’ন্তি (পাচি॰ ৩৬৪), ৰস্সানস্স পঠমো মাসো পরিল়াহসমযো নাম। যথাহ ‘‘পরিল়াহসমযো নাম ৰস্সানস্স পঠমো মাসো’’তি (পাচি॰ ৩৬৪)। ‘‘যস্স ৰিনা নহানা ন ফাসু হোতী’’তি (পাচি॰ ৩৬৪) ৰুত্তো সমযো গিলানসমযো নাম। ‘‘অন্তমসো পরিৰেণম্পি সম্মট্ঠং হোতী’’তি (পাচি॰ ৩৬৪) ৰুত্তো কম্মসমযো নাম। ‘‘অদ্ধযোজনং গচ্ছিস্সামী’তি নহাযিতব্ব’’ন্তি (পাচি॰ ৩৬৪) ৰুত্তো অদ্ধানগমনসমযো নাম। ‘‘ভিক্খূ সরজেন ৰাতেন ওকিণ্ণা হোন্তি, দ্ৰে ৰা তীণি ৰা উদকফুসিতানি কাযে পতিতানি হোন্তী’’তি (পাচি॰ ৩৬৪) ৰুত্তো ৰাতৰুট্ঠিসমযো নাম।

    Tattha jeṭṭhamāso ca āsāḷhimāsassa purimapakkho cāti diyaḍḍhamāso uṇhasamayo nāma. Yathāha ‘‘uṇhasamayo nāma diyaḍḍho māso seso gimhāna’’nti (pāci. 364), vassānassa paṭhamo māso pariḷāhasamayo nāma. Yathāha ‘‘pariḷāhasamayo nāma vassānassa paṭhamo māso’’ti (pāci. 364). ‘‘Yassa vinā nahānā na phāsu hotī’’ti (pāci. 364) vutto samayo gilānasamayo nāma. ‘‘Antamaso pariveṇampi sammaṭṭhaṃ hotī’’ti (pāci. 364) vutto kammasamayo nāma. ‘‘Addhayojanaṃ gacchissāmī’ti nahāyitabba’’nti (pāci. 364) vutto addhānagamanasamayo nāma. ‘‘Bhikkhū sarajena vātena okiṇṇā honti, dve vā tīṇi vā udakaphusitāni kāye patitāni hontī’’ti (pāci. 364) vutto vātavuṭṭhisamayo nāma.

    নদীপারং গচ্ছতোপি ঊনকদ্ধমাসে ন্হাযন্তস্স অনাপত্তীতি যোজনা। ৰালিকং উক্কিরিত্ৰানাতি এত্থ সুক্খায নদিযা ৰালিকং উক্কিরিত্ৰা। কতাৰাটেসুপি ঊনকদ্ধমাসে ন্হাযন্তস্সপি অনাপত্তীতি। ‘‘তথা’’তি ইমিনা ‘‘ন্হাযন্তস্স অনাপত্তী’’তি ইদং পচ্চামসতি।

    Nadīpāraṃ gacchatopi ūnakaddhamāse nhāyantassa anāpattīti yojanā. Vālikaṃ ukkiritvānāti ettha sukkhāya nadiyā vālikaṃ ukkiritvā. Katāvāṭesupi ūnakaddhamāse nhāyantassapi anāpattīti. ‘‘Tathā’’ti iminā ‘‘nhāyantassa anāpattī’’ti idaṃ paccāmasati.

    ১৬২৪. পচ্চন্তিমেপি ৰা দেসেতি জম্বুদীপে যথাৰুত্তমজ্ঝিমদেসতো বহি পচ্চন্তিমেসু জনপদেসু, খুদ্দকেসু চ দীপেসু। সব্বেসন্তি লদ্ধসমযানং, অলদ্ধসমযানঞ্চ সব্বেসং ভিক্খূনং। আপদাসূতি ভমরঅনুবন্ধাদিআপদাসু। যথাহ ‘‘ভমরাদীহি অনুবদ্ধস্স উদকে নিমুজ্জিতুং ৰট্টতী’’তি (পাচি॰ অট্ঠ॰ ৩৬৬)। কাযচিত্তসমুট্ঠানং এল়কলোমসমুট্ঠানং নাম।

    1624.Paccantimepi vā deseti jambudīpe yathāvuttamajjhimadesato bahi paccantimesu janapadesu, khuddakesu ca dīpesu. Sabbesanti laddhasamayānaṃ, aladdhasamayānañca sabbesaṃ bhikkhūnaṃ. Āpadāsūti bhamaraanubandhādiāpadāsu. Yathāha ‘‘bhamarādīhi anubaddhassa udake nimujjituṃ vaṭṭatī’’ti (pāci. aṭṭha. 366). Kāyacittasamuṭṭhānaṃ eḷakalomasamuṭṭhānaṃ nāma.

    ন্হানকথাৰণ্ণনা।

    Nhānakathāvaṇṇanā.

    ১৬২৫-৭. ‘‘নৰং নাম অকতকপ্পং ৰুচ্চতী’’তি (পাচি॰ ৩৬৯) পাল়িৰচনতো চ ‘‘পটিলদ্ধনৰচীৰরেনাতি অত্থো’’তি (পাচি॰ অট্ঠ॰ ৩৬৮) অট্ঠকথাৰচনতো চ চীৰরন্তি এত্থ ‘‘নৰ’’ন্তি সেসো। কপ্পিযং বিন্দুং অদত্ৰা নৰং চীৰরং ভিক্খু পরিভুঞ্জতি, তস্সেৰং পরিভুঞ্জতো পাচিত্তীতি সম্বন্ধো। ছন্নন্তি খোমাদীনং, নিদ্ধারণে সামিৰচনং। অঞ্ঞতরং নৰং চীৰরন্তি নিদ্ধারেতব্বং। যত্থ কত্থচীতি ‘‘চতূসু ৰা কোণেসু তীসু ৰা দ্ৰীসু ৰা একস্মিং ৰা কোণে’’তি (পাচি॰ অট্ঠ॰ ৩৬৮) অট্ঠকথাৰচনতো চীৰরকোণেসু যত্থ কত্থচি।

    1625-7. ‘‘Navaṃ nāma akatakappaṃ vuccatī’’ti (pāci. 369) pāḷivacanato ca ‘‘paṭiladdhanavacīvarenāti attho’’ti (pāci. aṭṭha. 368) aṭṭhakathāvacanato ca cīvaranti ettha ‘‘nava’’nti seso. Kappiyaṃ binduṃ adatvā navaṃ cīvaraṃ bhikkhu paribhuñjati, tassevaṃ paribhuñjato pācittīti sambandho. Channanti khomādīnaṃ, niddhāraṇe sāmivacanaṃ. Aññataraṃ navaṃ cīvaranti niddhāretabbaṃ. Yattha katthacīti ‘‘catūsu vā koṇesu tīsu vā dvīsu vā ekasmiṃ vā koṇe’’ti (pāci. aṭṭha. 368) aṭṭhakathāvacanato cīvarakoṇesu yattha katthaci.

    কংসনীলেনাতি চম্মকারনীলেন। চম্মকারনীলং নাম পকতিনীলং। গণ্ঠিপদে পন ‘‘চম্মকারা উদকে তিফলং, অযোগূথঞ্চ পক্খিপিত্ৰা চম্মং কাল়ং করোন্তি, তং চম্মকারনীল’’ন্তি ৰুত্তং। মহাপচ্চরিযং পন ‘‘অযোমলং লোহমলং, এতং কংসনীলং নামা’’তি (পাচি॰ অট্ঠ॰ ৩৬৮) ৰুত্তং। পত্তনীলেন ৰাতি ‘‘যো কোচি নীলৰণ্ণো পণ্ণরসো’’তি (পাচি॰ অট্ঠ॰ ৩৬৮) অট্ঠকথায ৰুত্তেন নীলপণ্ণরসেন। যেন কেনচি কাল়েনাতি অঙ্গারজল্লিকাদীসু অঞ্ঞতরেন যেন কেনচি কাল়ৰণ্ণেন। ‘‘কদ্দমো নাম ওদকো ৰুচ্চতী’’তি (পাচি॰ ৩৬৯) ৰুত্তত্তা কদ্দমেনাতি উদকানুকদ্দমসুক্খকদ্দমাদিং সঙ্গণ্হাতি।

    Kaṃsanīlenāti cammakāranīlena. Cammakāranīlaṃ nāma pakatinīlaṃ. Gaṇṭhipade pana ‘‘cammakārā udake tiphalaṃ, ayogūthañca pakkhipitvā cammaṃ kāḷaṃ karonti, taṃ cammakāranīla’’nti vuttaṃ. Mahāpaccariyaṃ pana ‘‘ayomalaṃ lohamalaṃ, etaṃ kaṃsanīlaṃ nāmā’’ti (pāci. aṭṭha. 368) vuttaṃ. Pattanīlena vāti ‘‘yo koci nīlavaṇṇo paṇṇaraso’’ti (pāci. aṭṭha. 368) aṭṭhakathāya vuttena nīlapaṇṇarasena. Yena kenaci kāḷenāti aṅgārajallikādīsu aññatarena yena kenaci kāḷavaṇṇena. ‘‘Kaddamo nāma odako vuccatī’’ti (pāci. 369) vuttattā kaddamenāti udakānukaddamasukkhakaddamādiṃ saṅgaṇhāti.

    ‘‘মঙ্গুলস্স পিট্ঠিপ্পমাণকং মযূরস্স অক্খিপ্পমাণক’’ন্তি যথাক্কমেন যোজনা।

    ‘‘Maṅgulassa piṭṭhippamāṇakaṃ mayūrassa akkhippamāṇaka’’nti yathākkamena yojanā.

    ১৬২৮. ‘‘পাল়িকপ্পো কণ্ণিকাকপ্পো’’তি যোজনা, মুত্তাৰলি ৰিয পাল়িং কত্ৰা অপ্পিতকপ্পো চ কণ্ণিকাকারেন অপ্পিতকপ্পো চাতি অত্থো। কত্থচীতি এত্থ ‘‘যথাৰুত্তপ্পদেসে’’তি সেসো। ‘‘চতূসু ৰা কোণেসু তীসু ৰা’’তি (পাচি॰ অট্ঠ॰ ৩৬৮) ৰুত্তত্তা ‘‘অনেকং ৰা’’তি আহ। ৰট্টমেৰ ৰট্টকং, ইমিনা অঞ্ঞং ৰিকারং ন ৰট্টতীতি দস্সেতি। যথাহ ‘‘ঠপেত্ৰা একং ৰট্টবিন্দুং অঞ্ঞেন কেনচিপি ৰিকারেন কপ্পো ন কাতব্বো’’তি (পাচি॰ ৩৬৮)।

    1628. ‘‘Pāḷikappo kaṇṇikākappo’’ti yojanā, muttāvali viya pāḷiṃ katvā appitakappo ca kaṇṇikākārena appitakappo cāti attho. Katthacīti ettha ‘‘yathāvuttappadese’’ti seso. ‘‘Catūsu vā koṇesu tīsu vā’’ti (pāci. aṭṭha. 368) vuttattā ‘‘anekaṃ vā’’ti āha. Vaṭṭameva vaṭṭakaṃ, iminā aññaṃ vikāraṃ na vaṭṭatīti dasseti. Yathāha ‘‘ṭhapetvā ekaṃ vaṭṭabinduṃ aññena kenacipi vikārena kappo na kātabbo’’ti (pāci. 368).

    ১৬২৯. ‘‘অনাপত্তি পকাসিতা’’তি ইদং ‘‘ৰিমতিস্সচা’’তি এত্থ চ-সদ্দেন সমুচ্চিতং ‘‘আদিন্নে আদিন্নসঞ্ঞিনো’’তি ততিযৰিকপ্পং সন্ধায ৰুত্তং। যথাহ ‘‘আদিন্নে আদিন্নসঞ্ঞী, অনাপত্তী’’তি।

    1629.‘‘Anāpatti pakāsitā’’ti idaṃ ‘‘vimatissacā’’ti ettha ca-saddena samuccitaṃ ‘‘ādinne ādinnasaññino’’ti tatiyavikappaṃ sandhāya vuttaṃ. Yathāha ‘‘ādinne ādinnasaññī, anāpattī’’ti.

    ১৬৩০. ‘‘কপ্পে নট্ঠেপি ৰা’’তিআদীহি চ যোজেতব্বং। পি-সদ্দেন ‘‘কপ্পকতোকাসে জিণ্ণে’’তি ইদং সম্পিণ্ডেতি। যথাহ ‘‘কপ্পকতোকাসো জিণ্ণো হোতী’’তি। তেন কপ্পকতেনাতি সহত্থে করণৰচনং। সংসিব্বিতেসূতি এত্থ ‘‘অকপ্পকতেসূ’’তি সেসো। যথাহ ‘‘কপ্পকতেন অকপ্পকতং সংসিব্বিতং হোতী’’তি। নিৰাসনপারুপনং ক্রিযং। কপ্পবিন্দুঅনাদানং অক্রিযং।

    1630.‘‘Kappe naṭṭhepi vā’’tiādīhi ca yojetabbaṃ. Pi-saddena ‘‘kappakatokāse jiṇṇe’’ti idaṃ sampiṇḍeti. Yathāha ‘‘kappakatokāso jiṇṇo hotī’’ti. Tena kappakatenāti sahatthe karaṇavacanaṃ. Saṃsibbitesūti ettha ‘‘akappakatesū’’ti seso. Yathāha ‘‘kappakatena akappakataṃ saṃsibbitaṃ hotī’’ti. Nivāsanapārupanaṃ kriyaṃ. Kappabinduanādānaṃ akriyaṃ.

    দুব্বণ্ণকরণকথাৰণ্ণনা।

    Dubbaṇṇakaraṇakathāvaṇṇanā.

    ১৬৩১-৪. ‘‘ৰিকপ্পনা নাম দ্ৰে ৰিকপ্পনা সম্মুখাৰিকপ্পনা চ পরম্মুখাৰিকপ্পনা চা’’তি (পাচি॰ ৩৭৪) ৰুত্তত্তা ‘‘ৰিকপ্পনা দুৰে’’তিআদিমাহ। ইতীতি নিদস্সনে, এৰন্তি অত্থো। কথং সম্মুখাৰিকপ্পনা হোতীতি আহ ‘‘সম্মুখায…পে॰… নিদ্দিসে’’তি। একস্সাতি এত্থ ‘‘ব্যত্তস্সা’’তি সেসো। ইধ ব্যত্তো নাম ৰিকপ্পনপচ্চুদ্ধারণৰিধিং জানন্তো।

    1631-4. ‘‘Vikappanā nāma dve vikappanā sammukhāvikappanā ca parammukhāvikappanā cā’’ti (pāci. 374) vuttattā ‘‘vikappanā duve’’tiādimāha. Itīti nidassane, evanti attho. Kathaṃ sammukhāvikappanā hotīti āha ‘‘sammukhāya…pe… niddise’’ti. Ekassāti ettha ‘‘byattassā’’ti seso. Idha byatto nāma vikappanapaccuddhāraṇavidhiṃ jānanto.

    যথাৰচনযোগতোতি ‘‘ইমং চীৰর’ন্তি ৰা, ‘ইমানি চীৰরানী’তি ৰা, ‘এতং চীৰর’ন্তি ৰা, ‘এতানি চীৰরানী’তি ৰা’’তি (পারা॰ অট্ঠ॰ ২.৪৬৯) অট্ঠকথায ৰুত্তং অনতিক্কম্ম, ৰচনসম্বন্ধক্কমেনাতি অত্থো। তদেকদেসসরূপং দস্সেতি ‘‘ইমং চীৰর’’ন্তি।

    Yathāvacanayogatoti ‘‘imaṃ cīvara’nti vā, ‘imāni cīvarānī’ti vā, ‘etaṃ cīvara’nti vā, ‘etāni cīvarānī’ti vā’’ti (pārā. aṭṭha. 2.469) aṭṭhakathāya vuttaṃ anatikkamma, vacanasambandhakkamenāti attho. Tadekadesasarūpaṃ dasseti ‘‘imaṃ cīvara’’nti.

    ‘‘অপচ্চুদ্ধটতো’’তি ইমিনা ‘‘ন কপ্পতী’’তি এতস্স হেতুং দস্সেতি।

    ‘‘Apaccuddhaṭato’’ti iminā ‘‘na kappatī’’ti etassa hetuṃ dasseti.

    ১৬৩৫. ‘‘সন্তক’’মিচ্চাদি পচ্চুদ্ধরণপ্পকারো। যথাপচ্চযং করোহীতি তুয্হং রুচ্চনকং করোহীতি অত্থো।

    1635.‘‘Santaka’’miccādi paccuddharaṇappakāro. Yathāpaccayaṃ karohīti tuyhaṃ ruccanakaṃ karohīti attho.

    ১৬৩৬. সম্মুখাৰিকপ্পন্তরং দস্সেতুমাহ ‘‘অপরা সম্মুখা ৰুত্তা’’তিআদি। অত্তনা অভিরুচিতস্স যস্স কস্সচি নামং গহেত্ৰাতি যোজনা। সহধম্মিনন্তি এত্থ ‘‘পঞ্চন্ন’’ন্তি সেসো, নিদ্ধারণে সামিৰচনং।

    1636. Sammukhāvikappantaraṃ dassetumāha ‘‘aparā sammukhā vuttā’’tiādi. Attanā abhirucitassa yassa kassaci nāmaṃ gahetvāti yojanā. Sahadhamminanti ettha ‘‘pañcanna’’nti seso, niddhāraṇe sāmivacanaṃ.

    ১৬৩৯. এৰন্তি ৰক্খমানাপেক্খং। অপি-সদ্দো পন সদ্দস্সত্থে।

    1639.Evanti vakkhamānāpekkhaṃ. Api-saddo pana saddassatthe.

    ১৬৪০. মিত্তোতি দল়্হমিত্তো, ‘‘তেন ৰত্তব্বং ‘কো তে মিত্তো ৰা সন্দিট্ঠো ৰা’’তি (পাচি॰ ৩৭৪) ৰচনতো ইদং উপলক্খণং। পুন তেনপি ভিক্খুনা ৰত্তব্বন্তি যোজনা।

    1640.Mittoti daḷhamitto, ‘‘tena vattabbaṃ ‘ko te mitto vā sandiṭṭho vā’’ti (pāci. 374) vacanato idaṃ upalakkhaṇaṃ. Puna tenapi bhikkhunā vattabbanti yojanā.

    ১৬৪১-২. ‘‘অহং তিস্সস্স ভিক্খুনো দম্মী’তি ৰা…পে॰… ‘তিস্সায সামণেরিযা দম্মী’তি ৰা’’তি (পারা॰ অট্ঠ॰ ২.৪৬৯) সেসঅট্ঠকথাপাঠেন ‘‘ইদ’’মিচ্চাদিপাঠো যোজেতব্বো।

    1641-2. ‘‘Ahaṃ tissassa bhikkhuno dammī’ti vā…pe… ‘tissāya sāmaṇeriyā dammī’ti vā’’ti (pārā. aṭṭha. 2.469) sesaaṭṭhakathāpāṭhena ‘‘ida’’miccādipāṭho yojetabbo.

    ১৬৪৩. দ্ৰীসূতি নিদ্ধারণে ভুম্মং, এত্থ ‘‘ৰিকপ্পনাসূ’’তি পকরণতো লব্ভতি।

    1643.Dvīsūti niddhāraṇe bhummaṃ, ettha ‘‘vikappanāsū’’ti pakaraṇato labbhati.

    ১৬৪৪-৫. ইধ পন ইমস্মিং সাসনে যেন পন ভিক্খুনা সহ চীৰরসামিকেন তং ৰিনযকম্মং কতং, তস্স অৰিস্সাসেন ৰিস্সাসভাৰং ৰিনা সো ৰিনযকম্মকতো ভিক্খু তং চীৰরং পরিভুঞ্জেয্য, তস্স ভিক্খুনো পাচিত্তীতি যোজনা। ছন্দানুরক্খনত্থং ‘‘ৰিনযংকম্ম’’ন্তি অনুস্সারাগমো ৰেদিতব্বো, ৰিনযকম্মন্তি অত্থো। তং চীৰরং অধিট্ঠহন্তস্স ৰা ৰিস্সজ্জন্তস্স ৰা দুক্কটন্তি যোজনা।

    1644-5.Idhapana imasmiṃ sāsane yena pana bhikkhunā saha cīvarasāmikena taṃ vinayakammaṃ kataṃ, tassa avissāsena vissāsabhāvaṃ vinā so vinayakammakato bhikkhu taṃ cīvaraṃ paribhuñjeyya, tassa bhikkhuno pācittīti yojanā. Chandānurakkhanatthaṃ ‘‘vinayaṃkamma’’nti anussārāgamo veditabbo, vinayakammanti attho. Taṃ cīvaraṃ adhiṭṭhahantassa vā vissajjantassa vā dukkaṭanti yojanā.

    ১৬৪৬. পচ্চুদ্ধারকৰত্থেসূতি পচ্চুদ্ধটৰত্থেসু। অপচ্চুদ্ধারসঞ্ঞিনোতি অপচ্চুদ্ধটসঞ্ঞিনো। তত্থাতি অপচ্চুদ্ধটৰত্থেসু। ৰেমতিকস্সাতি ‘‘পচ্চুদ্ধটানি নু খো মযা, অপচ্চুদ্ধটানী’’তি সংসযাপন্নস্স।

    1646.Paccuddhārakavatthesūti paccuddhaṭavatthesu. Apaccuddhārasaññinoti apaccuddhaṭasaññino. Tatthāti apaccuddhaṭavatthesu. Vematikassāti ‘‘paccuddhaṭāni nu kho mayā, apaccuddhaṭānī’’ti saṃsayāpannassa.

    ১৬৪৭. পচ্চুদ্ধারণসঞ্ঞিস্সাতি পচ্চুদ্ধটমিদন্তি সঞ্ঞিস্স। ৰিস্সাসাতি যস্স ৰা চীৰরং ৰিকপ্পেসি, তেন অপচ্চুদ্ধটম্পি তস্স ৰিস্সাসা পরিভুঞ্জতো চ। যথাহ ‘‘তস্স ৰা ৰিস্সসন্তো পরিভুঞ্জতী’’তি (পাচি॰ ৩৭৬)।

    1647.Paccuddhāraṇasaññissāti paccuddhaṭamidanti saññissa. Vissāsāti yassa vā cīvaraṃ vikappesi, tena apaccuddhaṭampi tassa vissāsā paribhuñjato ca. Yathāha ‘‘tassa vā vissasanto paribhuñjatī’’ti (pāci. 376).

    ৰিকপ্পনকথাৰণ্ণনা।

    Vikappanakathāvaṇṇanā.

    ১৬৪৮-৯. ‘‘পত্তো নাম দ্ৰে পত্তা অযোপত্তো মত্তিকাপত্তো’’তি (পাচি॰ ৩৭৯) জাতিযা কপ্পিযপত্তানং ৰুত্তত্তা আহ ‘‘অধিট্ঠানুপগং পত্ত’’ন্তি। তাদিসন্তি অধিট্ঠানুপগং। সূচিঘরং নাম সসূচিকং ৰা অসূচিকং ৰা। কাযবন্ধনং নাম পট্টিকা ৰা সূকরন্তকং ৰা। নিসীদনং নাম সদসং ৰুচ্চতি।

    1648-9. ‘‘Patto nāma dve pattā ayopatto mattikāpatto’’ti (pāci. 379) jātiyā kappiyapattānaṃ vuttattā āha ‘‘adhiṭṭhānupagaṃ patta’’nti. Tādisanti adhiṭṭhānupagaṃ. Sūcigharaṃ nāma sasūcikaṃ vā asūcikaṃ vā. Kāyabandhanaṃ nāma paṭṭikā vā sūkarantakaṃ vā. Nisīdanaṃ nāma sadasaṃ vuccati.

