| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
পাচিত্তিযকথাৰণ্ণনা
Pācittiyakathāvaṇṇanā
২১২৯-৩০. এৰং তিংস নিস্সগ্গিযপাচিত্তিযানি দস্সেত্ৰা ইদানি সুদ্ধপাচিত্তিযানি দস্সেতুমাহ ‘‘লসুণ’’ন্তিআদি। লসুণন্তি এত্থ ইতি-সদ্দো লুত্তনিদ্দিট্ঠো। ‘‘লসুণং’’ইতি ভণ্ডিকং ৰুত্তং অট্ঠকথাযং (পাচি॰ অট্ঠ॰ ৭৯৩-৭৯৫)। চতুপঞ্চমিঞ্জাদিপ্পভেদং ভণ্ডিকং লসুণং নাম, ন ততো ঊনং। তেনাহ ‘‘ন একদ্ৰিতিমিঞ্জক’’ন্তি। পক্কলসুণতো, সীহল়দীপসম্ভৰতো চ ৰিসেসমাহ ‘‘আমকং মাগধংযেৰা’’তি। মগধেসু জাতং মাগধং, ‘‘ৰুত্ত’’ন্তি ইমিনা সম্বন্ধো। যথাহ ‘‘মগধরট্ঠে জাতলসুণমেৰ হি ইধ লসুণন্তি অধিপ্পেত’’ন্তি (পাচি॰ অট্ঠ॰ ৭৯৫)। তং ‘‘খাদিস্সামী’’তি গণ্হতীতি সম্বন্ধো। ৰুত্তপ্পকারং পাচিত্তিযঞ্চ অজ্ঝোহারৰসেনাতি দস্সেতুমাহ ‘‘অজ্ঝোহারৰসেনেৰ, পাচিত্তিং পরিদীপযে’’তি।
2129-30. Evaṃ tiṃsa nissaggiyapācittiyāni dassetvā idāni suddhapācittiyāni dassetumāha ‘‘lasuṇa’’ntiādi. Lasuṇanti ettha iti-saddo luttaniddiṭṭho. ‘‘Lasuṇaṃ’’iti bhaṇḍikaṃ vuttaṃ aṭṭhakathāyaṃ (pāci. aṭṭha. 793-795). Catupañcamiñjādippabhedaṃ bhaṇḍikaṃ lasuṇaṃ nāma, na tato ūnaṃ. Tenāha ‘‘na ekadvitimiñjaka’’nti. Pakkalasuṇato, sīhaḷadīpasambhavato ca visesamāha ‘‘āmakaṃ māgadhaṃyevā’’ti. Magadhesu jātaṃ māgadhaṃ, ‘‘vutta’’nti iminā sambandho. Yathāha ‘‘magadharaṭṭhe jātalasuṇameva hi idha lasuṇanti adhippeta’’nti (pāci. aṭṭha. 795). Taṃ ‘‘khādissāmī’’ti gaṇhatīti sambandho. Vuttappakāraṃ pācittiyañca ajjhohāravasenāti dassetumāha ‘‘ajjhohāravaseneva, pācittiṃ paridīpaye’’ti.
২১৩১. তদেৰ ৰক্খতি ‘‘দ্ৰে তযো’’তিআদিনা। সদ্ধিন্তি একতো। সঙ্খাদিত্ৰাতি গলবিলং অপ্পৰেসেত্ৰা দন্তেহি সংচুণ্ণিযন্তী খাদিত্ৰা। অজ্ঝোহরতি পরগলং করোতি।
2131. Tadeva vakkhati ‘‘dve tayo’’tiādinā. Saddhinti ekato. Saṅkhāditvāti galabilaṃ appavesetvā dantehi saṃcuṇṇiyantī khāditvā. Ajjhoharati paragalaṃ karoti.
২১৩২. তত্থাতি তস্মিং ভণ্ডিকলসুণে। ‘‘মিঞ্জানং গণনাযা’’তি ইমিনা অজ্ঝোহারপযোগগণনাযেৰ দীপিতা। যথাহ ‘‘ভিন্দিত্ৰা একেকং মিঞ্জং খাদন্তিযা পন পযোগগণনায পাচিত্তিযানী’’তি (পাচি॰ অট্ঠ॰ ৭৯৫)।
2132.Tatthāti tasmiṃ bhaṇḍikalasuṇe. ‘‘Miñjānaṃ gaṇanāyā’’ti iminā ajjhohārapayogagaṇanāyeva dīpitā. Yathāha ‘‘bhinditvā ekekaṃ miñjaṃ khādantiyā pana payogagaṇanāya pācittiyānī’’ti (pāci. aṭṭha. 795).
২১৩৩. সভাৰতো ৰট্টন্তেৰাতি যোজনা।
2133. Sabhāvato vaṭṭantevāti yojanā.
২১৩৫. যথাৰুত্তপলণ্ডুকাদীনং নানত্তং দস্সেতুমাহ ‘‘একা মিঞ্জা’’তিআদি। ইধ মিঞ্জানং ৰসেনেৰ নানত্তং দস্সিতং। অট্ঠকথাযং পন ৰণ্ণৰসেনাপি। যথাহ ‘‘পলণ্ডুকো পণ্ডুৰণ্ণো হোতি। ভঞ্জনকো লোহিতৰণ্ণো। হরিতকো হরিতপণ্ণৰণ্ণো’’তি (পাচি॰ অট্ঠ॰ ৭৯৭)।
2135. Yathāvuttapalaṇḍukādīnaṃ nānattaṃ dassetumāha ‘‘ekā miñjā’’tiādi. Idha miñjānaṃ vaseneva nānattaṃ dassitaṃ. Aṭṭhakathāyaṃ pana vaṇṇavasenāpi. Yathāha ‘‘palaṇḍuko paṇḍuvaṇṇo hoti. Bhañjanako lohitavaṇṇo. Haritako haritapaṇṇavaṇṇo’’ti (pāci. aṭṭha. 797).
২১৩৬. ‘‘সাল়ৰে উত্তরিভঙ্গকে’’তি পদচ্ছেদো। ‘‘বদরসাল়ৰাদীসূ’’তি (পাচি॰ অট্ঠ॰ ৭৯৭) অট্ঠকথাৰচনতো এত্থ বদর-সদ্দো সেসো। বদরসাল়ৰং নাম বদরফলানি সুক্খাপেত্ৰা চুণ্ণেত্ৰা কাতব্বা খাদনীযৰিকতি। উম্মত্তিকাদীনন্তি এত্থ আদি-সদ্দেন আদিকম্মিকা গহিতা। যথাহ ‘‘উম্মত্তিকায আদিকম্মিকাযা’’তি (পাচি॰ ৭৯৭)।
2136. ‘‘Sāḷave uttaribhaṅgake’’ti padacchedo. ‘‘Badarasāḷavādīsū’’ti (pāci. aṭṭha. 797) aṭṭhakathāvacanato ettha badara-saddo seso. Badarasāḷavaṃ nāma badaraphalāni sukkhāpetvā cuṇṇetvā kātabbā khādanīyavikati. Ummattikādīnanti ettha ādi-saddena ādikammikā gahitā. Yathāha ‘‘ummattikāya ādikammikāyā’’ti (pāci. 797).
পঠমং।
Paṭhamaṃ.
২১৩৭. সম্বাধেতি পটিচ্ছন্নোকাসে। তস্স ৰিভাগং দস্সেতুমাহ ‘‘উপকচ্ছেসু মুত্তস্স করণেপি ৰা’’তি।
2137.Sambādheti paṭicchannokāse. Tassa vibhāgaṃ dassetumāha ‘‘upakacchesu muttassa karaṇepi vā’’ti.
২১৩৮. অস্সা তথা পাচিত্তীতি সম্বন্ধো। ‘‘ন লোমগণনাযা’’তি ইমিনা ‘‘পযোগগণনাযা’’তি ইদমেৰ সমত্থযতি।
2138. Assā tathā pācittīti sambandho. ‘‘Na lomagaṇanāyā’’ti iminā ‘‘payogagaṇanāyā’’ti idameva samatthayati.
২১৩৯. আবাধেতি কণ্ডুআদিকে রোগে। যথাহ – ‘‘আবাধপচ্চযাতি কণ্ডুকচ্ছুআদিআবাধপচ্চযা’’তি (পাচি॰ অট্ঠ॰ ৮০১)। মগ্গসংৰিধানসমা মতাতি ভিক্খুনিযা সংৰিধায একদ্ধানসিক্খাপদেন সদিসা মতা ঞাতাতি অত্থো।
2139.Ābādheti kaṇḍuādike roge. Yathāha – ‘‘ābādhapaccayāti kaṇḍukacchuādiābādhapaccayā’’ti (pāci. aṭṭha. 801). Maggasaṃvidhānasamā matāti bhikkhuniyā saṃvidhāya ekaddhānasikkhāpadena sadisā matā ñātāti attho.
দুতিযং।
Dutiyaṃ.
২১৪০. পদুমস্স ৰা পুণ্ডরীকস্স ৰা অন্তমসো কেসরেনাপি কামরাগেন মুত্তকরণস্স তলঘাতনে মুত্তকরণম্পি পহারদানে পাচিত্তি হোতীতি যোজনা। কেসরেনাপীতি অপি-সদ্দেন মহাপদুমপণ্ণেহি ৰত্তব্বমেৰ নত্থীতি দীপেতি। যথাহ – ‘‘অন্তমসো উপ্পলপত্তেনাপীতি এত্থ পত্তং তাৰ মহন্তং, কেসরেনাপি পহারং দেন্তিযা আপত্তিযেৰা’’তি (পাচি॰ অট্ঠ॰ ৮০৩)।
2140. Padumassa vā puṇḍarīkassa vā antamaso kesarenāpi kāmarāgena muttakaraṇassa talaghātane muttakaraṇampi pahāradāne pācitti hotīti yojanā. Kesarenāpīti api-saddena mahāpadumapaṇṇehi vattabbameva natthīti dīpeti. Yathāha – ‘‘antamaso uppalapattenāpīti ettha pattaṃ tāva mahantaṃ, kesarenāpi pahāraṃ dentiyā āpattiyevā’’ti (pāci. aṭṭha. 803).
২১৪১. তত্থাতি তস্মিং মুত্তকরণতলে।
2141.Tatthāti tasmiṃ muttakaraṇatale.
ততিযং।
Tatiyaṃ.
২১৪২. যা পন ভিক্খুনী কামরাগপরেতা কামরাগেন পীল়িতা অত্তনো ব্যঞ্জনে মুত্তপথে উপ্পলপত্তম্পি পৰেসেতি, ন ৰট্টতি পাচিত্তি হোতীতি যোজনা। পি-সদ্দেন ‘‘কেসরমত্তম্পি পন পৰেসেন্তিযা আপত্তিযেৰা’’তি (পাচি॰ অট্ঠ॰ ৮১২) অট্ঠকথা উল্লিঙ্গিতা।
2142. Yā pana bhikkhunī kāmarāgaparetā kāmarāgena pīḷitā attano byañjane muttapathe uppalapattampi paveseti, na vaṭṭati pācitti hotīti yojanā. Pi-saddena ‘‘kesaramattampi pana pavesentiyā āpattiyevā’’ti (pāci. aṭṭha. 812) aṭṭhakathā ulliṅgitā.
২১৪৩-৪. যদ্যেৰং ‘‘জতুমট্ঠকে পাচিত্তিয’’ন্তি কস্মা ৰুত্তন্তি আহ ‘‘ইদং…পে॰… জতুমট্ঠক’’ন্তি। ইদং জতুমট্ঠকং ৰত্থুৰসেনেৰ ৰুত্তন্তি ‘‘অথ খো সা ভিক্খুনী জতুমট্ঠকং আদিযিত্ৰা ধোৰিতুং ৰিস্সরিত্ৰা একমন্তং ছড্ডেসি। ভিক্খুনিযো মক্খিকাহি সম্পরিকিণ্ণং পস্সিত্ৰা এৰমাহংসু ‘কস্সিদং কম্ম’ন্তি। সা এৰমাহ ‘ময্হিদং কম্ম’ন্তি। যা তা ভিক্খুনিযো অপ্পিচ্ছা, তা উজ্ঝাযন্তি খিয্যন্তি ৰিপাচেন্তি ‘কথঞ্হি নাম ভিক্খুনী জতুমট্ঠকং আদিযিস্সতী’’তি (পাচি॰ ৮০৬) আগতৰত্থুৰসেনেৰ ৰুত্তং, ন তং ৰিনা অঞ্ঞস্স ৰট্টকস্স সম্ভৰতোতি অধিপ্পাযো। জতুমট্ঠকং নাম জতুনা কতো মট্ঠদণ্ডকো।
2143-4. Yadyevaṃ ‘‘jatumaṭṭhake pācittiya’’nti kasmā vuttanti āha ‘‘idaṃ…pe… jatumaṭṭhaka’’nti. Idaṃ jatumaṭṭhakaṃ vatthuvaseneva vuttanti ‘‘atha kho sā bhikkhunī jatumaṭṭhakaṃ ādiyitvā dhovituṃ vissaritvā ekamantaṃ chaḍḍesi. Bhikkhuniyo makkhikāhi samparikiṇṇaṃ passitvā evamāhaṃsu ‘kassidaṃ kamma’nti. Sā evamāha ‘mayhidaṃ kamma’nti. Yā tā bhikkhuniyo appicchā, tā ujjhāyanti khiyyanti vipācenti ‘kathañhi nāma bhikkhunī jatumaṭṭhakaṃ ādiyissatī’’ti (pāci. 806) āgatavatthuvaseneva vuttaṃ, na taṃ vinā aññassa vaṭṭakassa sambhavatoti adhippāyo. Jatumaṭṭhakaṃ nāma jatunā kato maṭṭhadaṇḍako.
দণ্ডন্তি এত্থ ‘‘যং কিঞ্চী’’তি সেসো। যথাহ ‘‘অন্তমসো উপ্পলপত্তম্পি মুত্তকরণং পৰেসেতী’’তি (পাচি॰ ৮০৮)। এতম্পি চ অতিমহন্তং, কেসরমত্তম্পি পন পৰেসেন্তিযা আপত্তি এৰ। এল়ালুকন্তি কক্কারিফলং ৰা। তস্মিন্তি অত্তনো মুত্তকরণে।
Daṇḍanti ettha ‘‘yaṃ kiñcī’’ti seso. Yathāha ‘‘antamaso uppalapattampi muttakaraṇaṃ pavesetī’’ti (pāci. 808). Etampi ca atimahantaṃ, kesaramattampi pana pavesentiyā āpatti eva. Eḷālukanti kakkāriphalaṃ vā. Tasminti attano muttakaraṇe.
২১৪৫. আবাধপচ্চযাতি মুত্তকরণপ্পদেসে জাতৰণাদিম্হি ৰণট্ঠাননিরুপনাদিপচ্চযা।
2145.Ābādhapaccayāti muttakaraṇappadese jātavaṇādimhi vaṇaṭṭhānanirupanādipaccayā.
চতুত্থং।
Catutthaṃ.
২১৪৬. অগ্গপব্বদ্ৰযাধিকন্তি অগ্গপব্বদ্ৰযতো কেসগ্গমত্তম্পি অধিকং। যথাহ ‘‘অন্তমসো কেসগ্গমত্তম্পি অতিক্কামেতি, আপত্তি পাচিত্তিযস্সা’’তি (পাচি॰ ৮১২)। দকসুদ্ধিং করোন্তিযাতি মুত্তকরণট্ঠানে ধোৰনং করোন্তিযা। যথাহ ‘‘উদকসুদ্ধিকং নাম মুত্তকরণস্স ধোৰনা ৰুচ্চতী’’তি (পাচি॰ ৮১২)।
2146.Aggapabbadvayādhikanti aggapabbadvayato kesaggamattampi adhikaṃ. Yathāha ‘‘antamaso kesaggamattampi atikkāmeti, āpatti pācittiyassā’’ti (pāci. 812). Dakasuddhiṃ karontiyāti muttakaraṇaṭṭhāne dhovanaṃ karontiyā. Yathāha ‘‘udakasuddhikaṃ nāma muttakaraṇassa dhovanā vuccatī’’ti (pāci. 812).
২১৪৭. ‘‘তীণী’’তি ইমিনা একঙ্গুলিযা পব্বদ্ৰযস্স পৰেসেত্ৰা ধোৰনে দোসাভাৰং দীপেতি। দীঘতোতি অঙ্গুলিযা দীঘতো। তীণি পব্বানি গম্ভীরতো মুত্তকরণে পৰেসেত্ৰা উদকসুদ্ধিং আদিযন্তিযা পাচিত্তিযং ভৰেতি যোজনা।
2147.‘‘Tīṇī’’ti iminā ekaṅguliyā pabbadvayassa pavesetvā dhovane dosābhāvaṃ dīpeti. Dīghatoti aṅguliyā dīghato. Tīṇi pabbāni gambhīrato muttakaraṇe pavesetvā udakasuddhiṃ ādiyantiyā pācittiyaṃ bhaveti yojanā.
২১৪৮. তিস্সো, চতস্সো ৰা অঙ্গুলিযো একতো কত্ৰা ৰিত্থারেন পৰেসনে একপব্বেপি পৰিট্ঠে ‘‘দ্ৰঙ্গুলপব্বপরম’’ন্তি নিযমিতপ্পমাণাতিক্কমতো আহ ‘‘একপব্বম্পি যা পনা’’তি। যা পন ভিক্খুনী চতুন্নং ৰাপি অঙ্গুলীনং তিস্সন্নং ৰাপি অঙ্গুলীনং একপব্বম্পি ৰিত্থারতো পৰেসেতি, তস্সা পাচিত্তিযং সিযাতি যোজনা।
2148. Tisso, catasso vā aṅguliyo ekato katvā vitthārena pavesane ekapabbepi paviṭṭhe ‘‘dvaṅgulapabbaparama’’nti niyamitappamāṇātikkamato āha ‘‘ekapabbampi yā panā’’ti. Yā pana bhikkhunī catunnaṃ vāpi aṅgulīnaṃ tissannaṃ vāpi aṅgulīnaṃ ekapabbampi vitthārato paveseti, tassā pācittiyaṃ siyāti yojanā.
২১৪৯. ইতীতি এৰং। সব্বপ্পকারেনাতি গম্ভীরপৰেসনাদিনা সব্বেন পকারেন। অভিব্যত্ততরং কত্ৰাতি সুপাকটতরং কত্ৰা। অযমত্থোতি ‘‘একিস্সঙ্গুলিযা তীণী’’তিআদিনা ৰুত্তো অযমত্থো।
2149.Itīti evaṃ. Sabbappakārenāti gambhīrapavesanādinā sabbena pakārena. Abhibyattataraṃ katvāti supākaṭataraṃ katvā. Ayamatthoti ‘‘ekissaṅguliyā tīṇī’’tiādinā vutto ayamattho.
২১৫০. দ্ৰঙ্গুলপব্বে দোসো নত্থীতি যোজনা। উদকসুদ্ধিপচ্চযে পন সতিপি ফস্সসাদিযনে যথাৰুত্তপরিচ্ছেদে অনাপত্তি। অধিকম্পীতি দ্ৰঙ্গুলপব্বতো অধিকম্পি। উদকসুদ্ধিং করোন্তিযা দোসো নত্থীতি যোজনা।
2150. Dvaṅgulapabbe doso natthīti yojanā. Udakasuddhipaccaye pana satipi phassasādiyane yathāvuttaparicchede anāpatti. Adhikampīti dvaṅgulapabbato adhikampi. Udakasuddhiṃ karontiyā doso natthīti yojanā.
২১৫১. তথা উদকসুদ্ধিং করোন্তীনং উম্মত্তিকাদীনং অনাপত্তি পকাসিতাতি যোজনা।
2151. Tathā udakasuddhiṃ karontīnaṃ ummattikādīnaṃ anāpatti pakāsitāti yojanā.
পঞ্চমং।
Pañcamaṃ.
২১৫২. ভুঞ্জতো পন ভিক্খুস্সাতি পঞ্চন্নং ভোজনানং অঞ্ঞতরং ভুঞ্জতো ভিক্খুস্স। যথাহ ‘‘ভুঞ্জন্তস্সাতি পঞ্চন্নং ভোজনানং অঞ্ঞতরং ভোজনং ভুঞ্জন্তস্সা’’তি (পাচি॰ ৮১৭)। পানীযং ৰা ৰিধূপনং ৰাতি ৰক্খমানং পানীযং, বীজনীযঞ্চ। উপতিট্ঠেয্যাতি ‘‘হত্থপাসে তিট্ঠতী’’তি (পাচি॰ ৮১৭) ৰচনতো এত্থ উপ-সদ্দো হত্থপাসসঙ্খাতং সমীপং ৰদতীতি ৰেদিতব্বং।
2152.Bhuñjato pana bhikkhussāti pañcannaṃ bhojanānaṃ aññataraṃ bhuñjato bhikkhussa. Yathāha ‘‘bhuñjantassāti pañcannaṃ bhojanānaṃ aññataraṃ bhojanaṃ bhuñjantassā’’ti (pāci. 817). Pānīyaṃ vā vidhūpanaṃvāti vakkhamānaṃ pānīyaṃ, bījanīyañca. Upatiṭṭheyyāti ‘‘hatthapāse tiṭṭhatī’’ti (pāci. 817) vacanato ettha upa-saddo hatthapāsasaṅkhātaṃ samīpaṃ vadatīti veditabbaṃ.
২১৫৩. ৰত্থকোণাদি যা কাচি ‘‘বীজনী’’তি ৰুচ্চতীতি যোজনা, ইমিনা ‘‘বীজনিকিচ্চং সম্পাদেস্সামী’’তি অধিট্ঠায গহিতচীৰরকোণপ্পকারং যং কিঞ্চি ‘‘বীজনী’’তি ৰুচ্চতীতি অত্থো।
2153. Vatthakoṇādi yā kāci ‘‘bījanī’’ti vuccatīti yojanā, iminā ‘‘bījanikiccaṃ sampādessāmī’’ti adhiṭṭhāya gahitacīvarakoṇappakāraṃ yaṃ kiñci ‘‘bījanī’’ti vuccatīti attho.
২১৫৪. ‘‘অথ খো সা ভিক্খুনী তস্স ভিক্খুনো ভুঞ্জন্তস্স পানীযেন চ ৰিধূপনেন চ উপতিট্ঠিত্ৰা অচ্চাৰদতি। অথ খো সো ভিক্খু তং ভিক্খুনিং অপসাদেতি ‘মা, ভগিনি, এৰরূপং অকাসি, নেতং কপ্পতী’তি। ‘পুব্বে মং ত্ৰং এৰঞ্চ এৰঞ্চ করোসি, ইদানি এত্তকং ন সহসী’তি পানীযথালকং মত্থকে আসুম্ভিত্ৰা ৰিধূপনেন পহারং অদাসী’’তি (পাচি॰ ৮১৫) ইমস্মিং ৰত্থুম্হি ভিক্খূহি আরোচিতে ‘‘কথঞ্হি নাম, ভিক্খৰে, ভিক্খুনী ভিক্খুস্স পহারং দস্সতী’’তিআদীনি (পাচি॰ ৮১৫) ৰত্ৰা ‘‘যা পন ভিক্খুনী ভিক্খুস্স ভুঞ্জন্তস্স পানীযেন ৰা ৰিধূপনেন ৰা উপতিট্ঠেয্য, পাচিত্তিয’’ন্তি (পাচি॰ ৮১৬) ৰুত্তত্তা পহারপচ্চযা নু খোতি আসঙ্কং নিৰত্তেতুমাহ ‘‘হত্থপাসে ইধ ঠানপচ্চযাপত্তি দীপিতা’’তি। এত্থ চ আসুম্ভিত্ৰাতি পাতেত্ৰা। ইধাতি ইমস্মিং সিক্খাপদে। ‘‘ন, ভিক্খৰে, ভিক্খুনিযা ভিক্খুস্স পহারো দাতব্বো। যা দদেয্য, আপত্তি দুক্কটস্সা’’তি (চূল়ৰ॰ ৪২০) ভিক্খুনিক্খন্ধকে ৰুত্তং গহেত্ৰা আহ ‘‘পহারপচ্চযা ৰুত্তং, খন্ধকে দুক্কটং ৰিসু’’ন্তি। ইমিনা ৰুত্তস্সেৰত্থস্স কারণং দস্সিতং হোতি।
2154. ‘‘Atha kho sā bhikkhunī tassa bhikkhuno bhuñjantassa pānīyena ca vidhūpanena ca upatiṭṭhitvā accāvadati. Atha kho so bhikkhu taṃ bhikkhuniṃ apasādeti ‘mā, bhagini, evarūpaṃ akāsi, netaṃ kappatī’ti. ‘Pubbe maṃ tvaṃ evañca evañca karosi, idāni ettakaṃ na sahasī’ti pānīyathālakaṃ matthake āsumbhitvā vidhūpanena pahāraṃ adāsī’’ti (pāci. 815) imasmiṃ vatthumhi bhikkhūhi ārocite ‘‘kathañhi nāma, bhikkhave, bhikkhunī bhikkhussa pahāraṃ dassatī’’tiādīni (pāci. 815) vatvā ‘‘yā pana bhikkhunī bhikkhussa bhuñjantassa pānīyena vā vidhūpanena vā upatiṭṭheyya, pācittiya’’nti (pāci. 816) vuttattā pahārapaccayā nu khoti āsaṅkaṃ nivattetumāha ‘‘hatthapāse idha ṭhānapaccayāpatti dīpitā’’ti. Ettha ca āsumbhitvāti pātetvā. Idhāti imasmiṃ sikkhāpade. ‘‘Na, bhikkhave, bhikkhuniyā bhikkhussa pahāro dātabbo. Yā dadeyya, āpatti dukkaṭassā’’ti (cūḷava. 420) bhikkhunikkhandhake vuttaṃ gahetvā āha ‘‘pahārapaccayā vuttaṃ, khandhake dukkaṭaṃ visu’’nti. Iminā vuttassevatthassa kāraṇaṃ dassitaṃ hoti.
২১৫৫. হত্থপাসং জহিত্ৰাতি এত্থ ‘‘ভোজনং ভুঞ্জতো’’তি চ খাদনং খাদতোতি এত্থ ‘‘হত্থপাসে’’তি চ ৰত্তব্বং । ভোজনং ভুঞ্জতো হত্থপাসং জহিত্ৰা উপতিট্ঠন্তিযা ৰা খাদনং খাদতো হত্থপাসে উপতিট্ঠন্তিযা ৰা হোতি আপত্তি দুক্কটন্তি যোজনা।
2155.Hatthapāsaṃ jahitvāti ettha ‘‘bhojanaṃ bhuñjato’’ti ca khādanaṃ khādatoti ettha ‘‘hatthapāse’’ti ca vattabbaṃ . Bhojanaṃ bhuñjato hatthapāsaṃ jahitvā upatiṭṭhantiyā vā khādanaṃ khādato hatthapāse upatiṭṭhantiyā vā hoti āpatti dukkaṭanti yojanā.
২১৫৬. দেতীতি পানীযং ৰা সূপাদিং ৰা ‘‘ইমং পিৰথ, ইমিনা ভুঞ্জথা’’তি দেতি। তালৰণ্টং ‘‘ইমিনা বীজন্তা ভুঞ্জথা’’তি দেতি। দাপেতীতি অঞ্ঞেন উভযম্পি দাপেতি। ইদং সিক্খাপদং সমুট্ঠানতো এল়কলোমেন সমং মতন্তি যোজনা।
2156.Detīti pānīyaṃ vā sūpādiṃ vā ‘‘imaṃ pivatha, iminā bhuñjathā’’ti deti. Tālavaṇṭaṃ ‘‘iminā bījantā bhuñjathā’’ti deti. Dāpetīti aññena ubhayampi dāpeti. Idaṃ sikkhāpadaṃ samuṭṭhānato eḷakalomena samaṃ matanti yojanā.
ছট্ঠং।
Chaṭṭhaṃ.
২১৫৭. ৰিঞ্ঞত্ৰাতি সযং ৰিঞ্ঞত্ৰা, অঞ্ঞায ৰা ৰিঞ্ঞাপেত্ৰা। ‘‘ৰিঞ্ঞত্ৰা ৰা ৰিঞ্ঞাপেত্ৰা ৰা’’তি (পাচি॰ ৮২১) হি সিক্খাপদং। আমকং ধঞ্ঞন্তি অপক্কং অভট্ঠং সালিআদিকং সত্তৰিধং ধঞ্ঞং। যথাহ – ‘‘আমকধঞ্ঞং নাম সালি ৰীহি যৰো গোধুমো কঙ্গু ৰরকো কুদ্রূসকো’’তি (পাচি॰ ৮২২)। কোট্টেত্ৰাতি মুসলেহি কোট্টেত্ৰা। যদি পরিভুঞ্জতীতি যোজনা।
2157.Viññatvāti sayaṃ viññatvā, aññāya vā viññāpetvā. ‘‘Viññatvā vā viññāpetvā vā’’ti (pāci. 821) hi sikkhāpadaṃ. Āmakaṃ dhaññanti apakkaṃ abhaṭṭhaṃ sāliādikaṃ sattavidhaṃ dhaññaṃ. Yathāha – ‘‘āmakadhaññaṃ nāma sāli vīhi yavo godhumo kaṅgu varako kudrūsako’’ti (pāci. 822). Koṭṭetvāti musalehi koṭṭetvā. Yadi paribhuñjatīti yojanā.
২১৫৮-৬০. ‘‘ভুঞ্জিস্সামীতি পটিগ্গণ্হাতি, আপত্তি দুক্কটস্সাতি ইদং পযোগদুক্কটং নাম, তস্মা ন কেৰলং পটিগ্গহণেযেৰ দুক্কটং হোতী’’তিআদিনা (পাচি॰ অট্ঠ॰ ৮২২) অট্ঠকথাগতং ৰিভাগং দস্সেতুমাহ ‘‘ন কেৰলং তু ধঞ্ঞান’’ন্তিআদি। পনাতি অপি-সদ্দত্থে, সুক্খাপনেপীতি অত্থো। ভজ্জনত্থাযাতি এত্থ ‘‘ৰদ্দলিদিৰসে’’তি সেসো। ‘‘কপল্লসজ্জনে উদ্ধনসজ্জনে’’তি পচ্চেকং যোজেতব্বং। দব্বিসজ্জনেতি কটচ্ছুসম্পাদনে। তত্থ কপল্লকে ধঞ্ঞপক্খিপনেতি যোজনা। ‘‘ঘট্টনকোট্টনে’’তি ৰত্তব্বে গাথাবন্ধৰসেন ন-কারলোপং কত্ৰা ‘‘ঘট্টকোট্টনে’’তি ৰুত্তং।
2158-60. ‘‘Bhuñjissāmīti paṭiggaṇhāti, āpatti dukkaṭassāti idaṃ payogadukkaṭaṃ nāma, tasmā na kevalaṃ paṭiggahaṇeyeva dukkaṭaṃ hotī’’tiādinā (pāci. aṭṭha. 822) aṭṭhakathāgataṃ vibhāgaṃ dassetumāha ‘‘na kevalaṃ tu dhaññāna’’ntiādi. Panāti api-saddatthe, sukkhāpanepīti attho. Bhajjanatthāyāti ettha ‘‘vaddalidivase’’ti seso. ‘‘Kapallasajjane uddhanasajjane’’ti paccekaṃ yojetabbaṃ. Dabbisajjaneti kaṭacchusampādane. Tattha kapallake dhaññapakkhipaneti yojanā. ‘‘Ghaṭṭanakoṭṭane’’ti vattabbe gāthābandhavasena na-kāralopaṃ katvā ‘‘ghaṭṭakoṭṭane’’ti vuttaṃ.
২১৬১-৩. পমাণ-সদ্দস্স আৰত্তলিঙ্গসঙ্খ্যত্তা আহ ‘‘ভোজনঞ্চেৰ ৰিঞ্ঞত্তিপমাণ’’ন্তি । আৰত্তলিঙ্গসঙ্খ্যত্তং নাম নিযতলিঙ্গেকত্তবহুত্তং। তথা হেত্থ পমাণ-সদ্দো নিযতনপুংসকলিঙ্গে নিযতেকত্তং ৰুচ্চতি। এত্থ ইমস্মিং সিক্খাপদে ভোজনঞ্চেৰ ৰিঞ্ঞত্তি চাতি ইদং দ্ৰযং হি যস্মা পমাণং, তস্মা সযং ৰিঞ্ঞত্ৰা ৰা অঞ্ঞতো ভজ্জনাদীনি কারাপেত্ৰা ৰা অঞ্ঞায পন ৰিঞ্ঞাপেত্ৰা সযং ভজ্জনাদীনি কত্ৰা ৰা যা পন ভিক্খুনী অজ্ঝোহরতি, তস্সা অজ্ঝোহারপযোগেসু পাচিত্তিযো সিযুন্তি যোজনা।
2161-3. Pamāṇa-saddassa āvattaliṅgasaṅkhyattā āha ‘‘bhojanañceva viññattipamāṇa’’nti . Āvattaliṅgasaṅkhyattaṃ nāma niyataliṅgekattabahuttaṃ. Tathā hettha pamāṇa-saddo niyatanapuṃsakaliṅge niyatekattaṃ vuccati. Ettha imasmiṃ sikkhāpade bhojanañceva viññatti cāti idaṃ dvayaṃ hi yasmā pamāṇaṃ, tasmā sayaṃ viññatvā vā aññato bhajjanādīni kārāpetvā vā aññāya pana viññāpetvā sayaṃ bhajjanādīni katvā vā yā pana bhikkhunī ajjhoharati, tassā ajjhohārapayogesu pācittiyo siyunti yojanā.
মহাপচ্চরিযং (পাচি॰ অট্ঠ॰ ৮২৩) ৰুত্তং ৰিনিচ্ছযং দস্সেতুমাহ ‘‘মাতরং ৰা’’তিআদি। মাতরং ৰাপি যাচিত্ৰাতি এত্থ ৰা-সদ্দো অত্থন্তরৰিকপ্পনে। পি-সদ্দো সম্ভাৰনে। মাতরং ৰা পিতরং ৰা অঞ্ঞং ৰা ঞাতকং ৰা পৰারিতং ৰা আমকধঞ্ঞং যাচিত্ৰা ৰা অঞ্ঞায কারাপেত্ৰা ৰা যা পরিভুঞ্জতি, তস্সা পাচিত্তীতি যোজনা।
Mahāpaccariyaṃ (pāci. aṭṭha. 823) vuttaṃ vinicchayaṃ dassetumāha ‘‘mātaraṃ vā’’tiādi. Mātaraṃ vāpi yācitvāti ettha vā-saddo atthantaravikappane. Pi-saddo sambhāvane. Mātaraṃ vā pitaraṃ vā aññaṃ vā ñātakaṃ vā pavāritaṃ vā āmakadhaññaṃ yācitvā vā aññāya kārāpetvā vā yā paribhuñjati, tassā pācittīti yojanā.
২১৬৪. অৰিঞ্ঞত্তিযা লদ্ধং সযং ৰা ভজ্জনাদীনি কত্ৰা ৰা অঞ্ঞায কারাপেত্ৰা ৰা যা পরিভুঞ্জতি, তস্সা দুক্কটন্তি যোজনা।
2164. Aviññattiyā laddhaṃ sayaṃ vā bhajjanādīni katvā vā aññāya kārāpetvā vā yā paribhuñjati, tassā dukkaṭanti yojanā.
২১৬৫. অঞ্ঞায পন ৰিঞ্ঞত্তিযা লদ্ধং তায কারাপেত্ৰাপি সযং কত্ৰা ৰা অজ্ঝোহরন্তিযা তথা আপত্তি দুক্কটন্তি যোজনা। ইদঞ্চ মহাপচ্চরিযাগতনযং গহেত্ৰা ৰুত্তং। মহাঅট্ঠকথাযং পন ‘‘অঞ্ঞায ৰিঞ্ঞত্তং ভুঞ্জন্তিযা দুক্কট’’ন্তি (পাচি॰ অট্ঠ॰ ৮২২) ৰুত্তত্তা ৰিঞ্ঞত্তিযাপি অঞ্ঞায লদ্ধং আমকং ধঞ্ঞং তায কারাপেত্ৰা ৰা সযং কত্ৰা ৰা পরিভুঞ্জন্তস্সাপি দুক্কটমেৰ ৰুত্তন্তি ৰেদিতব্বং।
2165. Aññāya pana viññattiyā laddhaṃ tāya kārāpetvāpi sayaṃ katvā vā ajjhoharantiyā tathā āpatti dukkaṭanti yojanā. Idañca mahāpaccariyāgatanayaṃ gahetvā vuttaṃ. Mahāaṭṭhakathāyaṃ pana ‘‘aññāya viññattaṃ bhuñjantiyā dukkaṭa’’nti (pāci. aṭṭha. 822) vuttattā viññattiyāpi aññāya laddhaṃ āmakaṃ dhaññaṃ tāya kārāpetvā vā sayaṃ katvā vā paribhuñjantassāpi dukkaṭameva vuttanti veditabbaṃ.
