| Library / Tipiṭaka / ਤਿਪਿਟਕ • Tipiṭaka / ਖੁਦ੍ਦਸਿਕ੍ਖਾ-ਮੂਲਸਿਕ੍ਖਾ • Khuddasikkhā-mūlasikkhā |
੪. ਪਾਚਿਤ੍ਤਿਯਨਿਦ੍ਦੇਸવਣ੍ਣਨਾ
4. Pācittiyaniddesavaṇṇanā
੩੦. ਇਦਾਨਿ ਪਾਚਿਤ੍ਤਿਯਂ ਦਸ੍ਸੇਤੁਂ ‘‘ਸਮ੍ਪਜਾਨਮੁਸਾવਾਦੇ’’ਤ੍ਯਾਦਿ ਆਰਦ੍ਧਂ। ਤਤ੍ਥ ਸਮ੍ਪਜਾਨਮੁਸਾવਾਦੇਤਿ ਨਿਮਿਤ੍ਤਤ੍ਥੇ ਭੁਮ੍ਮવਚਨਂ, ਤਸ੍ਮਾ ਯੋ ਭਿਕ੍ਖੁ ਸਮ੍ਪਜਾਨਨ੍ਤੋ ਮੁਸਾ વਦਤਿ, ਤਸ੍ਸ ਤਨ੍ਨਿਮਿਤ੍ਤਂ ਤਂਹੇਤੁ ਤਪ੍ਪਚ੍ਚਯਾ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ। ਭਿਕ੍ਖੁਞ੍ਚ ਓਮਸਨ੍ਤਸ੍ਸਾਤਿ ਜਾਤਿਨਾਮਗੋਤ੍ਤਕਮ੍ਮਸਿਪ੍ਪવਯਆਬਾਧਲਿਙ੍ਗਕਿਲੇਸਾਪਤ੍ਤਿਅਕ੍ਕੋਸੇਸੁ ਭੂਤੇਨ વਾ ਅਭੂਤੇਨ વਾ ਯੇਨ ਕੇਨਚਿ ਮੁਖਸਤ੍ਤਿਨਾ ਭਿਕ੍ਖੁਂ ਓવਿਜ੍ਝਨ੍ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ। ਪੇਸੁਞ੍ਞਹਰਣੇਪਿ ਚਾਤਿ ਭਿਕ੍ਖੁਸ੍ਸ ਪੇਸੁਞ੍ਞਹਰਣੇ, ਜਾਤਿਆਦੀਹਿ ਅਕ੍ਕੋਸવਤ੍ਥੂਹਿ ਭਿਕ੍ਖੁਂ ਅਕ੍ਕੋਸਨ੍ਤਸ੍ਸ ਭਿਕ੍ਖੁਨੋ ਸੁਤ੍વਾ ਭਿਕ੍ਖੁਨੋ ਪਿਯਕਮ੍ਯਤਾਯ વਾ ਭੇਦਾਧਿਪ੍ਪਾਯੇਨ વਾ ਯੋ ਅਕ੍ਕੁਦ੍ਧੋ, ਤਸ੍ਸ ਭਿਕ੍ਖੁਸ੍ਸ ਕਾਯੇਨ વਾ વਾਚਾਯ વਾ ਪੇਸੁਞ੍ਞਹਰਣવਚਨੇ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ।
30. Idāni pācittiyaṃ dassetuṃ ‘‘sampajānamusāvāde’’tyādi āraddhaṃ. Tattha sampajānamusāvādeti nimittatthe bhummavacanaṃ, tasmā yo bhikkhu sampajānanto musā vadati, tassa tannimittaṃ taṃhetu tappaccayā pācittiyaṃ udīritanti attho. Bhikkhuñca omasantassāti jātināmagottakammasippavayaābādhaliṅgakilesāpattiakkosesu bhūtena vā abhūtena vā yena kenaci mukhasattinā bhikkhuṃ ovijjhantassa bhikkhuno pācittiyaṃ udīritanti attho. Pesuññaharaṇepi cāti bhikkhussa pesuññaharaṇe, jātiādīhi akkosavatthūhi bhikkhuṃ akkosantassa bhikkhuno sutvā bhikkhuno piyakamyatāya vā bhedādhippāyena vā yo akkuddho, tassa bhikkhussa kāyena vā vācāya vā pesuññaharaṇavacane pācittiyaṃ udīritanti attho.
੩੧. ਸਙ੍ਗੀਤਿਤ੍ਤਯਮਾਰੁਲ਼੍ਹਂ ਪਿਟਕਤ੍ਤਯਂ ਧਮ੍ਮਂ ਭਿਕ੍ਖੁਞ੍ਚ ਭਿਕ੍ਖੁਨਿਞ੍ਚ ਠਪੇਤ੍વਾ ਅਞ੍ਞੇਨ ਪੁਗ੍ਗਲੇਨ ਸਦ੍ਧਿਂ ਏਕਤੋ ਪਦਂ ਪਦਂ ਭਣਨ੍ਤਸ੍ਸ ਭਿਕ੍ਖੁਨੋ ਪਦਗਣਨਾਯ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਸਮੁਦਾਯਤ੍ਥੋ।
31. Saṅgītittayamāruḷhaṃ piṭakattayaṃ dhammaṃ bhikkhuñca bhikkhuniñca ṭhapetvā aññena puggalena saddhiṃ ekato padaṃ padaṃ bhaṇantassa bhikkhuno padagaṇanāya pācittiyaṃ udīritanti samudāyattho.
੩੨. ਅਨੁਪਸਮ੍ਪਨ੍ਨੇਨੇવਾਤਿ ਭਿਕ੍ਖੁਂ ਠਪੇਤ੍વਾ ਅਨ੍ਤਮਸੋ ਪਾਰਾਜਿਕવਤ੍ਥੁਭੂਤੇਨ ਤਿਰਚ੍ਛਾਨਗਤੇਨਾਪਿ ਸਹ ਤਿਰਤ੍ਤਿਯਂ ਸਯਿਤ੍વਾ ਚਤੁਤ੍ਥਦਿવਸੇ ਅਤ੍ਥਙ੍ਗਤੇ ਸੂਰਿਯੇ ਪੁਨ ਸਹਸੇਯ੍ਯਾਯ ਪਾਚਿਤ੍ਤਿ ਸਿਯਾਤਿ ਸਮ੍ਬਨ੍ਧੋ। ਤਤ੍ਥ ਸਹਸੇਯ੍ਯਾਯਾਤਿ ਸਬ੍ਬਚ੍ਛਨ੍ਨਪਰਿਚ੍ਛਿਨ੍ਨੇ, ਯੇਭੁਯ੍ਯੇਨਚ੍ਛਨ੍ਨਪਰਿਚ੍ਛਿਨ੍ਨੇ વਾ ਸੇਨਾਸਨੇ ਪੁਬ੍ਬਾਪਰਿਯੇਨ વਾ ਏਕਕ੍ਖਣੇ વਾ ਏਕਤੋ ਨਿਸਜ੍ਜਨਾਯ। ਤਤ੍ਥ ਛਦਨਂ ਅਨਾਹਚ੍ਚ ਦਿਯਡ੍ਢਹਤ੍ਥੁਬ੍ਬੇਧੇਨ ਪਾਕਾਰਾਦਿਨਾ ਪਰਿਚ੍ਛਿਨ੍ਨਮ੍ਪਿ ਸਬ੍ਬਪਰਿਚ੍ਛਿਨ੍ਨਮਿਚ੍ਚੇવ વੇਦਿਤਬ੍ਬਂ।
32.Anupasampannenevāti bhikkhuṃ ṭhapetvā antamaso pārājikavatthubhūtena tiracchānagatenāpi saha tirattiyaṃ sayitvā catutthadivase atthaṅgate sūriye puna sahaseyyāya pācitti siyāti sambandho. Tattha sahaseyyāyāti sabbacchannaparicchinne, yebhuyyenacchannaparicchinne vā senāsane pubbāpariyena vā ekakkhaṇe vā ekato nisajjanāya. Tattha chadanaṃ anāhacca diyaḍḍhahatthubbedhena pākārādinā paricchinnampi sabbaparicchinnamicceva veditabbaṃ.
