| Library / Tipiṭaka / д̇ибидага • Tipiṭaka / бариваара-адтагат̇аа • Parivāra-aṭṭhakathā |
(3) баажид̇д̇ияаван̣н̣анаа
(3) Pācittiyavaṇṇanā
476. бан̃жа баажид̇д̇ияаанийд̇и бан̃жа бхзсаж̇ж̇аани бадиг̇г̇ахзд̇ваа наанаабхааж̇анзсу ваа згабхааж̇анз ваа амиссзд̇ваа табид̇аани хонд̇и, сад̇д̇аахаад̇иггамз со бхигку бан̃жа баажид̇д̇ияаани саб̣б̣аани наанаавад̇т̇угаани згагкан̣з аабаж̇ж̇ад̇и, ‘‘имам̣ батамам̣ аабанно, имам̣ бажчаа’’д̇и на вад̇д̇аб̣б̣о.
476.Pañca pācittiyānīti pañca bhesajjāni paṭiggahetvā nānābhājanesu vā ekabhājane vā amissetvā ṭhapitāni honti, sattāhātikkame so bhikkhu pañca pācittiyāni sabbāni nānāvatthukāni ekakkhaṇe āpajjati, ‘‘imaṃ paṭhamaṃ āpanno, imaṃ pacchā’’ti na vattabbo.
нава баажид̇д̇ияаанийд̇и яо бхигку нава бан̣ийд̇абхож̇анаани вин̃н̃аабзд̇ваа д̇зхи сад̣̇д̇хим̣ згад̇о згам̣ габ̣ал̣ам̣ омад̣̇д̣̇ид̇ваа мукз багкибид̇ваа бараг̇ал̣ам̣ ад̇иггаамзд̇и, аяам̣ нава баажид̇д̇ияаани саб̣б̣аани наанаавад̇т̇угаани згагкан̣з аабаж̇ж̇ад̇и ‘‘имам̣ батамам̣ аабанно, имам̣ бажчаа’’д̇и на вад̇д̇аб̣б̣о. згаваажааяа д̣̇зсзяяаад̇и ‘‘ахам̣, бханд̇з, бан̃жа бхзсаж̇ж̇аани бадиг̇г̇ахзд̇ваа сад̇д̇аахам̣ ад̇иггаамзд̇ваа бан̃жа аабад̇д̇ияо аабанно, д̇аа д̇умхамуулз бадид̣̇зсзмий’’д̇и звам̣ згаваажааяа д̣̇зсзяяа, д̣̇зсид̇аава хонд̇и, д̣̇вийхи д̇ийхи ваажаахи гижжам̣ наама над̇т̇и. д̣̇уд̇ияависсаж̇ж̇анзби ‘‘ахам̣, бханд̇з, нава бан̣ийд̇абхож̇анаани вин̃н̃аабзд̇ваа бхун̃ж̇ид̇ваа нава аабад̇д̇ияо аабанно, д̇аа д̇умхамуулз бадид̣̇зсзмий’’д̇и вад̇д̇аб̣б̣ам̣.
Nava pācittiyānīti yo bhikkhu nava paṇītabhojanāni viññāpetvā tehi saddhiṃ ekato ekaṃ kabaḷaṃ omadditvā mukhe pakkhipitvā paragaḷaṃ atikkāmeti, ayaṃ nava pācittiyāni sabbāni nānāvatthukāni ekakkhaṇe āpajjati ‘‘imaṃ paṭhamaṃ āpanno, imaṃ pacchā’’ti na vattabbo. Ekavācāya deseyyāti ‘‘ahaṃ, bhante, pañca bhesajjāni paṭiggahetvā sattāhaṃ atikkāmetvā pañca āpattiyo āpanno, tā tumhamūle paṭidesemī’’ti evaṃ ekavācāya deseyya, desitāva honti, dvīhi tīhi vācāhi kiccaṃ nāma natthi. Dutiyavissajjanepi ‘‘ahaṃ, bhante, nava paṇītabhojanāni viññāpetvā bhuñjitvā nava āpattiyo āpanno, tā tumhamūle paṭidesemī’’ti vattabbaṃ.