    ‘‘পত্তং ৰা’’তিআদীহি উপযোগন্তপদেহি ‘‘অপনেত্ৰা নিধেন্তস্সা’’তি পচ্চেকং যোজেতব্বং। নিধেন্তস্সাতি এতস্স ‘‘হসাপেক্খস্সা’’তি ৰিসেসনং। যথাহ ‘‘হসাপেক্খোপীতি কীল়াধিপ্পাযো’’তি (পাচি॰ ৩৭৯)। ‘‘কেৰল’’ন্তি ইমিনা দুন্নিক্খিত্তস্স পটিসামনাধিপ্পাযাদিঅঞ্ঞাধিপ্পাযাভাৰং দীপেতি। ৰক্খতি চ ‘‘দুন্নিক্খিত্তমনাপত্তি, পটিসামযতো পনা’’তি।

    ‘‘Pattaṃ vā’’tiādīhi upayogantapadehi ‘‘apanetvā nidhentassā’’ti paccekaṃ yojetabbaṃ. Nidhentassāti etassa ‘‘hasāpekkhassā’’ti visesanaṃ. Yathāha ‘‘hasāpekkhopīti kīḷādhippāyo’’ti (pāci. 379). ‘‘Kevala’’nti iminā dunnikkhittassa paṭisāmanādhippāyādiaññādhippāyābhāvaṃ dīpeti. Vakkhati ca ‘‘dunnikkhittamanāpatti, paṭisāmayato panā’’ti.

    ১৬৫০. তেনাপীতি আণত্তেন। তস্সাতি আণাপকস্স। তিকদুক্কটং ৰুত্তন্তি অনুপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন তিকদুক্কটং ৰুত্তং, ইমিনা চ উপসম্পন্নসন্তকে তিকপাচিত্তিযন্তি ইদঞ্চ ৰুত্তমেৰ হোতি।

    1650.Tenāpīti āṇattena. Tassāti āṇāpakassa. Tikadukkaṭaṃ vuttanti anupasampanne upasampannasaññivematikaanupasampannasaññīnaṃ vasena tikadukkaṭaṃ vuttaṃ, iminā ca upasampannasantake tikapācittiyanti idañca vuttameva hoti.

    ১৬৫১. অঞ্ঞন্তি পাল়িযং অনাগতং পত্তত্থৰিকাদিপরিক্খারং।

    1651.Aññanti pāḷiyaṃ anāgataṃ pattatthavikādiparikkhāraṃ.

    ১৬৫২. সব্বেসূতি পাল়িযং আগতেসু চ অনাগতেসু চ সব্বেসু পরিক্খারেসু।

    1652.Sabbesūti pāḷiyaṃ āgatesu ca anāgatesu ca sabbesu parikkhāresu.

    ১৬৫৩. ধম্মকথং কত্ৰাতি ‘‘সমণেন নাম অনিহিতপরিক্খারেন ভৰিতুং ন ৰট্টতী’’তি (পাচি॰ অট্ঠ॰ ৩৭৭) অট্ঠকথাগতনযেন ধম্মকথং কত্ৰা। অনিহিতপরিক্খারেনাতি অপ্পটিসামিতপরিক্খারেন। নিধেতি চে, তথা অনাপত্তীতি যোজনা। অৰিহেসেতুকামস্সাতি ৰিহেসাধিপ্পাযরহিতস্স। অকীল়স্সাতি কীল়াধিপ্পাযরহিতস্স কেৰলং ৰত্তসীসেন ‘‘পটিসামেত্ৰা দস্সামী’’তি অপনিধেন্তস্স।

    1653.Dhammakathaṃ katvāti ‘‘samaṇena nāma anihitaparikkhārena bhavituṃ na vaṭṭatī’’ti (pāci. aṭṭha. 377) aṭṭhakathāgatanayena dhammakathaṃ katvā. Anihitaparikkhārenāti appaṭisāmitaparikkhārena. Nidheti ce, tathā anāpattīti yojanā. Avihesetukāmassāti vihesādhippāyarahitassa. Akīḷassāti kīḷādhippāyarahitassa kevalaṃ vattasīsena ‘‘paṭisāmetvā dassāmī’’ti apanidhentassa.

    ১৬৫৪. অদিন্নাদানসমুট্ঠানাপত্তীনং অকুসলাদিৰসেনপি সচিত্তকত্তা আহ ‘‘ইদং অকুসলেনেৰ সচিত্ত’’ন্তি।

    1654. Adinnādānasamuṭṭhānāpattīnaṃ akusalādivasenapi sacittakattā āha ‘‘idaṃ akusaleneva sacitta’’nti.

    চীৰরাপনিধানকথাৰণ্ণনা।

    Cīvarāpanidhānakathāvaṇṇanā.

    সুরাপানৰগ্গো ছট্ঠো।

    Surāpānavaggo chaṭṭho.

    ১৬৫৫. ‘‘তিরচ্ছানগতং পাণ’’ন্তি ইমিনা ‘‘যো পন ভিক্খু সঞ্চিচ্চ পাণং জীৰিতা ৰোরোপেয্য, পাচিত্তিয’’ন্তি (পাচি॰ ৩৮৩) ইমস্মিং সিক্খাপদে অধিপ্পেতং পাণং দস্সেতি। আপত্তিনানত্তাভাৰা আহ ‘‘মহন্তং খুদ্দকম্পি ৰা’’তি। যথাহ ‘‘ইমস্মিঞ্চ সিক্খাপদে তিরচ্ছানগতোযেৰ ‘পাণো’তি ৰেদিতব্বো, তং খুদ্দকম্পি মহন্তম্পি মারেন্তস্স আপত্তিনানাকরণং নত্থি, মহন্তে পন উপক্কমমহন্তত্তা অকুসলং মহন্তং হোতী’’তি (পাচি॰ অট্ঠ॰ ৩৮২)। ‘‘মারেন্তস্স অস্সা’’তি পদচ্ছেদো। ‘‘খুদ্দকম্পি ৰা মারেন্তস্সা’’তি ইমিনা অট্ঠকথাযং ‘‘অন্তমসো মঞ্চপীঠং সোধেন্তো মঙ্গুলবীজকেপি পাণসঞ্ঞী নিক্কারুণিকতায তং ভিন্দন্তো অপনেতি, পাচিত্তিযং। তস্মা এৰরূপেসু ঠানেসু কারুঞ্ঞং উপট্ঠপেত্ৰা অপ্পমত্তেন ৰত্তং কাতব্ব’’ন্তি ৰুত্তৰিনিচ্ছযোপি সঙ্গহিতো।

    1655.‘‘Tiracchānagataṃ pāṇa’’nti iminā ‘‘yo pana bhikkhu sañcicca pāṇaṃ jīvitā voropeyya, pācittiya’’nti (pāci. 383) imasmiṃ sikkhāpade adhippetaṃ pāṇaṃ dasseti. Āpattinānattābhāvā āha ‘‘mahantaṃ khuddakampi vā’’ti. Yathāha ‘‘imasmiñca sikkhāpade tiracchānagatoyeva ‘pāṇo’ti veditabbo, taṃ khuddakampi mahantampi mārentassa āpattinānākaraṇaṃ natthi, mahante pana upakkamamahantattā akusalaṃ mahantaṃ hotī’’ti (pāci. aṭṭha. 382). ‘‘Mārentassa assā’’ti padacchedo. ‘‘Khuddakampi vā mārentassā’’ti iminā aṭṭhakathāyaṃ ‘‘antamaso mañcapīṭhaṃ sodhento maṅgulabījakepi pāṇasaññī nikkāruṇikatāya taṃ bhindanto apaneti, pācittiyaṃ. Tasmā evarūpesu ṭhānesu kāruññaṃ upaṭṭhapetvā appamattena vattaṃ kātabba’’nti vuttavinicchayopi saṅgahito.

    ১৬৫৬. উভযত্থ চাতি পাণে ৰা অপাণে ৰাতি উভযত্থাপি। অৰসেসৰিনিচ্ছযো পনেত্থ মনুস্সৰিগ্গহে ৰুত্তনযেনেৰ ৰেদিতব্বো।

    1656.Ubhayatthacāti pāṇe vā apāṇe vāti ubhayatthāpi. Avasesavinicchayo panettha manussaviggahe vuttanayeneva veditabbo.

    সঞ্চিচ্চপাণকথাৰণ্ণনা।

    Sañciccapāṇakathāvaṇṇanā.

    ১৬৫৮. সপ্পাণকন্তি সহ পাণকেহীতি সপ্পাণকং। যে পরিভোগেন মরন্তি, এৰরূপা ইধ ‘‘পাণকা’’তি অধিপ্পেতা। অস্সাতি ভিক্খুনো।

    1658.Sappāṇakanti saha pāṇakehīti sappāṇakaṃ. Ye paribhogena maranti, evarūpā idha ‘‘pāṇakā’’ti adhippetā. Assāti bhikkhuno.

    ১৬৫৯. ‘‘অৰিচ্ছিজ্জা’’তি ইমিনা ৰিচ্ছেদেনেৰ পযোগনানত্তং হোতীতি দীপেতি। পত্তপূরম্পীতি এত্থ পি-সদ্দো ব্যতিরেকে।

    1659.‘‘Avicchijjā’’ti iminā vicchedeneva payoganānattaṃ hotīti dīpeti. Pattapūrampīti ettha pi-saddo byatireke.

    ১৬৬০-১. অস্স পাচিত্তি পরিদীপিতাতি সম্বন্ধো। তাদিসেনাতি সপ্পাণকেন। আৰিঞ্ছিত্ৰানাতি পরিব্ভমিত্ৰা। যাগুযোতি এত্থ ‘‘উণ্হা’’তি সামত্থিযা লব্ভতি। ইদঞ্চ পাণীনং মারণত্থং যং কিঞ্চি উণ্হৰত্থুং সপ্পাণকেন উদকেন অনিব্বাপেতুং উপলক্খণং। তং সপ্পাণকং উদকং। ন্হাযতোপি ৰাতি এত্থ পি-সদ্দেন অট্ঠকথাযং –

    1660-1. Assa pācitti paridīpitāti sambandho. Tādisenāti sappāṇakena. Āviñchitvānāti paribbhamitvā. Yāguyoti ettha ‘‘uṇhā’’ti sāmatthiyā labbhati. Idañca pāṇīnaṃ māraṇatthaṃ yaṃ kiñci uṇhavatthuṃ sappāṇakena udakena anibbāpetuṃ upalakkhaṇaṃ. Taṃ sappāṇakaṃ udakaṃ. Nhāyatopi vāti ettha pi-saddena aṭṭhakathāyaṃ –

    ‘‘উদকসোণ্ডিং ৰা পোক্খরণিং ৰা পৰিসিত্ৰা বহি নিক্খমনত্থায ৰীচিং উট্ঠাপযতোপি। সোণ্ডিং ৰা পোক্খরণিং ৰা সোধেন্তেহি ততো গহিতউদকং উদকেযেৰ আসিঞ্চিতব্বং। সমীপম্হি উদকে অসতি কপ্পিযউদকস্স অট্ঠ ৰা দস ৰা ঘটে উদকসণ্ঠানকপ্পদেসে আসিঞ্চিত্ৰা তত্থ আসিঞ্চিতব্বং। ‘পৰট্টিত্ৰা উদকে পতিস্সতী’তি উণ্হপাসাণে উদকং নাসিঞ্চিতব্বং। কপ্পিযউদকেন পন পাসাণং নিব্বাপেত্ৰা আসিঞ্চিতুং ৰট্টতী’’তি (পাচি॰ অট্ঠ॰ ৩৮৭) –

    ‘‘Udakasoṇḍiṃ vā pokkharaṇiṃ vā pavisitvā bahi nikkhamanatthāya vīciṃ uṭṭhāpayatopi. Soṇḍiṃ vā pokkharaṇiṃ vā sodhentehi tato gahitaudakaṃ udakeyeva āsiñcitabbaṃ. Samīpamhi udake asati kappiyaudakassa aṭṭha vā dasa vā ghaṭe udakasaṇṭhānakappadese āsiñcitvā tattha āsiñcitabbaṃ. ‘Pavaṭṭitvā udake patissatī’ti uṇhapāsāṇe udakaṃ nāsiñcitabbaṃ. Kappiyaudakena pana pāsāṇaṃ nibbāpetvā āsiñcituṃ vaṭṭatī’’ti (pāci. aṭṭha. 387) –

    ৰুত্তৰিনিচ্ছযং সম্পিণ্ডেতি।

    Vuttavinicchayaṃ sampiṇḍeti.

    ১৬৬২. উভযত্থপীতি সপ্পাণকেপি অপ্পাণকেপীতি উভযত্থেৰ।

    1662.Ubhayatthapīti sappāṇakepi appāṇakepīti ubhayattheva.

    ১৬৬৪-৬. পাণপটিবদ্ধতায কারণং দস্সেতুমাহ ‘‘পতন’’ন্তিআদি। সলভাদীনন্তি পটঙ্গাদীনং । ঞত্ৰাতি এত্থ পি-সদ্দো লুত্তনিদ্দিট্ঠো। এৰমুপরিপি। পদীপুজ্জলনন্তি এত্থ ‘‘ৰিযা’’তি সেসো। এত্থাতি ইমস্মিং সিক্খাপদে। সপ্পাণভাৰোৰ সপ্পাণভাৰতা, তং। ভুঞ্জতোতি ভুঞ্জিতব্বতো।

    1664-6. Pāṇapaṭibaddhatāya kāraṇaṃ dassetumāha ‘‘patana’’ntiādi. Salabhādīnanti paṭaṅgādīnaṃ . Ñatvāti ettha pi-saddo luttaniddiṭṭho. Evamuparipi. Padīpujjalananti ettha ‘‘viyā’’ti seso. Etthāti imasmiṃ sikkhāpade. Sappāṇabhāvova sappāṇabhāvatā, taṃ. Bhuñjatoti bhuñjitabbato.

    সলভাদীনং পতনং ঞত্ৰাপি সুদ্ধেন চেতসা পদীপুজ্জলনং ৰিয সপাণভাৰং ঞত্ৰাপি জলসঞ্ঞায ভুঞ্জিতব্বতো এত্থ পণ্ণত্তিৰজ্জতা ঞেয্যাতি যোজনা।

    Salabhādīnaṃ patanaṃ ñatvāpi suddhena cetasā padīpujjalanaṃ viya sapāṇabhāvaṃ ñatvāpi jalasaññāya bhuñjitabbato ettha paṇṇattivajjatā ñeyyāti yojanā.

    এৰং সন্তে সিঞ্চনসপ্পাণকসিক্খাপদানং উভিন্নম্পি কো ৰিসেসোতি আহ ‘‘সিঞ্চনে’’তিআদি। সিঞ্চনং সিঞ্চনসিক্খাপদং সিঞ্চনে ৰুত্তং সিঞ্চনৰিসযে পঞ্ঞত্তং, ইদং পন সপ্পাণকসিক্খাপদং পরিভোগে ৰুত্তং অজ্ঝোহারৰিসযে পঞ্ঞত্তন্তি অযমেৰ তস্স চেৰ অস্স চ ৰিসেসোতি যোজনা।

    Evaṃ sante siñcanasappāṇakasikkhāpadānaṃ ubhinnampi ko visesoti āha ‘‘siñcane’’tiādi. Siñcanaṃ siñcanasikkhāpadaṃ siñcane vuttaṃ siñcanavisaye paññattaṃ, idaṃ pana sappāṇakasikkhāpadaṃ paribhoge vuttaṃ ajjhohāravisaye paññattanti ayameva tassa ceva assa ca visesoti yojanā.

    সপ্পাণককথাৰণ্ণনা।

    Sappāṇakakathāvaṇṇanā.

    ১৬৬৭. যথাধম্মন্তি যো যস্স অধিকরণস্স ৰূপসমনায ধম্মো ৰুত্তো, তেনেৰ ধম্মেনাতি অত্থো। ‘‘কিচ্চাধিকরণ’’ন্তি ইমিনা ইতরানি অধিকরণানি উপলক্খিতানি। যথাহ ‘‘অধিকরণং নাম চত্তারি অধিকরণানি ৰিৰাদাধিকরণং অনুৰাদাধিকরণং আপত্তাধিকরণং কিচ্চাধিকরণ’’ন্তি (পাচি॰ ৩৯৪)। অপলোকনকম্মাদীনি চত্তারি সঙ্ঘকিচ্চং নাম, তদেৰ সমথেহি অধিকরণীযত্তা ৰূপসমেতব্বত্তা অধিকরণন্তি কিচ্চাধিকরণং। পুন নীহাতব্বন্তি পুন নীহরিতব্বং, ৰূপসমেতব্বন্তি অত্থো। ইমিনা ‘‘অকতং কম্ম’’ন্তিআদিনা পাল়িযং দস্সিতা দ্ৰাদস উক্কোটা উপলক্খিতাতি দট্ঠব্বা। উক্কোটেন্তস্সাতি তস্স তস্স ভিক্খুনো সন্তিকং গন্ত্ৰা ‘‘অকতং কম্ম’’ন্তিআদীনি ৰত্ৰা উচ্চালেন্তস্স যথাপতিট্ঠিতভাৰেন পতিট্ঠাতুং ন দেন্তস্স। এত্থ চ পতিট্ঠাতুং ন দেন্তস্সাতি তস্স পৰত্তিআকারদস্সনত্থং ৰুত্তং। যং পন ধম্মেন অধিকরণং নিহটং, তং সুনিহটমেৰ।

    1667.Yathādhammanti yo yassa adhikaraṇassa vūpasamanāya dhammo vutto, teneva dhammenāti attho. ‘‘Kiccādhikaraṇa’’nti iminā itarāni adhikaraṇāni upalakkhitāni. Yathāha ‘‘adhikaraṇaṃ nāma cattāri adhikaraṇāni vivādādhikaraṇaṃ anuvādādhikaraṇaṃ āpattādhikaraṇaṃ kiccādhikaraṇa’’nti (pāci. 394). Apalokanakammādīni cattāri saṅghakiccaṃ nāma, tadeva samathehi adhikaraṇīyattā vūpasametabbattā adhikaraṇanti kiccādhikaraṇaṃ. Puna nīhātabbanti puna nīharitabbaṃ, vūpasametabbanti attho. Iminā ‘‘akataṃ kamma’’ntiādinā pāḷiyaṃ dassitā dvādasa ukkoṭā upalakkhitāti daṭṭhabbā. Ukkoṭentassāti tassa tassa bhikkhuno santikaṃ gantvā ‘‘akataṃ kamma’’ntiādīni vatvā uccālentassa yathāpatiṭṭhitabhāvena patiṭṭhātuṃ na dentassa. Ettha ca patiṭṭhātuṃ na dentassāti tassa pavattiākāradassanatthaṃ vuttaṃ. Yaṃ pana dhammena adhikaraṇaṃ nihaṭaṃ, taṃ sunihaṭameva.

    ১৬৬৮. ‘‘অকতং কম্মং, দুক্কটং কম্মং, পুন কাতব্বং কম্ম’’ন্তি ৰদতা ৰদন্তেন ভিক্খুনা তং কম্মং উচ্চালেতুং ন ৰট্টতীতি যোজনা।

    1668. ‘‘Akataṃ kammaṃ, dukkaṭaṃ kammaṃ, puna kātabbaṃ kamma’’nti vadatā vadantena bhikkhunā taṃ kammaṃ uccāletuṃ na vaṭṭatīti yojanā.

    ১৬৬৯. ৰিপ্পকতেতি আরদ্ধানিট্ঠিতে। তন্তি পটিক্কোসন্তং। সঞ্ঞাপেত্ৰাতি কতকম্মস্স অনৰজ্জভাৰং ঞাপেত্ৰা। ন পনঞ্ঞথাতি তথা অসঞ্ঞাপেত্ৰা।

    1669.Vippakateti āraddhāniṭṭhite. Tanti paṭikkosantaṃ. Saññāpetvāti katakammassa anavajjabhāvaṃ ñāpetvā. Na panaññathāti tathā asaññāpetvā.

    ১৬৭০. অধম্মে পন কম্মস্মিন্তি যথাপাল়িআগতে কম্মস্মিং। উভযত্থাপীতি ধম্মকম্মে, অধম্মকম্মে ৰাতি উভযত্থ।

    1670.Adhamme pana kammasminti yathāpāḷiāgate kammasmiṃ. Ubhayatthāpīti dhammakamme, adhammakamme vāti ubhayattha.

    ১৬৭১. ন চ কম্মারহস্স ৰাতি এত্থ চ-সদ্দো ‘‘ৰগ্গেন চা’’তি যোজেতব্বো। চ-সদ্দো ৰা-সদ্দত্থে দট্ঠব্বো। ‘‘অধম্মেন, ৰগ্গেন ৰা ন কম্মারহস্স ৰা কত’’ন্তি জানতো উক্কোটনে দোসো নত্থীতি যোজনা।

    1671.Na ca kammārahassa vāti ettha ca-saddo ‘‘vaggena cā’’ti yojetabbo. Ca-saddo vā-saddatthe daṭṭhabbo. ‘‘Adhammena, vaggena vā na kammārahassa vā kata’’nti jānato ukkoṭane doso natthīti yojanā.

    উক্কোটনকথাৰণ্ণনা।

    Ukkoṭanakathāvaṇṇanā.

    ১৬৭৩. ‘‘দুট্ঠুল্লা নাম আপত্তি চত্তারি চ পারাজিকানি তেরস চ সঙ্ঘাদিসেসা’’তি (পাচি॰ ৩৯৯) ৰচনতো পারাজিকানম্পি দুট্ঠুল্লত্তা, ইধ চ পারাজিকস্স অনধিপ্পেতত্তা ইধাধিপ্পেতমেৰ দস্সেতুং ‘‘সঙ্ঘাদিসেস’’ন্তি ইমিনা দুট্ঠুল্ল-পদং ৰিসেসিতং। যথাহ ‘‘এত্থ চত্তারি পারাজিকানি অত্থুদ্ধারৰসেন দস্সিতানি, সঙ্ঘাদিসেসাপত্তি পন অধিপ্পেতা’’তি (পাচি॰ অট্ঠ॰ ৩৯৯)। ঞত্ৰাতি সামং ৰা অঞ্ঞতো ৰা জানিত্ৰা। ছাদযতো তস্স পরিযাপুতাতি ‘‘ইমং জানিত্ৰা চোদেস্সন্তি, সারেস্সন্তি, নারোচেস্সামী’’তি পটিচ্ছাদেন্তস্স তস্স পরিযাপুতা দেসিতা।

    1673. ‘‘Duṭṭhullā nāma āpatti cattāri ca pārājikāni terasa ca saṅghādisesā’’ti (pāci. 399) vacanato pārājikānampi duṭṭhullattā, idha ca pārājikassa anadhippetattā idhādhippetameva dassetuṃ ‘‘saṅghādisesa’’nti iminā duṭṭhulla-padaṃ visesitaṃ. Yathāha ‘‘ettha cattāri pārājikāni atthuddhāravasena dassitāni, saṅghādisesāpatti pana adhippetā’’ti (pāci. aṭṭha. 399). Ñatvāti sāmaṃ vā aññato vā jānitvā. Chādayato tassa pariyāputāti ‘‘imaṃ jānitvā codessanti, sāressanti, nārocessāmī’’ti paṭicchādentassa tassa pariyāputā desitā.

