| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
(3) பாசித்தியவண்ணனா
(3) Pācittiyavaṇṇanā
476. பஞ்ச பாசித்தியானீதி பஞ்ச பே⁴ஸஜ்ஜானி படிக்³க³ஹெத்வா நானாபா⁴ஜனேஸு வா ஏகபா⁴ஜனே வா அமிஸ்ஸெத்வா ட²பிதானி ஹொந்தி, ஸத்தாஹாதிக்கமே ஸோ பி⁴க்கு² பஞ்ச பாசித்தியானி ஸப்³பா³னி நானாவத்து²கானி ஏகக்க²ணே ஆபஜ்ஜதி, ‘‘இமங் பட²மங் ஆபன்னோ, இமங் பச்சா²’’தி ந வத்தப்³போ³.
476.Pañca pācittiyānīti pañca bhesajjāni paṭiggahetvā nānābhājanesu vā ekabhājane vā amissetvā ṭhapitāni honti, sattāhātikkame so bhikkhu pañca pācittiyāni sabbāni nānāvatthukāni ekakkhaṇe āpajjati, ‘‘imaṃ paṭhamaṃ āpanno, imaṃ pacchā’’ti na vattabbo.
நவ பாசித்தியானீதி யோ பி⁴க்கு² நவ பணீதபோ⁴ஜனானி விஞ்ஞாபெத்வா தேஹி ஸத்³தி⁴ங் ஏகதோ ஏகங் கப³ளங் ஓமத்³தி³த்வா முகே² பக்கி²பித்வா பரக³ளங் அதிக்காமேதி, அயங் நவ பாசித்தியானி ஸப்³பா³னி நானாவத்து²கானி ஏகக்க²ணே ஆபஜ்ஜதி ‘‘இமங் பட²மங் ஆபன்னோ, இமங் பச்சா²’’தி ந வத்தப்³போ³. ஏகவாசாய தே³ஸெய்யாதி ‘‘அஹங், ப⁴ந்தே, பஞ்ச பே⁴ஸஜ்ஜானி படிக்³க³ஹெத்வா ஸத்தாஹங் அதிக்காமெத்வா பஞ்ச ஆபத்தியோ ஆபன்னோ, தா தும்ஹமூலே படிதே³ஸேமீ’’தி ஏவங் ஏகவாசாய தே³ஸெய்ய, தே³ஸிதாவ ஹொந்தி, த்³வீஹி தீஹி வாசாஹி கிச்சங் நாம நத்தி². து³தியவிஸ்ஸஜ்ஜனேபி ‘‘அஹங், ப⁴ந்தே, நவ பணீதபோ⁴ஜனானி விஞ்ஞாபெத்வா பு⁴ஞ்ஜித்வா நவ ஆபத்தியோ ஆபன்னோ, தா தும்ஹமூலே படிதே³ஸேமீ’’தி வத்தப்³ப³ங்.
Nava pācittiyānīti yo bhikkhu nava paṇītabhojanāni viññāpetvā tehi saddhiṃ ekato ekaṃ kabaḷaṃ omadditvā mukhe pakkhipitvā paragaḷaṃ atikkāmeti, ayaṃ nava pācittiyāni sabbāni nānāvatthukāni ekakkhaṇe āpajjati ‘‘imaṃ paṭhamaṃ āpanno, imaṃ pacchā’’ti na vattabbo. Ekavācāya deseyyāti ‘‘ahaṃ, bhante, pañca bhesajjāni paṭiggahetvā sattāhaṃ atikkāmetvā pañca āpattiyo āpanno, tā tumhamūle paṭidesemī’’ti evaṃ ekavācāya deseyya, desitāva honti, dvīhi tīhi vācāhi kiccaṃ nāma natthi. Dutiyavissajjanepi ‘‘ahaṃ, bhante, nava paṇītabhojanāni viññāpetvā bhuñjitvā nava āpattiyo āpanno, tā tumhamūle paṭidesemī’’ti vattabbaṃ.