੩੩. ਏਕਰਤ੍ਤਮ੍ਪਿ ਇਤ੍ਥਿਯਾ ਸਦ੍ਧਿਂ ਸੇਯ੍ਯਂ ਕਪ੍ਪਯਤੋ ਤਸ੍ਸ ਭਿਕ੍ਖੁਨੋਪਿ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਤਤ੍ਥ ਇਤ੍ਥਿਯਾਤਿ ਅਨ੍ਤਮਸੋ ਤਦਹੁਜਾਤਾਯਪਿ ਮਨੁਸ੍ਸਿਤ੍ਥਿਯਾ। ਦੇਸੇਨ੍ਤਸ੍ਸ વਿਨਾ વਿਞ੍ਞੁਂ, ਧਮ੍ਮਞ੍ਚ ਛਪ੍ਪਦੁਤ੍ਤਰਿਨ੍ਤਿ વਿਞ੍ਞੁਂ ਪੁਰਿਸਂ વਿਨਾ ਇਤ੍ਥਿਯਾ ਛਪ੍ਪਦਤੋ ਉਤ੍ਤਰਿਂ ਧਮ੍ਮਂ ਦੇਸੇਨ੍ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਤਤ੍ਥ ‘‘ਛਪ੍ਪਦੁਤ੍ਤਰਿ’’ਨ੍ਤਿ ਏਤ੍ਥ ਏਕੋ ਗਾਥਾਪਾਦੋ ਏਕਂ ਪਦਨ੍ਤਿ ਏવਂ ਸਬ੍ਬਤ੍ਥ ਪਦਪ੍ਪਮਾਣਂ વੇਦਿਤਬ੍ਬਂ। ਛ ਪਦਾਨਿ ਛਪ੍ਪਦਂ, ਛਪ੍ਪਦਤੋ ਉਤ੍ਤਰਿਂ ਛਪ੍ਪਦੁਤ੍ਤਰਿਂ।
33. Ekarattampi itthiyā saddhiṃ seyyaṃ kappayato tassa bhikkhunopi pācitti siyāti attho. Tattha itthiyāti antamaso tadahujātāyapi manussitthiyā. Desentassa vinā viññuṃ, dhammañca chappaduttarinti viññuṃ purisaṃ vinā itthiyā chappadato uttariṃ dhammaṃ desentassa bhikkhuno pācitti siyāti attho. Tattha ‘‘chappaduttari’’nti ettha eko gāthāpādo ekaṃ padanti evaṃ sabbattha padappamāṇaṃ veditabbaṃ. Cha padāni chappadaṃ, chappadato uttariṃ chappaduttariṃ.
੩੪. ਭਿਕ੍ਖੁਸਮ੍ਮੁਤਿਂ ਠਪੇਤ੍વਾ ਭਿਕ੍ਖੁਨੋ ਦੁਟ੍ਠੁਲ੍ਲਂ વਜ੍ਜਂ ਅਭਿਕ੍ਖੁਨੋ વਦਨ੍ਤਸ੍ਸ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ। ਤਤ੍ਥ ਦੁਟ੍ਠੁਲ੍ਲਨ੍ਤਿ ਇਧ ਸਙ੍ਘਾਦਿਸੇਸਂ ਅਧਿਪ੍ਪੇਤਂ। ਭਿਕ੍ਖੁਸਮ੍ਮੁਤਿਯਾਤਿ ਯਂ ਸਙ੍ਘੋ ਅਭਿਣ੍ਹਾਪਤ੍ਤਿਕਸ੍ਸ ਭਿਕ੍ਖੁਨੋ ਆਯਤਿਂ ਸਂવਰਤ੍ਥਾਯ ਆਪਤ੍ਤੀਨਞ੍ਚ ਕੁਲਾਨਞ੍ਚ ਪਰਿਯਨ੍ਤਂ ਕਤ੍વਾ વਾ ਅਕਤ੍વਾ વਾ ਤਿਕ੍ਖਤ੍ਤੁਂ ਅਪਲੋਕੇਤ੍વਾ ਕਤਿਕਂ ਕਰੋਤਿ, ਤਂ ਠਪੇਤ੍વਾ। ਅਭਿਕ੍ਖੁਨੋਤਿ ਅਨੁਪਸਮ੍ਪਨ੍ਨਸ੍ਸ। વਦਨ੍ਤਸ੍ਸਾਤਿ ਆਰੋਚੇਨ੍ਤਸ੍ਸ।
34. Bhikkhusammutiṃ ṭhapetvā bhikkhuno duṭṭhullaṃ vajjaṃ abhikkhuno vadantassa pācittiyaṃ udīritanti attho. Tattha duṭṭhullanti idha saṅghādisesaṃ adhippetaṃ. Bhikkhusammutiyāti yaṃ saṅgho abhiṇhāpattikassa bhikkhuno āyatiṃ saṃvaratthāya āpattīnañca kulānañca pariyantaṃ katvā vā akatvā vā tikkhattuṃ apaloketvā katikaṃ karoti, taṃ ṭhapetvā. Abhikkhunoti anupasampannassa. Vadantassāti ārocentassa.