    ১৬৭৪-৫. ধুরং নিক্খিপিত্ৰাতি ‘‘অঞ্ঞস্স ন আরোচেস্সামী’’তি ধুরনিক্খেপং কত্ৰা। তস্সাতি দুট্ঠুল্লস্স। পটিচ্ছাদনং হেতু কারণং যস্স আরোচনস্সাতি ৰিগ্গহো। পটিচ্ছাদনহেতুকন্তি আরোচনকিরিযায ৰিসেসনং, ‘‘ইত্থন্নামো ইত্থন্নামং সঙ্ঘাদিসেসং আপন্নো, অঞ্ঞস্স ন আরোচেহী’’তি ৰত্ৰা আরোচনং করোতীতি ৰুত্তং হোতি। ইতীতি ৰুত্তনিদস্সনে, হীতি এৰকারত্থে, এৰমেৰ ৰদতীতি অত্থো।

    1674-5.Dhuraṃ nikkhipitvāti ‘‘aññassa na ārocessāmī’’ti dhuranikkhepaṃ katvā. Tassāti duṭṭhullassa. Paṭicchādanaṃ hetu kāraṇaṃ yassa ārocanassāti viggaho. Paṭicchādanahetukanti ārocanakiriyāya visesanaṃ, ‘‘itthannāmo itthannāmaṃ saṅghādisesaṃ āpanno, aññassa na ārocehī’’ti vatvā ārocanaṃ karotīti vuttaṃ hoti. Itīti vuttanidassane, hīti evakāratthe, evameva vadatīti attho.

    যাৰ কোটি ন ছিজ্জতি, তাৰ এৰং ভিক্খূনং সতম্পি সহস্সম্পি তং আপত্তিং আপজ্জতি এৰাতি যোজনা।

    Yāva koṭi na chijjati, tāva evaṃ bhikkhūnaṃ satampi sahassampi taṃ āpattiṃ āpajjati evāti yojanā.

    ১৬৭৬. মূলেনাতি সঙ্ঘাদিসেসং আপন্নপুগ্গলেন। আরোচিতস্স দুতিযস্সাতি সমানাধিকরণং। মূলেন ‘‘মম আপত্তিং আপন্নভাৰং অঞ্ঞস্স ন আরোচেহী’’তি আরোচিতস্স দুতিযভিক্খুস্স সন্তিকা সুণন্তেন ততিযেন নিৰত্তিত্ৰা তস্সেৰ দুতিযস্স পকাসিতে আরোচনস্স কোটি ছিন্নাতি ৰুচ্চতীতি যোজনা। কোটীতি আরোচনকিরিযাৰসানং ৰুচ্চতি।

    1676.Mūlenāti saṅghādisesaṃ āpannapuggalena. Ārocitassa dutiyassāti samānādhikaraṇaṃ. Mūlena ‘‘mama āpattiṃ āpannabhāvaṃ aññassa na ārocehī’’ti ārocitassa dutiyabhikkhussa santikā suṇantena tatiyena nivattitvā tasseva dutiyassa pakāsite ārocanassa koṭi chinnāti vuccatīti yojanā. Koṭīti ārocanakiriyāvasānaṃ vuccati.

    ১৬৭৭. দুট্ঠুল্লায চ দুট্ঠুল্লসঞ্ঞীতি এত্থ ‘‘আরোচেন্তো’’তি পকরণতো লব্ভতি। ইতরেসু পন দ্ৰীসূতি দুট্ঠুল্লায ৰেমতিকো, অদুট্ঠুল্লসঞ্ঞীতি দ্ৰীসু।

    1677.Duṭṭhullāya ca duṭṭhullasaññīti ettha ‘‘ārocento’’ti pakaraṇato labbhati. Itaresu pana dvīsūti duṭṭhullāya vematiko, aduṭṭhullasaññīti dvīsu.

    ১৬৭৮. অদুট্ঠুল্লাযাতি পঞ্চৰিধায লহুকাপত্তিযা। সব্বত্থাতি সব্বেসু ৰিকপ্পেসু। তিকদুক্কটং নিদ্দিট্ঠন্তি অদুট্ঠুল্লায দুট্ঠুল্লসঞ্ঞিৰেমতিকঅদুট্ঠুল্লসঞ্ঞীনং ৰসেন দুক্কটত্তযং পাল়িযং (পাচি॰ ৪০০) দস্সিতন্তি অত্থো। সব্বত্থাতি সব্বেসু। অনুপসম্পন্নৰারেসূতি তীসু অনুপসম্পন্নৰিকপ্পেসু। দুক্কটন্তি অনুপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন তিকদুক্কটন্তি অত্থো।

    1678.Aduṭṭhullāyāti pañcavidhāya lahukāpattiyā. Sabbatthāti sabbesu vikappesu. Tikadukkaṭaṃ niddiṭṭhanti aduṭṭhullāya duṭṭhullasaññivematikaaduṭṭhullasaññīnaṃ vasena dukkaṭattayaṃ pāḷiyaṃ (pāci. 400) dassitanti attho. Sabbatthāti sabbesu. Anupasampannavāresūti tīsu anupasampannavikappesu. Dukkaṭanti anupasampanne upasampannasaññivematikaanupasampannasaññīnaṃ vasena tikadukkaṭanti attho.

    ১৬৭৯-৮০. ‘‘সঙ্ঘস্স ভেদনাদীনি ভৰিস্সন্তী’’তিআদীহি সব্বেহি পদেহি ‘‘ন আরোচেতি চে, দোসো নত্থী’’তি ইদং পচ্চেকং যোজেতব্বং। সভাগং ৰা ন পস্সতীতি তথা অপস্সন্তো ন আরোচেতি চে, দোসো নত্থি। কক্খল়ো অযন্তি ন আরোচেতি চে, দোসো নত্থি।

    1679-80. ‘‘Saṅghassa bhedanādīni bhavissantī’’tiādīhi sabbehi padehi ‘‘na āroceti ce, doso natthī’’ti idaṃ paccekaṃ yojetabbaṃ. Sabhāgaṃ vā na passatīti tathā apassanto na āroceti ce, doso natthi. Kakkhaḷo ayanti na āroceti ce, doso natthi.

    ১৬৮১. অঞ্ঞস্স অনারোচনেন আপজ্জিতব্বতো ‘‘অক্রিয’’ন্তি ৰুত্তং। ‘‘আরোচেতব্ব’’ন্তি অনুঞ্ঞাতস্স অনারোচনং অনাদরমন্তরেন ন হোতীতি আহ ‘‘দুক্খৰেদন’’ন্তি। এত্থ চ মাতিকট্ঠকথাযং ‘‘সমনুভাসনসদিসানেৰা’’তি (কঙ্খা॰ অট্ঠ॰ দুট্ঠল্লসিক্খাপদৰণ্ণনা) ৰুত্তং, ইধ ‘‘ধুরনিক্খেপতুল্যাৰা’’তি, উভযত্থ নামমত্তমেৰ ৰিসেসো, একমেৰ সমুট্ঠানন্তি ৰেদিতব্বং।

    1681. Aññassa anārocanena āpajjitabbato ‘‘akriya’’nti vuttaṃ. ‘‘Ārocetabba’’nti anuññātassa anārocanaṃ anādaramantarena na hotīti āha ‘‘dukkhavedana’’nti. Ettha ca mātikaṭṭhakathāyaṃ ‘‘samanubhāsanasadisānevā’’ti (kaṅkhā. aṭṭha. duṭṭhallasikkhāpadavaṇṇanā) vuttaṃ, idha ‘‘dhuranikkhepatulyāvā’’ti, ubhayattha nāmamattameva viseso, ekameva samuṭṭhānanti veditabbaṃ.

    দুট্ঠুল্লকথাৰণ্ণনা।

    Duṭṭhullakathāvaṇṇanā.

    ১৬৮২. ঊনৰীসতিৰস্সন্তি এত্থ ‘‘জান’’ন্তি সেসো, ‘‘ঊনৰীসতিৰস্সো’’তি জানন্তোতি অত্থো। ঊনৰীসতিৰস্সো নাম পটিসন্ধিতো পট্ঠায অপরিপুণ্ণৰীসতিসংৰচ্ছরো। যোতি যো ভিক্খু উপজ্ঝাযো হুত্ৰা। করেয্যাতি কারাপেয্য। উপসম্পজ্জতীতি উপসম্পদো, তং। যো জানং ঊনৰীসতিৰস্সং পুগ্গলং উপসম্পদং উপসম্পন্নং করেয্য, তস্স এৰং উপসম্পাদেন্তস্স ভিক্খুনো পাচিত্তিযং হোতীতি যোজনা। সেসানন্তি ‘‘গণস্স চ আচরিযস্স চ আপত্তি দুক্কটস্সা’’তি (পাচি॰ ৪০৪) পাল়িযং দস্সিতানং গহণং।

    1682.Ūnavīsativassanti ettha ‘‘jāna’’nti seso, ‘‘ūnavīsativasso’’ti jānantoti attho. Ūnavīsativasso nāma paṭisandhito paṭṭhāya aparipuṇṇavīsatisaṃvaccharo. Yoti yo bhikkhu upajjhāyo hutvā. Kareyyāti kārāpeyya. Upasampajjatīti upasampado, taṃ. Yo jānaṃ ūnavīsativassaṃ puggalaṃ upasampadaṃ upasampannaṃ kareyya, tassa evaṃ upasampādentassa bhikkhuno pācittiyaṃ hotīti yojanā. Sesānanti ‘‘gaṇassa ca ācariyassa ca āpatti dukkaṭassā’’ti (pāci. 404) pāḷiyaṃ dassitānaṃ gahaṇaṃ.

    ১৬৮৩. ঊনৰীসতিৰস্সভাৰং জানতা ৰা অজানতা ৰা ভিক্খুনা যো পুগ্গলো চে উপসম্পাদিতো, সো অনুপসম্পন্নোৰ হোতি, পুন সো পরিপুণ্ণৰীসতিৰস্সো সমানো উপসম্পন্নো কাতব্বো উপসম্পাদেতব্বোযেৰাতি যোজনা।

    1683. Ūnavīsativassabhāvaṃ jānatā vā ajānatā vā bhikkhunā yo puggalo ce upasampādito, so anupasampannova hoti, puna so paripuṇṇavīsativasso samāno upasampanno kātabbo upasampādetabboyevāti yojanā.

    ১৬৮৪. দসৰস্সচ্চযেন পরিপুণ্ণদসৰস্সো হুত্ৰা উপজ্ঝাযস্স সতো অস্স ভিক্খুপটিঞ্ঞস্স অঞ্ঞেসং উপসম্পাদনে কোচি দোসো চে একংসেন নত্থি ন ৰিজ্জতীতি যোজনা।

    1684.Dasavassaccayena paripuṇṇadasavasso hutvā upajjhāyassa sato assa bhikkhupaṭiññassa aññesaṃ upasampādane koci doso ce ekaṃsena natthi na vijjatīti yojanā.

    ১৬৮৫. তং ভিক্খুন্তি ঊনৰীসতিৰস্সো হুত্ৰা উপসম্পজ্জিত্ৰা পরিপুণ্ণদসৰস্সো উপজ্ঝাযো হুত্ৰা উপসম্পাদেন্তং তং ভিক্খুপটিঞ্ঞং। গণো চে পরিপূরতীতি মজ্ঝিমদেসে দসৰগ্গো, পচ্চন্তিমেসু জনপদেসু পঞ্চৰগ্গো গণো সচে অনূনো হোতি। তেতি উপসম্পাদিতা। সূপসম্পন্নাতি সুট্ঠু উপসম্পন্না।

    1685.Taṃ bhikkhunti ūnavīsativasso hutvā upasampajjitvā paripuṇṇadasavasso upajjhāyo hutvā upasampādentaṃ taṃ bhikkhupaṭiññaṃ. Gaṇo ce paripūratīti majjhimadese dasavaggo, paccantimesu janapadesu pañcavaggo gaṇo sace anūno hoti. Teti upasampāditā. Sūpasampannāti suṭṭhu upasampannā.

    ১৬৮৬-৭. যো ভিক্খু উপজ্ঝাযো হুত্ৰা ‘‘ঊনৰীসতিৰস্সপুগ্গলং উপসম্পাদযিস্সামি’’ইতি গণম্পি ৰা আচরিযম্পি ৰা পত্তম্পি ৰা পরিযেসতি, মাল়কঞ্চ সম্মন্নতি বদ্ধসীমং বন্ধতি, তস্স সব্বেসু পযোগেসু দুক্কটং। তথা ঞত্তিযা দুক্কটং। তথা দ্ৰীসু কম্মৰাচাসুপি দুক্কটন্তি যোজনা।

    1686-7. Yo bhikkhu upajjhāyo hutvā ‘‘ūnavīsativassapuggalaṃ upasampādayissāmi’’iti gaṇampi vā ācariyampi vā pattampi vā pariyesati, māḷakañca sammannati baddhasīmaṃ bandhati, tassa sabbesu payogesu dukkaṭaṃ. Tathā ñattiyā dukkaṭaṃ. Tathā dvīsu kammavācāsupi dukkaṭanti yojanā.

    ১৬৮৮-৯. ৰীসতি চ তানি ৰস্সানি চাতি ৰীসতিৰস্সানি, ঊনানি ৰীসতিৰস্সানি যস্স সো ঊনৰীসতিৰস্সো, ঊনৰীসতিৰস্সোতি সঞ্ঞা ঊনৰীসতিৰস্সসঞ্ঞা, সা এতস্স অত্থীতি ‘‘ঊনৰীসতিৰস্সসঞ্ঞী’’ইতি ৰত্তব্বে নিপাতনলক্খণেন ৰস্স-সদ্দলোপং কত্ৰা ‘‘ঊনৰীসতিসঞ্ঞী’’তি ৰুত্তং, তস্স ঊনৰীসতিসঞ্ঞিস্স। পরিপুণ্ণানি ৰীসতিৰস্সানি এতস্সাতি ‘‘পরিপুণ্ণৰীসতিৰস্সো’’তি ৰত্তব্বে নিপাতনলক্খণেন ৰীসতিৰস্স-সদ্দলোপং কত্ৰা ‘‘পরিপুণ্ণো’’তি পুগ্গলো ৰুচ্চতি, তস্মিং পরিপুণ্ণে, পরিপুণ্ণৰীসতিৰস্সে পুগ্গলেতি অত্থো। উভযত্থাতি ঊনৰীসতিপরিপুণ্ণৰীসতিৰস্সেসু উভোসু পুগ্গলেসু।

    1688-9. Vīsati ca tāni vassāni cāti vīsativassāni, ūnāni vīsativassāni yassa so ūnavīsativasso, ūnavīsativassoti saññā ūnavīsativassasaññā, sā etassa atthīti ‘‘ūnavīsativassasaññī’’iti vattabbe nipātanalakkhaṇena vassa-saddalopaṃ katvā ‘‘ūnavīsatisaññī’’ti vuttaṃ, tassa ūnavīsatisaññissa. Paripuṇṇāni vīsativassāni etassāti ‘‘paripuṇṇavīsativasso’’ti vattabbe nipātanalakkhaṇena vīsativassa-saddalopaṃ katvā ‘‘paripuṇṇo’’ti puggalo vuccati, tasmiṃ paripuṇṇe, paripuṇṇavīsativasse puggaleti attho. Ubhayatthāti ūnavīsatiparipuṇṇavīsativassesu ubhosu puggalesu.

    ঊনৰীসতিৰস্সকথাৰণ্ণনা।

    Ūnavīsativassakathāvaṇṇanā.

    ১৬৯১. থেয্যসত্থেন সদ্ধিন্তি ‘‘থেয্যসত্থো নাম চোরা কতকম্মা ৰা হোন্তি অকতকম্মা ৰা’’তিআদিনা (পাচি॰ ৪০৯) পদভাজনে ৰুত্তসরূপেন সত্থসঙ্খাতেন জনসমূহেন সহাতি ৰুত্তং হোতি। সহাদিযোগে করণৰচনং। জানন্তোতি ‘‘থেয্যসত্থো’’তি জানন্তো। সংৰিধাযাতি ‘‘গচ্ছামাৰুসো, গচ্ছাম ভন্তে, গচ্ছামাৰুসো, অজ্জ ৰা হিয্যো ৰা পরে ৰা অপরে ৰা গচ্ছামা’’তি পদভাজনে ৰুত্তনযেন সংৰিদহিত্ৰাতি অত্থো। মগ্গন্তি একদ্ধানমগ্গং, এত্থ ‘‘অন্তমসো গামন্তরম্পী’’তি সেসো। যথাহ ‘‘একদ্ধানমগ্গং পটিপজ্জেয্য অন্তমসো গামন্তরম্পী’’তি। পাচিত্তিযং সিযাতি ‘‘গামে গামন্তরে গামন্তরে আপত্তি পাচিত্তিযস্স। অগামকে অরঞ্ঞে অদ্ধযোজনে অদ্ধযোজনে আপত্তি পাচিত্তিযস্সা’’তি ৰুত্তপ্পকারং পাচিত্তিযং ভৰেয্য।

    1691.Theyyasatthenasaddhinti ‘‘theyyasattho nāma corā katakammā vā honti akatakammā vā’’tiādinā (pāci. 409) padabhājane vuttasarūpena satthasaṅkhātena janasamūhena sahāti vuttaṃ hoti. Sahādiyoge karaṇavacanaṃ. Jānantoti ‘‘theyyasattho’’ti jānanto. Saṃvidhāyāti ‘‘gacchāmāvuso, gacchāma bhante, gacchāmāvuso, ajja vā hiyyo vā pare vā apare vā gacchāmā’’ti padabhājane vuttanayena saṃvidahitvāti attho. Magganti ekaddhānamaggaṃ, ettha ‘‘antamaso gāmantarampī’’ti seso. Yathāha ‘‘ekaddhānamaggaṃ paṭipajjeyya antamaso gāmantarampī’’ti. Pācittiyaṃ siyāti ‘‘gāme gāmantare gāmantare āpatti pācittiyassa. Agāmake araññe addhayojane addhayojane āpatti pācittiyassā’’ti vuttappakāraṃ pācittiyaṃ bhaveyya.

    ১৬৯২. ন উদ্ধটোতি ইধ ন ৰুত্তো।

    1692.Na uddhaṭoti idha na vutto.

    ১৬৯৩-৪. মগ্গাটৰিৰিসঙ্কেতেতি মগ্গৰিসঙ্কেতে, অটৰিৰিসঙ্কেতে চ। যথাৰত্থুকমেৰাতি পাচিত্তিযমেৰ। তেসূতি সত্থিকেসু। অসংৰিদহন্তেসূতি সংৰিধানং অকরোন্তেসু। সযং ৰিদহতোপি চাতি অত্তনা সংৰিদহন্তস্স চ। উভযত্থাতি থেয্যসত্থে ৰা অথেয্যসত্থে ৰাতি দ্ৰীসু।

    1693-4.Maggāṭavivisaṅketeti maggavisaṅkete, aṭavivisaṅkete ca. Yathāvatthukamevāti pācittiyameva. Tesūti satthikesu. Asaṃvidahantesūti saṃvidhānaṃ akarontesu. Sayaṃ vidahatopi cāti attanā saṃvidahantassa ca. Ubhayatthāti theyyasatthe vā atheyyasatthe vāti dvīsu.

    ১৬৯৫. অথেয্যসত্থসঞ্ঞিস্সাতি এত্থ ‘‘উভযত্থা’’তি অনুৰত্তেতব্বং। কালস্সাযন্তি কালিকো, ৰিসঙ্কেতো, তস্মিং, কালসম্বন্ধিনি ৰিসঙ্কেতে চ অনাপত্তীতি অত্থো। ‘‘কালিকে’’তি ইমিনা ৰিসঙ্কেতৰিসেসনেন মগ্গাটৰিৰিসঙ্কেতেপি আপত্তিযেৰাতি দীপেতি।

    1695.Atheyyasatthasaññissāti ettha ‘‘ubhayatthā’’ti anuvattetabbaṃ. Kālassāyanti kāliko, visaṅketo, tasmiṃ, kālasambandhini visaṅkete ca anāpattīti attho. ‘‘Kālike’’ti iminā visaṅketavisesanena maggāṭavivisaṅketepi āpattiyevāti dīpeti.

    ১৬৯৬. কাযচিত্ততো , কাযৰাচাচিত্ততো চ সমুট্ঠানতো ইদং সিক্খাপদং থেয্যসত্থসমুট্ঠানং কথিতন্তি যোজনা।

    1696. Kāyacittato , kāyavācācittato ca samuṭṭhānato idaṃ sikkhāpadaṃ theyyasatthasamuṭṭhānaṃ kathitanti yojanā.

    থেয্যসত্থকথাৰণ্ণনা।

    Theyyasatthakathāvaṇṇanā.

    ১৬৯৭. সত্তমন্তি ‘‘যো পন ভিক্খু মাতুগামেন সদ্ধিং সংৰিধাযা’’তিআদিনা (পাচি॰ ৪১৩) উদ্দিট্ঠং সত্তমসিক্খাপদং। ভিক্খুনিযা সদ্ধিং সংৰিধানেনাতি ভিক্খুনিযা সদ্ধিং সংৰিধানসিক্খাপদেন। সমুট্ঠানাদিনাতি সমুট্ঠানাদিনা ৰিনিচ্ছযেন। তুল্যন্তি সদিসং। কোচিপীতি অপ্পমত্তকোপি।

    1697.Sattamanti ‘‘yo pana bhikkhu mātugāmena saddhiṃ saṃvidhāyā’’tiādinā (pāci. 413) uddiṭṭhaṃ sattamasikkhāpadaṃ. Bhikkhuniyā saddhiṃ saṃvidhānenāti bhikkhuniyā saddhiṃ saṃvidhānasikkhāpadena. Samuṭṭhānādināti samuṭṭhānādinā vinicchayena. Tulyanti sadisaṃ. Kocipīti appamattakopi.

    সংৰিধানকথাৰণ্ণনা।

    Saṃvidhānakathāvaṇṇanā.

    ১৬৯৮. এতে পঞ্চ ধম্মা অন্তরাযকরাতি পকাসিতাতি যোজনা। ইধ অযং অন্তরাযকর-সদ্দো পাল়িযং আগতেন অন্তরাযিক-সদ্দেন সমানত্থো। তস্মা কম্মন্তরাযিকা, কিলেসন্তরাযিকা, ৰিপাকন্তরাযিকা, উপৰাদন্তরাযিকা, আণাৰীতিক্কমন্তরাযিকাতি ইমে পঞ্চ অন্তরাযিকা ধম্মা ভগৰতা পকাসিতাতি ৰুত্তং হোতি।

    1698. Ete pañca dhammā antarāyakarāti pakāsitāti yojanā. Idha ayaṃ antarāyakara-saddo pāḷiyaṃ āgatena antarāyika-saddena samānattho. Tasmā kammantarāyikā, kilesantarāyikā, vipākantarāyikā, upavādantarāyikā, āṇāvītikkamantarāyikāti ime pañca antarāyikā dhammā bhagavatā pakāsitāti vuttaṃ hoti.

    তত্থ তংতংসম্পত্তিযা ৰিবন্ধনৰসেন সত্তসন্তানস্স অন্তরে ৰেমজ্ঝে এতি আগচ্ছতীতি অন্তরাযো, দিট্ঠধম্মিকাদিঅনত্থো, অনতিক্কমনট্ঠেন তস্মিং অন্তরাযে নিযুত্তা, অন্তরাযং ৰা ফলং অরহন্তি, অন্তরাযস্স ৰা করণসীলাতি অন্তরাযিকা (সারত্থ॰ টী॰ পাচিত্তিয ৩.৪১৭; কঙ্খা॰ অভি॰ টী॰ অরিট্ঠসিক্খাপদৰণ্ণনা)।

    Tattha taṃtaṃsampattiyā vibandhanavasena sattasantānassa antare vemajjhe eti āgacchatīti antarāyo, diṭṭhadhammikādianattho, anatikkamanaṭṭhena tasmiṃ antarāye niyuttā, antarāyaṃ vā phalaṃ arahanti, antarāyassa vā karaṇasīlāti antarāyikā (sārattha. ṭī. pācittiya 3.417; kaṅkhā. abhi. ṭī. ariṭṭhasikkhāpadavaṇṇanā).