вад̇т̇ум̣ гид̇д̇зд̇ваа д̣̇зсзяяаад̇и ‘‘ахам̣, бханд̇з, бан̃жа бхзсаж̇ж̇аани бадиг̇г̇ахзд̇ваа сад̇д̇аахам̣ ад̇иггаамзсим̣, яат̇аавад̇т̇угам̣ д̇ам̣ д̇умхамуулз бадид̣̇зсзмий’’д̇и звам̣ вад̇т̇ум̣ гид̇д̇зд̇ваа д̣̇зсзяяа, д̣̇зсид̇аава хонд̇и аабад̇д̇ияо, аабад̇д̇ияаа наамаг̇г̇ахан̣зна гижжам̣ над̇т̇и. д̣̇уд̇ияависсаж̇ж̇анзби ‘‘ахам̣, бханд̇з, нава бан̣ийд̇абхож̇анаани вин̃н̃аабзд̇ваа бхуд̇д̇о, яат̇аавад̇т̇угам̣ д̇ам̣ д̇умхамуулз бадид̣̇зсзмий’’д̇и вад̇д̇аб̣б̣ам̣.
Vatthuṃ kittetvā deseyyāti ‘‘ahaṃ, bhante, pañca bhesajjāni paṭiggahetvā sattāhaṃ atikkāmesiṃ, yathāvatthukaṃ taṃ tumhamūle paṭidesemī’’ti evaṃ vatthuṃ kittetvā deseyya, desitāva honti āpattiyo, āpattiyā nāmaggahaṇena kiccaṃ natthi. Dutiyavissajjanepi ‘‘ahaṃ, bhante, nava paṇītabhojanāni viññāpetvā bhutto, yathāvatthukaṃ taṃ tumhamūle paṭidesemī’’ti vattabbaṃ.
яаавад̇ад̇ияагз д̇иссод̇и угкид̇д̇аанувад̇д̇игааяа баарааж̇игам̣ бхзд̣̇агаанувад̇д̇агаанам̣ гогаалигаад̣̇ийнам̣ сан̇гхаад̣̇исзсам̣, баабигааяа д̣̇идтияаа аббадиниссаг̇г̇з жан̣д̣агаал̣игааяа жа бхигкунияаа баажид̇д̇ияанд̇и имаа яаавад̇ад̇ияагаа д̇иссо аабад̇д̇ияо. ча вохаарабажжаяаад̇и баяуд̇д̇аваажаабажжаяаа ча аабад̇д̇ияо аабаж̇ж̇ад̇ийд̇и ад̇т̇о. гат̇ам̣? ааж̇ийвахзд̇у ааж̇ийвагааран̣аа баабижчо ижчаабагад̇о асанд̇ам̣ абхууд̇ам̣ уд̇д̇аримануссад̇хаммам̣ уллабад̇и, аабад̇д̇и баарааж̇игасса. ааж̇ийвахзд̇у ааж̇ийвагааран̣аа сан̃жарид̇д̇ам̣ самаабаж̇ж̇ад̇и, аабад̇д̇и сан̇гхаад̣̇исзсасса. ааж̇ийвахзд̇у ааж̇ийвагааран̣аа яо д̇з вихаарз васад̇и со арахаад̇и вад̣̇ад̇и, аабад̇д̇и т̇уллажжаяасса. ааж̇ийвахзд̇у ааж̇ийвагааран̣аа бхигку бан̣ийд̇абхож̇анаани ад̇д̇ано ад̇т̇ааяа вин̃н̃аабзд̇ваа бхун̃ж̇ад̇и, аабад̇д̇и баажид̇д̇ияасса. ааж̇ийвахзд̇у ааж̇ийвагааран̣аа бхигкуний бан̣ийд̇абхож̇анаани ад̇д̇ано ад̇т̇ааяа вин̃н̃аабзд̇ваа бхун̃ж̇ад̇и, аабад̇д̇и баадид̣̇зсанийяасса. ааж̇ийвахзд̇у ааж̇ийвагааран̣аа суубам̣ ваа од̣̇анам̣ ваа аг̇илаано ад̇д̇ано ад̇т̇ааяа вин̃н̃аабзд̇ваа бхун̃ж̇ад̇и, аабад̇д̇и д̣̇уггадассаад̇и.