੩੫. ਯੋ ਅਕਪ੍ਪਿਯਂ ਪਥવਿਂ ਖਣੇਯ੍ਯ વਾ ਖਣਾਪੇਯ੍ਯ વਾ, ਤਸ੍ਸ ਪਾਚਿਤ੍ਤਿਯਂ ਸਿਯਾ। ਤਤ੍ਥ ਅਕਪ੍ਪਿਯਨ੍ਤਿ ਉਦ੍ਧਨਪਚਨਾਦਿવਸੇਨ વਾ ਤਥਾ ਤਥਾ ਅਦਡ੍ਢਾ વਾ ਜਾਤਪਥવੀ વੁਚ੍ਚਤਿ। ਸਾ ਤਿવਿਧਾ ਸੁਦ੍ਧਮਿਸ੍ਸਪੁਞ੍ਜવਸੇਨ। ਤਤ੍ਥ ਸੁਦ੍ਧਪਥવੀ ਨਾਮ ਪਕਤਿਯਾ ਸੁਦ੍ਧਪਂਸੁ વਾ ਸੁਦ੍ਧਮਤ੍ਤਿਕਾ વਾ। ਮਿਸ੍ਸਪਥવੀ ਨਾਮ ਯਤ੍ਥ ਪਂਸੁਤੋ વਾ ਮਤ੍ਤਿਕਤੋ વਾ ਪਾਸਾਣਸਕ੍ਖਰਕਥਲਮਰੁਮ੍ਬવਾਲੁਕਾਸੁ ਅਞ੍ਞਤਰਸ੍ਸ ਤਤਿਯਭਾਗੋ ਹੋਤਿ। ਪੁਞ੍ਜਪਥવੀ ਨਾਮ ਅਤਿਰੇਕਚਾਤੁਮਾਸਂ ਓવਟ੍ਠੋ ਪਂਸੁਪੁਞ੍ਜੋ વਾ ਮਤ੍ਤਿਕਾਪੁਞ੍ਜੋ વਾ ਹੋਤਿ। વੁਤ੍ਤਲਕ੍ਖਣੇਨ ਪਨ ਮਿਸ੍ਸਕਪੁਞ੍ਜੋਪਿ ਪਿਟ੍ਠਿਪਾਸਾਣੇ ਠਿਤਸੁਖੁਮਰਜਮ੍ਪਿ ਚ ਦੇવੇ ਫੁਸਯਨ੍ਤੇ ਸਕਿਂ ਚੇ ਤਿਨ੍ਤਂ, ਚਾਤੁਮਾਸਚ੍ਚਯੇਨ ਤਿਨ੍ਤੋਕਾਸੋ ਪੁਞ੍ਜਪਥવੀਸਙ੍ਖਮੇવ ਗਚ੍ਛਤਿ। ਯੋ ਭਿਕ੍ਖੁ ਭੂਤਗਾਮਂ વਿਕੋਪੇਯ੍ਯ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਸਮ੍ਬਨ੍ਧੋ। ਤਤ੍ਥ ਭੂਤਗਾਮਨ੍ਤਿ ਭવਨ੍ਤਿ, ਅਭવੁਂ ਚਾਤਿ ਭੂਤਾ, ਜਾਯਨ੍ਤਿ વਡ੍ਢਨ੍ਤਿ ਜਾਤਾ વਡ੍ਢਿਤਾ ਚਾਤਿ ਅਤ੍ਥੋ, ਗਾਮੋਤਿ ਰਾਸਿ, ਭੂਤਾਨਂ ਗਾਮੋ, ਭੂਤਾ ਏવ વਾ ਗਾਮੋਤਿ ਭੂਤਗਾਮੋ, ਪਤਿਟ੍ਠਿਤਹਰਿਤਤਿਣਰੁਕ੍ਖਾਦੀਨਮੇਤਂ ਅਧਿવਚਨਂ। ਤਂ ਭੂਤਗਾਮਂ। વਿਕੋਪੇਯ੍ਯਾਤਿ ਛੇਦਨਭੇਦਨਾਦੀਨਿ ਕਰੇਯ੍ਯ।
35. Yo akappiyaṃ pathaviṃ khaṇeyya vā khaṇāpeyya vā, tassa pācittiyaṃ siyā. Tattha akappiyanti uddhanapacanādivasena vā tathā tathā adaḍḍhā vā jātapathavī vuccati. Sā tividhā suddhamissapuñjavasena. Tattha suddhapathavī nāma pakatiyā suddhapaṃsu vā suddhamattikā vā. Missapathavī nāma yattha paṃsuto vā mattikato vā pāsāṇasakkharakathalamarumbavālukāsu aññatarassa tatiyabhāgo hoti. Puñjapathavī nāma atirekacātumāsaṃ ovaṭṭho paṃsupuñjo vā mattikāpuñjo vā hoti. Vuttalakkhaṇena pana missakapuñjopi piṭṭhipāsāṇe ṭhitasukhumarajampi ca deve phusayante sakiṃ ce tintaṃ, cātumāsaccayena tintokāso puñjapathavīsaṅkhameva gacchati. Yo bhikkhu bhūtagāmaṃ vikopeyya, tassa pācittiyaṃ siyāti sambandho. Tattha bhūtagāmanti bhavanti, abhavuṃ cāti bhūtā, jāyanti vaḍḍhanti jātā vaḍḍhitā cāti attho, gāmoti rāsi, bhūtānaṃ gāmo, bhūtā eva vā gāmoti bhūtagāmo, patiṭṭhitaharitatiṇarukkhādīnametaṃ adhivacanaṃ. Taṃ bhūtagāmaṃ. Vikopeyyāti chedanabhedanādīni kareyya.
੩੬. ਯੋ ਭਿਕ੍ਖੁ ਸਙ੍ਘਿਕਂ ਮਞ੍ਚਾਦਿਂ ਅਜ੍ਝੋਕਾਸੇ ਸਨ੍ਥਰਣਾਦਿਕਂ ਕਤ੍વਾ ਆਪੁਚ੍ਛਨਾਦਿਕਂ ਅਕਤ੍વਾ ਯਾਤਿ, ਤਸ੍ਸ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਤਤ੍ਥ ਸਙ੍ਘਿਕਨ੍ਤਿ ਸਙ੍ਘਸ੍ਸ ਸਨ੍ਤਕਂ। ਮਞ੍ਚਾਦਿਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਪੀਠਭਿਸਿਕੋਚ੍ਛਾਦਿਂ ਸਙ੍ਗਣ੍ਹਾਤਿ। ਸਨ੍ਥਰਣਾਦਿਕਨ੍ਤਿ ਸਨ੍ਥਰਣਾਦਿਂ ਕਤ੍વਾ વਾ ਕਾਰਾਪੇਤ੍વਾ વਾ। ਆਪੁਚ੍ਛਨਾਦਿਕਨ੍ਤਿ ਆਪੁਚ੍ਛਨਂ વਾ ਉਦ੍ਧਰਣਂ વਾ ਉਦ੍ਧਰਾਪਨਂ વਾਤਿ ਅਤ੍ਥੋ। ਯਾਤੀਤਿ ਗਚ੍ਛਤਿ।
36. Yo bhikkhu saṅghikaṃ mañcādiṃ ajjhokāse santharaṇādikaṃ katvā āpucchanādikaṃ akatvā yāti, tassa pācitti siyāti attho. Tattha saṅghikanti saṅghassa santakaṃ. Mañcādinti ettha ādi-saddena pīṭhabhisikocchādiṃ saṅgaṇhāti. Santharaṇādikanti santharaṇādiṃ katvā vā kārāpetvā vā. Āpucchanādikanti āpucchanaṃ vā uddharaṇaṃ vā uddharāpanaṃ vāti attho. Yātīti gacchati.
