| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
បាចិត្តិយវណ្ណនា
Pācittiyavaṇṇanā
៤៧៦. សព្ពានិ នានាវត្ថុកានីតិ សប្បិនវនីតាទីនំ បញ្ចន្នំ វត្ថូនំ ភេទេន បាចិត្តិយានិ បញ្ច នានាវត្ថុកានិ។ ឯស នយោ បណីតភោជនវិសយេ នវ បាចិត្តិយានីតិអាទីសុបិ។ ឯតេន ភេសជ្ជបណីតភោជនសិក្ខាបទានិ ឯកេកសិក្ខាបទវសេន បញ្ញត្តានិបិ វត្ថុភេទេន បច្ចេកំ បញ្ចសិក្ខាបទនវសិក្ខាបទសទិសានិ ភិក្ខុនីនំ បាដិទេសនីយាបត្តិយោ វិយាតិ ទស្សេតិ។ តេនេវ ‘‘នានាវត្ថុកានី’’តិ វុត្តំ។ សប្បិំ ឯវ បដិគ្គហេត្វា អនេកភាជនេសុ ឋបេត្វា សត្តាហំ អតិក្កាមេន្តស្ស ភាជនគណនាយ សម្ភវន្តិយោ ពហុកាបិ អាបត្តិយោ ឯកវត្ថុកា ឯវ ហោន្តិ, ឯវំ សប្បិភោជនមេវ ពហូសុ ឋានេសុ វិញ្ញាបេត្វា ឯកតោ វា វិសុំ វិសុមេវ វា ភុញ្ជន្តស្ស អាបត្តិយោ ឯកវត្ថុកា ឯវាតិ ទដ្ឋព្ពា។
476.Sabbāninānāvatthukānīti sappinavanītādīnaṃ pañcannaṃ vatthūnaṃ bhedena pācittiyāni pañca nānāvatthukāni. Esa nayo paṇītabhojanavisaye nava pācittiyānītiādīsupi. Etena bhesajjapaṇītabhojanasikkhāpadāni ekekasikkhāpadavasena paññattānipi vatthubhedena paccekaṃ pañcasikkhāpadanavasikkhāpadasadisāni bhikkhunīnaṃ pāṭidesanīyāpattiyo viyāti dasseti. Teneva ‘‘nānāvatthukānī’’ti vuttaṃ. Sappiṃ eva paṭiggahetvā anekabhājanesu ṭhapetvā sattāhaṃ atikkāmentassa bhājanagaṇanāya sambhavantiyo bahukāpi āpattiyo ekavatthukā eva honti, evaṃ sappibhojanameva bahūsu ṭhānesu viññāpetvā ekato vā visuṃ visumeva vā bhuñjantassa āpattiyo ekavatthukā evāti daṭṭhabbā.
បាឡិយំ ឯកវាចាយ ទេសេយ្យ, វុត្តា អាទិច្ចពន្ធុនាតិ ឯត្ថ ‘‘ទេសេយ្យាតិ វុត្តា’’តិ ឥតិ-សទ្ទំ អជ្ឈាហរិត្វា យោជេតព្ពំ។ ឯវំ សេសេសុបិ។
Pāḷiyaṃ ekavācāya deseyya, vuttā ādiccabandhunāti ettha ‘‘deseyyāti vuttā’’ti iti-saddaṃ ajjhāharitvā yojetabbaṃ. Evaṃ sesesupi.
ភេទានុវត្តកានន្តិ ឯត្ថ អាទិ-សទ្ទោ លុត្តនិទ្ទិដ្ឋោ។ យាវតតិយកា ច សព្ពេ ឧភតោវិភង្គេ អាគតា, សង្ឃាទិសេសសាមញ្ញេន ឯកំ, បាចិត្តិយសាមញ្ញេន ច ឯកំ កត្វា ‘‘យាវតតិយកេ តិស្សោ’’តិ វុត្តន្តិ ទដ្ឋព្ពំ។ ឯត្ថ ច ញត្តិយា ទុក្កដំ, ទ្វីហិ កម្មវាចាហិ ថុល្លច្ចយាបិ សន្តិ ឯវ។ តានិ មាតិកាយ ន អាគតានិ។ មាតិកាគតវសេន ហេត្ថ ‘‘តិស្សោ’’តិ វុត្តំ។
Bhedānuvattakānanti ettha ādi-saddo luttaniddiṭṭho. Yāvatatiyakā ca sabbe ubhatovibhaṅge āgatā, saṅghādisesasāmaññena ekaṃ, pācittiyasāmaññena ca ekaṃ katvā ‘‘yāvatatiyake tisso’’ti vuttanti daṭṭhabbaṃ. Ettha ca ñattiyā dukkaṭaṃ, dvīhi kammavācāhi thullaccayāpi santi eva. Tāni mātikāya na āgatāni. Mātikāgatavasena hettha ‘‘tisso’’ti vuttaṃ.