Yāvatatiyake tissoti ukkhittānuvattikāya pārājikaṃ bhedakānuvattakānaṃ kokālikādīnaṃ saṅghādisesaṃ, pāpikāya diṭṭhiyā appaṭinissagge caṇḍakāḷikāya ca bhikkhuniyā pācittiyanti imā yāvatatiyakā tisso āpattiyo. Cha vohārapaccayāti payuttavācāpaccayā cha āpattiyo āpajjatīti attho. Kathaṃ? Ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati, āpatti pārājikassa. Ājīvahetu ājīvakāraṇā sañcarittaṃ samāpajjati, āpatti saṅghādisesassa. Ājīvahetu ājīvakāraṇā yo te vihāre vasati so arahāti vadati, āpatti thullaccayassa. Ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati, āpatti pācittiyassa. Ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati, āpatti pāṭidesanīyassa. Ājīvahetu ājīvakāraṇā sūpaṃ vā odanaṃ vā agilāno attano atthāya viññāpetvā bhuñjati, āpatti dukkaṭassāti.
каад̣̇анд̇асса д̇иссод̇и мануссамам̣сз т̇уллажжаяам̣, авасзсзсу агаббияамам̣сзсу д̣̇уггадам̣, бхигкунияаа ласун̣з баажид̇д̇ияам̣. бан̃жа бхож̇анабажжаяаад̇и авассуд̇аа авассуд̇асса бурисасса хад̇т̇ад̇о бхож̇анам̣ г̇ахзд̇ваа д̇ад̇т̇зва мануссамам̣сам̣ ласун̣ам̣ ад̇д̇ано ад̇т̇ааяа вин̃н̃аабзд̇ваа г̇ахид̇абан̣ийд̇абхож̇анаани авасзсан̃жа агаббияамам̣сам̣ багкибид̇ваа вомиссагам̣ омад̣̇д̣̇ид̇ваа аж̇жхохарамаанаа сан̇гхаад̣̇исзсам̣, т̇уллажжаяам̣, баажид̇д̇ияам̣, баадид̣̇зсанийяам̣, д̣̇уггаданд̇и имаа бан̃жа аабад̇д̇ияо бхож̇анабажжаяаа аабаж̇ж̇ад̇и.
Khādantassa tissoti manussamaṃse thullaccayaṃ, avasesesu akappiyamaṃsesu dukkaṭaṃ, bhikkhuniyā lasuṇe pācittiyaṃ. Pañca bhojanapaccayāti avassutā avassutassa purisassa hatthato bhojanaṃ gahetvā tattheva manussamaṃsaṃ lasuṇaṃ attano atthāya viññāpetvā gahitapaṇītabhojanāni avasesañca akappiyamaṃsaṃ pakkhipitvā vomissakaṃ omadditvā ajjhoharamānā saṅghādisesaṃ, thullaccayaṃ, pācittiyaṃ, pāṭidesanīyaṃ, dukkaṭanti imā pañca āpattiyo bhojanapaccayā āpajjati.
бан̃жа таанаанийд̇и ‘‘угкид̇д̇аанувад̇д̇игааяа бхигкунияаа яаавад̇ад̇ияам̣ саманубхаасанааяа аббадиниссаж̇ж̇анд̇ияаа н̃ад̇д̇ияаа д̣̇уггадам̣, д̣̇вийхи гаммаваажаахи т̇уллажжаяам̣, гаммаваажаабарияосаанз аабад̇д̇и баарааж̇игасса, сан̇гхабхзд̣̇ааяа бараггаманаад̣̇ийсу сан̇гхаад̣̇исзсо, баабигааяа д̣̇идтияаа аббадиниссаг̇г̇з баажид̇д̇ияа’’нд̇и звам̣ саб̣б̣аа яаавад̇ад̇ияагаа бан̃жа таанаани г̇ажчанд̇и. бан̃жаннан̃жзва аабад̇д̇ийд̇и аабад̇д̇и наама бан̃жаннам̣ сахад̇хаммигаанам̣ ход̇и, д̇ад̇т̇а д̣̇виннам̣ ниббарияааязна аабад̇д̇иязва, сигкаамаанасааман̣зрисааман̣зраанам̣ бана агаббияад̇д̇аа на ваддад̇и. иминаа барияааязна д̇зсам̣ аабад̇д̇и на д̣̇зсаабзд̇аб̣б̣аа, д̣̇ан̣д̣агаммам̣ бана д̇зсам̣ гаад̇аб̣б̣ам̣. бан̃жаннам̣ ад̇хигаран̣зна жаад̇и ад̇хигаран̣ан̃жа бан̃жаннамзваад̇и ад̇т̇о. зд̇зсам̣язва хи бан̃жаннам̣ бад̇д̇ажийвараад̣̇ийнам̣ ад̇т̇ааяа винижчаяавохааро ад̇хигаран̣анд̇и вужжад̇и, г̇ихийнам̣ бана ад̣д̣агаммам̣ наама ход̇и.