    পঞ্চানন্তরিযকম্মানেৰ কম্মন্তরাযিকা, তথা ভিক্খুনিদূসককম্মং। তং পন মোক্খস্সেৰ অন্তরাযং করোতি, ন সগ্গস্স। ইদঞ্চ মিচ্ছাচারলক্খণস্স অভাৰতো ৰুত্তং। ন হি ভিক্খুনিযা ধম্মরক্খিতভাৰো অত্থি। পাকতিকভিক্খুনিৰসেন চেতং ৰুত্তং। অরিযায পন পৰত্তং অপাযসংৰত্তনিকমেৰ। নন্দমাণৰকো (ম॰ নি॰ অট্ঠ॰ ৩.৭; ধ॰ প॰ অট্ঠ॰ ১.৬৮ উপ্পলৰণ্ণত্থেরীৰত্থু; অ॰ নি॰ অট্ঠ॰ ২.৩.৩৪) চেত্থ নিদস্সনং। উভিন্নং সমানচ্ছন্দতাৰসেন ৰা ন সগ্গন্তরাযিকতা, মোক্খন্তরাযিকতা পন মোক্খত্থায পটিপত্তিযা ৰিদূসনতো। অভিভৰিত্ৰা পন পৰত্তিযা সগ্গন্তরাযিকতাপি ন সক্কা নিৰারেতুন্তি ৰদন্তি।

    Pañcānantariyakammāneva kammantarāyikā, tathā bhikkhunidūsakakammaṃ. Taṃ pana mokkhasseva antarāyaṃ karoti, na saggassa. Idañca micchācāralakkhaṇassa abhāvato vuttaṃ. Na hi bhikkhuniyā dhammarakkhitabhāvo atthi. Pākatikabhikkhunivasena cetaṃ vuttaṃ. Ariyāya pana pavattaṃ apāyasaṃvattanikameva. Nandamāṇavako (ma. ni. aṭṭha. 3.7; dha. pa. aṭṭha. 1.68 uppalavaṇṇattherīvatthu; a. ni. aṭṭha. 2.3.34) cettha nidassanaṃ. Ubhinnaṃ samānacchandatāvasena vā na saggantarāyikatā, mokkhantarāyikatā pana mokkhatthāya paṭipattiyā vidūsanato. Abhibhavitvā pana pavattiyā saggantarāyikatāpi na sakkā nivāretunti vadanti.

    অহেতুকদিট্ঠিঅকিরিযদিট্ঠিনত্থিকদিট্ঠিসঙ্খাতা মিচ্ছাদিট্ঠিধম্মা নিযতভাৰপ্পত্তা কিলেসন্তরাযিকা নাম। পণ্ডকতিরচ্ছানগতউভতোব্যঞ্জনকানং পটিসন্ধিচিত্তুপ্পাদধম্মা ৰিপাকন্তরাযিকা নাম। পণ্ডকাদিগ্গহণঞ্চেত্থ নিদস্সনমত্তং সব্বাযপি অহেতুকপটিসন্ধিযা ৰিপাকন্তরাযিকভাৰতো । অরিযূপৰাদা উপৰাদন্তরাযিকা নাম। তে পন যাৰ অরিযে ন খমাপেন্তি, তাৰদেৰ, ন ততো পরং। সঞ্চিচ্চ আপন্না সত্তাপত্তিক্খন্ধা আণাৰীতিক্কমন্তরাযিকা নাম। তেপি যাৰ ভিক্খুভাৰং ৰা পটিজানাতি, ন ৰুট্ঠাতি ৰা ন দেসেতি ৰা, তাৰদেৰ, ন ততো পরং।

    Ahetukadiṭṭhiakiriyadiṭṭhinatthikadiṭṭhisaṅkhātā micchādiṭṭhidhammā niyatabhāvappattā kilesantarāyikā nāma. Paṇḍakatiracchānagataubhatobyañjanakānaṃ paṭisandhicittuppādadhammā vipākantarāyikā nāma. Paṇḍakādiggahaṇañcettha nidassanamattaṃ sabbāyapi ahetukapaṭisandhiyā vipākantarāyikabhāvato . Ariyūpavādā upavādantarāyikā nāma. Te pana yāva ariye na khamāpenti, tāvadeva, na tato paraṃ. Sañcicca āpannā sattāpattikkhandhā āṇāvītikkamantarāyikā nāma. Tepi yāva bhikkhubhāvaṃ vā paṭijānāti, na vuṭṭhāti vā na deseti vā, tāvadeva, na tato paraṃ.

    ১৬৯৯-৭০০.

    1699-700.

    ‘‘অনন্তরাযিকা এতে।

    ‘‘Anantarāyikā ete;

    যথা হোন্তি তথা অহং।

    Yathā honti tathā ahaṃ;

    দেসিতং মুনিনা ধম্মং।

    Desitaṃ muninā dhammaṃ;

    আজানামীতি যো ৰদে’’তি॥ –

    Ājānāmīti yo vade’’ti. –

    এৰং দুতিযগাথা ৰত্তব্বা। তথা অৰুত্তে ‘‘তিক্খত্তু’’ন্তিআদিগাথা পঠমগাথায সদ্ধিং ঘটনা এৰ ন সিযা। তস্মা এত্থাযং গাথা পরিহীনাতি ৰিঞ্ঞাযতি।

    Evaṃ dutiyagāthā vattabbā. Tathā avutte ‘‘tikkhattu’’ntiādigāthā paṭhamagāthāya saddhiṃ ghaṭanā eva na siyā. Tasmā etthāyaṃ gāthā parihīnāti viññāyati.

    এতেতি ‘‘অন্তরাযিকা’’তি ভগৰতা পকাসিতা পঞ্চ ধম্মা ‘‘যথা অনন্তরাযিকা হোন্তি, তথা অহং মুনিনা দেসিতং ধম্মং আজানামী’’তি যো ভিক্খু ৰদেয্য, সো পন ভিক্খু তিক্খত্তুং ৰত্তব্বোতি সম্বন্ধো। কেহি কথং ৰত্তব্বোতি আহ ‘‘যে পস্সন্তী’’তিআদি। যে তথাৰাদিতং ভিক্খুং পস্সন্তি, ‘‘অসুকো আযস্মা এৰংৰাদী’’তি পরতো সুণন্তি চ, তেহি। সো পন ভিক্খু ‘‘মা আযস্মা এৰং অৰচা’’তি তিক্খত্তুং ৰত্তব্বোতি যোজনা।

    Eteti ‘‘antarāyikā’’ti bhagavatā pakāsitā pañca dhammā ‘‘yathā anantarāyikā honti, tathā ahaṃ muninā desitaṃ dhammaṃ ājānāmī’’ti yo bhikkhu vadeyya, so pana bhikkhu tikkhattuṃ vattabboti sambandho. Kehi kathaṃ vattabboti āha ‘‘ye passantī’’tiādi. Ye tathāvāditaṃ bhikkhuṃ passanti, ‘‘asuko āyasmā evaṃvādī’’ti parato suṇanti ca, tehi. So pana bhikkhu ‘‘mā āyasmā evaṃ avacā’’ti tikkhattuṃ vattabboti yojanā.

    ১৭০১. অৰদন্তস্সাতি তং দিস্ৰা ৰা সুত্ৰা ৰা যথাৰুত্তনযেন অৰদন্তস্স। দুক্কটন্তি ঞাতদুক্কটং। তং দুলদ্ধিং। অনিস্সজতোতি ভিক্খূহি এৰং ৰুত্তেপি অনিস্সজন্তস্স। তথা দুক্কটন্তি অতিদিসতি।

    1701.Avadantassāti taṃ disvā vā sutvā vā yathāvuttanayena avadantassa. Dukkaṭanti ñātadukkaṭaṃ. Taṃ duladdhiṃ. Anissajatoti bhikkhūhi evaṃ vuttepi anissajantassa. Tathā dukkaṭanti atidisati.

    ১৭০২. কম্মৰাচাযাতি ততিযায কম্মৰাচায। ওসানেতি পরিযোসানে, য্যকারে পত্তেতি অধিপ্পাযো। তিকপাচিত্তিযং ৰুত্তন্তি ‘‘ধম্মকম্মে ধম্মকম্মসঞ্ঞী ন পটিনিস্সজ্জতি, আপত্তি পাচিত্তিযস্স। ধম্মকম্মে ৰেমতিকো ন পটিনিস্সজ্জতি, আপত্তি পাচিত্তিযস্স। ধম্মকম্মে অধম্মকম্মসঞ্ঞী ন পটিনিস্সজ্জতি, আপত্তি পাচিত্তিযস্সা’’তি (পাচি॰ ৪২১) তিকপাচিত্তিযং ৰুত্তং। অধম্মে তিকদুক্কটং ৰুত্তন্তি অধম্মকম্মে ধম্মকম্মসঞ্ঞিৰেমতিকঅধম্মকম্মসঞ্ঞীনং ৰসেন তিকদুক্কটং ৰুত্তং।

    1702.Kammavācāyāti tatiyāya kammavācāya. Osāneti pariyosāne, yyakāre patteti adhippāyo. Tikapācittiyaṃ vuttanti ‘‘dhammakamme dhammakammasaññī na paṭinissajjati, āpatti pācittiyassa. Dhammakamme vematiko na paṭinissajjati, āpatti pācittiyassa. Dhammakamme adhammakammasaññī na paṭinissajjati, āpatti pācittiyassā’’ti (pāci. 421) tikapācittiyaṃ vuttaṃ. Adhamme tikadukkaṭaṃ vuttanti adhammakamme dhammakammasaññivematikaadhammakammasaññīnaṃ vasena tikadukkaṭaṃ vuttaṃ.

    ১৭০৩. ‘‘অনাপত্তি অকতকম্মস্সা’’তি পদচ্ছেদো। কম্মং নাম সমনুভাসনকম্মং। যথাহ ‘‘অনাপত্তি অসমনুভাসন্তস্সা’’তি (পাচি॰ ৪২২)।

    1703. ‘‘Anāpatti akatakammassā’’ti padacchedo. Kammaṃ nāma samanubhāsanakammaṃ. Yathāha ‘‘anāpatti asamanubhāsantassā’’ti (pāci. 422).

    অরিট্ঠকথাৰণ্ণনা।

    Ariṭṭhakathāvaṇṇanā.

    ১৭০৪. ঞত্ৰাতি অনোসারিতভাৰং সযমেৰ ৰা পরতো ৰা তস্স ৰা সন্তিকা ঞত্ৰা। অকতানুধম্মেনাতি অকতো ওসারণসঙ্খাতো অনুধম্মো যস্স সো অকতানুধম্মো, তেন, সহযোগে করণৰচনং। তথাৰাদিকভিক্খুনাতি ‘‘তথাহং ভগৰতা ধম্মং দেসিতং আজানামী’’তিআদিং ৰদন্তেন ভিক্খুনা। ‘‘অকতানুধম্মেনা’’তি ইমিনা সমানাধিকরণং। সংৰসেয্যাতি উপোসথাদিকং সঙ্ঘকম্মং করেয্য। ভুঞ্জেয্য চাতি আমিসসম্ভোগং ৰা ধম্মসম্ভোগং ৰা করেয্য। সহ সেয্য ৰাতি নানূপচারেপি একচ্ছন্নে নিপজ্জেয্য।

    1704.Ñatvāti anosāritabhāvaṃ sayameva vā parato vā tassa vā santikā ñatvā. Akatānudhammenāti akato osāraṇasaṅkhāto anudhammo yassa so akatānudhammo, tena, sahayoge karaṇavacanaṃ. Tathāvādikabhikkhunāti ‘‘tathāhaṃ bhagavatā dhammaṃ desitaṃ ājānāmī’’tiādiṃ vadantena bhikkhunā. ‘‘Akatānudhammenā’’ti iminā samānādhikaraṇaṃ. Saṃvaseyyāti uposathādikaṃ saṅghakammaṃ kareyya. Bhuñjeyya cāti āmisasambhogaṃ vā dhammasambhogaṃ vā kareyya. Saha seyya vāti nānūpacārepi ekacchanne nipajjeyya.

    ১৭০৫. ইদানি যথাৰুত্তপাচিত্তিযস্স খেত্তনিযমং দস্সেতুমাহ ‘‘উপোসথাদিকং কম্ম’’ন্তিআদি। আদি-সদ্দেন পৰারণং গহিতং। যথাহ ‘‘উপোসথং ৰা পৰারণং ৰা’’তি (পাচি॰ ৪২৫)। তেন সহাতি উক্খিত্তকেন সহ। ‘‘কম্মস্স পরিযোসানে’’তি ইদং সংৰাসেন আপত্তিখেত্তনিদস্সনং।

    1705. Idāni yathāvuttapācittiyassa khettaniyamaṃ dassetumāha ‘‘uposathādikaṃ kamma’’ntiādi. Ādi-saddena pavāraṇaṃ gahitaṃ. Yathāha ‘‘uposathaṃ vā pavāraṇaṃ vā’’ti (pāci. 425). Tena sahāti ukkhittakena saha. ‘‘Kammassa pariyosāne’’ti idaṃ saṃvāsena āpattikhettanidassanaṃ.

    ১৭০৬. একেনেৰ পযোগেন বহুং যামকালিকাদিআমিসং গণ্হতো একং পাচিত্তিযং। তথা একেনেৰ পযোগেন বহুং আমিসং দদতোপি একং পাচিত্তিযং। বহূসু পযোগেসু বহূনি পাচিত্তিযানীতি যোজনা। ইমিনা চ আমিসসম্ভোগেন তুল্যফলং ধম্মসম্ভোগম্পি সহচরিযেন আহাতি ৰেদিতব্বং। তত্থ পন পদাদীহি উদ্দিসন্তস্স ৰা উদ্দিসাপেন্তস্স ৰা পদসোধম্মে ৰুত্তনযেন আপত্তি ৰেদিতব্বা।

    1706. Ekeneva payogena bahuṃ yāmakālikādiāmisaṃ gaṇhato ekaṃ pācittiyaṃ. Tathā ekeneva payogena bahuṃ āmisaṃ dadatopi ekaṃ pācittiyaṃ. Bahūsu payogesu bahūni pācittiyānīti yojanā. Iminā ca āmisasambhogena tulyaphalaṃ dhammasambhogampi sahacariyena āhāti veditabbaṃ. Tattha pana padādīhi uddisantassa vā uddisāpentassa vā padasodhamme vuttanayena āpatti veditabbā.

    ১৭০৭. ইতরোতি পকতত্তো। ইতরস্মিন্তি উক্খিত্তকে। পরোতি পকতত্তো। উভোপি ৰাতি পকতত্তউক্খিত্তা দ্ৰেপি ৰা। ‘‘একত্থ একতো নিপজ্জন্তী’’তি সেসো। ইমেসু তীসুপি ঠানেসু ‘‘পাচিত্তী’’তি পকরণতো লব্ভতি।

    1707.Itaroti pakatatto. Itarasminti ukkhittake. Paroti pakatatto. Ubhopi vāti pakatattaukkhittā dvepi vā. ‘‘Ekattha ekato nipajjantī’’ti seso. Imesu tīsupi ṭhānesu ‘‘pācittī’’ti pakaraṇato labbhati.

    ১৭০৮. উট্ঠহিত্ৰা পুনপ্পুনং নিপজ্জন্তস্স নিপজ্জনপযোগানং ৰসেন আপত্তিযো সিযুন্তি অজ্ঝাহারযোজনা কাতব্বা। ‘‘উক্খিত্তকে নিপন্নস্মি’’ন্তিআদিনা ৰুত্তাপত্তিৰিনিচ্ছযো কত্থ হোতীতি আহ ‘‘একনানূপচারেসু, একচ্ছন্নে ৰিনিচ্ছযো’’তি। নানূপচারেসূতি এত্থ পি-সদ্দো চ ‘‘ৰিনিচ্ছযো’’তি এত্থ অযন্তি চ যোজেতব্বো। একো উপচারো অস্সাতি একূপচারং, নানা উপচারো অস্সাতি নানূপচারং, একূপচারঞ্চ নানূপচারঞ্চ একনানূপচারানি একদেসসরূপেকসেসেন, তেসু। একতো ছন্নানি একচ্ছন্নানি, তেসু একচ্ছন্নেসূতি ৰত্তব্বে ৰণ্ণলোপেন ৰা ৰচনৰিপল্লাসেন ৰা ‘‘একচ্ছন্নে’’তি ৰুত্তং। একনানূপচারেসুপি সেনাসনেসু একচ্ছন্নেসু অযং যথাৰুত্তআপত্তিৰিনিচ্ছযো দট্ঠব্বোতি অত্থো।

    1708. Uṭṭhahitvā punappunaṃ nipajjantassa nipajjanapayogānaṃ vasena āpattiyo siyunti ajjhāhārayojanā kātabbā. ‘‘Ukkhittake nipannasmi’’ntiādinā vuttāpattivinicchayo kattha hotīti āha ‘‘ekanānūpacāresu, ekacchanne vinicchayo’’ti. Nānūpacāresūti ettha pi-saddo ca ‘‘vinicchayo’’ti ettha ayanti ca yojetabbo. Eko upacāro assāti ekūpacāraṃ, nānā upacāro assāti nānūpacāraṃ, ekūpacārañca nānūpacārañca ekanānūpacārāni ekadesasarūpekasesena, tesu. Ekato channāni ekacchannāni, tesu ekacchannesūti vattabbe vaṇṇalopena vā vacanavipallāsena vā ‘‘ekacchanne’’ti vuttaṃ. Ekanānūpacāresupi senāsanesu ekacchannesu ayaṃ yathāvuttaāpattivinicchayo daṭṭhabboti attho.

    ১৭০৯. উভযত্থাপীতি উক্খিত্তানুক্খিত্তেসু দ্ৰীসুপি।

    1709.Ubhayatthāpīti ukkhittānukkhittesu dvīsupi.

    ১৭১০. ‘‘সঞ্ঞিস্স ওসারিতোতি চা’’তি পদচ্ছেদো।

    1710. ‘‘Saññissa osāritoti cā’’ti padacchedo.

    উক্খিত্তকথাৰণ্ণনা।

    Ukkhittakathāvaṇṇanā.

    ১৭১২. তথা ৰিনাসিতন্তি ‘‘অজ্জতগ্গে তে আৰুসো সমণুদ্দেস ন চেৰ সো ভগৰা সত্থা অপদিসিতব্বো, যম্পি চঞ্ঞে সমণুদ্দেসা লভন্তি ভিক্খূহি সদ্ধিং দিরত্ততিরত্তং সহসেয্যং, সাপি তে নত্থি, চর পিরে ৰিনস্সা’’তি (পাচি॰ ৪২৯) ৰুত্তনযেন নাসিতং। ‘‘তথা নাসিতং সমণুদ্দেস’’ন্তি (পাচি॰ ৪২৮) ৰচনতো ‘‘সমণুদ্দেস’’ন্তি সেসো। জানন্তি ৰুত্তনযেন ‘‘নাসিতো অয’’ন্তি জানন্তো। উপলাপেয্যাতি ‘‘উপলাপেয্য ৰাতি তস্স পত্তং ৰা চীৰরং ৰা উদ্দেসং ৰা পরিপুচ্ছং ৰা দস্সামী’’তি (পাচি॰ ৪৩০) পদভাজনে আগতনযেন সঙ্গণ্হেয্য। তেনাতি নাসিতেন। উপট্ঠাপেয্য ৰাতি তেন দিয্যমানানি চুণ্ণমত্তিকাদীনি সাদিযন্তো তেন অত্তনো উপট্ঠানং কারাপেয্য ৰা। ‘‘তেনা’’তি ইদং সহত্থে করণৰসেন ‘‘সম্ভুঞ্জেয্যা’’তিআদীহি চ যোজেতব্বং। ৰাতি এত্থ গাথাবন্ধৰসেন রস্সো। সম্ভোগসহসেয্যা অনন্তরসিক্খাপদে ৰুত্তনযা এৰ। তস্মা আপত্তিপরিচ্ছেদোপেত্থ তস্মিং ৰুত্তনযেনেৰ ৰেদিতব্বো।

    1712.Tathā vināsitanti ‘‘ajjatagge te āvuso samaṇuddesa na ceva so bhagavā satthā apadisitabbo, yampi caññe samaṇuddesā labhanti bhikkhūhi saddhiṃ dirattatirattaṃ sahaseyyaṃ, sāpi te natthi, cara pire vinassā’’ti (pāci. 429) vuttanayena nāsitaṃ. ‘‘Tathā nāsitaṃ samaṇuddesa’’nti (pāci. 428) vacanato ‘‘samaṇuddesa’’nti seso. Jānanti vuttanayena ‘‘nāsito aya’’nti jānanto. Upalāpeyyāti ‘‘upalāpeyya vāti tassa pattaṃ vā cīvaraṃ vā uddesaṃ vā paripucchaṃ vā dassāmī’’ti (pāci. 430) padabhājane āgatanayena saṅgaṇheyya. Tenāti nāsitena. Upaṭṭhāpeyya vāti tena diyyamānāni cuṇṇamattikādīni sādiyanto tena attano upaṭṭhānaṃ kārāpeyya vā. ‘‘Tenā’’ti idaṃ sahatthe karaṇavasena ‘‘sambhuñjeyyā’’tiādīhi ca yojetabbaṃ. Vāti ettha gāthābandhavasena rasso. Sambhogasahaseyyā anantarasikkhāpade vuttanayā eva. Tasmā āpattiparicchedopettha tasmiṃ vuttanayeneva veditabbo.

    ১৭১৩. অত্থুদ্ধারৰসেন অট্ঠকথাযং (পাচি॰ অট্ঠ॰ ৪২৮) ৰুত্তা তিস্সো নাসনা দস্সেতুমাহ ‘‘সংৰাসেন…পে॰… তিস্সো’’তি। তত্থ তীসু কতমা অধিপ্পেতাতি আহ ‘‘এত্থা’’তিআদি। দণ্ডকম্মেন নাসনা এত্থ অধিপ্পেতাতি যোজনা। এতাসং ৰিভাগো চ ‘‘তত্থ আপত্তিযা অদস্সনাদীসু উক্খেপনা সংৰাসনাসনা নাম। ‘দূসকো নাসেতব্বো, মেত্তিযং ভিক্খুনিং নাসেথা’তি অযং লিঙ্গনাসনা নাম। ‘অজ্জতগ্গে তে আৰুসো সমণুদ্দেস ন চেৰ সো ভগৰা সত্থা অপদিসিতব্বো’তি অযং দণ্ডকম্মনাসনা নামা’’তি (পাচি॰ অট্ঠ॰ ৪২৮) অট্ঠকথায ৰুত্তো।

    1713. Atthuddhāravasena aṭṭhakathāyaṃ (pāci. aṭṭha. 428) vuttā tisso nāsanā dassetumāha ‘‘saṃvāsena…pe… tisso’’ti. Tattha tīsu katamā adhippetāti āha ‘‘etthā’’tiādi. Daṇḍakammena nāsanā ettha adhippetāti yojanā. Etāsaṃ vibhāgo ca ‘‘tattha āpattiyā adassanādīsu ukkhepanā saṃvāsanāsanā nāma. ‘Dūsako nāsetabbo, mettiyaṃ bhikkhuniṃ nāsethā’ti ayaṃ liṅganāsanā nāma. ‘Ajjatagge te āvuso samaṇuddesa na ceva so bhagavā satthā apadisitabbo’ti ayaṃ daṇḍakammanāsanā nāmā’’ti (pāci. aṭṭha. 428) aṭṭhakathāya vutto.

