| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
পাচিত্তিযৰণ্ণনা
Pācittiyavaṇṇanā
৪৭৬. সব্বানি নানাৰত্থুকানীতি সপ্পিনৰনীতাদীনং পঞ্চন্নং ৰত্থূনং ভেদেন পাচিত্তিযানি পঞ্চ নানাৰত্থুকানি। এস নযো পণীতভোজনৰিসযে নৰ পাচিত্তিযানীতিআদীসুপি। এতেন ভেসজ্জপণীতভোজনসিক্খাপদানি একেকসিক্খাপদৰসেন পঞ্ঞত্তানিপি ৰত্থুভেদেন পচ্চেকং পঞ্চসিক্খাপদনৰসিক্খাপদসদিসানি ভিক্খুনীনং পাটিদেসনীযাপত্তিযো ৰিযাতি দস্সেতি। তেনেৰ ‘‘নানাৰত্থুকানী’’তি ৰুত্তং। সপ্পিং এৰ পটিগ্গহেত্ৰা অনেকভাজনেসু ঠপেত্ৰা সত্তাহং অতিক্কামেন্তস্স ভাজনগণনায সম্ভৰন্তিযো বহুকাপি আপত্তিযো একৰত্থুকা এৰ হোন্তি, এৰং সপ্পিভোজনমেৰ বহূসু ঠানেসু ৰিঞ্ঞাপেত্ৰা একতো ৰা ৰিসুং ৰিসুমেৰ ৰা ভুঞ্জন্তস্স আপত্তিযো একৰত্থুকা এৰাতি দট্ঠব্বা।
476.Sabbāninānāvatthukānīti sappinavanītādīnaṃ pañcannaṃ vatthūnaṃ bhedena pācittiyāni pañca nānāvatthukāni. Esa nayo paṇītabhojanavisaye nava pācittiyānītiādīsupi. Etena bhesajjapaṇītabhojanasikkhāpadāni ekekasikkhāpadavasena paññattānipi vatthubhedena paccekaṃ pañcasikkhāpadanavasikkhāpadasadisāni bhikkhunīnaṃ pāṭidesanīyāpattiyo viyāti dasseti. Teneva ‘‘nānāvatthukānī’’ti vuttaṃ. Sappiṃ eva paṭiggahetvā anekabhājanesu ṭhapetvā sattāhaṃ atikkāmentassa bhājanagaṇanāya sambhavantiyo bahukāpi āpattiyo ekavatthukā eva honti, evaṃ sappibhojanameva bahūsu ṭhānesu viññāpetvā ekato vā visuṃ visumeva vā bhuñjantassa āpattiyo ekavatthukā evāti daṭṭhabbā.
পাল়িযং একৰাচায দেসেয্য, ৰুত্তা আদিচ্চবন্ধুনাতি এত্থ ‘‘দেসেয্যাতি ৰুত্তা’’তি ইতি-সদ্দং অজ্ঝাহরিত্ৰা যোজেতব্বং। এৰং সেসেসুপি।
Pāḷiyaṃ ekavācāya deseyya, vuttā ādiccabandhunāti ettha ‘‘deseyyāti vuttā’’ti iti-saddaṃ ajjhāharitvā yojetabbaṃ. Evaṃ sesesupi.
ভেদানুৰত্তকানন্তি এত্থ আদি-সদ্দো লুত্তনিদ্দিট্ঠো। যাৰততিযকা চ সব্বে উভতোৰিভঙ্গে আগতা, সঙ্ঘাদিসেসসামঞ্ঞেন একং, পাচিত্তিযসামঞ্ঞেন চ একং কত্ৰা ‘‘যাৰততিযকে তিস্সো’’তি ৰুত্তন্তি দট্ঠব্বং। এত্থ চ ঞত্তিযা দুক্কটং, দ্ৰীহি কম্মৰাচাহি থুল্লচ্চযাপি সন্তি এৰ। তানি মাতিকায ন আগতানি। মাতিকাগতৰসেন হেত্থ ‘‘তিস্সো’’তি ৰুত্তং।
Bhedānuvattakānanti ettha ādi-saddo luttaniddiṭṭho. Yāvatatiyakā ca sabbe ubhatovibhaṅge āgatā, saṅghādisesasāmaññena ekaṃ, pācittiyasāmaññena ca ekaṃ katvā ‘‘yāvatatiyake tisso’’ti vuttanti daṭṭhabbaṃ. Ettha ca ñattiyā dukkaṭaṃ, dvīhi kammavācāhi thullaccayāpi santi eva. Tāni mātikāya na āgatāni. Mātikāgatavasena hettha ‘‘tisso’’ti vuttaṃ.
সঙ্ঘাদীহীতি সঙ্ঘগণপুগ্গলেহি কারণভূতেহি। অব্ভুণ্হসীলোতি পরিসুদ্ধভাৰূপগমনেন অভিনৰুপ্পন্নসীলো। অভিনৰুপ্পন্নঞ্হি ‘‘অব্ভুণ্হ’’ন্তি ৰুচ্চতি, পরিসুদ্ধসীলোতি অত্থো। তেনাহ ‘‘পাকতিকো’’তি।
Saṅghādīhīti saṅghagaṇapuggalehi kāraṇabhūtehi. Abbhuṇhasīloti parisuddhabhāvūpagamanena abhinavuppannasīlo. Abhinavuppannañhi ‘‘abbhuṇha’’nti vuccati, parisuddhasīloti attho. Tenāha ‘‘pākatiko’’ti.
‘‘কোসম্বকক্খন্ধকে ৰুত্তানিসংসে’’তি ইদং কোসম্বকক্খন্ধকে ‘‘সচে মং ইমে ভিক্খূ আপত্তিযা অদস্সনে উক্খিপিস্সন্তি, ন মযা সদ্ধিং উপোসথং করিস্সন্তী’’তিআদিনা আপত্তিযা অদস্সনে আদীনৰং দস্সেত্ৰা পরেসম্পি সদ্ধায আপত্তিদেসনাৰিধানমুখেন সামত্থিযতো পকাসিতো। একতো উপোসথকরণ, পৰারণাকরণ, সঙ্ঘকম্মকরণ, আসনেনিসীদন, যাগুপানেনিসীদন, ভত্তগ্গেনিসীদন, একচ্ছন্নেসযন, যথাৰুড্ঢঅভিৰাদনাদিকরণসঙ্খাতে অট্ঠানিসংসে সন্ধায ৰুত্তং।
‘‘Kosambakakkhandhake vuttānisaṃse’’ti idaṃ kosambakakkhandhake ‘‘sace maṃ ime bhikkhū āpattiyā adassane ukkhipissanti, na mayā saddhiṃ uposathaṃ karissantī’’tiādinā āpattiyā adassane ādīnavaṃ dassetvā paresampi saddhāya āpattidesanāvidhānamukhena sāmatthiyato pakāsito. Ekato uposathakaraṇa, pavāraṇākaraṇa, saṅghakammakaraṇa, āsanenisīdana, yāgupānenisīdana, bhattaggenisīdana, ekacchannesayana, yathāvuḍḍhaabhivādanādikaraṇasaṅkhāte aṭṭhānisaṃse sandhāya vuttaṃ.
চতুন্নন্তি ৰিনযপিটকে আগতানং ৰসেন ৰুত্তং। কতমা পন সাতি সা চতুব্বিধা অচ্চযদেসনা কতমাতি অত্থো। অভিমারানন্তি মারণত্থায পযোজিতধনুগ্গহানং। উপট্ঠাযিকাযাতি সহসেয্যসিক্খাপদৰত্থুস্মিং আগতায।
Catunnanti vinayapiṭake āgatānaṃ vasena vuttaṃ. Katamā pana sāti sā catubbidhā accayadesanā katamāti attho. Abhimārānanti māraṇatthāya payojitadhanuggahānaṃ. Upaṭṭhāyikāyāti sahaseyyasikkhāpadavatthusmiṃ āgatāya.
অট্ঠন্নং ভিক্খুনীনন্তি থেরাসনতো পট্ঠায অট্ঠহি ভিক্খুনীহি ইতরায আগতায ৰুড্ঢায ভিক্খুনিযা আসনং দাতব্বং। অট্ঠন্নং পন ভিক্খুনীনং নৰকায আগতায অদাতুম্পি ৰট্টতি। তায পন সঙ্ঘনৰকাসনে লদ্ধোকাসে নিসীদিতব্বং। অথ ৰা অট্ঠন্নং ৰুড্ঢানং ভিক্খুনীনং ইতরায নৰকতরায আসনং দাতব্বং। কম্মানি নৰাতি ওসারণাদীনি নৰ এৰ।
Aṭṭhannaṃ bhikkhunīnanti therāsanato paṭṭhāya aṭṭhahi bhikkhunīhi itarāya āgatāya vuḍḍhāya bhikkhuniyā āsanaṃ dātabbaṃ. Aṭṭhannaṃ pana bhikkhunīnaṃ navakāya āgatāya adātumpi vaṭṭati. Tāya pana saṅghanavakāsane laddhokāse nisīditabbaṃ. Atha vā aṭṭhannaṃ vuḍḍhānaṃ bhikkhunīnaṃ itarāya navakatarāya āsanaṃ dātabbaṃ. Kammāni navāti osāraṇādīni nava eva.
পাচিত্তিযৰণ্ণনা নিট্ঠিতা।
Pācittiyavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৩. পাচিত্তিযং • 3. Pācittiyaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / (৩) পাচিত্তিযৰণ্ণনা • (3) Pācittiyavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পাচিত্তিযৰণ্ণনা • Pācittiyavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পাচিত্তিযৰণ্ণনা • Pācittiyavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / (৩) পাচিত্তিযৰণ্ণনা • (3) Pācittiyavaṇṇanā