੩੭. ਯੋ ਭਿਕ੍ਖੁ ਸਙ੍ਘਿਕਾવਸਥੇ ਸੇਯ੍ਯਂ ਸਨ੍ਥਰਣਾਦਿਕਂ ਕਤ੍વਾ ਆਪੁਚ੍ਛਨਾਦਿਕਂ ਅਕਤ੍વਾ ਯਾਤਿ, ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਤਤ੍ਥ ਸਙ੍ਘਿਕਾવਸਥੇਤਿ ਸਙ੍ਘਸ੍ਸ ਸਨ੍ਤਕੇ ਆવਸਥੇ વਿਹਾਰੇ ਗਬ੍ਭੇ વਾ ਅਞ੍ਞਸ੍ਮਿਂ વਾ ਸਬ੍ਬਪਰਿਚ੍ਛਿਨ੍ਨੇ ਗੁਤ੍ਤਸੇਨਾਸਨੇ। ਸੇਯ੍ਯਨ੍ਤਿ ਭਿਸਿ ਚਿਮਿਲਿਕਾ ਪਾવੁਰਣਂ ਉਤ੍ਤਰਤ੍ਥਰਣਂ ਭੂਮਤ੍ਥਰਣਂ ਤਟ੍ਟਿਕਾ ਚਮ੍ਮਕ੍ਖਣ੍ਡਂ ਨਿਸੀਦਨਂ ਪਚ੍ਚਤ੍ਥਰਣਂ ਤਿਣਸਨ੍ਥਾਰੋ ਪਣ੍ਣਸਨ੍ਥਾਰੋਤਿ ਏવਮਾਦਿਕਂ। ਸਨ੍ਥਰਣਾਦਿਕਨ੍ਤਿ ਤੇਸੁ ਯੇਨ ਕੇਨਚਿ ਅਤ੍ਥਰਣਾਦਿਕਂ ਕਤ੍વਾ વਾ ਕਾਰਾਪੇਤ੍વਾ વਾ।
37. Yo bhikkhu saṅghikāvasathe seyyaṃ santharaṇādikaṃ katvā āpucchanādikaṃ akatvā yāti, tassa bhikkhuno pācitti siyāti attho. Tattha saṅghikāvasatheti saṅghassa santake āvasathe vihāre gabbhe vā aññasmiṃ vā sabbaparicchinne guttasenāsane. Seyyanti bhisi cimilikā pāvuraṇaṃ uttarattharaṇaṃ bhūmattharaṇaṃ taṭṭikā cammakkhaṇḍaṃ nisīdanaṃ paccattharaṇaṃ tiṇasanthāro paṇṇasanthāroti evamādikaṃ. Santharaṇādikanti tesu yena kenaci attharaṇādikaṃ katvā vā kārāpetvā vā.
੩੮-੯. ਯੋ ਪਨ ਭਿਕ੍ਖੁ ਜਾਨਂ ਸਪ੍ਪਾਣਕਂ ਤੋਯਂ ਪਰਿਭੁਞ੍ਜਯੇ, ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਯੋਜਨਾ। ਤਤ੍ਥ ਜਾਨਂ ਸਪ੍ਪਾਣਕਨ੍ਤਿ ‘‘ਸਪ੍ਪਾਣਕਮਿਦ’’ਨ੍ਤਿ ਦਿਸ੍વਾ વਾ ਸੁਤ੍વਾ વਾ ਯੇਨ ਕੇਨਚਿ ਆਕਾਰੇਨ ਜਾਨਨ੍ਤੋ। ਤੋਯਨ੍ਤਿ ਉਦਕਂ। ਪਰਿਭੁਞ੍ਜਯੇਤਿ ਪਰਿਭੁਞ੍ਜੇਯ੍ਯ। ਯੋ ਭਿਕ੍ਖੁ ਪਾਰਿવਤ੍ਤਕਂ ਠਪੇਤ੍વਾ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀવਰਂ ਦੇਤਿ, ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾ। ਚੀવਰਪ੍ਪਟਿਗ੍ਗਹਣਸਿਕ੍ਖਾਪਦੇ ਭਿਕ੍ਖੁ ਪਟਿਗ੍ਗਾਹਕੋ ਇਧ ਭਿਕ੍ਖੁਨੀ, ਅਯਂ વਿਸੇਸੋ। ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀવਰਂ ਸਿਬ੍ਬਤੋਪਿ ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਚੀવਰਨ੍ਤਿ ਨਿવਾਸਨਪਾਰੁਪਨੂਪਗਂ। ਸਿਬ੍ਬਤੋਤਿ ਸਯਂ ਸਿਬ੍ਬਨ੍ਤਸ੍ਸ ਸੂਚਿਂ ਪવੇਸੇਤ੍વਾ ਨੀਹਰਣੇ ਪਯੋਗਗਣਨਾਯ ਪਾਚਿਤ੍ਤਿ। ਸਿਬ੍ਬਾਪੇਨ੍ਤਸ੍ਸ ਪਨ ‘‘ਸਿਬ੍ਬਾ’’ਤਿ વੁਤ੍ਤੋ ਸਚੇਪਿ ਸਬ੍ਬਂ ਸੂਚਿਕਮ੍ਮਂ ਨਿਟ੍ਠਾਪੇਸਿ, ਏਕਮੇવ ਪਾਚਿਤ੍ਤਿ, ਆਣਤ੍ਤਸ੍ਸ ਪਯੋਗਗਣਨਾਯ ਪਾਚਿਤ੍ਤਿ ਹੋਤਿ। ਪવਾਰੇਤ੍વਾਨ ਅਤਿਰਿਤ੍ਤਂ ਅਕਾਰੇਤ੍વਾ ਭੁਞ੍ਜਤੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਤਤ੍ਰਾਯਂ વਿਨਿਚ੍ਛਯੋ – ਓਦਨੋ ਸਤ੍ਤੁ ਕੁਮ੍ਮਾਸੋ ਮਚ੍ਛੋ ਮਂਸਨ੍ਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਸਾਸਪਮਤ੍ਤਮ੍ਪਿ ਅਜ੍ਝੋਹਰਿਤ੍વਾ ਭੋਜਨਂ ਪਟਿਕ੍ਖੇਪਂ ਕਤ੍વਾ ਅਞ੍ਞੇਨ ਇਰਿਯਾਪਥੇਨ ‘‘ਅਲਮੇਤਂ ਸਬ੍ਬ’’ਨ੍ਤਿ ਅਤਿਰਿਤ੍ਤਂ ਅਕਾਰੇਤ੍વਾ ਪਰਿਭੁਞ੍ਜਤੋ ਪਾਚਿਤ੍ਤਿ ਹੋਤੀਤਿ।
38-9. Yo pana bhikkhu jānaṃ sappāṇakaṃ toyaṃ paribhuñjaye, tassa bhikkhuno pācitti siyāti yojanā. Tattha jānaṃsappāṇakanti ‘‘sappāṇakamida’’nti disvā vā sutvā vā yena kenaci ākārena jānanto. Toyanti udakaṃ. Paribhuñjayeti paribhuñjeyya. Yo bhikkhu pārivattakaṃ ṭhapetvā aññātikāya bhikkhuniyā cīvaraṃ deti, tassa bhikkhuno pācitti siyā. Cīvarappaṭiggahaṇasikkhāpade bhikkhu paṭiggāhako idha bhikkhunī, ayaṃ viseso. Aññātikāya bhikkhuniyā cīvaraṃ sibbatopi tassa bhikkhuno pācitti siyāti attho. Cīvaranti nivāsanapārupanūpagaṃ. Sibbatoti sayaṃ sibbantassa sūciṃ pavesetvā nīharaṇe payogagaṇanāya pācitti. Sibbāpentassa pana ‘‘sibbā’’ti vutto sacepi sabbaṃ sūcikammaṃ niṭṭhāpesi, ekameva pācitti, āṇattassa payogagaṇanāya pācitti hoti. Pavāretvāna atirittaṃ akāretvā bhuñjato pācitti siyāti attho. Tatrāyaṃ vinicchayo – odano sattu kummāso maccho maṃsanti pañcannaṃ bhojanānaṃ aññataraṃ sāsapamattampi ajjhoharitvā bhojanaṃ paṭikkhepaṃ katvā aññena iriyāpathena ‘‘alametaṃ sabba’’nti atirittaṃ akāretvā paribhuñjato pācitti hotīti.
