| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பாசித்தியவண்ணனா
Pācittiyavaṇṇanā
476. ஸப்³பா³னி நானாவத்து²கானீதி ஸப்பினவனீதாதீ³னங் பஞ்சன்னங் வத்தூ²னங் பே⁴தே³ன பாசித்தியானி பஞ்ச நானாவத்து²கானி. ஏஸ நயோ பணீதபோ⁴ஜனவிஸயே நவ பாசித்தியானீதிஆதீ³ஸுபி. ஏதேன பே⁴ஸஜ்ஜபணீதபோ⁴ஜனஸிக்கா²பதா³னி ஏகேகஸிக்கா²பத³வஸேன பஞ்ஞத்தானிபி வத்து²பே⁴தே³ன பச்சேகங் பஞ்சஸிக்கா²பத³னவஸிக்கா²பத³ஸதி³ஸானி பி⁴க்கு²னீனங் பாடிதே³ஸனீயாபத்தியோ வியாதி த³ஸ்ஸேதி. தேனேவ ‘‘நானாவத்து²கானீ’’தி வுத்தங். ஸப்பிங் ஏவ படிக்³க³ஹெத்வா அனேகபா⁴ஜனேஸு ட²பெத்வா ஸத்தாஹங் அதிக்காமெந்தஸ்ஸ பா⁴ஜனக³ணனாய ஸம்ப⁴வந்தியோ ப³ஹுகாபி ஆபத்தியோ ஏகவத்து²கா ஏவ ஹொந்தி, ஏவங் ஸப்பிபோ⁴ஜனமேவ ப³ஹூஸு டா²னேஸு விஞ்ஞாபெத்வா ஏகதோ வா விஸுங் விஸுமேவ வா பு⁴ஞ்ஜந்தஸ்ஸ ஆபத்தியோ ஏகவத்து²கா ஏவாதி த³ட்ட²ப்³பா³.
476.Sabbāninānāvatthukānīti sappinavanītādīnaṃ pañcannaṃ vatthūnaṃ bhedena pācittiyāni pañca nānāvatthukāni. Esa nayo paṇītabhojanavisaye nava pācittiyānītiādīsupi. Etena bhesajjapaṇītabhojanasikkhāpadāni ekekasikkhāpadavasena paññattānipi vatthubhedena paccekaṃ pañcasikkhāpadanavasikkhāpadasadisāni bhikkhunīnaṃ pāṭidesanīyāpattiyo viyāti dasseti. Teneva ‘‘nānāvatthukānī’’ti vuttaṃ. Sappiṃ eva paṭiggahetvā anekabhājanesu ṭhapetvā sattāhaṃ atikkāmentassa bhājanagaṇanāya sambhavantiyo bahukāpi āpattiyo ekavatthukā eva honti, evaṃ sappibhojanameva bahūsu ṭhānesu viññāpetvā ekato vā visuṃ visumeva vā bhuñjantassa āpattiyo ekavatthukā evāti daṭṭhabbā.
பாளியங் ஏகவாசாய தே³ஸெய்ய, வுத்தா ஆதி³ச்சப³ந்து⁴னாதி எத்த² ‘‘தே³ஸெய்யாதி வுத்தா’’தி இதி-ஸத்³த³ங் அஜ்ஜா²ஹரித்வா யோஜேதப்³ப³ங். ஏவங் ஸேஸேஸுபி.
Pāḷiyaṃ ekavācāya deseyya, vuttā ādiccabandhunāti ettha ‘‘deseyyāti vuttā’’ti iti-saddaṃ ajjhāharitvā yojetabbaṃ. Evaṃ sesesupi.
பே⁴தா³னுவத்தகானந்தி எத்த² ஆதி³-ஸத்³தோ³ லுத்தனித்³தி³ட்டோ². யாவததியகா ச ஸப்³பே³ உப⁴தோவிப⁴ங்கே³ ஆக³தா, ஸங்கா⁴தி³ஸேஸஸாமஞ்ஞேன ஏகங், பாசித்தியஸாமஞ்ஞேன ச ஏகங் கத்வா ‘‘யாவததியகே திஸ்ஸோ’’தி வுத்தந்தி த³ட்ட²ப்³ப³ங். எத்த² ச ஞத்தியா து³க்கடங், த்³வீஹி கம்மவாசாஹி து²ல்லச்சயாபி ஸந்தி ஏவ. தானி மாதிகாய ந ஆக³தானி. மாதிகாக³தவஸேன ஹெத்த² ‘‘திஸ்ஸோ’’தி வுத்தங்.
Bhedānuvattakānanti ettha ādi-saddo luttaniddiṭṭho. Yāvatatiyakā ca sabbe ubhatovibhaṅge āgatā, saṅghādisesasāmaññena ekaṃ, pācittiyasāmaññena ca ekaṃ katvā ‘‘yāvatatiyake tisso’’ti vuttanti daṭṭhabbaṃ. Ettha ca ñattiyā dukkaṭaṃ, dvīhi kammavācāhi thullaccayāpi santi eva. Tāni mātikāya na āgatāni. Mātikāgatavasena hettha ‘‘tisso’’ti vuttaṃ.
ஸங்கா⁴தீ³ஹீதி ஸங்க⁴க³ணபுக்³க³லேஹி காரணபூ⁴தேஹி. அப்³பு⁴ண்ஹஸீலோதி பரிஸுத்³த⁴பா⁴வூபக³மனேன அபி⁴னவுப்பன்னஸீலோ. அபி⁴னவுப்பன்னஞ்ஹி ‘‘அப்³பு⁴ண்ஹ’’ந்தி வுச்சதி, பரிஸுத்³த⁴ஸீலோதி அத்தோ². தேனாஹ ‘‘பாகதிகோ’’தி.