    ১৭১৫. ‘‘ৰুত্তা সমনুভাসনে’’তি (ৰি॰ ৰি॰ ১৭০৩) তত্থ ৰুত্তত্তা আহ ‘‘অরিট্ঠেন সমা মতা’’তি।

    1715. ‘‘Vuttā samanubhāsane’’ti (vi. vi. 1703) tattha vuttattā āha ‘‘ariṭṭhena samā matā’’ti.

    কণ্টককথাৰণ্ণনা।

    Kaṇṭakakathāvaṇṇanā.

    সপ্পাণকৰগ্গো সত্তমো।

    Sappāṇakavaggo sattamo.

    ১৭১৬-৭. যো ভিক্খু সিক্খাপদং ৰীতিক্কমন্তো তং ৰীতিক্কমং যে পস্সন্তি, সুণন্তি চ, তেহি ভিক্খূহি সিক্খাপদেন ৰুচ্চমানো ‘‘মাৰুসো এৰং অকাসি, ন কপ্পতি এতং ভিক্খুস্সা’’তি সিক্খাপদে ৰুত্তনযেন ৰুচ্চমানো ‘‘এতস্মিং সিক্খাপদে যেন মং তুম্হে ৰদেথ, এতস্মিং সিক্খাপদত্থে যাৰ অঞ্ঞং ৰিযত্তং বহুস্সুতং পকতঞ্ঞুং ৰিনযধরং ন পুচ্ছামি, তাৰ অহং ন সিক্খিস্সামী’’তি ভণতি, তস্স এৰং ভণন্তস্স পাচিত্তিযং সিযাতি সাধিপ্পাযযোজনা।

    1716-7.Yo bhikkhu sikkhāpadaṃ vītikkamanto taṃ vītikkamaṃ ye passanti, suṇanti ca, tehi bhikkhūhi sikkhāpadena vuccamāno ‘‘māvuso evaṃ akāsi, na kappati etaṃ bhikkhussā’’ti sikkhāpade vuttanayena vuccamāno ‘‘etasmiṃ sikkhāpade yena maṃ tumhe vadetha, etasmiṃ sikkhāpadatthe yāva aññaṃ viyattaṃ bahussutaṃ pakataññuṃ vinayadharaṃ na pucchāmi, tāva ahaṃ na sikkhissāmī’’ti bhaṇati, tassa evaṃ bhaṇantassa pācittiyaṃ siyāti sādhippāyayojanā.

    ১৭১৮-৯. অনুপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন অনুপসম্পন্নে সত্থুনা তিকদুক্কটং দীপিতন্তি যোজনা, ইমিনা চ উপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন উপসম্পন্নে তিকপাচিত্তিযং দীপিতং হোতি। অপঞ্ঞত্তেন ওৰদনপ্পকারং দস্সেতুমাহ ‘‘ন সল্লেখাযিদং হোতী’’তি। উভোহিপি উপসম্পন্নানুপসম্পন্নেহি । ‘‘ইদং সল্লেখায ন হোতী’’তি অপঞ্ঞত্তেন ৰুচ্চমানস্স ‘‘ন তাৰাহ’’ন্তিআদীনি ৰদতো তস্স ভিক্খুনো দুক্কটং হোতীতি যোজনা। ‘‘ন দোসো উম্মত্তকাদীন’’ন্তি পদচ্ছেদো।

    1718-9. Anupasampanne upasampannasaññivematikaanupasampannasaññīnaṃ vasena anupasampanne satthunā tikadukkaṭaṃ dīpitanti yojanā, iminā ca upasampanne upasampannasaññivematikaanupasampannasaññīnaṃ vasena upasampanne tikapācittiyaṃ dīpitaṃ hoti. Apaññattena ovadanappakāraṃ dassetumāha ‘‘na sallekhāyidaṃ hotī’’ti. Ubhohipi upasampannānupasampannehi . ‘‘Idaṃ sallekhāya na hotī’’ti apaññattena vuccamānassa ‘‘na tāvāha’’ntiādīni vadato tassa bhikkhuno dukkaṭaṃ hotīti yojanā. ‘‘Na doso ummattakādīna’’nti padacchedo.

    সহধম্মিককথাৰণ্ণনা।

    Sahadhammikakathāvaṇṇanā.

    ১৭২০. ‘‘যো পন ভিক্খু পাতিমোক্খে উদ্দিস্সমানে এৰং ৰদেয্যা’’তিআদিসিক্খাপদপাঠতো (পাচি॰ ৪৩৯) উদ্দিট্ঠেহীতি এত্থ ‘‘খুদ্দানুখুদ্দকেহি সিক্খাপদেহী’’তি সেসো। পারাজিকং ঠপেত্ৰা অৰসেসা উপাদাযুপাদায খুদ্দানুখুদ্দকাতি নিদ্দিট্ঠা। এত্থ কিন্তি পটিক্খেপে, এতেহি কিং, পযোজনং নত্থীতি ৰুত্তং হোতি। এতেহীতি সমীপত্থে ৰচনসামঞ্ঞেন ‘‘ইমেহী’’তি এতস্স পরিযাযো। ‘‘কিং পনিমেহী’’তি (পাচি॰ ৪৩৯) সিক্খাপদপাঠে পটিক্খেপস্স কারণং দস্সেতি ‘‘কুক্কুচ্চাদিনিদানতো’’তি। এত্থ আদি-সদ্দেন ৰিহেসাৰিলেখা গহিতা। এত্থ কুক্কুচ্চং নাম ‘‘কপ্পতি নু খো, ন কপ্পতি নু খো’’তি কুক্কুচ্চকরণং। ৰিহেসা নাম ৰিপ্পটিসারো। ৰিলেখা নাম ৰিচিকিচ্ছাসঙ্খাতা মনোৰিলেখতা মনোৰিলেখা, ইমেহি সকলেহি পদেহি সিক্খাপদৰিৰণ্ণকপ্পকারো দস্সিতো। ‘‘ইতি সিক্খাপদৰিৰণ্ণনে’’তি ইতি-সদ্দো অজ্ঝাহরিত্ৰা যোজেতব্বো। ৰিৰণ্ণনেতি নিমিত্তত্থে ভুম্মং।

    1720. ‘‘Yo pana bhikkhu pātimokkhe uddissamāne evaṃ vadeyyā’’tiādisikkhāpadapāṭhato (pāci. 439) uddiṭṭhehīti ettha ‘‘khuddānukhuddakehi sikkhāpadehī’’ti seso. Pārājikaṃ ṭhapetvā avasesā upādāyupādāya khuddānukhuddakāti niddiṭṭhā. Ettha kinti paṭikkhepe, etehi kiṃ, payojanaṃ natthīti vuttaṃ hoti. Etehīti samīpatthe vacanasāmaññena ‘‘imehī’’ti etassa pariyāyo. ‘‘Kiṃ panimehī’’ti (pāci. 439) sikkhāpadapāṭhe paṭikkhepassa kāraṇaṃ dasseti ‘‘kukkuccādinidānato’’ti. Ettha ādi-saddena vihesāvilekhā gahitā. Ettha kukkuccaṃ nāma ‘‘kappati nu kho, na kappati nu kho’’ti kukkuccakaraṇaṃ. Vihesā nāma vippaṭisāro. Vilekhā nāma vicikicchāsaṅkhātā manovilekhatā manovilekhā, imehi sakalehi padehi sikkhāpadavivaṇṇakappakāro dassito. ‘‘Iti sikkhāpadavivaṇṇane’’ti iti-saddo ajjhāharitvā yojetabbo. Vivaṇṇaneti nimittatthe bhummaṃ.

    কুক্কুচ্চাদিনিদানতো এতেহি খুদ্দানুখুদ্দকেহি সিক্খাপদেহি উদ্দিট্ঠেহি কিং ইতি সিক্খাপদৰিৰণ্ণনে পাচিত্তিযাপত্তি হোতীতি যোজনা।

    Kukkuccādinidānato etehi khuddānukhuddakehi sikkhāpadehi uddiṭṭhehi kiṃ iti sikkhāpadavivaṇṇane pācittiyāpatti hotīti yojanā.

    ১৭২১. তিকপাচিত্তিযং ৰুত্তন্তি ‘‘উপসম্পন্নে উপসম্পন্নসঞ্ঞী ৰিনযং ৰিৰণ্ণেতি, আপত্তি পাচিত্তিযস্স। উপসম্পন্নে ৰেমতিকো…পে॰… অনুপসম্পন্নসঞ্ঞী…পে॰… পাচিত্তিযস্সা’’তি (পাচি॰ ৪৪১) তীণি পাচিত্তিযানি ৰুত্তানি। তং ৰিনযং সচে পন অনুপসম্পন্নস্স সন্তিকে ৰিৰণ্ণেতি, তিকদুক্কটন্তি যোজনা।

    1721.Tikapācittiyaṃ vuttanti ‘‘upasampanne upasampannasaññī vinayaṃ vivaṇṇeti, āpatti pācittiyassa. Upasampanne vematiko…pe… anupasampannasaññī…pe… pācittiyassā’’ti (pāci. 441) tīṇi pācittiyāni vuttāni. Taṃ vinayaṃ sace pana anupasampannassa santike vivaṇṇeti, tikadukkaṭanti yojanā.

    ১৭২২-৪. উভিন্নম্পীতি উপসম্পন্নানং, অনুপসম্পন্নানং উভিন্নম্পি, ‘‘সন্তিকে’’তি সেসো। অঞ্ঞধম্মৰিৰণ্ণনেতি ৰিনযতো অঞ্ঞেসং সুত্তাভিধম্মানং ৰিৰণ্ণনে।

    1722-4.Ubhinnampīti upasampannānaṃ, anupasampannānaṃ ubhinnampi, ‘‘santike’’ti seso. Aññadhammavivaṇṇaneti vinayato aññesaṃ suttābhidhammānaṃ vivaṇṇane.

    অনাপত্তিৰিসযং দস্সেতুমাহ ‘‘নৰিৰণ্ণেতুকামস্সা’’তিআদি। নৰিৰণ্ণেতুকামস্স ‘‘হন্দ সুত্তন্তং পরিযাপুণ, পচ্ছাপি ৰিনযং পরিযাপুণিস্সসি’’ ইতি এৰং ৰদন্তস্স অনাপত্তীতি যোজনা। সদিসা এৰ সাদিসা।

    Anāpattivisayaṃ dassetumāha ‘‘navivaṇṇetukāmassā’’tiādi. Navivaṇṇetukāmassa ‘‘handa suttantaṃ pariyāpuṇa, pacchāpi vinayaṃ pariyāpuṇissasi’’ iti evaṃ vadantassa anāpattīti yojanā. Sadisā eva sādisā.

    ৰিলেখনকথাৰণ্ণনা।

    Vilekhanakathāvaṇṇanā.

    ১৭২৫. মোহনকথাযং তাৰ –

    1725. Mohanakathāyaṃ tāva –

    ‘‘অন্ৰড্ঢমাসং যো ভিক্খু।

    ‘‘Anvaḍḍhamāsaṃ yo bhikkhu;

    পাতিমোক্খে অসেসতো।

    Pātimokkhe asesato;

    উদ্দিস্সমানে অঞ্ঞাণ-

    Uddissamāne aññāṇa-

    তায পুচ্ছতি অত্তনো’’তি॥ –

    Tāya pucchati attano’’ti. –

    পঠমগাথায ভৰিতব্বং। এৰঞ্হি সতি ‘‘অঞ্ঞাণেনা’’তিআদিগাথা পরিপুণ্ণসম্বন্ধা সিযাতি ৰিঞ্ঞাযতি।

    Paṭhamagāthāya bhavitabbaṃ. Evañhi sati ‘‘aññāṇenā’’tiādigāthā paripuṇṇasambandhā siyāti viññāyati.

    অঞ্ঞাণেনাতি এত্থ ৰা ‘‘আপন্নত্তা’’তি সেসো। আপত্তিমোক্খোতি আপত্তিযা মোক্খো। অঞ্ঞাণেন আপন্নত্তা আপত্তিমোক্খো নেৰ ৰিজ্জতীতি যোজনা। কিং কাতব্বন্তি আহ ‘‘কারেতব্বো’’তিআদি। যথা ধম্মো ঠিতো, তথা ভিক্খু কারেতব্বোতি সম্বন্ধো। ধম্ম-সদ্দো পাল়িৰাচকো, পাল়িযং যথা ৰুত্তং, তথা কারেতব্বোতি অত্থো, দেসনাগামিনী আপত্তি চে, দেসাপেতব্বো, ৰুট্ঠানগামিনী চে, ৰুট্ঠাপেতব্বোতি ৰুত্তং হোতি। যথাহ ‘‘যথাধম্মো কারেতব্বো’’তি (পাচি॰ ৪৪৪)। অঞ্ঞাণেন আপন্নত্তা তস্স আপত্তিযা মোক্খো নত্থি। যথা পন ধম্মো চ ৰিনযো চ ঠিতো, তথা ভিক্খু কারেতব্বো, দেসনাগামিনিং চে আপন্নো হোতি, দেসাপেতব্বো, ৰুট্ঠানগামিনিং চে, ৰুট্ঠাপেতব্বোতি অত্থো।

    Aññāṇenāti ettha vā ‘‘āpannattā’’ti seso. Āpattimokkhoti āpattiyā mokkho. Aññāṇena āpannattā āpattimokkho neva vijjatīti yojanā. Kiṃ kātabbanti āha ‘‘kāretabbo’’tiādi. Yathā dhammo ṭhito, tathā bhikkhu kāretabboti sambandho. Dhamma-saddo pāḷivācako, pāḷiyaṃ yathā vuttaṃ, tathā kāretabboti attho, desanāgāminī āpatti ce, desāpetabbo, vuṭṭhānagāminī ce, vuṭṭhāpetabboti vuttaṃ hoti. Yathāha ‘‘yathādhammo kāretabbo’’ti (pāci. 444). Aññāṇena āpannattā tassa āpattiyā mokkho natthi. Yathā pana dhammo ca vinayo ca ṭhito, tathā bhikkhu kāretabbo, desanāgāminiṃ ce āpanno hoti, desāpetabbo, vuṭṭhānagāminiṃ ce, vuṭṭhāpetabboti attho.

    ১৭২৬. উত্তরিন্তি যথাধম্মকরণতো উত্তরিং। দুতিযেনেৰাতি ঞত্তিদুতিযেনেৰ। নিন্দিত্ৰাতি ‘‘তস্স তে আৰুসো অলাভা’’তিআদিনা গরহিত্ৰা।

    1726.Uttarinti yathādhammakaraṇato uttariṃ. Dutiyenevāti ñattidutiyeneva. Ninditvāti ‘‘tassa te āvuso alābhā’’tiādinā garahitvā.

    ১৭২৭. এৰং আরোপিতে মোহেতি যথাধম্মকরণতো উপরি যথাৰুত্তনযেন তং পুগ্গলং গরহিত্ৰা ঞত্তিদুতিযায কম্মৰাচায তস্স এৰং মোহে আরোপিতে। পুন যদি মোহেতীতি যোজনা। তস্মিং মোহনকে পুগ্গলে পাচিত্তি ৰুত্তাতি যোজনা।

    1727.Evaṃāropite moheti yathādhammakaraṇato upari yathāvuttanayena taṃ puggalaṃ garahitvā ñattidutiyāya kammavācāya tassa evaṃ mohe āropite. Puna yadi mohetīti yojanā. Tasmiṃ mohanake puggale pācitti vuttāti yojanā.

    ১৭২৮. দীপিতং তিকদুক্কটন্তি ‘‘অধম্মকম্মে ধম্মকম্মসঞ্ঞী মোহেতি, ৰেমতিকো, অধম্মকম্মসঞ্ঞী মোহেতি, আপত্তি দুক্কটস্সা’’তি (পাচি॰ ৪৪৭) তিকদুক্কটং দস্সিতং। এতস্স ৰিপরিযাযতো তিকপাচিত্তিযং ৰেদিতব্বং। যথাহ ‘‘ধম্মকম্মে ধম্মকম্মসঞ্ঞী মোহেতি, ৰেমতিকো, অধম্মকম্মসঞ্ঞী মোহেতি, আপত্তি পাচিত্তিযস্সা’’তি (পাচি॰ ৪৪৭)। এত্থ কম্মন্তি মোহারোপনকম্মং অধিপ্পেতং। যথাহ ‘‘ধম্মকম্মেতিআদীসু মোহারোপনকম্মং অধিপ্পেত’’ন্তি (পাচি॰ অট্ঠ॰ ৪৪৭)।

    1728.Dīpitaṃ tikadukkaṭanti ‘‘adhammakamme dhammakammasaññī moheti, vematiko, adhammakammasaññī moheti, āpatti dukkaṭassā’’ti (pāci. 447) tikadukkaṭaṃ dassitaṃ. Etassa vipariyāyato tikapācittiyaṃ veditabbaṃ. Yathāha ‘‘dhammakamme dhammakammasaññī moheti, vematiko, adhammakammasaññī moheti, āpatti pācittiyassā’’ti (pāci. 447). Ettha kammanti mohāropanakammaṃ adhippetaṃ. Yathāha ‘‘dhammakammetiādīsu mohāropanakammaṃ adhippeta’’nti (pāci. aṭṭha. 447).

    ১৭২৯-৩০. ‘‘ন চ মোহেতুকামস্সা’’তিআদীহি ‘‘অনাপত্তীতি ৰিঞ্ঞেয্য’’ন্তি ইদং পচ্চেকং যোজেতব্বং। ‘‘ৰিত্থারেন অসুতস্সা’’তি পদচ্ছেদো। এত্থ ‘‘পাতিমোক্খ’’ন্তি কম্মপদং অপেক্খিতব্বং। ৰিত্থারেন ঊনকদ্ৰত্তিক্খত্তুং সুতস্স চাতি যোজনা। তথাতি ইমিনা ‘‘অনাপত্তীতি ৰিঞ্ঞেয্য’’ন্তি ইদং পচ্চামসতি।

    1729-30.‘‘Na ca mohetukāmassā’’tiādīhi ‘‘anāpattīti viññeyya’’nti idaṃ paccekaṃ yojetabbaṃ. ‘‘Vitthārena asutassā’’ti padacchedo. Ettha ‘‘pātimokkha’’nti kammapadaṃ apekkhitabbaṃ. Vitthārena ūnakadvattikkhattuṃ sutassa cāti yojanā. Tathāti iminā ‘‘anāpattīti viññeyya’’nti idaṃ paccāmasati.

    মোহনকথাৰণ্ণনা।

    Mohanakathāvaṇṇanā.

    ১৭৩১-২. কুদ্ধোতি কুপিতো। পহারং দেতীতি কাযেন ৰা কাযপটিবদ্ধেন ৰা নিস্সগ্গিযেন ৰা অন্তমসো উপ্পলপত্তেনাপি পহারং দেতি। যথাহ ‘‘পহারং দদেয্যাতি কাযেন ৰা কাযপটিবদ্ধেন ৰা নিস্সগ্গিযেন ৰা অন্তমসো উপ্পলপত্তেনাপি পহারং দেতী’’তি (পাচি॰ ৪৫১)। এত্থ ‘‘অঞ্ঞস্স ভিক্খুস্সা’’তি সেসো। তস্সাতি অপেক্খিত্ৰা ‘‘যো’’তি লব্ভতি।

    1731-2.Kuddhoti kupito. Pahāraṃ detīti kāyena vā kāyapaṭibaddhena vā nissaggiyena vā antamaso uppalapattenāpi pahāraṃ deti. Yathāha ‘‘pahāraṃ dadeyyāti kāyena vā kāyapaṭibaddhena vā nissaggiyena vā antamaso uppalapattenāpi pahāraṃ detī’’ti (pāci. 451). Ettha ‘‘aññassa bhikkhussā’’ti seso. Tassāti apekkhitvā ‘‘yo’’ti labbhati.

    অট্ঠকথাগতং ৰিনিচ্ছযং দস্সেতুমাহ ‘‘সম্পহরিতুকামেনা’’তিআদি, ইমিনা মরণাধিপ্পাযেন পহটে পারাজিকন্তি ৰুত্তং হোতি।

    Aṭṭhakathāgataṃ vinicchayaṃ dassetumāha ‘‘sampaharitukāmenā’’tiādi, iminā maraṇādhippāyena pahaṭe pārājikanti vuttaṃ hoti.

    ১৭৩৩. ‘‘ইতি এৰং কতে অযং সঙ্ঘমজ্ঝেন ৰিরোচতী’’তি ৰিরূপকরণাপেক্খো ৰিরূপকরণে অপেক্খৰা তস্স চ অপেক্খিতস্স ভিক্খুস্স কণ্ণং ৰা নাসং ৰা যদি ছিন্দতি, দুক্কটন্তি যোজনা।

    1733. ‘‘Iti evaṃ kate ayaṃ saṅghamajjhena virocatī’’ti virūpakaraṇāpekkho virūpakaraṇe apekkhavā tassa ca apekkhitassa bhikkhussa kaṇṇaṃ vā nāsaṃ vā yadi chindati, dukkaṭanti yojanā.

    ১৭৩৪. অনুপসম্পন্নেতি সামিৰচনত্থে ভুম্মং। ‘‘ইত্থিযা’’তিআদীহি পদেহি যথারহং যোজেতব্বং ‘‘অনুপসম্পন্নায ইত্থিযা অনুপসম্পন্নস্স পুরিসস্সা’’তি। তিরচ্ছানগতস্সপীতি এত্থ ‘‘অন্তমসো’’তি সেসো। যথাহ ‘‘অন্তমসো তিরচ্ছানগতস্সপী’’তি (পাচি॰ অট্ঠ॰ ৪৫২)।

    1734.Anupasampanneti sāmivacanatthe bhummaṃ. ‘‘Itthiyā’’tiādīhi padehi yathārahaṃ yojetabbaṃ ‘‘anupasampannāya itthiyā anupasampannassa purisassā’’ti. Tiracchānagatassapīti ettha ‘‘antamaso’’ti seso. Yathāha ‘‘antamaso tiracchānagatassapī’’ti (pāci. aṭṭha. 452).

    ১৭৩৫. ‘‘সচে পহরতি ইত্থিঞ্চা’’তি পদচ্ছেদো। রত্তেন চেতসাতি কাযসংসগ্গরাগেন রত্তেন চিত্তেন। ৰিনিদ্দিট্ঠাতি ‘‘যো পন ভিক্খু ওতিণ্ণো ৰিপরিণতেন চিত্তেন মাতুগামেন সদ্ধিং কাযসংসগ্গং সমাপজ্জেয্যা’’তিআদিনা (পারা॰ ২৭০) দস্সিতা।

    1735. ‘‘Sace paharati itthiñcā’’ti padacchedo. Rattena cetasāti kāyasaṃsaggarāgena rattena cittena. Viniddiṭṭhāti ‘‘yo pana bhikkhu otiṇṇo vipariṇatena cittena mātugāmena saddhiṃ kāyasaṃsaggaṃ samāpajjeyyā’’tiādinā (pārā. 270) dassitā.

    ১৭৩৬. মোক্খাধিপ্পাযোতি ততো অত্তনো মোক্খং পত্থেন্তো। দোসো ন ৰিজ্জতীতি দুক্কটাদিকোপি দোসো নত্থি।

    1736.Mokkhādhippāyoti tato attano mokkhaṃ patthento. Doso na vijjatīti dukkaṭādikopi doso natthi.