Pañca ṭhānānīti ‘‘ukkhittānuvattikāya bhikkhuniyā yāvatatiyaṃ samanubhāsanāya appaṭinissajjantiyā ñattiyā dukkaṭaṃ, dvīhi kammavācāhi thullaccayaṃ, kammavācāpariyosāne āpatti pārājikassa, saṅghabhedāya parakkamanādīsu saṅghādiseso, pāpikāya diṭṭhiyā appaṭinissagge pācittiya’’nti evaṃ sabbā yāvatatiyakā pañca ṭhānāni gacchanti. Pañcannañceva āpattīti āpatti nāma pañcannaṃ sahadhammikānaṃ hoti, tattha dvinnaṃ nippariyāyena āpattiyeva, sikkhāmānasāmaṇerisāmaṇerānaṃ pana akappiyattā na vaṭṭati. Iminā pariyāyena tesaṃ āpatti na desāpetabbā, daṇḍakammaṃ pana tesaṃ kātabbaṃ. Pañcannaṃ adhikaraṇena cāti adhikaraṇañca pañcannamevāti attho. Etesaṃyeva hi pañcannaṃ pattacīvarādīnaṃ atthāya vinicchayavohāro adhikaraṇanti vuccati, gihīnaṃ pana aḍḍakammaṃ nāma hoti.
бан̃жаннам̣ винижчаяо ход̇ийд̇и бан̃жаннам̣ сахад̇хаммигаанам̣язва винижчаяо наама ход̇и. бан̃жаннам̣ вуубасамзна жаад̇и зд̇зсам̣язва бан̃жаннам̣ ад̇хигаран̣ам̣ винижчид̇ам̣ вуубасанд̇ам̣ наама ход̇ийд̇и ад̇т̇о. бан̃жаннан̃жзва анаабад̇д̇ийд̇и зд̇зсам̣язва бан̃жаннам̣ анаабад̇д̇и наама ход̇ийд̇и ад̇т̇о. д̇ийхи таанзхи собхад̇ийд̇и сан̇гхаад̣̇ийхи д̇ийхи гааран̣зхи собхад̇и. гад̇авийд̇иггамо хи буг̇г̇ало саббадигаммам̣ аабад̇д̇им̣ сан̇гхамаж̇жхз г̇ан̣амаж̇жхз буг̇г̇аласанд̇игз ваа бадигарид̇ваа аб̣бхун̣хасийло баагад̇иго ход̇и, д̇асмаа д̇ийхи таанзхи собхад̇ийд̇и вужжад̇и.
Pañcannaṃ vinicchayo hotīti pañcannaṃ sahadhammikānaṃyeva vinicchayo nāma hoti. Pañcannaṃ vūpasamena cāti etesaṃyeva pañcannaṃ adhikaraṇaṃ vinicchitaṃ vūpasantaṃ nāma hotīti attho. Pañcannañceva anāpattīti etesaṃyeva pañcannaṃ anāpatti nāma hotīti attho. Tīhi ṭhānehi sobhatīti saṅghādīhi tīhi kāraṇehi sobhati. Katavītikkamo hi puggalo sappaṭikammaṃ āpattiṃ saṅghamajjhe gaṇamajjhe puggalasantike vā paṭikaritvā abbhuṇhasīlo pākatiko hoti, tasmā tīhi ṭhānehi sobhatīti vuccati.