২১৬৬-৭. সেদকম্মাদিঅত্থাযাতি ৰাতরোগাদিনা আতুরানং সেদনাদিপটিকারত্থায। ইধ ‘‘অঞ্ঞাতকঅপ্পৰারিতট্ঠানেপী’’তি সেসো। ভিক্খূনম্পি এসেৰ নযো। ঠপেত্ৰা সত্ত ধঞ্ঞানি ঞাতকপৰারিতট্ঠানে সেসৰিঞ্ঞত্তিযাপি অনাপত্তীতি ঞাতব্বন্তি যোজনা। সেসৰিঞ্ঞত্তিযাতি মুগ্গমাসঅলাবুকুম্ভণ্ডকাদীনং ৰুত্তধঞ্ঞাৰসেসানং ৰিঞ্ঞত্তিযা।
2166-7.Sedakammādiatthāyāti vātarogādinā āturānaṃ sedanādipaṭikāratthāya. Idha ‘‘aññātakaappavāritaṭṭhānepī’’ti seso. Bhikkhūnampi eseva nayo. Ṭhapetvā satta dhaññāni ñātakapavāritaṭṭhāne sesaviññattiyāpi anāpattīti ñātabbanti yojanā. Sesaviññattiyāti muggamāsaalābukumbhaṇḍakādīnaṃ vuttadhaññāvasesānaṃ viññattiyā.
সালিআদীনং সত্তন্নং ধঞ্ঞানং দুক্কটস্স ৰুত্তত্তা, অনামাসত্তা চ সব্বেন সব্বং ন ৰট্টন্তীতি দস্সেতুমাহ ‘‘ঞাতকানম্পী’’তিআদি।
Sāliādīnaṃ sattannaṃ dhaññānaṃ dukkaṭassa vuttattā, anāmāsattā ca sabbena sabbaṃ na vaṭṭantīti dassetumāha ‘‘ñātakānampī’’tiādi.
২১৬৮. লদ্ধন্তি লব্ভমানং। নৰকম্মেসূতি নৰকম্মত্থায, নিমিত্তত্থে ভুম্মং। এত্থ ‘‘সম্পটিচ্ছিতু’’ন্তি সেসো। ‘‘অৰিঞ্ঞত্তিযা লব্ভমানং পন নৰকম্মত্থায সম্পটিচ্ছিতুং ৰট্টতী’’তি (পাচি॰ অট্ঠ॰ ৮২৩) মহাপচ্চরিযং ৰুত্তং।
2168.Laddhanti labbhamānaṃ. Navakammesūti navakammatthāya, nimittatthe bhummaṃ. Ettha ‘‘sampaṭicchitu’’nti seso. ‘‘Aviññattiyā labbhamānaṃ pana navakammatthāya sampaṭicchituṃ vaṭṭatī’’ti (pāci. aṭṭha. 823) mahāpaccariyaṃ vuttaṃ.
সত্তমং।
Sattamaṃ.
২১৬৯. সঙ্কারন্তি কচৰরং। ৰিঘাসকং ৰাতি উচ্ছিট্ঠকমচ্ছকণ্টকমংসট্ঠিচলকমুখধোৰনাদিকং যং কিঞ্চি। ছড্ডেয্য ৰাতি এত্থ ‘‘সয’’ন্তি সেসো ‘‘ছড্ডাপেয্য পরেহী’’তি ৰক্খমানত্তা। কুট্টস্স তিরো তিরোকুট্টং, তস্মিং, কুট্টস্স পরভাগেতি অত্থো। ‘‘পাকারেপি অযং নযো’’তি ৰক্খমানত্তা কুট্টন্তি ৰা ব্যতিরিত্তা ভিত্তি গহেতব্বা।
2169.Saṅkāranti kacavaraṃ. Vighāsakaṃ vāti ucchiṭṭhakamacchakaṇṭakamaṃsaṭṭhicalakamukhadhovanādikaṃ yaṃ kiñci. Chaḍḍeyya vāti ettha ‘‘saya’’nti seso ‘‘chaḍḍāpeyya parehī’’ti vakkhamānattā. Kuṭṭassa tiro tirokuṭṭaṃ, tasmiṃ, kuṭṭassa parabhāgeti attho. ‘‘Pākārepi ayaṃ nayo’’ti vakkhamānattā kuṭṭanti vā byatirittā bhitti gahetabbā.
২১৭১. একাতি এত্থ আপত্তীতি সেসো। ‘‘তস্সা’’তি ইমিনা সম্বন্ধো।
2171.Ekāti ettha āpattīti seso. ‘‘Tassā’’ti iminā sambandho.
২১৭২. ছড্ডনেতি এত্থ পি-সদ্দো লুত্তনিদ্দিট্ঠো। দন্তকট্ঠস্স ছড্ডনেপি ভিক্খুনিযা পাচিত্তি পরিদীপিতাতি যোজনা।
2172.Chaḍḍaneti ettha pi-saddo luttaniddiṭṭho. Dantakaṭṭhassa chaḍḍanepi bhikkhuniyā pācitti paridīpitāti yojanā.
২১৭৩-৪. সব্বত্থাতি ৰুত্তপ্পকারেসু সব্বেসু ৰিকপ্পেসু। অনাপত্তিৰিসযং দস্সেতুমাহ ‘‘অৰলঞ্জেপী’’তিআদি। অৰলঞ্জে ঠানে অনোলোকেত্ৰা ছড্ডেন্তিযাপি ৰা ৰলঞ্জে ঠানে ওলোকেত্ৰাপি ৰা পন ছড্ডেন্তিযা অনাপত্তীতি যোজনা। ছড্ডনং ক্রিযং। অনোলোকনং অক্রিযং।
2173-4.Sabbatthāti vuttappakāresu sabbesu vikappesu. Anāpattivisayaṃ dassetumāha ‘‘avalañjepī’’tiādi. Avalañje ṭhāne anoloketvā chaḍḍentiyāpi vā valañje ṭhāne oloketvāpi vā pana chaḍḍentiyā anāpattīti yojanā. Chaḍḍanaṃ kriyaṃ. Anolokanaṃ akriyaṃ.
অট্ঠমং।
Aṭṭhamaṃ.
২১৭৫-৬. যা পন ভিক্খুনী খেত্তে ৰা নাল়িকেরাদিআরামে ৰা যত্থ কত্থচি রোপিমে হরিতট্ঠানে তানি ৰিঘাসুচ্চারসঙ্কারমুত্তসঙ্খাতানি চত্তারি ৰত্থূনি সচে সযং ছড্ডেতি ৰা, তথা পরে ছড্ডাপেতি ৰা, তস্সা ভিক্খুনিযা আপত্তিৰিনিচ্ছযো ৰুত্তনযো ‘‘একেক’’মিচ্চাদিনা যথাৰুত্তপকারোতি যোজনা।
2175-6. Yā pana bhikkhunī khette vā nāḷikerādiārāme vā yattha katthaci ropime haritaṭṭhāne tāni vighāsuccārasaṅkāramuttasaṅkhātāni cattāri vatthūni sace sayaṃ chaḍḍeti vā, tathā pare chaḍḍāpeti vā, tassā bhikkhuniyā āpattivinicchayo vuttanayo ‘‘ekeka’’miccādinā yathāvuttapakāroti yojanā.
২১৭৭-৮. যা পন ভিক্খুনী হরিতে খেত্তে নিসীদিত্ৰা ভুঞ্জমানা ৰা তথা হরিতে তত্থ খেত্তে উচ্ছুআদীনি খাদন্তি খাদমানা গচ্ছন্তী ৰা যদি উচ্ছিট্ঠং উদকং ৰা চলকাদিং ৰা ছড্ডেতি, তস্সা পাচিত্তিযং হোতীতি যোজনা। চলকং নাম ৰমিকরং।
2177-8.Yā pana bhikkhunī harite khette nisīditvā bhuñjamānā vā tathā harite tattha khette ucchuādīni khādanti khādamānā gacchantī vā yadi ucchiṭṭhaṃ udakaṃ vā calakādiṃ vā chaḍḍeti, tassā pācittiyaṃ hotīti yojanā. Calakaṃ nāma vamikaraṃ.
২১৭৯. তাদিসে হরিতে ঠানে অন্তমসো মত্থকছিন্নং নাল়িকেরম্পি জলং পিৰিত্ৰা ছড্ডেন্তিযা আপত্তি সিযাতি যোজনা।
2179.Tādise harite ṭhāne antamaso matthakachinnaṃ nāḷikerampi jalaṃ pivitvā chaḍḍentiyā āpatti siyāti yojanā.
২১৮০. সব্বেসন্তি ভিক্খুভিক্খুনীনং।
2180.Sabbesanti bhikkhubhikkhunīnaṃ.
২১৮১. লাযিতম্পি খেত্তং পুন রোহণত্থায মনুস্সা রক্খন্তি চে, তত্থ তস্মিং খেত্তে ৰিঘাসুচ্চারাদীনি ছড্ডেন্তিযা অস্সা ভিক্খুনিযা যথাৰত্থুকমেৰ হি পাচিত্তিযমেৰাতি যোজনা। ‘‘অস্সা যথাৰত্থুক’’ন্তি ইমিনা ভিক্খুস্স দুক্কটন্তি ৰুত্তমেৰ হোতি।
2181. Lāyitampi khettaṃ puna rohaṇatthāya manussā rakkhanti ce, tattha tasmiṃ khette vighāsuccārādīni chaḍḍentiyā assā bhikkhuniyā yathāvatthukameva hi pācittiyamevāti yojanā. ‘‘Assā yathāvatthuka’’nti iminā bhikkhussa dukkaṭanti vuttameva hoti.
২১৮২. ছড্ডিতে খেত্তেতি মনুস্সেহি উদ্ধটসস্সে খেত্তে। যথাহ – ‘‘মনুস্সেসু সস্সং উদ্ধরিত্ৰা গতেসু ছড্ডিতখেত্তং নাম হোতি, তত্থ ৰট্টতী’’তি (পাচি॰ অট্ঠ॰ ৮৩০)। এৰং অকতেপি খেত্তে সামিকে আপুচ্ছিত্ৰা কাতুং ৰট্টতি। যথাহ ‘‘সামিকে অপলোকেত্ৰা ছড্ডেতী’’তি (পাচি॰ ৮৩২)। ইধ খেত্তপালকা, আরামাদিগোপকা চ সামিকা এৰ। সঙ্ঘস্স খেত্তে, আরামে চ সচে ‘‘তত্থ কচৰরং ন ছড্ডেতব্ব’’ন্তি কতিকা নত্থি, ভিক্খুস্স ছড্ডেতুং ৰট্টতি সঙ্ঘপরিযাপন্নত্তা, ন ভিক্খুনীনং। তাসং পন ভিক্খুসঙ্ঘে ৰুত্তনযেন ন ৰট্টতি, ন তস্স ভিক্খুস্স, এৰং সন্তেপি সারুপ্পৰসেন কাতব্বন্তি। সব্বন্তি উচ্চারাদি চতুব্বিধং।
2182.Chaḍḍite khetteti manussehi uddhaṭasasse khette. Yathāha – ‘‘manussesu sassaṃ uddharitvā gatesu chaḍḍitakhettaṃ nāma hoti, tattha vaṭṭatī’’ti (pāci. aṭṭha. 830). Evaṃ akatepi khette sāmike āpucchitvā kātuṃ vaṭṭati. Yathāha ‘‘sāmike apaloketvā chaḍḍetī’’ti (pāci. 832). Idha khettapālakā, ārāmādigopakā ca sāmikā eva. Saṅghassa khette, ārāme ca sace ‘‘tattha kacavaraṃ na chaḍḍetabba’’nti katikā natthi, bhikkhussa chaḍḍetuṃ vaṭṭati saṅghapariyāpannattā, na bhikkhunīnaṃ. Tāsaṃ pana bhikkhusaṅghe vuttanayena na vaṭṭati, na tassa bhikkhussa, evaṃ santepi sāruppavasena kātabbanti. Sabbanti uccārādi catubbidhaṃ.
নৰমং।
Navamaṃ.
২১৮৩. এত্থ ‘‘নচ্চং নাম যং কিঞ্চি নচ্চং। গীতং নাম যং কিঞ্চি গীতং। ৰাদিতং নাম যং কিঞ্চি ৰাদিত’’ন্তি (পাচি॰ ৮৩৫) ৰচনতো ‘‘যং কিঞ্চী’’তি সেসো। যা পন ভিক্খুনী যং কিঞ্চি নচ্চং ৰা যং কিঞ্চি গীতং ৰা যং কিঞ্চি ৰাদিতং ৰা দস্সনত্থায গচ্ছেয্যাতি যোজনা। তত্থ যং কিঞ্চি নচ্চন্তি নটাদযো ৰা নচ্চন্তু সোণ্ডা ৰা, অন্তমসো মোরসুকমক্কটাদযোপি, সব্বম্পেতং নচ্চমেৰ। যং কিঞ্চি গীতন্তি নটাদীনং ৰা গীতং হোতু অরিযানং পরিনিব্বানকালে রতনত্তযগুণূপসংহিতং সাধুকীল়িতগীতং ৰা অসঞ্ঞতভিক্খূনং ধম্মভাণকগীতং ৰা, সব্বম্পেতং গীতমেৰ। যং কিঞ্চি ৰাদিতন্তি ঘনাদিৰাদনীযভণ্ডৰাদিতং ৰা হোতু কুটভেরিৰাদিতং ৰা অন্তমসো উদরভেরিৰাদিতম্পি , সব্বম্পেতং ৰাদিতমেৰ। ‘‘দস্সনসৰনত্থাযা’’তি ৰত্তব্বে ৰিরূপেকসেসনযেন ‘‘দস্সনত্থাযা’’তি ৰুত্তং। পঞ্চন্নং ৰিঞ্ঞাণানং যথাসকং ৰিসযস্স আলোচনসভাৰতায ৰা ‘‘দস্সনত্থায’’ ইচ্চেৰ ৰুত্তং।
2183. Ettha ‘‘naccaṃ nāma yaṃ kiñci naccaṃ. Gītaṃ nāma yaṃ kiñci gītaṃ. Vāditaṃ nāma yaṃ kiñci vādita’’nti (pāci. 835) vacanato ‘‘yaṃ kiñcī’’ti seso. Yā pana bhikkhunī yaṃ kiñci naccaṃ vā yaṃ kiñci gītaṃ vā yaṃ kiñci vāditaṃ vā dassanatthāya gaccheyyāti yojanā. Tattha yaṃ kiñci naccanti naṭādayo vā naccantu soṇḍā vā, antamaso morasukamakkaṭādayopi, sabbampetaṃ naccameva. Yaṃ kiñci gītanti naṭādīnaṃ vā gītaṃ hotu ariyānaṃ parinibbānakāle ratanattayaguṇūpasaṃhitaṃ sādhukīḷitagītaṃ vā asaññatabhikkhūnaṃ dhammabhāṇakagītaṃ vā, sabbampetaṃ gītameva. Yaṃ kiñci vāditanti ghanādivādanīyabhaṇḍavāditaṃ vā hotu kuṭabherivāditaṃ vā antamaso udarabherivāditampi , sabbampetaṃ vāditameva. ‘‘Dassanasavanatthāyā’’ti vattabbe virūpekasesanayena ‘‘dassanatthāyā’’ti vuttaṃ. Pañcannaṃ viññāṇānaṃ yathāsakaṃ visayassa ālocanasabhāvatāya vā ‘‘dassanatthāya’’ icceva vuttaṃ.
২১৮৪. পুব্বপযোগদুক্কটেন সহ পাচিত্তিযং দস্সেতুমাহ ‘‘দস্সনত্থায নচ্চস্সা’’তিআদি। গীতস্সাতি এত্থ ‘‘ৰাদিতস্সা’’তি পকরণতো লব্ভতি।
2184. Pubbapayogadukkaṭena saha pācittiyaṃ dassetumāha ‘‘dassanatthāya naccassā’’tiādi. Gītassāti ettha ‘‘vāditassā’’ti pakaraṇato labbhati.
২১৮৫. একপযোগেনাতি একদিসাৰলোকনপযোগেন। তেনেৰ ৰক্খতি ‘‘অঞ্ঞস্মিম্পি…পে॰… সিযু’’ন্তি। পস্সতীতি এত্থ ‘‘নচ্চ’’ন্তি সেসো। তেসন্তি যেসং নচ্চং পস্সতি। পি-সদ্দেন ৰাদিতম্পি সম্পিণ্ডেতি। যথাহ ‘‘তেসংযেৰ গীতৰাদিতং সুণাতি, একমেৰ পাচিত্তিয’’ন্তি (পাচি॰ অট্ঠ॰ ৮৩৬)।
2185.Ekapayogenāti ekadisāvalokanapayogena. Teneva vakkhati ‘‘aññasmimpi…pe… siyu’’nti. Passatīti ettha ‘‘nacca’’nti seso. Tesanti yesaṃ naccaṃ passati. Pi-saddena vāditampi sampiṇḍeti. Yathāha ‘‘tesaṃyeva gītavāditaṃ suṇāti, ekameva pācittiya’’nti (pāci. aṭṭha. 836).
২১৮৬. অঞ্ঞতোতি অঞ্ঞস্মিং দিসাভাগে।
2186.Aññatoti aññasmiṃ disābhāge.
২১৮৭. ‘‘ৰিসুং পাচিত্তিযো সিযু’’ন্তি ইদমেৰ পকাসেতুমাহ ‘‘পযোগগণনাযেত্থ, আপত্তিগণনা সিযা’’তি। এত্থাতি ইমস্মিং নানাদিসাভাগে। নচ্চগীতৰাদিতানং দস্সনসৰনে অট্ঠকথাগতং ৰিনিচ্ছযং দস্সেতুমাহ ‘‘নচ্চিতু’’ন্তিআদি।
2187. ‘‘Visuṃ pācittiyo siyu’’nti idameva pakāsetumāha ‘‘payogagaṇanāyettha, āpattigaṇanā siyā’’ti. Etthāti imasmiṃ nānādisābhāge. Naccagītavāditānaṃ dassanasavane aṭṭhakathāgataṃ vinicchayaṃ dassetumāha ‘‘naccitu’’ntiādi.
২১৮৮. ‘‘নচ্চ ইতী’’তি পদচ্ছেদো, ‘‘নচ্চাহী’’তিপি পাঠো। উপট্ঠানন্তি ভেরিসদ্দপূজং। সম্পটিচ্ছিতুন্তি ‘‘সাধূ’’তি অধিৰাসেতুং। ইমস্স উপলক্খণৰসেন ৰুত্তত্তা নচ্চগীতেপি এসেৰ নযো।
2188. ‘‘Nacca itī’’ti padacchedo, ‘‘naccāhī’’tipi pāṭho. Upaṭṭhānanti bherisaddapūjaṃ. Sampaṭicchitunti ‘‘sādhū’’ti adhivāsetuṃ. Imassa upalakkhaṇavasena vuttattā naccagītepi eseva nayo.
২১৮৯-৯০. সব্বত্থাতি নচ্চনাদীসু সব্বত্থ। উপট্ঠানং করোমাতি তুম্হাকং চেতিযস্স নচ্চাদীহি উপহারং করোমাতি। উপট্ঠানং পসত্থন্তি উপট্ঠানকরণং নাম সুন্দরন্তি।
2189-90.Sabbatthāti naccanādīsu sabbattha. Upaṭṭhānaṃ karomāti tumhākaṃ cetiyassa naccādīhi upahāraṃ karomāti. Upaṭṭhānaṃ pasatthanti upaṭṭhānakaraṇaṃ nāma sundaranti.
যা আরামেযেৰ চ ঠত্ৰা পস্সতি ৰা সুণাতি ৰাতি যোজনা, ইধ ‘‘অন্তরারামে ৰা’’তিআদি সেসো। ‘‘আরামে ঠত্ৰা অন্তরারামে ৰা বহিআরামে ৰা নচ্চাদীনি পস্সতি ৰা সুণাতি ৰা, অনাপত্তী’’তি (পাচি॰ অট্ঠ॰ ৮৩৭) অট্ঠকথায ৰুত্তং। ‘‘ঠত্ৰা’’তি ৰুত্তেপি সব্বেসুপি ইরিযাপথেসু লব্ভতি। আরামে ঠত্ৰাতি ন কেৰলং ঠত্ৰাৰ, ততো গন্ত্ৰাপি সব্বিরিযাপথেহিপি লভতি। ‘‘আরামে ঠিতা’’তি (পাচি॰ ৮৩৭) পন আরামপরিযাপন্নদস্সনত্থং ৰুত্তং। ইতরথা নিসিন্নাপি ন লভেয্যাতি গণ্ঠিপদাদীসু ৰুত্তং। ভিক্খূনম্পি এসেৰ নযো।
Yā ārāmeyeva ca ṭhatvā passati vā suṇāti vāti yojanā, idha ‘‘antarārāme vā’’tiādi seso. ‘‘Ārāme ṭhatvā antarārāme vā bahiārāme vā naccādīni passati vā suṇāti vā, anāpattī’’ti (pāci. aṭṭha. 837) aṭṭhakathāya vuttaṃ. ‘‘Ṭhatvā’’ti vuttepi sabbesupi iriyāpathesu labbhati. Ārāme ṭhatvāti na kevalaṃ ṭhatvāva, tato gantvāpi sabbiriyāpathehipi labhati. ‘‘Ārāme ṭhitā’’ti (pāci. 837) pana ārāmapariyāpannadassanatthaṃ vuttaṃ. Itarathā nisinnāpi na labheyyāti gaṇṭhipadādīsu vuttaṃ. Bhikkhūnampi eseva nayo.
২১৯১. যা অত্তনো ঠিতোকাসং আগন্ত্ৰা পযোজিতং পস্সতি ৰা সুণাতি ৰাতি যোজনা। ঠিতোকাসন্তি এত্থ গতিনিৰত্তিসামঞ্ঞেন সযিতনিসিন্নম্পি গয্হতি। তথারূপা হি কারণা গন্ত্ৰা পস্সন্তিযা ৰাপীতি যোজনা। কারণং নাম সলাকভত্তাদিকারণং। যথাহ ‘‘সতি করণীযেতি সলাকভত্তাদীনং ৰা অত্থায অঞ্ঞেন ৰা কেনচি করণীযেন গন্ত্ৰা গতট্ঠানে পস্সতি ৰা সুণাতি ৰা, অনাপত্তী’’তি (পাচি॰ অট্ঠ॰ ৮৩৭)।
2191. Yā attano ṭhitokāsaṃ āgantvā payojitaṃ passati vā suṇāti vāti yojanā. Ṭhitokāsanti ettha gatinivattisāmaññena sayitanisinnampi gayhati. Tathārūpā hi kāraṇā gantvā passantiyā vāpīti yojanā. Kāraṇaṃ nāma salākabhattādikāraṇaṃ. Yathāha ‘‘sati karaṇīyeti salākabhattādīnaṃ vā atthāya aññena vā kenaci karaṇīyena gantvā gataṭṭhāne passati vā suṇāti vā, anāpattī’’ti (pāci. aṭṭha. 837).
২১৯২. মগ্গং গচ্ছন্তী পটিপথে নচ্চং অট্ঠত্ৰা পস্সতীতি এৰং পস্সন্তিযাপি চ তথা অনাপত্তীতি অজ্ঝাহারযোজনা। পটিপথেতি গমনমগ্গাভিমুখে। আপদাসুপীতি তাদিসেন উপদ্দৰেন উপদ্দুতা সমজ্জট্ঠানং পৰিসতি, এৰং পৰিসিত্ৰা পস্সন্তিযা ৰা সুণন্তিযা ৰা অনাপত্তি।
2192. Maggaṃ gacchantī paṭipathe naccaṃ aṭṭhatvā passatīti evaṃ passantiyāpi ca tathā anāpattīti ajjhāhārayojanā. Paṭipatheti gamanamaggābhimukhe. Āpadāsupīti tādisena upaddavena upaddutā samajjaṭṭhānaṃ pavisati, evaṃ pavisitvā passantiyā vā suṇantiyā vā anāpatti.
২১৯৩. ইদং সিক্খাপদং সমুট্ঠানতো এল়কলোমসিক্খাপদেন সমং মতং ‘‘সমান’’ন্তি ৰিঞ্ঞাতং।
2193.Idaṃ sikkhāpadaṃ samuṭṭhānato eḷakalomasikkhāpadena samaṃ mataṃ ‘‘samāna’’nti viññātaṃ.
দসমং।
Dasamaṃ.
লসুণৰগ্গো পঠমো।
Lasuṇavaggo paṭhamo.
২১৯৪-৫. ইধ ইমস্মিং সাসনে যা পন ভিক্খুনী রত্তন্ধকারস্মিং অপ্পদীপে পুরিসেন সদ্ধিং একিকা সচে সন্তিট্ঠতি, তস্সা পাচিত্তিযং ৰুত্তন্তি যোজনা। রত্তন্ধকারস্মিন্তি রত্তিযং। রত্তিপরিযাযো হি রত্তন্ধকার-সদ্দো। যথাহ পদভাজনে ‘‘রত্তন্ধকারেতি ওগ্গতে সূরিযে’’তি (পাচি॰ ৮৪০)। অপ্পদীপেতি পজ্জোতচন্দসূরিযঅগ্গীসু একেনাপি অনোভাসিতে, ইমিনা রত্তিক্খেত্তং দস্সেতি। ‘‘সন্তিট্ঠতী’’তি ইমিনা গমননিসিন্নসযনসঙ্খাতং ইরিযাপথত্তিকঞ্চ উপলক্খিতন্তি দট্ঠব্বং। ৰুত্তঞ্হি ৰজিরবুদ্ধিনা ‘‘সন্তিট্ঠেয্যাতি এত্থ ঠানাপদেসেন চতুব্বিধোপি ইরিযাপথো সঙ্গহিতো, তস্মা পুরিসেন সদ্ধিং চঙ্কমনাদীনি করোন্তিযাপি পাচিত্তিযঞ্চ উপলব্ভতী’’তি (ৰজির॰ টী॰ পাচিত্তিয ৮৩৯ থোকং ৰিসদিসং)। পুরিসেন সদ্ধিন্তি সন্তিট্ঠিতুং, সল্লপিতুঞ্চ ৰিঞ্ঞুনা মনুস্সপুরিসেন সদ্ধিং।
2194-5.Idha imasmiṃ sāsane yā pana bhikkhunī rattandhakārasmiṃ appadīpe purisena saddhiṃ ekikā sace santiṭṭhati, tassā pācittiyaṃ vuttanti yojanā. Rattandhakārasminti rattiyaṃ. Rattipariyāyo hi rattandhakāra-saddo. Yathāha padabhājane ‘‘rattandhakāreti oggate sūriye’’ti (pāci. 840). Appadīpeti pajjotacandasūriyaaggīsu ekenāpi anobhāsite, iminā rattikkhettaṃ dasseti. ‘‘Santiṭṭhatī’’ti iminā gamananisinnasayanasaṅkhātaṃ iriyāpathattikañca upalakkhitanti daṭṭhabbaṃ. Vuttañhi vajirabuddhinā ‘‘santiṭṭheyyāti ettha ṭhānāpadesena catubbidhopi iriyāpatho saṅgahito, tasmā purisena saddhiṃ caṅkamanādīni karontiyāpi pācittiyañca upalabbhatī’’ti (vajira. ṭī. pācittiya 839 thokaṃ visadisaṃ). Purisena saddhinti santiṭṭhituṃ, sallapituñca viññunā manussapurisena saddhiṃ.
রহস্সাদৰসেন পুরিসস্স হত্থপাসং সমাগন্ত্ৰা তেন সদ্ধিং সল্লপন্তিযা ৰা পাচিত্তিযং ৰুত্তন্তি যোজনা।
Rahassādavasena purisassa hatthapāsaṃ samāgantvā tena saddhiṃ sallapantiyā vā pācittiyaṃ vuttanti yojanā.
২১৯৬-৭. যা পন ভিক্খুনী সচে মনুস্সপুরিসস্স হত্থপাসং ৰিজহিত্ৰা সন্তিট্ঠতি ৰা সল্লপতি ৰা, যক্খপেততিরচ্ছানগতানং হত্থপাসং অৰিজহিত্ৰা সন্তিট্ঠতি ৰা সল্লপতি ৰা, তস্সা দুক্কটং পরিদীপিতন্তি যোজনা।
2196-7. Yā pana bhikkhunī sace manussapurisassa hatthapāsaṃ vijahitvā santiṭṭhati vā sallapati vā, yakkhapetatiracchānagatānaṃ hatthapāsaṃ avijahitvā santiṭṭhati vā sallapati vā, tassā dukkaṭaṃ paridīpitanti yojanā.
ৰিঞ্ঞুগ্গহণেন অৰিঞ্ঞূ পুরিসো অনাপত্তিং ন করোতীতি দীপেতি।
Viññuggahaṇena aviññū puriso anāpattiṃ na karotīti dīpeti.
২১৯৮. অঞ্ঞৰিহিতাযাতি রহোঅস্সাদতো অঞ্ঞং চিন্তেন্তিযা। যথাহ ‘‘রহোঅস্সাদতো অঞ্ঞৰিহিতাৰ হুত্ৰা’’তি (পাচি॰ অট্ঠ॰ ৮৪১)। চতুত্থেন, ছট্ঠেন চ সমুট্ঠানেন সমুট্ঠানতো থেয্যসত্থসমুট্ঠানং। সন্তিট্ঠনসল্লপনৰসেন ক্রিযং। সঞ্ঞায ৰিমোক্খো এতস্মিন্তি সঞ্ঞাৰিমোক্খকং।
2198.Aññavihitāyāti rahoassādato aññaṃ cintentiyā. Yathāha ‘‘rahoassādato aññavihitāva hutvā’’ti (pāci. aṭṭha. 841). Catutthena, chaṭṭhena ca samuṭṭhānena samuṭṭhānato theyyasatthasamuṭṭhānaṃ. Santiṭṭhanasallapanavasena kriyaṃ. Saññāya vimokkho etasminti saññāvimokkhakaṃ.
পঠমং।
Paṭhamaṃ.
২১৯৯. পটিচ্ছন্নে ওকাসেতি কুট্টাদীসু যেন কেনচি পটিচ্ছন্নে ওকাসে। ইদং ৰচনং।
2199.Paṭicchanne okāseti kuṭṭādīsu yena kenaci paṭicchanne okāse. Idaṃ vacanaṃ.
দুতিযং।
Dutiyaṃ.
২২০০. ততিযে ‘‘অজ্ঝোকাসে’’তি চ চতুত্থে ‘‘রথিকায, ব্যূহে, সিঙ্ঘাটকে’’তি পদানি চ ৰজ্জেত্ৰা অৰসেসং সন্ধাযাহ ‘‘অপুব্বং নত্থি কিঞ্চিপী’’তি। এত্থ ‘‘ৰত্তব্ব’’ন্তি সেসো। এত্থ চ রথিকাযাতি রচ্ছায। ব্যূহেতি অনিব্বিদ্ধরচ্ছায। সিঙ্ঘাটকেতি চচ্চরে ওকাসে, তিকোণং ৰা চতুকোণং ৰা মগ্গসমোধানট্ঠানেতি ৰুত্তং হোতি।
2200. Tatiye ‘‘ajjhokāse’’ti ca catutthe ‘‘rathikāya, byūhe, siṅghāṭake’’ti padāni ca vajjetvā avasesaṃ sandhāyāha ‘‘apubbaṃ natthi kiñcipī’’ti. Ettha ‘‘vattabba’’nti seso. Ettha ca rathikāyāti racchāya. Byūheti anibbiddharacchāya. Siṅghāṭaketi caccare okāse, tikoṇaṃ vā catukoṇaṃ vā maggasamodhānaṭṭhāneti vuttaṃ hoti.
ততিযচতুত্থানি।
Tatiyacatutthāni.
২২০১-২. ‘‘যা পন ভিক্খুনী পুরেভত্তং কুলানি উপসঙ্কমিত্ৰা আসনে নিসীদিত্ৰা সামিকে অনাপুচ্ছা পক্কমেয্য, পাচিত্তিয’’ন্তি (পাচি॰ ৮৫৫) ৰচনতো যা পন ভিক্খুনী পুরেভত্তং কুলানি উপসঙ্কমিত্ৰা ছদনন্তো আসনে নিসীদিত্ৰা সামিকে অনাপুচ্ছা অনোৰস্সকপ্পদেসং অতিক্কমেতি, যা চ অজ্ঝোকাসে ৰা নিসীদিত্ৰা সচে উপচারং অতিক্কমেতি, তস্সা পঠমে পদে দুক্কটং হোতি, দুতিযে পদে পাচিত্তি পরিযাপুতাতি যোজনা। ‘‘আসনে’’তি ইমিনা পল্লঙ্কমাভুজিত্ৰা নিসীদনারহমাসনং অধিপ্পেতং। যথাহ – ‘‘আসনং নাম পল্লঙ্কস্স ওকাসো ৰুচ্চতী’’তি (পাচি॰ ৮৫৬)। অনোৰস্সপ্পদেসন্তি নিব্বকোসব্ভন্তরং। অব্ভোকাসে আপত্তিখেত্তং দস্সেতুমাহ ‘‘উপচারম্পি ৰা সচে’’তি। উপচারন্তি দ্ৰাদসহত্থপ্পমাণং পদেসং। যথাহ গণ্ঠিপদে ‘‘উপচারো দ্ৰাদসহত্থো’’তি।
2201-2. ‘‘Yā pana bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkameyya, pācittiya’’nti (pāci. 855) vacanato yā pana bhikkhunī purebhattaṃ kulāni upasaṅkamitvā chadananto āsane nisīditvā sāmike anāpucchā anovassakappadesaṃ atikkameti, yā ca ajjhokāse vā nisīditvā sace upacāraṃ atikkameti, tassā paṭhame pade dukkaṭaṃ hoti, dutiye pade pācitti pariyāputāti yojanā. ‘‘Āsane’’ti iminā pallaṅkamābhujitvā nisīdanārahamāsanaṃ adhippetaṃ. Yathāha – ‘‘āsanaṃ nāma pallaṅkassa okāso vuccatī’’ti (pāci. 856). Anovassappadesanti nibbakosabbhantaraṃ. Abbhokāse āpattikhettaṃ dassetumāha ‘‘upacārampi vā sace’’ti. Upacāranti dvādasahatthappamāṇaṃ padesaṃ. Yathāha gaṇṭhipade ‘‘upacāro dvādasahattho’’ti.
২২০৩. ‘‘তথা’’তি ইমিনা ‘‘দুক্কটং সমুদীরিত’’ন্তি ইদং পচ্চামসতি। আপুট্ঠে অনাপুট্ঠসঞ্ঞায আপুট্ঠে ৰিচিকিচ্ছতো পক্কমন্তিযা তথা দুক্কটন্তি যোজনা। এত্থ চ ‘‘ভিক্খুনিযা’’তি সম্বন্ধিনিযা সমানত্তা ‘‘ৰিচিকিচ্ছন্তিযা’’তি ৰত্তব্বে লিঙ্গৰিপল্লাসৰসেন ‘‘ৰিচিকিচ্ছতো’’তি ৰুত্তন্তি দট্ঠব্বং।
2203.‘‘Tathā’’ti iminā ‘‘dukkaṭaṃ samudīrita’’nti idaṃ paccāmasati. Āpuṭṭhe anāpuṭṭhasaññāya āpuṭṭhe vicikicchato pakkamantiyā tathā dukkaṭanti yojanā. Ettha ca ‘‘bhikkhuniyā’’ti sambandhiniyā samānattā ‘‘vicikicchantiyā’’ti vattabbe liṅgavipallāsavasena ‘‘vicikicchato’’ti vuttanti daṭṭhabbaṃ.
২২০৪. গিলানাযাতি যা তাদিসেন গেলঞ্ঞেন আপুচ্ছিতুং ন সক্কোতি। আপদাসূতি ঘরে অগ্গি উট্ঠিতো হোতি চোরা ৰা, এৰরূপে উপদ্দৰে অনাপুচ্ছা পক্কমন্তিযা অনাপত্তি।
2204.Gilānāyāti yā tādisena gelaññena āpucchituṃ na sakkoti. Āpadāsūti ghare aggi uṭṭhito hoti corā vā, evarūpe upaddave anāpucchā pakkamantiyā anāpatti.