សង្ឃាទីហីតិ សង្ឃគណបុគ្គលេហិ ការណភូតេហិ។ អព្ភុណ្ហសីលោតិ បរិសុទ្ធភាវូបគមនេន អភិនវុប្បន្នសីលោ។ អភិនវុប្បន្នញ្ហិ ‘‘អព្ភុណ្ហ’’ន្តិ វុច្ចតិ, បរិសុទ្ធសីលោតិ អត្ថោ។ តេនាហ ‘‘បាកតិកោ’’តិ។
Saṅghādīhīti saṅghagaṇapuggalehi kāraṇabhūtehi. Abbhuṇhasīloti parisuddhabhāvūpagamanena abhinavuppannasīlo. Abhinavuppannañhi ‘‘abbhuṇha’’nti vuccati, parisuddhasīloti attho. Tenāha ‘‘pākatiko’’ti.
‘‘កោសម្ពកក្ខន្ធកេ វុត្តានិសំសេ’’តិ ឥទំ កោសម្ពកក្ខន្ធកេ ‘‘សចេ មំ ឥមេ ភិក្ខូ អាបត្តិយា អទស្សនេ ឧក្ខិបិស្សន្តិ, ន មយា សទ្ធិំ ឧបោសថំ ករិស្សន្តី’’តិអាទិនា អាបត្តិយា អទស្សនេ អាទីនវំ ទស្សេត្វា បរេសម្បិ សទ្ធាយ អាបត្តិទេសនាវិធានមុខេន សាមត្ថិយតោ បកាសិតោ។ ឯកតោ ឧបោសថករណ, បវារណាករណ, សង្ឃកម្មករណ, អាសនេនិសីទន, យាគុបានេនិសីទន, ភត្តគ្គេនិសីទន, ឯកច្ឆន្នេសយន, យថាវុឌ្ឍអភិវាទនាទិករណសង្ខាតេ អដ្ឋានិសំសេ សន្ធាយ វុត្តំ។
‘‘Kosambakakkhandhake vuttānisaṃse’’ti idaṃ kosambakakkhandhake ‘‘sace maṃ ime bhikkhū āpattiyā adassane ukkhipissanti, na mayā saddhiṃ uposathaṃ karissantī’’tiādinā āpattiyā adassane ādīnavaṃ dassetvā paresampi saddhāya āpattidesanāvidhānamukhena sāmatthiyato pakāsito. Ekato uposathakaraṇa, pavāraṇākaraṇa, saṅghakammakaraṇa, āsanenisīdana, yāgupānenisīdana, bhattaggenisīdana, ekacchannesayana, yathāvuḍḍhaabhivādanādikaraṇasaṅkhāte aṭṭhānisaṃse sandhāya vuttaṃ.
ចតុន្នន្តិ វិនយបិដកេ អាគតានំ វសេន វុត្តំ។ កតមា បន សាតិ សា ចតុព្ពិធា អច្ចយទេសនា កតមាតិ អត្ថោ។ អភិមារានន្តិ មារណត្ថាយ បយោជិតធនុគ្គហានំ។ ឧបដ្ឋាយិកាយាតិ សហសេយ្យសិក្ខាបទវត្ថុស្មិំ អាគតាយ។
Catunnanti vinayapiṭake āgatānaṃ vasena vuttaṃ. Katamā pana sāti sā catubbidhā accayadesanā katamāti attho. Abhimārānanti māraṇatthāya payojitadhanuggahānaṃ. Upaṭṭhāyikāyāti sahaseyyasikkhāpadavatthusmiṃ āgatāya.
អដ្ឋន្នំ ភិក្ខុនីនន្តិ ថេរាសនតោ បដ្ឋាយ អដ្ឋហិ ភិក្ខុនីហិ ឥតរាយ អាគតាយ វុឌ្ឍាយ ភិក្ខុនិយា អាសនំ ទាតព្ពំ។ អដ្ឋន្នំ បន ភិក្ខុនីនំ នវកាយ អាគតាយ អទាតុម្បិ វដ្ដតិ។ តាយ បន សង្ឃនវកាសនេ លទ្ធោកាសេ និសីទិតព្ពំ។ អថ វា អដ្ឋន្នំ វុឌ្ឍានំ ភិក្ខុនីនំ ឥតរាយ នវកតរាយ អាសនំ ទាតព្ពំ។ កម្មានិ នវាតិ ឱសារណាទីនិ នវ ឯវ។
Aṭṭhannaṃ bhikkhunīnanti therāsanato paṭṭhāya aṭṭhahi bhikkhunīhi itarāya āgatāya vuḍḍhāya bhikkhuniyā āsanaṃ dātabbaṃ. Aṭṭhannaṃ pana bhikkhunīnaṃ navakāya āgatāya adātumpi vaṭṭati. Tāya pana saṅghanavakāsane laddhokāse nisīditabbaṃ. Atha vā aṭṭhannaṃ vuḍḍhānaṃ bhikkhunīnaṃ itarāya navakatarāya āsanaṃ dātabbaṃ. Kammāni navāti osāraṇādīni nava eva.
បាចិត្តិយវណ្ណនា និដ្ឋិតា។
Pācittiyavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ៣. បាចិត្តិយំ • 3. Pācittiyaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / (៣) បាចិត្តិយវណ្ណនា • (3) Pācittiyavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បាចិត្តិយវណ្ណនា • Pācittiyavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បាចិត្តិយវណ្ណនា • Pācittiyavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / (៣) បាចិត្តិយវណ្ណនា • (3) Pācittiyavaṇṇanā