    ১৭৩৭-৯. হেঠেতুকামমাযন্তং চোরম্পি ৰা পচ্চত্থিকম্পি ৰা অন্তরামগ্গে পস্সিত্ৰাতি যোজনা। দিস্ৰা কথং পটিপজ্জিতব্বন্তি আহ ‘‘মা ইধাগচ্ছুপাসকা’’তিআদি, আগমনপটিক্খেপেন তত্থেৰ তিট্ঠাতি ৰুত্তং হোতি। আযন্তন্তি এৰং ৰুত্তে তং অনাদিযিত্ৰা আগচ্ছন্তং। যথাহ ‘‘ৰচনং অনাদিযিত্ৰা আগচ্ছন্ত’’ন্তি (পাচি॰ অট্ঠ॰ ৪৫৩)।

    1737-9. Heṭhetukāmamāyantaṃ corampi vā paccatthikampi vā antarāmagge passitvāti yojanā. Disvā kathaṃ paṭipajjitabbanti āha ‘‘mā idhāgacchupāsakā’’tiādi, āgamanapaṭikkhepena tattheva tiṭṭhāti vuttaṃ hoti. Āyantanti evaṃ vutte taṃ anādiyitvā āgacchantaṃ. Yathāha ‘‘vacanaṃ anādiyitvā āgacchanta’’nti (pāci. aṭṭha. 453).

    এসেৰ নযোতি ‘‘মা আগচ্ছা’তি ৰুত্তেপি আগচ্ছন্তং পহটে মতেপি অনাপত্তী’’তি অযং নযো।

    Eseva nayoti ‘‘mā āgacchā’ti vuttepi āgacchantaṃ pahaṭe matepi anāpattī’’ti ayaṃ nayo.

    ১৭৪০. তিকপাচিত্তিযং ৰুত্তন্তি ‘‘উপসম্পন্নে উপসম্পন্নসঞ্ঞী, ৰেমতিকো, অনুপসম্পন্নসঞ্ঞী পহারং দেতি, আপত্তি পাচিত্তিযস্সা’’তি (পাচি॰ ৪৫২) তিকপাচিত্তিযং ৰুত্তং। সেসেতি অনুপসম্পন্নে। তিকদুক্কটন্তি ‘‘অনুপসম্পন্নে উপসম্পন্নসঞ্ঞী, ৰেমতিকো , অনুপসম্পন্নসঞ্ঞী পহারং দেতি, আপত্তি দুক্কটস্সা’’তি (পাচি॰ ৪৫২) তিকদুক্কটং ৰুত্তং। অনাণত্তিকত্তা আহ ‘‘কাযচিত্তসমুট্ঠান’’ন্তি। কাযচিত্তানং সুখোপেক্খাপি সম্ভৰন্তীতি ততো ৰিসেসেতুমাহ ‘‘দুক্খৰেদন’’ন্তি।

    1740.Tikapācittiyaṃ vuttanti ‘‘upasampanne upasampannasaññī, vematiko, anupasampannasaññī pahāraṃ deti, āpatti pācittiyassā’’ti (pāci. 452) tikapācittiyaṃ vuttaṃ. Seseti anupasampanne. Tikadukkaṭanti ‘‘anupasampanne upasampannasaññī, vematiko , anupasampannasaññī pahāraṃ deti, āpatti dukkaṭassā’’ti (pāci. 452) tikadukkaṭaṃ vuttaṃ. Anāṇattikattā āha ‘‘kāyacittasamuṭṭhāna’’nti. Kāyacittānaṃ sukhopekkhāpi sambhavantīti tato visesetumāha ‘‘dukkhavedana’’nti.

    পহারকথাৰণ্ণনা।

    Pahārakathāvaṇṇanā.

    ১৭৪১. কাযন্তি কাযেকদেসং হত্থাদিঅৰযৰমাহ। ৰাতি দুতিযত্থসম্পিণ্ডনে। কাযবদ্ধন্তি কাযপটিবদ্ধং পহরণযোগ্গাযোগ্গেসু কত্তরযট্ঠিসত্থাদীসু অঞ্ঞতরং। সচে উচ্চারেয্যাতি সচে পহরণাকারং দস্সেত্ৰা উক্খিপেয্য, ইদং ‘‘কাযং ৰা কাযপটিবদ্ধং ৰা’’তি ইমেহি পদেহি পচ্চেকং যোজেতব্বং। তস্সাতি উচ্চারিতকাযাদিকস্স। উগ্গিরণপচ্চযাতি উক্খিপনকারণা।

    1741.Kāyanti kāyekadesaṃ hatthādiavayavamāha. Vāti dutiyatthasampiṇḍane. Kāyabaddhanti kāyapaṭibaddhaṃ paharaṇayoggāyoggesu kattarayaṭṭhisatthādīsu aññataraṃ. Sace uccāreyyāti sace paharaṇākāraṃ dassetvā ukkhipeyya, idaṃ ‘‘kāyaṃ vā kāyapaṭibaddhaṃ vā’’ti imehi padehi paccekaṃ yojetabbaṃ. Tassāti uccāritakāyādikassa. Uggiraṇapaccayāti ukkhipanakāraṇā.

    ১৭৪২. অসম্পহরিতুকামেনাতি পহারদানং অনিচ্ছন্তেন। দিন্নত্তাতি পহারস্স দিন্নত্তা। অপ্পহরিতুকামত্তা পুরিমসিক্খাপদেন পাচিত্তিযং ন হোতি, উগ্গিরিতুকামতায কতপযোগস্স উগ্গিরণমত্তে অট্ঠত্ৰা পহারস্স দিন্নত্তা ইমিনাপি পাচিত্তিযং ন হোতি, অজ্ঝাসযস্স, পযোগস্স চ অসুদ্ধত্তা অনাপত্তিযাপি ন ভৰিতব্বন্তি দুক্কটং ৰুত্তং।

    1742.Asampaharitukāmenāti pahāradānaṃ anicchantena. Dinnattāti pahārassa dinnattā. Appaharitukāmattā purimasikkhāpadena pācittiyaṃ na hoti, uggiritukāmatāya katapayogassa uggiraṇamatte aṭṭhatvā pahārassa dinnattā imināpi pācittiyaṃ na hoti, ajjhāsayassa, payogassa ca asuddhattā anāpattiyāpi na bhavitabbanti dukkaṭaṃ vuttaṃ.

    ১৭৪৩. সচে তেন পহারেন ভিক্খুনো হত্থাদীসুপি যং কিঞ্চি অঙ্গং ভিজ্জতি, পহটস্স পহারদাযকস্স দুক্কটন্তি সম্বন্ধো।

    1743. Sace tena pahārena bhikkhuno hatthādīsupi yaṃ kiñci aṅgaṃ bhijjati, pahaṭassa pahāradāyakassa dukkaṭanti sambandho.

    ১৭৪৪. সেসো ৰিনিচ্ছযো ‘‘মোক্খাধিপ্পাযো’’তিআদিকো ইধ অৰুত্তো ৰিনিচ্ছযো সমুট্ঠানাদিনা সদ্ধিং অনন্তরে ৰুত্তনযেন ৰিনযঞ্ঞুনা ৰেদিতব্বোতি যোজনা। ‘‘তিরচ্ছানাদীনং ৰচ্চকরণাদিং দিস্ৰান পলাপেতুকামতায কুজ্ঝিত্ৰাপি উগ্গিরন্তস্স মোক্খাধিপ্পাযো এৰা’’তি ৰদন্তি।

    1744.Seso vinicchayo ‘‘mokkhādhippāyo’’tiādiko idha avutto vinicchayo samuṭṭhānādinā saddhiṃ anantare vuttanayena vinayaññunā veditabboti yojanā. ‘‘Tiracchānādīnaṃ vaccakaraṇādiṃ disvāna palāpetukāmatāya kujjhitvāpi uggirantassa mokkhādhippāyo evā’’ti vadanti.

    তলসত্তিকথাৰণ্ণনা।

    Talasattikathāvaṇṇanā.

    ১৭৪৫. অমূলকেনাতি দিট্ঠাদিমূলৰিরহিতেন, এত্থ ‘‘ভিক্খু’’ন্তি সেসো। সঙ্ঘাদিসেসেনাতি তেরসন্নং অঞ্ঞতরেন। তস্সাতি চোদকস্স, চোদাপকস্স ৰা পাপভিক্খুনো। সচে চুদিতকো তস্মিং খণে ‘‘এস মং চোদেতী’’তি জানাতি, পাচিত্তিযং সিযাতি যোজনা, ইমিনা ‘‘সচে এৰং ন জানাতি, চিরেন ৰা জানাতি, দুক্কটং হোতী’’তি সিদ্ধং।

    1745.Amūlakenāti diṭṭhādimūlavirahitena, ettha ‘‘bhikkhu’’nti seso. Saṅghādisesenāti terasannaṃ aññatarena. Tassāti codakassa, codāpakassa vā pāpabhikkhuno. Sace cuditako tasmiṃ khaṇe ‘‘esa maṃ codetī’’ti jānāti, pācittiyaṃ siyāti yojanā, iminā ‘‘sace evaṃ na jānāti, cirena vā jānāti, dukkaṭaṃ hotī’’ti siddhaṃ.

    ১৭৪৬. তত্থাতি উপসম্পন্নে। তিকপাচিত্তিযন্তি ‘‘উপসম্পন্নে উপসম্পন্নসঞ্ঞী অমূলকেন সঙ্ঘাদিসেসেন অনুদ্ধংসেতি, আপত্তি পাচিত্তিযস্স। ৰেমতিকো…পে॰… অনুপসম্পন্নসঞ্ঞী অমূলকেন সঙ্ঘাদিসেসেন অনুদ্ধংসেতি, আপত্তি পাচিত্তিযস্সা’’তি (পাচি॰ ৪৬২) তিকপাচিত্তিযং । দিট্ঠাচারৰিপত্তিযা চোদকো দুক্কটাপত্তীতি অমূলিকায দিট্ঠিৰিপত্তিযা ৰা আচারৰিপত্তিযা ৰা অনুদ্ধংসেন্তস্স দুক্কটাপত্তি হোতীতি অত্থো। সেসে চাতি অনুপসম্পন্নে। তিকদুক্কটন্তি অনুপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন তীণি দুক্কটানি হোন্তীতি অত্থো।

    1746.Tatthāti upasampanne. Tikapācittiyanti ‘‘upasampanne upasampannasaññī amūlakena saṅghādisesena anuddhaṃseti, āpatti pācittiyassa. Vematiko…pe… anupasampannasaññī amūlakena saṅghādisesena anuddhaṃseti, āpatti pācittiyassā’’ti (pāci. 462) tikapācittiyaṃ . Diṭṭhācāravipattiyā codako dukkaṭāpattīti amūlikāya diṭṭhivipattiyā vā ācāravipattiyā vā anuddhaṃsentassa dukkaṭāpatti hotīti attho. Sese cāti anupasampanne. Tikadukkaṭanti anupasampanne upasampannasaññivematikaanupasampannasaññīnaṃ vasena tīṇi dukkaṭāni hontīti attho.

    ১৭৪৭. ‘‘তথাসঞ্ঞিস্স অনাপত্তী’’তি পদচ্ছেদো। তথাসঞ্ঞিস্সাতি সমূলকসঞ্ঞিস্স।

    1747. ‘‘Tathāsaññissa anāpattī’’ti padacchedo. Tathāsaññissāti samūlakasaññissa.

    অমূলককথাৰণ্ণনা।

    Amūlakakathāvaṇṇanā.

    ১৭৪৮-৯. সঞ্চিচ্চাতি তস্স পরিপুণ্ণৰীসতিৰস্সাদিভাৰং জানন্তোযেৰ। ভিক্খুনোতি এত্থ ‘‘অঞ্ঞস্সা’’তি সেসো । ঊনৰীসতিৰস্সো ত্ৰং মঞ্ঞেতি এত্থ ‘‘মঞ্ঞে’’তি ইমিনা পরিকপ্পত্থৰাচিনা নিপাতেন ‘‘উদকং মঞ্ঞে আদিত্ত’’ন্তিআদীসু (পারা॰ ৩৮৩) ৰিয মুসাৰাদাপত্তিযা অৰিসযতং দীপেতি। হিতেসিতায অনুসিট্ঠিদানাদিকে তথারূপে অঞ্ঞস্মিং পচ্চযে কারণে অসতি ‘‘ঊনৰীসতিৰস্সো ত্ৰং মঞ্ঞে’’ ইতি এৰমাদিনা অঞ্ঞস্স ভিক্খুনো যো ভিক্খু সচে সঞ্চিচ্চ কুক্কুচ্চং উপ্পাদেয্য, তস্স এৰং কুক্কুচ্চং উপ্পাদেন্তস্স ভিক্খুনো ৰাচায ৰাচায পাচিত্তি হোতীতি যোজনা।

    1748-9.Sañciccāti tassa paripuṇṇavīsativassādibhāvaṃ jānantoyeva. Bhikkhunoti ettha ‘‘aññassā’’ti seso . Ūnavīsativasso tvaṃ maññeti ettha ‘‘maññe’’ti iminā parikappatthavācinā nipātena ‘‘udakaṃ maññe āditta’’ntiādīsu (pārā. 383) viya musāvādāpattiyā avisayataṃ dīpeti. Hitesitāya anusiṭṭhidānādike tathārūpe aññasmiṃ paccaye kāraṇe asati ‘‘ūnavīsativasso tvaṃ maññe’’ iti evamādinā aññassa bhikkhuno yo bhikkhu sace sañcicca kukkuccaṃ uppādeyya, tassa evaṃ kukkuccaṃ uppādentassa bhikkhuno vācāya vācāya pācitti hotīti yojanā.

    ১৭৫০. তিকপাচিত্তিযং ৰুত্তন্তি ‘‘উপসম্পন্নে উপসম্পন্নসঞ্ঞী সঞ্চিচ্চ কুক্কুচ্চং উপদহতি, আপত্তি পাচিত্তিযস্স। ৰেমতিকো…পে॰… অনুপসম্পন্নসঞ্ঞী সঞ্চিচ্চ কুক্কুচ্চং উপদহতি, আপত্তি পাচিত্তিযস্সা’’তি (পাচি॰ ৪৬৭) তিকপাচিত্তিযং ৰুত্তং। সেসে চাতি অনুপসম্পন্নে চ। তিকদুক্কটন্তি অনুপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন তিকদুক্কটং। ৰজ্জমেৰ ৰজ্জতা।

    1750.Tikapācittiyaṃ vuttanti ‘‘upasampanne upasampannasaññī sañcicca kukkuccaṃ upadahati, āpatti pācittiyassa. Vematiko…pe… anupasampannasaññī sañcicca kukkuccaṃ upadahati, āpatti pācittiyassā’’ti (pāci. 467) tikapācittiyaṃ vuttaṃ. Sese cāti anupasampanne ca. Tikadukkaṭanti anupasampanne upasampannasaññivematikaanupasampannasaññīnaṃ vasena tikadukkaṭaṃ. Vajjameva vajjatā.

    ১৭৫১. হিতেসিতায ভাসতোতি সম্বন্ধো। মা এৰন্তি এত্থ ‘‘করোহী’’তি সেসো, পুনপি মা এৰং করোহীতি অত্থো। ‘‘অহং তং ইত্থিযা সহ নিসিন্নং মঞ্ঞে, তযা ৰিকালে ভুত্তং মঞ্ঞে, পুন মা এৰং করোহি’’ ইতি হিতেসিতায ভাসতো অনাপত্তি পকাসিতাতি যোজনা।

    1751. Hitesitāya bhāsatoti sambandho. Mā evanti ettha ‘‘karohī’’ti seso, punapi mā evaṃ karohīti attho. ‘‘Ahaṃ taṃ itthiyā saha nisinnaṃ maññe, tayā vikāle bhuttaṃ maññe, puna mā evaṃ karohi’’ iti hitesitāya bhāsato anāpatti pakāsitāti yojanā.

    সঞ্চিচ্চকথাৰণ্ণনা।

    Sañciccakathāvaṇṇanā.

    ১৭৫৩. ভণ্ডনং নাম কলহো, ভণ্ডনং জাতং যেসন্তি ৰিগ্গহো, জাতভণ্ডনানন্তি অত্থো, ‘‘ৰচন’’ন্তি সেসো। সোতুং উপস্সুতিং তিট্ঠেয্যাতি যোজনা। উপেচ্চ সুয্যতি এত্থাতি হি উপস্সুতি, ঠানং, যং ঠানং উপগতেন সক্কা হোতি কথেন্তানং সদ্দং সোতুং, তত্থাতি অত্থো। যো পন ভিক্খু ভণ্ডনজাতানং ভিক্খূনং ৰচনং সোতুং উপস্সুতিং সচে তিট্ঠেয্য, তস্স পাচিত্তিযং সিযাতি যোজনা।

    1753.Bhaṇḍanaṃ nāma kalaho, bhaṇḍanaṃ jātaṃ yesanti viggaho, jātabhaṇḍanānanti attho, ‘‘vacana’’nti seso. Sotuṃ upassutiṃ tiṭṭheyyāti yojanā. Upecca suyyati etthāti hi upassuti, ṭhānaṃ, yaṃ ṭhānaṃ upagatena sakkā hoti kathentānaṃ saddaṃ sotuṃ, tatthāti attho. Yo pana bhikkhu bhaṇḍanajātānaṃ bhikkhūnaṃ vacanaṃ sotuṃ upassutiṃ sace tiṭṭheyya, tassa pācittiyaṃ siyāti yojanā.

    ১৭৫৪. চোদেতুকামতায গচ্ছতো অস্সাতি যোজনা।

    1754. Codetukāmatāya gacchato assāti yojanā.

    ১৭৫৫. সোতুন্তি পচ্ছতো গচ্ছন্তানং ভণ্ডনজাতানং ৰচনং সোতুং। ওহীযন্তস্সাতি পকতিগমনং হাপেত্ৰা ওসক্কন্তস্স। পুরতো গচ্ছতো ভিক্খুস্স দুক্কটন্তি যোজনা। গচ্ছতো তুরিতং ৰাপীতি পুরতো গচ্ছন্তানং ভণ্ডনজাতানং ৰচনং সোতুং পচ্ছতো সীঘং গচ্ছন্তস্সাপি। অযমেৰ ৰিনিচ্ছযোতি পদে পদে অযং এৰ ৰিনিচ্ছযো।

    1755.Sotunti pacchato gacchantānaṃ bhaṇḍanajātānaṃ vacanaṃ sotuṃ. Ohīyantassāti pakatigamanaṃ hāpetvā osakkantassa. Purato gacchato bhikkhussa dukkaṭanti yojanā. Gacchato turitaṃ vāpīti purato gacchantānaṃ bhaṇḍanajātānaṃ vacanaṃ sotuṃ pacchato sīghaṃ gacchantassāpi. Ayameva vinicchayoti pade pade ayaṃ eva vinicchayo.

    ১৭৫৬. অত্তনো ঠিতোকাসন্তি সম্বন্ধো। উক্কাসিত্ৰাপি ৰাতি উক্কাসিতসদ্দং কত্ৰা ৰা। এত্থ অহন্তি ৰা ৰত্ৰা ঞাপেতব্বন্তি যোজনা।

    1756. Attano ṭhitokāsanti sambandho. Ukkāsitvāpi vāti ukkāsitasaddaṃ katvā vā. Ettha ahanti vā vatvā ñāpetabbanti yojanā.

    ১৭৫৭. তিকপাচিত্তিযং ৰুত্তং উপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন। সেসে চাতি অনুপসম্পন্নে। তিকদুক্কটং অনুপসম্পন্নে উপসম্পন্নসঞ্ঞিৰেমতিকঅনুপসম্পন্নসঞ্ঞীনং ৰসেন।

    1757.Tikapācittiyaṃ vuttaṃ upasampanne upasampannasaññivematikaanupasampannasaññīnaṃ vasena. Sese cāti anupasampanne. Tikadukkaṭaṃ anupasampanne upasampannasaññivematikaanupasampannasaññīnaṃ vasena.

    ১৭৫৮. ওরমিস্সন্তি মযা গহিতদুগ্গাহতো ৰিরমিস্সামি।

    1758.Oramissanti mayā gahitaduggāhato viramissāmi.

    ১৭৫৯. কাযচিত্ততো চ কাযৰাচাচিত্ততো চ সমুট্ঠানতো থেয্যসত্থসমুট্ঠানং। সিযা কিরিযং সোতুকামতায গমনৰসেন, সিযা অকিরিযং ঠিতট্ঠানং আগন্ত্ৰা মন্তযমানং অজানাপনৰসেন, তেনাহ ‘‘ইদং হোতি ক্রিযাক্রিয’’ন্তি। গমনেন সিজ্ঝনতো কাযকম্মং । তুণ্হীভাৰেন সিজ্ঝনতো ৰচীকম্মং। সদোসন্তি সাৰজ্জং, অকুসলচিত্তন্তি ৰুত্তং হোতি।

    1759. Kāyacittato ca kāyavācācittato ca samuṭṭhānato theyyasatthasamuṭṭhānaṃ. Siyā kiriyaṃ sotukāmatāya gamanavasena, siyā akiriyaṃ ṭhitaṭṭhānaṃ āgantvā mantayamānaṃ ajānāpanavasena, tenāha ‘‘idaṃ hoti kriyākriya’’nti. Gamanena sijjhanato kāyakammaṃ. Tuṇhībhāvena sijjhanato vacīkammaṃ. Sadosanti sāvajjaṃ, akusalacittanti vuttaṃ hoti.

    উপস্সুতিকথাৰণ্ণনা।

    Upassutikathāvaṇṇanā.

    ১৭৬০. ধম্মিকানন্তি ধম্মেন ৰিনযেন সত্থুসাসনেন কতানং। কম্মানন্তি অপলোকনকম্মং, ঞত্তিকম্মং, ঞত্তিদুতিযকম্মং, ঞত্তিচতুত্থকম্মন্তি ইমেসং চতুন্নং কম্মানং। খীযতীতি অরুচিং পকাসেতি।

    1760.Dhammikānanti dhammena vinayena satthusāsanena katānaṃ. Kammānanti apalokanakammaṃ, ñattikammaṃ, ñattidutiyakammaṃ, ñatticatutthakammanti imesaṃ catunnaṃ kammānaṃ. Khīyatīti aruciṃ pakāseti.

    ১৭৬১. উভযত্থাতি অধম্মে, ধম্মে চ।

    1761.Ubhayatthāti adhamme, dhamme ca.