வத்து²ங் கித்தெத்வா தே³ஸெய்யாதி ‘‘அஹங், ப⁴ந்தே, பஞ்ச பே⁴ஸஜ்ஜானி படிக்³க³ஹெத்வா ஸத்தாஹங் அதிக்காமேஸிங், யதா²வத்து²கங் தங் தும்ஹமூலே படிதே³ஸேமீ’’தி ஏவங் வத்து²ங் கித்தெத்வா தே³ஸெய்ய, தே³ஸிதாவ ஹொந்தி ஆபத்தியோ, ஆபத்தியா நாமக்³க³ஹணேன கிச்சங் நத்தி². து³தியவிஸ்ஸஜ்ஜனேபி ‘‘அஹங், ப⁴ந்தே, நவ பணீதபோ⁴ஜனானி விஞ்ஞாபெத்வா பு⁴த்தோ, யதா²வத்து²கங் தங் தும்ஹமூலே படிதே³ஸேமீ’’தி வத்தப்³ப³ங்.
Vatthuṃ kittetvā deseyyāti ‘‘ahaṃ, bhante, pañca bhesajjāni paṭiggahetvā sattāhaṃ atikkāmesiṃ, yathāvatthukaṃ taṃ tumhamūle paṭidesemī’’ti evaṃ vatthuṃ kittetvā deseyya, desitāva honti āpattiyo, āpattiyā nāmaggahaṇena kiccaṃ natthi. Dutiyavissajjanepi ‘‘ahaṃ, bhante, nava paṇītabhojanāni viññāpetvā bhutto, yathāvatthukaṃ taṃ tumhamūle paṭidesemī’’ti vattabbaṃ.
யாவததியகே திஸ்ஸோதி உக்கி²த்தானுவத்திகாய பாராஜிகங் பே⁴த³கானுவத்தகானங் கோகாலிகாதீ³னங் ஸங்கா⁴தி³ஸேஸங், பாபிகாய தி³ட்டி²யா அப்படினிஸ்ஸக்³கே³ சண்ட³காளிகாய ச பி⁴க்கு²னியா பாசித்தியந்தி இமா யாவததியகா திஸ்ஸோ ஆபத்தியோ. ச² வோஹாரபச்சயாதி பயுத்தவாசாபச்சயா ச² ஆபத்தியோ ஆபஜ்ஜதீதி அத்தோ². கத²ங்? ஆஜீவஹேது ஆஜீவகாரணா பாபிச்சோ² இச்சா²பகதோ அஸந்தங் அபூ⁴தங் உத்தரிமனுஸ்ஸத⁴ம்மங் உல்லபதி, ஆபத்தி பாராஜிகஸ்ஸ. ஆஜீவஹேது ஆஜீவகாரணா ஸஞ்சரித்தங் ஸமாபஜ்ஜதி, ஆபத்தி ஸங்கா⁴தி³ஸேஸஸ்ஸ. ஆஜீவஹேது ஆஜீவகாரணா யோ தே விஹாரே வஸதி ஸோ அரஹாதி வத³தி, ஆபத்தி து²ல்லச்சயஸ்ஸ. ஆஜீவஹேது ஆஜீவகாரணா பி⁴க்கு² பணீதபோ⁴ஜனானி அத்தனோ அத்தா²ய விஞ்ஞாபெத்வா பு⁴ஞ்ஜதி, ஆபத்தி பாசித்தியஸ்ஸ. ஆஜீவஹேது ஆஜீவகாரணா பி⁴க்கு²னீ பணீதபோ⁴ஜனானி அத்தனோ அத்தா²ய விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. ஆஜீவஹேது ஆஜீவகாரணா ஸூபங் வா ஓத³னங் வா அகி³லானோ அத்தனோ அத்தா²ய விஞ்ஞாபெத்வா பு⁴ஞ்ஜதி, ஆபத்தி து³க்கடஸ்ஸாதி.
