| Library / Tipiṭaka / ਤਿਪਿਟਕ • Tipiṭaka / ਖੁਦ੍ਦਸਿਕ੍ਖਾ-ਮੂਲਸਿਕ੍ਖਾ • Khuddasikkhā-mūlasikkhā |
੧੨. ਪਾਚਿਤ੍ਤਿਯਨਿਦ੍ਦੇਸવਣ੍ਣਨਾ
12. Pācittiyaniddesavaṇṇanā
੧੨੧. ਮੁਸਾ …ਪੇ॰… ਹਰਣੇਤਿ ਨਿਮਿਤ੍ਤਤ੍ਥੇ ਭੁਮ੍ਮવਚਨਂ, ਤਸ੍ਸ ‘‘ਪਾਚਿਤ੍ਤਿ વੁਤ੍ਤਾ’’ਤਿ ਇਮਿਨਾ ਸਮ੍ਬਨ੍ਧੋ। ਏવਂ ਸਬ੍ਬਤ੍ਥ। ਮੁਸਾવਾਦੇਤਿ ਨਿਪਾਤੇਨ ਸਦ੍ਧਿਂ ਤਪ੍ਪੁਰਿਸੋ। ਪੁਬ੍ਬੇਪਿ ਜਾਨਿਤ੍વਾ વਚਨਕ੍ਖਣੇਪਿ ਜਾਨਨ੍ਤਸ੍ਸ ਮੁਸਾਭਣਨਨਿਮਿਤ੍ਤਨ੍ਤਿ ਅਤ੍ਥੋ। ਭਣਨਞ੍ਚ ਨਾਮ ਇਧ ਅਭੂਤਸ੍ਸ વਾ ਭੂਤਤਂ, ਭੂਤਸ੍ਸ વਾ ਅਭੂਤਤਂ ਕਤ੍વਾ ਕਾਯੇਨ વਾ વਾਚਾਯ વਾ વਿਞ੍ਞਾਪਨਪ੍ਪਯੋਗੋ। ਪਾਰਾਜਿਕਸਙ੍ਘਾਦਿਸੇਸਾਚਾਰવਿਪਤ੍ਤਿਯੋ ਅਮੂਲਿਕਾਯ ਚੋਦੇਨ੍ਤਸ੍ਸ ਯਥਾਕ੍ਕਮਂ ਸਙ੍ਘਾਦਿਸੇਸਪਾਚਿਤ੍ਤਿਯਦੁਕ੍ਕਟਾਨਿ। ਅਨੁਪਧਾਰੇਤ੍વਾ ਸਹਸਾ ਭਣਨ੍ਤਸ੍ਸ, ‘‘ਅਞ੍ਞਂ ਭਣਿਸ੍ਸਾਮੀ’’ਤਿ ਅਞ੍ਞਂ ਭਣਨ੍ਤਸ੍ਸ ਯਸ੍ਸ ਭਣਤਿ, ਸੋ ਨ ਸੁਣਾਤਿ, ਤਸ੍ਸ ਚ ਅਨਾਪਤ੍ਤਿ।
121.Musā…pe… haraṇeti nimittatthe bhummavacanaṃ, tassa ‘‘pācitti vuttā’’ti iminā sambandho. Evaṃ sabbattha. Musāvādeti nipātena saddhiṃ tappuriso. Pubbepi jānitvā vacanakkhaṇepi jānantassa musābhaṇananimittanti attho. Bhaṇanañca nāma idha abhūtassa vā bhūtataṃ, bhūtassa vā abhūtataṃ katvā kāyena vā vācāya vā viññāpanappayogo. Pārājikasaṅghādisesācāravipattiyo amūlikāya codentassa yathākkamaṃ saṅghādisesapācittiyadukkaṭāni. Anupadhāretvā sahasā bhaṇantassa, ‘‘aññaṃ bhaṇissāmī’’ti aññaṃ bhaṇantassa yassa bhaṇati, so na suṇāti, tassa ca anāpatti.
ਓਮਸਤਿ ਅਮਨਾਪਤਾਯ ਕਣ੍ਣੇਸੁ વਿਜ੍ਝਤਿ વਿਯ ਏਤੇਨ, ਓਮਸਤਿ વਾਤਿ ਓਮਸੋ, ਸੋ ਚਾਯਂ વਾਦੋਚ, ਤਸ੍ਮਿਂ। ਦੀਘੋ ਪਨ ਗਾਥਾਬਨ੍ਧવਸੇਨ। ਏવਂ ਸਬ੍ਬਤ੍ਥ। ਹੀਨੁਕ੍ਕਟ੍ਠੇਸੁ ਚ ਜਾਤਿਨਾਮਗੋਤ੍ਤવਯਕਮ੍ਮਸਿਪ੍ਪਆਬਾਧਲਿਙ੍ਗਕਿਲੇਸਆਪਤ੍ਤਿਅਕ੍ਕੋਸਸਙ੍ਖਾਤੇਸੁ ਦਸਸੁ ਭੂਤੇਨ વਾ ਅਭੂਤੇਨ વਾ ‘‘ਖਤ੍ਤਿਯੋਸਿ, ਚਣ੍ਡਾਲੋਸੀ’’ਤਿਆਦਿਨਾ ਕਾਯੇਨ વਾ વਾਚਾਯ વਾ ਅਨਞ੍ਞਾਪਦੇਸੇਨ ਭਿਕ੍ਖੁਨੋ ਖੁਂਸੇਤੁਕਾਮਤਾਯ ਅਕ੍ਕੋਸવਚਨੇਤਿ ਅਤ੍ਥੋ। ‘‘ਸਨ੍ਤਿ ਇਧੇਕਚ੍ਚੇ ਚਣ੍ਡਾਲਾ’’ਤਿਆਦਿਨਾ ਅਞ੍ਞਾਪਦੇਸੇਨ વਾ ‘‘ਚੋਰੋਸਿ, વਿਕਾਰੀਸਿ, ਮਾਤੁਘਾਤਕੋਸੀ’’ਤਿਆਦੀਹਿ ਪਾਲ਼ਿਮੁਤ੍ਤਪਦੇਹਿ વਾ ਭਿਕ੍ਖੁਸ੍ਸ, ਯਥਾ વਾ ਤਥਾ વਾ ਅਨੁਪਸਮ੍ਪਨ੍ਨਂ, ਪਰਮ੍ਮੁਖਾ ਪਨ ਸਬ੍ਬਮ੍ਪਿ ਅਕ੍ਕੋਸਨ੍ਤਸ੍ਸ ਦੁਕ੍ਕਟਂ। ਕੇવਲਂ ਦવਕਮ੍ਯਤਾਯ વਦਤੋ ਪਨ ਸਬ੍ਬਤ੍ਥ ਦੁਬ੍ਭਾਸਿਤਂ।
Omasati amanāpatāya kaṇṇesu vijjhati viya etena, omasati vāti omaso, so cāyaṃ vādoca, tasmiṃ. Dīgho pana gāthābandhavasena. Evaṃ sabbattha. Hīnukkaṭṭhesu ca jātināmagottavayakammasippaābādhaliṅgakilesaāpattiakkosasaṅkhātesu dasasu bhūtena vā abhūtena vā ‘‘khattiyosi, caṇḍālosī’’tiādinā kāyena vā vācāya vā anaññāpadesena bhikkhuno khuṃsetukāmatāya akkosavacaneti attho. ‘‘Santi idhekacce caṇḍālā’’tiādinā aññāpadesena vā ‘‘corosi, vikārīsi, mātughātakosī’’tiādīhi pāḷimuttapadehi vā bhikkhussa, yathā vā tathā vā anupasampannaṃ, parammukhā pana sabbampi akkosantassa dukkaṭaṃ. Kevalaṃ davakamyatāya vadato pana sabbattha dubbhāsitaṃ.