д̣̇вз гааяигаа рад̇д̇инд̇и бхигкуний рад̇д̇анд̇хагаарз бурисасса хад̇т̇абаасз таананисаж̇ж̇асаяанаани габбаяамаанаа баажид̇д̇ияам̣, хад̇т̇абаасам̣ виж̇ахид̇ваа таанаад̣̇ийни габбаяамаанаа д̣̇уггаданд̇и д̣̇вз гааяад̣̇ваарасамбхаваа аабад̇д̇ияо рад̇д̇им̣ аабаж̇ж̇ад̇и. д̣̇вз гааяигаа д̣̇иваад̇и зд̇знзва убааязна д̣̇иваа бадижчаннз огаасз д̣̇вз аабад̇д̇ияо аабаж̇ж̇ад̇и. ниж̇жхааяанд̇асса згаа аабад̇д̇ийд̇и ‘‘на жа, бхигкавз, саарад̇д̇зна маад̇уг̇аамасса ан̇г̇аж̇аад̇ам̣ убаниж̇жхааяид̇аб̣б̣ам̣ . яо убаниж̇жхааязяяа, аабад̇д̇и д̣̇уггадассаа’’д̇и (баараа. 266) ниж̇жхааяанд̇асса аяамзгаа аабад̇д̇и. згаа бин̣д̣абаад̇абажжаяаад̇и ‘‘на жа, бхигкавз, бхигкаад̣̇ааяигааяа мукам̣ ологзд̇аб̣б̣а’’нд̇и (жуул̣ава. 366) зд̇т̇а д̣̇уггадаабад̇д̇и, анд̇амасо яааг̇ум̣ ваа б̣яан̃ж̇анам̣ ваа д̣̇знд̇асса сааман̣зрассааби хи мукам̣ уллогаяад̇о д̣̇уггадамзва. гурунд̣̇ияам̣ бана ‘‘згаа бин̣д̣абаад̇абажжаяаад̇и бхигкунибарибаажид̇ам̣ бин̣д̣абаад̇ам̣ бхун̃ж̇анд̇асса баажид̇д̇ияа’’нд̇и вуд̇д̇ам̣.
Dve kāyikā rattinti bhikkhunī rattandhakāre purisassa hatthapāse ṭhānanisajjasayanāni kappayamānā pācittiyaṃ, hatthapāsaṃ vijahitvā ṭhānādīni kappayamānā dukkaṭanti dve kāyadvārasambhavā āpattiyo rattiṃ āpajjati. Dve kāyikā divāti eteneva upāyena divā paṭicchanne okāse dve āpattiyo āpajjati. Nijjhāyantassa ekā āpattīti ‘‘na ca, bhikkhave, sārattena mātugāmassa aṅgajātaṃ upanijjhāyitabbaṃ . Yo upanijjhāyeyya, āpatti dukkaṭassā’’ti (pārā. 266) nijjhāyantassa ayamekā āpatti. Ekā piṇḍapātapaccayāti ‘‘na ca, bhikkhave, bhikkhādāyikāya mukhaṃ oloketabba’’nti (cūḷava. 366) ettha dukkaṭāpatti, antamaso yāguṃ vā byañjanaṃ vā dentassa sāmaṇerassāpi hi mukhaṃ ullokayato dukkaṭameva. Kurundiyaṃ pana ‘‘ekā piṇḍapātapaccayāti bhikkhuniparipācitaṃ piṇḍapātaṃ bhuñjantassa pācittiya’’nti vuttaṃ.
адтаанисам̣сз самбассанд̇и госамб̣агагканд̇хагз вуд̇д̇аанисам̣сз. угкид̇д̇агаа д̇аяо вуд̇д̇аад̇и аабад̇д̇ияаа ад̣̇ассанз аббадигаммз баабигааяа жа д̣̇идтияаа аббадиниссаг̇г̇зд̇и. д̇зжад̇д̇аалийса саммаавад̇д̇анаад̇и д̇зсам̣язва угкид̇д̇агаанам̣ зд̇д̇агзсу вад̇д̇зсу вад̇д̇анаа.