Yāvatatiyake tissoti ukkhittānuvattikāya pārājikaṃ bhedakānuvattakānaṃ kokālikādīnaṃ saṅghādisesaṃ, pāpikāya diṭṭhiyā appaṭinissagge caṇḍakāḷikāya ca bhikkhuniyā pācittiyanti imā yāvatatiyakā tisso āpattiyo. Cha vohārapaccayāti payuttavācāpaccayā cha āpattiyo āpajjatīti attho. Kathaṃ? Ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa. Ājīvahetu ājīvakāraṇā sañcarittaṃ samāpajjati, āpatti saṅghādisesassa. Ājīvahetu ājīvakāraṇā yo te vihāre vasati so arahāti vadati, āpatti thullaccayassa. Ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati, āpatti pācittiyassa. Ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati, āpatti pāṭidesanīyassa. Ājīvahetu ājīvakāraṇā sūpaṃ vā odanaṃ vā agilāno attano atthāya viññāpetvā bhuñjati, āpatti dukkaṭassāti.
கா²த³ந்தஸ்ஸ திஸ்ஸோதி மனுஸ்ஸமங்ஸே து²ல்லச்சயங், அவஸேஸேஸு அகப்பியமங்ஸேஸு து³க்கடங், பி⁴க்கு²னியா லஸுணே பாசித்தியங். பஞ்ச போ⁴ஜனபச்சயாதி அவஸ்ஸுதா அவஸ்ஸுதஸ்ஸ புரிஸஸ்ஸ ஹத்த²தோ போ⁴ஜனங் க³ஹெத்வா தத்தே²வ மனுஸ்ஸமங்ஸங் லஸுணங் அத்தனோ அத்தா²ய விஞ்ஞாபெத்வா க³ஹிதபணீதபோ⁴ஜனானி அவஸேஸஞ்ச அகப்பியமங்ஸங் பக்கி²பித்வா வோமிஸ்ஸகங் ஓமத்³தி³த்வா அஜ்ஜோ²ஹரமானா ஸங்கா⁴தி³ஸேஸங், து²ல்லச்சயங், பாசித்தியங், பாடிதே³ஸனீயங், து³க்கடந்தி இமா பஞ்ச ஆபத்தியோ போ⁴ஜனபச்சயா ஆபஜ்ஜதி.
Khādantassa tissoti manussamaṃse thullaccayaṃ, avasesesu akappiyamaṃsesu dukkaṭaṃ, bhikkhuniyā lasuṇe pācittiyaṃ. Pañca bhojanapaccayāti avassutā avassutassa purisassa hatthato bhojanaṃ gahetvā tattheva manussamaṃsaṃ lasuṇaṃ attano atthāya viññāpetvā gahitapaṇītabhojanāni avasesañca akappiyamaṃsaṃ pakkhipitvā vomissakaṃ omadditvā ajjhoharamānā saṅghādisesaṃ, thullaccayaṃ, pācittiyaṃ, pāṭidesanīyaṃ, dukkaṭanti imā pañca āpattiyo bhojanapaccayā āpajjati.
பஞ்ச டா²னானீதி ‘‘உக்கி²த்தானுவத்திகாய பி⁴க்கு²னியா யாவததியங் ஸமனுபா⁴ஸனாய அப்படினிஸ்ஸஜ்ஜந்தியா ஞத்தியா து³க்கடங், த்³வீஹி கம்மவாசாஹி து²ல்லச்சயங், கம்மவாசாபரியோஸானே ஆபத்தி பாராஜிகஸ்ஸ, ஸங்க⁴பே⁴தா³ய பரக்கமனாதீ³ஸு ஸங்கா⁴தி³ஸேஸோ, பாபிகாய தி³ட்டி²யா அப்படினிஸ்ஸக்³கே³ பாசித்திய’’ந்தி ஏவங் ஸப்³பா³ யாவததியகா பஞ்ச டா²னானி க³ச்ச²ந்தி. பஞ்சன்னஞ்சேவ ஆபத்தீதி ஆபத்தி நாம பஞ்சன்னங் ஸஹத⁴ம்மிகானங் ஹோதி, தத்த² த்³வின்னங் நிப்பரியாயேன ஆபத்தியேவ, ஸிக்கா²மானஸாமணேரிஸாமணேரானங் பன அகப்பியத்தா ந வட்டதி. இமினா பரியாயேன தேஸங் ஆபத்தி ந தே³ஸாபேதப்³பா³, த³ண்ட³கம்மங் பன தேஸங் காதப்³ப³ங். பஞ்சன்னங் அதி⁴கரணேன சாதி அதி⁴கரணஞ்ச பஞ்சன்னமேவாதி அத்தோ². ஏதேஸங்யேவ ஹி பஞ்சன்னங் பத்தசீவராதீ³னங் அத்தா²ய வினிச்ச²யவோஹாரோ அதி⁴கரணந்தி வுச்சதி, கி³ஹீனங் பன அட்³ட³கம்மங் நாம ஹோதி.