    ১৭৬২. অধম্মেনাতি এত্থ ‘‘কম্মেনা’’তি সেসো, ধম্মৰিরুদ্ধেন কম্মেনাতি অত্থো। ‘‘কম্মস্মি’’ন্তি ইদং ৰিভত্তিং ৰিপরিণামেত্ৰা ‘‘কম্মেনা’’তি অনুৰত্তেতব্বং। ৰগ্গেনাতি ‘‘ছন্দারহানং ছন্দো আহটো হোতি, সম্মুখীভূতা ন পটিক্কোসন্তী’’তি (মহাৰ॰ ৩৮৭) ৰুত্তসামগ্গিলক্খণস্স ৰিরুদ্ধত্তা অসমগ্গেন, এত্থ ‘‘সঙ্ঘেনা’’তি সেসো। ‘‘তথা অকম্মারহস্সা’’তি পদচ্ছেদো। ‘‘অধম্মেন কম্মেন ইমে কম্মং করোন্তী’’তি চ ‘‘অসমগ্গেন সঙ্ঘেন ইমে কম্মং করোন্তী’’তি চ ‘‘অধম্মেন কম্মেন ৰগ্গেন সঙ্ঘেন ইমে কম্মং করোন্তী’’তি চ তথা ‘‘অকম্মারহস্স ইমে কম্মং করোন্তী’’তি চ ঞত্ৰা যো খীযতি, তস্স চ অনাপত্তি পকাসিতাতি যোজনা।

    1762.Adhammenāti ettha ‘‘kammenā’’ti seso, dhammaviruddhena kammenāti attho. ‘‘Kammasmi’’nti idaṃ vibhattiṃ vipariṇāmetvā ‘‘kammenā’’ti anuvattetabbaṃ. Vaggenāti ‘‘chandārahānaṃ chando āhaṭo hoti, sammukhībhūtā na paṭikkosantī’’ti (mahāva. 387) vuttasāmaggilakkhaṇassa viruddhattā asamaggena, ettha ‘‘saṅghenā’’ti seso. ‘‘Tathā akammārahassā’’ti padacchedo. ‘‘Adhammena kammena ime kammaṃ karontī’’ti ca ‘‘asamaggena saṅghena ime kammaṃ karontī’’ti ca ‘‘adhammena kammena vaggena saṅghena ime kammaṃ karontī’’ti ca tathā ‘‘akammārahassa ime kammaṃ karontī’’ti ca ñatvā yo khīyati, tassa ca anāpatti pakāsitāti yojanā.

    কম্মপটিবাহনকথাৰণ্ণনা।

    Kammapaṭibāhanakathāvaṇṇanā.

    ১৭৬৪-৫. আরোচিতং ৰত্থু যাৰ ন ৰিনিচ্ছিতং ৰাতি যোজনা, ‘‘চোদকেন চ চুদিতকেন চ অত্তনো কথা কথিতা, অনুৰিজ্জকো সম্মতো, এত্তাৰতাপি ৰত্থুমেৰ আরোচিতং হোতী’’তি (পাচি॰ অট্ঠ॰ ৪৮১) অট্ঠকথায ৰুত্তত্তা আরোচিতং ৰত্থু যাৰ ন ৰিনিচ্ছিতং হোতীতি অত্থো। ঞত্তি ৰা ঠপিতা , কম্মৰাচা নিট্ঠং যাৰ ন গচ্ছতি, এতস্মিং…পে॰…হোতি আপত্তি দুক্কটন্তি যোজনা।

    1764-5. Ārocitaṃ vatthu yāva na vinicchitaṃ vāti yojanā, ‘‘codakena ca cuditakena ca attano kathā kathitā, anuvijjako sammato, ettāvatāpi vatthumeva ārocitaṃ hotī’’ti (pāci. aṭṭha. 481) aṭṭhakathāya vuttattā ārocitaṃ vatthu yāva na vinicchitaṃ hotīti attho. Ñatti vā ṭhapitā , kammavācā niṭṭhaṃ yāva na gacchati, etasmiṃ…pe…hoti āpatti dukkaṭanti yojanā.

    ১৭৬৬. ছন্দং অদত্ৰা হত্থপাসে জহিতে তস্স পাচিত্তিযং সিযাতি যোজনা।

    1766. Chandaṃ adatvā hatthapāse jahite tassa pācittiyaṃ siyāti yojanā.

    ১৭৬৭-৯. অধম্মেপি কম্মস্মিং ধম্মকম্মন্তি সঞ্ঞিনো দুক্কটন্তি যোজনা। ধম্মকম্মে চ অধম্মকম্মসঞ্ঞিনো অনাপত্তি ইধ ন ৰুত্তা, পাল়িযং পন ৰুত্তত্তা ইধাপি যোজেতব্বা। ‘‘সঙ্ঘস্স ভণ্ডনাদীনি ভৰিস্সন্তী’’তি সঞ্ঞিনো গচ্ছতো চ যো ৰা গিলানো হোতি, তস্স গচ্ছতো চ গিলানস্স করণীযে সতি গচ্ছতো চ কম্মং নকোপেতুকামস্স গচ্ছতো চ পস্সাৰনাদিনা পীল়িতস্স গচ্ছতো চ ‘‘আগমিস্সামি’’ইতি এৰং গচ্ছতোপি ন দোসতাতি যোজনা। তত্থ দোসো এৰ দোসতা, আপত্তি, নদোসতা অনাপত্তি। হত্থপাসং ৰিজহিত্ৰা গমনেন, ছন্দস্স অদানেন চ আপজ্জনতো ক্রিযাক্রিযং।

    1767-9. Adhammepi kammasmiṃ dhammakammanti saññino dukkaṭanti yojanā. Dhammakamme ca adhammakammasaññino anāpatti idha na vuttā, pāḷiyaṃ pana vuttattā idhāpi yojetabbā. ‘‘Saṅghassa bhaṇḍanādīni bhavissantī’’ti saññino gacchato ca yo vā gilāno hoti, tassa gacchato ca gilānassa karaṇīye sati gacchato ca kammaṃ nakopetukāmassa gacchato ca passāvanādinā pīḷitassa gacchato ca ‘‘āgamissāmi’’iti evaṃ gacchatopi na dosatāti yojanā. Tattha doso eva dosatā, āpatti, nadosatā anāpatti. Hatthapāsaṃ vijahitvā gamanena, chandassa adānena ca āpajjanato kriyākriyaṃ.

    ছন্দংঅদত্ৰাগমনকথাৰণ্ণনা।

    Chandaṃadatvāgamanakathāvaṇṇanā.

    ১৭৭০-১. সমগ্গেন সঙ্ঘেন সদ্ধিন্তি সমানসংৰাসকেন সমানসীমাযং ঠিতেন সঙ্ঘেন সদ্ধিং। ৰুত্তঞ্হি ‘‘সমগ্গো নাম সঙ্ঘো সমানসংৰাসকো সমানসীমাযং ঠিতো’’তি (পাচি॰ ৪৮৬)। চীৰরন্তি ৰিকপ্পনুপগমাহ। যথাহ ‘‘চীৰরং নাম ছন্নং চীৰরানং অঞ্ঞতরং চীৰরং ৰিকপ্পনুপগং পচ্ছিম’’ন্তি (পাচি॰ ৪৮৬)। সম্মতস্সাতি সেনাসনপঞ্ঞাপকাদিসম্মুতিং পত্তেসু অঞ্ঞতরস্স। খীযতীতি ‘‘যো যো মিত্তো, তস্স তস্স দেন্তী’’তিআদিনা নযেন অৰণ্ণং ভণতি।

    1770-1.Samaggena saṅghena saddhinti samānasaṃvāsakena samānasīmāyaṃ ṭhitena saṅghena saddhiṃ. Vuttañhi ‘‘samaggo nāma saṅgho samānasaṃvāsako samānasīmāyaṃ ṭhito’’ti (pāci. 486). Cīvaranti vikappanupagamāha. Yathāha ‘‘cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchima’’nti (pāci. 486). Sammatassāti senāsanapaññāpakādisammutiṃ pattesu aññatarassa. Khīyatīti ‘‘yo yo mitto, tassa tassa dentī’’tiādinā nayena avaṇṇaṃ bhaṇati.

    ধম্মকম্মে ধম্মকম্মসঞ্ঞিৰেমতিকঅধম্মকম্মসঞ্ঞীনং ৰসেন তিকপাচিত্তিযং ৰুত্তং।

    Dhammakamme dhammakammasaññivematikaadhammakammasaññīnaṃ vasena tikapācittiyaṃ vuttaṃ.

    ১৭৭২-৪. সঙ্ঘেনাসম্মতস্সাপি চীৰরং, অঞ্ঞমেৰ ৰা তথেৰ সমগ্গেন সঙ্ঘেন দত্ৰা খীযতি, তস্স দুক্কটন্তি যোজনা। অনুপসম্পন্নে তথেৰ সমগ্গেন সঙ্ঘেন দিন্নে সব্বত্থ চীৰরে, অঞ্ঞপরিক্খারে চ দুক্কটন্তি যোজনা। অনুপসম্পন্নেতি সম্পদানত্থে ভুম্মং, অনুপসম্পন্নস্সাতি অত্থো।

    1772-4. Saṅghenāsammatassāpi cīvaraṃ, aññameva vā tatheva samaggena saṅghena datvā khīyati, tassa dukkaṭanti yojanā. Anupasampanne tatheva samaggena saṅghena dinne sabbattha cīvare, aññaparikkhāre ca dukkaṭanti yojanā. Anupasampanneti sampadānatthe bhummaṃ, anupasampannassāti attho.

    সভাৰতো ছন্দাদীনং ৰসেনেৰ করোন্তং খীযন্তস্স চ অনাপত্তীতি যোজনা। নযা ৰিনিচ্ছযক্কমা।

    Sabhāvato chandādīnaṃ vaseneva karontaṃ khīyantassa ca anāpattīti yojanā. Nayā vinicchayakkamā.

    দুব্বলকথাৰণ্ণনা।

    Dubbalakathāvaṇṇanā.

    ১৭৭৫. ইদং দ্ৰাদসমন্তি সম্বন্ধো, ‘‘যো পন ভিক্খু জানং সঙ্ঘিকং লাভং পরিণতং পুগ্গলস্স পরিণামেয্য, পাচিত্তিয’’ন্তি (পাচি॰ ৪৯০) ইমং দ্ৰাদসমং সিক্খাপদন্তি অত্থো। তিংসককণ্ডস্মিং নিস্সগ্গিযকণ্ডে। অন্তিমেনাতি এত্থ ‘‘সিক্খাপদেনা’’তি পকরণতো লব্ভতি। চ-সদ্দো এৰকারত্থো। ‘‘যো পন ভিক্খু জানং সঙ্ঘিকং লাভং পরিণতং অত্তনো পরিণামেয্য, নিস্সগ্গিযং পাচিত্তিয’’ন্তি (পারা॰ ৬৫৮) ইমিনা অন্তিমেনেৰ সিক্খাপদেন সব্বথা সব্বং ৰত্তব্বং তুল্যন্তি যোজনা। অযমেৰ ৰিসেসতাতি এত্থ ৰিসেসোযেৰ ৰিসেসতা, অযমেৰ ৰিসেসোতি অত্থো।

    1775. Idaṃ dvādasamanti sambandho, ‘‘yo pana bhikkhu jānaṃ saṅghikaṃ lābhaṃ pariṇataṃ puggalassa pariṇāmeyya, pācittiya’’nti (pāci. 490) imaṃ dvādasamaṃ sikkhāpadanti attho. Tiṃsakakaṇḍasmiṃ nissaggiyakaṇḍe. Antimenāti ettha ‘‘sikkhāpadenā’’ti pakaraṇato labbhati. Ca-saddo evakārattho. ‘‘Yo pana bhikkhu jānaṃ saṅghikaṃ lābhaṃ pariṇataṃ attano pariṇāmeyya, nissaggiyaṃ pācittiya’’nti (pārā. 658) iminā antimeneva sikkhāpadena sabbathā sabbaṃ vattabbaṃ tulyanti yojanā. Ayameva visesatāti ettha visesoyeva visesatā, ayameva visesoti attho.

    ১৭৭৬. তত্থাতি তস্মিং নিস্সগ্গিযাৰসানে সিক্খাপদে। অত্তনো পরিণামনাতি অত্তনো পরিণামনহেতু।

    1776.Tatthāti tasmiṃ nissaggiyāvasāne sikkhāpade. Attano pariṇāmanāti attano pariṇāmanahetu.

    পরিণামনকথাৰণ্ণনা।

    Pariṇāmanakathāvaṇṇanā.

    সহধম্মিকৰগ্গো অট্ঠমো।

    Sahadhammikavaggo aṭṭhamo.

    ১৭৭৭-৮. যো পন ভিক্খু দেৰিযা ৰাপি রঞ্ঞো ৰাপি অৰিদিতাগমনো অপ্পটিসংৰিদিতাগমনো সযনীযঘরা রাজস্মিং অনিক্খন্তে, দেৰিযা অনিক্খন্তায তস্স সযনীযঘরস্স উম্মারং ইন্দখীলং সচে অতিক্কমেয্য, তস্স ভিক্খুনো পঠমে পাদে দুক্কটং সিযা, দুতিযে পাদে পাচিত্তিযং সিযাতি যোজনা।

    1777-8.Yo pana bhikkhu deviyā vāpi rañño vāpi aviditāgamano appaṭisaṃviditāgamano sayanīyagharā rājasmiṃ anikkhante, deviyā anikkhantāya tassa sayanīyagharassa ummāraṃ indakhīlaṃ sace atikkameyya, tassa bhikkhuno paṭhame pāde dukkaṭaṃ siyā, dutiye pāde pācittiyaṃ siyāti yojanā.

    ১৭৭৯. পটিসংৰিদিতেতি অত্তনো আগমনে নিৰেদিতে। নেৰপটিসংৰিদিতসঞ্ঞিনোতি অনিৰেদিতসঞ্ঞিনো। তত্থাতি তস্মিং পটিসংৰিদিতাগমনে। ৰেমতিকস্সাতি ‘‘পটিসংৰিদিতং নু খো, ন পটিসংৰিদিতং নু খো’’তি সংসযমাপন্নস্স।

    1779.Paṭisaṃviditeti attano āgamane nivedite. Nevapaṭisaṃviditasaññinoti aniveditasaññino. Tatthāti tasmiṃ paṭisaṃviditāgamane. Vematikassāti ‘‘paṭisaṃviditaṃ nu kho, na paṭisaṃviditaṃ nu kho’’ti saṃsayamāpannassa.

    ১৭৮০-১. নেৰ খত্তিযস্স অপ্পটিসংৰিদিতেপি ৰা ন খত্তিযাভিসেকেন অভিসিত্তস্স অপ্পটিসংৰিদিতেপি ৰা পৰিসতো ন দোসোতি যোজনা, এৰরূপানং অনিৰেদিতেপি পৰিসন্তস্স অনাপত্তীতি অত্থো।

    1780-1. Neva khattiyassa appaṭisaṃviditepi vā na khattiyābhisekena abhisittassa appaṭisaṃviditepi vā pavisato na dosoti yojanā, evarūpānaṃ aniveditepi pavisantassa anāpattīti attho.

    উভোসু রাজিনি চ দেৰিযা চ সযনিঘরতো বহি নিক্খন্তেসু পৰিসতোপি ৰা উভিন্নং অঞ্ঞতরস্মিং নিক্খন্তে পৰিসতোপি ৰা ন দোসোতি যোজনা। কথিনেনাতি এত্থ ‘‘সমুট্ঠানাদিনা সম’’ন্তি সেসো, ইদং সিক্খাপদং সমুট্ঠানাদিৰসেন কথিনসিক্খাপদেন সমানন্তি ৰুত্তং হোতি। সযনীযঘরপ্পৰেসো ক্রিযং। অপ্পটিসংৰেদনং অক্রিযং।

    Ubhosu rājini ca deviyā ca sayanigharato bahi nikkhantesu pavisatopi vā ubhinnaṃ aññatarasmiṃ nikkhante pavisatopi vā na dosoti yojanā. Kathinenāti ettha ‘‘samuṭṭhānādinā sama’’nti seso, idaṃ sikkhāpadaṃ samuṭṭhānādivasena kathinasikkhāpadena samānanti vuttaṃ hoti. Sayanīyagharappaveso kriyaṃ. Appaṭisaṃvedanaṃ akriyaṃ.

    অন্তেপুরকথাৰণ্ণনা।

    Antepurakathāvaṇṇanā.

    ১৭৮২. রজতং , জাতরূপং ৰা অত্তনো অত্থায উগ্গণ্হন্তস্স, উগ্গণ্হাপযতোপি ৰা তস্স নিস্সগ্গিযাপত্তীতি যোজনা।

    1782. Rajataṃ , jātarūpaṃ vā attano atthāya uggaṇhantassa, uggaṇhāpayatopi vā tassa nissaggiyāpattīti yojanā.

    ১৭৮৩. গণপুগ্গলসঙ্ঘানং অত্থায চেতিযে নৰকম্মস্স অত্থায উগ্গণ্হাপযতো, উগ্গণ্হতোপি ৰা দুক্কটং হোতীতি যোজনা। জাতরূপরজতানং সরূপং নিস্সগ্গিযে ৰুত্তনযেনেৰ ৰেদিতব্বং।

    1783. Gaṇapuggalasaṅghānaṃ atthāya cetiye navakammassa atthāya uggaṇhāpayato, uggaṇhatopi vā dukkaṭaṃ hotīti yojanā. Jātarūparajatānaṃ sarūpaṃ nissaggiye vuttanayeneva veditabbaṃ.

    ১৭৮৪. মুত্তাদিরতনম্পি ৰুত্তসরূপমেৰ। সঙ্ঘাদীনম্পীতি এত্থ আদি-সদ্দেন গণপুগ্গলচেতিযানং সঙ্গহো।

    1784. Muttādiratanampi vuttasarūpameva. Saṅghādīnampīti ettha ādi-saddena gaṇapuggalacetiyānaṃ saṅgaho.

    ১৭৮৫-৬. যং কিঞ্চি গিহিসন্তকং সচে কপ্পিযৰত্থু ৰা হোতু, অকপ্পিযৰত্থু ৰাপি হোতু, মাতুকণ্ণপিল়ন্ধনং তালপণ্ণম্পি ৰা হোতু, ভণ্ডাগারিকসীসেন পটিসামযতো তস্স পাচিত্তিযাপত্তি হোতীতি যোজনা।

    1785-6. Yaṃ kiñci gihisantakaṃ sace kappiyavatthu vā hotu, akappiyavatthu vāpi hotu, mātukaṇṇapiḷandhanaṃ tālapaṇṇampi vā hotu, bhaṇḍāgārikasīsena paṭisāmayato tassa pācittiyāpatti hotīti yojanā.

    ১৭৮৭. ন নিধেতব্বমেৰাতি ন পটিসামেতব্বমেৰ।

    1787.Na nidhetabbamevāti na paṭisāmetabbameva.

    ১৭৮৮. এসো হি যস্মা পলিবোধো নাম, তস্মা ঠপেতুং পন ৰট্টতীতি যোজনা।

    1788. Eso hi yasmā palibodho nāma, tasmā ṭhapetuṃ pana vaṭṭatīti yojanā.

    ১৭৮৯. অনুঞ্ঞাতে ঠানেতি এত্থ ‘‘পতিত’’ন্তি সেসো। এত্থ অনুঞ্ঞাতট্ঠানং নাম অজ্ঝারামো ৰা অজ্ঝাৰসথো ৰা। যথাহ ‘‘অনুজানামি ভিক্খৰে রতনং ৰা রতনসম্মতং ৰা অজ্ঝারামে ৰা অজ্ঝাৰসথে ৰা উগ্গহেত্ৰা ৰা উগ্গহাপেত্ৰা ৰা নিক্খিপিতুং ‘যস্স ভৰিস্সতি, সো হরিস্সতী’’তি (পাচি॰ ৫০৪)। এত্থ চ অজ্ঝারামো নাম পরিক্খিত্তস্স অন্তোপরিক্খেপো, অপরিক্খিত্তস্স দ্ৰিন্নং লেড্ডুপাতানং অন্তো। অজ্ঝাৰসথো নাম পরিক্খিত্তস্স অন্তোপরিক্খেপো, অপরিক্খিত্তস্স মুসলপাতব্ভন্তরং। ‘‘উগ্গহেত্ৰা’’তি ইদং উপলক্খণং, উগ্গহাপেত্ৰাতিপি ৰুত্তং হোতি।

    1789.Anuññāte ṭhāneti ettha ‘‘patita’’nti seso. Ettha anuññātaṭṭhānaṃ nāma ajjhārāmo vā ajjhāvasatho vā. Yathāha ‘‘anujānāmi bhikkhave ratanaṃ vā ratanasammataṃ vā ajjhārāme vā ajjhāvasathe vā uggahetvā vā uggahāpetvā vā nikkhipituṃ ‘yassa bhavissati, so harissatī’’ti (pāci. 504). Ettha ca ajjhārāmo nāma parikkhittassa antoparikkhepo, aparikkhittassa dvinnaṃ leḍḍupātānaṃ anto. Ajjhāvasatho nāma parikkhittassa antoparikkhepo, aparikkhittassa musalapātabbhantaraṃ. ‘‘Uggahetvā’’ti idaṃ upalakkhaṇaṃ, uggahāpetvātipi vuttaṃ hoti.

    ১৭৯০-১. অনুঞ্ঞাতে পন ঠানে যথাৰুত্তঅজ্ঝারামাদিকে ঠানে রতনং ৰা রতনসম্মতং ৰা মনুস্সানং উপভোগপরিভোগং ৰা সযনভণ্ডং ৰা গহেত্ৰা নিক্খিপন্তস্স, রতনসম্মতং ৰিস্সাসং গণ্হন্তস্স চ তাৰকালিকমেৰ ৰা গণ্হন্তস্স উভযত্থ উম্মত্তকাদীনঞ্চ ন দোসোতি যোজনা।

    1790-1.Anuññāte pana ṭhāne yathāvuttaajjhārāmādike ṭhāne ratanaṃ vā ratanasammataṃ vā manussānaṃ upabhogaparibhogaṃ vā sayanabhaṇḍaṃ vā gahetvā nikkhipantassa, ratanasammataṃ vissāsaṃ gaṇhantassa ca tāvakālikameva vā gaṇhantassa ubhayattha ummattakādīnañca na dosoti yojanā.

    সঞ্চরিত্তসমোদযন্তি এত্থ ‘‘সমুট্ঠানাদিনা ইদং সিক্খাপদ’’ন্তি ৰত্তব্বং, ইদং সিক্খাপদং সমুট্ঠানাদিনা সঞ্চরিত্তসমজাতিকন্তি অত্থো।

    Sañcarittasamodayanti ettha ‘‘samuṭṭhānādinā idaṃ sikkhāpada’’nti vattabbaṃ, idaṃ sikkhāpadaṃ samuṭṭhānādinā sañcarittasamajātikanti attho.

    রতনকথাৰণ্ণনা।

    Ratanakathāvaṇṇanā.

    ১৭৯২. পুরেতি পুব্বভাগে।

    1792.Pureti pubbabhāge.

    ১৭৯৩-৪. সন্তন্তি চারিত্তসিক্খাপদে ৰুত্তসরূপং। অনাপুচ্ছাতি ‘‘ৰিকালে গামপ্পৰেসনং আপুচ্ছামী’’তি অনাপুচ্ছিত্ৰা। পচ্চযং ৰিনাতি তাদিসং অচ্চাযিকং করণীযং ৰিনা। পরিক্খেপোক্কমেতি পরিক্খেপস্স অন্তোপৰেসে। উপচারোক্কমেতি এত্থাপি এসেৰ নযো।

    1793-4.Santanti cārittasikkhāpade vuttasarūpaṃ. Anāpucchāti ‘‘vikāle gāmappavesanaṃ āpucchāmī’’ti anāpucchitvā. Paccayaṃ vināti tādisaṃ accāyikaṃ karaṇīyaṃ vinā. Parikkhepokkameti parikkhepassa antopavese. Upacārokkameti etthāpi eseva nayo.

    ১৭৯৫. অথাতি ৰাক্যন্তরারম্ভে।

    1795.Athāti vākyantarārambhe.