ਪੇਸੁਞ੍ਞਹਰਣੇਤਿ ਪਿਸੁਣਸ੍ਸ ਭਾવੋ ਪੇਸੁਞ੍ਞਂ। ਅਤ੍ਤਨੋ ਪਿਯਕਮ੍ਯਤਾਯ વਾ ਪਰਸ੍ਸ ਪਰੇਸੁ ਭੇਦਾਧਿਪ੍ਪਾਯੇਨ વਾ ਜਾਤਿਆਦੀਹਿ ਓਮਸਨ੍ਤਸ੍ਸ ਭਿਕ੍ਖੁਨੋ વਚਨਂ ਸੁਤ੍વਾ ਭਿਕ੍ਖੁਸ੍ਸ ਤਸ੍ਸ ਪੇਸੁਞ੍ਞਸ੍ਸ ਹਰਣੇ। ਅਨੁਪਸਮ੍ਪਨ੍ਨਸ੍ਸ ਹਰਣੇ ਦੁਕ੍ਕਟਂ। ਪਦਂ ਪਦਂ ਪਦਸੋ, વਿਚ੍ਛਾਯਂ ਸੋ, ਕੋਟ੍ਠਾਸੇਨ ਕੋਟ੍ਠਾਸੇਨਾਤਿ ਅਤ੍ਥੋ। ਸਙ੍ਗੀਤਿਤ੍ਤਯਾਰੁਲ਼੍ਹੋ ਤਿਪਿਟਕਧਮ੍ਮੋ, ਅਨਾਰੁਲ਼੍ਹੋ ਚ ਰਾਜੋવਾਦਾਦਿਕੋ ਧਮ੍ਮੋ ਨਾਮ, ਤੇਨ ਸਹ ਪਦਸੋਤਿ ਨਿਪਾਤਸ੍ਸ ਤਤਿਯਾਤਪ੍ਪੁਰਿਸੋ। ਪਦਸੋਧਮ੍ਮੇਤਿ ਏਕਕ੍ਖਰਾਦਿਨਾ ਕੋਟ੍ਠਾਸੇਨ ਕੋਟ੍ਠਾਸੇਨ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਯਥਾવੁਤ੍ਤਧਮ੍ਮਭਣਨੇਤਿ ਅਤ੍ਥੋ। ਪਦਸੋਧਮ੍ਮਭਣਨਞ੍ਹਿ ਪਦਸੋਧਮ੍ਮ-ਸਦ੍ਦੇਨ ਉਪਚਾਰੇਨ વੁਤ੍ਤਂ। ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਏਕਤੋ ਉਦ੍ਦੇਸਗ੍ਗਹਣੇ ਸਜ੍ਝਾਯਕਰਣੇ, ਤਂਸਨ੍ਤਿਕੇ ਉਦ੍ਦੇਸਗ੍ਗਹਣਾਦਿਕੇ ਚ ਤੇਨ ਸਦ੍ਧਿਂ ਏਕਤੋ ਯੇਭੁਯ੍ਯੇਨ ਪਗੁਣਂ ਗਨ੍ਥਂ ਭਣਨ੍ਤਸ੍ਸ ਓਸਾਰੇਨ੍ਤਸ੍ਸ ਖਲਿਤਟ੍ਠਾਨੇ ‘‘ਏવਂ ਭਣਾਹੀ’’ਤਿ ਏਕਤੋ ਭਣਨ੍ਤਸ੍ਸਪਿ ਅਨਾਪਤ੍ਤਿ।
Pesuññaharaṇeti pisuṇassa bhāvo pesuññaṃ. Attano piyakamyatāya vā parassa paresu bhedādhippāyena vā jātiādīhi omasantassa bhikkhuno vacanaṃ sutvā bhikkhussa tassa pesuññassa haraṇe. Anupasampannassa haraṇe dukkaṭaṃ. Padaṃ padaṃ padaso, vicchāyaṃ so, koṭṭhāsena koṭṭhāsenāti attho. Saṅgītittayāruḷho tipiṭakadhammo, anāruḷho ca rājovādādiko dhammo nāma, tena saha padasoti nipātassa tatiyātappuriso. Padasodhammeti ekakkharādinā koṭṭhāsena koṭṭhāsena anupasampannena saddhiṃ yathāvuttadhammabhaṇaneti attho. Padasodhammabhaṇanañhi padasodhamma-saddena upacārena vuttaṃ. Anupasampannena saddhiṃ ekato uddesaggahaṇe sajjhāyakaraṇe, taṃsantike uddesaggahaṇādike ca tena saddhiṃ ekato yebhuyyena paguṇaṃ ganthaṃ bhaṇantassa osārentassa khalitaṭṭhāne ‘‘evaṃ bhaṇāhī’’ti ekato bhaṇantassapi anāpatti.
ਅਨ੍ਤਮਸੋ વਤ੍ਥਾਦਿਨਾ ਯੇਨ ਕੇਨਚਿ ਸਬ੍ਬਚ੍ਛਨ੍ਨਂ ਛਦਨਂ ਅਨਾਹਚ੍ਚ ਦਿਯਡ੍ਢਹਤ੍ਥੁਬ੍ਬੇਧੇਨਾਪਿ ਸਬ੍ਬਪਰਿਚ੍ਛਿਨ੍ਨਂ ਯੇਭੁਯ੍ਯੇਨਛਨ੍ਨਂ ਯੇਭੁਯ੍ਯੇਨਪਰਿਚ੍ਛਿਨ੍ਨਞ੍ਚ ਸੇਨਾਸਨਂ ਅਗਾਰਨ੍ਤਿ ਅਧਿਪ੍ਪੇਤਂ। ਤਤ੍ਰਟ੍ਠੋ ਪਨ ਭਿਕ੍ਖੁਂ ਠਪੇਤ੍વਾ ਅਨ੍ਤਮਸੋ ਪਾਰਾਜਿਕવਤ੍ਥੁਭੂਤੋ ਤਿਰਚ੍ਛਾਨਗਤੋਪਿ ਅਨ੍ਤਮਸੋ ਤਦਹੁਜਾਤਾ ਇਤ੍ਥੀਪਿ ਉਪਚਾਰਤੋ ਅਗਾਰ-ਸਦ੍ਦੇਨ વੁਚ੍ਚਤਿ। ਸਹ ਅਗਾਰੇਨਾਤਿ ਸਾਗਾਰੋ, ਭਿਕ੍ਖੁ। ਉਪਚਾਰੇਨੇવ ਚ ਪਨ ਅਨੁਪਸਮ੍ਪਨ੍ਨੇਨ, ਮਾਤੁਗਾਮੇਨ ਚ ਸਹ ਸੇਯ੍ਯਕਪ੍ਪਨਂ ਸਾਗਾਰਭਾવੋ ਨਾਮਾਤਿ ਗਹੇਤਬ੍ਬਂ। ਸਙ੍ਘਸਮ੍ਮਤਂ ਸੇਨਾਸਨਪਞ੍ਞਾਪਕਾਦਿਭੇਦਂ ਉਪਸਮ੍ਪਨ੍ਨਂ ਅਯਸਕਾਮਾ ਹੁਤ੍વਾ ਭਿਕ੍ਖੂਹਿ ਯੇਨ ਚ ਉਜ੍ਝਾਪੇਨ੍ਤਿ ਅવਜਾਨਾਪੇਨ੍ਤਿ ਅવਞ੍ਞਾਯ ਓਲੋਕਾਪੇਨ੍ਤਿ, ਲਾਮਕਤੋ વਾ ਚਿਨ੍ਤਾਪੇਨ੍ਤਿ, ਤਂ વਚਨਂ ਉਜ੍ਝਾਪਨਕਂ। ਯੇਨ ਖੀਯਨ੍ਤਿ ਸਬ੍ਬਤ੍ਥ ਤਸ੍ਸ ਅવਣ੍ਣਂ ਪਕਾਸੇਨ੍ਤਿ, ਤਂ ਖੀਯਨਂ।
Antamaso vatthādinā yena kenaci sabbacchannaṃ chadanaṃ anāhacca diyaḍḍhahatthubbedhenāpi sabbaparicchinnaṃ yebhuyyenachannaṃ yebhuyyenaparicchinnañca senāsanaṃ agāranti adhippetaṃ. Tatraṭṭho pana bhikkhuṃ ṭhapetvā antamaso pārājikavatthubhūto tiracchānagatopi antamaso tadahujātā itthīpi upacārato agāra-saddena vuccati. Saha agārenāti sāgāro, bhikkhu. Upacāreneva ca pana anupasampannena, mātugāmena ca saha seyyakappanaṃ sāgārabhāvo nāmāti gahetabbaṃ. Saṅghasammataṃ senāsanapaññāpakādibhedaṃ upasampannaṃ ayasakāmā hutvā bhikkhūhi yena ca ujjhāpenti avajānāpenti avaññāya olokāpenti, lāmakato vā cintāpenti, taṃ vacanaṃ ujjhāpanakaṃ. Yena khīyanti sabbattha tassa avaṇṇaṃ pakāsenti, taṃ khīyanaṃ.
੧੨੨. ਤਲਨ੍ਤਿ ਹਤ੍ਥਤਲਮਧਿਪ੍ਪੇਤਂ। ਤਗ੍ਗਹਣੇਨ ਪਨ ਕਾਯੋવ ਤਲਂ। ਸਤ੍ਤੀਤਿ ਕਾਯਪ੍ਪਟਿਬਦ੍ਧਾ ਸਤ੍ਤਿ ਆવੁਧવਿਸੇਸੋ, ਉਪਲਕ੍ਖਣਤ੍ਤਾ ਪਨ ਸਬ੍ਬਮ੍ਪਿ ਕਾਯਪ੍ਪਟਿਬਦ੍ਧਂ ਸਤ੍ਤਿ। ਤਲਞ੍ਚ ਸਤ੍ਤਿ ਚ ਤਲਸਤ੍ਤਿ। ਇਧ ਪਨ ਕੋਪੇਨ ਭਿਕ੍ਖੁਸ੍ਸ ਤਲਸਤ੍ਤਿਉਗ੍ਗਿਰਣਂ ਤਲਸਤ੍ਤਿ। ਸਚੇ ਪਨ વਿਰਦ੍ਧੋ ਪਹਾਰਂ ਦੇਤਿ, ਨ ਪਹਰਿਤੁਕਾਮਤਾਯ ਦਿਨ੍ਨਤ੍ਤਾ ਦੁਕ੍ਕਟਂ, ਪਹਰਿਤੁਕਾਮਤਾਯ ਪਾਚਿਤ੍ਤਿਯਂ, ਅਨੁਪਸਮ੍ਪਨ੍ਨੇ ਦੁਕ੍ਕਟਂ, ਮੋਕ੍ਖਾਧਿਪ੍ਪਾਯਸ੍ਸ ਅਨਾਪਤ੍ਤਿ।
122.Talanti hatthatalamadhippetaṃ. Taggahaṇena pana kāyova talaṃ. Sattīti kāyappaṭibaddhā satti āvudhaviseso, upalakkhaṇattā pana sabbampi kāyappaṭibaddhaṃ satti. Talañca satti ca talasatti. Idha pana kopena bhikkhussa talasattiuggiraṇaṃ talasatti. Sace pana viraddho pahāraṃ deti, na paharitukāmatāya dinnattā dukkaṭaṃ, paharitukāmatāya pācittiyaṃ, anupasampanne dukkaṭaṃ, mokkhādhippāyassa anāpatti.
ਪਞ੍ਞਤ੍ਤੇਨ વਦਤੋ ਉਪਸਮ੍ਪਨ੍ਨਸ੍ਸ વਾ ਤੇਨ વੁਚ੍ਚਮਾਨਧਮ੍ਮਸ੍ਸ વਾ ਅਨਾਦਰਕਰਣਂ ਅਨਾਦਰੋ। ਅਨੁਪਸਮ੍ਪਨ੍ਨਸ੍ਸ ਤੇਨ વੁਚ੍ਚਮਾਨਸ੍ਸ વਾ ਉਪਸਮ੍ਪਨ੍ਨੇਨ, ਪਰੇਨ વਾ ਅਪਞ੍ਞਤ੍ਤੇਨ વਾ વੁਚ੍ਚਮਾਨਸ੍ਸ ਅਨਾਦਰੇ ਦੁਕ੍ਕਟਂ।
Paññattena vadato upasampannassa vā tena vuccamānadhammassa vā anādarakaraṇaṃ anādaro. Anupasampannassa tena vuccamānassa vā upasampannena, parena vā apaññattena vā vuccamānassa anādare dukkaṭaṃ.
‘‘ਊਨવਸ੍ਸੋ ਤ੍વਂ ਮਞ੍ਞੇ’’ਤਿਆਦਿਨਾ ਭਿਕ੍ਖੁਨੋ ਕੁਕ੍ਕੁਚ੍ਚਸ੍ਸ ਉਪ੍ਪਾਦਨਂ ਅਨੁਪਸਮ੍ਪਨ੍ਨਸ੍ਸ ਦੁਕ੍ਕਟਂ।
‘‘Ūnavasso tvaṃ maññe’’tiādinā bhikkhuno kukkuccassa uppādanaṃ anupasampannassa dukkaṭaṃ.
ਅਨਾਪੁਚ੍ਛਾ ਗਾਮਪ੍ਪવੇਸਨੇਤਿ ਪਕਤਿવਚਨੇਨ ਪੁਚ੍ਛਿਤੁਮਨੁਰੂਪਂ ਅਨ੍ਤੋਉਪਚਾਰਸੀਮਾਯ ਦਸ੍ਸਨੂਪਚਾਰੇ ਭਿਕ੍ਖੁਂ ਦਿਸ੍વਾ ‘‘વਿਕਾਲੇ ਗਾਮਪ੍ਪવੇਸਨਂ ਆਪੁਚ੍ਛਾਮੀ’’ਤਿ ਅਨਾਪੁਚ੍ਛਿਤ੍વਾ વਿਕਾਲੇ ਗਾਮਪ੍ਪવੇਸਨੇ। ਦੀਘੋ ਪਨ ਸਨ੍ਧਿવਸੇਨ। ਆਪਦਾਸੁ ਅਨਾਪਤ੍ਤਿ।
Anāpucchā gāmappavesaneti pakativacanena pucchitumanurūpaṃ antoupacārasīmāya dassanūpacāre bhikkhuṃ disvā ‘‘vikāle gāmappavesanaṃ āpucchāmī’’ti anāpucchitvā vikāle gāmappavesane. Dīgho pana sandhivasena. Āpadāsu anāpatti.
ਪਰਮ੍ਪਰਭੋਜਨੇਤਿ ਪਰੋ ਚ ਪਰੋ ਚ ਪਰਮ੍ਪਰਾ ਮ-ਕਾਰੋ ਸਨ੍ਧਿવਸੇਨ, ਤਸ੍ਮਾ ਪਰਮ੍ਪਰਾ ਉਪ੍ਪਤ੍ਤવਿਸਯਅਪਾਦਾਨવਚਨਂ, ਪਰਤੋ ਪਰਤੋ ਲਦ੍ਧਾ ਭੁਞ੍ਜਨੇਤਿ ਅਤ੍ਥੋ। ਅਯਮੇਤ੍ਥ ਅਧਿਪ੍ਪਾਯੋ – ਪਞ੍ਚਹਿ ਭੋਜਨੇਹਿ ਨਾਮਂ ਗਹੇਤ੍વਾ ਨਿਮਨ੍ਤਿਤਸ੍ਸ ਯੇਨ ਯੇਨ ਪਠਮਂ ਨਿਮਨ੍ਤਿਤੋ, ਤਸ੍ਸ ਤਸ੍ਸ ਭੋਜਨਤੋ ਉਪ੍ਪਟਿਪਾਟਿਯਾ, ‘‘ਮਯ੍ਹਂ ਭਤ੍ਤਪਚ੍ਚਾਸਂ ਤੁਯ੍ਹਂ ਦਮ੍ਮੀ’’ਤਿ વਾ ‘‘વਿਕਪ੍ਪੇਮੀ’’ਤਿ વਾ ਆਦਿਨਾ ਸਮ੍ਮੁਖਾ વਾ ਪਰਮ੍ਮੁਖਾ વਾ ਅવਿਕਪ੍ਪੇਤ੍વਾ વਾ ਅਞ੍ਞਤੋ ਅਞ੍ਞਤੋ ਪਞ੍ਚਭੋਜਨਾਦੀਨਿ ਲਦ੍ਧਾ ਭੁਞ੍ਜਮਾਨੇਤਿ। ਗਿਲਾਨਚੀવਰਦਾਨਚੀવਰਕਾਰਸਮਯੇ ਅਨਾਪਤ੍ਤਿ।
Paramparabhojaneti paro ca paro ca paramparā ma-kāro sandhivasena, tasmā paramparā uppattavisayaapādānavacanaṃ, parato parato laddhā bhuñjaneti attho. Ayamettha adhippāyo – pañcahi bhojanehi nāmaṃ gahetvā nimantitassa yena yena paṭhamaṃ nimantito, tassa tassa bhojanato uppaṭipāṭiyā, ‘‘mayhaṃ bhattapaccāsaṃ tuyhaṃ dammī’’ti vā ‘‘vikappemī’’ti vā ādinā sammukhā vā parammukhā vā avikappetvā vā aññato aññato pañcabhojanādīni laddhā bhuñjamāneti. Gilānacīvaradānacīvarakārasamaye anāpatti.
੧੨੩. ਸੇਯ੍ਯਂ ਸੇਨਾਸਨਾਨਿ વਾ ਅਨੁਦ੍ਧਰਿਤ੍વਾ ਗਮਨੇਤਿ ਸਮ੍ਬਨ੍ਧੋ। વਾ-ਸਦ੍ਦੋ ਸਮੁਚ੍ਚਯੇ। ਤਤ੍ਥ ‘‘ਭਿਸਿ ਚਿਮਿਲਿਕਾ ਉਤ੍ਤਰਤ੍ਥਰਣਂ ਭੂਮਤ੍ਥਰਣਂ ਤਟ੍ਟਿਕਾ ਚਮ੍ਮਕ੍ਖਣ੍ਡੋ ਨਿਸੀਦਨਂ ਪਚ੍ਚਤ੍ਥਰਣਂ ਤਿਣਸਨ੍ਥਾਰੋ ਪਣ੍ਣਸਨ੍ਥਾਰੋ’’ਤਿ (ਪਾਚਿ॰ ੧੧੬) વੁਤ੍ਤਾਸੁ ਦਸਸੁ ਸੇਯ੍ਯਾਸੁ ਏਕਮ੍ਪਿ ਅਤ੍ਤਨੋ વਸ੍ਸਗ੍ਗਨੇ ਗਹੇਤ੍વਾ ਸਙ੍ਘਿਕੇ ਸਬ੍ਬਪ੍ਪਟਿਚ੍ਛਨ੍ਨੇ ਗੁਤ੍ਤੇ ਸੇਨਾਸਨੇ ਸਨ੍ਥਰਿਤ੍વਾ વਾ ਸਨ੍ਥਰਾਪੇਤ੍વਾ વਾ ਯਥਾ ਠਪਿਤਂ ਉਪਚਿਕਾਦੀਹਿ ਨ ਖਜ੍ਜਤਿ, ਤਥਾ ਠਪਨવਸੇਨ ਅਨੁਦ੍ਧਰਿਤ੍વਾ ਪਰਿਕ੍ਖਿਤ੍ਤਸ੍ਸ ਆਰਾਮਸ੍ਸ ਪਰਿਕ੍ਖੇਪਂ, ਅਪਰਿਕ੍ਖਿਤ੍ਤਸ੍ਸ ਉਪਚਾਰਂ ਅਤਿਕ੍ਕਮਿਤ੍વਾ ਗਮਨੇ ਚ, ਤਥਾ ਮਞ੍ਚਪੀਠਤਿਸਿਕੋਚ੍ਛਸਙ੍ਖਾਤਾਨਿ ਸੇਨਾਸਨਾਨਿ વਸ੍ਸਕਾਲੇ ਅਜ੍ਝੋਕਾਸੇ ਸਨ੍ਥਰਿਤ੍વਾ વਾ ਸਨ੍ਥਰਾਪੇਤ੍વਾ વਾ ਅਨੁਪਸਮ੍ਪਨ੍ਨੇਨ ਅਨੁਦ੍ਧਰਿਤ੍વਾ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤਂ ਅਤਿਕ੍ਕਮਿਤ੍વਾ ਗਮਨੇ ਚਾਤਿ ਅਤ੍ਥੋ। ਯਥਾવੁਤ੍ਤਤੋ ਪਨ ਅਞ੍ਞਤ੍ਥ ਦੁਕ੍ਕਟਂ।
123. Seyyaṃ senāsanāni vā anuddharitvā gamaneti sambandho. Vā-saddo samuccaye. Tattha ‘‘bhisi cimilikā uttarattharaṇaṃ bhūmattharaṇaṃ taṭṭikā cammakkhaṇḍo nisīdanaṃ paccattharaṇaṃ tiṇasanthāro paṇṇasanthāro’’ti (pāci. 116) vuttāsu dasasu seyyāsu ekampi attano vassaggane gahetvā saṅghike sabbappaṭicchanne gutte senāsane santharitvā vā santharāpetvā vā yathā ṭhapitaṃ upacikādīhi na khajjati, tathā ṭhapanavasena anuddharitvā parikkhittassa ārāmassa parikkhepaṃ, aparikkhittassa upacāraṃ atikkamitvā gamane ca, tathā mañcapīṭhatisikocchasaṅkhātāni senāsanāni vassakāle ajjhokāse santharitvā vā santharāpetvā vā anupasampannena anuddharitvā thāmamajjhimassa purisassa leḍḍupātaṃ atikkamitvā gamane cāti attho. Yathāvuttato pana aññattha dukkaṭaṃ.
ਇਤ੍ਥਿਯਾ ਅਦ੍ਧਾਨਗਮਨੇਤਿ ‘‘ਗਚ੍ਛਾਮ ਭਗਿਨਿ, ਗਚ੍ਛਾਮ ਅਯ੍ਯਾ’’ਤਿ ਅਞ੍ਞਮਞ੍ਞਂ ਸਂવਿਦਹਿਤ੍વਾ ‘‘ਅਜ੍ਜ વਾ ਸ੍વੇ વਾ’’ਤਿਆਦਿਨਾ ਨਿਯਮਿਤਕਾਲવਿਸਙ੍ਕੇਤਂ ਅਕਤ੍વਾਪਿ ਦ੍વਾਰવਿਸਙ੍ਕੇਤਂ ਮਗ੍ਗવਿਸਙ੍ਕੇਤਂ ਕਤ੍વਾਪਿ ਇਤ੍ਥਿਯਾ ਸਦ੍ਧਿਂ ਅਦ੍ਧਾਨਮਗ੍ਗਗਮਨੇਤਿ ਅਤ੍ਥੋ।
Itthiyā addhānagamaneti ‘‘gacchāma bhagini, gacchāma ayyā’’ti aññamaññaṃ saṃvidahitvā ‘‘ajja vā sve vā’’tiādinā niyamitakālavisaṅketaṃ akatvāpi dvāravisaṅketaṃ maggavisaṅketaṃ katvāpi itthiyā saddhiṃ addhānamaggagamaneti attho.
ਏਕੇਕਾਯ ਨਿਸੀਦਨੇਤਿ ਏਕੇਨ ਏਕਾਤਿ ਏਕੇਕਾ, ਤਸ੍ਸਾ ਨਿਸਜ੍ਜਾਯਾਤਿ ਅਤ੍ਥੋ। ਏਕੇਨ ਸਹ ਏਕਿਸ੍ਸਾ ਨਿਸਜ੍ਜਂ વਿਨਾ ਏਕਾਯ ਸਹ ਏਕਸ੍ਸ ਨਿਸਜ੍ਜਂ ਨਾਮ ਨਤ੍ਥੀਤਿ ਏਕਾਯ ਸਹ ਏਕਸ੍ਸ ਨਿਸਜ੍ਜਾਯਂ ਸਤਿ ਨਿਸਿਨ੍ਨਸ੍ਸ ਭਿਕ੍ਖੁਨੋ ਪਾਚਿਤ੍ਤਿਯਨ੍ਤਿ ਅਧਿਪ੍ਪਾਯੋ। ‘‘ਏਕਾਯੇਕਨਿਸੀਦਨੇ’’ਤਿ વਾ ਪਾਠੋ।
Ekekāya nisīdaneti ekena ekāti ekekā, tassā nisajjāyāti attho. Ekena saha ekissā nisajjaṃ vinā ekāya saha ekassa nisajjaṃ nāma natthīti ekāya saha ekassa nisajjāyaṃ sati nisinnassa bhikkhuno pācittiyanti adhippāyo. ‘‘Ekāyekanisīdane’’ti vā pāṭho.
੧੨੪. ਰੂਪਾਦੀਨਂ ਉਪਸਂਹਾਰੇਨ, ਭਯਾਨਕਕਥਾਕਥਨੇਨ વਾ ਉਪਸਮ੍ਪਨ੍ਨਸ੍ਸ ਭਿਂਸਾਪਨੇ। ਅਨੁਪਸਮ੍ਪਨ੍ਨਸ੍ਸ ਦੁਕ੍ਕਟਂ।
124. Rūpādīnaṃ upasaṃhārena, bhayānakakathākathanena vā upasampannassa bhiṃsāpane. Anupasampannassa dukkaṭaṃ.
ਆਕੋਟਨੇ ਉਪਸਮ੍ਪਨ੍ਨਸ੍ਸ ਅਨ੍ਤਮਸੋ ਉਪ੍ਪਲਪਤ੍ਤੇਨਾਪਿ ਪਹਾਰਦਾਨੇ। ਅਨੁਪਸਮ੍ਪਨ੍ਨਸ੍ਸ ਅਨ੍ਤਮਸੋ ਤਿਰਚ੍ਛਾਨਗਤਸ੍ਸਪਿ ਦੁਕ੍ਕਟਂ। ਮੋਕ੍ਖਾਧਿਪ੍ਪਾਯਸ੍ਸ ਅਨਾਪਤ੍ਤਿ।
Ākoṭane upasampannassa antamaso uppalapattenāpi pahāradāne. Anupasampannassa antamaso tiracchānagatassapi dukkaṭaṃ. Mokkhādhippāyassa anāpatti.
ਸਙ੍ਘਮਜ੍ਝੇ વਿਨਯਧਰੇਨ ਅਨੁਯੁਞ੍ਜਿਯਮਾਨਸ੍ਸ ਪੁਚ੍ਛਿਤਤੋ ਅਞ੍ਞਸ੍ਸ વਾਦੋ ਅਞ੍ਞੇਨ ਅਞ੍ਞਂ ਪਟਿਚਰਣਂ ਅਞ੍ਞવਾਦੋ। ਤਥੇવ ਪੁਚ੍ਛਿਯਮਾਨਸ੍ਸ ਅਕਥੇਤੁਕਾਮਤਾਯ વਿਹੇਸਨਂ ਤੁਣ੍ਹੀਭਾવੋ વਿਹੇਸਾ। ਅਞ੍ਞવਾਦਕਸ੍ਸ વਿਹੇਸਕਸ੍ਸ ਚ ਞਤ੍ਤਿਦੁਤਿਯਕਮ੍ਮੇਨ ਅਞ੍ਞવਾਦਕવਿਹੇਸਕਕਮ੍ਮੇ ਕਤੇ ਪੁਨ ਅਞ੍ਞવਾਦੇ વਿਹੇਸਾਯ ਪਾਚਿਤ੍ਤਿਯਂ। ਅਨਾਰੋਪਿਤੇ ਪਨ ਕਮ੍ਮੇ ਦੁਕ੍ਕਟਂ। ਕਿਞ੍ਚਿ વੀਤਿਕ੍ਕਮਂ ਦਿਸ੍વਾ ‘‘ਆવੁਸੋ, ਇਦਂ ਨਾਮ ਤਯਾ ਕਤ’’ਨ੍ਤਿ વੁਤ੍ਤੇ ਤਂ ਨ ਕਥੇਤੁਕਾਮੋ ਤੁਣ੍ਹੀਭੂਤੋ ਸਙ੍ਘਂ વਿਹੇਸੇਤੀਤਿ વਿਹੇਸਕੋ। ਅਨਾਚਾਰਂ ਆਚਰਿਤ੍વਾ ਸਙ੍ਘਮਜ੍ਝੇ ਆਪਤ੍ਤਿਯਾ, વਤ੍ਥੁਨਾ વਾ ਅਨੁਯੁਞ੍ਜਿਯਮਾਨੇ ਤਂ ਅਕਥੇਤੁਕਾਮੋ ‘‘ਕੋ ਆਪਨ੍ਨੋ, ਕਿਸ੍ਮਿਂ ਆਪਨ੍ਨੋ’’ਤਿਆਦਿਨਾ ਨਯੇਨ ਅਞ੍ਞੇਹਿ વਚਨੇਹਿ ਤਂ વਚਨਂ ਪਟਿਚ੍ਛਾਦੇਨ੍ਤੋ ਯੋ ਅਞ੍ਞਂ વਦਤਿ, ਅਯਂ ਅਞ੍ਞવਾਦਕੋ ਨਾਮ।
Saṅghamajjhe vinayadharena anuyuñjiyamānassa pucchitato aññassa vādo aññena aññaṃ paṭicaraṇaṃ aññavādo. Tatheva pucchiyamānassa akathetukāmatāya vihesanaṃ tuṇhībhāvo vihesā. Aññavādakassa vihesakassa ca ñattidutiyakammena aññavādakavihesakakamme kate puna aññavāde vihesāya pācittiyaṃ. Anāropite pana kamme dukkaṭaṃ. Kiñci vītikkamaṃ disvā ‘‘āvuso, idaṃ nāma tayā kata’’nti vutte taṃ na kathetukāmo tuṇhībhūto saṅghaṃ vihesetīti vihesako. Anācāraṃ ācaritvā saṅghamajjhe āpattiyā, vatthunā vā anuyuñjiyamāne taṃ akathetukāmo ‘‘ko āpanno, kismiṃ āpanno’’tiādinā nayena aññehi vacanehi taṃ vacanaṃ paṭicchādento yo aññaṃ vadati, ayaṃ aññavādako nāma.
ਦੁਟ੍ਠੁਲ੍ਲਂ ਨਾਮ ਪਾਰਾਜਿਕਸਙ੍ਘਾਦਿਸੇਸਾ, ਇਧ ਪਨ ਸਙ੍ਘਾਦਿਸੇਸੋવ। ਪਕਾਸੋ ਚ ਛਾਦੋ ਚ ਪਕਾਸਛਾਦੋ, ਦੁਟ੍ਠੁਲ੍ਲਸ੍ਸ ਪਕਾਸਛਾਦੋਤਿ ਤਪ੍ਪੁਰਿਸੋ। ਅਭਿਣ੍ਹਾਪਤ੍ਤਿਕਸ੍ਸ ਭਿਕ੍ਖੁਨੋ ਆਯਤਿਂ ਸਂવਰਤ੍ਥਾਯ ਆਪਤ੍ਤਿਪਰਿਯਨ੍ਤਂ ਕੁਲਪਰਿਯਨ੍ਤਞ੍ਚ ਕਤ੍વਾ વਾ ਅਕਤ੍વਾ વਾ ਤਿਕ੍ਖਤ੍ਤੁਂ ਅਪਲੋਕੇਤ੍વਾ ਕਾਤਬ੍ਬਂ। ਭਿਕ੍ਖੁਸਮ੍ਮੁਤਿਂ ਠਪੇਤ੍વਾ ਅਨੁਪਸਮ੍ਪਨ੍ਨਸ੍ਸ ‘‘ਅਯਂ ਅਸੁਚਿਂ ਮੋਚੇਤ੍વਾ ਸਙ੍ਘਾਦਿਸੇਸਂ ਆਪਨ੍ਨੋ’’ਤਿਆਦਿਨਾ ਨਯੇਨ વਤ੍ਥੁਨਾ ਸਦ੍ਧਿਂ ਆਪਤ੍ਤਿਂ ਘਟੇਤ੍વਾ ਤਸ੍ਸ ਦੁਟ੍ਠੁਲ੍ਲਸ੍ਸ ਪਕਾਸਨੇ ਆਰੋਚਨੇ ਚ, ਤਸ੍ਸੇવ ਯੇਨ ਕੇਨਚਿ ਉਪਾਯੇਨ ਞਤ੍વਾ ਛਾਦਨੇ ਚ, ਅਦੁਟ੍ਠੁਲ੍ਲਾਰੋਚਨੇ ਛਾਦਨੇ ਚ, ਅਨੁਪਸਮ੍ਪਨ੍ਨਸ੍ਸ ਪਨ ਪੁਰਿਮਪਞ੍ਚਮਸਿਕ੍ਖਾਪਦੇ ਇਤਰਾ ਦੁਟ੍ਠੁਲ੍ਲੇਪਿ ਦੁਕ੍ਕਟਂ।
Duṭṭhullaṃ nāma pārājikasaṅghādisesā, idha pana saṅghādisesova. Pakāso ca chādo ca pakāsachādo, duṭṭhullassa pakāsachādoti tappuriso. Abhiṇhāpattikassa bhikkhuno āyatiṃ saṃvaratthāya āpattipariyantaṃ kulapariyantañca katvā vā akatvā vā tikkhattuṃ apaloketvā kātabbaṃ. Bhikkhusammutiṃ ṭhapetvā anupasampannassa ‘‘ayaṃ asuciṃ mocetvā saṅghādisesaṃ āpanno’’tiādinā nayena vatthunā saddhiṃ āpattiṃ ghaṭetvā tassa duṭṭhullassa pakāsane ārocane ca, tasseva yena kenaci upāyena ñatvā chādane ca, aduṭṭhullārocane chādane ca, anupasampannassa pana purimapañcamasikkhāpade itarā duṭṭhullepi dukkaṭaṃ.
ਹਾਸੋਦਕੇਤਿ ਏਤ੍ਥ ਹਾਸੇ ਉਦਕੇਤਿ ਪਦવਿਭਾਗੋ વੇਦਿਤਬ੍ਬੋ। ਯੇਨ ਕੇਨਚਿ ਸਰੀਰਾવਯવੇਨ ਹਸਾਧਿਪ੍ਪਾਯਸ੍ਸ ਉਪਕਚ੍ਛਕਾਦੀਸੁ ਹਾਸੇ ਫੁਸਨੇ। ਹਾਸਨਿਮਿਤ੍ਤਞ੍ਹਿ ਫੁਸਨਂ ਹਾਸੋ। ਅਨੁਪਸਮ੍ਪਨ੍ਨੇ ਦੁਕ੍ਕਟਂ। ਉਦਕੇ ਹਾਸੇਤਿ ਉਪਰਿਗੋਪ੍ਫਕੇ ਉਦਕੇ ਹਸਾਧਿਪ੍ਪਾਯਸ੍ਸ ਉਮ੍ਮੁਜ੍ਜਨਨਿਮੁਜ੍ਜਨੇਨ ਕੀਲ਼ਾਯ। ਕੀਲ਼ਾ ਹਿ ਇਧ ਹਾਸੋਤਿ વੁਤ੍ਤੋ। ਨਾવਾਯ ਕੀਲ਼ਤੋ, ਹਤ੍ਥਾਦਿਨਾ ਕਟ੍ਠਾਦਿਨਾ વਾ ਉਦਕਂ ਹਨਤੋ ਅਨ੍ਤਮਸੋ ਭਾਜਨਗਤਕਞ੍ਜਿਕਾਦੀਨਿਪਿ ਖਿਪਨਕੀਲ਼ਾਯ ਕੀਲ਼ਤੋ ਦੁਕ੍ਕਟਂ। ਅਹਸਾਧਿਪ੍ਪਾਯਸ੍ਸ ਅਨਾਪਤ੍ਤਿ।
Hāsodaketi ettha hāse udaketi padavibhāgo veditabbo. Yena kenaci sarīrāvayavena hasādhippāyassa upakacchakādīsu hāse phusane. Hāsanimittañhi phusanaṃ hāso. Anupasampanne dukkaṭaṃ. Udake hāseti uparigopphake udake hasādhippāyassa ummujjananimujjanena kīḷāya. Kīḷā hi idha hāsoti vutto. Nāvāya kīḷato, hatthādinā kaṭṭhādinā vā udakaṃ hanato antamaso bhājanagatakañjikādīnipi khipanakīḷāya kīḷato dukkaṭaṃ. Ahasādhippāyassa anāpatti.
ਨਿਚ੍ਛੁਭਨੇ વਿਹਾਰਾਤਿ ਸਙ੍ਘਿਕવਿਹਾਰਤੋ ਭਿਕ੍ਖੁਨੋ ਨਿਕ੍ਕਡ੍ਢਨਨਿਕ੍ਕਡ੍ਢਾਪਨੇ। ਏਤ੍ਥ ਚ ਏਕਪ੍ਪਯੋਗੇ ਏਕਾ, ਨਾਨਾਪਯੋਗੇ ਦ੍વਾਰਗਣਨਾਯ ਆਪਤ੍ਤਿਯੋ। ਪੁਗ੍ਗਲਿਕਨਿਕ੍ਕਡ੍ਢਨੇ, ਤਸ੍ਸ ਪਰਿਕ੍ਖਾਰਨਿਕ੍ਕਡ੍ਢਨੇ, ਅਨੁਪਸਮ੍ਪਨ੍ਨਸ੍ਸ ਪਨ ਤਸ੍ਸ ਪਰਿਕ੍ਖਾਰਸ੍ਸ વਾ ਨਿਕ੍ਕਡ੍ਢਨੇ ਦੁਕ੍ਕਟਂ। ਨ ਸਮ੍ਮਾવਤ੍ਤਨ੍ਤਾਨਂ ਅਨ੍ਤੇવਾਸਿਕਸਦ੍ਧਿવਿਹਾਰਿਕਾਨਂ વਾ ਨਿਕ੍ਕਡ੍ਢਨੇ, ਅਤ੍ਤਨੋ વਿਸ੍ਸਾਸਿਕਸ੍ਸ વਿਹਾਰਾ ਨਿਕ੍ਕਡ੍ਢਨੇ, ਭਣ੍ਡਨਕਾਰਕਸ੍ਸ ਪਨ ਸਕਲਸਙ੍ਘਾਰਾਮਤੋ ਨਿਕ੍ਕਡ੍ਢਨੇ ਅਨਾਪਤ੍ਤਿ।
Nicchubhane vihārāti saṅghikavihārato bhikkhuno nikkaḍḍhananikkaḍḍhāpane. Ettha ca ekappayoge ekā, nānāpayoge dvāragaṇanāya āpattiyo. Puggalikanikkaḍḍhane, tassa parikkhāranikkaḍḍhane, anupasampannassa pana tassa parikkhārassa vā nikkaḍḍhane dukkaṭaṃ. Na sammāvattantānaṃ antevāsikasaddhivihārikānaṃ vā nikkaḍḍhane, attano vissāsikassa vihārā nikkaḍḍhane, bhaṇḍanakārakassa pana sakalasaṅghārāmato nikkaḍḍhane anāpatti.
ਅਨੁਪਖਜ੍ਜ ਸਯਨੇਤਿ ‘‘વੁਡ੍ਢੋ, ਗਿਲਾਨੋ, ਸਙ੍ਘੇਨ ਦਿਨ੍ਨੋ’’ਤਿ ਜਾਨਿਤ੍વਾ ਮਞ੍ਚਪੀਠਾਨਂ વਾ ਤਸ੍ਸ ਭਿਕ੍ਖੁਨੋ ਪવਿਸਨ੍ਤਸ੍ਸ વਾ ਨਿਕ੍ਖਮਨ੍ਤਸ੍ਸ વਾ ਉਪਚਾਰਂ ਅਨੁਪਖਜ੍ਜ ਅਨੁਪવਿਸਿਤ੍વਾ ਸਙ੍ਘਿਕੇ વਿਹਾਰੇ ‘‘ਯਸ੍ਸ ਸਮ੍ਬਾਧੋ ਭવਿਸ੍ਸਤਿ, ਸੋ ਪਕ੍ਕਮਿਸ੍ਸਤੀ’’ਤਿ ਅਧਿਪ੍ਪਾਯੇਨ ਨਿਸੀਦਨਨਿਸਜ੍ਜਨવਸੇਨ ਸਯਨੇ। ਪੁਗ੍ਗਲਿਕੇ ਦੁਕ੍ਕਟਂ।
Anupakhajja sayaneti ‘‘vuḍḍho, gilāno, saṅghena dinno’’ti jānitvā mañcapīṭhānaṃ vā tassa bhikkhuno pavisantassa vā nikkhamantassa vā upacāraṃ anupakhajja anupavisitvā saṅghike vihāre ‘‘yassa sambādho bhavissati, so pakkamissatī’’ti adhippāyena nisīdananisajjanavasena sayane. Puggalike dukkaṭaṃ.
ਏਤ੍ਥ ਚ ਪਾਚਿਤ੍ਤੀਤਿ ਉਦ੍ਦਿਸਿਤ੍વਾ ਕਾਨਿਚਿ ਪਸਿਦ੍ਧਾਨਿ ਦਸ੍ਸਿਤਾਨਿ। ਅવੁਤ੍ਤਾਨਿ ਪਨ ਤਾਦਿਸਾਨਿ ਇਮਿਨਾવ ਸਾਮਞ੍ਞવਚਨੇਨ ਸਙ੍ਗਹੇਤ੍વਾ વੇਦਿਤਬ੍ਬਾਨਿ। ਕਥਂ? ਅਚੇਲਕਾਦਿਅਞ੍ਞਤਿਤ੍ਥਿਯਾਨਂ ਯਸ੍ਸ ਕਸ੍ਸਚਿ ਆਮਿਸਸ੍ਸ ਸਹਤ੍ਥਾ ਦਾਨੇ ਚ, ਸਪ੍ਪਿਨવਨੀਤਤੇਲਮਧੁਫਾਣਿਤਮਚ੍ਛਮਂਸਖੀਰਦਧਿਸਙ੍ਖਾਤਾਨਂ ਪਣੀਤਭੋਜਨਾਨਂ ਅਤ੍ਤਨੋ ਅਤ੍ਥਾਯ વਿਞ੍ਞਾਪੇਤ੍વਾ ਭੁਞ੍ਜਨੇ, ਰਾਗਪਰਿਯੁਟ੍ਠਿਤਇਤ੍ਥਿਪੁਰਿਸਸ੍ਸ ਯੋਗ੍ਗੇ ਕੁਲੇ ਅਨੁਪવਿਸਿਤ੍વਾ ਨਿਸਜ੍ਜਨਕਪ੍ਪਨੇ, ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਨਿਮਨ੍ਤਿਤੋ ਤਸ੍ਮਿਂ ਭੁਤ੍ਤੇ વਾ ਅਭੁਤ੍ਤੇ વਾ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਿਤ੍વਾ ਪੁਰੇਭਤ੍ਤਂ ਪਚ੍ਛਾਭਤ੍ਤਂ વਾ ਯਸ੍ਮਿਂ ਕੁਲੇ ਨਿਮਨ੍ਤਿਤੋ, ਤਤੋ ਗਿਲਾਨਚੀવਰਦਾਨਕਾਰਸਮਯਂ ਠਪੇਤ੍વਾ ਅਞ੍ਞਸ੍ਮਿਂ ਅਞ੍ਞਕੁਲਪ੍ਪવੇਸਨੇ, ਠਪੇਤ੍વਾ ਏਕਦਿવਸਂ ਅਞ੍ਞਸ੍ਮਿਂ ਦਿਨੇ ਆવਸਥਪਿਣ੍ਡਸ੍ਸ ਅਗਿਲਾਨੇਨ ਹੁਤ੍વਾ ਭੁਞ੍ਜਨੇ, ਰਤ੍ਤਿਪਰਿਚ੍ਛੇਦਂ વਾ ਭੇਸਜ੍ਜਪਰਿਚ੍ਛੇਦਂ વਾ ਕਤ੍વਾ ਪવਾਰਿਤਤੋ ਉਤ੍ਤਰਿ ਅਞ੍ਞਤ੍ਰ ਪੁਨ ਪવਾਰਣਾਯ ਅਞ੍ਞਤ੍ਰ ਨਿਚ੍ਚਪ੍ਪવਾਰਣਾਯ વਿਞ੍ਞਾਪਨੇ, ਅਞ੍ਞਤ੍ਰ ਤਥਾਰੂਪਪਚ੍ਚਯਾ ਗਾਮਤੋ ਨਿਕ੍ਖਨ੍ਤਸੇਨਾਦਸ੍ਸਨਾਯ ਗਮਨੇ, ਪਚ੍ਚਯੇਨਪਿ ਗਨ੍ਤ੍વਾ ਤਿਰਤ੍ਤਤੋ ਉਤ੍ਤਰਿ ਸੇਨਾਯ વਾਸੇ, ਤਸ੍ਸ ਚ વਸਨ੍ਤਸ੍ਸ ਯੁਦ੍ਧਟ੍ਠਾਨਬਲਗਣਟ੍ਠਾਨਸੇਨਾਨਿવੇਸਅਨੀਕਦਸ੍ਸਨਤ੍ਥਂ ਗਮਨੇ, ਪਿਟ੍ਠਾਦੀਹਿ ਕਤਮਜ੍ਜਸਙ੍ਖਾਤਸੁਰਾਯ, ਪੁਪ੍ਫਾਦੀਹਿ ਕਤਆਸવਸਙ੍ਖਾਤਮੇਰਯਸ੍ਸ ਚ ਪਾਨੇ, ਪਦੀਪੁਜ੍ਜਲਪਤ੍ਤਪਚਨਾਦਿਕਾਰਣਂ વਿਨਾ વਿਸਿਬ੍ਬਿਤੁਕਾਮਤਾਯ ਅਗਿਲਾਨਸ੍ਸ ਅਗ੍ਗਿਨੋ ਜਾਲਨਜਾਲਾਪਨੇ, ਕਪ੍ਪਬਿਨ੍ਦੁਂ ਅਨਾਦਾਯ ਨવਚੀવਰਪਰਿਭੋਗੇ, ਸਾਮਂ ਚੀવਰਂ વਿਕਪ੍ਪੇਤ੍વਾ ਅਪਚ੍ਚੁਦ੍ਧਾਯ ਪਰਿਭੋਗੇ, ਭਿਕ੍ਖੁਸਨ੍ਤਕਪਤ੍ਤਾਦਿਨੋ ਅਨ੍ਤਮਸੋ ਹਸਾਧਿਪ੍ਪਾਯੇਨਪਿ ਅਪਨਿਧਾਨੇ ਅਪਨਿਧਾਪਨੇ, ਸਞ੍ਚਿਚ੍ਚ ਤਿਰਚ੍ਛਾਨਗਤਸ੍ਸ ਜੀવਿਤવੋਰੋਪਨੇ, ਸਞ੍ਚਿਚ੍ਚ ਯਥਾਧਮ੍ਮਂ ਨਿਹਤਾਧਿਕਰਣਸ੍ਸ ਪੁਨਕਮ੍ਮਾਯ ਉਕ੍ਕੋਟਨੇ, ਸਞ੍ਚਿਚ੍ਚ ਥੇਯ੍ਯਸਤ੍ਥੇਨ ਸਦ੍ਧਿਂ ਸਂવਿਧਾਯ ਏਕਦ੍ਧਾਨਗਮਨੇ, ਭਿਕ੍ਖੂਹਿ ਸਿਕ੍ਖਾਪਦੇਹਿ વੁਚ੍ਚਮਾਨਸ੍ਸ ਅਞ੍ਞਂ ਅવਿਚਾਰੇਤ੍વਾ ‘‘ਨ ਤਤ੍ਥ ਸਿਕ੍ਖਿਸ੍ਸਾਮੀ’’ਤਿ ਭਣਨੇ, ਸਿਕ੍ਖਾਪਦવਿવਣ੍ਣਨੇ, ਇਮੇਸਂ ‘‘ਸੁਤ੍વਾ ਓਰਮਿਸ੍ਸਾਮੀ’’ਤਿ ਅਧਿਪ੍ਪਾਯਂ વਿਨਾ વਿવਾਦਾਪਨ੍ਨਾਨਂ ਉਪਸ੍ਸੁਤਿਟ੍ਠਾਨੇ, ਧਮ੍ਮਿਕਾਨਂ ਕਮ੍ਮਾਨਂ ਛਨ੍ਦਂ ਦਤ੍વਾ ਪਚ੍ਛਾ ਖੀਯਨਧਮ੍ਮਾਪਜ੍ਜਨੇ, ਸਙ੍ਘੇ વਿਨਿਚ੍ਛਯੇ વਤ੍ਤਮਾਨੇ ਛਨ੍ਦਂ ਅਦਤ੍વਾ ਪਕ੍ਕਮਨੇ, ਸਮਗ੍ਗੇਨ ਸਙ੍ਘੇਨ ਚੀવਰਂ ਦਤ੍વਾ ਪਚ੍ਛਾ ਖੀਯਨਧਮ੍ਮਾਪਜ੍ਜਨੇ, ਅਞ੍ਞਤ੍ਰ ਅਜ੍ਝਾਰਾਮਾ ਅਜ੍ਝਾવਸਥਾ વਾ ਰਤਨਸ੍ਸ વਾ ਰਤਨਸਮ੍ਮਤਸ੍ਸ વਾ ਉਗ੍ਗਣ੍ਹਨਉਗ੍ਗਹਾਪਨੇ ਪਾਚਿਤ੍ਤਿਯਨ੍ਤਿ।
Ettha ca pācittīti uddisitvā kānici pasiddhāni dassitāni. Avuttāni pana tādisāni imināva sāmaññavacanena saṅgahetvā veditabbāni. Kathaṃ? Acelakādiaññatitthiyānaṃ yassa kassaci āmisassa sahatthā dāne ca, sappinavanītatelamadhuphāṇitamacchamaṃsakhīradadhisaṅkhātānaṃ paṇītabhojanānaṃ attano atthāya viññāpetvā bhuñjane, rāgapariyuṭṭhitaitthipurisassa yogge kule anupavisitvā nisajjanakappane, pañcannaṃ bhojanānaṃ aññatarena nimantito tasmiṃ bhutte vā abhutte vā santaṃ bhikkhuṃ anāpucchitvā purebhattaṃ pacchābhattaṃ vā yasmiṃ kule nimantito, tato gilānacīvaradānakārasamayaṃ ṭhapetvā aññasmiṃ aññakulappavesane, ṭhapetvā ekadivasaṃ aññasmiṃ dine āvasathapiṇḍassa agilānena hutvā bhuñjane, rattiparicchedaṃ vā bhesajjaparicchedaṃ vā katvā pavāritato uttari aññatra puna pavāraṇāya aññatra niccappavāraṇāya viññāpane, aññatra tathārūpapaccayā gāmato nikkhantasenādassanāya gamane, paccayenapi gantvā tirattato uttari senāya vāse, tassa ca vasantassa yuddhaṭṭhānabalagaṇaṭṭhānasenānivesaanīkadassanatthaṃ gamane, piṭṭhādīhi katamajjasaṅkhātasurāya, pupphādīhi kataāsavasaṅkhātamerayassa ca pāne, padīpujjalapattapacanādikāraṇaṃ vinā visibbitukāmatāya agilānassa aggino jālanajālāpane, kappabinduṃ anādāya navacīvaraparibhoge, sāmaṃ cīvaraṃ vikappetvā apaccuddhāya paribhoge, bhikkhusantakapattādino antamaso hasādhippāyenapi apanidhāne apanidhāpane, sañcicca tiracchānagatassa jīvitavoropane, sañcicca yathādhammaṃ nihatādhikaraṇassa punakammāya ukkoṭane, sañcicca theyyasatthena saddhiṃ saṃvidhāya ekaddhānagamane, bhikkhūhi sikkhāpadehi vuccamānassa aññaṃ avicāretvā ‘‘na tattha sikkhissāmī’’ti bhaṇane, sikkhāpadavivaṇṇane, imesaṃ ‘‘sutvā oramissāmī’’ti adhippāyaṃ vinā vivādāpannānaṃ upassutiṭṭhāne, dhammikānaṃ kammānaṃ chandaṃ datvā pacchā khīyanadhammāpajjane, saṅghe vinicchaye vattamāne chandaṃ adatvā pakkamane, samaggena saṅghena cīvaraṃ datvā pacchā khīyanadhammāpajjane, aññatra ajjhārāmā ajjhāvasathā vā ratanassa vā ratanasammatassa vā uggaṇhanauggahāpane pācittiyanti.
ਪਾਚਿਤ੍ਤਿਯਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Pācittiyaniddesavaṇṇanā niṭṭhitā.