Aṭṭhānisaṃse sampassanti kosambakakkhandhake vuttānisaṃse. Ukkhittakā tayo vuttāti āpattiyā adassane appaṭikamme pāpikāya ca diṭṭhiyā appaṭinissaggeti. Tecattālīsa sammāvattanāti tesaṃyeva ukkhittakānaṃ ettakesu vattesu vattanā.
бан̃жатаанз мусааваад̣̇од̇и баарааж̇игасан̇гхаад̣̇исзсат̇уллажжаяабаажид̇д̇ияад̣̇уггадасан̇каад̇з бан̃жадтаанз мусааваад̣̇о г̇ажчад̇и. жуд̣̇д̣̇аса бараманд̇и вужжад̇ийд̇и д̣̇асаахабарамаад̣̇инаязна хздтаа вуд̇д̇ам̣. д̣̇ваад̣̇аса баадид̣̇зсанийяаад̇и бхигкуунам̣ жад̇д̇аари бхигкунийнам̣ адта. жад̇уннам̣ д̣̇зсанааяа жаад̇и жад̇уннам̣ ажжаяад̣̇зсанааяаад̇и ад̇т̇о. гад̇амаа бана саад̇и? д̣̇звад̣̇ад̇д̇зна баяож̇ид̇аанам̣ абхимаараанам̣ ажжаяад̣̇зсанаа, ануруд̣̇д̇хад̇т̇зрасса убадтааяигааяа ажжаяад̣̇зсанаа, вад̣дхасса лижчавино ажжаяад̣̇зсанаа, ваасабхаг̇аамияад̇т̇зрасса угкзбанийяагаммам̣ гад̇ваа ааг̇ад̇аанам̣ бхигкуунам̣ ажжаяад̣̇зсанаад̇и аяам̣ жад̇уннам̣ ажжаяад̣̇зсанаа наама.
Pañcaṭhāne musāvādoti pārājikasaṅghādisesathullaccayapācittiyadukkaṭasaṅkhāte pañcaṭṭhāne musāvādo gacchati. Cuddasa paramanti vuccatīti dasāhaparamādinayena heṭṭhā vuttaṃ. Dvādasa pāṭidesanīyāti bhikkhūnaṃ cattāri bhikkhunīnaṃ aṭṭha. Catunnaṃ desanāya cāti catunnaṃ accayadesanāyāti attho. Katamā pana sāti? Devadattena payojitānaṃ abhimārānaṃ accayadesanā, anuruddhattherassa upaṭṭhāyikāya accayadesanā, vaḍḍhassa licchavino accayadesanā, vāsabhagāmiyattherassa ukkhepanīyakammaṃ katvā āgatānaṃ bhikkhūnaṃ accayadesanāti ayaṃ catunnaṃ accayadesanā nāma.
адтан̇г̇иго мусааваад̣̇од̇и ‘‘буб̣б̣звасса ход̇и мусаа бхан̣исса’’нд̇и аад̣̇им̣ гад̇ваа ‘‘винид̇хааяа сан̃н̃а’’нд̇и барияосаанзхи (баажи. 4-5; бари. 459) адтахи ан̇г̇зхи адтан̇г̇иго. убосат̇ан̇г̇ааниби баан̣ам̣ на ханзд̇иаад̣̇инаа наязна вуд̇д̇аанзва. адта д̣̇ууд̇зяяан̇г̇аанийд̇и ‘‘ид̇ха, бхигкавз, бхигку сод̇аа жа ход̇и саавзд̇аа жаа’’д̇иаад̣̇инаа (жуул̣ава. 347) наязна сан̇гхабхзд̣̇агз вуд̇д̇аани. адта д̇ид̇т̇ияавад̇д̇аани махааканд̇хагз вуд̇д̇аани.