    ১৭৯৬. ততো অঞ্ঞন্তি পঠমং ৰিকালে গামপ্পৰেসনং আপুচ্ছিত্ৰা ততো পৰিট্ঠগামতো অঞ্ঞং গামং। পুন ততোতি দুতিযগামমাহ। কত্থচি পোত্থকে ‘‘আপুচ্ছনে কিচ্চ’’ন্তি পাঠো দিস্সতি, ‘‘আপুচ্ছনকিচ্চ’’ন্তি পাঠোযেৰ পন যুত্ততরো। যথাআকঙ্খিতপমাণং দস্সেতুমাহ ‘‘গামসতেপি ৰা’’তি।

    1796.Tato aññanti paṭhamaṃ vikāle gāmappavesanaṃ āpucchitvā tato paviṭṭhagāmato aññaṃ gāmaṃ. Puna tatoti dutiyagāmamāha. Katthaci potthake ‘‘āpucchane kicca’’nti pāṭho dissati, ‘‘āpucchanakicca’’nti pāṭhoyeva pana yuttataro. Yathāākaṅkhitapamāṇaṃ dassetumāha ‘‘gāmasatepi vā’’ti.

    ১৭৯৭. পস্সম্ভেত্ৰানাতি পটিৰিনোদেত্ৰা। অন্তরা অঞ্ঞং গামং পৰিসন্তি চেতি যোজনা।

    1797.Passambhetvānāti paṭivinodetvā. Antarā aññaṃ gāmaṃ pavisanti ceti yojanā.

    ১৭৯৮-৯. কুলঘরে ৰা অঞ্ঞত্থ আসনসালায ৰা ভত্তকিচ্চং কত্ৰা যো ভিক্খু সপ্পিভিক্খায ৰা তেলভিক্খায ৰা সচে চরিতুকামো সিযাতি যোজনা।

    1798-9. Kulaghare vā aññattha āsanasālāya vā bhattakiccaṃ katvā yo bhikkhu sappibhikkhāya vā telabhikkhāya vā sace caritukāmo siyāti yojanā.

    পস্সেতি পকতিৰচনসৰনারহে অত্তনো সমীপে, এতেনেৰ এত্তকা ঠানা দূরীভূতো অসন্তো নাম হোতীতি ব্যতিরেকতো লব্ভতীতি দস্সেতি। অসন্তেতি অৰিজ্জমানে ৰা ৰুত্তপ্পমাণতো দূরীভূতে ৰা। নত্থীতি এত্থ ‘‘চিন্তেত্ৰা’’তি সেসো।

    Passeti pakativacanasavanārahe attano samīpe, eteneva ettakā ṭhānā dūrībhūto asanto nāma hotīti byatirekato labbhatīti dasseti. Asanteti avijjamāne vā vuttappamāṇato dūrībhūte vā. Natthīti ettha ‘‘cintetvā’’ti seso.

    ১৮০২. অনোক্কম্মাতি অনুপসক্কিত্ৰা। মগ্গাতি গন্তব্বমগ্গা।

    1802.Anokkammāti anupasakkitvā. Maggāti gantabbamaggā.

    ১৮০৩. তিকপাচিত্তিযন্তি ৰিকালে ৰিকালসঞ্ঞিৰেমতিককালসঞ্ঞীনং ৰসেন তিকপাচিত্তিযং ৰুত্তং।

    1803.Tikapācittiyanti vikāle vikālasaññivematikakālasaññīnaṃ vasena tikapācittiyaṃ vuttaṃ.

    ১৮০৪. অচ্চাযিকে কিচ্চে ৰাপীতি সপ্পদট্ঠাদীনং ভেসজ্জপরিযেসনাদিকে অচিরাযিতব্বকিচ্চে সতি গচ্ছতো।

    1804.Accāyike kicce vāpīti sappadaṭṭhādīnaṃ bhesajjapariyesanādike acirāyitabbakicce sati gacchato.

    ১৮০৫. অন্তরারামন্তি গামব্ভন্তরে সঙ্ঘারামং। ভিক্খুনীনং উপস্সযন্তি ভিক্খুনিৰিহারং। তিত্থিযানং উপস্সযন্তি তিত্থিযারামং।

    1805.Antarārāmanti gāmabbhantare saṅghārāmaṃ. Bhikkhunīnaṃ upassayanti bhikkhunivihāraṃ. Titthiyānaṃ upassayanti titthiyārāmaṃ.

    ১৮০৬-৭. অন্তরারামাদিগমনে ন কেৰলং অনাপুচ্ছা গচ্ছতোযেৰ, কাযবন্ধনং অবন্ধিত্ৰা, সঙ্ঘাটিং অপারুপিত্ৰা গচ্ছন্তস্সাপি অনাপত্তি।

    1806-7. Antarārāmādigamane na kevalaṃ anāpucchā gacchatoyeva, kāyabandhanaṃ abandhitvā, saṅghāṭiṃ apārupitvā gacchantassāpi anāpatti.

    আপদাসুপীতি সীহো ৰা ব্যগ্ঘো ৰা আগচ্ছতি, মেঘো ৰা উট্ঠেতি, অঞ্ঞো ৰা কোচি উপদ্দৰো উপ্পজ্জতি, এৰরূপাসু আপদাসুপি বহিগামতো অন্তোগামং গচ্ছতো অনাপত্তীতি অত্থো।

    Āpadāsupīti sīho vā byaggho vā āgacchati, megho vā uṭṭheti, añño vā koci upaddavo uppajjati, evarūpāsu āpadāsupi bahigāmato antogāmaṃ gacchato anāpattīti attho.

    ৰিকালগামপ্পৰেসনকথাৰণ্ণনা।

    Vikālagāmappavesanakathāvaṇṇanā.

    ১৮০৮. অট্ঠিদন্তমযং ৰাপি ৰিসাণজং ৰাপি সূচিঘরন্তি যোজনা। অট্ঠি নাম যং কিঞ্চি অট্ঠি। দন্তোতি হত্থিদন্তো। ৰিসাণং নাম যং কিঞ্চি ৰিসাণং।

    1808. Aṭṭhidantamayaṃ vāpi visāṇajaṃ vāpi sūcigharanti yojanā. Aṭṭhi nāma yaṃ kiñci aṭṭhi. Dantoti hatthidanto. Visāṇaṃ nāma yaṃ kiñci visāṇaṃ.

    ১৮০৯. লাভেতি পটিলাভে। ভেদনকন্তি ভেদনমেৰ ভেদনকং, তং অস্স অত্থীতি ভেদনকং, পঠমং ভিন্দিত্ৰা পচ্ছা দেসেতব্বত্তা তং ভেদনকং অস্স পাচিত্তিযস্স অত্থীতি ভেদনকং, পাচিত্তিযং, অস্সত্থিঅত্থে অ-কারপচ্চযো।

    1809.Lābheti paṭilābhe. Bhedanakanti bhedanameva bhedanakaṃ, taṃ assa atthīti bhedanakaṃ, paṭhamaṃ bhinditvā pacchā desetabbattā taṃ bhedanakaṃ assa pācittiyassa atthīti bhedanakaṃ, pācittiyaṃ, assatthiatthe a-kārapaccayo.

    ১৮১০-১. ‘‘অনাপত্তি অরণিকে’’তি পদচ্ছেদো। অরণিকেতি অরণিধনুকে। ৰিধেতি কাযবন্ধনস্স ৰিধকে। অঞ্জনিকাতি অঞ্জনিনাল়িকা। দকপুঞ্ছনিযাতি নহাতস্স গত্তে উদকপুঞ্ছনপেসিকায। ৰাসিজটেতি ৰাসিদণ্ডকে।

    1810-1. ‘‘Anāpatti araṇike’’ti padacchedo. Araṇiketi araṇidhanuke. Vidheti kāyabandhanassa vidhake. Añjanikāti añjanināḷikā. Dakapuñchaniyāti nahātassa gatte udakapuñchanapesikāya. Vāsijaṭeti vāsidaṇḍake.

    সূচিঘরকথাৰণ্ণনা।

    Sūcigharakathāvaṇṇanā.

    ১৮১২-৩. মঞ্চপীঠসরূপং দুতিযে ভূতগামৰগ্গে চতুত্থসিক্খাপদে ৰুত্তমেৰ। ‘‘সুগতঙ্গুলেন অট্ঠঙ্গুলপাদক’’ন্তি অট্ঠঙ্গুলপাদকস্স আগতত্তা ‘‘অট্ঠঙ্গুলপ্পমাণেনা’’তি এত্থ ‘‘পাদেনা’’তি সেসো।

    1812-3. Mañcapīṭhasarūpaṃ dutiye bhūtagāmavagge catutthasikkhāpade vuttameva. ‘‘Sugataṅgulena aṭṭhaṅgulapādaka’’nti aṭṭhaṅgulapādakassa āgatattā ‘‘aṭṭhaṅgulappamāṇenā’’ti ettha ‘‘pādenā’’ti seso.

    হেট্ঠিমাটনিন্তি অটনিযা হেট্ঠিমতলং। অটনিযা হেট্ঠিমং হেট্ঠিমাটনী, তং ঠপেত্ৰা, অঞ্ঞত্র হেট্ঠিমায অটনিযাতি ৰুত্তং হোতি। দেসনাপুব্বভাগিযেন মঞ্চপাদচ্ছেদেন সহ ৰত্ততীতি সচ্ছেদা। তং পমাণং। অতিক্কমতোতি অতিক্কামযতো, গাথাবন্ধৰসেন য-কারলোপো।

    Heṭṭhimāṭaninti aṭaniyā heṭṭhimatalaṃ. Aṭaniyā heṭṭhimaṃ heṭṭhimāṭanī, taṃ ṭhapetvā, aññatra heṭṭhimāya aṭaniyāti vuttaṃ hoti. Desanāpubbabhāgiyena mañcapādacchedena saha vattatīti sacchedā. Taṃ pamāṇaṃ. Atikkamatoti atikkāmayato, gāthābandhavasena ya-kāralopo.

    ১৮১৫. পমাণেন করোন্তস্সাতি অটনিযা হেট্ঠা ৰড্ঢকিরতনপ্পমাণেন পাদেন যোজেত্ৰা করোন্তস্স, এতেনেৰ ‘‘ঊনকং করোন্তস্সা’’তি ইদং উপলক্খিতং। তস্সাতি তস্স অপ্পমাণিকস্স। ছিন্দিত্ৰাতি অটনিতো হেট্ঠা ৰড্ঢকিরতনাতিরিত্তং ঠানং ছিন্দিত্ৰা।

    1815.Pamāṇena karontassāti aṭaniyā heṭṭhā vaḍḍhakiratanappamāṇena pādena yojetvā karontassa, eteneva ‘‘ūnakaṃ karontassā’’ti idaṃ upalakkhitaṃ. Tassāti tassa appamāṇikassa. Chinditvāti aṭanito heṭṭhā vaḍḍhakiratanātirittaṃ ṭhānaṃ chinditvā.

    ১৮১৬. পমাণতো নিখণিত্ৰাতি এত্থ ‘‘অধিক’’ন্তি সামত্থিযা লব্ভতি, পমাণতো অধিকং ঠানং নিখণিত্ৰা, অন্তোভূমিং পৰেসেত্ৰাতি ৰুত্তং হোতি। উত্তানং ৰাপীতি উদ্ধং পাদং কত্ৰা ভূমিযং ৰা দারুঘটিকাসু ৰা ঠপেত্ৰা। অট্টং ৰা বন্ধিত্ৰা পরিভুঞ্জতোতি উক্খিপিত্ৰা তুলাসঙ্ঘাটে ঠপেত্ৰা অট্টং বন্ধিত্ৰা পরিভুঞ্জন্তস্স অনাপত্তি।

    1816.Pamāṇato nikhaṇitvāti ettha ‘‘adhika’’nti sāmatthiyā labbhati, pamāṇato adhikaṃ ṭhānaṃ nikhaṇitvā, antobhūmiṃ pavesetvāti vuttaṃ hoti. Uttānaṃ vāpīti uddhaṃ pādaṃ katvā bhūmiyaṃ vā dārughaṭikāsu vā ṭhapetvā. Aṭṭaṃ vā bandhitvā paribhuñjatoti ukkhipitvā tulāsaṅghāṭe ṭhapetvā aṭṭaṃ bandhitvā paribhuñjantassa anāpatti.

    মঞ্চকথাৰণ্ণনা।

    Mañcakathāvaṇṇanā.

    ১৮১৭. তূলং ওনদ্ধমেত্থাতি তূলোনদ্ধং, তূলং পক্খিপিত্ৰা উপরি চিমিলিকায ওনদ্ধং, ‘‘তূলং নাম তীণি তূলানি রুক্খতূলং লতাতূলং পোটকিতূল’’ন্তি (পাচি॰ ৫২৮) ৰুত্ততূলানং অঞ্ঞতরং পক্খিপিত্ৰা উপরি পিলোতিকায সিব্বিত্ৰা কতন্তি ৰুত্তং হোতি। পোটকিতূলন্তি এরকতূলাদি যং কিঞ্চি তিণজাতীনং তূলং। উদ্দালনমেৰ উদ্দালনকং, তং অস্স অত্থীতি উদ্দালনকন্তি ৰুত্তনযমেৰ। অতিক্কন্তা ঈতি উপদ্দৰো যেন সো অনীতি, ভগৰা, তেন অনীতিনা।

    1817. Tūlaṃ onaddhametthāti tūlonaddhaṃ, tūlaṃ pakkhipitvā upari cimilikāya onaddhaṃ, ‘‘tūlaṃ nāma tīṇi tūlāni rukkhatūlaṃ latātūlaṃ poṭakitūla’’nti (pāci. 528) vuttatūlānaṃ aññataraṃ pakkhipitvā upari pilotikāya sibbitvā katanti vuttaṃ hoti. Poṭakitūlanti erakatūlādi yaṃ kiñci tiṇajātīnaṃ tūlaṃ. Uddālanameva uddālanakaṃ, taṃ assa atthīti uddālanakanti vuttanayameva. Atikkantā īti upaddavo yena so anīti, bhagavā, tena anītinā.

    ১৮১৮. আযোগেতি আযোগপত্তে। বন্ধনেতি কাযবন্ধনে। অংসবদ্ধকেতি অংসবন্ধনকে। বিব্বোহনেতি উপধানে। থৰিকাতি পত্তথৰিকা। থৰিকাদীসূতি আদি-সদ্দেন সিপাটিকাদীনং সঙ্গহো। থৰিকাদীসু তূলোনদ্ধেসু পরিভুত্তেসু ভিক্খুনো অনাপত্তীতি যোজনা।

    1818.Āyogeti āyogapatte. Bandhaneti kāyabandhane. Aṃsabaddhaketi aṃsabandhanake. Bibbohaneti upadhāne. Thavikāti pattathavikā. Thavikādīsūti ādi-saddena sipāṭikādīnaṃ saṅgaho. Thavikādīsu tūlonaddhesu paribhuttesu bhikkhuno anāpattīti yojanā.

    ১৮১৯. অঞ্ঞেন চ কতন্তি এত্থ ‘‘মঞ্চং ৰা পীঠং ৰা’’তি পকরণতো লব্ভতি। উদ্দালেত্ৰাতি পিলোতিকং উপ্পাটেত্ৰা তূলং অপনেত্ৰা। নযাতি সমুট্ঠানাদযো।

    1819.Aññena ca katanti ettha ‘‘mañcaṃ vā pīṭhaṃ vā’’ti pakaraṇato labbhati. Uddāletvāti pilotikaṃ uppāṭetvā tūlaṃ apanetvā. Nayāti samuṭṭhānādayo.

    তূলোনদ্ধকথাৰণ্ণনা।

    Tūlonaddhakathāvaṇṇanā.

    ১৮২০. নিসীদনন্তি নিসীদনচীৰরং। পমাণতোতি ‘‘তত্রিদং পমাণং, দীঘসো দ্ৰে ৰিদত্থিযো সুগতৰিদত্থিযা, তিরিযং দিযড্ঢং , দসা ৰিদত্থী’’তি (পাচি॰ ৫৩১) ৰুত্তপমাণতো। পমাণাতিক্কমে পযোগে তস্স দুক্কটং সিযাতি যোজনা।

    1820.Nisīdananti nisīdanacīvaraṃ. Pamāṇatoti ‘‘tatridaṃ pamāṇaṃ, dīghaso dve vidatthiyo sugatavidatthiyā, tiriyaṃ diyaḍḍhaṃ , dasā vidatthī’’ti (pāci. 531) vuttapamāṇato. Pamāṇātikkame payoge tassa dukkaṭaṃ siyāti yojanā.

    ১৮২১. সচ্ছেদন্তি পমাণতো অতিরিত্তপদেসস্স ছেদনকিরিযাসহিতপটিকম্মং পাচিত্তিযমুদীরিতন্তি অত্থো। তস্সাতি নিসীদনস্স। দ্ৰীসু ঠানেসু ফালেত্ৰা তিস্সো দসা কাতব্বা সিযুন্তি যোজনা।

    1821.Sacchedanti pamāṇato atirittapadesassa chedanakiriyāsahitapaṭikammaṃ pācittiyamudīritanti attho. Tassāti nisīdanassa. Dvīsu ṭhānesu phāletvā tisso dasā kātabbā siyunti yojanā.

    ১৮২২. তদূনকন্তি ততো পমাণতো ঊনকং। ৰিতানাদিং করোন্তস্সাতি এত্থ আদি-সদ্দেন অত্থরণসাণিপাকারভিসিবিব্বোহনানং সঙ্গহো। ‘‘সঞ্চরিত্তসমা নযা’’তি ইদং ৰুত্তত্থমেৰ।

    1822.Tadūnakanti tato pamāṇato ūnakaṃ. Vitānādiṃ karontassāti ettha ādi-saddena attharaṇasāṇipākārabhisibibbohanānaṃ saṅgaho. ‘‘Sañcarittasamā nayā’’ti idaṃ vuttatthameva.

    নিসীদনকথাৰণ্ণনা।

    Nisīdanakathāvaṇṇanā.

    ১৮২৩. রোগেতি কণ্ডুপিল়কাদিরোগে সতি। যথাহ ‘‘অনুজানামি ভিক্খৰে যস্স কণ্ডু ৰা পিল়কাৰা অস্সাৰো ৰা থুল্লকচ্ছু ৰা আবাধো, তস্স কণ্ডুপটিচ্ছাদি’’ন্তি (মহাৰ॰ ৩৫৪)। এত্থ কণ্ডূতি কচ্ছু। পিল়কাতি লোহিততুণ্ডিকা সুখুমপিল়কা। অস্সাৰোতি অরিসভগন্দলমধুমেহাদিৰসেন অসুচিপগ্ঘরণং। থুল্লকচ্ছু ৰা আবাধোতি মহাপিল়কাবাধো ৰুচ্চতি। পমাণতোতি ‘‘তত্রিদং পমাণং, দীঘসো চতস্সো ৰিদত্থিযো সুগতৰিদত্থিযা, তিরিযং দ্ৰে ৰিদত্থিযো’’তি (পাচি॰ ৫৩৮) ৰুত্তপ্পমাণতো।

    1823.Rogeti kaṇḍupiḷakādiroge sati. Yathāha ‘‘anujānāmi bhikkhave yassa kaṇḍu vā piḷakāvā assāvo vā thullakacchu vā ābādho, tassa kaṇḍupaṭicchādi’’nti (mahāva. 354). Ettha kaṇḍūti kacchu. Piḷakāti lohitatuṇḍikā sukhumapiḷakā. Assāvoti arisabhagandalamadhumehādivasena asucipaggharaṇaṃ. Thullakacchu vā ābādhoti mahāpiḷakābādho vuccati. Pamāṇatoti ‘‘tatridaṃ pamāṇaṃ, dīghaso catasso vidatthiyo sugatavidatthiyā, tiriyaṃ dve vidatthiyo’’ti (pāci. 538) vuttappamāṇato.

    কণ্ডুপটিচ্ছাদিকথাৰণ্ণনা।

    Kaṇḍupaṭicchādikathāvaṇṇanā.

    ১৮২৫. পমাণেনেৰাতি ‘‘তত্রিদং পমাণং, দীঘসো ছ ৰিদত্থিযো সুগতৰিদত্থিযা, তিরিযং অড্ঢতেয্যা’’তি (পাচি॰ ৫৪৩) ৰুত্তপ্পমাণেনেৰ। পমাণাতিক্কমেতি ৰস্সিকসাটিকায যথাৰুত্তপমাণতো অতিক্কমনে, নিমিত্তত্থে চেতং ভুম্মং। তস্স ভিক্খুস্স। নযোতি ছেদনপাচিত্তিযাদিকো ৰিনিচ্ছযনযো।

    1825.Pamāṇenevāti ‘‘tatridaṃ pamāṇaṃ, dīghaso cha vidatthiyo sugatavidatthiyā, tiriyaṃ aḍḍhateyyā’’ti (pāci. 543) vuttappamāṇeneva. Pamāṇātikkameti vassikasāṭikāya yathāvuttapamāṇato atikkamane, nimittatthe cetaṃ bhummaṃ. Tassa bhikkhussa. Nayoti chedanapācittiyādiko vinicchayanayo.

    ৰস্সিকসাটিককথাৰণ্ণনা।

    Vassikasāṭikakathāvaṇṇanā.

    ১৮২৬. সুগতস্স চীৰরেন তুল্যপ্পমাণং চীৰরং যো ভিক্খু সচে কারেয্য, তস্স চীৰরস্স করণে তস্স ভিক্খুস্স দুক্কটং সিযাতি যোজনা। তুল্যং পমাণং যস্সাতি ৰিগ্গহো।

    1826. Sugatassa cīvarena tulyappamāṇaṃ cīvaraṃ yo bhikkhu sace kāreyya, tassa cīvarassa karaṇe tassa bhikkhussa dukkaṭaṃ siyāti yojanā. Tulyaṃ pamāṇaṃ yassāti viggaho.

    ১৮২৭. অত্তনো ৰত্থানং করণকারাপনং ৰিনা অঞ্ঞতো পটিলাভো নাম নত্থি, সূচিকম্মপরিযোসানে চীৰরসরূপস্স পটিলাভোযেৰেত্থ পটিলাভোতি ৰিঞ্ঞাযতি।

    1827. Attano vatthānaṃ karaṇakārāpanaṃ vinā aññato paṭilābho nāma natthi, sūcikammapariyosāne cīvarasarūpassa paṭilābhoyevettha paṭilābhoti viññāyati.

    ১৮২৮. তস্সাতি যং ‘‘সুগতস্স চীৰরেনা’’তি ৰুত্তং, তস্স সুগতচীৰরস্স। দীঘসো পমাণেন সুগতস্স ৰিদত্থিযা নৰ ৰিদত্থিযো, তিরিযং পমাণেন ছ ৰিদত্থিযো ৰিনিদ্দিট্ঠা সিক্খাপদেযেৰ কথিতাতি যোজনা।

    1828.Tassāti yaṃ ‘‘sugatassa cīvarenā’’ti vuttaṃ, tassa sugatacīvarassa. Dīghaso pamāṇena sugatassa vidatthiyā nava vidatthiyo, tiriyaṃ pamāṇena cha vidatthiyo viniddiṭṭhā sikkhāpadeyeva kathitāti yojanā.

    নন্দকথাৰণ্ণনা।

    Nandakathāvaṇṇanā.

    রাজৰগ্গো নৰমো।

    Rājavaggo navamo.

    ইতি ৰিনযত্থসারসন্দীপনিযা ৰিনযৰিনিচ্ছযৰণ্ণনায

    Iti vinayatthasārasandīpaniyā vinayavinicchayavaṇṇanāya

    পাচিত্তিযকথাৰণ্ণনা নিট্ঠিতা।

    Pācittiyakathāvaṇṇanā niṭṭhitā.

    পঠমো ভাগো নিট্ঠিতো।

    Paṭhamo bhāgo niṭṭhito.




    Next: পাটিদেসনীযকথাৰণ্ণনা • Pāṭidesanīyakathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact