| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
(৩) পাচিত্তিযৰণ্ণনা
(3) Pācittiyavaṇṇanā
৪৭৬. পঞ্চ ভেসজ্জানীতি সব্বিআদীনি পঞ্চ ভেসজ্জানি। ইমং আপত্তিন্তি সম্বন্ধো। পচ্ছা আপন্নোতি যোজনা।
476.Pañca bhesajjānīti sabbiādīni pañca bhesajjāni. Imaṃ āpattinti sambandho. Pacchā āpannoti yojanā.
একং কবল়ন্তি একং আলোপং, তুম্হমূলেতি তুম্হং সন্তিকে।
Ekaṃkabaḷanti ekaṃ ālopaṃ, tumhamūleti tumhaṃ santike.
যথাৰত্থুকন্তি ৰত্থুঅনুলোমং, আপত্তিযো দেসিতাৰ হোন্তীতি যোজনা।
Yathāvatthukanti vatthuanulomaṃ, āpattiyo desitāva hontīti yojanā.
কোকালিকাদীনন্তিআদিসদ্দেন কটমোদকতিস্সকাদযো (পারা॰ ৪১৭) সঙ্গণ্হাতি। পাপিকায দিট্ঠিযা অপ্পটিনিস্সগ্গে পাচিত্তিযঞ্চ চণ্ডকাল়িকায ভিক্খুনিযা পাচিত্তিযঞ্চাতি যোজনা। পযুত্তৰাচাপচ্চযাতি ৰিঞ্ঞত্তিনিমিত্তাদীহি পকারেন যুত্তায ৰাচায পচ্চযা। আপত্তি পারাজিকস্সাতি পারাজিকস্স আপজ্জনং। অথৰা পারাজিকস্সাতি অস্স ভিক্খুস্স পারাজিকা আপত্তি হোতীতি ৰা পারাজিকা আপত্তি অস্স ভৰতীতি ৰা যোজনা কাতব্বা। ইতীতি ইমা ছ আপত্তিযো আপজ্জতীতি যোজনা।
Kokālikādīnantiādisaddena kaṭamodakatissakādayo (pārā. 417) saṅgaṇhāti. Pāpikāya diṭṭhiyā appaṭinissagge pācittiyañca caṇḍakāḷikāya bhikkhuniyā pācittiyañcāti yojanā. Payuttavācāpaccayāti viññattinimittādīhi pakārena yuttāya vācāya paccayā. Āpatti pārājikassāti pārājikassa āpajjanaṃ. Athavā pārājikassāti assa bhikkhussa pārājikā āpatti hotīti vā pārājikā āpatti assa bhavatīti vā yojanā kātabbā. Itīti imā cha āpattiyo āpajjatīti yojanā.
ভোজনং গহেত্ৰা অজ্ঝোহরমানাতি সম্বন্ধো। তথেৰাতি যথা খাদনে, তথেৰ মংসং লসুণং অজ্ঝোহরমানাতি যোজনা। ‘‘পণীতভোজনানী’’তি চ ‘‘অকপ্পিযমংস’’ন্তি চ পদানি ‘‘অজ্ঝোহরমানা’’তি পদেন সম্বন্ধিতব্বানি।
Bhojanaṃ gahetvā ajjhoharamānāti sambandho. Tathevāti yathā khādane, tatheva maṃsaṃ lasuṇaṃ ajjhoharamānāti yojanā. ‘‘Paṇītabhojanānī’’ti ca ‘‘akappiyamaṃsa’’nti ca padāni ‘‘ajjhoharamānā’’ti padena sambandhitabbāni.
পঞ্চ ঠানানীতি পঞ্চ আপত্তিসঙ্খাতানি ঠানানি। তত্থাতি পঞ্চসু সহধম্মিকেসু। দ্ৰিন্নন্তি ভিক্খুভিক্খুনীনং। তেসন্তি সিক্খমানাদীনং। পঞ্চন্নমেৰাতি সহধম্মিকানংযেৰ। ৰিনিচ্ছযৰোহারোতি ৰিনিচ্ছযৰচনং। ইমিনা চত্তারি অধিকরণানি পটিক্খিপতি। অড্ডকম্মং নামাতি অভিযুঞ্জন্তানং কম্মং নাম।
Pañca ṭhānānīti pañca āpattisaṅkhātāni ṭhānāni. Tatthāti pañcasu sahadhammikesu. Dvinnanti bhikkhubhikkhunīnaṃ. Tesanti sikkhamānādīnaṃ. Pañcannamevāti sahadhammikānaṃyeva. Vinicchayavohāroti vinicchayavacanaṃ. Iminā cattāri adhikaraṇāni paṭikkhipati. Aḍḍakammaṃ nāmāti abhiyuñjantānaṃ kammaṃ nāma.
‘‘সহধম্মিকান’’ন্তি ইমিনা পঞ্জন্নং ৰিনিচ্ছযোতি এত্থ পঞ্চসরূপং দস্সেতি। সোভণভাৰং ৰিত্থারেন্তো আহ ‘‘কতৰীতিক্কমো হী’’তিআদি। অব্ভুণ্হসীলোতি অভিনৰুপ্পন্নসীলো। অব্ভুণ্হসীলো নাম অত্থতো পাকতিকসীলোতি আহ ‘‘পাকতিকো’’তি, পকতিসীলেন নিযুত্তোতি অত্থো।
‘‘Sahadhammikāna’’nti iminā pañjannaṃ vinicchayoti ettha pañcasarūpaṃ dasseti. Sobhaṇabhāvaṃ vitthārento āha ‘‘katavītikkamo hī’’tiādi. Abbhuṇhasīloti abhinavuppannasīlo. Abbhuṇhasīlo nāma atthato pākatikasīloti āha ‘‘pākatiko’’ti, pakatisīlena niyuttoti attho.
‘‘কাযদ্ৰারসম্ভৰা’’তি ইমিনা কাযিকাতি পদস্স তদ্ধিতভাৰং দস্সেতি। মুখং ওলোকেতব্বন্তি এত্থ ৰুত্তাতি সম্বন্ধো।
‘‘Kāyadvārasambhavā’’ti iminā kāyikāti padassa taddhitabhāvaṃ dasseti. Mukhaṃ oloketabbanti ettha vuttāti sambandho.
চতুন্নং দেসনায চাতি এত্থ ‘‘দেসনাযা’’তি পদং আদিপদলোপন্তি আহ ‘‘অচ্চযদেসনাযা’’তি। সাতি অচ্চযদেসনা। অভিনিলীযিত্ৰা ধনুনা মারেন্তীতি অভিমারা।
Catunnaṃ desanāya cāti ettha ‘‘desanāyā’’ti padaṃ ādipadalopanti āha ‘‘accayadesanāyā’’ti. Sāti accayadesanā. Abhinilīyitvā dhanunā mārentīti abhimārā.
ছেজ্জং হোতীতি এত্থ ছেজ্জং নাম পারাজিকাপজ্জনমেৰাতি আহ ‘‘দেৰদত্তো ৰিয পারাজিকং আপজ্জতী’’তি। ইমা পন আপত্তিযোতি পারাজিকথুল্লচ্চযাপত্তিযো।
Chejjaṃhotīti ettha chejjaṃ nāma pārājikāpajjanamevāti āha ‘‘devadatto viya pārājikaṃ āpajjatī’’ti. Imā pana āpattiyoti pārājikathullaccayāpattiyo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৩. পাচিত্তিযং • 3. Pācittiyaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / (৩) পাচিত্তিযৰণ্ণনা • (3) Pācittiyavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পাচিত্তিযৰণ্ণনা • Pācittiyavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পাচিত্তিযৰণ্ণনা • Pācittiyavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পাচিত্তিযৰণ্ণনা • Pācittiyavaṇṇanā