੪੦. ਯੋ ਭਿਕ੍ਖੁ ਆਸਾਦਨਾਪੇਕ੍ਖੋ ਭੁਤ੍ਤਾવਿਂ ਪવਾਰਿਤਂ ਭਿਕ੍ਖੁਂ ‘‘ਹਨ੍ਦ, ਭਿਕ੍ਖੁ, ਖਾਦ વਾ ਭੁਞ੍ਜ વਾ’’ਤਿ ਅਨਤਿਰਿਤ੍ਤੇਨ ਪવਾਰੇਤਿ, ਭੋਜਨੇ ਭੁਤ੍ਤੇ ਤਸ੍ਸ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ। ਤਤ੍ਥ ਆਸਾਦਨਾਪੇਕ੍ਖੋਤਿ ਆਸਾਦਨਂ ਚੋਦਨਂ ਮਙ੍ਕੁਕਰਣਭਾવਂ ਅਪੇਕ੍ਖਮਾਨੋ।
40. Yo bhikkhu āsādanāpekkho bhuttāviṃ pavāritaṃ bhikkhuṃ ‘‘handa, bhikkhu, khāda vā bhuñja vā’’ti anatirittena pavāreti, bhojane bhutte tassa pācittiyaṃ udīritanti attho. Tattha āsādanāpekkhoti āsādanaṃ codanaṃ maṅkukaraṇabhāvaṃ apekkhamāno.
੪੧-੨. ਯੋ ਭਿਕ੍ਖੁ ਸਨ੍ਨਿਧਿਭੋਜਨਂ ਭੁਞ੍ਜੇਯ੍ਯ, ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਤਤ੍ਥ ਸਨ੍ਨਿਧਿਭੋਜਨਨ੍ਤਿ ਪਟਿਗ੍ਗਹੇਤ੍વਾ ਏਕਰਤ੍ਤਂ વੀਤਿਨਾਮਿਤਭੋਜਨਂ। વਿਕਾਲੇ ਯਾવਕਾਲਿਕਂ ਭੁਞ੍ਜਤੋ વਾਪਿ ਪਾਚਿਤ੍ਤਿ ਸਿਯਾਤਿ ਯੋਜਨਾ। ਤਤ੍ਥ વਿਕਾਲੇਤਿ વਿਗਤਕਾਲੇ, ਮਜ੍ਝਨ੍ਹਿਕਾਤਿਕ੍ਕਮਤੋ ਪਟ੍ਠਾਯ ਯਾવ ਅਰੁਣੁਗ੍ਗਮਨਾਤਿ ਅਤ੍ਥੋ। ਯਾવਕਾਲਿਕਨ੍ਤਿ વਨਮੂਲਫਲਾਦਿਕਂ ਆਮਿਸਭੋਜਨਂ। ਅਗਿਲਾਨੋ ਭਿਕ੍ਖੁ ਪਣੀਤਕਂ ਸਪ੍ਪਿਭਤ੍ਤਾਦਿਕਮ੍ਪਿ વਿਞ੍ਞਾਪੇਤ੍વਾਨ ਭੁਞ੍ਜੇਯ੍ਯ, ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਯੋਜਨਾ। ਤਤ੍ਥ ਅਗਿਲਾਨੋਤਿ ਕਲ੍ਲਕੋ। ਪਣੀਤਕਨ੍ਤਿ ਸਪ੍ਪਿਤੇਲਮਧੁਫਾਣਿਤਮਚ੍ਛਮਂਸਖੀਰਦਧਿਸਙ੍ਖਾਤੇਹਿ ਸਂਸਟ੍ਠਂ ਸਤ੍ਤਧਞ੍ਞਨਿਬ੍ਬਤ੍ਤਂ ਪਣੀਤਭੋਜਨਂ । ਯੋ ਭਿਕ੍ਖੁ ਦਨ੍ਤਕਟ੍ਠੋਦਕਂ વਜ੍ਜੇਤ੍વਾ ਅਪ੍ਪਟਿਗ੍ਗਹਿਤਕਂ ਭੁਞ੍ਜੇਯ੍ਯ, ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਤਤ੍ਥ ਅਪ੍ਪਟਿਗ੍ਗਹਿਤਨ੍ਤਿ ਕਾਯੇਨ વਾ ਕਾਯਪ੍ਪਟਿਬਦ੍ਧੇਨ વਾ ਗਣ੍ਹਨ੍ਤਸ੍ਸ ਹਤ੍ਥਪਾਸੇ ਠਤ੍વਾ ਕਾਯਕਾਯਪ੍ਪਟਿਬਦ੍ਧਨਿਸ੍ਸਗ੍ਗਿਯਾਨਂ ਅਞ੍ਞਤਰੇਨ ਨ ਦਿਨ੍ਨਂ ਅਪ੍ਪਟਿਗ੍ਗਹਿਤਂ ਨਾਮ।
41-2. Yo bhikkhu sannidhibhojanaṃ bhuñjeyya, tassa bhikkhuno pācitti siyāti attho. Tattha sannidhibhojananti paṭiggahetvā ekarattaṃ vītināmitabhojanaṃ. Vikāle yāvakālikaṃ bhuñjato vāpi pācitti siyāti yojanā. Tattha vikāleti vigatakāle, majjhanhikātikkamato paṭṭhāya yāva aruṇuggamanāti attho. Yāvakālikanti vanamūlaphalādikaṃ āmisabhojanaṃ. Agilāno bhikkhu paṇītakaṃ sappibhattādikampi viññāpetvāna bhuñjeyya, tassa bhikkhuno pācitti siyāti yojanā. Tattha agilānoti kallako. Paṇītakanti sappitelamadhuphāṇitamacchamaṃsakhīradadhisaṅkhātehi saṃsaṭṭhaṃ sattadhaññanibbattaṃ paṇītabhojanaṃ . Yo bhikkhu dantakaṭṭhodakaṃ vajjetvā appaṭiggahitakaṃ bhuñjeyya, pācitti siyāti attho. Tattha appaṭiggahitanti kāyena vā kāyappaṭibaddhena vā gaṇhantassa hatthapāse ṭhatvā kāyakāyappaṭibaddhanissaggiyānaṃ aññatarena na dinnaṃ appaṭiggahitaṃ nāma.
੪੩. ਯੋ ਭਿਕ੍ਖੁ ਤਿਤ੍ਥਿਯਸ੍ਸ ਸਹਤ੍ਥਤੋ ਕਿਞ੍ਚਿ ਭੁਞ੍ਜਿਤਬ੍ਬਂ ਦਦੇਯ੍ਯ, ਤਸ੍ਸ ਪਾਚਿਤ੍ਤਿ ਸਿਯਾਤਿ ਸਮ੍ਬਨ੍ਧੋ। ਤਤ੍ਥ ਤਿਤ੍ਥਿਯਸ੍ਸਾਤਿ ਅਞ੍ਞਤਿਤ੍ਥਿਯਸ੍ਸ। ਕਿਞ੍ਚਿ ਭੁਞ੍ਜਿਤਬ੍ਬਨ੍ਤਿ ਯਂ ਕਿਞ੍ਚਿ ਭੋਜਨੀਯਂ। ਸਹਤ੍ਥਤੋਤਿ ਸਹਤ੍ਥਾ। ਯੋ ਭਿਕ੍ਖੁ ਮਾਤੁਗਾਮੇਨ ਏਕਤੋ ਰਹੋ ਨਿਸਜ੍ਜਂ ਕਪ੍ਪੇਯ੍ਯ, ਤਸ੍ਸ ਪਾਚਿਤ੍ਤਿ ਸਿਯਾਤਿ ਸਮ੍ਬਨ੍ਧੋ। ਤਤ੍ਥ ਰਹੋਤਿ ਪਟਿਚ੍ਛਨ੍ਨੇ। ਕਪ੍ਪੇਤਿ ਕਪ੍ਪੇਯ੍ਯ। ਏਕਤੋਤਿ ਸਦ੍ਧਿਂ।
43. Yo bhikkhu titthiyassa sahatthato kiñci bhuñjitabbaṃ dadeyya, tassa pācitti siyāti sambandho. Tattha titthiyassāti aññatitthiyassa. Kiñci bhuñjitabbanti yaṃ kiñci bhojanīyaṃ. Sahatthatoti sahatthā. Yo bhikkhu mātugāmena ekato raho nisajjaṃ kappeyya, tassa pācitti siyāti sambandho. Tattha rahoti paṭicchanne. Kappeti kappeyya. Ekatoti saddhiṃ.
੪੪. ਸੁਰਾਮੇਰਯਪਾਨੇਪੀਤਿ ਏਤ੍ਥ ਪਿਟ੍ਠਾਦੀਹਿ ਕਤਂ ਮਜ੍ਜਂ ਸੁਰਾ। ਪੁਪ੍ਫਾਦੀਹਿ ਕਤੋ ਆਸવੋ ਮੇਰਯਂ। ਯੋ ਭਿਕ੍ਖੁ ਤਦੁਭਯਮ੍ਪਿ ਬੀਜਤੋ ਪਟ੍ਠਾਯ ਕੁਸਗ੍ਗੇਨਾਪਿ ਪਿવਤਿ, ਤਸ੍ਸ ਤਪ੍ਪਾਨਪਚ੍ਚਯਾ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ। ਅਙ੍ਗੁਲਿਪਤੋਦਕੇ ਚਾਪੀਤਿ ਅਙ੍ਗੁਲੀਹਿ ਉਪਕਚ੍ਛਕਾਦੀਨਂ ਘਟ੍ਟਨਪਚ੍ਚਯਾ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਹਸਧਮ੍ਮੇਪਿ ਚੋਦਕੇਤਿ ਉਪਰਿਗੋਪ੍ਫਕੇ ਉਦਕੇ ਹਸਧਮ੍ਮੇ ਕੀਲ਼ਾਨਿਮਿਤ੍ਤਂ ਤਸ੍ਸ ਪਾਚਿਤ੍ਤਿ ਸਿਯਾਤਿ ਅਤ੍ਥੋ।
44.Surāmerayapānepīti ettha piṭṭhādīhi kataṃ majjaṃ surā. Pupphādīhi kato āsavo merayaṃ. Yo bhikkhu tadubhayampi bījato paṭṭhāya kusaggenāpi pivati, tassa tappānapaccayā pācittiyaṃ udīritanti attho. Aṅgulipatodake cāpīti aṅgulīhi upakacchakādīnaṃ ghaṭṭanapaccayā pācitti siyāti attho. Hasadhammepi codaketi uparigopphake udake hasadhamme kīḷānimittaṃ tassa pācitti siyāti attho.
੪੫. ਅਨਾਦਰੇਪਿ ਪਾਚਿਤ੍ਤੀਤਿ ਪੁਗ੍ਗਲਸ੍ਸ વਾ ਧਮ੍ਮਸ੍ਸ વਾ ਅਨਾਦਰਕਰਣੇਪਿ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਯੋ ਭਿਕ੍ਖੁ ਉਪਸਮ੍ਪਨ੍ਨੇਨ ਪਞ੍ਞਤ੍ਤੇਨ વੁਚ੍ਚਮਾਨੋ ਤਸ੍ਸ વਾ વਚਨਂ ਅਕਤ੍ਤੁਕਾਮਤਾਯ, ਤਂ વਾ ਧਮ੍ਮਂ ਅਸਿਕ੍ਖਿਤੁਕਾਮਤਾਯ ਅਨਾਦਰਿਯਂ ਕਰੋਤਿ, ਤਸ੍ਸ ਤਸ੍ਮਿਂ ਅਨਾਦਰਿਯੇ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਭਯਾਨਕਂ ਕਥਂ ਕਤ੍વਾ વਾ ਭਯਾਨਕਂ ਰੂਪਂ ਦਸ੍ਸੇਤ੍વਾ વਾ ਭਿਕ੍ਖੁਂ ਭੀਸਯਤੋਪਿ ਪਾਚਿਤ੍ਤਿ ਸਿਯਾਤਿ ਅਤ੍ਥੋ।
45.Anādarepi pācittīti puggalassa vā dhammassa vā anādarakaraṇepi pācitti siyāti attho. Yo bhikkhu upasampannena paññattena vuccamāno tassa vā vacanaṃ akattukāmatāya, taṃ vā dhammaṃ asikkhitukāmatāya anādariyaṃ karoti, tassa tasmiṃ anādariye pācitti siyāti attho. Bhayānakaṃ kathaṃ katvā vā bhayānakaṃ rūpaṃ dassetvā vā bhikkhuṃ bhīsayatopi pācitti siyāti attho.
੪੬. ਯੋ ਭਿਕ੍ਖੁ ਅਗਿਲਾਨੋ ਕਿਞ੍ਚਿ ਪਚ੍ਚਯਂ ਠਪੇਤ੍વਾ ਜੋਤਿਂ ਜਲੇਯ੍ਯ વਾ ਜਲਾਪੇਯ੍ਯ વਾ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਸਮ੍ਬਨ੍ਧੋ। ਤਤ੍ਥ ਕਿਞ੍ਚਿ ਪਚ੍ਚਯਨ੍ਤਿ ਪਦੀਪੁਜ੍ਜਲਨਂ વਾ ਪਤ੍ਤਪਚਨਾਦੀਸੁ ਜੋਤਿਕਰਣਂ વਾਤਿ ਏવਰੂਪਂ ਪਚ੍ਚਯਂ ਠਪੇਤ੍વਾ। ਜੋਤਿਨ੍ਤਿ ਅਗ੍ਗਿਂ।
46. Yo bhikkhu agilāno kiñci paccayaṃ ṭhapetvā jotiṃ jaleyya vā jalāpeyya vā, tassa pācittiyaṃ siyāti sambandho. Tattha kiñci paccayanti padīpujjalanaṃ vā pattapacanādīsu jotikaraṇaṃ vāti evarūpaṃ paccayaṃ ṭhapetvā. Jotinti aggiṃ.
੪੭-੮. ਕਪ੍ਪਬਿਨ੍ਦੁਂ ਅਨਾਦਾਯ ਨવਚੀવਰਭੋਗਿਨੋ ਨવਂ ਚੀવਰਂ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਕਪ੍ਪਬਿਨ੍ਦੁਨ੍ਤਿ ਮੋਰਕ੍ਖਿਮਣ੍ਡਲਮਙ੍ਗੁਲਪਿਟ੍ਠੀਨਂ ਅਞ੍ਞਤਰਪ੍ਪਮਾਣਂ ਕਪ੍ਪਬਿਨ੍ਦੁਂ। ਅਨਾਦਾਯਾਤਿ ਅਨਾਦਿਯਿਤ੍વਾ। ਭਿਕ੍ਖੁਨੋ ਚੀવਰਾਦਿਕਂ ਪਰਿਕ੍ਖਾਰਂ ਅਪਨੇਤ੍વਾ ਨਿਧੇਨ੍ਤਸ੍ਸ વਾ ਨਿਧਾਪੇਨ੍ਤਸ੍ਸ વਾ ਹਸਾਪੇਕ੍ਖਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ। ਚੀવਰਾਦਿਕਨ੍ਤਿ ਆਦਿ-ਸਦ੍ਦੇਨ ਪਤ੍ਤਨਿਸੀਦਨਸੂਚਿਘਰਕਾਯਬਨ੍ਧਨਾਦਿਂ ਸਙ੍ਗਣ੍ਹਾਤਿ। ਨਿਧੇਨ੍ਤਸ੍ਸਾਤਿ ਨਿਦਹਨ੍ਤਸ੍ਸ। ਹਸਾਪੇਕ੍ਖਸ੍ਸਾਤਿ ਹਸਾਧਿਪ੍ਪਾਯਸ੍ਸ। ਜਾਨਂ ਪਾਣਂ ਹਨੇ ਭਿਕ੍ਖੁ, ਤਿਰਚ੍ਛਾਨਗਤਮ੍ਪਿ ਚਾਤਿ ਯੋ ਭਿਕ੍ਖੁ ‘‘ਪਾਣੋ’’ਤਿ ਜਾਨਨ੍ਤੋ ਤਿਰਚ੍ਛਾਨਗਤਂ ਪਾਣਂ ਖੁਦ੍ਦਕਮ੍ਪਿ ਮਹਨ੍ਤਮ੍ਪਿ ਹਨੇਯ੍ਯ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ।
47-8. Kappabinduṃ anādāya navacīvarabhogino navaṃ cīvaraṃ bhuñjantassa pācitti siyāti attho. Kappabindunti morakkhimaṇḍalamaṅgulapiṭṭhīnaṃ aññatarappamāṇaṃ kappabinduṃ. Anādāyāti anādiyitvā. Bhikkhuno cīvarādikaṃ parikkhāraṃ apanetvā nidhentassa vā nidhāpentassa vā hasāpekkhassa bhikkhuno pācitti siyāti attho. Cīvarādikanti ādi-saddena pattanisīdanasūcigharakāyabandhanādiṃ saṅgaṇhāti. Nidhentassāti nidahantassa. Hasāpekkhassāti hasādhippāyassa. Jānaṃ pāṇaṃ hane bhikkhu, tiracchānagatampi cāti yo bhikkhu ‘‘pāṇo’’ti jānanto tiracchānagataṃ pāṇaṃ khuddakampi mahantampi haneyya, tassa pācittiyaṃ siyāti attho.
੪੯. ਛਾਦੇਤੁਕਾਮੋ ਛਾਦੇਤਿ, ਦੁਟ੍ਠੁਲ੍ਲਂ ਭਿਕ੍ਖੁਨੋਪਿ ਚਾਤਿ ਯੋ ਭਿਕ੍ਖੁ ਭਿਕ੍ਖੁਨੋ ਦੁਟ੍ਠੁਲ੍ਲਸਙ੍ਖਾਤਂ ਸਙ੍ਘਾਦਿਸੇਸਂ ਛਾਦੇਤੁਕਾਮੋ ਹੁਤ੍વਾ ਛਾਦੇਤਿ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ। ਇਤ੍ਥਿਯਾ ਸਹ ਸਂવਿਧਾਯ ਗਾਮਨ੍ਤਰਗਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ।
49.Chādetukāmo chādeti, duṭṭhullaṃ bhikkhunopi cāti yo bhikkhu bhikkhuno duṭṭhullasaṅkhātaṃ saṅghādisesaṃ chādetukāmo hutvā chādeti, tassa pācittiyaṃ siyāti attho. Itthiyā saha saṃvidhāya gāmantaragatassa bhikkhuno pācittiyaṃ siyāti yojanā.