পঞ্চমং।
Pañcamaṃ.
২২০৫-৬. ‘‘গচ্ছন্তিযা ৰজন্তিযা’’তি চ নিসীদননিপজ্জনাৰসানদস্সনত্থং ৰুত্তং। পাচিত্তিযং পন পচ্ছাভত্তং সামিকে ‘‘ইধ নিসীদাম ৰা সযাম ৰা’’তি অনাপুচ্ছিত্ৰা নিসিন্ননিপন্নপচ্চযা হোতীতি ৰেদিতব্বং। পচ্ছাভত্তং সামিকে অনাপুচ্ছা আসনে নিসীদিত্ৰা গচ্ছন্তিযা একা পাচিত্তি হোতীতি যোজনা। এস নযো ‘‘নিপজ্জিত্ৰা’’তিআদীসুপি।
2205-6.‘‘Gacchantiyā vajantiyā’’ti ca nisīdananipajjanāvasānadassanatthaṃ vuttaṃ. Pācittiyaṃ pana pacchābhattaṃ sāmike ‘‘idha nisīdāma vā sayāma vā’’ti anāpucchitvā nisinnanipannapaccayā hotīti veditabbaṃ. Pacchābhattaṃ sāmike anāpucchā āsane nisīditvā gacchantiyā ekā pācitti hotīti yojanā. Esa nayo ‘‘nipajjitvā’’tiādīsupi.
যথা পন তত্থ অসংহারিমে অনাপত্তি, এৰমিধ ধুৰপঞ্ঞত্তে ৰা অনাপত্তীতি।
Yathā pana tattha asaṃhārime anāpatti, evamidha dhuvapaññatte vā anāpattīti.
ছট্ঠং।
Chaṭṭhaṃ.
২২০৭. তিসমুট্ঠানন্তি সচিত্তকেহি তীহি সমুট্ঠানেহি সমুট্ঠানতো।
2207.Tisamuṭṭhānanti sacittakehi tīhi samuṭṭhānehi samuṭṭhānato.
অট্ঠমং।
Aṭṭhamaṃ.
২২০৮. যা পন ভিক্খুনী অত্তানম্পি ৰা পরম্পি ৰা নিরযব্রহ্মচরিযেহি অভিসপেয্য, তস্সা ৰাচতো ৰাচতো সিযা পাচিত্তীতি যোজনা। তত্থ অভিসপেয্যাতি সপথং করেয্য, ‘‘নিরযে নিব্বত্তামি, অৰীচিম্হি নিব্বত্তামী’’তি অত্তানং ৰা ‘‘নিরযে নিব্বত্ততু, অৰীচিম্হি নিব্বত্ততূ’’তি পরং ৰা ‘‘গিহিনী হোমি, ওদাতৰত্থা হোমী’’তি অত্তানং ৰা ‘‘গিহিনী হোতু, ওদাতৰত্থা হোতূ’’তি পরং ৰা অভিসপেয্যাতি ৰুত্তং হোতি।
2208. Yā pana bhikkhunī attānampi vā parampi vā nirayabrahmacariyehi abhisapeyya, tassā vācato vācato siyā pācittīti yojanā. Tattha abhisapeyyāti sapathaṃ kareyya, ‘‘niraye nibbattāmi, avīcimhi nibbattāmī’’ti attānaṃ vā ‘‘niraye nibbattatu, avīcimhi nibbattatū’’ti paraṃ vā ‘‘gihinī homi, odātavatthā homī’’ti attānaṃ vā ‘‘gihinī hotu, odātavatthā hotū’’ti paraṃ vā abhisapeyyāti vuttaṃ hoti.
২২১০. অক্কোসতি অত্তানং ৰা পরং ৰাতি সম্বন্ধো। তিকপাচিত্তিযন্তি উপসম্পন্নায উপসম্পন্নসঞ্ঞাৰেমতিকাঅনুপসম্পন্নসঞ্ঞাৰসেন। সেসাযাতি অনুপসম্পন্নায। অনুপসম্পন্নায উপসম্পন্নসঞ্ঞা, ৰেমতিকা, অনুপসম্পন্নসঞ্ঞা অক্কোসতি, দুক্কটন্তি এৰং তিকদুক্কটং।
2210. Akkosati attānaṃ vā paraṃ vāti sambandho. Tikapācittiyanti upasampannāya upasampannasaññāvematikāanupasampannasaññāvasena. Sesāyāti anupasampannāya. Anupasampannāya upasampannasaññā, vematikā, anupasampannasaññā akkosati, dukkaṭanti evaṃ tikadukkaṭaṃ.
২২১১. অত্থধম্মানুসাসনিং পুরক্খত্ৰা ৰদন্তীনং অনাপত্তীতি যোজনা। যথাহ অট্ঠকথাযং ‘‘অত্থপুরেক্খারাযাতি অট্ঠকথং কথেন্তিযা। ধম্মপুরেক্খারাযাতি পাল়িং ৰাচেন্তিযা। অনুসাসনিপুরেক্খারাযাতি ‘ইদানিপি ত্ৰং এদিসা, সাধু ৰিরমস্সু, নো চে ৰিরমসি, অদ্ধা পুন এৰরূপানি কম্মানি কত্ৰা নিরযে উপ্পজ্জিস্সসি, তিরচ্ছানযোনিযা উপ্পজ্জিস্সসী’তি এৰং অনুসাসনিযং ঠত্ৰা ৰদন্তিযা অনাপত্তী’’তি (পাচি॰ অট্ঠ॰ ৮৭৮)।
2211. Atthadhammānusāsaniṃ purakkhatvā vadantīnaṃ anāpattīti yojanā. Yathāha aṭṭhakathāyaṃ ‘‘atthapurekkhārāyāti aṭṭhakathaṃ kathentiyā. Dhammapurekkhārāyāti pāḷiṃ vācentiyā. Anusāsanipurekkhārāyāti ‘idānipi tvaṃ edisā, sādhu viramassu, no ce viramasi, addhā puna evarūpāni kammāni katvā niraye uppajjissasi, tiracchānayoniyā uppajjissasī’ti evaṃ anusāsaniyaṃ ṭhatvā vadantiyā anāpattī’’ti (pāci. aṭṭha. 878).
নৰমং।
Navamaṃ.
২২১২. ৰধিত্ৰাতি সত্থাদীহি পহরিত্ৰা। ৰধিত্ৰা ৰাতি এত্থ ৰা-সদ্দো পাল়িযং ‘‘ৰধিত্ৰা ৰধিত্ৰা’’তি (পাচি॰ ৮৮০) ৰুত্তং আমেডিতং সূচেতি।
2212.Vadhitvāti satthādīhi paharitvā. Vadhitvā vāti ettha vā-saddo pāḷiyaṃ ‘‘vadhitvā vadhitvā’’ti (pāci. 880) vuttaṃ āmeḍitaṃ sūceti.
২২১৩. এত্থাতি ইমস্মিং সিক্খাপদে। কাযৰাচাচিত্তসমুট্ঠানং ধুরনিক্খেপসমুট্ঠানং নাম, সমনুভাসনসমুট্ঠানন্তিপি এতস্সেৰ নামং।
2213.Etthāti imasmiṃ sikkhāpade. Kāyavācācittasamuṭṭhānaṃ dhuranikkhepasamuṭṭhānaṃ nāma, samanubhāsanasamuṭṭhānantipi etasseva nāmaṃ.
দসমং।
Dasamaṃ.
অন্ধকারৰগ্গো দুতিযো।
Andhakāravaggo dutiyo.
২২১৪. যা পন ভিক্খুনী নগ্গা অনিৰত্থা অপারুতা হুত্ৰা নহাযতি, অস্সা সব্বপযোগে দুক্কটং। তস্স নহানস্স ৰোসানে পরিযোসানে সা ভিক্খুনী জিনৰুত্তং জিনেন ভগৰতা ভিক্খুনীনং পঞ্ঞত্তং দোসং পাচিত্তিযাপত্তিং সমুপেতি আপজ্জতীতি যোজনা। ভিক্খুনি দোসন্তি এত্থ গাথাবন্ধৰসেন রস্সো কতো।
2214. Yā pana bhikkhunī naggā anivatthā apārutā hutvā nahāyati, assā sabbapayoge dukkaṭaṃ. Tassa nahānassa vosāne pariyosāne sā bhikkhunī jinavuttaṃ jinena bhagavatā bhikkhunīnaṃ paññattaṃ dosaṃ pācittiyāpattiṃ samupeti āpajjatīti yojanā. Bhikkhuni dosanti ettha gāthābandhavasena rasso kato.
২২১৫. অচ্ছিন্নচীৰরাতি অচ্ছিন্নউদকসাটিকচীৰরা। নট্ঠচীৰরাতি চোরাদীহি নট্ঠউদকসাটিকচীৰরা। আপদাসু ৰাতি ‘‘মহগ্ঘং ইমং দিস্ৰা চোরাপি হরেয্যু’’ন্তি এৰরূপাসু আপদাসু ৰা নগ্গায নহাযন্তিযা ন দোসো।
2215.Acchinnacīvarāti acchinnaudakasāṭikacīvarā. Naṭṭhacīvarāti corādīhi naṭṭhaudakasāṭikacīvarā. Āpadāsu vāti ‘‘mahagghaṃ imaṃ disvā corāpi hareyyu’’nti evarūpāsu āpadāsu vā naggāya nahāyantiyā na doso.
পঠমং।
Paṭhamaṃ.
২২১৬. দুতিযেতি ‘‘উদকসাটিকং পন ভিক্খুনিযা কারযমানাযা’’তিআদিসিক্খাপদে (পাচি॰ ৮৮৮)।
2216.Dutiyeti ‘‘udakasāṭikaṃ pana bhikkhuniyā kārayamānāyā’’tiādisikkhāpade (pāci. 888).
দুতিযং।
Dutiyaṃ.
২২১৭-৮. দুস্সিব্বিতং চীৰরন্তি অসক্কচ্চসিব্বিতং চীৰরং। ৰিসিব্বেত্ৰাতি দুস্সিব্বিতং পুন সিব্বনত্থায সযং ৰা ৰিগতসিব্বনং কত্ৰা। ‘‘ৰিসিব্বাপেত্ৰা’’তি সেসো। যথাহ ‘‘ৰিসিব্বেত্ৰা ৰা ৰিসিব্বাপেত্ৰা ৰা’’তি (পাচি॰ ৮৯৩)। অনন্তরাযাতি দসসু অন্তরাযেসু অঞ্ঞতরন্তরাযরহিতা। তং ৰিসিব্বিতং, ৰিসিব্বাপিতং ৰা চীৰরং। ‘‘অনন্তরাযা তং পচ্ছা’’তি ৰত্তব্বে গাথাবন্ধৰসেন রস্সো কতো। ন সিব্বেয্যাতি এত্থাপি ‘‘ন সিব্বাপেয্যা’’তি সেসো। যথাহ ‘‘নেৰ সিব্বেয্য, ন সিব্বাপনায উস্সুক্কং করেয্যা’’তি (পাচি॰ ৮৯৩)।
2217-8.Dussibbitaṃ cīvaranti asakkaccasibbitaṃ cīvaraṃ. Visibbetvāti dussibbitaṃ puna sibbanatthāya sayaṃ vā vigatasibbanaṃ katvā. ‘‘Visibbāpetvā’’ti seso. Yathāha ‘‘visibbetvā vā visibbāpetvā vā’’ti (pāci. 893). Anantarāyāti dasasu antarāyesu aññatarantarāyarahitā. Taṃ visibbitaṃ, visibbāpitaṃ vā cīvaraṃ. ‘‘Anantarāyā taṃ pacchā’’ti vattabbe gāthābandhavasena rasso kato. Na sibbeyyāti etthāpi ‘‘na sibbāpeyyā’’ti seso. Yathāha ‘‘neva sibbeyya, na sibbāpanāya ussukkaṃ kareyyā’’ti (pāci. 893).
চতুপঞ্চাহন্তি এত্থ ‘‘উত্তরিছপ্পঞ্চৰাচাহি (পাচি॰ ৬২-৬৪), উত্তরিদিরত্ততিরত্ত’’ন্তিআদীসু (পাচি॰ ৫১-৫২) ৰিয অপ্পসঙ্খ্যায বহুসঙ্খ্যাযং অন্তোগধত্তেপি উভযৰচনং লোকৰোহারৰসেন ৰচনসিলিট্ঠতাযাতি দট্ঠব্বং। ধুরেতি সিব্বনুস্সাহে। নিক্খিত্তমত্তেতি ৰিস্সট্ঠমত্তে।
Catupañcāhanti ettha ‘‘uttarichappañcavācāhi (pāci. 62-64), uttaridirattatiratta’’ntiādīsu (pāci. 51-52) viya appasaṅkhyāya bahusaṅkhyāyaṃ antogadhattepi ubhayavacanaṃ lokavohāravasena vacanasiliṭṭhatāyāti daṭṭhabbaṃ. Dhureti sibbanussāhe. Nikkhittamatteti vissaṭṭhamatte.
২২১৯. তিকপাচিত্তিযং ৰুত্তন্তি উপসম্পন্নায উপসম্পন্নসঞ্ঞা, ৰেমতিকা, অনুপসম্পন্নসঞ্ঞাতি তীসু ৰারেসু তিকপাচিত্তিযং ৰুত্তং। সেসাযাতি অনুপসম্পন্নায। তিকদুক্কটন্তি ৰারত্তযে দুক্কটত্তযং।
2219.Tikapācittiyaṃ vuttanti upasampannāya upasampannasaññā, vematikā, anupasampannasaññāti tīsu vāresu tikapācittiyaṃ vuttaṃ. Sesāyāti anupasampannāya. Tikadukkaṭanti vārattaye dukkaṭattayaṃ.
২২২০. উভিন্নন্তি উপসম্পন্নানুপসম্পন্নানং। অঞ্ঞস্মিন্তি চীৰরতো অঞ্ঞস্মিং। অন্তরাযেপি ৰা সতীতি রাজচোরাদিঅন্তরাযানং দসন্নং অঞ্ঞতরে সতি।
2220.Ubhinnanti upasampannānupasampannānaṃ. Aññasminti cīvarato aññasmiṃ. Antarāyepi vā satīti rājacorādiantarāyānaṃ dasannaṃ aññatare sati.
২২২১. ‘‘ধুরনিক্খেপনং নাম, সমুট্ঠানমিদং মত’’ন্তি ইদং অট্ঠকথায ‘‘ধুরনিক্খেপসমুট্ঠান’’ন্তি (পাচি॰ অট্ঠ॰ ৮৯৩) ৰুত্তমেৰ গহেত্ৰা ৰুত্তং, তেরসসু সমুট্ঠানসীসেসু ‘‘ধুরনিক্খেপসমুট্ঠান’’ন্তি ৰিসুং সমুট্ঠানসীসং নাম নত্থি। মাতিকট্ঠকথাযঞ্চ ‘‘সমনুভাসনসমুট্ঠান’’ন্তি (কঙ্খা॰ অট্ঠ॰ চীৰরসিব্বনসিক্খাপদৰণ্ণনা, অত্থতো সমানং) ৰুত্তং, তং সমুট্ঠানসীসেসু অন্তোগধমেৰ। তস্মা ‘‘ধুরনিক্খেপসমুট্ঠান’’ন্তি ইদং সমনুভাসনসমুট্ঠানস্সেৰ পরিযাযোতি গহেতব্বং।
2221.‘‘Dhuranikkhepanaṃ nāma, samuṭṭhānamidaṃ mata’’nti idaṃ aṭṭhakathāya ‘‘dhuranikkhepasamuṭṭhāna’’nti (pāci. aṭṭha. 893) vuttameva gahetvā vuttaṃ, terasasu samuṭṭhānasīsesu ‘‘dhuranikkhepasamuṭṭhāna’’nti visuṃ samuṭṭhānasīsaṃ nāma natthi. Mātikaṭṭhakathāyañca ‘‘samanubhāsanasamuṭṭhāna’’nti (kaṅkhā. aṭṭha. cīvarasibbanasikkhāpadavaṇṇanā, atthato samānaṃ) vuttaṃ, taṃ samuṭṭhānasīsesu antogadhameva. Tasmā ‘‘dhuranikkhepasamuṭṭhāna’’nti idaṃ samanubhāsanasamuṭṭhānasseva pariyāyoti gahetabbaṃ.
ততিযং।
Tatiyaṃ.
২২২২. পঞ্চ অহানি পঞ্চাহং, পঞ্চাহমেৰ পঞ্চাহিকং। ‘‘অতিক্কমেয্যা’’তি কিরিযায দ্ৰিকম্মকত্তা ‘‘পঞ্চাহিক’’ন্তি চ ‘‘সঙ্ঘাটিচার’’ন্তি চ উপযোগত্থে এৰ উপযোগৰচনং। সঙ্ঘটিতট্ঠেন সঙ্ঘাটি, ইতি ৰক্খমানানং পঞ্চন্নং চীৰরানমেৰাধিৰচনং, সঙ্ঘাটীনং চারো সঙ্ঘাটিচারো, পরিভোগৰসেন ৰা ওতাপনৰসেন ৰা পরিৰত্তনন্তি অত্থো। ‘‘পঞ্চাহিকং সঙ্ঘাটিচারং অতিক্কমেয্যাতি পঞ্চমং দিৰসং পঞ্চ চীৰরানি নেৰ নিৰাসেতি ন পারুপতি ন ওতাপেতি পঞ্চমং দিৰসং অতিক্কামেতি, আপত্তি পাচিত্তিযস্সা’’তি (পাচি॰ ৮৯৯) ৰচনতো পঞ্চদিৰসব্ভন্তরে যং কিঞ্চি অকত্ৰা অতিক্কামেন্তিযা চীৰরগণনায পাচিত্তি হোতীতি দস্সেতুমাহ ‘‘যাতিক্কমেয্যা’’তিআদি।
2222. Pañca ahāni pañcāhaṃ, pañcāhameva pañcāhikaṃ. ‘‘Atikkameyyā’’ti kiriyāya dvikammakattā ‘‘pañcāhika’’nti ca ‘‘saṅghāṭicāra’’nti ca upayogatthe eva upayogavacanaṃ. Saṅghaṭitaṭṭhena saṅghāṭi, iti vakkhamānānaṃ pañcannaṃ cīvarānamevādhivacanaṃ, saṅghāṭīnaṃ cāro saṅghāṭicāro, paribhogavasena vā otāpanavasena vā parivattananti attho. ‘‘Pañcāhikaṃ saṅghāṭicāraṃ atikkameyyāti pañcamaṃ divasaṃ pañca cīvarāni neva nivāseti na pārupati na otāpeti pañcamaṃ divasaṃ atikkāmeti, āpatti pācittiyassā’’ti (pāci. 899) vacanato pañcadivasabbhantare yaṃ kiñci akatvā atikkāmentiyā cīvaragaṇanāya pācitti hotīti dassetumāha ‘‘yātikkameyyā’’tiādi.
২২২৩. তিচীৰরন্তি অন্তরৰাসকউত্তরাসঙ্গসঙ্ঘাটিসঙ্খাতং তিচীৰরঞ্চ। সংকচ্চীতি থনৰেঠনসঙ্খাতং চীৰরঞ্চ। দকসাটীতি উতুনিকালে নিৰাসেতব্বউদকসাটিচীৰরঞ্চ। ইতি ইমে পঞ্চ। পঞ্চ তূতি পঞ্চ চীৰরানি নাম।
2223.Ticīvaranti antaravāsakauttarāsaṅgasaṅghāṭisaṅkhātaṃ ticīvarañca. Saṃkaccīti thanaveṭhanasaṅkhātaṃ cīvarañca. Dakasāṭīti utunikāle nivāsetabbaudakasāṭicīvarañca. Iti ime pañca. Pañca tūti pañca cīvarāni nāma.
২২২৪-৫. তিকপাচিত্তীতি পঞ্চাহাতিক্কন্তসঞ্ঞা, ৰেমতিকা, অনতিক্কন্তসঞ্ঞাতি ৰিকপ্পত্তযে পাচিত্তিযত্তযং হোতি। পঞ্চাহানতিক্কন্তে অতিক্কন্তসঞ্ঞাৰেমতিকানং ৰসেন দ্ৰিকদুক্কটং।
2224-5.Tikapācittīti pañcāhātikkantasaññā, vematikā, anatikkantasaññāti vikappattaye pācittiyattayaṃ hoti. Pañcāhānatikkante atikkantasaññāvematikānaṃ vasena dvikadukkaṭaṃ.
‘‘পঞ্চমে দিৰসে’’তিআদি অনাপত্তিৰারসন্দস্সনং। নিসেৰতীতি নিৰাসেতি ৰা পারুপতি ৰা। ওতাপেতীতি এত্থ ৰা-সদ্দো লুত্তনিদ্দিট্ঠো, ওতাপেতি ৰাতি অত্থো। আপদাসুপীতি মহগ্ঘং চীৰরং, ন সক্কা হোতি চোরভযাদীসু পরিভুঞ্জিতুং, এৰরূপে উপদ্দৰে অনাপত্তি।
‘‘Pañcame divase’’tiādi anāpattivārasandassanaṃ. Nisevatīti nivāseti vā pārupati vā. Otāpetīti ettha vā-saddo luttaniddiṭṭho, otāpeti vāti attho. Āpadāsupīti mahagghaṃ cīvaraṃ, na sakkā hoti corabhayādīsu paribhuñjituṃ, evarūpe upaddave anāpatti.
চতুত্থং।
Catutthaṃ.
২২২৬. অঞ্ঞিস্সা সঙ্কমেতব্বচীৰরং অনাপুচ্ছা গহেত্ৰা যা পরিভুঞ্জতি, তস্সা পাচিত্তিযং সিযাতি যোজনা, অঞ্ঞিস্সা উপসম্পন্নায সন্তকং পঞ্চন্নং চীৰরানং অঞ্ঞতরং তস্সা অৰত্ৰা আদায পুন তস্সা দাতব্বং, অদত্ৰা যা ভিক্খুনী পটিসেৰতি, তস্সা পাচিত্তিযং হোতীতি অত্থো। ‘‘সঙ্কমেতব্বচীৰরং সঙ্কমনীয’’ন্তি পরিযাযসদ্দা এতে। যথাহ ‘‘চীৰরসঙ্কমনীযন্তি সঙ্কমেতব্বচীৰরং, অঞ্ঞিস্সা সন্তকং অনাপুচ্ছা গহিতং পুন পটিদাতব্বচীৰরন্তি অত্থো’’তি (পাচি॰ অট্ঠ॰ ৯০৩)।
2226. Aññissā saṅkametabbacīvaraṃ anāpucchā gahetvā yā paribhuñjati, tassā pācittiyaṃ siyāti yojanā, aññissā upasampannāya santakaṃ pañcannaṃ cīvarānaṃ aññataraṃ tassā avatvā ādāya puna tassā dātabbaṃ, adatvā yā bhikkhunī paṭisevati, tassā pācittiyaṃ hotīti attho. ‘‘Saṅkametabbacīvaraṃ saṅkamanīya’’nti pariyāyasaddā ete. Yathāha ‘‘cīvarasaṅkamanīyanti saṅkametabbacīvaraṃ, aññissā santakaṃ anāpucchā gahitaṃ puna paṭidātabbacīvaranti attho’’ti (pāci. aṭṭha. 903).
২২২৭. তিকপাচিত্তিযং ৰুত্তন্তি ‘‘উপসম্পন্নায উপসম্পন্নসঞ্ঞা…পে॰… ৰেমতিকা …পে॰… অনুপসম্পন্নসঞ্ঞা চীৰরসঙ্কমনীযং ধারেতি, আপত্তি পাচিত্তিযস্সা’’তি (পাচি॰ ৯০৫) এৰং তিকপাচিত্তিযং পাল়িযং ৰুত্তং। সেসাযাতি অনুপসম্পন্নায। ‘‘তিকদুক্কট’’ন্তি ইদঞ্চ ৰুত্তনযমেৰ। আপদাসূতি সচে অপারুতং ৰা অনিৰত্থং ৰা চোরা হরন্তি, এৰরূপাসু আপদাসু ৰা।
2227.Tikapācittiyaṃ vuttanti ‘‘upasampannāya upasampannasaññā…pe… vematikā …pe… anupasampannasaññā cīvarasaṅkamanīyaṃ dhāreti, āpatti pācittiyassā’’ti (pāci. 905) evaṃ tikapācittiyaṃ pāḷiyaṃ vuttaṃ. Sesāyāti anupasampannāya. ‘‘Tikadukkaṭa’’nti idañca vuttanayameva. Āpadāsūti sace apārutaṃ vā anivatthaṃ vā corā haranti, evarūpāsu āpadāsu vā.
২২২৮. এতং সমুট্ঠানং কথিনেন তুল্যন্তি যোজনা। গহণং, পরিভোগো চ ক্রিযং। অনাপুচ্ছনং অক্রিযং।
2228. Etaṃ samuṭṭhānaṃ kathinena tulyanti yojanā. Gahaṇaṃ, paribhogo ca kriyaṃ. Anāpucchanaṃ akriyaṃ.
পঞ্চমং।
Pañcamaṃ.
২২২৯. লভিতব্বং তু চীৰরন্তি লভিতব্বং ৰিকপ্পনুপগং চীৰরং। নিৰারেতীতি যথা তে দাতুকামা ন দেন্তি, এৰং অন্তরাযং পরক্কমতি। পাচিত্তিং পরিদীপযেতি সচে তস্সা ৰচনেন তে ন দেন্তি, ভিক্খুনিযা পাচিত্তিযং ৰদেয্যাতি অত্থো।
2229.Labhitabbaṃ tu cīvaranti labhitabbaṃ vikappanupagaṃ cīvaraṃ. Nivāretīti yathā te dātukāmā na denti, evaṃ antarāyaṃ parakkamati. Pācittiṃ paridīpayeti sace tassā vacanena te na denti, bhikkhuniyā pācittiyaṃ vadeyyāti attho.
২২৩০. এত্থ পঠমং ‘‘সঙ্ঘস্সা’’তি ৰুত্তত্তা গণস্সাতি দ্ৰে তযোৰ গহেতব্বা। লাভেতি এত্থ ‘‘নিৰারিতে’’তি সেসো। সচে অঞ্ঞং পরিক্খারং নিৰারেতি, তথেৰ দুক্কটন্তি যোজনা। অঞ্ঞন্তি ৰিকপ্পনুপগচীৰরতো অঞ্ঞং। পরিক্খারন্তি যং কিঞ্চি থালকাদীনং ৰা সপ্পিতেলাদীনং ৰা অঞ্ঞতরং।
2230. Ettha paṭhamaṃ ‘‘saṅghassā’’ti vuttattā gaṇassāti dve tayova gahetabbā. Lābheti ettha ‘‘nivārite’’ti seso. Sace aññaṃ parikkhāraṃ nivāreti, tatheva dukkaṭanti yojanā. Aññanti vikappanupagacīvarato aññaṃ. Parikkhāranti yaṃ kiñci thālakādīnaṃ vā sappitelādīnaṃ vā aññataraṃ.
২২৩১. আনিসংসং নিদস্সেত্ৰাতি ‘‘কিত্তকং অগ্ঘনকং দাতুকামত্থাতি পুচ্ছতি, ‘এত্তকং নামা’তি ৰদন্তি, ‘আগমেথ তাৰ, ইদানি ৰত্থু মহগ্ঘং, কতিপাহেন কপ্পাসে আগতে সমগ্ঘং ভৰিস্সতী’’তি এৰং আনিসংসং দস্সেত্ৰা। ন দোসতাতি ন দোসো, অনাপত্তীতি অত্থো।
2231.Ānisaṃsaṃ nidassetvāti ‘‘kittakaṃ agghanakaṃ dātukāmatthāti pucchati, ‘ettakaṃ nāmā’ti vadanti, ‘āgametha tāva, idāni vatthu mahagghaṃ, katipāhena kappāse āgate samagghaṃ bhavissatī’’ti evaṃ ānisaṃsaṃ dassetvā. Na dosatāti na doso, anāpattīti attho.
ছট্ঠং।
Chaṭṭhaṃ.
২২৩২-৩. ধম্মিকং সমগ্গেন সঙ্ঘেন সন্নিপতিত্ৰা করিযমানং চীৰরানং ৰিভঙ্গং ভাজনং যা ভিক্খুনী পটিসেধেয্য পটিবাহেয্য, তস্সা এৰং পটিসেধেন্তিযা পাচিত্তিযং হোতীতি যোজনা। অধম্মে ধম্মসঞ্ঞায দুক্কটং পরিদীপিতন্তি যোজনা। উভো ৰেমতিকায ৰাতি উভোসু ৰেমতিকায। গাথাবন্ধৰসেন সু-সদ্দলোপো। ধম্মিকে অধম্মিকে চীৰরৰিভঙ্গে ৰেমতিকায পটিবাহন্তিযা দুক্কটং পরিদীপিতন্তি যোজনা। যথাহ ‘‘ধম্মিকে ৰেমতিকা পটিবাহতি, আপত্তি দুক্কটস্স। অধম্মিকে ৰেমতিকা পটিবাহতি, আপত্তি দুক্কটস্সা’’তি। আনিসংসং নিদস্সেত্ৰাতি ‘‘একিস্সা একং সাটকং নপ্পহোতি, আগমেথ তাৰ, কতিপাহেনেৰ উপ্পজ্জিস্সতি, ততো ভাজেস্সামী’’তি (পাচি॰ ৯১৪) এৰং আনিসংসং দস্সেত্ৰা।
2232-3.Dhammikaṃ samaggena saṅghena sannipatitvā kariyamānaṃ cīvarānaṃ vibhaṅgaṃ bhājanaṃ yā bhikkhunī paṭisedheyya paṭibāheyya, tassā evaṃ paṭisedhentiyā pācittiyaṃ hotīti yojanā. Adhamme dhammasaññāya dukkaṭaṃ paridīpitanti yojanā. Ubho vematikāya vāti ubhosu vematikāya. Gāthābandhavasena su-saddalopo. Dhammike adhammike cīvaravibhaṅge vematikāya paṭibāhantiyā dukkaṭaṃ paridīpitanti yojanā. Yathāha ‘‘dhammike vematikā paṭibāhati, āpatti dukkaṭassa. Adhammike vematikā paṭibāhati, āpatti dukkaṭassā’’ti. Ānisaṃsaṃ nidassetvāti ‘‘ekissā ekaṃ sāṭakaṃ nappahoti, āgametha tāva, katipāheneva uppajjissati, tato bhājessāmī’’ti (pāci. 914) evaṃ ānisaṃsaṃ dassetvā.
সত্তমং।
Sattamaṃ.
২২৩৫-৬. নিৰাসনুপগং ৰা তথা পারুপনুপগং ৰা কপ্পবিন্দুকতং ৰা যং কিঞ্চি চীৰরং পঞ্চ সহধম্মিকে চ মাতাপিতরোপি মুঞ্চিত্ৰা অঞ্ঞস্স যস্স কস্সচি গহট্ঠস্স ৰা পরিব্বাজকস্স ৰা যদি দদেয্য, তস্সাপি পাচিত্তিযং পরিযাপুতন্তি যোজনা। এত্থ চ ‘‘পিতরো’’তি মাতা চ পিতা চ মাতাপিতরোতি ৰত্তব্বে ৰিরূপেকসেসৰসেন নিদ্দেসো দট্ঠব্বো।
2235-6. Nivāsanupagaṃ vā tathā pārupanupagaṃ vā kappabindukataṃ vā yaṃ kiñci cīvaraṃ pañca sahadhammike ca mātāpitaropi muñcitvā aññassa yassa kassaci gahaṭṭhassa vā paribbājakassa vā yadi dadeyya, tassāpi pācittiyaṃ pariyāputanti yojanā. Ettha ca ‘‘pitaro’’ti mātā ca pitā ca mātāpitaroti vattabbe virūpekasesavasena niddeso daṭṭhabbo.
২২৩৭. এত্থ ইমস্মিং সিক্খাপদে তা পন পাচিত্তিযো চীৰরানং গণনায ৰসেন গণেতব্বাতি যোজনা।
2237.Ettha imasmiṃ sikkhāpade tā pana pācittiyo cīvarānaṃ gaṇanāya vasena gaṇetabbāti yojanā.
২২৩৮. তাৰ সম্পটিচ্ছিতো কালো এতস্সাতি তাৰকালিকং, চীৰরং। ‘‘অঞ্ঞস্সা’’তি পুব্বে ৰুত্তস্স দূরত্তা পুনপি ‘‘অঞ্ঞেস’’ন্তি আহ, সোযেৰত্থো।
2238. Tāva sampaṭicchito kālo etassāti tāvakālikaṃ, cīvaraṃ. ‘‘Aññassā’’ti pubbe vuttassa dūrattā punapi ‘‘aññesa’’nti āha, soyevattho.
অট্ঠমং।
Aṭṭhamaṃ.
২২৩৯. যা পন ভিক্খুনী ‘‘সচে মযং সক্কোম, দস্সাম করিস্সামাতি এৰং ৰাচা ভিন্না হোতী’’তি ৰুত্তায দুব্বলায চীৰরপচ্চাসায চীৰরস্স ৰিভঙ্গং নিসেধেত্ৰা চীৰরে কালং অতিক্কমেয্য, অস্সা দোসতা পাচিত্তিযাপত্তি হোতীতি যোজনা। চীৰরে কালন্তি ‘‘চীৰরকালসমযো নাম অনত্থতে কথিনে ৰস্সানস্স পচ্ছিমো মাসো, অত্থতে কথিনে পঞ্চমাসা’’তি (পাচি॰ ৯২২) পদভাজনে ৰুত্তং চীৰরকালং। অতিক্কমেয্যাতি ‘‘অনত্থতে কথিনে ৰস্সানস্স পচ্ছিমং দিৰসং, অত্থতে কথিনে কথিনুদ্ধারদিৰসং অতিক্কামেতী’’তি ৰুত্তৰিধিং অতিক্কামেয্য।
2239. Yā pana bhikkhunī ‘‘sace mayaṃ sakkoma, dassāma karissāmāti evaṃ vācā bhinnā hotī’’ti vuttāya dubbalāya cīvarapaccāsāya cīvarassa vibhaṅgaṃ nisedhetvā cīvare kālaṃ atikkameyya, assā dosatā pācittiyāpatti hotīti yojanā. Cīvare kālanti ‘‘cīvarakālasamayo nāma anatthate kathine vassānassa pacchimo māso, atthate kathine pañcamāsā’’ti (pāci. 922) padabhājane vuttaṃ cīvarakālaṃ. Atikkameyyāti ‘‘anatthate kathine vassānassa pacchimaṃ divasaṃ, atthate kathine kathinuddhāradivasaṃ atikkāmetī’’ti vuttavidhiṃ atikkāmeyya.
২২৪০. ‘‘অদুব্বলচীৰরে দুব্বলচীৰরসঞ্ঞা, আপত্তি দুক্কটস্সা’’তি ৰচনতো সুদুব্বলন্তি চেতসাতি এত্থ সু-সদ্দো পদপূরণে। উভোসূতি দুব্বলে, অদুব্বলে চ। কঙ্খিতায ৰাতি ৰেমতিকায ৰা।
2240. ‘‘Adubbalacīvare dubbalacīvarasaññā, āpatti dukkaṭassā’’ti vacanato sudubbalanti cetasāti ettha su-saddo padapūraṇe. Ubhosūti dubbale, adubbale ca. Kaṅkhitāya vāti vematikāya vā.
২২৪১. আনিসংসং নিদস্সেত্ৰাতি ‘‘কিঞ্চাপি ‘ন মযং অয্যে সক্কোমা’তি ৰদন্তি, ইদানি পন তেসং কপ্পাসো আগমিস্সতি, সদ্ধো পসন্নো পুরিসো আগমিস্সতি , অদ্ধা দস্সতী’’তি (পাচি॰ অট্ঠ॰ ৯২১) এৰং অট্ঠকথায ৰুত্তনযেন আনিসংসং দস্সেত্ৰা।
2241.Ānisaṃsaṃ nidassetvāti ‘‘kiñcāpi ‘na mayaṃ ayye sakkomā’ti vadanti, idāni pana tesaṃ kappāso āgamissati, saddho pasanno puriso āgamissati , addhā dassatī’’ti (pāci. aṭṭha. 921) evaṃ aṭṭhakathāya vuttanayena ānisaṃsaṃ dassetvā.
নৰমং।
Navamaṃ.
২২৪২. ধম্মিকং কথিনুদ্ধারন্তি ‘‘ধম্মিকো নাম কথিনুদ্ধারো সমগ্গো ভিক্খুনিসঙ্ঘো সন্নিপতিত্ৰা উদ্ধরতী’’তি (পাচি॰ ৯২৯) ৰুত্তং কথিনুদ্ধারং।
2242.Dhammikaṃ kathinuddhāranti ‘‘dhammiko nāma kathinuddhāro samaggo bhikkhunisaṅgho sannipatitvā uddharatī’’ti (pāci. 929) vuttaṃ kathinuddhāraṃ.
২২৪৩. যস্সাতি যস্স কথিনস্স। অত্থারমূলকো আনিসংসো নাম ‘‘যো চ তত্থ চীৰরুপ্পাদো, সো নেসং ভৰিস্সতী’’তি (মহাৰ॰ ৩০৬) অনুঞ্ঞাতো তস্মিং ৰিহারে উপ্পজ্জনকচীৰরৰত্থানিসংসো। উদ্ধারমূলকো নাম অন্তরুব্ভারং কারাপেন্তেহি উপাসকেহি দিয্যমানচীৰরৰত্থানিসংসো।
2243.Yassāti yassa kathinassa. Atthāramūlako ānisaṃso nāma ‘‘yo ca tattha cīvaruppādo, so nesaṃ bhavissatī’’ti (mahāva. 306) anuññāto tasmiṃ vihāre uppajjanakacīvaravatthānisaṃso. Uddhāramūlako nāma antarubbhāraṃ kārāpentehi upāsakehi diyyamānacīvaravatthānisaṃso.
২২৪৫. সমানিসংসোপীতি অত্থারআনিসংসেন সমানিসংসোপি উব্ভারো। সদ্ধাপালনকআরণাতি পসাদানুরক্খনত্থায দাতব্বোতি যোজনা। আনিসংসং নিদস্সেত্ৰাতি ‘‘ভিক্খুনিসঙ্ঘো জিণ্ণচীৰরো, কথিনানিসংসমূলকো মহালাভো’’তি এৰরূপং আনিসংসং দস্সেত্ৰা।
2245.Samānisaṃsopīti atthāraānisaṃsena samānisaṃsopi ubbhāro. Saddhāpālanakaāraṇāti pasādānurakkhanatthāya dātabboti yojanā. Ānisaṃsaṃ nidassetvāti ‘‘bhikkhunisaṅgho jiṇṇacīvaro, kathinānisaṃsamūlako mahālābho’’ti evarūpaṃ ānisaṃsaṃ dassetvā.
২২৪৬. সমুট্ঠানাদিনা সদ্ধিং সেসং পন ৰিনিচ্ছযজাতং অসেসেন সব্বাকারেন সত্তমেন সিক্খাপদেন সমং মতং ‘‘সদিস’’ন্তি ৰিঞ্ঞাতং। কিঞ্চিপি অপ্পকম্পি অপুব্বং তত্থ ৰুত্তনযতো অঞ্ঞং নত্থীতি যোজনা।
2246. Samuṭṭhānādinā saddhiṃ sesaṃ pana vinicchayajātaṃ asesena sabbākārena sattamena sikkhāpadena samaṃ mataṃ ‘‘sadisa’’nti viññātaṃ. Kiñcipi appakampi apubbaṃ tattha vuttanayato aññaṃ natthīti yojanā.
দসমং।
Dasamaṃ.
নগ্গৰগ্গো ততিযো।
Naggavaggo tatiyo.
২২৪৭. ‘‘যা পন ভিক্খুনিযো দ্ৰে একমঞ্চে তুৰট্টেয্যুং, পাচিত্তিয’’ন্তি (পাচি॰ ৯৩৩) পঞ্ঞত্তসিক্খাপদে ৰিনিচ্ছযং দস্সেতুমাহ ‘‘একাযা’’তিআদি। একাযাতি একায ভিক্খুনিযা। অপরাতি অঞ্ঞা উপসম্পন্না। নিপজ্জেয্যুন্তি এত্থ ‘‘একমঞ্চে’’তি সেসো। দ্ৰেতি দ্ৰে ভিক্খুনিযো।
2247. ‘‘Yā pana bhikkhuniyo dve ekamañce tuvaṭṭeyyuṃ, pācittiya’’nti (pāci. 933) paññattasikkhāpade vinicchayaṃ dassetumāha ‘‘ekāyā’’tiādi. Ekāyāti ekāya bhikkhuniyā. Aparāti aññā upasampannā. Nipajjeyyunti ettha ‘‘ekamañce’’ti seso. Dveti dve bhikkhuniyo.
২২৪৮-৯. ‘‘একায চা’’তিআদি অনাপত্তিৰারনিদ্দেসো। উভো ৰাপি সমং নিসীদন্তীতি যোজনা। এল়কেনাতি এল়কলোমসিক্খাপদেন।
2248-9.‘‘Ekāya cā’’tiādi anāpattivāraniddeso. Ubho vāpi samaṃ nisīdantīti yojanā. Eḷakenāti eḷakalomasikkhāpadena.
পঠমং।
Paṭhamaṃ.
২২৫০-১. পাৰারকটসারাদিন্তি এত্থ ভুম্মেকৰচনং। ‘‘সংহারিমেসূ’’তি ইমিনা সমানাধিকরণত্তা বহুৰচনপ্পসঙ্গে ৰচনৰিপল্লাসেনেত্থ একৰচননিদ্দেসোতি দট্ঠব্বো। পাৰারো চ কটসারো চ তে আদি যস্সাতি ৰিগ্গহো, নিদ্ধারণে চেতং ভুম্মং। এককন্তি নিদ্ধারিতব্বনিদস্সনং। একমেৰ এককং। সংহারিমেসু পাৰারাদীসু অঞ্ঞতরন্তি অত্থো। ‘‘পাৰারোতি কোজৰাদযো’’তি ৰদন্তি। কটসারোতি কটোযেৰ। আদি-সদ্দেন অত্থরিত্ৰা সযনারহং সব্বং সঙ্গণ্হাতি। তেনেৰাতি যং অত্থতং, তেনেৰ। পারুপিত্ৰা সচে যা পন দ্ৰে সহেৰ নিপজ্জন্তি, তাসং পাচিত্তিযং সিযাতি যোজনা। এত্থ চ অত্থরণপাৰুরণকিচ্চে একস্সেৰ নিদ্দিট্ঠত্তা একস্স অন্তস্স অত্থরণঞ্চ একস্স অন্তস্স পারুপনঞ্চ ৰিঞ্ঞাযতি। যথাহ ‘‘সংহারিমানং পাৰারত্থরণকটসারকাদীনং একং অন্তং অত্থরিত্ৰা একং পারুপিত্ৰা তুৰট্টেন্তীনমেতং অধিৰচন’’ন্তি (পাচি॰ অট্ঠ॰ ৯৩৭)।
2250-1.Pāvārakaṭasārādinti ettha bhummekavacanaṃ. ‘‘Saṃhārimesū’’ti iminā samānādhikaraṇattā bahuvacanappasaṅge vacanavipallāsenettha ekavacananiddesoti daṭṭhabbo. Pāvāro ca kaṭasāro ca te ādi yassāti viggaho, niddhāraṇe cetaṃ bhummaṃ. Ekakanti niddhāritabbanidassanaṃ. Ekameva ekakaṃ. Saṃhārimesu pāvārādīsu aññataranti attho. ‘‘Pāvāroti kojavādayo’’ti vadanti. Kaṭasāroti kaṭoyeva. Ādi-saddena attharitvā sayanārahaṃ sabbaṃ saṅgaṇhāti. Tenevāti yaṃ atthataṃ, teneva. Pārupitvā sace yā pana dve saheva nipajjanti, tāsaṃ pācittiyaṃ siyāti yojanā. Ettha ca attharaṇapāvuraṇakicce ekasseva niddiṭṭhattā ekassa antassa attharaṇañca ekassa antassa pārupanañca viññāyati. Yathāha ‘‘saṃhārimānaṃ pāvārattharaṇakaṭasārakādīnaṃ ekaṃ antaṃ attharitvā ekaṃ pārupitvā tuvaṭṭentīnametaṃ adhivacana’’nti (pāci. aṭṭha. 937).
একস্মিং একত্থরণে ৰা একপাৰুরণে ৰা নিপজ্জনে সতি তাসং দ্ৰিন্নং ভিক্খুনীনং দুক্কটন্তি সম্বন্ধো। দ্ৰিকদুক্কটং ৰুত্তন্তি ‘‘নানত্থরণপাৰুরণে একত্থরণপাৰুরণসঞ্ঞা…পে॰… ৰেমতিকা, আপত্তি দুক্কটস্সা’’তি (পাচি॰ ৯৩৯) ৰুত্তং দুক্কটদ্ৰযং।
Ekasmiṃ ekattharaṇe vā ekapāvuraṇe vā nipajjane sati tāsaṃ dvinnaṃ bhikkhunīnaṃ dukkaṭanti sambandho. Dvikadukkaṭaṃ vuttanti ‘‘nānattharaṇapāvuraṇe ekattharaṇapāvuraṇasaññā…pe… vematikā, āpatti dukkaṭassā’’ti (pāci. 939) vuttaṃ dukkaṭadvayaṃ.
২২৫২. ৰৰত্থানং নিদস্সেত্ৰাতি মজ্ঝে কাসাৰং ৰা কত্তরযট্ঠিং ৰা অন্তমসো কাযবন্ধনম্পি ঠপেত্ৰা নিপজ্জন্তি, অনাপত্তীতি অত্থো। সেসং সমুট্ঠানাদিৰিধানং। আদিনাতি ইমস্মিংযেৰ ৰগ্গে পঠমসিক্খাপদেন। তুল্যন্তি সমানং।
2252.Vavatthānaṃ nidassetvāti majjhe kāsāvaṃ vā kattarayaṭṭhiṃ vā antamaso kāyabandhanampi ṭhapetvā nipajjanti, anāpattīti attho. Sesaṃ samuṭṭhānādividhānaṃ. Ādināti imasmiṃyeva vagge paṭhamasikkhāpadena. Tulyanti samānaṃ.
দুতিযং।
Dutiyaṃ.
২২৫৩. অঞ্ঞিস্সা ভিক্খুনিযা। অফাসুকারণাতি অফাসুকরণহেতু। অনাপুচ্ছাতি অনাপুচ্ছিত্ৰা। তস্সা পুরতো চ চঙ্কমনাদযো যদি করেয্য, এৰং করোন্তিযা পাচিত্তিযাপত্তি হোতীতি যোজনা। চঙ্কমনাদযোতি এত্থ আদি-সদ্দেন ‘‘তিট্ঠতি ৰা নিসীদতি ৰা সেয্যং ৰা কপ্পেতি উদ্দিসতি ৰা উদ্দিসাপেতি ৰা সজ্ঝাযং ৰা করোতী’’তি (পাচি॰ ৯৪৩) পদভাজনে ৰুত্তানং সঙ্গহো।
2253.Aññissā bhikkhuniyā. Aphāsukāraṇāti aphāsukaraṇahetu. Anāpucchāti anāpucchitvā. Tassā purato ca caṅkamanādayo yadi kareyya, evaṃ karontiyā pācittiyāpatti hotīti yojanā. Caṅkamanādayoti ettha ādi-saddena ‘‘tiṭṭhati vā nisīdati vā seyyaṃ vā kappeti uddisati vā uddisāpeti vā sajjhāyaṃ vā karotī’’ti (pāci. 943) padabhājane vuttānaṃ saṅgaho.
২২৫৪. নিৰত্তনানং গণনাযাতি চঙ্কমন্তিযা চঙ্কমস্স উভযকোটিং পত্ৰা নিৰত্তন্তিযা নিৰত্তনগণনায। পযোগতোযেৰাতি পযোগগণনাযেৰ, ইরিযাপথপরিৰত্তনগণনাযেৰাতি ৰুত্তং হোতি। দোসাতি পাচিত্তিযাপত্তিযো।
2254.Nivattanānaṃ gaṇanāyāti caṅkamantiyā caṅkamassa ubhayakoṭiṃ patvā nivattantiyā nivattanagaṇanāya. Payogatoyevāti payogagaṇanāyeva, iriyāpathaparivattanagaṇanāyevāti vuttaṃ hoti. Dosāti pācittiyāpattiyo.
২২৫৫. পদানং গণনাৰসাতি এত্থ আদি-সদ্দো লুত্তনিদ্দিট্ঠো। যথাহ ‘‘পদাদিগণনাযা’’তি (পাচি॰ অট্ঠ॰ ৯৪৩)। তিকপাচিত্তিযং ৰুত্তন্তি উপসম্পন্নায উপসম্পন্নসঞ্ঞা, ৰেমতিকা, অনুপসম্পন্নসঞ্ঞাতি ৰিকপ্পত্তযস্স ৰসেন পাচিত্তিযত্তযং ৰুত্তং। সেসাযাতি অনুপসম্পন্নায।
2255.Padānaṃ gaṇanāvasāti ettha ādi-saddo luttaniddiṭṭho. Yathāha ‘‘padādigaṇanāyā’’ti (pāci. aṭṭha. 943). Tikapācittiyaṃ vuttanti upasampannāya upasampannasaññā, vematikā, anupasampannasaññāti vikappattayassa vasena pācittiyattayaṃ vuttaṃ. Sesāyāti anupasampannāya.
২২৫৬. ন চ অফাসুকামাযাতি আপুচ্ছিত্ৰা তস্সা ভিক্খুনিযা পুরতো চঙ্কমনাদীনি করোন্তিযা অনাপত্তীতি যোজনা।
2256.Naca aphāsukāmāyāti āpucchitvā tassā bhikkhuniyā purato caṅkamanādīni karontiyā anāpattīti yojanā.
২২৫৭. ক্রিযাক্রিযন্তি চঙ্কমনাদিকরণং কিরিযং। আপুচ্ছায অকরণং অকিরিযং। পাপমানসন্তি অকুসলচিত্তং।
2257.Kriyākriyanti caṅkamanādikaraṇaṃ kiriyaṃ. Āpucchāya akaraṇaṃ akiriyaṃ. Pāpamānasanti akusalacittaṃ.
ততিযং।
Tatiyaṃ.
২২৫৮-৯. অনন্তরাযাতি ৰক্খমানেসু রাজন্তরাযাদীসু দসসু অন্তরাযেসু অঞ্ঞতররহিতা ভিক্খুনী। দুক্খিতন্তি গিলানং। যথাহ ‘‘দুক্খিতা নাম গিলানা ৰুচ্চতী’’তি (পাচি॰ ৯৪৮)। সহজীৰিনিন্তি সদ্ধিৰিহারিনিং। যথাহ ‘‘সহজীৰিনী নাম সদ্ধিৰিহারিনী ৰুচ্চতী’’তি। অঞ্ঞায ৰা নুপট্ঠাপেয্যাতি অঞ্ঞায ভিক্খুনিযা, সিক্খমানায, সামণেরিযা ৰা গিহিনিযা ৰা উপট্ঠানং ন কারাপেয্য। নুপট্ঠেয্য সযম্পি ৰাতি যা উপট্ঠানং ন করেয্য। ধুরে নিক্খিত্তমত্তে ৰাতি ‘‘নেৰ উপট্ঠেস্সামি, ন উপট্ঠাপনায উস্সুক্কং করিস্সামী’’তি ধুরে উস্সাহে নিক্খিত্তমত্তেযেৰ। তস্সাতি উপজ্ঝাযায।
2258-9.Anantarāyāti vakkhamānesu rājantarāyādīsu dasasu antarāyesu aññatararahitā bhikkhunī. Dukkhitanti gilānaṃ. Yathāha ‘‘dukkhitā nāma gilānā vuccatī’’ti (pāci. 948). Sahajīvininti saddhivihāriniṃ. Yathāha ‘‘sahajīvinī nāma saddhivihārinī vuccatī’’ti. Aññāya vā nupaṭṭhāpeyyāti aññāya bhikkhuniyā, sikkhamānāya, sāmaṇeriyā vā gihiniyā vā upaṭṭhānaṃ na kārāpeyya. Nupaṭṭheyya sayampi vāti yā upaṭṭhānaṃ na kareyya. Dhure nikkhittamatte vāti ‘‘neva upaṭṭhessāmi, na upaṭṭhāpanāya ussukkaṃ karissāmī’’ti dhure ussāhe nikkhittamatteyeva. Tassāti upajjhāyāya.
অন্তেৰাসিনিযা ৰাপীতি পব্বজ্জাউপসম্পদাধম্মনিস্সযৰসেন চতুব্বিধাসু অন্তেৰাসিনীসু অঞ্ঞতরায। ইতরাযাতি অনুপসম্পন্নায।
Antevāsiniyā vāpīti pabbajjāupasampadādhammanissayavasena catubbidhāsu antevāsinīsu aññatarāya. Itarāyāti anupasampannāya.
২২৬০. গিলানাযাতি সযং গিলানায। ‘‘গৰেসিত্ৰা অলভন্তিযা’’তি পদচ্ছেদো, অঞ্ঞং উপট্ঠাযিকং পরিযেসিত্ৰা অলভমানাযাতি অত্থো। ‘‘আপদাসু উম্মত্তিকাদীন’’ন্তি পদচ্ছেদো। গাথাবন্ধৰসেন ৰণ্ণলোপোপি দট্ঠব্বো। আপদাসূতি তথারূপে উপদ্দৰে সতি। ধুরনিক্খেপনোদযন্তি ধুরনিক্খেপসমুট্ঠানং। যদেত্থ ৰত্তব্বং, তং হেট্ঠা ৰুত্তমেৰ।
2260.Gilānāyāti sayaṃ gilānāya. ‘‘Gavesitvā alabhantiyā’’ti padacchedo, aññaṃ upaṭṭhāyikaṃ pariyesitvā alabhamānāyāti attho. ‘‘Āpadāsu ummattikādīna’’nti padacchedo. Gāthābandhavasena vaṇṇalopopi daṭṭhabbo. Āpadāsūti tathārūpe upaddave sati. Dhuranikkhepanodayanti dhuranikkhepasamuṭṭhānaṃ. Yadettha vattabbaṃ, taṃ heṭṭhā vuttameva.
চতুত্থং।
Catutthaṃ.
২২৬১-২. পুগ্গলিকস্স অত্তাযত্তপরাযত্তৰসেন অনিযমিতত্তা ‘‘সক’’ন্তি ইমিনা নিযমেতি। সকং পুগ্গলিকন্তি অত্তনো পুগ্গলিকং। দত্ৰাতি এত্থ ‘‘ভিক্খুনিযা’’তি সেসো। সকৰাটন্তি পরিৰত্তকদ্ৰারকৰাটসহিতং। উপস্সযন্তি গেহং। দ্ৰারাদীসূতি এত্থ আদি-সদ্দেন গব্ভপমুখানং সঙ্গহো, নিদ্ধারণে চেতং ভুম্মং। বহূনিপীতি নিদ্ধারেতব্বনিদস্সনং। বহূনিপি দ্ৰারানি ৰা বহূ গব্ভে ৰা বহূনি পমুখানি ৰা। তন্তি যস্সা উপস্সযো দিন্নো, তং ভিক্খুনিং। নিক্কড্ঢন্তিযাতি অতিক্কামেন্তিযা। তস্সাতি যা নিক্কড্ঢতি, তস্সা।
2261-2. Puggalikassa attāyattaparāyattavasena aniyamitattā ‘‘saka’’nti iminā niyameti. Sakaṃ puggalikanti attano puggalikaṃ. Datvāti ettha ‘‘bhikkhuniyā’’ti seso. Sakavāṭanti parivattakadvārakavāṭasahitaṃ. Upassayanti gehaṃ. Dvārādīsūti ettha ādi-saddena gabbhapamukhānaṃ saṅgaho, niddhāraṇe cetaṃ bhummaṃ. Bahūnipīti niddhāretabbanidassanaṃ. Bahūnipi dvārāni vā bahū gabbhe vā bahūni pamukhāni vā. Tanti yassā upassayo dinno, taṃ bhikkhuniṃ. Nikkaḍḍhantiyāti atikkāmentiyā. Tassāti yā nikkaḍḍhati, tassā.
২২৬৩. এত্থাতি নিক্কড্ঢনে। এসেৰ নযোতি ‘‘পযোগগণনায আপত্তী’’তি দস্সিতনযো। এত্থ পযোগো নাম আণাপনং, ইমিনা ‘‘একাযাণত্তিযা অনেকেসু দ্ৰারেসু অতিক্কামিতেসুপি একাৰ আপত্তি হোতী’’তি এৰমাদিকং অট্ঠকথাগতৰিনিচ্ছযং (পাচি॰ অট্ঠ॰ ৯৪৩, ৯৫২ অত্থতো সমানং) সঙ্গণ্হাতি।
2263.Etthāti nikkaḍḍhane. Eseva nayoti ‘‘payogagaṇanāya āpattī’’ti dassitanayo. Ettha payogo nāma āṇāpanaṃ, iminā ‘‘ekāyāṇattiyā anekesu dvāresu atikkāmitesupi ekāva āpatti hotī’’ti evamādikaṃ aṭṭhakathāgatavinicchayaṃ (pāci. aṭṭha. 943, 952 atthato samānaṃ) saṅgaṇhāti.
২২৬৪. তেসু ৰিনিচ্ছযেসু একং ৰিনিচ্ছযৰিসেসং দস্সেতুমাহ ‘‘এত্তকাৰ ইমং দ্ৰারা’’তিআদি। দ্ৰারগণনায আপত্তিযো দ্ৰারগণনাপত্তিযো।
2264. Tesu vinicchayesu ekaṃ vinicchayavisesaṃ dassetumāha ‘‘ettakāva imaṃ dvārā’’tiādi. Dvāragaṇanāya āpattiyo dvāragaṇanāpattiyo.
২২৬৫. অকৰাটম্হাতি অকৰাটবন্ধতো উপস্সযা নিক্কড্ঢন্তিযা দুক্কটন্তি যোজনা। সেসাযাতি অনুপসম্পন্নায। তিকদুক্কটন্তি অনুপসম্পন্নায উপসম্পন্নসঞ্ঞায, ৰেমতিকায, অনুপসম্পন্নসঞ্ঞায চ ৰসেন তিকদুক্কটং। উভিন্নন্তি উপসম্পন্নানুপসম্পন্নানং। পরিক্খারেসূতি পত্তচীৰরাদীসু পরিক্খারেসু । সব্বত্থাতি সব্বেসু পযোগেসু, নিক্কড্ঢিযমানেসু, নিক্কড্ঢাপিযমানেসু চাতি ৰুত্তং হোতি।
2265.Akavāṭamhāti akavāṭabandhato upassayā nikkaḍḍhantiyā dukkaṭanti yojanā. Sesāyāti anupasampannāya. Tikadukkaṭanti anupasampannāya upasampannasaññāya, vematikāya, anupasampannasaññāya ca vasena tikadukkaṭaṃ. Ubhinnanti upasampannānupasampannānaṃ. Parikkhāresūti pattacīvarādīsu parikkhāresu . Sabbatthāti sabbesu payogesu, nikkaḍḍhiyamānesu, nikkaḍḍhāpiyamānesu cāti vuttaṃ hoti.
২২৬৬. এত্থ ইমস্মিং সিক্খাপদে সমুট্ঠানাদিৰিনিচ্ছযেন সহ সেসং ৰিনিচ্ছযজাতং অসেসেন সব্বপ্পকারেন সঙ্ঘিকা ৰিহারস্মা নিক্কড্ঢনসিক্খাপদেন সমং মতং ‘‘সদিস’’ন্তি সল্লক্খিতন্তি যোজনা।
2266.Ettha imasmiṃ sikkhāpade samuṭṭhānādivinicchayena saha sesaṃ vinicchayajātaṃ asesena sabbappakārena saṅghikā vihārasmā nikkaḍḍhanasikkhāpadena samaṃ mataṃ ‘‘sadisa’’nti sallakkhitanti yojanā.
পঞ্চমং।
Pañcamaṃ.
২২৬৭. ছট্ঠেতি ‘‘যা পন ভিক্খুনী সংসট্ঠা ৰিহরেয্য গহপতিনা ৰা গহপতিপুত্তেন ৰা’’তিআদিমাতিকায (পাচি॰ ৯৫৬) নিদ্দিট্ঠে ছট্ঠসিক্খাপদে। ইধ ৰত্তব্বন্তি ইমস্মিং ৰিনযৰিনিচ্ছযে কথেতব্বং। অরিট্ঠস্স সিক্খাপদেনাতি অরিট্ঠসিক্খাপদেন। ৰিনিচ্ছযোতি সমুট্ঠানাদিকো।
2267.Chaṭṭheti ‘‘yā pana bhikkhunī saṃsaṭṭhā vihareyya gahapatinā vā gahapatiputtena vā’’tiādimātikāya (pāci. 956) niddiṭṭhe chaṭṭhasikkhāpade. Idha vattabbanti imasmiṃ vinayavinicchaye kathetabbaṃ. Ariṭṭhassa sikkhāpadenāti ariṭṭhasikkhāpadena. Vinicchayoti samuṭṭhānādiko.
ছট্ঠং।
Chaṭṭhaṃ.
২২৬৮. সাসঙ্কসম্মতেতি এত্থ ‘‘সপ্পটিভযে’’তি সেসো। উভযম্পি হেট্ঠা ৰুত্তত্থমেৰ। অন্তোরট্ঠেতি যস্স ৰিজিতে ৰিহরতি, তস্সেৰ রট্ঠে। সাসঙ্কসম্মতে সপ্পটিভযে অন্তোরট্ঠে সত্থেন ৰিনা চারিকং চরন্তিযা ভিক্খুনিযা আপত্তি সিযাতি যোজনা।
2268.Sāsaṅkasammateti ettha ‘‘sappaṭibhaye’’ti seso. Ubhayampi heṭṭhā vuttatthameva. Antoraṭṭheti yassa vijite viharati, tasseva raṭṭhe. Sāsaṅkasammate sappaṭibhaye antoraṭṭhe satthena vinā cārikaṃ carantiyā bhikkhuniyā āpatti siyāti yojanā.
২২৬৯. এৰং চরন্তিযা সগামকট্ঠানে গামন্তরপ্পৰেসে চ অগামকে অরঞ্ঞে অদ্ধযোজনে চ ৰিনযঞ্ঞুনা ভিক্খুনা পাচিত্তিযনযো পাচিত্তিযাপত্তিৰিধানক্কমো ঞেয্যো ঞাতব্বোতি যোজনা।
2269. Evaṃ carantiyā sagāmakaṭṭhāne gāmantarappavese ca agāmake araññe addhayojane ca vinayaññunā bhikkhunā pācittiyanayo pācittiyāpattividhānakkamo ñeyyo ñātabboti yojanā.
২২৭০. সহ সত্থেন চরন্তিযা ন দোসোতি যোজনা। খেমট্ঠানে চরন্তিযা, আপদাসু ৰা চরন্তিযা ন দোসোতি যোজনা।
2270. Saha satthena carantiyā na dosoti yojanā. Khemaṭṭhāne carantiyā, āpadāsu vā carantiyā na dosoti yojanā.
সত্তমং।
Sattamaṃ.
২২৭১. অট্ঠমে নৰমে ৰাপীতি ‘‘যা পন ভিক্খুনী তিরোরট্ঠে’’তিআদিকে (পাচি॰ ৯৬৬) অট্ঠমসিক্খাপদে চ ‘‘যা পন ভিক্খুনী অন্তোৰস্সং চারিকং চরেয্য, পাচিত্তিয’’ন্তি (পাচি॰ ৯৭০) ৰুত্তনৰমসিক্খাপদে চ। অনুত্তানং ন ৰিজ্জতি, সব্বং উত্তানমেৰ, তস্মা এত্থ মযা ন ৰিচারীযতীতি অধিপ্পাযো।
2271.Aṭṭhamenavame vāpīti ‘‘yā pana bhikkhunī tiroraṭṭhe’’tiādike (pāci. 966) aṭṭhamasikkhāpade ca ‘‘yā pana bhikkhunī antovassaṃ cārikaṃ careyya, pācittiya’’nti (pāci. 970) vuttanavamasikkhāpade ca. Anuttānaṃ na vijjati, sabbaṃ uttānameva, tasmā ettha mayā na vicārīyatīti adhippāyo.
অট্ঠমনৰমানি।
Aṭṭhamanavamāni.
২২৭২. ‘‘যা পন ভিক্খুনী ৰস্সংৰুত্থা চারিকং ন পক্কমেয্য অন্তমসো ছপ্পঞ্চযোজনানিপি, পাচিত্তিয’’ন্তি (পাচি॰ ৯৭৪) ৰুত্তসিক্খাপদে ৰিনিচ্ছযং দস্সেতুমাহ ‘‘পাচিত্তী’’তিআদি। অহং ন গমিস্সামি ন পক্কমিস্সামীতি ধুরনিক্খেপে কতে পাচিত্তীতি যোজনা। তথাতি পাচিত্তি।
2272. ‘‘Yā pana bhikkhunī vassaṃvutthā cārikaṃ na pakkameyya antamaso chappañcayojanānipi, pācittiya’’nti (pāci. 974) vuttasikkhāpade vinicchayaṃ dassetumāha ‘‘pācittī’’tiādi. Ahaṃ na gamissāmi na pakkamissāmīti dhuranikkhepe kate pācittīti yojanā. Tathāti pācitti.
২২৭৩. ৰস্সংৰুত্থায পৰারেত্ৰা অন্তমসো পঞ্চ যোজনানি গন্তুং ৰট্টতি। এত্থ অপি-সদ্দস্স সম্ভাৰনত্থতং দস্সেতুমাহ ‘‘ছসূ’’তিআদি। ইধ ইমস্মিং অনাপত্তিৰারে ছসু যোজনেসু যদত্থি ৰত্তব্বং, তং কিন্নু নাম সিযা, নত্থি কিঞ্চি ৰত্তব্বন্তি অত্থো। পৰারেত্ৰা ছ যোজনানি গচ্ছন্তিযা অনাপত্তিভাৰো অৰুত্তসিদ্ধোৰাতি দীপেতি।
2273. Vassaṃvutthāya pavāretvā antamaso pañca yojanāni gantuṃ vaṭṭati. Ettha api-saddassa sambhāvanatthataṃ dassetumāha ‘‘chasū’’tiādi. Idha imasmiṃ anāpattivāre chasu yojanesu yadatthi vattabbaṃ, taṃ kinnu nāma siyā, natthi kiñci vattabbanti attho. Pavāretvā cha yojanāni gacchantiyā anāpattibhāvo avuttasiddhovāti dīpeti.
২২৭৪. তীণি যোজনানি। তেনেৰাতি যেন গতা, তেনেৰ মগ্গেন। অঞ্ঞেন মগ্গেনাতি গতমগ্গতো অঞ্ঞেন পথেন।
2274.Tīṇi yojanāni. Tenevāti yena gatā, teneva maggena. Aññena maggenāti gatamaggato aññena pathena.
২২৭৫. দসৰিধে অন্তরাযস্মিং সতীতি ৰক্খমানেসু অন্তরাযেসু অঞ্ঞতরস্মিং সতি। তস্সা অনাপত্তীতি যোজনা। আপদাসূতি অট্টাদিকারণেন কেনচি পলিবুদ্ধাদিভাৰসঙ্খাতাসু আপদাসু। গিলানাযাতি সযং গিলানায। দুতিযায ভিক্খুনিযা অলাভে ৰা অপক্কমন্তিযা অনাপত্তি।
2275.Dasavidhe antarāyasmiṃ satīti vakkhamānesu antarāyesu aññatarasmiṃ sati. Tassā anāpattīti yojanā. Āpadāsūti aṭṭādikāraṇena kenaci palibuddhādibhāvasaṅkhātāsu āpadāsu. Gilānāyāti sayaṃ gilānāya. Dutiyāya bhikkhuniyā alābhe vā apakkamantiyā anāpatti.
২২৭৬. রাজা চ চোরা চ অমনুস্সা চ অগ্গি চ তোযঞ্চ ৰাল়া চ সরীসপা চাতি ৰিগ্গহো। মনুস্সোতি এত্থ গাথাবন্ধৰসেন পুব্বপদলোপো ‘‘লাবূনি সীদন্তী’’তিআদীসু (জা॰ ১.১.৭৭) ৰিয। জীৰিতঞ্চ ব্রহ্মচরিযা চ জীৰিতব্রহ্মচরিযন্তি সমাহারদ্ৰন্দে সমাসো, তস্স জীৰিতব্রহ্মচরিযস্স। অন্তরাযা এৰ অন্তরাযিকা। এতেসং দসন্নং অঞ্ঞতরস্মিং অপক্কমন্তিযা অনাপত্তি। যথাহ ‘‘অন্তরাযেতি দসৰিধে অন্তরাযে। ‘পরং গচ্ছিস্সামী’তি নিক্খন্তা, নদিপূরো পন আগতো, চোরা ৰা মগ্গে হোন্তি, মেঘো ৰা উট্ঠাতি, নিৰত্তিতুং ৰট্টতী’’তি (পাচি॰ অট্ঠ॰ ৯৭৬)।
2276. Rājā ca corā ca amanussā ca aggi ca toyañca vāḷā ca sarīsapā cāti viggaho. Manussoti ettha gāthābandhavasena pubbapadalopo ‘‘lābūni sīdantī’’tiādīsu (jā. 1.1.77) viya. Jīvitañca brahmacariyā ca jīvitabrahmacariyanti samāhāradvande samāso, tassa jīvitabrahmacariyassa. Antarāyā eva antarāyikā. Etesaṃ dasannaṃ aññatarasmiṃ apakkamantiyā anāpatti. Yathāha ‘‘antarāyeti dasavidhe antarāye. ‘Paraṃ gacchissāmī’ti nikkhantā, nadipūro pana āgato, corā vā magge honti, megho vā uṭṭhāti, nivattituṃ vaṭṭatī’’ti (pāci. aṭṭha. 976).
২২৭৭. অপক্কমনং অক্রিযং। অনাদরিযেন আপজ্জনতো আহ ‘‘দুক্খৰেদন’’ন্তি।
2277. Apakkamanaṃ akriyaṃ. Anādariyena āpajjanato āha ‘‘dukkhavedana’’nti.
দসমং।
Dasamaṃ.
তুৰট্টৰগ্গো চতুত্থো।
Tuvaṭṭavaggo catuttho.
২২৭৮-৮০. রাজাগারন্তি রঞ্ঞো কীল়নঘরং। চিত্তাগারন্তি কীল়নচিত্তসালং। আরামন্তি কীল়নউপৰনং। কীল়ুয্যানন্তি কীল়নত্থায কতং উয্যানং। কীল়াৰাপিন্তি এত্থ কিঞ্চাপি পাল়িযং (পাচি॰ ৯৭৯) পোক্খরণী ৰুত্তা, সা পন সব্বজলাসযানং কীল়ায কতানং উপলক্খণৰসেন ৰুত্তাতি আহ ‘‘কীল়াৰাপি’’ন্তি, কীল়নত্থায কতৰাপিন্তি অত্থো। ‘‘নানাকার’’ন্তি ইদং যথাৰুত্তপদেহি পচ্চেকং যোজেতব্বং। সব্বসঙ্গাহিকৰসেন ‘‘তানী’’তি ৰুত্তং। নানাকারং রাজাগারং চিত্তাগারং আরামং কীল়ুয্যানং ৰা কীল়াৰাপিং দট্ঠুং গচ্ছন্তীনং তানি সব্বানি একতো দট্ঠুং গচ্ছন্তীনং তাসং ভিক্খুনীনং পদে পদে দুক্কটং মুনিনা নিদ্দিট্ঠন্তি যোজনা।
2278-80.Rājāgāranti rañño kīḷanagharaṃ. Cittāgāranti kīḷanacittasālaṃ. Ārāmanti kīḷanaupavanaṃ. Kīḷuyyānanti kīḷanatthāya kataṃ uyyānaṃ. Kīḷāvāpinti ettha kiñcāpi pāḷiyaṃ (pāci. 979) pokkharaṇī vuttā, sā pana sabbajalāsayānaṃ kīḷāya katānaṃ upalakkhaṇavasena vuttāti āha ‘‘kīḷāvāpi’’nti, kīḷanatthāya katavāpinti attho. ‘‘Nānākāra’’nti idaṃ yathāvuttapadehi paccekaṃ yojetabbaṃ. Sabbasaṅgāhikavasena ‘‘tānī’’ti vuttaṃ. Nānākāraṃ rājāgāraṃ cittāgāraṃ ārāmaṃ kīḷuyyānaṃ vā kīḷāvāpiṃ daṭṭhuṃ gacchantīnaṃ tāni sabbāni ekato daṭṭhuṃ gacchantīnaṃ tāsaṃ bhikkhunīnaṃ pade pade dukkaṭaṃ muninā niddiṭṭhanti yojanā.
পঞ্চপীতি রাজাগারাদীনি পঞ্চপি। একাযেৰ পাচিত্তি আপত্তি পরিদীপিতাতি যোজনা। তং তং দিসাভাগং গন্ত্ৰা পস্সন্তি চে, পাটেক্কাপত্তিযো পযোগগণনায সিযুন্তি যোজনা।
Pañcapīti rājāgārādīni pañcapi. Ekāyeva pācitti āpatti paridīpitāti yojanā. Taṃ taṃ disābhāgaṃ gantvā passanti ce, pāṭekkāpattiyo payogagaṇanāya siyunti yojanā.
২২৮১. গমনবাহুল্লেন আপত্তিবাহুল্লং পকাসেত্ৰা গীৰাপরিৰত্তনসঙ্খাতেন পযোগবাহুল্লেনাপি আপত্তিবাহুল্লং পকাসেতুমাহ ‘‘পযোগবহুতাযাপি, পাচিত্তিবহুতা সিযা’’তি। সব্বত্থাতি যত্থ ভিক্খুনিযা পাচিত্তিযং ৰুত্তং, তত্থ সব্বত্থ।
2281. Gamanabāhullena āpattibāhullaṃ pakāsetvā gīvāparivattanasaṅkhātena payogabāhullenāpi āpattibāhullaṃ pakāsetumāha ‘‘payogabahutāyāpi, pācittibahutā siyā’’ti. Sabbatthāti yattha bhikkhuniyā pācittiyaṃ vuttaṃ, tattha sabbattha.
২২৮২. ‘‘অৰসেসোপি অনাপত্তী’’তি পদচ্ছেদো। অনাপত্তি চ কথামগ্গো চ অনাপত্তিকথামগ্গো, তেসং ৰিনিচ্ছযো অনাপত্তিকথামগ্গৰিনিচ্ছযো, ‘‘অনাপত্তি আরামে ঠিতা পস্সতী’’তিআদিকো (পাচি॰ ৯৮১) অনাপত্তিৰিনিচ্ছযো চ অট্ঠকথাগতো (পাচি॰ অট্ঠ॰ ৯৮১) অৰসেসৰিনিচ্ছযো চাতি অত্থো। ‘‘আরামে ঠিতা’’তি এতেন অজ্ঝারামে রাজাগারাদীনি করোন্তি, তানি পস্সন্তিযা অনাপত্তীতি অযমনাপত্তিৰারো দস্সিতো। এতেনেৰ অন্তোআরামে তত্থ তত্থ গন্ত্ৰা নচ্চাদীনি ৰিয রাজাগারাদীনিপি পস্সিতুং লভতীতিপি সিদ্ধং। আদি-সদ্দেন ‘‘পিণ্ডপাতাদীনং অত্থায গচ্ছন্তিযা মগ্গে হোন্তি, তানি পস্সতি, অনাপত্তি। রঞ্ঞো সন্তিকং কেনচি করণীযেন গন্ত্ৰা পস্সতি, অনাপত্তি। কেনচি উপদ্দুতা পৰিসিত্ৰা পস্সতি, অনাপত্তী’’তি এতে অনাপত্তিৰারা সঙ্গহিতা। নচ্চদস্সন…পে॰… সহাতি সমুট্ঠানাদিনা ৰিনিচ্ছযেন সহ নচ্চদস্সনসিক্খাপদসদিসোৰ।
2282. ‘‘Avasesopi anāpattī’’ti padacchedo. Anāpatti ca kathāmaggo ca anāpattikathāmaggo, tesaṃ vinicchayo anāpattikathāmaggavinicchayo, ‘‘anāpatti ārāme ṭhitā passatī’’tiādiko (pāci. 981) anāpattivinicchayo ca aṭṭhakathāgato (pāci. aṭṭha. 981) avasesavinicchayo cāti attho. ‘‘Ārāme ṭhitā’’ti etena ajjhārāme rājāgārādīni karonti, tāni passantiyā anāpattīti ayamanāpattivāro dassito. Eteneva antoārāme tattha tattha gantvā naccādīni viya rājāgārādīnipi passituṃ labhatītipi siddhaṃ. Ādi-saddena ‘‘piṇḍapātādīnaṃ atthāya gacchantiyā magge honti, tāni passati, anāpatti. Rañño santikaṃ kenaci karaṇīyena gantvā passati, anāpatti. Kenaci upaddutā pavisitvā passati, anāpattī’’ti ete anāpattivārā saṅgahitā. Naccadassana…pe… sahāti samuṭṭhānādinā vinicchayena saha naccadassanasikkhāpadasadisova.
পঠমং।
Paṭhamaṃ.
২২৮৩. মানতো পমাণতো অতীতা অপেতা মানাতীতা, আসন্দী, তং। ৰাল়েহি উপেতো ৰাল়ূপেতো, পল্লঙ্কো, তং। ‘‘আসন্দী নাম অতিক্কন্তপ্পমাণা ৰুচ্চতী’’তি ৰচনতো হেট্ঠা অট্টনিযা ৰড্ঢকিহত্থতো উচ্চতরপাদো আযামচতুরস্সো মঞ্চপীঠৰিসেসো আসন্দী নাম সমচতুরস্সানং অতিক্কন্তপ্পমাণানম্পি অনুঞ্ঞাতত্তা। ‘‘পল্লঙ্কো নাম আহরিমেহি ৰাল়েহি কতো’’তি (পাচি॰ ৯৮৪) ৰচনতো পমাণযুত্তোপি এৰরূপো ন ৰট্টতি। আহরিত্ৰা যথানুরূপট্ঠানে ঠপেতব্বৰাল়রূপানি আহরিমৰাল়া নাম, সংহরিমৰাল়রূপযুত্তোতি ৰুত্তং হোতি। মানাতীতং আসন্দিং ৰা ৰাল়ূপেতং পল্লঙ্কং ৰা সেৰন্তীনং অভিনিসীদন্তীনং, অভিনিপজ্জন্তীনঞ্চ যাসং ভিক্খুনীনং সত্থা পাচিত্তিযাপত্তিং আহ।
2283. Mānato pamāṇato atītā apetā mānātītā, āsandī, taṃ. Vāḷehi upeto vāḷūpeto, pallaṅko, taṃ. ‘‘Āsandī nāma atikkantappamāṇā vuccatī’’ti vacanato heṭṭhā aṭṭaniyā vaḍḍhakihatthato uccatarapādo āyāmacaturasso mañcapīṭhaviseso āsandī nāma samacaturassānaṃ atikkantappamāṇānampi anuññātattā. ‘‘Pallaṅko nāma āharimehi vāḷehi kato’’ti (pāci. 984) vacanato pamāṇayuttopi evarūpo na vaṭṭati. Āharitvā yathānurūpaṭṭhāne ṭhapetabbavāḷarūpāni āharimavāḷā nāma, saṃharimavāḷarūpayuttoti vuttaṃ hoti. Mānātītaṃ āsandiṃ vā vāḷūpetaṃ pallaṅkaṃ vā sevantīnaṃ abhinisīdantīnaṃ, abhinipajjantīnañca yāsaṃ bhikkhunīnaṃ satthā pācittiyāpattiṃ āha.
২২৮৪. তাসং নিসীদনস্সাপি নিপজ্জনস্সাপি পযোগবাহুল্লৰসেন পাচিত্তিযানং গণনা হোতি ইতি এৰং নিদ্দিট্ঠা এৰং অযং গণনা অচ্চন্তযসেন অনন্তপরিৰারেন ভগৰতা ৰুত্তাতি যোজনা। এত্থ চ ইচ্চেৰন্তি নিপাতসমুদাযো, ইতি-সদ্দো নিদস্সনে, এৰং-সদ্দো ইদমত্থে দট্ঠব্বো।
2284. Tāsaṃ nisīdanassāpi nipajjanassāpi payogabāhullavasena pācittiyānaṃ gaṇanā hoti iti evaṃ niddiṭṭhā evaṃ ayaṃ gaṇanā accantayasena anantaparivārena bhagavatā vuttāti yojanā. Ettha ca iccevanti nipātasamudāyo, iti-saddo nidassane, evaṃ-saddo idamatthe daṭṭhabbo.
২২৮৫. পাদে আসন্দিযা ছেত্ৰাতি আসন্দিযা পাদে পমাণতো অধিকট্ঠানছিন্দনেন ছেত্ৰা। পল্লঙ্কস্স পাদে ৰাল়কা পল্লঙ্কৰাল়কা, তে হিত্ৰা অপনেত্ৰা, অনাপত্তীতি সেৰন্তীনং অনাপত্তি।
2285.Pāde āsandiyā chetvāti āsandiyā pāde pamāṇato adhikaṭṭhānachindanena chetvā. Pallaṅkassa pāde vāḷakā pallaṅkavāḷakā, te hitvā apanetvā, anāpattīti sevantīnaṃ anāpatti.
দুতিযং।
Dutiyaṃ.
২২৮৬-৭. ছন্নন্তি খোমাদীনং ছন্নং, নিদ্ধারণে সামিৰচনং। অঞ্ঞতরং সুত্তন্তি নিদ্ধারিতব্বনিদস্সনং। হত্থাতি হত্থেন, করণত্থে চেতং নিস্সক্কৰচনং। অঞ্চিতন্তি হত্থাযামেন আকড্ঢিতং । তস্মিন্তি তস্মিং অঞ্ছিতে সুত্তপ্পদেসে। তক্কম্হীতি কন্তনসূচিম্হি। ৰেঠিতেতি পলিৰেঠিতে।
2286-7.Channanti khomādīnaṃ channaṃ, niddhāraṇe sāmivacanaṃ. Aññataraṃ suttanti niddhāritabbanidassanaṃ. Hatthāti hatthena, karaṇatthe cetaṃ nissakkavacanaṃ. Añcitanti hatthāyāmena ākaḍḍhitaṃ . Tasminti tasmiṃ añchite suttappadese. Takkamhīti kantanasūcimhi. Veṭhiteti paliveṭhite.
সুত্তকন্তনতো সব্বপুব্বপযোগেসূতি সুত্তকন্তনতো পুব্বেসু কপ্পাসৰিচিননাদিসব্বপযোগেসু। হত্থৰারতোতি হত্থৰারগণনায। যথাহ ‘‘কপ্পাসৰিচিননং আদিং কত্ৰা সব্বপুব্বপযোগেসু হত্থৰারগণনায দুক্কট’’ন্তি (পাচি॰ অট্ঠ॰ ৯৮৮)।
Suttakantanato sabbapubbapayogesūti suttakantanato pubbesu kappāsavicinanādisabbapayogesu. Hatthavāratoti hatthavāragaṇanāya. Yathāha ‘‘kappāsavicinanaṃ ādiṃ katvā sabbapubbapayogesu hatthavāragaṇanāya dukkaṭa’’nti (pāci. aṭṭha. 988).
২২৮৮. কন্তিতং সুত্তন্তি পঠমমেৰ কন্তিতং দসিকসুত্তাদিং। পুন কন্তন্তিযাতি কোটিযা কোটিং সঙ্ঘাটেত্ৰা পুন কন্তন্তিযা।
2288.Kantitaṃ suttanti paṭhamameva kantitaṃ dasikasuttādiṃ. Puna kantantiyāti koṭiyā koṭiṃ saṅghāṭetvā puna kantantiyā.
ততিযং।
Tatiyaṃ.
২২৮৯. তণ্ডুলানং কোট্টনং তু আদিং কত্ৰা গিহীনং ৰেয্যাৰচ্চং করোন্তিযা সব্বপুব্বপযোগেসু দুক্কটন্তি যোজনা।
2289. Taṇḍulānaṃ koṭṭanaṃ tu ādiṃ katvā gihīnaṃ veyyāvaccaṃ karontiyā sabbapubbapayogesu dukkaṭanti yojanā.
২২৯০. যাগুআদিসু নিপ্ফাদেতব্বেসু তদাধারানি ভাজনানি গণেত্ৰাৰ পাচিত্তিং পরিদীপযে, খজ্জকাদীসু রূপানং গণনায পাচিত্তিং পরিদীপযেতি যোজনা। যাগুআদিসূতি এত্থ আদি-সদ্দেন ভত্তসূপাদীনং সঙ্গহো। খজ্জকাদীসূতি আদি-সদ্দেন মচ্ছমংসাদিউত্তরিভঙ্গানং সঙ্গহো।
2290.Yāguādisu nipphādetabbesu tadādhārāni bhājanāni gaṇetvāva pācittiṃ paridīpaye, khajjakādīsu rūpānaṃ gaṇanāya pācittiṃ paridīpayeti yojanā. Yāguādisūti ettha ādi-saddena bhattasūpādīnaṃ saṅgaho. Khajjakādīsūti ādi-saddena macchamaṃsādiuttaribhaṅgānaṃ saṅgaho.
২২৯১. ‘‘সচেপি মাতাপিতরো আগচ্ছন্তি, যংকিঞ্চি বীজনিং ৰা সম্মজ্জনিদণ্ডং ৰা কারাপেত্ৰা ৰেয্যাৰচ্চকরট্ঠানে ঠপেত্ৰাৰ যং কিঞ্চি পচিতুং ৰট্টতী’’তি অট্ঠকথাগতং ৰিনিচ্ছযং দস্সেতুমাহ ‘‘সচে’’তিআদি। সচেতি এত্থ ‘‘মাতাপিতরো আগচ্ছন্তী’’তি সেসো। অত্তনো এৰমাগতানং মাতাপিতূনম্পি কিঞ্চি কম্মং অকারেত্ৰা কিঞ্চি কম্মং কাতুং ন ৰট্টতীতি যোজনা। অপি-সদ্দো সম্ভাৰনে, তেন অঞ্ঞেসং কথাযেৰ নত্থীতি দীপেতি।
2291. ‘‘Sacepi mātāpitaro āgacchanti, yaṃkiñci bījaniṃ vā sammajjanidaṇḍaṃ vā kārāpetvā veyyāvaccakaraṭṭhāne ṭhapetvāva yaṃ kiñci pacituṃ vaṭṭatī’’ti aṭṭhakathāgataṃ vinicchayaṃ dassetumāha ‘‘sace’’tiādi. Saceti ettha ‘‘mātāpitaro āgacchantī’’ti seso. Attano evamāgatānaṃ mātāpitūnampi kiñci kammaṃ akāretvā kiñci kammaṃ kātuṃ na vaṭṭatīti yojanā. Api-saddo sambhāvane, tena aññesaṃ kathāyeva natthīti dīpeti.
২২৯২-৩. সঙ্ঘস্স যাগুপানে ৰেয্যাৰচ্চং করোন্তিযা অনাপত্তীতি যোজনা। ‘‘সঙ্ঘভত্তেপী’’তিআদীসুপি এসেৰ নযো। অত্তনো ৰেয্যাৰচ্চকরস্স ৰাতি সম্বন্ধো। যথাহ ‘‘যাগুপানেতি মনুস্সেহি সঙ্ঘস্সত্থায করিযমানে যাগুপানে ৰা সঙ্ঘভত্তে ৰা তেসং সহাযিকভাৰেন যং কিঞ্চি পচন্তিযা অনাপত্তি। চেতিযপূজায সহাযিকা হুত্ৰা গন্ধমালাদীনি পূজেতি, ৰট্টতী’’তি (পাচি॰ অট্ঠ॰ ৯৯৩)।
2292-3. Saṅghassa yāgupāne veyyāvaccaṃ karontiyā anāpattīti yojanā. ‘‘Saṅghabhattepī’’tiādīsupi eseva nayo. Attano veyyāvaccakarassa vāti sambandho. Yathāha ‘‘yāgupāneti manussehi saṅghassatthāya kariyamāne yāgupāne vā saṅghabhatte vā tesaṃ sahāyikabhāvena yaṃ kiñci pacantiyā anāpatti. Cetiyapūjāya sahāyikā hutvā gandhamālādīni pūjeti, vaṭṭatī’’ti (pāci. aṭṭha. 993).
চতুত্থং।
Catutthaṃ.
২২৯৪. ‘‘যা পন ভিক্খুনী ‘এহায্যে ইমং অধিকরণং ৰূপসমেহী’তি ৰুচ্চমানা ‘সাধূ’তি পটিস্সুণিত্ৰা সা পচ্ছা অনন্তরাযিকিনী নেৰ ৰূপসমেয্য ন ৰূপসমায উস্সুক্কং করেয্য, পাচিত্তিয’’ন্তি (পাচি॰ ৯৯৫) সিক্খাপদস্স ৰিনিচ্ছযং দস্সেতুমাহ ‘‘পাচিত্তি ধুরনিক্খেপে’’তিআদি। ধুরনিক্খেপেতি ন দানি তং ৰূপসমেস্সামি, অঞ্ঞাহি ৰা ন ৰূপসমাপেস্সামী’’তি এৰং ধুরস্স উস্সাহস্স নিক্খেপে পাচিত্তীতি যোজনা। চীৰরসিব্বনে যথা পঞ্চাহপরিহারো লব্ভতি, ইধ পন তথা একাহম্পি পরিহারো ন লব্ভতীতি যোজনা।
2294. ‘‘Yā pana bhikkhunī ‘ehāyye imaṃ adhikaraṇaṃ vūpasamehī’ti vuccamānā ‘sādhū’ti paṭissuṇitvā sā pacchā anantarāyikinī neva vūpasameyya na vūpasamāya ussukkaṃ kareyya, pācittiya’’nti (pāci. 995) sikkhāpadassa vinicchayaṃ dassetumāha ‘‘pācitti dhuranikkhepe’’tiādi. Dhuranikkhepeti na dāni taṃ vūpasamessāmi, aññāhi vā na vūpasamāpessāmī’’ti evaṃ dhurassa ussāhassa nikkhepe pācittīti yojanā. Cīvarasibbane yathā pañcāhaparihāro labbhati, idha pana tathā ekāhampi parihāro na labbhatīti yojanā.
২২৯৫. সেসন্তি ‘‘ধুরং নিক্খিপিত্ৰা পচ্ছা ৰিনিচ্ছিনন্তী আপত্তিং আপজ্জিত্ৰাৰ ৰিনিচ্ছিনাতী’’তিআদিকং ৰিনিচ্ছযজাতং। তত্থ চীৰরসিব্বনে ৰুত্তনযেনেৰ ৰেদিতব্বন্তি যোজনা।
2295.Sesanti ‘‘dhuraṃ nikkhipitvā pacchā vinicchinantī āpattiṃ āpajjitvāva vinicchinātī’’tiādikaṃ vinicchayajātaṃ. Tattha cīvarasibbane vuttanayeneva veditabbanti yojanā.
পঞ্চমং।
Pañcamaṃ.
২২৯৬-৭. যা পন ভিক্খুনী গিহীনং ৰা সহধম্মিকে ঠপেত্ৰা অঞ্ঞেসং পরিব্বাজকপরিব্বাজিকানং ৰা দন্তপোনোদকং ৰিনা অঞ্ঞং যং কিঞ্চি অজ্ঝোহরণীযং খাদনীযং, ভোজনীযং ৰা কাযেন ৰা কাযপটিবদ্ধেন ৰা নিস্সগ্গিযেন ৰা দদাতি, তস্সা পাচিত্তিযং হোতীতি যোজনা।
2296-7.Yāpana bhikkhunī gihīnaṃ vā sahadhammike ṭhapetvā aññesaṃ paribbājakaparibbājikānaṃ vā dantaponodakaṃ vinā aññaṃ yaṃ kiñci ajjhoharaṇīyaṃ khādanīyaṃ, bhojanīyaṃ vā kāyena vā kāyapaṭibaddhena vā nissaggiyena vā dadāti, tassā pācittiyaṃ hotīti yojanā.
২২৯৮-৯. ইধ ইমস্মিং সিক্খাপদে মুনিনা দন্তকট্ঠোদকে দুক্কটং ৰুত্তন্তি যোজনা। যা পন ভিক্খুনী কাযাদীহি সযং ন দেতি অঞ্ঞেন দাপেতি, তস্সা চ কাযাদীহি অদত্ৰা ভূমিযং নিক্খিপিত্ৰা দেন্তিযাপি যা বাহিরলেপং ৰা দেতি, তস্সাপি উম্মত্তিকায চ ন দোসো অনাপত্তীতি যোজনা।
2298-9.Idha imasmiṃ sikkhāpade muninā dantakaṭṭhodake dukkaṭaṃ vuttanti yojanā. Yā pana bhikkhunī kāyādīhi sayaṃ na deti aññena dāpeti, tassā ca kāyādīhi adatvā bhūmiyaṃ nikkhipitvā dentiyāpi yā bāhiralepaṃ vā deti, tassāpi ummattikāya ca na doso anāpattīti yojanā.
ছট্ঠং।
Chaṭṭhaṃ.
২৩০০-১. আৰসথচীৰরন্তি ‘‘উতুনিযো ভিক্খুনিযো পরিভুঞ্জন্তূ’’তি দিন্নং চীৰরং। যা ভিক্খুনী যং ‘‘আৰসথচীৰর’’ন্তি নিযমিতং চীৰরং, তং চতুত্থে দিৰসে ধোৰিত্ৰা অন্তমসো উতুনিযা সামণেরায ৰা অদত্ৰা সচে পরিভুঞ্জেয্য, তস্সা পাচিত্তিযং ৰুত্তন্তি যোজনা। তিকপাচিত্তিযং সিযাতি ‘‘অনিস্সজ্জিতে অনিস্সজ্জিতসঞ্ঞা…পে॰… ৰেমতিকা…পে॰… নিস্সজ্জিতসঞ্ঞা পরিভুঞ্জতি, আপত্তি পাচিত্তিযস্সা’’তি (পাচি॰ ১০০৬) ৰুত্তং পাচিত্তিযং হোতীতি যোজনা।
2300-1.Āvasathacīvaranti ‘‘utuniyo bhikkhuniyo paribhuñjantū’’ti dinnaṃ cīvaraṃ. Yā bhikkhunī yaṃ ‘‘āvasathacīvara’’nti niyamitaṃ cīvaraṃ, taṃ catutthe divase dhovitvā antamaso utuniyā sāmaṇerāya vā adatvā sace paribhuñjeyya, tassā pācittiyaṃ vuttanti yojanā. Tikapācittiyaṃ siyāti ‘‘anissajjite anissajjitasaññā…pe… vematikā…pe… nissajjitasaññā paribhuñjati, āpatti pācittiyassā’’ti (pāci. 1006) vuttaṃ pācittiyaṃ hotīti yojanā.
২৩০২-৩. তস্মিং চীৰরে নিস্সজ্জিতে অনিস্সজ্জিতসঞ্ঞায ৰা ৰেমতিকায ৰা তস্সা ভিক্খুনিযা দ্ৰিকদুক্কটং ৰুত্তন্তি যোজনা। অঞ্ঞাসং উতুনীনং অভাৰে অদত্ৰাপি পরিভুঞ্জন্তিযা অনাপত্তি। পুন পরিযযেতি পুন উতুনিৰারে যথাকালং পরিভুঞ্জন্তিযা অনাপত্তি। অচ্ছিন্নচীৰরাদীনঞ্চ অনাপত্তীতি যোজনা। পরিযযেতি গাথাবন্ধৰসেন রস্সত্তং । অচ্ছিন্নচীৰরাদীনন্তি এত্থ আদি-সদ্দেন নট্ঠচীৰরাদীনং সঙ্গহো। আপদাসুপীতি মহগ্ঘচীৰরং সরীরতো মোচেত্ৰা সুপ্পটিসামিতম্পি চোরা হরন্তি, এৰরূপাসু আপদাসু পরিভুঞ্জন্তিযা অনাপত্তীতি যোজনা।
2302-3.Tasmiṃ cīvare nissajjite anissajjitasaññāya vā vematikāya vā tassā bhikkhuniyā dvikadukkaṭaṃ vuttanti yojanā. Aññāsaṃ utunīnaṃ abhāve adatvāpi paribhuñjantiyā anāpatti. Puna pariyayeti puna utunivāre yathākālaṃ paribhuñjantiyā anāpatti. Acchinnacīvarādīnañca anāpattīti yojanā. Pariyayeti gāthābandhavasena rassattaṃ . Acchinnacīvarādīnanti ettha ādi-saddena naṭṭhacīvarādīnaṃ saṅgaho. Āpadāsupīti mahagghacīvaraṃ sarīrato mocetvā suppaṭisāmitampi corā haranti, evarūpāsu āpadāsu paribhuñjantiyā anāpattīti yojanā.
সত্তমং।
Sattamaṃ.
২৩০৪. সকৰাটকং ৰিহারন্তি কৰাটবন্ধৰিহারং, দ্ৰারকৰাটযুত্তং সুগুত্তসেনাসনন্তি ৰুত্তং হোতি। রক্খনত্থায অদত্ৰাতি ‘‘ইমং জগ্গেয্যাসী’’তি এৰং অনাপুচ্ছিত্ৰা।
2304.Sakavāṭakaṃvihāranti kavāṭabandhavihāraṃ, dvārakavāṭayuttaṃ suguttasenāsananti vuttaṃ hoti. Rakkhanatthāya adatvāti ‘‘imaṃ jaggeyyāsī’’ti evaṃ anāpucchitvā.
২৩০৫-৬. ‘‘হোতি পাচিত্তিযং তস্সা, চারিকং পক্কমন্তিযা’’তি ৰুত্তমেৰ পকাসেতুমাহ ‘‘অত্তনো গামতো’’তিআদি। অত্তনো গামতোতি অত্তনো ৰসনকগামতো। তথা ইতরস্সাতি অপরিক্খিত্তস্স ৰিহারস্স পরিক্খেপং উপচারং। তন্তিআদিপদত্তযে ভুম্মত্থে উপযোগৰচনং ৰেদিতব্বং। পরিক্খিত্তস্স ৰিহারস্স পরিক্খেপে পঠমেন পদেন সমতিক্কন্তে দুক্কটং, তথা ইতরস্স অপরিক্খিত্তস্স ৰিহারস্স তস্মিং উপচারে অতিক্কন্তে দুক্কটং। দুতিযেন পদেন পরিক্খেপে, উপচারে সমতিক্কন্তমত্তে পাচিত্তীতি যোজনা।
2305-6. ‘‘Hoti pācittiyaṃ tassā, cārikaṃ pakkamantiyā’’ti vuttameva pakāsetumāha ‘‘attano gāmato’’tiādi. Attano gāmatoti attano vasanakagāmato. Tathā itarassāti aparikkhittassa vihārassa parikkhepaṃ upacāraṃ. Tantiādipadattaye bhummatthe upayogavacanaṃ veditabbaṃ. Parikkhittassa vihārassa parikkhepe paṭhamena padena samatikkante dukkaṭaṃ, tathā itarassa aparikkhittassa vihārassa tasmiṃ upacāre atikkante dukkaṭaṃ. Dutiyena padena parikkhepe, upacāre samatikkantamatte pācittīti yojanā.
২৩০৭. অকৰাটবন্ধনস্মিং কৰাটবন্ধরহিতে ৰিহারে তথা অনিস্সজ্জন্তিযা দুক্কটং পরিদীপিতং। জগ্গিকং অলভন্তিযাতি এত্থ ‘‘পরিযেসিত্ৰা’’তি সেসো। জগ্গিকন্তি ৰিহারপটিজগ্গিকং।
2307.Akavāṭabandhanasmiṃ kavāṭabandharahite vihāre tathā anissajjantiyā dukkaṭaṃ paridīpitaṃ. Jaggikaṃ alabhantiyāti ettha ‘‘pariyesitvā’’ti seso. Jaggikanti vihārapaṭijaggikaṃ.
২৩০৮. আপদাসূতি রট্ঠে ভিজ্জন্তে আৰাসে ছড্ডেত্ৰা গচ্ছন্তি, এৰরূপাসু আপদাসু। গিলানাযাতি ৰচীভেদং কাতুং অসমত্থাযাতি।
2308.Āpadāsūti raṭṭhe bhijjante āvāse chaḍḍetvā gacchanti, evarūpāsu āpadāsu. Gilānāyāti vacībhedaṃ kātuṃ asamatthāyāti.
অট্ঠমং।
Aṭṭhamaṃ.
২৩০৯-১০. হত্থী চ অস্সো চ রথো চ হত্থিঅস্সরথা, তে আদি যেসং তে হত্থিঅস্সরথাদযো, তেহি। আদি-সদ্দেন ধনু থরূতি পদদ্ৰযং গহিতং। সংযুত্তন্তি যথাৰুত্তেহি হত্থিঅস্সাদিপদেহি সংযোজিতং, ‘‘হত্থীনং সিপ্পং হত্থিসিপ্প’’ন্তিআদিনা কতসমাসন্তি অত্থো, ‘‘হত্থিসিপ্পং অস্সসিপ্পং রথসিপ্পং ধনুসিপ্পং থরুসিপ্প’’ন্তি এৰং ৰুত্তং যং কিঞ্চি সিপ্পন্তি ৰুত্তং হোতি। হত্থিসিক্খাদিসিপ্পং সন্দীপকো গন্থো ৰচ্চৰাচকানং অভেদোপচারেন এৰং ৰুত্তোতি গহেতব্বং। তেনেৰ ৰক্খতি ‘‘পদাদীনং ৰসেনিধা’’তি। পরূপঘাতকং মন্তাগদযোগপ্পভেদকং কিঞ্চীতি পরেসং অন্তরাযকরং খিলনৰসীকরণসোসাপনাদিভেদং আথব্বণমন্তঞ্চ ৰিসযোগাদিপ্পভেদকঞ্চ যং কিঞ্চি সিপ্পন্তি অত্থো।
2309-10. Hatthī ca asso ca ratho ca hatthiassarathā, te ādi yesaṃ te hatthiassarathādayo, tehi. Ādi-saddena dhanu tharūti padadvayaṃ gahitaṃ. Saṃyuttanti yathāvuttehi hatthiassādipadehi saṃyojitaṃ, ‘‘hatthīnaṃ sippaṃ hatthisippa’’ntiādinā katasamāsanti attho, ‘‘hatthisippaṃ assasippaṃ rathasippaṃ dhanusippaṃ tharusippa’’nti evaṃ vuttaṃ yaṃ kiñci sippanti vuttaṃ hoti. Hatthisikkhādisippaṃ sandīpako gantho vaccavācakānaṃ abhedopacārena evaṃ vuttoti gahetabbaṃ. Teneva vakkhati ‘‘padādīnaṃ vasenidhā’’ti. Parūpaghātakaṃ mantāgadayogappabhedakaṃ kiñcīti paresaṃ antarāyakaraṃ khilanavasīkaraṇasosāpanādibhedaṃ āthabbaṇamantañca visayogādippabhedakañca yaṃ kiñci sippanti attho.
এত্থ চ খিলনমন্তো নাম দারুসারখিলং মন্তেত্ৰা পথৰিযং পৰেসেত্ৰা মারণমন্তো। ৰসীকরণমন্তো নাম পরং অত্তনো ৰসে ৰত্তাপনকমন্তো। সোসাপনকমন্তো নাম পরসরীরং রসাদিধাতুক্খযেন সুক্খভাৰং পাপনকমন্তো। আদি-সদ্দেন ৰিদেস্সনাদিমন্তানং সঙ্গহো। ৰিদেস্সনং নাম মিত্তানং অঞ্ঞমঞ্ঞস্স ৰেরিভাৰাপাদনং। ইধ ইমস্মিং সাসনে যা ভিক্খুনী হত্থি…পে॰… কিঞ্চি যস্স কস্সচি সন্তিকে পদাদীনং ৰসেন পরিযাপুণেয্য অধীযেয্য চে, তস্সা পাচিত্তিযং হোতীতি যোজনা।
Ettha ca khilanamanto nāma dārusārakhilaṃ mantetvā pathaviyaṃ pavesetvā māraṇamanto. Vasīkaraṇamanto nāma paraṃ attano vase vattāpanakamanto. Sosāpanakamanto nāma parasarīraṃ rasādidhātukkhayena sukkhabhāvaṃ pāpanakamanto. Ādi-saddena videssanādimantānaṃ saṅgaho. Videssanaṃ nāma mittānaṃ aññamaññassa veribhāvāpādanaṃ. Idha imasmiṃ sāsane yā bhikkhunī hatthi…pe… kiñci yassa kassaci santike padādīnaṃ vasena pariyāpuṇeyya adhīyeyya ce, tassā pācittiyaṃ hotīti yojanā.
২৩১১. লেখেতি লিখিতসিপ্পে। ধারণায চাতি ধারণসত্থে, যস্মিং ৰুত্তনযেন পটিপজ্জন্তা বহূনিপি গন্থানি ধারেন্তি। গুত্তিযাতি অত্তনো ৰা পরেসং ৰা গুত্তত্থায। পরিত্তেসু চ সব্বেসূতি যক্খপরিত্তচোরৰাল়াদিসব্বেসু পরিত্তেসু চ।
2311.Lekheti likhitasippe. Dhāraṇāya cāti dhāraṇasatthe, yasmiṃ vuttanayena paṭipajjantā bahūnipi ganthāni dhārenti. Guttiyāti attano vā paresaṃ vā guttatthāya. Parittesu ca sabbesūti yakkhaparittacoravāḷādisabbesu parittesu ca.
নৰমং।
Navamaṃ.
২৩১২. দসমেতি ‘‘যা পন ভিক্খুনী তিরচ্ছানৰিজ্জং ৰাচেয্য, পাচিত্তিয’’ন্তি (পাচি॰ ১০১৮) সমুদ্দিট্ঠে দসমসিক্খাপদে। ইদং দসমসিক্খাপদং।
2312.Dasameti ‘‘yā pana bhikkhunī tiracchānavijjaṃ vāceyya, pācittiya’’nti (pāci. 1018) samuddiṭṭhe dasamasikkhāpade. Idaṃ dasamasikkhāpadaṃ.
দসমং।
Dasamaṃ.
চিত্তাগারৰগ্গো পঞ্চমো।
Cittāgāravaggo pañcamo.
২৩১৩. সভিক্খুকং আরামন্তি যত্থ ভিক্খূ রুক্খমূলেপি ৰসন্তি, তং পদেসং। জানিত্ৰাতি ‘‘সভিক্খুক’’ন্তি জানিত্ৰা। যং কিঞ্চীতি ভিক্খুং ৰা সামণেরং ৰা আরামিকং ৰা যং কিঞ্চি।
2313.Sabhikkhukaṃ ārāmanti yattha bhikkhū rukkhamūlepi vasanti, taṃ padesaṃ. Jānitvāti ‘‘sabhikkhuka’’nti jānitvā. Yaṃ kiñcīti bhikkhuṃ vā sāmaṇeraṃ vā ārāmikaṃ vā yaṃ kiñci.
২৩১৪-৫. ‘‘সভিক্খুকো নাম আরামো যত্থ ভিক্খূ রুক্খমূলেপি ৰসন্তী’’তি (পাচি॰ ১০২৫) ৰচনতো আহ ‘‘সচে অন্তমসো’’তিআদি। যা পন ভিক্খুনী অন্তমসো রুক্খমূলস্সপি অনাপুচ্ছা সচে পরিক্খেপং অতিক্কামেতি, তস্সা পঠমে পাদে দুক্কটং, অপরিক্খিত্তে তস্স ৰিহারস্স উপচারোক্কমে ৰাপি ভিক্খুনিযা দুক্কটং, দুতিযে পাদে অতিক্কামিতে পাচিত্তি সিযাতি যোজনা।
2314-5. ‘‘Sabhikkhuko nāma ārāmo yattha bhikkhū rukkhamūlepi vasantī’’ti (pāci. 1025) vacanato āha ‘‘sace antamaso’’tiādi. Yā pana bhikkhunī antamaso rukkhamūlassapi anāpucchā sace parikkhepaṃ atikkāmeti, tassā paṭhame pāde dukkaṭaṃ, aparikkhitte tassa vihārassa upacārokkame vāpi bhikkhuniyā dukkaṭaṃ, dutiye pāde atikkāmite pācitti siyāti yojanā.
২৩১৬. অভিক্খুকে আরামে সভিক্খূতি সঞ্ঞায উভোসুপি সভিক্খুকাভিক্খুকেসু আরামেসু জাতকঙ্খায সঞ্জাতৰিচিকিচ্ছায, ৰেমতিকাযাতি অত্থো। তস্সা আপত্তি দুক্কটং হোতীতি যোজনা।
2316.Abhikkhuke ārāme sabhikkhūti saññāya ubhosupi sabhikkhukābhikkhukesu ārāmesu jātakaṅkhāya sañjātavicikicchāya, vematikāyāti attho. Tassā āpatti dukkaṭaṃ hotīti yojanā.
২৩১৭. সীসানুলোকিকা যা ভিক্খুনী গচ্ছতি, তস্সা চ অনাপত্তি পকাসিতাতি যোজনা। এৰমুপরিপি। তা ভিক্খুনিযো যত্থ সন্নিপতিতা হোন্তি, তাসং সন্তিকং ‘‘গচ্ছামী’’তি গচ্ছতি। যথাহ ‘‘যত্থ ভিক্খুনিযো পঠমতরং পৰিসিত্ৰা সজ্ঝাযং ৰা চেতিযৰন্দনাদীনি ৰা করোন্তি, তত্থ তাসং সন্তিকং গচ্ছামীতি গন্তুং ৰট্টতী’’তি (পাচি॰ অট্ঠ॰ ১০২৭)।
2317. Sīsānulokikā yā bhikkhunī gacchati, tassā ca anāpatti pakāsitāti yojanā. Evamuparipi. Tā bhikkhuniyo yattha sannipatitā honti, tāsaṃ santikaṃ ‘‘gacchāmī’’ti gacchati. Yathāha ‘‘yattha bhikkhuniyo paṭhamataraṃ pavisitvā sajjhāyaṃ vā cetiyavandanādīni vā karonti, tattha tāsaṃ santikaṃ gacchāmīti gantuṃ vaṭṭatī’’ti (pāci. aṭṭha. 1027).
২৩১৮. ‘‘সন্তং ভিক্খুং অনাপুচ্ছা’’তি ৰচনেনেৰ অভিক্খুকং আরামং কিঞ্চি অনাপুচ্ছা পৰিসন্তিযা অনাপত্তীতি দীপিতং হোতি। আরামমজ্ঝতো ৰা মগ্গো হোতি, তেন গচ্ছন্তিযাপি। আপদাসূতি যেন কেনচি উপদ্দুতা হোতি, এৰরূপাসু আপদাসু পৰিসন্তিযা।
2318.‘‘Santaṃ bhikkhuṃ anāpucchā’’ti vacaneneva abhikkhukaṃ ārāmaṃ kiñci anāpucchā pavisantiyā anāpattīti dīpitaṃ hoti. Ārāmamajjhato vā maggo hoti, tena gacchantiyāpi. Āpadāsūti yena kenaci upaddutā hoti, evarūpāsu āpadāsu pavisantiyā.
পঠমং।
Paṭhamaṃ.
২৩২০. অক্কোসেয্যাতি দসন্নং অক্কোসৰত্থূনং অঞ্ঞতরেন সম্মুখা, পরম্মুখা ৰা অক্কোসেয্য ৰা। পরিভাসেয্য ৰাতি ভয’মস্স উপদংসেয্য ৰা। তিকপাচিত্তিযন্তি ‘‘উপসম্পন্নে উপসম্পন্নসঞ্ঞা…পে॰… ৰেমতিকা…পে॰… অনুপসম্পন্নসঞ্ঞা অক্কোসতি ৰা পরিভাসতি ৰা, আপত্তি পাচিত্তিযস্সা’’তি (পাচি॰ ১০৩১) তিকপাচিত্তিযং ৰুত্তং। সেসেতি অনুপসম্পন্নে। তিকদুক্কটং তস্সা হোতীতি যোজনা।
2320.Akkoseyyāti dasannaṃ akkosavatthūnaṃ aññatarena sammukhā, parammukhā vā akkoseyya vā. Paribhāseyya vāti bhaya’massa upadaṃseyya vā. Tikapācittiyanti ‘‘upasampanne upasampannasaññā…pe… vematikā…pe… anupasampannasaññā akkosati vā paribhāsati vā, āpatti pācittiyassā’’ti (pāci. 1031) tikapācittiyaṃ vuttaṃ. Seseti anupasampanne. Tikadukkaṭaṃ tassā hotīti yojanā.
২৩২১. ‘‘পুরক্খত্ৰা’’তিআদীসু যং ৰত্তব্বং, তং ‘‘অভিসপেয্যা’’তি (পাচি॰ ৮৭৫) ৰুত্তসিক্খাপদে ৰুত্তনযমেৰ।
2321.‘‘Purakkhatvā’’tiādīsu yaṃ vattabbaṃ, taṃ ‘‘abhisapeyyā’’ti (pāci. 875) vuttasikkhāpade vuttanayameva.
দুতিযং।
Dutiyaṃ.
২৩২২-৩. সঙ্ঘন্তি ভিক্খুনিসঙ্ঘং। পরিভাসেয্যাতি ‘‘বালা এতা, অব্যত্তা এতা, নেতা জানন্তি কম্মং ৰা কম্মদোসং ৰা কম্মৰিপত্তিং ৰা কম্মসম্পত্তিং ৰা’’তি (পাচি॰ ১০৩৫) আগতনযেন পরিভাসেয্যাতি অত্থো। ইতরাযাতি এত্থ উপযোগত্থে করণৰচনং। একং ভিক্খুনিং ৰা সম্বহুলা ভিক্খুনিযো ৰা তথেৰ ইতরং অনুপসম্পন্নং ৰা পরিভাসন্তিযা তস্সা দুক্কটং পরিদীপিতন্তি যোজনা।
2322-3.Saṅghanti bhikkhunisaṅghaṃ. Paribhāseyyāti ‘‘bālā etā, abyattā etā, netā jānanti kammaṃ vā kammadosaṃ vā kammavipattiṃ vā kammasampattiṃ vā’’ti (pāci. 1035) āgatanayena paribhāseyyāti attho. Itarāyāti ettha upayogatthe karaṇavacanaṃ. Ekaṃ bhikkhuniṃ vā sambahulā bhikkhuniyo vā tatheva itaraṃ anupasampannaṃ vā paribhāsantiyā tassā dukkaṭaṃ paridīpitanti yojanā.
ততিযং।
Tatiyaṃ.
২৩২৪-৬. যা নিমন্তনপৰারণা উভোপি গণভোজনসিক্খাপদে (পাচি॰ ২১৭-২১৯), পৰারণসিক্খাপদে (পাচি॰ ২৩৮-২৩৯) চ ৰুত্তলক্খণা, তাহি উভোহি নিমন্তনপৰারণাহি যা চ ভিক্খুনী সচে নিমন্তিতাপি ৰা পৰারিতাপি ৰা ভৰেয্য, সা পুরেভত্তং যাগুঞ্চ যামকালিকাদিকালিকত্তযঞ্চ ঠপেত্ৰা যং কিঞ্চি আমিসং যাৰকালিকং অজ্ঝোহরণত্থায পটিগ্গণ্হাতি চে, তস্সা গহণে দুক্কটং সিযা, অজ্ঝোহারৰসেন এত্থ ইমস্মিং সিক্খাপদে পাচিত্তি পরিদীপিতাতি যোজনা।
2324-6. Yā nimantanapavāraṇā ubhopi gaṇabhojanasikkhāpade (pāci. 217-219), pavāraṇasikkhāpade (pāci. 238-239) ca vuttalakkhaṇā, tāhi ubhohi nimantanapavāraṇāhi yā ca bhikkhunī sace nimantitāpi vā pavāritāpi vā bhaveyya, sā purebhattaṃ yāguñca yāmakālikādikālikattayañca ṭhapetvā yaṃ kiñci āmisaṃ yāvakālikaṃ ajjhoharaṇatthāya paṭiggaṇhāti ce, tassā gahaṇe dukkaṭaṃ siyā, ajjhohāravasena ettha imasmiṃ sikkhāpade pācitti paridīpitāti yojanā.
এত্থ চ নিমন্তিতা নাম ‘‘পঞ্চন্নং ভোজনানং অঞ্ঞতরেন ভোজনেন নিমন্তিতা’’তি গণভোজনসিক্খাপদে ৰুত্তলক্খণা। পৰারণা চ ‘‘পৰারিতো নাম অসনং পঞ্ঞাযতি, ভোজনং পঞ্ঞাযতি, হত্থপাসে ঠিতো অভিহরতি, পটিক্খেপো পঞ্ঞাযতী’’তি পৰারণসিক্খাপদে ৰুত্তলক্খণাতি ৰেদিতব্বা।
Ettha ca nimantitā nāma ‘‘pañcannaṃ bhojanānaṃ aññatarena bhojanena nimantitā’’ti gaṇabhojanasikkhāpade vuttalakkhaṇā. Pavāraṇā ca ‘‘pavārito nāma asanaṃ paññāyati, bhojanaṃ paññāyati, hatthapāse ṭhito abhiharati, paṭikkhepo paññāyatī’’ti pavāraṇasikkhāpade vuttalakkhaṇāti veditabbā.
২৩২৭. কালিকানি চ তীণেৰাতি যামকালিকাদীনি তীণি কালিকানি এৰ।
2327.Kālikāni ca tīṇevāti yāmakālikādīni tīṇi kālikāni eva.
২৩২৮-৯. নিমন্তিতপৰারিতানং দ্ৰিন্নং সাধারণাপত্তিং দস্সেত্ৰা অনাপত্তিং দস্সেতুমাহ ‘‘নিমন্তিতা’’তিআদি। ইধ ইমস্মিং সাসনে যা পন ভিক্খুনী নিমন্তিতা অপ্পৰারিতা সচে যাগুং পিৰতি, ৰট্টতি অনাপত্তীতি অত্থো। সামিকস্সাতি যেন নিমন্তিতা, তস্স নিমন্তনসামিকস্সেৰ। অঞ্ঞভোজনন্তি যেন নিমন্তিতা, ততো অঞ্ঞস্স ভোজনং। সচে সা ভুঞ্জতি, তথা ৰট্টতীতি যোজনা।
2328-9. Nimantitapavāritānaṃ dvinnaṃ sādhāraṇāpattiṃ dassetvā anāpattiṃ dassetumāha ‘‘nimantitā’’tiādi. Idha imasmiṃ sāsane yā pana bhikkhunī nimantitā appavāritā sace yāguṃ pivati, vaṭṭati anāpattīti attho. Sāmikassāti yena nimantitā, tassa nimantanasāmikasseva. Aññabhojananti yena nimantitā, tato aññassa bhojanaṃ. Sace sā bhuñjati, tathā vaṭṭatīti yojanā.
কালিকানি চ তীণেৰাতি যামকালিকাদীনি তীণি কালিকানেৰ। পচ্চযে সতীতি পিপাসাদিপচ্চযে সতি।
Kālikāni ca tīṇevāti yāmakālikādīni tīṇi kālikāneva. Paccaye satīti pipāsādipaccaye sati.
২৩৩০. ইমস্স সিক্খাপদস্স ইদং সমুট্ঠানং অদ্ধানেন তুল্যন্তি যোজনা। পৰারিতায, অপ্পৰারিতায ৰা নিমন্তিতায ৰসেন কিরিযাকিরিযতং দস্সেতুমাহ ‘‘নিমন্তিতা’’তিআদি। নিমন্তিতা পন সামিকং অনাপুচ্ছা ভুঞ্জতি চে, তস্সা ৰসেন ইদং সিক্খাপদং কিরিযাকিরিযং হোতি। এত্থ ভুঞ্জনং ক্রিযং। সামিকস্স অনাপুচ্ছনং অক্রিযং।
2330. Imassa sikkhāpadassa idaṃ samuṭṭhānaṃ addhānena tulyanti yojanā. Pavāritāya, appavāritāya vā nimantitāya vasena kiriyākiriyataṃ dassetumāha ‘‘nimantitā’’tiādi. Nimantitā pana sāmikaṃ anāpucchā bhuñjati ce, tassā vasena idaṃ sikkhāpadaṃ kiriyākiriyaṃ hoti. Ettha bhuñjanaṃ kriyaṃ. Sāmikassa anāpucchanaṃ akriyaṃ.
২৩৩১. ‘‘কপ্পিযং কারাপেত্ৰা’’তিআদিং পৰারিতমেৰ সন্ধাযাহ। যা যদি পরিভুঞ্জতি, তস্সা চ পাচিত্তি সিযা কিরিযতো হোতীতি যোজনা। সিযাতি অৰস্সং। পৰারণসিক্খাপদে ৰুত্তনযেন কপ্পিযং কারেত্ৰা ৰা অকারাপেত্ৰা ৰা পরিভুঞ্জন্তিযা তস্সা পরিভোগেনেৰ ইমিনা সিক্খাপদেন অৰস্সং আপত্তি হোতীতি অত্থো।
2331.‘‘Kappiyaṃ kārāpetvā’’tiādiṃ pavāritameva sandhāyāha. Yā yadi paribhuñjati, tassā ca pācitti siyā kiriyato hotīti yojanā. Siyāti avassaṃ. Pavāraṇasikkhāpade vuttanayena kappiyaṃ kāretvā vā akārāpetvā vā paribhuñjantiyā tassā paribhogeneva iminā sikkhāpadena avassaṃ āpatti hotīti attho.
চতুত্থং।
Catutthaṃ.
২৩৩২. ‘‘যা পন ভিক্খুনী কুলমচ্ছরিনী অস্স, পাচিত্তিয’’ন্তি (পাচি॰ ১০৪৩) ইমস্মিং সিক্খাপদে ৰিনিচ্ছযং দস্সেতুমাহ ‘‘ভিক্খুনীন’’ন্তিআদি। কুলসন্তিকে ভিক্খুনীনং অৰণ্ণং ৰদন্তিযা পাচিত্তীতি সম্বন্ধো, কুলস্স সন্তিকে ‘‘ভিক্খুনিযো দুস্সীলা পাপধম্মা’’তি ভিক্খুনীনং অৰণ্ণং ভাসন্তিযাতি অত্থো। কুলস্সাৰণ্ণনং ৰাপীতি ‘‘তং কুলং অস্সদ্ধং অপ্পসন্ন’’ন্তি ভিক্খুনীনং সন্তিকে কুলস্স অৰণ্ণং অগুণং ৰদন্তিযা পাচিত্তীতি সম্বন্ধো।
2332. ‘‘Yā pana bhikkhunī kulamaccharinī assa, pācittiya’’nti (pāci. 1043) imasmiṃ sikkhāpade vinicchayaṃ dassetumāha ‘‘bhikkhunīna’’ntiādi. Kulasantike bhikkhunīnaṃ avaṇṇaṃ vadantiyā pācittīti sambandho, kulassa santike ‘‘bhikkhuniyo dussīlā pāpadhammā’’ti bhikkhunīnaṃ avaṇṇaṃ bhāsantiyāti attho. Kulassāvaṇṇanaṃ vāpīti ‘‘taṃ kulaṃ assaddhaṃ appasanna’’nti bhikkhunīnaṃ santike kulassa avaṇṇaṃ aguṇaṃ vadantiyā pācittīti sambandho.
২৩৩৩. সন্তং ভাসন্তিযা দোসন্তি অমচ্ছরাযিত্ৰা কুলস্স ৰা ভিক্খুনীনং ৰা সন্তং দোসং আদীনৰং কথেন্তিযা।
2333.Santaṃbhāsantiyā dosanti amaccharāyitvā kulassa vā bhikkhunīnaṃ vā santaṃ dosaṃ ādīnavaṃ kathentiyā.
পঞ্চমং।
Pañcamaṃ.
২৩৩৪-৫. ওৰাদদাযকোতি অট্ঠহি গরুধম্মেহি ওৰাদং দেন্তো। ৰস্সং উপগচ্ছন্তিযাতি ৰস্সং ৰসন্তিযা।
2334-5.Ovādadāyakoti aṭṭhahi garudhammehi ovādaṃ dento. Vassaṃ upagacchantiyāti vassaṃ vasantiyā.
২৩৩৬. ভিক্খূতি ওৰাদদাযকা ভিক্খূ।
2336.Bhikkhūti ovādadāyakā bhikkhū.
ছট্ঠং।
Chaṭṭhaṃ.
২৩৩৮. যা সা ভিক্খুনী ৰস্সং ৰুত্থা পুরিমং ৰা পচ্ছিমং ৰা তেমাসং ৰুত্থা ততো অনন্তরং উভতোসঙ্ঘে ভিক্খুনিসঙ্ঘে চ ভিক্খুসঙ্ঘে চ ‘‘নাহং পৰারেস্সামী’’তি ধুরং নিক্খিপতি চেতি যোজনা।
2338. Yā sā bhikkhunī vassaṃ vutthā purimaṃ vā pacchimaṃ vā temāsaṃ vutthā tato anantaraṃ ubhatosaṅghe bhikkhunisaṅghe ca bhikkhusaṅghe ca ‘‘nāhaṃ pavāressāmī’’ti dhuraṃ nikkhipati ceti yojanā.
সত্তমং।
Sattamaṃ.
২৩৪১. ওৰাদাদীনমত্থাযাতি অট্ঠগরুধম্মস্সৰনাদীনমত্থায। আদি-সদ্দেন উপোসথপুচ্ছনপৰারণানং গহণং।
2341.Ovādādīnamatthāyāti aṭṭhagarudhammassavanādīnamatthāya. Ādi-saddena uposathapucchanapavāraṇānaṃ gahaṇaṃ.
২৩৪২. ওৰাদাদীনমত্থায অগমনেন অক্রিযং। কাযিকন্তি কাযকম্মং।
2342. Ovādādīnamatthāya agamanena akriyaṃ. Kāyikanti kāyakammaṃ.
অট্ঠমং।
Aṭṭhamaṃ.
২৩৪৩. ‘‘অন্ৰদ্ধমাসং ভিক্খুনিযা ভিক্খুসঙ্ঘতো দ্ৰে ধম্মা পচ্চাসীসিতব্বা উপোসথপুচ্ছনঞ্চ ওৰাদূপসঙ্কমনঞ্চ, তং অতিক্কামেন্তিযা পাচিত্তিয’’ন্তি (পাচি॰ ১০৫৯) ইমস্মিং সিক্খাপদে ৰিনিচ্ছযং দস্সেতুমাহ ‘‘ন যাচিস্সামী’’তিআদি। তং উত্তানত্থমেৰ।
2343. ‘‘Anvaddhamāsaṃ bhikkhuniyā bhikkhusaṅghato dve dhammā paccāsīsitabbā uposathapucchanañca ovādūpasaṅkamanañca, taṃ atikkāmentiyā pācittiya’’nti (pāci. 1059) imasmiṃ sikkhāpade vinicchayaṃ dassetumāha ‘‘na yācissāmī’’tiādi. Taṃ uttānatthameva.
নৰমং।
Navamaṃ.
২৩৪৬-৭. পসাখো নাম নাভিযা হেট্ঠা, জাণুমণ্ডলানং উপরি পদেসো। তথা হি যস্মা রুক্খস্স সাখা ৰিয উভো ঊরূ পভিজ্জিত্ৰা গতা, তস্মা সো পসাখোতি ৰুচ্চতি, তস্মিং পসাখে। সঞ্জাতন্তি উট্ঠিতং। গণ্ডন্তি যং কিঞ্চি গণ্ডং। রুধিতন্তি যং কিঞ্চি ৰণং। সঙ্ঘং ৰাতি ভিক্খুনিসঙ্ঘং ৰা। গণং ৰাতি সম্বহুলা ভিক্খুনিযো ৰা। একেনাতি এত্থ ‘‘পুরিসেনা’’তি সেসো, সহত্থে ইদং করণৰচনং। যথাহ ‘‘পুরিসেন সদ্ধিং একেনেকা’’তি। পুরিসোতি চ মনুস্সপুরিসোৰ গহেতব্বো।
2346-7.Pasākho nāma nābhiyā heṭṭhā, jāṇumaṇḍalānaṃ upari padeso. Tathā hi yasmā rukkhassa sākhā viya ubho ūrū pabhijjitvā gatā, tasmā so pasākhoti vuccati, tasmiṃ pasākhe. Sañjātanti uṭṭhitaṃ. Gaṇḍanti yaṃ kiñci gaṇḍaṃ. Rudhitanti yaṃ kiñci vaṇaṃ. Saṅghaṃ vāti bhikkhunisaṅghaṃ vā. Gaṇaṃ vāti sambahulā bhikkhuniyo vā. Ekenāti ettha ‘‘purisenā’’ti seso, sahatthe idaṃ karaṇavacanaṃ. Yathāha ‘‘purisena saddhiṃ ekenekā’’ti. Purisoti ca manussapurisova gahetabbo.
ধোৰাতি এত্থ আদি-অত্থে ৰত্তমানেন ইতি-সদ্দেন ‘‘আলিম্পাপেয্য ৰা বন্ধাপেয্য ৰা মোচাপেয্য ৰা’’তি (পাচি॰ ১০৬৩) সিক্খাপদাগতানং ইতরেসং তিণ্ণং সঙ্গণ্হনতো ‘‘আলিম্প বন্ধ মোচেহী’’তি আণত্তিত্তযং সঙ্গহিতং। তেনেৰ ৰক্খতি ‘‘দুক্কটানিচ্ছ পাচিত্তিযো ছ চা’’তি।
Dhovāti ettha ādi-atthe vattamānena iti-saddena ‘‘ālimpāpeyya vā bandhāpeyya vā mocāpeyya vā’’ti (pāci. 1063) sikkhāpadāgatānaṃ itaresaṃ tiṇṇaṃ saṅgaṇhanato ‘‘ālimpa bandha mocehī’’ti āṇattittayaṃ saṅgahitaṃ. Teneva vakkhati ‘‘dukkaṭāniccha pācittiyo cha cā’’ti.
যা পন ভিক্খুনী পসাখে জাতং গণ্ডং ৰা রুধিতং ৰা সঙ্ঘং ৰা গণং ৰা অনাপুচ্ছিত্ৰা একেন পুরিসেন একিকা ‘‘ভিন্দ ফালেহি ধোৰ আলিম্প বন্ধ মোচেহী’’তি সব্বানি কাতব্বানি আণাপেতি, তস্সা ছ দুক্কটানি, কতেসু ভিন্দনাদীসু ছসু কিচ্চেসু তস্সা ছ পাচিত্তিযো হোন্তীতি যোজনা।
Yā pana bhikkhunī pasākhe jātaṃ gaṇḍaṃ vā rudhitaṃ vā saṅghaṃ vā gaṇaṃ vā anāpucchitvā ekena purisena ekikā ‘‘bhinda phālehi dhova ālimpa bandha mocehī’’ti sabbāni kātabbāni āṇāpeti, tassā cha dukkaṭāni, katesu bhindanādīsu chasu kiccesu tassā cha pācittiyo hontīti yojanā.
২৩৪৮-৯. এত্থাতি গণ্ডে ৰা ৰণে ৰা। ‘‘যং কাতব্বং অত্থি, তং সব্বং ত্ৰং করোহি’’ইতি সচে এৰং যা আণাপেতীতি যোজনা। তস্সা একায আণাপনৰাচায ছ দুক্কটানি চ পাচিত্তিযচ্ছক্কঞ্চেতি দ্ৰাদসাপত্তিযো সিযুন্তি যোজনা।
2348-9.Etthāti gaṇḍe vā vaṇe vā. ‘‘Yaṃ kātabbaṃ atthi, taṃ sabbaṃ tvaṃ karohi’’iti sace evaṃ yā āṇāpetīti yojanā. Tassā ekāya āṇāpanavācāya cha dukkaṭāni ca pācittiyacchakkañceti dvādasāpattiyo siyunti yojanā.
২৩৫১. আপুচ্ছিত্ৰা ৰাতি সঙ্ঘং ৰা গণং ৰা আপুচ্ছিত্ৰা। দুতিযন্তি দুতিযিকং। ৰিঞ্ঞুং দুতিযং গহেত্ৰাপি ৰাতি যোজনা।
2351.Āpucchitvāvāti saṅghaṃ vā gaṇaṃ vā āpucchitvā. Dutiyanti dutiyikaṃ. Viññuṃ dutiyaṃ gahetvāpi vāti yojanā.
দসমং।
Dasamaṃ.
আরামৰগ্গো ছট্ঠো।
Ārāmavaggo chaṭṭho.
২৩৫৩. ‘‘গণপরিযেসনাদিস্মি’’ন্তি ৰত্তব্বে ছন্দানুরক্খনত্থং নিগ্গহিতাগমো। গব্ভিনিন্তি আপন্নসত্তং, কুচ্ছিপৰিট্ঠসত্তন্তি অত্থো। ৰুট্ঠাপেন্তিযাতি উপসম্পাদেন্তিযা। কম্মৰাচাহীতি দ্ৰীহি কম্মৰাচাহি।
2353. ‘‘Gaṇapariyesanādismi’’nti vattabbe chandānurakkhanatthaṃ niggahitāgamo. Gabbhininti āpannasattaṃ, kucchipaviṭṭhasattanti attho. Vuṭṭhāpentiyāti upasampādentiyā. Kammavācāhīti dvīhi kammavācāhi.
২৩৫৪-৫. কম্মৰাচায ওসানেতি ততিযকম্মৰাচায পরিযোসানে, য্যকারপ্পত্তেতি অত্থো। গব্ভিনিসঞ্ঞায ন চ গব্ভিনিযাতি অগব্ভিনিযা গব্ভিনিসঞ্ঞায চ। উভো সঞ্জাতকঙ্খাযাতি উভোসু সমুপ্পন্নসংসযায, গব্ভিনিযা, অগব্ভিনিযা চ ৰেমতিকাযাতি অত্থো। গাথাবন্ধৰসেনেত্থ সু-সদ্দলোপো। তথা ৰুট্ঠাপেন্তিযা উপজ্ঝাযায আপত্তি দুক্কটং হোতীতি যোজনা। আচরিনিযা তস্সাতি উপজ্ঝাযা গব্ভিনিং ৰুট্ঠাপেতি, তস্সা কম্মৰাচং সাৰেন্তিযা আচরিনিযা চ। গণস্সাতি উপজ্ঝাযাচরিনীহি অঞ্ঞস্স ভিক্খুনিগণস্স চ। তথা দুক্কটং দীপিতন্তি যোজনা।
2354-5.Kammavācāya osāneti tatiyakammavācāya pariyosāne, yyakārappatteti attho. Gabbhinisaññāya na ca gabbhiniyāti agabbhiniyā gabbhinisaññāya ca. Ubho sañjātakaṅkhāyāti ubhosu samuppannasaṃsayāya, gabbhiniyā, agabbhiniyā ca vematikāyāti attho. Gāthābandhavasenettha su-saddalopo. Tathā vuṭṭhāpentiyā upajjhāyāya āpatti dukkaṭaṃ hotīti yojanā. Ācariniyā tassāti upajjhāyā gabbhiniṃ vuṭṭhāpeti, tassā kammavācaṃ sāventiyā ācariniyā ca. Gaṇassāti upajjhāyācarinīhi aññassa bhikkhunigaṇassa ca. Tathā dukkaṭaṃ dīpitanti yojanā.
২৩৫৬. ‘‘দ্ৰীসু অগব্ভিনিসঞ্ঞাযা’’তি পদচ্ছেদো। দ্ৰীসূতি গব্ভিনিযা, অগব্ভিনিযা চ।
2356. ‘‘Dvīsu agabbhinisaññāyā’’ti padacchedo. Dvīsūti gabbhiniyā, agabbhiniyā ca.
পঠমং।
Paṭhamaṃ.
২৩৫৭. দুতিযেতি ‘‘যা পন ভিক্খুনী পাযন্তিং ৰুট্ঠাপেয্য, পাচিত্তিয’’ন্তি (পাচি॰ ১০৭৩) সিক্খাপদে। ইমস্মিং সিক্খাপদে পাযন্তী নাম মাতা ৰা হোতি ধাতি ৰাতি অযং ৰিসেসো।
2357.Dutiyeti ‘‘yā pana bhikkhunī pāyantiṃ vuṭṭhāpeyya, pācittiya’’nti (pāci. 1073) sikkhāpade. Imasmiṃ sikkhāpade pāyantī nāma mātā vā hoti dhāti vāti ayaṃ viseso.
দুতিযং।
Dutiyaṃ.
২৩৫৮. যা পন ভিক্খুনী দ্ৰে ৰস্সানি ছসু ধম্মেসু অসিক্খিতসিক্খং সিক্খমানং সচে ৰুট্ঠাপেয্য, পাচিত্তি সিযাতি যোজনা। তত্থ দ্ৰে ৰস্সানীতি পৰারণৰসেন দ্ৰে সংৰচ্ছরানি। ছসু ধম্মেসূতি পাণাতিপাতাৰেরমণিআদীসু ৰিকালভোজনাৰেরমণিপরিযোসানেসু ছসু ধম্মেসু। অসিক্খিতসিক্খন্তি ‘‘পাণাতিপাতাৰেরমণিং দ্ৰে ৰস্সানি অৰীতিক্কম্ম সমাদানং সমাদিযামী’’তিআদিনা (পাচি॰ ১০৭৯) নযেন অনাদিন্নসিক্খাপদং ৰা এৰং সমাদিযিত্ৰাপি কুপিতসিক্খং ৰা। সিক্খমানং তেসু ছসু ধম্মেসু সিক্খনতো ৰা তে ৰা সিক্খাসঙ্খাতে ধম্মে মাননতো এৰং লদ্ধনামং অনুপসম্পন্নং। ৰুট্ঠাপেয্যাতি উপসম্পাদেয্য। আপত্তি সিযাতি পঠমসিক্খাপদে ৰুত্তনযেনেৰ কম্মৰাচাপরিযোসানে পাচিত্তি আপত্তি সিযা, পাচিত্তি হোতীতি অত্থো।
2358. Yā pana bhikkhunī dve vassāni chasu dhammesu asikkhitasikkhaṃ sikkhamānaṃ sace vuṭṭhāpeyya, pācitti siyāti yojanā. Tattha dve vassānīti pavāraṇavasena dve saṃvaccharāni. Chasu dhammesūti pāṇātipātāveramaṇiādīsu vikālabhojanāveramaṇipariyosānesu chasu dhammesu. Asikkhitasikkhanti ‘‘pāṇātipātāveramaṇiṃ dve vassāni avītikkamma samādānaṃ samādiyāmī’’tiādinā (pāci. 1079) nayena anādinnasikkhāpadaṃ vā evaṃ samādiyitvāpi kupitasikkhaṃ vā. Sikkhamānaṃ tesu chasu dhammesu sikkhanato vā te vā sikkhāsaṅkhāte dhamme mānanato evaṃ laddhanāmaṃ anupasampannaṃ. Vuṭṭhāpeyyāti upasampādeyya. Āpatti siyāti paṭhamasikkhāpade vuttanayeneva kammavācāpariyosāne pācitti āpatti siyā, pācitti hotīti attho.
২৩৫৯. ‘‘ধম্মকম্মে ধম্মকম্মসঞ্ঞা ৰুট্ঠাপেতি, আপত্তি পাচিত্তিযস্স। ধম্মকম্মে ৰেমতিকা ৰুট্ঠাপেতি, আপত্তি পাচিত্তিযস্স। ধম্মকম্মে অধম্মকম্মসঞ্ঞা ৰুট্ঠাপেতি, আপত্তি পাচিত্তিযস্সা’’তি এৰং ধম্মকম্মে সত্থুনা তিকপাচিত্তিযং ৰুত্তং। ‘‘অধম্মকম্মে ধম্মকম্মসঞ্ঞা, আপত্তি দুক্কটস্স। অধম্মকম্মে ৰেমতিকা আপত্তি দুক্কটস্স। অধম্মকম্মে অধম্মকম্মসঞ্ঞা ৰুট্ঠাপেতি, আপত্তি দুক্কটস্সা’’তি (পাচি॰ ১০৮২) এৰং অধম্মে পন কম্মস্মিং সত্থুনা তিকদুক্কটং দীপিতং।
2359. ‘‘Dhammakamme dhammakammasaññā vuṭṭhāpeti, āpatti pācittiyassa. Dhammakamme vematikā vuṭṭhāpeti, āpatti pācittiyassa. Dhammakamme adhammakammasaññā vuṭṭhāpeti, āpatti pācittiyassā’’ti evaṃ dhammakamme satthunā tikapācittiyaṃ vuttaṃ. ‘‘Adhammakamme dhammakammasaññā, āpatti dukkaṭassa. Adhammakamme vematikā āpatti dukkaṭassa. Adhammakamme adhammakammasaññā vuṭṭhāpeti, āpatti dukkaṭassā’’ti (pāci. 1082) evaṃ adhamme pana kammasmiṃ satthunā tikadukkaṭaṃ dīpitaṃ.
২৩৬০. অখণ্ডতো খণ্ডং অকত্ৰা।
2360.Akhaṇḍato khaṇḍaṃ akatvā.
২৩৬১. সচে উপসম্পদাপেক্খা পব্বজ্জায সট্ঠিৰস্সাপি হোতি, তস্সা ইমা ছ সিক্খাযো দ্ৰে ৰস্সানি অৰীতিক্কমনীযা পদাতব্বা, ইমা অদত্ৰা ন কারযে নেৰ ৰুট্ঠাপেয্যাতি যোজনা।
2361. Sace upasampadāpekkhā pabbajjāya saṭṭhivassāpi hoti, tassā imā cha sikkhāyo dve vassāni avītikkamanīyā padātabbā, imā adatvā na kāraye neva vuṭṭhāpeyyāti yojanā.
ততিযং।
Tatiyaṃ.
২৩৬২. চতুত্থে নত্থি ৰত্তব্বন্তি ৰক্খমানৰিসেসতো অঞ্ঞং ৰত্তব্বং নত্থীতি যথাৰুত্তনযমেৰাতি অধিপ্পাযো। ‘‘ইধা’’তিআদিনা ইমস্মিং সিক্খাপদে লব্ভমানৰিসেসং দস্সেতি। ইধ ইমস্মিং সিক্খাপদে সঙ্ঘেন সম্মতং তং সিক্খমানং ৰুট্ঠাপেন্তিযা ভিক্খুনিযা অনাপত্তি হোতীতি যোজনা।
2362.Catutthe natthi vattabbanti vakkhamānavisesato aññaṃ vattabbaṃ natthīti yathāvuttanayamevāti adhippāyo. ‘‘Idhā’’tiādinā imasmiṃ sikkhāpade labbhamānavisesaṃ dasseti. Idha imasmiṃ sikkhāpade saṅghena sammataṃ taṃ sikkhamānaṃ vuṭṭhāpentiyā bhikkhuniyā anāpatti hotīti yojanā.
২৩৬৩. দ্ৰে ৰস্সানি ছসু ধম্মেসু সিক্খিতসিক্খায সিক্খমানায ভিক্খুনিসঙ্ঘেন উপসম্পদতো পঠমং ঞত্তিদুতিযায কম্মৰাচায যা ৰুট্ঠানসম্মুতি দাতব্বা হোতি, সা ৰুট্ঠানসম্মুতি সচে পঠমং অদিন্না হোতি। তত্থ তস্মিং উপসম্পদমাল়কেপি পদাতব্বাযেৰাতি যোজনা।
2363. Dve vassāni chasu dhammesu sikkhitasikkhāya sikkhamānāya bhikkhunisaṅghena upasampadato paṭhamaṃ ñattidutiyāya kammavācāya yā vuṭṭhānasammuti dātabbā hoti, sā vuṭṭhānasammuti sace paṭhamaṃ adinnā hoti. Tattha tasmiṃ upasampadamāḷakepi padātabbāyevāti yojanā.
২৩৬৪. ততিযঞ্চাতি ততিযসিক্খাপদঞ্চ। চতুত্থঞ্চাতি ইদং চতুত্থসিক্খাপদঞ্চ। পঠমেন সমং ঞেয্যন্তি পঠমেন সিক্খাপদেন সমুট্ঠানাদিনা ৰিনিচ্ছযেন সমানন্তি ঞাতব্বং। চতুত্থং পন সিক্খাপদং ৰুট্ঠাপনসম্মুতিং অদাপেত্ৰা ৰুট্ঠাপনৰসেন ক্রিযাক্রিযং হোতি।
2364.Tatiyañcāti tatiyasikkhāpadañca. Catutthañcāti idaṃ catutthasikkhāpadañca. Paṭhamena samaṃ ñeyyanti paṭhamena sikkhāpadena samuṭṭhānādinā vinicchayena samānanti ñātabbaṃ. Catutthaṃ pana sikkhāpadaṃ vuṭṭhāpanasammutiṃ adāpetvā vuṭṭhāpanavasena kriyākriyaṃ hoti.
চতুত্থং।
Catutthaṃ.
২৩৬৫. গিহিগতন্তি পুরিসন্তরগতং, পুরিসসমাগমপ্পত্তন্তি অত্থো। পরিপুণ্ণদ্ৰাদসৰস্সা পরিপুণ্ণা উত্তরপদলোপেন। কিঞ্চাপি ন দোসোতি যোজনা। ৰুট্ঠাপেন্তিযাতি উপজ্ঝাযা হুত্ৰা উপসম্পাদেন্তিযা।
2365.Gihigatanti purisantaragataṃ, purisasamāgamappattanti attho. Paripuṇṇadvādasavassā paripuṇṇā uttarapadalopena. Kiñcāpi na dosoti yojanā. Vuṭṭhāpentiyāti upajjhāyā hutvā upasampādentiyā.
২৩৬৬. সেসন্তি ৰুত্তং। অসেসেন সব্বসো।
2366.Sesanti vuttaṃ. Asesena sabbaso.
পঞ্চমং।
Pañcamaṃ.
২৩৬৮. দুক্খিতং সহজীৰিনিন্তি এত্থ ‘‘সিক্খাপদ’’ন্তি সেসো। তুৰট্টকৰগ্গস্মিং ‘‘দুক্খিতং সহজীৰিনি’’ন্তি ইমেহি পদেহি যুত্তং যং সিক্খাপদং ৰুত্তং, তেন সিক্খাপদেন অট্ঠমং সমং ঞেয্যং, ন ৰিসেসতা ৰিসেসো নত্থীতি যোজনা। অট্ঠমন্তি ‘‘যা পন ভিক্খুনী সহজীৰিনিং ৰুট্ঠাপেত্ৰা দ্ৰে ৰস্সানি নেৰ অনুগ্গণ্হেয্য ন অনুগ্গণ্হাপেয্য, পাচিত্তিয’’ন্তি (পাচি॰ ১১০৮) ৰুত্তসিক্খাপদং। তত্থ সহজীৰিনিন্তি সদ্ধিৰিহারিনিং। নেৰ অনুগ্গণ্হেয্যাতি সযং উদ্দেসাদীহি নানুগ্গণ্হেয্য। ন অনুগ্গণ্হাপেয্যাতি ‘‘ইমিস্সা অয্যে উদ্দেসাদীনি দেহী’’তি এৰং ন অঞ্ঞায অনুগ্গণ্হাপেয্য। পাচিত্তিযন্তি ধুরে নিক্খিত্তমত্তে পাচিত্তিযং।
2368.Dukkhitaṃ sahajīvininti ettha ‘‘sikkhāpada’’nti seso. Tuvaṭṭakavaggasmiṃ ‘‘dukkhitaṃ sahajīvini’’nti imehi padehi yuttaṃ yaṃ sikkhāpadaṃ vuttaṃ, tena sikkhāpadena aṭṭhamaṃ samaṃ ñeyyaṃ, na visesatā viseso natthīti yojanā. Aṭṭhamanti ‘‘yā pana bhikkhunī sahajīviniṃ vuṭṭhāpetvā dve vassāni neva anuggaṇheyya na anuggaṇhāpeyya, pācittiya’’nti (pāci. 1108) vuttasikkhāpadaṃ. Tattha sahajīvininti saddhivihāriniṃ. Neva anuggaṇheyyāti sayaṃ uddesādīhi nānuggaṇheyya. Na anuggaṇhāpeyyāti ‘‘imissā ayye uddesādīni dehī’’ti evaṃ na aññāya anuggaṇhāpeyya. Pācittiyanti dhure nikkhittamatte pācittiyaṃ.
অট্ঠমং।
Aṭṭhamaṃ.
২৩৬৯. যা কাচি ভিক্খুনী ৰুট্ঠাপিতপৰত্তিনিং দ্ৰে ৰস্সানি নানুবন্ধেয্য চে, তস্সা পাচিত্তি পরিযাপুতা কথিতাতি যোজনা। ৰুট্ঠাপেতীতি ৰুট্ঠাপিতা, পৰত্তেতি সুসিক্খাপেতীতি পৰত্তিনী, ৰুট্ঠাপিতা চ সা পৰত্তিনী চাতি ৰুট্ঠাপিতপৰত্তিনী, উপজ্ঝাযাযেতং অধিৰচনং, তং, উপজ্ঝাযং। নানুবন্ধেয্যাতি চুণ্ণেন, মত্তিকায, দন্তকট্ঠেন, মুখোদকেনাতি এৰং তেন তেন করণীযেন উপট্ঠহেয্য।
2369.Yā kāci bhikkhunī vuṭṭhāpitapavattiniṃ dve vassāni nānubandheyya ce, tassā pācitti pariyāputā kathitāti yojanā. Vuṭṭhāpetīti vuṭṭhāpitā, pavatteti susikkhāpetīti pavattinī, vuṭṭhāpitā ca sā pavattinī cāti vuṭṭhāpitapavattinī, upajjhāyāyetaṃ adhivacanaṃ, taṃ, upajjhāyaṃ. Nānubandheyyāti cuṇṇena, mattikāya, dantakaṭṭhena, mukhodakenāti evaṃ tena tena karaṇīyena upaṭṭhaheyya.
২৩৭০. ‘‘দ্ৰে ৰস্সানি অহং নানুবন্ধিস্সামী’’তি ধুরং নিক্খিপতি চে, এৰং ধুরে নিক্খিত্তমত্তস্মিং পন তস্সা পাচিত্তিযং সিযাতি যোজনা।
2370. ‘‘Dve vassāni ahaṃ nānubandhissāmī’’ti dhuraṃ nikkhipati ce, evaṃ dhure nikkhittamattasmiṃ pana tassā pācittiyaṃ siyāti yojanā.
২৩৭১. যা পন ভিক্খুনী উপজ্ঝাযং বালং ৰা অলজ্জিং ৰা নানুবন্ধতি, তস্সা, গিলানায ৰা আপদাসু ৰা উম্মত্তিকায ৰা নানুবন্ধন্তিযা ন দোসোতি যোজনা।
2371. Yā pana bhikkhunī upajjhāyaṃ bālaṃ vā alajjiṃ vā nānubandhati, tassā, gilānāya vā āpadāsu vā ummattikāya vā nānubandhantiyā na dosoti yojanā.
২৩৭২. অনুপট্ঠানেন হোতীতি আহ ‘‘অক্রিযং ৰুত্ত’’ন্তি।
2372. Anupaṭṭhānena hotīti āha ‘‘akriyaṃ vutta’’nti.
নৰমং।
Navamaṃ.
২৩৭৩-৫. যা কাচি ভিক্খুনী সহজীৰিনিং সদ্ধিৰিহারিনিং ৰুট্ঠাপেত্ৰা উপসম্পাদেত্ৰা তং গহেত্ৰা অন্তমসো ছপ্পঞ্চযোজনানিপি ন গচ্ছেয্য ন চঞ্ঞং আণাপেয্য ‘‘ইমং, অয্যে, গহেত্ৰা গচ্ছা’’তি অঞ্ঞঞ্চ ন নিযোজেয্য চে, ধুরে নিক্খিত্তমত্তস্মিং ‘‘ন দানি গচ্ছিস্সামি, অঞ্ঞঞ্চ গহেত্ৰা গন্তুং ন নিযোজেস্সামী’’তি উস্সাহে ৰিস্সট্ঠমত্তে তস্সা পাচিত্তিযং সিযাতি যোজনা।
2373-5. Yā kāci bhikkhunī sahajīviniṃ saddhivihāriniṃ vuṭṭhāpetvā upasampādetvā taṃ gahetvā antamaso chappañcayojanānipi na gaccheyya na caññaṃ āṇāpeyya ‘‘imaṃ, ayye, gahetvā gacchā’’ti aññañca na niyojeyya ce, dhure nikkhittamattasmiṃ ‘‘na dāni gacchissāmi, aññañca gahetvā gantuṃ na niyojessāmī’’ti ussāhe vissaṭṭhamatte tassā pācittiyaṃ siyāti yojanā.
অন্তরাযস্মিং সতি ৰা দুতিযং অলভন্তিযা ৰা আপদাসু ৰা গিলানায ৰা উম্মত্তিকায ৰা ন দোসোতি যোজনা।
Antarāyasmiṃ sati vā dutiyaṃ alabhantiyā vā āpadāsu vā gilānāya vā ummattikāya vā na dosoti yojanā.
দসমং।
Dasamaṃ.
গব্ভিনিৰগ্গো সত্তমো।
Gabbhinivaggo sattamo.
২৩৭৬. গিহিগতেহি তীহেৰাতি অনন্তরে গব্ভিনিৰগ্গে গিহিগতপদযুত্তেহি পঞ্চমছট্ঠসত্তমেহি তীহেৰ সিক্খাপদেহি। সদিসানীতি ইধ ৰীসতিৰস্সৰচনঞ্চ কুমারিভূতৰচনঞ্চ তত্থ দ্ৰাদসৰস্সৰচনঞ্চ গিহিগতৰচনঞ্চ ঠপেত্ৰা অৰসেসেহি ৰিনিচ্ছযেহি যথাক্কমং সদিসানেৰাতি।
2376.Gihigatehi tīhevāti anantare gabbhinivagge gihigatapadayuttehi pañcamachaṭṭhasattamehi tīheva sikkhāpadehi. Sadisānīti idha vīsativassavacanañca kumāribhūtavacanañca tattha dvādasavassavacanañca gihigatavacanañca ṭhapetvā avasesehi vinicchayehi yathākkamaṃ sadisānevāti.
২৩৭৭. মহূপপদাতি মহা উপপদো যাসং সিক্খমানানং তা মহূপপদা। উপপদং নাম পদানমেৰ যুজ্জতি, ন অত্থানন্তি ‘‘যাস’’ন্তি অঞ্ঞপদেন সিক্খমানাদিপদানং গহণং, সদ্দত্থানমভেদোপচারস্স পন ইচ্ছিতত্তা সিক্খমানপদগহিতানমেত্থ গহণং ৰেদিতব্বং, মহাসিক্খমানাতি ৰুত্তং হোতি। আদিতোতি এত্থ ‘‘ৰুত্তা’’তি সেসো, গব্ভিনিৰগ্গে তিস্সন্নং গিহিগতানং পুরিমেসু ততিযচতুত্থসিক্খাপদেসু আগতা দ্ৰে সিক্খমানাতি অত্থো। গিহিগতায ‘‘পরিপুণ্ণদ্ৰাদসৰস্সা’’তি চ কুমারিভূতায ‘‘পরিপুণ্ণৰীসতিৰস্সা’’তি চ ৰস্সৰসেন নানাকরণস্স ৰুত্তত্তা তাহি দ্ৰীহি মহাসিক্খমানায ৰস্সৰসেনেৰ নানাকরণং দস্সেতুমাহ ‘‘গতা ৰীসতিৰস্সাতি, ৰিঞ্ঞাতব্বা ৰিভাৰিনা’’তি, অতিক্কন্তৰীসতিৰস্সা মহাসিক্খমানা নাম হোতীতি অত্থো।
2377.Mahūpapadāti mahā upapado yāsaṃ sikkhamānānaṃ tā mahūpapadā. Upapadaṃ nāma padānameva yujjati, na atthānanti ‘‘yāsa’’nti aññapadena sikkhamānādipadānaṃ gahaṇaṃ, saddatthānamabhedopacārassa pana icchitattā sikkhamānapadagahitānamettha gahaṇaṃ veditabbaṃ, mahāsikkhamānāti vuttaṃ hoti. Āditoti ettha ‘‘vuttā’’ti seso, gabbhinivagge tissannaṃ gihigatānaṃ purimesu tatiyacatutthasikkhāpadesu āgatā dve sikkhamānāti attho. Gihigatāya ‘‘paripuṇṇadvādasavassā’’ti ca kumāribhūtāya ‘‘paripuṇṇavīsativassā’’ti ca vassavasena nānākaraṇassa vuttattā tāhi dvīhi mahāsikkhamānāya vassavaseneva nānākaraṇaṃ dassetumāha ‘‘gatā vīsativassāti, viññātabbā vibhāvinā’’ti, atikkantavīsativassā mahāsikkhamānā nāma hotīti attho.
২৩৭৮. তা দ্ৰে মহাসিক্খমানা সচে গিহিগতা ৰা হোন্তু, ন চ পুরিসগতা ৰা হোন্তু , সম্মুতিআদিসু কম্মৰাচায ‘‘সিক্খমানা’’তি ৰত্তব্বাতি যোজনা। এত্থ চ সম্মুতি নাম ঞত্তিদুতিযায কম্মৰাচায কাতব্বায সিক্খায সম্মুতি চেৰ ৰুট্ঠানসম্মুতি চ। আদি-সদ্দেন উপসম্পদাকম্মং গহিতং।
2378.Tā dve mahāsikkhamānā sace gihigatā vā hontu, na ca purisagatā vā hontu , sammutiādisu kammavācāya ‘‘sikkhamānā’’ti vattabbāti yojanā. Ettha ca sammuti nāma ñattidutiyāya kammavācāya kātabbāya sikkhāya sammuti ceva vuṭṭhānasammuti ca. Ādi-saddena upasampadākammaṃ gahitaṃ.
২৩৭৯. ইমাসং দ্ৰিন্নং সম্মুতিদানাদীসু ঞত্তিযা চ কম্মৰাচায চ ৰত্তব্বং দস্সেত্ৰা ইদানি অৰত্তব্বং দস্সেতুমাহ ‘‘ন তা’’তিআদি। তা এতা উভোপি মহাসিক্খমানা ‘‘কুমারিভূতা’’তি ৰা তথা ‘‘গিহিগতা’’তি ৰা কম্মৰাচায ন ৰত্তব্বা যস্মা, তস্মা এৰং ৰত্তুং ন ৰট্টতীতি যোজনা। ‘‘ন ৰত্তব্বা’’তি ইমিনা তথা চে কম্মৰাচা ৰুচ্চেয্য, তং কম্মং কুপ্পতীতি দীপেতি। ইধ পন-সদ্দো যস্মা-পদত্থোতি তদত্থৰসেন যোজনা দস্সিতা।
2379. Imāsaṃ dvinnaṃ sammutidānādīsu ñattiyā ca kammavācāya ca vattabbaṃ dassetvā idāni avattabbaṃ dassetumāha ‘‘na tā’’tiādi. Tā etā ubhopi mahāsikkhamānā ‘‘kumāribhūtā’’ti vā tathā ‘‘gihigatā’’ti vā kammavācāya na vattabbā yasmā, tasmā evaṃ vattuṃ na vaṭṭatīti yojanā. ‘‘Na vattabbā’’ti iminā tathā ce kammavācā vucceyya, taṃ kammaṃ kuppatīti dīpeti. Idha pana-saddo yasmā-padatthoti tadatthavasena yojanā dassitā.
২৩৮০. সম্মুতিন্তি সিক্খমানসম্মুতিং। দসৰস্সাযাতি এত্থ ‘‘গিহিগতাযা’’তি সেসো। যথাহ – ‘‘গিহিগতায দসৰস্সকালে সিক্খাসম্মুতিং দত্ৰা দ্ৰাদসৰস্সকালে উপসম্পদা কাতব্বা’’তি (পাচি॰ অট্ঠ॰ ১১১৯)। সেসাসুপীতি একাদসৰস্সকালে দত্ৰা তেরসৰস্সকালে কাতব্বা, দ্ৰাদস, তেরস, চুদ্দস, পন্নরস, সোল়স, সত্তরস, অট্ঠারসৰস্সকালে সিক্খাসম্মুতিং দত্ৰা ৰীসতিৰস্সকালে কাতব্বাতি এৰং অট্ঠারসৰস্সপরিযন্তাসু সেসাসুপি সিক্খমানাসু। অযং নযোতি ‘‘সম্মুতিযা দিন্নসংৰচ্ছরতো আগামিনি দুতিযে সংৰচ্ছরে উপসম্পাদেতব্বা’’তি অযং নযো। তেনেৰ ৰুত্তং ‘‘একাদসৰস্সকালে দত্ৰা তেরসৰস্সকালে কাতব্বা’’তিআদি।
2380.Sammutinti sikkhamānasammutiṃ. Dasavassāyāti ettha ‘‘gihigatāyā’’ti seso. Yathāha – ‘‘gihigatāya dasavassakāle sikkhāsammutiṃ datvā dvādasavassakāle upasampadā kātabbā’’ti (pāci. aṭṭha. 1119). Sesāsupīti ekādasavassakāle datvā terasavassakāle kātabbā, dvādasa, terasa, cuddasa, pannarasa, soḷasa, sattarasa, aṭṭhārasavassakāle sikkhāsammutiṃ datvā vīsativassakāle kātabbāti evaṃ aṭṭhārasavassapariyantāsu sesāsupi sikkhamānāsu. Ayaṃ nayoti ‘‘sammutiyā dinnasaṃvaccharato āgāmini dutiye saṃvacchare upasampādetabbā’’ti ayaṃ nayo. Teneva vuttaṃ ‘‘ekādasavassakāle datvā terasavassakāle kātabbā’’tiādi.
২৩৮১. ‘‘কুমারিভূতা’’তিপি ‘‘গিহিগতা’’তিপি ৰত্তুং ৰট্টতীতি অট্ঠকথাযং ৰুত্তাতি যোজনা।
2381. ‘‘Kumāribhūtā’’tipi ‘‘gihigatā’’tipi vattuṃ vaṭṭatīti aṭṭhakathāyaṃ vuttāti yojanā.
২৩৮২. যা পন পরিপুণ্ণৰীসতিৰস্সা সামণেরী ‘‘কুমারিভূতা’’তি ৰুত্তা, সা কম্মৰাচায ‘‘কুমারিভূতা’’ইচ্চেৰ ৰত্তব্বা, অঞ্ঞথা পন ন ৰত্তব্বা ‘‘গিহিগতা’’তি ৰা ‘‘পুরিসন্তরগতা’’তি ৰা ন ৰত্তব্বাতি যোজনা। যথাহ ‘‘কুমারিভূতা পন ‘গিহিগতা’তি ন ৰত্তব্বা, ‘কুমারিভূতা’ইচ্চেৰ ৰত্তব্বা’’তি।
2382.Yā pana paripuṇṇavīsativassā sāmaṇerī ‘‘kumāribhūtā’’ti vuttā, sā kammavācāya ‘‘kumāribhūtā’’icceva vattabbā, aññathā pana na vattabbā ‘‘gihigatā’’ti vā ‘‘purisantaragatā’’ti vā na vattabbāti yojanā. Yathāha ‘‘kumāribhūtā pana ‘gihigatā’ti na vattabbā, ‘kumāribhūtā’icceva vattabbā’’ti.
২৩৮৩. এতা তু পন তিস্সোপীতি মহাসিক্খমানা গিহিগতা, কুমারিভূতাতি ৰুত্তা পন এতা তিস্সোপি। অপি-সদ্দেন গিহিগতা কুমারিভূতা দ্ৰে সকসকনামেনাপি ৰত্তুং ৰট্টন্তীতি দীপেতি। ‘‘কুমারিভূতসিক্খমানাযা’’তি পাল়িযং অৰুত্তত্তা ন ৰট্টতীতি কোচি মঞ্ঞেয্যাতি আহ ‘‘ন সংসযো’’তি। তথা ৰত্তব্বতাহেতুদস্সনত্থমাহ ‘‘সিক্খাসম্মুতিদানতো’’তি।
2383.Etā tu pana tissopīti mahāsikkhamānā gihigatā, kumāribhūtāti vuttā pana etā tissopi. Api-saddena gihigatā kumāribhūtā dve sakasakanāmenāpi vattuṃ vaṭṭantīti dīpeti. ‘‘Kumāribhūtasikkhamānāyā’’ti pāḷiyaṃ avuttattā na vaṭṭatīti koci maññeyyāti āha ‘‘na saṃsayo’’ti. Tathā vattabbatāhetudassanatthamāha ‘‘sikkhāsammutidānato’’ti.
পঠমদুতিযততিযানি।
Paṭhamadutiyatatiyāni.
২৩৮৪-৫. যা পন ভিক্খুনী ঊনদ্ৰাদসৰস্সাৰ উপসম্পদাৰসেন অপরিপুণ্ণদ্ৰাদসৰস্সা এৰ সযং উপজ্ঝাযা হুত্ৰা পরং সিক্খমানং সচে ৰুট্ঠাপেতি, পুব্বে ৰুত্তনযেনেৰ গণপরিযেসনাদিদুতিযানুস্সাৰনপরিযোসানেসু আপন্নানং দুক্কটানং অনন্তরং কম্মৰাচানং ওসানে ততিযানুস্সাৰনায য্যতারপ্পত্তায তস্সা পাচিত্তি পরিদীপিতাতি যোজনা।
2384-5. Yā pana bhikkhunī ūnadvādasavassāva upasampadāvasena aparipuṇṇadvādasavassā eva sayaṃ upajjhāyā hutvā paraṃ sikkhamānaṃ sace vuṭṭhāpeti, pubbe vuttanayeneva gaṇapariyesanādidutiyānussāvanapariyosānesu āpannānaṃ dukkaṭānaṃ anantaraṃ kammavācānaṃ osāne tatiyānussāvanāya yyatārappattāya tassā pācitti paridīpitāti yojanā.
চতুত্থং।
Catutthaṃ.
২৩৮৬. পঞ্চমেতি ‘‘যা পন ভিক্খুনী পরিপুণ্ণদ্ৰাদসৰস্সা সঙ্ঘেন অসম্মতা ৰুট্ঠাপেয্য, পাচিত্তিয’’ন্তি (পাচি॰ ১১৪২) সিক্খাপদে। কাযচিত্তৰাচাচিত্তকাযৰাচাচিত্তৰসেন তিসমুট্ঠানং। ক্রিযাক্রিযন্তি ৰুট্ঠাপনং কিরিযং, সঙ্ঘসম্মুতিযা অগ্গহণং অকিরিযং।
2386.Pañcameti ‘‘yā pana bhikkhunī paripuṇṇadvādasavassā saṅghena asammatā vuṭṭhāpeyya, pācittiya’’nti (pāci. 1142) sikkhāpade. Kāyacittavācācittakāyavācācittavasena tisamuṭṭhānaṃ. Kriyākriyanti vuṭṭhāpanaṃ kiriyaṃ, saṅghasammutiyā aggahaṇaṃ akiriyaṃ.
পঞ্চমং।
Pañcamaṃ.
২৩৮৭. সঙ্ঘেনাতি ভিক্খুনিসঙ্ঘেন। উপপরিক্খিত্ৰাতি অলজ্জিভাৰাদিং উপপরিক্খিত্ৰা। অলং তাৰাতি এত্থ ‘‘তে অয্যে’’তি সেসো। ৰারিতাতি এত্থ ‘‘সাধূতি পটিস্সুণিত্ৰা’’তি সেসো। ‘‘অলং তাৰ তে, অয্যে, উপসম্পাদিতেনা’’তি ৰারিতা ‘‘সাধূ’’তি পটিস্সুণিত্ৰা এত্থ এতস্মিং পৰারণে পচ্ছা খীযতি ‘‘অহমেৰ নূন বালা, অহমেৰ নূন অলজ্জিনী’’তিআদিনা অৰণ্ণং পকাসেতি, দোসতা পাচিত্তিযাপত্তি হোতীতি যোজনা।
2387.Saṅghenāti bhikkhunisaṅghena. Upaparikkhitvāti alajjibhāvādiṃ upaparikkhitvā. Alaṃ tāvāti ettha ‘‘te ayye’’ti seso. Vāritāti ettha ‘‘sādhūti paṭissuṇitvā’’ti seso. ‘‘Alaṃ tāva te, ayye, upasampāditenā’’ti vāritā ‘‘sādhū’’ti paṭissuṇitvā ettha etasmiṃ pavāraṇe pacchā khīyati ‘‘ahameva nūna bālā, ahameva nūna alajjinī’’tiādinā avaṇṇaṃ pakāseti, dosatā pācittiyāpatti hotīti yojanā.
২৩৮৮. ছন্দদোসাদীহি করোন্তিযাতি এত্থ ‘‘পকতিযা’’তি সেসো। পকতিযা ছন্দদোসাদীহি অগতিগমনেহি নিৰারণং করোন্তিযা সচে উজ্ঝাযতি, ন দোসোতি যোজনা।
2388.Chandadosādīhikarontiyāti ettha ‘‘pakatiyā’’ti seso. Pakatiyā chandadosādīhi agatigamanehi nivāraṇaṃ karontiyā sace ujjhāyati, na dosoti yojanā.
ছট্ঠং।
Chaṭṭhaṃ.
২৩৮৯-৯০. লদ্ধে চীৰরেতি সিক্খামানায ‘‘সচে মে ত্ৰং, অয্যে, চীৰরং দস্সসি, এৰাহং তং ৰুট্ঠাপেস্সামী’’তি ৰত্ৰা যাচিতে তস্মিং চীৰরে লদ্ধে। পচ্ছাতি চীৰরলাভতো পচ্ছা। অসন্তে অন্তরাযিকেতি দসন্নং অন্তরাযানং অঞ্ঞতরস্মিং অন্তরাযে অৰিজ্জমানে। ৰুট্ঠাপেস্সামিনাহন্তি অহং তং ন সমুট্ঠাপেস্সামীতি ধুরনিক্খেপনে তস্সা পাচিত্তিযং হোতীতি যোজনা।
2389-90.Laddhecīvareti sikkhāmānāya ‘‘sace me tvaṃ, ayye, cīvaraṃ dassasi, evāhaṃ taṃ vuṭṭhāpessāmī’’ti vatvā yācite tasmiṃ cīvare laddhe. Pacchāti cīvaralābhato pacchā. Asante antarāyiketi dasannaṃ antarāyānaṃ aññatarasmiṃ antarāye avijjamāne. Vuṭṭhāpessāmināhanti ahaṃ taṃ na samuṭṭhāpessāmīti dhuranikkhepane tassā pācittiyaṃ hotīti yojanā.
২৩৯১. ইদন্তি ইদং সিক্খাপদং। অৰুট্ঠাপনেন অক্রিযং।
2391.Idanti idaṃ sikkhāpadaṃ. Avuṭṭhāpanena akriyaṃ.
সত্তমং।
Sattamaṃ.
২৩৯২. অট্ঠমন্তি ‘‘যা পন ভিক্খুনী সিক্খমানং ‘সচে মং ত্ৰং, অয্যে, দ্ৰে ৰস্সানি অনুবন্ধিস্সসি, এৰাহং তং ৰুট্ঠাপেস্সামী’’তিআদি (পাচি॰ ১১৫৫) সিক্খাপদং। নৰমেতি ‘‘যা পন ভিক্খুনী পুরিসসংসট্ঠং কুমারকসংসট্ঠং চণ্ডিং সোকাৰাসং সিক্খমানং ৰুট্ঠাপেয্য, পাচিত্তিয’’ন্তি (পাচি॰ ১১৫৯) ৰুত্তসিক্খাপদে। ‘‘ৰত্তব্বং নত্থী’’তি ইদং সদ্দত্থৰিসেসমন্তরেন ৰিনিচ্ছযস্স সুৰিঞ্ঞেয্যত্তা ৰুত্তং। তেনেৰাহ ‘‘উত্তানমেৰিদ’’ন্তি।
2392.Aṭṭhamanti ‘‘yā pana bhikkhunī sikkhamānaṃ ‘sace maṃ tvaṃ, ayye, dve vassāni anubandhissasi, evāhaṃ taṃ vuṭṭhāpessāmī’’tiādi (pāci. 1155) sikkhāpadaṃ. Navameti ‘‘yā pana bhikkhunī purisasaṃsaṭṭhaṃ kumārakasaṃsaṭṭhaṃ caṇḍiṃ sokāvāsaṃ sikkhamānaṃ vuṭṭhāpeyya, pācittiya’’nti (pāci. 1159) vuttasikkhāpade. ‘‘Vattabbaṃ natthī’’ti idaṃ saddatthavisesamantarena vinicchayassa suviññeyyattā vuttaṃ. Tenevāha ‘‘uttānamevida’’nti.
সদ্দত্থো পন এৰং ৰেদিতব্বো – পুরিসসংসট্ঠন্তি পরিপুণ্ণৰীসতিৰস্সেন পুরিসেন অননুলোমিকেন কাযৰচীকম্মেন সংসট্ঠং। কুমারকসংসট্ঠন্তি ঊনৰীসতিৰস্সেন কুমারেন তথেৰ সংসট্ঠং। চণ্ডিন্তি কোধনং। সোকাৰাসন্তি সঙ্কেতং কত্ৰা আগচ্ছমানা পুরিসানং অন্তো সোকং পৰেসেতীতি সোকাৰাসা, তং সোকাৰাসং। অথ ৰা ঘরং ৰিয ঘরসামিকা, অযম্পি পুরিসসমাগমং অলভমানা সোকং আৰিসতি, ইতি যং আৰিসতি, স্ৰাস্সা আৰাসো হোতীতি সোকাৰাসা। তেনেৰস্স পদভাজনে ‘‘সোকাৰাসা নাম পরেসং দুক্খং উপ্পাদেতি, সোকং আৰিসতী’’তি (পাচি॰ ১১৬০) দ্ৰেধা অত্থো ৰুত্তো। পাচিত্তিযন্তি এৰরূপং ৰুট্ঠাপেন্তিযা ৰুত্তনযেনেৰ কম্মৰাচাপরিযোসানে উপজ্ঝাযায পাচিত্তিযং।
Saddattho pana evaṃ veditabbo – purisasaṃsaṭṭhanti paripuṇṇavīsativassena purisena ananulomikena kāyavacīkammena saṃsaṭṭhaṃ. Kumārakasaṃsaṭṭhanti ūnavīsativassena kumārena tatheva saṃsaṭṭhaṃ. Caṇḍinti kodhanaṃ. Sokāvāsanti saṅketaṃ katvā āgacchamānā purisānaṃ anto sokaṃ pavesetīti sokāvāsā, taṃ sokāvāsaṃ. Atha vā gharaṃ viya gharasāmikā, ayampi purisasamāgamaṃ alabhamānā sokaṃ āvisati, iti yaṃ āvisati, svāssā āvāso hotīti sokāvāsā. Tenevassa padabhājane ‘‘sokāvāsā nāma paresaṃ dukkhaṃ uppādeti, sokaṃ āvisatī’’ti (pāci. 1160) dvedhā attho vutto. Pācittiyanti evarūpaṃ vuṭṭhāpentiyā vuttanayeneva kammavācāpariyosāne upajjhāyāya pācittiyaṃ.
২৩৯৩. ‘‘নত্থি অজানন্তিযা’’তি পচ্ছেদো, সিক্খমানায পুরিসসংসট্ঠাদিভাৰং অজানন্তিযাতি অত্থো।
2393. ‘‘Natthi ajānantiyā’’ti pacchedo, sikkhamānāya purisasaṃsaṭṭhādibhāvaṃ ajānantiyāti attho.
অট্ঠমনৰমানি।
Aṭṭhamanavamāni.
২৩৯৪. ৰিজাতমাতরা ৰা জনকপিতরা ৰা সামিনা পরিগ্গাহকসামিনা ৰা নানুঞ্ঞাতং উপসম্পদত্থায অননুঞ্ঞাতং তং সিক্খমানং ৰুট্ঠাপেন্তিযা তস্সা পাচিত্তিযাপত্তি সিযাতি যোজনা।
2394. Vijātamātarāvā janakapitarā vā sāminā pariggāhakasāminā vā nānuññātaṃ upasampadatthāya ananuññātaṃ taṃ sikkhamānaṃ vuṭṭhāpentiyā tassā pācittiyāpatti siyāti yojanā.
২৩৯৫. ন ভিক্খুনাতি ভিক্খুনা দ্ৰিক্খত্তুং ন পুচ্ছিতব্বং, সকিমেৰ পুচ্ছিতব্বন্তি ৰুত্তং হোতি। যথাহ ‘‘ভিক্খুনীহি দ্ৰিক্খত্তুং আপুচ্ছিতব্বং পব্বজ্জাকালে চ উপসম্পদাকালে চ, ভিক্খূনং পন সকিং আপুচ্ছিতেপি ৰট্টতী’’তি (পাচি॰ অট্ঠ॰ ১১৬২)।
2395.Na bhikkhunāti bhikkhunā dvikkhattuṃ na pucchitabbaṃ, sakimeva pucchitabbanti vuttaṃ hoti. Yathāha ‘‘bhikkhunīhi dvikkhattuṃ āpucchitabbaṃ pabbajjākāle ca upasampadākāle ca, bhikkhūnaṃ pana sakiṃ āpucchitepi vaṭṭatī’’ti (pāci. aṭṭha. 1162).
২৩৯৬-৭. অত্থিতন্তি অত্থিভাৰং। চতূহি সমুট্ঠাতি, চত্তারি ৰা সমুট্ঠানানি এতস্সাতি চতুসমুট্ঠানং। কতমেহি চতূহি সমুট্ঠাতীতি আহ ‘‘ৰাচতো…পে॰… কাযৰাচাদিতোপি চা’’তি। কথং ৰাচাদীহি চতূহি সমুট্ঠাতি? অব্ভানকম্মাদীসু কেনচিদেৰ করণীযেন খণ্ডসীমাযং নিসিন্না ‘‘পক্কোসথ সিক্খমানং, ইধেৰ নং উপসম্পাদেস্সামা’’তি উপসম্পাদেতি, এৰং ৰাচতো সমুট্ঠাতি। ‘‘উপস্সযতো পট্ঠায উপসম্পাদেস্সামী’’তি ৰত্ৰা খণ্ডসীমং গচ্ছন্তিযা কাযৰাচতো সমুট্ঠাতি। দ্ৰীসুপি ঠানেসু পণ্ণত্তিং জানিত্ৰা ৰীতিক্কমং করোন্তিযা ৰাচাচিত্ততো, কাযৰাচাচিত্ততো চ সমুট্ঠাতি। উপসম্পাদনং ক্রিযং, অনাপুচ্ছনং অক্রিযং।
2396-7.Atthitanti atthibhāvaṃ. Catūhi samuṭṭhāti, cattāri vā samuṭṭhānāni etassāti catusamuṭṭhānaṃ. Katamehi catūhi samuṭṭhātīti āha ‘‘vācato…pe… kāyavācāditopi cā’’ti. Kathaṃ vācādīhi catūhi samuṭṭhāti? Abbhānakammādīsu kenacideva karaṇīyena khaṇḍasīmāyaṃ nisinnā ‘‘pakkosatha sikkhamānaṃ, idheva naṃ upasampādessāmā’’ti upasampādeti, evaṃ vācato samuṭṭhāti. ‘‘Upassayato paṭṭhāya upasampādessāmī’’ti vatvā khaṇḍasīmaṃ gacchantiyā kāyavācato samuṭṭhāti. Dvīsupi ṭhānesu paṇṇattiṃ jānitvā vītikkamaṃ karontiyā vācācittato, kāyavācācittato ca samuṭṭhāti. Upasampādanaṃ kriyaṃ, anāpucchanaṃ akriyaṃ.
দসমং।
Dasamaṃ.
২৩৯৮. এত্থ ইমস্মিং সাসনে যা ভিক্খুনী পারিৰাসিকেন ছন্দদানেন সিক্খমানং সচে ৰুট্ঠাপেতি, তস্সা পাচিত্তিযং সিযাতি যোজনা। তত্থ পারিৰাসিকেন ছন্দদানেনাতি চতুব্বিধং পারিৰাসিযং পরিসপারিৰাসিযং, রত্তিপারিৰাসিযং, ছন্দপারিৰাসিযং, অজ্ঝাসযপারিৰাসিযন্তি।
2398.Ettha imasmiṃ sāsane yā bhikkhunī pārivāsikena chandadānena sikkhamānaṃ sace vuṭṭhāpeti, tassā pācittiyaṃ siyāti yojanā. Tattha pārivāsikena chandadānenāti catubbidhaṃ pārivāsiyaṃ parisapārivāsiyaṃ, rattipārivāsiyaṃ, chandapārivāsiyaṃ, ajjhāsayapārivāsiyanti.
তত্থ পরিসপারিৰাসিযং নাম ভিক্খূ কেনচিদেৰ করণীযেন সন্নিপতিতা হোন্তি, অথ মেঘো ৰা উট্ঠহতি, উস্সারণা ৰা করীযতি, মনুস্সা ৰা অজ্ঝোত্থরন্তা আগচ্ছন্তি, ভিক্খূ ‘‘অনোকাসো অযং, অঞ্ঞত্র গচ্ছামা’’তি ছন্দং অৰিস্সজ্জেত্ৰাৰ উট্ঠহন্তি। ইদং পরিসপারিৰাসিযং। কিঞ্চাপি পরিসপারিৰাসিযং, ছন্দস্স পন অৰিস্সট্ঠত্তা কম্মং কাতুং ৰট্টতি।
Tattha parisapārivāsiyaṃ nāma bhikkhū kenacideva karaṇīyena sannipatitā honti, atha megho vā uṭṭhahati, ussāraṇā vā karīyati, manussā vā ajjhottharantā āgacchanti, bhikkhū ‘‘anokāso ayaṃ, aññatra gacchāmā’’ti chandaṃ avissajjetvāva uṭṭhahanti. Idaṃ parisapārivāsiyaṃ. Kiñcāpi parisapārivāsiyaṃ, chandassa pana avissaṭṭhattā kammaṃ kātuṃ vaṭṭati.