Pañca ṭhānānīti ‘‘ukkhittānuvattikāya bhikkhuniyā yāvatatiyaṃ samanubhāsanāya appaṭinissajjantiyā ñattiyā dukkaṭaṃ, dvīhi kammavācāhi thullaccayaṃ, kammavācāpariyosāne āpatti pārājikassa, saṅghabhedāya parakkamanādīsu saṅghādiseso, pāpikāya diṭṭhiyā appaṭinissagge pācittiya’’nti evaṃ sabbā yāvatatiyakā pañca ṭhānāni gacchanti. Pañcannañceva āpattīti āpatti nāma pañcannaṃ sahadhammikānaṃ hoti, tattha dvinnaṃ nippariyāyena āpattiyeva, sikkhāmānasāmaṇerisāmaṇerānaṃ pana akappiyattā na vaṭṭati. Iminā pariyāyena tesaṃ āpatti na desāpetabbā, daṇḍakammaṃ pana tesaṃ kātabbaṃ. Pañcannaṃ adhikaraṇena cāti adhikaraṇañca pañcannamevāti attho. Etesaṃyeva hi pañcannaṃ pattacīvarādīnaṃ atthāya vinicchayavohāro adhikaraṇanti vuccati, gihīnaṃ pana aḍḍakammaṃ nāma hoti.
பஞ்சன்னங் வினிச்ச²யோ ஹோதீதி பஞ்சன்னங் ஸஹத⁴ம்மிகானங்யேவ வினிச்ச²யோ நாம ஹோதி. பஞ்சன்னங் வூபஸமேன சாதி ஏதேஸங்யேவ பஞ்சன்னங் அதி⁴கரணங் வினிச்சி²தங் வூபஸந்தங் நாம ஹோதீதி அத்தோ². பஞ்சன்னஞ்சேவ அனாபத்தீதி ஏதேஸங்யேவ பஞ்சன்னங் அனாபத்தி நாம ஹோதீதி அத்தோ². தீஹி டா²னேஹி ஸோப⁴தீதி ஸங்கா⁴தீ³ஹி தீஹி காரணேஹி ஸோப⁴தி. கதவீதிக்கமோ ஹி புக்³க³லோ ஸப்படிகம்மங் ஆபத்திங் ஸங்க⁴மஜ்ஜே² க³ணமஜ்ஜே² புக்³க³லஸந்திகே வா படிகரித்வா அப்³பு⁴ண்ஹஸீலோ பாகதிகோ ஹோதி, தஸ்மா தீஹி டா²னேஹி ஸோப⁴தீதி வுச்சதி.
Pañcannaṃ vinicchayo hotīti pañcannaṃ sahadhammikānaṃyeva vinicchayo nāma hoti. Pañcannaṃ vūpasamena cāti etesaṃyeva pañcannaṃ adhikaraṇaṃ vinicchitaṃ vūpasantaṃ nāma hotīti attho. Pañcannañceva anāpattīti etesaṃyeva pañcannaṃ anāpatti nāma hotīti attho. Tīhi ṭhānehi sobhatīti saṅghādīhi tīhi kāraṇehi sobhati. Katavītikkamo hi puggalo sappaṭikammaṃ āpattiṃ saṅghamajjhe gaṇamajjhe puggalasantike vā paṭikaritvā abbhuṇhasīlo pākatiko hoti, tasmā tīhi ṭhānehi sobhatīti vuccati.