੫੦. ਭਿਕ੍ਖੁਂ વਾ ਪਹਰੇਯ੍ਯਾਥਾਤਿ ਯੋ ਭਿਕ੍ਖੁ ਭਿਕ੍ਖੁਂ ਪਹਰੇਯ੍ਯ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ। ਤਲਸਤ੍ਤਿਕਮੁਗ੍ਗਿਰੇਤਿ ਯੋ ਭਿਕ੍ਖੁ ਪਹਰਣਾਕਾਰਂ ਦਸ੍ਸੇਨ੍ਤੋ ਕਾਯਂ વਾ ਕਾਯਪ੍ਪਟਿਬਦ੍ਧਂ વਾ ਉਗ੍ਗਿਰੇਯ੍ਯ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ। ਚੋਦੇਯ੍ਯ વਾ ਚੋਦਾਪੇਯ੍ਯ, ਭਿਕ੍ਖੁਂ ਅਮੂਲਕੇਨ ਚਾਤਿ ਯੋ ਭਿਕ੍ਖੁ ਭਿਕ੍ਖੁਂ ਅਮੂਲਕੇਨ ਸਙ੍ਘਾਦਿਸੇਸੇਨ ਚੋਦੇਯ੍ਯ વਾ ਚੋਦਾਪੇਯ੍ਯ વਾ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ। ਤਤ੍ਥ ਅਮੂਲਕੇਨਾਤਿ ਦਿਟ੍ਠਾਦਿਮੂਲવਿਰਹਿਤੇਨ।
50.Bhikkhuṃvā pahareyyāthāti yo bhikkhu bhikkhuṃ pahareyya, tassa pācittiyaṃ siyāti yojanā. Talasattikamuggireti yo bhikkhu paharaṇākāraṃ dassento kāyaṃ vā kāyappaṭibaddhaṃ vā uggireyya, tassa pācittiyaṃ siyāti attho. Codeyya vā codāpeyya, bhikkhuṃ amūlakena cāti yo bhikkhu bhikkhuṃ amūlakena saṅghādisesena codeyya vā codāpeyya vā, tassa pācittiyaṃ siyāti attho. Tattha amūlakenāti diṭṭhādimūlavirahitena.
੫੧. ਕੁਕ੍ਕੁਚ੍ਚੁਪ੍ਪਾਦਨੇ ਚਾਪੀਤਿ ‘‘ਊਨવੀਸਤਿવਸ੍ਸੋ ਤ੍વਂ ਮਞ੍ਞੇ’’ਤਿਆਦੀਨਿ ਭਣਨ੍ਤੋ ਕੁਕ੍ਕੁਚ੍ਚਂ ਉਪ੍ਪਾਦੇਯ੍ਯ, ਤਸ੍ਸ ਕੁਕ੍ਕੁਚ੍ਚੁਪ੍ਪਾਦਨਪਚ੍ਚਯਾ ਪਾਚਿਤ੍ਤਿਯਂ ਹੋਤਿ। ਯੋ ਭਿਕ੍ਖੁ ਭਣ੍ਡਨਤ੍ਥਾਯ ਭਣ੍ਡਨਜਾਤਾਨਂ વਚਨਂ ਸੋਤੁਂ ਉਪਸ੍ਸੁਤਿਂ ਯਾਤਿ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਸਮ੍ਬਨ੍ਧੋ। ਤਤ੍ਥ ਭਣ੍ਡਨਤ੍ਥਾਯਾਤਿ ਕਲਹਤ੍ਥਾਯ। ਭਣ੍ਡਨਜਾਤਾਨਨ੍ਤਿ ਕਲਹਜਾਤਾਨਂ। ਉਪਸ੍ਸੁਤਿਨ੍ਤਿ ਸੁਤਿਸਮੀਪਂ।
51.Kukkuccuppādane cāpīti ‘‘ūnavīsativasso tvaṃ maññe’’tiādīni bhaṇanto kukkuccaṃ uppādeyya, tassa kukkuccuppādanapaccayā pācittiyaṃ hoti. Yo bhikkhu bhaṇḍanatthāya bhaṇḍanajātānaṃ vacanaṃ sotuṃ upassutiṃ yāti, tassa pācittiyaṃ siyāti sambandho. Tattha bhaṇḍanatthāyāti kalahatthāya. Bhaṇḍanajātānanti kalahajātānaṃ. Upassutinti sutisamīpaṃ.
੫੨. ਯੋ ਭਿਕ੍ਖੁ ਸਙ੍ਘਸ੍ਸ ਪਰਿਣਾਮਿਤਂ ਯਂ ਲਾਭਂ, ਤਂ ਪਰਪੁਗ੍ਗਲਸ੍ਸ ਨਾਮੇਤਿ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਸਮ੍ਬਨ੍ਧੋ। ਤਤ੍ਥ ਨਾਮੇਤੀਤਿ ਪਰਿਣਾਮੇਤਿ। ਪੁਚ੍ਛਂ ਅਕਤ੍વਾਤਿ ‘‘વਿਕਾਲੇ ਗਾਮਪ੍ਪવੇਸਨਂ ਆਪੁਚ੍ਛਾਮੀ’’ਤਿ વਾ ‘‘ਗਾਮਂ ਪવਿਸਿਸ੍ਸਾਮੀ’’ਤਿ વਾ ਅਨਾਪੁਚ੍ਛਿਤ੍વਾ। ਸਨ੍ਤਭਿਕ੍ਖੁਨ੍ਤਿ ਅਨ੍ਤੋਉਪਚਾਰਸੀਮਾਯ ਦਸ੍ਸਨੂਪਚਾਰੇ ਭਿਕ੍ਖੁਂ ਦਿਸ੍વਾ ਯਂ ਸਕ੍ਕਾ ਹੋਤਿ ਪਕਤਿવਚਨੇਨ ਆਪੁਚ੍ਛਿਤੁਂ, ਤਾਦਿਸਂ વਿਜ੍ਜਮਾਨਂ ਭਿਕ੍ਖੁਂ। ਗਾਮਸ੍ਸਾਤਿ ਗਾਮਂ, ਕਮ੍ਮਤ੍ਥੇ ਸਾਮਿવਚਨਂ। ਗਤੇਤਿ ਸਮ੍ਪਦਾਨਤ੍ਥੇ ਭੁਮ੍ਮવਚਨਂ, ਗਤਸ੍ਸਾਤਿ ਅਤ੍ਥੋ। ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਿਤ੍વਾ વਿਕਾਲੇ ਗਾਮਂ ਗਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ। ਸੇਸਂ ਉਤ੍ਤਾਨਮੇવਾਤਿ।
52. Yo bhikkhu saṅghassa pariṇāmitaṃ yaṃ lābhaṃ, taṃ parapuggalassa nāmeti, tassa pācittiyaṃ siyāti sambandho. Tattha nāmetīti pariṇāmeti. Pucchaṃ akatvāti ‘‘vikāle gāmappavesanaṃ āpucchāmī’’ti vā ‘‘gāmaṃ pavisissāmī’’ti vā anāpucchitvā. Santabhikkhunti antoupacārasīmāya dassanūpacāre bhikkhuṃ disvā yaṃ sakkā hoti pakativacanena āpucchituṃ, tādisaṃ vijjamānaṃ bhikkhuṃ. Gāmassāti gāmaṃ, kammatthe sāmivacanaṃ. Gateti sampadānatthe bhummavacanaṃ, gatassāti attho. Santaṃ bhikkhuṃ anāpucchitvā vikāle gāmaṃ gatassa bhikkhuno pācittiyaṃ siyāti attho. Sesaṃ uttānamevāti.
ਪਾਚਿਤ੍ਤਿਯਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Pācittiyaniddesavaṇṇanā niṭṭhitā.