Aṭṭhaṅgiko musāvādoti ‘‘pubbevassa hoti musā bhaṇissa’’nti ādiṃ katvā ‘‘vinidhāya sañña’’nti pariyosānehi (pāci. 4-5; pari. 459) aṭṭhahi aṅgehi aṭṭhaṅgiko. Uposathaṅgānipi pāṇaṃ na hanetiādinā nayena vuttāneva. Aṭṭha dūteyyaṅgānīti ‘‘idha, bhikkhave, bhikkhu sotā ca hoti sāvetā cā’’tiādinā (cūḷava. 347) nayena saṅghabhedake vuttāni. Aṭṭha titthiyavattāni mahākhandhake vuttāni.
адтаваажигаа убасамбад̣̇аад̇и бхигкунийнам̣ убасамбад̣̇ам̣ санд̇хааяа вуд̇д̇ам̣. адтаннам̣ бажжудтаад̇аб̣б̣анд̇и бхад̇д̇аг̇г̇з адтаннам̣ бхигкунийнам̣ ид̇араахи бажжудтааяа аасанам̣ д̣̇аад̇аб̣б̣ам̣ . бхигкуноваад̣̇аго адтахийд̇и адтахан̇г̇зхи саманнааг̇ад̇о бхигку бхигкуноваад̣̇аго самманнид̇аб̣б̣о.
Aṭṭhavācikā upasampadāti bhikkhunīnaṃ upasampadaṃ sandhāya vuttaṃ. Aṭṭhannaṃ paccuṭṭhātabbanti bhattagge aṭṭhannaṃ bhikkhunīnaṃ itarāhi paccuṭṭhāya āsanaṃ dātabbaṃ . Bhikkhunovādako aṭṭhahīti aṭṭhahaṅgehi samannāgato bhikkhu bhikkhunovādako sammannitabbo.
згасса чзж̇ж̇анд̇и г̇аат̇ааяа навасу ж̇анзсу яо салаагам̣ г̇аахзд̇ваа сан̇гхам̣ бхинд̣̇ад̇и, д̇ассзва чзж̇ж̇ам̣ ход̇и, д̣̇звад̣̇ад̇д̇о вияа баарааж̇игам̣ аабаж̇ж̇ад̇и. бхзд̣̇агаанувад̇д̇агаанам̣ жад̇уннам̣ т̇уллажжаяам̣ гогаалигаад̣̇ийнам̣ вияа, д̇хаммаваад̣̇ийнам̣ жад̇уннам̣ анаабад̇д̇и. имаа бана аабад̇д̇ияо жа анаабад̇д̇ияо жа саб̣б̣зсам̣ згавад̇т̇угаа сан̇гхабхзд̣̇авад̇т̇угаа зва.
Ekassa chejjanti gāthāya navasu janesu yo salākaṃ gāhetvā saṅghaṃ bhindati, tasseva chejjaṃ hoti, devadatto viya pārājikaṃ āpajjati. Bhedakānuvattakānaṃ catunnaṃ thullaccayaṃ kokālikādīnaṃ viya, dhammavādīnaṃ catunnaṃ anāpatti. Imā pana āpattiyo ca anāpattiyo ca sabbesaṃ ekavatthukā saṅghabhedavatthukā eva.
нава аагхаад̇авад̇т̇уунийд̇и г̇аат̇ааяа навахийд̇и навахи бхигкуухи сан̇гхо бхиж̇ж̇ад̇и. н̃ад̇д̇ияаа гаран̣аа наваад̇и н̃ад̇д̇ияаа гаад̇аб̣б̣аани гаммаани наваад̇и ад̇т̇о. сзсам̣ уд̇д̇аанамзва.
Nava āghātavatthūnīti gāthāya navahīti navahi bhikkhūhi saṅgho bhijjati. Ñattiyā karaṇā navāti ñattiyā kātabbāni kammāni navāti attho. Sesaṃ uttānameva.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / бариваарабаал̣и • Parivārapāḷi / 3. баажид̇д̇ияам̣ • 3. Pācittiyaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / баажид̇д̇ияаван̣н̣анаа • Pācittiyavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / баажид̇д̇ияаван̣н̣анаа • Pācittiyavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / баажид̇д̇ияаван̣н̣анаа • Pācittiyavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / (3) баажид̇д̇ияаван̣н̣анаа • (3) Pācittiyavaṇṇanā