Saṅghādīhīti saṅghagaṇapuggalehi kāraṇabhūtehi. Abbhuṇhasīloti parisuddhabhāvūpagamanena abhinavuppannasīlo. Abhinavuppannañhi ‘‘abbhuṇha’’nti vuccati, parisuddhasīloti attho. Tenāha ‘‘pākatiko’’ti.
‘‘கோஸம்ப³கக்க²ந்த⁴கே வுத்தானிஸங்ஸே’’தி இத³ங் கோஸம்ப³கக்க²ந்த⁴கே ‘‘ஸசே மங் இமே பி⁴க்கூ² ஆபத்தியா அத³ஸ்ஸனே உக்கி²பிஸ்ஸந்தி, ந மயா ஸத்³தி⁴ங் உபோஸத²ங் கரிஸ்ஸந்தீ’’திஆதி³னா ஆபத்தியா அத³ஸ்ஸனே ஆதீ³னவங் த³ஸ்ஸெத்வா பரேஸம்பி ஸத்³தா⁴ய ஆபத்திதே³ஸனாவிதா⁴னமுகே²ன ஸாமத்தி²யதோ பகாஸிதோ. ஏகதோ உபோஸத²கரண, பவாரணாகரண, ஸங்க⁴கம்மகரண, ஆஸனேனிஸீத³ன, யாகு³பானேனிஸீத³ன, ப⁴த்தக்³கே³னிஸீத³ன, ஏகச்ச²ன்னேஸயன, யதா²வுட்³ட⁴அபி⁴வாத³னாதி³கரணஸங்கா²தே அட்டா²னிஸங்ஸே ஸந்தா⁴ய வுத்தங்.
‘‘Kosambakakkhandhake vuttānisaṃse’’ti idaṃ kosambakakkhandhake ‘‘sace maṃ ime bhikkhū āpattiyā adassane ukkhipissanti, na mayā saddhiṃ uposathaṃ karissantī’’tiādinā āpattiyā adassane ādīnavaṃ dassetvā paresampi saddhāya āpattidesanāvidhānamukhena sāmatthiyato pakāsito. Ekato uposathakaraṇa, pavāraṇākaraṇa, saṅghakammakaraṇa, āsanenisīdana, yāgupānenisīdana, bhattaggenisīdana, ekacchannesayana, yathāvuḍḍhaabhivādanādikaraṇasaṅkhāte aṭṭhānisaṃse sandhāya vuttaṃ.
சதுன்னந்தி வினயபிடகே ஆக³தானங் வஸேன வுத்தங். கதமா பன ஸாதி ஸா சதுப்³பி³தா⁴ அச்சயதே³ஸனா கதமாதி அத்தோ². அபி⁴மாரானந்தி மாரணத்தா²ய பயோஜிதத⁴னுக்³க³ஹானங். உபட்டா²யிகாயாதி ஸஹஸெய்யஸிக்கா²பத³வத்து²ஸ்மிங் ஆக³தாய.
Catunnanti vinayapiṭake āgatānaṃ vasena vuttaṃ. Katamā pana sāti sā catubbidhā accayadesanā katamāti attho. Abhimārānanti māraṇatthāya payojitadhanuggahānaṃ. Upaṭṭhāyikāyāti sahaseyyasikkhāpadavatthusmiṃ āgatāya.
அட்ட²ன்னங் பி⁴க்கு²னீனந்தி தே²ராஸனதோ பட்டா²ய அட்ட²ஹி பி⁴க்கு²னீஹி இதராய ஆக³தாய வுட்³டா⁴ய பி⁴க்கு²னியா ஆஸனங் தா³தப்³ப³ங். அட்ட²ன்னங் பன பி⁴க்கு²னீனங் நவகாய ஆக³தாய அதா³தும்பி வட்டதி. தாய பன ஸங்க⁴னவகாஸனே லத்³தோ⁴காஸே நிஸீதி³தப்³ப³ங். அத² வா அட்ட²ன்னங் வுட்³டா⁴னங் பி⁴க்கு²னீனங் இதராய நவகதராய ஆஸனங் தா³தப்³ப³ங். கம்மானி நவாதி ஓஸாரணாதீ³னி நவ ஏவ.
Aṭṭhannaṃ bhikkhunīnanti therāsanato paṭṭhāya aṭṭhahi bhikkhunīhi itarāya āgatāya vuḍḍhāya bhikkhuniyā āsanaṃ dātabbaṃ. Aṭṭhannaṃ pana bhikkhunīnaṃ navakāya āgatāya adātumpi vaṭṭati. Tāya pana saṅghanavakāsane laddhokāse nisīditabbaṃ. Atha vā aṭṭhannaṃ vuḍḍhānaṃ bhikkhunīnaṃ itarāya navakatarāya āsanaṃ dātabbaṃ. Kammāni navāti osāraṇādīni nava eva.
பாசித்தியவண்ணனா நிட்டி²தா.
Pācittiyavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 3. பாசித்தியங் • 3. Pācittiyaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / (3) பாசித்தியவண்ணனா • (3) Pācittiyavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாசித்தியவண்ணனா • Pācittiyavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாசித்தியவண்ணனா • Pācittiyavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / (3) பாசித்தியவண்ணனா • (3) Pācittiyavaṇṇanā