த்³வே காயிகா ரத்திந்தி பி⁴க்கு²னீ ரத்தந்த⁴காரே புரிஸஸ்ஸ ஹத்த²பாஸே டா²னநிஸஜ்ஜஸயனானி கப்பயமானா பாசித்தியங், ஹத்த²பாஸங் விஜஹித்வா டா²னாதீ³னி கப்பயமானா து³க்கடந்தி த்³வே காயத்³வாரஸம்ப⁴வா ஆபத்தியோ ரத்திங் ஆபஜ்ஜதி. த்³வே காயிகா தி³வாதி ஏதேனேவ உபாயேன தி³வா படிச்ச²ன்னே ஓகாஸே த்³வே ஆபத்தியோ ஆபஜ்ஜதி. நிஜ்ஜா²யந்தஸ்ஸ ஏகா ஆபத்தீதி ‘‘ந ச, பி⁴க்க²வே, ஸாரத்தேன மாதுகா³மஸ்ஸ அங்க³ஜாதங் உபனிஜ்ஜா²யிதப்³ப³ங் . யோ உபனிஜ்ஜா²யெய்ய, ஆபத்தி து³க்கடஸ்ஸா’’தி (பாரா॰ 266) நிஜ்ஜா²யந்தஸ்ஸ அயமேகா ஆபத்தி. ஏகா பிண்ட³பாதபச்சயாதி ‘‘ந ச, பி⁴க்க²வே, பி⁴க்கா²தா³யிகாய முக²ங் ஓலோகேதப்³ப³’’ந்தி (சூளவ॰ 366) எத்த² து³க்கடாபத்தி, அந்தமஸோ யாகு³ங் வா ப்³யஞ்ஜனங் வா தெ³ந்தஸ்ஸ ஸாமணேரஸ்ஸாபி ஹி முக²ங் உல்லோகயதோ து³க்கடமேவ. குருந்தி³யங் பன ‘‘ஏகா பிண்ட³பாதபச்சயாதி பி⁴க்கு²னிபரிபாசிதங் பிண்ட³பாதங் பு⁴ஞ்ஜந்தஸ்ஸ பாசித்திய’’ந்தி வுத்தங்.
Dve kāyikā rattinti bhikkhunī rattandhakāre purisassa hatthapāse ṭhānanisajjasayanāni kappayamānā pācittiyaṃ, hatthapāsaṃ vijahitvā ṭhānādīni kappayamānā dukkaṭanti dve kāyadvārasambhavā āpattiyo rattiṃ āpajjati. Dve kāyikā divāti eteneva upāyena divā paṭicchanne okāse dve āpattiyo āpajjati. Nijjhāyantassa ekā āpattīti ‘‘na ca, bhikkhave, sārattena mātugāmassa aṅgajātaṃ upanijjhāyitabbaṃ . Yo upanijjhāyeyya, āpatti dukkaṭassā’’ti (pārā. 266) nijjhāyantassa ayamekā āpatti. Ekā piṇḍapātapaccayāti ‘‘na ca, bhikkhave, bhikkhādāyikāya mukhaṃ oloketabba’’nti (cūḷava. 366) ettha dukkaṭāpatti, antamaso yāguṃ vā byañjanaṃ vā dentassa sāmaṇerassāpi hi mukhaṃ ullokayato dukkaṭameva. Kurundiyaṃ pana ‘‘ekā piṇḍapātapaccayāti bhikkhuniparipācitaṃ piṇḍapātaṃ bhuñjantassa pācittiya’’nti vuttaṃ.
அட்டா²னிஸங்ஸே ஸம்பஸ்ஸந்தி கோஸம்ப³கக்க²ந்த⁴கே வுத்தானிஸங்ஸே. உக்கி²த்தகா தயோ வுத்தாதி ஆபத்தியா அத³ஸ்ஸனே அப்படிகம்மே பாபிகாய ச தி³ட்டி²யா அப்படினிஸ்ஸக்³கே³தி. தேசத்தாலீஸ ஸம்மாவத்தனாதி தேஸங்யேவ உக்கி²த்தகானங் எத்தகேஸு வத்தேஸு வத்தனா.
Aṭṭhānisaṃse sampassanti kosambakakkhandhake vuttānisaṃse. Ukkhittakā tayo vuttāti āpattiyā adassane appaṭikamme pāpikāya ca diṭṭhiyā appaṭinissaggeti. Tecattālīsa sammāvattanāti tesaṃyeva ukkhittakānaṃ ettakesu vattesu vattanā.
பஞ்சடா²னே முஸாவாதோ³தி பாராஜிகஸங்கா⁴தி³ஸேஸது²ல்லச்சயபாசித்தியது³க்கடஸங்கா²தே பஞ்சட்டா²னே முஸாவாதோ³ க³ச்ச²தி. சுத்³த³ஸ பரமந்தி வுச்சதீதி த³ஸாஹபரமாதி³னயேன ஹெட்டா² வுத்தங். த்³வாத³ஸ பாடிதே³ஸனீயாதி பி⁴க்கூ²னங் சத்தாரி பி⁴க்கு²னீனங் அட்ட². சதுன்னங் தே³ஸனாய சாதி சதுன்னங் அச்சயதே³ஸனாயாதி அத்தோ². கதமா பன ஸாதி? தே³வத³த்தேன பயோஜிதானங் அபி⁴மாரானங் அச்சயதே³ஸனா, அனுருத்³த⁴த்தே²ரஸ்ஸ உபட்டா²யிகாய அச்சயதே³ஸனா, வட்³ட⁴ஸ்ஸ லிச்ச²வினோ அச்சயதே³ஸனா, வாஸப⁴கா³மியத்தே²ரஸ்ஸ உக்கே²பனீயகம்மங் கத்வா ஆக³தானங் பி⁴க்கூ²னங் அச்சயதே³ஸனாதி அயங் சதுன்னங் அச்சயதே³ஸனா நாம.
Pañcaṭhāne musāvādoti pārājikasaṅghādisesathullaccayapācittiyadukkaṭasaṅkhāte pañcaṭṭhāne musāvādo gacchati. Cuddasa paramanti vuccatīti dasāhaparamādinayena heṭṭhā vuttaṃ. Dvādasa pāṭidesanīyāti bhikkhūnaṃ cattāri bhikkhunīnaṃ aṭṭha. Catunnaṃ desanāya cāti catunnaṃ accayadesanāyāti attho. Katamā pana sāti? Devadattena payojitānaṃ abhimārānaṃ accayadesanā, anuruddhattherassa upaṭṭhāyikāya accayadesanā, vaḍḍhassa licchavino accayadesanā, vāsabhagāmiyattherassa ukkhepanīyakammaṃ katvā āgatānaṃ bhikkhūnaṃ accayadesanāti ayaṃ catunnaṃ accayadesanā nāma.
அட்ட²ங்கி³கோ முஸாவாதோ³தி ‘‘புப்³பே³வஸ்ஸ ஹோதி முஸா ப⁴ணிஸ்ஸ’’ந்தி ஆதி³ங் கத்வா ‘‘வினிதா⁴ய ஸஞ்ஞ’’ந்தி பரியோஸானேஹி (பாசி॰ 4-5; பரி॰ 459) அட்ட²ஹி அங்கே³ஹி அட்ட²ங்கி³கோ. உபோஸத²ங்கா³னிபி பாணங் ந ஹனேதிஆதி³னா நயேன வுத்தானேவ. அட்ட² தூ³தெய்யங்கா³னீதி ‘‘இத⁴, பி⁴க்க²வே, பி⁴க்கு² ஸோதா ச ஹோதி ஸாவேதா சா’’திஆதி³னா (சூளவ॰ 347) நயேன ஸங்க⁴பே⁴த³கே வுத்தானி. அட்ட² தித்தி²யவத்தானி மஹாக²ந்த⁴கே வுத்தானி.