পুন ভিক্খূ ‘‘উপোসথাদীনি করিস্সামা’’তি রত্তিং সন্নিপতিত্ৰা ‘‘যাৰ সব্বে সন্নিপতন্তি, তাৰ ধম্মং সুণিস্সামা’’তি একং অজ্ঝেসন্তি, তস্মিং ধম্মকথং কথেন্তেযেৰ অরুণো উগ্গচ্ছতি। সচে ‘‘চাতুদ্দসিকং উপোসথং করিস্সামা’’তি নিসিন্না, ‘‘পন্নরসো’’তি কাতুং ৰট্টতি। সচে পন্নরসিকং কাতুং নিসিন্না, পাটিপদে অনুপোসথে উপোসথং কাতুং ন ৰট্টতি। অঞ্ঞং পন সঙ্ঘকিচ্চং কাতুং ৰট্টতি। ইদং পন রত্তিপারিৰাসিযং নাম।
Puna bhikkhū ‘‘uposathādīni karissāmā’’ti rattiṃ sannipatitvā ‘‘yāva sabbe sannipatanti, tāva dhammaṃ suṇissāmā’’ti ekaṃ ajjhesanti, tasmiṃ dhammakathaṃ kathenteyeva aruṇo uggacchati. Sace ‘‘cātuddasikaṃ uposathaṃ karissāmā’’ti nisinnā, ‘‘pannaraso’’ti kātuṃ vaṭṭati. Sace pannarasikaṃ kātuṃ nisinnā, pāṭipade anuposathe uposathaṃ kātuṃ na vaṭṭati. Aññaṃ pana saṅghakiccaṃ kātuṃ vaṭṭati. Idaṃ pana rattipārivāsiyaṃ nāma.
পুন ভিক্খূ ‘‘কিঞ্চিদেৰ অব্ভানাদিসঙ্ঘকম্মং করিস্সামা’’তি নিসিন্না হোন্তি, তত্রেকো নক্খত্তপাঠকো ভিক্খু এৰং ৰদতি ‘‘অজ্জ নক্খত্তং দারুণং, মা ইদং কম্মং করোথা’’তি, তে তস্স ৰচনেন ছন্দং ৰিস্সজ্জেত্ৰা তত্থেৰ নিসিন্না হোন্তি, অথঞ্ঞো আগন্ত্ৰা –
Puna bhikkhū ‘‘kiñcideva abbhānādisaṅghakammaṃ karissāmā’’ti nisinnā honti, tatreko nakkhattapāṭhako bhikkhu evaṃ vadati ‘‘ajja nakkhattaṃ dāruṇaṃ, mā idaṃ kammaṃ karothā’’ti, te tassa vacanena chandaṃ vissajjetvā tattheva nisinnā honti, athañño āgantvā –
‘‘নক্খত্তং পটিমানেন্তং, অত্থো বালং উপচ্চগা’’তি॥ (জা॰ ১.১.৪৯) –
‘‘Nakkhattaṃ paṭimānentaṃ, attho bālaṃ upaccagā’’ti. (jā. 1.1.49) –
ৰত্ৰা ‘‘কিং নক্খত্তেন, করোথা’’তি ৰদতি। ইদং ছন্দপারিৰাসিযঞ্চেৰ অজ্ঝাসযপারিৰাসিযঞ্চ। এতস্মিং পারিৰাসিযে পুন ছন্দপারিসুদ্ধিং অনাহরিত্ৰা কম্মং কাতুং ন ৰট্টতি। ইদং সন্ধায ৰুত্তং ‘‘পারিৰাসিকেন ছন্দদানেনা’’তি।
Vatvā ‘‘kiṃ nakkhattena, karothā’’ti vadati. Idaṃ chandapārivāsiyañceva ajjhāsayapārivāsiyañca. Etasmiṃ pārivāsiye puna chandapārisuddhiṃ anāharitvā kammaṃ kātuṃ na vaṭṭati. Idaṃ sandhāya vuttaṃ ‘‘pārivāsikena chandadānenā’’ti.
পাচিত্তিযং সিযাতি এৰং ৰুট্ঠাপেন্তিযা ৰুত্তনযেনেৰ কম্মৰাচাপরিযোসানে পাচিত্তিযং সিযাতি অত্থো।
Pācittiyaṃ siyāti evaṃ vuṭṭhāpentiyā vuttanayeneva kammavācāpariyosāne pācittiyaṃ siyāti attho.
২৩৯৯. ছন্দং অৰিহায ৰা অৰিস্সজ্জেত্ৰাৰ অৰুট্ঠিতায পরিসায তু যথানিসিন্নায পরিসায ৰুট্ঠাপেন্তিযা অনাপত্তীতি যোজনা। ৰা-সদ্দো এৰকারত্থো।
2399. Chandaṃ avihāya vā avissajjetvāva avuṭṭhitāya parisāya tu yathānisinnāya parisāya vuṭṭhāpentiyā anāpattīti yojanā. Vā-saddo evakārattho.
একাদসমং।
Ekādasamaṃ.
২৪০০. দ্ৰাদসেতি ‘‘যা পন ভিক্খুনী অনুৰস্সং ৰুট্ঠাপেয্য, পাচিত্তিয’’ন্তি (পাচি॰ ১১৭১) সিক্খাপদে। তেরসেতি ‘‘যা পন ভিক্খুনী একং ৰস্সং দ্ৰে ৰুট্ঠাপেয্য, পাচিত্তিয’’ন্তি (পাচি॰ ১১৭৫) সিক্খাপদে।
2400.Dvādaseti ‘‘yā pana bhikkhunī anuvassaṃ vuṭṭhāpeyya, pācittiya’’nti (pāci. 1171) sikkhāpade. Teraseti ‘‘yā pana bhikkhunī ekaṃ vassaṃ dve vuṭṭhāpeyya, pācittiya’’nti (pāci. 1175) sikkhāpade.
দ্ৰাদসমতেরসমানি।
Dvādasamaterasamāni.
কুমারিভূতৰগ্গো অট্ঠমো।
Kumāribhūtavaggo aṭṭhamo.
২৪০১. অগিলানাতি ছত্তুপাহনেন ৰূপসমেতব্বরোগরহিতা। যথাহ ‘‘অগিলানা নাম যস্সা ৰিনা ছত্তুপাহনা ফাসু হোতী’’তি। ছত্তঞ্চ উপাহনা চ ছত্তুপাহনং। তত্থ ছত্তং ৰুত্তলক্খণং, উপাহনা ৰক্খমানলক্খণা। ধারেয্যাতি উভযং একতো ধারেয্য। ৰিসুং ধারেন্তিযা হি দুক্কটং ৰক্খতি।
2401.Agilānāti chattupāhanena vūpasametabbarogarahitā. Yathāha ‘‘agilānā nāma yassā vinā chattupāhanā phāsu hotī’’ti. Chattañca upāhanā ca chattupāhanaṃ. Tattha chattaṃ vuttalakkhaṇaṃ, upāhanā vakkhamānalakkhaṇā. Dhāreyyāti ubhayaṃ ekato dhāreyya. Visuṃ dhārentiyā hi dukkaṭaṃ vakkhati.
২৪০২. দিৰসন্তি অচ্চন্তসংযোগে উপযোগৰচনং। সচে ধারেতীতি যোজনা।
2402.Divasanti accantasaṃyoge upayogavacanaṃ. Sace dhāretīti yojanā.
২৪০৩. কদ্দমাদীনীতি এত্থ আদি-সদ্দেন মহাৰালুকাদীনং গহণং।
2403.Kaddamādīnīti ettha ādi-saddena mahāvālukādīnaṃ gahaṇaṃ.
২৪০৪. সচে গচ্ছতীতি সম্বন্ধো। দিস্ৰা গচ্ছাদিকন্তি ছত্তে লগ্গনযোগ্গং নীচতরং গচ্ছাদিকং দিস্ৰা। আদি-সদ্দেন গুম্বাদীনং গহণং। দুক্কটন্তি উপাহনমত্তস্সেৰ ধারণে দুক্কটং।
2404. Sace gacchatīti sambandho. Disvā gacchādikanti chatte lagganayoggaṃ nīcataraṃ gacchādikaṃ disvā. Ādi-saddena gumbādīnaṃ gahaṇaṃ. Dukkaṭanti upāhanamattasseva dhāraṇe dukkaṭaṃ.
২৪০৫. অপনামেত্ৰাতি সীসতো অপনামেত্ৰা। ওমুঞ্চিত্ৰাতি পাদতো ওমুঞ্চিত্ৰা। হোতি পাচিত্তিযন্তি পুন পাচিত্তিযং হোতি।
2405.Apanāmetvāti sīsato apanāmetvā. Omuñcitvāti pādato omuñcitvā. Hoti pācittiyanti puna pācittiyaṃ hoti.
২৪০৬. পযোগগণনাযেৰাতি ছত্তুপাহনস্স অপনেত্ৰা অপনেত্ৰা একতো ধারণপযোগগণনায। তিকপাচিত্তিযং ৰুত্তন্তি ‘‘অগিলানা অগিলানসঞ্ঞা, ৰেমতিকা, গিলানসঞ্ঞা ছত্তুপাহনং ধারেতি, আপত্তি পাচিত্তিযস্সা’’তি (পাচি॰ ১১৮১) এৰং তিকপাচিত্তিযং ৰুত্তং। ‘‘গিলানা অগিলানসঞ্ঞা, গিলানা ৰেমতিকা, ছত্তুপাহনং ধারেতি, আপত্তি দুক্কটস্সা’’তি (পাচি॰ ১১৮২) এৰং দ্ৰিকদুক্কটং তথেৰ ৰুত্তন্তি সম্বন্ধো।
2406.Payogagaṇanāyevāti chattupāhanassa apanetvā apanetvā ekato dhāraṇapayogagaṇanāya. Tikapācittiyaṃ vuttanti ‘‘agilānā agilānasaññā, vematikā, gilānasaññā chattupāhanaṃ dhāreti, āpatti pācittiyassā’’ti (pāci. 1181) evaṃ tikapācittiyaṃ vuttaṃ. ‘‘Gilānā agilānasaññā, gilānā vematikā, chattupāhanaṃ dhāreti, āpatti dukkaṭassā’’ti (pāci. 1182) evaṃ dvikadukkaṭaṃ tatheva vuttanti sambandho.
২৪০৭. যত্থ ভিক্খূ ৰা ভিক্খুনিযো ৰা নিৰসন্তি, তস্মিং আরামে ৰা উপচারে ৰা অপরিক্খিত্তস্স আরামস্স উপচারে ৰা। আপদাসূতি রট্ঠভেদাদিআপদাসু।
2407. Yattha bhikkhū vā bhikkhuniyo vā nivasanti, tasmiṃ ārāme vā upacāre vā aparikkhittassa ārāmassa upacāre vā. Āpadāsūti raṭṭhabhedādiāpadāsu.
পঠমং।
Paṭhamaṃ.
২৪০৮. ভিক্খুনিযাতি এত্থ ‘‘অগিলানাযা’’তি সেসো, পাদেন গন্তুং সমত্থায অগিলানায ভিক্খুনিযাতি অত্থো। যথাহ ‘‘অগিলানা নাম সক্কোতি পদসা গন্তু’’ন্তি (পাচি॰ ১১৮৭)। যানং নাম রথাদি, তং হেট্ঠা ৰুত্তসরূপমেৰ।
2408.Bhikkhuniyāti ettha ‘‘agilānāyā’’ti seso, pādena gantuṃ samatthāya agilānāya bhikkhuniyāti attho. Yathāha ‘‘agilānā nāma sakkoti padasā gantu’’nti (pāci. 1187). Yānaṃ nāma rathādi, taṃ heṭṭhā vuttasarūpameva.
২৪০৯. আপদাসূতি রট্ঠভেদাদিআপদাসু। ছত্তুপাহনসিক্খাপদে আরামে, আরামূপচারে চ অনাপত্তি ৰুত্তা, ইধ তথা অৰুত্তত্তা সব্বত্থাপি আপত্তিযেৰ ৰেদিতব্বা।
2409.Āpadāsūti raṭṭhabhedādiāpadāsu. Chattupāhanasikkhāpade ārāme, ārāmūpacāre ca anāpatti vuttā, idha tathā avuttattā sabbatthāpi āpattiyeva veditabbā.
দুতিযং।
Dutiyaṃ.
২৪১০. ‘‘যং কিঞ্চিপি কটূপিয’’ন্তি ইদং ‘‘সঙ্ঘাণি’’ন্তি এতস্স অত্থপদং। যথাহ – ‘‘সঙ্ঘাণি নাম যা কাচি কটূপগা’’তি। সঙ্ঘাণি নাম মেখলাদিকটিপিল়ন্ধনং। কটূপিযন্তি কটিপ্পদেসোপগং।
2410.‘‘Yaṃ kiñcipi kaṭūpiya’’nti idaṃ ‘‘saṅghāṇi’’nti etassa atthapadaṃ. Yathāha – ‘‘saṅghāṇi nāma yā kāci kaṭūpagā’’ti. Saṅghāṇi nāma mekhalādikaṭipiḷandhanaṃ. Kaṭūpiyanti kaṭippadesopagaṃ.
২৪১২. কটিসুত্তং নাম কটিযং পিল়ন্ধনরজ্জুসুত্তকং।
2412.Kaṭisuttaṃ nāma kaṭiyaṃ piḷandhanarajjusuttakaṃ.
২৪১৩. ইধ ইমস্মিং সিক্খাপদে চিত্তং অকুসলং, ইদং পন সিক্খাপদং লোকৰজ্জং, ইতি ইদং উভযমেৰ ৰিসেসতা পুরিমসিক্খাপদতো ইমস্স নানাকরণং।
2413.Idha imasmiṃ sikkhāpade cittaṃ akusalaṃ, idaṃ pana sikkhāpadaṃ lokavajjaṃ, iti idaṃ ubhayameva visesatā purimasikkhāpadato imassa nānākaraṇaṃ.
ততিযং।
Tatiyaṃ.
২৪১৪. সীসূপগাদিসু যং কিঞ্চি সচে যা ধারেতি, তস্সা তস্স ৰত্থুস্স গণনায আপত্তিযো সিযুন্তি যোজনা। সীসং উপগচ্ছতীতি সীসূপগং, সীসে পিল়ন্ধনারহন্তি অত্থো। আদি-সদ্দেন গীৰূপগাদীনং গহণং। যথাহ – ‘‘ইত্থালঙ্কারো নাম সীসূপগো গীৰূপগো হত্থূপগো পাদূপগো কটূপগো’’তি।
2414. Sīsūpagādisu yaṃ kiñci sace yā dhāreti, tassā tassa vatthussa gaṇanāya āpattiyo siyunti yojanā. Sīsaṃ upagacchatīti sīsūpagaṃ, sīse piḷandhanārahanti attho. Ādi-saddena gīvūpagādīnaṃ gahaṇaṃ. Yathāha – ‘‘itthālaṅkāro nāma sīsūpago gīvūpago hatthūpago pādūpago kaṭūpago’’ti.
২৪১৫. ন চ দোসোতি যোজনা। ‘‘সদিসন্তি পরিদীপিত’’ন্তি ৰত্তব্বে ইতি-সদ্দো লুত্তনিদ্দিট্ঠো।
2415. Na ca dosoti yojanā. ‘‘Sadisanti paridīpita’’nti vattabbe iti-saddo luttaniddiṭṭho.
চতুত্থং।
Catutthaṃ.
২৪১৬. যেন কেনচি গন্ধেনাতি চন্দনতগরাদিনা যেন কেনচি গন্ধকক্কেন। সৰণ্ণাৰণ্ণকেন চাতি ৰণ্ণেন সহ ৰত্ততীতি সৰণ্ণকং, হলিদ্দিকক্কাদি, নত্থি এতস্স উব্বট্টনপচ্চযা দিস্সমানো ৰণ্ণৰিসেসোতি অৰণ্ণকং, সাসপকক্কাদি, সৰণ্ণকঞ্চ অৰণ্ণকঞ্চ সৰণ্ণাৰণ্ণকং, তেন সৰণ্ণাৰণ্ণকেন চ। উব্বট্টেত্ৰা ন্হাযন্তিযা ন্হানোসানে পাচিত্তিযাপত্তি পকাসিতাতি যোজনা।
2416.Yenakenaci gandhenāti candanatagarādinā yena kenaci gandhakakkena. Savaṇṇāvaṇṇakena cāti vaṇṇena saha vattatīti savaṇṇakaṃ, haliddikakkādi, natthi etassa ubbaṭṭanapaccayā dissamāno vaṇṇavisesoti avaṇṇakaṃ, sāsapakakkādi, savaṇṇakañca avaṇṇakañca savaṇṇāvaṇṇakaṃ, tena savaṇṇāvaṇṇakena ca. Ubbaṭṭetvā nhāyantiyā nhānosāne pācittiyāpatti pakāsitāti yojanā.
২৪১৭. সব্বপযোগেতি সব্বস্মিং পুব্বপযোগে। আবাধপচ্চযাতি দদ্দুকুট্ঠাদিরোগপচ্চযা।
2417.Sabbapayogeti sabbasmiṃ pubbapayoge. Ābādhapaccayāti daddukuṭṭhādirogapaccayā.
২৪১৮. ছট্ঠন্তি ‘‘যা পন ভিক্খুনী ৰাসিতকেন পিঞ্ঞাকেন নহাযেয্য, পাচিত্তিয’’ন্তি (পাচি॰ ১২০৩) সিক্খাপদং।
2418.Chaṭṭhanti ‘‘yā pana bhikkhunī vāsitakena piññākena nahāyeyya, pācittiya’’nti (pāci. 1203) sikkhāpadaṃ.
পঞ্চমছট্ঠানি।
Pañcamachaṭṭhāni.
২৪১৯. যা পন ভিক্খুনী অঞ্ঞায ভিক্খুনিযা সচে উব্বট্টাপেয্য ৰা সম্বাহাপেয্য ৰা, তস্সা ভিক্খুনিযা তথা পাচিত্তিযাপত্তি হোতীতি যোজনা।
2419. Yā pana bhikkhunī aññāya bhikkhuniyā sace ubbaṭṭāpeyya vā sambāhāpeyya vā, tassā bhikkhuniyā tathā pācittiyāpatti hotīti yojanā.
২৪২০. এত্থ ইমস্মিং উব্বট্টনে, সম্বাহনে চ হত্থং অমোচেত্ৰা উব্বট্টনে একা আপত্তি সিযা, হত্থং মোচেত্ৰা মোচেত্ৰা উব্বট্টনে পযোগগণনায সিযাতি যোজনা।
2420.Ettha imasmiṃ ubbaṭṭane, sambāhane ca hatthaṃ amocetvā ubbaṭṭane ekā āpatti siyā, hatthaṃ mocetvā mocetvā ubbaṭṭane payogagaṇanāya siyāti yojanā.
২৪২১. আপদাসূতি চোরভযাদীহি সরীরকম্পনাদীসু। গিলানাযাতি অন্তমসো মগ্গগমনপরিস্সমেনাপি আবাধিকায।
2421.Āpadāsūti corabhayādīhi sarīrakampanādīsu. Gilānāyāti antamaso maggagamanaparissamenāpi ābādhikāya.
২৪২২. অট্ঠমসিক্খাপদে ‘‘সিক্খমানাযা’’তি চ নৰমসিক্খাপদে ‘‘সামণেরিযা’’তি চ দসমসিক্খাপদে ‘‘গিহিনিযা’’তি চ ৰিসেসং ৰজ্জেত্ৰা অৰসেসৰিনিচ্ছযো সত্তমেনেৰ সমানোতি দস্সেতুমাহ ‘‘অট্ঠমাদীনি তীণিপী’’তি।
2422. Aṭṭhamasikkhāpade ‘‘sikkhamānāyā’’ti ca navamasikkhāpade ‘‘sāmaṇeriyā’’ti ca dasamasikkhāpade ‘‘gihiniyā’’ti ca visesaṃ vajjetvā avasesavinicchayo sattameneva samānoti dassetumāha ‘‘aṭṭhamādīni tīṇipī’’ti.
সত্তমট্ঠমনৰমদসমানি।
Sattamaṭṭhamanavamadasamāni.
২৪২৩. অন্তোউপচারস্মিন্তি দ্ৰাদসরতনব্ভন্তরে। ‘‘ভিক্খুস্স পুরতো’’তি ইদং উপলক্খণং। তস্মা পুরতো ৰা হোতু পচ্ছতো ৰা পস্সতো ৰা, সমন্ততো দ্ৰাদসরতনব্ভন্তরেতি নিদস্সনপদমেতং। ছমাযপীতি অনন্তরহিতায ভূমিযাপি। যা নিসীদেয্যাতি সম্বন্ধো। ন ৰট্টতি পাচিত্তিযাপত্তি হোতীতি অত্থো।
2423.Antoupacārasminti dvādasaratanabbhantare. ‘‘Bhikkhussa purato’’ti idaṃ upalakkhaṇaṃ. Tasmā purato vā hotu pacchato vā passato vā, samantato dvādasaratanabbhantareti nidassanapadametaṃ. Chamāyapīti anantarahitāya bhūmiyāpi. Yā nisīdeyyāti sambandho. Na vaṭṭati pācittiyāpatti hotīti attho.
২৪২৪. তিকপাচিত্তিযং ৰুত্তন্তি অনাপুচ্ছিতে অনাপুচ্ছিতসঞ্ঞা, ৰেমতিকা, আপুচ্ছিতসঞ্ঞাতি তীসু ৰিকপ্পেসু পাচিত্তিযত্তযং ৰুত্তং। আপুচ্ছিতে অনাপুচ্ছিতসঞ্ঞা, ৰেমতিকা ৰা ভিক্খুস্স পুরতো নিসীদেয্যাতি ৰিকপ্পদ্ৰযে দুক্কটদ্ৰযং হোতি। আপদাসূতি রট্ঠভেদাদিআপদাসু। আপুচ্ছিতুঞ্চ ঠাতুঞ্চ অসক্কোন্তিযা গিলানায।
2424.Tikapācittiyaṃ vuttanti anāpucchite anāpucchitasaññā, vematikā, āpucchitasaññāti tīsu vikappesu pācittiyattayaṃ vuttaṃ. Āpucchite anāpucchitasaññā, vematikā vā bhikkhussa purato nisīdeyyāti vikappadvaye dukkaṭadvayaṃ hoti. Āpadāsūti raṭṭhabhedādiāpadāsu. Āpucchituñca ṭhātuñca asakkontiyā gilānāya.
২৪২৫. নিপজ্জনং ক্রিযং। অনাপুচ্ছনং অক্রিযং।
2425. Nipajjanaṃ kriyaṃ. Anāpucchanaṃ akriyaṃ.
একাদসমং।
Ekādasamaṃ.
২৪২৬. ওকাসো কতো যেন সো ওকাসকতো, ন ওকাসকতো অনোকাসকতো, তং, অকতোকাসন্তি অত্থো, ‘‘অসুকস্মিং নাম ঠানে পুচ্ছামী’’তি অত্তনা পুচ্ছিতব্বৰিনযাদীনং নামং গহেত্ৰা ওকাসং কারাপনকালে অধিৰাসনৰসেন অকতোকাসন্তি ৰুত্তং হোতি। দোসতাতি পাচিত্তিযাপত্তি। একস্মিং পিটকে ওকাসং কারাপেত্ৰা অঞ্ঞস্মিং পিটকে পঞ্হং পুচ্ছন্তিযাপি পাচিত্তিযং হোতীতি দস্সেতুমাহ ‘‘ৰিনযে চা’’তিআদি।
2426. Okāso kato yena so okāsakato, na okāsakato anokāsakato, taṃ, akatokāsanti attho, ‘‘asukasmiṃ nāma ṭhāne pucchāmī’’ti attanā pucchitabbavinayādīnaṃ nāmaṃ gahetvā okāsaṃ kārāpanakāle adhivāsanavasena akatokāsanti vuttaṃ hoti. Dosatāti pācittiyāpatti. Ekasmiṃ piṭake okāsaṃ kārāpetvā aññasmiṃ piṭake pañhaṃ pucchantiyāpi pācittiyaṃ hotīti dassetumāha ‘‘vinaye cā’’tiādi.
পুচ্ছন্তিযাপি চাতি এত্থ পি-সদ্দেন ‘‘অভিধম্মং পুচ্ছন্তিযাপী’’তি ইদঞ্চ অনুত্তসমুচ্চযত্থেন চ-সদ্দেন ‘‘সুত্তন্তে ওকাসং কারাপেত্ৰা ৰিনযং ৰা অভিধম্মং ৰা পুচ্ছতি, আপত্তি পাচিত্তিযস্স। অভিধম্মে ওকাসং কারাপেত্ৰা সুত্তন্তং ৰা ৰিনযং ৰা পুচ্ছতি, আপত্তি পাচিত্তিযস্সা’’তি ইদঞ্চ সঙ্গহিতং।
Pucchantiyāpi cāti ettha pi-saddena ‘‘abhidhammaṃ pucchantiyāpī’’ti idañca anuttasamuccayatthena ca-saddena ‘‘suttante okāsaṃ kārāpetvā vinayaṃ vā abhidhammaṃ vā pucchati, āpatti pācittiyassa. Abhidhamme okāsaṃ kārāpetvā suttantaṃ vā vinayaṃ vā pucchati, āpatti pācittiyassā’’ti idañca saṅgahitaṃ.
২৪২৭. অনোদিস্সাতি ‘‘অসুকস্মিং নাম পুচ্ছামী’’তি এৰং অনিযমেত্ৰা কেৰলং ‘‘পুচ্ছিতব্বং অত্থি, পুচ্ছামি অয্যা’’তি এৰং ৰত্ৰা।
2427.Anodissāti ‘‘asukasmiṃ nāma pucchāmī’’ti evaṃ aniyametvā kevalaṃ ‘‘pucchitabbaṃ atthi, pucchāmi ayyā’’ti evaṃ vatvā.
দ্ৰাদসমং।
Dvādasamaṃ.
২৪২৮-৯. সংকচ্চিকন্তি থনৰেঠনচীৰরং, তং পন পারুপন্তিযা অধক্খকং উব্ভনাভিমণ্ডলং পটিচ্ছাদেন্তিযা পারুপিতব্বং। তেনাহ মাতিকট্ঠকথাযং ‘‘অসংকচ্চিকাতি অধক্খকউব্ভনাভিমণ্ডলসঙ্খাতস্স সরীরস্স পটিচ্ছাদনত্থং অনুঞ্ঞাতসংকচ্চিকচীৰররহিতা’’তি (কঙ্খা॰ অট্ঠ॰ অসংকচ্চিকসিক্খাপদৰণ্ণনা)। ‘‘সংকচ্চিকায পমাণং তিরিযং দিযড্ঢহত্থন্তি পোরাণগণ্ঠিপদে ৰুত্ত’’ন্তি (ৰজির॰ টী॰ পাচিত্তিয ১২২৪-১২২৬) ৰজিরবুদ্ধিত্থেরো। পরিক্খেপোক্কমেতি পরিক্খেপস্স অন্তোপৰেসনে। উপচারোক্কমেপীতি অপরিক্খিত্তস্স গামস্স দুতিযলেড্ডুপাতব্ভন্তরপৰেসনেপি। এত্থাতি ইমস্মিং সিক্খাপদে। এসেৰ নযোতি ‘‘পঠমে পাদে দুক্কটং, দুতিযে পাচিত্তিয’’ন্তি যথাৰুত্তোযেৰ নযো মতো ৰিঞ্ঞাতোতি অত্থো।
2428-9.Saṃkaccikanti thanaveṭhanacīvaraṃ, taṃ pana pārupantiyā adhakkhakaṃ ubbhanābhimaṇḍalaṃ paṭicchādentiyā pārupitabbaṃ. Tenāha mātikaṭṭhakathāyaṃ ‘‘asaṃkaccikāti adhakkhakaubbhanābhimaṇḍalasaṅkhātassa sarīrassa paṭicchādanatthaṃ anuññātasaṃkaccikacīvararahitā’’ti (kaṅkhā. aṭṭha. asaṃkaccikasikkhāpadavaṇṇanā). ‘‘Saṃkaccikāya pamāṇaṃ tiriyaṃ diyaḍḍhahatthanti porāṇagaṇṭhipade vutta’’nti (vajira. ṭī. pācittiya 1224-1226) vajirabuddhitthero. Parikkhepokkameti parikkhepassa antopavesane. Upacārokkamepīti aparikkhittassa gāmassa dutiyaleḍḍupātabbhantarapavesanepi. Etthāti imasmiṃ sikkhāpade. Eseva nayoti ‘‘paṭhame pāde dukkaṭaṃ, dutiye pācittiya’’nti yathāvuttoyeva nayo mato viññātoti attho.
২৪৩০. আপদাসুপীতি মহগ্ঘং হোতি সংকচ্চিকং, পারুপিত্ৰা গচ্ছন্তিযা চ উপদ্দৰো উপ্পজ্জতি, এৰরূপাসু আপদাসু অনাপত্তি।
2430.Āpadāsupīti mahagghaṃ hoti saṃkaccikaṃ, pārupitvā gacchantiyā ca upaddavo uppajjati, evarūpāsu āpadāsu anāpatti.
২৪৩১. সেসন্তি ইধ সরূপতো অদস্সিতঞ্চ। ৰুত্তনযেনেৰাতি মাতিকাপদভাজনাদীসু ৰুত্তনযেনেৰ। সুনিপুণস্মিং ধম্মজাতং, অত্থজাতঞ্চ ৰিভাৰেতি ৰিৰিধেনাকারেন পকাসেতীতি ৰিভাৰী, তেন ৰিভাৰিনা।
2431.Sesanti idha sarūpato adassitañca. Vuttanayenevāti mātikāpadabhājanādīsu vuttanayeneva. Sunipuṇasmiṃ dhammajātaṃ, atthajātañca vibhāveti vividhenākārena pakāsetīti vibhāvī, tena vibhāvinā.
তেরসমং।
Terasamaṃ.
ছত্তুপাহনৰগ্গো নৰমো।
Chattupāhanavaggo navamo.
এৰং নৰহি ৰগ্গেহি ভিক্খুনীনং ভিক্খূহি অসাধারণানি ছন্নৰুতি সিক্খাপদানি দস্সেত্ৰা ইতো পরেসু মুসাৰাদৰগ্গাদীসু সত্তসু ৰগ্গেসু ভিক্খূহি সাধারণসিক্খাপদানি ভিক্খুপাতিমোক্খৰিনিচ্ছযকথায ৰুত্তনযেনেৰ ৰেদিতব্বানীতি তানি ইধ ন দস্সিতানি।
Evaṃ navahi vaggehi bhikkhunīnaṃ bhikkhūhi asādhāraṇāni channavuti sikkhāpadāni dassetvā ito paresu musāvādavaggādīsu sattasu vaggesu bhikkhūhi sādhāraṇasikkhāpadāni bhikkhupātimokkhavinicchayakathāya vuttanayeneva veditabbānīti tāni idha na dassitāni.
সব্বানেৰ ভিক্খুনীনং খুদ্দকেসু ছন্নৰুতি, ভিক্খূনং দ্ৰেনৰুতীতি অট্ঠাসীতিসতং সিক্খাপদানি। ততো পরং সকলং ভিক্খুনিৰগ্গং, পরম্পরভোজনং, অনতিরিত্তভোজনং, অনতিরিত্তেন অভিহট্ঠুং পৰারণং, পণীতভোজনৰিঞ্ঞত্তি, অচেলকসিক্খাপদং, দুট্ঠুল্লপঅচ্ছাদনং, ঊনৰীসতিৰস্সউপসম্পাদনং, মাতুগামেন সদ্ধিং সংৰিধায অদ্ধানগমনং, রাজন্তেপুরপ্পৰেসনং , সন্তং ভিক্খুং অনাপুচ্ছা ৰিকালে গামপ্পৰেসনং, নিসীদনং, ৰস্সিকসাটিকন্তি ইমানি বাৰীসতি সিক্খাপদানি অপনেত্ৰা সেসানি সতঞ্চ ছসট্ঠি চ সিক্খাপদানি ভিক্খুনিপাতিমোক্খুদ্দেসমগ্গেন উদ্দিট্ঠানীতি ৰেদিতব্বানি।
Sabbāneva bhikkhunīnaṃ khuddakesu channavuti, bhikkhūnaṃ dvenavutīti aṭṭhāsītisataṃ sikkhāpadāni. Tato paraṃ sakalaṃ bhikkhunivaggaṃ, paramparabhojanaṃ, anatirittabhojanaṃ, anatirittena abhihaṭṭhuṃ pavāraṇaṃ, paṇītabhojanaviññatti, acelakasikkhāpadaṃ, duṭṭhullapaacchādanaṃ, ūnavīsativassaupasampādanaṃ, mātugāmena saddhiṃ saṃvidhāya addhānagamanaṃ, rājantepurappavesanaṃ , santaṃ bhikkhuṃ anāpucchā vikāle gāmappavesanaṃ, nisīdanaṃ, vassikasāṭikanti imāni bāvīsati sikkhāpadāni apanetvā sesāni satañca chasaṭṭhi ca sikkhāpadāni bhikkhunipātimokkhuddesamaggena uddiṭṭhānīti veditabbāni.
তত্রাযং সঙ্খেপতো অসাধারণসিক্খাপদেসু সমুট্ঠানৰিনিচ্ছযো – গিরগ্গসমজ্জা, চিত্তাগারসিক্খাপদং, সঙ্ঘাণি, ইত্থালঙ্কারো, গন্ধৰণ্ণকো, ৰাসিতকপিঞ্ঞাকো, ভিক্খুনিআদীহি উম্মদ্দনপরিমদ্দনানীতি ইমানি দস সিক্খাপদানি অচিত্তকানি, লোকৰজ্জানি, অকুসলচিত্তানি। অযং পনেত্থ অধিপ্পাযো – ৰিনাপি চিত্তেন আপজ্জিতব্বত্তা অচিত্তকানি, চিত্তে পন সতি অকুসলেনেৰ আপজ্জিতব্বত্তা লোকৰজ্জানি চেৰ অকুসলচিত্তানি চ। অৰসেসানি অচিত্তকানি পণ্ণত্তিৰজ্জানেৰ। চোরিৰুট্ঠাপনং, গামন্তরং, আরামসিক্খাপদং, গব্ভিনিৰগ্গে আদিতো পট্ঠায সত্ত, কুমারিভূতৰগ্গে আদিতো পট্ঠায পঞ্চ, পুরিসসংসট্ঠং, পারিৰাসিযছন্দদানং, অনুৰস্সৰুট্ঠাপনং, একন্তরিকৰুট্ঠাপনন্তি ইমানি একূনৰীসতি সিক্খাপদানি সচিত্তকানি, পণ্ণত্তিৰজ্জানি। অৰসেসানি সচিত্তকানি লোকৰজ্জানেৰাতি।
Tatrāyaṃ saṅkhepato asādhāraṇasikkhāpadesu samuṭṭhānavinicchayo – giraggasamajjā, cittāgārasikkhāpadaṃ, saṅghāṇi, itthālaṅkāro, gandhavaṇṇako, vāsitakapiññāko, bhikkhuniādīhi ummaddanaparimaddanānīti imāni dasa sikkhāpadāni acittakāni, lokavajjāni, akusalacittāni. Ayaṃ panettha adhippāyo – vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni ceva akusalacittāni ca. Avasesāni acittakāni paṇṇattivajjāneva. Corivuṭṭhāpanaṃ, gāmantaraṃ, ārāmasikkhāpadaṃ, gabbhinivagge ādito paṭṭhāya satta, kumāribhūtavagge ādito paṭṭhāya pañca, purisasaṃsaṭṭhaṃ, pārivāsiyachandadānaṃ, anuvassavuṭṭhāpanaṃ, ekantarikavuṭṭhāpananti imāni ekūnavīsati sikkhāpadāni sacittakāni, paṇṇattivajjāni. Avasesāni sacittakāni lokavajjānevāti.
ইতি ৰিনযত্থসারসন্দীপনিযা ৰিনযৰিনিচ্ছযৰণ্ণনায
Iti vinayatthasārasandīpaniyā vinayavinicchayavaṇṇanāya
পাচিত্তিযকথাৰণ্ণনা নিট্ঠিতা।
Pācittiyakathāvaṇṇanā niṭṭhitā.