Aṭṭhaṅgiko musāvādoti ‘‘pubbevassa hoti musā bhaṇissa’’nti ādiṃ katvā ‘‘vinidhāya sañña’’nti pariyosānehi (pāci. 4-5; pari. 459) aṭṭhahi aṅgehi aṭṭhaṅgiko. Uposathaṅgānipi pāṇaṃ na hanetiādinā nayena vuttāneva. Aṭṭha dūteyyaṅgānīti ‘‘idha, bhikkhave, bhikkhu sotā ca hoti sāvetā cā’’tiādinā (cūḷava. 347) nayena saṅghabhedake vuttāni. Aṭṭha titthiyavattāni mahākhandhake vuttāni.
அட்ட²வாசிகா உபஸம்பதா³தி பி⁴க்கு²னீனங் உபஸம்பத³ங் ஸந்தா⁴ய வுத்தங். அட்ட²ன்னங் பச்சுட்டா²தப்³ப³ந்தி ப⁴த்தக்³கே³ அட்ட²ன்னங் பி⁴க்கு²னீனங் இதராஹி பச்சுட்டா²ய ஆஸனங் தா³தப்³ப³ங் . பி⁴க்கு²னோவாத³கோ அட்ட²ஹீதி அட்ட²ஹங்கே³ஹி ஸமன்னாக³தோ பி⁴க்கு² பி⁴க்கு²னோவாத³கோ ஸம்மன்னிதப்³போ³.
Aṭṭhavācikā upasampadāti bhikkhunīnaṃ upasampadaṃ sandhāya vuttaṃ. Aṭṭhannaṃ paccuṭṭhātabbanti bhattagge aṭṭhannaṃ bhikkhunīnaṃ itarāhi paccuṭṭhāya āsanaṃ dātabbaṃ . Bhikkhunovādako aṭṭhahīti aṭṭhahaṅgehi samannāgato bhikkhu bhikkhunovādako sammannitabbo.
ஏகஸ்ஸ சே²ஜ்ஜந்தி கா³தா²ய நவஸு ஜனேஸு யோ ஸலாகங் கா³ஹெத்வா ஸங்க⁴ங் பி⁴ந்த³தி, தஸ்ஸேவ சே²ஜ்ஜங் ஹோதி, தே³வத³த்தோ விய பாராஜிகங் ஆபஜ்ஜதி. பே⁴த³கானுவத்தகானங் சதுன்னங் து²ல்லச்சயங் கோகாலிகாதீ³னங் விய, த⁴ம்மவாதீ³னங் சதுன்னங் அனாபத்தி. இமா பன ஆபத்தியோ ச அனாபத்தியோ ச ஸப்³பே³ஸங் ஏகவத்து²கா ஸங்க⁴பே⁴த³வத்து²கா ஏவ.
Ekassa chejjanti gāthāya navasu janesu yo salākaṃ gāhetvā saṅghaṃ bhindati, tasseva chejjaṃ hoti, devadatto viya pārājikaṃ āpajjati. Bhedakānuvattakānaṃ catunnaṃ thullaccayaṃ kokālikādīnaṃ viya, dhammavādīnaṃ catunnaṃ anāpatti. Imā pana āpattiyo ca anāpattiyo ca sabbesaṃ ekavatthukā saṅghabhedavatthukā eva.
நவ ஆகா⁴தவத்தூ²னீதி கா³தா²ய நவஹீதி நவஹி பி⁴க்கூ²ஹி ஸங்கோ⁴ பி⁴ஜ்ஜதி. ஞத்தியா கரணா நவாதி ஞத்தியா காதப்³பா³னி கம்மானி நவாதி அத்தோ². ஸேஸங் உத்தானமேவ.
Nava āghātavatthūnīti gāthāya navahīti navahi bhikkhūhi saṅgho bhijjati. Ñattiyā karaṇā navāti ñattiyā kātabbāni kammāni navāti attho. Sesaṃ uttānameva.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 3. பாசித்தியங் • 3. Pācittiyaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாசித்தியவண்ணனா • Pācittiyavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாசித்தியவண்ணனா • Pācittiyavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாசித்தியவண்ணனா • Pācittiyavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / (3) பாசித்தியவண்ணனா • (3) Pācittiyavaṇṇanā
